<a href="https://kyzylorda-news.kz/">Kyzylorda-news.kz.</a> Отбасы – мемлекеттің басты құндылығы әрі адамзат баласының бойына ұлттық тәрбиені, адамгершілік қасиетті дарытудың негізгі діңгегі болып саналады. Соңғы уақытта қоғамда отбасындағы бала тәрбиесі, ата-ананың жанұядағы рөлі мен жауапкершілігі туралы сан алуан пікірлер талқыға салынуда. Соның бірі – бала тәрбиесі. Ақпараттық ағын жан-жаққа қаратпай қатты ағыспен ағып жатқанда психологиясы енді қалыптасып жатқан баланы одан арашалап қалу әлбетте қиын. Ал бұл тұрғыда әке-шешенің балаға дұрыс көңіл бөлуі қаншалықты маңызды? Бүгін Өңірлік коммуникациялар қызметінің ақпарат алаңында аталмыш мәселеге қатысты брифинг өтіп, отбасы құндылығы туралы сөз етілді.<blockquote>«Біздің өңірімізде 25-тен аса үкіметтік емес ұйым мен аналар кеңесі бар. Бұл ұйымдар отбасы саясаты мен аналар институтын қалыптастыруда ауқымды жұмыстар атқарып келеді. ҚХА жанындағы Аналар кеңесі мен әйелдер істері және отбасылық-демографиялық саясат жөніндегі комиссия отбасындағы ана мен әкенің рөлі, бала тәрбиесі туралы негізгі шараларды белсенді қолға алуда. Өздеріңіз білетіндей, отбасындағы береке-бірлік бұл – еліміздің бірлігінің бекемдігін айғақтайды. Сол үшін отбасы институтын қалыптастыруда аталмыш ұйымдардың жұмысы аса маңызды», - деді Әйелдер істері және отбасылық-демографиялық саясат жөніндегі комиссия хатшысы Қаламқас Каримова.</blockquote>Бүгінде отбасы құндылығын кеңінен насихаттау және үлгілі жанұяларды қоғамда дәріптеу мақсатында қала және барлық аудандарда ҚХА жанындағы аналар кеңесі жұмыс істеуде. Аналар кеңесінің негізгі міндеті – ата-анамен бала арасындағы қарым-қатынасты дамыту, ана болу институтын қалыптастыру және жанұядағы ұлттық салт-дәстүрлерді нығайту болып табылады.&nbsp;<blockquote>«Соңғы уақытта көп отбасыларда кездесетін мәселелер - жасөспірімдер арасындағы тәртіпсіздіктің көбеюі, ата-ана жауапкершілігінің төмендеуі, енді ғана жанұя құрған жастардың лезде ажырауы, келін мен ененің арасындағы дау ушығып барады. Жалпы отбасындағы мәселенің дұрыс шешім табуы тікелей ата-анаға байланысты. Өйткені, әкенің жанұя алдындағы өз жауапкершілігі бар, ананың өзі орындайтын міндеті бар. Мұны дұрыс үйлестіріп отыру ер мен әйелге байланысты. Ал бала тәрбиесіне әке мен ана теңдей жауапты. Қазіргі таңда білім ошақтарында жас балалар электронды шылым шегуге әуестеніп барады. Ал баланың осындай зиянды қылыққа бой алдырғанын ата-ана білмеуі мүмкін. Осы мәселеге байланысты біздің аналар кеңесі әлеуметтік желілерде ата-аналармен байланысып, дүкендерде жасөспірімдерге электронды шылымдарды сатуға тыйым салатын шараларды қолға алды. Бұдан бөлек, біздің ұйым мектептер мен колледждерде ғана емес, ата-анамен жасөспірімдерді жалпы қамтитын ауқымды іс-шаралар мен жиындар ұйымдастыруда. Онда қажетті мамандардың кеңесін алып, өздерін толғандырған мәселелерін ортаға салады. Мұндай іс-шараларды жиі-жиі өткізіп тұруымыз керек», - деді Қазақстан халқы ассамблеясы жанындағы облыстық Аналар кеңесінің төрайымы Нұрсәуле Мұсаева.</blockquote>

Қаламқас Каримова: Қызылордада 25-тен аса үкіметтік емес ұйым мен аналар кеңесі бар

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің мұғалімдері Вера Кораблева мен Жасұлан Сапарбаев сертификатталған STEAM тренері мәртебесіне ие болды.&nbsp;NIS педагогтері Қазақстанда STEAM білім беруді дамытудың жол картасы шеңберінде «Jana Talap: STEAM пәндерін оқытуда құзыреттіліктерді дамыту» атты біліктілікті арттыру курсын сәтті аяқтады.&nbsp;144 сағатты қамтитын курста еліміздің 50-ге жуық мұғалімі оқыту үдерісінде STEAM білім беруді қолдану әдістері мен қағидаларын үйреніп, өз оқу бағдарламаларын әзірлеуге дағдыланды.&nbsp;<blockquote>«STEAM — оқытудың интеграцияланған және пәнаралық тәсілі. Бұл бағдарлама оқушыларға ғылым, технология, инженерия, өнер және математиканы кіріктіріп оқытуды мақсат етеді. 3 айға созылған курста отандық және шетелдік тәжірибелермен танысып, педагогикалық құзыреттіліктерімізді дамыта алдық. Инженерлік дизайн, проблемалық оқыту бөлімдерін жан-жақты қарастырып, білімімізді арттырдық», – дейді сертификат иесі Жасұлан Сапарбаев.&nbsp;</blockquote>Мичиган мемлекеттік университетінің оқытушылары мен әлемдік білім саласының сарапшыларынан дәріс алған педагогтер алдағы уақытта аймақтағы жалпы білім беретін мектеп мұғалімдерімен тәжірибе алмасатын болады.&nbsp;&nbsp;

Қызылордалық мұғалімдер республикалық STEAM тренері атанды 

<a href="https://kyzylorda-news.kz/">Kyzylorda-news.kz.</a> Бүгін Қызылорда облыс әкімінің орынбасары Нұрымбет Сақтағановтың төрағалығымен облыс әкімдігі жанындағы мемлекеттік рәміздер жөніндегі комиссия отырысы өтті.&nbsp;Күн тәртібінде мемлекеттік рәміздердің насихатталуы және қолданылу жай-күйіне облыстық инспекциялық топтың тексеру қорытындысы, облыстық білім басқармасына қарасты мекемелердегі және Арал, Қазалы аудандарындағы мемлекеттік рәміздердің қолданылуы мен насихатталуы жайында мәселелер қаралды.&nbsp;<blockquote>«Мемлекеттік рәміздер – Тәуелсіздігіміздің басты құндылығы әрі ажырамас бөлігі. Халқымыздың бірлігі мен тұтастығын, азаматтық бірегейлігін бейнелейтін атрибуттардың бірі. Сондықтан, әрбір азамат Мемлекеттік рәміздерді құрметтеуге, қадірлеуге міндетті. Өздеріңіз білесіздер, облыстық инспекциялық топ жылына 2 рет рәміздердің пайдаланылуы мен қолданылуына зерделеу жұмыстарын жүргізіп келеді», - деді Нұрымбет Аманұлы.&nbsp;</blockquote>Кеңесте облыстық қоғамдық даму басқармасының басшысы Алмасбек Есмаханов облыстық инспекциялық топтың аймақтағы 241мемлекеттік мекемеге зерделеу жұмыстарын жүргізгенін айтты.&nbsp;Сондай-ақ облыстық білім басқармасына қарасты мекемелерде мемлекеттік рәміздердің пайдаланылуы мен насихатталу барысы туралы басқарма басшысының орынбасары Әзизбек Ізімбетов және Арал, Қазалы аудандарындағы мемлекеттік рәміздердің қолданылуы мен насихатталуы бойынша аудан әкімнің орынбасарлары К.Бержанов, Д.Тлеумбетов баяндама жасады.&nbsp;Жиын соңында отырыста қаралған мәселелерге орай комиссия мүшелері өздерінің ұсыныс-пікірлерін ортаға салды. Сонымен қатар комиссия төрағасы Нұрымбет Аманұлы мемлекеттік мекемелерде мемлекеттік рәміздердің пайдаланылуын, қолданылуы мен орналастырылуын түсіндіру бойынша жаднамалар, инфограммалар, буклеттер, флаерлер әзірленуін және мемлекеттік рәміздердің стандартқа сай болуын қадағалап, оларды ауыстыру үшін мемлекеттік тапсырыс аясында уақытылы қаражаттың бөлінуі қажет екенін айтып, нақты тапсырмалар жүктеді.<img src="https://knadmin.beoblood.kz/uploads/348811778_680390250483449_4920227846867750801_n_67394b817b.jpg" alt="348811778_680390250483449_4920227846867750801_n.jpg">

Қызылордада мемлекеттік рәміздер жөніндегі комиссия отырысы өтті

<a href="https://kyzylorda-news.kz/">Kyzylorda-news.kz.</a> Елді мекендердің тіршілігін нарыққа бейімдеу керек. Мәселен, Қармақшы ауданына қарасты қоңсы қонған Ақтөбе ауылында құс фабрикасын іске қосу жоспарлануда. Жылына 1500 тонна құс етін өндіретін құс фабрикасы құрылысы біршама жұмыс атқарды.&nbsp;Мемлекеттік бағдарламалар, кәсіпке байланысты жаңадан шығып жатқан өзгеріс туралы мониторинг жасап отырғаны өзіне пайдалы болмақ. Кәсіпкер болу оңай емес әрине. Алайда кәсіпкер өзін ғана жұмыспен қамтып қоймай, өзге де адамдарға жұмыс береді. Кәсіпкер болу – жергілікті жердің экономикасының жетілуіне, халықтың әл-ауқатын көтеруге мүмкіндік беретін үлкен қозғаушы күш.Ақтөбе ауылында құс фабрикасын іске қосу жоспарлануда. Жылына 1500 тонна құс етін өндіретін құс фабрикасы құрылысы біршама жұмыс атқарды. Кәсіпорынның іске қосылуы ауданда азық-түлік өндірісін дамытуға, жаңа жұмыс орындарын ашуға, сонымен қатар жем қорын дайындауға, қажетті дақылдар егіп, көлемін арттыруға, сол арқылы егіс саласын әртараптандыруға ықпалын тигізеді. Мәселен, кешенді нысанның жұмысы үшін құс азығына күніне 20-22 тонна дақыл керек. Айына 600 тонна құс жемінің қажеттілігі туындайды. Әдетте құс шаруашылығына соя, зығыр, жүгері секілді өнімдер қажет. Фабрика пайдалануға берілгеннен кейін солай жеммен қамтамасыз ету мәселесі өздігінен туындайды. Сондықтан серіктестік құрамы жем зауытын салуды қолға алған. Бұл жоба жем дайындауға қажетті дақылдарды егуге де жол ашады. Ал серіктестік төрағасы Нұрлан Іздібаевқа құс фабрикасын салу туралы идея шаруашылыққа инкубатор алу ниетінен басталған.<blockquote>«Жылына 1500 тонна құс етін өндіретін өндірістің болашағынан зор үміт күтудеміз», – дейді кәсіпкердің өзі.&nbsp;</blockquote>Негізгі бағыты бройлер балапандарын өсіру және құс етін өндіру. Жобаның жалпы құны 1,9 млрд &nbsp;теңгені құрайды екен. Серіктестік басшысы Нұрлан Іздібаевтың айтуынша, бройлерден неғұрлым сапалы ет алынады.<blockquote>«Құс еті мен жұмыртқасының адам ағзасына тигізер пайдасы мол. Бір ғана жұмыртқаның өзінде 13 түрлі витамин болса, олардың барлығының да адамның өсіп қалыптасуына, ми қызметінің дамып, көздің көру қабілетіне тигізер әсері зор. Бүгінде ішкі нарықта сырттан тасымалданатын құс еті мен жұмыртқасы дүкен сөресін толтыруда. Құс фабрикасының ашылуы, сонымен бірге халықты жұмыспен қамтып, әл-ауқатын түзеуге де сеп болмақ. Ауданымызда ашылатын құс фабрикасы аудан көлемінде ғана емес облыс, республика деңгейінде халық сұранысын қанағаттанадырады деген сенім бар. Ал, ұсақ құс өсірумен айналысатын жеке кәсіпкерлер қазіргі таңда тек құс жұмыртқасын нарыққа ұсынып, халықты сапалы жұмыртқамен қамтуда. Ауданда тауық, үйрек, қаз секілді құстың үш түрінің жұмыртқалары өндіріледі», – дейді Қармақшы аудандық ауылшаруашылығы бөлімінің мамандары.</blockquote>Мемлекет басшысы Жолдауында шағын және орта кәсіпкерлікті дамыту еліміздің әлеуметтік-экономикалық және саяси өмірінде маңызды рөл атқаратынын атап өтті. Индустрияландыру бағдарламасының екінші бесжылдығы аясында құрылысы басталған «Қармақшы құс» фабрикасының құрылысы аяқталуға жақын. Жобаның жалпы құны 1,9 млрд теңгені құрайды. Егер құс фабрикасы іске қосылған жағдайда 70-ке дейін жұмыс орыны ашылып, жергілікті жұмыссыз азаматтарды тарту көзделуде.Аталған қаржыға құс фабрикасының әкімшілік және бақылау-өткізу пунктінің, 6 құс цехының және инкубациялық цехтың құрылыс жұмысы, құс сою цехының металл конструкциялық жабынын монтаждау жұмыстары жүргізіліп, құс фабрикасының аумағы қоршалған. Сондай-ақ, 2021 жылы құс фабрикасын іске қосу мақсатында «Бизнестің жол картасы – 2025» бағдарламасы аясында электр және сумен жабдықтау желілері, кәріз су желілерін жүргізу үшін 400 миллион теңгеге жуық қаржы қаралып, тиісті жұмыстар атқарылған.Құс алып оны баптаған әлдеқайда тиімді. Мәселен, сырттан импортталған тауық етін алайық. Дүкен сөрелерінде толып тұр. Қайдан келгенін де білмейміз. Ал бағасы көңілге қонымсыз. Біреуін алсаң күнделікті ас мәзіріне жетпейді. Себебі, тұла бойы мұз. Мұз болған соң салмағы да ауыр болады. Пісіргенде әлгіндегі майлы еті «піш» болып қалады. Неге? Ең алдымен салмағынан ақы жеу үшін етке ауа мен су айдайды. Солай шығынға қалай батып жатқанымызды білмей де қаламыз. Егер сол құсты өзіміз өсіріп, баптасақ ше? Бір тауықтың өзі кем дегенде күніне 1 рет жұмыртқалайды. Бұл қалтаңызда аз да болса ақша қалды деген сөз. «Ақша тиыннан құралады» демекші, ақырындап құс санын арттырса. Кәсіптің көзін шағыннан бастап, оны дөңгелетіп әкетсе қандай ғажап.Алдағы уақытта Қармақшы ауданында кәсіпкерлік салада бірқатар ірі жобаларды іске қосу жұмыстары тұр. Соның ішінде «Ақтөбе ауылдық округінінен «Қармақшы құс» ЖШС-нің құс фабрикасын маусым-шілде айларында іске қосу жоспарлануда.Қармақшы – аграрлы өлке. Өндірісі өрісті, алқабы ырысты, қамбасы күрішті өңірдің өркендеу жолында атқарылып жатқан жұмыстары аз емес. Ал құс өндіру қолға мықтап алынған. Тек іске қосып, нәтижесін көру ғана қалды.

Ақтөбе ауылындағы құс фабрикасы биыл іске қосылмақ

<a href="https://kyzylorda-news.kz/">Kyzylorda-news.kz.</a> Биылдан бастап кәсібі бар немесе кәсіп бастағысы келіп жүрген жастарға жылдық 2,5 процентпен микронесие берілетіндігін жаңалықтардан естіп, біліп жүрміз. Бірақ жастардың дені бұл жаңалықты естігенімен шағын несиенің берілу шарттарын жете біле бермейді. Осы орайда Қазалы аудандық жастар ресурстық орталығы сала мамандарымен бірлесе бағдарламаның тетігін түсіндіруді қолға алып, насихат жұмыстарын бастап кетті.Жастар ресурстық орталығы, аудандық жұмыспен қамту, сондай-ақ кәсіпкерлік палата мамандарының қатысуымен кенттегі бірнеше мектептің, аурухананың, өндірістік мекемелердің жастарымен кездесу ұйымдастырылып, 2,5 проценттік жеңілдетілген несиенің талаптары және берілу бағыттары бойынша түсіндірме жұмыстары үздіксіз жүргізілуде.<blockquote>«Мемлекет басшысы халыққа арнаған Жолдауында жастарды қолдау басты мақсатқа айналу керектігін айтқан еді. Біз соның аясында жұмыс жасап жатырмыз. Жастар мемлекет тарапынан беріліп жатқан мүмкіндікті тиімді пайдалану үшін насихат шараларын кең көлемде ұйымдастырудамыз. Себебі көпшілігі маңызды жобалардан қалыс қалып жатыр. Сондықтан біз мемлекеттік бағдарламалар мен бастамалар туралы ақпарат беріп, хабарлап отыру мақсат тұттық. Осы сынды және өзге де жүзеге асырылып жатқан жобалардың бар екендігін жастарға тұрақты түрде түсіндіре алсақ, олар кәсіпкерлікке бет бұрса, біздің миссиямыздың орындалғаны», – дейді орталық маманы Азамат Алпамыс.</blockquote><blockquote>«Мұндай жобалар жастарға керек-ақ. Көбісі кәсіпті неден, қалай бастарын білмейді. Ал осындай шағын несие жастардың бастамасы үшін үлкем көмек бола алады. Себебі проценттік мөлшері төмен. Бұл жаңа басталған кәсіп үшін тиімді болмақ. Сондықтан жастар берілген мүмкіндікті барынша пайдалануы керек деп ойлаймын»,– дейді Айжан есімді бойжеткен.</blockquote>Айта кетейік, 2,5 проценттік жеңілдетілген несие 2021-2025 жылдарға арналған кәсіпкерлікті дамыту жөніндегі ұлттық жоба шеңберінде жүзеге асырылуда. Жоба аясында кәсіпкерлікті бастағысы келететін немесе кәсіпкерлікпен айналысатын 21 мен 35 жасқа дейінгі жастарға шағын несие беру көзделген.

Қазалыда жеңілдетілген несие жайы жан-жақты түсіндірілді

<a href="https://kyzylorda-news.kz/ru">Kyzylorda-news.kz.</a> Елімізде жастарды жалпы қоғамдық үдерістерге қосу мақсатында ынталандыру жұмыстары іске асырылып, олардың өзін-өзі жүзеге асыруы үшін мемлекеттік деңгейде жағдай жасалуда. Аудан көлемінде өз жұмысын бастаған жастар еңбек бригадаларының құрылуы сөзімізді дәлелдей түседі.Мемлекет басшысы Қ.Тоқаев «Елімізде еңбекқор адам, кәсіби маман – ең сыйлы адам болуы тиіс» деп атап өткен еді. Расында да қай қоғамда, қай заманда болмасын, аяғы қимылдағанның аузы қимылдайтыны және бар.«Нағыз жаза – жұмысқа салу емес, нағыз жаза – жұмыссыз қалу шығар» дейді екен Қадір Мырзаәлі ақын. Еңбекпен есейген Сыр жастары да жан-жақты еңбекке араласып, ебін тауып, халыққа да пайдалы жұмыс жасауда. Қазіргі таңда белең алып тұрған жұмыссыздық мәселесін азайту мақсатында ауданға қарасты ауылдық округтерде арнайы жастар еңбек бригадалары құрылды. Аудан әкімінің қолдауымен бүгінде қызу еңбекке кіріскен жастар еңбектің нағыз ер етерін біледі.<blockquote>Қазіргі уақытта белең алып тұрған жастар арасындағы жұмыссыздық мәселесін шешу, жастарды еңбекке баулу және NEET санатындағы жастардың санын азайту мақсатында бірнеше ауылдық округтерден жастар бригадалары құрылды. Аудан әкімі Берік Сәрменбаевтың тапсырмасына сәйкес еңбекпен айналысуға ниетті жастарды қолдау басты мақсаттардың бірі болып отыр. Жастар бригадаларына мемлекеттен уақытша жер беріліп, су айдайтын насос құру, қоршалау, егін науқанына дайындық жұмыстарына қолдау көрсетілуде. Аталған жастар бригадаларында жұмыссыз жастар еңбекпен қамтылуда. Бригада мүшелері ауылдық округтерден алыс емес өңірлерде бақша дақылдарын яғни картоп, қауын, қарбыз және жүгері егуді жоспарлап отыр, – дейді жастармен жұмыс жүргізіп жүрген аудандық жастар ресурстық орталығының директоры Нұрман Абдрасилов.</blockquote>Еңбек бригадасы құрамында жұмыс жасауға ниетті ауыл жастары үшін егістік жерді егін егуге дайындау, су айдайтын насос беру, келісім арқылы жер беру және қоршау жұмыстары ауыл жастары үшін тегін жүргізіледі. Сондай-ақ жас еңбеккерлер тәжірибе жинақтау мақсатында Жаңақорған ауданы, Жайылма ауылдық округіне арнайы барып, ерте көктемде егін ша¬руашылығының қарқын алуы үшін біліктіліктерін арттырып қайтты. Өндірістің ең маңызды саласы саналатын ауыл шаруашылығын дамыту мақсатында атқарылып жатқан игі істерге аудан әкімдігі, аудандық ауыл шаруашылығы және жер қатынастары бөлімі мен шаруашылық құрылым-дары, ауылдық округ әкімдігі қолдау көрсетуде.Айта кетейік, қазіргі таңда аудан бойынша жеті ауылдық округте жастар еңбек бригадалары құрылып, онда 150 жас жұмыспен қамтылған. Бригада мүшелері қоғамдық өмірден де тыс қалдырылмайтын болады. Олар түрлі іс-шараларға тартылып, сонымен қатар өз өнімдерін облыстық, аудандық көрме-жәрмеңкелерде ұсынуына жағдай да жасалмақ. Бүгінгі таңда дала еңбеккерлеріне 40 гектар жер беріліп, 15 гектарға бақша дақылдары, қалған аумаққа картоп орналастырылуда.&nbsp;

Сырдарияда еңбек бригадасында 150 жас жұмыспен қамтылған

<a href="https://kyzylorda-news.kz/">Kyzylorda-news.kz.</a> Қазақстан Республикасының еңбек сіңірген жаттықтырушысы Әділбек Үргенішбайұлы Серікбаевты еске алуға арналған 2006-2007 жылы туылған жасөспірімдер арасында самбодан республикалық турнир өз мәресіне жетті.Республикалық турнирге 13 команда 150-ге спортшы қатысты, атап айтар болсақ Атырау облысы, Ақтөбе облысы, Шымкент қаласы, Жамбыл облысы, Түркістан облысы, Павлодар облысы, Тәжікстан, Қызылорда қаласы және Қызылорда облысының аудандырынан құралған спортшылар келіп қатысты.Спорттық іс-шараның негізгі мақсаты Қазақстан Республикасының еңбек сіңірген жаттықтырушысы Әділбек Серікбаевты еске алу, облыс көлесінде самбо күресін дамыту, салауатты өмір салтын насихаттау, спортшыларды достыққа, патриоттық сезімге тәрбиелеу болып табылады.Республикалық турнирге жерлестеріміз қатысып жеңіс төрінен көрінді. Атап айтар болсақ, турнир қорытындысымен:42 кг салмақ дәрежесінде:ІІІ орын – Әлманбет Ерсұлтан (Қармақшы ауданы)ІІІ орын – Сапабеков Шыңғыс (Байқоңыр қаласы)ІІ орын – Темірбекұлы Бағдәулет (Қызылорда қаласы)І орын – Тұрсынбек Бекжан (Қызылорда қаласы)46 кг салмақ дәрежесінде:ІІІ орын – Ібіраш Мағжан (Қармақшы ауданы)ІІІ орын – Сейтхан Мадияр (Қызылорда қаласы)ІІ орын – Жиенбаев Нұрислам (Қызылорда қаласы)І орын – Өмірбек Арман (Ақтау қаласы)49 кг салмақ дәрежесінде:ІІІ орын – Зайдуллай Сафарали (Тәжікстан)ІІІ орын – Азим Елдос (Жамбыл облысы)ІІ орын - Темірбекұлы Құдайберген (Қармақшы ауданы)І орын – Егімбай Әділет (Орал облысы)53 кг салмақ дәрежесінде:ІІІ орын – Аралбек Айдос (Қармақшы ауданы)ІІІ орын – Қанибеков Мирас (Қармақшы ауданы)ІІ орын – Құлжанов Бекзат (Жамбыл қаласы)І орын – Орысбайұлы Ғани (Ақтау облысы)58 кг салмақ дәрежесінде:ІІІ орын – Есембай Қосымбек (Ақтау облысы)ІІІ орын – Кодиров Бободжан (Тәжікстан)ІІ орын – Джингазаев Сержан (Ақтау облысы)І орын – Бауыржанұлы Шейхрахман (Қызылорда қаласы)64 кг салмақ дәрежесінде:ІІІ орын – Қылышбеков Нұрасыл (Байқоңыр қаласы)ІІІ орын – Пернебай Нұркелді (Жамбыл облысы)ІІ орын – Кеңес Нұрсұлтан (Қызылорда қаласы)І орын – Жасұлан Амандық (Орал облысы)71 кг салмақ дәрежесінде:ІІІ орын – Тұрақбаев Сұңғат (Ақтау облысы)ІІІ орын – Жұмақожа Мирас (Жаңақорған ауданы)ІІ орын – Өтеген Архат (Орал қаласы)І орын – Мұрат Ықылас (Ақтау облысы)79 кг салмақ дәрежесінде:ІІІ орын – Нуркабаев Ермек (Қостанай облысы)ІІІ орын – Куликенов Алихан (Қостанай облысы)ІІ орын – Ғалымжанұлы Ерасыл (Шымкент қаласы)І орын – Рохманов Шохангер (Тәжікстан)88 кг салмақ дәрежесінде:ІІІ орын – Әділбек Исламбек (Тасбөгет)ІІІ орын – Серікұлы Берік (Жаңақорған ауданы)ІІ орын – Сейдалыұлы Асылжан (Қармақшы ауданы)І орын – Ізбасар Алданазар (Қызылорда облысы)+88 кг салмақ дәрежесінде:ІІІ орын – Қозыбақов Адиль (Павлодар облысы)ІІІ орын – Дарханбеков Рахат (Қызылорда облысы)ІІ орын – Дәулетұлы Ерасыл (Шымкент қаласы)І орын – Сұлтан Бейбарыс (Қызылорда қаласы)

Қармақшыда самбодан өткен республикалық турнир аяқталды

<a href="https://kyzylorda-news.kz/">Kyzylorda-news.kz.</a> Спорт – денсаулық кепілі. Қашанда осы қағиданы ұстанған қазалылықтар спорттың қай саласында болмасын түрлі жарыстар өткізуді әдетке айналдырған. Қазақстан ғана емес әлемге аты таныс спортшылар туған өлкеде спортқа жаны құмар жастар өсіп келеді. Олардың бірі футболды таңдаса, енді бірі боксты жанына серік еткен. Ал бүгінгі ойын өрнеге тіптен бөлек. Қасиетті Қазалы жеріне облыстың түкпір-түкпірінен жиналған талапкерлер волейболдан бақ сынады.&nbsp;Қашақбай Пірімов ауылында Қазалы ауданының еңбек ардагері Нартай Кәдірұлын еске алуға арналған волейболдан облыстық ашық турнир басталды.Ең алдымен көпшілікке жарысқа қатысушы барлық командалар таныстырылды. Олардың қатарында Қызылорда қаласы, Жаңақорған, Шиелі, Сырдария, Арал, Қазалы аудандары және Құмжиек ауылы мен ардагерлер құрамалары бар. Турнирді аудан әкімі Мұхтар Оразбаев ашып, спортшыларға сәттілік тіледі.<blockquote>«Қазақ халқы қашанда елдік пен ерлікті ұлықтай білген. Ел мерейін көтерген ерлерін құрметтеген. Оның дәлелі ретінде кеше ауданда еңбек ардагері Нартай Кәдірұлының ұрпақтары марқұмның рухына құран бағыштап, ас берді. Ал бүгін Қ.Пірімов ауылында волейболдан ауқымды турнир бастау алуда. Нартай ағамыздың жаны жәннаттық болсын. Жарысқа қатысушыларға сәттілік тілеймін! Тек мықтылар жеңіске жетсін», – деді аудан басшысы.&nbsp;</blockquote>Мұнан соң қонақтар Нартай Кәдірұлын 1 минут үнсіздікпен еске алды. Артынша көпшілік Қызылорда қаласы мен Құмжиек командасының ойынын тамашалады.

Еңбек ардагерін еске алуға арналған волейболдан облыстық ашық турнир өтті

<a href="https://kyzylorda-news.kz/">Kyzylorda-news.kz.</a> Биылғы оқу жылына 88 мың грант бөлінді. Бұл туралы ҚР Ғылым және жоғары білім вице-министрі Қуаныш Ерғалиев мәлім етті, деп хабарлайды <a href="https://www.inform.kz/kz/ubt-biylga-bolingen-grant-sany-belgili-boldy_a4069995">ҚазАқпарат</a>.Атап айтқанда, биыл 18 мамырда осы жылдағы негізгі ҰБТ басталды және ол 5 шілдеге дейін жалғасады.<blockquote>«Жалпы, ҰБТ-ға 166 мың талапкер өтініш тапсырды. Биыл Мемлекет басшысы Қасым-Жомарт Кемелұлы Тоқаевтың берген тапсырмасын орындауды жалғастырамыз. Бұл ретте гранттың 60 пайызы инженерлік-техникалық мамандықтарды қамтиды. Сондай-ақ, тығыз орналасқан, жаңа құрылған және батыс аймақтарындағы жастар үшін де арнайы грант бөлінген. 2023 жылы өңірлік ЖОО-ларға бөлінетін педагогикалық квота саны артып, 6280 грант бөлінді. Ал «Серпін» бағдарламасы бойынша 3653 грант бөлінді», - деді Қуаныш Ерғалиев.</blockquote>Оның айтуынша, «Серпін» бағдарламасы аясында жұмыс арқылы өтеу мерзімі биыл қысқарды. Бұрын 3 жыл болса, қазір 2 жылды құрап отыр. Сондай-ақ, грантты жұмыс арқылы өтеу оқыған аймақта ғана емес, бағдарлама аясында қамтылған басқа аймақтарға да баруға болады.<blockquote>«Білім беру гранттарының жалпы саны 88 мыңды құрады. Оның ішінде бакалавриатта оқу үшін 73 мың грант, магистратураға – 13 мың, докторантураға 1890 грант бөлініп отыр. Биыл грантқа құжаттарды қабылдау және оның иегерлерінің тізімін жариялау күндеріне қатысты өзгеріс болмайды. Яғни, 13-20 шілде аралығында грантқа құжаттарды қабылдауды, ал грант иегерлерінің тізімін 10 тамызға дейін жариялауды жоспарлап отырмыз. Жоғары орындарына қабылдау 25 тамызға дейін жүзеге асырылады», - деді вице-министр.</blockquote>

ҰБТ: Биылға бөлінген грант саны белгілі болды

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың «Жаңа Қазақстан жаңару мен жаңғыру жолы» атты Қазақстан халқына жолдауын кеңінен насихаттау, Тәуелсіздіктің қастерлі де, киелі ұғым екендігін, тәуелсіздіктің баянды болуы үшін ұлттық бірегейлік пен бірліктің маңыздылығын жастарға түсіндіру, тәуелсіздік жылдары өз мамандығының хас шебері атанып, еліміздің дамуына үлес қосып жүрген азаматтарды қоғамда кеңінен насихаттау, жастарға үлгі ету мақсатында «ҚР еңбек озаттарының алтын кітабы» атты республикалық патриоттық байқауы өтті.Екі кезеңнен тұратын байқауды Қазақстан Республикасы «Bilim-orkenieti» ұлттық инновациялық ғылыми-зерттеу орталығы ұйымдастырды. Оған Б.Қабылұлы атындағы мәдениет үйінің әдістемелік бөлім меңгерушісі Гүлшат Әбдімомынова қатысып, жеңімпаз атанған болатын. Марапаттау рәсіміне арнайы Астана қаласына барып қатысқан Гүлшат Шайзадақызы I дәрежелі дипломмен және ҚР Еңбек озаттарының алтын төсбелгісі, &nbsp;алтын кітабы, куәлік және құрмет грамотасымен марапатталды. Айта кетейік Г.Әбдімомынова бұған дейін «Бейбітшілік Әлемі» халықаралық қазақ шығармашылық бірлестігінің «Мәдениет майталманы» медалі және «Шиелі ауданына – 90 жыл» мерекелік медалімен, Қазақстандық салалық мәдениет, спорт, туризм және ақпарат қызметкерлері кәсіподағының «Еңбек даңқы» төсбелгісімен марапатталып, облыстық мәдениет басқармасының «Жарқын болашақ – бүгінгі білікті маман» атты үздіктерді насихаттайтын кітапқа енген. Одан бөлек көптеген республикалық, облыстық байқаулардың жүлдегері.Мәдениет қызметкерлері мерекесі қарсаңында мерейі үстем болған жерлесімізді марапатымен құттықтаймыз!

Мереке қарсаңындағы марапат

<a href="https://kyzylorda-news.kz/">Kyzylorda-news.kz.</a> Биыл қаладағы 26 көпқабатты тұрғын үйдің қасбеті заманауи панельдермен қапталады. Бүгінде бұл бағытта тиісті жұмыстар жүргізілуде.&nbsp;Игілікті бастаманы жергілікті кәсіпкерлер туған жерге тарту ретінде қолға алған. Олардың демеушілігімен жалпы ауданы 40 мың шаршы метр соңғы үлгідегі құрылыс материалдары қолданылмақ. Бұл өз кезегінде көпқабатты үйлерді жыл сайын әктеу, сырлаудан тыйып, қолайсыз ауа райынан қорғауға жақсы мүмкіндік. Сондай-ақ қала сәулетіне де ерекше көрік қосады.&nbsp;Осы орайда облыс әкімі кәсіпкерлермен кездесуде құрылыс жұмысынығ материалдың сапалы болуын қатаң тапсырған болатын. Сондай-ақ оларға алғысын білдірген еді.<blockquote>«Мемлекет басшысы Қасым-Жомарт Кемелұлы туған жеріне жанашырлықпен қарайтын кәсіпкерлерді патриотизм мен әлеуметтік жауапкершіліктің үлгісін көрсетіп, ел экономикасын дамытуға үлес қосуға шақырған болатын. Бұл жұмыстарға жергілікті кәсіпкерлер, Сыр топырағынан түлеген меценаттар белсенді араласуда. Олар қайырымдылық шараларына, атамекенін көркейтуге бар күш-жігерін салуда», – деді Нұрлыбек Машбекұлы.</blockquote>Бүгінде &nbsp;облыс әкімінің бастамасымен қаладағы 26 көпқабатты тұрғын үйдің қасбеті жаңғыртылуда. Оның ішінде Абай даңғылындағы №46, №54 және №62 үйлер, Сырдария шағын ауданындағы №1 және №2 тұрғын үйлердің сыртқы қасбетін әрлеу жұмыстары басталған. Сонымен қатар &nbsp;заманауи панельдермен қаптау жұмыстары Абай даңғылындағы №37, 39, 41, 43, 44, &nbsp;62 үй мен Мұратбаев көшесіндегі №17 үй, Сырдария шағын ауданындағы №1 және №2 тұрғын үйлерде жүргізілуде. Жаңғырту жұмыстары шілде айына дейін аяқталады деп күтілуде.

Қызылордада көпқабатты үйлер жаңа кейіпке енуде

<a href="https://kyzylorda-news.kz/">Kyzylorda-news.kz.</a> Қазалы ауданына қарасты Өркендеу ауылдық округінде «Ауылым – ақбоз мекенім» атты ауыл күніне арналған салтанатты шара өтті.Ауыл тұрғындарының қуанышымен бөлісуге арнайы келген аудан әкімі Мұхтар Оразбаев бірлігі бекем, тірлігі тиянақты &nbsp;ауыл жұртын мерекемен құттықтады.&nbsp;<blockquote>«Туған жер – адам баласының кіндік қаны тамған, жанына, жүрегіне жақын, қимас сезімге бөлейтін алтын ұясы. Ауылына елең етіп, мойын бұрмайтын адам кемде-кем. Жанкент ауылы - Түркі елдеріне ортақ тұлға Қорқыт бабамызбен әлемге «Екінші ұстаз» атанған Әбу Насыр Әл-Фараби бабамыз мекендеген киелі өлке. Мұндағы халықтың бірлігі бекем, тірлігі тиянақты. Баршаңызды бүгінгі ауыл күнімен шын жүректен құттықтаймын», - деген аудан басшысы ауылдың өсіп-өркендеуіне сүбелі үлес қосып жүрген бірқатар азаматтарды аудан әкімінің Алғыс хатымен марапаттады.&nbsp;</blockquote>Мұнан соң ардагерлер Өткелбай Жолмырзаев, Есенкелді Мәлиұлы және Аманжол Қалыбайұлы сөз алды. Сол секілді Жанкент ауылының қамқоршы қызы Сәрсенгүл Әлімжанқызы да жылы лебізін білдірді.&nbsp;Мерекелік бағдарлама аясында ауыл тұрғындары әртүрлі спорттық жарыстарды тамашалады. Мұнда жастар батпан көтеру, бағанаға өрмелеу, арқан тарту, ләңгі тебу, қой көтеру, қол күрес және грек-рим күресі бойынша өзара күш сынасты. Мерекелік шарада аудан және ауыл өнерпаздары өнер көрсетіп, жиналғандарға ерекше көңіл-күй сыйлады.Айта кетейік, кешкілік ауылда облыс және аудан өнерпаздарының қатысуымен концерт ұйымдастырылатын болады.

Қазақстан және Қызылорда облысының жаңалықтары