<a href="https://kyzylorda-news.kz/">Kyzylorda-news.kz</a> 2026 жылғы 16 наурыздағы жағдай бойынша Қазақстанда АИ-95 бензинінің бағасы шамамен литріне 0,51 доллар.&nbsp;Бұл әлемдік орташа көрсеткіштен&nbsp;шамамен үш есе төмен. &nbsp;Бұл туралы&nbsp;<a href="https://stan.kz/kazakstan-alemdegi-zhanarmay-bagasi-en-arzan-elderdin-k-432068/">Stan.kz&nbsp;</a>ақпарат агенттігі&nbsp;GlobalPetrolPrices сайтына сілтеме жасап хабарлайды.Әлемдік рейтингте Қазақстан тоғызыншы орында&nbsp;және жанармай бағасы қолжетімді елдер қатарында тұр. Бұл топқа рес­урсқа байлығы немесе субсидиялар арқылы жанармай бағасын төмен ұстайтын мемлекеттер кіреді: Ливия, Иран, Венесуэла, сондай-ақ Кувейт, Алжир, Түркменстан, Мысыр, Қатар, Сауд Арабиясы, Бахрейн және Оман.Бұл елдердің кейбірі жанармай бағасын минималды деңгейде ұстайды, бұл әлеуметтік саясаттың бір бөлігі ретінде қарастырылады. Сонымен қатар&nbsp;кей елдерде жанармай бағасын төмен ұстау үшін олардың экономикасы негізінен мұнай мен газ сияқты шикізатқа тәуелді болады. Егер шикізат бағасы құлдыраса, сол елдерде&nbsp;қиындық туады. Қазақстан бұл елдермен салыстырғанда тұрақтырақ көрінеді, бірақ бізде де бензин бағасын қалыптастыруда мемлекеттің шешімдері маңызды рөл атқарады. Яғни, бағаны нарық өзі емес, үкіметтің реттеуі де айтарлықтай әсер етеді.Экономисттердің айтуынша, ресурстардың бағасын ұзақ уақыт бойы төмен ұстау кейде “тәуелділік”&nbsp;тәрізді мінез-құлық&nbsp;қалыптастырады. Төмен бензин бағасы бірқатар жүйелік әсерге әкеліп соғады, олар&nbsp;бірден байқалмайды:<ul><li style="text-align:justify;">Біріншіден, бұл бюджетке және мұнай өңдеу секторына қысым жасайды. Төмен маржа модернизация мен инвестиция мүмкіндіктерін шектейді;</li><li style="text-align:justify;">Екіншіден, отын ішкі тұтыну көлемін арттырады. Бұл жолдардың жүктемесін, шығарындыларды көбейтеді және инфрақұрылымның тез тозуына себеп болады;</li><li style="text-align:justify;">Үшіншіден, көрші елдермен баға айырмашылығы пайда болады, бұл отынның заңды және заңсыз түрде елден шығарылуына итермелейді.</li></ul>Ұзақ мерзімді перспективада мұндай факторлар экономиканың жалпы тиімділігін төмендетуі мүмкін және жанармай бағасында тікелей көрінбейтін қосымша шығынңа әкеп соғады.Дамыған елдерде жағдай керісінше. Еуропа, Жапония және Оңтүстік Кореяда бензин бағасы айтарлықтай жоғары,&nbsp;көбіне&nbsp;литрі 3 доллардан асады.Бұл мемлекеттердің саясатына байланысты: жоғары баға салықтар арқылы қалыптасады, ал сол салықтар инфрақұрылымды дамытуға, экологиялық жобаларға және қоғамдық көлікті жетілдіруге жұмсалады. Сондықтан рейтингті зерттеген талдаушылардың айтуынша,&nbsp;дамыған елдедің экономикасында жанармайдың&nbsp;қымбат болуы айтарлықтай мәселе емес, керісінше реттеу мен тұрақты даму құралы ретінде қарастырылады.Қазақстан үшін жанармай&nbsp;бағасының төмен болуы әлі де маңызды әлеуметтік фактор. Осылайша логистика мен ауыл шаруашылығында бизнестің&nbsp;шығындары&nbsp;азаяды.&nbsp;Дегенмен, ел алдында саланың тиімділігін біртіндеп арттыру міндеті тұр. Бұл жанармайдың қолжетімділігі мен нарықтық механизмдер арасындағы тепе-теңдікті табуды қажет етеді.<blockquote>“Қазіргі&nbsp;модельді қысқа мерзімде сақтау мүмкін, бірақ ұзақ мерзімде баға қалыптастыруда икемдірек тәсіл қажет. Қазір Қазақстан ең қолжетімді бензині бар елдер қатарында, бұл айтарлықтай экономикалық артықшылық. Мұның бәрі күрделі реттеу жүйесінің нәтижесі&nbsp;және негізгі міндет –&nbsp;бұл артықшылықты экономикалық тиімділіктің төмендеуіне әкелмейтіндей ету”, –&nbsp;дейді сарапшылар.</blockquote>Фото: Нұрболат Нұржаубай

Қазақстан әлемдегі жанармай бағасы ең арзан елдердің қатарына енді

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың қатысуымен ІІ дәрежелі «Айбын» орденінің иегері, полиция аға лейтенанты Талғат Қозыбаевты еске алуға арналған республикалық турнирдің ашылу салтанаты өтті. Турнирдің ашылуына облыстық полиция департаментінің бастығы, полиция полковнигі Серік Ергешов, облыстық ішкі істер органдары мен Ұлттық Ұлан ардагерлері кеңесінің төрағасы Әмірбек Шаймағанбетов және Талғат Қозыбаевтың отбасы арнайы қатысты.Аудан басшысы бейбіт күннің батыры Талғат Қозыбаевтың өнегелі өмірі мен ерлігін атап өтіп, республикалық турнирге қатысушыларға сәттілік тіледі.<blockquote>– Халық даналығында «Ерлік ешқашан ұмытылмайды» деген нақыл бар. Қызмет бабында қайсарлықпен қаза тапқан батыр ұлымыз, полиция аға лейтенанты Талғат Қозыбаевтың есімі әркез жаңғырып тұрады. Өйткені, өз антына адал болған перзенттерін ел ешқашан ұмытпайды.Талғат Есентайұлы аудан орталығындағы №131 орта мектепте білім алып, Қарағанды қаласында заң факультетінде жоғары білім меңгерген. Болашағын құқық қорғау саласымен байланыстырған азамат ел тыныштығы жолында қызмет етіп, антына адал болды. Бейбіт күннің батыры Талғат Есентайұлы небәрі 25 жасында қылмыскердің қолынан қаза тапты. Ел тыныштығын қорғаудағы &nbsp;ерлігі үшін ІІ дәрежелі «Айбын» орденімен марапатталды. Оның ержүректігі мен табандылығы, азаматтылығы өскелең ұрпаққа өшпес үлгі-өнеге етілуде. Өзі қайтыс болған Тартоғай &nbsp;елді мекенінде және өзі туып өскен О.Мәлібаев мөлтек ауданындағы көшелерге батыр ұлдың есімі берілді. Қазақстан Республикасы Үкіметінің Қаулысымен өзі оқыған орта мектеп Талғат Қозыбаевтың есімімен аталады. &nbsp;Жыл сайын батыр ұлды еске алуға арналған казақ күресінен республикалық турнир өткізіліп келеді. Бұл турнир – тек спорттық дода ғана емес, батырларымыздың рухына тағзым, оның есімін ұрпақ жадында мәңгі қалдыру жолындағы игі шара, — деді Берік Әбдіғаппарұлы.</blockquote>Сонымен қатар, облыстық полиция департаментінің бастығы, полиция полковнигі Серік Ергешов, облыстық ішкі істер органдары мен Ұлттық Ұлан ардагерлері кеңесінің төрағасы Әмірбек Шаймағанбетов және батыр ұлдың әкесі Есентай Қозыбаев сөз сөйлеп, турнирдің мән-маңызына тоқталып, өтуіне атсалысқан азаматтарға алғыстарын білдірді. Арнайы "Алғыс хаттар" табыс етті.Жарысқа еліміздің түкпір-түкпірінен 200-ге жуық жас балуандар қатысып, өз шеберліктерін көрсетуде.<img src="https://knadmin.beoblood.kz/uploads/photo_output_40_e6e1cd022b.jpeg" alt="турнир">

Жас балуандар республикалық турнирде бақ сынады

<a href="https://kyzylorda-news.kz/">Kyzylorda-news.kz</a> “Евразия” спорт кешенінде велоспорттан Қазақстан Республикасы Кубогінің салтанатты ашылу рәсімі өтті. Жарыс бағдарламасына ерлер арасында көпкүндік дода, әйелдер арасында жекелей жарыс, сондай-ақ юниор ұлдар арасында «Критериум» бағдарламасы енгізілген.Салтанатты шараға облыстық дене шынықтыру, спорт және туризм басқармасының бөлім басшысы Сағидат Бертай, Қызылорда облысының велоспорт федерациясының президенті Рахат Ілияс, жарыстың бас төрешісі Алла Василенкова және спорт саласының ардагерлері қатысып, жарыс қатысушыларына сәттілік тіледі. Сондай-ақ, ашылу салтанатында велоспорттан ҚР спорт шебері атағын алған жас спортшылар марапатталды.&nbsp;Аталған жарысқа алғаш рет Әзірбайжан мемлекеті, сондай-ақ Астана, Алматы, Шымкент қалалары мен еліміздің өзге де өңірлерінен келген жалпы саны 12 команда қатысады. Спортшылар бірнеше күн бойы тас жолда өзара бақ сынап, өз шеберліктерін көрсетпек.Бұл жарыс аймақта велоспортты дамытуға және жас спортшылардың өзара тәжірибе алмасуына үлкен мүмкіндік болмақ.<img src="https://knadmin.beoblood.kz/uploads/Velosport_turnir_2_2672b239bd.jpg" alt="Велоспорт турнир 2.jpg">

Велоспорттан Қазақстан Республикасының кубогі басталды

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмахановтың төрағалығымен Сырдария өзеніндегі көктемгі су көтерілу кезеңіндегі қауіпсіздікті қамтамасыз ету және аудан аумағындағы санитарлық тазалық мәселелері бойынша кеңейтілген мәжіліс өтті.Жиында Сырдария өзеніндегі су деңгейінің көтерілуіне байланысты атқарылатын жұмыстар жан-жақты талқыланды. Алдын ала мәліметтерге сәйкес, Көктөбе су бекеті арқылы облыс шекарасына секундына 850 текше метр су келуі күтілуде. Осыған орай, аудан басшысы тиісті сала басшыларына су басу қаупі бар аймақтардың қауіпсіздігін қамтамасыз ету, көлдер жүйесі мен жайылымдық жерлерге суды тиімді бағыттау, қорғаныс бөгеттерін нығайту және инженерлік инфрақұрылымды ретке келтіру бойынша нақты тапсырмалар берді.Сонымен қатар жағалауларды бекіту, бөгеттерді жөндеу, каналдар мен арықтарды тазалау, су өткізгіш құрылғыларды жаңарту жұмыстарын белгіленген жоспарға сәйкес сапалы әрі уақытылы жүргізуді қатаң тапсырды. Төтенше жағдайлардың алдын алу мақсатында эвакуациялық пункттердің дайындығы пысықтап, түсіндірме және оқу-жаттығу шараларын тұрақты өткізу қажеттігін атап өтті.Мәжілістің күн тәртібінде Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» республикалық экологиялық акциясы аясындағы жұмыстар да қаралды. Осы ретте аудан әкімі Әйтеке би кенті мен ауылдық округтердің санитарлық тазалығын сынға алып, бірқатар кемшіліктерді атап өтті.Тазалық жұмыстарын жүйелеу, елді мекендердегі қоқыс мәселесін шешу, абаттандыру мен көгалдандыруды күшейту, заң талаптарын сақтамай, белгіленбеген орындарға қоқыс тастаған тұрғындарға қатысты әкімшілік шараларды күшейту қажеттігін ескертті.Жол бойындағы санитарлық тазалық, әсіресе «Батыс Еуропа – Батыс Қытай» халықаралық автодәлізі бойындағы тазалық мәселесін қамтамасыз ету бойынша тиісті мекемелерге нақты тапсырмалар берілді.Жиын қорытындысы бойынша аудан әкімі барлық жауапты тұлғаларға берілген тапсырмалардың сапалы әрі мерзімінде орындалуы қатаң бақылауда болатынын ескертті.<img src="https://knadmin.beoblood.kz/uploads/azaly_tazaly_m_selesi_2_6aabda971b.jpg" alt="Қазалы тазалық мәселесі 2.jpg">

Санитарлық тазалық пен бірқатар өзекті мәселелер қаралды

Жақында ғана өткен педагогикалық практика менің өмірімде үлкен бір сынақ болды. Әдетте, біз докторанттар ғылыми жұмыс, теория, зерттеу деп жүріп, өзімізді тек «ғалым» ретінде көруге дағдыланып кетеді екенбіз. Бірақ Әл-Фараби атындағы ҚазҰУ-дың «Әлеуметтану» мамандығының 2-курс студенттеріне дәріс бере бастағанда, бұл түсінігім бір сәтте астан-кестен болды. Сапалық әдістер туралы лекция оқу — ол жай ғылым емес, ол адамдармен тіл табысудың нағыз мектебі екен. Шынымды айтсам, алғашқы күні аудиторияға кіргенде іштей қатты қобалжыдым. «Менің айтқаным оларға қызық па?», «Осылардың алдында оқытушы болып тұруға лайықпын ба?» деген күдік маза бермеді. Психологтар мұны «импостер синдромы» дейді екен, бірақ мен үшін бұл жай ғана «адам алдындағы жауапкершілік» болды. Өзіңді нық ұстап, оқытушы екеніңді сезіну үшін білім ғана емес, ішкі рухтың мықтылығы керек екенін түсіндім. Басында студенттермен арадағы жас айырмашылығының аздығынан ба, әлде өзімді әлі шәкірт сезінгендіктен бе, олармен қалай сөйлесу керектігін білмей біраз қиналдым. Студенттермен қарым-қатынаста «алтын ортаны» табу — нағыз әлеуметтанулық эксперимент сияқты. Олармен тым жақын болып кетсең, сабақтың берекесі қашады, ал тым қатал болсаң, олар сенен қаша бастайды. Мен барынша ашық болуға тырыстым. Студентті «білмейтін бала» емес, «ертеңгі әріптесім» деп қабылдағанда ғана арамыздағы мұз еріді. Семинарларда «кеуде соқпай», олардың пікірін тыңдай бастағанымда, сабақ жанды пікірталасқа айналды. Бірақ бәрінен де қиыны — ғылымның ауыр тілін қарапайым халықтың тіліне аудару екен. «Интерпретация», «феноменология» деген сөздерді оқулықтағыдай айтсаң, студенттердің көзі сөніп қалатынын байқадым. Сондықтан бәрін өмірден мысал келтіріп, қарапайым тілмен жеткізуге тырыстым. Студенттің көзінен «енді түсіндім!» деген ұшқынды көру — оқытушы үшін ең үлкен бақыт екенін сонда сезіндім. Осы практика кезінде көкейіме түйген ең басты нәрсе — білімнің махаббатсыз құны жоқтығы. Біз кейде «менікі ғана дұрыс» деп ақиқатты бетке басамыз. Бірақ махаббатсыз айтылған ақиқаттың өзі — қатыгездік. Студенттің қатесін түзеткенде де, бағасын қойғанда да, оны мұқату емес, оның өсуіне жаның ашып, жанашырлықпен айтпасаң, ешқандай нәтиже болмайды екен. Оқытушы болу үшін екі шартты берік ұстану керек: біріншісі — айтып тұрғаның шындық болуы керек, екіншісі — оны махаббатпен, жаныңды салып айта білуің керек. Сонда ғана студент сені қабылдайды, сенің соңыңнан ереді. Әрине, сабақ үстінде студенттердің телефонға телміріп, немқұрайлы отырған сәттері де болды. Ондайда ашуланбай, «неге олай?» деп өзіңнен сұрау керек екен. Өз эмоцияңды басқару және сабыр сақтай білу — оқытушының ең үлкен құралы. Қысқасы, бұл бірнеше апта мен үшін тек практика емес, нағыз өмірлік сабақ болды. Ұстаздық — тек ақпаратты беру емес, ол — адамның жанына сәуле түсіру. Нағыз ұстаз болу үшін алдымен өз ішіңдегі менмендікті жеңіп, ақиқатты махаббатпен жеткізе білетін рухани деңгейге көтерілуің керек екен. Осыны түсінгенде ғана менің әлеуметтанушы ретіндегі, докторант ретіндегі жолым жаңа мағынаға ие болды.Нұрсұлтан Қаражан.&nbsp; Әлеуметтанушы.&nbsp; Әл-Фараби атындағы ҚазҰУ-дың&nbsp; 1-курс докторанты

Аудитория мен мінбер: Докторанттың күнделігінен 

<a href="https://kyzylorda-news.kz/">Kyzylorda-news.kz</a> Бүгін – ұлт көсемі Әлихан Бөкейханның туған күні. Әлихан Нұрмұхаммедұлы Бөкейхан 1866 жылы 25 наурызда Семей облысы Қарқаралы уезі Тоқырауын болысының жетінші ауылында туған. Әлиханның әкесі Нұрмұхаммед те, анасы Бегім ханым да көзі ашық, көкірегі ояу, сауатты адамдар болған. Тегіне қарамастан өте кішіпейіл жандар болған. Әкесі ит жүгіртіп, құс салған – кедей адам. Егін еккен, диірмен тартқан, азын-аулақ малы болған, балаларын оқытқан. Анасы – кестеші, оюшы, сызушы, тігін машинасы жоқ кездің өзінде қолмен киім тіккен. Қайырымдылығы сол, өзінен нашарлардың киімін тігіп берген. Өздері мұсылманша қара танитын епті, ширақ, еті тірі ерлі-зайыптылар балаларын оқытуға күш салған.Әлиханның туған інісі Смахан Төре Нұрмұхаммедұлы өз естелігінде былай деп жазады:«Әлихан жас күнінде асықты көп ойнайды екен. Ұтқан балаға асығын береді екен. Жасы үлкен, зорлықшыл баланы сабайды екен. Алтыбақан тепкенде, әйгөлек ойнағанда зорлық қылған қыз-келіншек, бозбаланы «тыныш отыр» деп жайғастырып қояды екен. Ел көшкенде түйесі ауған балалы әйелдердің түйесін басып береді екен. Шаңырағын көтере алмай жатқан жесір кемпірлердің шаңырағын көтеріп береді екен».&nbsp;Әлихан жасынан зерек болып өседі. Жергілікті молданың оқуынан кейін, Семейдегі үш сыныпты бастауыш мектепте, одан соң Қарқаралыдағы қазақ балаларына арналған мектепте жеті жыл оқыған. 1886 жылы Омбыдағы төрт жылдық техникалық училищеде, одан кейін Санкт-Петербург қаласындағы Орман шаруашылығы институтының экономика факультетінде білім алды. Төтенше емтихан тапсырып оқыған, заңгер деген де дипломы бар. Оқудан кейін Омбы қаласына оралып, орман шаруашылығы институтында математика пәнінен сабақ береді. Сол жылдары «Степной край» газетінің редакция алқасына кіреді. Ол қазақтың сиыр, қой және жылқы шаруашылығы туралы іргелі зерттеулерді ғана емес, тарих, этнография, әдебиет пен фольклорға арналған жүздеген мақала жазды. «Қозы Көрпеш – Баян сұлу», «Ер Тарғын», «Ер Сайын» сынды халық ауыз әдебиетінің бірнеше үлгісін жинақтап, баспадан шығарды. 1916 жылдан бастап елдің қоғамдық-саяси өміріне белсенді араласады. Орынборда қазақ тұрғындары атынан қалалық думаға сайланады. 1917 жылдың желтоқсанында бүкіл қазақтардың алғашқы құрылтайында Қазақ автономиясы жарияланып, соның тұңғыш төрағасы болып сайланады.Ел Президенті Қасым-Жомарт Кемелұлының сөзімен айтсақ: «Ол – халқымыздың біртуар перзенті. Алаш қозғалысының негізін қалаушы. ХХ ғасыр басында Әлихан бастаған қазақ зиялылары ұлттық мүдде жолында аянбай еңбек етіп, мемлекетшілдің озық үлгісін көрсетті».Әлихантанушы ғалым Жүсіп Сұлтанхан Әлихан Нұрмұхаммедұлын адамзат тарихында сирек кездесетін тұлға деп есептейді. Туған халқына шын мағынасында кіршіксіз қызмет етуі оны осындай биік дәрежеге көтерді. Заманында ақын Сұлтанмахмұт Торайғыров көреген көсем Әлихан жайында:«Заманда бастан-аяқ кейін кеткен,Жасымай Алашына қызмет еткен.Болса да қалың тұман, қараңғы түн,Туатын бақ жұлдызға көзі жеткен.Түймеге жарқылдаған алданбаған,Басқадай бір басы үшін жалданбаған.«Қайткенде Алаш көркейер» деген ойданБасқа ойды өмірінде малданбаған» – деп жырлаған екен.&nbsp;Азаттық жолындағы қиян-кескі күресте үзеңгілесі әрі адал досы болған алаштың аяулы ұлы Ахмет Байтұрсынұлы:«Қырағы, қиян жазбас сұңқарым-ай,Қажымас қашық жолға тұлпарым-ай!Үйілген өлексені өрге сүйреп,Шығармақ қыр басына іңкәрім-ай!» – деп жүрек тебірентер жырын арнаған.&nbsp;«Қарағым, жалғызымсың қазақтағы,Ұл тумақ сендей болып аз-ақ тағы.Өгіз өліп, болмаса арба сынып,Өмірің өткен жансың азаптағы.&nbsp;Бал тамған, ханзадам-ай, қаламыңнан,Тәңірім айырмасын талабыңнан!» – деген ақын Кәкітай Жанатайұлының Әлиханға айтқаны да көңілінде сәулесі бар кісіні бей-жай қалдырмасы анық.&nbsp;Ақынның «бал тамған, ханзадам-ай, қаламыңнан» деуі тегін емес. Әлихан Нұрмұхаммедұлы – Шыңғыс ханның Жошыдан тарайтын 23-інші ұрпағы, төре тұқымынан. Арғы атасы – Барақ Сұлтан. Қазақтың соңғы хандарының бірі – Бөкей – осы Барақ сұлтанның баласы. Әрине ақ қиізге хан көтерер заманы өтіп кетті. Алайды қазақтың үш Жүзге бөлініп, бытырауы, ымыраға келе алмауы орыс империясының отаршылдығына душар еткенін жан-тәнімен сезген Әлихан Бөкейхан: «Тірі болсам, хан баласында қазақтың хақысы бар еді, қазаққа қызмет қылмай қоймаймын» деп өз-өзіне серт берді және ақырғы демі біткенше халыққа қызмет қылам деген уәдесіне адал болды.1937 жылы Әлихан Бөкейханға жалған айып тағылып, Мәскеуде өлім жазасына кесіледі, үкіл сол-күні-ақ жүзеге асырылды.Саят АСҚАР,Қорқыт ата атындағы&nbsp;Қызылорда университетінің студентіФото: wikipedia.org

Әлихан Бөкейханның туғанына – 160 жыл

«Қазақстан Орталық Азия өңірінде таза спортты ілгерілетуде негізгі рөл атқарады» — ҚР Туризм және спорт министрлігі Дүниежүзілік допингке қарсы агенттікпен (WADA) өзара түсіністік туралы меморандумға қол қойдыҚол қою рәсімі Польшаның Торунь қаласында өткен жабық ғимараттағы жеңіл атлетикадан әлем чемпионаты аясында өтті. Құжатқа министр Ербол Мырзабосынов пен WADA президенті Витольд Банька арасындағы кездесу барысында қол қойылды.Меморандум еліміздің таза спорт қағидаттарына берік екенін растайды, сондай-ақ Мемлекет басшысының халықаралық ынтымақтастықты дамыту және допингке қарсы саясатты жетілдіру жөніндегі тапсырмаларын іске асыруға бағытталған маңызды қадамдардың бірі саналады.«Біздің белсенді ынтымақтастығымыз өткен жылы Астанада Мемлекет басшысының жылы қабылдауынан бастау алды деп есептеймін. Допингке қарсы зерттеулердің дамуына көрсеткен қолдауы үшін Президент Қасым-Жомарт Тоқаевтың тұлғасында Қазақстанға алғысымды білдіремін. Бұл келісім Қазақстанның өңірде таза спортты дамытудағы жетекші рөлінің нығайып келе жатқанын көрсетеді», — деді Витольд Банька.Сонымен қатар тараптар 2027 жылы Астанада WADA-ның Атқарушы комитеті мен Құрылтай кеңесінің отырыстарын өткізу мүмкіндігін талқылады. Ербол Мырзабосынов Қазақстанның адал бәсекелестік қағидаттарын ұдайы ұстанатынын және допингке қарсы білім беру жүйесін белсенді түрде дамытып жатқанын атап өтті.«WADA-мен ынтымақтастық біз үшін стратегиялық маңызға ие. Қазақстанда таза спорт мәдениетін қалыптастыруға, халықаралық стандарттарды нығайтуға және әлемдік озық тәжірибелерді енгізуге басымдық беріледі. Еліміз допингтің алдын алу және білім беру бағытындағы бағдарламаларды қолдап, оларды жүйелі түрде жүзеге асырып келеді», — деді министр.Кездесу аясында салалық білім беру және ғылыми инфрақұрылымды дамыту мәселесі де ерекше назарға алынды. Қазақ ұлттық спорт университеті мамандар даярлау мен тәжірибе алмасудың тиімді алаңы ретінде қарастырылып, Қазақстанның Орталық Азиядағы допингке қарсы саясаттағы көшбасшылығын нығайтатын білім беру хабы ретіндегі рөлін күшейтуге ықпал етеді.Еске сала кетейік, өткен жылы Мемлекет басшысы WADA президенті Витольд Баньканы қабылдаған болатын. Ол агенттік президенттері ішінде Қазақстанға алғаш келгендердің бірі еді. Кездесу барысында Мемлекет басшысы Витольд Баньканы II дәрежелі «Достық» орденімен марапаттады. Биылғы меморандум екіжақты ынтымақтастықтың жүйелі түрде дамып келе жатқанын көрсетеді.<img src="https://knadmin.beoblood.kz/uploads/FB_IMG_1774417645200_7eea47228b.jpg" alt="FB_IMG_1774417645200.jpg">

Екі жақты меморандумға қол қойылды 

Қармақшы ауданында саналы ғұмырын білім беру саласына арнаған ұлағатты ұстаз, тыл ардагері, ел анасы Ақбалыш Жалғасованы еске алуға арналған жазба ақындардың облыс деңгейдегі жыр-мүшәйрасы өтті.Тағылымы мол әдеби іс-шараны облыс әкімінің орынбасары, ҚР Президентінің «Байқоңыр» кешеніндегі арнаулы өкілі Қайрат Нұртай ашып, облыс әкімі Н.Нәлібаевтың жазба ақындар мүшәйрасына қатысушыларға арнаған ізгі лебізін жеткізді.Мүшәйраға Қызылорда қаласы мен аудандардан 21 ақын қатысып, бірінші кезеңде А.Жалғасоваға арнау, екінші кезеңде тұтас түркі өркениетінің алтын арқауы болған ерлік пен елдік, бірлік пен батырлық идеясы туралы «Оғыз-жыр» тақырыбында өлең оқыды. Ақындардың өлеңін белгілі жырау, ҚР Медниет қайраткері Берік Саймағанбетов, Қазақстан Жазушылар және Журналистер одағының мүшесі Нұрлан Көбегенұлы, «Қармақшы таңы» газетінің бас редакторы Сәрсенкүл Райымбаева бағалап, қазылық етті.Жыр мүшәйрасының қорытындысында сырдариялық ақын Ақтөре Ибрагимұлы бас жүлде иегері атанды. Арнайы алғыс хат пен сыйақыны Қармақшы ауданының әкімі Жандос Еркінбек табыстап, ақынның арнау өлеңі мен шығармашылық ізденісін жоғары бағалады. Сонымен қатар ұлағатты ұстаз, тыл ардагері, ел анасы Ақбалыш Жалғасованың ғибратты ғұмыры, тағдыр жолы ел-халыққа үлгі-өнеге екенін айтып өтті.Айта кетсек, саналы ғұмырын ұрпақ тәрбиесіне арнаған ұстаз-ананың өнегелі өмірін ұлықтау мақсатында ұйымдастырылған бұл тағылымды іс-шара жеті жылдан бері дәстүрлі түрде өткізіліп келеді.

Облыс көлемінде жазба ақындар мүшәйрасы өтті 

Облыс әкімі Нұрлыбек Нәлібаев, Парламент Сенаты мен Мәжілісінің депутаттары Руслан Рүстемов, Мұрат Әбенов, Мархабат Жайымбетов, Мұрат Ергешбаевтың қатысуымен Қорқыт Ата атындағы Қызылорда университеті «Инжинирингтік паркінің» іргетасын қалау рәсімі өтті. Аймақ басшысы жиналған жұртшылықты мерекемен құттықтап, басталған іске сәттілік тіледі. «Мемлекет басшымыз Қасым-Жомарт Кемелұлы «Жасанды интеллектіні дамыту, бұл – ұран емес, бұл экономикалық идеологияның негізгі тірегі, тіпті ұлттық идеологиямыздың мызғымас тұғыры болуға тиіс»,– деп цифрландырудың &nbsp;басты міндеттерін орындауды тапсырды.2023 жылы Қазақстандағы Корея Республикасы Бас Консулдығының ресми шақыртуымен облыстан арнайы делегация Оңтүстік Кореяға барған болатынбыз. Сапар барысында екіжақты кездесулер мен іс-шаралар ұйымдастырылды. СеулТех университетімен білім, ғылым саласында тиімді байланыстар орнатылды. Нәтижесінде сол жылы 6 қарашада Сеул ұлттық ғылым және технология университетімен бірлесіп, жасанды интеллектіні экономиканың барлық саласына енгізуге білікті кадрлар дайындау үшін Қорқыт Ата университетінде Қазақстандағы алғашқы Жасанды интеллект институты ашылды.Бүгінде институтта 240 студент, оның 200-і бірлескен білім беру, 40-ы қосдипломды бағдарлама бойынша оқиды. Болашақ мамандар аймағымыздың әлеуметтік-экономикалық дамуына ерекше серпін береді деп сенеміз.Қорқыт Ата университетіне қырық жылдан астам уақыттан бері жаңа оқу ғимараты салынбаған. Инжинирингтік парк қаламыздың сәулетіне ерекше көрік беретін заманауи нысан болады. Алдағы уақытта да талантты, дарынды жастарымызды қолдауға, әсіресе ғылымды дамытуға бағытталған жұмысты жалғастырамыз»,– деді аймақ басшысы.<img src="https://knadmin.beoblood.kz/uploads/FB_IMG_1774413221857_b30698ba4a.jpg" alt="FB_IMG_1774413221857.jpg">Айта кету керек, 90 жылдық тарихы бар университетте ғылымды дамыту және бәсекеге қабілетті мамандар даярлау бағытында 580 профессор-оқытушы қызмет атқарады. Оқу орнында 155 мамандық бойынша 11 мыңнан астам студент білім алады, оның ішінде 5 375-і мемлекеттік грант, 5 690-ы ақылы негізде оқиды.Соңғы бес жылда білім алушылар санының өсуі мен ғылыми жобаларды қаржыландырудың артуы есебінен университеттің табысы үш есе ұлғайған. 2020 жылдан бері материалдық-техникалық база, Ботаникалық бақ қайта жаңғыртылды.Студенттердің инновациялық идеялары мен стартап-жобаларын іске асыратын бизнес-инкубациялық орталық бар. 2020-2025 жылдары университет әлемдік рейтингтерге алғаш рет енді.<img src="https://knadmin.beoblood.kz/uploads/Zalozhen_fundament_Inzhiniring_parka_KU_imeni_Korkyt_ata1_f4da7e1140.jpg" alt="Заложен фундамент Инжиниринг парка КУ имени Коркыт ата1.jpg">

Университеттің "Инжинирингтік паркінің" іргетасі қаланды 

<a href="https://kyzylorda-news.kz/">Kyzylorda-news.kz</a>&nbsp; Құқықтық сауатты арттыру құр білім болып қалмайды. Бұл бағытта ҚАЖ департаментіне қарасты №68 мекемесі шаруашылық бөліміне қалдырылған жазасын өтеушілерді қолдау шараларын ұйымдастыруды үзген емес. «Жігер» Қызылорда облыстық мүгедектерінің қоғамдық қорымен бірлесе отырып, келелі кездесу өткізгені сөзімізге тұздық.Яғни, жазасын өтеуші азаматтарға заңға енгізілген өзгерістер бойынша түсіндірме жұмысы жүргізіліп, өзекті сұрақтарға жауап та берілді. Пайдалы кеңестің соңы мерекелік көңіл-күйге ұласқаны тағы бар. Ұлыстың ұлы күнінде ұлттық ойындардан сайыс өткізгені ұтымды шешім.Сайыс барысында әрқайсысы қабілеті мен шеберлігін көрсете білді. Ал, нәтижесі бойынша жеңімпаздар марапатталып, қор атынан арнайы сыйлықтар тарту етілді. Игілікке иек артқан мұндай бастамалар тұралап қалмауға негіз.

Сауат һәм сайыс: Мерекедегі мәнді іс-шара

<a href="https://kyzylorda-news.kz/">Kyzylorda-news.kz</a>&nbsp; Көшпенді өмір салтын ұстанған қазақ халқы үшін спорт күш сынасу ғана емес, рухани мұраның ажырамас бөлігі. ҚАЖ департаментіне қарасты №68 мекемесі Наурызнама күндерін атап өтуде кейін тартпады. Мәселен, ұлттық спорт күнінде шаруашылық бөліміне қалдырылған жазасын өтеушілерге облыстық спорт басқармасымен бірлесе отырып спорттық сайыс өткізілді.Сайыс барысында арқан тартыс, ләңгі тебу, турникке тартылу және гір көтеру сияқты спорт түрі қамтылып, қатысушылар өздерінің ептілігі мен күш-қайратын көрсете білді. Әрбір ойын тартысты өтіп, топтар арасындағы өзара қолдау да байқалды.Ұйымдастырылған іс-шараның басты мақсаты – жазасын өтеушілердің бос уақытын тиімді өткізу, ұлттық құндылықтарды насихаттау және салауатты өмір салтын қалыптастыру. Әрі олардың рухани және физикалық дамуына ықпал етері айтпасақ та түсінікті.

Наурызнама: күш пен жігер сыналған сәт

23 наурызда Тазару күнінде Мемлекет Басшысының «Таза Қазақстан» экологиялық бастамасы аясында бүкіл ел бойынша ауқымды экологиялық акциялар басталды.Қазақстандағы экологиялық күн тәртібі мемлекеттік саясаттың да, қоғамдық күнделікті өмірдің де бір бөлігіне айнала отырып, өзектілігін арттыруда. «Таза Қазақстан» бүкіл ел бойынша мыңдаған азаматтарды біріктіреді.«Жаңару күні», «Таза ел біздің қолымызда», «Таза Қазақстан – жаңарған болашақ», «Табиғатқа тағзым» сияқты экоакциялары өтті, «Мөлдір бұлақ», «Таза Жайық» акциялары өткізілді, «Өзіңнен баста», «Ақ ниет толқыны», «Тазару күні» т.рлі іс-шаралар өткізілді. Аумақты тазарту бойынша өткізілген акция қорытындысы бойынша 2,7 тонна қоқыс жиналды, 87 мың адам қатысты.Қазақстандықтардың ауқымды экологиялық акцияларға қатысуы табиғатқа қамқорлық жасау мемлекеттің, бизнестің және барлық азаматтардың ортақ міндеті екенін көрсетеді. Бұл жеке тазалау немесе экологиялық іс-шаралар туралы ғана емес, сонымен қатар тазалық, ресурстарға ұқыпты қарау және қоршаған ортаға жауапкершілік өмір сүру нормасына айналады.Бұл қағидаттар Конституция деңгейінде көрініс тапты және бекітілді, яғни олар ел үшін ерекше маңызға ие. Енді таза, қауіпсіз және абаттандырылған орта — бұл жай ғана тілек емес, барлығы үшін маңызды нұсқаулық.Өскелең ұрпақтың бойында экологиялық сананы қалыптастыруда «Таза Қазақстан» – Мемлекет басшысының бастамасымен бір реттік іс-шаралар шеңберінен шығып, экологиялық мәдениетті және азаматтардың қоршаған ортаның жай-күйі үшін жеке жауапкершілігін қалыптастыруға бағытталған ауқымды қозғалысқа айналған экологиялық акция үлкен рөл атқарды.Наурыз-рухани тазару мен жаңару уақыты. Наурызнамды мерекелеу аясында бүгін Тазару күні – жаңару символы және қоршаған әлемге саналы көзқарас атап өтілетіні қуантады.

Қазақстан және Қызылорда облысының жаңалықтары