<a href="https://kyzylorda-news.kz/">Kyzylorda-news.kz</a> Бүгінгі кейіпкеріміз өткен жылы ғана айына 3 мың тәтті тоқаш пісірсе, бүгінде ең кемі 15-16 мыңнан астам нан өнімдерін тұтынушыларына ұсынуда. Кәсіп иесі бұл көрсеткішке кәсіпкерлік саласындағы мемлекеттік қолдаудың, яғни «Қызылорда» Өңірлік инвестициялық орталығынан жеңілдікпен алған несиенің арқасында жеткенін айтты.Қызылордалық Лаура Ұзақова 4 баланың анасы. Негізгі мамандығы химия пәнінің мұғалімі. Бала күтіміне байланысты уақытша демалысқа шыққаннан кейін мамандығы бойынша қайта жұмыс істеуге мүмкіндігі болмайды. Осы кезде декретте отырғанда енесінен үйренген ісі табыс көзіне айналдыруға сеп болады.<blockquote>«Жолдасымның анасы Жұмакүл Арынғазиева 40 жыл наубайханада жұмыс істеген. Тәжірибелі маман. Ол кісінің қолынан шыққан нан өнімдерін жақын маңдағы дүкендер алып тұратын. Жанында жүріп тәтті тоқаш пісіруді үйреніп алдым. Жұмыссыз қалғанда анамыздан үйренген істі кәсіпке айналдыруды ойластырдым», - дейді Лаура Ұзақова.</blockquote>Жас кәсіпкер алғашында отбасының қаржысына алынған екі секциялы пешпен ісін бастайды.<blockquote>«Нан өнімдерінің ішінде тәтті тоқашымызда сұраныс жоғары болды. Айына 3000 тоқаштай пісіріп, шағын дүкендерге жеткізіп беріп жүрдік. Өнімімізге сұраныс артты. Алайда бір пешпен үлгермейтініміз белгілі болды. Осылайша кәсіпті кеңейту керек, бірақ оған қаржыны қайдан табамыз деп жүргенде спорт секциясына балаларды тасып жүрген жолдасым ата-аналардың бірінен «Қызылорда» Өңірлік инвестициялық орталығы жайлы естіп, үйге айтып келді», - дейді жас кәсіпкер.</blockquote>Өңірлік орталықтың жергілікті кәсіпкерлерді қолдауға арналғанын &nbsp;білгеннен кейін бағдарламаларымен танысып, өтінім береді. Кәсіпті кеңейтуге Орталық арқылы биыл мамырда 6,5 млн теңге жеңілдетілген несие алады.<blockquote>«Бұл қаржыға төрт секциялы екі пеш, екі жұмыс үстелін, нан өнімдеріне арналған сөрелер, қалыптар, өзге де қажет құрал-жабдықтар алдық. Енді тиімділігін айтайын, өнім көлемі бірден артты. Бұрын айына ең көбі 3500 тоқаш шығарып жүрсек, қазір кәсіпті кеңейткеннен кейін 15-16 мың тоқаш пісіріп жатырмыз. Негізгі тұтынушыларымыз үлкен дүкендер. Жұмыс қолы жетпей жатыр. Сол үшін жақында 3 адамды жұмысқа аламыз», - дейді Лайра Ұзақова.</blockquote>Айта кеткен жөн, тамақ өндірісімен айналысатын кәсіпкерлерге тамаша мүмкіндік жасалуда. Қызылорда қаласындағы Сол жағалаудан ашылып жатқан өндірістік аймақта орналасатын кәсіпкерлер кәсібіне қажетті құрал-жабдықтарға «Қызылорда» Өңірлік инвестициялық орталығы арқылы жеңілдікпен 3 пайызбен несие ала алады.Қосымша сұрақтар бойынша Орталыққа +7 705 177 47 30, +7 775 757 94 74, 40-03-60 байланыс нөмірлері арқылы хабарласуға болады.Фото:&nbsp;«Қызылорда» Өңірлік инвестициялық орталығының баспасөз қызметі

Лаура Ұзақова: Мемлекеттік қолдаудың арқасында өнім өндіру көлемі бес есеге артты

<a href="https://kyzylorda-news.kz/">Kyzylorda-news.kz</a>&nbsp; Қазалы ауданы бүгінде Сыр өңірінде әлеуметтік-экономикалық серпін алған аудандардың қатарында. Халықтың әл-ауқатын жақсарту, ауыл-аймақтарды дамыту, білім мен мәдениет саласындағы инфрақұрылымды күшейту - аудан басшылығының басты назарындағы мәселе. Осы мақсатта аудан көлемінде көптеген жобалар іске асырылып жатыр. Бұл жұмыстарды көзбен көру, елге кеңінен ақпарат тарату мақсатында Қазалы ауданына арнайы БАҚ өкілдеріне арналған баспасөз туры ұйымдастырылды.Баспасөз туры аясында журналистер ауданның бірқатар маңызды нысандарымен танысты. Алдымен Қарлан учаскесіндегі темірбетонды көпірдің құрылыс жұмыстары көрсетілді. Бұл көпір - ауданның көлік инфрақұрылымын жақсартуға бағытталған маңызды жоба. Құрылыс толық аяқталғанда жолаушылар мен жүк тасымалының қозғалысы айтарлықтай жеңілдейді. Бұл әсіресе ауыл шаруашылығы өнімдерін тасымалдау мен ауылдар арасындағы байланыс үшін үлкен қолайлылық әкеледі.Келесі бағыт - Әйтеке би кентіндегі автокөлік жөндеу орталығы. Мұнда тұрғындар автокөліктеріне кәсіби әрі сапалы жөндеу жұмыстарын жасата алады. Орталық заманауи құрал-жабдықтармен қамтамасыз етілген. Бұл - аудан тұрғындарының тұрмысына тікелей ықпал ететін сервистік қызметтің жаңа деңгейі.Бұдан кейінгі аялдама - Жанқожа батыр, Бекарыстан би, Майдакөл және Ү.Түктібаев ауылдарына газ тарту жұмыстары. Қазіргі таңда аталған елді мекендерде магистральды газ құбырларының құрылысы қарқынды жүруде. Жыл соңына дейін аяқталса, ауданның газдандыру көрсеткіші 73 пайызға жетеді. Бұл - ауыл халқының өмір сапасын арттыратын маңызды бастама.«Әлсейт» көпірінен бастап Бекарыстан би ауылына дейінгі автомобиль жолының күрделі жөндеу жұмыстары да тілшілер назарына ұсынылды. Бұл бағыттағы жұмыстар аяқталғанда жол қозғалысы қауіпсіз әрі ыңғайлы болмақ. Ауылдардың бір-бірімен байланысы нығайып, тасымал ісі жандана түседі.Майдакөл ауылындағы 100 орындық ауылдық клубтың құрылысы да маңызды мәдени нысандардың бірі. Құрылысы аяқталуға таяу клуб ауыл халқының руханият ордасына айналмақ. Мұнда түрлі мәдени іс-шаралар, жиындар, концерттер ұйымдастырылатын болады.Жанқожа батыр ауылындағы 300 орындық «Жайлы мектеп» жобасы да өзекті. Мемлекет басшысының бастамасымен жүзеге асқан бұл мектеп ауыл балаларының сапалы білім алуына үлкен мүмкіндік береді. Кең әрі заманауи жабдықталған білім ошағының ашылуы - ауыл үшін үлкен жаңалық.Бұдан бөлек, Қазалы аудандық ауруханасы жанынан салынып жатқан 42 төсектік инсульт және кардиология орталығының құрылысы назарға ұсынылды. Құрылыс аяқталған соң бұл орталық аймақта алғаш рет ашылатын инсульттік көмек орталығы болады. Заманауи медициналық құралдармен жабдықталып, аудан халқына сапалы әрі қолжетімді медициналық қызмет көрсетілмек.Қазалы қаласындағы «Руханият» орталығы мен сквері, №234 мектептегі ағымдағы және күрделі жөндеу жұмыстары, Қазалы теміржол вокзалы мен жаяу жүргіншілер көпірінің құрылыс барысы да журналистердің басты назарында болды. Әсіресе 120 жылдық тарихы бар Қазалы теміржол вокзалының күрделі жөндеуден өтуі - аймақтың бет-бейнесін жаңғыртатын маңызды қадам. Вокзалдың заманауи қалыпқа келтірілуі - ауданның стратегиялық әлеуетін арттырады.Сондай-ақ Әйтеке би кентіндегі жаңғыртылған орталық алаң, Қазалы мәдени-демалыс кешені, спорт кешенінің құрылысы көрсетілді. Бүгінде Қазалыда спортқа, мәдениетке, демалыс орындарына ерекше көңіл бөлінуде. Мұның бәрі тұрғындардың бос уақытын тиімді өткізуге, салауатты өмір салтын қалыптастыруға жағдай жасауда.

Қазалыда халық тұрмысын жақсартатын ауқымды жобалар іске асуда 

<a href="https://kyzylorda-news.kz/">Kyzylorda-news.kz</a>&nbsp; ҚР Парламенті Сенатының депутаттары, «AMANAT» партиясының мүшелері Наурызбай Байқадамов пен Руслан Рүстемов және партияның облыстық филиалының төрағасы Алмасбек Есмаханов партияның сайлауалды бағдарламасы мен «Ауыл аманаты» жобасы аясында жүзеге асқан Қалжан ахун ауылындағы жылыжай жұмысымен танысты.Ауылдағы жасыл жетістікпен«Береке» ауылшаруашылық өндірістік кооперативі жетекшісі Серік Әбжалиев таныстырып, атқарылған жұмыстар мен алдағы жоспарлар туралы ақпарат берді.«Береке» ауылшаруашылық өндірістік кооперативінің жетекшісі Серік Әбжалиев жылыжай бизнесін дамыту бағытындағы 2023 жылы «Ауыл аманаты» жобасы аясында және 2024 жылы «Өңірлік инвестициялық орталығы» арқылы тамақ өнеркәсібін дамыту мақсатында төмендетілген несие алып, жылыжай шаруашылығын қайта жандандырған. Қазіргі таңда кооператив жылыжайында қияр мен қызанақ өсірілуде, және бұл өнімдерге деген сұраныс өте жоғары екенін атап өтті.Жылыжай кешені ауыл шаруашылығының дәстүрлі түрін заманауи технологиялармен ұштастырып, сапалы өнім шығаруды мақсат етеді. Сонымен қатар, бұл жоба ауыл тұрғындарын жұмысқа орналастыруға және жергілікті экономиканың дамуына да өз үлесін қосуда.Аумағы 200 шаршы метр болатын осы жылыжайда қазір 600 түп қияр күтіп бапталуда. Мамандар күн сайын қатарларды аралап, өнімнің өсіп-жетілуін бақылап отырады.Жылыжай жұмыстарымен танысу барысында Сенат депутаттары мұндағы жұмысшыларымен пікірлесіп, ұсыныс-пікірлерін білдірді.<img src="https://knadmin.beoblood.kz/uploads/1_Sapaly_nim_sapaly_bastama_senatorlar_zhylyzhaj_zh_mysyn_k_rdi_c6752bae90.jpg" alt="1 Сапалы өнім – сапалы бастама сенаторлар жылыжай жұмысын көрді.jpg">

Сапалы өнім – сапалы бастама: сенаторлар жылыжай жұмысын көрді

<a href="https://kyzylorda-news.kz/">Kyzylorda-news.kz</a>&nbsp; ҚР Парламенті Сенатының депутаттары, «AMANAT» партиясының мүшелері Наурызбай Байқадамов пен Руслан Рүстемов және партияның облыстық филиалының төрағасы Алмасбек Есмаханов жұмыс сапарымен Сырдария ауданында болып, Қалжан ахун елді мекеніндегі электр желілерінің қайта жаңғырту жұмыстарымен танысты.Аудан әкімі Берік Сәрменбаев Ел Президенті Қасым-Жомарт Кемелұлы Тоқаев ең алдымен халыққа қажетті инфрақұрылымдық жұмыстарды атқаруды тапсырғанын атап көрсетті. Осыған орай, аймақ басшысы Нұрлыбек Машбекұлы Нәлібаевтың қолдауымен елді мекендерде электр желілері қайта жаңғыртудан өтіп жатқанын жеткізді.Қалжан Ахун елді мекенінде атқарылып жатқан жұмыстар туралы тиісті сала басшылары мен мердігер компания өкілдері ақпарат берді.Жалпы құны 490,5 млн. теңгені құрайтын «Қызылорда облысы Сырдария ауданы Қалжан ахун елді мекенін электрмен жабдықтау» жұмыс жобасын жүзеге асыруға 2024 жылы республикалық бюджеттен 57,3 млн. теңге қаржы бөлініп, 119 дана бір бағаналы электр бағаналары және бір тірегі бар бір бағаналы 26 дана, екі тірегі бар бір бағаналы 4 дана және ВЛ-10/0,4 кВ–2,3 шақырым электр желісі орнатылған. 2025 жылға республикалық бюджеттен 280,0 млн. теңге қаржы бөлініп, 142 дана бір бағаналы электр бағаналары және бір тірегі бар бір бағаналы 32 дана, екі тірегі бар бір бағаналы 1 дана орнатылып, жері тегістеліп бетон блоктары бар 3 дана КТПН қойылған.Өткен жылы елді мекенде 150 электр бағаналары мен 2,3 шақырым электр желісі орнатылса, биыл тағы 200-ге жуық электр бағаналары орнатылу жұмыстары жүргізілуде. Электр жабдықтау құрылысы жұмыстарын мердігер мекеме «Қызылорда электр тарату торабтары компаниясы» АҚ жүргізуде.

Энергетика саласындағы жаңғырту жұмыстары назарда

<a href="https://kyzylorda-news.kz/">Kyzylorda-news.kz</a>&nbsp; Арал ауданы әкімдігінің мәжіліс залында сегізінші шақырылған аудандық мәслихаттың кезекті 34 сессиясы өтті.Сессияны аудандық мәслихат төрағасы Б.Турахметов ашып жүргізді. Жиынға аудан әкімі Аманжол Оңғарбаев қатысып, ауданның әлеуметтік-экономикалық даму жөнінде баяндама жасап, жыл басынан бері атқарылған жұмыстар легімен таныстырып өтті.Алдағы міндет бұдан да ауықымды екенін айтып, халық қалаулыларын елге ортақ істе тізе қосып, бірлесе жұмыс істеуге шақырды.Ауданда атқарылып жатқан жұмыстарға оң бағасын берген аудандық мәслихаттың депутаты Е.Аяғанов Сексеуіл кентіндегі қолға алынуы тиіс бірнеше мәселелерді ортаға салды.Жиын барысында мұнан өзге ауданда қылмыстың алдын алу және құқықтық тәртіпті нығайту шаралары туралы Арал ауданының полиция бөлімінің бастығы Н.Әлтай, 2025-2027 жылдарға арналған аудандық бюджет туралы» Арал аудандық мәслихатының 2024 жылғы 23 желтоқсандағы №313 шешіміне өзгерістер енгізу туралы аудандық экономика және қаржы бөлімінің басшысы Т.Рашев, Арал қаласындағы және Жақсықылыш кентіндегі көшеге жаңа атау беру туралы аудандық мәдениет және тілдерді дамыту бөлімі басшысының міндетін атқарушысы Б.Мамбетов және «Арал ауданы көлемінде құрылған №№1-55 және №382 учаскелік сайлау комиссияларын сайлау туралы» Арал аудандық мәслихатының 2023 жылғы 22 желтоқсандағы №175 шешіміне толықтыру енгізу туралы Арал аудандық мәслихатының төрағасы Б.Турахметов хабарлама жасады.Сесия барысында қала, кент және бірнеше ауылдық округтердің әкімдері 2025-2027 жылдарға арналған бюджеті туралы шешіміне өзгерістер енгізу жөнінде хабарлама жасады.Сессияның күн тәртібінде көтерілген мәселелер депутаттар тарапынан қолдау тауып, тиісті шешімдер қабылданды.Аудан әкімдігінің баспасөз қызметі

Арал аудандық мәслихатының кезекті сессиясы өтті

<a href="https://kyzylorda-news.kz/">Kyzylorda-news.kz</a> Жалағаш ауданына жұмыс сапары барысында ҚР Парламенті Сенатының депутаттары, “AMANAT” партиясының мүшелері Наурызбай Байқадамов пен Руслан Рүстемов және партияның облыстық филиалының төрағасы Алмасбек Есмаханов ауданның ауыл шаруашылығы бағытындағы жұмысшыларымен Таң ауылында кездесу өткізді.Басқосу барысында ауыл еңбеккерлері тарапынан егінге жіберілетін судың жеткіліксіздігі және өсірілген өнімнің сатылмай қалуы секілді өзекті мәселелер көтерілді. Сенат депутаттары бұл жағдайларды назарға алып, тиісті министрліктер мен мекемелер деңгейінде қаралатынын жеткізді.<blockquote>«Ауыл шаруашылығы – ел экономикасының негізгі тірегі. Диқандардың мәселесі – мемлекеттің де мәселесі. Судың жетіспеушілігі мен өнімнің сатылмай қалуы – жүйелі шешімді қажет ететін түйткілдер. Бұл бағытта тиісті жұмыстар атқарылады», – деді Сенат депутаты Руслан Рүстемов.</blockquote>

Партия мүшелері еңбек адамдарымен кездесті

<a href="https://kyzylorda-news.kz/">Kyzylorda-news.kz</a> Мемлекет басшысы биыл Бурабайда өткен Ұлттық құрылтай отырысында халықтың спорттық инфрақұрылымдарға қолжетімділігін арттыру мақсатында облыс орталықтары мен аудандарда заманауи стадиондар мен спорт кешендерін салу мәселесіне ерекше тоқталған болатын.Бұл ретте Ел Президенті және Үкіметтің ерекше қолдауымен аймақ басшысы Нұрлыбек Машбекұлының бастамасымен былтыр Қызылорда қаласының сол жағалауында құны 20,9 млрд теңгені құрайтын 11 мың орындық жаңа стадионның құрылысы басталған болатын.Бұл стадион халықаралық стандарттарына сай салынып жатқандықтан әлемдік додаларды жоғары деңгейде өткізуге мол мүмкіндік береді.Бірегей нысанда жасыл алаңнан бөлек, олимпиадалық спорт түрлеріне арналған бокс залы, күрестің үш түріне арналған атап айтқанда дзюдо, грек-рим, еркін күрес залы, фитнес залы, спорттық гимнастика, таеквондо және ауыр атлетика залдары қамтылатын болады.Жаңа стадионның тағы бір ерекшелігі, халықаралық деңгейдегі «Фелипс» компаниясының өнімдері арқылы жарықтандырылатын болады. Бұл өз кезегінде, түрлі деңгейдегі мәдени-спорттық іс-шараларды жоғары деңгейде өткізуге септігін тигізбек. Бұдан бөлек, жанкүйерлерге арналған «Қайсар» футбол клубының жабдықтарын сататын арнайы дүкен және дәмхана қарастырылмақ.Осыған байланысты бүгін облыстық дене шынықтыру, спорт және туризм басқармасы басшысының орынбасары Жігер Оңдасынұлы 31 арнаға стадион құрылысы бойынша арнайы сұхбат берді.Аталған нысанды осы жылдың қыркүйек айында пайдалануға беру жоспарлануда.

Он бір мың орындық жаңа стадион жақын арада пайдалануға беріледі

<a href="https://kyzylorda-news.kz/">Kyzylorda-news.kz</a> Қармақшы ауданының әкімі Жандос Еркінбек ауыр атлетикадан жастар арасындағы Азия чемпионатының жеңімпазы, жерлесіміз Ерасыл Сәулебековті арнайы қабылдады.<blockquote>– Ерасыл – Қармақшының мақтанышы. Бұл жеңіс – тек спорттық табыс емес, жастарымыздың биікке ұмтылуына үлгі болатын тарихи сәт. Аудан атынан сіздерге алғыс айтып, жаңа белестерді бағындыруларыңызға тілектеспін,” – деп аудан әкімі.</blockquote>Аудан әкімі халықаралық аренада ел абыройын асқақтатқан Ерасылға Алғыс хат пен қаржылай сертификат табыстады. Сондай-ақ, қажырлы еңбегі мен табандылығы үшін жеке бапкері Айдар Ералиевке де құрмет көрсетілді.Шара барысында Қармақшы ауданының мәслихат төрағасы Әділ Қошалақов пен аудандық ардагерлер кеңесінің төрағасы Асқар Мереков құттықтау сөз сөйлеп, Ерасылдың жеңісі – аудан ғана емес, күллі Сыр өңірінің мерейін үстем еткен үлкен жетістік екенін жеткізіп, жас спортшымызға баталарын берді.Айта кету керек, қазіргі таңда Қармақшы ауданында бұқаралық спортты дамыту мақсатында жүйелі жұмыстар атқарылуда. Оның ішінде ауыр атлетика бөлімі 2014 жылдан бастап құрылып, әлем және ел біріншіліктерінің жеңімпаздары тәрбиеленіп шығуда. Бүгінде онда 50-ге жуық жас спортшы кәсіби деңгейге жету жолында еңбек етіп келеді.

Спорт: Ерасыл Сәулебековке құрмет көрсетті

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимовтың төрағалығымен өткен мәжілісте ауданның 2025 жылдың алғашқы жартыжылдығындағы әлеуметтік-экономикалық даму көрсеткіштері, республикалық, облыстық және аудандық бюджеттен бөлінген қаржыларды мерзімінде әрі тиімді игеру, салық базасын ұлғайту шаралары және өзге де маңызды мәселелер қаралды.2025 жылдың алғашқы жартысында ауданның экономикалық дамуында оң тенденция қалыптасып, өнеркәсіп өнімінің көлемі – 139,3 пайызға, өңдеу өнеркәсібі – 222,3 пайызға, инвестициялар тарту – 102,1 пайызға, бөлшек сауда – 101,2 пайызға, ауыл шаруашылығының жалпы өнімі – 102,5 пайызға, тұрғын үй көлемі – 105,4 пайызға, құрылыс жұмыстары – 111,5 пайызға орындалды.«Экономикалық өсім – бұл тек көрсеткіш қана емес, ол ең алдымен халықтың әл-ауқатын жақсартуға бағытталған нақты нәтижелермен өлшенуі тиіс. Сондықтан ауданның дамуы жолындағы жұмысты одан әрі жандандыруды, берілген тапсырмалардың уақытылы орындалуын қамтамасыз етуді тапсырамын», – деді А.Ибраимов.Сонымен қатар, аудан әкімі қаржыны тиімді игеру мен салық базасын кеңейтуге қатысты сала жетекшілеріне және бөлім басшыларына нақты хаттамалық тапсырмалар жүктеді. Жоспарланған шаралардың уақтылы әрі сапалы орындалуы – аудан дамуының негізгі тетігі екені тағы да ескертілді.Жиын қорытындысы бойынша берілген тапсырмалардың орындалу барысы тұрақты бақылауда болатыны ескертілді.<img src="https://knadmin.beoblood.kz/uploads/Zhala_ash_ekonomikaly_damu_2_0c749fcabb.jpg" alt="Жалағаш экономикалық даму 2.jpg">

Жалағаш: Экономикалық даму бағытында оң тенденция қалыптасты

<a href="https://kyzylorda-news.kz/">Kyzylorda-news.kz</a> Сыр бойындағы тіршілікке тірек болған Арал өңірі соңғы жылдары жаңа серпінмен дамып келеді. Мұнда әлеуметтік инфрақұрылымды жаңарту, денсаулық сақтау мен білім беру нысандарын жетілдіру, ауыл шаруашылығын ілгерілету бағытында ауқымды жобалар қолға алынған. Тұрғындардың өмір сапасын жақсартуға бағытталған жұмыстар өз нәтижесін беріп, ауданда жаңа нысандар бой көтеріп, халық игілігіне ұсынылуда. Осы және өзге де маңызды жобалардың жүзеге асу барысымен танысу мақсатында ауданға бұқаралық ақпарат құралдарының өкілдері үшін баспасөз туры ұйымдастырылды.Сексеуіл кентінде «Жайлы мектеп» ұлттық жобасы аясында 300 орындық жаңа мектептің құрылысы жүріп жатыр. Қазіргі таңда ішкі әрлеу және абаттандыру жұмыстары жалғасуда. Мердігер ұйым өкілдерінің айтуынша, нысан қыркүйек айында пайдалануға беріліп, оқушылар жаңа оқу жылын заманауи әрі жайлы ортада бастайды.<img src="https://knadmin.beoblood.kz/uploads/Aral_audany_zhoba_2_0054f1b176.jpg" alt="Арал ауданы жоба 2.jpg">Арал қаласындағы 1910 жылы салынған №14 мектеп-лицейде күрделі жөндеу жұмыстары жүргізілуде. Мектептің іргетасы берік сақталғанымен, инженерлік жүйелері толық жаңартылып, шатыр, терезе, еден ауыстырылып, сыртқы әрлеу және аула абаттандыру жұмыстары атқарылып жатыр. Бұл жұмыстар білім беру сапасына тікелей әсер ететіні сөзсіз.Денсаулық сақтау саласында да елеулі ілгерілеу байқалады. Арал аудандық көпбейінді орталық аурухана жанынан жапсаржай құрылысы жүріп жатыр. 40 төсектік нысанда кардиология мен инсульт бөлімшелері болады. Қажетті медициналық жабдықтармен қамтылған жапсаржай іске қосылған соң, аудан халқына кешенді әрі жоғары сапалы медициналық көмек көрсетілетін болады. Бұған қоса, 25 төсектік жұқпалы аурулар бөлімшесінің құрылысы да жүргізілуде.БАҚ өкілдері «Қамқорлық» оңалту орталығының құрылыс барысымен де танысты. Қазіргі уақытта ішкі жабдықтау жұмыстары жүргізіліп жатыр. Тұзды, сенсорлық, механотерапия және бальнеотерапия бөлмелерімен қамтылатын орталық заманауи оңалту қызметін көрсетуге мүмкіндік береді.<img src="https://knadmin.beoblood.kz/uploads/Aral_audany_zhoba_7f357a2155.jpg" alt="Арал ауданы жоба.jpg">Ауыл шаруашылығы бағытында Ақирек ауылдық округіне қарасты Ақбай елді мекеніндегі егін жинау науқаны қызу жүріп жатыр. Ауыл еңбеккерлері қарбыз, қауын, қызанақ және басқа да көкөніс-бақша өнімдерін жинауға кірісті. Биылғы жылы қолайлы ауа райының және дихандардың тынымсыз еңбегінің нәтижесінде мол өнім алынуда. Жиналған өнімдер облыс аумағына таратылып, жергілікті нарыққа жеткізілуде.Сондай-ақ, Аманөткел ауылдық округінде орналасқан «Арал Рыбторг» ЖШС-нің тоған шаруашылығы назарға ұсынылды. 15 гектар аумақты алып жатқан шаруашылықта тұқы, сазан, ақамур және дөңмаңдай сияқты балық түрлері өсірілуде. 2024 жылы 7,7 млн дана шабақ тоғандарға жіберілген. Жылдық қуаттылығы 300 тонна болатын өндіріс орны болашақта өңірдегі балық өнімінің көлемін еселемек.Арал ауданындағы бұл жобалар - өңірдің әлеуетін арттыруға, тұрғындардың тұрмыс сапасын жақсартуға бағытталған нақты істердің көрінісі. Білім мен денсаулық, кәсіп пен ауыл шаруашылығы қатар дамыған аймақта халықтың болашағына деген сенімі де артып келеді.

Аралда халық игілігіне бағытталған жобалар қарқынды жүзеге асуда

<a href="https://kyzylorda-news.kz/">Kyzylorda-news.kz</a> Бүгін ҚР Парламенті Сенатының депутаттары Наурызбай Байқадамов пен Руслан Рүстемов жұмыс сапарымен Жалағаш ауданына барып, күн сәулесінен энергия өндіретін электр станциясының жұмысымен танысты.Жалағаш ауданының әкімі Ардақ Ибраимов аталған маңызды жобамен таныстырып, 28 МВт қуат өндіретін күн электр станциясының өңір үшін әлеуметтік-экономикалық маңызын атап өтті. Сондай-ақ, жобаны жүзеге асырып жатқан компаниямен әріптестікті одан әрі жандандыру бағытында бірқатар бастамалар қолға алынғанын жеткізді.Аталған жоба – Жалағаш кентінің шығыс бөлігінде энергия тапшылығын алдын алу мақсатында жүзеге асқан маңызды нысан. Станцияны «Nomad Solar» жауапкершілігі шектеулі серіктестігі салған.Жобаны жүзеге асыру үшін кент аумағынан жалпы көлемі 164 гектар жер учаскесі бөлінген, оның ішінде күн электр станциясының құрылысы 75 гектар аумақта орналасқан. Жалпы инвестиция көлемі – 19 миллиард теңгені құрайды.Бүгінгі күні бұл нысанда 19 адам тұрақты жұмыспен қамтылған. Жоба ауданның экономикасын дамытуға, жаңа жұмыс орындарын ашуға және экологиялық тұрақтылықты қамтамасыз етуге өз үлесін қосуда.Халық қалаулылары станцияның жұмысына оң баға беріп, ел игілігіне одан әрі қызмет ететініне сенім білдірді. Сондай-ақ, болашақта осындай жаңартылатын энергия көздері арқылы еліміздегі электр энергиясы тапшылығын азайтуға бағытталған жобалардың маңыздылығын ерекше атап өтті.<img src="https://knadmin.beoblood.kz/uploads/K_n_elektr_stancziyasy_Zhala_ash_2_cac5f5db56.jpg" alt="Күн электр станциясы Жалағаш 2.jpg">

Сенат депутаттары күн электр станциясының жұмысымен танысты

<a href="https://kyzylorda-news.kz/">Kyzylorda-news.kz</a>&nbsp; ҚАЖ департаментіне қарасты &nbsp;№68 мекемесіне Жол патрульдік полициясы тексеру жүргізу үшін келді. Негізгі мақсат &nbsp;– жол қозғалысы қауіпсіздігін қамтамасыз ету, автокөлікті заңды пайдалануын қадағалау.Осы ретте, мекеме қызметкерлерінің жеке автокөлігін құжаттық және техникалық тұрғыдан тексеріп, жол қозғалысы ережелерін ескеруін назарға алды. Көліктің тіркеу құжаттары, сақтандыру полисі, медициналық алғашқы көмек қобдишасының жарамдылық мерзімі және техникалық тексеру куәлігіне де мән берілді. Нәтижесінде, көлік құжатының толық, ал техникалық жағдайы талапқа сай екендігі анықталып, айтарлықтай кемшілік байқалмады.<blockquote>– Жол-көлік апаты сынды оқиғалар көңілді алаң ететіні рас. Сондықтан, жол қозғалысы ережелерін сақтау мен көліктердің техникалық жағдайын тексерудің маңызы зор. Осыған байланысты Жол патрульдік полициясының мұндай тексеруі &nbsp;– тәртіпсіздік пен заң бұзушылықтарға жол бермеуге бағытталған қажетті қадам. Бақылау жұмысы баяуламаса, қауіпсіздік күшейтіліп, түрлі апаттың алдын алуға негіз болмақ, - деді мекеменің жеке құраммен жұмыс жөніндегі аға инспекторы Динара Шахи.</blockquote>

Қазақстан және Қызылорда облысының жаңалықтары