<a href="https://kyzylorda-news.kz/">Kyzylorda-news.kz</a> Қызылорда облыстық сотында 28 маусым – бұқаралық ақпарат құралдары қызметкерлері күніне орай салтанатты шара өткізілді.Шараға Қызылорда облыстық сотының судьясы, баспасөз қызметін үйлестіруші Маликова Шолпан Маратқызы, Қазақстан Республикасы Судьялар Одағының Қызылорда облысы бойынша филиалының төрағасы Елшібеков Бақытбек Есенгелдіұлы, Қазақстан Республикасы Сот Әкімшілігінің Қызылорда облысы бойынша Департаментінің басшысы Асанова Мөлдір Әбдіғабпарқызы және өңірдегі бұқаралық ақпарат құралдарының өкілдері қатысты.<img src="https://knadmin.beoblood.kz/uploads/yzylorda_oblysty_soty_BA_kilderin_tty_tady_3193552e09.jpg" alt="Қызылорда облыстық соты БАҚ өкілдерін құттықтады.jpg">Салтанатты шараны Қызылорда облыстық сотының судьясы, баспасөз қызметін үйлестіруші Маликова Шолпан Маратқызы ашып, бұқаралық ақпарат құралдары бүгінгі таңда азаматтық қоғамның институты ретінде билік пен халықты байланыстырушы және еліміздің жетістіктері мен жағымды жаңалықтарының жаршысына айнала білгенін атап өтті.<img src="https://knadmin.beoblood.kz/uploads/yzylorda_oblysty_soty_BA_kilderin_tty_tady3_57d6629e56.jpg" alt="Қызылорда облыстық соты БАҚ өкілдерін құттықтады3.jpg">Қазақстан Республикасы Судьялар Одағының Қызылорда облысы бойынша филиалының төрағасы Елшібеков Бақытбек Есенгелдіұлы бұқаралық ақпарат құралдарының өкілдері сот жүйесіндегі жаңашылдықтарды халыққа жеткізіп, сот жұмысын ақпараттандырып отыруға зор үлес қосып келе жатқанына тоқталды.Қазақстан Республикасы Сот Әкімшілігінің Қызылорда облысы бойынша Департаментінің басшысы Асанова Мөлдір Әбдіғабпарқызы ақпарат саласының қызметкерлерін кәсіби мерекелерімен құттықтай отырып, игі тілегін білдірді.<img src="https://knadmin.beoblood.kz/uploads/yzylorda_oblysty_soty_BA_kilderin_tty_tady4_99a34aacd2.jpg" alt="Қызылорда облыстық соты БАҚ өкілдерін құттықтады4.jpg">Шара барысында сот жүйесі қызметінің жариялылығы мен ашықтығын қамтамасыз етуге қосқан үлесі үшін республикалық және облыстық бұқаралық ақпарат құралдарының өкілдері Қызылорда облыстық сотының төрағасының, Қазақстан Республикасы Судьялар Одағының Қызылорда облысы бойынша филиалы төрағасының және Қазақстан Республикасы Сот Әкімшілігінің Қызылорда облысы бойынша Департаментінің басшысының Алғыс хаттарымен және естелік сыйлықтарымен марапатталды.Сонымен қатар, сот қызметінің ақпараттық жұмысын жүргізуге белсене атсалысып жүрген мамандары да Алғыс хаттармен марапатталды.Шарада Қазақстан Республикасы Судьялар Одағының 30 жылдығы қарсаңында және бұқаралық ақпарат құралдары қызметкерлерінің арасында Қызылорда облысы бойынша филиалының ұйымдастыруымен өткізілген «Сот репортері» байқауы қорытындыланып, жеңімпаздар анықталды.Байқау қорытындысы бойынша «Халық» газетінің тілшісі Бекмырзаев Тұрар І орын иеленді.Ал, байқаудың бас жүлдесі ақпарат саласының ардагері, «Сыр дидары» газетінің тілшісі Бейбітбек Бүркітбайұлына табысталды.Шара аясында бұқаралық ақпарат құралдары өкілдерінің атынан белгілі қаламгер-журналисттер Н.Көбегенұлы және Б.Бүркітбайұлы сөз сөйлеп, ұйымдастырушыларға алғысын білдірді.Фото: Қызылорда облыстық сотының баспасөз қызметі

Қызылорда облыстық соты БАҚ өкілдерін құттықтады

<a href="https://kyzylorda-news.kz/">Kyzylorda-news.kz</a> Бұқаралық ақпарат құралдары қызметкерлерінің кәсіби мерекесі қарсаңында еліміздің ақпарат, ғылым және мәдениет салаларында жемісті еңбек етіп жүрген бірқатар азамат мемлекеттік марапаттарға ие болды.Солардың қатарында белгілі ғалым, филология ғылымдарының докторы, профессор Амантай Шәріпке «Қазақстанның еңбек сіңірген қайраткері» құрметті атағы берілді. Бұл марапат оның ғылым мен білім саласындағы көпжылдық еңбегі мен ел руханиятын дамытуға қосқан үлесінің жоғары бағаланғанын көрсетеді.Амантай Шәріп қазақ әдебиеті мен журналистикасының өзекті мәселелерін зерттеп, ұлттық құндылықтарды насихаттауға зор еңбек сіңірген ғалым ретінде кеңінен танымал. Ол ғылыми-зерттеу жұмыстарымен қатар, ақпарат саласында да белсенді қызмет атқарып, әр жылдары «Qyzylorda» телеарнасын басқарып, өңірлік журналистиканың дамуына елеулі үлес қосты.Ғалымның басшылық кезеңінде телеарна мазмұндық тұрғыдан жаңарып, өңірдің қоғамдық-саяси, мәдени және рухани өмірін кеңінен насихаттайтын маңызды ақпараттық алаңға айналды. Сонымен қатар жас журналистердің кәсіби тұрғыда қалыптасуына қолдау көрсетіп, шығармашылық ұжымның дамуына ерекше мән берді.Құрметті атаққа ие болған Амантай Шәріпті жоғары марапатымен құттықтап, деніне саулық, отбасына амандық, ғылыми және шығармашылық қызметіне толағай табыс тілейміз.Фото: Ақорда

Белгілі ғалым Амантай Шәріпке «Қазақстанның еңбек сіңірген қайраткері» атағы берілді

<a href="https://kyzylorda-news.kz/">Kyzylorda-news.kz</a> Бұқаралық ақпарат құралдары қызметкерлерінің кәсіби мерекесі қарсаңында Қазақстан Республикасының Президенті Қасым-Жомарт Тоқаев медиа саласының өкілдерін құттықтап, қазіргі заманда кәсіби журналистиканың айрықша рөлін атап өтті.Мемлекет басшысы жалған ақпараттың таралуына қарсы күрестегі журналистердің маңызына арнайы тоқталды:<blockquote>«Заманауи технологиялар цифрлық алаңда алауыздықты әдейі ушықтыратын «ботофермалардың» пайда болуына түрткі болды. Көпе-көрінеу жалған ақпарат тарату, адамды қаралау, өтірікті шындай соғатын қауіпті құбылыс қалыптасты. Оны қазір дипфейк деп атайды. Яғни объективті фактілер эмоцияның көлеңкесінде қалып, қасақана арандатушылық туғызады. Қоғамның ынтымақ-бірлігіне сына қағып, мемлекеттік институттардың атына кір келтіру үшін жасанды интеллект құралдары қолданылады. Танымал тұлғалардың жасанды цифрлық бейнелерін түпнұсқадан ажырату мүмкін емес. Мұндай технологияларды түрлі алаяқтар мен деструктивті күштер белсенді пайдаланады. Сондықтан медиа саласының қызметкерлері жауапкершілік танытып, мемлекеттің аталған гибридті, аса қауіпті қатерлерге төтеп беруіне атсалысуға тиіс. Осы орайда сіздердің еңбектеріңіз орасан», – деді Қасым-Жомарт Тоқаев.</blockquote>Мұндай жағдайда сапалы журналистика қоғамды жалған ақпараттан қорғаудың негізгі құралдарының бірі болып қала береді. Журналистердің кәсіби қызметі азаматтарға ақпарат ағынында бағдар табуға, фактілерді жорамалдан ажыратуға, сондай-ақ тексерілген мәліметтерді манипуляциядан айыра білуге көмектеседі.Жалған ақпаратқа қарсы іс-қимыл орталығы фактілерге адалдық танытып, жоғары кәсіби стандарттарды ұстанатын және таратылатын ақпараттың шынайылығы үшін қоғам алдында жауапкершілікті терең сезінетін медиа өкілдеріне алғыс білдіреді.Фото: ашық дереккөзден

Мемлекет басшысы заманауи журналистиканың айрықша рөлін атап өтті

<a href="https://kyzylorda-news.kz/">Kyzylorda-news.kz</a>&nbsp;&nbsp; Қазақстанда жалған ақпарат тарату фактілері бойынша құқық қолдану тәжірибесі қалыптасып келеді.Ішкі істер министрлігінің мәліметінше, 2026 жылдың алғашқы 5 айында ҚР ӘҚБтК-нің 456-2-бабы (Жалған ақпаратты, құқыққа қайшы контентті орналастыру, тарату) бойынша 59 адам әкімшілік жауапкершілікке тартылды. Сонымен қатар, Қылмыстық кодекстің 274-бабы (Көрінеу жалған ақпарат тарату) бойынша 20 қылмыстық іс тіркеліп, олардың бір бөлігі сотқа жолданды.Талдау көрсеткендей, жауапкершілікке тартуға тек бұқаралық ақпарат құралдарындағы жарияланымдар ғана емес, сонымен бірге әлеуметтік желілердегі хабарламалар, пікірлер, бейнероликтер және өзге де пайдаланушы контенті негіз болуы мүмкін.Соңғы мысалдардың қатарында, төтенше жағдайлар туралы жалған мәліметтер тарату, шынайы оқиға ретінде көрсетілген қойылымдық бейнероликтер жариялау, сондай-ақ мемлекеттік органдар мен құқық қорғау құрылымдарының қызметі туралы шындыққа жанаспайтын ақпарат тарату жағдайлары бар.Жасанды интеллект технологияларын қолдану жағдайларына ерекше назар аударылады. Нейрожелілер арқылы суреттерді, аудиожазбаларды және бейнероликтерді генерациялау авторды оларды таратудың салдары үшін жауапкершіліктен босатпайды. Егер мұндай контент азаматтарды адастырса, үрей туғызса немесе шынайы оқиға ретінде ұсынылса, оның жариялануына міндетті түрде құқықтық баға беріледі.Әрбір жарияланымның нақты авторы бар, ал кез келген резонансты жалған ақпарат соңында цифрлық із қалдырады.Сот және әкімшілік тәжірибе көрсеткендей, құқықтық шаралар парақшаның жазылушылар санына, аккаунттың танымалдығына немесе қолданылған технологияларға қарамастан қабылданады.Жалған ақпаратқа қарсы іс-қимыл орталығы кез келген тексерілмеген хабарламаларға сын көзқараспен қарап, күмәнді дереккөздерден алынған мәліметтерді таратпауды ұсынады. Есіңізде болсын, аудиторияның назарын аударуға ұмтылу жарияланатын ақпараттың шынайылығы мен дұрыстығы үшін заң алдында жауап беру міндетінен босатпайды.Фото: pixabay.com

Желіде жалған ақпарат таратқаны үшін нақты жауапкершілік туындайды

Мемлекет басшысы Қасым-Жомарт Кемелұлы Тоқаев жастардың денсаулығын сақтау, заң мен тәртіп қағидатын нығайту және зиянды әдеттердің алдын алу мәселелеріне ерекше назар аударып келеді. Осы бағытта Қызылорда облысының Полиция департаменті құқық бұзушылықтардың алдын алу, азаматтардың құқықтық сауаттылығын арттыру және есірткі қылмысына қарсы күрес жұмыстарын жүйелі түрде жүргізуде.Жыл сайын 26 маусымда бүкіл әлемде Нашақорлыққа және есірткінің заңсыз айналымына қарсы халықаралық күрес күні атап өтіледі. Бұл күн қоғам назарын есірткі мәселесіне аударып, салауатты өмір салтын насихаттауға бағытталған маңызды дата болып табылады.Осыған орай өңірімізде есірткіге тәуелділіктің алдын алу, жастар арасында түсіндіру жұмыстарын жүргізу және тұрғындардың құқықтық мәдениетін арттыру мақсатында кешенді іс-шаралар ұйымдастырылуда. Арнайы іс-шаралар жоспары бекітіліп, жауапты мекемелер арасында нақты міндеттер айқындалды.Жоспарға сәйкес білім беру ұйымдарында, жастар көп шоғырланатын орындарда және еңбек ұжымдарында 60-тан астам профилактикалық іс-шара өткізілді. Сонымен қатар бұқаралық ақпарат құралдарында 98 ақпараттық материал жарияланды.Бұл бағыттағы жұмыстар алдағы уақытта да жалғасатын болады. Сондай-ақ, 26 маусым күні сағат 20:00-де Қызылорда қаласындағы «Қалалық мәдени-демалыс» паркінде Полиция департаментінің ұйымдастыруымен концерттік бағдарлама өтеді.Барша облыс тұрғындарын аталған іс-шараға белсенді қатысуға шақырамыз. Есірткісіз қоғам құру – баршамыздың ортақ міндетіміз.

Халықаралық нашақорлыққа және есірткінің заңсыз айналымына қарсы күрес күні

<blockquote>– Сіздер қоғамда «Заң мен тәртіп», «Адал азамат» қағидаттарын орнықтыруға, сондай-ақ «Таза Қазақстан» тұжырымдамасын кеңінен дәріптеуге белсене атсалысып келесіздер. Сол арқылы халқымыздың болмыс-бітімін және санасын жаңғыртуға зор еңбек сіңіріп жүрсіздер. Алдағы уақытта да ақпарат саласының мамандары ел игілігіне қызмет ете береді деп сенемін. Мен бүгін Қазақстан Республикасының журналистикасы мен телевизиясының дамуына елеулі үлес қосқаны үшін медиа саласының үздік мамандарына жоғары мемлекеттік награда беру туралы Жарлыққа қол қойдым. Марапатталған азаматтардың арасында саналы ғұмырын ақпарат саласына арнаған ардагер қызметкерлер де бар. Осы тұста ұлттық телевизияның алғашқы кәсіби мамандарының бірі, қазақ тіліндегі тұңғыш эфирді жүргізген майталман диктор Зұлқия Жұматованы ерекше атап өткім келеді. Бүгінгі таңда 106 жасқа келген ардақты тұлғаны халқымыз айрықша құрметтейді. Сондықтан мен Зұлқия Мұқанқызына «Құрмет» орденін табыстау туралы шешім қабылдадым. Сондай-ақ қазір ортамызда отандық медианың мәртебесін арттырып жүрген тәжірибелі азаматтар отыр. Олардың қатарында Ертай Ашықбаев, Татьяна Корецкая, Қайрат Мұсақұлов, Қымбат Досжан сынды танымал журналистер бар. Тілшілердің жас буыны сіздерге қарап бой түзейді, – деді Мемлекет басшысы.</blockquote>t.me/aqorda_resmiФото: Ақорда

Президент бұқаралық ақпарат құралдарының қызметкерлеріне Әділетті, Таза, Қауіпсіз әрі Күшті Қазақстанды құру ісіне орасан зор үлес қосып келе жатқаны үшін алғыс айтты

<a href="https://kyzylorda-news.kz/">Kyzylorda-news.kz</a> &nbsp;«28 маусым – Бұқаралық ақпарат құралдары қызметкерлерінің күні» қарсаңында Қызылорда облысы Полиция департаментінің басшылығы өңіріміздің журналистер қауымын кәсіби мерекелерімен құттықтады.Мерекелік шараға өңірдің бұқаралық ақпарат құралдарының өкілдері қатысып, ақпарат саласы мамандарының қоғамдағы орны мен полиция және БАҚ арасындағы өзара әріптестікті одан әрі нығайту мәселелері кеңінен сөз етілді.<img src="https://knadmin.beoblood.kz/uploads/731253215_997297969705180_5556737707446588350_n_d2cd1116ac.jpg" alt="731253215_997297969705180_5556737707446588350_n.jpg">Жиында Қызылорда облысы Полиция департаментінің бастығы полиция полковнигі Ергешов Серік Жүрсінбайұлы сөз сөйлеп, журналистерді кәсіби мерекелерімен құттықтады.Департамент бастығы бүгінгі таңда ақпарат кеңістігінің қарқынды дамуы бұқаралық ақпарат құралдарының қоғамдағы рөлін бұрынғыдан да арттырғанын атап өтіп, журналистиканың тек ақпарат тарату құралы ғана емес, қоғамдық пікірді қалыптастыратын, ел мен халық арасындағы сенімді байланысты нығайтатын маңызды институт екенін айтты. Сондай-ақ полиция қызметі мен бұқаралық ақпарат құралдарының өзара ынтымақтастығы қоғамдық қауіпсіздікті қамтамасыз етуге, құқықтық мәдениетті арттыруға және азаматтардың мемлекеттік органдарға деген сенімін нығайтуға елеулі үлес қосатынын жеткізді.<blockquote>«Сіздерді кәсіби мерекелеріңізбен құттықтай отырып, шығармашылық шабыт, барлық игі бастамаларыңызға сәттілік тілеймін.Қаламдарыңыз қарымды,еңбектеріңіз жемісті болсын!» деген тілегін білдірді департамент бастығы.</blockquote>Сондай – ақ ақпарат саласының дамуына, қоғамды шынайы әрі жедел ақпаратпен қамтамасыз етуге және құқық қорғау органдарының қызметін кеңінен насихаттауға үлес қосып жүрген БАҚ өкілдеріне алғыс білдірді.<img src="https://knadmin.beoblood.kz/uploads/731232909_997298096371834_4996553051055770413_n_470e09fd12.jpg" alt="731232909_997298096371834_4996553051055770413_n.jpg">Іс-шара соңында бір топ журналистер Қызылорда облысы Полиция департаменті бастығының Алғыс хатымен марапатталып, естелік сыйлықтар табысталды.

Қызылорда облысының Бас полицейі БАҚ өкілдерін кәсіби мерекелерімен құттықтады

<a href="https://kyzylorda-news.kz/">Kyzylorda-news.kz</a> &nbsp;Қасым-Жомарт Тоқаев сән-салтанатты өмір мен «жеңіл ақша» культін дәріптеу дұрыс емес деп санайды.<blockquote>– Өйткені бұл өскелең ұрпақты адастырып, олардың дүниетаным құндылықтары мен өмірлік мұратына теріс ықпал етеді. Жастар медиакеңістіктен ысырапшылдық пен мәнсіз ырду-дырдуға толы алдамшы өмірді емес, керісінше, жасампаз еңбектің, адал табыстың, ішкі мәдениеттің нағыз үлгісін көруі керек. Бүгінгі журналистер екі маңызды рөлді қоса атқаруға тиіс: яғни олар шындықты боямасыз көрсететін айна, сонымен қатар ұлтты өркениетке жетелейтін ағартушылық жолдағы шамшырақ болуы керек. Қазір біз біртұтас ұлт болып, өркендеген, заманауи, яғни озық мемлекет құрып жатырмыз. Бірақ бұл – төл құндылықтарымызды ұмыту деген ұғым емес. Біз жұртымызға тән игі қасиеттерді жаңғырта түсуіміз керек. Мұны азаматтарымыз, әсіресе, жастарымыз терең түсінуі қажет. Мәдениеті жоғары елдің әлемдегі мәртебесі де, беделі де биік болары айқын. Ал нағыз мәдениет үйде де, түзде де әдеп сақтау, көпшілік ортада өзін дұрыс ұстау, басқа адамдарды құрметтеу, сыйлау сияқты қарапайым қағидалардан басталады. Қазақ халқы әдептен аттамаған, әрдайым үлкенге құрмет, кішіге ізет көрсете білген. Жақынына жанашыр көзбен қарап, жығылғанға демеу, сүрінгенге сүйеу болған. Біздің шынайы болмысымыз – осы. Сондықтан адамның ар-намысына нұқсан келтіретін, қауіпсіздігіне қатер төндіретін кез келген әрекетке жол бермеу қажет. Біз озық ел ретінде қоғамда салт-дәстүрімізге негізделген өркениетті этикалық нормаларды орнықтыра түсуіміз керек. Мен бұл туралы үнемі айтып жүрмін. Осы бағыттағы жұмысты күшейту – айрықша маңызы бар міндет. «Қалам елді түзейді» деген сөз бекер айтылмаған. Осы орайда, біз сіздерге – журналистер қауымына зор үміт артамыз. Ақпарат саласының қызметкерлері қашанда ұлт сапасын жақсартатын құндылықтарды дәріптеу ісіне белсене атсалысуы қажет деп санаймын, – деді Президент.</blockquote>t.me/aqorda_resmiФото: Ақорда

Мемлекет басшысы: «Бүгінгі журналистер ұлтты өркениетке жетелейтін ағартушылық жолдағы шамшырақ болуы керек»

<a href="https://kyzylorda-news.kz/">Kyzylorda-news.kz</a> Бүгін «Таза Қазақстан» республикалық экологиялық акциясы аясында Қызылорда қаласындағы «Сыр сүлейлері» аллеясында «Таза қала – ортақ жауапкершілік» атты тазалық шарасы ұйымдастырылды.Акцияның негізгі мақсаты – қоршаған ортаның тазалығын сақтау, экологиялық мәдениетті қалыптастыру және тұрғындардың табиғатқа деген жауапкершілігін арттыру.<img src="https://knadmin.beoblood.kz/uploads/Taza_ala_orta_zhauapkershilik_ekologiyaly_akcziyasy_tti1_f58ed97805.jpg" alt="«Таза қала – ортақ жауапкершілік» экологиялық акциясы өтті1.jpg">Шараға «Жасыл ел» еңбек жасақтарының сарбаздары және белсенді жастар қатысып, аллея аумағын қоқыстан тазарту, жасыл желектердің маңын ретке келтіру, сондай-ақ аллея бойында орналасқан ескерткіштер мен мүсіндерді сүртіп, күтіп-баптау жұмыстарын жүргізді.Шараның арнайы қонағы әрі спикері – үш дүркін «Алтын домбыра» иегері, белгілі айтыскер ақын Мұхтар Ниязов болды. Кездесу барысында ақын жастармен еркін пікір алмасып, «Сыр сүлейлері» аллеясының ашылу тарихы мен оның рухани-мәдени маңызына тоқталды. Сондай-ақ ол Сыр өңірінен шыққан жыраулар мен шайырлардың қазақ әдебиеті мен өнеріндегі орны туралы айтып, жастарды ұлттық құндылықтарды құрметтеуге және тарихи-мәдени мұраларды көздің қарашығындай сақтауға шақырды.Акция аясында қатысушылар экологиялық мәдениеттің маңызы туралы пікір алмасып, қоғамда тазалық пен тәртіпті сақтаудың ортақ міндет екендігін көрсетті. Жастар қоршаған ортаны қорғауға бағытталған бастамаларға белсенді қатысып, туған қаланың көркеюіне өз үлестерін қосты.Мұндай шаралар тұрғындардың экологиялық сауаттылығын арттырып қана қоймай, қоғамда табиғатқа жанашырлық пен жауапкершілік мәдениетін қалыптастыруға ықпал етеді.«Таза Қазақстан» акциясы аясындағы игі бастамалар алдағы уақытта да өз жалғасын табады.

«Таза қала – ортақ жауапкершілік» экологиялық акциясы өтті

<a href="https://kyzylorda-news.kz/">Kyzylorda-news.kz</a>&nbsp; Президент Қазақстанда БАҚ қызметіне қажетті жағдай жасалғанын айтты.<blockquote>– Заманауи технологиялар цифрлық алаңда алауыздықты әдейі ушықтыратын «ботофермалардың» пайда болуына түрткі болды. Көпе-көрінеу жалған ақпарат тарату, адамды қаралау, өтірікті шындай соғатын қауіпті құбылыс қалыптасты. Оны қазір дипфейк деп атайды. Яғни объективті фактілер эмоцияның көлеңкесінде қалып, қасақана арандатушылық туғызады. Қоғамның ынтымақ-бірлігіне сына қағып, мемлекеттік институттардың атына кір келтіру үшін жасанды интеллект құралдары қолданылады. Танымал тұлғалардың жасанды цифрлық бейнелерін түпнұсқадан ажырату мүмкін емес. Мұндай технологияларды түрлі алаяқтар мен деструктивті күштер белсенді пайдаланады. Сондықтан медиа саласының қызметкерлері жауапкершілік танытып, мемлекеттің аталған гибридті, аса қауіпті қатерлерге төтеп беруіне атсалысуға тиіс. Осы орайда сіздердің еңбектеріңіз орасан.&nbsp;Елімізде пікір алуандығы мен сөз еркіндігі бар, ал цензураға заң жүзінде тыйым салынған. Алайда, сөз бостандығы дегеніміз жүгенсіздікке және тәртіпсіздікке жол беру деген сөз емес. Сондықтан қоғамдық пікірді өздерінің теріс пиғылына пайдаланып, медиа саласында айласын асырғысы келетіндер мына бір қарапайым қағиданы жадында ұстауы қажет: бірде-бір адам шексіз құқық иесі емес. Басқаша айтсақ, өз құқыңды білу және сақтау өзгенің құқын бұзу немесе ар-ожданын таптау деген сөз емес. Алдымызда адамдар жалған ақпараттың жетегінде кетпей, күрішті күрмектен ажыратуы үшін медиасауаттылықты барынша арттыру міндеті тұр. Қоғам қауіпсіздігі мен құқықтық тәртіпті қамтамасыз ету үшін жасанды интеллект технологиясының мүмкіндіктерін кеңінен пайдалану қажет, соның ішінде кез келген заңсыз ақпаратты жедел анықтау және бұғаттау жұмысын қолға алу өте маңызды. Біз Заң мен тәртіпке бағынатын ел ретінде құқықтық нигилизмге, әсірешілдікке, яғни, радикализмге және халқымыздың болмысына жат құндылықтарды насихаттау ісіне түбегейлі тосқауыл қоюымыз керек. Бұл – өте маңызды міндет, – деді Мемлекет басшысы.</blockquote>t.me/aqorda_resmiФото: Ақорда

Мемлекет басшысы журналистердің жалған ақпарат таратуға қарсы күресте атқаратын рөліне тоқталды

<a href="https://kyzylorda-news.kz/">Kyzylorda-news.kz</a> «Халықаралық нашақорлыққа қарсы күрес күніне» орай айлық шеңберінде Қызылорда қаласындағы дәріхана ұйымдарында ақпараттық-түсіндірме жұмыстары жүргізілді. Іс-шараға Қызылорда облысы Полиция департаментінің Есірткі қылмысына қарсы іс-қимыл басқармасының жедел уәкілі, полиция капитаны Темірхан Асқатұлы және Департаменттің фармацевтикалық қызметті бақылау бөлімінің басшысы Айжан Сағнадинова қатысты.Іс-шара барысында дәріхана қызметкерлеріне күшті әсер ететін заттарды рецептсіз босатудың алдын алу мәселелері түсіндіріліп, дәрілік заттар айналысы саласындағы қолданыстағы заңнамаға енгізілген өзгерістер туралы ақпарат берілді.Атап айтқанда, 2026 жылғы 1 қаңтардан бастап Қазақстан Республикасында күшті әсер ететін дәрілік заттарды, психотроптық заттар мен прекурсорларды рецептсіз өткізуге қатысты жауапкершіліктің күшейтілгені түсіндірілді.<img src="https://knadmin.beoblood.kz/uploads/2304c464_811c_487c_94f7_1311c33b29fd_9212cdd0cf.jpg" alt="2304c464-811c-487c-94f7-1311c33b29fd.jpg">Күшті әсер ететін заттардың тізбесі Қазақстан Республикасы Денсаулық сақтау министрінің 2023 жылғы 26 маусымдағы №120 бұйрығымен бекітілген. Аталған тізбеге 94 атау енгізілген, оның ішінде Тропикамид, Прегабалин, Зопиклон, Циклопентолат, Сибутрамин секілді дәріханалар арқылы босатылатын дәрілік препараттар да бар.<img src="https://knadmin.beoblood.kz/uploads/111_604cfccad9.webp" alt="111.webp">Сонымен қатар, №120 бұйрықпен бекітілген күшті әсер ететін заттарды рецептсіз өткізгені үшін Қазақстан Республикасының Қылмыстық кодексінің 301 және 303-баптарына сәйкес қылмыстық жауапкершілік көзделгені туралы түсіндіру жұмыстары жүргізілді.Іс-шараның мақсаты – дәріхана ұйымдары қызметкерлерінің заңнама талаптарын сақтауын қамтамасыз ету, күшті әсер ететін заттардың рецептсіз босатылуының алдын алу және халық денсаулығын қорғау.

Дәріхана ұйымдарында ақпараттық-түсіндірме жұмыстары жүргізілді

<a href="https://kyzylorda-news.kz/">Kyzylorda-news.kz</a> Президент ел тағдырына тікелей әсер ететін маңызды оқиға қарсаңында Парламенттің 8-ші шақырылымы өз жұмысын аяқтайтынын еске салды.<blockquote>– Қос палатаның бірлескен отырысына міндетті түрде қатысамын: тарихи кезеңде атқарылған жұмысты қорытындылап, ел дамуының жаңа кезеңіндегі негізгі мақсат-міндеттерге тоқталып өтемін. Біз, Қазақстан халқы жасампаз әрі озық ойлы ұлт ретінде алысқа көз тігеміз. Осы даңғыл жолда берекелі бірлігіміз бен ырысты ынтымағымызды күшейтіп, барлық мақсатымызға жетеміз. Мен бұған кәміл сенемін, – деді Мемлекет басшысы.</blockquote>Қасым-Жомарт Тоқаевтың пікірінше, отандық бұқаралық ақпарат құралдары өздеріне жүктелген жауапты миссияны жоғары деңгейде атқару үшін халықаралық медиа қоғамдастықтағы бәсекеге қабілеттілігін арттыруға тиіс.<blockquote>– Медиаиндустрия цифрлық дәуірдің сын-қатерлерімен алғашқылардың бірі болып бетпе-бет келді. Осылайша, цифрлық матрицаның – қоғам өміріндегі жаңа санаттың бір бөлігіне айналды. Нарықтың түбегейлі өзгеруі салдарынан жаңалықтар порталы, әлеуметтік желілер мен мессенджерлер алдыңғы қатарға шықты. Мерзімді баспасөз бен телевизия бұрынғы үстемдігінен айырылды. Қазіргі жағдай осындай. Алайда мен «Дәстүрлі медианың дәурені өтті» деген пікірмен келіспеймін. Керісінше, газеттер мен телеарналар жаңа форматқа көшіп, инновациялық мультимедиялық платформа құрып, заман талабына сай дамып келеді. Олардың басты артықшылығы – мәселені терең талдап, шолу мен сараптама ұсына алуында. Ақпараттық кеңістікте қарабайыр тақырыптар қаптап, ұсақ-түйекті сөз қылу көбейген заманда сапалы әрі өзекті журналистиканың маңызы еселеп артады. Сондықтан, менің ойымша, дәстүрлі БАҚ қым-қиғаш уақиғалар нөпірінде қоғам үшін ақпарат айдынындағы компас, тіпті идеологиялық бағдар рөлін алдағы уақытта да атқара береді, – деді Президент.</blockquote>t.me/aqorda_resmiФото: Ақорда

Қазақстан және Қызылорда облысының жаңалықтары