<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев АҚШ-тың Қазақстандағы Төтенше және Өкілетті Елшісі Дэниел Розенблюммен және USAID Халықаралық даму агенттігі өңірлік миссия директорының орынбасары Моник Мосольфпен кездесті.Басқосуда аймақ басшысы Қазақстан мен Америка Құрама Штаттары арасында 30 жылдан бері ашық әрі сенімді өзара қарым-қатынас қарқынды дамығанын атап өтті.<blockquote>«Бүгінгі күні Қазақстан мен АҚШ арасында екіжақты қарым-қатынастың барлық бағыттары бойынша кеңейтілген стратегиялық серіктестік орнатылған. Жоғары деңгейдегі тұрақты ресми кездесулер, өзара сауда-экономикалық қатынастың қарқынды дамуы оның айқын дәлелі деп білеміз. Өткен жылдың қорытындысына қарағанда, Қызылорда облысы мен Америка Құрама Штаттары арасындағы тауар айналымы 10,1 млн. АҚШ долларын құрап, алдыңғы жылдың сәйкес кезеңімен салыстырғанда 3,7 есе өскен.Әлемдік қауымдастық Арал теңізінің тартылуын адамзат тарихындағы экологиялық дағдарыстың бірі ретінде бағалады. Құрғаған теңіздің зардабы тек өңірге немесе бір елге ғана емес, барша әлемге тиюде. Осы іссапарда Аралдың қазіргі жағдайымен және атқарылған жұмыстармен арнайы танысқандарыңыз, Аралды құтқару ісіне қосқан елеулі үлестеріңіз үшін алғысымызды білдіреміз», – деді облыс әкімі.</blockquote>Айта кетейік, 2021-2023 жылдары USAID Халықаралық даму агенттігінің «Оазис» жобасы шеңберінде Арал теңізінің құрғаған ұлтанындағы экожүйені қалпына келтіру мақсатында 150 гектар жерге сексеуіл тұқымы себіліп, көшеттер отырғызылды, 500 метр тереңдікте су ұңғымасы қазылып, пайдалануға берілді.Еске салсақ, Мемлекет басшысы 2021-2025 жылдар аралығында Арал теңізінің құрғаған ұлтанындағы 1,1 млн. гектарға сексеуіл екпелерін егуді тапсырған болатын. Биыл 276,2 мың гектар аумақта осы бағыттағы жұмыстар жоспарланған. Қазір 65 мың гектар ұлтанға 19,4 млн. сексеуіл көшеті отырғызылды, алдағы жылы 280 мың гектар алқапқа егіледі.Бүгінгі кездесуде АҚШ елшісі Америка мен Қазақстанның өзара тиімді әріптестігін әрі қарай дамытуға мүдделі екенін жеткізді.Өңірге жұмыс сапары барысында Дэниел Розенблюм Қызылорда облысының су шаруашылығы нысандарымен, USAID Oasis жобасының жүзеге асырылу барысымен танысты.

Облыс әкімі АҚШ Елшісімен кездесті

&nbsp;<a href="https://kyzylorda-news.kz/">Kyzylorda-news.kz</a>&nbsp; Дана халқымыз «Үйлену оңай, үй болу қиын» деп, шаңырақ көтерудің жауапкершілігі туралы бір ауыз сөзбен түйіндеп кеткен. Алайда қазір үйленудің өзі оңайға соқпай тұр. Дүркіретіп той жасау үшін несие алып, отау құрған жастардың шаңырақтары жыл өтпей шайқалып жатыр. Жуырда әлеуметтік желілерде Ranking.kz сайты жариялаған мәлімет алаңдатып қойды. Рейтинг бойынша ажырасу жөнінен әлемде Қазақстан Мальдив аралдарынан кейінгі екінші орынға шыққан. Одан кейін Ресей, Беларусь және Қытай &nbsp;келеді. Ажырасудың ең төмен көрсеткіші Үндістан, Мозамбик және Кения сияқты елдерде тіркелген. Расында, бұл ақпарат шындыққа жанаса ма? Еліміздегі ресми деректер қандай ақпаратты алға тартады? Саралап көрелік.Ұлттық статистика бюросы бұл деректердің шындыққа сай келмейтінін айтып мәлімдеме жасады. «Ажырасу коэффициенті 4,6 тең Қазақстан Мальдив аралдарынан кейін екінші орында тұрғаны туралы ақпарат шындыққа сәйкес келмейді. Бұл жалған деректің негізгі көзі https://worldpopulationreview.com/ сайтындағы мақала болған. 2022 жылдың қорытындысы бойынша елімізде ажырасу коэффициенті 1000 адамға шаққанда 2,27 құраған. &nbsp;2020, 2021 жылдармен салыстырғанда коэффициенттің төмендеуі байқалады. 2023 жылдың қорытынды деректері сәуір айында жарияланады», – делінген хабарламада.Тағы да &nbsp;деректерге жүгінер болсақ, дәм-тұзы жараспағандар саны былтыр 16,8 мың жұп болса, 2022 жылға қарағанда 5,3%-ға аз. Қалада ажырасу 5,2%-ға, ауылда 5,5%-ға азайған.&nbsp;Өңірлер бойынша отбасы құрғандар саны жөнінен Алматы алда тұрғаны белгілі болды. Өткен жылы 13,1 мың жұп некелескен. &nbsp;Одан кейінгі орында &nbsp;Түркістан облысы және Астана қаласы. Ең аз неке Ұлытау облысында тіркелген, 1,5 мың жұп.Ажырасу жөнінен де Алматы көш бастапты. Одан кейінгі орынды Қарағанды облысы мен Астана еншілеген. Ең аз ажырасу да Ұлытау облысында тіркелген, 198 жұп.Сарапшылар еліміздегі ажырасудың бірнеше себептерін атап көрсетеді. Екі жұптың арасына туыстарының түсуі, моральдық шектеулердің болмауы, сонымен бірге ажырасу процесінің жеңіл болуы да әсер еткен. Бұған қоса тұрмыстық зорлық-зомбылық, маскүнемдік, қызғаныш, жұмыссыздық, қаражаттың жетіспеушілігі және тұрғын үй сияқты материалдық мәселелер де өз әсерін тигізеді екен.Иә, отбасы болған соң ыдыс-аяқ сылдырламай тұрмайтыны және рас. Мамандар енді шаңырақ көтергендер 5 жылға дейін бір-бірін түсініп, отбасындағы кикілжіңдерге сабырлылықпен қараса әрі қарай некенің тұрақты болатынын айтады. Алайда 10-15 жыл өткен соң да орта жасқа келгенде шаңырағы шайқалып, екіге айырылып жатқандар жоқ емес. Мұндайда ең әуелі зардап шегетін – бала. Өздерінің ұстанымы мен көзқарасын алға тартып некені оңай бұза салатындар баласының өтпелі кезеңіне көңіл бөлмейді. Одан кейін бала тұйықталу, өз ортасынан алшақтау, түрлі жаман әдеттерге бой алдыру секілді жағдайларға душар болады.Ә.Мүсілімұлы атындағы №101 &nbsp;орта мектептің психологы Жанат Бекпенбетова ата-анасының ажырасуы балаға үлкен соққы болатынын айтады.<blockquote>– Кез келген бала жылулық пен қамқорлықты, мейірім мен қолдауды өзінің отбасынан күтеді. Кәмелет жасына жеткенше ата-анасына арқа сүйейді. Ал ата-анасы ажырасқанда бұл функциялардың барлығы бұзылады. Үлкендер өз басының мәселесімен әуре болады. Мұндайда көп жағдайда бала анасында қалып жатады. Әлі даму үстіндегі бала үшін жанына жақын адамдардың екіге айырылғаны кері әсер етеді. Мәселен, кей балалар өз-өзімен тұйықталып, терең ойға түсіп кетсе, екіншілері өте агрессивті болып кетеді. Бұл ата-анасының ажырасқанын қабылдамай жатқанын көрсетеді. Өйткені қажетті кезде қолдау жетпейді. Бала оны әдейілеп жасамайды. Бірақ сондай жағдайға алып келеді. Дамыған елдерде ерлі-зайыптылар бір-бірімен үйлеспегендіктен саналы түрде ажырасады. Бірақ олар баланың зардап шегетінін жақсы түсінеді. Сондықтан бала кімде қалса да екі жақтап көңіл бөліп, қиын кезеңде жанынан табыла біледі. Олар екі жақтан демеу болып, тұңғиыққа батуына, ашушаң болып кетуіне жол бермейді. Қай психологтың тәжірибесін алып қарасаңыз да, мектептегі оқушының тәртіпсіздігі, үлгерімінің нашарлауы көбіне осындай жағдайдан кейін шығады. Менің алдыма келетін оқушылардың көбі осындай, – дейді маман.</blockquote>Сарапшылардың зерттеуінше, елімізде жылына орта есеппен 140 мың отбасы шаңырақ көтерсе, оның 50 мыңы ажырасып кетеді екен. Ажырасуға арыз беретіндердің көбі – әйелдер. Олар ақылмен емес, эмоциямен әрекет етеді дейді психологтар. Неке жасының күрт өзгеруі де мамандарды алаңдатуда. Қазіргі таңда ерлер үшін некеге тұрудың орташа жасы – 27, ал әйелдер үшін 24 болып отыр. Отбасын кеш құру ажырасу санының артуына ықпал етіп отырған көрінеді.Өңірдегі ресми деректерге қарайтын болсақ, өткен жылдың қаңтар айында 347, биылғы қаңтарда 384 неке тіркелген. Ал ажырасқандар былтыр қаңтарда 35 болса, биылғы қаңтар айында 160-қа өскен. Оның ішінде қалалықтар 90, ауылдық жердегі некенің бұзылуы 70 болған.Жыл басында деректердің артуы әлеуметтік жағдайдың күрделенуін байқатса керек. Атаулы әлеуметтік көмекті алу үшін де осындай қадамға барғандар статистиканы көбейтіп отыр. Сондай-ақ мамандар екі жастың отбасылық өмірге дайын болмауы ажырасудың негізгі себебінің бірі деп түсіндіреді. Тұрмыстық зорлық-зомбылық құрбандарына арнаулы әлеуметтік қызметтер көрсету орталығының директоры Жандос Тұсмағанбетов отбасы құндылығы қазір сезім мен сертке емес, көп жағдайда мүмкіндік пен есепке құрылғанын айтады.<blockquote>– Жастар отбасылық өмірге жеңіл қарайды. Отбасын құрып, сәбилі болғаннан кейін тұрмыстағы ауыртпалықтарды көтере алмай, ұрыс-керісті үдетіп, үйдің берекесін алады. Жас отбасының ойрандалуына қаржылық, материалдық проблемадан бастап, моральдық жеке мәселелерге дейін түрткі болады. Сондықтан оның алдын алу үшін әр жас қарым-қатынасты дұрыс құрудан бастау керек. Шешім қабылдамас бұрын қыз бен жігіт тарапынан рухани дайындық пен жауапкершілік қажет. Оларды үйленбей тұрып, өмірде кездесетін түрлі жағдайлар туралы кинолар көрсетіп, арнайы психолог маманның алдынан бір өткізіп алған артық емес. Бізде қазір отбасы құндылығын насихаттауға арналған орталық көп. Бірақ олар бір күндік шарадан әрі аса алмай жатыр. Маған әріптестерім ренжуі мүмкін. Бірақ бұл – шындық, – дейді ол.</blockquote>Шаңырақтың шайқалуы, ерлі-зайыптының екіге айырылуы қоғам үшін де оңай емес. Ажырасу салдарынан жалғызілікті адамдар мен толық емес отбасылар көбейеді. Ең бастысы ұлттың зияткерлік сапасына, Абай айтқан жастардың «толық адам» болып қалыптасуына кері әсер ететіні анық. Сондықтан ажырасудың салдарымен емес, себебімен күрескен жөн секілді. Фото: Сыр бойы&nbsp;

Ата-анасының ажырасуы балаға қалай әсер етеді?

<a href="https://kyzylorda-news.kz/">Kyzylorda-news.kz.</a> &nbsp; Облыс аумағында «Таза Қазақстан» республикалық акциясы аясындағы «Киелі мекен» апталығы бастау алды. Сыр өңірі – ежелден тарихи-мәдени ескерткіштер мен кесенелерге бай өлке. Мұнда мемлекет қорғауына алынған 567 тарихи-мәдени ескерткіш бар.Осы ретте, 14-20 сәуір аралығына жоспарланған «Киелі мекен» апталығында барлық тарихи-мәдени ескерткіштер, тарихи-өлкетану музейлерінің аумақтары абаттандырылады.Акцияның алғашқы күні Қызылорда қаласындағы «Қорқыт ата кітабының 1300 жылдығына арналған ескерткіш», Ұлы Отан соғысында қаза тапқандарға қойылған белгі, Амангелді Иманов, Жанқожа Нұрмұхамедұлы ескерткіштерінің маңайы тазартылды.Игі бастамаға аралдықтар да атсалысып, аудан тұрғындары «Балықшылар музейінің» ауласын &nbsp;көркейтті, Әбдіжәміл Нұрпейісов музейі аумағында әктеу, сырлау жұмыстарын жүргізіп, ағаш көшеттерін отырғызды. Аталған шараға мәдениет және өнер саласының қызметкерлері белсенді қатысты. Қазалы ауданының тұрғындары да акцияға ерекше қолдау білдіруде. Олар «Жанқожа батыр» кесенесі мен Ғ.Мұратбаевтың мемориалдық музейіне келіп, тазалық жұмыстарын жүргізді. Бұдан бөлек, қазақ хандығының астаналарының бірі болған «Жанкент» қалашығы мен «Бегім ана» мұнарасы, «Кердері» кесенелерінің аумақтары да абаттандырылды.«Киелі мекен» апталығында қармақшылықтар түркі жұртына ортақ қасиетті орын «Қорқыт ата ескерткіш-кешені» мен «Марал ишан», «Қалқай ишан» кесенелеріне тазалық жұмыстарын жүргізді.Ал, жалағаштықтар Бұқарбай батыр және Ұлы Отан соғысы құрбандарына арналған ескерткіштердің, «Түмен әулие» кесенесінің аумағына жиналды. Ағаш көшеттерін отырғызып, күл-қоқыстан тазартты.&nbsp;Сырдария ауданындағы «Асанас», «Қышқала» қалашықтары мен «Қалжан ахун» мешіт-медресесі аумағы тазартылып, игі бастамаға тұрғындар белсене атсалысты.Шиелі ауданындағы «Оқшы ата» қорымының айналасына да тазалық жұмыстары жүргізіліп, ағаш көшеттері отырғызылды.&nbsp;Жаңақорғандағы «Қорасан ата» кесенесі мен «Сығанақ» қалашығы, басқа да тарихи-мәдени ескерткіштер маңы қоқыстан тазартылды. Аталған акцияға аудан тұрғындары, мәдениет және өнер саласының қызметкерлері, сала ардагерлері ерекше қолдау білдірді. Жалпы «Киелі мекен» апталығындағы сенбілікке 3000 адам қатысты, 100-ге жуық іс-шара өтті. Тарихи-мәдени нысандардың маңайына 5000-ға жуық ағаш көшеттері отырғызылды.Апта соңына дейін «Жалаңтөс баһадүр» ескерткіші, «Саяси қуғын-сүргін құрбандарына арналған мемориалды ескерткіш», С.Қожанов, Ы.Жақаев бюсттері мен Мұстафа Шоқай, Бұқарбай Естекбайұлы, Ғани Мұратбаев ескерткіштері, Батырхан Шөкенов атындағы саябаққа тазалау жұмыстарын жүргізу жоспарланған.Облыс көлеміндегі көркейту-көгалдандыру және санитарлық-тазалық сенбіліктері тек акция кезінде ғана емес &nbsp;көктемнің алғашқы күні 1 наурыздан бастау алып, тұрақты түрде жүруде.<figure class="media"><div data-oembed-url="https://www.youtube.com/watch?v=f7FyLXMilko"><div style="position: relative; padding-bottom: 100%; height: 0; padding-bottom: 56.2493%;"><iframe src="https://www.youtube.com/embed/f7FyLXMilko" style="position: absolute; width: 100%; height: 100%; top: 0; left: 0;" frameborder="0" allow="autoplay; encrypted-media" allowfullscreen=""></iframe></div></div></figure>

Сыр өңірінде «Таза Қазақстан» республикалық экологиялық акциясы аясында «Киелі мекен» апталығы басталды

<a href="https://kyzylorda-news.kz/">Kyzylorda-news.kz</a> 25-26 сәуір күні Астана қаласында ENACTUS KAZAKHSTAN NATIONAL EXPO 2024 мектеп оқушылары мен студенттік кәсіпкерліктің ұлттық кубогы өтеді. Байқауға Қазақстанның барлық өңірінен мектеп оқушылары, колледж және ЖОО студенттері қатысады. Сондай-ақ бизнес және білім беру саласындағы көшбасшылар бас қосады. Жалпы көрмеге 200-ден астам команда қатысады деп жоспарлануда. ENACTUS KAZAKHSTAN NATIONAL EXPO 2024 - Қазақстандағы ENACTUS халықаралық бағдарламасының қатысушыларының жоба бойынша нәтижелерінің жыл сайынғы көрмесі. Іс-шараға демеуші компаниялардың көрмесі, бос орындар жәрмеңкесі, іскерлік кездесулер, питчинг және қатысушыларға арналған арнайы байқаулар кіреді. Басты оқиға студенттік кәсіпкерліктің ұлттық кубогының финалы болып табылады, оның нәтижелері бойынша жеңімпаз команда ENACTUS WORLD CUP 2024 әлем чемпионатында Қазақстанның намысын қорғау құқығын алады. Ауқымды сайыстың ұйымдастырушысы – ENACTUS Kazakhstan қоры. Ресми демеушілер – Olzha Agro, KMF&amp;KMF-Демеу, TURAN табиғи суы, Eurasian Resources Group, Raimbek Group, KT Cloud Lab, White&amp;Case, Caravan Resources, Kazakhstan Mining, TSSP, KazAgroFeed, ABS Строй, Leader Еngineering group, NES Kazakhstan. Ресми серіктестер – "Kazakh Tourism" Ұлттық компаниясы" АҚ, "Атамекен" ҰКП, ҚР Ғылым және жоғары білім министрлігі.

Елордада ENACTUS KAZAKHSTAN NATIONAL EXPO 2024 ұйымдастырылады

<a href="https://kyzylorda-news.kz/">Kyzylorda-news.kz</a> Су тасқыны басталғалы бері өңірлерден «жедел желі» телефондарына 1 667 қоңырау келіп түскен, 123 шұғыл психологиялық көмек көрсетілді. Бұл туралы республикалық ақпараттық штабта өткен брифингте ТЖМ Азаматтық қорғаныс және әскери бөлімдер комитетінің аға офицері Ерасыл Сайпаш айтты, деп хабарлайды El.kzақпарат агенттігі.Су тасқыны басталғалы бері 107 465 адам, оның ішінде 38 627 бала қауіпсіз жерлерге жеткізілді. 11 786 адам үйлеріне оралды. &nbsp;Уақытша орналасу пункттеріне 7 598 адам, оның ішінде 3 288 бала &nbsp;орналасты.9,4 млн текше метрден астам еріген қар суы сорып шығарылды, 2 млн қапшық пен 1,2 млн тоннадан астам инертті материал төселді.Авариялық-құтқару жұмыстарына 32 484 адам, &nbsp;3 709 техника, 14 әуе кемесі жұмылдырылды.Сағат 16.00-дегі жағдай бойынша Атырау, Ақтөбе, Ақмола, Қостанай, Батыс Қазақстан, Солтүстік Қазақстан облыстарында 4 870 жеке тұрғын үй, 1517 аула аумағы және 2 035 саяжай үйі су астында қалуда.&nbsp;<blockquote>ТЖМ азаматтарды аса мұқият болуға, су тасқыны кезеңінде қауіпсіздік шараларын мүлтіксіз сақтауға, үйлерден және эвакуациялау пункттерінен тиісті рұқсатсыз кетпеуге шақырады, - деді спикер.</blockquote>

Су тасқыны басталғалы "жедел желі" телефондарына 1 667 қоңырау түскен

<a href="https://kyzylorda-news.kz/">Kyzylorda-news.kz</a> Қызылорда қаласындағы&nbsp;«Білім Ыбырай» қоғамдық қорында&nbsp;108&nbsp;стипендиат бар. Жалпы, бұл жобаның басты мақсаты – мектеп бітіруші үздіктерін мұғалімдік саласына тарту. Және осы мұғалімдік саласына түскен степендиаттармен «Mugalim» бағдарламасы арқылы заманауи, бәсекеге қабілетті, білікті мамандарды дайындау, педогогика саласындағы кадрлық әлеуетті дамыту, олардың тәжірибелерін шыңдау, сондай-ақ тиімді мамандар пулын қалыптастыру. Мұндағы студенттер тек білім алып қана қоймай, білім мен ғылым, өнер мен спорт бағытындағы түрлі байқауларда бақ сынайды.13&nbsp;сәуір күні Шымкент қаласында республикалық “Мұғалім” жобасының ұйымдастыруымен “INTELLECTA” интелектуалды ойынының оңтүстік аймақтық кезеңі өткізілді. Интеллектуалды сайысқа 6 команда қатысып, Шымкент, Түркістан, Қызылорда қаласынан келді. Сыр өңірінің атынан 2 команда бақ сынады. “Ыбырай” қоғамдық қорының белсенділері жиналған “Dariya” командасы жүлделі І орынды жеңіп алса, “Snowdrop” командасы жүлделі ІІІ орынды қанағат тұтты.Әртүрлі мамандық студенттерінен құралған&nbsp;“Dariya” командасының жетекшісі&nbsp;Kyzylorda news&nbsp;ақпарат агенттігінің журналисі, “Ыбырай” қоғамдық қорының координаторы, менторы Азамат Абимолда болды. Ал, команда құрамында педагогикалық мамандықтың 1&nbsp;курс студенттері&nbsp;Шәміл Анарбай, Қабыл Дүйсек, Қуаныш Сапарбек, Мадияр Дузумбайұлы, Азамат Сеитмахамбет пен Бақдаулет Исаев.&nbsp;Жігіттерден құралған құрам&nbsp;ICEBREAKING, MASTER MIND, EXPECTO PATRONUM, VABANK&nbsp;деп аталатын 4&nbsp;кезеңнен қарсыластарын айқын басымдықпен жеңіп, республикалық кезеңге жолдама алды.<blockquote>-&nbsp;Жетекшімізбен бірге аламан додаға тыңғылықты дайындалдық. Әрбір кезеңге өзіндік стратегиямен қарағанымыз рас. Байқау өте тартысты өтті. Соңына дейін кімнің жеңіске жететіні беймәлім болды. Қарсылыстарымыздың барлығы осал болмады. Дегенмен, республикалық кезеңге біздің баратынымызға қатты қуаныштымыз. Енді дайындықты күшейтіп, республикадан жүлдемен оралу керек. Болашақ ұстаздардың білімінің, көкжиегінің кеңеюіне арналған осындай жобалардың барына алғысымызды білдіреміз, -&nbsp;деді&nbsp;“Dariya” командасының капитаны Шәміл Анарбай.</blockquote>Айта кету керек, алғаш рет болашақ мұғалімдер арасында өткізіліп жатқан байқаудың республикалық кезеңі&nbsp;27&nbsp;сәуір күні Ақтөбе қаласында ұйымдастырылады. Қазақстанның Орталық, Солтүстік, Батыс пен Шығыс аймағының үздіктері бас қосатын бәйгеде Оңтүстік аймақтың намысын Қызылорда қаласының жігіттері қорғайды.

Қызылордалық студенттер республикалық интеллектуалды ойында оңтүстік аймақтың намысын қорғайды

<a href="https://kyzylorda-news.kz/">Kyzylorda-news.kz</a> Мәжіліс депутаттарының еліміздің су басқан өңірлеріне сапары жалғасуда. Кеше Еділ Жаңбыршин, Абзал Құспан, Ринат Заитов, Мақсат Толықбай және Нартай Сәрсенғалиев Атырау қаласында, Махамбет ауданы мен Құлсары қаласында болды, деп хабарлайды El.kzақпарат агенттігі.Сапар барысында мәжілісмендер Атырау облысында су тасқынын алдын алуға атсалысып, су басқан елдімекендердің тұрғындармен кездесіп, зардап шеккен аудандар мен ауылдарды аралады.Жайық өзенінен сақтанып, бөгет салып жатқан Алмалы ауылының тұрғындарымен кездесуде Нартай Сәрсенғалиев басты мақсат елді мекендерді тасқын судан аман алып қалу екеніне ерекше назар аударды.<blockquote>Жайық өзені күніне 20 сантиметрге көтеріліп жатыр. Қазір мұнда Алмалыны аралға айналдырып бөгетпен қоршауда. Судың қатты соққаны сонша, тұтас тас қабырғаларды опырып тастауда. Махамбет ауданына да ат басын тіредік. Жайық алдымен осында соғады. Махамбет ауданында жалпы 21 елді мекен бар екен. Соның ішіндегі 17 ауыл Жайықтың тура жанында тұр, – деді депутат. &nbsp;</blockquote>Мәжіліс депутаты Мақсат Толықбай Атыраудың біраз бөлігін сақтап қалуға мүмкіндік бар екенін айтып, &nbsp;Ресейден үлкен нөпірмен су келе жатқанына алаңдаушылық білдірді.<blockquote>Батыс Қазақстан облысына да қиын болайын деп тұр. Ешкімге оңай емес. Қазір Атырауды айналдыра қоршайтын 21 шақырым дамба салынып жатыр. Уақыт аз. Оған қоса Жайық өзені Атыраудың ішімен ағып өтеді. Кәсіпкерлер де қол ұшын созып, техникасына дейін беріп жатыр. Әскерилер жұмылдырылды. Өз қалтасынан ақша шығарған әріптес депутаттарға, күн-түн демей көмек қолын созып жатқан Атырау, Алмалы, Исатай, Махамбет және тағы басқа ауыл тұрғындарына алғысымыз шексіз. «AMANAT» партиясының да ұйымдастыруымен азық-түлік, қап, қосымша жұмыс күші, техника келіп жатыр, – деді Мақсат Толықбай.</blockquote>Құлсары қаласының тұрғындарымен кездесуде Еділ Жаңбыршин жалған ақпаратқа ермей, бұл қиын жағдайдан бірігіп шығу керектігіне баса мән берді.

Мәжілісмендер үлкен нөпірмен су келе жатқанына алаңдап отыр

Kyzylorda-news.kz. Қызылорда облысы әкімдігінің ұйымдастыруымен су тасқыны болған аймақтарға көмек жіберу жалғасуда.Бүгін Батыс Қазақстан облысына 106 арнайы техника жөнелтілді.Арнайы техникалар бір тәулік ішінде әзірленіп, теміржол &nbsp;арқылы жолға шықты.&nbsp;Еске салсақ, осы уақытқа дейін су апаты болған аймақтарға 296 қызылордалық құтқарушы, 135 техника жіберілді.

Сыр өңірінен Батыс Қазақстан облысына арнайы техникалар жіберілді

Биылдан бастап балаларды бірінші сыныпқа қабылдау тәртібіне өзгеріс енгізілді.Тиісінше, Egov.kz «Электрондық үкіметтің» веб-порталы арқылы шағын мөлтектегі білім беру ұйымдарын автоматты түрде таңдау қарастырылған. Осы арқылы сынып жинағы да автоматты түрде жинақталады. Сондай-ақ, «электронды үкімет» порталы арқылы білім беру ұйымымен келісім шарт электрондық форматта жасалатын болады. Жалпы, облыста бірінші сыныпқа құжат қабылдау 1 сәуір мен 31 тамыз аралығында жүргізіледі. Бұл жөнінде Өңірлік коммуникациялар қызметінің ақпарат алаңында облыстық білім басқармасы басшысының орынбасары Бағдат Бердаулетов хабарлады.<blockquote>-Осы жылы бірінші сыныпқа құжаттарды қабылдау мерзімі 31 тамызға дейін ұзартылды. Қазіргі таңда балаларды бірінші сыныпқа қабылдау тәртібіне енгізілген өзгеріске байланысты ата-аналарға тиісті түсіндірме жұмыстары жүргізілуде. Ал білім беру ұйымдарында арнайы E-gov өзіне-өзі қызмет көрсету бұрыштары жасақталған. Биыл облыс бойынша 2024-2025 оқу жылына 17 448 бала бірінші сыныптың табалдырығын аттайды деп жоспарлануда. Оның ішінде қазақ тілінде оқитын оқушылар саны – 16 345 бала болса, орыс тілінде білім алатын балалар саны – 1 103 құрайды. Дегенмен, балалардың мектепке дайындығы да аса маңызды. Осы ретте, балабақша немесе білім беру ұйымдарының даярлық тобында тәрбиеленбеген балалар үшін тамыз айында өңіріміздегі барлық мектептерде дайындық сыныптары жұмыс істейтін болады. Бұл өз кезегінде оқушылардың қыркүйек айынан бастап сабақ процесіне кедергісіз енуіне мүмкіндік жасамақ, - деді Бағдат Қамбозұлы.</blockquote>Қызылорда қаласында үш тілде оқытатын дарынды балаларға арналған мамандандырылған сыныптары бар білім беру ұйымдарында үш ауысымды оқытудың алдын алу үшін қажетті шаралар қабылданды. Мәселен, аталған білім беру ұйымдарына қосымша құрылыс нысандары салынып, балалардың санына орай сынып кабинеттері жасақталды. Сондай-ақ, бірінші сыныпқа қабылдау реттілігі 9,11 сынып бітірушілердің санына қарай сынып жинақтау тапсырылды.&nbsp;

Бірінші сыныпқа құжат қабылдау тәртібі өзгерді

Экономиканың ілгерлеуі ғылымның дамуымен байланысты

&nbsp;<a href="https://kyzylorda-news.kz/">Kyzylorda-news.kz</a> &nbsp;Су тасқынынан зардап шеккен аймақтарға сыр өңірінен 50 млн теңгенің гуманитарлық көмегі жіберілді.Еліміздегі күрделі жағдайға байланысты Мемлекет басшысы Үндеу жолдап, «Осындай қиын-қыстау кезде бір жағадан бас, бір жеңнен қол шығару айрықша маңызды. Бір ел, бір халық болып жұмылып, бұл апатты еңсереміз. Бұл біздің қолымыздан келеді» деген болатын.Осыған орай аймақ басшысы Нұрлыбек Нәлібаев су тасқынынан зардап шеккен өңірлерге көмек көрсетуді ұйымдастыруды тапсырды.Қызылордалықтар су тасқыны болған аймақтарға жәрдемдесуге жаппай жұмылуда. Қала және аудан әкімдіктері ұйымдастырған «Күшіміз – бірлікте» акциясына облыстың жанашыр азаматтары мен волонтерлер өз үлесін қосты.Бүгін аймақтағы ірі мұнай компанияларының бірі – «Торғай Петролеум» акционерлік қоғамы Атырау, Ақтөбе, Қостанай, Батыс және Солтүстік Қазақстан облыстарына 50 млн. теңгенің 120 тонна қайырымдылық көмегін жіберді. Жиырма тонналық 10 жүк көлігі азық-түлік, газ плиталары, қайықтар мен құрал-саймандар, төсек жабдықтары, ыдыс аяқ, гигиеналық заттар мен дәрі-дәрмек тиеп жолға шықты.Облыстық мәслихат төрағасы, "AMANAT" партиясы облыстық филиалының төрағасы Наурызбай Байқадамов, «Торғай Петролеум» АҚ бас директоры Дәурен Әбілқайыров ізгілік керуеніне сәт сапар, су басқан аймақтардағы ағайындарға Сыр жұртшылығы атынан ізгі тілегін білдірді.Тасқын судан зардап шеккендерге көмек көрсетуден жергілікті компаниялар да қалыс қалған жоқ.Бүгінгі қайырымдылық керуенін және еріктілерді айтыскер ақын, Н.Бекежанов атындағы қазақ музыкалық академиялық драма театрының директоры Мұхтар Ниязов бастап барады. Оның бастамасымен өнер адамдары, мәслихат депутаттары 3 млн. теңге қаржы жинап, көмек беруде.Айта кетейік, қазір Қостанай, Ақтөбе облыстарында 66 қызылордалық құтқарушы, 9 арнайы техника, 4 қайық, 20 мотопомпа жұмыс істейді. Бұған дейін Ақтөбе қаласы мен аталған облыстың Қобда ауданына 25 жүк көлігімен 83 млн. теңгенің 112 тонна азық-түлік, көрпе-төсек, гигиеналық құралдар, дәрі-дәрмек, құрылыс заттары, 50 млн. теңгенің 20 тонна жем-шөбі жеткізілді, 2,5 млн.теңге қаржы Ақтөбе облысында ашылған есепшоттарға аударылды.Тасқыннан зардап шеккен басқа өңірлерге де гуманитарлық көмек көрсету үшін «Жастар орталықтары», сауда үйлері мен базарларда ашылған пункттерде әлі де гуманитарлық көмек жинақталуда. Оған Сыр өңірінің жанашыр азаматтары мен еріктілері атсалысып, өз үлестерін қосуда.Фото: Қызылорда облысы әкімінің баспасөз қызметі<img src="https://knadmin.beoblood.kz/uploads/434639057_830315209134117_6434360479920224945_n_3aa2b4999d.jpg" alt="434639057_830315209134117_6434360479920224945_n.jpg">

Қызылорда: Су тасқынынан зардап шеккен 5 өңірге гуманитарлық көмек жөнелтілді

<a href="https://kyzylorda-news.kz/">Kyzylorda-news.kz</a> &nbsp;Аймақ басшысы Нұрлыбек Нәлібаев Ораза айт мерекесімен құттықтады.Құрметті жерлестер!Сіздерді асыл дініміз бен салт-дәстүріміздің байланысын бекемдеп, рухани құндылығымыздың ажырамас бөлігіне айналған қасиетті Ораза айт мерекесімен құттықтаймын. Отыз күн ораза тұтып, сабырын шыңдаған мұсылман жұрты үшін бүгінгі мейрамның орны ерекше.Мемлекет басшысы Қасым-Жомарт Кемелұлы халқымыздың салт-дәстүрі Ислам дінінің, Рамазан айының және Айт мейрамының ұлағатымен ұштасқанын атап өтіп, бұл сабақтастық берекелі бірлігімізді нығайтып, әділетті қоғам құру жолында маңызды рөл атқаратынына тоқталды.Айт мерекесі бастауын тереңнен алады, ғасырлар қойнауынан сыр шертеді. Халқымызды бейбітшілік пен татулыққа, өзара сыйластыққа үндейді. Имандылық пен парасаттылықты, жасампаздық пен мейірімді дәріптеп, жақсылыққа жол ашады. Осы күндері қайырымдылық молынан жасалады, адамдардың бір-біріне деген құрметі артады.Бүгінгі мереке күні әр шаңыраққа құт-береке тілеймін! Ниеттеріңіз қабыл болғай! Ораза айт баршамызға жақсылық әкелсін!

Қазақстан және Қызылорда облысының басты жаңалықтары