<a href="https://kyzylorda-news.kz/">Kyzylorda-news.kz.</a> Ел экономикасының алға жылжуында кәсіпкерлік саласының маңызы айтарлықтай. Оның ішінде ер азаматтармен қатар, әйел-аналардың да халыққа көрсетіп жатқан қызметі бір төбе. Кәсіп деген теңіздің тұңғиығынан қорықпай, оған тәуекелмен бел байлаған нәзік жанның бірі – «Адина» сауда орталығының директоры, «Жыл кәсіпкері», «Үздік кәсіпкер» номинацияларының иегері Нағима Тоқсанбаева. Төменде кәсіпкермен болған сұқбатымызды ұсынамыз.&nbsp;– Нағима Тиышбекқызы, редакциямызға қош келдіңіз! Әңгімені өзіңізден бастасақ?– Сіздерге де рақмет, аз-кем еңбегімізді елеп жатқан. Мен Жосалы кентінің тумасымын. Іргелі білім ордасы Ш.Уәлиханов атындағы №26 орта мектепті «Алтын белгіге» бітірген түлекпін. Ұстаздарымның сенімін ақтаған шәкірттерінің бірімін. Әкем медицина қызметкері болған соң ата-анамның ықпалымен осы саланы таңдадым. Мектепті бітіргеннен кейін асқақ арманмен Қарағандыға жол тартып, сондағы медициналық академияның студенті атандым. Жоғары оқу орнын дәрігерлік мамандық бойынша тәмамдап, еңбек жолымды обаға қарсы күрес мекемесінде бастадым. Нақтырақ айтқанда, мекеменің зертханасына меңгерушілік еттім. Ол жерде табан тіреп 16 жыл қызмет істедім. Білім мен тәжірибеме сай марапат, алғыс дегеннен &nbsp;кенде болмадым. Бірақ бір күнде шешім қабылдадым.&nbsp;– Ол қандай шешім болды екен?– Сонша жыл маңдай теріммен қызмет еткен дәрігерлік жолымды кәсіпке айырбастау керек болды. Мұндай шешім қабылдау маған оңай болмады. Дегенмен, жастайымнан анамның саудамен айналысқанын, кәсіпте береке барын көріп өскен ұрпақ болғасын аса тартына да қоймадым. 1990 жылдары экономикалық құлдырау кезінде күнкөрістен көпшілік қиналып жатқанда анамыз ойланбастан саудаға шығып кетті. &nbsp;Жалпы жанұямыздың дені кәсіпкер. Династия десем де болады. Оған қоса, тұрғындардың қалаға сабылмай аудан орталығынан іздегенінің бәрін тиімді бағада табатын дүкен ашу менің бұрыннан келе жатқан арманым болатын. Бұл арманыма «Ерінбеген етікші болады» дегендей, ерінбей еңбек етуім мен тәуекелдің нәтижесінде жеттім. Егер менен біреу «Кәсіптегі ұстазыңыз кім?» деп сұраса, мен оған бірден-ақ анам деп жауап берген болар едім. Алғашында қызымның есімімен ашқан шағын «Адина» дүкені қазір үлкен сауда орталығына айналды. 30-дан аса адамды тұрақты жұмыспен қамтып отырмын. Олардың халыққа сапалы қызмет көрсетуі үшін жылдың төрт мезгілінде дүкен ішінде киетін арнайы киімін, үзіліссіз жұмыс жасағандықтан 3 мезгіл ас-суын беруді міндетіме алғанмын. Одан бөлек, мереке сайын сыйақыларын, мектепке дайындық есебінде балаларының оқу құралдары мен киім-кешегіне, басқа да жағдайларда бірінші болып қолдауды, көмек беруді басшылық парызым деп санаймын. Оларға сенім артамын. Қызметкерлердің арасында «Жыл үздігі» байқауын өткізіп, жыл қорытындысымен марапат тапсыру да дүстүрге айналып келеді. Мерекелерде бас қосып, тосынсый жасауға тырысамын. Мұның бәрі ұжымның ауызбірлікте, сыйластықта еңбек етуі үшін жасалып отырған қолайлы жағдай деп есептеймін.– Кәсіптің неше түрі бар. Соның арасынан неге киім-кешек сататын дүкенге таңдауыңыз түсті?– Әкем 45 жыл медицина саласында қызмет атқарса, анам Айша Бөлекбаева тұрмыстық қажетін өтеу мекемінде дүкенші болды. Бала кезімізден әдемі киініп үйренгенбіз. Отбасындағы балалар киімнің әдемісін киетінбіз. Таңдап, талғап білетінбіз. Сол себепті де болар таңдауымның киімге түскені. Бір айтарлығы, қоғамды ештеңемен таңғалдыра алмайсыз. Ақиқат осы. Тек ерекше әрі сұранысқа ие кәсіпті бастаған жөн. Өйткені, нарықтық бәсекеге төтеп берудің бірден-бірі жолы осы десем, артық болмас. Жалпы ауданға қажетті кәсіп көп. Біз бастапқыда шағын дүкенде киім-кешек сатсақ, бүгінгі таңда 2 үлкен сауда орталығымыз бар. Оның бірінде тұрмыстық тауарлар мен ыдыс-аяқ, ойыншықтар арзан бағада саудаланса, екіншісінде киім-кешек пен төсек-жабдық, косметикалық бұйымдар мен оқу-құралдары сатылады. Жақын арада орталықтан 2 қабатты сауда орталығы мен тамақтанатын орын, кафе ашуды жоспарлап және оның алғашқы жұмыстарына кірісіп те кеткен жайымыз бар. Осындай жетістікке жетуім – халықтың арқасы. Сондықтан да табысымның бір бөлігін қайырымдылыққа жұмсауды әдетке айналдырғанмын. Көпбалалы аналар мен тұрмысы әлжуаз &nbsp;отбасыларына азық-түлік пен киім-кешек беруден аянып қалмаймын. «Мектепке жол» акциясына да үлес қосып, белсенділік танытудамыз. Өнерді, өнер адамдарын жоғары бағалаймын. Ауданда өтетін іс-шараларға қатысып, жастардың өнеріне қолдау білдіремін. «Жайдарман» клубының демеушісімін. Қандай додаға шықса да, оларды қолдауды өз жауапкершілігіме алғанмын. Өзім білім алған №26 орта мектепке де демеушілік жасап тұрамын. Иә, әдетте жасаған жақсылығыңды жария етпе дейді, бірақ ол арқылы басқалардың жақсы іске ұмтылуына түрткі болатынымызды да ұмытпауымыз керек. &nbsp; &nbsp; &nbsp;– Әлеуметтік желіде белсендісіз. Кез келген адам желіде ойын ашық жазып, сырымен бөлісе бермейді. Ұжымды ұйыстырудағы тәсіліңіз де ерекше көрінеді. Соның бір мысалы – қазақ тілінен сабақ алудасыздар…– Енді қазір саудамды бір жолға қойып қойдым. Кезінде жұмыс істегеннің де пайдасы бар. Адамдармен қалай араласу, қалай сөйлесу &nbsp;керек, этика-эстетикасы бар дегендей, осының барлығы да кәсіп барысында көмегін тигізіп жатады. Ол жерде де басшы болдым. Осы нәрселерді тәртібіме кіргіздім. Бір кәсіпкер болып қана қою аздық етеді. Жан-жақтылық деген бар. Кәсібіңді өзің дөңгелетіп қана қоймай, қоғамға да пайдасы тиюі тиіс. Менде жұмыс істейтін қызметкерлер «Осындай жерде жұмыс істеймін» деп мақтана да білуі керек қой. Оларға үнемі: «Жұмысқа келгенде қуанып келу керек» деп айтып отырамын. Арасында кейбірі 10 жылдан бері бірге келеміз. Жаңадан келген қыз-келіншектер болса, жаймен түсіндіріңдер деп жатамын.&nbsp;– Сергек жүресіз.&nbsp;– Сауда-сауда дей бермей, қоғамға да пайда әкелу керекпіз. Ол үшін өзіміз бірінші кезекте жақсы көңіл-күйде болып, айналамызға жағымды әсер сыйлай білуіміз қажет. Қарап отырсақ, жан-жағымызда шаршаған, қажыған адамдарды байқайсыз. Біреуде жетпеушілік, біреуде отбасылық жағдай, енді біреуде жұмыссыздық... Сол үшінде сергек жүруді қалаймын. Жалпы қоғамда абыройлы болуың үшін – адал болуың керек екен. Ақшаны алғанда да, біреуге ақша бергенде де өтірік алдамауың керек. Адал болғандай қалай, өз-өзіңе адал болуың керек. Алдап кету деген болмайды. Адам көрмейді, алдап кетуге болады дегенмен, Алла тағала бәрін көріп тұрады.&nbsp;– Отбасыңыз туралы айтып өтсеңіз?– Ұл, қыз тәрбиелеп, немере сүйіп отырған бақытты жас әжемін. Қызым Адина мен ұлым Рахатты да кәсіпке баулыдым. Олар қазір Қызылорда қаласындағы «Адина» сауда орталығының жұмысын жүргізуде.&nbsp;– Алда қандай мақсат, жоспарларыңыз бар?&nbsp;– Бұрынғы аудан әкімі Әділбек Бөрібайұлы, кәсіпкерлік бөлімінің басшысы інімдей болып кеткен Біржан Өмірзақовтармен бұған дейін де жылы қарым-қатынаста араласып тұрамын. Мен негізінде кәсіпті қойып, Қызылордаға кетемін бе деп ойлағанмын. Бірақ сондай азаматтарымыз келіп, ауданымызды дамытып, көркейтіп жатқан кезінде қалаға кетемін деген шешіміме тоқтау салдым. Сол кісілер ақылдасып, ұсыныс айтқан соң «Таңсықбай» базарын сатып алдым. Әйтпесе, қалада балаларым мен немерем бар. Ол жақта да бизнесіміз, үй-жайымыз бар. Енді сол шаруаны бастап жатырмыз. &nbsp;Ескі ғимаратты бұзу жұмыстары аяқталды. 15 адамға жұмыс тауып берсем. Болашақта фитнес клубын, балаларға арналған &nbsp;ойын орталығын қолжетімді бағада ашқым келеді.– Айтар тілегіңіз болса?– Аудандық басылымның оқырманы, жанашыры көп болсын. Халыққа тілеріміз – &nbsp;бейбітшілік, тыныштық заманда өмір сүре берейік. &nbsp;Осындай дәрежеге жетіп отырғанымыз сол халықтың арқасы деп білемін.

Ерінбей еңбек ету шыңға жеткізеді

<a href="https://kyzylorda-news.kz/ru">Kyzylorda-news.kz.</a> Мұғалім ‒ қашанда мектептің жүрегі, қоғамның қозғаушы күші. Жақында №264 мектепте еңбек етіп жүрген білікті мұғалім Мөлдір Әбдіқаппарқызымен тілдестік.&nbsp;− Ең алдымен әңгімемізді осы салаға келген сәтіңізден бастасақ… Шәкірт тәрбиелеу, ұстаз болу сізге қандай жауапкершілік жүктейді?− Алғашында ұстаз болу менің арманым емес еді. Бірақ әкемнің «менің қызым ұстаз болады» деген сөзі осы салаға бастап келді. Дегенмен осы таңдауыма еш өкінген емеспін. Қиындығы мен қуанышы қатар жүрсе де, білім беру арқылы әрбір күнімнің сауапқа толы болатыны есіме түскенде әкеме ерекше &nbsp;алғыс айтамын.Мектеп қабырғасындағы ұстаздық қадамым 2006 жылы №101 мектеп-лицейінде басталды. Бастапқыда үлкен жауапкершілікті артқан соң, ішкі қорқынышымның болғаны рас. Алайда мамандығыма деген қызығушылығымды арттырып, көмек беріп, шәкірт тәрбиелеуге үйрететін ұлағатты ұстаздар көп болды. Сол кісілермен тәжірибе алмаса отырып, оқушыға жан-жақты білім беруді меңгердім.Алғаш рет шәкірттерімнің алдына барған кезде ұстаз болу өмірімдегі ең бақытты әрі маңызды сәт екенін ұқтым. Әр күн сайын қайталанатын сабақ барысы үлкен дайындықты, ізденісті, жан-жақтылықты қажет етеді. Ұстаз шәкіртке бар болмысымен үлгі, сондықтан өзіңді ұстау мәдениеті маңызды саналады. «Ұстазға қарап шәкірт өседі» дегендей, әрбір шәкірттің бойындағы қыр-сырын ашуға, сенімдерін ақтауға талпынып келемін. 2010-2011 оқу жылдары алғашқы шәкірттерім түлек атанды. Бүгінде білім берген оқушыларым әр түрлі сала &nbsp;бойынша маман иесі болып қызмет етуде. Олардың ел дамуына үлес қосып, жақсы маман иесі болғанына қуанамын.− Уақыт өткен сайын сала мамандарына жүктелетін талап та жоғарылып келеді. Жаңа заманға сай ұстаз қандай қабілеттерге ие болу керек деп ойлайсыз?− Мұғалім заман ағымына ілесіп отыру керек, өйткені адам үнемі ізденіс үстінде жүрмесе мидың жұмыс істеуі бәсеңдейді. Бұл − ғылымда дәлелденген қағида. Жан-жақтылыққа, үйренуге, ізденуге, оқуға қазір талпынбасақ болашақ ұрпағымыздың дамуына кедергі келетіні анық. Өйткені заман ағымына қарай білімді жаңартып, ақпараттық технологияларды күнделікті өмірде қолдана білу керек. Сондықтан мұғалімнің кәсіби маман болғаны дұрыс.«Ұстаздық ету – өзгенің бақытын аялау, өзіңнің уақытыңды аямау» деген сөз бекер айтылмаған. Біліммен қоса тәрбиені қатар алып жүру де – уақыт талабы. Бұл бағытта оқушылармен үнемі тәрбиелік іс-шаралар, сайыстар, кездесулер, саяхаттар ұйымдастырып отырамын. Игі істер мен жақсылықтарды құлақпен есту балалардың қызығушылығын оята қоймайды, тек айтылған дүниелерді қолмен ұстап, көзбен көрсе ғана белсенділіктері артады. Сонымен қоса біздің атқарған жұмыстарымыз оқушылардың жан-жақтылығына, қоғамда өзін ұстай білуіне, сөйлеуіне септігі тиеді деген сенімдемін. Шынында жер үстінде адам тәрбиелеуден асқан абройлы іс, ардақты жұмыс жоқ.− Қай саланы алып қарасақ та, қиындығы қатар жүретіні рас. Білім саласында сізді қандай мәселе алаңдатады?− Әрине қай саланы алсақ та, қиындықсыз болмайды. Егер адам өз жұмысын шынайы, бар ынтасымен сүйіп істесе алынбайтын қамал жоқ. Әрбір жұмысымызды разылықпен бастасақ, берекелі болатыны анық.Білім саласында көптеген алаңдататын мәселелер бар. Соның бірі − оқулықтағы күрделенген тапсырмалар. Келешекте оқушылардың &nbsp;деңгейіне қарай тапсырмалар берілсе және көлемі біршама азайтылса &nbsp;деген ұсынысым бар.− Ұстаздың мерейлі сәті оқушылардың жетістігінен де байқалып жатады. Осы орайда талапты та талантты шәкірттеріңіз жайлы да айтып берсеңіз…− &nbsp;Білім жүйесінің жаны да, жүрегі де − ұстаз. Ал ұстаздың мерейін көтеріп, еңбегін ақтайтын шәкірті. Білім алу барысында ата-ана, ұстаз, білім алушы болып үштікті берік ұстансақ, әрбір шәкіртіміздің жетістікке жетеріне сенемін. Әрбір шәкірттің бойында талап та, талант та болады. Осы кезге дейін мектепті «Алтын белгімен» бітірген шәкірттеріммен, «Білім инновация лицейінде», НЗМ мектептерінде оқуын жалғастырып жүрген оқушыларыммен мақтана аламын. &nbsp;Қазіргі таңда мектеп бітіруші түлектерімнен үлкен үміт күтудемін. Сонымен қоса облыстық, қалалық, мектепішілік жарыстарда жүлделі орындармен марапатталған оқушыларым да жеткілікті.− &nbsp;Сұхбатыңызға рақмет!

Мөлдір Әбдіқаппарқызы: Білім жүйесінің жаны да, жүрегі де – ұстаз

<a href="https://kyzylorda-news.kz/ru">Kyzylorda-news.kz.</a> «Дарын» мемлекеттік жастар сыйлығын иеленгендердің ішінде Сыр бойының перзенттер бар. Оның бірі – жыршы, киелі өнердің насихатшысы Күнсұлу Түрікпен. Қуанышты сәтте Күнсұлумен сұхбаттасудың сәті түсті.– Күнсұлу, «жүзден жүйрік, мыңнан тұлпар» шыққан жеңісіңіз құтты болсын. Бұл сыйлық кез келгенге берілмейтіні белгілі. «Дарын» жастар сыйлығын алғандағы әсеріңіз?..– Расында, «Дарын» мемлекеттік сыйлығы дарынды, шығармашыл жастарға үлкен шабыт сыйлайтын мемлекеттік сыйлықтың баспалдағы деп түсінемін. Әрине, «Дарын» сыйлығына шашасына шаң жұқтырмайтын талантты үміткерлер аз болған жоқ. Несібемізге орай биыл бұл сыйлықты өнердің ішінде жыр өнеріне бергенді жөн көрген болу керек. «Сырдың елі – жырдың елі». Сыр елі – жырдың ошағын сөндірмеген, қасиетті өнердің қарашаңырағы. Бұл сыйлық Сыр мәдениетінің, оның ішінде жырдың айналасында жүрген Сыр жыршыларының ортақ жеңісі дер едім. Осындай мәртебеге қол жеткізудегі әсерді сөзбен жеткізе алмаймын. Өнердегі еңбегімізді бағалап, осындай құрметке бөлегені үшін еліме алғысым шексіз. Мені қолдаған, «Дарын» сыйлығына ұсынған сырбойылықтарға, облыстық мәдениет басқармасына, облыстық халық шығармашылығы ұжымына ризашылығымды білдіремін. Сонымен қатар менің жетістікке жетуіме септігін тигізген өмірдегі алғашқы ұстазым – ата-анама, өнердегі ұстаздарыма алғысымды айтамын.– Жыраулық өнердің ізін жалғап келе жатқан жас буынның бірісіз. Шығармашылығыңызда нендей жаңалық бар?– Осыдан бір-екі жыл бұрын жыршылық өнерді насихаттау мақсатында Марат Сүгірбай деген азаматпен бірге бірнеше фестиваль ұйымдастырдық. Бұл фестиваль нәтижелі болды. Жастардың ата мұрасын көзінің қарашығындай сақтап, қасиетті өнердің болашағына бей-жай қарай алмайтынына көзіміз жетті. Бұл мақсатта біршама жобалар жасадық. «Жырласа, жастар жырласын!» атты кең көлемде республикалық фестиваль ұйымдастырдық. Сол шараның ізінше өзім «Ән, терме, домбыра курсы» жұмысын бастадым. Онлайн форматтағы курстың мақсаты – жастардың дәстүрлі ән-жыр өнеріне деген қызығушылығын ояту. Бір қызығы, бұл курсқа бұрын қолына домбыра ұстап көрмеген, жыр айтып көрмеген, тіпті жырдың не екенін білмейтін талапкерлер де қызығушылық білдіріп, қатысуда. Олардың ынтасы мені қуантады. Бір-екі аптаның ішінде жырды түсінгендер аз емес. Сондай-ақ курсқа шетелдегі қандас бауырларымыз қатысуда. Бұл арқылы әр қазақтың қанында бар дәстүрлі жыр өнеріне үлкен жауапкершілікпен қарайтынын түсіндім. Сонымен қатар кәсіби шеберлігін арттырып жүрген аға буын, орта буын өкілдері де бар. Курстың алғашқы кезеңін аяқтадық. Бүгінде екінші кезеңге талапкерлерді қабылдау басталады. Болашақта бұл курсты үлкен жыр мектебіне айналдырсам деген мақсатым бар.– Бір сұхбатыңызда «әрбір орындаушы өзінің жыр қорымен өлшенеді» деген екенсіз. Сіздің қорыңызда қанша жыр бар? Таңды таңға ұрып жыр айтқыңыз келетін сәттер болады ма?– Шынында солай. Қазіргі кезде таңнан-таңға жыр айтатын сәт болмауы мүмкін. Бірақ халық сұраған кезде тартынып қалмайтындай деңгейде әрдайым дайындық, ізденіс болуы керек. Әрине, екі-үш күн қатарынан жыр айтатын сәттер болады. Сырттан келген қандастарымыз немесе ауылдағы ағайын әлі де жыр тыңдаудан жалықпайды. Өзім сондай сәттердің куәсі болдым. Биыл карантин кезінде халықтың дәстүрлі өнерге деген қызығушылығы қайта оянды. Әр істің қайыры бар деген ғой. Сол себепті жыршылар халық жыр сұраған кезде дайын болуы керек. Өзім әрдайым дайынмын деп айта аламын.– Дәстүрлі өнерде жаңа есімдер бар ма?– Әр өңірде жаңа есімдер бар. Бір ғана Қызылорда облысының Қармақшы ауданындағы Жыраулар мектебі жыл сайын қаншама шәкірттер дайындауда. Шиелі ауданында Нартай мектебі жұмыс істеуде. Арал ауданында да Жыраулар үйі бар. Жыл сайын жыраулық өнерге жүздеген есім қадам басады. Бұл – үлкен жетістік.– Сұхбатыңызға рахмет!

Күнсұлу Түрікпен: Жырдың ошағын сөндірмеймін

<a href="https://kyzylorda-news.kz/ru">Kyzylorda-news.kz.</a> Маркетинг дәуіріне көшкелі жаңа мамандықтар сұранысқа ие бола бастады. Яғни біз бұрын назар аудармаған SMM, таргетолог, дизайнер, копирайтерлер арасында бәсекелестік болуы да заңды дүние. Бизнес саласында жүргендердің сатылымын бір ғана батырмамен миллионға жеткізіп жүрген қызылордалық Ақбөпе Мұсатаева – таңдаулы таргетолог. Өз мамандығының қыр-сырымен бөлісіп, шәкірттерін осы салада шыңдап жүрген тәжірибелі маманмен жақында сұқбаттасқан едік.– Ақбөпе Дүйсенханқызы, инфобизнес десе үрке қарайтындар көп. Бұл мамандыққа қалай қадам бастыңыз?– Өзім &nbsp;Жаңақорған ауданы Жайылма ауылында дүниеге келдім. Мектепте 9-сыныпты бітірген соң, Шымкент қаласындағы Авиценна колледжіне оқуға түсіп, мейірбике ретінде кәсіби білімімді жалғастырдым. Оны да жақсы деңгейде аяқтадым. Тұрмысқа шыққанша дәріханада 40 мың теңге жалақыға жұмыс істеп жүретінмін. Бірнеше жыл бұрын болса да, ол кезде айлығым жолым мен тамағымнан артылмайтын.Кейін тұрмысқа шығып, балалы болдым. Үйде отырып немен айналысуға болады деген ой келді. Қандай жұмыс істеймін? Қолымнан не келеді? Үйде отырып ақша табуға болатын жаңа мамандықтарды зерттей бастадым. Жеке кәсіп бастау туралы да ой келді. Ниша таңдаудан біраз қиындықтар болды. Содан инстаграм арқылы жоба сатып алдым. Сол жобаның серіктесі атанып, дайын курсты сату арқылы табыс таба бастадым. Алғашқы клиенттер өзімнің достарым, туыстарым болды. Уақыт өте тұтынушы таусыла бастады. Блогерлерге жарнама беріп көрдім, бірақ нәтиже болмады. Сол кезде алғаш рет таргет жарнамасымен &nbsp;танысып, оны инстаграм арқылы «продвигать» батырмасы арқылы жіберген болатынмын. Нәтижесі жақсы болды. Осылайша таргеттің пайдасын және ол арқылы табыстың қанша есе артатынын түсіндім, толықтай осы мамандыққа ауыстым. Нақты бір сарапшыны білмегендіктен, түрлі онлайн жоба, курсты сатып алып, соларды оқу арқылы таргет жарнамасын үйрендім.– Жеке кәсіпте сұраныстың артуы таргетке қаншалықты тәуелді?– Пандемия кезінде барлық кәсіп үйге дейін жеткізіп беру, қашықтан онлайн қызмет көрсетуге бейімделіп үлгерді. Ал кез-келген онлайн бизнес иесі таргет жарнамасын қолданады. Кәсіпкер ретінде оны қолданбау қателік сияқты. Себебі өзім бірге жұмыс істейтін жобаларда таргет қолданатындардың саудасы ең кемі 2 есе алға жылжуда. Кез-келген тұрақты клиенті бар, жақсы жүріп тұрған кәсіп иелері де таргетке жүгініп жатады. Демек, жарнаманың пайдасы көп.– Осы мамандықтың қыр-сырын айтып өтсеңіз…– Таргет жарнамасы алғаш 2015 жылдың соңында инстаграм желісіне жаңа функция ретінде қосылған еді. Басында көбі түсінбегенмен әлеуметтік желі кәсіпкер мен кәсіптің бет-бейнесін қалыптас¬тыратын ғып, өзін ұсынатын алаңға айналғанда таргетке сұраныс артып, тұтынушыны көбейтіп, табысты арттырудың тиімді құралы болып үлгерді.Тәжірибелі маман ретінде өзіме таргет жарнамасы үшін сұраныс көп. Инстаграм желісінде 92000 оқырманым бар. Күніне кем дегенде түрлі бизнес иесінен 10 жарнама келеді, солардың ішінен таңдап, 5 жарнаманы шығарамын. Бұл мамандық қазір қазақ қоғамында кеңінен қанат жайғанын мойындау керек. Сонымен бірге таргетолог мамандығы – жастарға, үйде отырған аналарға, жұмыссыз адамға керемет мүм¬кіндік. Себебі беделді кәсіпкерлердің өзі таргет жарнамасын шығара алмай, таргетологқа жүгінеді.Жоғарыда айтып өткенімдей, мейірбике болып алатын 40 000 теңге жалақымды қазір күніне тауып жүрмін. «Бизнес set» және «Cosmos» жобалары бойынша біраз қазақты таргет арқылы табыс табуға үйреттім. 3 айда жасап жатқан жобалардың сертификатталған миллионері атанып, қазір шәкірттерімнің өзі бұрынғы жылдық табысын бір айда шығарып алуда. Бұл – мен үшін үлкен қуаныш.– Мамандықтар жойылып, жаңасы пайда болып жатады. Таргет «қашанға дейін өмір сүреді» деп ойлайсыз?– Қолданыстан қашан шығатынын білмеймін. Бірақ әзірге кәсіпкерлер мен қоғамдық маңызы бар орындар үшін басты қажеттіліктің бірі. Меніңше, таргет жарнамасы қажетсіз болып қалмайды, тек өзге бағытқа өзгеріп, жаңа функциялар, әдіс-тәсілдер енуі мүмкін. Әрине, ешқандай мамандықты тон пішіп, осынша уақыт қана өзекті болып, қажеттілердің қатарында болады дей алмаймыз. Себебі кезінде бір ғана техника шыққанға дейін қаншама адам қарапайым қарды қатырып, мұздатқыш ретінде қолданды ғой. Азық-түлікті мұздатып тұру қызметі үшін мұз тасушы, оны қатырып беруші мыңдаған адам бір ғана тоңазытқыш пайда болған уақытта жұмыссыз қалып кетті. Сондықтан таргет жайлы нақты кесіп-пішіп айта алмаймын. Мүмкін, оның орнын басқа техникалар басатын шығар. Мүмкін, таргет жаңа деңгейге көтерілетін болар. Оны алдағы бесжылдықта білетін боламыз.

Жерлесіміз таргетолог саласының қыр-сырымен бөлісті

<a href="https://kyzylorda-news.kz/ru">Kyzylorda-news.kz.</a> Соңғы жылдары адамды бейжай қалдырмайтын, ерекше эмоция сыйлайтын сыйлық жасау мүмкіндігі көбейді. Алтыдағы баладан алпыстағы қартқа дейін жаңа эмоция арқылы жаны рахаттанып, өмір сүруге құлшына түседі, өзіндегі шаттықты өзгелерге де таратпай тұра алмайды. Сондықтан бір ғана сыйлық бүкіл ғұмырға жететін ерекше сезім сыйлауы ғажап емес.Қызылордалық жас Әйгерім Бахытжанның арнайы мүсіншелер жасау кәсібі мыңдаған адамды қуантып келеді. Көпті қызықтырған кәсіптің құпиясы неде? Қаншалықты сұраныс бар? Осы жайында Әйгерім Бахытжанқызымен сұқбаттасудың сәті түсті.– Кәсібіңіз қаламызда жалғыз-ақ. Идея қайдан келді?– Өзім Қызылорда қаласының тұрғынымын, осында туып-өстім. 2015 жылы Астана медицина университетіне оқуға түстім. Интерн-врач боп қызмет еткім келеді. Бұйырса, резидент боламын. Бұл кәсіпті бастау жайлы карантиннің алдында, 2020 жылы наурыз айынан бастап ойға алып, көп ұзамай іске кірістік. Сол уақытта барлық салада дерлік деградация жүрді. Аурухана да жабылды, біразы онлайн режимге ауысып, кәсіптік нысандардың көбі құлдырап жатты, кейбірі жаңа жүйеге көшті. Осындай сындарлы, қиын сәтте жолдасым екеуміз туған жерге оралуға бел будық. Бірақ барған соң немен айналысамыз? Қандай кәсіп бастауға болады? Әртүрлі идеялар келіп, ойланып жүрдік. Осыған қызықтым.Шетелде осы саламен айналысатын кәсіпкерлерді көріп, Астана қаласынан оқытатын курстарды іздедім. Осылайша бір курсты тауып, оқып үйреніп алдым. Нәтижесінде енді ғана дамып, ірі қалаларда таралған кәсіп түрін Қызылордаға әкелдім. Көбінесе Солтүстік Қазақстанның тұрғындары, ата-аналар тапсырыс беріп, қызығушылық танытады.Бұл кәсіпті қолөнер түрі десе де артық емес. Себебі қолмен, зейінді бір нәрсеге шоғырландыру арқылы жасалады. Тәуекел деп осы саланы бастағанда көбісі түсінбейтін, тіпті, үрке қарайтын. Көпшіліктің көзінен мұның не қажеті бар деген секілді сұрақ көрінетін.– Алғашқы тапсырысыңызға тоқталып өтсеңіз…– Ең алғашқы тапсырысты досымның жаңа туған нәрестесіне арнайылап жасадық. Үйіндегі кісілер мынау не деп таңданып, басқаша көзқарас танытыпты. Одан кейін 5 күннен соң дайын нәтижесін, картинканы әкеліп табыстаған кезде олар таңданысын жасыра алмады. «Бұлай жасауға да бола ма? Қалай жасайды? Ерекше екен» деп қызығып, рақметін жаудырғаны есімде. Сол кезден бастап инстаграм әлеуметтік желісінде арнайы парақша ашып, нәтижені, әр тапсырысты салып отырдым. Осылайша бір адамнан бір адам естіп, әлеуметтік желі арқылы танып, разы болған тұтынушылар тегін жарнама жасай бастады.– Мүсіншелер қалай жасалады?– Туындылар арнайы ұнтақтар арқылы жасалады. Өзіндік құрамына сай ұнтақтарды араластыру арқылы қажетті массаны, өнімді аламыз. Цемент тектес арнайы ұнтақты араластырып қалыпқа құйған соң, өзінің формасына еніп, қатып, ерекше мүсіншеге айналады. Бізде ата-аналар баласы дүниеге келгенде, үш күн өткенде, бір ай, алты ай, бір жас мерзімінде де естелік үшін жасатады. Тіпті, отбасындағы үш-төрт балаға жасайтындар да бар. Мұның бәрі де естелік. Қағаз секілді жыртылып, сарғайып кетпейді, су өтпейді. Қайда, қанша уақыт сақтасаңыз да сол қалпында тұрады. Мәселен, баланың картинасына қашан өмірге келгені, сағаты, салмағы, бойы жазылып, әдемі ескерткіш ретінде көңілге жылылық сыйлайды. Баланың, үлкен адамның, тіпті, шетелдерде иттің, мысықтың аяқтарының мүсінін жасап жатады. Мұнда аяқтың, қолдың әр клеткасы, ізі анық әрі толық түсетіндіктен, мұны бір жағынан ДНК анықтамасы десек те болады. Смартфондарда «саусақтың ізі» арқылы тіркелу, сол арқылы телефонды ашу жүйесі енгізілген ғой. Сол секілді мұнда да адам қолының өзіне ғана тән сызықтары, қайталанбайтын әр қыртысы, қолдың көлемі өз қалпында, жүз пайыз анық көрінеді.– Ерекше тапсырыстар болды ма?– Ата-ананың талабына, талғамына сай жасай беремін. Мысалы, маған бір ата-ана теңіз, біреуі батыр, біреуі жұлдыз, бірі ғарышкер бейнесіндегі мүсіншелерге тапсырыс берген еді. Барлығы да талғамға байланысты.Ерекше есімде қалған бір тапсырыс бар. Медицина саласында жүрген мықты хирург, офтальмологқа ағайға арналған сыйлыққа тапсырыс берді. Әріптестері қанша көзді емдеп, қанша адамның өмірін аман алып қалған, тағдырына әсер еткен дәрігердің қолын мүсіншеге айналдырып, ескерткіш әрі бағалы сыйлық ретінде ұсынды.Бұл салада сұраныс жоғары десем артық емес. Көбіне аудан, ауылдан сұрап жатады. Өкінішке қарай, қаланың ішінен тапсырыс қабылдап, жеткізетіндіктен сырт жақтарға шығуға мүмкіндік аз. Соған қарамастан ата-аналар Қазалыдан, Шиеліден келіп, естелік ретінде сақтап қалу үшін баланың қолы, аяғының мүсіншелерін алып жатады. Бағасы маңызды емес. Бұл атадан балаға мұра сияқты, жүрекке жылу сыйлап, жылдан жылға сақтала беретіндіктен, құнсыз, өлшеусіз сыйлық.– Сұқбат үшін рақмет!

Қызылордалық жас ерекше кәсіппен айналысады

Әділбек Жаханов: Халық ‒ менің университетім 

<a href="https://kyzylorda-news.kz/ru">Kyzylorda-news.kz.</a> Ел асып, еңбектеніп жүрген жастар көп. Бірі ғылым арқылы, бірі техника арқылы адамзатқа пайдасын тигізіп жатса, енді бірі кәсібімен кеңге қанат жаюда. Маңдай терді кәсіппен байланыстырған Жасұлан Серіков — АҚШ-қа көшкен қызылордалықтың бірі.— Жасұлан аға, АҚШ-қа қашан көштіңіз? Америка қандай мүмкіндіктер сыйлады?— Өткен жылдың маусым айында отбасымызбен түгел осында көшіп келдік.Тура бір жыл болыпты. Отбасымызбен грин карта ұтып алған едік. Ал грин карта Америкаға заңды түрде кіріп шығуға, сонда өмір сүруге, кәсіп бастауға мүмкіндік береді.Осындай мүмкіндікті неге пайдаланып көрмеске деген ниетпен көшкен едік. Бізге тек екі түрлі шектеу бар. Біріншіден, мемлекеттік қызметке орналаса алмаймыз. Екіншісі, сайлауға қатысып, дауыс бере алмаймыз. Әрине, екеуінің де бізге ешқандай қажеттілігі жоқ. Одан бөлек американдықтарға берілетін барлық мүмкіндік пен құқықтық артықшылықтар бізге де ортақ.&nbsp;Американың берген мүмкіндіктеріне тоқталсақ. Алдымен мен үшін кәсіп бастауға үлкен мүмкіндік берді. Жақында 7 %-пен автокредит алдым. Қазақстанда автокредит жағы қиындау. Бастысы, осы кішкентай бизнес жобам арқылы отбасымды материалдық жағынан қамтамасыз етіп, ай сайынғы жалдамалы пәтердің ақысын төлеп отырмын. Төрт баламның үшеуі ең үздік мектепте білім алады. Медицина жағынан тегін, сапалы қызметтер бар. Мұның бәрі — мен үшін де, отбасым үшін де үлкен мүмкіндік.&nbsp;— Жақында Абай облысында орын алған өрт кезінде қаншама қарапайым қызметкерлер, қазақтың азаматтары жалын құшты. АҚШ-та адам өмірінен былай қойғанда, табиғаттың қауіпсіздігіне қатаң қарайтын секілді...&nbsp;— Өрт – тілсіз жау. Мұндай төтенше жағдай, өкінішке орай, барлық елде орын алып жатады. Америкада қай салада болмасын, адам өміріне, өмір қауіпсіздігіне баса назар аударады. Абай облысындағы жағдай барысында өрт сөндірушілердің қауіпсіздігіне қатысты қорқынышты ақпараттарды естіп отырмыз. Тіпті, дұрыс аяқ киімі де болмаған екен. Соған қарамастан өрт сөндіруге аттанған. Америкалықтар адам өмірі түгіл бір түйір талдың хал-жағдайына бейжай қарамайды. Яғни, заң барлығына ортақ. Басқа елдермен салыстырғанда өрт кезінде адам шығыны аз.&nbsp;— «Жан аямай кәсіп қыл» дейді Абай атамыз. Кәсіпкерлікке қалай келдіңіз? &nbsp;— Қызылордада жүрген кезімде де шағын ИП, кішкентай кәсіптерім болды. Әрине, ірі кәсіпкер болдым деп айта алмаймын. Алайда кәсіп арқылы қажетті шығындарды жауып, отбасымды қамтамасыз етіп жүрдім.«Атамекен» &nbsp;кәсіпкерлер палатасында жұмыс істедім. Жалпы тәжірибе бар. Дегенмен кәсіп бастау, оны дөңгелетіп әкету оңай емес.&nbsp;Америкада кәсіпкерлердің жобаларына үкімет араласпайды, тиіспейді. Тек заңмен жүрсеңіз болды. Америкалықтардың жауапкершілігі шектеулі формасы LLC деп аталады. Жақында сәуір айында кәсіпкер ретінде сонда тіркелдім. Жүк көлігін алып, кәсібімізді бастап кеттік. Әрине, алғашқы ай қиынға соқты, тапсырыс болмады. Алайда біртіндеп тапсырыстар, қызығушылық танытушылар артып келеді. Бұйырса, долларлық миллионер атансақ деген мақсатымыз бар. Бір жылдаң соң нәтижемізді көреміз. Бізде, Қазақстанда, қара жұмыс деп бөліп қараймыз. Бәрі жұмсақ креслода, таза орында жұмыс істегісі келеді. Ал Америкада жұмысты қиын, оңай, жақсы, жаман деп бөлмейді. Жүк тасушының өзі жақсы жұмыс. Адал еңбекпен келсе болды.— Алдағы уақытта қандай жоспарларыңыз бар? Туған жерге тың идеялармен оралу ойда жоқ па?— Шынымды айтсам, өзім де Америкаға сондай мақсатпен келдім. &nbsp;Осында жұмыс істеп, кәсіп жүргізіп, осы елдің артықшылығы мен жақсы жақтарын бойыма сіңіріп, қажетсіз тұсын қалдырып, тәжірибе жинақтағым келеді. Содан кейін араға 3-4 жыл салып, керегімді алған соң елге оралып, жиған білімімді іске асыру ойымда бар. Балаларым тіл үйреніп, үлкен ұлым 11 сыныпты бітірген соң ЖОО-ға түссе, бірінші арманым сол. Одан кейін кәсібімді дөңгелетіп, миллионер атану мақсаты тұр. Осы екеуі орындалған соң Қызылордаға оралып, ата-анамның, достарымның қасында болсам деймін. Әрине, бірнеше жылдан соң қандай ойда болатынымды білмеймін. Бірақ қазіргі мақсатым тәжірибелі кәсіпкер ретінде елге оралу боп тұр.&nbsp;Ойда тың идея, іске асырылар жобалар көп. &nbsp;Іске асырам деген адам, нәтиже шығарамыз деген ұжым болса, еститін құлақ болса, уақыт жоғалтпай, ештеңені күтпей, қазірден-ақ іске асыруға болады.&nbsp;— Әдемі әңгімеңізге рақмет!&nbsp;

Қызылордалық жас Америкада жұмыс істейді

<a href="https://kyzylorda-news.kz/ru">Kyzylorda-news.kz.</a> Жолсерік қызметін кез келген адам атқара алмайды. Жүгі ауыр, өзіндік қиындықтары, жауапкершіліктері бар. Жол үстінде күн-түн &nbsp;жүру оңайға соқпасы анық. Жолсеріктің міндеттері де көп. Адамдардың діттеген жеріне аман-есен жетуі, олардың таза жерде демалу да кіреді. Біз жолсерік Нұрхан Ақылбекұлынан мамандықтың қыр-сырын сұрап білдік.– &nbsp;Нұрхан Ақылбекұлы әңгімемізді мамандық таңдаудан бастасақ. Бала арманы кей адамды ұшқыш, ғарышкер болуға жетелейтіні анық. Сізге жолсерік мамандығын таңдауға не себеп болды?– Балалық шақта әрқилы маман иесі болуды армандайтынымыз шындық. Менің де мамандық таңдауда таңдау-шешімім сан тарапқа кеткенін жасыра алмаймын. Бірде полицей болуды мақсат тұтсам, енді бірде дәрігер атануды қаладым. Алайда ер жетіп, сана-сезім қалыптасқан шақта таным-білігіңе сай мамандық таңдайтын кез келеді емес пе?! Осындай сындарлы сәтте жаңылыспай, техникалық салаға бет бұруды жөн деп таптым. Арман жетегімен Қазақ гуманитарлық заң және техникалық колледжінің түлегі атандым. Осылайша, 5 жыл бұрын теміржол саласының қыр-сырын жете зерттеп, жолсерік жұмысының мән-маңызын бағамдай бастадым. Көп өтпей, 2018 жылы теміржол саласындағы алғашқы еңбек жолым басталды. Қазіргі таңда «Марал-Нұр» ЖШС-де жолсерік болып қызмет істеймін.– Теміржол саласының өзіндік қиындығы бары белгілі. Ал жолсерік болудың ауыртпашылығын атап өтсеңіз…– Әрине, әр саланың өз кемшілігі мен артықшылығы бар. Жолсерік үшін ең басты жүк – жауапкершілік. Жолаушылардың қауіпсіздігін қадағалау, вагон ішіндегі техникалық базаның кідіріссіз жұмыс істеуін қамтамасыз ету басты міндетке айналған. Оның үстіне күн-түні станциядан жолаушыларды түсіріп-міңгізу үшін қырағылық қажет. Осының барлығы жолсеріктен жауапкершілік пен білікті талап ететіні айтпаса да түсінікті. Алайда, бұл саладан алшақтауға себеп емес. Аталған жұмыс түрлі адаммен байланыс орнату, қоғамдық өзгеріске куә болу, адамдардың қарым-қатынасы мен мінез-құлқын «ә» дегеннен аңдауға бейімдейді. Сондықтан, жолсерік жолаушының көмекшісі ғана емес, сан саланы тоғыстырған маман дегім келеді.– Қызмет барысында түрлі қалада болып, қилы адам кезігеді. Әр аймақтың тұрғындарының мінез-құлқы, болмысындағы ерекшелікті байқай алдыңыз ба?– Дұрыс айтасыз. Географиялық ерекшелік өзгерген сайын адамдардың мінезі, ойлау қабілеті, тіпті тілі де өзгеретініне куә боламыз. Қарапайым адамға білінбегенімен, апта сайын түрлі облысқа сапарлайтын жолсерік үшін мұндай ерекшелік бірден айқындала түседі. Айтып өткенімдей, біздің мамандық сан бағытты тоғыстырған. Соның ішінде адамдармен қарым-қатынас, психология саласы жақындау. Сол себепті өзгерісті тез байқауға жол ашылады. Мәселен, Қызылорда-Павлодар бағытында сапар шеккенде аймақтардағы адамдардың өзара тілдік, мінез өзгерістері байқалады. Қызылордалықтардың басым дені қазақ тілінде сөйлеп, мінезі ашық болса, Павлодар тұрғындары орысшаға жақындау әрі өмір сүру дағдылары бөлек.– Халық арасында пойыздардың сапасына көңіл толмастық басым. Теміржол саласындағы жолаушылар тасымалы көрсеткішіне қандай баға берер едіңіз?– Кемшіліксіз сала болмайтыны белгілі. Алайда, қолда бар мүмкіндікті пайдаланып, өзгеріске ұмтылса, кез келген олқылықты түзетуге болады деп санаймын. Бұл ұстаным теміржол саласына да қатысты. Вагон, сервис көрсеткіші мүмкіндікке қарай жыл сайын жаңарып, үздіксіз даму үстінде. Сондықтан алдағы уақытта жолаушылардың талап-тілегін толық қанағаттандыратын дәрежеге жететініміз анық.Осы орайда маңызды жайтты атап өткім келеді. Халықпен байланыс орнату, көпшілікпен жұмыс істеу қашанда қиын. Бәріне бірдей жағып, көңілден шығу да мүмкін емес. Басты мақсат – әлемдік стандарттарға қарай бой түзеп, сала жаңалықтарын уақытылы енгізу. Сонда ғана сыншылар да, халық та риза болмақ.– Әңгімеңізге рақмет!

Нұрхан Ақылбекұлы: Вагон, сервис көрсеткіші мүмкіндікке қарай жыл сайын жаңарып, үздіксіз даму үстінде

<a href="https://kyzylorda-news.kz/ru">Kyzylorda-news.kz.</a> Кездейсоқ келген қиындыққа қарсы тұрып, жығылғанға жәрдемдесу сауапты іс. Әсіресе, адамды ажал аузынан арашалауға жұмсалған қажыр-жігердің құны өлшеусіз екені аян. Сондықтан кейінгі буынға үлгі-өнеге боларлық қадам жасаған қаһармандарды дәріптеу, ерлігін елге таныту кезек күттірмейді. Олардың әрбір таңдауы мен қайырымды әрекеті үміт сыйлайды, мейірім ұялатады. Бұл қатарға түн жарымында өрт ішінде қалған отбасыны құтқарған қызылордалық Серікбол Төребектің әрекетін де қосуға болады. Қайсар азамат жалынға қарамай, адам өміріне араша болып, 5 адамның өмірін аман алып қалды. Серікболмен жүздесіп, оқиғаның мән-жайын сұраудың сәті туды.– Серікбол, бір-ақ сәтте бүгінгінің батырына айналдыңыз. Бүтін отбасыны ажалдан арашалаған әрекетіңіз әлеуметтік желіде қызу талқыланып, көпшілік ыстық ықыласын білдіруде. Жағдайдың қалай орын алғанын әртүрлі дереккөзден естігенімізбен, нақты жүйе әлі қалыптасып үлгірмеді. Алдымен, оқиға қалай болғанын баяндап берсеңіз.– Бәрі кездейсоқ орын алды. Оқиға өткен аптада, яғни жұмадан сенбіге қараған түні болды. Қолым бос уақытта такси болып жұмыс істейтінмін. Кезекті сапарым кезінде сағат екі шамасында Қызылорда қаласындағы «Саяхат» ықшам ауданынан тапсырыс түсті. Жұмыс барысымен сол маңнан өте бере шатыры отқа оранған үйді көзім шалды. Дереу көлігімнен түстім де үйдің есік-терезесін ұра жөнелдім. Бар ойым адамдарды құтқару болды. Үйді айналып, айқайлап жүрмін. Дыбыс берген, оянған адам байқалмады. Ұялы телефонымның жарығын жағып, терезеден қарағанымда үйде жатқан адамдарды көрдім. Сол кезде-ақ енді уақыт жоғалтуға болмайтынын ұқтым. Алдымен 101-ге қоңырау шалып, өрт туралы хабарладым. Мамандарға үйдің ішінде адамдар бар екенін, шатыры жалынға оранғанын жеткіздім. Мекен-жайды хабарлаған соң өрт сөндірушілерден терезені сындыруға рұқсат алдым.Қызығы, терезені сындырған кезде ғана үй ішіндегі адам да ояна бастады. Дереу есікке барып, жұлқылап тартқылай бастадым. Бұл кезде үйдегілер есікке қарай келіп қалған еді. Сол кезде есік те ашылып, бәрі сыртқа шықты. Есіктің ілгегі жұлынып кеткен секілді. Осылайша, үйдегі адамдар аман-есен жалын құрсауынан құтылды.– Өртке оранған үйдегі тұрғындардың түгел шыққанын қалай тексердіңіз?– Есік-терезені сындырғаннан кейін кішкентай балалар мен әйел және соңынан жұбайы шықты. Балалардың аман-есен екеніне көз жеткізген соң отағасы қайта үйге кіріп, құжаттарды алып шықты. Көп өтпей, үй ішінде пропан баллоны бар екенін білдік. Үй егесі қайта кіріп, пропан баллонын сыртқа шығарып үлгірдік. Қатерді ойлайтын уақыт болмады. Бар мақсатым адам өмірін құтқару болатын.– Әрине, сіздің жасаған қадамыңыз – үлгі-өнеге аларлық іс. Өзгенің өмірі үшін жанұшыра жүгіру жүрегі кең, тәрбиелі жанның қолынан келетіні анық. Осы орайда өзіңіз, отбасыңыз туралы айтып өтсеңіз.– 1997 жылы Қызылорда қаласында дүниеге келдім. Әкем қаржылық бақылау инспекциясында еңбек етсе, анам жүйке аурулары диспансерінде жұмыс істейді. Әпкем мен ағам бар. Мен үйдің кенжесімін. Бұған дейін Қызылорда қаласындағы М.Ықсанов атындағы құрылыс және бизнес колледжінен телекоммуникация мамандығы бойынша білім алдым. Сондай-ақ қаладағы 66597 әскери бөлімінде барлаушы болып еңбек еттім. Алайда денсаулық жағдайыма ол жұмыстан шығуға тура келді.– Ерлігіңіз еленіп, өзіңізден үлгі алар буын көбейсін. Әңгімеңізге рақмет!

Қызылордалық жігіт бір отбасын өрттен құтқарған

<a href="https://kyzylorda-news.kz/ru">Kyzylorda-news.kz.</a> Жастар саясатын жүргізу тұрақты бақылау мен жүйелі сараптауды қажет етеді. Әсіресе, жас буын арасындағы діни ахуал мемлекеттің жіті қадағалауына мұқтаж. Осы орайда білімді теологтар мен тәжірибелі әлеуметтанушылардың маңызы жоғары екенін айқын сезінеміз. Аймақ жастарының діни ахуалын зерттеуде жемісті еңбек етіп жүрген Бақберген Сарсенбайұлы да облыстағы білікті маманның қатарында.– Бүгінде діни білімді сенімді орта, қауіпсіз мекеннен алу маңызға айналды. Алғашқы сауалды шетелде діни білім алып жатқан Сыр жастарынан бастасақ. Тәуелсіздің жылдарынан бері қанша азамат шетелде діни білім алды? Бүгінде мемлекет тарапынан арнайы белгіленген шетелдік ЖОО тізімі бар ма?&nbsp;– Шетелде діни білім алуға барлық жағдай жасалғаны белгілі. Мемлекет тарапынан түрлі білім гранты, «Болашақ» мемлекеттік бағдарламасы және демеушілердің қаражат есебінен шетелде діни білім алып жатқан азамат жетерлік. Оның ішінде, әрине, өзіміздің Сыр өңірінің жастары да бар. Шетелде діни білім алудың жақсы жақтарымен қатар, жағымсыз тұстарын да көз көріп, құлақ естіп жүр. Осы орайда, олар шетелдің діни білімімен қоса, ол жақтың мәдениетін, тұрмыс-салтын меңгеріп келетінін айта кетуіміз керек.&nbsp;Тәуелсіздік алғаннан бері шетелде теріс діни білім алған кейбір ұлан ел аумағына түрлі жат ағым мен көптеген діни топтың енуіне себеп болды. Соның салдарымен дін мамандары мен имамдар әлі күнге дейін күресуде. Сол үшін бүгінгі таңда ҚМДБ шетелде діни білім алсам деп ниеттенген жастарға бірнеше елдің ЖОО-дарымен келісімшартқа отырған. Ол елдердің қатарында Түркия («Хасики»), Мысыр («Әл-Азһар»), Иордания сынды мемлекеттер бар.– Жастарды радикалды діни ағымнан алыс ұстау бағытында қандай жұмыс жүргізілуде?&nbsp;– Жастарды радикалды діни ағымдардан аулақ ұстау үшін ата-бабаларымыз ұстанған сара жолды, яғни, имам ағзам Абу Ханифа мазһабын насихаттайтын медреселер мен мектептер көптеп бой көтеруде. Иә, жастардың арасында басқа елдермен салыстырғанда дінге қызығушылық өте жоғары. Сондықтан да мұндай оқу орындарының көбеюі біз үшін өте маңызды болып тұр. Оған қоса теолог мамандардың жер-жерде профилактикалық &nbsp;түсіндірме жұмыстарын жүргізуі халықтың көзі ашып, деструктивті діни ағым ұстанушыға қарсы иммунитет қалыптастыруда.– Дін мен дәстүр сабақтастығын қалай түсінесіз?&nbsp;– Қазақ халқының дәстүрі ислам дінімен біте қайнасып жатқаны ақиқат. Меніңше, бұл пікірге тек қазақтың салт-дәстүрінің байыбына бармай байбалам салатын надан адамдар ғана қарсы болар. Өйткені, оқыған-тоқыған адам мұндай жаңсақ ойға бармасы анық. Кезіндегі Қасым ханның қасқа жолы мен Есім ханның ескі жолы, Тәукенің «Жеті жарғысындағы» исламның сарындары бұл мәселеге анық дәлел болады. Ислам діні де ешқашан дәстүрге қарсы шықпаған. Тіпті, кейде ғалымдар әр елдің дәстүріне сүйеніп пәтуа шығарған, өзекті мәселелерге дәстүрден дәлел алған. Сондықтан ислам діні мен қазақ халқының дәстүрі егіз ұғым іспетті.– Әлеуметтік желі ақпарат таратудың негізгі нысанына айналды. &nbsp;Әлеуметтік желілерде діни контенттерді таразылап отырасыздар ма?&nbsp;– Әлеуметтік желіде сақ болу керегі айтылып та, жазылып та жүр. Біздің Дін мәселелерін зерттеу орталығында арнайы БАҚ бөлімі жұмыс істейді. Сол жерде мамандар мониторинг жасау арқылы ҚР бойынша тыйым салынған сайттар мен уағызын тыңдауға болмайтын уағызшылардың діни материалдарын таратқан, жүктеген не лүпіл басқан аккаунттарды қадағалап отырады. Әрине, бұл әдіс өз кезегінде жемісін беріп жатыр. Алайда ата-аналар тарапынан да үйде смартфон қарап отырған баласына, жақындарына, іні-қарындастарына қадағалау болса, олқылықпен күресу анағұрлым жеңіл болар еді.– Дәстүрлі емес діни ағым жетегіндегі жастарды қайта әлеуметтендірудің басты жолы қандай деп ойлайсыз?&nbsp;– Жат ағым жетегінде кеткен жастарды қайта әлеуметтендіріп, қоғамға бейімдеу үшін оларға ең алдымен мемлекет тарапынан қолдау керек деп ойлаймын. Яғни, олардың мемлекетке деген сенімін қайтару қажет. Сондай-ақ оларды оқшаулап, шеттетуден аса сақ болу керек. Керісінше, ортаға тартып, қандай да бір көмек керек болған жағдайда, көмек қолын созатын болсақ, олардың да ойының, ұстанымының өзгерері анық.– Мешіт пен медресе құрылысына қаржы жинайтын қоғамдық қор саны артты. Бұл орайда бақылау бар ма, заңбұзушылықтар кездесе ме?– Мешіт пен медресе жайына келер болсақ, елімізде мешіт саны өте аз. Сонымен қатар, еліміз зайырлы болғандықтан, мемлекет тарапынан мешіт пен медреселердің құрылысына қаражат бөлінбейтіні белгілі. Осы себепті халық қаражат жинап, мешіт пен медресе салу көбейді. Бұл ретте, салынып жатқан ғимарат ҚМДБ-ға қарайтын болса, мүфтияттың қажеттілігіне жарайтын болса, құптарлық іс деп ойлаймын. Өйткені, жат ағыммен күресу үшін біздің рухани бай және білімді болуымыз өте маңызды.– Әңгімеңізге рақмет!

Аймақта діни ахуал тұрақты

<a href="https://kyzylorda-news.kz/ru">Kyzylorda-news.kz.</a> Қазақстандықтардан түсетін салық – мемлекеттік кірістің бір бөлігі. Алайда жеке меншігіне тиесілі салықты төлемей, жылдар бойы қашып жүретіндер бар. Осы орайда Қызылорда қаласы бойынша Мемлекеттік кірістер басқармасы басшысының орынбасары &nbsp;Жорабек Нәбиұлымен өңірдегі салық төлеу мәдениеті жөнінде сұқбаттасқан едік.&nbsp;– Жеке меншікке салық төлеуде кімдерге жеңілдік қарастырылған?– Салық Кодексінің 526-бабы 2-тармағына сәйкес жеке тұлғаларға мүлік салығы бойынша келесідей жеңілдіктер қарастырылған. Атап айтқанда Кеңес Одағының Батырлары, Социалистiк Еңбек Ерлерi, "Халық қаhарманы", "Қазақстанның Еңбек Ері" атақтарына ие болған, үш дәрежелi Даңқ орденiмен және "Отан" орденiмен наградталған адамдар, "Батыр ана" атағына ие болған, "Алтын алқа" алқасымен наградталған көп балалы аналар, бөлек тұратын зейнеткерлер — меншiк құқығындағы барлық салық салу объектiсінiң жалпы құнынан республикалық бюджет туралы заңда белгіленген және тиісті қаржы жылының 1 қаңтарында қолданыста болатын айлық есептік көрсеткiштің 1000 еселенген мөлшері шегiнде; &nbsp;Ұлы Отан соғысының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер және басқа мемлекеттердің аумағындағы ұрыс қимылдарының ардагерлері, Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталған адамдар, сондай-ақ 1941 жылғы 22 маусым – 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталмаған адамдар, мүгедектер – меншік құқығындағы барлық салық салу объектісінің жалпы құнынан республикалық бюджет туралы заңда белгiленген және тиiстi қаржы жылының 1 қаңтарында қолданыста болатын айлық есептік көрсеткіштің 1500 еселенген мөлшері шегінде, &nbsp;жетім балалар және 18 жасқа толғанға дейінгі кезеңге ата-анасының қамқорлығынсыз қалған балаларға жеңілдік бар.&nbsp;Ал ҚР Салық Кодексінің 490-бабына сәйкес меншігіндегі бір автокөлік құралы бойынша:1) Ұлы Отан соғысының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер және басқа мемлекеттердің аумағындағы ұрыс қимылдарының ардагерлері, Ұлы Отан соғысы жылдарында тылдағы қажырлы еңбегi мен мінсiз әскери қызметi үшiн бұрынғы КСР Одағы ордендерiмен және медальдарымен наградталған адамдар, сондай-ақ 1941 жылғы 22 маусым – 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегi мен мінсiз әскери қызметi үшiн бұрынғы КСР Одағы ордендерiмен және медальдарымен наградталмаған адамдар, Кеңес Одағының батырлары мен Социалистiк Еңбек ерлерi, "Халық қаhарманы", "Қазақстанның Еңбек Ері" атақтарына ие болған, үш дәрежелі Даңқ орденiмен және "Отан"орденiмен наградталған адамдар, "Батыр ана" атағына ие болған немесе "Алтын алқа" не "Күмiс алқа" алқаларымен наградталған көп балалы аналар;2) меншiгiнде мотоколяскалары мен автомобильдерi бар мүгедектер көлік құралы салығын төлеушілер болып табылмайды.– Өңірде салықтан жалтаратындар көп пе?— Кірістер органдары салық төлеуші (салық агенті) ұсынған есепті, уәкілетті мемлекеттік органдардың мәліметтерін, сондай-ақ салық төлеушінің қызметі туралы басқа да құжаттар мен мәліметтерді зерделеу және талдау негізінде камералдық бақылау жүзеге асырылады.Осыған сәйкес, салықтан жалтару фактісі анықталған жағдайда кірістер органдарымен салық төлеушіге ҚР Салық Кодексі 96-бабына сәйкес камералдық бақылау нәтижесімен анықталған бұзушылықтар бойынша хабарлама жасалады. Оның орындалу мерзімі 30 жұмыс күнін құрайды. Мерзімінде орындалмаған жағдайда, Салық Кодексінің 118 бабына сай, салық төлеушінің банктік шығыс операциялары тоқтатылу бойынша өкім шығарылады.Қазіргі танда, салықтан жалтаратын салық төлеушілердің саны аз емес, бірақ олардың барлығы автоматтандырылған ақпараттық жүйелер арқылы анықталып, тиісті жауапкершілікке тартылатын болады.– Жылдар бойы салық төлемей келе жатқандарға қандай шаралар қолданылады?– Барлығы заңмен шешіледі. Мәселен, Салық Кодексінің 116-бабына сәйкес салық төлеушінің (салық агентінің) белгіленген мерзімде орындалмаған салықтық міндеттеменің орындалуын қамтамасыз ету тәсілдері мынадай: 1) салықтардың және бюджетке төленетін төлемдердің төленбеген сомасына өсімпұлды есепке жазу; 2) салық төлеушінің банктік шоттары бойынша шығыс операцияларын тоқтата тұру; 3) салық төлеушінің кассасы бойынша шығыс операцияларын тоқтата тұру; 4) салық төлеушінің мүлікке билік етуін шектеу тәсілдерімен қамтамасыз етілуі мүмкін.– Салық төленбесе, мүлік иесінің карталары бұғатталып, іс сотқа жіберіледі. Ал салық төленген сәтте сот орындаушыға қанша пайызы беріледі? – Бұл сұрақтың жауабы да арнайы заңда қарастырылған. Берешек бюджет есебіне өндірілмеген жағдайда жеке сот орындаушыларға бағдарламалар арқылы салық бұйрықтары жолданады. Осыған байланысты, жеке сот орындаушылар өз құзіреттілігіне сәйкес мәжбүрлеп өндіру шараларын қабылдайды. Нақтырақ айтар болсақ: - атқарушылық құжаттарды орындайды; - борышкерлердің ел аумағынан шығуын уақытша шектейді; - мерзімді орындау үшін борышкерлердің жұмыс орындарына атқарушылық істі жолдайды; - жүргізуші куәлігіне шектеу салады; - борышкерлердің мүліктеріне тиым салады; - мүлкінен өндіріп алу және берешектерді төлеуден жалтарып жүрген борышкерлерді әкімшілік жауаптылыққа тартады. Өз кұзіреттігіне сәйкес 25 пайызға дейінгі өндірісте тұрған сомаға сәйкес қызметіне сома алады.– Мемлекеттік кіріске бір жылда қанша салық төленді?– Өткен жылы жалпы мемлекеттік бюджетке 109 млрд 487,8 млн теңге түсім түсіп, 2021 жылмен салыстырғанда 18 млрд 288,7 млн теңгеге артты. Оның ішінде, республикалық бюджет түсімі 67 млрд 432,2 млн теңгені құрады. Ал жергілікті бюджет түсімі 42 млрд 55,6 млн теңге болып, 2021 жылмен салыстырғанда түсім 3 млрд 849,9 млн теңгеге артқан. Дегенмен салық төлеу мәдениеті енді ғана қалыптасып келеді.– Сұқбатыңызға рақмет!

Облыста салық төлеу мәдениеті қалыптасқан

<a href="https://kyzylorda-news.kz/ru">Kyzylorda-news.kz.</a> Сырда велоспорттың қарқыны тұралап, Марат Сатыбалдиев пен Сергей Капустинның жетістігін жалғайтын шабандоздар жоқтың қасы еді. Жақында Үндістанда үміт оянып, Аслан Силықбек қос аңыздың жолын қайта жалғады. Нью-Делиде жерлесіміз жеңімпаз атанып, Сыр спортының жарқын көрінісін байқатты. Азияны бағындырған шабандозды туған жерге келісімен әңгімеге тарттық.– Аслан, Азия чемпионатындағы алтын жүлдең құтты болсын! Алтын &nbsp;оңай келмегені анық…– Рақмет, жарыс жоғары деңгейде өтті. 4 шақырымды құрады. Азия біріншілігіне ұзақ мерзімде дайындық жүргіздік. Астана қаласында оқу-жаттығу жиындары бірнеше айға созылды. Одан бөлек Парижде әлем кубогына қатысып, өз-өзімізді қамшылап алдық. Парижде көрсеткішке қарағанда физикалық күш қуат жинауымыз маңызды болды. Бапкердің тапсырмасына сәйкес барлығын сәтті жүзеге асырдық. Үндістанға баруымыздың өзі қызық болды. Бірден бара салмадық. Алдымен іріктеу болды. 8 велошабандоз Астана қаласында дайындалдық. Бас бапкер Тимур Харисов сегіздің ішінен алтауын қалдырды. Жарыс таяған сәтте тағы біреуімен қоштасуға тура келді. Солай 5 жүйрік Азияға аттандық.– Үндістанда адаптация қалай қалыптасты?– Дұрыс айтасыз, спортшылар үшін адаптация өте маңызды. Климат ауыстыру кейбіреуіне оң нәтиже берсе, кейбіреуіне керсінше. Сондықтан адаптацияға қатты көңіл бөлеміз. Үндістан Азияда орналасқандықтан қатты әсер етпеді. Ауа-райына жылдам бейімделіп кеттік.– Велотрек сайысы командалық эстафетадан тұратыны белгілі. Үндістанда дәл осы командалық сайыстан топ жардың. Жабық аренадағы &nbsp;жарысқа тоқталайықшы…– Командамыз 5 спортшыдан жасақталды. Оның біреу қосалқы құрамда болды. Негізгі құрамнан бірі жарақат не болмаса сырқаттанып қалса соның орнын басатын болды. Ал негізгі құрамда Максим Тарскин, Илья Карабутов, Вадим Белугинмен бірге өнер көрсеттік. Іріктеу сынында сүрінбедік. Іріктеу кезеңдерде жарысты бірінші бастап жүрдім. Бұл командалық жарыста күрделі кезең болып есептеледі. Бар ауыртпашылықты мойныма алып, финалға өтуге барымды салдым. Ал финалда мәрені аяқтайтын қорытынды шабандоздың қызметін атқардым. Кореядан 3 секундқа алға шығып, жеңімпаз атандық. Үздік үштікті жарыстың қожайындары түйіндеді. Жалпы елге еңбектің арқасында абыроймен оралдық.– Әңгімеңізге рақмет!

Қазақстан және Қызылорда облысының жаңалықтары: Сұхбат