<a href="https://kyzylorda-news.kz/">Kyzylorda-news.kz.</a>&nbsp;Саяси қуғын-сүргін құрбандарын толық ақтау жөніндегі мемлекеттік комиссияның жұмыс нәтижелері туралы ҚР Мемлекеттік хатшысы Ерлан Қарин әңгімелеп берді, деп хабарлайды <a href="https://lenta.inform.kz/kz/sayasi-kugyn-surgin-kurbandaryn-tolyk-aktau-zhonindegi-memkomissiya-zhumysy-maresine-zhetip-kaldy-erlan-karin_a3938738">ҚазАқпарат.</a>
–&nbsp;Ерлан Тынымбайұлы, Саяси қуғын-сүргін құрбандарын толық ақтау жөніндегі мемлекеттік комиссия өз жұмысын 2020 жылдың қараша айында бастаған еді. Президенттің тиісті Жарлығы шықты. Осы аралықта қандай жұмыстар атқарылды, жұмысқа нендей ресурстар тартылды?
– Мемлекеттік комиссия – ауқымды ғылыми жоба. Комиссия жұмысы ХХ ғасырдың 20-50-ші жылдарындағы тарихымызды зерттеудің, зұлмат оқиғалар хроникасын толық қалпына келтірудің және тоталитаризм жылдарында зардап шеккен қазақстандықтар туралы тарихи жадыны сақтаудың жаңа кезеңін бастап берді.
Сондықтан Мемлекеттік комиссияның базасында жүйелі әрі көп жоспарлы жұмыс ұйымдастырылды.
Біріншіден, қуғын-сүргін мәселелерін зерделеу төңірегіне үлкен академиялық және сарапшылық күш біріктірілді.
Бұрын аталмыш тақырыпты әр түрлі ғалымдар, тіпті жекелеген ұжымдар белсенді түрде зерттеп келген еді. Бірақ жүйелі жұмыс жоқ болатын.
Сол себепті Мемлекеттік комиссияға қуғын-сүргін тарихын зерттеумен айналысатын ғылыми-сараптамалық ортаның барлық негізгі өкілдерінің басын қосу туралы шешім қабылданды.
Бүгінде Мемлекеттік комиссияның жұмыс топтарында 316 сарапшы-ғалым жұмыс істейді, олардың ішінде 261 адамға жабық архивтерде жұмыс істеуге рұқсат берілген.
Бұдан бөлек, бірыңғай формат бойынша әр өңірде жергілікті комиссиялардың жұмысы ұйымдастырылды. Олардың қатарында 500-ден астам адам бар.
Екіншіден, іздестіру-зерттеу жұмыстарын ұйымдастырудың нақты әдіснамасы жасалды.
Қуғын-сүргін тарихын зерттеуге мұқият, жан-жақты қарау керек.
Әрбір материал, әрбір іс архивтен алынып, жұртшылыққа жариялай салатын деректер жиынтығы емес.
Бұл жекелеген адамның немесе бір топ адамның тарихы. Оларды объективті бағалау үшін тек қана фактілерге негізделген ғылыми зерттеу қажет.
Мемлекеттік комиссия жұмысын енді бастаған кезде қуғын-сүргін құрбандары жөніндегі құжаттар мен материалдардың көпшілігі еліміздегі әртүрлі архивтерде сақталды, оның жүйесі болмады.
Бұған қоса, көптеген құжаттарда құпия грифі болды және оларға қол жеткізу мүмкін емес еді.
Сондықтан Мемлекеттік комиссия әртүрлі архив қорларындағы тарихи құжаттарды жедел іздестіру және оларды сапалы түрде талдау бойынша бірегей әдіснама әзірледі.
Мемлекеттік комиссияның жұмыс топтарындағы ғалымдар орталықтағы да, жергілікті жерлердегі де жабық қорлармен жұмыс істеу үшін арнайы әдістеме бойынша дайындалды.
Осылайша, бір мезетте бүкіл еліміз бойынша ерекше қорлармен тиімді жұмыс істей алатын зерттеушілер корпусы қалыптасты.
Үшіншіден, Мемлекеттік комиссияның өзіне жүктелген міндеттерін орындауы үшін түрлі мемлекеттік органдар мен ведомстволардың күші біріктірілді.
Олар біздің ғалымдарымызға зерттеу және талдау жұмыстарында айтарлықтай көмек көрсетіп отыр.
Ғалымдарды бұрын қолжетімсіз және құпия болған материалдар мен қорларға кіргізуге мүмкіндік туды. Ведомстволық және мемлекеттік архивтерде арнайы кабинеттер жасақталды, архившілер Мемлекеттік комиссия өкілдеріне консультациялық қолдау көрсету үшін арнайы дайындықтан өтті.
Еліміздің барлық өңірлеріндегі архивтердегі материалдарды бір мезгілде зерделеу, іздеу және салыстыру үшін барлық ұйымдастырушылық және әкімшілік мәселелер шешілді.
– Мемлекеттік комиссия жұмысының арқасында қандай нәтижелерге қол жетті?
– Мемлекеттік комиссия қандай да бір нақты материал жинаумен ғана шектелмейді. Бастысы, зерттеу жұмыстары үшін жүйелі әдіснама құрып, соның негізінде заң жобасын әзірлеу процестерін бастау маңызды болатын.
Қазірдің өзінде Мемлекеттік комиссия жұмысының нәтижелері шынайы деректерде де, нақты бизнес-процестерде де көрініп жатыр.
Атап айтқанда, архив материалдарын іздеу мен талдаудың тиімді жүйесінің арқасында тарихи құжаттардың ауқымды бөлігі анықталып, хронологиялық тәртіппен жүйеленді.
Бұл жұмыс еліміздің барлық өңірлеріндегі 60-тан астам мемлекеттік және ведомстволық архивтерде атқарылды. Осы жұмысқа тартылған ғалым-сарапшылардың үлкен әлеуетін пайдалана отырып, Мемлекеттік комиссия жедел іздестіруді, құжаттардың жіктелуін және олардың бірыңғай білім базасына біріктірілуін қамтамасыз етеді.
Бұдан басқа, Мемлекеттік комиссияның шешімдері саяси қуғын-сүргін құрбандарына байланысты құжаттарды құпиясыздандыру жөніндегі ведомствоаралық жұмысты ұйымдастыруға және тиімді үйлестіруге ықпал етті.
Біз бұл процестерге Бас прокуратураның, Ішкі істер министрлігінің және Ұлттық қауіпсіздік комитетінің ресурстарын мақсатты түрде бағытталды.
Осыған дейін Бас прокуратура 2,4 миллионнан астам материалдарды, ҰҚК 1,5 мыңнан астам архив істері мен құжаттарды, ІІМ 5,3 мыңнан астам құжаттарды құпиясыздандырды.
Мемлекеттік комиссия қызметінің шеңберінде прокуратура органдары жаңа деректерді анықтады және прокурорлық қадағалау тәртібімен 250 мыңнан астам азамат ақталды. Ақталғандардың негізгі бөлігі жер аударылған және күштеп көшірілген азаматтар.
Бұған Мемлекет басшысының 2020 жылы қабылдаған Жарлығы негіз болды. Соның арқасында прокурорларға әлдебір азаматтардан шағым түскенін күтіп отырмай-ақ, қуғын-сүргін құрбандарын өздері ақтай алатын мүмкіндік берілді.
Нақты айтар болсақ, қолданыстағы «Жаппай қуғын-сүргін құрбандарын ақтау туралы» заң бойынша жапа шеккен азамат немесе оның туысқандары өкілетті органға шағымдануы қажет.
Құпия грифі алынған материалдарды зерттеуге және оны одан әрі зерделеуге қолайлы мүмкіндік жасау мақсатында Архив материалдарын зерделеу орталығы құрылды.
Еліміздің барлық архивтеріндегі қуғын-сүргін тарихы туралы мұрағат материалдардың негізгі бөлігі орталықтың базасына біріктірілді және жүйеге түсірілді.
Орталық қызметкерлері ведомстволардан келген құпиясыздандырылған құжаттарды ғылыми тұрғыдан өңдейді, реставрациядан өткізеді және цифрлық форматқа көшіреді. Әрбір ведомстволық архив арнайы кесте бойынша өз материалдарын дайындайды және орталыққа тапсырады.
Қазірдің өзінде онда 50 мыңға жуық материал жиналды және бұл жұмыс жоспарлы түрде жалғаса береді.
Осылайша, ХХ ғасырдың 20-50 жылдарындағы қуғын-сүргін кезеңіне қатысты барлық тарихи материалдарды сақтаудың бірыңғай мемлекеттік қоры құрылады.
Бұл бағытта ізденіп жүрген ғалымдар мен зерттеушілердің жұмысын едәуір жеңілдетеді.
Сондай-ақ, Мемлекеттік комиссия публицистикалық қызметі де бір жолға қойылды.
Мемлекеттік комиссия аясындағы зерттеу жұмыстарының нәтижелерін ғылыми тұрғыдан бекіту мақсатында тарихи материалдарға негізделген ғылыми жинақтардың топтамасы жарық көрді.
Қазіргі уақытта қуғын-сүргін жасауға негіз болған ұйымдастырушылық және әкімшілік құжаттар туралы ақпаратты қамтитын осындай екі жинақ шығарылды. Бұл жұмыс жыл бойына жалғасады және Мемлекеттік комиссия қызметінің академиялық қорын құрайды.
Осы бағыттағы жұмыстың тағы бір бөлігі – Мемлекеттік комиссияның деректер базасы жинақталатын және толықтырылып отыратын арнайы портал құру.
Аталған порталда ақталған, бірақ көпшілікке белгісіз қазақстандықтар туралы бұған дейін бір ізге түспеген құпия емес материалдар мен деректер жарияланып, ғылыми тұрғыда жүйеленеді.
Осылайша, қуғын-сүргін құрбандары туралы жалпыға қолжетімді ақпарат көзі қалыптасады, ол үнемі толықтырылып отырады.
Мұның барлығы жазықсыз қуғын-сүргінге ұшыраған қазақстандықтарды ақтауға және ұрпақтары үшін ата-бабаларының халық жауы емес екенін дәлелдеуге негіз болады.
– Алдағы уақытта Мемлекеттік комиссия қандай бағыттарға басымдық береді? Қуғын-сүргін құрбандарын ақтау жөніндегі жұмыс қалай жалғасады?
– Мемлекеттік комиссияның негізгі міндеті ХХ ғасырдың 20-50-ші жылдарында қуғын-сүргінге ұшыраған барлық азаматтарды бір мезетте ақтау емес екенін атап айтқым келеді. Бұл соттар мен прокуратураның жұмысы.
Мемлекеттік комиссияның қызметі қуғын-сүргін құрбандарын ақтауға қажетті заңдық, ұйымдастырушылық, ғылыми-талдамалық негіз жасауға бағытталған.
Тиісті органдар мен мекемелер Мемлекеттік комиссияның қорытындылары мен әзірлемелеріне сүйене отырып өз жұмысын жалғастырады, бұрын тиісті заңдардың шеңберіне енбей қалған қазақстандықтардың жаңа санаттарын ақтайды.
Қазіргі таңда Мемлекеттік комиссияның жұмысы өз мәресіне жетіп қалды. Қорытынды дайындау және заңнаманы жетілдіруге қатысты деректер базасын іздеу мен қалыптастыру бағытындағы негізгі міндеттер толық аяқталуға жақын.
Осыдан соң Мемлекеттік комиссияның жұмысын аяқтау жоспарланып отыр. Кестеге сәйкес бұл жұмыстар осы жылдың соңына дейін тәмәмдалуы тиіс.
– Мемлекеттік комиссияның қызметі ресми түрде аяқталғаннан кейінгі жұмыстар қалай жалғасады?
– Мемлекеттік комиссия зерттеу жұмыстарын жүйелеуге және ақтау процестерін қайта жаңғыртуға қажетті шешімдер қабылдауға арналған алаң ретінде құрылған болатын.
Сонымен қатар, Мемлекеттік комиссия қабылдаған шешімдер негізінде құрылған барлық методологиялық инфрақұрылым белгілі бір дәрежеде сақталып, жұмысын жалғастыра береді.
Қазіргі таңда Мемлекеттік комиссияның негізгі әкімшілік және әдістемелік органы ретінде Жобалық офис жұмыс істеп жатыр.
Оның жұмысы қайта жасақталып, сараптамалық институттардың бірінде әдіснамалық және консультациялық қызметпен айналысатын болады.
Қуғын-сүргін құрбандары бойынша ашық цифрлық деректер базасын толықтыру, сондай-ақ ғылыми жинақтар сериясын шығару жұмыстары жалғасады.
Бұдан бөлек, 2023 жылға дейін бекітілген нысаналы қаржыландыру бағдарламасы шеңберінде ғалымдар мен зерттеушілерге олардың саяси қуғын-сүргін құрбандарын зерттеу бағытындағы жұмыстары үшін қолдау көрсетіле береді.

Ерлан Қарин: Саяси қуғын-сүргін құрбандарын толық ақтау жөніндегі мемкомиссия жұмысы мәресіне жетіп қалды

<a href="https://kyzylorda-news.kz/">Kyzylorda-news.kz.</a> Бүгін қазақ халқының демографиялық әлеуеті мен адами капиталына өтелмес шығын әкелген нәубеттердің құрбанын еске алу күні.
31 мамыр – Қазақстан қоғамы үшін әрі қасіретті, әрі қасиетті дата. Қасіретті болатыны, ел ішінде ХХ ғасырдың өн бойында жалғасқан саяси-қуғын сүргіннің ызғары шарпымаған әулет жоқ. Қасиетті болатыны, үш ғасырдан астам уақытқа созылған тәуелсіздік жолындағы күрестің соңғы құрбандары осы нәубеттерден зардап шеккен болатын.
Сол құрбандардың ең көрнекті өкілдерінің бірі, биыл 150 жылдығы тойланып жатқан Ахмет Байтұрсынұлы «Қазақ» газетіне «Әлхамдуилилла, аз емеспіз. 6 миллион қазақпыз» деп жазғанда араға ғасыр салып, туған халқының саны 13 миллионға әрең жететінін білмеген еді.
«Арыс» қоры және Республикалық «Әділет» тарихи-ағарту қоғамының төрағасы Ғарифолла Әнестің мәліметі бойынша, Ахмет Байтұрсынұлы сүйіншілеп мақала жазған тұста бауырлас өзбек халқының саны 3 миллионға да толмаған көрінеді. Сол өзбек ағайынның саны қазір – 32 миллион! Геометриялық прогрессия заңы бойынша, 3 миллионға жуық өзбектің саны бір ғасырда 32 миллионға жеткенде 6 миллион қазақтың саны 60 миллионнан оп-оңай асуы керек еді. Осыдан кейін қазақ әлемін оңалмастай етіп жұтатып кеткен ашаршылық қасақана ұйымдастырылған жоқ дегенге сену қиын.
1930 жылдан басталып, 1987 жылға дейін толқын-толқынмен жалғасқан саяси қуғын-сүргіннің салдарын еңсеруді қойып, құпиясын әлі толық зерттеп болмай жатырмыз. Өйткені тәуелсіздік алғаннан бері екінші рет Саяси қуғын-сүргін құрбандарын ақтауға қатысты заң қабылдағалы отырмыз.
Ол заң 1920-1950 жылдардағы саяси қуғын-сүргін құрбандарын толық ақтау жөніндегі&nbsp;<a href="https://www.inform.kz/kz/bas-prokuratura-sayasi-kugyndauga-baylanysty-2-mln-kuzhatty-kupiyasyzdandyryp-zhatyr_a3934254">мемлекеттік комиссияның</a>&nbsp;қорытындысынан кейін қабылданбақ.
Бұған дейін айтқанымыздай, жалпы еліміз тәуелсіздік алғаннан бері бұл мәселеге екінші рет мемлекеттік деңгейде бет бұрып отыр. 1993 жылғы 14 сәуірде «Саяси қуғын-сүргін құрбандарын жаппай ақтау туралы» Заң қабылданып, бірталай адам ақталған болатын. Бірақ ол кезде шаруалар көтерілісі, бай-кулактарды жою, олардың мүліктерін тәркілеу және күштеп отырықтандыру, жаппай коллективизациялау, 1920-33 жылдар аралығындағы саясатқа қарсы көтерілген халыққа және дін өкілдеріне қатысты жаппай жазалау салдарынан құрбан болғандар аталған заңнан тыс қалған еді. Сол олқылықтың орнын толтыру бұл жолғы мемлекеттік комиссия жұмысының негізгі бағыты болып белгіленген. Комиссия жұмысының қорытындысы бойынша «Саяси қуғын-сүргін құрбандарын толық ақтау туралы» Заң жобасы әзірленіп, ҚР Президентіне мемкомиссияның жұмысы туралы баяндама дайындалуы керек. Бүгінде мемлекеттік комиссия ақтауға жататын азаматтардың 11 санаты бойынша топ-топқа бөлінген.
Сондай-ақ екі кіші комиссия бар. Оның бірі саяси-қуғын сүргін құрбандарын заң тұрғысында ақтау мен есімдерін ұлықтау бойынша әдістеме дайындауға жұмылдырылған. Ал екіншісі саяси қуғын-сүргін жөніндегі жабық архив қорларын жан-жақты зерделеу және оларды кезең-кезеңімен құпиясыздандыру бойынша құрылды.
Бұл жұмыс тобының құрамына ҚР Ұлттық ғылыми академиясының академиктерінен, ғылыми-зерттеу институттары мен жоғары оқу орындарының ғалымдарынан құралған 69 адам тартылды. Ал 17 өңірде мәслихат депутаттарының, ғалымдардың, өлкетанушылардың қатысуымен консультативтік-кеңесші органдар форматында өңірлік комиссия құрылып, олардың құрамына 265 ғалым алынды.
Бұл атаулы күн – саяси дата дегеннен гөрі ұлтты тұтастыратын, өткен дәуірдің қасіреті туралы түрлі ұстанымда жүрген адамдардың бәрін ортақ диалогқа шақыратын, әлуметтік маңызы бар күн деген орынды.
<a href="https://www.inform.kz/kz">ҚазАқпарат</a>

Бүгін – саяси қуғын-сүргін және ашаршылық құрбандарын еске алу күні

<a href="https://kyzylorda-news.kz/">Kyzylorda-news.kz.</a> Қызылордада еліміздің дамуына ерекше үлес қосқан адамдар туралы энциклопедия қайта басылатын болады. Оған Орынбор облысының мемлекеттік мұрағаттарынан жергілікті этнографтар тапқан мәліметтер енгізіледі.
Мәселен, ресейлік сақтау орнының сөрелерінен Әбілқайыр ханның жақын адамы – Кедей би туралы белгісіз фактілер табылды. Мәселен, белгілі болғандай, көрнекті қайраткер 1740 жылдан 1750 жылға дейін Петерборда Қазақ хандығының мүддесін қорғаған. Сонымен қатар, экспедиция құрамында ол қазақ жерлерін зерттеді, ол туралы кейінірек кітаптарында жазды. Қызылордалық ғалымдардың зерттеулері әлі де жалғасуда. Бұл жұмыстардың барлығы “Рухани жаңғыру”бағдарламасы аясында жүзеге асырылуда.
<blockquote>
 – 21 ғасырда инновацияға, ғылымға, техникаға көп көңіл бөлінеді. Бірақ рухани факторды, ұлт тарихын ұмытпауымыз керек. Өз тарихын білмейтін халықтың болашағы жоқ екені белгілі. Біз тарихымыздағы ақтаңдақтардың орнын толтыру үшін жұмыс істеп қана қоймай, осы білімді болашақ ұрпаққа аман — есен жеткізуіміз керек, – деді тарих ғылымдарының докторы Берекет Кәрібаев.
</blockquote>

Қызылордада энциклопедия қайта басылады

Kyzylorda-news.kz. Сыр өңірінде ұлт әдебиетінің абызы, КСРО Мемлекеттік сыйлығының лауреаты Әбдіжәміл Нұрпейісовті еске алу кешінің жалғасы ретінде бүгін «Әбдіжәміл Нұрпейісов – заманымыздың заңғар жазушысы» атты республикалық ғылыми конференция ұйымдастырылды.
Жиынға облыс әкімі Нұрлыбек Нәлібаев, ҚР Парламенті Мәжілісінің депутаты Балайым Кесебаева, жазушы, кинодраматург, Қазақстанның еңбек сіңірген қайраткері Елубай Смағұл, ҚР Мәдениет қайраткері Мырзан Кенжебай және кинорежиссер Рүстем Әбдірашов, Ақтөбе облысы Шалқар ауданының арнайы делегациясы, мәслихат депутаттары, зиялы қауым өкілдері, ғалымдар мен ұстаздар, Әбдіжәміл Нұрпейісовтің туған-туысқандары қатысты. 
Конференцияда аймақ басшысы жазушының рухани мол мұрасы мен құнды туындылары бүгінгі ұрпағының рухын көтеріп, тәуелсіз Қазақ елінің баянды болашағына қызмет ете беретінін атап өтті.
Қазақ елінің, қасиетті Сырдың руханиятына, әлемдік ақыл-ойдың бай қазынасына өлшеусіз үлес қосқан классик жазушы, елінің Әбесі болған дарабоз тұлға туған жерінің тағдырлы мәселесін жаһандық деңгейге жеткізіп, оқырман қауымның шексіз ықыласына бөленді.
<blockquote>
 «Мәдени-рухани дәулетіміздің қадір-қасиетін қапысыз пайымдап, елі мен жері үшін тер төккен тұлғаларымыздың болмысын жаңылмай танып отыру – ұрпақ парызы» деп өзі айтып кеткеніндей, енді бізге Әбдіжәміл ағаның шығармашылығын, қазақ әдебиетінің дамуына үлес қосқан өлшеусіз еңбегін, қайталанбас классикалық туындыларын жас ұрпаққа ұлағаттау аманат болып қалды. Сондықтан, еске алу шарасын екі күнге екшеп, оның әрбір сәтін мән-маңызға толы мезіретпен атқаруды ойластырдық,-деді Нұрлыбек Нәлібаев.
</blockquote>
Іс-шарада Елубай Смағұл жазушының кесек болмысын және шығармаларындағы кейіпкерлердің мінезі мен ұстанымын жеткізудегі ерекше қолтаңбасын сөз етсе, Мырзан Кенжебай Әбдіжәміл Нұрпейісов шығармаларының терең мағынасы, өзекті сюжеттері мен аса шеберлікпен суреттелген кейіпкерлері болашақ оқырманның да жүрегінде әрқашан маңызды орын алатынын тебіреніспен жеткізді.
Сондай-ақ, Қорқыт Ата атындағы Қызылорда университетінің профессорлары Бағдат Кәрібозұлы, Ғабит Тұяқбаев және Ұлжан Жанбершиева классиктің шығармаларын жан-жақты талдап, Сырдың дара перзентінің ел болашағы үшін еткен ерен еңбегі мен азаматтық тұлғасын саралады.
<img src="https://kyzylorda-news.kz/wp-content/uploads/2022/05/fb_img_1653746897334.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653746920727.jpg" alt="" />

«Әбдіжәміл Нұрпейісов &#8211; заманымыздың заңғар жазушысы» атты республикалық ғылыми конференция өтті

Kyzylorda-news.kz. Н.Бекежанов атындағы қазақ академиялық музыкалық драма театрында Қазақстан және КСРО Халық әртісі, Қазақстанның Еңбек Ері Асанәлі Әшімовтің 85 жасқа толуына арналған «Тағдыр тақтасы» спектаклі сахналанды.
Мерекелік шараға аймақ басшысы Нұрлыбек Нәлібаев, халық әртісінің жұбайы Бағдат Әшімова, өнер саласының ардагерлері, зиялы қауым өкілдері, өнер сүйер азаматтар қатысты.
Киелі сахнада Асанәлі Әшімовтің өмір жолын бейнелейтін «Тағдыр тақтасы» қойылымын шәкірттерінен құралған «Жаңа ғасыр» театры сомдап шығып, көрермен қошеметіне ие болды.
Театр төрінде өткен арнайы шарада облыс әкімі Нұрлыбек Нәлібаев аңыз адам, біртуар қайраткер Асанәлі Әшімовке Сыр жұртшылығы атынан құттықтауын жеткізіп, мерейтой иесінің иығына шапан жауып, Қызылорда облысының Құрмет грамотасын табыстады.
<blockquote>
 “Құрметті Асанәлі Әшімұлы! Әлемге танылған Өзіңіздей дарабоз өнер иесін Сыр елі өз перзентіндей қадірлейді. Бүгін өңірімізге Өзіңіздің ат басын бұруыңыз барша сырбойылықтарға үлкен қуаныш алып келгені сөзсіз. Мемлекет басшысы Қасым-Жомарт Кемелұлы Тоқаев «Сізді аса көрнекті актер ретінде КСРО ғана емес, бүкіл әлемдік кинематография қауымдастығы мойындады», – деген болатын. Сіз тума талантыңызбен, кәсіби шеберлікпен сомдаған рольдеріңізбен екі дәуір ұрпағының сүйікті актері ғана емес, ұлағатты ұстазы да болдыңыз. Барша Сыр жұртшылығы атынан Сізді мерейлі жасыңызбен шын жүректен құттықтаймын! Сізге зор денсаулық, отбасыңызға бақ-береке, амандық тілеймін”, – деді Н.Нәлібаев.
</blockquote>
Салтанатты кеште Асанәлі Әшімов Ж.Ерманның сөзіне жазылған А.Қоразбаевтың «Жан балам» әнін орындап, Сыр еліне алғысын жеткізді.
Айта кетейік, театр фойесінде Асанәлі Әшімовтің шығармашылығына арналған көрме ұйымдастырылды.
<img src="https://kyzylorda-news.kz/wp-content/uploads/2022/05/fb_img_1651373630836.jpg" alt="" />
<img src="https://kyzylorda-news.kz/wp-content/uploads/2022/05/fb_img_1651373635070.jpg" alt="" />
<img src="https://kyzylorda-news.kz/wp-content/uploads/2022/05/fb_img_1651373639800.jpg" alt="" />
<img src="https://kyzylorda-news.kz/wp-content/uploads/2022/05/fb_img_1651373624332.jpg" alt="" />
<img src="https://kyzylorda-news.kz/wp-content/uploads/2022/05/fb_img_1651373621105.jpg" alt="" />
<img src="https://kyzylorda-news.kz/wp-content/uploads/2022/05/fb_img_1651373645783.jpg" alt="" />

Қызылордада Асанәлі Әшімовке құрмет көрсетілді

<a href="https://kyzylorda-news.kz/">Kyzylorda-news.kz.</a> Бұл – көрнекті мемлекет және қоғам қайраткері, мемле­кеттік сыйлықтың лауреаты, әйгілі театр сыншысы Әшірбек СЫҒАЙДЫҢ осыдан отыз жыл шамасы бұрын Қали СӘРСЕН­БАЙҒА берген сұхбатынан алынған үзінділер. Содан бері бірдеңе өзгерді ме екен, енді өзгермесе… Оқып көріңіз.
Билік пен халық екі тілде сөйлейді. Билік өз тілімізде сөйлемей өспейміз.
Билік базар араласын. Базардан бүткіл өмірімізді көруге болады.
***
Қазіргі әндерден тек барабанның дауысынан басқа ештеңе естімейсің. Миың шаршайды, көзің қарауытады. Құрқұлаққа айналдық қой.
***
…Ал енді мына өнердегі біржақтылықты айтайын. Опера театрының негізін салған, Күләш апамызды жетектеп жүріп, опера сахнасына алып шыққан Қанабек Байсейітовтың аты қайда? Осыны министрліктегілер қағазбастылықпен отырып аңғармай қалған болуы керек, әйтпесе Астанадағы опера театрын «Байсейітовтер театры» деп атасақ қандай жарасымды болар еді. Гнесиндер атында институт, ағайынды Абдуллиндер атында көше бар ғой. Осыны кім ойлайды? Қанекеңнің атында Талдықорғанда бір колледж болған, қазір бар ма, жоқ па білмеймін. Сонсоң «Құштар көңіл» деген кітабы қалды. Қанекеңнің қатарластарының бәрінің аты жаңғырып жатыр. Бұл кісі неге жалғыз қалды?
***
Шындық бір түрлі жаңа түскен келін секілді. Бірде ұяң, бірде қылымсиды, бірде долы т.б.
Мәдениет, өнер халықтың көз алдында. Ол сенің жүзің, бетің, бағдаршамың, сенің психологияң, эмоцияң. Мәдениет осындай жүк көтеріп тұр. Ол жұрттың назарында.
***
Менің 20 жыл өмірім Мәдениет министр­лігінде өтті. Екі рет орынбасар болдым. Орталық Комитеттің Мәдениет бөлімінде істедім. Ректор болдым. Өнер баспалдағының бар саласынан өткен адаммын. Тағдырыма ризамын. Мемлекет басшылары мені министрдің орынбасары ретінде таныса, мен оларға қандай кінә қоямын. Ұлттық өнер үшін министр болып бір істеп көруге болар еді, бірақ ондай мүмкіндік болмады. Қызметті өз еркіммен өткізіп кеткен адаммын. Егер артымнан сөз еріп жатса, «Жас Алаш» бірінші болып жазар еді. Бес миллион долларды жұтып қойған Кутовойды білесің. Кейде сондай былыққа батпай, аман-есен кеткеніме шүкіршілік етемін. Әлдекімдердің кепілдемесімен, звондауымен жұмысқа орналасқан емеспін. Бәріне өзімнің қаламым мен қағазымның арқасында жеттім.
…Менің кеткен сабебім, кездейсоқ, кәсіби маман емес адамдардың өнерге араласуы мені қорқытты, үркітті… Мәдениеттің оқуын бітірмегендер мәдениетті түсінбейді деуден аулақпын. Бірақ дәл өзіңдей түсінбейді. Ол жігіттер мүмкіндігін өз саласында байқап көру керек еді. Мәселен мені жұлып алып басқа қызметке қойса, бас тартар едім, жігіттердің бас тартпайтынына қайран қаламын.
Төлегендер жинақы жүру үшін, Бекежандар керек.
***
…Кейде біздің өнер адамдары «кім сойса да, қасапшы сойса екен» деп өтірік жылайды. Олар өнердің басына түсінбейтін адам келсе, соған қуанатын секілді. Әрқайсысы Станиславский, Қуанышбаев тәрізді болғысы келеді де, ал анау соған сеніп қалады. Ал енді ұңғыл-шұңғылының бәрін біліп отырған кісіні бұлар да жақтыра бермейді-ау деп ойлаймын.
***
…Қызметтен кетіп барып атақ алғаныма шүкір деймін.Әйтпесе мынау қызметін пайлаланды деген сөзге де ілініп кетуім ғажап емес еді.
***
Дос дегеннің өзі де кейде шартты ұғым болып көрінеді. Бір қарағанда дос көп секілді. Бірақ олар аз, өте аз. Достықтың өзі құбылмалы жайға айналып барады. Осындайда Сағатты сағынамын.Тірі күнінде ренжіскен кезіміз де болды. Бірақ жаны өте нәзік еді оның. Көңілінде кір сақтай алмайтын. Шамалы уақыт өткен соң «әй, шалдың баласы қой енді» деп жүретін. Осындай досты кейде оңашада етжүрегім елжіреп, сағынып отырамын.
***
Мен алты министрмен қызметтес болдым. Мұның ішінде кісіге жаны ашитын, өнерді өзегімен өртеніп танитын Жексембек Еркінбековтей министрді мен көргенім жоқ. Он екі жыл Мәдениет министрі болу оңай емес. Негізінен таза адам болды. Басқалар «мен жаман болдым ба?» десе, өзі білсін. Көп таланттар Еркінбековтың тұсында танылды. Егер осы дұрыс емес дейтін кісі болса, менімен сайысқа түсе берсін. Өйткені ол кісіге бес жарым жыл орынбасар болдым.
<a href="https://anatili.kazgazeta.kz/news/60318">Anatili.kz</a>

Әшірбек Сығай: Төлегендер жинақы жүру үшін, Бекежандар керек

Kyzylorda-news.kz. Көктемнің алғашқы күні Елордадан бастау алған Роза Бағланованың 100 жылдық мерейтойы Сыр өңірінде жалғасын тапты.
Нартай Бекежанов атындағы Қызылорда облыстық қазақ академиялық музыкалық драма театрында Қазақстанның Халық әртісі, Халық қаһарманы Роза Бағланованың 100 жылдық мерейтойына арналған «ҚАЗАҚТЫҢ ҚАҺАРМАН ҚЫЗЫ» атты мерекелік концерт өтті.
Бұл мерекелік концерт облыс әкімі Нұрлыбек Нәлібаевтың концертті өткізуге келген еліміздің танымал өнер жұлдыздарымен кездесуімен басталды.
Аймақ басшысы Халық қаһарманы, қазақтың бұлбұлы атанған Роза Бағланованың ізін жалғап, әндерін насихаттауда өнер иелерінің айрықша орны бар екенін жеткізіп, ілтипатын көрсетті.
<blockquote>
 «Айтулы концертке қазақтың ән өнерін асқақтатып, ұлт мәдениетін көтеруге еңбек сіңіріп жүрген Өздеріңіздің қатысып, өнер көрсетулеріңіз Сыр жұртшылығы үшін үлкен мақтаныш деп білемін. Бүгін Сыр елінде ән мен өнер мерекесі ғана емес, ұлт руханиятының жаңғырған күні десе болады. Өнер көшіндегі Сіздер тұрғанда ән падишасы, қазақтың қаһарман қызы Роза Бағланованың есімі ұрпақтан-ұрпаққа жалғаса беретіні сөзсіз» – деді Нұрлыбек Нәлібаев.
</blockquote>
Концертте Қазақстанның халық әртісі Нұрғали Нүсіпжанов, Сұлушаш Нұрмағанбетова, Алтынбек Қоразбаев, Гүлнәр Сиқымбаева, Жеңіс Сейдуллаұлы, Жеңіс Ысқақова, Игорь Благодарный, Айгуль Иманбаева, Асхат Үрпеков, Шаба, Нұрлан Албан, Бауыржан Исаев, Зарина Жакенова сынды әртістер мен Құрманғазы атындағы Қазақ ұлттық оркестрі өнер көрсетті. Өнер майталмандары Нұрғали Нүсіпжанов, Алтынбек Қоразбаев пен Сұлушаш Нұрмағанбетова Роза Бағланованың өнер әлеміндегі қолтаңбасын сөз етіп, Сыр жұртының өнер иелеріне деген құрметі үшін алғысын жеткізді.
Мұнан соң, өңір басшысы ұлт өнерінің майталмандарына Сыр халқы атынан сый-сияпат жасап, құрметін көрсетті.
Айта кетейік, қазақ өнерінің біртуар әншісіне арналған бұл керемет ән кеші Мәдениет және спорт министрлігінің ұйымдастыруымен өтті.
Сыр өңірі – халық деген әр талантын төбесіне көтере алатын, ұлтым деген ұл-қыздарын ұлықтай алатын өрісті өңір. Сыр топырағынан түлеп ұшқан өнер иесі, ән падишасы Роза Тәжібайқызының әндерін сағынған көрермендер өнер жұлдыздары мен концертті ұйымдастырушыларға деген құрмет қошеметін аямады. Ән кеші өте жоғары деңгейде өтті.
<img src="https://kyzylorda-news.kz/wp-content/uploads/2022/04/img-20220424-wa0010.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0013.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0004.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0009.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0008.jpg" alt="" />

Қызылордада Роза Бағланованың 100 жылдығына арналған концерт өтті

<a href="https://kyzylorda-news.kz/">Kyzylorda-news.kz.</a> Грауденцте соғыс қызып жатқанда «Генерал Рахымовтың дивизиясына концерт қоюға әртiстер келе жатыр» деген хабар тарайды. Туған жерден жырақта от пен оқтың ортасында жүрген жауынгерлердiң қуанышында шек жоқ еді. Бұл кезде совет әскерлерi Польша жерiн жаудан азат етiп жатқан. Жергiлiктi халық жауынгерлердi қуана қарсы алады.
16 күннiң iшiнде 215 шақырымға созылған Польшаның 124 елдiмекенi гитлершiл басқыншылардан тазартылды. Әрбiр адым жер үшiн жантүршiктiрерлiк шайқас болып, совет әскері 1945 жылдың 25 ақпанында Грауденц қаласын қоршауға алады. Оған 37-шi гвардиялық атқыштар дивизиясы мен 2-шi күштi армия бiрiге отырып қол жеткiзген едi.
37-шi гвардиялық атқыштар дивизиясының командирi даңқты қолбасшы, генерал-майор Сабыр Рахымов болатын. Ол концерт қоюға әншi жерлестерiнiң келгенiне қатты қуанады. Елден келген өнер иелерiнiң iшiнде бұлбұл көмей әншi Роза Бағланова да бар еді.
Роза апамыз осы оқиғаны өмір бойы ұмытқан емес, әңгіменің орайы келгенде үнемі мақтанышпен айтып, марқайып отыратын.
<blockquote>
 «Араларыңда менiң қарындасым бар екен ғой, қазақтың қызы – Роза Бағланова деген қайсың?» – деп ол кiсi бiздiң арамызға өзi iздеп келдi. Сұңғақ бойлы, шашы қап-қара, қырықтардан асқан кiсi екен. Әңгiме арасында ол өзiнiң туыстары жайында сөз қозғады, кiшкентайдан жетiм қалғанын айтты. Кiм бағып, кiм адам еткенiн, тегiнiң неге Рахымов болғанын, бәрiн-бәрiн айтып бердi», – дедi бірде Қазақстанның Халық қаһарманы, Қазақстан Халық әртiсi, әншi Роза Бағланова әңгiме арасында.
</blockquote>
Майдан даласында жүрген жауын­гер­лердi рухтандырып, көңiлдерiн көтеруге келген өнерпаздарға генерал Рахымов жерлесi Тоғанбайды таныстырады. Қазақстанның мақтанышы, Кеңестер Ода­ғының Батыры, Днепр шайқасының қаһар­маны Тоғанбай Қауынбаевтың май­дан даласында аты аңызға айналып тұрған кез едi. «Отан үшiн» атты май­дан­дық газетте жауынгер-ақын Сағынғали Сейiтовтiң «Тоғанбай» деген өлеңi жарияланған болатын. Елден келген әншiлер шаршағанына қарамай, күнiне үш реттен концерт бердi. Тiптi жау жағының мазалап, оқта-текте оқ жаудырып қоятынына да қараған жоқ.
Біз – жауынгер халықтың ұрпағымыз. Бұл жәй ғана айтыла салған сөз емес, тарихтың ұзақсонар көшінде талай рет айғақталған нәрсе. Өжеттік пен батылдық біздің қанымызда бар. Қай ғасырды, қайсыбір елеулі оқиғаны алсаңыз да, бар ғұмырын аттың жалы, түйенің қомында өткізген ата-бабаларымыздың ерлік пен батырлық дастаны менмұндалап тұрады. Өзге жұртқа қарағанда, бір ерекшелігі – біздің халқымыздың ұлдарымен бірге, қыздары да барлық уақытта өжеттік пен ерліктің символына айнала білген.
Осы «Ұлы Отан соғысы» деген атпен тарихта қалған төрт жылдық қырғында Шығыстың шынарлары Әлия мен Мән­шүк, Хиуаз бастаған қыздарымыз қаһарман халықтың қаны сақталғанын барша әлемге тағы бір әйгілеп берді.
Жаратылысы бөлек, табиғаты батыр­лық пен батылдықтың тұнығынан тарал­ған өр қыздарымыз өз алдына, жаны нәзік, ішкі әлемін сезім иірімдерінің тербетілген әлсіз ғана майдақоңыр талшықтары билеткен өнер иелері де күн туғанда қасқайып, қыр басындағы қан майданның ара­сында жүрді. Сондай оқиғаның бірі атақты әншіміз Роза Бағла­нова­ның басынан өткенін бүгінде ел де жақсы білсе керек.
Жан алысып, жан беріскен ұлы шай­қас қара жердің қара топырағын қанға бояп, қыраттың басы қызарып, ойпаттың іші ойран боп жатқанда, зұлымдықтың найзасына айқара төсін қаймықпай тосып, бұғауға түскен бейқам елдерді фашизмнің құрсауынан босату үшін өлімге бас тіккен кеңестік жауынгерлерге күш беру мақсатында ел-елден өнер адамдары барып, концерт қойып жүрген кездер болатын. Оған да екінің бірінің жүрегі дауалай бермейді, бұған да батырлық пен батылдық қажет.
Алғашында, енді келіп көлік­тен түсерде, генерал «Менің қарын­дасым екенсің ғой!» – деп көтеріп алғанда, өзінің туған қарындасына жолыққандай қатты қуанады. Сонда екі иығына екі кісі мінгендей, ұзын бой­лы, қарулы кісінің қолындағы кіп-кішкентай әнші қыздың балаша мәз болғанын қайтерсіз. Қазақ қайда жүрсе де бауырмалдығын ұмытпаған халық қой, Еуропаның төсіндегі қан майдан даласында кездесіп, бірін-бірі ағалы-қарындас тұтқан екеуіне өзге жұрт қызыға қараған еді. 
Әншiлердi генерал Сабыр Рахымов­тың дивизиясына арнайы апарып концерт ұйымдастыратын жөнi бар едi. Ержүрек қолбасшының сарбаздары мұндай құрметке лайық болатын. Мұ­ның алдында Солтүстiк Кавказды бас­қын­шылардан азат етудегi генерал Рахымовтың ерлiгi мен әскери шеберлiгi Сталиннiң өзiн таң қалдырған.
Сұрапыл соғыс жүрiп жатқанда да қолы­нан iс келетiн бiлiктi басшыны таң­дап-талғап отырған. Әскери iстер­дегi генералдың шеберлiгi маршал Рокоссовскийдi де мойындатты. Ол 1-Белару­сь майданының жаңа қолбас­шысы Жуковтан генерал Рахымовты майдандағы жағдайдың тым ауырлығына байланысты 2-Беларусь майданына жiберуiн өтiнген. Рахымовтың 37-гвардиялық атқыштар дивизиясына келу себебi осы болатын.
Оңтүстiк Қазақстан облысындағы Қазығұрт тауының баурайында туып-өскен Сабыр Рахымов өзбек елiн­де тәрбие алған. Сөйтiп төскей­де малы, төсекте басы қо­сыл­ған екi елдiң төл бала­сына айналды. Оның кезiнде «өзбектен шық­қан тұңғыш генерал» атан­ғаны да сондықтан едi. Алайда, ол өзiнiң сүйген жары, майдандас серiгi Құралай Натуллаеваға «Менiң арманым – қазақ болып өлу» деп талай айтыпты.
<blockquote>
 «Мен – Сабырмен соғыста бiрге болған адаммын. Сабырдың қайтадан қалай қазақ болғаны ұзақ әңгiме. Бұл мәселемен айналысып, ары-берi шап­қыла­­ғаныма елу жыл болды. Бармаған жерiм жоқ, ақырында жоғары әскери училищенiң мұрағат бөлiмiнен «Сабыр Омарұлы» деген құжатын алып барып жағдайды түзедiм. Соның өзiнде 1996 жылы халықаралық сотқа берiп барып, соның арқасында ғана оның қазақ болғандығын дәлелдей алдым», – дегені бар бізбен әңгімесінде генералдың сүйген жары, соғыс ардагерi Құралай Натуллаева.
</blockquote>
Генерал Рахымов елiнен келген әр­тiстерге үлкен сый-құрмет көрсетiп, арнайы дастархан жасап, маңайындағы жоғары шендi офицерлердi түгел жинап, келген қонақтармен ашық-жарқын әңгiме құрады. Елге деген сағыныш сезi­мi жеңiп, бiр сәт Роза қарындасымен қазақша сөйлеседі. 
Соғыс уағында ең қажет нәрсе – қауiп­сiздiк пен сақтық шаралары. Сабыр Рахымов жауынгерлердi қанаттандырып, соңында өздерiн күткен ел бар екенiн тағы бiр естерiне салып, дем беруге кел­ген қонақтарының жай-күйiне қатты алаңдаған. Алайда майдан даласында талай мәрте қан көрiп құтырынған қанқұйлы фашистер қонақжайлылық таныта қоймапты.
– Бiздi концерт қоюға жауынгерлер орналасқан үйлерге, госпитальдерге алып барады. Кейде «Бұл жер өте қауiптi» деп басқа жерге қарай тасиды. Сөйтiп жүрiп, концерт ұйымдастырып жүрдiк. Бiрде, аз ғана уақытқа дамыл тауып, демалып жатқан кезiмiз едi, «Сақтаныңдар! Жау ұшағы!» деп айғайлаған дауыстар шық­ты да, бәрiмiз сыртқа қарай жүгiрдiк. Артынша, сол жатқан үйiмiздiң төбесiн бомба жапырып тастады. Бақытымыз бар екен, дер уағында шығып үлгердiк.
Қан майданның тап ортасына барса да қанатын өрт шалмаған қазақтың бұлбұл қызы, қаһарман қызы, әншi Роза Бағланованың майдан даласы жайын­да айтар әңгiмелерi аз емес еді. Гене­рал Сабыр Рахымов туралы да көп де­рек бiледi екен. Кезiнде 15 одақтас респу­блика халқының Отаны бiреу ғана болатын. Ондағы барлық жұрт бiр елдiң ғана азаматы едi. Генерал Сабыр Рахымов ресми түрде қазақ болуды туған ел алдындағы борышым деп санаған. Кеңестер Одағының Батыры атағы қаза тапқан соң берiлген генералдың аманаты елу жылдан кейiн орындалған. Бұл жерде генералдың сүйiктi жары Құралай Натуллаеваның ерекше еңбегi мен асқан табандылығын айтпай кетуге болмас. Ол жайында Роза апамыз да айта жүретін. Кезінде өзінің Ташкентте оқығанын, адам баласының басында неше түрлі жағдайлар болатынын айтқанда, генералдың басынан өткен оқиғаларды да түсінетінбіз.
Бауырмал қазақтың қайда жүрсе де қазақтығын танытып отыратын әдеті бар. Әнші мен батырдың майдан даласында ағалы-қарындастай болып табысқан осы оқиғасын бұрын да талай рет айтып, талай рет жазғанбыз. Роза Бағланованың 100 жылдық мерейтойы аталып өтіп жатқан тұста мұны тағы бір еске салғанымыз артық болмас дейміз. Жастардың біле жүргені дұрыс.
Әнуарбек ӘУЕЛБЕК, 
ақын, Қазақстанның Мәдениет қайраткері

Қанатын өрт шалмаған, қайран бұлбұл!

<a href="https://kyzylorda-news.kz/">Kyzylorda-news.kz.</a> Халқының мақтанышына айналған ән падишасы, КСРО және Қазақстанның халық әртісі, Халық қаһарманы Роза Бағланованың туғанына биыл ғасыр толды.
Мемлекет басшысы Қасым-Жомарт Тоқаев әншінің құрметіне мерекелік іс-шаралар өткізуге үлкен маңыз беріп, жалпыреспубликалық деңгейде Сыр сандуғашын еске алу іс-шаралары өтуде. 
Бүгін облыс әкімі Нұрлыбек Нәлібаев Роза Бағланованың 100 жылдығына орай «Ақмаңдайлым» атты республикалық әншілер конкурсының ашылу рәсіміне қатысты. Іс-шараға әншінің ұлы Тәжен мен келіні Марал, жергілікті ардагерлер, өнер қайраткелері қатысты.
Аймақ басшысы өнерсүйер қауымды Сыр елінің біртуар перзентінің мерейтойымен құттықтап, конкурсқа қатысушыларға сәттілік тіледі.
<blockquote>
 «Бүгін Сыр елінде ән мен өнер мерекесі ғана емес, ұлт руханиятының асқақтаған күні десе болады. Қазақтың қаһарман қызы Роза Бағланованың есімі ұрпақтан ұрпаққа жалғаса берсін. Бүгінгі байқауға қатысып отырған жастар арасынан Роза апасына ұқсаған таланттар шығады деп сенемін!», – деді облыс әкімі.
</blockquote>
Сөз соңында Нұрлыбек Нәлібаев ән падишасының ұлы Тәжен мен келіні Маралға қазақы дәстүрге сай сый-сияпат жасады.
Айта кетейік, конкурсқа қазақтың ән өнерін асқақтатып, ұлт мәдениетін көтеруге еңбек сіңіріп жүрген – Рамазан Тайманов, Күлән Қалымбетова, Жеңіс Сейдуллаұлы, Бахтияр Тайлақбаев, Сембек Жұмағалиев секілді еліміздің кәсіби өнер тарландары қазылық етуде.
Өнер байқауында еліміздің түкпір-түкпірінен келген жас әншілер бақ сынауда.
<img src="https://kyzylorda-news.kz/wp-content/uploads/2022/04/278572720_285767060411212_6426505297102284860_n.jpg" alt="" />
<img src="https://kyzylorda-news.kz/wp-content/uploads/2022/04/278295201_285767067077878_8832389208497293510_n.jpg" alt="" />
<img src="https://kyzylorda-news.kz/wp-content/uploads/2022/04/278566375_285767160411202_6193947375216966176_n.jpg" alt="" />
<img src="https://kyzylorda-news.kz/wp-content/uploads/2022/04/278738683_285767173744534_8492124268761103057_n.jpg" alt="" />
<img src="https://kyzylorda-news.kz/wp-content/uploads/2022/04/278649416_285767337077851_8795797870398231245_n.jpg" alt="" />

Қызылордада Роза Бағланованың құрметіне «Ақмаңдайлым» байқауы басталды

<a href="https://kyzylorda-news.kz/">Kyzylorda-news.kz.</a> Бүгін Қазақстан және КСРО халық артисі, Халық қаһарманы Роза Бағланованың 100 жылдығы аясында туған жері Сыр елінде әншінің ескерткіші ашылды.
Облыс орталығының қақ төрінен орын алған ескерткіштің ашылу салтанатында Қызылорда облысының әкімі Нұрлыбек Машбекұлы құттықтау сөз сөйлеп, Роза Тәжібайқызының ұлы Тәжен мен келіні Марал өз лебіздерін білдірді.
Ескерткіштің ашылу рәсімі Роза Бағланованың 100 жылдығына арналған «Ақмаңдайлым» республикалық әншілер конкурсына ұласып жатыр.
<img src="https://kyzylorda-news.kz/wp-content/uploads/2022/04/zhenis.jpg" alt="" />

Қызылордада Роза Бағланованың ескерткіші ашылды

<a href="https://kyzylorda-news.kz/">Kyzylorda-news.kz.</a>&nbsp; Жалағаш ауданында отбасылық құндылықтарды насихаттау, гендерлік саясатты жүзеге асыру мақсатында Қызылорда облыстық әйелдер кеңесінің ұйымдастыруымен тағылымды шара өтті. Жалағаш ауданынан түлеп ұшып, бүгінде өңірде жауапты қызмет атқарып жүрген және өз саласы бойынша ұзақ жылдар абыроймен қызмет атқарып, зейнет демалысына шыққан қыз-келіншектер еліне төркіндеп келіп, туған жеріне тағзым етті.
Іс-шара барысында құрметті қонақтар алдымен аудандық тарихи-өлкетану музейіне барып, туып-өскен жерінің тарихына қанықты. Одан соң Ш.Ермағанбетова атындағы №246 мектепте аудан тұрғындарымен кездесті.
Кездесуге аудан әкімінің орынбасары Жасұлан Еспенбет қатысты. Алдымен сөз алған Қызылорда облыстық әйелдер кеңесінің төрайымы Райкүл Байназарова іс шараның негізгі мақсатына тоқталды. Сондай-ақ еңбек ардагерлері Гүлсара Қуандықова және Қазына Өзденбаевалар өздерінің еңбек жолдары жайында әңгімелеп, қызықты шақтарын еске алды.
Өткен ғасырдың жетпісінші жылдары елдің аузынан түспеген “Тракторшы Гүлсара” әнін бүгінгі жастар білмегенімен, сол заманның өкілдері жақсы біледі. Гүлсара, Қазына апаларымыз ауыр жүк көліктерін тізгіндеп, еңбек майданының бел ортасында жүрді. Бірі трактормен, бірі “ЗИЛ” жүк көлігімен күні-түні жол жүріп Қызылқұм, Қарақұмдағы малшыларға қажетін жеткізіп берді, одан бөлек, егіс даласындағы еңбекшілерге ер азаматтармен бірдей қызмет еткені бүгінгі жастарға үлгі, өнеге десе болады. Сонымен бірге шара барысында Қорқыт Ата атындағы Қызылорда университетінің профессоры, педагогика ғылымдарының кандидаты Рабиға Игенбаева аудан жастарын ғылыми зерттеулерге және ізденістерге баулу бағытында өзінің ұзақ жылғы тәжірибесімен бөліссе, “Атамекен” кәсіпкерлер палатасы жанынан құрылған кәсіпкер әйелдер ассоциациясының төрайымы Жанна Аманова белсенді кәсіпкер әйелдердің қоғамның жаңа бағытта дамуына қосып келе жатқан үлесі зор екенін мақтанышпен жеткізді.
Сонымен бірге Қазақстан Жазушылар одағының және Қазақстан Журналистер одағының мүшесі, “Сыр бойы” газетінің тілшісі Ғазиза Әбілдаева жастарды шығармашылыққа баулу жайына тоқталды. Ал, М.Мәметова атындағы Қызылорда педагогикалық жоғары колледжі директоры Жақсыгүл Тоғанова мен аудандық білім бөлімінің басшысы Талғат Садықов колледжде даярланатын болашақ педагог кадрлардың кәсіби даярлығы мазмұнын жетілдіру мақсатында меморандумға қол қойды.
Аталған іс шараны Жасұлан Ерданұлы қорытындылап, халқымыздың жөн-жоралғысымен сый-сияпат жасап, құрмет көрсетті. Қонақтар Қ.Қазантаев атындағы аудандық мәдениет үйі жанындағы халық театры сахналаған “Жеңгетай” спектаклін тамашалады.
<img src="https://kyzylorda-news.kz/wp-content/uploads/2022/04/278509187_1431604417291632_3566154977842401984_n.jpg" alt="" />
<img src="https://kyzylorda-news.kz/wp-content/uploads/2022/04/278537830_1431604460624961_6989988653762867761_n.jpg" alt="" />
<img src="https://kyzylorda-news.kz/wp-content/uploads/2022/04/278585178_1431604323958308_7530494856945925801_n.jpg" alt="" />
<img src="https://kyzylorda-news.kz/wp-content/uploads/2022/04/278597064_1431604370624970_4297283854453606832_n.jpg" alt="" />
<img src="https://kyzylorda-news.kz/wp-content/uploads/2022/04/278589277_1431604260624981_7945938401843706765_n.jpg" alt="" />

Бабалар жолы жаңғырды

<a href="https://kyzylorda-news.kz/">Kyzylorda-news.kz.</a> «Мүмкіндіктер керуені» шарасы аясында С.Майқанова атындағы мәдениет үйінде «Жас ақындар» кастингі өтті.
Айтулы шараға ақын, ұстаз, «Құрмет» орденінің иегері Мамыр Байдәулетов пен «Рухани жаңғыру» орталығының Ұйымдастыру-жобалау жұмысы бөлімінің басшысы Шакизат Қаратайұлы қазылық етіп, сөз өнерінің қадірін түсінетін, шығармашылық қуат пен шынайы таланты бар жастарға бағыт-бағдар беріп, сөз қиюластырудың түрлі техникаларын, айтуға оңай, тыңдауға түсінікті жыр жазудың қыр-сырымен бөлісті. Ақын болуда шалқар шабыттан бөлек, эстетикалық талғам мен сөз құдіретінің маңыздылығы, көркемдік сапасының биік болуы жөнінде түрлі ақыл-кеңестер айтылды.
<blockquote>
 «Ақындық өнер – сөз өнерінің аса қастерлі саласы, ақын бойындағы шығармашылық қуат пен шынайы таланттың биік өлшемі. Ежелден-ақ қазақ халқы да өлең сөздің қасиетіне бас иіп, оны өнер атаулының ең биік шыңына балаған. Өлең тілінің кіршіксіз таза болуы, бөтен сөзбен былғанбауы – ақындықтың басты талабы. Бізде бунақ, шумақ, ұйқас деген түсініктер бар, бұл – өнердің техникалық жағы. Осының бәрін меңгерген ақыннан болашақта жақсы сөз шебері шығатынына сенімім мол», – деді ақын Мамыр Байдәулетов.
</blockquote>
Жыр кастингіне 20-дан аса қала жастары қатысып, өз бақтарын сынады. Шығармашылық әлеуеті жоғары ақындар алдағы уақытта шеберлік сағаттарына, ақындармен кездесулер мен түрлі жазба ақындар үйірмелеріне қатысады.

Қазақстан және Қызылорда облысының жаңалықтары: Руханият

Ерлан Қарин: Саяси қуғын-сүргін құрбандарын толық ақтау жөніндегі мемкомиссия жұмысы мәресіне жетіп қалды

Бүгін – саяси қуғын-сүргін және ашаршылық құрбандарын еске алу күні

Қызылордада энциклопедия қайта басылады

«Әбдіжәміл Нұрпейісов – заманымыздың заңғар жазушысы» атты республикалық ғылыми конференция өтті

Қызылордада Асанәлі Әшімовке құрмет көрсетілді

Әшірбек Сығай: Төлегендер жинақы жүру үшін, Бекежандар керек

Қызылордада Роза Бағланованың 100 жылдығына арналған концерт өтті

Қанатын өрт шалмаған, қайран бұлбұл!

Қызылордада Роза Бағланованың құрметіне «Ақмаңдайлым» байқауы басталды

Қызылордада Роза Бағланованың ескерткіші ашылды

Бабалар жолы жаңғырды

Мүмкіндіктер керуені: Жас ақындар кастингі өтті

Қазақстан және Қызылорда облысының жаңалықтары: Руханият

Ерлан Қарин: Саяси қуғын-сүргін құрбандарын толық ақтау жөніндегі мемкомиссия жұмысы мәресіне жетіп қалды

Бүгін – саяси қуғын-сүргін және ашаршылық құрбандарын еске алу күні

Қызылордада энциклопедия қайта басылады

«Әбдіжәміл Нұрпейісов &#8211; заманымыздың заңғар жазушысы» атты республикалық ғылыми конференция өтті

Қызылордада Асанәлі Әшімовке құрмет көрсетілді

Әшірбек Сығай: Төлегендер жинақы жүру үшін, Бекежандар керек

Қызылордада Роза Бағланованың 100 жылдығына арналған концерт өтті

Қанатын өрт шалмаған, қайран бұлбұл!

Қызылордада Роза Бағланованың құрметіне «Ақмаңдайлым» байқауы басталды

Қызылордада Роза Бағланованың ескерткіші ашылды

Бабалар жолы жаңғырды

Мүмкіндіктер керуені: Жас ақындар кастингі өтті

«Әбдіжәміл Нұрпейісов – заманымыздың заңғар жазушысы» атты республикалық ғылыми конференция өтті