<a href="https://kyzylorda-news.kz/">Kyzylorda-news.kz</a> Қазақстанда үйінің ауласында кілем жуғандарға айыппұл салынады. Бұл туралы <a href="https://stan.kz/kazakstanda-uyinin-aulasinda-kilem-zhugandarga-ayippyl-419143/">Stan.kz </a>ақпарат агенттігі Отырар телеарнасына сілтеме жасап хабарлайды.Әкімшілік құқық бұзушылық туралы кодекстің 505-бабына сәйкес, аулада кілем жуу абаттандыру қағидаларын бұзу ретінде қарастырылады. Айыппұлдың мөлшері құқық бұзушының мәртебесіне байланысты белгіленеді.<blockquote>"Жеке тұлғалар үшін айыппұл мөлшері 20 айлық есептік көрсеткішке (АЕК) дейін белгіленген. 2025 жылы бұл шамамен 78 мың теңгені құрайды. Шағын кәсіпкерлік субъектілері мен коммерциялық емес ұйымдар үшін айыппұл 30 АЕК-ке дейін жетеді – бұл шамамен 118 мың теңге. Орта бизнес үшін айыппұл 40 АЕК, яғни 157 280 теңге болады. Ал ірі кәсіпкерлікке салынатын айыппұл 100 АЕК-ке дейін барады – бұл 393 200 теңге шамасында", – делінген бапта.</blockquote>Полицияның мәліметінше, құқық бұзушылықтар тек жоспарлы тексерістер кезінде ғана емес, азаматтардың шағымдары негізінде де тіркеледі. Лас суды төгу, жуғыш заттарды пайдалану, көгалдарды зақымдау және жағымсыз иістер секілді санитарлық нормаларды бұзатын әрекеттер де әкімшілік жауапкершілікке әкелуі мүмкін.Мұндай құқық бұзушылықтарды қадағалаумен учаскелік инспекторлар, жергілікті полиция қызметкерлері, санитариялық қызмет өкілдері мен әкімдік айналысады. Қайталанған шағым түскен жағдайда арнайы комиссия құрылып, екі еселенген мөлшерде айыппұл салынады.Заңгер Евгений Яворскийдің айтуынша, санитариялық талаптар мен күнделікті тұрмыс қажеттіліктері арасында тепе-теңдік сақтау маңызды. Оның пікірінше, әр азаматтың ақылы қызметтерді тұрақты түрде пайдалану мүмкіндігі бола бермейді, сондықтан бұл мәселені әлеуметтік тұрғыдан да қарастыру қажет.<blockquote>"Әкімшілік кодексінің 505-бабы іс жүзінде қызық түсіндіріледі. Бұл бап бойынша тек кілем тазалағаны үшін ғана емес, кондиционерді дұрыс орнатпағандарға да айыппұл салынады. Жеке өз басым мұндай бітпейтін айыппұлдарға түбегейлі қарсымын. Алдымен адамдарға өздері үшін жайлы өмір сүру ортасын қалыптастыру қажет деп ойлаймын. Сонда, бәлкім, олар да қандай да бір құқық бұзушылықтардан бас тартар еді. Қазір көпшіліктің қаржылық жағдайы қиын. Әркімнің кілемін химиялық тазалауға тапсыруға мүмкіндігі жоқ. Меніңше, мұндай жағдайлар үшін әкімшілік жауапкершілікке тартуға болмайды. Оның үстіне, егер сізге айыппұл салынса және сіз бұған келіспесеңіз, сотқа жүгіне аласыз. Сот шешім шығармайынша, сізді ешкім жазалай алмайды", – дейді заңгер Евгений Яворский.</blockquote>Айта кетейік, заң бойынша айыппұл туралы қаулыға 10 күн ішінде eGov.kz порталы арқылы немесе әкімшілік сотқа шағымдануға болады. Бұл ретте өзіңіздің кінәсіз екеніңізді дәлелдейтін айғақтар ұсыну маңызды. Ал егер айыппұл 7 күннің ішінде ерікті түрде төленсе, 50 пайыздық жеңілдік қарастырылған.Фото: freepik.com

Қазақстанда үйінің ауласында кілем жуғандарға айыппұл салынады

<a href="https://kyzylorda-news.kz/">Kyzylorda-news.kz</a>&nbsp;Қызылорда облысы Төтенше жағдайлар департаменті электросамокаттарды зарядтау кезінде қауіпсіздік шараларын сақтауға шақырады!&nbsp;Соңғы уақытта самокаттан шыққан өрт оқиғалары артты. Үй ішінің қауіпсіздігі үшін келесі ережелерді еске саламыз:&nbsp;Зарядтағыш – тек түпнұсқа болу керек!&nbsp;Жалған құрылғы – батареяның қызып, жарылуына себеп болады.Самокатты қараусыз қалдырмаңыз;Түнде немесе үйде ешкім жоқ кезде зарядтауға болмайды!Жанғыш заттардың жанында зарядтамаңыз;(төсек, перде, жиһаз қасында қауіпті)&nbsp;Толық қуатқа жеткізбей тоқтатыңыз;&nbsp;100%-ға жеткізбей, қуаттауды өшіріңізІсінген не иісі шыққан батарея – қауіп көзі болып табылатындығын естен шығармайық!Өз үйіңіз бен жақындарыңыздың амандығы өз қолыңызда!&nbsp;Қарапайым ережелерді сақтау – үлкен қауіптің алдын алады!Фото: freepik.com

Қауіпсіздік шаралары қаперден шықпауы тиіс

<a href="https://kyzylorda-news.kz/">Kyzylorda-news.kz</a> «Азаматтарға арналған үкімет» Мемлекеттік корпорациясы Халыққа қызмет көрсету орталықтарының ақпараттық жүйесін ҚР Денсаулық сақтау министрлігінің ақпараттық жүйесімен біріктірді. Бұл жүргізуші куәлігін алу кезінде 073/е үлгісіндегі жалған медициналық анықтама ұсыну мүмкіндігін жояды.Енді азаматтарға «Жүргізуші куәлігін беру» мемлекеттік қызметін алу кезінде медициналық анықтаманы қағаз түрінде тапсырудың қажеті жоқ. Медициналық тексерудің нәтижесі автоматты түрде ИАЖ ХҚКО-ға келіп түседі. Бұл жаңашылдық өтініштердің қарау мерзімін жеделдетуге, жалған құжаттарды ұсыну жағдайларын болдырмауға және жүргізуші куәлігін алу рәсімінің ашықтығын арттыруға мүмкіндік береді.Аталған бастама ауқымды цифрлық трансформацияның бір бөлігіне айналды және бұл мемлекеттік органдар арасындағы өзара іс-қимылды оңтайландыру арқылы мемлекеттік қызметтердің сапасы мен қолжетімділігін арттыруға бағытталған.Айта кету керек, жүргізуші куәлігінің қолданылу мерзімі аяқталмай тұрып ауыстырылған жағдайда, медициналық тексеруден өту талап етілмейді. Сондай-ақ, психоневрологиялық және наркологиялық диспансерлерден анықтама ұсыну қажеттілігі жоқ.

Мемлекеттік корпорация жүргізуші куәлігін алу кезінде 073/е медициналық анықтамасын автоматты түрде тексеруді енгізді

<a href="https://kyzylorda-news.kz/">Kyzylorda-news.kz</a> &nbsp;Қызылорда облысы Полиция департаментінің қызметкерлері Сырдария ауданы Нағи Ілиясов атындағы ауылда патриоттық тақырыпта концерт берді.Ашық аспан астындағы концерт Қазақстан полициясы күніне орай ұйымдастырылды. Қоғам тыныштығын күзетудегі еңбегін құрметтеу және қала тұрғындары арасында патриотизм мен бірлікті арттыру мақсатында өткен шара барысында погон таққан өнерпаздар патриоттық әндерді орындады.Тәртіп сақшылары барын салып, көпшіліктің көңілінен шығуға тырысты. Олар өздерінің жұмыс уақыттарының тығыздығына қарамастан, үлкен дайындықпен келгендерін көрсетті.<blockquote>«Құрметті ауыл тұрғындары және қадірлі қонақтар! Биыл Қазақстан полициясының құрылғанына 33 жыл толып отыр. Полиция – бұл тек құқық қорғаушы орган ғана емес, ол – халықпен тығыз байланыста жұмыс істейтін, қоғамның тыныштығын, қауіпсіздігін қамтамасыз ететін сенімді тірек.Бүгінгі біздің арнайы ұйымдастырып отырған іс-шарамызға келгендеріңізге, Сіздермен жүздескенімізге қуаныштымыз. Біз – осы қоғамның бір мүшесіміз. Сіздердің мәселелеріңіз, уайымдарыңыз біз үшін маңызды. Себебі қауіпсіз орта – бәрімізге ортақ. Қылмыстың алдын алу, құқық бұзушылықпен күресу тек полицияның ғана емес, бүкіл қоғамның ортақ ісі.Біздің басты мақсатымыз – заңдылық пен тәртіпті сақтау ғана емес, сонымен қатар халықпен ашық, әділ, сенімді қарым-қатынас орнату. Қоғам тыныштығы – бәріміздің қолымызда!» деді Қызылорда облысы Полиция департаменті бастығының орынбасары полиция полковнигі Омаров Оралбек Тәубақабылұлы.</blockquote>Фото: Полиция департаменті

Қызылордалық полицейлер патриоттық концерт ұйымдастырды

<a href="https://kyzylorda-news.kz/">Kyzylorda-news.kz</a> Жаз мезгілі басталысымен балалардың қауіпсіздігі басты назарда болуы тиіс. Өткен жылы балалардың терезеден құлауының 16 жағдайы тіркеліп, 17 бала түрлі жарақаттар алған. Балалардың терезеден құлау фактісінің басты себебі ата-аналардың балаларды бақылаусыз қалдыруы, терезеде уақытша бекіткіш торлардың болмауы, балалардың терезе алдында ойнауынан болып отыр,- дейді мамандар. Осыған орай аймақта “Терезе” жедел алдын-алу шарасы өз жұмысын бастады. Бұл туралы ТЖД төтенше жағдайларды алдын-алу басқармасының бастығы Бейбітхан Спанов пен көпбейінді облыстық балалар ауруханасының травматолог дәрігері Жеңісбек Карбозов айтты.<blockquote>– Қызылорда облысы бойынша балалардың көпқабатты тұрғын үйлердің терезелерінен құлап зардап шегуін немесе қаза болуын болдырмау мақсатында үгіттеу-түсіндіру жұмыстарын жүргізілуде. Сонымен қатар қала аумағында орналасқан көпқабатты тұрғын үйлердің және мини-маркет, сауда орындарының кіре беріс есіктерінің тұсына түсіндірме парақтары ілініп, тұрғын үй ауласында ескерту, түсіндіру іс-шаралары жүргізілуде. Осындай жағдайларды болдырмау бағытында “Терезе” жедел алдын-алу шарасы жолға қойылды. Мақсат біреу. Балардың денсаулығы бәрінен де маңызды. Оған бәріміз де жауапкершілікпен қарауымыз керек. Әсіресе, тұрмысы төмен отбасыларда тұратын балалардың қауіпсіздігіне баса мән беріліп отыр. Біз мұндай отбасылардың тұрғын үйлеріндегі терезелерге қорғаныш құрылғыларын орнатуды жоспарлап отырмыз. Профилактикалық жұмыс жүйелі түрде жалғасын табады,- деді Бейбітхан Оразайұлы.</blockquote>&nbsp;2025 жылдың алғашқы бес айында қайғылы жағдайлар тіркелген жоқ.&nbsp;<blockquote>– Бұл балалар қауіпсіздігі бағытындағы алдын алу шараларының тиімді жүргізіліп жатқанын көрсетеді. Алайда, осы кезеңде 1415 бала түрлі себептермен стационарлық ем қабылдады. Осындай жағдайлардың орын алуы сыртқы ортаның қолайсыздығы мен ересектер тарапынан бала қауіпсіздігіне немқұрайлы қарауынан болуда. Әрбір ата-ана мен ересек адам баланың өмірі мен денсаулығына жауапты екенін ұмытпауы керек. Жарақат алу қаупі бар жағдайларды дер кезінде анықтап, жою біздің ортақ міндетіміз. Балаларға қауіпсіздік ережелерін түсіндіру, оларға үнемі бағыт-бағдар беріп отыру ең алдымен ата-ананың құзырындағы жауапкершілік,- деді Жеңісбек Карбозов.</blockquote>

Бала өмірі - біздің жауапкершілік

<a href="https://kyzylorda-news.kz/">Kyzylorda-news.kz</a> &nbsp;Ресейде балаларға энергетикалық сусын сатқаны үшін айыппұл енгізілді. Енді мұндай бұзушылық үшін үш миллион теңгеден астам айыппұл салынуы мүмкін. Тиісті заңға ел президенті Владимир Путин қол қойды. Бұл туралы <a href="http://stan.kz/">Stan.kz</a> ақпарат агенттігі хабарлайды.Сондай-ақ көлемі 500 миллилитрден асатын банкаларды сатуға тыйым салынды. Бұл шаралар кәмелетке толмағандардың денсаулығын сақтауға бағытталған. Жергілікті биліктің айтуынша, энергетикалық сусындарды ішу жүрек-қан тамырлары ауруларына және артық салмаққа әкеп соқтырады.Елде балаларға сергітетін сусындарды сатуға тыйым салу наурыз айынан бастап күшіне енгенімен, жазалау шаралары&nbsp;енді ғана күшіне енді.Фото:&nbsp;pixabay.com

Енді балаларға энергетикалық сусын сатқандарға айыппұл салынады

<a href="https://kyzylorda-news.kz/">Kyzylorda-news.kz</a> «26 маусым – Халықаралық нашақорлыққа қарсы күрес күнін» мерекелеу айлығы аясында және профилактикалық іс-шараларды жүзеге асыру мақсатында облыстың мектеп жанындағы лагерьлер нашақорлыққа қарсы челленджге қатысты.«Қызылорда – нашақорлыққа қарсы!» деп ұрандатқан демалушылар, қоғамға зиянды бұл құбылысқа теріс көзқарас танытып, өскелең ұрпақты оның ықпалына бой алдырмауға, сол арқылы өз өмірін бақытты әрі еркін етуде шақырып!

Жазғы балалар лагерінде есірткіге қарсы челлендж өтті

<a href="https://kyzylorda-news.kz/">Kyzylorda-news.kz</a> «26 маусым – Халықаралық нашақорлыққа қарсы күрес күнін» мерекелеу айлық аясында және профилактикалық іс-шараларды жүзеге асыру мақсатында облыстың мектеп жанындағы лагерьлер «Жастар нашақорлыққа қарсы!» ұранымен есірткіге қарсы флешмобқа қатысты.Іс-шараның мақсаты: кәмелетке толмағандар мен жастарды салауатты өмір салтына және олардың бос уақытын тиімді пайдалануға баулу.Флешмобқа қатысушылар өздерінің билері арқылы есірткіге деген теріс көзқарасты, салауатты өмір салтына шақыруды көрсетті.Жеті аудан мен Қызылорда қаласындағы мектеп жанындағы лагерьлерде есірткіге қарсы флешмобтар өтті.

Жастар нашақорлыққа қарсы!

<a href="https://kyzylorda-news.kz/">Kyzylorda-news.kz</a> Қорғаныс министрінің бірінші орынбасары Сұлтан Қамалетдинов жастарды әскерге күштеп әкету іс-қимылдарына пікір айтты. Бұл туралы <a href="https://kaz.inform.kz/news/korganis-ministrlg-askerge-kushtep-aketu-areket-bolsa-sotka-zhugnu-mumkndg-bar-c930d8/">kaz.inform.kz</a> хабарлады.&nbsp;<blockquote>– Өкінішке қарай, мұндай фактілер болды. Бұған жол беруге болмайды. Сонымен бірге, біздің елде Президент «заң пен тәртіп» түсінігін айқындады. Қазақстан Республикасы Конституциясының 36-бабында «ерікті түрде» деген ұғым жоқ, онда мемлекетті қорғау - әрбір азаматының қасиетті парызы және міндеті деген нақты жазылған. Осы орайда әскерге шақырылғандар осыны орындауға міндетті. Ал егер орындамаса, заң нормалары бұл азаматқа қатысты болуы керек, - деді Сұлтан Қамалетдинов Сенаттың жалпы отырысынан кейін тілшілер сұрағына жауап бере отырып.</blockquote>Сондай-ақ министрдің орынбасарынан әскерге күштеп алып кететіндерге қатысты қолданылып жатқан шаралар туралы сұралды.– Барлық жүргізілген тексерулер бойынша, егер азамат өз құқығы бұзылды деп есептесе, бізде құқықтық мемлекет – оның сотқа жүгінуге құқығы бар. Мен Қорғаныс министрінің бірінші орынбасары ретінде өз өкілеттігімді жүзеге асырған кезеңде, мұндай жағдайлар болған жоқ, – деді ол.Фото: gov.kz

Қорғаныс министрлігі: әскерге күштеп әкету әрекеті болса, сотқа жүгіну мүмкіндігі бар  

<a href="https://kyzylorda-news.kz/">Kyzylorda-news.kz</a> &nbsp;Талдықорғандағы Жетісу облысының қылмыстық істер жөніндегі мамандандырылған ауданаралық сотында судья Ержан Жанұзақов жасөспірім Шерзат Полатты өлтірді деп айыпталған 9 сотталушыға үкім шығарды. Бұл туралы <a href="http://stan.kz/">Stan.kz</a> ақпарат агенттігі хабарлайды.&nbsp;Сот қаулысымен&nbsp;басты күдікті Абзал Шынасыл 23&nbsp;жылға бас бостандығынан айырылды. Оған Қылмыстық кодекстің 99-бабы 2-бөлігі (Адам өлтіру), 293-бабы 3-бөлігі (Бұзақылық), 24-бабы 3-бөлігі (Қылмысқа дайындалу және қылмысқа оқталу) бойынша айып тағылды.&nbsp;Екінші сотталушы Равиль Сакиев 20 жылға бас бостандығынан айырылды. Судья оны Қылмыстық кодекстің 293-бабы 3-бөлігі (Бұзақылық), 99-бабы 3-бөлігі (Кісі өлтіруге оқталу), 24-бабы 3-бөлігі (Қылмысқа дайындалу және қылмысқа оқталу) бойынша кінәлі деп таныды.&nbsp;Ал Шыңғыс Белғожаев 7 жылға сотталды. Оған Қылмыстық кодекстің &nbsp;293-бабы 3-бөлігі (Бұзақылық) бойынша айып тағылған.&nbsp;Дархан Әскентай 7 жылға бас бостандығынан айырылды. Ол Қылмыстық кодекстің &nbsp;293-бабы 3-бөлігі (бұзақылық) бойынша кінәлі деп танылды.Нұрқияс Ілиясов 9 жылға бас бостандығынан айырылды. Ол Қылмыстық кодекстің 293-бабы 3-бөлігі (бұзақылық) бойынша кінәлі деп танылды.&nbsp;Ал Нұрбол Тоқтаубаев 7 жылға сотталды. Оған Қылмыстық кодекстің 293-бабы 3-бөлігі (бұзақылық) бойынша айып тағылған. Оның туысы Азамат Тоқтаубаев 15&nbsp;жылға бас бостандығынан айырылды. Оған Қылмыстық кодекстің 293-бабы 3-бөлігі (бұзақылық), 188-бап (ұрлық) бойынша айып тағылған.&nbsp;Дидар Қалиахмет Қылмыстық кодекстің&nbsp;293-бабы 3-бөлігі (бұзақылық) бойынша кінәлі деп танылып, 7 жылға бас бостандығынан айырылды.&nbsp;Кәмелет жасына толмаған Думан Ысқақ Қылмыстық кодекстің 434-бабы (ауыр қылмыс туралы хабарламау) бойынша кінәлі деп танылып, 1,5 жылға сотталды.&nbsp;Айта кетейік, бұған дейін прокурор Дана Сәрсенбай сотталушыларға 1 жыл 6 айдан 23 жылға дейін жаза беруді сұраған еді.&nbsp;Фото: видеодан алынған скрин&nbsp;

Шерзат Полаттың қазасына қатысты сот үкімі шықты

<a href="https://kyzylorda-news.kz/">Kyzylorda-news.kz</a> «Заң және тәртіп» нарративін ілгерту мақсатында Қызылорда облысы бойынша сыбайлас жемқорлыққа қарсы қызметі Департаменті Қызылорда облысының мәдениет, архивтер және құжаттама басқармасымен бірлесіп ұйымдастыруымен «Сыбайлас жемқорлыққа қарсы іс-қимылдың жаңа тетіктері» тақырыбында&nbsp; қызметкерлермен кездесу өтті.Іс-шараның мақсаты «Заң және тәртіп» идеологиясын ілгерілету, қызметкерлерді жемқорлыққа қарсы заңнаманы сақтауға ынталандыру, оның жағымсыз салдары және оған қарсы іс-қимыл мәселелерінде жеке жауапкершіліктің маңыздылығы туралы түсіндіру.Кездесуге Департамент басшысының бірінші орынбасары А.Жүнісов, «Қорқыт ата» атындағы&nbsp; Қызылорда университетінің комплаенс-офицері, Сыбайлас жемқорлыққа қарсы&nbsp; волонтер – Ә.Жаппасбаев және теолог Б.Оспанов қатысты.Департамент басшысының бірінші орынбасары А.Жүнісов өз баяндамасында, «Жемқорлықпен күрес тек құзырлы органдардың емес, бүкіл қоғамның міндеті. Біз бұл індетке қарсы тұру үшін құқықтық мәдениет пен азаматтық жауапкершілікті қатар дамытуымыз керек»,- екендігі айтылды.Іс-шара соңында қатысушыларға сыбайлас жемқорлыққа қарсы бағыттағы бейнематериалдар көрсетілді. Жемқорлыққа қарсы іс-қимыл мәселелері бойынша тегін консультациялар алу үшін, сондай-ақ белгілі болған сыбайлас жемқорлық құқық бұзушылық фактілері туралы хабарлау үшін 1424 колл-орталығына хабарласу мүмкіндігі туралы ақпарат берілді.

«Сыбайлас жемқорлыққа қарсы іс-қимылдың жаңа тетіктері» тақырыбында кездесу өтті

<a href="https://kyzylorda-news.kz/">Kyzylorda-news.kz</a> Батыс Қазақстан облысы Сырым ауданына қарасты Жымпиты ауылында қайғылы жағдай болды. Жекеменшік үйден өрт шығып&nbsp;бес бала қаза тапты. Бұл туралы <a href="http://stan.kz/">Stan.kz</a> ақпарат агенттігі хабарлады.&nbsp;Төтенше жағдайлар қызметінің мәліметінше, өрт кешкі уақытта тұрғын үйлердің бірінде болған. Оқиға орнына жедел түрде өрт сөндірушілер мен жедел жәрдем тобы жеткен.&nbsp;Құтқарушылар балаларды жанып жатқан үйден шығарып, аудандық ауруханаға жеткізген.<blockquote>“Балалар тіршілік белгілерінсіз&nbsp;жедел жәрдеммен аудандық ауруханаға жеткізілді.&nbsp;Дәрігерлер бар күш-жігерін салғанымен, оларды аман алып қалу мүмкін болмады”, –&nbsp;делінген Батыс Қазақстан облысының денсаулық сақтау басқармасының хабарламасында.</blockquote>Алдын ала мәлімет бойынша, балалардың өліміне көмірқышқыл газымен улану себеп болған.&nbsp;Сырым ауданы әкімдігі сағат 15:00 шамасында Жымпиты ауылында тұрғын үй өртеніп жатқаны туралы хабарлама түскенін мәлімдеді.&nbsp;<blockquote>“Қаза тапқан балалардың жасы 1 жастан 6&nbsp;жасқа дейін. Олар бір отбасының баласы”, –&nbsp;делінген хабарламада.&nbsp;</blockquote>Балалардың 35 жастағы әкесі “Демалыс орталығы” мемлекеттік коммуналдық қазыналық кәсіпорнында, ал анасы жергілікті дүкенде&nbsp;жұмыс істейді. Бес балалы отбасы жалдамалы пәтерде тұрған. Өрт кезінде ата-анасы жұмыста болған.Фото: freepik.com

Қазақстан және Қызылорда облысының жаңалықтары: Құқық