<a href="https://kyzylorda-news.kz/">Kyzylorda-news.kz.</a>&nbsp; Қызылордада Қармақшы ауданы әкімдігі, облыстық мәдениет, архивтер және құжаттама басқармасының қолдауымен атақты жырау Көшеней Рүстембекұлының 75 жылдық мерейтойына арналған «Жүрегі жауһар жампозым» атты этноқойылым концерті өтті.
Қасиетті Қармақшы өңірінде дүниеге келген Сыр сүлейі, көрнекті мәдениет өкілі, жырау Көшеней Рүстембекұлының өмірі мен шығармашылығын насихаттауға арналған кеште қалалық жастар театры, Жиенбай жыраудың немересі Бидас Рүстембеков, Көшеней Рүстембекұлының баласы Арнұр Көшеней және елімізге белгілі жыршы-жыраулар өнерден шашу шашты.
Көшеней Рүстембековтың бірегей тұлғасы ашылып, қайталанбас өнері бүгінгі ұрпаққа дәріптелген кешті «Мәдениет қайраткері» төсбелгісінің иегері Берік Саймағанбетов жүргізді. Шара соңында жыршы-жырауларға алғыс білдіріп, Қазақстан Республикасының еңбек сіңірген қайраткері, «Құрмет» орденінің иегері, жырау Ұлжан Байбосыноваға «Қармақшы ауданының құрметті азаматы» атағы табысталды.
<blockquote>
 «Осыдан 48 жыл бұрын қазақтың тұқиян-тектен тін тартатын жыраулық – жыршылық өнеріне жаңаша келбет қалыптастырған Көшеней, өзінің қысқа ғұмырында атадан балаға жалғасқан тектік сарынның осы дәуірге жетуіне алтын көпір болды. Небәрі 27 жыл өмір сүріп, артына өнерін жалғастырар ұрпағын, мың жылдықтарға ұласатын жарығы самаладай өнердің білте шамын жағып қалдырды. Арада төрт мүшелдей уақыт өтті. Көшеней жырдың керуен көші тоқтаусыз жүріп, алшаң басып жаңа ғасырдың төріне озып келеді. Елбасы, Қазақстанның тұңғыш президенті Н.Ә.Назарбаевтың «Мәдени мұра, Рухани жаңғыру, Ұлы даланың жеті қыры» атты бағдарламалық мақалаларының негізгі бағыты ескі мұра, есті ғұрыптарымызды жас ұрпақтың санасында жаңғырту болса, біз сөз етіп отырған жырымыз бен жыршыларымыз ұлттық сананың қалыптасуына жұмыс жасайтын егіз ұғым.
 Ел тәуелсіздігінің 30 жылдығы, Көшеней Рүстембекұлының 75 жылдығына арналған «Жүрегі жауһар жампозым» атты этно-қойылым концертте Көшенейдей жампоздың барлық қырын, тарихтың бүккен сырын ашуға тырыстық және ол ойымыздың үдесінен шыққандай болдық», – деді «Мәдениет қайраткері» төсбелгісінің иегері Берік Саймағанбетов.
</blockquote>
Аталған шарада жыр мәйегінен шашу шашқан жыршы – жырауларға облыстық мәдениет, архивтер және құжаттама басқармасы басшысы Асқарбек Есжанов пен Қармақшы ауданы әкімі Қайрат Нұртайдың алғыс хаттары табысталды.
<img src="https://kyzylorda-news.kz/wp-content/uploads/2021/12/269762912_1831652437222256_2256543170448045897_n.jpg" alt="" />
<img src="https://kyzylorda-news.kz/wp-content/uploads/2021/12/269852047_935927433969969_8046975844076642005_n.jpg" alt="" />
<img src="https://kyzylorda-news.kz/wp-content/uploads/2021/12/268456521_935927913969921_757013298534654352_n.jpg" alt="" />
<img src="https://kyzylorda-news.kz/wp-content/uploads/2021/12/269780332_1831652373888929_7708096197616953575_n.jpg" alt="" />

Қызылордада «Жүрегі жауһар жампозым» атты этноқойылым өтті

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде ел тәуелсіздігінің 30 жылдығына орай «Тәуелсіздік және ұлттық мәдениет» атты салтанатты жиын өтті. Мерекелік шарада руханият және мәдениет саласында атқарылған жұмыстар мен алдағы міндеттер талқыланды.
Жиында Басқарма Төрағасы–Ректор Бейбіткүл Кәрімова университетте мәдени шаралардың ауқымы кеңейгенін, жас дарындардың жаңа шоғыры қалыптасқанын, биыл «Дидар» халықтық фольклорлы – этнографиялық ансамблінің құрамы қайта жасақталғанын атап өтті.
<blockquote>
 «Қазақтың сан мыңжылдық тарихы мен мәдениеті, рухани болмысын ұлттық өнерімізден көруге болады. Университетте 2000 жылы құрылған «Дидар» халықтық фольклорлы-этнографиялық ансамблі жауһар жырды дәріптеп, ұлттық өнердің асқақтауы жолында еңбек етіп келеді. Бүгінде өнер ұжымы елімізде ғана емес, алыс-жақын шетелдерде де танымал. Білім мен ғылымның қарашаңырағы саналатын Қорқыт ата атындағы Қызылорда университетінде бабалар дәстүрін жалғаған өнер саңлақтары, жас таланттар мәдениеттің дамуына үлкен үлес қосуда», – деді Бейбіткүл Сәрсемханқызы.
</blockquote>
&nbsp;«Дидар» халықтық фольклорлы – этнографиялық ансамблінің құрамы биыл қайта жасақталып, репертуары мен музыкалық аспаптар түгелдей дерлік жаңарған. Өнер ұжымы осы кезге дейін Түркия, Оңтүстік Корея елдерінде өнер көрсетіп, халықаралық «Шабыт», республикалық «Ғасырлар үні», «Жұбанов көктемі» фестивальдерінің бас жүлдесін иеленді.
Бүгінде анссамбльді жаңа деңгейге көтеру мақсатында көркемдік жетекшісі әрі дирижер қызметіне ҚР еңбек сіңірген қайраткері, қауымдастырылған профессор Мүсілім Әмзе шақырылды. Биылдан бастап Қазақстанның еңбек сіңірген қайраткері, Құрмет орденінің иегері Рамазан Тайманов та Дәстүрлі өнер институтының аға оқытушысы қызметін атқаруда. Сондай-ақ, университеттің «Дәстүрлі музыка өнері және хореография» кафедрасында аға оқытушысы болып қызмет атқаратын Қазақстанның еңбек сіңірген қайраткері, әнші Жеңіс Ысқақова жуырда өткен есеп беру кешінде өнер көрсетті.
Мәдениет саласының өкілдері жиылған «Тәуелсіздік және ұлттық мәдениет» аттышараға Қазақконцерт жанындағы республикалық концерттік-гастрольдік&nbsp;қызмет&nbsp;орталығының менеджері Ержан Алданазаров Нұр-Сұлтан қаласынан арнайы келіп қатысты. Сондай-ақ, мерекелік шарада облыстық білім және ғылым қызметкерлері кәсіподақ комитетінің төрағасы, облыстық мәслихат депутаты Гүлнар Есқалиева, Қызылорда облысының мәдениет, архивтер және құжаттама басқармасы басшысының орынбасары Ержан Жеткерұлы да қатысушыларға марапат табыстады.
Жиында университетте оқытушылық қызмет атқаратын өнер иелері мен білім алушылар «Мәдениет саласының үздігі» медалі, облыс әкімі мен облыстық мәслихат хатшысының Алғыс хаты, облыстық білім және ғылым қызметкерлері кәсіподақ комитетінің Құрмет грамотасы, Роза Бағланова атындағы «Қазақконцерт» мемлекеттік концерттік ұйымының директоры Жеңіс Сейдуллаұлының алғыс хаты, облыстық мәдениет, құжаттама және архивтер басқармасының Алғыс хаты, Қорқыт ата атындағы Қызылорда университетінің «Үздік түлек» медалімен марапатталды.
Айта кету керек, биыл университет білім алушылары өнер додаларында үздіктер қатарынан көрінді. Тобыл қаласында «Арқада Наушабайдың Нұржаны өткен» атты ІІ республикалық жыр-терме, дәстүрлі ән орындаушылар байқауында&nbsp; Дәстүрлі өнер институтының студенті Малика Алдамжарова Бас жүлде, Қызылордада өткен ХІІІ облыстық «Сыр жұлдыздры – 2021» ән байқауында дәстүрлі өнер институтының студенті Мұхамедәли Сартай жүлделі ІІ орын, «Көне Тараз күмбірі» ІІ республикалық фольклорлық ансамбльдер байқауында «Дидар» халықтық фольклорлы – этнографиялық ансамблі ІІІ орын иеленді.
Сондай-ақ, биыл Қазақстан Республикасы&nbsp;Білім және ғылым министрлігінің қолдауымен ҚР Тәуелсіздігінің 30 жылдығы аясында жыр алыбы Жамбыл Жабаевтың 175 жылдығына орай Қорқыт ата атындағы Қызылорда университетінде студенттер арасында республикалық жас ақындар айтысы өтті. Өнер додасында жүлделі І орын Қорқыт ата атындағы Қызылорда университетінің 2-курс студенті Жамбыл Бақытәліге, ІІ орын Әл-Фараби атындағы Қазақ ұлттық университетінің студенті Ұларбек Жеңісбек пен университетіміздің 4-курс студенті Бексұлтан Орынбасаровқа табысталды.
<img src="https://kyzylorda-news.kz/wp-content/uploads/2021/12/9dfe8430-40c1-41ff-aab0-4996a74c468b.jpg" alt="" />
<img src="https://kyzylorda-news.kz/wp-content/uploads/2021/12/2ae3c91c-c95f-4c1b-88bf-d338bb6f02f8.jpg" alt="" />

Университетте «Тәуелсіздік және ұлттық мәдениет» атты салтанатты жиын өтті

<a href="https://kyzylorda-news.kz/">Kyzylorda-news.kz.</a> Биыл елімізде алғаш рет архившілердің кәсіби мерекесі аталып өтуде. Бүгінде облыстың мемлекеттік архивтерінде 3561 қор яғни басқару құжаттары, ғылыми-техникалық құжаттар, фото және бейне құжаттар сақтаулы. Ал жыл сайын 15 мыңға жуық құжат архивке енеді. Бұл туралы Өңірлік коммуникациялар қызметінде өткен брифингте «Облыстық мемлекеттік архиві» КММ директорының орынбасары Жанат Алтынбаева мәлімдеді.
<blockquote>
 Архив ісі – тарихи-мәдени мұраны сақтау, дамыту және насихаттауда маңызды рөл атқарады. «Архивтік анықтамалар мен құжаттардың көшірмелері немесе архивтік үзінділер беру» сынды қызметтермен қамтылған. Сыр өңірі тарихына қатысты зерттелмеген тың құжаттар Ресей Федерациясының Орынбор, Мәскеу, Санкт-Петербургтағы мемлекеттік архивтерінде сақталған. Сондай-ақ, еліміздің біртуар азаматтары, көрнекті мемлекет және қоғам қайраткерлеріне қатысты деректер Тәжікстан, Франция, Германия, Түркия елдерінің архивінде бар. Осы тарихи жәдігерлерді анықтап, құжаттарды жинақтап елге қайтару алдағы уақыттың жоспарында, – деді Жанат Алтынбаева.
</blockquote>
Ал Қызылорда қалалық архивіне енетін құжаттар үш түрде қайта өңделіп, 17-19 градус температурада ылғалдылығы 55 градустық бөлмеде сақталады.
<blockquote>
 Қазіргі таңда қалалық архив қорында 82 мыңнан аса құжат сақтаулы. Осы құжаттардың негізінде азаматтардың әлеуметтік-құқықтық сұраныстарын орындау біздің басты міндетіміз болып табылады, – деді «Облыстық мемлекеттік архиві» КММ Қызылорда қалалық филиалының басшысы Жұлдыз Байғараева.
</blockquote>

Қызылорда архивінде 3561 қор сақтаулы

<a href="https://kyzylorda-news.kz/">Kyzylorda-news.kz.</a> «Алтынай» республикалық би байқауының жеңімпаздары анықталды, – деп хабарлайды <a href="https://www.inform.kz/kz">ҚазАқпарат.</a>
Қазақстан Тәуелсіздігінің 30 жылдығы, қоғам қайраткері, этнограф-ғалым Өзбекәлі Жәнібековтың 90 және «Алтынай» МХБ ансамблінің 35 жылдығына арналған I республикалық «Алтынай» би байқауының қорытынды концерті өтті. Шара барысында жеңімпаздар марапатталды.
Бас жүлдені Алматы облыстық «Алтынай» мемлекеттік халық би ансамблі қанжығасына байлады.
Ал І-орынды Нұр-Сұлтан қаласының «Наз» мемлекеттік би ансамблі және Қызылорда облысының «Томирис» би ансамблі жеңіп алды.
Айта кетейік, «Томирис» ансамблі би байқауына Н.Тайрдың “Қазыналы қазағым” және Б.Ағиярдың “Жайлауда” биін апарған.
ІІ-орынды Алматы облысының «Құлансаз» фольклорлы-этнографиялық ансамблі және Ақтөбе облысы «Аққу» би ансамблі иеленді.
ІІІ-орын Алматы облысының «Талдықорған әуендері» фольклорлы-этнографиялық ән-би ансамблі мен Жамбыл облысы «Ақкербез» би ұжымына бұйырды.
Сонымен қатар «Ең үздік ер адам образы» үшін«НАЗ» мемлекеттік би театрының балет артисі Асхат Маден арнайы жүлдемен марапатталды. Ал «Ең үздік әйел адам образы» үшін Ғазиза Жұбанова атындағы Ақтөбе облыстық филармониясының «Аққу» би ансамблінің балет артисі Дана Жасжанова, «ҮМІТ» сыйлығы дипломымен Қазақстан Республикасы Қарулы Күштер Ұлттық әскери – патриоттық орталығы филиалының эстрадалық би тобы;
<blockquote>
 «Бидің ұлттық құндылығын сақтап, дамытқаны үшін» дипломымен Шығыс Қазақстан облысы «Ертіс» концерттік бірлестігінің «Алтай» би ансамблі, сонымен бірге «Би әлем» Жетісу хореография орталығының арнайы сыйлығымен Қали Байжанов атындағы Қарағанды облыстық концерттік бірлестігінің «Аққу» би ансамблі марапатталды.
</blockquote>
<img src="https://kyzylorda-news.kz/wp-content/uploads/2021/12/269791260_1833716650152750_728567477093568173_n.jpg" alt="" />

Республикалық би байқауында «Томирис» би ансамблі І-орынды жеңіп алды

Kyzylorda-news.kz. Бүгін Қазақстан Республикасының Демократиялық жаңару күні, деп хабарлайды <a href="https://www.inform.kz/kz">ҚазАқпарат.</a>
1991 жылы 12 желтоқсанда Қазақстан Республикасы Президенті Нұрсұлтан Назарбаевтың «Қазақстандағы 1986 жылғы 17-18 желтоқсандағы оқиғаларға қатысқаны үшін жауаптылыққа тартылған азаматтарды ақтау туралы» Жарлығымен Қазақстандағы 1986 жылғы желтоқсанның 17-18-індегі оқиғаларға қатысқаны үшін қылмыстық, әкімшілік және тәртіптік жауапқа тартылған адамдар ақталды. Сонымен қатар, аталған Жарлықтың 4-тармағы бойынша желтоқсанның 17-сі Қазақстан Республикасының Демократиялық жаңару күні деп жарияланды.
Сондай-ақ осы күн Желтоқсан құрбандарын еске алу күні де.
1986 жылы 17-19 желтоқсан аралығында Алматыда қазақ жастарының КСРО билігінің отаршылдық, әміршіл-әкімшіл жүйесіне қарсы наразылық қимылдары орын алды. Көтерілістің басталуына Мәскеудегі орталықтың республика халқының пікірімен санаспастан Ресейдің Ульянов облыстық партия комитетінің 1-ші хатшысы Г.В.Колбинді Казақстан Компартиясы ОК-нің 1-ші хатшысы етіп тағайындауы түрткі болды. Желтоқсанның 17-і күні таңертеңгі сағат 8-де қаладағы Л.И.Брежнев атындағы алаңға (қазіргі Республика алаңы) саяси тәуелсіздікті талап еткен ұрандармен алғашында 300-дей адам жиналып, кешкісін ереуілшілер саны 20 мыңға жетті. Бірақ олардың қойған талап-тілектері аяқ асты етіліп, оларды тарату мақсатында алаңға құқық қорғау органдарының қызметкерлері мен арнайы әскери күштер тобы жеткізілді.
КСРО ІІМ-нің № 0385 бұйрығы негізінде дайындалған «Құйын-86» операциясы бойынша көтеріліс қатыгездікпен басып жаншылды. Желтоқсанның 18-і күні алаңға қайта жиналмақ болған жастарға қарсы әскер күші қолданылды. Олардың қалған топтарын ығыстыру үшін жедел отряд, милиция мен жасақшылардан арнайы топтар құрылып, қала көшелеріне аттандырылды. Осы әскери күштер желтоқсанның 19-ы күні қаланың әр тұсында қайтадан шеруге шықпақ болған 6 топты басып, таратты, ұстап қамады. Алаңдағы көтерілісшілер таратылған соң ішкі істер бөлімдеріне 2401 адам жеткізілген (Алматы түрмесіне сыймағандықтан, қала сыртына апарып тасталғандарды қосып есептегенде, барлығы 8,5 мың адам ұсталған).
Желтоқсан көтерілісі құрбандарының қатарында Е.Сыпатаев, С.Мұхамеджанова, К.Молданазарова, Қ.Рысқұлбеков, М.Әбдіқұлов, Л.Асанова сынды қазақ жастары бар.

Бүгін Қазақстан Республикасының Демократиялық жаңару күні

<a href="https://kyzylorda-news.kz/">Kyzylorda-news.kz.</a> 20 желтоқсан күні облыстық Қазақстан Халқы Ассамблеясы жанындағы аналар кеңесінің бастамасымен «Қыз – елдің көркі» атты қыздар форумы ұйымдастырылады. Оған 16-20 жас аралығындағы қыздар қатысады.
<blockquote>
 «Аналар кеңесі жұмысының бір бағыты – қыздар тәрбиесі. Осы жылдың шілде айында бастау алған «Қыз – ұлттың ұяты, халықтың шырайы» атты ақпараттық-насихаттық жобасы жүзеге асырылуда. Аудандарда үлгілі көпбалалы отбасының және қыз тәрбиелеп отырған аналармен кездесулер өткіздік. Сондай-ақ, онлайн түрде оқушы және студент қыздар қатыстырылып тәрбиелік мәні бар шаралар ұдайы ұйымдастырылуда. Ал бұл форум өсіп келе жатқан өрістерімізге үлкен тәрбие бастауы болмақ. Себебі, ұрпақ өрбітуші болашақ ана, қыздарымыздың бойында инабаттылық, ибалалық қасиеттерді жоғалтпай, сақтап қалуымыз керек», – деді облыстық Аналар кеңесінің төрайымы Рахима Ахметова.
</blockquote>
Жалпы, Аналар кеңесі 2014 жылы құрылды. Қазіргі кезде облыс бойынша 113 Аналар кеңесі жұмыс жасайды, 1103 қыз-келіншек қамтылған. Олар отбасы мәртебесін биіктетуде, құндылықтарды насихаттауда және ұрпақ тәрбиесіне бағытталған жұмыстарды атқарады.
Барлық аудандарда әкенің отбасындағы рөлін, бала тәрбиесіндегі орнын нығайтуда «Әкем – асқар тауым», «Әкем – мақтанышым», «Әке болу оңай ма?!» атты кездесулер, пікір алмасулар, дөңгелек үстелдер ұйымдастырылуда.
<blockquote>
 «Отбасы құндылықтарын дәріптеу мақсатында ардагерлер, әжелер кеңестерімен 8 шара өтті. «Бойтұмар ханым» қоғамдық бірлестігінің ұйымдастыруымен облыста «Ақ орамал» жобасы іске асты. Мақсаты – әйел-аналарымыздың отбасы тәрбиесіндегі орны мен ұрпақтар сабақтастығын нығайту. Жоба «Қазақстанның іскер әйелдері» қауымдастығымен қолдау тауып, алдағы уақытта республика көлемінде жүзеге асу жоспарлануда», – деді Әйелдер істері және отбасылық-демографиялық саясат жөніндегі комиссия хатшысы Қаламқас Каримова.
</blockquote>

Қызылорда: «Қыз &#8211; елдің көркі» атты қыздар форумы өтеді

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығына орай Ә.Тәжібаев атындағы Қызылорда облыстық әмбебап ғылыми кітапханасында үш тілде жарыққа шыққан «Сыр – Алаштың анасы» атты тарихи құнды кітаптың тұсауы кесілді.
Салтанатты шараға облыс әкімінің орынбасары, редакциялық алқа төрағасы Серік Ахмет, облыстық мәслихаттың хатшысы, тарих ғылымдарының кандидаты Наурызбай Байқадамов, техника ғылымдарының докторы, профессор, ҚР ҰҒА академигі Қылышбай Бисенов, Қорқыт Ата атындағы Қызылорда университетінің «Қорқыттану» ғылыми орталығының жетекшісі, филология ғылымдарының докторы, профессор Бағдат Кәрібозұлы, «Рухани жаңғыру» орталығының директоры, тарих ғылымдарының кандидаты Уәлихан Ибраев және ардагерлер мен ұстаздар, қоғам белсенділері қатысты.
Кітапта аймақтың ерте дәуірден бастап бүгінгі күнге дейінгі тарихы, экономикасы, қоғамдық-саяси және рухани-мәдени өміріндегі қол жеткізген табыстары мен жетістіктері үш тілде әзірленген. Кіріспесі Қазақстан Республикасының Тұңғыш Президенті – Елбасы Нұрсұлтан Назарбаевтың, Мемлекет басшысы Қасым-Жомарт Тоқаевтың және осы кітаптың идея авторы, облыс әкімі Гүлшара Әбдіқалықованың құттықтауымен басталады.
«Сыр – Алаштың анасы» кітабы логикалық тұрғыдан тізбектелген бірнеше бөлімдерден, яғни, облыс туралы жалпы ақпарат, облыс тарихына арналған, облыстың экономикалық әлеуеті, «Сыр елі – жыр елі», әлеуметтік салаға арналған, «Рухани жаңғыру» бөлімдерінен тұрады. Сонымен қатар, Қызылорда, Байқоңыр қалалары мен аудандардағы соңы серпіліс, үдемелі экономикалық дамуы мен қоғамдық-мәдени өмірдегі өзекті ақпараттар берілген.
Кітаптың тұсаукесер рәсімін облыс әкімінің орынбасары, редакциялық алқа төрағасы Серік Әбжәліұлы Ахмет ашты. Жинақтың мазмұны мен көркемдік-идеялық ерекшелігіне кеңінен тоқталып, бұл кітап Сыр елінің Тәуелсіздікке деген тартуы болмақ деді.
<blockquote>
 «Баршаңызды Тәуелсіздіктің 30 жылдық мерейтой аясында оқырманға жол тартқан жаңа кітаптың жарыққа шығуымен құттықтаймын. Редакциялық алқамен ойласа келе кітапты «Сыр – Алаштың анасы» деп атауымыздың үлкен символдық мәні бар. Халқымыздың сан ғасырлық тарихында Сыр өзенінің бойы ұлы өркениеттердің ошағы болып қана қоймай, барша дала халқына қиналғанда пана, сүрінгенде сүйеніш болғаны тарихтан белгілі. Бұл сөз бүгінде тек облыс халқына ғана емес, барша қазақстандықтарға және алыс-жақын шетелдік қонақтарымызға да таныс деп айтсақ қателеспейміз. Ал, сыртқы мұқабасының түсін де кездейсоқ таңдаған жоқпыз. Сыр топырағының түсімен үйлесім табуының өзі тарихтан тамыр тартқан туынды екенін дәлелдейді. Ал, Қорқыт ата ескерткішін бейнелеу арқылы өңіріміздің тарихы өте тереңде екенін және Сыр елінің жыр елі екенін ұғындыруды жөн санадық. Сыр елінің тарихына қаныққысы келген әрбір оқырман бұл еңбектен көп дүниені саралай алады деген ойдамын», – деді облыс әкімінің орынбасары.
</blockquote>
Келелі басқосуда облыстық мәслихаттың хатшысы, тарих ғылымдарының кандидаты Наурызбай Байқадамов іргелі ізденістерге құрылған жаңа кітап оқырманға олжалы сый болғалы тұрғанын қаперге салды. Ал, техника ғылымдарының докторы, профессор, ҚР ҰҒА академигі Қылышбай Бисенов бұл кітап тұтас Сыр елінің даму динамикасын айшықтап беретін құнды мұраға айналатынын атап өтті. Сондай-ақ, Қорқыт Ата атындағы Қызылорда университетінің «Қорқыттану» ғылыми орталығының жетекшісі, филология ғылымдарының докторы, профессор Бағдат Кәрібозұлы бұл кітаптың тың тарихи деректерге негізделіп, бұрын-сонды жарық көрмеген ақпараттармен толықтырылып шығуы үлкен ізденістен туған еңбек деп жоғары бағасын берді.
Алқалы отырыста «Рухани жаңғыру» орталығының директоры, тарих ғылымдарының кандидаты Уәлихан Ибраев кітаптың киелі жерлер географиясына негізделген тарихи орындар мен аңыз болып жеткен оқиғаларға сүйеніп жазылуының өзіндік мәні жоғары екенін мақтанышпен жеткізді.
Жиында жаңа кітаптың тұсауы кесіліп, қалың көпшілікке жол тартты. Жарыққа шыққан кітаптар өңірдің барлық кітапханаларына таратылатын болады.
Айта кету керек, тарихи жинақ аймақтың тұрмысын, рухани-мәдени даму белестерін саралау, қазына-жауһарларымызды белсенді насихаттауға үндейді. Бұл қоғамды адамның жаңа келбетін қалыптастыруда өңірде жүзеге асып жатқан «Сыр елі» мега жобасының ажырамас бөлігінің бірі болмақ.
<img src="https://kyzylorda-news.kz/wp-content/uploads/2021/12/kitap.jpg" alt="" />
<img src="https://kyzylorda-news.kz/wp-content/uploads/2021/12/kitap1.jpg" alt="" />

Тәуелсіздікке тарту: Қызылордада «Сыр – алаштың анасы» кітабы жарыққа шықты

<a href="https://kyzylorda-news.kz/">Kyzylorda-news.kz.</a> Бүгін А.Тоқмағанбетов атындағы мәдениет үйінде Ел Тәуелсіздігінің 30 жылдық мерейтойына арналған «Тәуелсіздік – мәңгілік ел мәртебесі» атты салтанатты шара өтті.
<blockquote>
 «Баршаңызды Ұлы дала елінің ұлық мерекесі – Тәуелсіздік күнімен шын жүректен құттықтаймын! Биыл рухы асқақ, тұғыры биік төл мемлекетімізге 30 жыл толды. Қарапайым тілмен айтқанда, нағыз ердің жасында, ұлы мақсаттардың басында тұрмыз. Іргесі берік Тәуелсіз Қазақстанның көркеюі жолында атқарған еңбектеріңіздің жемісін көре беріңіздер» – деді қала әкімінің орынбасары Бектас Нуридинов.
</blockquote>
Бектас Балғабайұлы өңіріміздің әлеуметтік-экономикалық дамуына және қоғамдық-саяси өмірінің өсіп-өркендеуіне қосқан үлестері үшін бірқатар азаматтарға Қызылорда қаласы әкімінің Алғыс хатын табыстады.
Шара Сыр елінің белгілі өнерпаздарының мерекелік концертіне және патриоттық сезімге толы кешке ұласты.
<img src="https://kyzylorda-news.kz/wp-content/uploads/2021/12/265971118_1673397859718647_5445538789535693153_n.jpg" alt="" />
<img src="https://kyzylorda-news.kz/wp-content/uploads/2021/12/265971118_1673397636385336_5489869901751851160_n.jpg" alt="" />
<img src="https://kyzylorda-news.kz/wp-content/uploads/2021/12/266366317_1673397726385327_526741109072926937_n.jpg" alt="" />
<img src="https://kyzylorda-news.kz/wp-content/uploads/2021/12/266063655_1673397703051996_133394633178381743_n.jpg" alt="" />
<img src="https://kyzylorda-news.kz/wp-content/uploads/2021/12/265999170_1673397869718646_704965312015653365_n.jpg" alt="" />

Тәуелсіздік – мәңгілік ел мәртебесі

<a href="https://kyzylorda-news.kz/">Kyzylorda-news.kz.</a>&nbsp; Жерлесіміз, Қазақстан Жазушылар Одағының мүшесі, ақын Темірше Сарыбайұлының 80 жылдық мерейтойына арналған «Сөйле жүрек, сөз сенде, толға бүгін» атты республикалық жазба ақындар жыр мүшәйрасы өтті.
<blockquote>
 «Темірше ақынның өлеңін оқыған адам оның туған жерге туын тіккен азамат екенін шамалайды. Қамал бұзар қырық жасында өнер қуып, өлең қуып Алматыға аттанса, араға отыз жыл салып, елге оралды. Бұлдағы Темкеңнің елге деген сағынышы мен махаббатынан болса керек. «Сырдың жиегінде тұрып сұлулығына көз салудан артық қандай бақыт бар!», деді аудан әкімінің орынбасары Жасұлан Ерданұлы.
</blockquote>
Жыр мүшайраға республикамыздың әр өңірінен 12 ақын қатысты. Байқау екі кезеңнен тұрды. Бірінші кезекте жас ақындар өздерінің Темірше Сарыбайұлына арнаған арнау өлеңдерін оқыса, екінші кезеңде еркін тақырыпта өз өлеңдерін оқыды.
Филология ғылымдарының кандидаты, қазылар алқасының төрағасы Шанжархан Бекмағанбетов, Қазақстан Жазушылар және Журналистер одағының мүшесі , ақын Ғазиза Әбілда және Қазақстан Жазушылар одағының мүшесі, ақын Назгүл Бердіқожа бастаған қазылар алқасы жеңімпаздарды анықтап, арнайы дипломмен және қаржылай сыйлықтармен марапаттады.
Сайыс нәтижесінде шымкенттік Арайлым Мұраталиева ІІІ орын, нұрсұлтандық Мұхтар Күмісбек ІІ орын, қызылордалық Ақжол Түменбай І орынды иеленсе, Алматы қаласынан келген Нұртас Тұрғанбек бас жүлдені қанжығасына байлады.
<img src="https://kyzylorda-news.kz/wp-content/uploads/2021/12/265112960_309185467876683_1845984262227242495_n.jpg" alt="" />

Жалағашта республикалық жазба ақындардың жыр-мүшайрасы өтті

<a href="https://kyzylorda-news.kz/">Kyzylorda-news.kz.</a> Ақпарат және қоғамдық даму министрлігінің қолдауымен «Қазақстан» телерадиокорпорациясы ұйымдастырған «30 жыл 30 есім» ұлттық байқауының жеңімпаздары анықталды.
**Жеңімпаздар: 
**– «Медицина және денсаулық сақтау саласына қосқан үлесі үшін» – Серік Ақшолақов, Юрий Пя, Надежда Петухова 
– «Қоғамдық белсенділігі үшін» Асылы Осман, Олеся Баимова, Айман Омарова 
– «Мәдениет саласына сіңірген еңбегі үшін» Димаш Құдайберген, Секен Тұрысбеков, Ерболат Төлепбай 
– «Кино саласына сіңірген еңбегі үшін» Болат Әбділманов, Асанәлі Әшімов, Досхан Жолжақсынов 
– «Спорт саласындағы жетістіктері үшін» Дәулет Тұрлыханов, Қанат Ислам, Илья Ильин 
– «Ғылымның дамуына қосқан үлесі үшін» Асқар Жұмаділдаев, Күнсұлу Закарья, Зейнолла Самашев 
– «Білім саласының дамуына қосқан үлесі үшін» Муаммер Гүль, Аятжан Ахметжанұлы, Аягүл Миразова 
– «Ауыл шаруашылығы және агроөндіріс саласына қосқан үлесі үшін» Нұрислам Ыбраев, Иван Сауэр, Сыдық Дәулетов 
– «Дәстүрлі өнердің дамуына қосқан үлесі үшін» Айгүл Үлкенбаева, Рамазан Стамғазиев, Елмұра Жаңабергенова 
– «Әдебиет» аталымы бойынша Дулат Исабеков, Светқали Нұржан, Ұлықбек Есдәулет марапатталды.

«30 ЖЫЛ 30 ЕСІМ» ұлттық жүлдесінің иегерлері анықталды

<a href="https://kyzylorda-news.kz/">Kyzylorda-news.kz.</a> Қызылорда облысының мәдениет, архивтер және құжаттама басқармасының ел Тәуелсіздігінің 30 жылдығына орай ұйымдастырған «Тұғыры биік Тәуелсіздік» атты республикалық ақындар айтысы «Жергілікті атқарушы органдар» санаты «Жылдың үздік жобасы» номинациясына ұсынылған болатын. Аталған шара жобалық басқару жөніндегі ұлттық конкурста жеңімпаз атанып, күміс жүлдеге ие болды.
Алты Алашқа ана атанған Сыр өңірінде сөз сарасын салмақтаған сүлейлердің жалғасы болған, елдің даңқын бір ауыз сөздің құдіретіне сыйдырған ақындар аймағымыздың өнері мен мәдениетін асқақтатып келеді.
Суырыпсалма өнердің саңлақтары сөз сайысында Тәуелсіздік жылдарындағы еліміздің қол жеткізген мерейлі жетістіктерін, кемел келешегі мен бағдарлы болашағының бағытын ұшқыр ой, көркем тілмен жырға қосып, халыққа кеңінен насихаттады. Сондай-ақ айтыс аламаны жаңа есімдер, жас ақындармен толықты.

«Жылдың үздік жобасы»: Қызылордада өткен ақындар айтысы күміс жүлдеге ие болды

Kyzylorda-news.kz. Бүгін облыстық Н.Бекежанов атындағы қазақ академиялық музыкалық драма театрында Қазақстанның еңбек сіңірген қайраткері, Қызылорда облысының Құрметті азаматы Әмір-Темір Хұсейін Жүсіпұлының 80 жылдығына арналған «Театр-тағдыр тұмарым!» атты шығармашылық кеші өткізілді.
Мерейлі кеште облыс әкімі Гүлшара Әбдіқалықова мерейтой иесін құттықтап, өнер саласындағы еңбегін ерекше бағалады.
<blockquote>
 “Тәуелсіздігімізге 30 жыл болған еліміздің рухани байлығын арттырып, төл өнерімізді халықаралық деңгейде танытуда өнер өкілдерінің алар орны бар. Қазіргі таңда Сыр елінде мақтаныш етіп айтатын өнердің тұғырлы тұлғаларының тұтас ансамблі бар. Солардың сапында Қазақстанның еңбек сіңірген қайраткері, танымал режиссер, талантты сахна майталманы Хұсейін Жүсіпұлы Әмір-Темірдің есімі ерекше аталады. Еліміздің бірнеше театрында қызмет етіп, алайда, туған жерге деген перзенттік парызын өтеу үшін Қызылорда драма театрында қалған Хұсейін ағамыз бүгінде қазақ театр өнеріндегі өр болмысты өнер иесіне айналып отыр. Хұсейін ағамызды Сыр театрының ғана емес, жалпы қазақ өнерінің дамуына сүбелі үлес қосқан қайраткер деп танимыз. Театрдың шығармашылық ұжымын бір арнаға тоғыстырып, сахналық өнерді толыққанды жасауға үздіксіз қызмет атқарып келеді. Міне, бүгін Сыр жұртшылығы, өнер сүйер қауым өзіңізбен бірге қуана тойлап жатыр. Мерейлі жасыңыз құтты болсын!”, – деді облыс әкімі.
</blockquote>
Аймақ басшысы мерейтой иесіне Сыр елінің өнер саласына қосқан зор үлесі үшін алғыс білдіріп, Қызылорда облысының Құрмет грамотасын табыстап, иығына шапан жапты.
Мерейтойлық кеште өнер майталманын КСРО және Қазақ КСР Халық артисі Асанәлі Әшімов, Қазақстанның халық артисі Талғат Теменов құттықтап, маэстроның театр өмірінде қалдырған өзіндік қолтаңбасы мен жоғары репертуарлық талғамын атап өтті. Ал, ҚР Мәдениет және спорт министрі Ақтоты Райымқұлованың құттықтауын аталмыш министрліктің жауапты қызметкері Гүлнафис Мырзашева жеткізді.
Шығармашылық кеште көрнекті жазушы, ҚР Мемлекеттік сыйлықтарының иегері Дулат Исабеков және С.Вургун атындағы Әзірбайжан Мемлекеттік орыс драма театрының көркемдік жетекшісі Мирбала Салимли бейнеқұттықтауын жолдады.
Іс-шарада Алматы қаласындағы Ғ.Мүсірепов атындағы жасөспірімдер театрының әртістері, Сыр өнерпаздары Самал Байсейітова мен Мақсат Мақұлбеков бастаған өнер саласының қызметкерлері режиссердің өмірлік жолы мен қызметіне арналған сахна қойылымдары мен ән композицияларын орындады. Кеш соңында мерейтой иесі жиналған жұртқа көрсетілген құрмет үшін ризашылығын білдірді.
Хұсейін Әмір-Темір Сырдария ауданында туған. Қызылорда, Талдықорған, Алматы, Шымкент, Орал театрларының сахнасында түрлі жанрдағы, әртүрлі стильдегі 200-ден аса спектакль қойған. Сыр өңіріндегі халық театрларында 15-тен аса спектакльді сахналаған. Өнер иесінің туындылары отандық және шетелдік театрларында қойылып, көрерменнің ыстық ықыласына бөленді.
Шығармашылық жетістіктері үшін кеңестік Мәдениет министрлігінің, 2 мәрте Қазақстан Республикасы Мәдениет министрлігінің, Қызылорда және Алматы облысы әкімінің Құрмет грамоталарымен марапатталған. Қазақстанның еңбек сіңірген қайраткері атағын алды.
<img src="https://kyzylorda-news.kz/wp-content/uploads/2021/12/fb_img_1638620592462.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620596070.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620598352.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620600940.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620607073.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620610186.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620612817.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620616248.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620618381.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620620327.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638620626892.jpg" alt="" />

Қазақстан және Қызылорда облысының жаңалықтары: Мәдениет

Қызылордада «Жүрегі жауһар жампозым» атты этноқойылым өтті

Университетте «Тәуелсіздік және ұлттық мәдениет» атты салтанатты жиын өтті

Қызылорда архивінде 3561 қор сақтаулы

Республикалық би байқауында «Томирис» би ансамблі І-орынды жеңіп алды

Бүгін Қазақстан Республикасының Демократиялық жаңару күні

Қызылорда: «Қыз – елдің көркі» атты қыздар форумы өтеді

Тәуелсіздікке тарту: Қызылордада «Сыр – алаштың анасы» кітабы жарыққа шықты

Тәуелсіздік – мәңгілік ел мәртебесі

Жалағашта республикалық жазба ақындардың жыр-мүшайрасы өтті

«30 ЖЫЛ 30 ЕСІМ» ұлттық жүлдесінің иегерлері анықталды

«Жылдың үздік жобасы»: Қызылордада өткен ақындар айтысы күміс жүлдеге ие болды

Театр тарланы Хұсейін Әмір-Темір – 80 жаста

Қазақстан және Қызылорда облысының жаңалықтары: Мәдениет

Қызылордада «Жүрегі жауһар жампозым» атты этноқойылым өтті

Университетте «Тәуелсіздік және ұлттық мәдениет» атты салтанатты жиын өтті

Қызылорда архивінде 3561 қор сақтаулы

Республикалық би байқауында «Томирис» би ансамблі І-орынды жеңіп алды

Бүгін Қазақстан Республикасының Демократиялық жаңару күні

Қызылорда: «Қыз &#8211; елдің көркі» атты қыздар форумы өтеді

Тәуелсіздікке тарту: Қызылордада «Сыр – алаштың анасы» кітабы жарыққа шықты

Тәуелсіздік – мәңгілік ел мәртебесі

Жалағашта республикалық жазба ақындардың жыр-мүшайрасы өтті

«30 ЖЫЛ 30 ЕСІМ» ұлттық жүлдесінің иегерлері анықталды

«Жылдың үздік жобасы»: Қызылордада өткен ақындар айтысы күміс жүлдеге ие болды

Театр тарланы Хұсейін Әмір-Темір &#8211; 80 жаста

Қызылорда: «Қыз – елдің көркі» атты қыздар форумы өтеді

Театр тарланы Хұсейін Әмір-Темір – 80 жаста