<a href="https://kyzylorda-news.kz/ru/obshestvo/">Kyzylorda-news.kz</a>. 27 қыркүйекте республиканың басым бөлігінде құбылмалы ауа райы сақталады. Фронталды бөліктердің әсерінен жаңбыр жауады, батыста қатты жаңбыр күтіледі. Елдің солтүстігінде, солтүстік-батысында жауын-шашын жаңбыр мен қар түрінде болады. Республиканың барлық аумағында күшті жел тұрады, оңтүстікте шаңды дауыл көтеріліп, оңтүстікте, батыста найзағай болжанады. ҚазАқпарат бұл туралы Қазгидрометке сілтеме жасап хабарлайды.
Түнде&nbsp;Қызылорда облысының&nbsp;басым бөлігінде, күндіз солтүстігінде найзағай күтіледі, 15-20 м/с екпіндегі желдің жылдамдығы 23 м/с артады. Түнде Қарағанды облысының солтүстігінде, орталығында желдің күші 15-20 м/с құрайды. Күндіз басым бөлігінде 15-20 м/с болады, екпіні 23 м/с күшейеді.

27 қыркүйекке арналған ауа райы болжамы

Kyzylorda-news.kz. Ел Тәуелсіздігінің 30 жылдық мерейтойы аясында ұйымдастырылған, Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы өз мәресіне жетті.
Салтанатты шарада облыс әкімінің орынбасары Серік Ахмет жыр додасының жеңімпаздарын құттықтап, жауһар өнерді дәріптейтін байқаудың Сыр елінде бастау алуы рухани сабақтастықты жалғап отырғанын жеткізді.
<blockquote>
 Бабаларымыздың таңдайында тат баспаған асыл сөздерін бүгінге жеткізіп, қастерлеп жүрген белгілі жырау Алмас Алматов пен оның дарабоз шәкірттерінің халық қазынасын дәріптеп келе жатқан еңбегі бүгін тағы бір биіктен көрінді. 
 Мәресіне жетіп отырған жыр додасы – осы сөзіміздің айғағы. Жыраулық дәстүр – қазақтың рухын көтеретін, рухани кемелдігін көрсететін бекзат өнер. Сол өнерді өр үнімен асқақататып, жан-дүниемізге ізгілік пен тазалық тарту еткен бүгінгі байқау қатысушыларына барша тыңдарман атынан алғыс білдіремін. Сонымен қатар, мәртебелі өнерді өз дәрежесінде әділ бағалап, өрен жүйріктерді анықтаған қазылар алқасы мүшелеріне де шын жүректен рахмет айтамын,-деді Серік Ахмет.
</blockquote>
Жыр додаға 13 жыр жүйрігі қатысып, бақтарын сынады. Белгілі жырау Алмас Алматов төрағалық еткен қазылар алқасының шешімімен бас жүлде Арал ауданынының тумасы, атақты жыршы-жырау Айбек Тәңірбергеновке табысталды. Бас жүлде иегерін облыс әкімінің орынбасары марапаттады.
Байқаудың жүлделі І орны қызылордалық Серік Жақсығұловқа берілсе, ІІ орынды ақтөбелік Демеубай Жолымбетов жеңіп алды. ІІІ орынды Павлодар қаласынан Бөкен Жігер, Қызылорда қаласынан Жақсан Жәнібек және Арал ауданынан Бексұлтан Орынбасар өзара бөлісті. Ал, қалған 7 қатысушыға ынталандыру сыйлығы бұйырды. 
Айта кету керек, бас жүлде иесіне 500 мың. теңге табысталды. Ал, І орынға 300 мың, ІІ орынға 200 мың және ІІІ орын иелеріне 100 мың теңгеден берілді.
<img src="https://kyzylorda-news.kz/wp-content/uploads/2021/09/fb_img_1632537492197.jpg" alt="" />
<hr />

Республикалық жыршы-жыраулар байқауында Айбек Тәңірбергенов бас жүлде алды

*<a href="https://kyzylorda-news.kz/ru/obshestvo/">Kyzylorda-news.kz</a>. Ел Тәуелсіздігінің 30 жылдық мерейтойы аясында Н.Бекежанов атындағы облыстық музыкалық драма театрында Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы бастау алды.*
Ұлттық өнерді ұлықтап, мәдени мұраларды дәріптеуді көздейтін жыршы-жыраулар байқауының ашылу рәсіміне облыс әкімі Гүлшара Әбдіқалықова қатысып, жыр-керуеніне жиналған халықты Тәуелсіздігінің 30 жылдығымен құттықтап, додаға қатысушы жыршыларға сәттілік тіледі.
<blockquote>
 «Сыр елі – жыр елі» атанған қасиетті өлкеміз – тума таланттардың бесігі болған, дауылпаз Сыр сүлейлері шыққан өңір. Абыз Қорқыттан бастау алатын жыраулық дәстүрдің мектебін қалыптастырған Шораяқтың Омары, Балқы Базар, Қарасақал Ерімбет, Кете Жүсіп, Дүр Оңғар, Тұрмағамбет, Нартай, Нұртуғандай дүлдүлдер дүниеге келген жер. Бүгінгі республикалық дәстүрлі орындаушылардың байқауы Арқа мен Батыстың, Жетісу мен Сырдың дарындарын тоғыстырып, Сыр жерінде жырдың жалауын желбіреткен күн десек қателеспейміз. 
 Олай болса, байқауға қатысушы өнер саңлақтарына көмейлеріңізден күміс әуен төгілсін деген тілек білдіремін! Тәуелсіздігіміз тұғырлы, ғұмыры мәңгі болсын!, – деді Гүлшара Әбдіқалықова.
</blockquote>
Жыр додасында дәстүрлі өнердің әлемдік деңгейде насихатталуына және талантты өнерпаздардың кәсіби білім алуына елеулі үлес қосқан белгілі жырау Алмас Алматов төрелік жасап, жырау, Қазақстанның еңбек сіңірген қайраткері, өнертану ғылымдарының кандидаты, Қазақ Ұлттық Өнер университетінің профессоры Эльмира Жаңабергенова, Қазақстанның еңбек сіңірген қайраткері, филология ғылымдарының кандидаты, Құрманғазы атындағы Қазақ Ұлттық консерваториясының аға оқытушысы Ұлжан Байбосынова, қоғам қайраткері, өнер жанашыры Рзақұл Нұртаев, жыршы-жырау, «Мәдениет саласының үздігі» төсбелгісінің иегері Майра Сарсенбаева қазылық етуде.
Байқауға 13 жыр жүйрігі қатысып, егемен елдің өркенді істерін арқау етіп, даңқты өнер иесі Кете Жүсіп Ешниязұлының мол мұрасын бүгінге ұрпаққа аманаттау мақсатында ұлттық өнерді ұлықтады.
Жыр додасына Ақтөбе қаласынан Демеубай Жолымбетов, Маңғыстау облысынан Амангелді Сәңкібаев, Павлодар облысы Бөкен Жігер, Алматы қаласынан Бақыт Тоғжанова, Қызылорда қаласынан Әділхан Қуаңбаев, Болат Баймұратов, Серік Жақсығұлов, Жақсан Жәнібек, Малика Алдамжарова қатысуда. Сондай-ақ, Арал ауданынан Айбек Тәңірбергенов пен Бексұлтан Орынбасар, Шиелі ауданынан Мұхамедәлі Бекпейісов және Қармақшы ауданынан Әлішер Мырзағалиев көрерменге ұлық өнерді тағы бір дәріптеді.
Байқау барысында Жүсіп Ешниязұлының бұрын соңды көп орындалмай жүрген айтыстары, термелері және «Шәһзада», «Сұрмерген», «Мекер қатын» дастандарымен қатар Ел Тәуелсіздігінің 30 жылдығына арналған арнау жырлар орындалуда.
Айта кетейік, жыр байқауы кешке дейін жалғасып, жүйрік жеңімпаздар марапатталады.
<img src="https://kyzylorda-news.kz/wp-content/uploads/2021/09/242664978_3738264646276577_5262404616285524503_n.jpg" alt="" />
<img src="https://kyzylorda-news.kz/wp-content/uploads/2021/09/242692985_3738265426276499_3246591966889410785_n.jpg" alt="" />

Сыр елінде «Жырлансын, Тәуелсіздік жыр бұлағы» атты республикалық жыршы-жыраулар байқауы басталды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; ҚР Тәуелсіздігінің 30 жылдығына орай Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы өтеді. Ұлттық мұра – жыраулық өнерді насихаттауға арналған шара 24 қыркүйек күні болады. Бұл туралы Өңірлік коммуникациялар қызметінде өткен баспасөз конференциясында облыстық мәдениет, архивтер және құжаттама басқармасының басшысы Асқарбек Есжанов мәлімдеді.
<blockquote>
 «Даңқты өнер иесінің мол мұрасын бүгінге ұрпаққа аманаттау мақсатында өткелі отырған байқауға Ақтөбе қаласынан белгілі жыр жампозы Демеубай Жолымбетов және Маңғыстау жерінен қазыналы қарт жырау Амангелді Сәңкібаев, Кереку топырағынан Бөкен Жігер, Алматы қаласынан Бақыт Тоғжановалар келді. Сондай-ақ Сыр елінің дәстүрлі өнерін республикалық деңгейде паш етіп жүрген жыр жүйріктері Айбек Тәңірбергенов, Серік Жақсығұлов, Күнсұлу Түрікпен, Марат Сүгірбай, Болат Баймұратов, Әділхан Қуаңбаевтар мен қатар жас жыршыларымыз барлығы 15 талапкер байқауда бақ сынамақ. Байқау барысында Жүсіп Ешниязұлының бұрын соңды көп орындалмай жүрген айтыстары, термелері және «Шәһзада», «Сұрмерген», «Мекер қатын» дастандарымен қатар Ел Тәуелсіздігінің 30 жылдығына арналған арнау жырлар орындалады», – деді Асқарбек Темірбекұлы.
</blockquote>
Жыр додасында өңіріміздегі дәстүрлі өнердің әлемдік деңгейде насихатталуына және талантты өнерпаздардың кәсіби білім алуына аянбай еңбек етіп жүрген жырау Алмас Алматов төрағалық жасайды. Сонымен бірге байқауда жырау, Қазақстанның еңбек сіңірген қайраткері, өнертану ғылымдарының кандидаты, Қазақ Ұлттық Өнер университетінің профессоры Эльмира Жаңабергенова, Қазақстанның еңбек сіңірген қайраткері, филология ғылымдарының кандидаты, Құрманғазы атындағы Қазақ Ұлттық консерваториясының аға оқытушысы Ұлжан Байбосынова, қоғам қайраткері, өнер жанашыры Рзақұл Нұртаев, жыршы-жырау Майра Сарсенбаева қазылық етеді. Байқау 2 кезең бойынша өткізіледі. Бір ерекшелігі – уақытқа шектеу қойылмайды. Сахнаға шыққан жыраулар сағаттап жыр айтуға мүмкіндігі бар.
Брифингте Қазақстанның еңбек сіңірген қайраткері, жырау Алмас Алматов та республикалық байқау туралы пікірін білдірді.
<blockquote>
 «Өнер – мұрагер ұрпақтары арқылы дәстүрлі сипатқа айналады. Ал, мұрагері жоқ өнер жойылады, өледі не жоғалады. Иә, әрбір ұлт өзінің тілі, діні, ділімен безбенделетін болса, қазақ өнерінің түпқазығы осы жыр өнері. Ол адамның ақыл, ес, жад, зерде көзіменен төрттағандалып, мың жылдықтардың мұрасын миллиондаған жол жыр күйінде осы бір сана арқылы бізге жеткізді. Мұның құндылығы да сол. Ал бүгінде ұрпақты сол баба мәдениетіне, аталардың мұрасына қарай бейімдеп, тәрбиелеу ұйымдастырылайын деп отырған шараның басты мақсаты», – деді Алмас Алматов.
</blockquote>
Одан әрі облыстық халық шығармашылығын дамыту және мәдени-продюсерлік орталығының директоры Жанат Құрамысова байқаудың басты мақсаты – өңірдің брэнді болып саналатын жыраулық, шайырлық, ақындық өнерді дамыту, ұлы тұлғалардың өнерін ұлықтау екенін айтып, шараның маңыздылығына тағы бір мәрте тоқталды.
Айта кету керек, Жүсіп Ешниязұлы қазіргі Қызылорда облысы, Қармақшы ауданы, Тұрмағамбет ауылында 1871 жылы дүниеге келіп, 1927 жылы дүниеден өткен. Жастайынан әкесі Ешнияздан тәлім алған ол халық арасында кеңінен танымал болумен қатар, ел билігіне араласып болыс болған. 1898 жылдардан бастап ақын шығармалары ауыз әдебиеті нұсқаларын зерттеушілердің назарына ілініп, жинақтала бастайды.

Қызылордада республикалық жыршы-жыраулар байқауы өтеді

<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданында Қазақстан Республикасының Тұңғыш Президенті – Елбасы Нұрсұлтан Назарбаевтың «Туған жерге тағзым» акциясы аясында Орал қаласында тұратын жерлесіміз, қоғам қайраткері Қуанышбай Төлебаевпен кездесу өтті.
Басқосуда аудан әкімі Мұхтар Оразбаев бүгінгі кездесудің туған жерді қадірлеу, құрметтеуге бағытталғанын атап өтіп, Қуанышбай Төлебаевтың өмір жолдарына тоқталды.
<blockquote>
 «Сыр бойы мен Батыстың арасында рухани, мәдени байланыс, өсіп-өркендеу жолында екі жаққа да пайдасы мол игілікті қарым-қатынас орнатып, дәнекер бола білген ағамыз еліміздің өркендеуі жолында талмай еңбек етті.
 Туған елде, он тоғыз жасында еңбек жолын бастаған Қуанышбай ағамыз 1965-1968 жылдары Отан алдындағы борышын Ресейде өтеп келісімен мамандығы бойынша қызметін жалғастырды.
 «Кызылордасельстрой» тресінің №4 ПМК-сында мастер, прораб, бас инженер болып белсенді қызмет жасады. Қазалы ауданы орталығындағы аудандық аурухана, мектеп, клуб, киімді химиялық жолмен тазалайтын фабрика, “Казселхозтехника”, “Сельстройдың” өндірістік базаларын салу, көптеген тұрғын үйлер мен тұрмыстық объектілер тұрғызуға тікелей араласып, өз қолынан өткізді.
 Еңбегімен көзге түсе білген Қуанышбай Төлебайұлы 1971-1972 жылдары аудандық партия комитетінде нұсқаушылық қызметке алынды. Сөйтіп, жергілікті өндіріс пен құрылыс, мелиорация-суландыру саласындағы жұмыстарға басшылық жасады. Көп ұзамай ұйымдастырушылық қабілетін көрсеткен білімді маман өндіріске жіберілді. 1973-1975 жылдары «Басықара» поселкесіндегі құрылымды «Ремстрой» базасының іргесінде «Казмелиоводхозға» қарасты ПМК-64 мекемесін құрып, басшылықты қолға алды», – деген аудан басшысы бүгінгі кейіпкеріміздің мұнан кейінгі еңбек жолы Ақжайық өңірінде жалғасқанын айтты.
</blockquote>
Қуанышбай Төлебайұлы 1975 жылы республикалық дәрежедегі басшылардың сенім артуымен Орал облысының су шаруашылығы және мелиорация басқармасының бастығы қызметіне жоғарылатылып, жіберілді. Сол уақыттан бастап бар өмірін Жайықтың бойында өткізсе де туған жерден қол үзген жоқ. Ақжайық пен Сыр өңірінің еркесіндей тең өсіп, емін-еркін, абыройлы қызмет атқарған ол осы кезге дейін екі жұрттың арасындағы дәнекерші, елші болып келеді.
Мұнан соң аудан әкімі Мұхтар Оразбаев Қуанышбай Төлебаев ағамыздың иығына шапан жауып, «Алғыс хатпен» марапаттады.
Туған жерге сәлем бере келген жерлесіміз Қуанышбай Төлебаев кездесуді ұйымдастырған аудан басшылығына алғысын айтып, ризашылығын білдірді. Мұнан соң бірқатар қазалылықтарға өзі төрағалық жасайтын «Зерде – Память» қорының «Алғыс хатын» табыстады.
Кездесуде аудандық ардагерлер кеңесінің төрағасы Оразғали Бекбанов Ақжайықта түрлі қызмет атқарған азаматтың еңбекқорлығын ерекше атап өтті. соның нәтижесінде туған жерде де, Орал өңірінде де абыройға кенелгенін тілге тиек етті.
Айта кетейік, Қуанышбай Төлебайұлы Қазалы ауданына сапары кезінде ауданның киелі жерлерін аралап, өзінің туған жері – Жанкент ауылына арнайы барады.
<img src="https://kyzylorda-news.kz/wp-content/uploads/2021/09/242390052_3159778837576375_5223836897113213695_n.jpg" alt="" />
<img src="https://kyzylorda-news.kz/wp-content/uploads/2021/09/242376257_3159778747576384_5445661089574017647_n.jpg" alt="" />

Қоғам қайраткері Қуанышбай Төлебаев жерлестерімен кездесті

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстан Республикасы Тәуелсіздігінің 30 жылдығына орай «Nur Otan» партиясы ҚР Білім және ғылым министрлігі және «Qazaq Epos» қоғамдық қорымен бірлесе отырып «Тұлпар мініп, ту алған!» байқауын жариялайды.
Байқау 6-10 сынып оқушылары арасында «Едіге батыр» жырын жатқа айтудан өтеді. Қатысушылар қосымша Алтын Орда мемлекетінің тарихи оқиғаларына қатысты сұрақтарға жауап беріп, жырда кездесетін көнерген сөздердің мән-мағынасын түсіндіріп, қазақ әдебиеті пәнінің оқу бағдарламасы негізінде әзірленген сұрақтарға жауап беруі тиіс.
Байқау 2021 жылдың 25 қыркүйек – 5 қараша аралығында өтеді. 
Жеңімпаз оқушылар ақшалай сыйлықтармен марапатталады.
Аудандық кезеңде: 
1-орын – 150 мың теңге; 
2-орын – 100 мың теңге; 
3-орын – 50 мың теңге.
Облыстық (қалалық) кезеңде: 
1-ші орын – 750 000 теңге (біреу); 
2-ші орын – 350 000 теңге (екеу); 
3-ші орын – 200 000 теңге (екеу).
Облыстық (қалалық) деңгейдегі жеңімпаз оқушылардың мұғалімдеріне арналған ақшалай сыйлықтар: 
1-ші орын – 1 500 000 теңге (біреу); 
2-ші орын – 700 000 теңге (екеу); 
3-ші орын – 400 000 теңге (екеу).
Байқау туралы толық ақпаратпен www.qazaqepos.com сайтында танысуға болады. Қосымша жаңалықтар мен мәліметтерді «Nur Otan» партиясы филиалдарының әлеуметтік желілердегі ресми парақшаларынан таба аласыздар.

«Тұлпар мініп, ту алған!» байқауы басталды

Kyzylorda-news.kz. Бұған дейін «Тұлпар мініп, ту алған» республикалық байқауы ұйымдастырылып, жыр жаттаған жастар миллионер атанған еді. Биыл да дәстүр үзілмеді. Тәуелсіздіктің 30 жылдығына орай аталған қор «Nur Otan» партиясы, Білім және ғылым министрлігімен бірлесіп, тағылымға толы сайысты қайта жариялады.⠀Бүгін «Nur Otan» партиясының облыстық филиалында облыстық филиал төрағасының бірінші орынбасары Ләйлә Төрешова, «Qazaq epos» қорының Қызылорда облысы бойынша өкілі Дәурен Сейітжанұлы мен облыстық «Дарын» қосымша білім беру орталығының директоры Айжан Қиянбекова байқау талаптарын тарқатып айтты.
Ләйлә Төрешова байқау 6-10 сынып оқушылары арасында «Едіге батыр» жырын жатқа айтудан өтетінін мәлімдеді. Қатысушылар қосымша Алтын Орда мемлекетінің тарихи оқиғаларына қатысты сұрақтарға жауап беріп, жырда кездесетін көнерген сөздердің мән-мағынасын түсіндіруі тиіс.
<blockquote>
 ⠀«Тегінде адам баласы адам баласынан ақыл-білімімен озады» деп ұлы Абай айтқан және ол еш уақыт мәнін жойған емес. Бұл бастама осы дана сөзді қаперден шығармай, жас та болса жетістіктерімен көзге түсіп жүрген дарынды оқушылардың танылуына жол ашады» дейді Ләйлә Бегалықызы.
</blockquote>
Жиында «Qazaq epos» қорының Қызылорда облысы бойынша өкілі Дәурен Сейітжанұлы рухани дода биыл үшінші рет өткізіліп отырғанын алға тартты. Бұған дейін байқау тек Алматы қаласымен шектелген. Ал, 2019 жылы республикалық деңгейде ұйымдастырылған және бұл байқауда Сыр өңірінен 3000-ға жуық мектеп оқушысы бақ сынауға мүмкіндік алған. Өткен жылы пандемияға байланысты сайыс кейінге шегерілді. Ал, биыл әдебиетке жақын шығармашыл жастар үшін орайлы сәт. Жүзден жүйрік атану, марапат биігінен табылып, сайыстың қомақты жүлдесін еншілеу алғырлар қолында. Тек мүмкіндікті қалт жібермеу керек.
<blockquote>
 – Байқау 25 қыркүйек-25 қараша аралығында өтеді. Қатысушылар «Едіге батыр» жырын жатқа айтып, жырдың ішіндегі көнерген, тариxи сөздердің мағынасын ашып, қазақ әдебиеті оқулығы бойынша әзірленген сұрақтарға жауап береді. Филология ғылымдарының докторы, профессор Серік Негимов бастаған ғалымдар жырдың Қ.Сәтбаев нұсқасын таңдады. Ол мектеп бағдарламасына толық сәйкес келеді. Байқау кезеңдері бойынша жеңімпаз атанған жастарға және олардың ұстаздарына қомақты қаржылай сыйлық қарастырылған, – дейді Дәурен Сейітжанұлы.
</blockquote>
Бұл ретте облыстық «Дарын» қосымша білім беру орталығының директоры Айжан Қиянбекова Сыр жастарының байқауға қатысуға асық екенін айтты.
Спикерлер аудандық кезеңде І орын еншілегендер 150 мың, ІІ орын 100, ІІІ орын иегері 50 мың теңгеге ие болатынын хабарлады. Облыстық-қалалық кезеңде үздік шыққан І орын иегеріне 750 000 теңге, ІІ орынға 350 000, ІІІ орын үшін 200 000 теңге қаржылай &nbsp;сый қарастырылған. Ал, облыстық (қалалық) деңгейдегі жеңімпаз оқушылардың мұғалімдеріне арналған сыйға келетін болсақ, І орынға 1 500 000 теңге, ІІ орын иегеріне 700 000, ІІІ орынды еншілеген қатысушының мұғаліміне 400 000 теңге беріледі.

«Тұлпар мініп, ту алған»: Байқау шарттары түсіндірілді

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін облыс әкімі Гүлшара Әбдіқалықова белгілі ақын, журналист, облыстық мәслихаттың депутаты, «Қызылорда қоғамдық телерадиокомпаниясы» жауапкершілігі шектеулі серіктестігінің құрылтайшысы Шәкизада Әбдікәрімовты мерейлі 65 жасымен құттықтап, дәстүрге сай иығына шапан жапты.
<blockquote>
 «Құрметті Шәкизада Өтетілеуұлы, Сізді мерейлі мерекеңізбен барша Сыр жұртшылығының атынан шын жүректен құттықтаймын! Еліміздің тәуелсіздігін нығайту, аймағымыздың қоғамдық-саяси, әсіресе рухани өмірін дамытуға ерекше еңбек сіңірген тұлға ретінде Сізді ерекше құрметтеймін. Бүгінде қасиетті Сыр топырағының киесінен шабыт алған Сіз шығармашылықтың өрлеу биігінен көрініп, туған жұртыңыздың мақтан тұтар тұлғаларының біріне айналдыңыз. Осындай елге құрметті азаматтарымызды үлгі етіп, еңбектерін бағалап, жасаған игі істерін ғибрат ету – біздің азаматтық парызымыз», – деді Гүлшара Әбдіқалықова.
</blockquote>
Басқосуда «Қазақстан» Республикалық телерадиокорпорациясы» акционерлік қоғамы Қызылорда облыстық филиалының директоры Жағыппар Қарабала мен облыстық мәслихат депутаты, «Ақмешіт ақшамы» газетінің бас редакторы Сәрсенкүл Бихожа мерейтой иесінің еңбек жолындағы елеулі сәттерді еске алып, жылы естеліктерімен бөлісті.
Жиын соңында арқалы ақын көрсетілген құрметке алғыс білдіріп, шығармашылығынан жыр-шумақтарын оқыды. Шәкизада Әбдікәрімов Қармақшы ауданы, «Дүр Оңғар» ауылында дүниеге келген. 
Әл-Фараби атындағы Қазақтың ұлттық университетінің журналистика факультетін бітірген.
Еңбек жолын 1981 жылы Қармақшы аудандық «Коммунизм шамшырағы» газетінде әдеби қызметкер болып бастап, 1984 жылы арнаулы жолдамамен «Байқоңыр» телекомпаниясына редактор қызметіне тағайындалды. 1985-1995 жылдары осы телекомпанияның төрағасы қызметтеріне дейін көтерілді. Байқоңыр қалалық «Қазақ тілі» қоғамын басқарып, ғарыш айлағында тұңғыш қазақ тіліндегі «Ақжол» газетін шығарды. 
Сонымен қатар, “Қазақстан” телеарнасының Қызылорда облысы бойынша меншікті тілшісі, Қызылорда арнайы экономикалық аймағы телекомпаниясының төрағасы қызметін атқарған.
Айта кету керек, ақын Шәкизада Әбдікәрімов еліміздің өркендеуіне және рухани дамуына ерекше үлес қосып жүрген елжанды азамат ретінде «Құрмет» орденімен, «Ерен еңбегі үшін» медалімен марапатталған. «Қазақстан Республикасының мәдениет қайраткері», «Қазақстанның құрметті журналисі», «Белсенді қызметі үшін», «ҚР ақпарат саласының үздігі» төсбелгілерінің иегері. «Қармақшы ауданының, Қызылорда қаласының құрметті азаматы». Қорқыт Ата атындағы Қызылорда мемлекеттік және «Болашақ» университеттерінің құрметті профессоры.
<img src="https://kyzylorda-news.kz/wp-content/uploads/2021/09/242314020_3724939354275773_7396779404362082883_n.jpg" alt="" />

Аймақ басшысы белгілі ақын Шәкизада Әбдікәрімовты мерейлі 65 жасымен құттықтады

<a href="https://kyzylorda-news.kz/">Kyzylorda-news.kz</a> Бүгін облыс әкімі Гүлшара Әбдіқалықова белгілі жырау, фольклортанушы, Қазақстанның Еңбек сіңірген қайраткері, «Парасат» орденінің иегері Алмасбек Алматовпен кездесті.
Аймақ басшысы жыраулық өнерді дамытушы, мәдениет жанашырының шығармашылығы арқылы қазақ өнерінің дамуына қосып жүрген сүбелі үлесін ерекше атап өтті.
<blockquote>
 «Сіз адамзаттың рухани мұрасын зерттеп, оны ұрпақ игілігіне асыру жолында аса зор істер атқарып, ұстаздық жасап келе жатырсыз. Түркі халықтарының ортақ ғұламасы Қорқыт ата мекен еткен топырақта туып, Сыр елінің ғана емес, қазақ жұртының рухани мұрасын, жыршылық дәстүрін жоғары деңгейге көтердіңіз. 
 Талапты жастарымыздың эпикалық жыр мектебінен өтіп, ұлт мұрасын жалғастырушы өнерпаз ретінде танылуына сіңірген еңбегіңіз зор. Біз сізбен әрдайым мақтанамыз, өнеріңізді құрмет тұтамыз»,-деді Гүлшара Әбдіқалықова.
</blockquote>
Басқосу барысында Сыр елінің жыраулық өнерін одан әрі дамыту, шығармашылық мұраларды насихаттау мәселелері қозғалды. Өз кезегінде Алмасбек Алматов облыс әкіміне Қызылорда қаласында «Түркі халықтарының өнер академиясын» ашу туралы ұсыныс жеткізді. Себебі өнер академиясы арқылы жыраулық өнерді жалғастыруға ниетті жастарға академиялық білім беру арқылы мәдениет жанашырларын шығару және өнерді зерттейтін мамандарды даярлауға мүмкіндік туады. Сонымен бірге «Қорқыт ата: жыр керуені» атты 2 томдық энциклопедияның аудио-видео нұсқасын шығару туралы ұсынысын жеткізді. Мұнан бөлек, Сыр елінде дәстүрлі түрде өтетін «Қорқыт және Ұлы дала сазы» фольклорлық-музыкалық өнер фестивалін ЮНЕСКО көлемінде өткізу туралы бастама көтерді.
Аймақ басшысы Гүлшара Әбдіқалықова өнерді дәріптеуге бағытталған ұсыныстардың маңызды екенін алға тартып, жыраулық мектептің сабақтастығын жалғау бағытында сырбойылықтардың ортақ іске мүдделі екенін тілге тиек етті.
<blockquote>
 «Түркі тілдес, бауырлас халықтар достығының шығармашылық зертханасын қалыптастырып, халықаралық деңгейдегі дәстүрлі өнер саласының оқу-ағарту және ғылыми орталығына айналуды мақсат тұтатын Академия ашу ұсынысыңыз орынды. Пысықтап қарап, қажетті жұмыстарды саралайтын боламыз.
 Ал, екінші ұсынысыңыз бойынша, Сыр сүлейлерінің мұраларын жинақтап, аудио энциклопедия етіп шығару арқылы біз болашақ ұрпаққа үлкен құнды дүние аманаттаймыз. Сондықтан да ұсынысыңызды жүзеге асыруға ниеттіміз. Сонымен бірге «Қорқыт және Ұлы дала сазы» фестиваліне қатысты идеяңыз пандемия жағдайы тұрақталған кезеңде мүмкін болатындықтан, алдағы уақытта ескеріп қарайтын боламыз, – деді Гүлшара Әбдіқалықова.
</blockquote>
Жиын соңында Алмасбек Алматов облыс әкіміне аудио нұсқасымен әзірленген “Ер Едіге” жыр-жинағын табыс етті.
Айта кетейік, Алмасбек Алматов қазақтың жыраулық өнерін Жапония, Түркия, Франция, АҚШ, Италия, Швейцария, Моңғолия, Ресей, Өзбекстан елдерінің өнер сүйер қауымына таныстырып келеді. 
«Шыңғыснама» тарихи-дастанының, «Жыр керуені» жинақтарының авторы.

Облыс әкімі белгілі жырау, фольклортанушы Алмасбек Алматовпен кездесті

<a href="https://kyzylorda-news.kz/">Kyzylorda-news.kz</a> Н.Бекежанов атындағы қазақ академиялық музыка-драма театры 15 қыркүйекте жаңа маусымын бастайды. Жаңа маусым В.Шекспирдің «Макбет» трагедиясымен ашылмақ. Бұл туралы Өңірлік коммуникациялар қызметінде өткен брифингте театрдың директоры Ғалым Баймырзаев хабарлады.
66 маусымды сәтті аяқтаған өнер ұжымы жаңа маусымды бастауға толықтай дайын. Өзінің жылдық жоспарын әзірлеп, актерлердің сахналық мүмкіндіктері мен театрдың бағыт-бағдарын қалыптастыру барысында жаңашыл спектакльдерді қоюды жоспарлауда.
Брифингте сондай-ақ Ғалым Қонақбайұлы театрдың өткен жылы атқарған жұмыстарына тоқталып өтті.
<blockquote>
 «Өткен маусымда театр үлкен жетістіктерге қол жеткізген. Тәуелсіздігіміздің 30 жылдығына арналған Думан Рамазанның “Абылай ханның арманы” тарихи драмасы және театр жастарының қатысуымен Рахымжан Отарбаевтың “Нашақор жайлы новелла” спектакльдерінің премьералары көрерменге ұсынылды. Өздеріңіз білетіндей, өткен жылы карантин уақытында театр санитарлық талаптарды сақтап, өз жұмысын жалғастырды. Онлайн форматта көптеген іс-шаралар атқарылып, көрермендер әлеуметтік желі арқылы қойылымдарымызды тамашалады”, – деді театр директоры.
</blockquote>

Н.Бекежанов атындағы қазақ академиялық музыка-драма театры жаңа маусымын қашан бастайды?

<a href="https://kyzylorda-news.kz/">Kyzylorda-news.kz</a> Облыстағы мәдениет ұйымдары мен өнер мекемелерінде ел Тәуелсіздігінің 30 жылдығы мерекесіне орай түрлі мәдени шаралар ұйымдастырылуда. Өңірлік коммуникациялар қызметінде өткен баспасөз конференциясында облыстық мәдениет архивтер және құжаттама басқармасы басшысының міндетін атқарушы Нұршат Наурызбаева ұлттық мереке қарсаңында өткізілетін шаралар мен саладағы жағымды жаңалықтарды баяндады.
<blockquote>
 «Тәуелсіздіктің 30 жылдығына орай бізде облыстық іс-шаралар жоспары бекітілген. Жыл басынан бері барлық мәдениет ұйымдарында және өнер мекемелерінде Тәуелсіздіктің 30 жылдығына байланысты ауқымды шаралар өткізілуде. Оның ішінде “Тұғыры биік Тәуелсіздік” атты республикалық ақындар айтысын атап өтсек болады. Осы сипаттағы шараларымыз барлық мәдениет ұйымдарында жалғасын табуда»,- деді Нұршат Бегежанқызы.
</blockquote>
Ел Тәуелсіздігінің мерейтойы қарсаңында Кете Жүсіп Ешниязұлының 150 жылдығын атап өту де жоспарланған. Бұл мақсатта қыркүйек айында «Жырлансын Тәуелсіздік жыр бұлағы» атты республикалық жыршы-жыраулар байқауы өткізілмек.
Қызылорда облыстық филормониясы Тәуелсіздіктің 30 жылдығына орай “Тәуелсіздікке тарту” айдарымен өнердің барлық жанры бойынша 30 ауқымды шара ұйымдастыруда. Бүгінде түрлі бағыттағы 24 шара аралас форматта өткізілген. Баспасөз конференциясында Талғат Мақашов облыстық филормониядағы ауқымды шаралар тізбегін баяндады.
<blockquote>
 «Жалпы бүгінгі күнге дейін филормонияның ұйымдастыруымен барлығы 90-нан аса шара өткізіліп, оған 50 мыңнан аса көрермен қамтылды. Ал Тәуелсіздіктің 30 жылдық мерекесіне орай 30 шара өткізілуде. Атап айтқанда, Тұрмағамбет атындағы халық аспаптар оркестірінің жыл концерті, “Қорқыт сазы” қобызшылар ансамблінің “Сарын” атты сазды кеші және қазақтың аңыз және салт ертегілерінің 30 кейіпкері циклымен “Әдемі” балалар музыкалық театр-студиясының қысқаметражды қойылымы көрермен қатысуымен өткізілсе, қалған туындылар елде орын алған пандемияға байланысты онлайн форматта өткізілді. Қыркүйек айында залда 30 пайыз орынға рұқсат беріліп, көрермендерімізбен қайта табысуға қызу дайындық жұмыстары басталып кетті», – деді облыстық филормонияның директоры Талғат Бақытбекұлы.
</blockquote>

Тәуелсіздікке &#8211; 30 жыл: Мәдениет ұйымдарында ауқымды шаралар ұйымдастырылуда

<a href="https://kyzylorda-news.kz/">Kyzylorda-news.kz</a> Алматы қаласындағы Ә.Қастеев атындағы ҚР Мемлекеттік өнер музейінде Қазақстанның еңбек сіңірген өнер қайраткері көрнекті суретші Қайырбай Зәкірұлының туғанына 75 жыл толуына және шығармашылығына 50 жыл толуына орай «Минотаврлар марафоны» атты жеке көрмесінің ашылуы өтті.
Мәдени шара Қазақстан Тәуелсіздігінің 30 жылдығы, ҚР Көркем академиясының 15 жылдығы аясында ұйымдастырылып жатыр. Көрмеге автордың жеке жинағынан алынған 30-ға жуық туынды қойылған. Салтанатты іс-шараға Сыр елінен облыстық мәслихат хатшысы Наурызбай Байқадамов бастаған арнайы делегация қатысып, аймақ басшысы Гүлшара Әбдіқалықованың құттықтауын жеткізді. Сондай-ақ, өнер иесіне шапан жауып, құрмет көрсетті.
<blockquote>
 “Сізді 75 жасқа толған мерейтойыңызбен және шығармашылығыңыздың 50 жылдығымен Сыр жұртшылығы атынан шын жүректен құттықтаймын! 
 Тәуелсіз еліміздің бейнелеу өнерінің дамуына зор үлесін қосып жүрген өз ісінің майталман шебері, график суретші, лирик ақын ретінде халқыңыз құрметтеп, бағалайды. 
 Өзіндік өнеріңіз интеллектуалды-философиялық көп қырлылығымен ерекшеленіп, ежелгі салт-дәстүр, әдет-ғұрыппен сабақтасып, уақытпен үндеседі. 
 Қаламыңыздан туған дүниелер елімізде ғана емес, АҚШ, Франция, Португалия, Қытай, Жапония, Марокко, Йемен секілді шет мемлекеттердің өнер мұражайларында, Ресей Федерациясы Мәдениет министрлігінің қорында қойылып, шетелдік дербес коллекционерлердің қолында сақталған. 
 Ел Тәуелсіздігінің 30 жылдығына арналған «Минотаврлар марафоны» атты жеке көрмеңіздің ашылуымен құттықтай отырып, деніңізге саулық, ұзақ өмір, отбасыңызға амандық тілеймін. 
 Шығармашылық шабытыңыз шарықтай берсін! 
 Тойыңыз тойға ұлассын!”, – делінген облыс әкімі Гүлшара Әбдіқалықованың құттықтауында.
</blockquote>
<img src="https://kyzylorda-news.kz/wp-content/uploads/2021/09/241533819_4307940189282892_743643721675930961_n.jpg" alt="" />
Қайырбай Зәкірұлы – әйгілі қазақстандық суретші, график, Қазақстан бейнелеу өнеріне 1970 жылдары келген көрнекті тұлға. Ол көпшілікке «Ұлбаланың бақыты», «Теңіз туралы толғау», «Базар жырау» топтамаларымен белгілі. Философиялық терең ойлайтын суретшіні әлем, адам болмысы, уақыт байланысы және ата-бабалардың рухани мұрасы тақырыптары толғандырады. 1990 жылдардан бастап суретші шығармашылығы өзгеріске ұшырап, туындыларында мифологиялық сюжеттер мен ғарыштан, бейне бір құс жолынан келгендей мистикалық бейнелер пайда болады.
«Минотаврлар марафоны» – Қ.Зәкірұлының акварель туындылары топтамасының шартты атауы. Оған соңғы екі жылда орындалған жиырмаға жуық акварель парақтары кіреді. Мұндай тақырыптың таңдалуы ең алдымен, суретшінің дүниетанымы мен көзқарасының&nbsp; өзіндік ерекшелігінде жатыр. Өмір мен өнерді марафон деп қабылдайтын ол, өз шығармаларында уақыт пен сезімнің трагедиясын көрсетуге тырысады. Егер суретші үшін графика – ең алдымен ойлау, дүниетанымды көрсету тәсілі болса, онда акварель – сезімдері мен эмоционалды рефлекстерді жеткізудің құралы. Шын мәнінде автор “Күлтегін”, “Қызыл құмыра”, “Чонтваридің жұмағы”, “Толғанай”, “Қаңбақ”, “Реквием”, “Летаргия”, “Талтүс”, тағы басқа акварель жұмыстарында адам құндылығының жоғалуы сынды уақыттың қасіретін ішкі жан дүниесінен өткізе отырып, мысқылмен, сарказммен жеткізеді.
<img src="https://kyzylorda-news.kz/wp-content/uploads/2021/09/7c3bb9aa-786b-4d8a-98a7-fb1a1378173b.jpg" alt="" />
<img src="https://kyzylorda-news.kz/wp-content/uploads/2021/09/59159cf5-d352-4e8d-b869-4dcde1dea9da.jpg" alt="" />
<img src="https://kyzylorda-news.kz/wp-content/uploads/2021/09/764fdbd7-f01d-4448-b6b5-65c2feaf05db.jpg" alt="" />
<img src="https://kyzylorda-news.kz/wp-content/uploads/2021/09/76e6d8d2-c68e-41c5-a004-e670ec7dd292-1.jpg" alt="" />

Қазақстан және Қызылорда облысының жаңалықтары: Мәдениет

27 қыркүйекке арналған ауа райы болжамы

Республикалық жыршы-жыраулар байқауында Айбек Тәңірбергенов бас жүлде алды

Сыр елінде «Жырлансын, Тәуелсіздік жыр бұлағы» атты республикалық жыршы-жыраулар байқауы басталды

Қызылордада республикалық жыршы-жыраулар байқауы өтеді

Қоғам қайраткері Қуанышбай Төлебаев жерлестерімен кездесті

«Тұлпар мініп, ту алған!» байқауы басталды

«Тұлпар мініп, ту алған»: Байқау шарттары түсіндірілді

Аймақ басшысы белгілі ақын Шәкизада Әбдікәрімовты мерейлі 65 жасымен құттықтады

Облыс әкімі белгілі жырау, фольклортанушы Алмасбек Алматовпен кездесті

Н.Бекежанов атындағы қазақ академиялық музыка-драма театры жаңа маусымын қашан бастайды?

Тәуелсіздікке – 30 жыл: Мәдениет ұйымдарында ауқымды шаралар ұйымдастырылуда

Алматыда суретші Қайырбай Зәкіровтің жеке көрмесі ашылды

Қазақстан және Қызылорда облысының жаңалықтары: Мәдениет

27 қыркүйекке арналған ауа райы болжамы

Республикалық жыршы-жыраулар байқауында Айбек Тәңірбергенов бас жүлде алды

Сыр елінде «Жырлансын, Тәуелсіздік жыр бұлағы» атты республикалық жыршы-жыраулар байқауы басталды

Қызылордада республикалық жыршы-жыраулар байқауы өтеді

Қоғам қайраткері Қуанышбай Төлебаев жерлестерімен кездесті

«Тұлпар мініп, ту алған!» байқауы басталды

«Тұлпар мініп, ту алған»: Байқау шарттары түсіндірілді

Аймақ басшысы белгілі ақын Шәкизада Әбдікәрімовты мерейлі 65 жасымен құттықтады

Облыс әкімі белгілі жырау, фольклортанушы Алмасбек Алматовпен кездесті

Н.Бекежанов атындағы қазақ академиялық музыка-драма театры жаңа маусымын қашан бастайды?

Тәуелсіздікке &#8211; 30 жыл: Мәдениет ұйымдарында ауқымды шаралар ұйымдастырылуда

Алматыда суретші Қайырбай Зәкіровтің жеке көрмесі ашылды

Тәуелсіздікке – 30 жыл: Мәдениет ұйымдарында ауқымды шаралар ұйымдастырылуда