<a href="https://kyzylorda-news.kz/">Kyzylorda-news.kz.</a> 9 мамыр – Жеңіс күні және ҚР Суретшілер одағының құрылғанына 90 жыл толуына орай ҚР Суретшілер одағының мүшесі, Абызбеков Әбілда Қырбайұлының «Дала үні» атты &nbsp;шығармашылық көрмесінің ашылуы болды.Көрменің ашылу салтанатында облыстық тарихи-өлкетану музейінің директоры Сапар &nbsp;Көзейбаев, Қазақстан Суретшілер одағының мүшесі, «Құрмет» ордені иегері Аманкелді Кененбайұлы, ҚР Суретшілер одағының Түркістан облыстық филиалының төрағасы Нұрлан Шилібаев сөз сөйлеп, ізгі лебіздерін білдірді. Өнердің нәзік иірімдерінен туындылар тоқыған қылқалам шеберінің еңбектерін жаңғырту, шығармашылығын дәріптеу – шараның негізгі мақсаты.Көрмеге суретшінің 90-ға жуық кескіндеме туындылары қойылып, көпшілік назарына ұсынылды. Суретшінің туындылары еліміздің көрнекті жерлеріне эпикалық үн қосқан дала сұлулығы мен өнер сұлулығын ұштастырған түрлі форматтағы пейзаждар, еңбегі ерен тұлғаларға арналған қанық түстермен көмкерілген портреттер және ұлттық тақырыптағы ізденістік еңбектерден тұрады.Ол туған жердің түстік байлығын қанық жылы түстерді батыл қолдану арқылы кемеліне жеткізе сала білген. Ол сонысымен құнды, сонысымен құрметті.Өнер иесінің шығармашылық еңбектері облыстық, республикалық музейлер мен жеке коллекционерлер қорында сақтаулы тұр.<blockquote>– Өнер жанрының қай түрі болса да үлкен талантты, еңбекті қажет етеді. Оның ішінде қылқалам шеберлерінің түрлі бояу кескіндемелерін бір арнада тоғыстырып, үйлестіре білуі тазалық пен талғампаздықтың жемісі деп бағалар едім. Ал бұл тұрғыда Әбілданың әлемі шексіз сүйсіндіреді. Көрме арқылы жастарды өнерге, Отанды сүюге баули аламыз. Менің бүгінгі шарадан түйген маңызды ойым осы, – деді «Құрмет» орденінің иегері Амангелді Кененбайұлы.</blockquote>&nbsp;&nbsp;

«Дала үні» шығармашылық көрмесі ашылды

&nbsp;<a href="https://kyzylorda-news.kz/">Kyzylorda-news.kz.</a>&nbsp; Тарихы терең Сырдария ауданы республика көлеміне өлкеден шыққан белгілі тұлғалармен танылған. Сондай тұлғалардың бірі ақиық ақын Асқар Тоқмағамбетов – мақтанышпен айтар тау тұлғалардың бірі және бірегейі.&nbsp;Қазақ әдебиетіндегі сатиралық поэзияның негізін қалаушы ақын қасиетті Сырдария жерінде дүниеге келіп, ақындығымен республикаға танымал болды. Оның атын мәшһүр еткен дарындылығы өзі туып-өскен топырақтан дарығаны белгілі. Сол себепті қазір ақынның өскен ауылы, сондағы мектеп А.Тоқмағамбетов атымен аталады. Сондай-ақ, ауылдық мәдениет үйінде ақиық ақынның музейі жасақталып, халыққа рухани қызмет көрсетіп келеді.Ауылдағы мәдениет ошағында орналасқан музей қорында белгілі жазушының өмір белестерін айқындайтын суреттер қоры жасақталған. Музейге кірген бетте ел мақтанышының қолына кітап ұстап тұрған үлкен суретін көресіз. Ал оның екі жағында А.Тоқмағамбетов туралы қазақ ақын-жазушыларының тұғырлы тұлғалары Ә.Тәжібаев пен М.Әуезовтың пікірлері жазылып қойылған.&nbsp;Алғашқысы «Асқардың өмірбаяны – республикамыздың өмірбаяны. Ақын осы өмірдің әр дәуірін жырымен баяндап отырғанда, өз сезімі мен жүрек күйін де сол жырларында қалтқысыз көрсетіп келген. Ол біздің ең белсенді, ең ұшқыр ақындарымыздың бірі» десе, «Абай жолын» жазған жазушы: «...Тіл жөнінен бұрынғының қорынан қарбытып отыратын, анық асыл тіл байлығы бар екі ақынды бөліп айтар едім, олар – Асқар мен Ғали. Асқар – қырғи тілді ақын» деп керемет баға берген.Мұндағы суреттер қорына тоқталар болсақ, алдымен, ақынның отбасы, немерелерімен түскен фотобаяндары көзге түседі. Одан кейін жұмыс үстелі көненің көзіндей сақтаулы тұр. Жұмыс барысындағы әріптестерімен, қарымды қаламгерлермен, атақты адамдармен кездескен, шет елге шыққан сапарлары бейнеленген суреттері қойылған.&nbsp;Атап айтқанда, төргі жақта 1975 жылы ақиық ақынның 70 жылдық мерейтойына келген Т.Әлімқұлов, Ә.Қоңыратбаев, М.Бәйділдаев, Ж.Бектұров секілді көптеген қазақ қаламгерлерімен түскен суреттері қойылса, осы қатарда ғарышкер-ұшқыш, Кеңес Одағының батыры Г.Титовпен, әлемге танымал жазушы Ш.Айтматовпен, қазақ әдебиетінің көрнекті өкілдері З.Шүкіров, Т.Ахтанов, Ғ.Мұстафин, З.Жарқынбаев, С.Шаймерденов, Ғ.Мүсірепов, М.Әлім¬баевтармен кездескен шағы ілулі. Бұдан бөлек, республикалық «Ара», «Балдырған» журналы, «Ленин жолы» газеті редакциясындағы, еңбек адамдарымен, жастармен, шәкірттерімен жүздесудегі естелік суреттері де бар. Сондай-ақ, музейдің төргі жағында ақынның бас киімі мен өзі пайдаланған теру машинкасы тұр.Ақын музейі қорында тарихтан сыр шертетін суреттер қатары көп десек, оның ішінде жүз жасаған Жамбылмен кездескен суретті ерекше атап өту керек. А.Тоқмағамбетовтың жас шағында бір топ қаламгерлермен қазақ жырауын ортаға алып, сұқбаттасуы ғажап кезең екені сөзсіз. Сонымен қатар, мұнда қазақ драматургиясына көп үлес қосқан жазушының С.Қожықовпен бірігіп жазған «Маржан» (орысшасы «Если бы каждый из нас») атты сценарийі бойынша «Қазақфильм» киностудиясы кино түсіре бастағандығы жөнінде айғақты материалдар бар.&nbsp;Жалпы, ақиық ақынның музейінен көпшілік рухани азық жинап, Сыр еліне, оның ішінде тарихы шежірелі Сырдария (Тереңөзек) ауданына табан тіреген ақын-жазушылар жөнінде көптеген мағлұмат алады. Сондықтан ақиық ақын Асқар ауылына жол түссе, міндетті түрде музей қорымен таныссаңыз болады. &nbsp;

Ақиық ақын Асқар Тоқмағамбетовтың ауылдағы музейі

<a href="https://kyzylorda-news.kz/ru">Kyzylorda-news.kz.</a> Қазақтың ғұмырына нәр беріп, алдынан жарқыраған ай, шуағын шашқан күндей болған, жауға шапса семсеріне күш берген құдіретті күй өнерінің орны бөлек. Күйді де, күйшіні де өмірге алып келген, оған ұзақ ғұмыр, мәңгілік мансап, биік тұғыр берген – халық. Сондықтан болар күй халықпен бірге жасап, ғасырды ғасырға жалғап келеді.Сыр өнерінің қарашаңырағына айналған облыстық филармония түрлі концерттер мен конкурстарда қазақ өнерін паш етіп жүрген талантты өнерпаздарымен мақтанады. Сол дарын иесінің бірі – қазақтың қара домбырасы мен қасиетті күй өнерін құрметтеген Айбек Жүсіпов. Кішкентайынан қасиетті домбыраның қадірін ұғынып, өнегелі әкенің тәлімді тәрбиесін, өнер жолында өресі биік ұстаздардың алдын көрген ол бірнеше мәрте халықаралық, республикалық және аймақтық конкурстардың жеңімпазы атанған.Жастайынан тұла бойды түршіктіріп, аса зор сезіммен тыңдарманның алпыс екі тамырын идіретін төл аспапта ойнауды үйренген. Күйге деген құштарлығы арманын арқалатып Қазанғап атындағы музыкалық колледжге алып келді. Мұнда талай өнер адамын дайындаған Махамбет Мәмбетназаровтан білім алды. Колледжді тәмамдаған соң Қазақ Ұлттық өнер академиясына қабылданып, күйші, профессор, композитор Орынбай Дүйсеннің шәкірті атанған. Қазір &nbsp;облыстық филармонияның «Ақмешіт» фольклорлық ансамблінде домбырашы болып қызмет атқарады. Айтуынша өнерге деген таланты әкесінен дарыған. Ол кісі де күйшілік өнерді жанына серік еткен әрі ұстаз болып, шәкірт тәрбиелеген.<blockquote>Әкем 6-сыныпқа өткенімде өзі жұмыс істейтін Қорқыт ата атындағы Өнер мектебіне оқуға берді. Үш жыл сонда &nbsp;білім &nbsp; алдым. &nbsp;Одан соң 2004 жылы музыкалық колледж, 2012 жылы Өнер академиясының түлегі атандым. Қазір фольклорлық ансамбль құрамында халықтың ықыласына бөленуім әкемнің қолдауының арқасында жүзеге асты, – дейді ол.</blockquote>Күй – жан дүниенің зар-мұңын, тіршіліктің сан қырын жеткізеді. Ал күйші әсем үннің тыңдарманға ой салуына ықпал етеді. Кейіпкеріміздің домбыра тартқанды өзіндік мәнері бар. Оның саусақтары домбыра мойнында билейді десек, артық айтпаған болар едік. Ата-бабадан қалған қасиетті аспаптың күмбірін тыңдаушы құлаққа байыпты жеткізуінің өзі туған жердің топырағынан нәр алған талантын тағы бір айқындайды.<blockquote>&nbsp;Қазір жастардың домбыраны үйренуге деген ынтасы молая түскенін байқауға болады. Бұл дегеніміз оның құндылығы бұрынғыдан да артқанын білдіреді. Әлбетте, бұл – қуантарлық жайт. Үйренуге ниет білдіруші жастардың саны көбейіп қана қоймай, оқытушылардың кәсіби деңгейі де артуда. Қадыр &nbsp;Мырза-Әлі айтқандай: «Нағыз қазақ – қазақ емес, нағыз қазақ – домбыра» деген рас. Қанша ғасыр өтсе де, бұл аспап өзінің бірегей құндылығын ешқашан жоймайды, – дейді ол.</blockquote>Қазақтың төл аспабы саналатын домбыраның сан түрі бар. Пішіні өзгерсе де, үні өзгермейтін тарихы бай, көненің көзі саналатын аспаптың әрбір қазақ үшін орны ерекше. Айбекте қасиетті қара домбыраны бір сәтке де жанынан тастамайтынын айтады. Бүгінде ол филармония ұжымымен бірге сахнада өнер көрсетіп жүр. Гастрольдік сапармен шетелге шығып, домбыраның үнімен әлем жұртшылығын таңғалдырып келеді.<blockquote>&nbsp;Бала кезден Нұрғиса Тілендиев, Қаршыға Ахмедияров сынды күйші-композиторларды көріп, туындыларын тыңдап өстім. Қазір Қазанғап, Жалдыбай, Әлшекей, Құрманғазы, Дина т.б күйшілердің шығармаларын орындап жүрмін. Сол арқылы халықтың алғысына бөленіп, көрерменнің көзайымына айналдым. Мұның барлығы – қасиетті қара домбыраның арқасы. Өмірлік ұстанымым – халықтың төл өнерін еш өзгеріссіз халыққа жеткізу, – дейді ол.</blockquote>Қазір ол №267 мектеп жанынан ашылған көркемдік-эстетикалық балалар &nbsp;орталығында дәріс береді. Өзі секілді домбыраны жетік меңгергісі келетін жастарға көмектесіп, өнер жолына қадам басуға ықпал етеді. Бүгінде шәкірттері түрлі байқауларға қатысып, жүлделі орындарға ие болып жүр.Домбыраның өкініш пен мұңды, қуаныш пен сағынышты баяндайтын ерекше үні бар. Әсерлі үнді естір құлаққа жеткізе білу екінің бірінің қолынан келе бермейді. Ойы жүйрік, санасы сергек Айбектің қанында бар күй өнерін дәріптеп келе жатқанының өзі әке жолын жалғастыру, қасиетті ата-баба рухын келер ұрпаққа жеткізу десек жөн болар.Қазақтың атын әлемге асқақтатып, халық өнерін келешек ұрапаққа насихаттау – кейіпкеріміз үшін өте маңызды. Он саусағы домбыра құлағында жүгіре жөнелгенде, арманының иесінен алыстамағанын байқауға болады. Алдағы уақытта асқақ армандары орындалып, төл өнердің биік шыңынан көрінуіне тілектеспіз. &nbsp;

Айбек Жүсіпов: Өмірлік ұстанымым – халықтың төл өнерін еш өзгеріссіз халыққа жеткізу

<a href="https://kyzylorda-news.kz/">Kyzylorda-news.kz.</a> Өркениетті елдердің дамуының алғышарты – мәдени, рухани жағынан алға жылжуы, тың жаңалықтар ашуы. Осы орайда облыстық мәдени шаралар және халықтың бос уақытын тиімді өткізу жөніндегі қызметті ұйымдастыру бөлімінің әдіскері Анаш Хамидпен сұқбаттасудың сәті түсті.‒ Анаш, қазір халықтың бос уақытын тиімді өткізуде қандай шаралар ұйымдастырылуда? Әңгімемізді орталық жұмысынан бастасақ…‒ Өздеріңізге белгілі, мемлекет басшысы Қасым-Жомарт Тоқаевтың «Тәуелсіздік бәрінен қымбат» атты мақаласында еліміздің ең маңызды мерекесін жоғары деңгейде атап өту керегін. Бұл тұрғыда бүкіл қазақ елі, соның ішінде Қызылорда қаласында ауқымды шаралар мен түрлі жобалар өткізу жоспарлануда. Яғни, барлық шара атаулы мерейтой аясында өтетін болады. Жалпы жылдық жоспарымызда халықтың бос уақытын тиімді өткізуді ұйымдастыру жөнінде көптеген іс-шара бар. Әлеуметтік желідегі парақшамызда түрлі айдарлар ашылып, халыққа өз деңгейінде мәдени-рухани азық сыйлап келеміз.‒ Ал өзіңіз бұл салаға қалай келдіңіз?‒ Негізінен мәдениет саласы маған алыс емес. Осы ретте бір ерекше оқиғамен бөліскім келіп отыр. Анамның тікелей қалауымен, бұйрығымен физика-математика бағытын таңдауым қажет болды. Бірақ жүрек қалауым басқа болған соң шығар, әйтеуір грантқа балым жетпей қалды. Жасымнан бірбеткей боп өскен мен ақылы оқымаймын деген шешіммен өмірімде бірінші рет анамның рұқсатынсыз Алматы қаласындағы Т.Жүргенов атындағы Өнер академиясына барып, «Кескіндеме, мүсін және дизайн» факультетінің сәндік өнер мамандығына оқуға түстім. Академия қабырғасында жүргенде-ақ қоғамдық жұмыстарға белсене араласып, түрлі көрмелерде суреттерім қойылып, студенттік кезеңді өте қызықты өткіздім. 2018 жылы А.Тоқмағамбетов атындағы қалалық мәдениет үйіне алғаш рет жастар тәжірибесі бағдарламасымен келіп, біліктілігім мен білімімнің арқасында маман болып қалыптастым.‒ Халықтың мәдениеттілігі немен өлшенеді? Мәдениетті тек тәртіппен бағалауға бола ма?‒ Адам мәдениеттілігінің деңгейі оның отбасында балаларына берген тәрбиесі, мейір-шапағатымен өлшенуі тиіс. Мәдениеттіліктің шегі не қалыбы болмайды. Ол адамға отбасындағы тәрбие, білім, өскен ортасы арқылы беріледі. Ұлы Абай отыз сегізінші қара сөзінде: «Қашан баланың ғылым-білімге махаббаты оянғанда ол адам бола бастайды. Адам болмағына үш нәрсе себеп: жақсы ата-ана, жақсы ұстаз, жақсы құрбы-құрдас» дейді. Осыдан-ақ тұлғада алғашқы негіз болмай, мәдениеттің қалыптасып, дамуы мүмкін емесін түсінеміз. Әдептілік, мәдениет ‒ барлық жақсы қасиеттердің жиынтығы, ол бойға біртіндеп сіңеді. Сондықтан әр адам өзін-өзі тәрбиелеуі тиіс. Шынайы мәдениет ең алдымен өз халқыңның қадір-қасиетін жете ұғынудан қалыптасады деп ойлаймын.Лұқпан Хакімнен біреу: «Осынша әдептілікті қайдан үйрендің?» деп сұрағанда ол: «Әдепсіздерден үйрендім. Олар істеген қылықты қайталамауға тырыстым» деп жауап беріпті. Әдептіліктің басты шарты ‒ іші-сыртың, мінез-құлқың, іс-әрекетің бәрі бірдей сыпайы, орнықты, ойлы, мазмұнды және барлық жағынан үйлесімді болу қажет деп ойлаймын. Ал адамдар қатаң тәртіппен ғана мәдениетті болады деу қиын…‒ Қалалық мәдениет бөлімінің тындырымды жұмыстарын көз көріп жүр. Жалпы мәдениет, өнер саласының мамандарына мемлекет тарапынан қаншалықты көңіл бөлінген?‒ Қазір қала мәдениеті өз деңгейінде жоғары нотада елге қызмет етіп, мәдени-рухани азық сыйлап келеді. Оның бәрі мемлекет қолдауын жүйелі түрде үйлестіріп отырған қала басшылығының мәдениет саласына деген оң ықыласынан деп білеміз. Атап айтар болсақ, заманауи үлгіде дыбыс жазу студиясы, &nbsp;дыбыс күшейткіш аппаратурасы, фольклорлық, вокалды аспапты ансамбльдер мен би топтары, көркемөнерпаздар үйірмелеріне инструменттер, сахналық киімдер тігіліп барынша қолдау көрсетіліп келеді. Ал, қаланың шығармашыл жастарын біріктірген Жастар театры көркемдік деңгейі жоғары спектакльдер ұсынып, өз көрерменін тауып үлгерді. Осы ретте, өнерді құрметтеп, мәдениетті өркендету – баршамыздың ортақ мақсатымыз екенін айта кеткен жөн.Елдің рухани дамуы мен кемелденуі мәдениеттің қарқынды дамуымен ұштасып, ұлттық өнердің қанат жайып, ұрпақтан ұрпаққа жалғасуына себепкер болып жүрген мәдениет қызметкерлерінің еңбегі орасан. Тынымсыз еңбектің нәтижесі шығар, жыл басында бірқатар мәдениет қызметкерлері қызметтік пәтер кілтін алып, қоныс той болғанын қуанышпен айтқым келеді. Сондай-ақ А.Тоқмағамбетов атындағы қалалық мәдениет үйі жанынан құрылған белгілі ақын Мамыр Байдәулетов жетекшілік ететін «Қауырсын» жас ақындар үйірмесінің белді мүшесі Піржан Сандыбайдың «Буыршын белес» атты тырнақалды жыр жинағы ақылы қызмет есебінен жарық көрді. Осындай үлкен қолдауларды сезінген біз секілді мәдениет қызметкерлері алдағы уақытта да халыққа сапалы қызмет ұсына береді.‒ Жастар қала мәдениетінің дамуына қандай үлес қоса алады?‒ Бұл бағытта жастардың үлесі зор. Өйткені қай кезде де қоғамның қозғаушы күші ‒ жастар. Кешегі Мағжан ақын «Мен жастарға сенемін!» деп үміт артып, Елбасы Н.Назарбаевтың «Еліміздің болашағы ‒ жастардың қолында» деуінің өзі бізге үлкен жауапкершілік жүктейді. Осындай жауапты міндетті сезінген біз секілді жастар қала мәдениетінің, еліміздің өсіп-өркендеуі жолында аянып қалмасымыз анық.

Қызылордалық жастар мәдениет саласына сан түрлі жаңалық әкелуде

<a href="https://kyzylorda-news.kz/">Kyzylorda-news.kz.</a>&nbsp; Би өнері адамның жан-дүниесімен астасып, көңілдермен түсіністік табатын қиын әрі қызық жанр екені мәлім. Өйткені, онда тіл жоқ, сөз жоқ, тек қимыл бар. Бір қызығы, көрермен сахнада қойылған биден сыр ұғып, өзінше топшы жасайды, жан дүниесі тыныш тауып яки делебесі қызып, ерекше күйге бөленетіні рас.Қазақ ұлтының алғашқы кәсіби бишісі Шара Жиенқұловадан бастау алған өнер түрі бірнеше ұрпақтың рухани байлығына айналып, бүгінгі таңда қазақ бишілері әлемдік деңгейде топ жарып жүрген жайы бар. Мұндай ұлттық өнерді ұлықтап, руханиятымызды жандандырып жүрген «Балауса» халықтық би ансамблі аудандық мәдениет үйі жанынан құрылған. Сан алуан деңгейдегі сайыстарда бақ сынап, аудан абыройын асқақтатып жүрген топтың негізі 2002 жылы қаланған. Ансамбль құрамында барлығы 39 өнерпаз бар. Олардың ішінде 8 өнерпаз үлкен топ бишілері болса, 31 биші – орта және кіші топ өнерпаздары. «Балауса» халықтық би ансамблінің шығармашылық қоржынында бүгінде елу шақты би қойылымы бар. Әр жаңа туындыға түрлі сахналық костюм тіккізіп, үлкен дайындықпен кірісетін би ұжымы еңбектің нәтижесін көріп, биік белес¬терді бағындырып жүр.<blockquote>Би өнері – өнер атаулының күрделі жанрларының бірі. Бірақ, осы салаға қызығушылық танытатындар қатары көп. Олардың ішінде қыздармен қатар ұл балалар да бар. Себебі би бір жағынан өнер болса, екінші жағынан спорт. Өздеріңіз байқайтын боларсыздар, биге қатысқан адамның жүріс-тұрысы икемді, бойын тік ұстайтын болып келеді. Бұның бәрі – үлкен еңбек, көп дайындықтың жемісі. Біздің «Балауса» би ұжымының құрылғанына жиырма жылдан астам уақыт өтті. Осы аралықта би тобы бірнеше түлек түлетті. Олардың кейбірі қазіргі таңда осы саланы одан әрі қарай жандандыруға еңбек етіп келеді, – дейді халықтық би ансамблінің балет-мейстрі Ақмарал Пернебаева.</blockquote>Би ұжымының қай тобы да қатысқан сайыстарынан жоғары деңгейде өнер көрсетіп, биік белестерді бағындырып келеді. Солардың бірі – жақында өткен «Таңшолпан» эстрадалық телебайқауы. «Қазақстан» Республикалық телерадио корпорациясы» акционерлік қоғамы облыстық «Қызылорда» телеарнасының ұйымдастыруымен өткен жасөспірімдер байқауында біздің бишілер бас жүлдені қанжығаға байлады. Би ұжымы бір ай бойы 3 кезеңнен тұратын іріктеудің жартылай финалынан жоғары көрсеткіш көрсетіп, ақтық сайысқа өткен. Дүбірлі додаға облыс аудандарынан 11 би ұжымы қатысқан. Өз ісінің нағыз мамандары бақ сынаған сайыста «Балауса» «Жан дүние» модерн биін сәтті орындап, шеберліктерін тағы бір дәлелдеді. «Жан дүние» қойылымы жан дүниесіне жеткен халық ерекше риза болса, қазылар алқасы биді жоғары бағалаған. Сонымен қатыр би ұжымы жақында өткен республикалық «Dance Battle» бишілер байқауына қазақ биі «Жайлауда» биімен қатысып, жүлделі І орынды иеленген.Айта кетейік, 29 сәуір – халықаралық би күні мерекесі аталып өтілді. Биылғы атаулы күннің қарсаңында ұйымдастырылған байқауларда «Балаусаның» бағы тағы жанып, биіктен көріне білді.<blockquote>&nbsp;Жалпы, би үйірмесі Сырдария ауданында жақсы жолға қойылған. Қазіргі уақытта әрбір ауылда би үйірмесі жұмыс жасайды. Біздің өнерпаздарымыз жоғарғы деңгейдегі байқауларда бақ сынап жүр. Алдағы уақытта «Балауса» халықтық би ансамблінің ұжымына шығармашылық табыс тілейміз. Өнерпаздарымыздың алар асулары көп болсын, – деді &nbsp;аудандық мәдениет және спорт бөлімінің басшысы Жігер &nbsp;Айекешов&nbsp;</blockquote>Зерттеуші ғалымдар «орыс биін аяқпен, өзбек, ұйғыр билері қол-мойын әрекетімен, моңғол биі жауырынмен, ал қазақ биі – адамның тұтас буындар жүйесімен орындалады» деп тұжырым жасайды. Жоғарыда атап өткеніміз түрлі ұлттың биін де нақышына келтіре билеп, би арқылы көрермен көзайымына айналып, талай додада аудан намысын асқақтатқан «Балауса» жетістігінің бірсыпырасы ғана. Ерекше өнерді дәріптеп, көпшіліктің қолдауына ие болған өнерпаздарға шығармашылық табыс тілей отырып, биік белестерден көріне берулеріне біз де тілектестік білдіреміз.&nbsp;&nbsp;&nbsp;

 Сырдариялық бишілер жеңімпаз атанды 

<a href="https://kyzylorda-news.kz/">Kyzylorda-news.kz.</a>&nbsp; А.Тоқмағамбетов атындағы қалалық мәдениет үйінде ұстаз-хореограф, ҚР Мәдениет қайраткері Төребек Бақтыбаевтың «Ұстаздан жеткен ұлы өнер» атты шығармашылық кеші өтті.Оған облыстық мәдениет және спорт басқармасы басшысының орынбасары Қуаныш Жанұзақов, қалалық мәдениет және тілдерді дамыту бөлімінің басшысы Жағыпар Тәжмаханов және Қазанғап атындағы Қызылорда музыкалық жоғары колледжінің директоры Ұлжан Байбосынова қатысты.Тағылымды кеште Қ.Жанұзақов құттықтау сөз сөйлеп, облыс әкімінің Алғыс хатын табыстады.<blockquote>Сыр өнері дарынды тұлғаларға кенде болған емес. Соның ішінде шоқтығы биік бір тармағы ол – би өнері. Бұл салада сіз салған сара жол ізіңізді басып, жолыңызды жалғап келе жатқан шәкірттеріңіз үшін өте құнды. Бекзат өнердің қыр-сырына қанығып, өзіңізден кейінгі өнерлі жастарды тәрбиелеу жолында аянбай тер төгіп келесіз. Өнерлі шәкірттеріңіз көбейе берсін. Халықтың ықыласына бөленіп жүре беріңіз, – деді ол.</blockquote>Кеш &nbsp;кейіпкерінің шығармашылық жолына тоқталар болсақ, сахна десе дүбірге құлақ тіккен тұлпардай бір орында тұра алмайтын талант иесі жас кезінде-ақ қазақ би өнерінің падишасы Шара Жиенқұлованың шәкірті атанып, бекзат өнерге бейімделеді. Атақты бишіден тәлім ала жүріп, халықаралық, республикалық байқауларда жүлдегерлер қатарынан көрінген.Ол Алматы қаласындағы Селезнев атындағы хореография училищесін тәмамдап, «Сыр &nbsp;сұлуы» халықтық ән-би ансамблінің балетмейстері &nbsp;қызметін &nbsp;атқарады. Қорқыт ата атындағы Қызылорда мемлекеттік университетінің «Хореография» факультетін тәмамдаған. 1995 жылдан бастап Қазанғап атындағы Қызылорда музыкалық жоғары колледжінің «Би өнері» бөлімінде оқытушы. Бүгінде Төребек Бақтыбаевтың түлектері мемлекеттік «Гүлдер», «Салтанат», «Алтынай», «Наз» облыстық «Сыр сұлуы», «Томирис», «Дидар», &nbsp;«Бұраң бел» би ансамбльдерінде өнер көрсетіп, биік шыңдарды бағындырып келеді.Төребек Шәленұлы – облыстық, қалалық іс-шараларға белсене араласып, облыс мәдениетін көтеруге &nbsp;атсалысып жүрген өнер майталманы. 2002 &nbsp;жылы ҚР Мәдениет қайраткері төсбелгісімен марапатталған. «Қазақ биі – ұлт болашағы» атты еңбегі жарық көрген.Ол «ҚР Білім &nbsp;беру &nbsp;ісінің құрметті қызметкері» төсбелгісінің иегері. Шәкірттері халықаралық, республикалық, конкурстарға қатысып жүлделі орындарға ие болып жүр.Кеш барысында өнер иесі туралы арнайы қойылым көрсетіліп, би өнеріне қосқан елеулі еңбектері жайлы мол мағлұматтар берілді. Сондай-ақ, облысқа белгілі би ансамбльдері кештің көркін қыздырып, түрлі жанрдағы билерді көрермен назарына ұсынды.&nbsp;

ҚР Мәдениет қайраткері Төребек Бақтыбаевтың шығармашылық кеші өтті

<a href="https://kyzylorda-news.kz/">Kyzylorda-news.kz.</a> Театр – тәрбие бесігі, өнердің айнасы. Көрнекі жазушы Ғабит Мүсіреповтың &nbsp;«Театр – хас сұлудың көз жасындай мөлдір өнер» деп баға беруі де тегін болмаса керек. Расында, театр – адамзат баласына рухани азық сыйлайтын қасиетті мекен. Ал сол қасиетті де қастерлі саналатын театрды сахна әртістерінсіз, өнер ұжымынсыз елестету мүмкін емес. Сондай өнер ұжымының бірі, ауданның ғана емес Сыр елінің абыройын асқақтатып жүрген &nbsp;– «Халық ­театры».Бір қарағанда сіз бен біз көріп жүрген театрлық қойылымдар мен спектакльдердің жұмысы сахнаның бергі жағынан оңай көрінуі мүмкін. Алайда, көптеген адамдар сахнаның арғы жағындағы қаншама еңбекті байқамайды, ауыр қиындықтың бар екенін біле бермейді. Сахна артындағы жұмыс көзге көрінбегендіктен, кейде ескерілмей жататыны да шындық. Ақиқатында біздің жанарымызға жас толтырып, алпыс екі тамырымызды шымырлатып жіберетін қойылымдардың бәрі қаншама сүзгіден өтеді, мықты дайындықты талап етеді. Әрине, мұның барлығы театр ұжымының бірлесіп, ұйымдасып атқаратын қажырлы еңбегінің арқасында ғана жүзеге асады. Қазіргі таңда қаншама қиындықтан өтіп, қаншама жүлдені қанжығасына байлаған театрлар көп-ақ. Мақаламызға арқау болып отырған «Халық театрын» да солардың бірі десек, артық айтпағанымыз болар. Олай деуімізге де себеп көп. Жарты ғасырдан аса тарихы бар өнер ұжымы ең алғаш 1967 жылы драма үйірмесі болып құрылған еді. Көркемөнерпаздардан құрылған құрам 1991 жылға дейін ел арасында үйірме ретінде танылды. Сол жылдан бастап үйірме әртістері «Үлгілі» атағын қорғап, ел алдына «Халық театры» деген атпен шыға бастады. Театр атағын алған өнер ұжымы сол уақыттан күні бүгінге дейін халықтың сүйікті театрына айналып келеді. Иә, «Халық театрын» бүгінде өнерге ғашық өнерпаздар жазбай таниды. Себебі, оның жеткен жетістіктері жайлы топ-том кітап жазуға болады.&nbsp;«Өнер жолы – ауыр жол» дейді қазақ. Әсіресе нәзік жандылар мен қыз баласы үшін бұл жолмен жүру оңай болмасы анық. Десе де, қазақ сахнасында қаншама әйел затының өнер үшін жан бергенін білеміз. Солардың бірі – Қазақстан Республикасының мәдениет қайраткері Әмина Тасболатова. Ол – Халық театры өнер ұжымының ең алғашқы режиссеры болып, есімі тарих бетінде алтын әріптермен қалды. Әмина Қажықызы театр сүйер қауымға көптеген спектакльдер мен қойылымдарды ұсынды. Атап айтар болсақ, Б.Майлиннің «Талтаңбайдың тәртібі», К.Кемеңгерұлының «Алтын сақина», Б.Тәжібаевтың «Батақтың сарысы», Ғ.Мүсіреповтің «Қозы Көрпеш – Баян Сұлу», Қ.Мұхаммеджановтың «Құдағи келіпті», «Қуырдақ дайын» сынды көптеген төл туындыларын сахналап, ел алғысына бөленді. Аталған қойылымдардың барлығы бүгінде әлі де көпшілік көрерменнің есінде.&nbsp;Иә, «Халық театрының» жеткен жетістіктері мен талай жылғы еткен еңбегін өнерге ғашық жандар жақсы біледі. Өнер ұжымы тек аудан деңгейінде ғана емес, облыс, тіпті республика көлемінде шығармашылық іс сапарлар жасап, төл туындыларымен талайды қуантты. Тіпті, қаншама фестивальдар мен байқауларда оза шауып, Сыр елінің мәрбесін асқақтатты. Мәселен, «Халық театры» 2006 жылы облыстық ¬«Театрлар көктемі» фестиваліне қатысып, М.Әуезовтің «Еңлік-Кебек» спектаклін сахналады. Аталмыш театрдың режиссеры Әмина Тасболатова «Ең үздік режиссер» атағына ие болса, өнер ұжымының мүшесі Ғ.Маханов «Ең үздік ер адам рөлі» номинациясын жеңіп алды. Бұдан бөлек 2010 жылы Қызылорда қаласында өткен «Театр көктемі – 2010» атты облыстық драма ұжымдары мен халық театрларының фестиваліне қатысып, О.Бодықовтың «Қанжар мен домбыра» атты 3 актілі спектаклін қойып, «Ең үздік қойылым» номинациясын қанжығаға байлады. Ал 2013 жылы Алматы қаласында өткен республикалық «Рауан» фестиваліне қатысып, Әкім Таразидің «Қыз махаббаты» драмасын қойып, бас жүлдеге ие болды. 2014 жылы ұжым өнерпаздары көпшілік қауымның алдында «Алғашқы махаббат» комедиясын сахналаса, 2015 жылы Тахауи Ахтановтың «Күтпеген кездесу» драмасын өнерсүйер қауымға жолдады. Бұдан бөлек 2016 жылғы «Құдағи келіпті» комедиясы да халықтың есінде өз ерекшелігімен қалды. Иә, «Халық театрының» сахналаған қойылымдарын айта берсек көп-ақ. Өнер ұжымының «Діннен шыққан дүрбелең», «Ең үздік әйел рөлі», «Жан дауа», «Телғара», «Суицид алаңынан репортаж» сынды қойылымдары да сіз бен біздің есімізде мәңгі қалары анық. Ал 2020 жылы сахналанған драматург Сұлтанәлі Балғабаевтың «Біз де ғашық болғанбыз» атты драмасы күллі Сырт жұртшылығының сүйікті қойылымына айналып үлгерді.&nbsp;Биылғы жылы да «Халық театры» көрермен көзайымына айналып, тағы бір жүлдені иемденді. Өнер ұжымы сәуір айында Ақтөбе облысында өткен байқауда да үздік деп танылды. Ақтөбе облысының әкімдігі, облыстық мәдениет, архивтер және құжаттама басқармасының қолдауымен, және Ақтөбе облыстық халық шығармашылығы орталығының ұйымдастыруымен өткен байқау жазушы Тахауи Ахтановтың 100 жылдығына арналып ұйымдастырылған еді. Міне, дәл осы байқауға &nbsp;республиканың 7 облысынан 10 халық театры қатысты. Бұл фестивальде Қызылорда облысынан Шиелі ауданының мәдениет және спорт бөліміне қарасты Бұдабай Қабылұлы атындағы аудандық мәдени-шығармашылық орталығы жанынан құрылған «Халық театры» ұжымы Тахауи Ахтановтың «Махаббат мұңы» драмасын сахналады. Ал «Театр – өнердің ұлы көші» атты республикалық халықтық театрлар фестивалінде ұлы өнердің құдіретін ұғынған жерлестеріміз І орынға ие болып, «Ең үздік сценография» номинациясын жеңіп алды.

Шиелілік театрдың жарты ғасырдан астам тарихы бар

<a href="https://kyzylorda-news.kz/">Kyzylorda-news.kz.</a>&nbsp; Арал аудандық мәдениет үйінде ҚР Суретшілер одағының құрылғанына 90 жыл толуына орай ҚР Суретшілер және Журналистер одағының мүшесі, Көлбай Әбілханұлының «Толқынды Арал» атты шығармашылық көрмесінің ашылу рәсімі өтті. Көрменің ашылу салтанатында Арал ауданы әкімінің орынбасары Кете-Төлеби Досымжанұлы және ҚР Суретшілер одағының мүшесі Берік Бөкешов сөз сөйлеп, көрменің ашылуымен құттықтады.Көрменің мақсаты – Қазақстанның бейнелеу өнерін насихаттап жүрген өңіріміздің танымал өнер иесінің шығармашылығын туған жерінде дәріптеу, халық арасында кеңінен насихаттау.&nbsp;Бүгінгі көрмеге суретшінің қылқаламынан шыққан майлы бояумен, акварельмен орындалған және графикалық, әзіл суреттерінен 70-ке жуық туындылары қойылды.&nbsp;Көлбай Әбілханұлының жұмыстары пейзаж, тұрмыстық жанрға негізделіп салынған. Көрмеде көпшілік назарына ұсынылып отырған шығармалардың көбісі акварель бояуларымен орындалған. Суретші ішкі жан дүниесіндегі сезімдерді көрерменге жеткізу үшін осы акварельдің мүмкіндігін қолданған. Суретшінің шығармаларының басты нысаны өзінің туған жері, кейіпкерлері өзінің туыстары мен жерлестері. Акварель бояулары қағаз бетіне мөлдір болып түседі, сол мөлдірлік акварель туындыларының ең басты қасиеті болып табылады.Қазақстан Суретшілер, Журналистер одағының мүшесі, «Бейнелеу өнеріне сіңірген еңбегі» үшін төс белгісінің иегері, суретші Көлбай Әбілханұлы 1945 жылы 1 тамызда, Арал қаласында дүниеге келді. 1953-1964 жылдары Т.Г.Шевченко атындағы қазақ орта мектебін бітірген. 1964-1967 жылдары Қазалы Зовет техникумының мал дәрігерлік бөлімін бітірген. 1967-1972 жылдары АХУ-дың суретші (пед.) бөлімін бітірген. 1972 жылы Арал қаласындағы Т.Г.Шевченко мектебінде сызу және суреттен сабақ беретін ұстаз. Кейін Қызылордаға келіп, әр салада суретшілік жұмыстар атқарған. 1981-1991 жылдары облыстық суретшілер шеберханасында суретші болып жұмыстар атқарған. Облыстық, республикалық көрмелерге қатысқан. 1991-2008 жылдары Қызылорда қаласындағы №176 мектепте сурет және сызудан дәріс беретін ұстаз болды. Мектеп арлық жарыста 1-орын, алғыс, мадақтаулар алған.&nbsp;Жазған ертегілері, құрама суреттерімен бірнеше мәрте республикалық «Ақ желкен» балалар журналында жарық көрген. Әзіл суреттері республикалық «Ара», «Жас Алаш» газеттерінде бірнеше мәрте жарық көрген. Мектепте ұстаздық жұмыс жасай жүріп, облыстық «Сыр мектебі» газетінде әзіл суреттері, ертегі құрама суреттері тұрақты жарық көрген. Республикалық Самала «Көз» газеттерінде әңгіме суреттері жарық көрді. «Ақмешіт ақшамы» газетінде көркемдеуші-суретші болып жұмыстар жасаған.&nbsp;Бірнеше прозалық кітаптардың авторы:1. «Талант пен тағдыр» редакторы/ Жазушы Сарыбұлақ Ибрашұлы;2. «Жекелендіру бастауы» редакторы/ Жазушы, ақын Құдайберген Сейсенәлі;3. «Жақсылар мен Жауыздар» редакторы Қуаныш Маханбет Қазақстан Журналистері сыйлығының лауреаты, ҚР баспа және полиграфия қайраткері, «Сиқырлы тымақ» ертегісі Қызылорда баспасынан жарық көрген.2019 жылы Қызылорда қаласында С.Айтбаев атындағы көркемсурет галереясында «Замандастар» атты жеке көрмесін өткізді. Қазір жоғарғы білімді зейнеткер.Көрмеге зиялы қауым өкілдері, ардагерлер, БАҚ өкілдері, көрме қонақтары мен аудан тұрғындары қатысты.<figure class="image"><img src="https://knadmin.beoblood.kz/uploads/343800359_791732145703813_9077327032568894863_n_c8ad2cdc48.jpg" alt="343800359_791732145703813_9077327032568894863_n.jpg"></figure>&nbsp;<figure class="image"><img src="https://knadmin.beoblood.kz/uploads/344257405_606820841507602_3842981460659012251_n_2f5a835b15.jpg" alt="344257405_606820841507602_3842981460659012251_n.jpg"></figure>

Аралда «Толқынды Арал» атты шығармашылық көрме ашылды

<a href="https://kyzylorda-news.kz/">Kyzylorda-news.kz.</a>&nbsp; Білім мен мәдениетті ұштастыру арқылы өнерлі, дарынды, талантты жастарды тәрбиелеу – басты міндет саналады. Халықтың мәдениетін қалыптастыру – сахнадағы әрбір өнерпаздың шеберлігіне тікелей байланысты болмақ. Қай кезде де, мәдениеттің мәртебесін биіктетін кәсіби мамандар дайындаудың маңызы зор. Бұл ретте, &nbsp;өнерлі өрендерді барынша шыңдауда үйірме қызметіне иек артылатыны белгілі. Сондықтан үйірменің қызметін жандандырып, заманауи бағытта жұмысын үйлестіре білу керектігін айқын сезіне білдік.&nbsp;Мемлекет басшысы Қасым-Жомарт Тоқаевтың пәрменімен елімізде «Art sport» бағдарламасы қолданысқа енгізілген еді. Жаңа жобаның игілігін көру мақсатында көптеген мәдениет ошақтары жанынан шығармашылық, өнер, спорт орталықтары жұмысын бастады. Осыдан 1 жылдан аса уақыт бұрын аталған бағдарлама шеңберінде Сырдария ауданының 8 ауылын, атап айтқанда Айдарлы, Жетікөл, Бесарық, Шіркейлі, Нағи Ілиясов, Іңкәрдария, Ақжарма, Асқар Тоқмағамбетов елді мекендерін қамтитын «Сұлу-ай» шығармашылық өнер орталығы ашылған болатын. Аз ғана уақыттың ішінде, шығармашылыққа бейім балалармен жұмыс жасау, олардың қабілетін шыңдау, өнерге, білімге баулу жолға қойылды. Қазіргі уақытта, 28 үйірмеде 425 бала тұрақты түрде дәріс алуда. Мәселен, Айдарлы ауылында «Эстрадалық вокал», «Шешендік өнер», «Прима» үйірмесі, «Бисермен өру», «Домбырамен ән салу», «Көркем оқу» «Ұлттық би», «Кескіндеме сурет салу» үйірмесі ашылған. Ал, Жетікөл ауылында «Ұлттық би», «Эстрадалық вокал» үйірмесі, Бесарық ауылында «Ұлттық би», «Көркем оқу» үйірмесі, Шіркейлі ауылында «Домбырамен ән салу» үйірмесі, Ақжарма ауылынан «Ұлттық би», «Эстрадалық вокал» үйірмесінің жұмысы жолға қойылған. Сонымен бірге Нағи Ілиясов ауылынан «Домбыра», «Ұлттық би», «Хормен ән салу», «Эстрадалық вокал» үйірмесі, Іңкәрдария ауылынан «Домбыра», «Көркем оқу», «Пернелі аспаптар», «Оркестр, ансамбль», «Ұлттық би» үйірмесі, Асқар Тоқмағамбетов ауылынан «Ұлттық би», «Эстрадалық вокал», &nbsp;«Домбыра», «Кескіндеме және сурет салу» үйірмесі жұмыс істеуде. &nbsp;<blockquote>– Негізінен, «Мұғалім ісі сырттай қарапайым болғанымен – тарихтағы ең ұлы істің бірі» екендігін жақсы білеміз. Жоғарыда тізбектелген үйірмелерді жүргізу үшін кәсіби мамандарды тарту – басты мақсатымыз болды. Білікті ұстаздармен жан-жақты байланыс орнату арқылы «Сұлу-ай» шығармашылық өнер орталығының ұжымын қалыптастыра білдік. Білімнің, мәдениеттің негізгі қайнар көзін меңгерген ұстаздар қатарында Зағира Ахметова, Рахия Әбдікәрімова, Ләззат Бекарыстанова, Палкүміс Бахадүрова, &nbsp;Роза Дүрманова, Әсел Ибраева, Мақсұт Әбсадықов, Алмат Өтеуов, Әділбек Әзімжан, Әбдіқадыр Сарыбаев, Гүлназ Сералиева, Нұрсұлу Ажарова, Әнел Сансызбаева, Кәмшат Қошақова, Айым Арғынбекқызы, Ботакөз Қалиасқарова, Гүлмайра Босатханова, Айкерім Жұмабекова, Қымбат Мырзабпарова, Маржан Әшірапбаева, &nbsp;Ақтолқын Накипова, Әділхан Қуаңбаев, Аружан Әлішерова, Нұрила Кенесары бар. Шын мәнінде, жұмыс бар жерде нәтиже болу керектегі – заңдылық. Ұстаздарымыздың қажырлы еңбегінің арқасында шәкіртеріміз аудандық, облыстық, республикалық, халықаралық дәрежедегі байқаулардан жүлдегерлер мен жеңімпаздар қатарынан көрінді. &nbsp;«Балалар жылы» аясында өткізілген аудандық іс-шараларда өнерпаздарымыз белсене өнер көрсетті, – дейді «Сұлу-ай» шығармашылық өнер орталығының құрылтайшысы Анар Қалдыбаева.&nbsp;</blockquote>Сырдария ауданына қарасты мәдениет ошақтарында үйірме жұмысы жан-жақты жүргізілген жағдайда балалар өнерге қызыға бастайды. «Art sport» бағдарламасын мақсатты түрде пайдалану арқылы алдағы уақытта бірнеше үйірме ашылғандығын барлық ата-ана қолдайды. Әрбір ауылдың, Тереңөзек кентінің негізгі жұмыс істеу бағытына қарай керекті үйірмелерді ашу – маңызды рөл ойнайды. Мысалы, Іңкәрдария ауылында соңғы жылдары би үйірмесі мүлдем болмаған. Негізінен, барлық мәдениет және клуб үйлерінің жанынан ашылған үйірмелер ауыл балаларының өнерге құштар болуына барлық жағдай жасауда. Мәселен, Жетікөл және Бесарық ауылында «Ұлттық би» үйірмесі жақсы жолға қойылды. Арнайы маманды жұмысқа тарту арқылы керекті үйірмені ашуға мүмкіндік алдық. Әрбір іс-шарада хор айтылса әрине артықтық етпейді. Барлығын ескере келіп, «Хор» үйірмесін ашуға бекіндік. Дәстүрлі музыка ұлтымыздың құндылықтарының бірі саналады. Қазіргі уақытта дәстүрлі ән айтуға машықтанған жастарымыз жеткілікті.«Art sport» бағдарламасы шеңберінде спорт үйірмелерін ашуды қолға алған болатын. Қазіргі таңда Нағи Ілиясов ауылының жастары тоғызқұмалақ, шахмат, дзюдо, қазақ күресі, таеквондо үйірмесінде жаттығады. Кәсіби мамандар жетістікке жету жолында аянбай еңбек етуде. Байрақты бәсекелерде жеңіс тұғырынан көрінуде.&nbsp;<blockquote>– Әрине, үйірме жұмыстары сапалы әрі уақытылы жүру үшін арнайы бөлмелерді материалдық базамен жасақтау күн тәртібінен түспейді. Ең алғаш жекелеген қиындықтарға қарамастан оқушыларға жайлы орта қалыптастыруға тырыстық. Осылайша, 8 ауылдағы үйірмелердің бөлмелерін заманауи талапқа сай жасақтауға жұмыс жасаудамыз. Өткен жылы Айдарлы ауылына 10 дана домбыра, Шіркейлі ауылына 5 дана домбыра, Іңкәрдария ауылына 10 дана домбыра және 1 дана баянға тапсырыс беріліп, алынды. Сонымен қатар жыл көлемінде барлық үйірмеге қажетті құрал-жабдықтар реттілігімен қамтамасыз етілді. Әрбір үйірменің мазмұндылығына сай, көрнекілік құралдар алынды. Арнайы парта, стол, би үйірмесіне лайықтандырылған бағандар, айналар, тақталар алынып, тиісті ауылдарға жеткізілді. Ең бастысы, би үйірмесінің оқушыларына сан түрлі &nbsp;сахналық киімдер тіктірілді. Атап айтқанда, Айдарлы ауылына 12 дана қазақ ұлтының киімі, 12 дана испан ұлтының киімі, Жетікөл ауылына 6 дана заманауи үлгідегі киім, Нағи ауылындағы домбырашыларымызға 10 ұлттық киімдер, хор айтушыларға арнайы формаға лайықтандырылған 12 киім тіктірілген болатын. Ата-аналармен бірлесіп отырып, Ақжарма ауылының бишілеріне 12 дана қазақ ұлтының киімі, 12 дана орыс ұлтының киімі тіктіріліп берілді. Айта кетейік, Жетікөл ауылының бишілеріне 12 дана қазақ ұлтының киімін тіктіруге тапсырыс беріліп, толықтай алынды. «Шахмат» үйірмесінің арнайы кабинеті ашылды. Сурет үйірмесіне керекті құрал-жабдықтармен қамтамасыз етілді. Алдағы уақытта қаржылық мүмкіндіктерге байланысты барлық ауылда үйірмелер материалдық базамен қамтамасыз етіледі. Жыл көлемінде балалардың жоғары деңгейдегі байқауларда бақ сынауы үшін біздің орталықтың тарапынан қаржылай қолдау көрсетіліп отырады. Өз кезегінде барлық ауыл әкімдеріне, жекелеген шаруашылық төрағаларына, мәдениет және клуб үйлерінің директорларына балаларға жан-жақты қолдау көрсеткені үшін алғыс айтамыз, – дейді Анар Қалдыбаева. &nbsp;</blockquote>«Сұлу-ай» шығармашылық өнер орталығы 2022 жылды табысты қорытындылады деп сеніммен айта аламыз. 2023 жылы ата-аналармен берік байланыс орнатып, жұмысты жандандыра бермек. Салиқалы, білімді ұрпақ тәрбиелеу жолында аянып қалмасы анық. Сапалы жұмыс жүргізу мақсатында қолға алынған жоспарлары сәтінен ұйымдастырылса деген тілек бар.&nbsp; &nbsp;&nbsp;&nbsp;&nbsp;

Сырдарияда «Art sport» бағдарламасы жолға қойылған

<a href="https://kyzylorda-news.kz/">Kyzylorda-news.kz.</a> ҚР Мәдениет және спорт вице-министрі Сәрсен Абайұлы Құранбек жұмыс сапарымен Қызылорда облысына келді. Вице-министр Ә.Тәжібаев атындағы облыстық әмбебап ғылыми кітапханасында тұрғындармен кездесті.Жиынды Қызылорда облысы әкімі аппаратының басшысы Байманов Шахмардан Асқарұлы жүргізіп, өңірдегі спорт саласы жетістіктері мен даму динамикасына қысқаша тоқталып өтті.Сондай-ақ, кездесуге облыстық мәдениет және спорт басқармасына қарасты мекеме басшылары, жаттықтырушылар және қоғам белсенділері мен БАҚ өкілдері қатысты.Сәрсен Абайұлы өз сөзін "Қасиетті Қорқыт бабаның рухымен тыныстаған киелі өңірде өздеріңізбен кездесіп отырғаныма қуаныштымын" деп бастады. Вице-министр сапарының басты міндеті елімізде жүріп жатқан реформалар туралы халықты ақпараттандыру, мемлекеттік органдардың ел тұрғындары алдындағы жауапкершілігі мен жұмысын күшейту екендігін айтты. Осы орайда ол министрлік тарапынан атқарылып жатқан жұмыстарға тоқталып өтті. Кездесуден соң С.Құранбек қоғам белсенділері мен БАҚ өкілдерінің сұрақтарына жауап беріп, тұрғындарға жеке қабылдау өткізді.&nbsp; Ендігі кезекте вице-министрді "NAMAN ATA" спорт кешенінің құрылтайшысы Мұрат Абайұлы Сәрсенбаев кешен жұмысымен таныстырды.&nbsp;Кешенде Сәрсен Абайұлы жаттығу өткізіп жатқан балалармен сұхбаттасып, оларға болашақ ел намысын қорғар чемпион болуын тіледі.Вице-министрдің соңғы нысаны Жаңақорған ауданынының жергілікті спорт кешені болды. Мұнда ол гандбол, баскетбол және үстел теннисімен айналысушы жас спортшылармен кездесті. Сонан соң, аудандық ипподромдағы Көкпаршылардың жаттығуын тамашалап, жетістіктері мен алдағы жоспарлары жайында ақпарат алды. Сәрсен Абайұлы Көкпар спортын дамыту бойынша аудандық спорт саласы басшыларының білдірген ұсыныстарын қолдап, елімізде ұлттық спортты дамыту мәселесі қашан да алдыңғы орында тұруы қажет екендігін тілге тиек етті. Сондай-ақ ол министрлік тарапынан ұлттық спорт түрлерін дамыту үшін барлық жағдай жасалып, ұсыныстар қашан да қабылданатындығын жеткізді.<img src="https://knadmin.beoblood.kz/uploads/343301671_229133879800043_6688878125797563700_n_231a5f060e.jpg" alt="343301671_229133879800043_6688878125797563700_n.jpg">

ҚР Мәдениет және спорт вице-министрі қызылордалықтармен кездесті

<a href="https://kyzylorda-news.kz/">Kyzylorda-news.kz.</a>&nbsp; Мен қазақ қыздарына қайран қалам... «Қазақтың әнін, ұлттық киімі мен салт-дәстүрін өмір бойы серік еттім» деген күміскөмей әнші, Қазақстан және КСРО Халық әртісі, Халық қаһарманы Роза Бағланова болса, «қазақтың бұлбұлы» атанған Күләш Бәйсейітова, Сыр елі, жыр елінің тумасы, Қазақстанның халық әртісі, «Қазақтың Ақбаяны, ақ еркесі, ақ қозысы» Мәдина Ералиева, КСРО және Қазақстанның Халық әртісі, КСРО Мемлекеттік сыйлығының лауреаты Бибігүл Төлегеновалар күллі қазақ даласын әнімен тербеген. Қазақтың әнші қыздарының, ерке қыздарының ізін жалғап жүрген жастарымыздың бірі – Аманкелді елді мекенінің тумасы Құралай Мейрамбек. Әлемнің 100 елінде көрсетілетін әйгілі «The Voice» телешоуының қазақстандық нұсқасы – «Қазақстан дауысы» мега-жобасының алғашқы кезеңінде-ақ бүкіл өнер сүйер қауымды үнімен таңқалдырып, «қобыз-қыз» атанған жерлесімізбен сұхбаттасқан едік.– Құралай Мейрамбекқызы, алғашқы сұрақты танысудан бастасақ?– Мен «Сыр өңірі – жыр өңірі» атанған Сырдария ауданы, Аманкелді ауылында дүниеге келген едім. Шағын ғана ауылдың қызымын. №10 дарынды балаларға арналған облыстық «Білім-инновация» лицей-интернатын 2019 жылы тәмамдағанмын. Одан кейін арман қуып, еліміздің бас қаласы Астана қаласына бағыт алдым. Қазіргі уақытта Қазақ ұлттық өнер университетінде арт-менеджмент мамандығы бойынша білім алып жатырмын. Отбасымда анам, әкем және бауырларым бар. Барлығы өнер саласында қызмет етеді. Екі әпкем – опера әншілері. Үлкен әпкем Гүлзат Әбдікәрімова – этно-фольклорлық «Қоңыр» тобының әншісі, екінші әпкем Ұлпан Әбдікәрімова – Қазақ ұлттық өнер университетінің түлегі, жоғарғы оқу орнынан кейінгі білімді Италияда алған. Ағамның негізгі мамандығы – дәрігер, бірақ ол да өнер саласынан алыс жан емес. Артымнан ерген інім бар. Қазір 9-сынып оқиды. Ол да отбасымыздың дәстүрін жалғап, жыр-термеші, әншілік бағытқа бет бұрып келеді. Қазірдің өзінде халықаралық байқаулардың жеңімпазы атанып үлгере алды.– Негізгі сұраққа көшсек. «Қазақстан дауысы» жобасына қалай келдіңіз? Жалпы әншілік қасиет кімнен дарыған?– Аталған жоба – Қазақстандағы ең үлкен жобалардың бірі. Тасада жүрген таланттарды танытуға, қазақ жастарын көтеруге бағытталған керемет мүмкіндік. Жобаға қатысушылардың бәрі «сен тұр, мен атайын» деп тұрған нағыз талант иелері. Бұл көңілге қуаныш сыйлайды. Әншілік бабамның қанымен, анамның сүтімен дарыған қасиет деп айта аламын. Сыр бойының топырағын басып өскен адамның «әу» демейтіні жоқ шығар, сірә! Атам – ақын, әжем 40 жыл мектепте тарих және қазақ әдебиетінің мұғалімі болған. Әсем дауыс маған Алланың берген сыйы деп ойлаймын. Одан соң әкем мен анамнан дарыған асыл қасиет дер едім. Ата-анам – өнер адамдары. Әкем – дәстүрлі жыр-термеші, анам – вокал сыныбының мұғалімі. Екеуі де Аманкелді ауылдық өнер мектебінде жұмыс жасап, жас өнерпаздарды өнерге баулуда. Осы кісілердің арқасында кішкентайымыздан қазақтың ұлттық өнеріне, ұлттық аспаптарына жақын болып өстік. Бұған дейін де ән айтып, үлкен сахналарда бақ сынағанмын. «Қазақстан дауысы» жобасына қатысу да үлкен армандарымның бірі болатын. Биылғы іріктеу басталғанынан хабар алған бойда, еш ойланбастан жобаға қатысуға шешім қабылдадым. Маусым айында іріктеуден өтіп жолдама алдым. Бірінші кезең сәтті өтті. Қазір екінші кезеңге дайыңдық үстіндеміз.– Аталған жобаның алғашқы кезеңінде Қазақстанның еңбек сіңірген қайраткері, Сырдария ауданының «Құрметті азаматы» Рамазан Таймановтың әніне жазылған «Қорқыт-қобыз» әнін орындап, төрт тәлімгердің де жүрегін жаулап алдыңыз. Бұл – жеңіл-желпі ән емес, оны орындау үшін ерекше дарын мен үлкен жүрек керек деп ойлаймын. Дәл осы әнді таңдауға не себеп болды?– Өзім қайда жүрсем де, мейлі Қазақстанның басқа қаласында болсын, мейлі шетелде болсын, өзімнің Сыр өңірінің тумасы екенімді, шағын ауылдың қаракөз қызы екенімді мақтан етіп, айтып келемін. Осы әнді таңдауға да сол туған жерге деген сүйіспеншілік себеп болды. Бұл әннің әуенін, өзіңіз айтып өткендей, өнердегі үлгі тұтар ағамыз Рамазан Тайманов, ал сөзін Оңталап Нұрмаханұлы ағамыз жазған. 1999 жыл «Қорқыт ата жылы» болып жарияланған екен. Соған орай, өнертанушылар Қорқыт мұрасын терең зерттесе, ақын-сазгерлер жыр шумақтарын арнаған. Соның ішінде «Қорқыт-қобыз» әні де бар. Жарыққа шығып, бүкіл қазақ елін тамсандырған әннің дүниеге келгеніне биыл – 22 жыл. Алғаш сахнаға Гүлнұр Оразымбетова шығарса, біз өз кезегімізде бұл әнді жаңаша өңдеп, қайта жаңғыртуды көздедік. Ал қайырмасында қобыздың даусын келтіру идеясын өзімнің туған жездем ұсынды. Ол кісі де өнер саласында жүрген азамат. Осы ойды жандандырып, әнге жаңаша леп бердік. Әрине, оңай болмады. Қажырлы еңбектің арқасында.– Әншілік жолдағы ұстаздарыңыз туралы айтып өтсеңіз.– Мен қандай жетістікке жетсем де әуелі Алла, одан кейін ата-анам себепкер. Әрине, ең алғашқы ұстаздарым – әке-шешем. Бала кезімізден Рамазан Тайманов ағайымыздың студиясында өстік. Қандай байқауға қатыссақ та, ағайымызбен ақылдасып отырамыз. Сол кісінің өңдеуімен көптеген әндер жарық көрді. Рамазан ағаға айтар алғысымыз шексіз. Жоғарғы оқу орнындағы ректорымыз Айман Мұсаходжаева апайымыз да өнер саласында жүрген, өнерді бағалай білетін жан. Осы жолда тәлім берген ұстаздарымның еңбегі ерен. Қазақстанның еңбек сіңірген қайраткері Қаракөз Ақдәулетова апайымды ерекше атап өтер едім. Өкінішке орай, ол кісі қазір ортамызда жоқ. «Жарқын болашақ», халықаралық «Бозторғай» байқауының президенті Қарлығаш Әбдікәрімова апайымызға үлкен рақмет. Сол кісінің жетекшілігімен «Славян базары» байқауына қатысып, жүлдегер атанған болатынмын.– «Қазақстан дауысы» сіздің алғашқы үлкен сахнаңыз емес екенінен хабардармыз. Бұған дейін қандай байқауларда бақ сынадыңыз? Ең алғаш үлкен сахнаға шыққан Құралай Мейрамбек туралы айтып өтсеңіз.– 5 жасымда «Ботақан» байқауына қатысып, «Бас жүлде» иелендім. Ол менің алғашқы үлкен сахнам еді. Сол уақыт менің санамнан ешқашан ұмытылмайды. Одан кейін 2011 жылы Испаниядағы Льорет-де-Мар қаласындағы «Опус» байқауына қатысып, одан да жүлделі орын алдым. Сол жылы Белорусиядағы Витебск қаласында өткен балалар арасындағы «Славянский базары» сайысына қатысып, 1-орын иелендім. 2014 жылы Африканың Мозамбик қаласында «IFLC Mozambique» фестивальінде өнер көрсетіп, арнайы марапат алдым. 2015 жылы Румынияның Бухарест қаласында өткен халықаралық «ХІІІ Түрік олимпиадасында» Бас жүлде иегері болдым. 2015 жылы «Bala Turkvizyon» халықаралық байқауының 1-орын иегері атандым. 2016 жылы Бразилияның Сан-Пауло қаласында өткен «Colors of the world» фестивальінде өнер көрсеттім. 2018 жылы «Жарқын болашақ», «Miss innovation» республикалық байқауларында 1-орын жүлдегері атандым. 2020 жылы «Қызылорда дауысы» байқауында өз өнерімді көрсеттім. Бұлар менің ірі байқаулардағы жеңісім ғана емес, үлкен өмірге қадам бастырған негізгі баспалдақтар деп білемін. Сахнаның киесі толғандырмай, толқытпай тұрмайды. Сондықтан мен еш қорықпадым деп айтпаймын. Кішкентай болсын, үлкен болсын, әр сахнаға шыққанда қобалжу болады, бірақ соның барлығын ақылмен, оймен дер кезінде жинақтау қажет. Түрлі байқауларға қатысып, тәжірибе жинаудамын. Бұл – мен үшін тек бастамасы.– Керемет! Өз-өзіңізге деген сенімділігіңіз бен қайсарлығыңыз – нағыз қазақ қызына тән қасиет. Соның нәтижесінде небәрі он сегіз жасыңызда күллі Қазақстанды таң қалдырдыңыз. Бұрындары да ірі жетістіктерге жеткенмен, сіздің жұлдызыңызды жаққан «Қазақстан дауысы» жобасы секілді?– Иә, дұрыс айтасыз. «Қазақстан дауысы» – еліміздегі ең үлкен жобалардың бірі. Телевизиялық байқау болғандықтан түгел ел тамашалай алады. Әлеуметтік желідегі қаралымдар саны бір аптаның ішіне 500 мыңға жетті. Барлығы оң пікір білдіруде. Халықтың ықыласы мен сүйіспеншілігіне бөлену, әнді тыңдарман жүрегіне жеткізу – басты мақсат. Елдің қолдауы мен тілеуі мені қанаттандыра түседі. Халық сенімін ақтауға күш-жігерімді саламын.– Өнерді кие тұтқан халық өнер адамын да биік қояды. Қазақ халқы әрдайым сізге тілектес. Енді бір кәсіби сұрақ болсын. Даусыңызға арнайы күтім жасайсыз ба?– Әрине, күтім жасау қажет. Күнделікті ән айтып, дауысты шынықтырамыз. Дауыстың да қалыбы бар. Сол формадан ауытқуға болмайды.– Алдағы жоспарларыңыз қандай?– Арман адамды алысқа жетелейді. Болашаққа арман да, мақсат та, жоспар да көп. Дәл қазір оқуымды үздік аяқтауым керек. &nbsp;Болашақта халықаралық сайыстарға қатысып, қазақ елін, қазақ өнерін әлемге танытып жүрген аға-апаларымның ізін жалғасам деген арманым бар.- Әдемі әңгімеңіз үшін рақмет!&nbsp;&nbsp;

 Сырдариялық әншінің бағындырған белесі зор

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде «Университет аруы-2023» байқауының қорытынды кеші өтті. &nbsp;Биыл сұлулық сайысына 50-ге жуық ару қатысып, &nbsp;ақтық мәреде 9 бойжеткен бақ сынады.&nbsp;Салтанатты кешке Басқарма төрағасы-Ректор Бейбіткүл Кәрімова қатысып, қатысушыларға сәттілік тіледі.<blockquote>«Қазақ қашанда қыз баланы құрмет тұтып, төрден орын беріп, ерекше мейіріммен өсірген. Болмысы нәзік аруларымыздың ибалы, әдепті әрі ақылды болуын басты орынға қойған. Университетте тәрбиелі әрі білімді, ұлтжанды, салт-дәстүр мен мәдениетті дәріптейтін қыздардың ортасын құру мақсатында «Қыз Жібек» қыздар клубы жұмыс істеп келеді.&nbsp; Биылғы сұлулық байқауына қатысушылар бірнеше ай бойы түрлі бағытта өздерін сынады. Ақтық мәреге жолдама алған әр бойжеткеннің ақылына көркі сай екеніне сенімдімін»,-деді Бейбіткүл Сәрсемханқызы.</blockquote>Байқаудың шешуші кезеңі 4 айналымнан тұрды. Алғашқы айналымда бойжеткендер өзін таныстырса, келесі кезеңде университет қызметкерлері, белсенді студенттермен бірге өз өнерін көрсетті. Ары қарай сұлулық пен сәндікті серік еткен арулардың сахна мәдениеті, жүріс-тұрысы сынға түсті. Соңғы кезеңде бойжеткендердің білімі мен парасаты сараланды.&nbsp;Нәтижесінде әділқазылар алқасының шешімімен Айкерім Нұрғалиева «ІІІ Вице Мисс-2023», Аружан Сұлтан «ІІ Вице Мисс-2023», Аружан Ермағанбетова «І Вице Мисс-2023» атанды. Ал «Университет аруы-2023» байқауының тәжі Фатиха Асылбекқызына бұйырды.Сайыста Нартай Бекежанов атындағы облыстық қазақ академиялық музыкалық драма театрының басшысы Мұхтар Ниязов, облыс әкімі жанындағы әйелдер істері және отбасылық-демографиялық саясат жөніндегі комиссия хатшысы Қаламқас Каримова, Үкіметтік емес ұйымдарының Альянсы Ассоциясы заңды тұлғалар бірлестігінің төрайымы Анар Ізден, Сыр елінің эстрада әншісі Алмас Шынберген, Ғылыми жұмыстар және халықаралық байланыстар жөніндегі проректор Майнұр Бөрібаева және Әлеуметтік және тәрбие жұмыстар бөлімінің басшысы Жанар Бимұратқызы төрелік жасады.Айта кетейік, байқау «Қыз жібек» қыздар клубының ұйымдастыруымен өтті. Биыл ұйымның құрылғанына – 10 жыл. Алдағы уақытта клубтың мерейтойын кең көлемде атап өту жоспарлануда. &nbsp;

Қазақстан және Қызылорда облысының жаңалықтары: Мәдениет