<a href="https://kyzylorda-news.kz/">Kyzylorda-news.kz.</a> Көктем айының шуаққа толы мерекесі – 8 наурыз Халықаралық әйелдер күніненде аудан әкімі Аманжол Оңғарбаев аудан ардагерлерімен бірге бірқатар асыл жанды арулардың отбасыларына барып, мерекемен құттықтады.Аудан басшысы алдымен 39 жастағы мүгедектігі бар бала күтуші Гүлмира Байменованың шаңырағын ат басын бұрды. Өз кезегінде аяулы ана құрмет көрсеткен аудан басшысына шынайы ризашылығын білдірді.Одан әрі, 82 жастағы жалғызбасты қарт әже Назду Керімованы төл мерекемен құттықтады. Аудан әкімі А.Оңғарбаев өз сөзінде «Қарттарымыз қазынамыз. Біз әрдайым сіздердің еткен еңбектеріңіз бен ел үшін жасаған қызметтеріңізді жадымыздан шығармаймыз. Бүгінгі өздеріңіз арқылы барша ауданның ақжаулықты аналары мен қыз-келіншектерді мерекемен құттықтаудамыз»,- деді. Арнайы құттықтай келген азаматтарға ризашылығын білдірген ардагер ана елдің амандығын тілеп, ақ батасын берді.Мұнан соң, І топ мүгедектігі бар Несіпбике Жақсыбаеваның үйіне барған аудан басшысы ардақты жанға ыстық ықыласы мен жылы лебізін білдірді.Фото: Арал ауданының әкімдігі

Арал ауданының әкімі аналарды төл мерекемен құттықтады

<a href="https://kyzylorda-news.kz/">Kyzylorda-news.kz.</a> 8 наурыз – Халықаралық әйелдер күні мерекесінде аудан әкімі Аманжол Оңғарбаев аудандық мәдениет үйінде өткен салтанатты шарада Арал өңірінің нәзік жандыларын мерекемен құттықтады.Алдымен мерекелік кештің шымылдығы әйел-ананың қадір-қасиетін ұлықтайтын сахналық қойылыммен түрілді.Мұнан соң, аудан басшысы сөз алып, барша әйелдер қауымына ақжарма лебізін арнады.<blockquote>«Шын мәнінде адамзат баласы үшін анадан құдіретті, анадан ардақты, анадан аяулы ешкім жоқ. Сондықтан әлемдегі ең жоғары мадақ та, құрмет те ару-аналарға арналады. Бүгінде ауданымызда 2 мыңнан аса алтын құрсақты аналарымыз болса, оның 113-і батыр ана. Ал 640-і Алтын алқа, 1226-і Күміс алқа иегерлері. «Әйел – бір қолымен бесікті, екінші қолымен әлемді тербейді» деген тәмсілдің астарында әйел адамның кез келген ауқымды істерге араласып, үлкен нәтижеге қол жеткізе алатынын дәлелдейтін терең мағына жатыр. Қазақ әйелі – елдіктің, қазақ әйелі – биіктіктің, қазақ әйелі – мәңгіліктің өлшемі. Әйел – өмір тірегі ғана емес, әйел – өмірдің өзі. Ауданымыздағы мемлекеттік қызмет саласындағы 36 пайызын, білім беру саласындағы 65 пайызын, медицина саласының 83 пайызын, мәдениет саласындағы 80 пайызын, өңірдегі кәсіпкерлердің 47 пайызын әйел азаматшалар құрап отыр. Сонымен қатар Аралдың ақ алтыны атанған ас тұзы мен су маржаны балық өндірісінде, темір жол мен ауылшаруашылығы, құқық қорғау саласында және бұқаралық ақпарат құралдарында еңбек етіп жүрген асыл апа-қарындастарымыз аз емес. Аяулы асыл жандар! Сіздер арқылы Арал халқының барша аруларын әсем мерекемен құттықтап, ыстық ықыласым мен ақжарма лебізімді білдіргім келеді. Сіздер барда сәбилеріміздің жүзінен күлкі кетпей, ер-азаматтарымыз еңсесін тік көтеріп жүре бермек!» – деді, аудан басшысы.</blockquote>Салтанатты кеште түрлі салада елеулі қызмет етіп, белсенділігімен ерекшеленіп, үздік деп танылған бірқатар аяулы аруларға Облыс және аудан әкімінің құттықтауы табысталды.Мерекелік шара көрерменге шат-шадыман көңіл-күй сыйлайтын концертпен жалғасты. Жергілікті аудан өнерпаздары мен мерекелік кешке арнайы келген эстрада жұлдызы Алмасхан Насыров әсем ән шырқады. Мың бұралған бишілердің өнері де көктем мерекесінің ажарын аша түсті.Фото: Арал ауданының әкімдігі

Аралдық арулар марапатталды

<a href="https://kyzylorda-news.kz/">Kyzylorda-news.kz.</a>&nbsp;&nbsp; &nbsp;Жуырда Тасбөгет кентінің әкімі Айдын Тыныштықбай БАҚ өкілдеріне берген брифингте жыл бойы атқарылған жұмыс барысы мен алдағы атқарылатын жұмыстарға тоқталды.Кент әкімінің айтуынша, өткен жылы инфрақұрылымды дамыту бойынша мемлекеттік бюджет, демеуші және инвестиция есебінен ауқымды жұмыстар атқарылған. Нақтырақ айтсақ, ұзындығы 82 шақырымды құрайтын 52 көшенің 41 көшесі жөндеуден өткен. Оның ішінде Сабалақ саяжайындағы 18 көше мен кенттегі 21 көшенің белгіленген бөліктеріне қиыршық тас төселіп, 2 көшеге асфальт төселген. Ал 7 көшеге жарық бағаналары орнатылса, «Еңбек» және «Өркендеу» саяжайындағы 3 көшеге демеушілер өз есебінен жарық бағаналарын орнатқан. Сонымен қатар аймақ басшысының қолдауымен кент аумағында құны 542,1 млн. теңгені құрайтын дене шынықтыру-сауықтыру кешені пайдалануға берілді.&nbsp;<blockquote>– Соңғы жылдары кентте кәсіпкерлікті дамыту бағытындағы мемлекеттік бағдарламаларға қатысу қарқыны артып келеді. Сондықтан биылғы жылы да тұрғындарға мемлекеттік бағдарламаны пайдалана отырып, кәсіп ашуға, кеңейтуге кеңес берілді. Нәтижесінде он екі айдың ішінде алпыс жеті тұрғын өз жобасын қорғап, 400,9 млн теңге көлемінде қаражат иеленді. Бүгінде кентте 1644 кәсіпкер бар. Олар өздерінің &nbsp;қызметін табысты жүзеге асыруда, – деді Тасбөгет кентінің әкімі Айдын Маратұлы.</blockquote>Мұнан соң кент әкімі биыл атқарылатын жұмыстарға тоқталды.– Өздеріңіз білетіндей, кентке қарасты Сабалақ саяжайын «көгілдір отынмен» қамтамасыз ету мәселесі де басты назарда. Қазіргі таңда «Досстройпроект» ЖШС мекемесінің демеушілігімен Сабалақ саяжайына «көгілдір отын» тарту жұмыстарының жоба-сметалық құжаттары әзірленді. Нәтижесін күтіп отырмыз, – деді Тасбөгет кентінің әкімі.Биыл Тасбөгент кентінің бюджеті 345,9 млн теңге болып бекітілген. Алдағы уақытта Е. Ертуғанов көшесінің Сапарбаев пен Баймағанбетов көшелері &nbsp;аралығына абаттандыру жұмыстары жүргізілсе, Исмайлов көшесіндегі жарық бағанасының орнатылмай қалған бөліктеріне жарықшамдар қойылмақ. Ал халықтың сұранысы бойынша кенттегі&nbsp; ұзындығы 12,7 шақырымды құрайтын 6 көшеге жарық бағаналарын орнату бойынша жоба сметалық құжаттары әзірленген.&nbsp; Сондай-ақ &nbsp;Ғ.Мұратбаев (Сапарбаев қиылысы) және Ә. Молдағұлова (Сейтпенбетов қиылысы) көшелеріне 4 аялдама мен Сабалақ саяжайының орталық көшесіне екі аялдама орнатылады. Одан бөлек кенттегі әлеуметтік нысандар орналасқан алты көшеге жаяу жүргіншілер жолын салуға және Сабалақ пен Еңбек саяжайындағы көшелерге жарық бағаналарын орнату мақсатында тиісті құжаттар әзірленуде.

Айдын Тыныштықбай: Көгілдір отынмен қамтамасыз ету басты назарда

&nbsp;<a href="https://kyzylorda-news.kz/">Kyzylorda-news.kz</a> Сырдың елі – өнердің киелі ордасына айналған қасиетті өлке саналатыны күллі жұртқа мәлім. Өткен ғасырдан жыр-дастан мен әуелеген әннің алтын ұясы саналатын бұл мекен өнерден кенде болған еместігін жақсы білеміз. Талантымен талайды таңқалдырған мәдениет майталмандары қазақ өнерінің көсегесін көгертуге барын салып келеді. Өз кезегінде жарты ғасырлық тарихы бар «Ритм» халықтық вокалды-аспапты ансамблінің аудан өмірінде қалыптасқан ізгілікті жолы бар екеніне әбден көз жеткізгенбіз. Ең алғаш ансамбль құрамында өнер көрсетіп, зор жетістікке жетуіне айрықша ықпал еткен Серік Байдәулетовпен шығармашылық ұжымның жұмысы жөнінде сұхбаттасудың сәті түсті.&nbsp;– Серік Ибадуллаұлы, 50 жылдан аса уақыт бойы жергілікті халықтың ыстық ықыласына бөленіп келе жатқан «Ритм» халықтық вокалды-аспапты ансамблі ең алғаш қалай құрылды? Құрамында кімдер болды?– «Ритм» халықтық вокалды-аспапты­ ансамблінде жастайымнан өнер көрсетіп келе жатырмын. Осыдан 52 жыл бұрын ауданымызда жергілікті сазгер Рамазан Тайманов, Оспан Қожақов, Мәлік Серікбаев сынды ағаларымыз Тереңөзек кентіндегі бұрынғы клубта аспаппен өнер көрсетуді бастағаны сол кездегі жұртшылыққа жақсы таныс. Сол уақыттан бастап халықтың жүрегінен орын алған аспаптар ансамблінің негізі қаланған болатын. Кейіннен, Рамазан Тайманов ағамыз Отан алдындағы борышын өтеуге әскерге аттанған уақытта ансамбль жұмысын жолға қою маған жүктелгендігін абыроймен айта аламын. Облыс аумағында халықтық вокалды-аспапты ансамбльдер құрыла бастаған мезетте біз де өнерімізді көпшілікке таныта бастаған болатынбыз. Әлі есімде 1975 жылы «1 маусым – Халықаралық балаларды қорғау күні» мерекесінде репертуарымызды толықтырып, тыңдарман қауым алдында өнер көрсетіп, көпшіліктың ыстық-ықыласына бөлендік. Әр жылдары ансамбль құрамында талантты, өнерлі аға буын өкілдері мен жастар өнер көрсетіп отырды. Мәселен, Бекет Алданазаров, Мұхан Қаушов, Кюри Каримов, Марат Олжабаев, Әлтай Әбдіреев, Ғалым Бакиров, Бауыржан Якудаев, Бақыт Абдураймов, Ораз Ерғалиев, Володя Тен, Марат Шамшиев сынды азаматтар аспапта ойнау өнерімен дараланды. Әрқашан қабілеті зор, музыкалық білімі бар азаматтар құрамның жаңарып отыруына қиындық соқтырмаған еді.– Ансамбль атауының қойылу тарихын бір сәтке еске түсірсек…– Өз кезегінде халықтық вокалды-аспапты ансамбль мүшелері жанды дауыста ән шырқап, әнсүйер қауымның назарын аударта бастаған тұста өзінің атауын бекіте алдық. Бір күні Әлтай Әбдіреев екеуміз ұзақ ойлана келіп, «Ритм» деген атауға тоқталған болатынбыз. Негізінен, ритм музыканың ырғағы саналады. Шығармаға жан бітіріп, барлық құрылымын сақтап тұратын ритмді ансамбліміздің ресми атауына айналдыра алғанымызға қуаныштымыз.– Өнер ұжымының репертуары жөнінде кеңінен тарқатып айтып бересіз бе?– Біздің әндеріміз тыңдарманның жүрегінен жол тауып, өміршеңдігімен ерекшеленіп келе жатқанына ел куә. Жалпы, ескі әндерді жаңғыртып, қазақ сазгерлерінің құнды туындыларын жарыққа шығарумен айналысаыз. 2006 жылы «Естен кетпес сол әндер» тақырыбындағы концерттік бағдарламамызда өткен ғасырдың 70-80 жылдары кеңінен халыққа танылған шығармаларды орындаған едік. Қазіргі уақытта 20-дан аса ән бар қоржанымызда. Оның ішінде, ансамбль мүшелері өзімнің авторлық 6-7 әнімді шырқап жүр. Сонымен қатар шетел әндерін айтамыз. 2009 жылы Ресей елінде өткізілген халықаралық байқауға қатысып, «Гран при» жеңіп алған болатынбыз. 42 ансамбль ішінен үздік шыққан кезімізде «Шыңдалу» атты рок балладасын орындаған едік.– «Ритм» халықтық вокалды-аспапты ансамбліне ұзақ жыл бойы жетекшілік еттіңіз. Ұжымды ұстап тұру қиын болды ма?– 42 жыл ансамбль жұмысын үйлестіруге табандылық таныта білдім десем, қателеспеймін. Соңғы 6 жылда жас әнші Дастан Палмахов аға буын бастаған жұмысты жалғастырса, қазіргі уақытта жергілікті сазгер Марат Қошықов ансамбльге жетекшілік етіп келеді. Әрине, тоқырау жылдары өнер ұжымын ұстап тұруға едәуір ауыртпалық еткені. Жыл сайын республикалық облыстық, аудандық байқауларға қатысып, жүлделі болуға ұмтылып келеміз. Халықтық атақты осыдан 11 жыл бұрын алған мезетте қуанышымызда шек болмады. Негізінен, ансамбль мүшелерінің сапалы әрі сәтті өнер көрсетуі – аспаптарға байланысты. Аспаптың күйін келтіріп, кәсіби тұрғыдан ойнап шығудың өзіндік қиындығы бар. Қай кезде де, аспаптың дауысына, ойналу ырғағына аса мән береміз. 1985 жылы, яғни, аумалы-төкпелі кезеңде мәдениет саласына басшылық жасаған Алма Бақтиярова апамыз Германия елінен «Вермона» музыкалық аппаратын алдыртып берді. Кейіннен, «Оңаша» ойын-сауық отауымен бірге елді мекендерді аралап, ауыл шаруашылығы құрылымдарының мамандарына концерттік бағдарлама ұсынған едік.– «Ритм» халықтық вокалды-аспапты ансамблінің қазіргі уақытта атқарып жатқан жұмысына тоқталып өтсеңіз.– Осы күні ансамбль құрамында Махмұд Сақтапов, Жәнібек Әбдіреев, Дархан Разақов сынды азаматтар бар. Жақында аудандық мәдениет үйінде «Сазға толы сырлы әндер» тақырыбында шығармашылық кешімізді өткізген едік. Сонымен қатар өткен жылы «Ритм» халықтық вокалды аспапты ансамблінің құрылғанына және шығармашылығына 50 жыл толуына орай «Сыр әуендері» атты облыстық вокалды аспапты ансамбльдер байқауы ұйымдастырылды. Біз қашанда өнерді жоғары бағалап, шығармашылығымызды дамыта береміз деп сеніммен айта аламын.– Сұхбатыңызға рақмет!

Сырдариялық ансамбль ескі әндерді жаңғыртқан

<a href="https://kyzylorda-news.kz/">Kyzylorda-news.kz</a> &nbsp;Соңғы мәліметтерге сәйкес Сырдария ауданы бойынша 14-35 жас аралығындағы барлығы 11727 жас бар екен.&nbsp;Бұл шамамен аудан халқының 30 пайызын құрайды. Есепті мерзімде 794 жас жұмыс сұрап, жұмыссыздыққа тіркелсе, оның 207-сі тұрақты жұмысқа, ал 8-і әлеуметтік жұмысқа орналасқан. Сонымен қоса 141 жас жастар тәжірибесіне және 116 жас қоғамдық жұмысқа жолдама алған. Сондай-ақ&nbsp;сәйкесінше ауданда 675 жас кәсіпкер тіркелген.&nbsp; &nbsp; &nbsp;Жалпы ауданда жастар саясаты мәселесімен тікелей аудандық қоғамдық даму бөлімі айналысады. Бөлімге қарасты аудандық жастар ресурстық орталығы да тиісті жұмыстарды сәйкесінше ұйымдастырып, үйлестіреді. 2017 жылдан бастап жұмыс істеп келе жатқан орталықтың негізгі басты мақсаты –&nbsp;жастар ұйымдарын қолдау мен дамыту, жастарға қызмет көрсету болып табылады. Бүгінгі күні аталған орталықта директорымен қоса есептегенде 7 қызметкер жұмыс істейді.&nbsp; &nbsp; &nbsp;Аудандық жастар ресурстық орталығы мекемесінің жұмысын үйлестіруге жергілікті бюджеттен 21 599,0 мың теңге қаржы бөлінген. Бұдан бөлек қоғамдық даму бөлімінің «Жастарға патриоттық тәрбие беру және жастар арасында ұлттық құндылықтарды насихаттау әлеуметтік қызметін ұйымдастыру» мемлекеттік әлеуметтік тапсырысы аясында да қаржы қарастырылған. Бұл бағытта бөлінген қаржы көлемі 3 445,0 мың теңге болса, келісім шарттағы сомасы 2 741,3 мың теңгені құрайды. Әлеуметтік жоба аясында жыл басынан бері 9 іс-шара ұйымдастырылған. Атап айтқанда, форум, фестиваль, спорттық сайыс, кездесу, жайдарман ойыны секілді жастардың қызығушылығын арттыратын іс-шаралар бар.<blockquote>&nbsp; &nbsp; &nbsp;– Аудан әкімі жыл сайын мемлекеттік жастар саясатын жүзеге асыру бойынша ұйымдастырылатын іс-шаралар жоспарын бекітеді. Жоспар былтыр да бекітілген. Соның аясында сол уақыттан бері 82 іс-шара ұйымдастырылып, оған 4274 жас қатыстырылды. Сонымен қатар жастар арасындағы жұмыссыздық деңгейін төмендету, кәсіпкерлікті дамыту мақсатында кеңес беру жұмысы қолға алынып, «Мүмкіндіктер алаңы» кеңес беру жобасы аясында 14 рет кездесу, «Tulga bol» жылжымалы жәрмеңкесі 14 рет ұйымдастырылды. Сондай-ақ саламатты өмір салтын қалыптастыру мақсатында «Сырдария барысы», көкпар, «Жеңімпаз бол» денсаулық фестивалі өткізілді, – дейді аудандық жастар ресурстық орталығының директоры А.Ахметова.</blockquote>&nbsp; &nbsp; &nbsp;Жастар саясаты саласында жетістіктермен қатар мәселелер де бар екені жасырын емес. Мәселен жастар арасындағы құқықбұзушылық күн тәртібінен ешқашан түспейді. Бұл бағытта аудандық полиция бөлімімен бірлесе кешенді профилактикалық іс-шаралар тұрақты түрде ұйымдастырылуда. Әсіресе жастардың түнемелік жүруі өзекті. Сондықтан сала мамандары ата-аналарға кәмелеттік жасқа толмаған балаларын бақылауда ұстауды сұрайды. Негізі жасөспірімдердің қызығушылығын ерте анықтап, түрлі үйірмелерге қатыстырудың, еңбекке баулудың маңызы зор. Осы ретте еңбексүйгіш жастардан құрылған еңбек бригадаларының жұмысын көпке үлгі етуге болады. Қазір ауданның Айдарлы, Аманкелді, Бесарық, Жетікөл, Шіркейлі, А.Тоқмағанбетов ауылдарында жастардың еңбек бригадасы құрылып, 150-ге жуық жас еңбек етіп жатыр. Олар егін науқанында бау-бақша өнімдерін егіп, өз нәпақасын тауып жүр.&nbsp; &nbsp; &nbsp;Ауданда ерікті жастардың да саны артып келеді. Ерікті жастардың бастамасымен қайырымдылық акциялары көптеп өткізілуде. Жалғызбасты, көпбалалы аналар мен қарттардың үй-жайларына ерікті жастардың қатысуымен тазалық жұмыстары жүргізілуде. Ал «Жасыл ел» еңбек жасағына биыл аудан бойынша 220 жас тартылып, олар ауданды абаттандыру жұмыстарына атсалысты. Нәтижесінде Сырдария ауданының «Жасыл ел» еңбек жасағы үздік деп танылып, облыс бойынша І орынды иеленді. Фото: freepik

Ауданда ерікті жастардың да саны артып келеді

&nbsp; <a href="https://kyzylorda-news.kz/">Kyzylorda-news.kz</a>. Рамазан - жақсылық пен мейірімге толы ерекше ай. Күллі мұсылман күтетін қасиетті рамазан айы 11 наурыз бен 9 сәуір аралығында өтеді. Ал, ораза айт мерекесі 10 сәуірге тура келеді. Қасиетті Қадір түні 5 сәуірден 6 сәуірге қараған түні өтеді. Сондай-ақ, ҚМДБ шешімі бойынша жан басына шаққандағы пітір садақаның мөлшері 640 теңге болып белгіленді. Бұл туралы облыстық дін істері басқармасының бөлім басшысы Нұрхат Бердібек хабарлады.<blockquote>– ҚМДБ төрағасы, Бас мүфти Наурызбай қажы Тағанұлының мәлімдемесіне сәйкес, биылғы Рамазан айы 11 наурызда басталады. Ал, Айт мерекесі 10 сәуірде өтеді. Рамазан айындағы жалпы пітір садақа мөлшері бекітілгенімен құрма, мейіз бағасымен де беруге болады. Сонымен қатар, пітір садақаны жүкті әйелдер ішіндегі сәбиі үшін де береді. Садақаны мешітке келіп немесе мобильді қосымшалар арқылы да аударуға болады. Дәстүр бойынша мешіттерімізде ауызашар дастарханы жайылып, белгіленген тәртіпте өткізіледі, – деді Қызылорда облысының бас имамы Дастан Құрманбаев.</blockquote>Брифинг барысында №3 қалалық емхананың жалпы тәжірибелі дәрігері Меруерт Нұрымбет оразаның адам денсаулығына пайдасын атап өтті.<blockquote>– &nbsp;Жалпы, медицинада ораза адам ағзасы үшін пайдалы. Себебі, адам ораза ұстаған кезде қан қысымы реттеліп, холестерин деңгейі төмендейді. Сонымен қатар, организмдегі қант деңгейінің тұрақты болуына да септігін тигізеді. Бұл кезеңде ең бастысы - дұрыс тамақтану тәртібі. Яғни, ауыз ашқан кезде құнарлы, ақуызы көп пайдалы тамақтарды және жеміс-жидектер мен көкөністерді жиі жеу керек. Алайда, медицина жағынан кей адамдарға ораза ұстауға кеңес берілмейді. Мысалы, асқазанның ойық жара ауруы бар, қант диабетіне шалдыққан науқастар, жүкті әйелдер және кішкентай балалар. Сондықтан, дәрігердің кеңесін ала отырып, ораза ұстаған жөн, – деді Меруерт Нұрымбет.</blockquote>Фото: Қызылорда облысының Өңірлік коммуникациялар қызметі

Қызылордада Рамазан айында қандай іс-шаралар өткізіледі? 

<a href="https://kyzylorda-news.kz/">Kyzylorda-news.kz.</a>&nbsp; Бүгін аудан әкімі Мейрамбек Шермағанбет Басықара, Қ.Пірімов, Жалаңтөс батыр және Ғани Мұратбаев ауылдарын аралап, елді мекендердің тыныс-тіршілігімен танысты. Аралау барысында аталмыш ауылдардың тұрғындарымен тілдесіп, олардың ұсыныс-пікірлерінде тыңдап қайтты.&nbsp;Мейрамбек Зинабдинұлы алдымен Басықара ауылындағы Ә.Тыныбаев атындағы су торабының жұмысын көрді. Су торабының бастығы Болат Әсербаев өндірістік учаскенің жұмысы жайында баяндады.&nbsp;Мұнан соң, аталмыш ауылдық округтерде орналасқан мектеп, балабақша, дәрігерлік амбулатория, ауылдық клуб, спорт кешені сынды барлық әлеуметтік нысандарды аралап, олардың жағдайын көрді.&nbsp;Аралау барысында әрбір мекеме басшысына ең әуелі әлеуметтік нысандардың тазалығына аса мән беріп, барлық талаптарға сай болуын қамтамасыз етуді тапсырды.&nbsp;Ал, ауыл тұрғындарымен кездесу барысында жастарды жұмыспен қамту, ауылға балабақша салу, қоғамдық көлік, көше жарықшамдарын қайта қалпына келтіру, жедел жәрдем көлігінің жоқтығы, жол салу сынды тұрғындар тарапынан айтылған мәселелерге заңдылыққа сәйкес жауап беріп, айтылған ұсыныстардың барлығын реттілігімен шешуге жұмыс жасайтындығын жеткізді. Сондай-ақ, айтылған әрбір ұсыныстарға байланысты жауапты сала басшыларына нақты тапсырмалар жүктеді.&nbsp;Елді мекендерді аралау барысында ауыл әкімдеріне әуелі ауылдың тазалығына назар аударып, ауылды абаттандыру, көркейту-көгалдандыру жұмыстарына ауызбіршілікпен ауыл халқын жұмылдыруды айтты.&nbsp;Сондай-ақ, көше бойларындағы жарықшамдармен қоршауларды, жол белгілерін ретке келтіріп, сырлап, ағаш түптерін әктеу, қураған ағаштарды кесіп орнына көшет отырғызу және басқа да ауылды көркейту бағытындағы жұмыстарды жүргізуді тапсырды.&nbsp;

Қазалы ауданының әкімі ауылдардың тыныс-тіршілігімен танысты

<a href="https://kyzylorda-news.kz/ru">Kyzylorda-news.kz</a>&nbsp; Аудан әкімі Мейрамбек Шермағанбет 8 наурыз – Халықаралық әйелдер күні қарсаңында бірқатар абзал аналардың үйлеріне барып, аймақ басшысы Нұрлыбек Нәлібаев пен аудан халқының атынан мерекемен құттықтады.&nbsp;Алдымен, 80 жастағы алтын құрсақты ана, еңбек ардагері, Басықара ауылының тұрғыны Рая Нұрхожаеваның шаңырағына арнайы барды. Қазыналы қартты құттықтап, ыстық лебізін білдірген аудан басшысы мерекелік сый-сияпат табыстады. Қуанышқа бөленген Рая әжей аналық алғысын айтып, ақ батасын берді.&nbsp;Мұнан соң, аудан әкімі Жалаңтөс батыр ауылындағы Қазалы ауданының құрметті азаматы Ажаркүл Алдажарованы құттықтап, үйіне барды. Мейрамбек Зинабдинұлы ақ жаулықты анаға ізгі тілегін арнап, мерекелік сыйлығын тарту етті.&nbsp;Шаңырағына арнайы келіп, мерекемен құттықтауы мерейін өсірген Ажаркүл ана, өз кезегінде аудан басшысына алғысын білдіріп, ел үшін атқарып жатқан қызметтеріне сәттілік тіледі.&nbsp;Бұдан кейін аудан әкімі Әйтеке би кентіндегі 100 жастағы ең қарт ана Софья Сағымбайдың отбасында болды. Екі ғасырдың куәсі болған, зұлмат жылдары аянбай тер төккен Софья әже шаңырағына арнайы құттықтай келген аудан әкіміне ризашылығын білдірді. Бес ұл-қыз тәрбиелеп өсірген ақ жаулықты әже бүгінде 16 немере, 15 шөбере, 5 шөпшек сүйіп отыр.&nbsp;Аудан әкімі Мейрамбек Зинабдинұлы ақ жаулықты аналардың ел дамуындағы елеулі еңбектерін атап өтіп, батыр аналардың қандай құрметке болсын лайық екендігін, оларды қадірлеу – бүгінгі ұрпақтың мерейлі міндеті екенін баса айтты.&nbsp;Өз кезегінде ақ жаулықты әжелер мерекемен құттықтаған аймақ басшысымен аудан әкімдігіне шынайы ризашылығын жеткізді.&nbsp;

Қазалыда қарт аналарға құрмет көрсетілді

&nbsp;<a href="https://kyzylorda-news.kz/">Kyzylorda-news.kz.</a> Қала іргесінде орналасқан Ақсуат ауылдық округін өзге ауылдарға үлгі боларлық экномикалық-әлеуметтік дамуы айшықты ауыл деп айтуға негіз бар. Бүгінде ауыл әкімі Нұрболат Бақытов ауылдық оругті көркейту мақсатында еңбек етіп келеді.&nbsp;Өткен жылы ауылды дамыту мақсатында атқарылған жұмыстарға тоқталған ауыл әкімі ауылдық округтің инфрақұрылымын дамытуға басымдық берілгенін атап өтті. «Соның бірі, ауылдық округтегі ең өзекті мәселенің бірі өз шешімін тапты. Яғни, елдімекен табиғи газбен қамтамасыз етілді,» - дейді ауылдық округ әкімі Нұрболат Бақытұлы.&nbsp;Сонымен қатар, «Ауыл - ел бесігі» жобасы мен Қазақстан Республикасының Ұлттық қорынан берілетін нысаналы трансферт есебінен ауылдық округтегі 8 көшеге асфальт төселіп, 1 көшеге жаяу жүргіншілер жолы салынды және 3 көшеге түнгі жарық бағаналары орнатылды. Сондай-ақ, №12 бағыттағы автокөліктер үлкен сыйымдылықтағы жаңа автокөліктермен толықтырылды, биыл №2-ші бағыттағы қоғамдық көліктер жаңа автокөліктермен қамтылды.Бұдан бөлек, «Samruk - Kazyna Trust» корпоративтік қоры тарапынан ауыл орталығынан спорт кешені және демеушілердің қаражаты есебінен 1 спорт ойын алаңы пайдалануға берілді.Мемлекеттің шағын және орта кәсіпкерлікті дамытуға жасап жатқан қолдауының арқасында ауылдық округ бойынша 541 кәсіпкерлік субъекті жұмыс істеуде, оның 185 кәсіпкерлік субьектісі 2023 жылы тіркелген. Сонымен қатар, кәсіпкерлікті дамытудың түрлі мемлекеттік бағдарламалары аясында ұсынылған 44 жоба мақұлданып, 278,5 миллион. теңгеге қаржыландырылды.&nbsp;- Енді, биыл тұрғындардың сұранысына сәйкес жаңадан қоныстанған аумақтағы 32 көшеге электр желілері тартылады. Сондай-ақ, осы аумаққа ойын алаңы салынады деп жоспарлануда. Ал, округтегі 6 көшеге күрделі жол жөндеу жұмыстары жүргізіліп, 2 көшеге түнгі жарық бағаналары орнатылатын болады, - деді ауыл әкімі Нұрболат Бақытұлы.

Әлеуметтік ахуалы жақсы ауыл

<a href="https://kyzylorda-news.kz/">Kyzylorda-news.kz.</a>&nbsp; Өткен жылы Қызылорда қаласында 13 539 жаңа жұмыс орны ашылды. Жыл көлемінде қалалық мансап орталығына жұмыс іздеуші ретінде 22 442 тұрғын жүгінген болса, оның ішінде 16 954 азамат уақытша жұмысқа жолдама алды, 5478 азамат тұрақты жұмысқа орналасты. Бұл туралы қалалық жұмыспен қамту және әлеуметтік бағдарламалар бөлімінің басшысы Кенжегүл Құрақбаева айтты.– Мемлекет басшысының 10 мың адамға 100 жаңа жұмыс орнын ашу жөніндегі тапсырмасы аясында қалада 5 820 жаңа жұмыс орны ашылды. Ал, мүгедектігі бар адамдарды жұмыспен қамту бағытында 304 азамат тұрақты жұмысқа жолданды. Бас бостандығынан айыру орындарынан босатылған және пробация қызметінің есебінде тұрған 130 адам жұмыспен қамтылды, – деді Кенжегүл Құрақбайқызы.«2021-2025 жылдарға арналған кәсіпкерлікті дамыту жөніндегі» Ұлттық жоба аясында қысқа мерзімді кәсіптік оқытуға 25 азамат жолданды. Бағдарламаның екінші бағыты – «Жаңа бизнес – идеяларды іске асыру» бойынша 461 азамат мемлекеттік грантқа ие болған. Сондай-ақ, бағдарламаның үшінші бағыты – «Халықты жұмыспен қамтуға жәрдемдесу шаралары» бойынша қоғамдық жұмыстарға 3194 адам, әлеуметтік жұмыс орындарына 189 адам, жастар тәжірибесіне 1381 жас маман, «Алғашқы жұмыс орны» жобасымен 70 жас маман, «Ұрпақтар келісімшарты» жобасымен 4 адам, «Күміс жас» жобасымен 798 зейнеталды жастағы азамат жұмысқа жолданды.&nbsp;Айта кету керек, 6 136 адамға атаулы әлеуметтік көмек төленіп, 9 800 балаға қосымша төлем, 7 290 балаға жолда жүру ақысы аударылды. 1 061 адамға тұрғын үй көмегі көрсетілді. Жекелеген санаттағы әлеуметтік қолдауды қажет ететін 3375 адамға әлеуметтік төлем жүргізілді.&nbsp;Мүгедектігі бар тұлғаларды оңалту шараларын жүзеге асыру бойынша 1 топ мүгедектеріне 1139 жеке көмекші, есту кемістігі бар адамдарға 17 ымдау тілі маманы, 13 инватакси қызмет көрсетті. Үйде тәрбиеленіп және оқытылатын мүгедектігі бар 536 балаға әлеуметтік төлем жүргізіліп, 6199 мүгедектігі бар адамдарға гигиеналық құралдар мен техникалық-компенсаторлық құралдар сатып алынды. 1500 көпбалалы отбасыға «Мұз айдыны» және «Евразия» спорт кешеніне жолдамалар берілді. Демеушілер тарапынан 4227 отбасыға көмек көрсетілді.&nbsp;Белгілі тұрғылықты жері жоқ адамдардың уақытша болуына арналған бейімдеу орталығымен 143 қызмет алушыға арнаулы әлеуметтік қызметтер көрсетілді. Зейнеткерлерге жартылай стационарлық жағдайда әлеуметтік қызмет көрсету орталығымен 470 қызмет алушы ардагерге күнделікті арнаулы әлеуметтік қызметтер көрсетілді. «Отбасын қолдау» орталығы мамандарымен 1201 адамға кеңес беру жұмыстары жүргізілді.

Президент тапсырмасы: Қалада жаңа жұмыс орындарын ашу жүйелі жүргізілуде

<a href="https://kyzylorda-news.kz/">Kyzylorda-news.kz.</a>&nbsp; Өнер мен мәдениеттің ордасы саналатын Сыр өңірінде жалпы, өткен жылы 1389 мәдени-көпшілік іс-шара өткізілген. Оған 219 786 көрермен қамтылған. Бұқаралық спорттық іс-шаралардың күнтізбелік жоспарына сәйкес дене шынықтыру мекемелерімен, спорт мектептері және спорт клубтарымен бірлескен түрде 197 спорттық іс-шара өткізіліп, оларға барлығы 15 294 спортшы қамтылған. Мәдениет және спорт саласында атқарылған жұмыстар және алдағы міндеттер туралы қалалық мәдениет және спорт бөлімінің басшысы Жағыпар Тажмаханов айтып берді. Сала басшысының айтуынша, бүгінде мәдени-спорттық шараларды өткізуде оған қатысушылар мен көрермен қауымының қызығушылығы артқан. Әсіресе, үйірмелердің көптеп ашылып, оған оқушыларды тарту өз нәтижесін беріп келеді. Мәселен, Қызылорда қаласы бойынша қала орталығындағы және кент, ауылдық округтердегі клубтар мен мәдениет үйлер жанынан барлығы 89 үйірме жұмыс жасап, оған 1043 көркемөнерпаз қатысқан. Бұдан бөлек, кітапханаға келген оқырман сұранысын қанағаттандыру, сапалы қызмет көрсету мақсатында жүйеге қарасты 21 кітапханада 1801 кітап сандық форматқа көшірілген. Бұл да болса оқырманға заман талабына сай қызмет көрсетудің бір тетігі болып табылады. – Бөлімге қарасты Қажымұқан Мұңайтпасұлы атындағы спорт клубында 13 спорттың түрінен үйірмелер қала тұрғындарына ақысыз негізде қызмет көрсетуде. Жыл көлемінде, Қажымұқан Мұңайтпасұлы атындағы спорт клубының спортшылары Қазақстан Республикасы мен Азия чемпионаттарында және Әлем чемпионаттары мен кубоктарында 136 рет жеңіс тұғырына көтерілді, – деді бөлім басшысы Жағыпар Айтбайұлы. Сонымен қатар ерекше жандарды қолдау, қоғамға бейімдеу мақсатында физиологиялық ерекшелігі бар жандардың талантын шыңдау мен өнерін көпшілікке насихаттау үшін 2022 жылы үйірме болып ашылған инклюзивті театр бар-тұғын. Таталған театр облыс әкімдігінің қолдауымен өткен жылы Сәбира Майқанова атындағы мәдениет үйі жанынан инклюзивті театр болып қайта құрылды. Сондай-ақ, мәдениет үйінде «Сырлы саз» халықтық фольклорлық ансамблі қайта құрылып, ұлттық аспаптардың үнімен мерекелердің сәнін келтіріп, ұлттық мәдениетіміздің дамуына үлес қосуда. Ал, биылдан бастап «Жастар театры» өз алдына дербес мекеме болып құрылып, өз жұмысын жалғастыруда. Сонымен қатар, А.Тоқмағанбетов атындағы мәдениет үйінде «Сиқырлы айна» халықтық балалар қуыршақ театры, «Мереке» вокалды-аспапты ансамблі, Қызылжарма ауылдық клубында «Қожабековтер» жанұялық ансамблі халыққа мәдени қызмет көрсетуде еңбек етіп келеді. Айта кету керек, 2024 жылы тойланатын мерейтойлар аясында түрлі мәдени іс-шаралар ұйымдастыру жоспарға қойылған. Елдімекендердегі халықтың мәдени нысандарға қолжетімділігін арттыру, балалар мен жасөспірімдерді мәдени тәрбиемен қамту мақсатында «Адал адам» мәдени-тәрбие орталығы жобасы аясында түрлі бағыттағы мәдени-көпшілік іс-шаралар өткізілетін болады. &nbsp;

Мәдени-спорттық үйірме қатысушылары жеңіс тұғырынан көрініп жүр

&nbsp;<a href="https://kyzylorda-news.kz/">Kyzylorda-news.kz</a>. Әйел - нәзік жаратылыс иесі. Десе де, оның бітім-болмысы кез келген ердің ауыр жүгін көтеруге қауқарлы. Қазақта ерте жасынан еңбекке араласып, ерлермен бірге иық тіресе қызмет еткен әйелдер аз емес. Болмысынан мықты, қажырлы, бесаспап жанның бірі - Қазына Өзденбаева да бір бойына бірнеше талант жиған асыл жан. Жастайынан ауыр техникаларды тізгіндеген ол кейіннен қолына қалам алып, жұртшылықты керемет туындыларымен тебірентті. Ақындар айтысында да талай мықтыны аузына қаратып, елдің қошеметіне бөленді. Бүгінде 70-тің төріне шыққан еңбек ардагері немере сүйіп, бар білген қазынасын үйретіп отыр. &nbsp;Өңірлік коммуникациялар қызметінің ақпарат алаңына ҚР Журналистер одағының мүшесі, ақын, сатирик-журналист, еңбек ардагері Қазына Мералықызы қонақта болып, өзінің өмір жолын баяндап берді.<blockquote>– Өзім Жалағаш ауданының тумасымын. Біз бой жете бастаған шақта қыздардың барлығы дерлік техника тізгіндеді. Ол кезде облыста 85-ке жуық қыз-келіншек ерлермен бірге рөлге отырдық. Мектеп бітірген бойда көлік жүргізу мектебіп оқып, жүргізуші куәлігін алдым. Осылайша “Газ 51” деген көлікті жүргіздім. Арада 1-2 жыл уақыт өткен соң “Зил-130” маркалы ауыр жүк көлігін айдай бастадым. Алайда, бұл машинаға ауысу үшін өзімді өзгелерге дәлелдеу керек болды. Есімде, тыңның 20 жылдығына орай еліміздің түкпір-түкпірінен 2 700-ге жуық азамат Қостанай қаласына жиналдық. Сол жиналған 2 700 ер азаматтың арасында мен ғана жалғыз қыз болып бардым. Бұл менің көзсіз ерлігім еді. 19 жасымда осынша ер азаматпен үш ай бірге бидай тасып, талай жерді, орман мен көлді аралау екінің бірі бара бермейтін ерлік еді. Сөйтіп, аман-есен туған жеріме оралып, еліме қызмет етуді жалғастырдым. Сонау бір жетпісінші жылдары Жезқазған трассасында, Арал мен Ырғыз арасындағы жол құрылысына қатыстым. Тіпті, таңғы сегізден кешкі сегізге дейін сегіз тісі бар соқамен 15 гектар жерді жыртып, “комбайн” мен “касемсоттан” түспейтін күндерді де басымнан өткердім. Ал жасым отызға таяған шақта домбыра үйреніп, кейін “Жас жыраулар” мектебінде айтыскер ақындарды тәрбиелейтін жетекші ұстаз болдым. Әр жылдары “Ақмешіт ақшамы”, “Ақмешіт апталығы” газеттерінде сатира бетін жүргіздім. Поэзияны бала кезден серік етсем де, сатира өнеріне аяқ асты келдім. Десе де, бұл менің бағымды ашқан өнер болды. Бүгінде 3 ұл мен 1 қыздың аяулы анасы, немерелерімнің сүйікті әжемісін. Бүгінгі күнді пайдалана отырып, барша нәзік жанды аруларды келе жатқан мерекесімен құттықтаймын! Қазақтың батыр қыздары көбейе берсін, – деді Қазына Мералықызы.Фото: Қызылорда облысының Өңірлік коммуникациялар қызметі</blockquote>

Қазақстан және Қызылорда облысының жаңалықтары: Мәдениет