<a href="https://kyzylorda-news.kz/">Kyzylorda-news.kz</a>&nbsp; Ғасырлар мұңын, мұрасын бізге жеткізген қасиетті домбыра шын иелерінің қолынан әлі түскен жоқ. Қаны қазақтың рухын жанып, намысын қайрап, тіпті тамырынан қол үзіп кеткенді де төл табиғатына қауыштырар қасиетті қос ішектен төгілген күйдің құдіреті неде?Бағзы заманалар баянын ғана емес, тұлпар тұяғының дүбірін, құс қанатының суылын сұлу сазбен төгілдіргенде тұла бойыңды сағыныш кернеп, саф таза мөлдір сезімнің айдынында жоғалтқан аңсар тілегіңді жалғанның жарығына жарқыратып алып шыққандай салтанатты бір күйді бастан кешесің.Бұл сезім біздің бүгінгі кейіпкеріміз – жарты ғасыр ғұмырының саналы бөлігін қос ішектің қоңыр үнімен егіз үйлестіріп келе жатқан қазақтың талантты аруы – Аякөз Еркінбекқызының болмысымен етене өріліп, жұдырықтай жүрегіне жып-жылы сәулесін төгіп келе жатқаны қандай ғажап!Бала кезінен домбыра үніне құлағы қанық өсті. Атасы Нұрсұлтан аймаққа әйгілі Айсын күйшінің бауыры еді, кіндігінен өрген қос перзенті – Еркінбек пен Жарқынбегінің екеуіне де күйшілік өнер дарыған екен. Жарқынбек көкесінің концерттерде күй орындап жүретінін өзіміз де талай көрдік. Ол кісінің қаламгерлік те қабілеті бар еді, редакциямызға жиі соғып мақалаларын беріп тұратын. Өзінің жадынан шығарған бірнеше күйлері де бар. Аудандық мәдениет үйінде көп жылдар автоклуб меңгерушісі болып қызмет атқарған. Шынайы мінездің иесі екендігіне өз өмір жолынан өрген естелік кітабын оқығанда анық көз жеткізген жайымыз бар. Бәзбіреулер секілді қолдан бояуын қалыңдатып батыр атанып, ал жеке басының олқы тұсына келгенде жорта бұрып әкетер қулықтан ада, болған-біткен жағдайларды еш бүкпесіз жайып салған ақеділ пейілінен шынайы бекзаттықты танығандай болғанбыз. Өкініштісі сол, бұл екі кісі де қазір арамызда жоқ.Айсынның ұрпақтарынан әке есімін көпке танымал еткен Бәден Айсыновтың орны бір төбе. Ол күні бүгінге дейін өзінің туып-өскен, өркен жайған атамекені – Жаңақорғанның тау жақ беткейінің талапты өрендерін биік мәртебелі өнерге баулып келеді. Бұдан бөлек Бәденнің жетекшілігімен құрылған отбасылық ұлт-аспаптар ансамблінің профессионалдық әлеуетінің бекемдігі, жанрының күрделілігімен көрерменге таза да, тәкаппар өнердің әлемдік жауһарларын да молынан тарту етіп келе жатқанын айта кеткеніміз жөн.Міне, осынау таланттар тұқымынан өрген, ізінен ерген, бала кезінен өнер жолына түсіп, академиялық білім алған, бүгінде бабалардың киелі мұрасын зерттеумен айналысып келе жатқан Аякөз Еркінбекқызымен жақында Жаңақорғанға келген сапарында сұқбаттасудың сәті түсіп, бір ғанибет күйге бөлендік.«Шерлі», «Терісқақпай», «Егес», «Отарба», «Аққу кеткен» сынды күйлерімен күні бүгінге дейін тыңдарман жүрегін бірде қоңыр мұңға, бірде тылсым сырға бөлесе, бірде тәтті қиялыңды көкке шарықтатар қуатына бас идірген Әлшекей әлеміне терең бойлауға екінің бірі тәуекел ете бермесе керек. Мне , осындай таудай талапқа тәуекел еткен қаракөзді талант құдіретімен табыстырған рух бірлігі десек болады. Бірі ХХ ғасырдың басында «бай-дәулеттінің ұрпағы» деген желеумен қуғын көріп, басына қатер төнген соң қашып-пысып, туған жерден жырақта сағыныштың зарлы үнін қос ішекке төгумен өткен мұңлық та, бірі ХХІ ғасырдың жаһандық білім деңгейімен қаруланған, міне, сондықтан да қызмет бабымен мұхит асып, бөтен мемлекеттің жерін басып, мәмілегерлік миссиясын орындап қайтқан азат елдің еркін ұланы. Бірақ екеуін байланыстырып тұрған киелі сезім – туған топырақты аңсаған ғазиз жүректің сағынышы еді. О, оны енді тілмен айтып жеткізу мүмкін емес екен, бірақ әруақты бабаның шерлі кеудеден лықсып төгілген шертпе күйі мен төкпе күйінің әрбір үзігін көңілмен түйсініп, табиғатын сүйегінен өткізген танакөз Әлшекей күйшіні тереңірек зерттеу талабына осы кездерден бастап басыбүтін ден қойыпты.Сұхбаттасымыздың өмір жолына аз-кем тоқталып өтсек, ол былай өріледі.Тоқсаныншы жылдары Талап ауылындағы №54 орта мектебін оқып тәмамдаған жас жүрек қалауы¬мен Қызылорда қаласындағы Қазанғап атын¬дағы музыкалық колледждің домбыра класында оқиды. Одан әрі Құрманғазы атындағы Қазақ Ұлттық консерваториясында білім алады. Оқуды бітірген соң институт қабырғасына қызметке орналасады. Оған қоса Қазақ радиосында «Баба мұра-сы» бағдарламасын жүргізеді. Осы кездері оның өзінің де есімі танымал бола бастаған. Республикалық Дина Нұрпейісова атындағы конкурстың жүлдегері, «Шабыт» шығармашыл жастар сайысының лауреаты атанады.2002-2008 жылдар аралығында Астана қаласындағы Л.Н.Гумилев атындағы Еуразия өнер университетінің арнайы шақыртуымен «Дәстүрлі музыкалық өнер» кафедрасында аға оқытушылық қызметке кіріседі. Осында жүргенінде «Қоңыр қаз» ансамблінің қазығын қалайды. Ерінің қызмет бабымен Иран мемлекетінде жүргенінде Қазақстан елшілігінің бүкіл мәдени шараларында ұлт өнерін жарқыратып танытуға тер төкті. Бүгінде Қазақ Ұлттық Өнер университетінде мектеп және колледж бөлімінде дәріс беріп келе жатқанын айтты.Аякөз Бақдәулет, Бақжан, Айару атты үш перзенттің анасы. Ері Дәуірбек Дүйсебай Әл-Фараби атындағы КазҰУ-ның түлегі. Шығыстану факультетінде парсы тілі мамандығын бітірген. Профессор Дандай Ысқақұлының жетекшілігімен Мұхтар Әуезовтің «Абай жолы» романының парсы тіліне аударылуын зерттеп, кандидаттық диссертациясын қорғаған. Астанадағы ұлттық академиялық кітапханада «Дүр дүниенің парасат тәжі» деп аталатын шығармашылық кеші өтіп, онда Дәуірбектің «Оянып кеткен ақ сәуле» деп аталатын жыр жинағының тұсауы кесілген екен.Он төрт жыл Иран мемлекетінде елшілік қызметте болған Дәуірбек пен Аякөздің перзенттері осы мемлекетте өмірге келді. Жары Аякөз ұлт мұрасының нағыз жоқшысы, жанашыры ретінде қызметін бұл жаққа келген соң да жалғастыра берді. Иран қазақтарына туған ұлтымыздың асыл құндылықтарын насихаттап, қазақтың домбырасының сан құраулы күмбірімен мыңдардың жан тереңінде түюлі жатқан шерлі тарихына сәуле жүгіртті. Талайлардың жүрегін шуаққа бөлеп, көңілдерін қанаттандырды. Бұл жылдар Аякөздің жеке шығармашылығына салмақты ой дарытқан, тұлға ретінде есейтіп, елдік мінезге тәрбиелеген тағылымымен де қымбат.Атамекеннен жырақта жүргенінде туған жерді, ата-ана мен бауырды жан жүрегі езіле еске алғанда бір заманда еріксіз қуғын көріп, бас амандығы үшін тау-тас кезіп шеккі ғұмыр кешкен баба тағдырына шынайы бас иген. Әлшекейдің шерлі көкірегінен құйылған күй ырғағының қылдай қағысынан, үзік дірілінен сағынышқа толы өз жүрегінің үнін танып, Әлшекей күйлері туралы толғанысты ойлар қаламұшына қиналыссыз орала бергенін айтады өзі.Ол бұдан бөлек «Ақбаламен шағдардың күйлері» атты кітаптың авторы. Бәден Айсыновтың күйлері туралы жазылған «Күй-көмбе» кітабы да жарық көрді.Осыдан үш жыл бұрын Жаңақорған ауданында Әлшекей Бектібайұлының 175 жылдығына орай М.Көкенов атындағы мәдениет үйінде ғылыми-танымдық конференция, орталық алаңда “Ақжелең” фестивалі өтті. Дәулескер күйшіге ерекше баға берілген осы жиынды өткізуге сол кезде Жаңақорған ауданының әкімі ретінде өзі ұйытқы болған Руслан Рүстемұлы осы шараға Иран елінен Аякөз Нұрсұлтанды арнайы шақыртқан болатын. Осы күні Аякөздің “Әлшекей күйші” кітабының және оның аудионұсқасының тұсауы кесілді. ҚР Сенаты депутаты, қаламгер Руслан Рүстемұлы «Парсы еліндегі парасат елшісі» жазбасын жариялағанда оның осындай қырына жан-жақты тоқталып өтіпті. Жақында Жаңақорған ауданындағы Әлшекей атындағы өнер мектебінде республикалық «Күй – көмбе» атты жас домбырашылардың байқауы өтті. Бұл шараны Әлшекей Бектібаев атындағы қордың президенті, күйшінің немересі Оңғарбай Дәнебеков ашып, аталған шараның мән-маңызына тоқталды.Жалпы осы байқаудың ұйымдастырылуына ұйытқы болған Аякөз Еркінбекқызы екенін айта кетсек артық емес. Байқауға қатысушылар тек қана Әлшекейдің күйлерін орындады.Әлшекей Бектібаев атындағы республикалық конкурсқа Қызылорда, Түркістан қалаларынан және Шиелі мен Жаңақорған ауданынан 60-қа жуық өнерпаз қатысып, бақ сынады. Олардың арасында орыс, өзбек ұлты өкілдерінің де болуы таңданарлық.Сайысқа қатысушыларға Әлшекей Бектібайұлының бейнесі арнайы соқтырылған медальондар табыс етілді.Өнер байқауына Қазанғап атындағы Қызылорда музыкалық колледжінің ұстазы, «Ерен еңбегі үшін» төсбелгісінің иегері Әлімжан Нағызханұлы, республикалық Дина Нұрпейісова атындағы күйшілер сайысының жеңімпазы Нұрсұлтан Аякөз қазылық етті.Сайыста кіші топтан Қызылорда қалалық өнер мектебінің оқушысы Жүсіпбек Бақдәулет (ұстазы Серікбай Дәулет) бас жүлдені иеленді.Орта топ номинациясы бойынша бас жүлдені Қызылорда қаласы №278 ІТ мектеп лицейінің оқушысы Жаңабай Абылай иеленді. Үлкен топ, яғни 15 пен 18 жас аралығындағы үміткерлер арасында бас жүлдені Түркістан қаласы "Ақжайық" музыкалық мектебінің оқушысы Ибадулла Тұрлыхан иеленді. Жүлдегерлер келесі күні өткен Аякөз Нұрсұлтанның шығармашылық кешінде өнер көрсетті.Туған жерге осы сапарында Аякөз Еркінбекқызы Жаңақорған ауданының ең үлкен марапаты “Құрмет грамотасымен” марапатталды. Баян ҮСЕЙІНОВА

Рух бірлігі және күй құдыреті

<a href="https://kyzylorda-news.kz/">Kyzylorda-news.kz</a> Әйтеке би кентінде тұратын Әлімжан Қияс аймақтық «Тұран Қазалы», аудандық «Қазалы» газетінде тілші боп істеген. Әлі де қолынан қаламын тастамай, көңілін мазалаған түрлі ой-толғанысын қағаз бетіне түсіруден жалыққан емес. Жақында оның аудандық, облыстық басылымдарда жарияланған жазбалары Қызылорда қаласындағы «Арал‒пресс» баспасынан «Жақсы сөз» деген атпен кітап болып жарыққа шықты. Жинақтың құрастырушы-редакторы «Сыр бойы» газетінің жауапты хатшысы, танымал журналист Дәуіржан Елубаев.Онда қайнаған өмірдің көлеңкелі, күнгей тұстары ой сүзгісінен өткізіліп, таразыланып, терең мағыналы толғамдар көптің назарына ұсынылған. Сырлы сөзбен көмкерілген әрбірі оқырманын бейжай қалдырмайды. Мәселен, «Арманы асқақ Айнұр», «Талаптының балғасы тасқа шеге қағады», «Жан жарасы» &nbsp;атты туындыларын оқырман көңілін толқытарлық дүние десек, жарасады. Кейіпкерлері тағдыр теперішіне мойынсынбай, дана Абайша айтсақ, адал еңбекпен мал іздеген, арды ойлап, қоғам мен отбасына пайда келтіріп жүрген қарапайым жандар. Ал, «Сана серпілісі» атты ойтүрткісінде қоғамдық сананы өзгертуге байланысты тұжырымдарын ғылыми және діни пәлсапа арқылы жеткізуге ұмтылады. Қорытындысында уақытша кідіріске ұшырап тұрған бұл дағдарыстың болашақта соны серпін аларына салмақты сенім артады.«Тәңірім тоқшылықпен сынамасын» деген әңгімесі ашаршылық нәубетінде аштан өлейін деп жатқан ақсақалдың: «біздің мұндай жағдайда жан беріп жатқанымызға Аллаға шүкір, кейінгі ұрпағымызды тоқшылықпен сынамаса екен» дегенде, қасында дәл сондай күйге түскен екінші кісі: «не айтып жатырсыз, аштан өлгеннің несі жақсы?» депті. Сонда ақсақал: «Алла бізді аштықпен сынап жатыр, мен кейінгі ұрпағымыз тоқшылықпен сыналып, Құдайын ұмытып кете ме деп қорқамын» деген екен деп түйінделеді. «Қазақты қайыстырған қасірет» атты жазбасы да, 1931-1933 жылдардағы ашаршылықтың ащы шындығын ашады.Әлімжанның мұнан кейінгі «Қазынаны қастер тұтайық», «Ұяда не көрсе, ұшқанда соны іледі», «Тәрбие тетігі талбесіктен», «Ниет түзулігі» секілді мөлтек әңгімелері ұтымды сюжеттерімен баурап, кім-кімнің де, сезім иірімдерін селт еткізеді. Күнделікті өмірде кездесетін түрлі жағдаяттарды көз алдыңа әкеліп, жақсысынан үйреніп, жаманынан жиренуге шақырады.Жанына қаламды серік қылып, ерінбей еңбек етіп жүрген қаламгерге қолдау көрсетіп жатқан азаматтарға шынайы пейілмен алғаусыз алғыс білдіріледі. Қанат – ұшса қатаяды, оқырмандар олжасына айналған тұңғыш кітабы құтты болсын. Шығармалары сұраныста болып, көптің көзайымына айналатын туынды қатары артуына септігі мол.

«Жақсы сөз» кітабы жарыққа шықты

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Театр әлемі – шығармашылықтың ең биік көрінісінің бірі. Бұл өнердің өркендеуінің қайнар көзі – жас артистер мен олардың болашаққа сенімі. Антон Чехов айтқанындай, театр – бұл тірі өнер, ал жастар – оның болашағы. Бұл сөздер қазіргі уақытта да өз маңыздылығын жоғалтқан жоқ.</h4><h4 style="margin-left:0px;text-align:justify;">Зарина Ерболқызы– Шиелі ауданы Сұлутөбе ауылының тумасы. Бала күнінен-ақ Голливуд жұлдыздарын үлгі тұтып, соларға қарап, болашақта өзінің де актриса болғысы келетінін сезген сияқты. Осы арман оны Қожа Ахмет Яссауи атындағы халықаралық қазақ-түрік университетіне алып келді. 2023 жылы актерлік мамандықты аяқтап, бүгінде Қызылорда қалалық жастар театрында еңбек етіп жүр.</h4><h4 style="margin-left:0px;text-align:justify;">Зарина үшін өнер жолы – оның жанына жақын, үлкен құштарлықпен таңдаған мамандығы.</h4><blockquote><h4 style="margin-left:0px;text-align:justify;">– Өнер жолын шын жүрегіммен таңдағандықтан алдымнан қандай тосқауыл кездессе де оны қиындық ретінде қабылдамаймын. Қойылымнан кейінгі көрермен қошеметі мен қолдауынан кейін барлығы ұмытылып кетеді, – дейді жас артист.</h4></blockquote><h4 style="margin-left:0px;text-align:justify;">Зарина сомдаған рольдерінің барлығы жанына жақын екенін айтады. Әсіресе, зұлым адамдарды сомдағанды немесе комедия жанрындағы қойылымдарда ойнағанды ерекше ұнатады.</h4><blockquote><h4 style="margin-left:0px;text-align:justify;">– Өзіме тапсырылған рольдерді табиғи болмысыммен үйлестіріп ойнаймын. Сондықтан көңілімнен шықпай қалған роль болмапты, – дейді ол.</h4></blockquote><h4 style="margin-left:0px;text-align:justify;">Жас артисттің болашақ арманы – өзі үлгі тұтатын жұлдыздармен бір кинода ойнау. Сонымен қатар Заринаның алға қойған мақсаттарының бірі – Қызылорда жастар театрының атын шығарып, оның дамуына үлес қосу.</h4><h4 style="margin-left:0px;text-align:justify;">Зарина Ерболқызы сияқты жас таланттар театр өнерінің болашағына сенім ұялатады. Олардың шығармашылық табыстары мен талпыныстары жастар театрының өркендеуіне ықпал етері сөзсіз.</h4>

Зарина Ерболқызы: Көңілімнен шықпай қалған роль болмапты

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Биыл қазақ тілді КВН-ге 25 жыл. Жайдарман сахнасында бір емес, бірнеше ұрпақ өсіп-жетілді.Олар тек әзіл, продакшн және креативті индустрия да ғана емес, сонымен қатар маркетинг, мемлекеттік қызмет саласында өздерін танытып жүр.</h4>Осы екі онжылдықтың ішінде Жайдарман креативті индустрия үшін жаңа талант иелерін дайындайтын әлеуметтік лифтке айналды. Жас командалар мен шығармашыл топтар тек медиалық танымалдылыққа ие болып қана қоймай, сонымен қатар шығармашылық тұрғыдан қалыптасуға қажетті дағдылар мен нетворкингке ие болды. Нәтижесінде, Жайдарман түлектері еңбек нарығындағы мамандар ретінде сұранысқа ие болады (актерлер, сценаристер, режиссерлер және т.б), сонымен қатар шығармашылық салада олар фильмдерді, YouTube жобаларды, телешоулар мен комедияларды, музыкалық жобаларды қамтитын жаңа коммерциялық жобаларды жасайды.Жуырда Қызылордада облысы әкімінің жүлдесіне арналған республикалық жайдарман фестивалі өтті. Фестивальге әр өңірден 13 команда қатысып, ойын үздіктері белгілі болды.&nbsp;«Қазақстан КВН Одағы» Республикалық жастар қоғамдық бірлестігінің Президенті Есен Елеукен тізгіндеген бұл кеште Қызылорда облысының қоғамдық даму басқармасының басшысы Алмасбек Есмаханов, Қорқыт құрамасы» КВН командасының белді ойыншысы Асылхан Дүкенбаев, «Арал АС» КВН командасының капитаны Төребек Дәрмағамбетов, ПТК арнасының продюсері Ғани Абдиев, Жайдарман жанашыры, жас кәсіпкер Ұлағат Қайратұлы, жас кәсіпкер, инновациялық «АРАЛҒА ЖАҢБЫР» жобасының&nbsp;авторыАлтайАйнабек төрелік етті. Қазылар алқасы жеңімпаздарға аймақ басшысының кубогын, сондай-ақ 1 млн, 500 мың, 300 мың және 100 мың теңге көлемінде ақшалай сыйақы табыстады.&nbsp;Ойын нәтижесі бойынша «Краш» құрамасы (Астана қаласы) чемпион атанып, «Алатау SU» құрамасы (Алматы қаласы) – IIорын, «Ассамблея» құрамасы (Қызылорда қаласы) – III орынды қанжығалады. Сондай-ақ ойынның үздік ойыншысы Жігер Жаирбай (Алатау SU құрамасы) 100 мың теңге ақшалай сыйлыққа ие болды.&nbsp;Сонымен қатар жайдарманшылар Жалағаш ауданына барып, аудан тұрғындарына көтеріңкі көңіл күй сыйлады. Өнер көрсеткендер арасынан Талант (Орал қаласы) – I орын, Ақпен бірге – II орын, ал Алмаз (Қарақалпақстан) III орынды иеленді. Топ жарғандарға дипломдар мен ақшалай сыйақы табысталды.&nbsp;&nbsp;Қорлан САРЫ Фото: kzvesti.kz

Қызылордада республикалық жайдарман ойындары өтті

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Сырдария ауданының мәдениетін дамытуға барынша үлес қосып, талай облыстық, республикалық байқауларда топ жарып, биік белестен көрініп жүрген талантты да дарынды жастарымыз аз емес. Сырдария ауданында өткен Мемлекеттік рәміздер мерекесіне орай аудандық айтулы іс-шарада облыс әкімі Н.Нәлібаевтың Алғыс хатымен марапатталған талантты азамат Абылайхан Қилымханов шәкірті Дінмұхаммед Алмасұлымен бірге Қармақшы ауданында өткен «Қорқыттан қалған қоңыр үн» атты облыстық дəстүрлі өнер байқауында бас жүлде иегері атанып, аудан мерейін асырды.</h4>Білікті маман Абылайхан Қилымхановтың өнері мен шығармашылығы Сырдария ауданының жұртшылығына етене таныс. Ол ең алғаш 2006 жылы Сырдария аудандық өнер мектебінің домбыра сыныбына барып, ұстазы Марат Сәдуақастан тәлім алған. «Ұстаздан шәкірт озар» демекші, талантты азамат ұстазынан алған білімінің арқасында киелі домбыраның қыр-сырын меңгеріп, құлағында ойнайды. Өнер мектебінде оқи жүріп, аудандық, облыстық, республикалық және халықаралық байқауларға қатысып, жүлделі орындарды иеленді. Облыстық «Бозторғай» байқауына қатысып, бас жүлде иеленсе, Атырау қаласында өткен республикалық «Махамбет күйлерінен» өткізілген домбырашылар байқауында жүлделі ІІ орынды қанжығасына байлаған. Одан бөлек Ақтөбе қаласында өткен «Бақыт Басығараев» республикалық күйшілер конкурсында лауреат атанып, Астана қаласында ұйымдастырылған «Қос-ішек» домбырашылар байқауында арнайы жүлде иегері атанған. Дарынды өнер иесінің бұдан да бөлек жеткен жетістіктері жетерлік.Домбыраның құлағында ойнайтын Абылайхан бүгінде аудандық өнер мектебінде домбыра пәнінің ұстазы және мәдениет үйінде «Ритм» ансамблінің жетекшісі болып қызмет атқарады. Білікті маман өзінің еңбек жолында көптеген шәкірт тәрбиелеп келеді. Өнерпаздың талантты шәкірттерінің жетістіктері жетерлік. Солардың бірі – облыстық күйшілер конкурсының жүлдегері Дінмұхаммед Алмасұлы.<blockquote>– Биыл 8 сыныпты аяқтаған Дінмұхаммед – менің талантты, ерекше дарыны бар мықты шәкірттерімнің бірі. Домбыра сыныбында білім алатын ол көптеген байқауда топ жарып, аудан намысын қорғап келеді. Бүгінде шәкіртімнің жарқын жетістіктерін зор мақтанышпен айтамын. Алматы қаласында өткен халықаралық «Бозторғай» байқауында бас жүлде иегері атанып, Астана қаласындағы республикалық «Абыз домбыра» өнер сайысында екінші орынды иеленді. Өзінің бойындағы ерекше талантымен талайды тамсандырған ол жақында Қармақшы ауданы әкімдігінің, мәдениет және тілдерді дамыту бөлімінің ұйымдастыруымен «Қорқыттан қалған қоңыр үн» атты байқауда бас жүлде иегері атанып, аудан абыройын асқақтата түсті. Талабы таудай шәкіртімнің бұл жеңісі еңбегімнің жемісі деп білемін. Дінмұхаммед болашағынан зор үміт күттіретін жас өнерпаз. Талантты өнерпаздың болашақта биік белес пен шыңдардан көрінуіне зор сенім мен үміт артамын, – дейді Абылайхан.</blockquote>Аудан өнерін алға жетелеп, талай талантты жастың шығармашылығын шыңдап жүрген білікті маманның еңбегі әркез бағалы. Жаңашылдықтың үлгісін көрсетіп, қазақтың киелі домбырасын дәріптеп жүрген жас талант иесі мен шәкіртінің жеңісі бүгінде көпке үлгі.&nbsp;Өнерлі жас – еңселі ел ертеңі екені айтпаса да түсінікті.

Өнерлі жас – еңселі ел ертеңі

Қазалы: Оқушылар үйінің жұмысы жандануда

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Қазақ музыкасын зерттеуші атақты сазгер, дирижер Ахмет Жұбанов «Музыка адамның ішкі жан дүниесін байытып, әр дәуірдегі қоғамдық өмірдің түрлі құбылыстарын дұрыс түсінуге көмектеседі» деген екен. Бұл пікірді «Ел іші – өнер кеніші» деп қуаттай түсуге болатыны рас. Бұл орайда Шаған ауылдық өнер мектебінің өрісі кеңейгенін, Ақжарма ауылында филиалының ашылғанын оқырман қауымға сүйіншілеп хабарлауды жөн көрдік.</h4>Бірден айта кетейік, Шаған ауы­лындағы өнер мектебінің Ақжар­мадағы филиалын ашуға ұлағатты ұстаз Қынаш Әуелбекова себепкерп атанған. Ардагер облыс әкімі Н.Нәлі­баев­тың қабылдауында болып, өз ұсынысын жеткізген. «Мақсатым – өнерге құштар ауыл балаларына қолдау көрсету еді» дейді білім сала­сының ардагері.<blockquote>– Аймақ басшысы өңірдің өнер, мәдениет, білім саласына ерекше мән беруде. Биылғы жылдың «Руханият жылы» деп жарияланғаны да терең ізденістің, жанашыр көз­­қарас­тың жемісі. Осы ретте, Нұрлыбек Машбекұлының қабыл­дауында болып, ауылымыздан өнер мектебінің филиа­лы ашылса деп ұсынысымды айттым. Аймақ басшысы өз қажет­тілігім­ді емес, қоғам мүддесін көтер­геніме назар аударып, қолдау білді­ретінін, ұсыныс орындалатынын айтты. Бұл өнерге құштар, талапты, талантты ауыл балалары үшін ерекше сый болды, – дейді Қынаш Әуелбекова.</blockquote>Жақында өнер мектебінің Ақжарма ауылдық филиалының өнер­­паздары көрермен қауымға ар­найы концерттік бағдарламасын ұсынды. «Өнерге қанат қаққандар» атты іс-шараға аудандық білім бөлі­мінің әдіскері Ғ.Бақтиярова, Шаған өнер мектебінің директоры Д.Әлиев және ауыл тұрғындары қатысқан болатын. Іс-шарада ауыл өнер­паздары әуе­лете ән шырқап, мың бұрала биледі. Өнерлі өрендер сондай-ақ түрлі аспаптарда ойнап, көрермен қауымға көтеріңкі көңіл-күй сыйлады. Концертте Өнер мектебінің Ақжарма ауылдық филиалының ашы­луына ұйытқы болған Қынаш Әуелбековаға аудандық білім бөлімі бас­шысының, кәсіподақ комитеті төрағасының Алғыс хаты беріліп, сый-құрмет көрсетілді. Сәні мен салтанаты жарасқан іс-шарада ардагерлер сөз сөйлеп, тілектестігін білдірді.Айта кету керек, жаңадан ашыл­ған филиалда домбыра, би, баян үйірмелері жұмыс істеуде. Онда 50-ге жуық бала білікті ұстаздардан өнердің қыр-сырын меңгеруде.

Ақжармада өнер мектебінің филиалы ашылды 

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Классик жазушы Ғабит Мүсірепов «Біреулерді қызмет көріктендірсе, енді біреулер қызметке көрік береді» демекші, Құндызай Бажиева – ауыл мәдениетінің дамуы мен өсіп-өркендеуіне өз үлесін қосып жүрген білікті маман саналады. Жауапкершілігі мол саланың 10 жыл қазанында қайнаған қызметкер Жетікөл ауылдық клубында мәдени ұйымдастырушы қызметін атқару үстінде.</h4>Қызметте сан алуан бағытты үйлестіре білген Құндызай Мұқанбетқалиқызы Қызылорда қаласына қарасты Маханбет ауылының тумасы. Өз ауылындағы №143 қазақ орта мектебінде біліп алып, кішкентай кезінен өнерге әуес болғаны елге белгілі. Мектепті бітірген соң «Болашақ» колледжінде оқып, қазақ тілі мен әдебиеті пәнінің мұғалімі мамандығын игеріп шыққан. Қазіргі таңда өнерге жаны жақын жан «Болашақ» университетінен «музыкалық білім» мамандығы бойынша білімін шыңдау үстінде.<blockquote>– 2014 жылы ауылдық клубқа мәдени ұйымдастырушы қызметіне орналасқан болатынмын. Әр мамандықтың өз қиыншылығы болады демекші, ұйымдастырушылық қызметтің жауапкершілігі басымырақ саналады. Мәдени көпшілік іс-шараларды үйлестіру тың идеяларды, әсемдікті, жан-жақтылықты, ең бастысы жауапкершілікті талап етеді. Себебі өткізілетін әрбір іс-шараға қатысатын өнерпаздармен тығыз байланыста болу, олардың сахналық киімін әзірлеу, реттілігін қалыптастыру, сахнаның безендірілуін ұйымдастыру, көрермен көңілінен шыға білу өте маңызды жауапкершілік жүктейді. Әрине көрермен көңілінен шығу оңай емес. Осындай сәттерде үлкен буынның айтқан ақылына, тәжірибесіне сүйенеміз, Сахна өнерпаздарымен жұмыс жасағандықтан қызықты жағдайлар көп болады, – дейді білікті маман.</blockquote>Қашан да үлкен мен кішінің көңілін таба алатын жан «Көркем сөз» үйірмесінің жетекшісі. Аудандық, облыстық, республикалық байқауларда жоғары деңгейде шәкірт дайындап, жас дарындардың өнерін шыңдауда жеткен жетістіктері жетерлік. Атап айтқанда, халықаралық «Ақ көгершін» конкурсының «Үздік ұстаз» дипломымен, облыстық «Бозторғай» балалар шығармашылық байқауына көркем сөз жанры бойынша жоғары деңгейде шәкірт тәрбиелеу жолында қосқан үлесі үшін арнайы алғыс хатпен марапатталды.<blockquote>– Алғаш жұмысқа орналасқан сәт­тен бастап «Көркемсөз» үйірмесін ашып оқушылармен жұмыс жасадым. Үйір­менің басты мақсаты – балаларды өлеңді мәнерлеп оқуға, көпшілік алдында ойын еркін жеткізуге, сахнамен жұмыс жасауға үйрету. Оқу­шылар аудандық, облыстық, республикалық байқауларға қаты­сып, жүлделі орындардан көрініп жүр. Баланың көңілі өте нәзік. Сондықтан баламен бала болып, олардың көңілін табуға тырысамыз, – дейді Құндызай Бажиева.</blockquote>Мәдениет саласында қа­жырлы еңбек етіп келе жатқан маман бүгінде қызметімен қатар отбасын алып жүрген сүйікті жар, аяулы ана. Өсіп- өнген әулетке келін болған Құндызай жұбайы Шаттық Камаловпен 1 ұл, 1 қыз тәрбиелеп отыр.«Қай елдің мәдениеті дамыса, сол елдің еңсесі де биік болады» демекші, осындай білік­ті мамандардың арқасында ауыл мәдениеті өркендей бермек.Таңшолпан ШАНЖАРХАНОВА

Құндызай Мұқанбетқалиқызы: Әр мамандықтың өз қиыншылығы болады

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Сырдария ауданынан шалғайда орналасқан Жетікөл ауылының тарихы тереңде жатыр. 1945 жылы соғыс аяқталғаннан кейін 1946 жылдың күз айын­да Маңабай көлінің жағасына №10 еңбекпен түзеу колониясы көшіп келген болатын. Ал 1949 жылы құрылыс қарқын алып, көктем шыға жаңа үйлер бой көтеріп, клуб, монша салынып халыққа қызметін бастаған екен. Негізінен, 1957 жылдың күзінде колония Қызылорда қаласына көшіріліп, желтоқсан айынан бастап облыстық атқару комитетінің сауын фермасы болып ашылғаны белгілі. Колониядан қалған клуб ғимараты тозығы жетіп, 1992 жылдары бұзылып кетеді.</h4><blockquote>– Бала күнімізде ауылдағы клубтан Дахир Наурызбаев дыбыс күшейт­кішпен «Бүгін совхоздың клубында екі сериялы үнді фильмі болады, келіп, тамашалаңыздар» деп хабарландыру айтып жататын. Ауылдың тіршілігі белгілі сол кезде кешке дейін шаруашылықтың жұмысында жүрсе де, кешке киноға барып апаларымыз ағыл-тегіл жылап отырып, кино көріп, түрлі мәдени іс-шараларға қатысуға уақыт табатын. Жастайымыздан өнерге құштар болып, 1996 жылы №174 орта мектебін бітіріп, сол жылы Қызылорда қаласындағы Қорқыт ата атындағы мемлекеттік университетінде «Музыка және ән айту» мамандығы бойынша білім алып, 2000 жылы тәмамдадым. 2000 жылы Отан алдындағы борышымды өтеуге әскерге кеттім. 2001 жылы сол кездегі облыс әкімінің қолдауымен 1982 жылы салынған шаруашылықтың балабақша ғимаратын ауылдық клубқа лайықтандырып, жөндеу жұмысын жүр­­гізіп, ашып берді. Ауыл­дық клуб­­тың меңгерушісі Нұржамал Сәрсенбаева болды. Ауыл көркемөнерпаздарынан ойын-сауық концертін ұйымдастырып, көрші ауылдарға гастрольдік сапармен өнер көрсетті, – дейді ауылдық клуб меңгерушісі, жыршы-термеші Алмат Өтеуов.</blockquote>Жетікөл ауылдық клубында 7 штат бірлікпен 9 қызметкер жұмыс істейді екен. Олардың қатарында әдіскер Ерлан Білманов, мәдени ұйымдастырушы, көркемсөз оқу үйірмесінің шебері Құндызай Бажиева халыққа мәдени қызмет көрсетіп келе жатқаны мәлім.Биыл ақын, халықаралық «Алаш» әдеби сыйлығының иегері Ибрагим Исаевтың туғанына 75 жыл толуына орай «Елге сапар» атты аудандық әншілер байқауы өткізілген. Байқауға 9 талапкер қатысып, қазылар алқасының төрайымы, сазгер, облыс­тық халық шығармашылығын дамыту продюсерлік орталығының мәдени қызмет­кері, мәдениет қайрат­кері Алтын Бекенова бастаған қазылар алқасы бас жүлдені Қоғалыкөл ауылынан қатысқан Қайрат Сәтбаевқа берсе, бірінші орынға жетікөлдік Дана Райқанқызын лайық деп таныды. Айту керек, әншілер ақын әндерін халыққа кеңінен насихаттады.<blockquote>– Мүмкіндігінше осы елге еңбегі сіңген ел ағаларының еңбек жолын жас ұрпаққа насихаттау мақсатында дәстүрлі түрде «Еңбегі елге сіңген ел ағалары» атты еңбек ардагерлермен кездесу кешін өткізіп келеміз. Іс-шараға тыл ардагері Ералы Бұрханов, ардагер-ұстаз Әзімхан Жүнісов, Зұлыпһар Бердібеков, Отан Сағындықов, совхоз директоры қызме­тін атқарған Жарылқасын Камалов шақырылды. Ардагерлердің еңбек жо­лы насихатталып, құрмет көрсетілді.</blockquote>Сонымен қатар Сыр сүлейі Омар Шораяқұлының туғанына 145 жыл толуы­на орай «Сөйле, тілім жосылып» атты аудандық термешілер бай­қауы болып өтті. Байқауда Омар Шораяқұлының шығармасынан бір шы­ғар­­ма орындау және Сыр сүлей­лерінің бір шығармасын орындау шарты қойылды. Қатысушы талап­керлердің арасында өзім де болып, Омар Шораяқұлының бай мұрасын көрер­менге ұсына білдік. Бұл жұмысты алдағы уақытта да жалғастырамыз, – дейді ауылдық клубтың меңгерушісі.Ауылдық клубта ән, көркем сөз, жыр-терме үйірмесі жұмыс жасаса, 2022 жылдан бері «Сұлу-ай» шы­ғар­­машылық өнер орталығының қол­­дауымен «Эстрадалық вокал» және «Ұлттық би» үйірмесі ауыл бала­­лары­ның өнерге бет бұруына өз үлесін қосып жұмыс атқаруда. Үйірме өнерпаздары халықаралық, республикалық, облыстық, аудандық байқауларда топ жаруда.Биыл ақпан айынан бастап «Адал адам» мәдени-тәрбие орталығы тұжы­рым­да­масы аясында 7 бағыт бойынша түрлі мәдени іс-шаралар өткізуді қолға алған. «Менің атым – Қожа», «Балуан Шолақ», «Тақиялы періште», «Қыз Жібек» секілді қазақтың құнды дүниелері көрсетіліп, насихатталған.<blockquote>– Алға қойған мақсатымыз – ха­лық­қа мәдени қызмет көрсету. «Сыр-сұхбат» бағдарламасы аясында ауыл­­дан түлеп ұшқан, елге белгілі тұлға­лар, ақын, журналист «Жыр жау­һарындай Жетікөл» кітабының авторы жерлесіміз Кенжалы Ерімбетов ағамыз­бен кездесу кешін өткізуді жос­парлап отырмыз, – дейді А.Өтеуов.</blockquote>Ауыл мәдениетін, өнерін алға сүйреп келе жатқан клубтың жетіс­тік­теріне тоқталсақ, «Сұлу-ай» шы­ғар­машылық өнер орталығының қол­­дауымен ашылған «Ұлттық би» үйірмесі – жетекшісі Шапағат Жарқынбек «Нұр-Шапағат» би тобын құрып, бірқатар байқауға қатыс­қан. Үйірме жетекшісінің тынымсыз ең­бе­­гі­нің арқасында биыл облыстық «Бозторғай» балалар шығармашылығы байқауынан ІІІ орынды иеленген. «Эстрадалық вокал» үйірмесінің мүше­лері Дарын Дахир, Тахмина Жиенбай, Раяна Жиенбай, ӘбуДәуіт Мырзахмет, Бағдәулет Нақыпбек республикалық, облыстық, аудандық байқауларда топ жарып жүр.Жетікөл ауылдық клубы жанынан ашылған көркемсөз үйірмесі 2014 жылдан бастап жұмыс істеп келеді. Осы уақыт аралығында үйірме өнерпаздары көптеген жетістікке қол жеткізді. Атап айтар болсақ, үйірме өнерпазы Сандуғаш Нұрланқызы «Абай, Мұқағали және Махамбет» оқу­лары атты республикалық байқауға қатысып, бас жүлдемен марапатталды. Сандуғаш «Бозторғай» балалар шығармашылық байқауында да көркемсөз жанры бойынша қатысып, бас жүлдемен марапатталды. Үйірме өнерпазы Жарылқасын Шариф те республикалық М.Мақатаев жырларын жатқа оқудан «Мұқағали жырлары» атты балалар мен жасөспірімдер арасындағы байқауда бірінші орын алды. Өнерпаз XXIII облыстық «Боз­тор­ғай» балалар шығармашылық бай­қауында «Актерлық шеберлік» жанры бойынша өнер көрсетіп, бас жүл­­дені иеленді. Өткен жылы Алматы қаласында өткен Мұқағали Мақатаев­тың өлеңдерін мәнерлеп орындаудан «Жапырақ жүрек» атты балалар мен жасөпірімдерге арнал­ған өнер байқауында «Көркем сөз» үйірмесінің өнер­паздары Аяулым Уалихан, Нұрасыл Уалихан көркемсөз жанры бойынша өнер көрсетіп, І орынмен мара­пат­талған болатын.Таланттардың түлеп ұшқан алтын бесігіне айналған ауылдық клуб – қазақ мәдениеті мен өнерін насихаттап келеді. Мәдениет ошағында түрлі іс-шара­лар тұрақты ұйымдастырылып, ұлттық құндылықтарымыздың негізі осылайша қалану үстінде.

Жетікөлде «Адал адам» мәдени-тәрбие орталығы тұжырымдамасы аясында 7 бағыт жүзеге асырылуда

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Ақтөбе қаласының 155 жылдық мерейтойына орай қала әкімдігінің қолдауымен, қалалық жастар ресурстық орталығының ұйымдастыруымен республикалық «Жыр жауһары» атты жас ақындар арасында поэтикалық дуэль өтті. Қызылордалық ақындар да бұл байқауда бақ сынап қайтты.&nbsp;</h4>Ұйымдастыру алқасы хабардар еткеннен бастап, ақындармен басымыз қосылатын күнді тағатсыздана күттік. Әлеуметтік желіде топқа қосылған ақындардың барлығы да қаламдас достар мен көзкөрген таныстар. Аз-кем алаңдап жүргенде аттанатын күн де туды. Теміржол вокзалынан бастап, гүлімен қарсы алған ақжүрек жандардың аппақ ниетіне көңіліміз жылып сала берді. Алып ұшып жеткен ақындарды алақанында аялап, аяғын жерге тигізбеген ақтөбелік ағайынның қонақжайлығына тәнті болдық.Жас ақындардың жарқырап көрінуіне жол ашу, шығармашылық ізденісіне жағдай жасау мақсатында ұйымдастырылған поэтикалық дуэльде Астана, Түркістан, Жезқазған, Қызылорда, Семей, Атырау, Орал, Шымкент және Ақтөбе қалаларының жас шайырлары бақ сынады.Жыр додасына қатысқан 12 ақын үш кезең бойынша сынға түсті. Алғашқы кезеңде «Таудан биік Ақтөбем» тақырыбында Ақтөбе қаласының 155 жылдығына арнау өлеңдерін оқыса, «Жастар жырлайды» атты екінші кезең патриоттық тақырыптағы поэзияға ұласты. Ал «Жыр жауһары» атауын алған үшінші кезеңде іріктелген 4 ақын сахна төрінде кезектесе отырып, еркін тақырыпта өлеңдерін оқыды.Республиканың түпкір-түпкірінен жиналған қатысушыларға ақын, Қазақстан Жазушылар одағы Семей өңірі филиалының төрағасы Мерей Қарт, ақтөбелік жас жазушы, Жазушылар одағының мүшесі Әлихан Жақсылық және филология ғылымдарының докторы Рита Жұмағалиева қазылық жасады. Олар кіл жүйріктен шын жүйрікті анықтау қиынға соққанын жасырмады.Сайыс нәтижесінде үшінші орынды еншілеген ақтөбелік Дәурен Тілеухан өз өлеңінде қалаға былайша ақтарылып сыр ашады:&nbsp; Сап түзеп салтанатты бағаналар,Бейуақта жарқ-жұрқ етіп жанады олар.Ақтөбе, бәрі осының бір күндеріЕлес боп екеумізден қала барар…Туған жерге деген махаббат пен оған деген сағыныш тірі жанның жүрегінен ешқашан өшпек емес. Қос қолын төбесіне қойып безіп кеткен пенденің өзін түптің түбінде балалығы өткен сол мекендегі жылт еткен сәулелі сәттер әйтеуір бір сағындыратыны анық. Адам топырақтан жаралған болса, жанымыздың бір бөлшегін туған жердің топырағынан жаратқан ба дерсің. Оған Гүлнәр Салықбайдың мына өлеңі дәлел: Арна таппай тасып келдім,Жылай алмай жасып келдім.Өзімді іздеп кеткен едім,Енді өзімнен қашып келдім.Қызылорда облысы, Қазалы ауданының тумасы, жас ақын Дәулет Жадырасын өз өлеңін былайша өреді: Оянғанда кештерде сен шам болып,Қызықтайды көзіңді ел сән көріп.Ескі ойлардың үстінде мен жыр жазып,Ескі қала үстінде сен сәнденіп…Қос құрлықтың ортасында орналасқан Ақтөбе қаласына биыл 155 жыл толды дегенмен, шындығында бұл қаланың тарихы әріректе жатыр. Қала аумағынан XVII-XVIII ғасырда өмір сүген сұлтандардың қорымы табылған. Сонымен қатар дәл осы маңда ортағасырлық қала болғаны анықталған.Оқ бойы оза шауып, бірінші орынды қанжығасына байлаған шымкенттік жас ақын Сезім Мергенбай Ақтөбеге арнауында: Тәңір салып тау іздедім сабылып,Жол іздедім күдерімді мәпелер.Әлде сары Мұғалжардай сарылып,Ойға жем боп отыра ма әкелер? – деп толғайды.Астарына үңілсек, қазақ «Әке – асқар тау» дейді. Ал Сезімнің сезімге толы поэзиясында қазақ даласындағы таулар әке бейнесінде сипатталады. Қай-қайсысын алсаң да шашасына шаң жұқпай, шаршы топты жарып жүрген жас ақындарға жүлделі орындардан бөлек қатысқаны үшін қаржылай сертификаттар табысталды.Қазақ поэзиясындағы алдыңғы буын ағалардың жалғасы, қаламы ұшқыр жас ақындардың басын қосу үлкен мәртебе. Ақтөбе қаласында өткен осынау сапар әрбір қызылордалық ақынның жүрегінде ең аяулы сәт болып сақталып қалары хақ.&nbsp;Аружан ОРАЛБАЙ, Қызылорда-Ақтөбе-ҚызылордаФото: «Жыр жауһары” ұйымдастырушыларынан

Қызылордалық ақындар Ақтөбе төрінде

<a href="https://kyzylorda-news.kz/">Kyzylorda-news.kz</a>&nbsp; Бүгін Қазақстан Республикасының Еңбек және халықты әлеуметтік қорғау вице-министрі Назгүл Сағындықова Сыр еліне арнайы жұмыс сапарымен келіп, облыс тұрғындарымен кездесу өткізді. Жиында ол әлеуметтік қызмет көрсету жүйесін трансфорамциялау жайын сөз етіп, мүгедектігі бар азаматтар үшін арнаулы әлеуметтік қызметтердің қолжетімжілігін арттыру және әлеуметтік сақтандыру жүйесін жаңғырту мәселелері туралы баяндады. Вице-министр тұрғындармен кездеспес бұрын БАҚ өкілдеріне арнайы сұхбат беріп, саладағы жаңашылдықтарды баяндап берді.<blockquote>&nbsp;– Сыр өңіріне келген басты себебім – өткен жылғы атқарған жұмыстарымыздың қорытындысы мен жаңа бастамаларды халыққа баяндап, олармен кері байланыста болу. Өздеріңізге мәлім, былтыр 1 шілдеден бастап «Әлеуметтік кодекс» іске қосылды. Облыс тұрғындарын аталған жаңа құжат бойынша осы жарты жылдықта жеткен жетістіктері мен өзгерістерді айтып, оларды ақпараттандыруды көздеп отырмыз. Кодекс енгізілгелі зейнетақы жүйесінде де біраз өзгерістер болды. Базалық зейнетақы мөлшері Мемлекет басшысының Жолдауында берген тапсырмасы аясында енді бірте-бірте артатын болады. Одан бөлек, әйелдердің зейнетке шығу жасы 2028 жылға қарай 61 жас болып бекітілді. Оның алдында зейнет жасы жарты жыл сайын кезең-кезеңімен қосылып отырған еді. Ана мен баланы қорғау жүйесінде де біршама өзгерістер бар. Алтын алқа мен күміс алқаға иегер аналарымыздың жәрдемақыларының мөлшері сараланып, бала күтімімен отырған аналар бір жарым жасқа дейін жәрдемақы алуға мүмкіндік алды. Сондай-ақ, осы әлеуметтік кодекс аясында мүгедектігі бар азаматтарға қатысты көптеген жүйелі өзгерістер енгізілді,- деді вице-министр Назгүл Ерікқызы.</blockquote>Өз кезегінде ҚР Еңбек және халықты әлеуметтік қорғау вице-министрі Қызылорда облысының халқымен кездесіп, тұрғындарды жеке мәселесі бойынша жеке қабылдады.Фото: Қызылорда облысының Өңірлік коммуникациялар қызметі

Еңбек және халықты әлеуметтік қорғау вице-министрі жұмыс сапарымен келді

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Қазалыда Қазақстан Композиторлар Одағының құрылғанына – 85 жыл толуына орай «Қазақстан Композиторлар Одағы шақырады!» атты республикалық музыкалық - фестиваль және Қазалы ауданындағы іргелі өнер-білім ордасы Қорқыт ата атындағы өнер мектебінің – 60 жылдық мерейтойына арналған Композиторлар Одағымен бірлесе «Жаса, қазақ өнері!» атты гала-концерт өтті.</h4>Роза Бағланова атындағы аудандық мәдениет орталығында өткен мерекелік концертте Қазалы ауданы әкімі Мейрамбек Шермағанбет сөз сөйлеп, Қазақстан Композиторлар Одағының 85 жылдығы және Қорқыт ата атындағы өнер мектебінің 60 жылдық мерейтойымен құттықтады.- Биыл қазақ кәсіби музыкасының тұрақтап дамуына, кешегі халық мұрасын бүгінге дейін жеткізіп, тарихы қазақ халқының өмірімен тығыз байланысып жатқан Қазақстан Композиторлар одағының құрылғанына – 85 жыл толып отыр. Ал, біздің киелі өңірдегі талай дарындарды өнер әлеміне қадам бастырған Қорқыт Ата атындағы өнер мектебіне – 60 жыл.Айтулы мерейтойларда ел мәдениеті мен өнерінің, қазақ музыка өнерінің дамуына, бүгінгі ұрпаққа насихаттау жолында аянбай еңбек етіп жүрген Қазақстан Композиторлар Одағы мүшелері мен барша өнерпаздарға шынайы алғысымды білдіремін, - деді Қазалы ауданы әкімі Мейрамбек Зинабдинұлы.Сондай-ақ, Қазақстан Композиторлар Одағының төрағасы Серікжан Құттымбетұлы мен барша одақ мүшелеріне облыс әкімі мен аудан әкімінің «Алғыс хатын» табыстады.Сонымен қатар, Композиторлар Одағы мен өнер мектебі ұжымына облыстық мәдениет, архивтер және құжаттама басқармасы мен облыстық білім басқармасы басшыларының құттықтаулары табысталды.Мұнан соң музыкалық – фестивалде аудандық Мырза атындағы халық аспаптар оркестрі, өнер мектебінің ұстаздары мен оқушылары Композиторлар Одағы мүшелерінің танымал шығармаларын орындап, қазалылық көрермендерге керемет көңіл-күй сыйлады.Айта кеткен жөн, Қазалы ауданында екі күн Қазақстан Композиторлар Одағы мүшелерінің қатысуымен мерейтойлар аясында түрлі іс-шаралар өтті.

Қазақстан және Қызылорда облысының жаңалықтары: Мәдениет