<a href="https://kyzylorda-news.kz/">Kyzylorda-news.kz</a> Шиелі ауданында биыл су үнемдеу технологияларын енгізу жұмыстары жүйелі түрде жүзеге асырылып, ауыл шаруашылығы саласында оң нәтижелер байқалуда.&nbsp;Соңғы жылдары өңірде су тапшылығы мәселесі өзекті болып отырғаны белгілі. Осыған орай мемлекет тарапынан су ресурстарын тиімді пайдалану, заманауи суару тәсілдерін енгізу және егіншіліктің тұрақтылығын арттыру бағытында нақты тапсырмалар берілген. Бүгінде осы міндеттер кезең-кезеңімен іске асырылып, шаруашылықтар жаңа технологияларға бет бұруда.Ауданда су үнемдеу технологияларын кеңінен енгізу мақсатында бірқатар ірі жобалар жүзеге асырылуда. Атап айтқанда, “Таң LTD” және “Центр Семеноводства” ЖШС-тері 2000 гектар алқапқа дәндік жүгері дақылын тамшылатып және жаңбырлатып суару әдістерімен егіп отыр. Аталған технологиялар суды тікелей өсімдік тамырына жеткізіп, оның ысырабын азайтады, булануды төмендетеді және өнімділікті айтарлықтай арттыруға мүмкіндік береді.Сонымен қатар, су үнемдеу тек жаңа технологияларды енгізумен ғана шектелмейді. Бұл бағытта - жерді лазерлік тегістеу, егіс айналымын сақтау, топырақты тиімді өңдеу, құрғақшылыққа төзімді дақыл түрлерін пайдалану секілді агротехникалық шаралар да кеңінен қолданылуда.Мұндай кешенді тәсілдер су ресурстарын тиімді басқаруға, шығындарды азайтуға және ауыл шаруашылығы өнімдерінің сапасы мен көлемін арттыруға оң әсерін тигізуде.Жалпы, Шиелі ауданында қолға алынған бұл бастамалар өңірдің аграрлық әлеуетін арттырып қана қоймай, экологиялық тепе-теңдікті сақтауға және тұрақты даму қағидаттарын орнықтыруға бағытталған маңызды қадам болып табылады.Алдағы уақытта да су үнемдеу технологияларын енгізу ауқымы кеңейтіліп, жаңа жобалар іске асырылатын болады.

Шиелі ауданында су үнемдеу технологиялары қарқынды дамуда

<a href="https://kyzylorda-news.kz/">Kyzylorda-news.kz</a> Шиелі ауданында ауданның «Құрметті азаматы», ел дамуына сүбелі үлес қосқан ардақты тұлға Әбдіманап Шорабаевты еске алуға арналған жасөспірімдер арасындағы бокстан республикалық турнирдің салтанатты ашылу рәсімі өтті.Ауқымды спорттық шара Шиелі кентіндегі Тәуелсіздік көшесі бойында орналасқан заманауи спорт кешенінде ұйымдастырылды. Дәстүрлі түрде өткізіліп келе жатқан турнир жыл сайын өз ауқымын кеңейтіп, бұқаралық спортты дамытуға серпін беріп келеді.<img src="https://knadmin.beoblood.kz/uploads/Respublikaly_boks_turniri_378062bb21.jpg" alt="Республикалық бокс турнирі.jpg">Биыл 13-ші мәрте ұйымдастырылып отырған додаға еліміздің 12 облысынан 220-ға жуық жас былғары қолғап шеберлері қатысуда.&nbsp;Салтанатты жиында аудан әкімінің орынбасары Болатбек Ысмағұлов сөз сөйлеп, қатысушыларға сәттілік тілеп, жарыстың жас спортшылар үшін үлкен тәжірибе алаңы екенін атап өтті. Сондай-ақ, Әбдіманап Шорабаевтың әпкесі Әтіркүл Шорабаева сөз алып, турнирді ұйымдастырушыларға алғыс білдіріп, жас спортшыларға жеңіс пен жігер тіледі.

Шиеліде республикалық бокс турнирі өтті

<a href="https://kyzylorda-news.kz/">Kyzylorda-news.kz</a> Жалағаш ауданындағы Руханият орталығында бос жұмыс орындарының жәрмеңкесі өтті. Жәрмеңкеге аудан әкімінің міндетін атқарушы Ғани Сүлейменов қатысып, ауданда жұмыссыздық деңгейін төмендету және жұмыс іздеушілерді жұмыспен қамту бағытындағы мұндай шаралардың маңыздылығын атап өтті. Сондай-ақ, осындай жәрмеңкелер алдағы уақытта да тұрақты түрде ұйымдастырылатынын жеткізді.Жұмыссыздықты азайту мақсатында өткен жәрмеңкеде 14 жұмыс беруші тарапынан 100-ден астам бос жұмыс орны ұсынылды. Оның ішінде «Харвест Агро» компаниясы 87 тұрақты және маусымдық жұмыс орнын ұсынды.Нәтижесінде жәрмеңке барысында 25 адам тұрақты жұмыспен қамтылды. Қалған қатысушылар жұмыс берушілермен кездесіп, кеңес алып, түйіндемелерін жолдады.<img src="https://knadmin.beoblood.kz/uploads/Bos_zh_mys_oryn_zh_rme_kesi_2_8e7d32ec65.jpg" alt="Бос жұмыс орын жәрмеңкесі 2.jpg">

Жалағаш ауданында бос жұмыс орындарының жәрмеңкесі өтті

<a href="https://kyzylorda-news.kz/">Kyzylorda-news.kz</a> Облыс әкімінің орынбасары Ардақ Зебешевтің төрағалығымен «China Datang» және «AETOS SYSTEMS» компанияларының өкілдерімен жаңартылатын энергия көздері жобаларын іске асыру мәселелері бойынша кездесу өтті.Кездесу барысында Қызылорда облысы аумағында энергетикалық инфрақұрылымды дамыту, инвестициялық жобаларды жүзеге асыру және өңірдің энергия жүйесінің тұрақтылығын арттыру мәселелері талқыланды.China Datang – Қытайдағы ең ірі энергетикалық компаниялардың бірі. Компанияның орнатылған қуаты 210 ГВт-тан асады, оның ішінде 18,8 ГВт жаңартылатын энергия көздеріне тиесілі. Компания «жасыл» энергетиканы дамыту бағытында белсенді жұмыс жүргізуде.AETOS SYSTEMS – гибридті энергетикалық жобаларды іске асыруда тәжірибесі бар толық циклді технологиялық интегратор болып табылады.Кездесу қорытындысы бойынша тараптар өңірде ірі инвестициялық жобаларды бірлесіп жүзеге асыруға өзара қызығушылық білдіріп, энергетика саласында ұзақ мерзімді әрі тиімді әріптестік орнатуға дайын екендіктерін жеткізді.Аталған бастамалар өңірдің энергетикалық қауіпсіздігін нығайтуға, инвестициялар тартуға және әлеуметтік-экономикалық дамуына оң ықпал етеді деп күтілуде.

Жасыл энергетика жобалары талқыланды

<a href="https://kyzylorda-news.kz/">Kyzylorda-news.kz</a> &nbsp;Әр адамның жүрегінде арман болады. Біреу үлкен жетістікке жетуді қаласа, енді бірі бақытты өмір сүруді армандайды. Арман — адамды алға жетелейтін күш. Бірақ арманның өзі жеткіліксіз. Оны нақты мақсатқа айналдыра алғанда ғана нәтиже болады.Мұхтар Әуезов адамның өмірінде арман мен мақсаттың ерекше орын алатынын өз шығармалары арқылы жиі көрсеткен. Оның кейіпкерлері әрқашан биік мұратқа ұмтылып, өмірден өз орнын табуға тырысады. Жазушы: «Алдыңа ұлы мақсат қойсаң, ұсақ ойлардан арыласың» деген мағынадағы ойларымен адамды тек қиялдап қана қоймай, әрекет етуге шақырады. Әуезовтің шығармаларынан еңбекқорлық, табандылық, білімге ұмтылу секілді қасиеттердің адамды үлкен жетістікке жеткізетіні байқалады.Сондықтан Мұхтар Әуезовтің ойынша, арман — адамға қанат бітіретін күш болса, мақсат — сол арманды шындыққа айналдыратын нақты қадам.Арман — бұл қиял, болашаққа деген тілек. Ал мақсат — сол арманға жетудің нақты жоспары. Мысалы, “мен бай болғым келеді” деген — арман. Ал “мен белгілі бір мамандықты меңгеріп, тұрақты табыс табамын” деген — мақсат. Яғни мақсатта нақты әрекет пен мерзім болады.Көп адамдар армандап қана қалады. Себебі олар алғашқы қадам жасаудан қорқады немесе ерінеді. Ал шын мәнінде, кез келген үлкен жетістік кішкентай қадамнан басталады. Күн сайын аз-аздан еңбек ету — үлкен нәтижеге алып келеді.Тағы бір маңызды нәрсе — табандылық. Жолда қиындықтар міндетті түрде кездеседі. Сол кезде берілмей, алға қарай жылжу — нағыз мықтылықтың белгісі. Қателіктер — бұл жеңіліс емес, керісінше тәжірибе.Қорытындылай келе, арман — бағыт, ал мақсат — сол бағытқа апарар жол. Егер арманыңды нақты жоспарға айналдырып, әрекет етсең, кез келген биікті бағындыруға болады. Ең бастысы — бастау және тоқтамау.Назым Әбілхай,Қорқыт ата атындағы Қызылорда университетінің 4-курс студентіФото: freepik.com

Арман мен мақсат: айырмашылығы неде?

Үкімет отырысында Премьер-министр Олжас Бектенов Конституцияны түсіндіру жөніндегі бекітілген іс-шаралар жоспары аясында ақпараттық-түсіндіру жұмыстары жүйелі түрде жүргізіліп жатқанын атап өтті.<blockquote>«Мемлекет басшысының тапсырмасына сәйкес Үкімет еліміздің Конституциясын түсіндіру жөніндегі іс-шаралар жоспарын бекітті. Қазіргі таңда сарапшылар мен қоғам қайраткерлерінің қатысуымен Конституцияның барлық новеллалары бойынша ақпараттық-түсіндіру жұмыстары жүйелі түрде жүргізілуде», — деп атап өтті Олжас Бектенов.</blockquote>Сондай-ақ, Премьер-министр мемлекеттік органдарға бірқатар тапсырма берді.<blockquote>«Мәдениет және ақпарат министрлігі уәкілетті мемлекеттік органдармен және ұйымдармен бірлесіп, осы бағытта жоспарлы жұмысты одан әрі жалғастыруы қажет. Оқу-ағарту, Ғылым және жоғары білім министрліктері халықтың құқықтық сауаттылығын қалыптастыру жөніндегі кешенді бағдарламаны уақтылы әзірлеп, Конституцияның тың қағидаттарын мектептер мен колледждердің және университеттердің үлгілік оқу бағдарламаларына енгізуді қамтамасыз етуге тиіс», — деп атап өтті Үкімет басшысы.</blockquote>Сондай-ақ заңнаманы талдау жүргізіп, бағдарламалық құжаттарды өзектендіру жұмыстарын аяқтау тапсырылды.<blockquote>«Жаңа Конституция нормаларын ескере отырып, белгіленген мерзімдерде қолданыстағы заңнамаға кешенді талдау жүргізіп, барлық заңдар мен бағдарламалық құжаттарды өзектендіру жұмыстарын аяқтау қажет. Барлық орталық және жергілікті атқарушы мемлекеттік органдарға Іс-шаралар жоспарын жүзеге асыруды қамтамасыз етуді тапсырамын», — деп атап өтті Олжас Бектенов.</blockquote>Фото: gov.kz

Олжас Бектенов мемлекеттік органдарға бірқтар тапсырма берді

<a href="https://kyzylorda-news.kz/">Kyzylorda-news.kz</a> Қазалы ауданы әкімінің орынбасары Жалғас Сүйеубаевтың төрағалығымен Конго-Қырым геморрагиялық қызбасының алдын алу және кенеге қарсы залалсыздандыру жұмыстарын ұйымдастыруға арналған мәжіліс өтті.Бүгінде Қазалы ауданы бойынша - Мәдениет, Басықара, Жанқожа батыр, Байғожа стансасы, №99 бекет, Ойынды және Алтай бекеті сынды барлығы 7 табиғи ошақ (тәуекел аймағы) ретінде белгіленген. Бұған байланысты кешенді іс-шаралар жоспары бекітіліп, залалсыздандыру жұмыстарының кезең-кезеңімен жүргізілмек. Атап айтқанда, бірінші кезең 27 сәуір – 5 мамыр аралығында, ал екінші кезең 6–12 мамыр аралығында жүзеге асырылады.Мәжіліс барысында Жалғас Оңғарұлы елді мекендердегі санитарлық тазалықты күшейту, қора-жайлар мен аулаларды механикалық тазалау, мал бастарын толық қамту арқылы кенеге қарсы өңдеу жұмыстарын сапалы ұйымдастыру мәселелерін көтерді. Сонымен қатар, тұрғындар арасында түсіндірме жұмыстарын жандандыру, ақпараттық материалдар тарату және бұқаралық ақпарат құралдары арқылы кеңінен насихат жүргізу жұмыстарын ұйымдастыру қажеттігін айтты.Жиында жауапты сала басшыларына &nbsp;дайындық деңгейін күшейту, қажетті дәрілік қорды қамтамасыз ету және бекітілген жоспардың уақтылы әрі сапалы орындалуын бақылау міндеттелді.

Конго-Қырым геморрагиялық қызбасының алдын алу мәселесі талқыланды

<a href="https://kyzylorda-news.kz/">Kyzylorda-news.kz</a> Мемлекет басшысының Қазақстан халқына Жолдауында айқындалған цифрландыру мен жасанды интеллектіні дамыту бағыты еліміздің өңдеу өнеркәсібінде нақты нәтижесін беруде. Солардың бірі республикада баламасы жоқ табақша шыны өндіретін «Orda Glass Ltd» ЖШС.Кәсіпорын өндіріс процесін толық цифрландырып, автоматтандыру арқылы жоғары тиімділікке қол жеткізген. Жылдық қуаты 197,1 мың тоннаны құрайтын зауытта өнеркәсіптік роботтар мен заманауи басқару жүйелері кеңінен енгізілген. Атап айтқанда, жапониялық Fanuc компаниясының роботтары ауыр шыныларды дәл әрі қауіпсіз өңдеуге мүмкіндік береді.Сонымен қатар, өнім сапасын цифрлық бақылау, ақауларды автоматты анықтау және шыны кесудің интеллектуалды жүйелері жұмыс істейді.2024 жылы іске қосылған энергия үнемдейтін шыны өндіру желісі жылына 5 млн шаршы метр өнім шығаруға қауқарлы. Бұл шыны түрі жылуды сақтап, күн сәулесінің әсерін төмендету арқылы энергия тиімділігін арттырады. Соңғы жылдары өндіріс көлемі өсіп, өнімнің 30 пайызы шетелге экспортталуда.Цифрландырудың тағы бір үлгісі «Айна Гласс» компаниясының айна өндіру зауыты. Мұнда өндіріс толық автоматтандырылған: барлық кезеңдер роботтар мен цифрлық жүйелер арқылы бақыланады. Өнім небәрі 40 минутта дайындалып, сапасы қатаң тексеріледі.Жалпы, бұл жобалар цифрландыру мен автоматтандырудың өндірістегі тиімділігін дәлелдеп, өңірдің индустриялық дамуына және экспорт әлеуетінің артуына зор үлес қосып отыр.<img src="https://knadmin.beoblood.kz/uploads/Zho_ary_tehnologiyaly_ndiris_2_36a097ef1d.jpg" alt="Жоғары технологиялық өндіріс 2.jpg">

Өңірде жоғары технологиялық өндіріс дамып келеді

<a href="https://kyzylorda-news.kz/">Kyzylorda-news.kz</a> Өңірлік коммуникациялар қызметінің ақпарат алаңында өткен баспасөз конференциясында жергілікті IT-стартаптардың Digital Qazaqstan халықаралық форумы аясындағы жетістіктері кеңінен баяндалды. Жиын барысында спикерлер өңір жастарының жасанды интеллект, медицина және киберқауіпсіздік салаларындағы тың жобаларына тоқталып, олардың ел дамуына қосар үлесін ерекше атап өтті.<blockquote>"Халықаралық деңгейдегі жетістіктеріміз кездейсоқ емес. Қызылордалық стартаптардың Digital Qazaqstan Battle ұлттық стартап-батлында жоғары нәтиже көрсетуі өңірде жүйелі түрде жүргізіліп жатқан IT-білім беру мен стартаптарды қолдау жұмыстарының айқын жемісі. Әсіресе, CortexAI жобасының II орын алып, 5 миллион теңге көлемінде инвестиция тартуы біз үшін үлкен жетістік. Еліміздің түкпір-түкпірінен жиналған 18 мықты команданың ішінде оқ бойы озық шыққан бұл жоба трансплантология саласына арналған. Аталған стартап жасанды интеллект көмегімен бүйрек трансплантациясынан кейінгі ағзаның қабылданбау қаупін 84% дәлдікпен болжай алады. Бұрын бірнеше сағатты қажет ететін күрделі талдау процесі небәрі 33 секундқа дейін қысқартылған. Бұл - отандық медицинаның цифрлық трансформациясына қосылған маңызды үлес", – деді Kyzylorda Hub жетекшісі Жанарыс Түбекбаев.</blockquote>Сонымен қатар, спикер аймақтағы жас инноваторларға барлық қажетті жағдай жасалып отырғанын, алдағы уақытта мұндай жобалардың саны арта түсетініне сенім білдірді.<blockquote>"Бүгінде интернет кеңістігінде алаяқтық әрекеттер мен фишингтік шабуылдар жиілеп отыр. Осы мәселені шешу мақсатында біз PhishGuard жобасын әзірледік. Жоба LLM API және жасанды интеллект алгоритмдері арқылы күмәнді сайттарды анықтап, қолданушыға нақты уақыт режимінде ескерту береді. Бұл қарапайым пайдаланушылар үшін де, бизнес құрылымдар үшін де маңызды құрал", – деді PhishGuard жобасының жетекшісі Нұрбек Әбілдаев.</blockquote>Оның айтуынша, форум барысында жобаға шетелдік және отандық серіктестер қызығушылық танытып, алғашқы қолданушылар базасы қалыптаса бастаған.Жобаның тең авторы Нұрбол Ерболұлы Оңалбеков PhishGuard жүйесінің техникалық артықшылықтарына кеңінен тоқталды:<blockquote>"Біздің жоба браузерлік кеңейтім ретінде жұмыс істейді. Қолданушы кірген сайттың қауіп деңгейін төмен, орташа немесе жоғары деп автоматты түрде бағалап, бірден ескерту береді. Бұл шешім интернеттегі қауіпсіздікті жаңа деңгейге көтереді деп сенеміз. Жоба алдағы уақытта жетілдіріліп, халықаралық нарыққа шығуға бағытталады", – деді ол.</blockquote>Осындай бастамалар арқылы Қызылорда өңірі еліміздің цифрлық даму картасында өз орнын нығайта түсері сөзсіз.

Қызылордалық IT-стартаптар халықаралық алаңда топ жарды

<a href="https://kyzylorda-news.kz/">Kyzylorda-news.kz</a> Бүгін ҚР Президенті Әкімшілігінің Басшысы Айбек Дәдебайдың төрағалығымен өңір әкімдерімен кеңес өтті. Күн тәртібінде «Таза Қазақстан» бағдарламасының іске асырылуы, &nbsp;туристік дестинацияларды дамыту, &nbsp;мемлекеттік орман қорына 2 млрд ағаш отырғызу, &nbsp;экопарктер құру мәселелері қаралды. Оған облыс әкімінің бірінші орынбасары Данияр Жаналинов селекторлық режим арқылы қатысты.Президент бастамасымен жүзеге асқан «Таза Қазақстан» бағдарламасы аясында өңірде санитарлық тазалық, абаттандыру және тұрғындарға қолайлы орта қалыптастыру бағытында жүйелі жұмыс жүргізілуде.<img src="https://knadmin.beoblood.kz/uploads/Taza_aza_stan_m_zhilis_2_9c163b935a.jpg" alt="Таза Қазақстан мәжіліс 2.jpg">Бюджет қаражатынан бөлек, демеушілер есебінен демалыс, ойын-спорт алаңдары жаңартылып, тұрғын үйлер мен әлеуметтік нысандар жөндеуден өтуде. Соңғы жылдары Қызылорда қаласындағы орталық алаң, мәдени-демалыс паркі мен Қорқыт ата сквері қайта жаңғыртылды.Ауылдарды дамыту мақсатында «Үлгілі елді мекен» конкурсы өткізіліп, үш жылда 2,064 млрд теңгенің 67 техникасы табысталды. Тұрмыстық қатты қалдықтарды басқару бағытында «Жасыл даму» АҚ қаржыландыруымен 98,7 млрд теңгенің 9 жобасы жүзеге асырылуда.Жаңақорған ауданында қалдықтарды сұрыптау кешені толық қаржыландырылып, жабдықтары жеткізілді. Сырдария ауданында облыстық бюджет есебінен 475 млн теңгеге сұрыптау кешені бар қалдықтар полигоны салынып, пайдалануға берілді.<img src="https://knadmin.beoblood.kz/uploads/Taza_aza_stan_m_zhilis_4_3166098475.jpg" alt="Таза Қазақстан мәжіліс 4.jpg">Аймаққа &nbsp;өткен жылы 212 278 турист келіп, көрсеткіш 25,4 пайызға өскен. Қызмет көрсету көлемі 3 млрд. 288 млн. теңгеге, яғни 42,8 пайызға артты. Тұрғындар мен туристерге қолайлы жағдай жасау үшін ауқымды жұмыс атқарылуда.Қайта жаңғыртылған теміржол вокзалы мен «Қорқыт ата әуежайында» туристерге арналған виртуалды карта әзірленіп, QR кодтар орнатылды. Экскурсияға келушілерге жаңадан салынған, тарихи мәліметтермен толықтырылған заманауи музей қызмет көрсетеді.Өңірдегі демалыс парктері жаңартылып, туристерге қолайлы әрі қауіпсіз болуы үшін барлық жағдай жасалды. Қауіпсіздікті күшейту мақсатында адам көп шоғырланатын орындарға 102 және SOS батырмаларының 15 құрылғысы орнатылды.Туристік инфрақұрылымды дамыту аясында халықаралық деңгейдегі бесжұлдызды қонақүй, IBIS Qyzylorda және Pana қонақүйлері бой көтеріп, аудан орталықтардағы теміржол вокзалдары қайта жаңғыртылуда.<img src="https://knadmin.beoblood.kz/uploads/Taza_aza_stan_m_zhilis_3_5e300fbe33.jpg" alt="Таза Қазақстан мәжіліс 3.jpg">

«Таза Қазақстан»:  Тұрғындар мен туристерге қолайлы орта қалыптасты

<a href="https://kyzylorda-news.kz/">Kyzylorda-news.kz</a> Бүгінде Қазалы ауданында жол қозғалысы қауіпсіздігін арттыру бағытындағы жұмыстар жүйелі түрде жалғасуда. Осы ретте, аудан әкімі Алмасбек Есмахановтың тапсырмасына сәйкес Әйтеке би кентіндегі Жанқожа Нұрмұхаммедұлы көшесінің бойында орналасқан Е.Бозғұлов атындағы №249 мектеп-лицейінің алдында жасанды жол кедергісі толықтай қайта жаңартылуда. Сонымен қатар, кенттегі М.Ғабдуллин және Желтоқсан көшесінің бойындағы №Жанқожа батыр атындағы №70 мектеп жанына жаңа жасанды жол кедергілері орнатылды.Аталған жұмыстардың басты мақсаты – мектеп, балабақша аумағына жақын учаскелерде көлік қозғалысының жылдамдығын төмендетіп, балалардың қауіпсіздігін қамтамасыз ету.Алдағы уақытта аудан орталығы мен елді мекендерде қосымша жасанды жол кедергілерін орнату жұмыстары кезең-кезеңімен жалғасатын болады.

Жол қозғалысы: Қауіпсіздік шаралары күшейтілуде

<a href="https://kyzylorda-news.kz/">Kyzylorda-news.kz</a> Президентке агенттік қызметінің негізгі қорытындылары мен алдағы кезеңге арналған міндеттері жөнінде баяндалды.Жанат Элимановтың айтуынша, бюджет шығыстарына жүргізілген мониторинг кезінде мал шаруашылығы саласына бөлінген 30 миллиард теңге субсидияны тиімсіз пайдалану тәуекелдері анықталған. Сондай-ақ ғылыми зерттеулер мен ғылыми-техникалық нәтижелерді коммерцияландыруға бағытталған 10 миллиардтан аса теңгені мақсатсыз жұмсау белгілері айқындалды. Міндетті әлеуметтік медициналық сақтандыру қаражатын жымқыру фактілері бойынша 14 сотқа дейінгі тергеу басталған, ал құрылыс саласында 5,3 миллиард теңгені заңсыз иемденбек болған жандарға қатысты 21 қылмыстық іс қозғалды.Мемлекет басшысына алаяқтық әрекеттердің алдын алу бойынша 17 қаржы пирамидасының қызметі тоқтатылғаны және банктер мен байланыс операторларының атын жамылып, арнайы құрылғылар арқылы жаппай фишингтік SMS-хабарламалар таратқан топ әшкереленгені жөнінде есеп берілді. Жалпы аудиториясы 25 мыңнан асатын 3,7 мың алаяқтық сайт және 22 топтық чат жабылған. 400-ден астам жалған құрылыс компаниясының заңсыз түрде бірінші санаттағы лицензия алуына жол берілген жоқ.Бұдан бөлек, қылмыстық табыстарды жылыстатуға қарсы күрес саласында атқарылған жұмыстар таныстырылды. Атап айтқанда, заңсыз схемаларда қолданылған дроп-карталарға қатысты 14 сотқа дейінгі тергеу басталды, олардың есепшотындағы қаржының жалпы айналымы 13 миллиард теңгеден асқан. «Көлеңкедегі» тұлғаларға рәсімделген 68 мыңнан астам карта бұғатталған. Жалған компаниялар мен құжаттарды пайдалану фактілері бойынша 23 іс тіркелген, келтірілген залал – шамамен 13 миллиард теңге. Қаржылық пирамидалар, онлайн-казино және алаяқтықтан түскен табысты жылыстатумен айналысқан 3 жасырын криптоайырбастау қызметінің жолы кесілді. Криптовалюта айырбастауға қатысты заңсыз онлайн сервистерге кіруге арналған 483 сілтеме жойылды.Кездесу соңында Мемлекет басшысы агенттіктің негізгі бағыттары бойынша бірқатар нақты тапсырма берді.Фото: Ақорда

Қазақстан және Қызылорда облысының жаңалықтары: Қоғам