<a href="https://kyzylorda-news.kz/">Kyzylorda-news.k</a> 21-23 қазан күндері Астанадағы EXPO халықаралық көрме орталығында ExpoGroup компаниясының ұйымдастыруымен KazAgroFarm-2026 халықаралық көрмесі өтеді. Биыл көрмеге әлемнің 25 елінен 300-ден астам компания қатысып, агроөнеркәсіп кешеніне арналған озық технологиялар мен заманауи шешімдерді ұсынады.Бір алаңда Қазақстан Республикасының Ауыл шаруашылығы министрлігі, Құрылтай депутаттары, мемлекеттік органдардың өкілдері, шетелдік делегациялар мен дипломатиялық миссиялар, халықаралық сарапшылар, әлемдік агробизнес өкілдері және еліміздің фермерлері бас қосады. KazAgroFarm-2026 ауыл шаруашылығы саласының келешегін айқындайтын маңызды кәсіби алаңға айналмақ.Дәстүрлі түрде KazAgroFarm-2026 экспозициясы аграрлық саланың екі негізгі бағытын біріктіреді. KazAgro өсімдік шаруашылығының толық циклін - тұқым мен өсіру технологияларынан бастап, өнімді жинау мен сақтауға дейінгі үдерістерді қамтиды. Ал KazFarm мал шаруашылығының генетика мен асылдандыру жұмысынан бастап, ет пен сүт өндіру және дайын өнім шығаруға дейінгі бағыттарын ұсынады.Осылайша, екі бағыт заманауи агроөнеркәсіп кешенінің іс жүзінде барлық негізгі буынын қамтиды. Бұған қоса, көрмеде цифрландыру, автоматтандыру, жасанды интеллект, роботтандыру және дәлме-дәл егіншілік саласындағы шешімдер таныстырылады. Бүгінде дәл осы технологиялар агробизнестің даму қарқынын айқындап отыр.Көрменің басты ерекшеліктерінің бірі - оның халықаралық ауқымы. Астанаға 25-тен астам елдің компаниялары, әлемге танымал брендтердің басшылары мен топ-менеджерлері, шетелдік делегациялар, дипломатиялық және сауда миссияларының өкілдері келеді.Қатысушылар үшін бұл - шетелдік компаниялар мен халықаралық сарапшылармен тікелей байланыс орнатуға, жаңа іскерлік серіктестер табуға, келіссөздер жүргізуге және өзара ынтымақтастықтың жаңа мүмкіндіктерін талқылауға арналған тиімді алаң.Көрменің іскерлік бағдарламасы мемлекеттік органдарды, бизнес өкілдерін, салалық ұйымдар мен халықаралық сарапшыларды біріктіреді. Негізгі іс-шаралардың бірі - қазақтың ақбас тұқымының 75 жылдығына арналған «Ақбас» қазақтың ақбас тұқымы күні болады.Сонымен қатар бағдарлама аясында агроөнеркәсіп кешенін дамытудың өзекті мәселелеріне арналған панельдік сессиялар, семинарлар, конференциялар мен кәсіби кездесулер өтеді. Шетелдік дипломатиялық миссиялардың қатысуымен де бірқатар іс-шара ұйымдастыру жоспарланған. Олардың қатарында Чехия, Нидерланд, Германия, Иран, Беларусь және басқа елдердің елшіліктері бар.Фермерлер үшін KazAgroFarm-2026 - бір сапар барысында шаруашылыққа арналған заманауи шешімдерді көруге, өндірушілермен және сарапшылармен тікелей сөйлесуге, жаңа технологиялармен танысуға және әлеуетті серіктестер табуға мүмкіндік.KazAgroFarm-2026 көрмесі 21-23 қазан күндері Астана қаласындағы EXPO халықаралық көрме орталығында өтеді. Мекенжайы: Мәңгілік Ел даңғылы, 53/1. Келушілер үшін кіру тегін.Толық ақпаратты ұйымдастырушылардан алуға болады:<ul><li style="text-align:justify;">Моб.: +7 (701) 216-22-91</li><li style="text-align:justify;">Моб.: +7 (701) 958-29-73</li><li style="text-align:justify;">E-mail: <a href="mailto:project@expogroup.kz">project@expogroup.kz</a></li><li style="text-align:justify;">E-mail: <a href="mailto:manager@expogroup.kz">manager@expogroup.kz</a></li><li style="text-align:justify;">Сайттар: kazagroexpo.kz, kazfarm.kz</li><li style="text-align:justify;">Instagram: @expogroupkaz</li></ul>

Әлемдік агробизнес Астанада бас қосады

<a href="https://kyzylorda-news.kz/">Kyzylorda-news.kz</a> Өткен аптада Арал ауданындағы Руханият орталығында көркемдік кеңестің кезекті отырысы өтті. Жиынды Арал ауданы әкімінің орынбасары, көркемдік кеңес төрағасы Н. Бохаев жүргізді.Отырыстың күн тәртібінде 30-31 қазан күндері аудан көлемінде аталып өтетін Сартай батыр Байжанұлының 315 жылдығына арналған іс-шараларды ұйымдастыру және өткізу барысы қаралды.Мерейтой аясында бірқатар мәдени-танымдық және спорттық іс-шаралар өткізу жоспарлануда. Атап айтқанда, жасөспірімдер арасында еркін күрестен аймақтық турнир, ғылыми-танымдық конференция, аймақтық жыр фестивалі және ат бәйгесін ұйымдастыру көзделген.<img src="https://knadmin.beoblood.kz/uploads/Aral_k_rkemdik_ke_es_2_ff984da4f2.jpg" alt="Арал көркемдік кеңес 2.jpg">Жиын барысында аталған іс-шараларды мазмұнды әрі жоғары деңгейде өткізуге қатысты көркемдік кеңес мүшелерінің ұсыныс-пікірлері тыңдалды. Кеңес төрағасы Н. Бохаев Сартай батырдың 315 жылдығына арналған мерейтойлық іс-шараларды өз деңгейінде ұйымдастыру мақсатында жауапты сала басшыларына нақты тапсырмалар жүктеді.Сонымен қатар отырыста 2027 жылы атап өтілетін қоғамдық-саяси маңызы бар іс-шаралар жоспарына енгізілетін ұсыныстарды жинақтау мәселесі қаралып, тиісті сала басшыларына ұсыныстарды әзірлеу және жинақтау жөнінде тапсырма берілді.Жиын қорытындысы бойынша күн тәртібіндегі мәселелер бойынша тиісті жұмыстарды сапалы әрі белгіленген мерзімде орындау қажеттігі айтылды.&nbsp;<img src="https://knadmin.beoblood.kz/uploads/Aral_k_rkemdik_ke_es_3_2ab7b72a43.jpg" alt="Арал көркемдік кеңес 3.jpg">

Арал: Көркемдік кеңестің кезекті отырысы өтті

<a href="https://kyzylorda-news.kz/">Kyzylorda-news.kz</a> Арал қаласындағы «Қамқорлық» оңалту орталығы толыққанды жұмыс істеп тұр. Өткен жылы ашылған нысан ерекше күтімді қажет ететін балаларға арналған өңірдегі маңызды әлеуметтік орталықтардың бірі.Орталықта балаларға медициналық оңалту, емдік дене шынықтыру және физиотерапиялық ем-шаралар жүргізіліп, логопед пен дефектологтың, еңбек терапиясы маманының кеңесі беріледі, сонымен қатар ата-аналарға психологиялық қолдау көрсетіледі.Мұнда әр балаға жеке жоспар жасалып, қозғалыс, сөйлеу, ойлау және әлеуметтік бейімделу дағдыларын дамытуға басымдық беріледі. Заманауи құрал-жабдықтармен жабдықталған кабинеттерде білікті мамандар қызмет атқарады.Орталықтың жұмысы Арал ауданы мен жақын аудандардағы отбасылар үшін оңалту қызметінің қолжетімділігін арттырып, балалардың облыс орталығына бармай, өз ауданында сапалы көмек алуына мүмкіндік беріп отыр.<img src="https://knadmin.beoblood.kz/uploads/Aral_am_orly_ortaly_y_c82d7ef272.jpg" alt="Арал қамқорлық орталығы.jpg">

Арал қаласындағы «Қамқорлық» оңалту орталығы балаларға қызмет көрсетуде

<a href="https://kyzylorda-news.kz/">Kyzylorda-news.kz</a> &nbsp;Қазақстанда 5 қазанда ең маңызды мерекелердің бірі – Мұғалімдер күні атап өтіледі.Мұғалім мамандығы терең білімді, сабырлықты, жауапкершілікті және өз ісіне деген шынайы сүйіспеншілікті талап етеді.Педагогтер балаларға білім беріп қана қоймай, ойлануға, шешім іздеуге, дербес әрі жауапты болуға үйретеді. Көбіміз қиындықтарды еңсеріп, өз мақсатымызға жетуге қолдау көрсеткен ұстаздарымызды ризашылықпен еске аламыз.Мұғалімдердің кәсібилігі, жігері мен адами қасиеттері қазақстандық жас ұрпақтың білім алуы мен тәрбиесінде маңызды рөл атқарады.Сурет: Нұрболат Нұржаубай

Бүгін – Мұғалімдер күні

<a href="https://kyzylorda-news.kz/">Kyzylorda-news.kz</a> Қазақстан Республикасының Премьер-министрі Олжас Бектенов AI &amp; Digital Bridge 2026 форумында ұсынылған цифрлық шешімдермен танысып, AI &amp; Digital Bridge Awards 2026 жеңімпаздарына марапаттар табыстады.Премьер-министрге түрлі салаларда қолдануға арналған отандық технологиялық компаниялар мен ұйымдардың жасанды интеллект негізіндегі әзірлемелері таныстырылды.Білім беру саласында QAIRU ЖИ университетінің оқу үдерісін бейне және аудио арқылы талдау шешімдері, AI-тьютор және білім алушылардың оқу үлгерімін талдау құралдары, сондай-ақ шағын жинақты мектептердегі әр оқушының оқу деңгейі мен қажеттілігіне бейімделетін жасанды интеллект негізіндегі онлайн оқыту жүйесі ұсынылды.Қаржы секторында Kaspi.kz маркетплейсі экожүйесіне ықпалдастырылған Kasper интеллектуалды AI-ассистенті және Halyk Bank әзірлеген жасанды интеллект негізінде қызметкерлердің құзыреттерін дамыту моделі таныстырылды.Қаржылық операциялардағы ауытқуларды анықтау және дропперлік әрекеттердің жолын кесу бағытында Freedom Holding компаниясының AI-Compliance платформасы ұсынылды.Өнеркәсіп саласында «Самұрық-Қазына» тобына қарасты компаниялардың жасанды интеллект технологиялары негізінде әзірлеген шешімдері таныстырылды. Атап айтқанда, ҚазМұнайГаз ұсынған цифрлық телнұсқалар мен ҚТЖ компаниясының SMART-диагностика жүйесі ұсынылды.Сондай-ақ түрлі салаларға арналған Alem AI Platform, QazBot Technologies, Trusted Kazakhstan және QazEta сияқты цифрлық өнімдер көрсетілді.<img src="https://knadmin.beoblood.kz/uploads/Haly_araly_forum_2_4d8015313e.jpg" alt="Халықаралық форум 2.jpg">

AI & Digital Bridge 2026 халықаралық форумы өз жұмысын қорытындылады

<a href="https://kyzylorda-news.kz/">Kyzylorda-news.kz</a> Облыс әкімінiң орынбасары Мейрамбек Шермағанбет Қызылорда облысы әкімдігі мен «Қазатомөнеркәсіп» ҰАК» АҚ қолдауымен ұйымдастырылған «Біліміміз – Елімізге» жобасы аясында «Болашақ» бағдарламасының түлектері – жоғары білікті медицина мамандарының қатысуымен Шиелі ауданында көшпелі медициналық қабылдау өткiзген дәрігерлердi арнайы қабылдап, алғыс бiлдiрдi.Көшпелі медициналық қабылдау өткiзген балалар кардиохирургі, интервенциялық кардиолог, эндокринолог, гинеколог, уролог, онкогинеколог, инфекционист-эпидемиолог, оториноларинголог және психолог мамандары 400-ден астам аудан тұрғынына консультациялық-диагностикалық көмек көрсетті.Сондай-ақ, мамандар тұрғындардың денсаулық жағдайын бағалап, зерттеу нәтижелерін саралап, қажетті медициналық ұсынымдар айтты.Медициналық көрсеткіштеріне сәйкес 45 тұрғынға жоспарлы стационарлық емге, оның ішінде хирургиялық емге қатысты кеңес берілдi.Айта кету керек, «Біліміміз – Елімізге» жобасы 10 жылдан астам уақыт бойы жүзеге асырылып келеді. Оның мақсаты «Болашақ» бағдарламасы түлектерінің білімі мен халықаралық тәжірибесін ел игілігіне бағыттау.Жобаның медициналық бағыты төрт жылдан бері жүзеге асырылып келеді. Бұл бастаманың негізін қалаған белгілі дәрігер-аритмолог, “Болашақ” түлегі Ғани Төлепбергенов биылғы жылдың басында өмірден өтті. Осы жолғы сапар оның қатысуынсыз алғаш рет ұйымдастырылды. Әріптестері мен қауымдастық мүшелері сапарды Ғани Төлепбергеновтің рухына арнап, оның медицина саласындағы еңбегі мен кәсіби мұрасын ұлықтау мақсатында жобаның медициналық бағытына дәрігердің есімін беру туралы шешім қабылдады.

Медициналық қабылдау өткізген дәрігерлермен кездесті

<a href="https://kyzylorda-news.kz/">Kyzylorda-news.kz</a> Қазақстан Республикасы Премьер-министрінің бірінші орынбасары Нұрлыбек Нәлібаевтың Қазақстан мен Моңғолия арасындағы сауда-экономикалық, ғылыми-техникалық және мәдени ынтымақтастық жөніндегі үкіметаралық комиссияның оныншы отырысына қатысуға арнайы келген Моңғолия Премьер-министрінің орынбасары Н. Номтойбайармен кездесті.Кездесу барысында Нұрлыбек Нәлібаев Қазақстан мен Моңғолияның стратегиялық серіктестігі практикалық ынтымақтастықты кеңейту және үкіметаралық тұрақты диалогті қолдау үшін сенімді негіз болып отырғанын атап өтті.Тараптар сауда, энергетика, атом, цифрлық, қаржы, мәдени-гуманитарлық салалардағы жоғары деңгейдегі негізгі уағдаластықтарды ілгерілету үшін екі Үкіметтің күш-жігерін жандандыру қажеттігіне келісті.Әріптестіктің айтарлықтай әлеуеті ауыл шаруашылығы мен тау-кен секторында, кен орындарын барлау мен игеру, минералдық шикізаттарды өңдеу жобаларында шоғырланғанын атап өтті.Бұл ретте тараптар тауар айналымы өсуінің басты шарттарының бірі саналатын елдер арасындағы көлік-логистикалық инфрақұрылымды дамытудың маңыздылығына да назар аударды.Тараптар биылғы маусым айынан бастап қос ел астанасы арасындағы тікелей әуе қатынасының ашылғанын атап өтіп, қосымша әуе бағыттарын іске қосу мүмкіндігін талқылады.Кездесу соңында Қазақстан мен Моңғолия арасындағы бұған дейін қол жеткізілген келісімдерді жүзеге асыруға және бірлескен жобаларды ілгерілету жөнінде белсенді жұмыс істеуге келісті.Сурет: gov.kz

Қазақстан мен Моңғолия арасындағы стратегиялық серіктестік дамып келеді

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаев көлік инфрақұрылымын дамыту және автомобиль жолдарының сапасын арттыруда қолға алынған &nbsp;құрылыс жұмыстарының барысымен танысты.Мемлекет басшысы Ұлттық құрылтайдың &nbsp;бесінші отырысында "Жақында "Қызылорда – Жезқазған" жолының Қызылордаға тиесілі бөлігі салынып бітті. «Батыс Қытай – Батыс Еуропа» – Қазақстандағы ең негізгі жолдың бірі. Алайда, оның "Қызылорда – Ақтөбе" арасындағы бөлігі тар, көлік апаттары жиі болып жатады. Мен осыған дейін бұл жолды кеңейту туралы тапсырма бердім. Биыл осы бағытта 4 жолақты жаңа күре жолдың құрылысы басталады.&nbsp;Сондай-ақ мен былтырғы Жолдауымда «Бейнеу – Сексеуіл» жолының құрылысын тездетуді тапсырғанымды білесіздер. Ондағы жұмыстар да биыл басталмақ" деп атап өткен болатын.<img src="https://knadmin.beoblood.kz/uploads/FB_IMG_1791086682240_32c92a3049.jpg" alt="FB_IMG_1791086682240.jpg">Тамыз айында &nbsp;телекөпір арқылы «Қызылорда-Сексеуіл», «Ұлғайсын-Сексеуіл» және «Бейнеу-Сексеуіл» автокөлік жолдарының құрылысын бастап берді.Телекөпір барысында Премьер-министрдің бірінші орынбасары Нұрлыбек Нәлібаев жобаны бастауға әзірлік жөнінде баяндап, еліміздің &nbsp;көлік инфрақұрылымын дамытудағы &nbsp;жобалардың маңызын атап өтті. &nbsp;Аймақ басшысы алдымен "Қызылорда–Ақтөбе" бағытындағы Қызылорда қаласының айналма жолы мен «Қызылорда–Сексеуіл» автомобиль жолының құрылыс алаңына барды.Қызылорда қаласының айналма жолының ұзындығы 25,8 шақырым, &nbsp;келісімшарт құны 39,5 млрд теңге. Ислам даму банкі есебінен қаржыландырылуда. Бас мердігері «Қыран», жобалаушысы «Семдорпроект» серіктестіктері. Жобаны іске асыру мерзімі – 2026-2029 жылдар. Құрылысқа 150 жұмысшы және 85 арнайы техника жұмылдырылған.«Қызылорда–Сексеуіл» автомобиль жолының 130,8 шақырымын қамтитын жобаның құны 242,3 млрд теңге. Қаржыландыру &nbsp;көзі &nbsp;Ислам даму банкі болса, &nbsp;мердігері &nbsp;«Integra Construction KZ», қосалқы мердігері &nbsp;«Элит Строй Комплект» серіктестіктері. 2026-2029 жылдар аралығында іске асады. Қазір құрылыс жұмыстарына 70 жұмысшы мен 43 арнайы техника тартылған.Аталған жобалар өңірдегі жол-көлік инфрақұрылымын жаңғыртуға, көлік қозғалысы қауіпсіздігі мен қолайлылығын арттыруға, &nbsp;транзиттік бағыттардың өткізу қабілетін жақсартуға мүмкіндік береді.<img src="https://knadmin.beoblood.kz/uploads/FB_IMG_1791086677348_a7199cd31e.jpg" alt="FB_IMG_1791086677348.jpg">

Жол-көлік инфрақұрылымын дамыту жұмыстарының барысымен танысты 

<a href="https://kyzylorda-news.kz/">Kyzylorda-news.kz</a> Шиелі ауданында ауыл жастарының шығармашылығын қолдауға, ұлттық өнер мен мәдени құндылықтарды дәріптеуге, елді мекендер арасындағы мәдени байланысты нығайтуға бағытталған «Ауыл Vibe, Retro NIGHT» байқауы өз мәресіне жетті.Апта сайын дәстүрлі түрде ұйымдастырылған мәдени жоба барысында ауданның ауылдық округтерінен келген өнерпаз жастар өз өнерлерін ортаға салып, ән, би, сахналық қойылымдар және шығармашылық бағыттар бойынша бақ сынады. Байқау ауыл жастарының бос уақытын тиімді ұйымдастырып қана қоймай, олардың өнерге деген қызығушылығын арттырып, туған жерге деген сүйіспеншілігін нығайтуға мүмкіндік берді.Байқаудың қорытынды кешіне аудан әкімі Айтбай Жандарбеков қатысып, ауылдық округтерден келген өнерпаз жастарды құттықтады.<img src="https://knadmin.beoblood.kz/uploads/FB_IMG_1791135134340_0fcacc9d38.jpg" alt="FB_IMG_1791135134340.jpg">– «Ауыл – ұлттық құндылықтарымыздың алтын бесігі. Ал ауылдың ажарын ашып, мәдени өмірін жандандыратын – елдің өнерлі жастары. «Ауыл Vibe, Retro NIGHT» жобасы арқылы ауданымыздың әр ауылынан талантты жастардың басын қосып, олардың шығармашылығын көпшілікке танытуға мүмкіндік алдық.Бүгінгі кеш – жай ғана байқаудың қорытындысы емес, ауыл жастарының өнері мен белсенділігін, бірлігі мен ұйымшылдығын көрсететін ерекше мерекелік шара. Әрбір ауылдық округтен келген өнерпаздардың дайындаған қойылымдары мен концерттік бағдарламалары көрермен көңілінен шықты.Барша байқауға қатысқан өнерпаз жастарға, ұйымдастырушыларға және қолдау көрсеткен ауыл тұрғындарына алғысымды білдіремін. Өнерлеріңіз өрге жүзсін, шығармашылық жолдарыңызға толағай табыс тілеймін!», – деді аудан әкімі.Байқау қорытындысы бойынша:<ul><li style="text-align:justify;">БАС ЖҮЛДЕ &nbsp;Бәйгеқұм және Телікөл ауылдық округтері</li><li style="text-align:justify;">І ОРЫН &nbsp;Иіркөл және Алмалы ауылдық округтері</li><li style="text-align:justify;">ІІ ОРЫН &nbsp;Ақтоған және Жаңатұрмыс, Бәйтерек және Жөлек ауылдық округтері</li><li style="text-align:justify;">ІІІ ОРЫН Жиделіарық және Тұран, Сұлутөбе және Майлытоғай ауылдық округтері болып табылды.</li></ul>Байқау соңында жеңімпаздар мен жүлдегерлерге арнайы дипломдар мен естелік сыйлықтар табысталды.Қорытынды кеш барысында ауылдық округтердің өнерпаздары көрермендерге ән мен биден, ұлттық өнер мен заманауи шығармашылықтан құралған мазмұнды концерттік бағдарлама ұсынып, көпшілікке көтеріңкі көңіл күй сыйлады.«Ауыл Vibe, Retro NIGHT» жобасы ауыл жастарының шығармашылығын шыңдап, олардың мәдени ортаға белсенді араласуына жол ашқан жарқын жобалардың біріне айналды.<img src="https://knadmin.beoblood.kz/uploads/FB_IMG_1791135144147_9b3a409ca3.jpg" alt="FB_IMG_1791135144147.jpg">

Шиеліде «АУЫЛ VIBE, RETRO NIGHT» жобасының жеңімпаздары марапатталды 

<a href="https://kyzylorda-news.kz/">Kyzylorda-news.kz</a> Қазалы ауданында «Таза Қазақстан» республикалық экологиялық акциясы аясында күзгі санитарлық тазалық жұмыстары қарқынды жалғасуда.Бүгін аудан орталығы Әйтеке би кентінде жүргізілген кезекті сенбілік барысында Жасыл белдеу алаңы, Т. Бөріқұлақов, Ж. Шеріпов, Ж. Аймауытов және Мағзаман әулие көшелерінде тазалық жұмыстары жүргізілді.Сенбілік барысында аталған аумақтардағы қоқыстар тазаланып, бейберекет өскен шөптер шабылды. Тазалық жұмыстарына мекеме қызметкерлерімен қатар аудан тұрғындары да белсенді қатысып, қоршаған ортаны абаттандыруға өз үлестерін қосты.<img src="https://knadmin.beoblood.kz/uploads/FB_IMG_1791134349543_1c75454573.jpg" alt="FB_IMG_1791134349543.jpg">Аудан орталығында ұйымдастырылған сенбілік жұмыстарын аудан әкімі Алмасбек Есмаханов аралап көріп, Әйтеке би кентінің әкімі мен тазалыққа жауапты сала басшыларына бірқатар тапсырмалар жүктеді.Жалпы сенбілік жұмыстарына аудан бойынша 136 мекемеден 1 372 адам және 16 техника жұмылдырылды. Атқарылған жұмыстар нәтижесінде полигондарға 16,2 тонна қоқыс шығарылды.Күзгі санитарлық тазалық шаралары аудан орталығымен қатар барлық ауылдық округтерде де жалғасты.

Қазалыда күзгі санитарлық тазалық жұмыстары қарқынды жүргізілді 

<a href="https://kyzylorda-news.kz/">Kyzylorda-news.kz</a> Халықаралық қарттар күніне орай қала әкімдігінің және &nbsp;қалалық ардагерлер кеңесінің ұйымдастыруымен ардагерлер облыс орталығында бой көтерген және құрылысы жүріп жатқан бірқатар ірі нысандарды аралап, атқарылып жатқан жұмыс барысымен танысты.Алдымен ардагерлер «Қызылорда арена» спорт кешенінің құрылыс алаңына барды. Заманауи спорт нысанында халықаралық стандарттарға сай 50 метрлік бассейн, футзал, баскетбол және волейбол залдары, конференция залы қарастырылған. Кешеннің құрылысы аяқталғаннан кейін мұнда ұлттық құрамалардың оқу-жаттығу жиындарын өткізуге, Азия және әлем чемпионаттары сынды халықаралық деңгейдегі спорттық жарыстарды, сондай-ақ мәдени-көпшілік іс-шараларды ұйымдастыруға мүмкіндік туады. Спорт кешенінің құрылыс барысымен танысқан ардагерлер жаңа кешен өскелең ұрпақтың спортпен айналысып, жастардың бос уақытын тиімді өткізуіне және тұрғындар арасында салауатты өмір салтын қалыптастыруға мүмкіндік беретінін атап өтті.Бұдан кейін қазыналы қарияларымыз Президент саябағы маңында бой көтеріп жатқан 9 қабатты 15 көппәтерлі тұрғын үйдің құрылыс жұмыстарын көрді. Жоба аясында барлығы 945 пәтер пайдалануға беріледі. Сондай-ақ, осы саябаққа қарсы беттегі «Еңбек» саяжайы аумағына 1 936 пәтерлі 9 қабатты 22 тұрғын үй түсуде. Аталған аумақтар алдағы уақытта жаңа тұрғын аудандарға айналады. Шаһарда тұрғын үй құрылысы еселеп артып, баспана кезегінде тұрған азаматтарды тұрғын үймен қамту бағытында ауқымды жұмыстар атқарылуда.Биыл бюджет қаражаты есебінен жаңа пәтерлер сатып алынып, ипотекалық бағдарламаға қатысушылар мен әлеуметтік көмекке мұқтаж жандар баспаналы болады. Жаңа тұрғын үй кешендерінің құрылысымен танысқан ардагерлер шаһардың сәулеттік келбетінің жаңарып, тұрғындарға қолайлы орта қалыптасып келе жатқанын жеткізді. Заманауи тұрғын үйлер қаланың көркіне көрік қосып, Сыр шаһарының жаңа келбетін қалыптастыруға үлес қосатынын да атап өтті.Сапар барысында ардагерлер Ботаникалық бақ пен Президент саябағын да аралады. Ботаникалық бақта веерлі пальма, Канар құрмасы, кактус пен алоэ, вашингтония пальмасы, стрелиция, жакаранда, алып юкка, мақта ағашы, бамбук, кариота секілді сирек кездесетін өсімдіктер жайқалып тұр. Өсімдіктердің табиғи ортаға бейімделіп, жыл он екі ай сақталуы үшін нысан микроклиматты автоматты басқару және заманауи суару инженерлік жүйелерімен жабдықталған. Бақтың тыныс-тіршілігімен танысқан ардагерлер мұндай нысандардың қаланың экологиялық мәдениетін қалыптастыруда және ішкі туризмді дамытуда маңызы зор екенін айтты. Сонымен қатар, тұрғындар мен қала қонақтарының демалып, табиғат аясында уақыт өткізуіне қолайлы жағдай жасалғанын атап өтті.Қаладағы жаңарған нысандарды аралаған ардагерлер шаһардың архитектуралық келбетінің заманауи бағытта өзгеруіне, спорттық, мәдени және демалыс орындарының көбеюіне оң бағасын берді. Сапар соңында ардагерлерге «Ақ Отау» мейрамханасында сый-құрмет көрсетілді. Қариялар Сыр елінің игілігі жолында атқарылып жатқан жұмыстарға ақ батасын беріп, ел дамуына бағытталған бастамалардың нәтижелі болуына тілектестік білдірді.<img src="https://knadmin.beoblood.kz/uploads/FB_IMG_1791012507364_e890a4324e.jpg" alt="FB_IMG_1791012507364.jpg">

Ардагерлер бірқатар нысанды аралады 

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаев Қызылорда гарнизонындағы әскери бөлімдер мен нысандарды аралады.Алдымен ҚР Қорғаныс министрлігінің 66597 әскери бөліміне барды. Мұнда 526 әскери, оның ішінде 42 мерзімді әскери қызметші және 17 азаматтық қызметкер бар. Сондай-ақ 107 техника пайдаланылуда.Аталған министрлікке қарасты 99215 әскери бөлімінде инфрақұрылымды жетілдіру жұмыстары жергілікті бюджет қаражаты есебінен жүргізілуде. Бұл мақсатқа 2024 жылы 278,8 млн теңге, өткен жылы 369,8 млн теңге, биылға 151 млн теңге бөлінген. Бөлімде 6 ғимарат бар, жеке құрамда 90 әскери қызметші және 10 азаматтық қызметкер еңбек етеді.<img src="https://knadmin.beoblood.kz/uploads/FB_IMG_1791012088812_c8043feccb.jpg" alt="FB_IMG_1791012088812.jpg">Келесі нысан – ҚР Ұлттық қауіпсіздік комитеті Шекара қызметінің Қызылорда облысы бойынша департаменті. Құрылымдық бөлімшелерін қоса есептегенде 118 ғимараты, жеке құрамында 700-ден астам әскери қызметші және 90-нан аса азаматтық қызметкер бар. Мерзімді әскери қызметшілер жоқ.Аймақ басшысы Ұлттық ұланның 5547 әскери бөліміндегі жағдайды да көрді. Мұндағы жеке құрам 540 әскери қызметшіден және 3 азаматтық қызметкерден құралған. Осы бөлімге қарасты әскери атыс алаңы 70 гектар жерде, аумағында 5 ғимарат орналасқан. Атыс алаңында 3 әскери қызметші және 4 мерзімді әскери қызметші жұмыс істейді.<img src="https://knadmin.beoblood.kz/uploads/FB_IMG_1791012103760_2fce7e172c.jpg" alt="FB_IMG_1791012103760.jpg">

Қазақстан және Қызылорда облысының жаңалықтары: Қоғам