<a href="https://kyzylorda-news.kz/">Kyzylorda-news.kz</a> Сыр шежіресі сонау 1904 жылдан бастау алатын Жосалы теміржол вокзалы осы кезең аралығында сапарға шыққан талайдың құтты тұрағы болып, қызметін әлі күнге дейін үзбей көрсетіп жатыр. Вокзал үйін бір көргеннен-ақ кімге болсын көненің көзіндей тарихи ғимарат екенін анадайдан еске салады. Бұл Қазан көтерілісіне дейін Ресей патшасы ІІ Николайдың бұйрығымен Ресей қалалары мен Тәшкен аралығында жолаушы, жүк тасымалы байланысын орнату мақсатында салынғанын аға ұрпақ өкілі жақсы білгенімен, кейінгі буынға таныс болмауы мүмкін. Дегенмен басы жолаушы шуылынан &nbsp;тынбайтын вокзалдың халыққа қызмет етудегі де, тарихи жәдігер ретіндегі де маңызы ерекше екені ақиқат дүние. Вокзал демекші, бүгінде ғимараттың бірнеше зал, бөлмесі бар. Атап айтқанда, күту залы, билет сату, ақпараттық-анықтама, асхана бөлмесі, сауда орталығы, дәріхана, полиция бөлімшесі қызмет көрсетіп тұр.Теміржолшылар мерекесінде аталған мекемеге бас сұғып, қазіргі жай-күйімен танысуды жөн санадық. Осы ретте Жосалы теміржол вокзалының бастығы, «Кәсібі бойынша үздік» атағының иегері Денис Хамовпен жүздесіп, әңгімелескенбіз.Алдымен оның аз-кем еңбек жолына тоқтала кетейік. Д.Николаевич теміржол саласының білікті маманы. 1998 жылдан бері, яғни салада 26 жыл қызмет етіп келеді. Басшылықтың сенімімен 2012 жылы вокзал бастығы лауазымына тағайындалған. Теміржолда жастайынан тәжірибе жинақтаған ол басшылық қызметке дейін бірқатар сатыдан өтіп, абыройлы еңбек еткен. Атап айтар болсақ, анықтама беру бойынша кезекші, анықтама бюросының агенті, вокзал бойынша кезекші, вокзал бастығының кезекші көмекшісі жұмыстарын атқарып, мамандығының сыры мен қырына қаныққан. Орта мектептен соң Алматыдағы Қазақтың Транспорт және коммуникация академиясына оқуға түсіп, оны 2010 жылы бітіріп шығады.&nbsp; Бір айтарлығы, Хамовтар отбасын теміржолшылар отбасы деп те айтуымызға негіз бар. Өйткені оның анасы Валентина Ким осы саланың майталманы. Саналы ғұмырының 35 жылын теміржолға арнаған ардақты жан.<blockquote>– Валентина Борисовна менің анам. Бүгінде зейнет демалысында. Ұзақ жылдар вокзал бастығы болып қызмет істеді. Бұл қызметтің тұтқасын ұстау анамнан кейін маған бұйырды. Бала күнімнен анамның қасында жүріп, вокзал жұмысына қанықпын. Қандай жауапкершілігі мен талабы болатынын көзбен көріп өскенмін. Сол үшін де теміржол маған таңсық болған емес, – дейді ол сөзін әрі қарай сабақтап. &nbsp;</blockquote>– Біздің вокзал 3 сыныпты катергорияға жатады. Жоба бойынша 200 жолаушыға арналған. Барлық қауіпсіздік шарасы сақталып, 24 сағат бойы электр энергиясымен қамтамасыз етіліп тұрады. Жолаушы пойызының келу, жүру уақыты алдын ала кезекшілікпен құлақтандырғыш арқылы хабарланады. Вокзал көпшілік орны болған соң тазалыққа &nbsp;мән береміз. Қажетті инвентарь, арнайы киім формасы міндеттелген. Тұрғындардың өмір қауіпсіздігін қамтамасыз етуде жолдың арғы бетіне өтуге аспалы көпір салынған. Жолаушының сұранысын қанағаттандыруда билет кассасы жоғары рөл атқарады. Ол заманауи технологиямен жабдықталған. &nbsp;Енді вокзал қызметкерлеріне келер болсам, ұжымда 12 адам еңбек етеді. Оның бесеуі – Индира Жұмабекова, Саламат Жайсаңбаев, Ғазиза Алтаева, Дәурен Тілеген, Айгүл Алпановалар анықтама беру бойынша қызмет көрсетсе, алты адам – Мақсат Басшыбаев, Азат Матжанов, Жарқын Сүлеева, Эльмира Кушманова, Самат Мархабаев және Гауһар Сүлейменовалар вокзал бастығының кезекші көмекшілері болып істейді. Бір адамымыз – Жаңабек Үсенбай электр жөндеуші. Вокзал бастығының кезекші көмекшілері пойызды шығарып салады. Перронда қауіпсіздік жағдайларына жауапты. Халыққа көмектеседі. Мысалы, мүмкіндігі шектеулі кісілер болып жатса, соларға жәрдем береді. Өзімізде оларға арналған арба бар. Қажет болған жағдайда соны шығарып береді. Егер қасында көмекші адамы болмаса, біздің қызметкерлер сүйемелдеп пойызға мінгізіп салады.Әрине, алға қойған көптеген жоспарымыз бар. Солардың ішіндегісі – келесі жылы бұйырса вокзалға толықтай заманауи үлгіде жөндеу жұмыстары жүргізілмек. Қазір бұл процесс қалаларда жүріп жатыр. Келешекте де өзімізге белгіленген міндеттерді адалынан атқарып, халыққа сервистік қызмет сапасын арттыруға атсалыса беретін боламыз. Сонымен қатар мақаланы пайдаланып, барша әріптестерімді саланың 120 жылдық мерейтойымен құттықтасам деймін. Қызметтеріне табыс, отбасыларына бақ-береке, елімізге тыныштық пен бейбітшілік тілеймін. Жаңа Қазақстанымыз жаңарып, жасарып, жаңғыра берсін, – дейді вокзал басшысы әріптестеріне жылы лебізін арнап.«Ел ағасыз, тон жағасыз болмайды» дегендей, бірлігі жарасқан ұжымның ардагерлері жастарға әркез ақылын айтып, кеңес беруден аянып қалған емес. Әсіресе Әсем Маханова, Валентина Ким, Гүлсім Аймағамбетова, Айша Ембергеновалар жас мамандардың жанашырлары, бағыт-бағдар сілтеп отырушы ұстаздары. &nbsp; &nbsp; &nbsp;Өз ісін жетік меңгерген Денис Хамовтың еңбегі ескерусіз емес. Өткен жылы әріптестері арасында оның озық тәжірибесі назарға алынып, «Қазақстан теміржолы» Ұлттық компаниясы» акционерлік қоғамының &nbsp;«Кәсібі бойынша үздік» атағына ие болып, құрметке бөленген-ді. Бұл оның ширек ғасырдан аса уақыт еткен еңбегіне берілген баға деп білеміз.&nbsp; «Еңбек ерлікке жеткізер, ерлік елдікке жеткізер» демекші, Жосалы вокзалының ұжымы жайлы облыстағылар да оң пікірде. Олар әркез белсенділік танытатын аудандағы әріптестерінің жолаушыларға көрсететін қызметтері мен кәсіби біліктіліктері және озық тәжірибелерін үлгі санайды.&nbsp;Сәрсенкүл АҚКІСІ

Жосалы вокзалының жұмысы жүйелі

<a href="https://kyzylorda-news.kz/">Kyzylorda-news.kz</a> Сонау ерте заманнан бастау алған елдің елдігін танытатын дегдар азаматтарды танып білу мен оларды ұлықтау ата-баба дәстүрінде орын алған. Бейтаныс екі адам кездескенде жөн сұрасып «еліңде кімің бар» деп сұрайтын екен. Ал сөздің түп төркінінде халықтың сапасы, елдің айбыны туралы білгісі келетіні түсінікті. Өйткені елдің келбетін тұлғалар қалыптастырған.Тәуелсіздігіміздің елең-алаң тұсында елдің көшін түзеп, жас мемлекеттің іргесін бекітуде Қармақшы ауданы бойынша негізгі тұлғалардың бірі болған Нажмадин Ысқақов аға десем қателеспеспін деймін.Өмірде көргені мен түйгені көп, қызметтің талай сатыларынан өткен, ауданымыздың және көрші Жалағаш ауданының бірнеше басшыларымен, абзал азаматтарымен қызметтес болған, өзі де басшылық қызмет атқарған, еңбекте мақтан тұтарлықтай ізбасарлар тәрбиелеген, өмірде адамгершілік пен азаматтықты бәрінен биік қойған, қандайбір жетістігі болсын мақтанбаған, еңбегін пәлденбеген, табысының ішкі сырын айтып жар салмайтын азаматтардың бірі емес, бірегейі бүгінде туғанына 90 жылдың белесіне шыққан Нажмадин аға туралы қысқа мақалама арқау етпекшімін.Елдің елдігін сақтап, халыққа қалтқысыз қызмет еткен Н.Ысқақов қуғын-сүргіні көп, аумалы-төкпелі қиын қыстау кезеңде 1934 жылы &nbsp;Ақжар ауылында өмірге келген. Балалық шағы осындай қиын кезеңге тура келгенмен, саналы да салауатты азамат болып өсіп, еңбек етудің де, елге қызмет етудің де, қоғамдық жұмысты жандандыра отырып, ауданның үлкен-кішісінің басын біріктіріп ынтымақты өмір сүрудің де үлгісін көрсете білді.Алғашқы еңбек жолын 1953 жылы №28 Бестам орта мектебін бітіргеннен кейін Қазақстанның 30 жылдығы ұжымшарында бастаған. Одан кейінгі өмір жолында Алтай өлкесінің Барнаул қаласындағы ауыл шаруашылығы институтына түсіп, 1960 жылы ғалым-зоотехник мамандығын алып, «Туған жерге туыңды тік» деген ата жолымен елге оралған.1960-1964 жылдары Жалағаш ауданының «Коммунизм», Қармақшы ауданындағы «Октябрь» әскери кеңшарында бас зоотехник, 1964 жылдан Қармақшы аудандық өндірістік басқармасы бастығының орынбасары, 1965 жылдың қаңтар айынан Қармақшы аудандық ауыл шаруашылығы басқармасының бастығы, 1971 жылдың мамыр айынан Қармақшы аудандық Кеңес атқару комитетінің төрағасы қызметтерін абыроймен атқарған.Ортақ мүдделі қызмет саласында өзара сеніммен, сыйластықпен, түсіністікпен, үйлесімділікпен іскерлік қарым-қатынаста халық, мемлекет үшін нәтижелі, абыройлы, жанашырлықпен еңбек етті. Өзінің іскерлігі мен кәсіби біліктілігінің арқасында мәселе орынды шешілетін. Күннің ыстығы демей егіншілердің, шалғайда демей әрбір малшылар ауылындағы отарларда болып, егінші, малшылар қауымының тыныс-тіршілігін, егін мен малдың жайын тұрақты бақылауда ұстап отыратын. Орын алған кемшіліктерге немқұрайдылық, салғырттық танытпайтын, оны нақты ойын көрсетіп, түсіндіріп, жедел іс жүзінде тиісті шараларды іске асыруға ықпал ететін. Тағы бір ерекше қасиеті – қандай қиыншылық кездессе де қаймықпай, шаршамай, соны шешудің жолын іздейтін. Оны жеңу үшін одан сайын жігерленіп, бастаған істі аяғына дейін жеткізетін. Сол кезеңде аудандағы өндіріс, құрылыс, транспорт, коммуналдық қызмет, әлеуметтік салалардың жұмысы да дамуда болды. Әрқайсысында жүздеген еңбеккерлер жұмыс жасаған тікелей Кеңес Одағы Геология Министрлігіне қарайтын өз елімізден басқа 13 шет елге өнім жіберетін Жосалы механикалық зауыты, Жосалы жол дистанциясы, Қазақстан бойынша &nbsp;үш өндіріс орнының бірі болған №42 рельс пісіру пойызы және су саласы мен күрделі құрылыс, транспорт мекемелері өз жоспарларын артығымен орындауға қол жеткізді. Халықтың тұрмыс-тіршілігі жақсарып, оларға қызмет көрсететін әлеуметтік салалардың жұмыстары жандана түсті, елді мекендер көркейіп өсті.Бұл жұмыстардың барлығының басында тікелей атқарушы, үйлестіруші орган болып саналатын аудандық Кеңес атқару комитетінің төрағасы Н.Ысқақов тұрды.Туған жерге, елге деген қызмет жауапкершілік жүгін одан әрі арттыра түсіп, 1981 жылдың ақпан айынан Қызылорда облысының ауыл шаруашылығы өнімдері сапасын тексеру инспекциясының басшысы, 1982 жылдың наурыз айынан Жалағаш ауданы «Жаңадария» кеңшарының директоры, 1989 жылдың мамыр айынан Қармақшы аудандық тұрмыс қажетін өтеу комбинатының директоры қызметтерін абыроймен атқарды. Облыстық партия комитетінің бірінші хатшысы Е.Әуелбеков мал шаруашылығын өркендетудегі кеңшар жұмысымен танысып, зор бағалап кеңшарда облыстық семинар- кеңес өткізіп, тәжірибесін бүкіл облыс шаруашылықтарына үлгі-өнеге етіп көрсетті. 1994 жылы қараша айында республикалық дәрежедегі дербес зейнеткер ретінде демалысқа шықты.Халыққа мінсіз қызмет ете жүріп аудандық, облыстық партия комитетіне &nbsp;бірнеше рет мүше болып сайланды, аудандық комитетінің бюро мүшесі болды. 9 рет аудандық, 7 рет облыстық Кеңестің депутаты болып сайланды. &nbsp;«Еңбегіне қарай құрметі» демекші, мемлекетке, ел-халыққа сіңірген елеулі еңбегі ескеріліп, қызмет еткен жылдары бірнеше мемлекеттік наградалармен марапатталды.«Еңбек Қызыл Ту», 3 мәрте «Құрмет белгісі» орденімен, Қазақ КСР Жоғарғы Кеңесінің «Құрмет грамотасымен» және бірнеше рет «Халық шаруашылығын дамытудағы үздік жетістіктері үшін», «Тыңға – 50 жыл», «КСРО азаматтық қорғанысының үздігі», «Еңбек ардагері», «С.Королев атындағы», «Қазақстан Республикасы Конституциясына – 10 жыл», «1941-1945 жылдардағы ҰОС жеңісінің» бірнеше мерекелік медальдары мен төсбелгілерінің иегері болды.&nbsp;Есімі «Дәуір» баспаханасынан шыққан «Қазақ жерінің зиялы азаматтары» атты ғұмырнамалық жинақтар сериясына алтын әріптермен жазылды. Ауданымыздың жан-жақты өсіп, өркендеуіне қосқан үлесі, халықтың сенімі мен қолдауы ескеріліп аудан бойынша төртінші болып «Қармақшы ауданының Құрметті азаматы» атағы және Жосалы кентінен көше атауы берілді.Мемлекеттік қызметтен құрметті демалысқа шыққаннан кейін де дамыл тапқан жоқ. Ауданның қоғамдық-саяси өміріне белсене араласты. Тәуелсіздігіміздің алғашқы жылдарында экономикалық дағдарыс орын алып, халықта күнделікті мұқтаждық мол болып, біздің егемендігімізге сызат түсіп жатқан уақытта ауданның ардагерлер қауымы Н.Ысқақовқа үлкен сенім артып,өздерінің көшбасшысы, яғни аудандық ардагерлер кеңесінің төрағасы етіп сайлады. Ол кісі қабылдауға келгендердің өтініш, тілектерін байыппен тыңдап, жеке түсіндіріп, тиісті орындарда шешудің жолын қарастырып, ел ағасы ретінде өзінің біліктілігі мен тәжірибелігін көрсетті. Алда жүрген ағаларына да, артынан ерген інілеріне де сырлас, ақылшысы бола білді. Ауданның үлкен-кішісінің басын біріктіріп, ынтымақты өмір сүрудің үлгісін көрсетті, тәуелсіз мемлекетіміздің абырой-беделін көтеруге атсалысты, елеулі үлес қосты. «Адам ғұмыры ұзақтығымен ғана емес, мазмұнымен өлшенеді» деген қасиетті сөз Нәкеңе арнап айтылғандай. Елге жасаған еңбегі, іскер басшылығы, адамға қамқорлығы, белсенді жұмысы, қайбір іс болмасын әділеттігі мен принципшілдігі онымен қызметтес, әріптес, сыйлас, ниеттес, тілектес болған қаншама жандардың көкейінде жаңғыруда. Батыл жүректілігімен, ер мінезділігімен, құйма құлақтылығымен, естігені мен оқығанын өмірі ұмытпайтындығымен &nbsp;де ерекшеленетін. Бір кісіні сұрасаң оның жоғары тегіне дейін, нағашысы мен жиеніне дейін талдап беріп таң қалдыратын. КСРО мен Қазақстанның Жоғарғы органдарында қаулы-қарарлардың қабылданған уақыты мен санына дейін жадында ұстап, жеткізіп отыратын.Жеңгеміз Омарова Ұмсын екеуі 5 баланы өмірге әкеліп, тәрбиелеп, әртүрлі мамандықтардың иесі атанды. Отбасы берекелі, қай уақытта барсаң да дастарқаны жаюлы. Табалдырықтан аттағандарды ықылас-пейілмен қабылдайтын. Қасиетті шаңырағында талай абыз ақсақалдар, ел басқарған азаматтар, әскери басшылар мен өнер иелері болып, өздерінің игі тілектерін жеткізіп, ақ баталарын беріп кететін. Қазір соңына ерген, бірге жүрген азаматтар Нәкең дастарқан басында бірге отырып ас ішетін кісілер болмаса, шайды да іше бермейтін деп еске алады.Нәкең 2010 жылы өмірден өткенде облыс әкімі мен облыстың ардагерлер кеңесінің төрағасы бас болып келіп, аудандық мәдениет үйінің алдында бірнеше жүздеген адамның қатысуымен қоштасу митингісі өтті. Мемлекет пен қоғам қайраткері, облыстың бас ардагері, ақсақалы Сейілбек Шаухаманов Нәкеңнің бүкіл елге еткен еңбегіне, адами қасиетіне, жалпы болмысына жан-жақты тоқталып, биік баға беріп «Нәке рухың есітіп жатқан шығар бұл өмірдегі соңғы сағатыңа дейін төраға болып кеттің, мәңгілік жайыңда да жаның жәнатта болып, төрағалықта қалатын шығарсың» деп жүрекжарды көңіл айтуын бүкіл қауымға жеткізген болатын.Елге кіршіксіз қызмет жасап, терін төккен, ақсақалдықтың үлгісін көрсеткен Нәкеңнің есімі – ел есінде мәңгілік сақталады деген осы болса керек. Ағаның жаны жәнатта, алды пейіш, арты кеніш болып, ұрпақтары өсіп-өркендеп биік мақсаттарына жете берсін демекпін.<figure class="image"><img src="https://knadmin.beoblood.kz/uploads/3af59b7e_1562_4685_b61c_6ef38be88ee4_61ece4afca.jpeg" alt="3af59b7e-1562-4685-b61c-6ef38be88ee4.jpeg"></figure> &nbsp;Әбдірахман ҚҰЛДҮЙСЕНОВ, Қармақшы ауданының Құрметті азаматы, аудандық Қоғамдық кеңесінің төрағасы

Ғибратты ғұмыр иесі 

<a href="https://kyzylorda-news.kz/">Kyzylorda-news.kz</a> Қармақшы ауданына қарасты Ақай ауылының тұрғыны Мейрамкүл Рыспанбетова Сексек ата тұқымын бағып өсіруде. Өткен жылы «Ауыл аманаты» бағдарламасы арқылы несие алып, Шымкент қаласынан 15 бас Заанен ешкісін сатып алған. Бүгінде асыл тұқымдылардан төл алып, сүтін сату арқылы пайдасын көріп отыр.«Пико, келе ғой мында» деді Мейрамкүл апай секеңдеген тентегін шақырып. Бұл қорадағы асыл тұқымды Заанен ешкілерінің ішіндегі ақылдысы. Суреттен көргеніңіздей адамнан қашпайды. Әлгі ешкіміз сөзді түсінгендей біз тұрған шарбаққа жақындап, дауыстап шақырған иесіне мойнын созып еркелей кетті. Ар жағында Сүтті қыз, Лиза, Мая, Даша, Саша ешкілері келгенімізге үрке қарап, қорада қашып жүр.<blockquote>– Бұған дейін жергілікті тұқымды ешкілерден екі бас асырап көрдім. Олар жақсы сүт берді. Содан кейін мал ұстауға қызығушылығым оянды. Екі басқа арнап салған тар қораны кеңейтіп, кәсіпкерлерге қолдау болған бағдарламамен ешкі санын көбейттім. Әр істің қиыншылығы қатар жүреді демекші сатып алған 15 ешкінің екеуі өліп қалды. Қалғанын ағамның үйіне бөліп ұстап, бағудамыз. Бұлар асыл тұқымды болғаннан кейін ерекші күтімді қажет етеді. Жылына бір рет егіз төлдейді. Көктемде төлдесе жаз бойы сауылады. Алғашында сүтті жақсы алдық, қазір аздан беріп жүр. Сүтінен құрт, май алып тұрақты тұтынушыларымызға қол жетімді бағада сатамыз, – дейді кәсіпкер.</blockquote>Мейрамкүл апамыз қорадағы тазалықты бірінші орынға қойған. Арнайы соғылған қора-жайы тап-тұйнақтай. Лақтарын бөлек, сауын ешкілерін бөлек ұстайды. Ешкілердің де жүндері тықыр, түріне қарап сүйсінесің. Бәрі иесін тыңдайды. Аттарын атап шақырғанда қасына келе қалады. Соның ішінде кейіпкеріміз Пикосын ерекше жақсы көретінін де жасырмады.<blockquote>– Ешкілерді сатып алуға барғанда ең бірінші Пико адамды танығандай маған келді. Содан бері бір-бірімізге жақынбыз. Айтқанды тыңдайды. Басқаларында өз аттарымен еркелетемін. Күнделікті жем-шөбін есеппен береміз. Жалпы ешкінің тамағына бей жай қарасаң, саған сүтін де солай береді. Сол үшін арпа, сұлы, биокорм беріп, жақсы сүт алудың қамын жасаймыз, – дейді ол.</blockquote>Бүгінде ешкінің сүті мен жүнінің пайдасы зор екенін білсек те, бұл шаруаны қолға алып, кәдеге жаратып отырған кәсіпкерлер аз. Мал шаруашылығымен айналысатын көпшілік саудаға сиыр сүтін шығарады. Ешкі бағатындар жоқтың қасы. Қазақ «Есің кетсе, ешкі жи» деген. Түсінген адамға сөздің астарында көп мағына бар. Негізінде ешкінің күтімі тәуір болса басы тез көбейеді. Ал сүтінің айрықша құнары ұшан теңіз. Адам ағзасына пайдасы өте жақсы, ауруға бірден-бір ем. Ешкінің сүтінде кальций көп. Бұл әсіресе балаларға өте пайдалы. Жаңа сауылған ешкі сүтінің тағы бір қасиеті – оның қуаты 4-5 сағатқа дейін ішектегі жағымсыз бактерияны жоюға қауқарлы.Кейіпкеріміздің кәсібін танығандар бүгінде таңсық тағамның құнарын түсініп тапсырыс беруде. Ал шетелдік ғалымдар ешкі сүтінің ерекшелігін ескеріп, оны пайдаға асыруды әлдеқашан жолға қойған.Ерсін СӘДУҰЛЫ

Ешкі баққан кәсіпкер

<a href="https://kyzylorda-news.kz/">Kyzylorda-news.kz</a> «Мағжан Жұмабаевтың «Мен жастарға сенемін» деген сөзі бар. Шын мәнінде, мен де жастарға сенемін. Баршаңызды қолдаймын. Расында, елімізге сіздер секілді белсенді, білімді, көзі ашық, көкірегі ояу жастар керек. Еліміздің болашағы жастардың қолында» деген болатын Ел Президенті Қасым-Жомарт Тоқаев. Расымен де, еліміздің болашағы жастардың қарымды қадамымен тығыз байланысты. Сондықтан іске асып жатқан реформалардың негізгі басымдығы жастар саясатына байланысты. Айдынды өлкенің ізденімпаз, өнерлі жастары да өздерін жақсы жағынан көрсетіп жүр.&nbsp;Статистикалық мәліметке сүйенсек, Арал аудан халқының 25 473 тұрғыны 14 пен 35 жас аралығындағы жастар. Бұл жалпы халықтың 24,8% пайызын құрайды. Оның ішінде ауыл жастары 15 747 жан. Ауданда орта арнаулы оқу орындарында 696 студент білім алуда. Ал 14-18 жас аралығындағы оқушылар саны – 7207.Аудан жастарымен тығыз байланыста жұмыс істейтін AILAQ жастар ресурстық орталығы көпшілікке өзінің атқарған жұмыстарымен танымал. 18-35 жас аралығындағы жандардың негізгі мәселелерін көтеріп, оларды шешу жолында қызмет ететін орталықта барлығы 22 адам жұмыс істейді. Сонымен бірге, Сексеуіл кенті мен ауылдық округтерде жастар саясатын жүзеге асыру арнайы мамандарға жүктелген.<blockquote>– AILAQ жастар ресурстық орталығы жастар үшін түрлі танымдық, ақпараттық, мәдени шаралар ұйымдастырып тұрады. Мысалы, I жартыжылдықтағы мәлімет бойынша түрлі бағыттағы 136 шара &nbsp;ұйымдастырылып, оған 5827 жас қамтылды. Жыл көлемінде орталық 12 бағыт бойынша жоба әзірледі. Атап айтар болсақ, «Жас маман» жобасы бойынша 16 кездесу, «Дін және жастар» жобасы мен «Еріктілер мектебі» жобасы бойынша 50 аясында шара өткізілді. «Жастар қоғам назарында» жобасы тақырыбында 14 рейд жұмысы жүрді. Және жыл сайын тұрақты түрде болатын «Мен спортты таңдаймын», «Жас сарбаз», «Жас кеңесші» жобалары ұйымдастырылды. Кәсібін жаңадан бастаған жас кәсіпкерлер де назардан тыс қалмады, оларға «Jas kasipker» жобасы ұсынылды. Қай саладан болмасын, мамандар да, біздің орталық та жастарға жол көрсетуден, көмек қолын созудан әсте жалықпаймыз, – дейді &nbsp;AILAQ жастар ресурстық орталығының басшысы Ақтілек Есекеев.</blockquote>Аудандағы жұмыссыз жастардың санын азайту мәселесі де бір жолға қойылып отыр. I жартыжылдықтағы мәлімет бойынша, жұмыспен қамту орталығына 813 адам жұмыссыз ретінде тіркелсе, оның 307-сі жас жерлестер. Сонымен қатар, &nbsp;«Жасыл Ел» еңбек жасағында маусымдық жұмыс істеп жатқан сарбаздар саны 100 жасты құрауда. Сонымен қатар, «Отбасылық цифрлық картасы» аясында NEET санатындағы жастармен жұмыс жүргізіліп, базадағы сауалнамаға 815 жас қатысып, нәтижесінде 474 жас жүйеге енгізілді. Алдағы уақытта жастармен тығыз байланыста атқарылған жұмыстар жалғасын таппақ.Иә, AILAQ жастар ресурстық орталығының жастар болашағы үшін атқарған жұмысы жетерлік. Абыройлы еңбек етіп жүрген жастардың еңбегі еленіп, алдағы уақытта биік белестерді бағындыруына тілекшіміз. О.ЖОЛДАСОВ

Арал: Белсенді жастардың биік белесі 

<a href="https://kyzylorda-news.kz/">Kyzylorda-news.kz</a> Қармақшы ауданына қарасты Ақай ауылына барған сапарымызда тұрғындар көгілдір отынның тиімділігін тілге тиек етті. Жыл сайын көмірдің кезегінде тұрып шаршаған жұрт көгілдір отынды асыға күткенін айтады.&nbsp;Қарап отырсақ, біздің тіршілігімізге жан беріп тұрған – жарық, газ. су. Осы үшеуіне жұмсалған коммуналдық төлем адал деп жатамыз. Әсіресе күз-қыс айларында аудан тұрғындары үшін қай-қайсысы да сөнбеуі керек. Осы ретте Жосалы кенті үшін 3 жылдан бері көгілдір отын маздап тұр. Тұрмыс тауқыметі жеңілдеп, өркениетке қарай қадам басып келеміз.&nbsp; &nbsp; Мұндай игілікке қадам басқан елді мекеннің бірі – ауданға қарасты Ақай ауылдық округі. Құрылыс жұмыстары 2022 жылдың тамыз айында басталып, 2023 жылдың 1 қарашасында толық аяқталған. Газ құбыры мен газ тарату желілерінің құрылысын «AKBARS Stroy Ltd» &nbsp;ЖШС мердігер мекемесі атқарған. Былтыр желтоқсан айында көгілдір отын іске қосылып көпті қуантты. Жалпы Ақай ауылдық округінде 1166 үй болса, бүгінгі таңда 648 үй толығымен газға қосылған. Құжатын қамдап, қосылуға дайын отырғандар да жетерлік дейді мамандар. &nbsp;<blockquote>– Бізге пеш жағып, күл шығарудан бұрын отын табу қиын еді. Күзге таяу көмір алу үшін ұзын-сонар кезек &nbsp;болады. Жыл өткен сайын бағасы да қымбаттай түсетін еді. Сондайда от жағып, күл шығармайтын қала тұрғындарына қызығатынбыз. Қазір ол күнге өзіміз де жеттік. Жылда жаз басталса қыстың қамына кірісіп отын, көмір іздейтін едік. Көптен күткен көгілдір отынның пайдасына кенелудеміз. Енді біз де отын жарып, пешке от жағып, күл шығармайтын болдық. Әсіресе әйелім мен келіндерімнің қуанышында шек жоқ. Олар қолдарын ыстық суға малып, жылы үйде уайымсыз тіршіліктерін қамдайтындығына дән риза. Тұрмыс тауқыметі азайып, халықтың әлеуметтік-тұрмыстық жағдайы жақсарды деген осы емес пе? Қазір алыстағы ауылдардың өзі өркениетке қарай оң қадамдар жасап жатыр. Жақында Төретам кенті де газға қосылмақ. Мұндай игілікті істердің қатары арта берсін, – дейді ауыл тұрғыны Қазбек Күншығаров.</blockquote>Көгілдір отын барда көңілдің отының да маздап тұратыны шындық. Ендеше осы игіліктің олқы болмауы жолында аянбай тер төгіп жүрген азаматтарға жұрт алғысы қашанда мол деп батыл айта аламыз. Олардың табысы қаулап, әр үйде газ лаулап тұрсын деп тілейік.&nbsp;Ардақ СӘКЕНҚЫЗЫ

Ақай ауылы көгілдір отынмен қамтылды

<a href="https://kyzylorda-news.kz/">Kyzylorda-news.kz</a> Жас болса да чемпион тәрбиелеп жүрген жанның бірі – Гүлайым Нұрмаханова. Ол жастарды спортқа баулып қана қоймай, жігерлендіріп, рухани күш-жігер беріп, отансүйгіштікке, намысшылдыққа, сергектікке тәрбиелеп жүрген ұстаз. Гүлайым Жосалы кентінің тумасы. Өзі де бала күнінен спортты серік еткен сұлу. Балалық қызығушылығы бүгініне айналып, спорт саласынан алыстамады. Керісінше, спортсүйер сұлуларды жеңіске жетелеуде.&nbsp;<blockquote>– Бала күнімнен спортқа жақын болдым. Бақберген Тәттімбетов ағайымнан самбо күресінің қыр-сырын үйрендім. Өсе келе тыңғылықты жаттығуымның арқасында аудандық, облыстық, республикалық жарыстарда орын алдым. Әрбір спортшының арманы болған Азия биігін бағындырдым. Кейіннен әлемдік байрақты жарысқа қатысып, жүлдемен елге оралдым. Спорттың арқасында ел, жер көріп көптеген жетістікке жеттім, – дейді жас жаттықтырушы.</blockquote>Кент орталығындағы №183 орта мектепте тәлім алған Гүлайым жоғары білімді «Болашақ» университетінен «Спорт және туризм» мамандығын меңгереді. 2017 жылдан бері №16 Балалар мен жасөспірімдер спорт мектебінде жаттықтырушы болып жұмыс істейді. Еңбек өтілі 7 жылды жуықтаған маманның біршама жетістігі де бар.&nbsp;<blockquote>– Осы салада барлық білген тәжірибелерімді шәкірттеріме үйретудемін. Оқушыларымның ішінде алғаш болып Ұлтай Сейілова жақсы нәтижелер көрсетті. Облыстық, республикалық чемпионаттарда жеңімпаз атанып, самбо күресінен Азия чемпионатының екі дүркін қола жүлдесін иеленді. Белбеу күресінен Әлем чемпионатының қола жүлдегері. Қазіргі таңда Ұлтай тыңғылықты оқу жаттығу жиынында алдағы әлемдік додаға дайындық үстінде. Венера Борисова мен Айниса Орынбасарова қыздарым ел чемпионаттарында қола жүлдегер атанды. Осы қыздарымның артынан спортшы сіңлілері өсіп келе жатыр. Ақбота Жақсылықова, Мадина Бейбітова, Дарина Мұқашова, Айшабибі Амантаевалар республикалық, облыстық жарыстарда топ жарып жүр. Алдағы уақытта бұдан да жақсы нәтижеге жету үшін дайындалу үстіндеміз. Өсіп келе жатқан жас балуан қыздарымыз биіктерді бағындырады деген үмітім мол, – дейді Гүлайым Нұрмаханова.&nbsp;</blockquote>Жалпы спорт темірдей тәртіп пен салқынқанды мінезді қажет етеді. Мұндай талап нәзікжандылар үшін оңай емес. Десе де, ерлермен қатар еңбек етіп жүрген Гүлайым бір жанұяның отанасы. Болашағынан зор үміт күтер 2 перзенттің анасы. Жаттықтырушылық жұмыс пен келіндік қызметті қатар алып жүрген жастың жұмысы да жауапты.&nbsp;<blockquote>– Жаттықтырушы болу – өте жауапты жұмыс дер едім. Ең қызығы, тәрбиелеген шәкірттеріңнің жақсы нәтижеге жетіп қуанғанын, эмоциясын көру. Кейде қыз бала болғасын мықты қарсыласын әзер жеңіп, қуаныштан көздеріне жас алып қалады. Спорт болғаннан кейін кейде дене жарақаттарын алады. Ата-аналарынан аманат етіп алып кеткеннен кейін жарыстан соң үйлеріне аман-сау жеткізгенше уайымдаймын. Ата-ана ретінде оларды да түсінемін. Негізі спорт мінездің қалыптасуына әсер етеді. Спортшы сабырлы, салмақты намысшыл, төзімді болуы керек. Мықты спортшы болу – көп жастың арманы. Бірақ, көбі жарты жолдан тастап кетеді. Спортқа шын құмар баланың ынтасы ерекше болады. Оның ептілігі, жылдамдығы, мінезі, еңбекқорлығы бірден байқалады. Табиғатына қарай кейбір бала уақыт өте келе ашылады. Жеңімпаз атану үшін физикалық жағынан ғана емес, рухани жағынан да мықты дайындық қажет. Жарыста жеңіс пен жеңіліс қатар жүреді. Жеңімпаз болғанда да, жеңілгенде де өзіңді-өзің ұстай білу адамның рухани өресіне байланысты. Жеңіске ұқыптылық пен тиянақтылықтың, еңбекқорлықтың арқасында ғана жетесің. Егер жеткен жетістігіңе рухани әлемің сай болмаса, абыройың аяқасты болуы бір-ақ сәтте, – дейді бапкер.</blockquote>Міне, бойындағы бар білімін өзінен кейінгімен бөлісуге, аудан абыройы үшін қызмет етуге дайын Гүлайымдай жастар көп болса дейміз. Өйткені жауапты жаттықтырушыдан жеңімпаз шәкірт шығатынына сенім мол.&nbsp;&nbsp;Ардақ СҮЛЕЙМЕНОВА

Жетістігі мол жас жаттықтырушы

<a href="https://kyzylorda-news.kz/">Kyzylorda-news.kz</a> Қарапайым қимыл-қозғалыстың ең жеңіл түрі жаяу жүру десе, бүгінде егде адам түгілі жас жеткіншектердің өзі аяқ тартып, құлшыныс таныта қоймайды. Автокөлік пен қоғамдық көліктер тоқтаусыз жүріп жатқан уақытта бір жерден екінші жерге жаяу бару әлдекім үшін миға қонымсыз болуы мүмкін. Алайда жаяу жүріп қимылдау арқылы бойыңыздағы дертке қарсы үлкен шипа барын бірі білсе, бірі білмес.Жосалы кент тұрғыны Гүлжамал Жиенбаева әжей жаяу жүрудің денсаулыққа нағыз пайдасын білген жанның бірі. Бүгінде кейуананың жасы сексен төртте. Ол жаяу жүруді 2010 жылдан бастап әдетке айналдырған. Оған сол уақытта жиі ауырып, сырқаттануы сеп болыпты.<blockquote>— Денсаулықтың қадірін қартайғанда білесің деп дана халқымыз бекерге айтпаған. Адамның жасы келген сайын сырқаты көбейе түсетіні рас екен. Бұрын жастықпен жұмыстың ауыр-жеңілін елемей, елге қызмет еттік. Жолдасым екеуміз Кеңес уақытында Қармақшы, Иіркөл ауылдарында мал баққан жандармыз. Ол кезде қой санын көбейту керек деген қатаң тапсырма бар. Күннің ыстық-суығына да қарамадық. Әйтеуір абыроймен сол үдеден шығып, бәйгесін алып, елдің құрметіне бөлендік. Бірақ осы тынымсыз жұмыстың та әсері денсаулыққа кейін сыр бере бастады. Балаларымыз болса да кейінгілері тұрмады. Жасым ұлғайған сайын қан қысымым жиі көтеріліп, ауруханаға көп түстім. Маған сол кезде көптің ақылы көмектесті. Қаныңыз қоюланып қалған, көп жүру керек деген кеңестер пайдасын тигізді. Міне, жиырма бес жылдан бері үздіксіз жаяу жүрумен айналысамын. Таң намазынан соң қолыма таяғымды алып, кенттің сыртқы жағын күнделікті жолым бойынша үш-төрт шақырымды артқа тастаймын. Үйге келген соң әрі қарай жарты сағаттық жаттығуға көшемін. Құдайдың құдіретін сезсеңіз таңғы уақытта ауа сондай таза болады. Адамға күш-қуат береді, – дейді әжей.</blockquote>Таяқ ұстағанға тым қарт кісі деп ойлап қалмаңыз. Гүлжамал әжей сырт көзге әлі де тың. Қазір бұралқы иттердің көше кезіп жүретін әдеті емес пе? Содан қорған болу үшін таяқты серік етемін дейді. Жаяу жүргеннің пайдасы бүгінде ол жүрек ауруынан айыққан. Тек күн жылыда ғана жаяу жүрмей, қыста да осы әдетінен жаңылмаған. Аязды күн мен қатты жел соғып, ауа райы құбылғанда жаттығуын үйде жасайды.Әлемдегі кей ғалымдар халықты сырқаттардан арашалап алудың ең қолжетімді әрі тиімді жолы күн сайын таза ауада жаяу жүру екенін айтқан. Американың Онкологтар қауымдастығы қатерлі ісіктің алдын алудың бірден-бір жолы ретінде де жаяу жүруді ұсынған.Рас, мынау тұрған төрт-бес үй әрі тұрған дүкенге көлік мініп баратынымыз жасырын емес. Жас болсақ та жаяу жүруге ерініп, мәшиненің ығына жығыла кетеміз. Осыдан кейін салмақ қосып, толығып кеттім деп уәжімізді айта бастаймыз. Ал бүгінде денсаулықтың қадірін білген Гүлжамал әжей жаяу жүрудің пайдасы зор екенін айтып, саламатты өмір салтын ұстануға кеңес береді.&nbsp;Ерсін СӘДУҰЛЫ

Жаяу жүруді әдетке айналдырған 83 жастағы әжей

<a href="https://kyzylorda-news.kz/ru">Kyzylorda-news.kz</a>&nbsp; Соңғы жылдары Арал ауданда құрылыс жұмыстары қарқынды дамып келеді. Оны күнделікті көзбен көріп жүрміз. Әсіресе, халық қажеттілігін өтейтін нысандардың бой көтеріп, ел мүддесіне жұмыс істеп &nbsp;жатқаны көңіл қуантады. Әдемі құрылыс нысандары өңірдің &nbsp;ажарын аша түсуде. Құрылысшылардың кәсіби мерекесі қарсаңында &nbsp;саладағы серпінді істерді саралап өтсек.&nbsp;Өтпелі жобалар ретінде «Арал ауданының Сексеуіл кентінде АГТС орната отырып «Бейнеу-Шымкент» магистарльды газ құбырынан бастап газ құбыры тармағын салу» және «Сексеуіл кентіне газ жеткізу құбырының және кварталішілік газ тарату желілерінің құрылысы» жобаларының құрылысы жалғасуда.Оған қоса, «Арал қаласындағы №4 мөлтек ауданға газ желісін тарту құрылыс жұмыстары», Арал қаласындағы 300 орындық Жайлы мектеп құрылысы, Сексеуіл кентіндегі 40 төсектік аурухана құрылысы және демеуші қаражаты есебінен салынып жатқан Тоқабай елді мекендегі мектеп құрылысы биыл жалғасын тапты.&nbsp;Қарқын мұнымен тоқтап қалмақ емес. 2024 жылы &nbsp;құрылыс саласында инфрақұрылымдық жобалары дамытуға, білім беру мен медицина саласының қажеттілігін қолдауға бағытталған жобалар қолға алынды. Олардың қатарында &nbsp;«Арал қаласындағы №1 мөлтек ауданға электр желісін тарту», «Арал қаласы 0,4 кВа әуе желілерін жүргізу», «Арал қаласындағы №5 мөлтек ауданға газ желісін тарту», «Арал қаласы №6 мөлтек ауданға газ желісін тарту құрылыс жұмыстары» және талай уақыттан бері халықтың өтініші мен тілегіне айналған Арал қаласы бойынша кәріздің сыртқы желісінің құрылысы 1-кезеңі де тап осы жылы қолға алынып отыр. Сондай-ақ болашақ ұрпаққа сапалы білім беру мақсатында &nbsp;Ақшатау елді мекеніндегі мектеп құрылысы, Сексеуіл кентіндегі 300 орындық «Жайлы мектеп» құрылысы да басталып кетті. Ал Тоқабай елді мекеніндегі дәрігерлік амбулатория құрылысы &nbsp;осындағы халықтың тілегін қамтамасыз ету мақсатында қолға алынып отыр. Жоғарыда айтылған маңызды жобалар қаржысы шешіліп өз бастауын алған болса енді басталып жатқан жобалардың да ауқымы кең. Жалпы аудандағы құрылыс саласында қарқынды жұмыс атқарылып, маңызды жобалар мәнін табуда. Сөзімізді дәлелдей түсу үшін осы жылы бастау аған жобалардың &nbsp;бірқатарын тілге тиек ете кетсек.&nbsp;Қазіргі күні облыс әкімінің бастамасымен «Руханият орталығының» құрылыс жұмыстары қолға алынған. &nbsp;Мұнда музей, кітапхана, архив, неке қию залы, ардагерлер және аналар, жастар орталықтары сынды бірқатар тарихи-мәдени, рухани ұйымдарды біріктіретін орталық болмақ. Бір ғимарат &nbsp;мәдени-көпшілік шаралар, концерттер, мерекелік кештер өткізіліп, тұрғындар жиі келетін мәдениет ошағына айналмақ.&nbsp;Арал қаласындағы Арал туберкулезге қарсы диспансері ғимаратын «Қамқорлық» ерте араласу оңалту орталығы етіп реконструкциялау» жобасы &nbsp;оңтайлы бастама ретінде қолдау тауып отыр. Биыл шижағалықтардың бірқатар көкейтесті мәселесі оң шешімін тапты. Шижаға елді мекеніне 0,4 және 10 кВ әуе желілерінің құрылысын жүргізу, газ құбыры желілерін салу, дене шынықтыру және сауықтыру кешенінің құрылысы қолға алынды. Сонымен бірге Аманөткел елді мекенінде 150 орындық ауылдық клубтың құрылысы басталғалы тұр.&nbsp;Құрылыс саласындағы атқарылып жатқан тағы бір ауқымды жоба һам халық үшін ақжолтай жаңалық халықтың әлеуметтік жағынан осал топтарына сатып алынатын 124 пәтердің құрылысының жүргізілуі. Еске сала кетейік, өткен жылы осындай 100 отбасы қоныс тойын тойлаған болатын.&nbsp;Салыстырып қарайтын болсақ, аудандағы құрылыс саласындағы жұмыстарда ілгерілеу бар. Мұның бәрі де халық сұранысын қамтамасыз етіп, елдің игілігіне жұмыс істеу мақсатында қолға алынуда. Оған қоса, қаладағы сәулеті келіскен кәсіпкерлік нысандар да жыл сайын қатарын көбейтуде. Міне мұның бәрі &nbsp;елдің дамуын көздейтін бастамалар.&nbsp; Н.МАРАТҚЫЗЫ&nbsp; Фото: ашық көздерден

Арал ауданда құрылыс қарқынды

<a href="https://kyzylorda-news.kz/">Kyzylorda-news.kz</a> Статистика Үкімет үшін ғана емес, қоғам үшін де маңызды. Жүздеген жыл ішінде Қазақстанның бұл жүйесі халықаралық талаптарға сай өзгерді. Заманауи технологиялар енгізіліп, жұмысы нақтылана түсті. Қазіргі уақытта статистикалық ақпараттарды жинау және өңдеу барысында жаңа ақпараттық технологиялар кеңінен қолданылуда. Ресми статистикалық ақпаратты пайдаланушылардың қолжетімділігі артты. Осы ретте 2024 жылдың алғашқы жартыжылдық есебінде қай салада болмасын өсім бар. Мұның бәрі – барша сала мамандарының бірлесіп жасаған жұмысының нәтижесі. Бұл туралы Арал аудандық статистика бөлімінің басшысы Еламан Қапанов&nbsp;хабарлайды.Мемлекетіміздің басты капиталы – ел азаматтары. Сондықтан олардың әрқайсысы мемлекетіміз үшін қымбат. Нақты айтар болсақ, статистикалық мәліметтер бойынша, Арал аудан халқы 2024 жылдың 1 маусымына 79 216 адамды құрап отыр. Бұл көрсеткіш облыс аудандары арасында халық саны жөнінен Жаңақорған, Шиелі және Қазалы аудандарынан кейінгі нәтиже болып саналады. Ал аймақ тұрғындарының жалпы саны 844 480 адамды құрап отыр. Ашып айтар болсақ, аудандағы тұрғындардың 37 275-і қала тұрғыны. Қалғаны ауылдық жерлерде тұрады. Халықтың 40 628-ін ерлер, 38 588-ін әйелдер құрайды.Арал уданның даму көрсеткішінде бірінші кезекте өнеркәсіп саласы тұр деуге болады. Өнім өндіріп, оны экспортқа шығарып келе жатқан кәсіпорындар 2024 жылдың алғашқы жартыжылдығында 16 354 млн. теңгенің өнімін өндірді. Бұл көрсеткіш өткен жылы өндірілген өнім көлеміне қарағанда нақты көлем индексімен 114,7 пайызға орындалғанын байқауға болады. Бұл ретте ауданның сыртқы нарыққа шығатын басты өнімдері ретінде йодталған ас тұзы, балық пен кварц құмы және тепловоздар мен жабдықтарды жөндеужұмыстарының қайсысы болса да өсімге ие болды.<blockquote>– Сонымен қатар, өңдеу өнеркәсібі саласында да даму байқалады. Қаңтар-маусым айларында жалпы 11 584 млн. теңгенің өнімі өңделіп шығарылса, бұл нақты көлем индексі арқылы өткен жылмен салыстырғанда 119,8% өсімді көрсетеді.Меншік нысандары бойынша тіркелген заңды тұлғалар саны 2024 жылдың 1 шілдесіне барлығы 525 болса, оның ішінде, жұмыс істейтіндер – 462, қызметін уақытша тоқтатқандар – 112, ал таратылу процесінде 2 нысан бар.2024 жылдың қаңтар-маусым айларында бөлшек сауда тауар айналымының көлемі 5377,9 млн. теңгені құрап, өткен жылдың тиісті кезеңімен салыстырғанда 102,8 пайызға өсті. Тауар айналымы жалпы көлемінің негізгі пайызын саудамен айналысатын кәсіпорындар мен жанар-жағармай өнімдерін сататын кәсіпкерлер құрайды.Тағы бір басты қозғаушы саланың бірі – инвестиция, құрылыс саласы екені жасырын емес. Ауданымызда да инвестиция, құрылыс жұмысы жоспарлы түрде жоғарғы деңгейде іске асып келеді. Негізгі капиталға салынған инвестициялар көлемі толықтай игеріліп, өткен жылдың тиісті кезеңімен салыстырғанда 14,6 пайызға артық орындалған. Қаржыландыру көздері бойынша бөлінген барлық қаражат тиісті бағытта мақсатты жұмсалды. Ал құрылыс жұмыстарының көлемі де 110,5 пайызға артығымен орындалды. Көрсеткіште қаладағы жаңа көпір құрылысы, Аққұлақ, Жаңақұрылыс, Аралқұм, Бекбауыл ауылдарындағы жол құрылысы және Сексеуіл кентіндегі газ жүргізу жұмыстары есептелген.Алғашқы жартыжылдықта аудан көлемінде жалпы 14 499 шаршы метр тұрғын үй пайдалануға берілген. Бұл өткен жылдың тиісті кезеңімен салыстырғанда 105 пайызға артық орындалып отыр. Осылайша аудандағы басты мәселенің бірі өз шешімін тауып келеді. Ауданымыздың басты кәсібі ауыл, орман және балық шаруашылығында да өсім бар. Нақты қолданыстағы бағамен 3 777,9 млн. теңге өнім өндіріліп, өткен жылдың кезеңімен салыстырғанда нақты көлем индексі 101,8 пайызға артық орындалып отыр.Мал шаруашылығында айтарлық өсім тіркелді. Оның ішінде, ірі қара мал саны 47 516 бас болса, түйе – 37 534 бас, жылқы – 61 401 бас, Шопан ата тұқымы – 37 504 бас және ешкі малы 65 239 бас тіркелді. Үй құстарының саны 4500-ке жетіп отыр. Төрт түліктің ішінде ең кемі жылқы малы 2% өсім алса, қой тұқымы 19,6 пайызға өсім алған.Аудан бойынша 5247 бірлік шағын және орта кәсіпкерлік субъектісі жұмыс істейді. Оның ішінде, 303 шағын кәсіпкерліктің заңды тұлғасы тіркелсе, 3874-ін жеке кәсіпкерлер құрайды. Шаруа немесе фермер қожалықтарының саны 1070-ке жетіп отыр.&nbsp;Биылғы жылдың 6 айлық есептік көрсеткішінде сандар осылай сөйлеп отыр. Алдағы уақытта ауданның әлеуметтік-экономикалық көрсеткіші бұдан да жоғары нәтижелерді көрсетеді деп сенеміз, – деді Еламан Қапанов.</blockquote>

Арал ауданының өсу динамикасы тұрақты

<a href="https://kyzylorda-news.kz/">Kyzylorda-news.kz</a> №60 мекеменің психологиялық қамтамасыз ету тобының психолог қызметкерлері &nbsp;жазасын өтеушілер арасында &nbsp;«Құм терапиясын» &nbsp;өткізді. Құм терапиясы психология аясында пайда болған психотерапия әдістерінің бірі. Бұл әлеммен және өзімен қарым-қатынас жасау тәсілі. &nbsp;шараның негізгі мақсаты ішкі шиеленісті жеңілдету, &nbsp;өзіне деген сенімділікті арттырады және дамудың жаңа жолдарын ашады. Құм терапиясы терең, шынайы өзін-өзі ұстауға, психикалық тұтастықты қалпына келтіруге, өзінің ерекше бейнесін және әлем бейнесін жинауға мүмкіндік береді. Бұл туралы №60 мекеменің баспасөз қызметі хабарлады.Шара барысында жазасын өтеуші азаматтарға психологиялық тренинг жаттығуларын жүргізе отырып, өз ойларынша түрлі суреттер салып, танымдық ойындар өткізу арқылы ашық &nbsp;пікірталас &nbsp;ұйымдастырылды.Мен «құм терапиясы» арқылы балалық &nbsp;шағыма саяхаттадым. Балалық шақ ең бақытты уайымсыз кезең. Өткен шақтың бақытты сәттерін еске алу керемет сезім сыйлайды. Әрі ойымыз бен ішкі &nbsp;сезімдерімізді әңгімелеу барысында босаңсып, жеңілдеп қалдым. Бізге осындай көңіл күй сыйлаған психолог мамандарға &nbsp;алғысымыз шексіз деді,-сотталған.Аталған терапия арқылы адамның шығармашылық, танымдық, интеллектуалдық карым-қатынас құзіреттілігі дамиды. Олар қиындықты бір сәтте естен шығарып, өмірге жаңаша оң көзқараспен қарап, ойша жағымды жағдайларды ойлап жүреді. Мұндай терапиялық тренингтер жазасын өтеуші азаматтардың ой-санасын өзгертіп, оң мінезді қалыптасуына әсері мол дейді,-мекеме психологы Шынар Көлбаева.

Сотталғандармен «Құм терапиясы» жүргізілді 

<a href="https://kyzylorda-news.kz/">Kyzylorda-news.kz</a> Қазалыда туып, өнерімен талайды тамсандырып жүрген талантты жандар жетерлік. Бірі ғылым саласында өзіндік қолтаңбасын қалдырса, енді бірі қазақ өнері мен мәдениетін өркендетуге үлес қосуда. Солардың қатарында талантты жерлесіміз, ҚР Дизайнерлер одағының ескерткіш медалінің иегері, ҚР мәдениет саласының үздігі Құрманқазы Қадыр да бар.Бейнелеу өнерінің хас шебері ретінде бірқатар туындысы Қазақстандағы және шетелдік жинақтарда сақтаулы тұрған белгілі суретші Құрманқазы Қадырмен сұхбаттасудың сәті түскен еді.– Құрманқазы аға, талай дүлділ дүниеге келген қасиетті Қазалы топырағының тумасысыз. Орта мектепті осында тәмамдадыңыз. Одан ары қарай өмір жолыңыз қалай жалғасын тапты?– Мен 1977 жылы Жаңақазалы станциясындағы Ы.Алтынсарин атындағы №421 онжылдық мектепті бітірген соң, Ленинград қаласына оқуға аттандым.1981 жылы Ленинград қаласындағы И.Е.Репин атындағы кескіндеме және сәулет институтының академиялық сурет, 1983-1985 жылдары В.А.Серов атындағы көркемсурет училищесінің кескіндеме бөлімінде дәріс алады. 1989 жылы сол қаладағы қала құрылысы және сәулет өнері мектебінің сәулет бөлімін бітірім. Менің Ленинградқа баруыма себепкер болған жан – менің ұстазым Қабылов Жасылық Санауұлы. Менің дарынымды танып, бағыт-бағдар беріп, талантымды ұштауға үлес қосқан сурет пәнінен беретін ұстазыма мың да бір рахмет айтамын. Жаны жәннәта болсын. Өте керемет жан еді.Бірде сабақта отырған едік, қасыма келіп:«Ертеңнен бастап маған қосымша сабаққа кел» деді. Менің суретшілік кәсібім осылай басталды. Бұл 5-сынып болатын.Одан кейін Алматының Абай атындағы Қазақ ұлттық университетінің көркемсурет және бейнелеу өнері факультетін де үздік тәмамдадым. Сол кезден бері Алматы облысының Еңбекшіқазақ ауданында қала құрылысы және сәулет бөлімінде сәулетші, жетекші сәулетші, Есік қаласында жетекші сәулетші-дизайнер болып қызмет атқардым.– Суретшілік қанмен келген қасиет пе әлде жүре келе дамыған дарын ба?– Суретшілік қанмен келген десекте болады. Өйткені әкем Қайролла ағаштан түрлі тұрмысқа қажетті бұйымдар жасайтын шебер еді.– Кімді ұстаз тұтасыз?– Меніңалғашқы ұстазым жоғарыда айтып өткенімдей Жақсылық Санауұлы деп танимын. Ол маған бәрін берді, менің ағамдай болды. Мәскеуден суретке арналған арнайы аспаптар, красклер алдырып беретін. Бұдан өзге өмір жолымда талай ұстаздар кездесті. Бәрі де жаны жайсаң, шәкіртке берер тәлім-тәрбиесі мол өте жақсы ұстаздар.– Ең алғаш салған суретіңіз есіңізде ме? Бала Құрманқазының қиялы қағаз бетіне қандай бейнені бейнеледі?– Алғашқы салған суретім әрине есімде. Ол ҚАЗ ССР-дің гербі болатын. Мен оны айнытпай салып, іліп қойатынмын. Мұны әкем көріп, «О, бәрекелді, менің балам суретші болады» деп мақтанатын.– Сізді кәдесый жасаудың хас шебері ретінде де танимыз. Қолыңыздан шыққан жауһар дүниелер көздің жауын алады. Әрқайсысының өзіндік ерекшелігі, мән-мағынасы бар. Алғашқы жасаған кәдесыйыңызды қалай атадыңыз? Шығу тарихына тоқталсаңыз...– Алғашқы жасалған кәдесый ол «Құда мың жылдық»деп аталды.Неге құда мың жылдық, өйкені, қазақ бауырмашыл, құдасын құдайдай сыйлағанхаықпыз. Сонау 1990 жылдары егемендігімізіді алып,бөлініп шыға бастаған кезеңде, суретшілерде өз ойларын ортаға сала бастады. Соның ішінде менде бармын. Малды сойып, жіліктеу, оны асып табақ тарту, осы табақтардың ішінде қай табақ кімге тартылады, нендей мән-мағынасы бар барлығы тұнып тұрған тәрбие. Мәселен, жанбас жілігі салынған табақ қадірлі қонағына тартылады. Осы жамбас жілікті сомдап, «Құда мың жылдық» деген кәдесый дүниеге келді. Кәдесыйдың философиялық маңызы зор десем болады.– Сүйекті қолданып та талай туындыны дүниеге әкелдіңіз. Бұл шығармаларыңызбен халыққа айтқыңыз келген ойыңыздың бары анық...– Сүйектен «Жамбас», «Жауырын», «Омпа», «Өткел», «Таразы», «Ақ жол», «Үш биші», «Қызыл елік» атты туындылар жасадым. Менің халыққа айтарым жас ұрпақ, ел болашағы жастарөз мәдениетін, салт-дәстүрін білуі тиіс.Босағаң берік болсын деген ниетпен ертеде аталарымыз кәрі жілікті босағаға іліп қоятын. Үйді бәле-жәледен қырық бір ұрыдан сақтайды деп, жауырын ілген. Жауырынға қарап жол ашқан,болмаса көріпкелдік жасаған бұның бәрінде философиялық маңызы терең ұғым бар. Қарапайым малды союдың өзінде реттілік бар. Қайда қарап сою керек, оның басын қайда қарату, не айту керек, оны жіліктеп асу міне осының бәрі салт-дәстүр. Мен өз шығармашылығым арқылы осылардың мәнін ұқтырғым келеді.– Аға, 2015 жылы Біріккен Араб Әмірліктерінің астанасы Абу-Даби қаласында Әмірліктің бұрынғы шейхы Зайд ұрпақтарының ұйымдастыруымен өткен Халықаралық көрмеге арнайы шақыртумен қатысып, онда қазақ қолөнерінің ерекшелігін насихаттап, сертификат иеленіп қайттыңыз. Алған әсеріңізбен бөліссеңіз...– 2015 жылы Біріккен Араб Әміршілігіне барып қазақ халқының мақтанышы «Құда мың жылдық», «Ақ жол»,«Босағаң берік болсын», тағы басқа жұмыстарды апарып, таныстырдым. Алған әсер өте көп. Оның бәрін сөзбен айып жеткіу оңай емес. Оны тек көру керек.– «Өнер сатылмайды, бағаланады» деп жатамыз. Ең жоғары бағаға бағаланған суретіңіз немесе кәдесыйыңыз...– Өнер ақшамен бағаланбауы керек. Өнердің бағасы оның құндылығында, философиялық маңыздылығында.– «Адам ұрпағымен мың жасайды» дейді дана қазақ. Ұл-қыздарыңыздың арасында әке жолын таңдағандары бар ма?– Әрине бар. Ол менің ұлым Дархан қазір Испания елінде оқиды.– Жерлестеріңіз, Қазалы халқына айтар лебізіңіз болса, мархаббат– Киелі қасиетті Қазалым гүлдене берсін.Бес батыр шыққан Қазалым жайнап, жаңарсын. Газет оқырмандары көп болсын. Осы тұста ұсынысмды айта кетсем деймін.Қазалы ауданының мәдениет бөлімі елден шыққан азаматтарды шақырып, кездесу ұйымдастырып, көрмелер жасаса, қуана қолдар едім.– Уақыт бөліп, сұхбат бергеніңізге, ізгі тілегіңізге рақмет. Шығармашылық табыс тілеймін.&nbsp;Ұлболсын ТАЛАПБАЕВА

Құрманқазы Қадыр: Ленинградқа баруыма себепкер болған жан – менің ұстазым Жасылық Қабылов

<a href="https://kyzylorda-news.kz/">Kyzylorda-news.kz</a> Аталған мәселенің әлі қаралып жатқаны, бірден қабылданбайтыны белгілі болды.&nbsp;Бұл туралы Мәдениет және ақпарат министрі Аида Балаева айтты, деп хабарлайды<a href="https://sn.kz/sn-akparat-agyny/117997-alaiaktar-kobeiip-ketti-kazakstanda-kaiyrymdylykk-a-aksha-zhinau-toktatyluy-mumkin"> Skifnews.kz </a>ақпарат порталы.Министрдің сөзінше, қайырымдылық мақсатындағы қаржы жинау тетігі азаматтық қоғамның қатысуымен талқыланады, сосын барып жан-жақты шешім қабылданады. Десе де, Аида Балаева қоғамдық талқылаудың қашан өтетіні туралы дерек келтірмеді. Мәжіліс отырысынан кейін ол БАҚ өкілдерінің сұрағына жауап берді. Ішінде қайырымдылыққа ақша жинауға тыйым салу мәселесі де бар.<blockquote>– Жұмыс тобы құрылды, мәселе талқыланып жатыр. Нақты шешімдер әлі жоқ, өйткені барлық ұсынысты жинап, сарапшылардың пікірін зерттейміз. Мұндай бастамалар жай ғана қабылданбайтынын түсіну керек. Алыпсатарлық, алаяқтық фактілер бар. Осыған орай, қайырымдылық көмек тетігін жетілдіру мәселесін қарастырамыз, – деді ол.</blockquote>Сондай-ақ, ведомство басшысы бұл қадамның көмекке мұқтаж жандарға қол ұшын созу үшін жасалғанын жеткізді.&nbsp;Фото: Time.kz

Қазақстан және Қызылорда облысының жаңалықтары: Қоғам