<a href="https://kyzylorda-news.kz/">Kyzylorda-news.kz.</a> Ирак&nbsp;түрмелерінде жатқан қазақстандық балалар екі аптадан соң үйлеріне оралады. Бұл туралы Қазақстанның Сыртқы істер министрлігінің ресми өкілі Айбек Смадияров айтты, деп хабарлайды <a href="https://kaz.tengrinews.kz/kazakhstan_news/irak-turmelernde-jatkan-kazakstandyik-balalardyin-kashan-302737/">Tengrinews.kz</a>.
<blockquote>
 “Балаларды үйіне қайтару операциясы әлі жүргізілген жоқ. Қазіргі уақытта Ирак өкілдерімен талқылап жатырмыз, сондай-ақ, балалардың Қазақстанға келгенде орналасатын жерін белгілеп, әлеуметтік жұмыстармен айналысып жатырмыз. Балаларға қайта қалпына келуіне, туыстарымен бұрынғыдай араласуы үшін уақыт керек болады. Олар осы күнге дейін ауыр жағдайда болды. Таяуда осы операцияны жүргіземіз деп ойлап отырмыз. Нақты қай күні өтетінін әзірше белгілемедік. Келіссөздер жүргізу барысында ешқандай қиындықтар жоқ, тек кейбір сәттерді талқылап жатырмыз”, –&nbsp;деді Айбек Смадияров.
</blockquote>
СІМ өкілі Қазақстанға 2-13 аралығындағы 10-нан аса баланың&nbsp;оралатынын айтады. “Олардың кейбіреулері жетім – әкесі де, шешесі де жоқ”, – деді Смадияров.
Оның айтуынша, келіссөздер екі апта ішінде аяқталады.

Ирак түрмелерінде жатқан қазақстандық балалардың тағдыры не болады?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> 2020 жылы дәрігерлердің жалақысы 30 пайызға өседі. Бұл туралы бүгін Үкімет отырысында ҚР Денсаулық сақтау министрі Елжан Біртанов айтты, деп хабарлайды ҚазАқпарат.
Министрдің айтуынша, 2020 жылы 1 қаңтардан бастап Қазақстанда Міндетті әлеуметтік медициналық сақтандыру жүйесі іске қосылады. Осыған орай, жүйенің дайындық деңгейін тексеру мақсатында 1 қыркүйектен бастап Қарағанды облысында медициналық сақтандыру пилоттық түрде іске қосылды. Оның негізгі мақсаты – медициналық қызметті алушылардың «сақтандырылу» статусын сәйкестендіру, тегін медициналық көмектің көлеміндегі және медициналық сақтандыру жүйесіндегі қызметтерді жеке-жеке есепке алу, 2020 жылдан бастап медициналық сақтандыру жүйесін толығымен енгізу мақсатында дайындық жұмыстарын жүргізу болып табылады. Жобаны іске асыру үшін бюджеттен қосымша 2,3 млрд теңге, оның ішінде профилактикалық қарап-тексеру мен консультациялық-диагностикалық қызметтердің қолжетімділігін жоғарылатуға 1,7 млрд теңге, медициналық оңалтуды кеңейтуге 600 млн теңгеге жуық қаражат бөлінді.
<blockquote>
 «Пилоттың оперативтік деректері бойынша екі айдың ішінде өңірде қымбат тұратын компьютерлік томография және магниттік-резонансты томография қызметтерінің саны – 178, медициналық оңалту қызметтері – 73 және консультациялық-диагностикалық көмек қызметтері 42 пайызға ұлғайды», – деді ол.
</blockquote>
Оның дерегінше, халық қажеттілігінің негізінде оңалтуды қоса алғанда, медициналық көмектің басым түрлерін қаржыландыру келесі жылы 7 есеге және 2025 жылға қарай 11 есеге дейін өседі. Тарифтердің өсуі медицина қызметкерлерінің жалақысын арттыруға мүмкіндік береді. Келесі жылы дәрігерлердің еңбекақысы 30 және орта медицина персоналының еңбекақысы 20 пайызға ұлғаяды.

2020 жылы дәрігерлердің жалақысы 30 пайызға өседі

<a href="https://kyzylorda-news.kz/">Kyzylorda-news.kz</a>. Сыр елінде ҚМДБ-ның Қызылорда облысы бойынша өкілдігінің ұйымдастыруымен «Рухани құндылықтар – қоғам бірлігінің негізі» атты облыс имамдарының аймақтық форумы өтті.
Аталған форумға ҚМДБ-ның наиб мүфтиі Ершат Оңғаров, Қызылорда облысы әкімінің орынбасары Наурызбай Байқадамов бастаған қонақтар, облыстағы ауыл, аудан, қаладағы барлық мешіттердің имамдары, сондай-ақ, ардагерлер, дінтану пәнінің мұғалімдері, дін мәселелерін зерттеу орталығының қызметкерлері, теолог мамандар қатысты.
<blockquote>
 «Мемлекет басшысы Қасым-Жомарт Кемелұлы жақында өткен республикалық Имамдар форумында «Парасаттылық, отансүйгіштік, адамгершілік қасиеттерін халықтың санасына сіңіру сауабы мол, абыройлы миссия. Ислам дініндегі мұндай ізгілік құндылықтары еліміздегі мұсылмандар қауымдастығының ынтымағын арттырып отыр» деп атап өткендей, қоғам тыныштығын қамтамасыз ету жолындағы Қазақстан мұсылмандар дін басқармасының бастамасымен көптеген игі істер жасалуда. Бүгінгі шара да соның бір парасы деп санаймыз. Бүгінде дін қызметкерлері жауапкершілігі мол имандылық қызметтерін абыроймен атқарып келе жатқандығын қоғам жақсы сезініп келеді. Сіздер адам баласы дүние есігін ашқан сәттен бастап, ақтық сапарға шығарып салғанға дейінгі жөн-жоралғылардың дұрыс өтуіне атсалысып ғана қоймай, қоғамның рухани кемелденуіне, парасаттылық пен отансүйгіштікке, білімділік пен мәдениеттілікке, татулық пен бірлікке насихаттап келесіздер. Өздеріңіз білесіздер, Қазақстан Республикасы зайырлы мемлекет ретінде қалыптасқан. Дегенмен Елбасының «Біз зайырлы мемлекетпіз деп дінмен айналыспай отыра алмаймыз» деген сөзі бар. Дін, зайырлылық саясатқа араласа бастағанда ашылады. Ал біз адамгершілік тұрғысынан келген кезде зиялылық қағидатын ұстанамыз. Бүгінгі форумда зиялы қауым өкілдерінің де қатысып отырған бірден-бір себебі – осы. Қазіргі таңда қоғамның құндылықтарын насихаттаған кезде ең алдымен бірлігімізді алдыңғы қатарға шығарамыз. Яғни, ұлы даланың құндылықтары мен ислам мәдениеті және өркениеті түйісіп үйлесуі бүгінгі күннің талабы болып отыр. Бұған мемлекет те, дін де тікелей жауапты, міндетті және парызы деп санаймыз», – деді форумда құттықтау сөз сөйлеген облыс әкімінің орынбасары Наурызбай Байқадамов.
</blockquote>
Жиынға Нұр-Сұлтан қаласынан арнайы келген ҚМДБ-ның наиб-мүфтиі Ершат Оңғаров өзінің баяндамасында Діни басқарма қабылдаған 3 құжатқа кеңінен тоқталып, аталған құжаттардың бүгінгі қоғамдағы рөлін жан-жақты талқылады.
Діни басқарманың наиб-мүфтиінің айтуынша, аталған құжаттар дін қызметкерлерінің темірқазығына айналуы керек. Мәселен, Қазақстан мұсылмандары діни басқармасы бекіткен «Дін қызметкерлері атқаратын діни рәсімдер тізілімінде» 45 рәсім көрсетілген. «Бірақ, аталған рәсімнің тізімі мұнымен шектеліп қалмайды. Болашақта өзгеруі мүмкін. Біздің бұл құжатта айтқымыз келгені – діни рәсімдерді кез келген адамның құқы жоқ. Оны мешітте еңбек ететін белігілі бір қызметкер атқаруы керек. Сонда ғана осы аталған діни рәсімдерге байланысты қоғамда болып жатқан келеңсіз жайттардың алдын аламыз», – деді Ершат Ағыбайұлы.
Сондай-ақ, форумда Қызылорда облыстық арадагерлер кеңесінің төрағасы Серік Дүйсенбаев, мемлекет және қоғам қайраткері, Қазақстан ҰҒА академигі, экономика ғылымдарының докторы, «Болашақ» университетінің ғылыми жетекшісі Бақберген Доспанбетов, Қазақстанның еңбек сіңірген қайраткері, филология ғылымдарының докторы, профессор, «Қорқыттану және өлке тарихы» ғылыми-зерттеу институтының директоры Бағдат Кәрібозұлы сөз сөйлеп, өздерінің ой-пікірлерін ортаға салды.
Ал, ҚМДБ-ның Қызылорда облысы бойынша Өкілі, «Ақмешіт-Сырдария» орталық мешітінің Бас имамы Болатбек Ұласқанұлы осындай аймақтық форум өңірімізде тұңғыш рет өткізіліп отырғандығына баса мән берді.
<blockquote>
 «Жуырда елордасы Нұр-Сұлтан қаласында ІІІ республикалық Имамдар форумы өткені баршаңызға белгілі. 500 имам қатысқан бұл ауқымды жиында&nbsp; үш негізгі құжат қабылданды. Олар – Қазақстан Мұсылмандары Діни басқармасы бекіткен «ҚМДБ құрылымындағы діни лауазымыдар тізілімі және міндеттері», «Жеті рухани қазық» Қазақстан мұсылмандарының рухани тұғырнамасы», «Дін қызметкерлері атқаратын діни рәсімдер тізілімі» құжаттар. Бұл құжаттардың маңызы мен мәні, ауқымы өте кең. Мәселен, үш құжаттың бірі «Жеті рухани қазық» тұғырнамасы. Мұнда әрбір мұсылман адамның бойынан табылатын негізгі жеті қасиеті туралы айтылады. Атап айтар болсақ, имандылық, отансүйгіштік, білімділік, ауызбіршілік, еңбекқорлық, мәдениеттілік және әділдік. Бұл қасиеттер әр адамның алдындағы бағдаршам іспетті. Адамның бойында бұл қасиеттерді бірі болса, екіншісі болмауы мүмкін. Сондықтан бұл құжат қазіргі уақытта керек дүние. Осы қабылданған құжататрға байланысты 31 қазан күні біз Сыр имамдарының алқалы жиынын өткіздік. Сол жиында форумда қабылданған құжаттарды алқалы жиын барысында талқылап, оны халыққа кеңінен түсіндіру жұмыстары жайында сөз қозғадық. Ал, бүгінгі облыс имамдарының аймақтық форумында осы құжаттарды қамти отырып, кеңінен әңгіме қозғамақпыз. Ғалымдар осы құжаттарға байланысты егжей-тегжейлі баяндайтын болады. Форум соңында облыс халқына үндеу жариялайтын боламыз», – деді ҚМДБ-ның Қызылорда облысы бойынша Өкіл имамы Болатбек Ұласқанұлы журналистерге берген сұхбатында.
</blockquote>
Форумда Қазалы, Қармақшы, Сырдария, Жалағаш, Арал, Жаңақорған аудандарының бас имамдары Берік Сүлейменов, Жақсыбек Әбенов, Асхат Асқаров, Әлібек Мәдиев, Қайырхан Қабылғазиев, Сағидулла Нұрманов, қалалық «Алдажар», «Ыбырай молда», «Айтбай» мешіттерінің бас имамдары Асылбек Зинмаддин, Талғат Нұрман, Нұржан Пердебеков, және обыстық «Ақмешіт-Сырдария» орталық мешітінің қари-ұстазы Мұқан Абжалелов Қызылорда облысы әкімінің орынбасары Н. Байқадамовтың Алғыс хатымен марапатталды. 
Жиын соңында ҚМДБ-ның Қызылорда облысы бойынша өкілі, «Ақмешіт-Сырдария» орталық мешітінің Бас имамы Болатбек Ұласқанұлы Сыр жұртшылығына облыс имамдарының форумда қабылдаған үндеуін жолдады.
<img src="https://kyzylorda-news.kz/wp-content/uploads/2019/11/imamdar-forwmy-2.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-3.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-4.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-5.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-6.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-7.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-8.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-9.jpg" alt="" />
<img src="https://kyzylorda-news.kz/wp-content/uploads/2019/11/imamdar-forwmy-10.jpg" alt="" />

Қызылордада облыс имамдарының аймақтық форумы өтті (ФОТО)

<a href="https://kyzylorda-news.kz/">Kyzylorda-news.kz.</a> Жастар жылына» орай ҚМДБ-ның Қызылорда облысы бойынша өкілдігі, «Жастар ісі» секторы «Жеті рухани қазық – жастар ұстанымы» атты Сыр жастарының облыстық форумын ұйымдастырды.
Форумға Қазақстан мұсылмандары діни басқармасының төраға орынбасары, наиб мүфти Ершат Оңғаров, ҚМДБ-ның Қызылорда облысы бойынша өкілі, орталық мешіттің Бас имамы Болатбек Абуов, облыстық жастар саясаты мәселелері басқармасының басшысы Қуаныш Жанұзақов қатысты.
<blockquote>
 «Форумның мақсаты – тәуелсіз мемлекетіміздің дамуы жолында әр саланың білікті мамандарының&nbsp; тәжірибелері арқылы жас қазақстандықтарды имандылыққа, парасаттылыққа, ауызбірлікке, белсенділікке үндеу. Рухани құндылықтарымызды бойға сіңіріп, сапалы ұлт қалыптастыру кезеңінде үлес қосуға насихаттау», – дейді ҚМДБ-ның Қызылорда облысы бойынша Өкілі Болатбек Абуов.
</blockquote>
Форум барысында аймақтағы жастар саясатының дамуына үлес қосып жүрген бірқатар азаматтарды Қазақстан мұсылмандары діни басқармасы төрағасының орынбасары, наиб мүфти Ершат Оңғаров алғыс хатпен марапаттады.
<img src="https://kyzylorda-news.kz/wp-content/uploads/2019/11/19zhastarforumy2.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy3.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy4.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy5.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy6.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy7.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy8.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy9.jpg" alt="" />
<img src="https://kyzylorda-news.kz/wp-content/uploads/2019/11/19zhastarforumy10.jpg" alt="" />

Сыр жастары облыстық рухани форумда бас қосты (ФОТО)

<a href="https://kyzylorda-news.kz/">Kyzylorda-news.kz</a>. Осыдан он жыл бұрын «100 мектеп, 100 аурухана» мемлекеттік бағдарламасы аясында Қызылорда қаласының Сырдария шағын ауданында 320 балаға арналып, 16 топты қамтитын «Алтын ұя» балабақшасы ашылды. Балабақшаның ашылу салтанатына Елбасы Н.Назарбаев қатысты.
«Алтын ұяға» 2009-2015 жылдар аралығында Баршагүл Өтемұратова басшылық жасады.
Мектеп жасына дейінгі балалардың жас ерекшеліктері мен жеке мүмкіндіктеріне сәйкес білім, білік және дағдыларын, рухани-адамгершілік құндылықтарын қалыптастыру, «Мәңгілік ел» жалпыұлттық идеясына негізделген жалпы адамзаттық құндылықтарға, ұлтжандылыққа және толеранттылыққа тәрбиелеу мақсатында балабақшада 94 қызметкер жұмыс жасайды, оның ішінде педагог қызметкерлер саны – 47.
Балабақша – баланың жүйелі түрде білім-тәрбие алатын ең алғашқы қоғамдық ошағы. Балаға беретін тәлім-тәрбиесінің тағылымы сол балабақшада қызмет ететін педагогикалық ұжымға, нақтырақ айтар болсақ, тәрбиеші-педагогтарға байланысты. Қазір тәрбиешілер бірнеше инновациялық технологиямен жұмыс жасайды.
Педагогтар «Тәй-тәй», В.Воскобовичтың ойын әдісі, ақпараттық-коммуникативтік технология, Д.Кюизенер таяқшалары, Фридрих Фребель материалдары, Б.Никитин технологиясы, ойын технологиясы, М.Монтессори педагогикасы, жобалау технологияларын оқу-тәрбие процесінде балалардың бірегей қабілеттерін дамытуда кеңінен қолданады.
Қаламыздағы басқа балабақшалардан ерекшелігі – бассейн, үйірмелер жұмыс істейді. Балалар танымдық дағдыларын дамыту үшін «Робототехника», «Интеллектум ойындары» үйірмелеріне қатысады.
Қызылорда қаласының педагогикалық шеберлік орталығы филиалында «Жаңартылған білім мазмұны» тақырыбында білім жетілдіру курсы ұйымдастырылып, онда 6 тәрбиеші білім жетілдірді. Өйткені тәрбиеші – суретші, әртіс, әдебиетші, ақылшы, ДОС және бала жанын бағамдар психолог.
Бүгінде «Оқу ісінің үздігі» жоғары санатты педагог Зафура Ерназарова басқарып отырған «Алтын ұя» бөбекжай-бақшасы – сенімге ие болып келе жатқан
тәрбие мен білім ұясы. Бөбекжай-бақшасындағы бала бақытын аялаған педагогтар жайлы айтсақ, Ақсұлу Ахметова – қазір зейнеткер, немерелерін тәрбиелеп отырған бақытты әже. Жас мамандарға ақылшы ұстаз болып жүрген жоғары санатты тәрбиеші Қанткүл Аяпова мен жоғары санатты музыка жетекшісі Зина Бердібекованы жастар үлгі тұтады. Шығармашылықпен жұмыс жасап жүрген үлгілі педагог-тәрбиешілер Ақманат Бегжанова, Гүлсім Сағындықова, Айгүл Қалдыбекова, т.б. – еңбексүйгіштігімен ерекшеленген І санатты ізденімпаз тәрбиешілер. Озық идеяларымен облыс және қала көлеміне танымал болып жүрген Мақпал Көшкімбаева – қалалық «Үздік тәрбиеші-2014» және облыстық «Үздік тәрбиеші-2015» сайыстарының жеңімпазы. Фариза Әлиева 2017 жылы қалалық «Үздік тәрбиеші-2017» байқауына қатысып, бас жүлде иеленді.
Гүлнұр Оразбаева қалалық, аймақтық «Үздік жас тәрбиеші-2015» байқауында II орынды иеленді. Облыстық білім басқармасы оқу орталығы ұйымдастыруымен өткен «Көшбасшы әдіскер, креативті тәрбиеші, дарынды бала» конкурсында «Креативті тәрбиеші» номинациясын жеңіп алды. Осы шығармашылық апталығында үздік дидактикалық материалдар көрмесіне өзінің қолдан дайындаған панносымен «Шығармашыл тәрбиеші» номинациясын Қанзира Хиноятова иеленді. «Өрлеу» біліктілікті арттыру ұлттық орталығы ұйымдастыруымен «Балабақша педагогтарының кәсіби құзыреттілігін жетілдіру жолдары» тақырыбындағы облыстық онлайн-семинар жұмысына қатысып, үздік идеялары мен тәжірибесі таратылды.
Балабақшаның педагог-психологы Ғалия Жүнісова былтыр қалалық «Үздік педагог-психолог» байқауына қатысып, I орын иеленді. Оның «Таным» білім беру саласы бойынша ерте жастағы балалардың психологиялық ерекшеліктері» тақырыбындағы іс-тәжірибесі республикаға таратылды. «Мектепке дейінгі тәрбие мен оқыту жүйесінің тұрақты дамуы: Казіргі заманғы тенденциялар, отандық тәжірибе, келешегі» тақырыбындағы республикалық ғылыми-тәжірибелік конференциясының материалдар жинағына еніп, өзінің әдістемелік құралын дайындады.
Гүлсім Сағындықова – І санатты ізденімпаз тәрбиеші. 2017 жылы Ақтөбе қаласында «Білім берудің заманауи әдістері мен технологиялары: Балабақша-мектеп-ЖОО» тақырыбындағы IV республикалық ғылыми-практикалық конференцияда «Мектеп жасына дейінгі баланы оқыту мен тәрбиелеуде Б.Никитиннің дамытушы ойындарының маңызы» тақырыбындығы баяндама оқып, II орынды иеленді. Ол 2017 жылы қалалық «Үздік тәрбиеші-2017» байқауында жүлделі І орын алған еді.
Айгүл Қалдыбекова – қалалық педагог­ тардың шеберлігін арттыру филиалында тәрбиешілерге жаңартылған білім мазмұны бойынша дәріс беріп жүрген педагог-тренер. Былтыр қалалық білім бөлімінің ұйым­ дастыруымен «Креативті тәрбиеші-2018» байқауына қатысқан Назерке Жұманова I орынға лайық деп танылды. Облыстық оқу орталығының ұйымдастыруымен «Үздікциклограмма» байқауына Әлия Төребай қатысып, «Білім беру салаларын кірік тіру» номинациясымен марапатталды. Қалалық «Үздік ән-әуез жетекшісі» байқауына қатысқан Эльвира Абдраманова ІІ орынды иеленді. «Үздік дене шынықтыру нұсқаушысы» конкурсына қатысқан Нұрхан Жақыпов бас жүлдеге ие болды.
Шығармашыл, ізденімпаз педагог-тәр­ биешілер жұмысының нәтижесі, әрине, балалардың жетістіктерімен өлшенуі заңды. Алтынұялық бүлдіршіндер де халықаралық, республикалық және облыс, қала көлеміне танылып жүр. Атап айтатын болсақ халықаралық «Таңғы шұғыла», «Ай-сәулемай», «Бейбітшілік әлемі», «Жұлдызды талант – Звездный талант» фестивальдарына қатысып бас жүлде, І дәрежелі, ІІ дәрежелі дипломдармен марапатталып келеді.
Биыл «Бейбітшілік әлемі» халықаралық фестивалінде «Ән» жанры бойынша Ақзияш Жанат, Анель Сыдық, Раяна Ибадулла және Айбибі Бахытжан қатысып жүлделі І орын иеленді.
Мектепке дейінгі шақ – адам өміріндегі ең маңызды кезең. Өйткені осы кезде баланың бойындағы табиғи дарын жан-жақты дами бастайды. Сондықтан осы шақта балалармен жан-жақты жұмыс жүргізілсе, нәтижелі болады. Тәрбиелі, білімді ұрпақ балабақшадан мектепке дайын шәкірт болып шығады.
Балабақша – барлық тәрбие мен білімнің ең алғашқы баспалдағы іспеттес. Мұндағы тәрбие мен білім балалардың табиғи мінезін, қабілетін ерте жастан дамытады. Бала – болашағымыз, бала – қуанышымыз. Ендеше мектепке дейінгі үздіксіз тәрбиемен, біліммен қамтуды басты мақсат тұтқан «Алтын ұяның» алғашқы онжылдықтағы қомақты табыстарын мақтанышпен айта аламыз.
<img src="https://kyzylorda-news.kz/wp-content/uploads/2019/11/02-1.jpg" alt="" />
<img src="https://kyzylorda-news.kz/wp-content/uploads/2019/11/03.jpg" alt="" />
<img src="https://kyzylorda-news.kz/wp-content/uploads/2019/11/04.png" alt="" />
<img src="https://kyzylorda-news.kz/wp-content/uploads/2019/11/05.png" alt="" />
<img src="https://kyzylorda-news.kz/wp-content/uploads/2019/11/06.jpg" alt="" />
<img src="https://kyzylorda-news.kz/wp-content/uploads/2019/11/07.jpg" alt="" />

Қызылордадағы Елбасы ашқан ерекше балабақша туралы не білеміз? (ФОТО)

<a href="https://kyzylorda-news.kz/">Kyzylorda-news.kz.</a> Қазалы ауданында Шығыс жастарының жалынды жетекшісі&nbsp; «Ғани Мұратбаев» атындағы республикалық жастар сыйлығын табыстау салтанаты өтті.
Биыл үшінші рет ұйымдастырылған байқауға 70 үміткер қатысып, солардың ішінде 30 жүйрік лайықты деп танылды.
Роза Бағланова атындағы аудандық мәдениет орталығында өткен салтанатты шарада аудан әкімінің орынбасары Әлімжан Жарылқағанов құттықтау сөз сөйледі.
<blockquote>
 «Жалын жігер Ғани атамыздың туғанына биыл 117 жыл толып отыр. Әйтсе де, біз үшін ол кісі әлі тірі, жап-жас күйінде елестейді. Жиырма үш жыл ғана өмір сүріп, жаһанға танылған тұлғаға айналған оның ісі мәңгілік жасайтыны сөзсіз. Ғанидың өмiр жолдарына көз жүгiртсең, бiлiмге құштарлық, әдiлдiк, табандылық, ұйымдастырушылық, уәдеге берiктiк, саяси тұрақтылық, шешендiк, адамдармен ортақ тiл табысу, жалған уәде бермеу, әлсiздерге қамқорлық, бастаған iстi аяғына жеткiзу, болашақты болжау сияқты тағылым аларлық қасиеттер бойында тұнып тұрғанына көз жеткiзесiң. Бiр басында осындай мiнез бен қасиет тоғысқан асыл азаматтың өнегесiн ұр¬паққа үлгi ету мiндет десек те, парыз десек те жарасады.Ал Ғани ісін жалғастыра білу бүгінгі ұрпақтың міндеті. Мына заманда «Өнердің кілтін тапқан ғана өрге шабады». Сендер, тәуелсіз Қазақстанның келешегі үшін тарихи жауапкершілік арқалайтын азаматсыңдар. Осы жауапкершілікті сезіне білулерің керек.Тұлпар дүлдүлдігімен, адам білгірлігімен озады. Беталысы күнде өзгерген алмағайып дүниеде адамзат үшін ешқашан өзгермеген, өзгермейтін темірқазықтар бар. Ол – білім! Ол – еңбек!», – деді Әлімжан Жарылқағанов.
</blockquote>
Мұнан соң Әлімжан Жарылқағанов, облыстық ішкі саясат басқармасының басшысы Талғат Маханов, аудандық мәслихат хатшысы Күнтілес Назымбеков жүзден жүйрік шыққан жеңімпаздарға «Ғани Мұратбаев» атындағы республикалық жастар сыйлығының Дипломын, төсбелгісін және естелік сыйлықтар табыстады.
Биыл «Ғани Мұратбаев» атындағы республикалық жастар сыйлығының жеңімпаздарының қатарында «Қазақстан» ұлттық телеарнасындағы «Мәселе» бағдарламасының жүргізушісі Нартай Аралбайұлы, бокстан әлем чемпионатының күміс жүлдегері Қамшыбек Қоңқабаев, жерлес талантты ақын Ақжол Түменбай секілді дарынды жастар бар.
Салтанатты шара аудан өнерпаздарының концерттік бағдарламасына ұласып, әннен шашу шашылды.
<img src="https://kyzylorda-news.kz/wp-content/uploads/2019/11/19kamshybek2.jpg" alt="" />

Қамшыбек Қоңқабаев «Ғани Мұратбаев» атындағы республикалық жастар сыйлығының иегері атанды

<a href="https://kyzylorda-news.kz/">Kyzylorda-news.kz.</a> Ауылды жерлерде әкімдікте жұмыс істейтін мамандар тапшы. Осыған байланысты Ұлттық экономика министрі Руслан Дәленов мемлекеттік қызметшілерді “Дипломмен ауылға” бағдарламасына қосуды ұсынды, деп хабарлайды&nbsp;<a href="https://sputniknews.kz/regions/20191118/12058062/Memlekettik-kyzmetshi-auil.html">Sputnik Қазақстан</a>.
<blockquote>
 “Ауылда кадр жетіспеушілігін шешу үшін мемлекеттік қызметшілерді “Дипломмен ауылға” жобасына қосуды ұсынамыз. Барлық ұсыныстар біз әзірлеп жатқан заң жобасында қарастырылады”, – деді Дәленов мәжілісте өткен үкімет сағатында.
</blockquote>
Ресми мәліметке сәйкес, ауылдық әкімдіктерде 450 орын бос тұр. Кадр жетіспеушілігі барынша байқалады. Ал мемлекеттік қызметшілер жалақының төмендігін сылтау етіп, ауылға барғысы келмейді.
<blockquote>
 “Ауылға баратын мамандарды қолдау қажет. “Дипломмен ауылға” бағдарламасында мемлекеттік қызметшілер болуы тиіс. Осы бағдарлама 2009 жылдан бастап қолға алынды. Содан бері 60 мыңнан астам маман қолдау тапты. Соның ішінде 27 мыңнан аса маман тұрғын үй алған. Ауылға келетін мамандарға 250 000 мың теңге көлемінде көтерме жәрдемақы және тұрғын үй алуға 4 миллион теңгеге дейін 0,01 процентпен кредит беріледі”, – деп атап көрсетті Дәленов.
</blockquote>
Министрдің сөзіне қарағанда, жыл сайын “Дипломмен ауылға” бағдарламасына республикалық бюджеттен 14 миллиард теңге бөлініп тұрады. Президенттің тапсырмасы бойынша келесі жылдан бастап қаржыландыру көлемі 20 миллиард теңгеге дейін өседі.

Енді мемлекеттік қызметшілер ауылға жіберіледі

<a href="https://kyzylorda-news.kz/">Kyzylorda-news.kz.</a> Байқоңыр қаласындағы білім мекемелері құрамында сынабы бар қауіпті қалдықтарды мектеп ғимаратында заңсыз сақтаған. Осылайша 8049 оқушы мен 1307 қызметкердің денсаулығына қауіп төндірген. Бұл туралы Қызылорда облыстық прокуратурасының баспасөз хатшысы Ғабит Ұзақбай мәлімдеді.
Байқоңыр қаласы прокуратурасы өз қадағалау аумағындағы білім ұйымдарының қауіпті қалдықтарды жою заңдылығының жай-күйіне талдау жүргізген болатын. Талдау барысында бірқатар білім мекемелерінде құрамында сынабы бар 2530 дана люминесцентті шамның біршама уақыттан бері жойылмай, заңсыз сақталғаны анықталды. Олардың пайдалану мерзімі өткен, барлығы жойылуға тиіс.
<blockquote>
 «Сынап пен оның қоспаларында адам ағзасында жиналуға және ағзасына зиян келтіруге қабілетті аса қауіпті уыты жоғары заттар бар. Созылмалы уланудың өрбуінде сынаптың кез келген нысандарынан құралған әртүрлі бұйымдардан, оның ішінде құрамында сынабы бар шамдардан бөлініп шығатын сынап буы аса қауіпті. ҚР Экологиялық кодексінің 293-бабы 2-1 бөлігіне сәйкес, құрамында сынабы бар қалдықтар бөлек жиналып, мамандандырылған кәсіпорындарға кәдеге жаратуға, қайта өңдеуге тапсырылуға тиіс», – деп мәлім етті Қызылорда облыстық прокуратурасының баспасөз хатшысы Ғабит Ұзақбай.
</blockquote>
Білім беру ұйымдары аталған заң талаптарын басшылыққа алмай, қауіпті қалдықтарды мектеп ғимаратында заңсыз сақтаған. Соның салдарынан 8 049 оқушы мен 1307 қызметкердің конституциямен кепілдік берілген құқықтары бұзылған.
Прокурорлық ықпал ету актісі енгізіліп, нәтижесінде білім бөлімі мен арнайы мекеме арасында келісімшарт жасалды.
Бүгінде қауіпті қалдықтар жойылған.

Байқоңыр мектептерінде заңсыз сақталған қауіпті қалдықтар 8049 оқушыға зауал төндірген

<a href="https://kyzylorda-news.kz/">Kyzylorda-news.kz.</a> Қарашаның 19-ы күні республиканың басым бөлігінде атмосфералық фронталды бөліктердің өтуіне байланысты тұрақсыз ауа райы күтіледі.
Кәсіпорын таратқан мәліметтерге қарағанда, бүгін еліміздің кей жерлерінде жауын-шашын болады, республиканың орталық бөлігінде және шығысында күндіз кей жерлерде мол көлемде қар жауады. Кей жерлерде жел күшейіп, тұман түсіп, жаяу бұрқасын, солтүстік пен шығыста көктайғақ күтіледі.
Алматы, Түркістан облыстарының бірқатар аумақтарында күндіз 15-20 м/с жылдамдықпен жел соғады.
Қызылорда, Атырау, Маңғыстау, Жамбыл облыстарының кей жерлерінде – тұман түсіп, Қызылорда, Атырау облыстарының бірқатар аумақтарында көктайғақ болады. Жамбыл облысының кей жерлерінде жел 15-20 м/с жылдамдықпен соғады.
Ақмола, Солтүстік Қазақстан облыстарының кей жерлерінде тұман түсіп, бұрқасын болуы ықтимал, жел 15-20 м/с күшейеді.
Батыс Қазақстан, Ақтөбе облыстарының кей жерлерінде тұман, көктайғақ күтіледі, күндіз жел 15-20 м/с күшейеді. Ақтөбе облысының кей жерлерінде жаяу бұрқасын болуы ықтимал.
Қостанай, Шығыс Қазақстан облыстарының кей жерлерінде бұрқасын болып, желдің жылдамдығы секундына 15-20 метрге, екпіні 23 метрге жетеді. Қостанай облысының кей аумақтарында тұман, Шығыс Қазақстан облысының бірқатар бөлігінде көктайғақ күтіледі.
Павлодар, Қарағанды облыстарының кей жерлерінде тұман, бұрқасын, көктайғақ, жаяу бұрқасын болады деген болжам бар, жел 15-20 м/с күшейеді.

Қазгидромет: Қарашаның 19-ы күнгі ауа райы болжамы

Халықаралық ерлер күні
Алғаш рет Ерлер күнін 1999 жылы Тринидад пен Тобаго Республикасының тұрғындары атап өтті. Содан бастап ЮНЕСКО-дан қолдау тауып, бұл күнді атап өтуге өзге елдер де қосыла бастады.
Кәсіпкер әйелдер күні
2014 жылдан бастап жыл сайын мерекеленуде. Америкалық жазушы, үй жануарларын күту саласындағы бірқатар компаниялардың иегері Венди Даймонд негізін қалаған. Гондурасқа барған сапарында ол Adelante ұйымында ерікті болды. Жалақысы төмен әйелдерге шағын кредит ұсынды. АҚШ-қа оралғаннан кейін ол кәсіпкер әйелдер күнін мерекелеу идеясын ұсынды. Бұл халықаралық мереке алғаш рет Нью-Йоркте БҰҰ бастамасымен өтті. қосымша шаралар әлемнің 144 елінде ұйымдастырылды.
2012 жылы Қазақстан тарихында тұңғыш рет Қазақстан Республикасы Білім және ғылым минстрлігі жанындағы Ұлттық студенттік кеңес құрылды.
2017 жылы Ақан Сатаевтың «Районы» фильмі Барселонадағы кинофестивальде «Үздік операторлық жұмыс» номинациясында жүлдеге ие болды.

19 қараша: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 19 қарашаға арналған жұлдыз-жорамалы.
Тоқты
Бүгін мінезіңіз жібектей жұмсақ. Кейбір ашу шақыратын уақытта қойдан да жуас мінез танытасыз. Бұл мінезіңіз айналаңыздағыларға ұнайды. Әсіресе сүйікті адамыңызға ұнағаны соншалық, сізге қымбат тосынсый жасағалы тұр.
Торпақ
«Шыдамның да шегі бар» демекші, шыдамыңызды тауысқан жан болса, онда өз обалы өзіне болмақ. Ашу шақырып, айқайлап алсаңыз да болады. Себебі сіз бұған дейін оған өзіңізге жоламауды ескерткен болатынсыз.
Егіздер
Бүгін жүйкеңіз сыр береді. Сырқаттанып қалмас үшін эмоцияға ерік беріңіз. Ашу-ызаны іште сақтап қалмаңыз. «Ауруын жасырған өледі» демекші, іштегі «дауылды» сыртқа шығарып, өзіңіз жеңілдеп қалыңыз.
Шаян
Бүгінгі жағдайлар, орын алып жатқан оқиғалар бақылауыңыздан шыққан болса, көмек көрсететін жан табылады. Ол барлық мәселені шешуге, қиындықтардың алдын алуға көмектеседі.
Арыстан
Бүгін сүйіктіңіз сіздің не ойлағаныңызды білмей дал болады. Себебі сіздің бүгінгі жүріс-тұрысыңыз жұмбақ. Тіпті айтар ойларыңызды да астарлап жеткізуге тырысасыз.
Бикеш
Бүгін ақпарат ағыны толассыз болмақ. Естіген жаңалықтарыңыздан соң, үй тірлігіне қолыңыз бармай, қиындық туындайды. Бұл қиындықтан құтылу үшін біліміңізді шыңдауға кірісіңіз.
Таразы
Қиялға берілмей, өмірге шынайы қарай біліңіз. сонда ғана арманыңыз шындыққа айналады. Сонымен қатар бүгін шағын кәсібіңізді кеңейтуге ұсыныс түседі. Бірақ ол үшін біраз тер төгуге тура келеді.
Сарышаян
Бүгін көңіл-күйіңіз керемет. Барлығы сіз ойлағаннан да жақсы болмақ. Мәселенің барлығы өз уақытында шешімін тауып, еш алаңдамайтын боласыз. Сонымен қатар сүйікті адамыңыздың көңілін табуға тырысыңыз.
Мерген
Бүгін өзіңізге ұнайтын іспен айналысасыз. Бұл іске әуестенгеніңіз сонша, жан-жағыңыздағы адамдарды да байқамайсыз. Ал бұл іс-әрекетіңіз көпшілікке ұнамауы мүмкін.
Тауешкі
Бүгін мақтауларға масаттанып, тәкаппарланып кетпеңіз. Әлдекімдер осы орайды өз мүддесіне пайдалануы мүмкін. Өзіңізді бірқалыпты ұстағаныңыз жөн. Сонда ғана өзгелерді мойындата аласыз.
Суқұйғыш
Не тілесеңіз де, барлығы орындалады. Тек ниетіңіз болса, барлық арманды орындауға болатынын естен шығармаңыз. Сонымен қатар бүгін ұнатпаған тағамды тұтынбағаныңыз жөн.
Балықтар
Бүгінгі жоспарыңыз тығыз орналасады. Уақыт тауып бір-екі жоспарды кейінге қалдырсаңыз болады. Ал қалған жоспарларыңыз барлығы оң нәтиже беретін болады.

Қазақстан және Қызылорда облысының жаңалықтары: Қоғам