<a href="https://kyzylorda-news.kz/">Kyzylorda-news.kz</a> Адамзат тарихында еңбек – әрқашан ұлы құндылық. Елдің еңсесін көтерген де – еңбек адамы. Жерді жыртып, егін еккен де, темірді балқытып, техника тізгіндеген де, мұнай-газды, кен-байлықты игерген де – қарапайым жұмысшы. Сондықтан Президент Қасым-Жомарт Тоқаевтың 2025 жылды «Жұмысшы мамандықтар жылы» деп жариялауы еліміздің жаңа экономикалық кезеңге қадам басуының айқын белгісі, еңбек мәдениетінің қайта түлеуі. Ал осындай кезеңде тірегі мығым, болашағы айқын, нағыз жұмысшы мамандарды даярлап келе жатқан Шиелі индустриалды-аграрлық колледжінің тынысы бөлек. Директоры Болат Сүлейменовтің басшылыққа келгеніне бір жылға енді жуықтаса да, атқарылған іс бір ғасырға татырдай. Өйткені колледж бүгінгі қоғам талаптарына сай жаңарып, жаңғырып, жаңа белеске қадам басып келеді. Біз Болат Сүлейменовпен жүздесіп, тарихтан тартып болашаққа дейінгі әсерлі, кең тынысты сұхбат құрдық.– Болат Мулланазарұлы, колледжді басқарғаныңызға енді жыл толады. Бір жылда не өзгерді?&nbsp;<blockquote>– Өмірдің өзі өзгеріссіз тұрмайды. Бұл жыл – мен үшін де, ұжым үшін де үлкен сын мен ізденістің, өзгеріс пен жаңғырудың жылы болды. Бүгінгі білім беру жүйесі бәсекеге қабілетті, нақты өндірісте қажет маман дайындауға бағытталуы тиіс. Осы талапқа сай колледждің жаңа тынысын ашып келеміз. Шиелі индустриалды-аграрлық колледжі – 1958 жылы Бәйгеқұм қыстағында негізі қаланған. 67 жылдан астам тарихы бар қара шаңырақ. Әр дәуірде түрлі атауға ие болса да, миссиясы өзгерген емес. Ол – елге қажет кәсіби маман дайындау. Бүгінде ауыл шаруашылығы, геология, құрылыс, энергетика, машина жасау бағыттарында сапалы кадр даярлайтын өңірдегі бірегей оқу орны. Кеңестің қарапайым аграрлық училищесінен – бүгінгі заманауи индустриялық колледжге дейінгі жол оңай болған жоқ. Бірақ ең бастысы – болашаққа деген сенім сақталды. Бүгінде колледж – 18 мамандық, 28 біліктілік бойынша кадр даярлайтын ірі орталық. 500-ге жуық студент білім алып, жалпы 116 маман қызмет етеді. 240 орындық жатақхана бар. Студенттерге қолайлы жағдай жасалған. Бір жылда біз оқу орнының рухын жаңа деңгейге көтеруге тырыстық. Өйткені, қазір бәсеке – білімде, еңбек – қолда, ал табыс – шеберлікте.</blockquote>– Колледж тарихы – еліміздің еңбек шежіресімен сабақтас. Оқу ордасында есімі алтын әріппен &nbsp;жазылған тұлғалар аз емес…<blockquote>– Иә, біз мұны мақтанышпен жиі айтамыз. Бұл колледж – еңбек ерлерінің ұстаханасы. Екі мәрте Социалистік Еңбек Ері Ыбырай Жақаев, Социалистік Еңбек Ерлері Закира Ержанова, Ұлбала Алтайбаева, Шырынкүл Қазанбаева, Жадыра Таспамбетова – бәрі де осы орданың түлегі. Одан бөлек, халық сүйген механизаторлар Рысбай Мәуленов, Сұлтан Айтасов ел сенімін арқалаған депутат Жақсылық Ахметов – бәрі осы шаңырақтан қанаттанған. Колледждің тарихына үңілсек, әр дәуірдің еңбек эпосын көреміз. Бұл – жай ғана білім орны емес, бұл – еңбек мәдениетінің академиясы.</blockquote>– Биыл «Жұмысшы мамандықтар жылы». Осы жыл колледждің өміріне қандай серпін әкелді?<blockquote>– Бұл жыл – біз үшін жаңа мүмкіндіктердің, жаңа жауапкершілік пен сенімнің жылы. Бір сөзбен айтқанда, осы жыл біздің миссиямызбен үндес. Мемлекет басшысы 2025 жылға айдар тағу арқылы: «Елдің ертеңін жұмысшы жасайды, елдің өркенін еңбек көтереді» деп қоғамға маңызды ой тастады. Біздің ең басты міндетіміз – жұмысшының қоғамдағы мәртебесін көтеру. Өйткені біз дайындайтын мамандықтың барлығы елге тікелей қажет. Электрик, дәнекерлеуші, механизатор, бұрғылаушы, автоэлектрик, кондитер, геолог, кран машинисі. Сондықтан биыл колледж үш бағытқа басымдық берді. Олар: кәсіби дағдыларды тереңдету, өндіріс орындарымен серіктестікті кеңейту, материалдық-техникалық базаны жаңарту. Осы бағыттар нәтиже берді.</blockquote>– Жыл ішіндегі колледж жетістіктері ерекше айтылып жүр. Сайыстардағы жеңістер туралы тоқталып кетсеңіз.<blockquote>– Иә, студенттеріміздің биылғы жеңістері біз үшін үлкен мақтаныш. WorldSkills – кәсіби шеберлік чемпионаттары «Дәнекерлеу ісі» бойынша Ержан Сарыбай облыс чемпионы, республикалық кезең – медальон. Жетекшісі: Қайрат Башаров. «Кондитерлік ісі» бойынша Нұрайлым Есенбай І орын, республикаға жолдама алды. Жетекшісі: Сабира Дайрақұлова. «Сән технологиясы» бойынша Ақбота Пәрімбетова, Аружан Әбдірасілова ІІІ орын. Жетекшісі: Айдана Ақылбекова. «Электромонтаждау» бойынша Лян Аркадий ІІ орын. Жетекшісі: Мейірбек Сұлтанбек. Өзге ірі жеңістерге тоқталсам, «Жас электрик – 2025» командалық II орын, екі студент – І дәрежелі диплом. «Жастар – жаңа геологиялық ашылымдар жолында» республикалық форум – I орын. Бұл – колледж тарихындағы ерекше жеңіс. Сондай-ақ, «AgroBest – 2025» ІII орын, «Кәсіби маман – 2025» байқауында серіктес «Волковгеология» Үздік кәсіпорын атағы. Барлығы – жұмысшы мамандықтарының беделін арттыратын жеңістер. Бұл жеңістердің әрқайсысы – бір ғана студенттің жетістігі емес, бұл – колледждің, ұстаздың, еңбек адамының жеңісі.</blockquote>– Жаңалық десе, колледжде жыл сайын тың дүниелер пайда болады. Биыл қандай өзгеріс бар?<blockquote>– Ең маңызды жаңалық – ЗИФ-1200 МПК бұрғылау қондырғысының оқу процесіне берілуі. Мұндай техникамен жұмыс істеу – студентке өндірістің есігін ашқанмен тең. Еліміздің ТжКБ жүйесінде сирек кездесетін мүмкіндік. Сонымен қатар 20-дан астам ірі кәсіпорынмен жаңа келісімшарт жасалды. Бұл дегеніміз – әрбір студенттің өндірістік тәжірибесі мен жұмыспен қамтылуы нақты жолға қойылады.</blockquote>– Білуімізше, колледж жаңа мамандықтар ашу жұмыстарын бастап кетіпті. Бұл қандай мамандықтар?<blockquote>– Дәл солай. Жұмысшы мамандықтар жылы бізге ерекше жауапкершілік жүктеді. Сол себепті 2025 жылдан бастап 8 жаңа мамандық ашу жұмысы жүріп жатыр. Олардың қатарында: автокөлікке қызмет көрсету, автоэлектрик, автослесарь, наубайшы, сумен жабдықтау жүйесінің операторлары, кран машинистері, уран өндіру саласының аппаратшылары, операторлар. Бұл – ел экономикасына ауадай қажет мамандықтар. Біздің міндет – осы салаларға білікті кадр даярлау.</blockquote>– Алдағы жоспар қандай? Сөзіңізден үлкен мақсаттар барын аңғардық…<blockquote>– Әрине, жоспар аз емес. Тіпті жоспар емес, үлкен жолдың бастамасы десек дұрыс. Алдағы жылдары біз колледжді жаңа деңгейге шығару үшін бірнеше стратегиялық қадамды жүзеге асырмақпыз. Ең әуелі студенттер санын 650-ге жеткізуді көздеп отырмыз. Бұл тек сан қуалау емес, оқу орнына деген сенім мен сұраныстың өскенінің көрінісі. Шеберханалардың бәрін толық жаңғырту – басты міндеттердің бірі. Заманауи құралсыз сапалы маман даярлау мүмкін емес. Сондай-ақ, дуальді оқытуды 40-50 пайыздық деңгейге жеткізуді жоспарлап отырмыз. Бұл – студенттің аудиториядан гөрі өндірісте көбірек уақыт өткізуіне жағдай жасау, яғни нағыз кәсіби ортаны сезінуіне мүмкіндік беру. Жаңа зертханалар ашу, индустриялық серіктестер санын ұлғайту, студенттерді шетелдік тағылымдамаларға жіберу – біздің келешектегі үлкен мақсаттарымыздың бір бөлігі ғана. Арманымыз – Шиелі индустриалды-аграрлық колледжін өңірдегі ғана емес, республикадағы алдыңғы қатарлы аграрлық-техникалық орталыққа айналдыру. Айта кетейін, биылғы маңызды жоспарымыздың бірі – қараша айының 27-сінде республика көлемінде ауқымды сайыс өткізу. «Жұмысшы мамандықтар жылы» шеңберінде «Геология және пайдалы қазбалар кен орындарын барлау» мен «Тау-кен металлургиясы» бағыттары бойынша ТжКБ ұйымдарының студенттері арасында «Тау-кен өндірісіндегі инновациялар және жас мамандардың рөлі» атты командалық кәсіби шеберлік сайысын ұйымдастырмақпыз. Бұл – біздің колледждің жаңашылдыққа, бәсекеге қабілеттілікке, ұлттық кадр даярлау ісінде көшбасшы болуға ұмтылған қадамы.</blockquote>– Соңғы сұрақ, жұмысшы мамандықтарының болашағы қандай?<blockquote>– Болашағы – өте үлкен. Жұмысшы мамандықтары – экономика жүрегінің соғысы. Маман жоқ жерде, өндіріс жоқ. Өндіріс жоқ жерде, даму жоқ. Сондықтан дәл бүгін – жұмысшының заманы. Менің ойымша, нағыз байлық – май ішіне сіңген қол еңбегінде. Таза еңбектің иісі – табысқа, тұрақтылыққа, кәсіби дамуға бастайтын адал соқпақ. Сол соқпаққа жастарды жетелеп, кәсіби жолына бағыттау – біздің парыз!</blockquote>– Әңгімеңізге рақмет. Шиелі колледжінің көтерген жүгі – ел ертеңінің жүгі екені анық.Сұхбаттасқан Сұлушаш МАДИЯРОВАФото: автордікі

Болат Сүлейменов: "Бәсеке – білімде, табыс – шеберлікте"

<a href="https://kyzylorda-news.kz/">Kyzylorda-news.kz</a> «AMANAT» партиясы Сырдария аудандық филиалы жанындағы Партиялық бақылау комиссиясының отырысы өтті. Облыстық мәслихат депутаты Жұмабек Ембергенов төрағалық ететін Партиялық бақылау комиссиясын күн тәртібінде негізгі төрт мәселе қаралды.Бірінші мәселе «AMANAT» партиясы сайлауалды бағдарламасының Сырдария ауданы бойынша 2025 жылға арналған индикаторларының орындалу барысы мен алдағы жоспарлар туралы аудан әкімі Б.Сәрменбаев баяндама жасап, сайлауалды бағдарламаның орындалуы бойынша ақпарат берді.<blockquote>– «AMANAT» партиясының сайлауалды бағдарламасының ауданда орындалуы қатаң бақылауда. 2023-2027 жылдарға арналған сайлауалды бағдарламаны іске асырудың Жол картасының Сырдария ауданына жүктелген міндеттеріне 2025 жылға барлығы 48 шара белгіленген. 2025 жылдың 11 айында белгіленген 48 шараның 37 орындалды, 11-і орындалу үстінде. Оның ішінде, орындалмау қаупі бар шаралар саны – 6. Есепті кезеңде аудандағы өңдеу өнеркәсібінің көлемі 11,9 млрд. теңге болып, 19,4 пайызға өсті. Ауыл шаруашылығында жалпы өнім көлемі&nbsp; 24,8 млрд. теңгені құрап, өткен жылмен салыстырғанда 100,5 пайызды құрады. Жыл басынан бері аудан кәсіпкерлеріне мемлекеттік бағдарламалар аясында 129 жоба бойынша 202,8 млн. теңге грант қаражаты берілді. Жол картасы аясында ағымдағы жылы Н.Ілиясов ауылын газдандыру жобасына облыстық бюджеттен 661,4 млн. теңге бөлініп, елді мекен табиғи газден қамтамасыз етілді. Ауданда электр желілерін тозу деңгейін 68 пайызға дейін түсіру межеленген. Бұл бағытта 2024 жылы Шаған ауылын электр желілерімен жабдықтау жұмыстары толық аяқталса, «Ауыл – ел бесігі» бағдарламасы аясында жоба құны&nbsp; 490,5 млн. теңгені құрайтын Қалжан ахун елді мекенін электрмен жабдықтау жүзеге асуда. Жол картасы аясында 2025 жылы&nbsp; 9,5 шақырым жергілікті маңызы бар жолдарды жөндеу және 15 шақырым елді мекендер көшелерін жөндеу жоспарланған. Есепті кезеңде аудан бойынша жол саласына қатысты 5 жобаға 982,3 млн. теңге қаржы бөлініп, аудандық маңызы бар «Қызылорда-Аэрапорт-Қоғалыкөл-Шіркейлі» автожолының қалған 10,2 шақырымы және Шіркейлі, Шаған, С.Сейфуллин елді мекендерінде 13 көше жөндеуден өтті. «AMANAT» партиясының 2023-2027 жылдарға арналған сайлауалды бағдарламасын ауданда толық жүзеге асыруға жұмыстарды жалғастыра береміз. Бұл бағытта нақты шаралар қабылдануда, – деді аудан әкімі.</blockquote>Екінші мәселе бойынша Қоғалыкөл, Шіркейлі ауылдық округінің әкімдері халыққа берген уәделері бойынша есеп берді. Сонымен қатар аудандық қоғамдық даму бөлімінің басшысы Б.Смайлов «AMANAT» партиясы сайлауалды бағдарламасындағы 2025 жылға арналған индикаторларының орындалу барысы туралы баяндама жасады. «AMANAT» партиясы Сырдария аудандық филиалы жанындағы Партиялық бақылау комиссиясының 2025 жылғы жұмыс қорытындысы және 2026 жылға арналған жұмыс жоспары бойынша «AMANAT» партиясы Сырдария аудандық филиалының Атқарушы хатшысы, Фракция жетекшісі А.Ибрагимұлы баяндама жасады.Күн тәртібіндегі мәселелер жан-жақты қаралып болған соң Партиялық бақылау комиссиясының төрағасы Жұмабек Ембергенов партияның сайлауалды бағдарламасы аясында және бюджеттен қаржы бөлініп салынып жатқан нысандарды, оның ішінде әлеуметтік нысандар мен жол құрылысы, тұрғындардың тегін дәрі-дәрмекпен қамтамасыз етілуі бойынша партиялық бақылау жұмыстарын жүргізудің маңыздылығын айтты.<blockquote>– «AMANAT» партиясының сайлауалды бағдарламасын орындау, құрылысы жүріп жатқан нысандарға партиялық бақылау жасау, партиялық жобаларды жүзеге асыру – бәріміздің ортақ міндетіміз. Сондықтан Партиялық бақылау комиссиясы өз жұмысын алдағы уақытта да жалғастыратын болады. Жұмыстардың сапалық мазмұнын арттыру керек. Бірде бір нысан партиялық бақылау жұмыстарынан тыс қалмауы қажет, – деп қорытындылады Партиялық бақылау комиссиясының төрағасы Жұмабек Ембергенов.</blockquote>

Партиялық бақылау комиссиясында бірқатар мәселелер қаралды

<a href="https://kyzylorda-news.kz/">Kyzylorda-news.kz</a> «Заң мен тәртіп» қағидасы аясында Абылай хан атындағы жоғары колледжінің студенттерімен профилактикалық кездесу өткізілді. Кездесуге Ювеналды Полиция бөлімшесінің аға инспекторы, Полиция майоры Соболев Виталий Алексеевич, Облыстық жастар ресурстық орталығының мамандары мен Ұлттық жекпе-жектен әлем чемпионы Бейбітжан Әмірханұлы, Еркін күрестен ҚР чемпионаты Жастар арасында Азия ойындарының қола жүлдегері Мерей Науанханұлы қатысты.Кездесудің негізгі мақсаты – жасөспірімдер мен жастар арасында құқықбұзушылықтың алдын алу, топтық төбелес, буллинг және суицид сияқты өзекті мәселелердің алдын алу жолдарын түсіндіру болды. Құқық қорғау органдарының өкілдері аталған құқықбұзушылықтардың салдары мен заң аясындағы жауапкершілік туралы жан-жақты ақпарат берді. Сондай-ақ, спорт шеберлері өз жетістіктерімен бөлісіп, кәсіби жолындағы тәжірибелерін ортаға салды.Шара барысында студенттер сала мамандарына сұрақтар қойып, нақты жауаптар алды. Мұндай кездесулер жастардың құқықтық сауаттылығын арттырып, қоғамдағы тәртіп пен қауіпсіздікті нығайтуға оң ықпал етеді. Алдағы уақытта да осы бағыттағы профилактикалық жұмыстар жалғасын табатын болады.

Құқықтық сауаттылықты арттыру мақсатында жастармен кездесу өткізді

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың қатысуымен құқық бұзушылықтың алдын алу бағытында атқарылған жұмыстар нәтижесіне байланысты іс-шара өтті. Оған аудандық мәслихат төрағасы Е.Әжікенов, аудан прокуроры А.Алимбаев, бөлім басшылары мен құқық қорғау қызметкерлері қатысты.<blockquote>– Мемлекет басшысының «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына арнаған Жолдауында «Заң мен тәртіп» қағидаты – қоғамда қауіпсіздік пен әділдікті қамтамасыз ететін негізгі құқықтық принципі. Заң үстемдігіне негізделген тәртіп бойынша қоғамдағы барлық әрекет пен шешім заңға сүйеніп жүзеге асырылады» деп атап өтті. Азаматтардың қауіпсіздігін қамтамасыз ету және құқық бұзушылықтың алдын алуда белгіленген нормаларды, заңдылықты орындау міндетті. Қоғамда заң талаптарын сақтау арқылы ғана &nbsp;тыныштық пен тәртіп орнайтыны белгілі. Бүгінде елімізде заң мен тәртіп идеологиясын ілгерілету жөніндегі 2025-2030 жылдарға арналған тұжырымдаманы іске асыру жөніндегі іс-қимыл жоспары бекітілген. Мұндағы мақсат – құқық бұзушылық профилактикасы мен халыққа қызмет етуге екпін бере отырып, мемлекеттік және құқық қорғау органдары қызметінің сервистік моделінің тиімділігін арттыру болып саналады. Аталған іс-қимыл жоспары негізінде «Қылмыссыз өңір – кемел келешек кепілі» жобасы жүзеге асырылуда. Бұл бастама құқық бұзушылықтың азаюына, жастар тәрбиесі мен қоғамдық тұрақтылықтың нығаюына оң әсерін тигізуде. Қоғамдық қауіпсіздікті қамтамасыз етуде аудандағы мемлекеттік қызметшілер, құқық қорғау органдарының қызметкерлері тынымсыз қызмет атқарып келеді, – деді Берік Әбдіғаппарұлы.</blockquote>«Қылмыссыз өңір – кемел келешек кепілі» жобасы бойынша аудан прокуроры Абай Алимбаев сөз сөйлеп, облыстық прокуратурамен қылмыстың алдын алу бағытында атқарылып жатқан жұмыстарға тоқталды. Оның ішінде, ауданда алкогольден бас тартқан елді мекендерде қылмыс саны азайғанын жеткізді. Осыған орай, бірқатар мемлекеттік қызметшілер мен полиция қызметкерлері "Алғыс хатпен" марапатталды.Іс-шара қорытындысында аудан әкімі мемлекетіміздің заңдарын сақтау, қоғамдық тәртіпті нығайту баршамызға ортақ міндет екеніне тоқталып, бұл бағытта жергілікті атқарушы билік, құқық қорғау органдары және қоғам бірлесе жұмыс атқаруы қажеттігін жеткізді.

Сырдария: Қоғамдық қауіпсіздікті қамтамасыз ету – басты міндет

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың қатысуымен «Азаматтарға арналған үкімет» мемлекеттік корпорациясының 20 жылдық мерейтойына арналған салтанатты іс-шара өтті.Мерекелік жиынға «Азаматтарға арналған үкімет» мемлекеттік корпорациясының акционерлік қоғамының Қызылорда облысы бойынша филиал директоры Аида Абибуллаева, аудандық мәслихат төрағасы Ержан Әжікенов, аудандық филиал директоры Жұмабек Ембергенов, аудан ардагерлері, аудандық мәслихат депутаттары арнайы қатысты.-Мемлекет басшысы биылғы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында<blockquote>«Біз жаппай цифрландыруды барынша енгізу арқылы экономиканы жаңғыртуымыз қажет» деп атап өтті.Президент Үкіметке экономиканың барлық саласын жаңғырту үшін жаппай цифрландыруды тапсырды. Осы ретте, «Азаматтарға арналған үкімет» корпорациясына жүктелетін міндет көп.Корпорацияның басты жетістігі – адамға бағдарланған қызмет көрсету жүйесін қалыптастыруында. «Бір терезе» қағидаты арқылы көрсетілетін қызметтер халықтың уақытын үнемдеп қана қоймай, мемлекеттік қызмет көрсету мәдениетінің жаңа стандарттарын енгізді. Осындай нәтижелі жұмыстардың арқасында бүгінде еліміз онлайн қызмет көрсету бойынша әлемде үздік 10 елдің қатарына енді.Ауданымызда «Азаматтарға арналған үкімет» корпорациясының филиалы тұрғындарға күн сайын сапалы әрі қолжетімді қызмет көрсетіп келеді. Туу туралы куәліктен бастап, әлеуметтік төлемдерге, жылжымайтын мүлікті тіркеу мен көлік құралдарын рәсімдеуге дейінгі көптеген маңызды қызметтер осы мекеме арқылы көрсетіледі. Бұл – әрбір отбасының, әрбір азаматтың өмірімен тікелей байланысты үлкен жауапкершілік жүктейтін жұмыс деді,- Берік Әбдіғаппарұлы.</blockquote>Өз кезегінде облыстық корпорация директоры Аида Ибрагимқызы мерейтоймен құттықтап, корпорация қызметкерлерінің халыққа қызмет көрсетудегі адал еңбегіне жоғары баға берді. Сондай-ақ алдағы уақытта да мемлекеттік қызметтердің сапасын арттыру, цифрландыру үдерістерін жетілдіру бағытындағы жұмыстар жалғасын табатынын айтып, ұжымға толағай табыс пен жаңа жетістіктер тіледі.Іс-шара соңында сала дамуына үлес қосқан бірқатар қызметкерлер алғыс хатпен және мерекелік медальдармен марапатталды.Фото: Сырдария ауданы әкімінің баспасөз қызметі

"Азаматтарға арналған үкімет" мемлекеттік корпорациясы 20 жылдық белесте

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың төрағалығымен мәжіліс өтіп, онда ауданның әлеуметтік-экономикалық даму көрсеткіштері қаралды.<blockquote>– 2025 жылдың қаңтар–қараша айларында ауданның өнеркәсіп орындары қолданыстағы бағамен 93,3 млрд теңгенің өнімін өндіріп, өткен жылдың сәйкес кезеңімен салыстырғанда 73,6 пайызға артты. Оның ішінде өңдеу өнеркәсібінің үлесі 13,1 млрд теңгені құрады. Ауыл, орман және балық шаруашылығы саласында жалпы өнім көлемі 25,7 млрд теңгеге жетіп, жоспар 101,2 пайызға орындалды. Ағымдағы жылдың 11 айында аудан экономикасына 83,3 млрд теңге негізгі капиталға инвестиция тартылып, бұл өткен жылдың тиісті кезеңімен салыстырғанда 101 пайызды құрады. Осы кезеңде 25,8 мың шаршы метр тұрғын үй пайдалануға беріліп, жоспар 101,2 пайызға орындалды. Құрылыс жұмыстарының көлемі 22,8 млрд теңгені құрап, 117,9 пайызға жетті. Бөлшек сауда көлемі 2025 жылдың қараша айында 2,9 млрд теңгені құрап, 100,1 пайыз болды, – деді Берік Әбдіғаппарұлы.</blockquote>Аудан әкімі 11 айдың қорытындысы бойынша макроэкономикалық көрсеткіштердің толық орындалғанын атап өтіп, жыл соңына дейін межеленген жоспарлардың толық әрі сапалы орындалуын қамтамасыз ету қажеттігін тапсырды. Сондай-ақ барлық мүмкіндіктерін тиімді пайдаланып, жылды жоғары нәтижемен қорытындылауды міндеттеді.Фото:&nbsp;Сырдария ауданы әкімінің баспасөз қызметі

 Макроэкономикалық көрсеткіштердің орындалуы тұрақты бақылауда

<a href="https://kyzylorda-news.kz/">Kyzylorda-news.kz</a> Арал аудан әкімдігінің мәжіліс залында аудан әкімі Аманжол Оңғарбаевтың төрағалығымен арнайы жиын өтіп, бірқатар маңызды мәселелер қаралды.Жиында Үкімет отырысында талқыланған трансшекаралық хабтарды дамыту мәселелері мен Қазақстан Республикасында қалдықтардың барлық түрлерін басқарудың 2026-2030 жылдарға арналған тұжырымдамасы күн тәртібіне қойылып, осы бағыттағы кемшіліктер мен олардың шешу жолдары жан-жақты қарастырылды.Алдымен теміржол және автожол бағыттары арқылы еліміздің экспорттық әлеуетін арттыру, сауда-экономикалық ынтымақтастықты дамыту бойынша жауапты сала басшыларымен нақты тапсырмалар пысықталды.Мемлекет басшысы биылғы Жолдауында «Қазақстан Еуразиядағы көлік хабы болуға тиіс» екенін атап өтіп, транзиттік дәліздердің стратегиялық маңызына тоқталған болатын. Солардың бірі – «Сексеуіл–Бейнеу» жолының құрылысын жеделдету тапсырмасы.Аудан әкімі аталған міндеттерді жүзеге асыру үшін облыстық басқармалармен және министрліктермен өзара тығыз байланыс орнату қажеттігін атап өтті.Сонымен қатар 14 желтоқсаннан бастап «Астана–Жезқазған» бағытындағы «Тальго» жүрдек пойызы Қызылорда қаласына дейін жүретіні айтылып, осы бағыттағы жол қауіпсіздігін қамтамасыз етуді жан-жақты қарастыру міндеттелді.Жиында қаралған екінші мәселе қоршаған ортаны қорғау, соның ішінде қатты тұрмыстық қалдықтарды қайта өңдеу жұмыстары. Құны 80,2 млн теңге болатын Арал қаласында қатты қалдықтарды сұрыптау кешенін салу жобасы «Жасыл Даму» АҚ-на ұсынылып, сараптамадан өткізілгені хабарланды. Аудан басшысы бұл жобаның тиімділігін мұқият зерделеп, толық сүйемелдеуді жауаптыларға тапсырды.Тазалық мәселесі де аудан әкімі назарынан тыс қалмады. Бұл бағыттағы жұмыстардың бірқатар кемшіліктері арнайы слайд арқылы көрсетіліп, өткен аптадағы сенбілікке салғырт қараған бірнеше мекеме басшыларына ескерту жасалды.Сонымен бірге ауданның макроэкономикалық көрсеткіштері бойынша да бірқатар олқылықтар атап өтіліп, жыл қорытындысында оң динамика қалыптастырудың маңыздылығы айтылды. Облыс әкімдігі бекіткен жоспарлар негізінде салалық көрсеткіштерді орындау және қорытынды жұмыстарға бақылауды күшейту тапсырылды.Жиын соңында аудан әкімі берілген тапсырмалардың уақытылы әрі толық орындалуы тиіс екенін ескертіп, әкімдік тарапынан бақылаудың тұрақты жүргізілетінін айтты.

Арал: Трансшекаралық хаб орнықты дамуға тиіс

<a href="https://kyzylorda-news.kz/">Kyzylorda-news.kz</a> Сығанақ қалашығы – Ұлы Жібек жолы бойындағы шаруашылығы мен әлеуметтік-экономикалық әлеуеті жоғары деңгейде дамыған атақты қалалардың бірі. Ақ Орда мемлекетінің, кейін Қазақ хандығының астанасы болған Сығанақ қалашығы жайлы тарихи деректер аз емес. Десе де ортағасырлық орданың ашылмаған сыры мен зерттелмеген тұстары әлі де көп. Ашық аспан астындағы мұражай жұмыстарын көпшілікке таныстырып, насихаттау мақсатында «Сығанақ тарихы» қоғамдық музейі мен Жаңақорған аудандық мәдениет бөлімінің ұйымдастыруымен көне қалашыққа танымдық экскурсия жасадық.Ғасырлардың куәсі болған Сығанақ қалашығы Жаңақорған ауданы, Сунақата ауылынан 2 шақырым қашықтықта орналасқан. Дешті даласының атақты хандары жерленген қасиетті һәм қастерлі өлкеде өткен маңызы мол танымдық шараны Жаңқорған ауданы әкімінің орынбасары Бектас Нұриддинов ашып, сөз сөйледі.<blockquote>– Бүгінгі Сығанақ қаласында ұйымдастырылып жатқан игі шараға Астана, Алматы, Шымкент, Түркістан, өзіміздің облыс орталығынан, басқа өңірлерден де арнайы делегациялар қатысып отыр. Бірнеше жыл бойы мемлекеттен тиісті қаражат бөлініп, Сығанақ қалашығына «Казрестоврация» мекемесінің мамандары қазба жұмыстарын ұйымдастырып, қаланың бұрынғы кейпін қалпына келтіруге жұмыс жасауда. Ақорда мемлекетінің, қазақ хандығының астанасы болған, Ұлы Жібек жолы бойынан орын тепкен, тарихи тағылымы мол, ортағасырлық Сығанақ қалашығының қазақ тарихында алатын орны ерекше, – деп атап өтті аудан әкімінің орынбасары.</blockquote>Шара барысында қалашық тарихын зерттеу мен дәріптеу мақсатында көптеген бастамалардың ұйытқысы әрі ұйымдастырушысы болып жүрген, «Сығанақ тарихы» музейінің негізін қалаушы Рысбек Амандықовқа Қызылорда облысының мәдениет, архивтер және құжаттама басқармасы басшысының Алғыс хаты табыс етілді. Мәдени шара әрі қарай «Мирас» антреприза театрының ашық аспан астындағы «Сығанақ сыры» атты қойылымымен жалғасты.<blockquote>– Антреприза термині бір қойылым үшін әр театрдан жиналатын әртістер ұғымын білдіреді. Бұл 2017 жылы қойылған «Һиссамиддин һәм Сығанақ сыры» атты пьесадан үзінді. Яғни аты аталған пьесаның қысқа-нұсқа екі картинасы көрсетілді. Һисамиддин мен оның досы Қожа Ахмед Ясауи екеуі екі қалаға, яғни бірі Яссы қаласына, бірі Сығанақ қаласына келіп ислам дінін дәріптейді. Осындағы Дешті-Қыпшақ қағанатының билеушісі Қадыр Бөке Алып Қыранмен кездеседі. Хорезм шахының елшілері келіп, соғыс үндеуін де осы жерде тастайды. Қойылымда базар маңындағы көріністе Һиссамиддинді құлдар мен кедей жалшылардың қамқоршысы ретінде сомдаймыз, – дейді театр режиссеры Дінмұхамед Әбжаппаров.</blockquote>Қойылымға арнайы қос бірдей локация дайындалған. Олардың бірі қалашықтың сыртқы бөлігі базарды бейнелесе, ал қала ішіне хан ордасы тігіліп, сахналық безендірулер жасалған. Ғұлама Һиссамиддиннің ғұмырнамасынан үзінді қойылымды тамашалаған қонақтар ізінше «Орда Сығанақ» шипажайының екінші қабатында орналасқан «Сығанақ тарихы» музейімен танысып, көне қалашықтан табылған тарихи экспонаттарға таңданысын жасырмады.<blockquote>– 2014 жылдан бастап қалашықтың тарихын зерттей бастадым, тұтас қазақ хандығының астанасы болған орынға арналған музейдің жоқтығын түсіндім. 2003 жылдан бері қазба жұмыстары жүргізілуде. Сонда бұл жерден табылған дүниелер қайда кетіп жатыр? Неге сырбойылықтар осынау тарихи құнды жәдігерлерді өз көзімен көріп, сырын сезіне алмайды? Неге бүгінгі ұрпаққа соны ұсынбасқа? Осындай сұрақтар санамды сілкіп, жан жаққа хат жазып, іздене бастадым. Мемлекеттен тікелей қолдау болмағандықтан «Сығанақ тарихы» деген атаумен қоғамдық қорды ашып, кейіннен 2018 жылы Халықаралық музей күнінде жергілікті музейдің тұсауы кесілді. Мұндағы экспонаттардың көбі археологтардың қазба жұмыстарынан қалған қалдықтардан бастау алды. Қаншама дүние табылды. Бірақ бүтіндері қолды болып, кейбірі сатылып кетті. Тіпті, қазба жұмысын жүргізген археологтардың өздері қалтасына басты. Дегенмен жан жақтан іздеу жұмыстары жүргізіліп, қалашықтың өз заттарымен толықтырудамыз, – дейді музейдің негізін қалаушы Рысбек Амандықов.</blockquote>Шараға арнайы келіп қатысқан Қызылорда облыстық тарихи-өлкетану музейінің мамандары мен мұражай директорының орынбасары Жанар Ахметова тарихи қалашықтың табанынан табылған көне жәдігерлерді Сығанақтың өз мұражайына табыстады.<blockquote>– Бүгін облыстық тарихи-өлкетану музейі қорынан 2022 жылы Қожа Ахмет Ясауи атындағы университеттің археология ғылыми зерттеу институтының осы Сығанақ қалашығына жүргізген қазба жұмыстары барысында табылған артефактілерін осы «Сығанақ тарихы» музейіне әкеліп табыстап отырмыз. Олар X ғасырға тиесілі глазурленген қаптамалар, терракоталар, өрілген қабырғалардың бұрыштамалары секілді құнды дүниелер, – дейді Жанар Ахметова.</blockquote>Талайды тарихи деректерге қанық етіп, таным көкжиегін кеңейткен шараның шарықтау шегі белгілі драматург Сая Қасымбектің «Нұрнама» атты драма қойылымымен қорытындыланды. Аудан әкімінің орынбасары «Мирас» антреприза театрының режиссеры Дінмұхамед Әбжаппаров пен драматург Сая Қасымбекке аудан халқының атынан алғысын білдіріп, аудан әкімінің марапаты мен сый-сияпатын табыстады.Аружан ОРАЛБАЙФото: автордікі

Сығанақ – мыңжылдықтар қаласы

<a href="https://kyzylorda-news.kz/">Kyzylorda-news.kz</a> Теміржол – ел экономикасының күретамыры. Күні-түні тынымсыз еңбек етіп жүрген сала мамандарының арқасында ел ішіндегі жолаушы қозғалысы мен жүк тасымалы үздіксіз қозғалыста. Ал осы салаға өмірін арнап, бірнеше буын бойы тынымсыз еңбек етіп келе жатқан әулеттердің бірі – жаңақорғандық Рзаевтар әулеті. Бұл әулеттің теміржол саласына сіңірген жалпы еңбек өтілі – 500 жылдан асып жығылады.Мемлекет басшысы 2025 жылды «Жұмысшы мамандықтар жылы» деп жариялаған болатын. Бұл – ерен еңбектің символына айналған жұмысшы мамандардың ел дамуына қосқан үлесі үшін алғыс һәм құрмет. Шойын жолды ел тірегі деп есептесек, Рзаевтар әулеті – сол тіректің тұғырын берік етіп отырған нағыз еңбек адамдары. Адал қызмет пен ұрпақ сабақтастығының үлгісін осы әулеттен аңғаруға болады.<img src="https://knadmin.beoblood.kz/uploads/Whats_App_Image_2025_12_18_at_12_11_06_cd9e84bb56.jpeg" alt="Рзаевтар әулеті.jpeg">Теміржолдың бойында өмірі мен қызметі қатар өрілген, темірдей тәртіпке бағынып, адал еңбегімен абырой биігінен көрінген ардагер теміржолшы – Оразбек Рзаевпен сұхбат құрудың сәті түсті.– Оразбек аға, Рзаевтар әулеті – нағыз теміржолшылар династиясы. Әулетіңіздің теміржол саласындағы тарихы жайлы тарқатып айтып берсеңіз.<blockquote>– Біздің ата қонысымыз – осы Жайылма. Бұл жер – малға жайлы, жолдың арғы бетінде терең әрі балығы мол Бозкөл жатыр. Әулетіміздің теміржолмен тағдырлас болғаны рас. Атам Әбілезім 1900-1904 жылдары «Орынбор – Ташкент» теміржолының топырақ төсемін салуға қатысып, алғаш еңбек жолын бастаған. Кейін ұзақ жыл жол жөндеуші болып еңбек етті. Үйленеді. Балалы-шағалы болады. Өзінің алты баласының үшеуі әке жолын қуып теміржолшы атанады. Содан бастап бүгінге дейін төрт буын теміржолда қызмет атқарып келеді. Атамыз Рза Әбілезімовтің үлкен баласы Бектас теміржолда жұмыс істеп жүріп, Ұлы Отан соғысына аттанады. Соғыстан оралған соң 1969 жылға дейін Жайылма станциясында кезекші болып жұмыс істеді. Әкем Құлтас 45 жыл теміржолда еңбек етіп, зейнетке шықты. Битас ағам Ташкенттегі теміржол институтын бітіріп, жол бригадирінен бастап, Қандыағаш жол дистанциясының бастығына дейін көтерілді. 1981 жылы қайта оралып, Шалқия теміржол кешенін салуға қатысты. Ағаларым Бектас, Битас, Абдулла – бәрі де өмірін теміржолға арнады. Бірі инженер, бірі станция бастығы болса, енді бірі «Құрметті теміржолшы» атанған азамат. Мен де сол жолды жалғап, жарты ғасыр ғұмырымды теміржолға арнадым, – деді Оразбек Рзаев.</blockquote>– Балалық шағыңыз теміржолдың бойында өткен екен. Ал өзіңіздің бұл саладағы жолыңыз қалай басталды?<blockquote>– Иә, бала күніміз Жайылма станциясында өтті. Үйіміздің тұсынан өтетін пойыздардың даусы, вагондардың сықыры – біз үшін қалыпты жағдай еді. Сол ортада өскен соң, менің басқа салаға кетуім мүмкін де емес еді. Бұл бізге атадан дарыған мамандық сияқты. Мен еңбек жолымды жол жөндеуші болып бастадым. 1979 жылы теміржолда электрмеханик болып жұмысқа кірдім. Әскерден соң Қызылорда белгі беру және байланыс дистанциясына монтер болып ауыстым. 1990 жылы он айлық электрмеханик курсын бітіріп, 1994 жылы Жайылма станциясына станция бастығы – электрмеханик болып тағайындалдым, – деді ол.</blockquote>– Бұл салада кішкене қателіктің өзі үлкен қауіпке ұласатыны белгілі. Қызметте қандай талаптар болды?<blockquote>– Біздің учаске 7 шақырымды құрайды. Теміржолда салғырттыққа мүлде жол жоқ. Бағдаршам, бұрмалар, рельс тізбегі, кабель, аккумулятор – бәріне жауаптымыз. Апта сайын техникалық тексеріс, ай сайын релелік өлшеу, жүйелі жөндеу – бәрі талапқа сай жасалып, қатаң тәртіппен жүреді. Әр белгі, әр қозғалыс – ережеге сай болу керек. Ең бастысы – 1994 жылдан бастап зейнетке шыққанға дейін өзіме бекітілген учаскеде бірде- бір күрделі ақауға жол берген емеспін. Бұл – жай мақтаныш емес, үлкен жауапкершіліктің нәтижесі. Жұмысымды адал атқаруға тырыстым. Жүйелі тексеру, уақытылы жөндеу – бәрі маңызды. Жүк пен жолаушы пойыздарының қарқыны сондай – біреуі тұрып қалса, оның артынан 10–15 пойыз кептеледі, – деді кейіпкеріміз.</blockquote>– Кеңес дәуіріндегі Жайылма станциясының тіршілігі қандай болды және қазіргі ахуалы қандай? Жайылма разъезі туралы қысқаша айтып өтсеңіз.<blockquote>– Сексенінші жылдарға дейін мұнда отыз шақты тұрғын үй, шағын бастауыш мектеп, 4 СОБ маманы, 4 станция кезекшісі, он шақты жол жөндеуші болды. Тұрғындар теміржолмен қатар мал ұстап, Бозкөлден балық аулап күнелтті. Балалар Түркістандағы интернатта оқыды. 1991 жылдан бері бұл разъезден өтетін пойыз саны азайды. Жайылма разъезіне бүгінде пойыз тоқтамайды. Бірақ қандай да бір себеппен тоқтай қалса, оны қамтамасыз ететін 4 бағыттамалық бұрма мен 10 бағдаршам қашанда дайын тұрады. Технология дамығалы бері шағын станциялар қозғалысқа белсенді араласпайды. Дегенмен тірек пункт ретінде маңызы зор, – дейді.</blockquote>– Теміржолшылар әулетінің еңбек жолы бүгінде жалғасып жатыр ма?<blockquote>– Бұл – мен мақтана айтатын дүние. Ұлым Бауыржан – байланыс механигі, екінші ұлым Олжас та осы мамандық иесі. Інілерімнің бірі Бақытжан – аға электромеханик. Екіншісі Арыстанбек – жол жөндеуші, оның ұлы Жаңақорған вокзалында электрик. Жиендеріміз Рүстем мен Ерболат – екеуі де теміржол саласында. Абдулла ағамның қызы Меруерт Қызылорда жол бөлімшесінде жауапты қызмет атқарады. Ал Бектас көкеміздің немересі Жансая – Қазақ көлік және коммуникациялар академиясында «Тасымалды ұйымдастыру» мамандығын бітіріп, логистика магистрі атанды. Қазір Атасу Групп компаниясында логист болып жұмыс істейді. Битас ағамның қызы Гүлнар – Белкөл станциясында қызметте. Айта берсең тізім ұзақ. Бірақ әрқайсысы өз ісінің нағыз маманы, – деп мақтана айтты.</blockquote>– Зейнетке шыққан соң бұл саламен байланысыңыз үзіліп қалған жоқ па? Сіз басқарып, тәрбиелеген жастардың ішінде шәкірттеріңіз жайлы айтсаңыз…<blockquote>– Жайылма станциясындағы жаңа буын мамандардан Ықылас Убашовты арнайы дайындап, зейнетке шыққанда орнымды тапсырып кеттім. Өзім де жыл сайын оқыту курстарынан қалмай, біліктілігімді арттырып отыратынмын. Бұл – мен үшін үлкен міндет. Себебі теміржолда тәжірибе мен тәртіп сабақтастығы үзілмеуі керек. Білгенімді үйретіп, соңымнан ерген жастарға жол көрсеттім, – дейді ол.</blockquote>– Еңбегіңіз ескерусіз қалмаған болар?<blockquote>– Жылдар бойы үздіксіз еңбек пен жауапкершіліктің арқасында сала басшылығы тарапынан түрлі алғыс хат пен құрмет грамотасын алдым. «Транс-Экспресс» салалық журналында әулетіміз жайлы арнайы мақала жарық көрді. Бірақ ең үлкен жетістік – осы салада үздіксіз қызмет етіп, ұрпағымды да осы жолға салғаным деп білемін. Жуырда ғана облыс орталығында ұзақ жыл еңбек еткен теміржолшылар кездесуіне шақырту алдым. «AMANAT» партиясы Қызылорда облыстық филиалының төрағасы Алмасбек Есмаханов алғыс хат табыстап, арқамызға шапан жапты. Еңбегім ескеріліп, түрлі марапат алдым, – дейді Оразбек аға.</blockquote>– Теміржолшыларға айтар тілегіңіз қандай?<blockquote>– Біз шойын жолдың бойында туған, теміржолмен тыныстаған адамдармыз. Сондықтан менің тілегім – теміржол тіршілігінің тыныштығы, халқымыздың амандығы, – деп сөзін түйіндеді.</blockquote>– Әңгімеңізге рақмет! Әулетіңіздің өнегелі жолы талай жасқа үлгі болары анық.Түйін. Теміржол – жай ғана қатынас құралы емес, тұтас бір халықтың тыныс-тіршілігімен, экономикалық дамуымен тығыз байланысты сала. Сол жолда күн-түн демей тер төгіп жүрген азаматтардың еңбегі өлшеусіз. Тағдыры мен тарихы, өткені мен бүгіні шойын жолмен сабақтасып жатқан Рзаевтар әулеті – ұрпаққа нағыз үлгі.<img src="https://knadmin.beoblood.kz/uploads/Whats_App_Image_2025_12_18_at_12_11_07_1394eee5ee.jpeg" alt="Рзаевтар әулеті.jpeg">Аружан ОРАЛБАЙФото: автордікі

Теміржолдан нәсібін тапқан әулет

<a href="https://kyzylorda-news.kz/">Kyzylorda-news.kz</a> Қызылорда облысының Арал ауданында прокуратура органдары арқылы мемлекетке қайтарылған активтер есебінен Тоқабай және Абай елді мекендерінің тұрғындарын сумен қамтамасыз ету мақсатында су құбырының құрылысы жүргізілуде.Сонымен қатар, Ерімбетжаға елді мекенін орталықтандырылған су құбыры желісіне қосу жұмыстары аяқталуға жақын.Қазіргі уақытта ауыл тұрғындары суды жер асты құдықтарынан пайдалануға немесе шалғай орналасқан елді мекендерден тасуға мәжбүр.Аталған жобалардың іске асырылуы үйлерді орталықтандырылған су жүйесіне қосуға мүмкіндік беріп, тұрғындардың өмір сапасын арттырып, өңір инфрақұрылымының одан әрі дамуы мен жаңғыртылуын қамтамасыз етпек.Арал ауданы прокуратурасы мен аудан әкімдігінің басшылығы әлеуметтік нысандардың құрылыс барысымен танысты.Құрылыс жұмыстарын ағымдағы жылдың соңына дейін аяқтау жоспарлануда.Бүгінгі күні мемлекетке қайтарылған активтер есебінен Арал ауданында денсаулық сақтау және сумен жабдықтау салалары бойынша жалпы алты әлеуметтік нысан жүзеге асырылып жатқандығын атап өткен жөн.Нысандардың құрылысы мен мемлекет қаражатының мақсатты жұмсалуы прокуратураның тұрақты бақылауында.Фото: freepik.com

Арал ауданында мемлекетке қайтарылған активтер есебінен әлеуметтік нысандардың құрылысы басталды

<a href="https://kyzylorda-news.kz/">Kyzylorda-news.kz</a> Жақында облыс әкімінің орынбасары жұмыс сапарымен Арал ауданында болды.Облыс әкімінің орынбасары Бахыт Жаханов ауданға жұмыс сапарымен келіп, аудан әкімі Аманжол Оңғарбаев пен облыстық құрылыс, сәулет және қала құрылысы басқармасының басшысы Ерлан Төралиев және құрылыс саласының мамандармен бірге қаладағы бірнеше құрылыс нысандарының жұмысымен танысты.Алдымен Тоқабай және Қарақұм ауылдарына барып, ауыз су тарту жұмыстарының құрылысымен танысты. &nbsp;Қазіргі таңда Арал-Сарыбұлақ топтық су құбырына қосылатын Арал-Тоқабай-Абай тармағының құрылысы және Қызылорда облысы Арал ауданына қарасты Тоқабай, Абай елді мекендерін сумен жабдықтау жұмыстары жүргізілуде. Жобаның мақсаты – халық саны 868 адамды құрайтын Тоқабай және 2206 адам тұратын Абай ауылдарын, яғни жалпы 3074 адамды орталықтандырылған ауыз сумен қамтамасыз ету.Жоба құны – 8,2 млрд теңге. Бас мердігер – «Сапа Құрылыс 2007» ЖШС. Нысан құрылысы 2021 жылы басталған.Бүгінгі таңда Жақсықылыш–Тоқабай бағытындағы ұзындығы 39 шақырым болатын су құбыры толық тартылды. Тоқабай ауылындағы ұзындығы 16,7 км болатын ауылішілік су желісі тартылып, тоқабайлықтардың игілігіне таза әрі сапалы ауыз су пайдалануға берілді.Облыс әкімінің орынбасары мұнан соң халықтың әлеуметтік осал тобына жататын тұрғын үйге мұқтаж отбасыларға арналып салынып жатқан тұрғын үйлердің құрылыс жұмыстарын көрді.Қазіргі таңда ауданда 2 пәтерлі 30 тұрғын үйдің құрылысы жүргізілуде. Өткен жылы мемлекеттік бюджеттен бөлінген 2,2 млрд теңгеге салынған 150 пәтерлі тұрғын үйге жыл басында тұрғындар қоныстанған болатын. Бұл бағыттағы жұмыстар биыл да жалғасуда. Ағымдағы жылы 60 пәтер сатып алуға 900 млн. теңге қаржы қаралды. Бүгінде тұрғын үйлер құрылысы аяқталуға жақын. Қазіргі уақытта ішкі әрлеу және жылу жүйелері жүргізілуде. Қаз-қатар тізілген үйлердің сыртқы қоршау жұмыстарымен қатар айналасын ретке келтірілуде.Облыс әкімінің орынбасары Б.Жаханов нысандарды аралау барысында құрылыс басында жауапты тұлғалармен жүздесіп, тиісті тапсырмалар берді.Бахыт Дүйсенұлы мұнан соң қаладағы темір жол вокзалының құрылыс жұмыстарымен танысты. Бұған дейін Арал қаласы мен Сексеуіл кентіндегі темір жол вокзалдарын күрделі жөндеуден өткізу жоспарланған. Алайда алдын ала жобалау барысында ғимараттардың тым ескі болуына байланысты, іргетасы мен қабырға тіректерінің әбден тозуы салдарынан инженерлік-техникалық тұрғыда күрделі жөндеу жұмыстарын жүргізу тиімсіз деп танылды.Қазіргі таңда Арал қаласы мен Сексеуіл кентіндегі ескі вокзалдардың орнына жаңа ғимараттардың құрылысы жүргізілуде.Бүгінде қалалық темір жол бекетінің құрылыс жұмыстарын «Техоснастка-Ремсервис» ЖШС мекемесі жүргізуде. Ғимараттың қабырғаларын қалау, бетон бұйымдарын берік орнату, терезелерін салу және ішкі бөлмелерін сылау жұмыстары жүргізілуде.Медицина саласында да нәтижелі істер қолға алынуда. Аудандағы жұқпалы аурулар бөлімшесінің ескі ғимаратының орнына жаңа нысанның құрылысы жүріп жатыр. Құны 2 млрд 300 млн теңге болатын нысанды «Иман» ЖШС мекемесі салуда. Қазіргі уақытта сыртқы абаттандыру және ішкі әрлеу жұмыстары жүргізілуде.Б.Дүйсенұлы нысан басында мердігер мекеме өкілдерімен тілдесіп, жұмысты сапалы әрі уақытлы аяқтауға күш салу керектігін тапсырды.Облыс әкімінің орынбасары Бахыт Жаханов кезекті жұмыс сапары барысында Мергенсайда салынып жатқан 150 орындық жаңа мектеп ғимаратының құрылыс барысымен танысты.Құны 2 млрд 333 млн. теңге болатын нысанның сырты толықтай қапталып, ішкі әрлеу және инженерлік жүйелерді тарту жұмыстары аяқталуға жақын. Қазіргі таңда ғимараттың ішкі жылу жүйелері мен электр желілері толықтай орнатылған. Еден төсеу, ішкі есіктерді орнату және абаттандыру жұмыстары жүргізілуде. Жаңа мектеп ғимараты жыл соңына дейін пайдалануға беріледі деп күтілуде.Бахыт Дүйсенұлы нысанды аралау барысында мердігерлерге сапа мен мерзім талаптарын сақтау қажеттігін қатаң ескертіп, тұрғындар көптен күткен білім ордасының уақытылы пайдалануға берілуі аса маңызды екенін айтты.Мұнан соң Сексеуіл кентінде жаңадан салынып жатқан вокзал ғимаратының құрылыс жұмыстарымен танысты. &nbsp;Бүгінде заманауи жолаушылар вокзалын толық аяқтауға, жолаушылар алаңын (перон) абаттандыруға қажетті материалдар қосымша жеткізілген. Ғимараттың қабырғасын сылау, стяжка құю, терезе салу, электр желісін жүргізу жұмыстары жүргізіліп жатыр. Жаңа заман талабына сай келетін вокзал алдағы уақытта кент ажарын ашып, жолаушыларға толыққанды қызмет көрсететін болады.Облыс әкімінің орынбасары Бақыт Жаханов кездесу барысында жауаптыларға негізгі жұмысты бәсеңдетпеуді және белгіленген мерзімде сапалы аяқтауды тапсырды.

Арал: Бүгінде тұрғын үйлер құрылысы аяқталуға жақын

<a href="https://kyzylorda-news.kz/">Kyzylorda-news.kz</a>&nbsp; «Батыс Еуропа – Батыс Қытай» автожолының Арал ауданы аумағында «PetroRetail» ЖШС-нің жол бойы сервистік қызмет көрсету орталығы ашылды. Оған облыстық мәслихат төрағасы Мұрат Тлеумбетов, облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай, аталған серіктестіктің даму жөніндегі директоры Бахытжан Тасанбаев, жауапты сала басшылары мен зиялы қауым өкілдері қатысты.Облыс әкімінің орынбасары аймақта атқарылған жұмыстарға тоқталып, жаңа бастамаға ізгі тілегін жеткізді.<blockquote>«Мемлекет басшымыз ұсынған «Қуатты өңірлер – қуатты ел» қағидаты ел дамуының темірқазығына айналды. Бұл халықтың ынтымағын нығайтып, мемлекеттің қуатын арттырады.Әділетті, Қуатты, Қауіпсіз әрі Таза Қазақстанды құру жолында Сыр халқы да бекем бірліктің, ерен еңбектің үлгісін көрсетуде. Жол бойындағы сервисті дамыту үшін автокөлікке газ құю компрессорлық станциялары бар көпфункционалды кешендер салынуда. Оған «Qazaq Oil», «Compass», «Алаш Метан», «Dom» сияқты компаниялар тартылып, жобалар кезең-кезеңімен іске асырылып келеді. Жақын арада тағы екі заманауи газ құю станциясы пайдалануға беріледі.Мемлекет басшысы Қасым-Жомарт Кемелұлы биылғы Жолдауында Кіші Аралды сақтап қалу және «Сексеуіл-Бейнеу» бағытындағы автомобиль жолы құрылысын жеделдетіп бастауды тапсырды.Бұл Мемлекет басшысының Сыр өңіріне, Аралға деген көзқарасының ерекше екенін байқатады. Ауқымды жоба аймағымыздың экономикалық әлеуетін арттыра түспек. Кешеннің жұмысы табысты, табысы берекелі болсын!», – деді Қ.Нұртай.</blockquote>Рәсімде ел дамуына елеулі үлес қосқан азаматтар мен серіктестік қызметкерлері облыс әкімінің Алғыс хатымен марапатталып, Бахытжан Тасанбаев тұрғындарды құттықтады. Еңбек ардагері Алдаберген Жоланов бата берді.Айта кетейік, «Батыс Еуропа – Батыс Қытай» халықаралық автомобиль дәлізінің бойында 55 жол бойы сервистік кешені жұмыс істейді.«PetroRetail» серіктестігінің В санатты кешені 2 млрд. теңгеге салынған. Инвестициялық жоба аясында заманауи талаптарға сай келетін 31 орындық қонақ үй, 20 келушіге қызмет көрсететін қоғамдық тамақтану орны іске қосылды, 20 адам тұрақты жұмыспен қамтылды.Сонымен қатар,&nbsp;Арал ауданындағы&nbsp;Ерімбетжаға елді мекеніне ауыз су жеткізілді.Жақында&nbsp;Арал ауданы Ерімбетжаға елді мекеніне ауыз су қосу рәсімі өтті. Рәсімге облыстық мәслихат төрағасы Мұрат Тлеумбетов, облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай, жауапты сала басшылары мен зиялы қауым өкілдері арнайы қатысты.Мұрат Тлеумбетов ауыл тұрғындарын құттықтап, өңірдің әлеуметтік-экономикалық дамуындағы жетістіктерді атап өтті.<blockquote>«Алаштың анасы» атанған қасиетті Сыр өңірінде Президентіміздің, Үкіметтің ерекше қолдауымен, жерлестеріміздің бекем бірлігінің арқасында байыпты бастамалар, жасампаз жобалар табысты іске асырылуда. Қала мен аудан орталықтарының, ауылдардың сәулеттік келбеті күн сайын жаңарып келеді.Мемлекет басшысы 2025 жылы еліміздің барлық аймағын ауыз сумен 100 пайыз қамтамасыз ету туралы тапсырма берген болатын. Облыс аумағында 2022 жылдан бері 14 млрд. теңгенің 60 жобасы қолға алынған.Өткен жылдың қорытындысы бойынша өңір халқын орталықтандырылған ауыз сумен қамту деңгейі 98,6 пайыз болды. Биыл 9 елді мекенге ауыз су жеткізілуде. Міне, Ерімбетжаға елді мекеніне қосамыз.Игіліктің бастауындай болған бүгінгі қуаныш барша отбасыға бақыт пен шаттық әкелсін!», – деді М. Тлеумбетов.</blockquote>Жиында ел дамуына елеулі үлес қосқан аға буын өкілдері мен ауылға су тартқан мердігер мекеменің өкілдері облыс әкімінің Алғыс хатымен марапатталып, ардагер Назыбек Жұбалиев бата берді.Биыл 8 млрд 100 млн. теңгеге Арал ауданындағы Абай, Тоқабай, 1 млрд. 45 млн. теңгеге Ерімбетжаға, Тастүбек елді мекендерін ауыз сумен қамту жобалары жүзеге асты. Қазір 1 млрд. 166 млн. теңгеге Тастүбек елді мекеніне су жеткізу жұмысы жүргізілуде. Осылайша өңірдегі барлық елді мекен 100 пайыз орталықтандырылған ауыз сумен қамтамасыз етіледі.&nbsp; &nbsp;Арал ауданында жасалып жатырған жұмыстар көп. Соның бірі&nbsp;Арал ауданындағы Тоқабай елді мекеніне ауыз су қосу рәсімі өтті. Оған облыстық мәслихат төрағасы Мұрат Тлеуімбетов, облыс әкімінің орынбасары, ҚР Президентінің «Байқоңыр» кешеніндегі арнаулы өкілі Қайрат Нұртай, зиялы қауым өкілдері мен ауыл тұрғындары қатысты.Облыстық мәслихат төрағасы тоқабайлықтарды құттықтап, аймақты ауыз сумен қамтамасыз ету бағытында атқарылған жұмыстарды атап өтті.«Мемлекет басшысы 2025 жылы еліміздің барлық аймағына 100 пайыз ауыз су жеткізу туралы тапсырма бергені белгілі. Сыр өңірінде Президент тапсырмасын белгіленген мерзім ішінде орындау мақсатында ауқымды жұмыс атқарылды.Ауыз су жеткізуге бағытталған 60 жоба жүзеге асты. Былтыр аймақ халқының орталықтандырылған ауыз сумен қамтылу деңгейі 98,6 пайыз болған. Биыл қалған 9 елді мекенде қарқынды жұмыс жүргізіліп, жыл соңына дейін белгіленген жоспар толық орындалады, яғни 100 пайыздық межеге қол жеткіземіз. Тоқабай елді елді мекеніне ауыз су қосамыз. Жиналған қауымды көптен күткен игіліктің іске асуымен құттықтаймыз», – деді Мұрат Жолкелдіұлы.Рәсімде ауылдың өркендеуіне үлес қосқан аға буын өкілдеріне, ауыз су жүргізген мердігер мекеме қызметкерлеріне облыс әкімінің Алғыс хаты табысталды. Жіңішкеқұм ауылдық округі ардагерлер кеңесінің мүшесі, ауыл шаруашылығы саласының ардагері Қыдырбай Мұсаев лебізін білдірді.Шалғайдағы ауылдар инфрақұрылымын дамыту, ең алдымен сапалы сумен, жолмен қамтамасыз ету тұрғындардың жайлы өмір сүруіне, тұрмыстық жағдайының жақсаруына оң әсерін тигізеді.

Қазақстан және Қызылорда облысының жаңалықтары: Қоғам