<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалының атқарушы хатшысы Ләйлә Төрешованың қатысуымен облыстық кәсіподақтар бірлестіктері орталығы алаңында ашық есік күні күні өтіп, «Құқықтық көмек» партиялық жоба аясында азаматтарға түрлі тақырыптарда кеңестер берілді.Жиынды ашқан облыстық партия филиаланың атқарушы хатшысы Ләйлә Төрешова жобаның мақсат міндеті мен жоба аясында атқарылған жұмыстарды атап өтті.<blockquote>«AMANAT» партиясының «Құқықтық көмек» партиялық жобасы 2023 жылдан бері жүзеге асып келеді. Жоба аясында өңірімізде білікті мамандармен азаматтарға, әлеуметтік осал топтағы жандарға тегін заңгерлік кеңестер беріліп, сотта, қылмысты қудалау органдарында және тағы басқа жағдайда азаматтарға өкілеттік етіп, өзін қорғауға көмек көрсету жұмыстары жүргізілуде. Мәселен, ағымдағы жылдың 8 айында 31 қабылдау өткізіліп, 156 адам жүгінсе, олардың 16-на жазбаша кеңес берілді, 89 тұрғынның құқығын қорғау бойынша сүйемелдеу шаралары жасалды. Онан бөлек, түрлі салалар бойынша Кодекс, заңдарға енгізілген өзгерістер төңірегінде түсіндіріме жұмыстары да жүргізіліп келеді. Бүгінгі ашық есік күні де қоғамда орын алып жатқан кейбір мәселелерді бірлесіп шешуге жұмыс жасау, әріптестік қағидаттарын орнату мақсатында облыстық кәсіподақтар бірлестіктері Орталығымен жасалған меморандум негізінде ұйымдастырылып отыр», - деді Ләйлә Төрешова.</blockquote>Ашық есік күнінің алғашқы бөлімінде бірқатар сала мамандарымен құқықтық түсіндірме жұмыстары жүргізілді. Атап айтсақ, «Жинақтаушы зейнетақы жүйесін жаңғырту, жарналардың түсу көлемін ұлғайту, қор қызметін алудың балама мүмкіндіктері» тақырыбында «Біріңғай жинақтаушы зейнетақы қоры» АҚ-ы облыстық филиалының бас маманы Гүлдана Тұяқбаева, 2024 жылдан бастап зиянды жағдайларда жұмыс істейтін жұмыскерлерге жаңадан енгізілген арнаулы әлеуметтік төлемдер бойынша ҚР Халықты әлеуметтік қорғау саласындағы реттеу және бақылау Комитетінің Қызылорда облысы бойынша департаментінің бөлім басшысы Төреахмет Жолымбетов және «Ақпараттық - құқықтық акция «Құқық пен еңбек - бір жүйе» тақырыптарында облыстық кәсіподақтар бірлестіктері Орталығының еңбек қатынастары жөніндегі сарапшысы Майра Боранбаевалар кең көлемде ақпарат берді.Екінші бөлімде арнайы мамандармен қабылдау ұйымдастырылып, азаматтардың өтініштері тыңдалды. Қабылдауға келушілер зейнетақы жүйесіне қатысты, «Қарызсыз қоғам» жобасының мүмкіндіктері, мүгедектігіне байланысты толық төлем қайтару, жұмыс орындарындағы қызметкерлерді аттестациялау жолдары туралы өтініштерін білдіріп, мамандардан жауап алды.&nbsp;

«Құқықтық көмек» партиялық жобасы аясында кеңестер берілді

<a href="https://kyzylorda-news.kz/">Kyzylorda-news.kz</a> Аутизмі бар балаларды өлтіруге шақырған алматылық блогер кешірім сұрады. Бұл туралы <a href="https://stan.kz/autizmi-bar-balalardi-oltiruge-shakirgan-bloger-keshirim-syradi-423212/">Stan.kz </a>ақпарат агенттігі хабарлайды.Блогер бұл сөздерді&nbsp;эмоцияға беріліп айтып қойғанын және жаман ойы болмағанын&nbsp;атап өтті.<blockquote>"Instagram-да бір видеоны көріп қалып, өте ауыр пікір айтып қойдым. Бірақ мен &nbsp;аутизмі бар балалардың ата-аналарының жүректеріне тиеді деген арам оймен айтпадым. Мен де эмоцияға беріліп, ашумен айтып қойдым. Барлығымыз бала асырап отырғандықтан, бала туралы айтылған сөз жүрекке батады екен. &nbsp;Аутизмі бар балалардың ата-аналарынан кешірім сұраймын. Мен арам оймен айтқан жоқпын, ойланбай айттым. Әр ата-анаға баласының орны бөлек, ауру баланы ешкім сұрап алмайды. Сол үшін ренжімеңіздер", – делінген үндеуде.</blockquote>Бұл жағдайға оқу-ағарту министрлігінің балалардың құқықтарын қорғау комитеті де пікір білдірді.<blockquote>“Ведомство әрбір баланың өмір сүру және толыққанды даму құқығы бар екенін еске салды. Бұл құқықтар баланың жынысына, тіліне, дініне, этникалық немесе әлеуметтік тегіне, денсаулық жағдайына және оның өзіне, ата-анасына немесе заңды өкілдеріне байланысты кез келген өзге де жағдайларға қарамастан қолданылады. Баланың қорғауға құқығын жоққа шығаратын немесе зорлық-зомбылықты ақтайтын кез келген пікір айтуға жол берілмейді және ол заңға ғана емес, қоғамның адамгершілік қағидаттарына да қайшы келеді”, –&nbsp;делінген хабарламада.</blockquote>Полиция оқиғаға қатысты сотқа дейінгі тергеуді бастады.Еске салсақ, осыған дейін блогердің аутизмі бар балаларды өлтіруге шақырғаны туралы жазған болатынбыз.<blockquote>"Аутистер тым көбейіп кетті, оларды емдеу керек, егер емделмесе, өлтіріп&nbsp;немесе арнайы аутизмге арналған ауруханалар ашу қажет. Аутизмі бар баланың ешқандай сезімі жоқ! Әке-шешесі неге қарамайды?&nbsp;Ата-аналар балаларының диагнозын біле тура, неге ай қарап жүреді?” –&nbsp;деп жазған еді блогер.</blockquote>Видеодан скрин

Аутизмі бар балаларды "өлтіруге шақырған" блогер кешірім сұрады

<a href="https://kyzylorda-news.kz/">Kyzylorda-news.kz</a> Қызылордада «Сыр жастары» жеңілдетілген ипотекалық несие беру бағдарламасына құжат қабылдау басталды. Бағдарламаға қатысушылар бүгіннен бастап өтініш пен құжаттарын электронды түрде kezekte.kz сайтына тіркеп, «Жұмыс істейтін жастарға арналған «SyrJastary» жеңілдетілген ипотекалық несие беру» сервисінде жүзеге асыра алады. Бұл туралы облыстық қоғамдық даму басқармасының басшысы Руслан Каюпов мәлімдеді.<blockquote>«Аймақ басшысы Нұрлыбек Нәлібаевтың бастамасымен Қызылорда облысының жастары үшін жеңілдетілген ипотекалық несие беруге бағытталған «Сыр жастары» бағдарламасы қабылданған болатын. Бағдарламаның жалпы құны 1 млрд 700 миллион теңге, оның 1 млрд 200 млн теңгесі облыстық бюджеттен бюджеттік несие ретінде бөлінсе, 500 млн теңге «Отбасы банкі» арқылы қарастырылып отыр. Былтыр бұл бағдарлама аясында 100 жас баспаналы болды. Бағдарламаға ұсыным беру 15 күнтізбелік күн ішінде жүзеге асырылады, бүгін басталған науқан 24 қыркүйек күні аяқталады. Одан кейін, жиналған балл саны бойынша әр санат ең көп балл жинаған қатысушылар іріктеледі, оларға электронды жолдама беріледі. Жолдаманы алған жастар «Отбасы банкінде» төлем қабілеттілігін растайды, содан кейін келісім-шарт рәсімделіп, үй табысталатын болады. Бағдарлама аясында табысталатын үйлер қаламыздың Сол жағалауында орналасқан, жалпы көлемі 49 және 66 шаршы метрден кем емес 2-3 бөлмелі пәтерлер болады деп күтілуде», - деді басқарма басшысы.</blockquote>Айта кетейік, бағдарлама бойынша сұрақтар болса, басқарманың азаматтық қоғам институттарымен жұмыс және жастар бөліміне 60-53-23 номері бойынша хабарласуға болады. Сонымен бірге, облыс, қала, аудандық жастар ресурстық орталықтарында «Сыр жастары» бағдарламасы бойынша кеңес беріп, құжат ұсынуға көмек беріледі. Жастардың құжат ұсынуға компьютері, интернеті болмаса, жастар орталықтарына барып, көмек алуға болады.

«Сыр жастары» бағдарламасына құжат қабылдау басталды

<a href="https://kyzylorda-news.kz/">Kyzylorda-news.kz</a> «AMANAT» партиясының 2023-2027 жылдарға арналған Жол картасы аясында пайдалануға берілген нысандарға ашылғандығы жөнінде тақтайша орнатылды.Партияның қалалық филиалы жанындағы Партиялық бақылау комиссиясының мүшелері «Келешек мектебі» жобасы аясында Қызылжарма ауылдық округінде ашылған құны 4 млрд 700 млн теңгені құрайтын 600 орындық №295 орта мектебінің жан-күйімен танысты.Жалпы қала бойынша оқушылар сыйымдылығын ретке келтіру мақсатында жаңадан екі бірдей мектеп құрылыс нысандарды пайдалануға берілген болатын. Соның нәтижесінде, оқушыларға қолайлы орта қалыптасып, сынып жетіспеушілігінің түйіні тарқады.Жаңа ғимаратында оқушылар бір ауысым бойынша білім алады. Соңғы үлгіде жабдықталған 39 оқу кабинеті, кәсіптік кабинеттер, «STEM», Робототехника, информатика, лингвистика, логопед кабинеттер, 2 спорт зал, АКТ зал, асхана, би залы, әмбебап шеберханалар жұмыс жасайды.Әрі қарай, комиссия төрағасы Мейрамбек Есжанов ата-аналармен пікір алмасты.

Партиялық бақылау жүргізілді

<a href="https://kyzylorda-news.kz/">Kyzylorda-news.kz</a> Қалалық сәулет және қала құрылысы бөлімінің мамандары Қазақстан Республикасының заңнамасына сәйкес, заңсыз орнатылған жарнама объектілерін алдын алуға және шаһардың сәулеттік келбетіне кері әсерін тигізетін сыртқы көрнекі нысандарға мониторинг жүргізді.Мониторинг барысында талаптарға сәйкес келмейтін жарнамалық-ақпараттық объектіні орналастыру фактілері анықталды.Айта кету керек, соңғы кездері жеке немесе заңды тұлғалар, оның ішінде кәсіпкерлер сыртқы жарнама ілудің заңдылықтарына қарамастан өз қалауларынша жарнамаларды іліп жұмыс жасауда. Олар жарнама конструкциясының тазалығына, эстетикалық және техникалық жай-күйіне мән бермегеннен бөлек, жарнамалық-ақпараттық нысан орналастырғаны үшін мемлекеттік кірістер департаментіне салық төлемеуде.Бөлім мамандар заңсыз жарнама орналастыруға жол бермеу туралы түсіндіру жұмыстарын жүргізіп, ал ескерту берілгенімен одан нәтиже шығармаған хабарлама иелерінің жарнама нысандары талапқа сай алынып тасталды. Бұл бағыттағы рейдтік жұмыстар ұдайы жүргізіледі.

Заңсыз жарнамаға жол жоқ

<a href="https://kyzylorda-news.kz/">Kyzylorda-news.kz</a> &nbsp;Қазақстан Республикасының Мәдениет және ақпарат министрлігі жастардың бастамасын қолдау мақсатында 2021 жылдан бастап «Тәуелсіздік ұрпақтары» грантын тағайындады.2025 жылдың 16 маусымы мен 18 тамызы аралығында өтінімдерді қабылдау T.URPAKTARY25@GMAIL.COM поштасы арқылы жүзеге асырылды. Нәтижесінде үміткерлерден 1 391 өтінім («Ғылым» -130, «Мәдениет»-131, «Ақпараттық технологиялар» -218, «Бизнес» – 644, «Медиа»- 145, «Волонтерлік» – 123) келіп түсті. Оның ішінде 186 адамның құжаттары тексеріліп, ұйымдастырушылар тарапынан қабылданды ( тізімді сілтеме бойынша көре аласыз https://www.gov.kz/…/mam/documents/details/856999…).Өтінімдердің көптігіне байланысты 5 қыркүйек күні таңғы сағат 5:00-ден бастап Gmail-дің өтінімдерді қабылдауға арналған электрондық пошта істен шығып, бұғатталды. 5 қыркүйектен бастап электрондық поштаны қалпына келтіру мақсатында IT мамандармен жұмыс жасалды, сондай-ақ Google компаниясының әкімшілігіне өтініштер жіберілді. Бірақ поштаны қалпына келтіру мүмкін болмады.Жоғарыда аталған техникалық мәселелері ескере отырып, конкурстық өтінімдер 2025 жылдың 9-19 қыркүйек аралығында, түнгі сағат 24:00-ге дейін T.ZAIAVKA2025@BK.RU электронды поштасы арқылы қабылданады.Тізімде бар 186 адамның өтінімдері қайта жіберуді қажет етпейді. Грант бөлудің мақсаты – белсенді шығармашыл жастар қауымдастығын қалыптастыруға бағытталған жаңа идеялар мен бастамаларды мемлекет тарапынан қолдау. 2025 жылы республикалық деңгейде 3 млн. теңгеден 30 грант берілетін болады.Грантқа 14 жастан бастап 35 жасқа дейінгі (34 жасты қоса алғанда) Қазақстан Республикасының азаматы үміткер бола алады.

«Тәуелсіздік ұрпақтары» грантына өтінім қабылдау жалғасады

<a href="https://kyzylorda-news.kz/">Kyzylorda-news.kz</a> Қызылорда қаласының Сол жағалауынан заманауи үлгіде салынған “Syr-Darya” коммуналдық базары бүгін техникалық түрде ашылады.Жалпы ауданы 5 мың шаршы метрді құрайтын бұл сауда алаңы қала тұрғындарына азық-түлік, сүт, ет, жеміс-жидек, көкөніс өнімдерін қолжетімді бағада ұсынып, тамақтану орындары қызмет көрсетуді бастайды.Осы ретте, қала тұрғындары мен қонақтарын “Syr-Darya” коммуналдық базарының техникалық ашылуына және жергілікті тауар өндірушілердің өнімін алуға шақырамыз.“Syr-Darya” коммуналдық базарына келушілер үшін қоғамдық көліктердің қызметі тегін ұйымдастырылғанын хабарлаймыз.Мекенжайы: Қызылорда қаласы, Сол жағалау шағын ауданы, Абылайхан даңғылы, н/з (автовокзал маңы) <img src="https://knadmin.beoblood.kz/uploads/ala_3f6d4fc5bb.webp" alt="қала.webp">

Қала тұрғындарының назарына!

<a href="https://kyzylorda-news.kz/">Kyzylorda-news.kz</a> Шиелі ауданының әкімі Айтбай Жандарбековтың төрағалығымен кезекті мәжіліс отырысы өтті. Жиында Мемлекет басшысы Қасым-Жомарт Кемелұлы Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында айтылған басым бағыттарды жүзеге асыру жайы талқыланды.Мәжіліске аудан әкімінің орынбасарлары, аудандық мәслихат төрағасы,“Amanat” партиясының аудандық филиалының атқарушы хатшысы, дербес бөлім басшылары, сондай-ақ ауылдық округ әкімдері қатысты.Мемлекет басшысы ел экономикасын дамытудың 7 маңызды негізгі бағытын белгіледі. Атап айтсақ, елімізге қомақты инвестиция тарту, өңдеу өнеркәсібінің дамуына жаңа серпін беру, ауыл шаруашылығын жаңа деңгейге көтеру, көлік логистикасын, экономиканы, адам капиталын, елімізді цифрлық дамытуға, тұрғын үй-коммуналдық шаруашылығы мен су инфрақұрылымын жаңғыртуға қатысты жаңа міндеттер.Аудан әкімі Айтбай Жандарбеков аталған бағыттардың әрқайсысы бойынша аудан көлемінде нақты жұмыстар жүргізу қажеттігін атап өтті. Әсіресе, ауыл шаруашылығына қатысты – пайдаланылмай жатқан және заңсыз иемденілген жерлерді анықтап, мемлекет меншігіне қайтару, оны тиімді игеретін азаматтарға қайта бөлу тапсырылды.Сонымен қатар, өңірдегі цифрландыру, шағын және орта кәсіпкерлікті қолдау, білім мен денсаулық сақтау саласын жетілдіру секілді маңызды бағыттар бойынша да міндеттер айқындалды.Жиын соңында аудан әкімі барлық бөлім басшылары мен ауыл әкімдеріне Жолдауды халыққа кеңінен насихаттап, нақты іске көшуді тапсырды.Фото: Шиелі ауданы әкімдігі

Жолдауда айқындалған бағыттар бойынша тапсырмалар жүктелді

<a href="https://kyzylorda-news.kz/">Kyzylorda-news.kz</a>&nbsp; Арал ауданының әкімі Аманжол Оңғарбаев қаладағы бірқатар құрылыс нысандарын аралап, қала бойынша қолға алынып жатқан жол жөндеу жұмыстарының жай-күйімен танысты.Алдымен «Моно және шағын қалаларды дамыту» бағдарламасы аясында Бақтыбай батыр көшесінің автомобиль жолын қайта жаңғырту жұмыстарымен танысты.Қазіргі таңда аталған көшенің жарты бөлігі кеңейтіліп, шебін төселген. Қаржының мүмкіндігіне қарай ендігі жұмыстар жақын күндері жүргізілуі тиіс. Аудан басшысы мердігер мекеме басшысымен кездесу барысында аталған жұмыстарды сапалы әрі мерзімінде аяқтауға күш салу керектігін тапсырды. Жұмыстың жедел жүруін бақылауда ұстап, қала көшелерінде ұзақ уақыт қолайсыздықтар тудырмау керектігін де атап өтті.Бақтыбай батыр көшесінің автомобиль жолын жаңғырту жұмыстарының басталуына орай, яғни Бақтыбай батыр мен Әбілқайыр хан көшелерінің қиылысынан бастап №260 қазақ орта мектебіне дейінгі аралықтағы көне асфальт жабындысы да арнайы құрылғымен алынып, қайта асфальттау жұмыстары жүргізілген болатын. Мердігер «Арал құрылысы» ЖШС мекемесі өз қаржысы есебінен, яғни демеушілік арқылы М.Мақатаев көшесінің 265 метр бөлігіне жол төсеу жұмыстарын жүргізді. Аудан әкімі ел көкейінде жүрген мәселеге оң көзқарас танытқан мекеме басшылығына ризашылық білдірді.Аудан бойынша жол құрылысына қатысты жұмыстар мұнымен шектеліп қалмайды. Ағымдағы жылы қолға алынуы тиіс осы бағыттағы жұмыстар жыл көлемінде жүйелі түрде қолға алынатын болады.Фото: Арал ауданы&nbsp;

Аудан әкімі қаладағы жол құрылысы жұмыстарын бақылады

<a href="https://kyzylorda-news.kz/">Kyzylorda-news.kz</a> Мәжіліс Спикері, «AMANAT» Төрағасы Ерлан Қошанов Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауын жүзеге асыру бойынша партия активімен кеңейтілген отырыс өткізді.Іс-шараға Мәжіліс депутаттары, қоғам қайраткерлері, Орталық аппарат қызметкерлері, «Жастар Рухының» белсенділері қатысты. Жиынға бейнеконференцбайланыс арқылы партияның барлық өңірлік филиалы қосылды.Сөз басында Ерлан Қошанов «AMANAT»партиясы Мемлекет басшысы Қасым-Жомарт Тоқаевтың қоғамдық тірегі бола отырып, Жолдауды ауқымды реформалардың лайықты жалғасы, елімізді дамыту бағытындағы нақты әрі жүйелі жұмыстың негізгі бағдары ретінде қарастыратынын ерекше атап өтті.<blockquote>«Президенттің биылғы Жолдауы – «Халық үніне құлақ асатын мемлекет» тұжырымдамасын жүзеге асырудың жарқын мысалы. Онда қоғамды толғандырған ең өзекті сұрақтарға жауап беріліп, жаһандық бастамалардан бастап, күнделікті өмірге қатысты барлық мәселелер қамтылды.«AMANAT» партиясының басты міндеті –Мемлекет басшысы реформаларының қозғаушы күші болу, саяси тұрақтылық пен қоғамдық келісімді қамтамасыз ету. Президент бастамаларын қолдау – бұл біздің басты таңдауымыз. Біздің ұзақ мерзімді миссиямыз да, партияның центристік ұстанымы да осы мүддемен ұштасып жатыр», – деді ол.</blockquote>Партия Төрағасы Жолдауда цифрландыру қадамы жаңа жалпыұлттық технологиялық идеяға айналғанына назар аударды. Жасанды интеллект пен жаңа технологиялар дамудың жаңа қозғаушыкүші саналады. Көптеген саланы цифрландыру бойынша кешенді іс-шараларды қолға алужоспарлануда. Партия бұл бағытта азаматтардың, әсіресе зейнеткерлер мен жасөспірімдердің цифрлық сауатын арттыруға арналған «Цифрлық қоғам» жобасын жүзеге асыруда. Енді партияластар оны бүкіл ел аумағына таратып, Жолдау шеңберінде әзірленетін жаңа «Digital Qazaqstan» стратегиясының бір бөлігіне айналдыруға тиіс.Ерлан Қошанов Мемлекет басшысы ауыл тұрғындарының әл-ауқатына ерекше назар аударғанын атап өтті. Бұл мәселе аграрлық саланың дамуымен тікелей байланысты. «AMANAT» партиясы бірнеше жылдан бері «Жер аманаты», «Ауыл аманаты», «Агросауат» жобаларын жүзеге асырып келеді. Олар ауылды дамытуға, ауыл тұрғындарының тұрмысын жақсартуға қажет нақты әрі түсінікті құралдарды ұсынады. Аталған жобаларды ел азаматтары жылы қабылдады. Тиісінше, олар Президент Жолдауында айқындалған жаңа бастамаларға енгізілуге тиіс.Сондай-ақ партия Төрағасы Мемлекет басшысы халықтың қаржылық сауатын арттыруға арналған «Қарызсыз қоғам» партиялық жобасына қолдау білдіргенін ерекше атап өтті. «AMANAT» Үкіметпен бірге заманауи цифрлық технологияларды пайдалана отырып, оның ауқымын кеңейтуді жалғастырады. Биыл call-орталық құрылды, 40 заңгердің қатысуымен онлайн-платформа жұмысы жолға қойылды, ал өңделген өтініштердің жалпы саны 800 мыңнан асты.Іс-шара барысында Мәжіліс депутаты, «AMANAT» партиясы фракциясының мүшесі Ринат Зайыт пікір білдірді. Оның айтуынша, Президент айтқан бір ұлт идеясын этникалық мағынада емес, қоғам бірлігінің көрінісі ретінде түсіну керек, себебі ұлттық бірлік – Қазақстанның баянды болашағының басты шарты.Мәжіліс депутаты, «AMANAT» партиясы фракциясының мүшесі Екатерина Смышляева Мемлекет басшысы Жолдауда цифрлық трансформацияның ауқымды міндеттерін белгілеп бергенін атап өтті. Ол «AMANAT» фракциясы бастамашылық еткен Цифрлық кодекс осы саладағы басты құжатқа айналатынын және алдағы серпінді қадамдардың құқықтық алғышартын жасауға мүмкіндік беретінін мәлімдеді. Депутат барлық мүдделі ұйымдарды оның дамуына белсенді қатысуға шақырды. Ал «Astana Hub»-тың бас директоры Мағжан Мәдиев цифрлық трансформация табысты болуы үшін адами капиталды дамыту және жас таланттарды қолдау қадамдары маңызды басымдыққа айналуға тиіс екенін айтты.«Kaz Alpine Club» ҚБ басқарма мүшесі Ерлан Смайлов Президент стратегиялық сала ретінде айқындаған туризм бағыты инфрақұрылым мен кадрларды дамытуды қажет ететінін атап өтті. Оның айтуынша, Қазақстанның шытырман оқиғалы туризмді дамытуға зор мүмкіндігі бар. «AMANAT» партиясы осы бағыттағы жұмысты бастап, «Алатау аманаты» жобасын іске қосты. Жоба жаңа жұмыс орындарын ашып, туристерді тартуға, сондай-ақ жергілікті жерлерде шағын бизнесті дамытуға серпін бермек.Мәжіліс депутаты, «AMANAT» фракциясының мүшесі Айдос Сарым партияның басты міндеті – Президент реформаларының мәнін халыққа, ең алдымен жастарға түсіндіре отырып, ұлттық бірлік пен келісімді нығайту екенін баса айтты. Депутаттың пікірінше, реформалар кең қолдау тауып, азаматтар олардың жүзеге асуына атсалысуы үшін партия Президент Жолдауын еліміздің әрбір тұрғынына қарапайым әрі түсінікті тілмен жеткізуі қажет.Мәжіліс депутаты Бақытжан Базарбек заңдардың орындалуын бақылауға арналған цифрлық картаны енгізу жөнінде ұсыныс білдірді. Бұл азаматтардың құқықтық санасын арттырып, қабылданған заңдардың мүлтіксіз орындалуын қамтамасыз етуге және Мемлекет басшысының «Заң және тәртіп» қағидасын нығайтуға мүмкіндік береді.Кәсіпкер, «TechnoWomen» басқарма төрағасы Әзиза Шөжеева Президент Жолдауында отандық тауар өндірушілерді барынша қолдау мәселесікөтерілгенін атап өтті. Ол кәсіпкерлердің бұл бастаманы үлкен ықыласпен қабылдағанын айтып, тәуелсіз сыртқы сауда алаңын құруды, сондай-ақ ұлттық жобаларды халықаралық нарықтарға шығаруға ықпал ететін партия жанынан кәсіпкерлік кеңесін құруды ұсынды.Осылайша, «AMANAT» партиясы еліміздің жетекші саяси күші ретінде Мемлекет басшысының барлық саяси және әлеуметтік-экономикалық бастамаларын толық қолдайды. Мәжілістегі партия фракциясы Президент Жолдауында қойылған міндеттердің заңнамалық тұрғыдан орындалуын қамтамасыз етеді. Партия ашық диалогқа дайын және ел дамуына үлес қосқысы келетін барлық азаматтармен бірлесе жұмыс істеуге әзір.Сонымен қатар Ерлан Қошанов партияның Орталық аппараты мен аймақтық филиалдарына Жолдауды халық арасында кеңінен насихаттап, Президент айтқан реформаларды жүзеге асыруға қоғамның барлық прогрессивті күштерін жұмылдыру жөнінде нақты тапсырмалар берді.

«AMANAT» партиясы Президент Жолдауына қолдау білдірді

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың төрағалығымен арнайы жиын өтіп, құрылыс нысандары, жол сапасы мен мерзіміне қатысты мәселелер талқыланды. Жауапты сала мамандарына нақты тапсырмалар жүктелді.Айта кету керек, соңғы үш жылда қаржыландырудың барлық көзінен 2 млн. 500 мың шаршы метр тұрғын үй пайдалануға берілді. Биыл бюджеттен тұрғын үй құрылысы мен жеке салушылардан дайын 3 800-ге жуық пәтерді сатып алуға қаржы бөлінді. Заманауи жаңа дизайнмен салынған 7, 9, 12 қабатты тұрғын үйлер қаламыздың сәнін келтірді.Өңір тұрғындары үшін әлеуметтік нысандар, атап айтқанда 2022 жылдан бері жаңадан 15 мәдениет нысаны салынды. Барлық ауданда «Руханият орталықтары», балалар мен жасөспірімдерге арналған «Сыр жұлдыздары» шығармашылық-инновациялық академиясы, «Саутс Ойл» компаниясының демеушілігімен музыкалық колледждің жаңа ғимараты, облыстық тарихи-өлкетану музейі ашылды.Ассамблеяның 30 жылдығы аясында Қызылорда қаласында «Қазатомөнеркәсіп» ұлттық атом компаниясының қолдауымен «Достық үйінің» жаңа ғимараты бой көтеруде. Нысан алдағы қараша айында ел игілігіне беріледі.Соңғы жылдары 1 232 шақырым автомобиль жолы мен көшелерді, 19 көпірді салуға, күрделі жөндеуге қаражат бөлінді. Арал, Жаңақорған аудандарында теміржол үстінен өтетін аспалы көпір пайдалануға берілді. Биыл 329 шақырым жол жөнделіп, жақсы жағдайдағы жолдардың үлесі 95 пайызға жетеді.Республикалық маңызы бар «Қызылорда-Жезқазған» автомобиль жолын қайта жаңғырту жұмыстары жалғасуда. Облыс аумағындағы 216 шақырымның 163 шақырымы ел игілігіне айналды. Қосымша 12 шақырымына екі қабатты асфальт төселді. Жоба биыл толық аяқталады.Облыс орталығының негізгі көшелері – әуежайдан Сұлтан Бейбарыс көшесіне дейінгі аралық, Шиелі ауданынан кіреберіс жол, Яссауи, Жаппасбай батыр магистральді көшелері, Тәуелсіздіктің 25 жылдығы даңғылы төрт жолақты болып кеңейтілді.Бүгінде Әбілқайыр хан көшесінен Саламатов көшесіне дейінгі 2,9 шақырым жолдың, Жанқожа батыр көшесі арқылы өтетін теміржол асты өткелінің құрылысы қарқынды жүруде.Аймақ басшысы жауапты басшыларға әрбір құрылыс нысанына барып, сапасы мен аяқталу мерзімін тұрақты бақылауда ұстауды ескертті.Фото: Қызылорда облысы әкімінің баспасөз қызметі

Құрылыс пен жол сапасы – күн тәртібіндегі басты мәселе

<a href="https://kyzylorda-news.kz/">Kyzylorda-news.kz</a> Президент Қасым-Жомарт Кемелұлы Тоқаев бүгінгі Қазақстан халқына Жолдауында ғылым саласына қатысты маңызды мәселелерді қамтып, оның бағыт-бағдарын айқындайтын бірқатар басымдықтарға тоқталды.<blockquote>– Ғылыми әзірлемелерді коммерцияландыру деңгейі 17 пайыздан аспайды. Ал, тиісті оқу орындарын бітірген түлектердің 40 пайызы ғана осы салаға жұмыс істеуге барады. Агроғылым мен «жердегі тіршіліктің» арасында алшақтық бар, – деп атап өтті Мемлекет басшысы.</blockquote> Бұл – ел ғылымының әлеуеті толық пайдаланылмай жатқандығын көрсетеді. Озық елдерде экономикада ғылымның үлесі айтарлықтай. Мысалы, АҚШ ғылыми әзірлемелерді коммерцияландыруда көшбасшы болып саналады. Университеттер мен жеке компаниялардың бірлескен жобаларының арқасында бұл көрсеткіш 60-70 пайызға жетеді. Массачусетс технологиялық институты (MIT) мен Стэнфорд университеті жүздеген стартаптың туындауына жол ашып, Google, Facebook, Moderna сияқты ірі компаниялардың қалыптасуына негіз болды.Оңтүстік Корея да инновациялық экономика үлгісінің жарқын мысалы болып табылады. Мұнда коммерцияландыру деңгейі 50-55 пайызға тең. Мемлекет университеттерді бизнеске серіктестікке міндеттеп, «Samsung», «LG», «Hyundai» секілді ірі компаниялардың ғылыми орталықтармен бірлесе дамуына жағдай жасады.Біздің елде ғылыми зерттеулер мен өнертапқыштық патенттердің коммерциялануы бірнеше себепке байланысты төмен. Ғалымдардың еңбегі мен нақты өндіріс арасындағы байланыс әлсіз. Президенттің сөзімен айтсақ, агроғылым мен «жердегі тіршіліктің» арасында алшақтық бар: зертханаларда жасалған жаңалықтар егістікке толық жетпейді, ғылыми тұжырымдар нақты шаруашылыққа айналмайды. Соның нәтижесінде инновациялық идеялар қажетті деңгейде экономикалық пайда әкелмей отыр. Бұл жағдайды өзгерту – ортақ міндетіміз.Біріншіден, ғылыми зерттеулерді өндіріс пен бизнеске бағыттау қажет. Әсіресе ауыл шаруашылығы, экология, цифрлық технология және жасанды интеллект саласында ғылымды нақты нәтижеге жеткізу маңызды. Екіншіден, ғалымдардың еңбегі лайықты бағалануы тиіс. Жас мамандар ғылымнан кетпей, осы салада қалып жұмыс істеуі үшін бәсекеге қабілетті жалақы мен әлеуметтік қолдау қарастырылуы қажет. Үшіншіден, ғылым мен бизнестің арасын жақындататын заңнамалық базаны күшейту маңызды. Парламент нақты шешім қабылдап, ғылыми әзірлемелерді коммерцияландыруға қолайлы орта жасауы қажет. Ғылым – елдің болашағы. Егер ғылым мен өндірісті ұштастыра білсек, Қазақстанның әр саладағы бәсекеге қабілеттілігі артады. Президент атап көрсеткен кемшіліктерді жойып, ұлттық мүддені қорғап, болашақ ұрпаққа мықты мемлекет қалдыруға болады. Сондықтан ғылым саласын жаңғырту – тек салалық мәселе емес, бұл – ұлттық қауіпсіздік пен ел дамуының стратегиялық кепілі.Руслан Рүстемұлы,ҚР Парламентінің Сенат депутаты

Қазақстан және Қызылорда облысының жаңалықтары: Қоғам