<a href="https://kyzylorda-news.kz/">Kyzylorda-news.kz</a> Қазіргі кезде әлеуметтік желілермен жұмыс істейтін SMM мамандығына сұраныс жоғары. SММ маманы деген кім? SMM менеджер ағылшын тіліндегі Social Media Marketing деген сөздің бас әріптерінен құралған атау. SMM менеджері әлеуметтік желілерде отырып, өзі қызмет ететін компания немесе мекеменің жұмыс бағдарына сай мақсатты аудиторияны тартатын, үйлестіретін маман. Олардың басты мақсаты оқырмандарды мекеме сайтына бағыттап, клиентке айналдырып, компания өнімдеріне көптеп адам тарту, жарнамалау.&nbsp;Еңбек нарығында осыдан 6 жыл бұрын пайда болған кәсіп бүгінде трендке айналған. Бір қызығы, бұл мамандықты ешбір жоғары оқу орны оқытпайды. Жас талғамайтын мамандықты жастар да, ересектер де игере алады. Ол үшін бір айлық курсын оқып алса болғаны.&nbsp;Ментор берген сертификатымен айына кемінде 80-200 мың теңге аралығында табыс табуға мүмкіндік бар. Жалпы әлеуметтік желінің қыр-сырын үйреніп, контент жоспар жасап, қоғамға сату тәсілдерін қолдана білген кез келген жан SMM менеджер бола алады. Сонымен қатар, сала бойынша мақсатты аудиториямен жұмыс істей білуі және адамдармен дұрыс қарым-қатынас ұстай білуі де маңызды.&nbsp;Бүгінде интернет-маркетолог онлайн бизнесті алға жылжытып отырғаны белгілі. Ғаламтордың бір сегментіне айналған SММ маманы ВКонтакте, Instagram, Telegram, Youtube, Facebook-те белсенді болып, қызықты әрі пайдалы жазбаларымен халықты өзіне тартып отыр. Үйден шықпай-ақ компьютер алдында SMM арқылы табыс тауып отырғандардың дені студенттер, бала күтіміне байланысты үйде отырған аналар және өзінің шағын және орта бизнесі бар кәсіпкерлер. Әр салада цифрлы технологияларды меңгеріп, оның әдіс-тәсілдерін дұрыс қолдана білгендерге қай жерде де сұраныс жоғары. Өйткені, ІТ мамандығынсыз болашақты елестету мүмкін емес.&nbsp;Әлем бойынша ең қажетті мамандықтар тізімінде ІТ маманы екінші орында. Технологиялық прогрестерге байланысты халық та кейбір қызмет пен тауар түрлерін қолындағы ұялы телефонмен-ақ тапсырыс беріп-ақ ала алатын жағдайға жеткен. Егін және мал шаруашылығы маманы, медицина маманы немесе қаржыгер, жасанды интеллект, роботизация, автоматизация сынды мамандықтардың өздері елімізде цифрлы технологияның қаншалықты дамығандығын көрсете алады.&nbsp;Жаңа ғасырда пайда болған киберфизикалық құрылым инженерлері, виртуалды жүйелерді прототиптеуші мамандар, цифрлық жобалаушылар, иммерсивті дизайнерлер, әсіресе, big data-мен жұмыс істейтіндер, дата инженерлер, өндірістік салада дрон басқаратын операторлар, киберқауіпсіздік атты жаңа мамандық атауларына да құлақ үйрене бастады.&nbsp;Әлеуметтік желінің әлеуетін көтеріп, нарықты жан-жақты зерттеп, бизнестің стратегиясын құру SММ маманының негізгі міндеті. Олар үнемі ізденіспен, зерттеумен, сараптаумен айналысып отырмаса, жылдамдығына көз ілеспейтін уақыт ағымынан қалып қояды. «Бір ай оқыған курсыңды тез арада практикада қолданбасаң, 3 айдан соң нәтижеге жетем деу бос әурешілік. Себебі, біз күнде ақпараты ағылған, технологиясы қарқынды дамыған ғасырда өмір сүріп отырмыз. Технологияның бүгінгі жаңалығы ертеңақ ескіріп қалуы мүмкін. SММ мамандығын игергендердің дені ары кетсе жарты жылда өз брендін қалыптастырып үлгереді. Әрі қарай өзгелерге пайдасын тигізеді. Рас, 4-5 жыл оқып, белгілі мамандық иесі болғанға не жетсін?!&nbsp;Оның жөні басқа... Біз SММ мамандығын өзгелерге үйрете отырып, интернет арқылы табыс табуға болатынын дәлелдейміз. Елді аузына қаратып жүрген миллионнан астам оқырманы бар блогерлердің көпшілігі өз парақшаларын SMM мамандары арқылы жүргізеді. Себебі миллиондаған аудиторияға сауатты, қызықты дүние ұсыну үшін де арнайы маманның көмегі керек.&nbsp;Сондай-ақ, қазіргі кезде SММ маманымен қатар мобилограф, таргетолог, веб аналитик, мессенджер маркетолог сынды мамандықтар да заман талабына сай дамып келеді. Олардың әрқайсысының атқаратын қызметтері әртүрлі. Бүгінде екінің бірі әлеуметтік желілерге тіркелген, сағаттап отырады. Біреудің ішкен тамағын, киген киімін, жүріс-тұрысын аңдығанша, табысын арттыратын пайдалы курстарды оқып алып, контент жүргізсе, хайлайтсын арттырса, брендін қалыптастырса қаржылық мұқтаждықтан құтылары анық. Қазіргі кезде жеке компанияларды айтпағанда, мемлекеттік мекемелер, жергілікті атқарушы билік құрылымдары да SMM менеджер штатын ашуда. Демек, бұл мамандыққа сұраныс бар деген сөз. SММ маманы мемлекеттік мекемелерде айлық жалақыға ғана жұмыс істейтін болса, ал, жеке тұлғалардың, кәсіпкерлердің, бизнесмендердің әлеуметтік желідегі парақшаларын жүргізетіндер, керісінше, қомақты табысқа қол жеткізіп жүр.&nbsp;Өткен жылы Шиелі ауданы бойынша мемлекеттік грант конкурсына қатысқан 732 түлектің 571-і мемлекеттік грант иегері атанған. Оның ішінде 231 педагогикалық мамандықтар бойынша, 59 медициналық, 140 түлек техникалық мамандықтар бойынша 41 түлек ауыл шаруашылығы және 100 түлек басқа саладағы мамандықтар бойынша грант иеленген. ІТ сала ел ауқымында үлкен өріс алып келеді. Осыдан 5-6 жыл бұрын супервайзер, SMM-менеджер, маркетолог сынды мамандықтар сұранысқа ие болатыны көп айтылатын. Расында, қазір тап осы мамандар тапшы. Оны Шиелі аудандық Жастар ресурстық орталығының директоры Ержан Әбдешов те растады. «Еңбек және халықты әлеуметтік қорғау министрі жаңа мамандықтар атласын жасады. Оған сәйкес алдағы жылдары киберқауіпсіздік, денсаулық сақтау, өнер және білім беру мамандары сұранысқа ие болады» деген.&nbsp;Олай болса, «Интернет деген – үлкен қоқыс алаңы, оған аузы-мұрныңды тұмшалап, қолыңа қолғап киiп кiрiп, үйiндiлердiң арасынан жарамдысын, өзiңе қажеттiсiн таңдап ала бiлуiң керек». Демек, интернеттi қолданудың мәдениетiн қалыптастыруға тиiспiз.

Өткен жылы Шиеліде 571 түлек мемлекеттік грант иегері атанған

<a href="https://kyzylorda-news.kz/">Kyzylorda-news.kz</a> Өскеменде мұғалімдер оқушылары ҰБТ-ны сәтті тапсыруы үшін 19 миллион теңге төлеген, — деп хабарлайды Democrat.kz ақпараттық порталы&nbsp; <a href="https://massaget.kz/">Massaget.kz</a> тілшісіне сілтеме жасап.Өскемен қаласының №2 сотында ҚР Қылмыстық кодексінің 190-бабы 4-бөлігі 2-тармағы бойынша Қ.-ға; ҚР Қылмыстық кодексінің 190-бабы 3-бөлігі 1,3,4-тармақтары бойынша (алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену iрi мөлшерде, екі немесе одан да көп адамға қатысты) Ш.-ға қатысты қылмыстық іс қаралды.Екі сотталушы 2022 жылғы тамыздан бастап 2023 жылғы шілдеге дейін мұғалімдерге білімін бағалайтын сертификаттар алуға жәрдемдесемін деп, оған қоса педагог портфолиосын және оқушылары ҰБТ-дан сәтті өткені туралы сертификат беретінін айтып алдап, алаяқтық жолмен ақша иемденген. Кейін оны өз қалаулары бойынша жұмсаған. Жәбірленушілерге келтірілген материалдық залалдың жалпы сомасы 19 415 000 теңге болады.«Прокурор сотталушы Қ.-ның мүлкін тәркілеп, 5 жыл бас бостандығынан айыруды, сотталушы Ш.-ны 3 жыл бас бостандығынан айыруды сұрады», — деп жазылған хабарламада.Сот Қ.-ға ҚР Қылмыстық кодексінің 190-бабы 4-бөлігі 2-тармағы бойынша 5 жылға бас бостандығынан айыру жазасын тағайындап, мүлкін тәркілеп, екі жасар баласы барын ескере отырып, ҚР Қылмыстық кодексінің 74-бабының 1-бөлігі негізінде тағайындалған жаза өтелуін 4 жылға кейінге қалдырды.Ш.-ға ҚР Қылмыстық кодексінің 190-бабы 3-бөлігі 1,3,4-тармақтары бойынша 4 жылға бас бостандығынан айыру жазасын тағайындап, 63-бапты қолдана отырып, шартты түрде жаза тағайындады.Жәбірленушілердің азаматтық талап-арыздары толық көлемде, жалпы сомасы 7 325 000 теңгеге қанағаттандырылды. Үкім заңды күшіне енген жоқ.

Мұғалімдер оқушылары ҰБТ-ны сәтті тапсыруы үшін 19 миллион теңге берген

<a href="https://kyzylorda-news.kz/">Kyzylorda-news.kz</a> Сыр елінен сұрапыл соғыс жылдары майдан даласына 70 мың азамат аттанып, оның 30 мыңы қайта оралмады. Бүгінгі Ұлы Жеңістің 79 жылдығын аймағымызда төрт батыр ардагеріміз қарсы алуда.Бүгін партияның облыстық филиалының Атқарушы хатшысы Ләйлә Төрешова «Тағзым» алаңында өткен «Ұлы Жеңіс – ұрпаққа аманат» атты салтанатты шараға қатысып, Ұлы Отан соғысы жылдары майданда ерлік көрсеткен, бақұл болған батырлардың құрметіне гүл шоқтарын қойды.Мұнан соң партияның облыстық филиалының Атқарушы хатшысы ҰОС батырлары Әбдірахман Байтіков пен Төлеген Жүнісовтың шаңырағына барып, қарт жауынгерлерді Жеңістің 79 жылдық мерекесімен құттықтады.Бәйтіков Абдрахман сұрапыл соғыс жылдарында майдан даласына алғашқылардың бірі болып, ерте жастан аттанған. Бар-жоғы 18 жастағы жігіт Курск Орел қаласының Курс доғасында ПТР бөлімінде жаяу әскер қатарында болған. 1943 жылы Курск доғасында ауыр жарақат алып, 2-топ мүгедегі болып, 1944 жылы 20 жасында елге оралған.Ал, Төлеген Жүнісов 1942 жылы қызыләскер қатарына қабылданып, кіші командирлер дайындайтын курста оқып, сержант болып, Украинада 688 атқыштар полкінде ұрыста болған.Кездесу барысында Атқарушы хатшы Ләйлә Төрешова соғыс ардагерлеріне «AMANAT» партиясының «Құттықтау» хатын жеткізді. Қарт майдангерлер сұрапыл соғыс жылдарынан сыр шертетін естеліктерімен бөлісіп, құттықтап келген аманаттықтарға ақ батасын берді.Жалпы «AMANAT» партиясы «Ардагерлерді ардақтайық» жобасы аясында ардагерлерге үнемі қолдау көрсетіп келеді. Қамқорлық шаралары тек мереке қарсаңында емес, жыл бойы жалғаса бермек.

Ұлы жеңіс – ұрпаққа аманат

<a href="https://kyzylorda-news.kz/">Kyzylorda-news.kz</a> Өткен күнде белгі жоқ десек те, өмір өткен күндермен қатар, есте қалған кезеңдерден құралады. Адамның есте қалған кезеңдері–айналасына тигізген шапағаты, ел үшін сіңірген еңбегі ұмытылмайтын ардақты істері. Біздің де сөз еткелі отырғанымыз Отан үшін от кешкен оғаландарды ардақтау һәм олардың ерліктерін ұлықтау. Жеңіс күнін жақындатқан барлық жауынгерлердің ішінде бұрымдылардың да еңбегі ерен. 1941-1945 жылғы бүкіл адамзаттың мәңгі есінде қалатын, баланы әкесіз жылатқан, ананы перзентсіз аңыратқан, келіншекті жесір қалдырып зарлатқан, сұм соғыс жаңақорғандықтардың да жүрегіне от салды. Сұм соғыста ерлермен қатар әйелдер де қару ұстап, жеңісті жақындада түсті. Солардың бірі – Разия Ысқақова.&nbsp; Дерек көздеріне қарағанда, Разия Ысқақова 1922 жылы Жайылма ауылында дүниеге келеді. 1938 жылы Шымкент қаласындағы Медициналық училищеге оқуға түседі. Оны 1941 жылы үздік бітіріп, фельдшер мамандығы бойынша жұмысқа араласады. Осы кезде екінші дүние жүзілік соғыстың негізгі майданы басталады. Отаншыл қазақ қызы соғыс комиссариятына өз еркімен барып, соғысқа сұранады. Осылайша 1941 жылдың қазан айында әскери-фельдшер болып, соғыс майданына аттанады.Сол кезде Разия 19 жаста еді. Ол атақты Сталинград қанды қырғын шайқасында фельдмаршыл Паульестің армиясының толықтай талқандалуына қатысады. Кейіннен Харьковті, Киевті, Варшава қалаларын азат етуге қатыса жүріп, жараланған Совет солдаттарын жау оқғының арасынан алып шығып, ерлік жасайды.Берлин шайқасына да қатысады. Сталинградтан басталған соғыс жолымен Берлинге дейін барған РазияБранденбург қақпасында өмірлік жолдасы Қали Әлиярұлымен кездеседі. Ұлы Отан соғысындағы көрсеткен ерен еңбегі үшін Дүниежүзілік Халықаралық Қызыл Крест комитетінің жоғарғы наградасы «Флоренс Найтингель» медалімен Қазақстан бойынша 3 фельдшер марапатталса, соның бірі – Разия Ысқақова еді.Совет Одағы Разияның жасаған ерліктері үшін «Қызыл жұлдыз» орденімен, «Жауынгерлік ерлігі үшін» медалімен, тағы да басқа бірнеше медальдармен марапаттады. Елге жеңіспен оралған Разия Ысқаққызы зейнеткерлікке шыққанға дейін, Шымкент қаласындағы №2 емханада медбике қызметін атқарды. Қазіргі кезде Разияның суреттері мен өмір жолдары жайлы құжаттар Лондон мен Москвада, Көкшетау мен Шымкент мұражайларында тұр. Ұлы Отан соғысының ардагері Разия Ысқаққызының ерліктеріне тиісті бағасын беру, аудан әкімдігі мен аудандық әскери комиссариаттың құзырында. Қорыта айтқанда, сол бір сұм соғыс жылдарындағы отты күндер адамзат санасынан еш өшпек емес, себебі оның құндылығы ғасырлар бойы жаңа буын ұрпаққа өсиет. Жеңісті жақындатқан жауынгерлерге қандай құрмет көрсетсек те лайықты.Әке өсиеті бізге азықӘкем Оразбайұлы Пернебек ұлы отан соғысының ардагері 1913 жылы 17 мамырда Төменарық аумағында қазіргі Қожамберді ауылында дүниеге келген. Әкем де өздерінің тағдырластары, замандастары сияқты тағдырдың басына салған барлық қиындықтарында қайнап піскен шыңдалған. Ұлы отан соғысына бастан аяқ қатысқан. Көрсеткен ерліктеріне қарай, «За отвагу» белгісімен, Берлинді Будапешті алғаны үшін, басқа да орден-медалдарымен марапатталды. Соғыстың алдында ауданда алғаш құрылған «Елтай» колхозына мүше болып, әр түрлі &nbsp;жұмыстар атқарады. Аяулы әкем, соғыстан елге оралғаннан кейін, соғыстан елге оралғаннан кейін, өзінің жұмыс істеген «Елтай» колхозында ауыртпалығын көріп, әбден ысылған әкеміз бұл жұмыста өзін жақсы қырынан көрсете білді. Фермада мал және егін шаруашылығы қатар дамып, ел арасында беделі &nbsp;арта түседі. Одан кейін бригадирлік қызметіне жіберді. Мұндада жемісті еңбек етеді. «Жақсының сөзі де, жақсы өзі де жақсы» деген осы шығар, жақсы әке балаға 40 жыл азық дейді. Бұл сөздің төркінде үлкен мән жатыр. Әкеміз артында ұрпақтарына өнегесі , тәрбиесі аты, атағы абыройы қалды. Мұның бізге 40 жыл азық болатыны ақиқат әкем, анамыз екеуі 6 қыз, 5 бала тәрбиелеп өсірді. &nbsp;Анамыз «алтын құрсақты» ана. Әке шешеміз өте тату тұрды. Анамыз өте бейнетқор адам еді. Әкем өте мейірімді жылы шырайлы, жан-жағына шуақ шашып тұратын жан еді. Әкемнің бір өсиеті бізге өтірік айтпаңдар, ұрлық істемеңдер, кісі жоқ үйге кірмеңдер деп айтып отыратын. Қан майданда қан кешіп, соғыста от пен өлімнің арасында жүрсе де, сабырлы болатын.&nbsp;Соғыстан кейінгі жылдары майдандас достарымен &nbsp;хат алысып тұратын. Бір күні Досмағанбетұлы Рақымғали деген досынанхат келді. Онда қанды көйлек майдандос Пернебек аға барсыз ба деген хатын оқып көзінен жас шығып кетті. Ол кісі Саратов облысы, Чайыклонский ауданы, Чайыкла ауылынан екен. Әкесі Оразбай шешесі Қалдығыз қарапайым шаруа кісілер болған. Әкем өте бауырмал туыс – туғандарын өте жақсы көретін. Әкем соғыста жүріп, жаралы болып, анасы мен туған-туысына, бауырларына өлең арнаған екен. Қымбатты хат күтемін қатар достан,&nbsp; Болашақ іс жайында ақыл қосқан, Ел жақтан ешбір хабар сезілмейді, Жарқырап тұрсадағы мөлдір аспан. Қиындық кездессе де ауыр нелер, Ерлікпен соғысып жүр жауынгерлер. Сұм фашист ұры иттей кейін қашты, Халқымыз қуанышқа бізді бөлеп. Дүйсебек, Құрмаш және Шертай інім, Арқасүйер бар еді, басқа кімім, Туған анам қалдықыз аман жүр ме, Уайыммен өткізіп әрбір күнін. Жолдасбек ағам еді Нұрбекпенен, Олар да жүрген шығар дүрмекпенен, Шауланбек оқу оқып, хат таныпты, Ғұлама болсын елі құрметтеген. Миномет, зеңбірекпен атой салып, Жау жақты снарядпен ұрдың анық, Самолет көктен жерге шүйілгенде, Сұм фашист жатты, жайрап есінен танып. Жау тұмсығын батырмай туған жерге, Талқанын шығарамыз жеме-жемде, Аман-сауі жолығармыз туыстарым, Мың сәлем Пернебектен туған елге. Әкем көзі тірісінде бұл өлеңін Нартайдың әніне салып, гормошкамен айтатын. Әкем 1978 жылы 29 маусымда &nbsp;қайтыс болды. Ұл-қыздары &nbsp;бүгінде бәріміз бір-бір шаңырақ иесі атанып, ұрпақ жалғастырып отырмыз. &nbsp;

19 жасында ерлік көрсеткен қайсар қыз

Сырбойылық партизан Тұрғанбике Жұмабаева

<a href="https://kyzylorda-news.kz/">Kyzylorda-news.kz</a> Бүгін еліміз үшін ең айбынды мереке — Отан қорғаушылар күні. Атаулы дата аясында «Ақ босаға» әйелдер қоғамдық бірлестігі мен Үкіметтік емес ұйымдардың ресурстық орталығының&nbsp;бірлесе ұйымдастыруымен 7 мамыр – Отан қорғаушылар күніне орай мерекелік құттықтау шарасы өтті.Шекарамыз шегенделіп, тәуелсіз ел атанамын дегенше талай бұралаң жолдар мен өткелі қиын, өкпегі көп кезеңдерден өткеніміз тарлан тарихтан белгілі. Миллиондаған халқы болса да мемлекетсіз, табан тірер туған топырақсыз жүрген ұлттар қаншама. Қанға біткен қайсар мінез бен ұлттық рухты асқақтатқан ержүрек батыр бабалар мен бүгінгі қуатты армиямыз егемен елдің еңсесін биіктетіп келеді.Айбынды мерекеге орай ұйымдастырылған шараға аймақтың бірқатар азаматтық сектор өкілдері, мемлекеттік орган қызметкерлері, мүмкіндігі шектеулі азаматтар мен жастар қатысты. Жиында аймақтың азаматтық саласында жастар бойында патриоттық тәрбие қалыптастыру бағытында еңбек етіп жүрген ардагерлерге арнайы қоғамдық даму басқармасы басшысының құттықтауы табысталды. Сонымен қатар «Ақ босаға» қоғамдық бірлестігінің атынан алғыс пен сый-сияпат ұсынылды.Сонымен қатар, шараға «Самұрық» инновациялық идеяларды дамыту орталығы» қоғамдық қорының жанындағы шығармашылық үйірме өнерпаздары қатысып, домбырамен күй шертіп, өз өнерлерін ортаға салды. Жиын соңында ардагерлер ел азаматтарын мерекемен құттықтап, шара ұйымдастырушыларына ерекше алғыс айтты.

Азат елдің айбары – айбынды әскер

<a href="https://kyzylorda-news.kz/">Kyzylorda-news.kz</a> Шиелі ауданының шаруалары өткен жылы шілденің ортасында шабындыққа шалғы түсіріп, шөп шабу науқанын қызу жүргізген-ді. Биылғы ұлу жылы да дәл сондай ұлы істерге бастамашы болады деген сенім жоқ емес.Шиелі аудандық ауыл шаруашылығы бөлімінің берген мәліметінше, өткен жылы 92 754 бас – ірі қара, 148 013 бас – қой мен ешкі, 25 768 бас – жылқы, 1705 бас – түйе тіркелген. Енді осынша төрт-түлікті алдағы қыс маусымынан қиналмай шығару үшін 2023 жылы 8978 гектар жерге – мал азықтық жоңышқа, 73 гектарға – жемдік жүгері, 195 гектарға – мал жемдік асқабақ орналастырылған. Өткен жылы мал басына қажетті азық қорын жасақтау мақсатында 36 400 тонна жем, 158 400 тонна шөп пен 32 700 тонна сабан жинау жоспарланыпты. Оған өткен жылғы шөп өнімі мүмкіндік те берді. Соған сай шаруалар уақытты тиімді пайдаланып үлгерді.&nbsp;Өткен жылы 5138 гектар ескі жоңышқаның бірінші орымы ақталып, 18 497 тонна жоңышқа шөбі өндірілген. Нақты болғандай, 2023 жылы Шиелі ауданында жоңышқаның бір данасы – 700-800 теңге аралығында сатылған екен.&nbsp;<blockquote>– Өткен жылы шөп шабу науқанының бірінші орымы ауданда 15 маусымнан басталған. Мал шаруашылығымен айналысатын 379 шаруа қожалық бар. 2022 жылға көз жүгіртсек, қысқы мал азықтық қорына 31 500 тонна – сабан, 34 100 тонна – жем, 149 700 тонна – шөп, оның ішінде 87 400 тонна – табиғи шөп, 62 300 тонна – жоңышқа шөбі дайындалды. Қазіргі таңда шаруашылықтар жем-шөп қорларын жинақтау мақсатында тынымсыз тірлік істеуде, – дейді Шиелі аудандық ауыл шаруашылығы бөлімінің басшысы Мұрат Әшірбеков.&nbsp;</blockquote>Өткен жылы шежірелі өлкеде алғашқылардың бірі болып Бестам ауылындағы Балтабай Қошқаровтың «Бестам Елі» шаруа қожалығының еңбеккерлері шабындыққа орақ салыпты. Құрылғанына 10 жыл болған қожалықта қырық қызметкер еңбек етеді. 2022 жылы аталған шаруа қожалық 50 гектарға – жаздық бидай, 50 гектарға – жаңа жоңышқа, 170 гектарға – ескі жоңышқа, 30 гектар жерге – мақсары, 250 гектарға – «Лидер» тұқымын сеуіп, 60 гектар жерге – бақша өнімдерін еккен. Ал өткен жылғы жоспарға сәйкес күрішті – 300 гектарға, мақсарыны – 30 гектарға, жаздық бидайды – 30 гектарға, ескі жоңышқаны – 170, бақша өнімдерін – 50 гектарға орналастырған.&nbsp;«Бестам Елінің» жылдағы жоспары бойынша жоңышқа 3 рет орылады. Сонымен қатар меже бойынша 170 үлескер отбасыға егістік алқабын дайындап, күріш, жоңышқа шөбі шаруа қожалық есебінен тегін таратылады. Одан бөлек, дала төсінде еңбек етіп жүрген жұмысшылар жатын орын, ыстық тамақпен толықтай қамтамасыз етілген. Жұмысшылардың айлық жалақысына келер болсақ, қай-қайсысы болмасын 100 мыңнан кем алмайды.&nbsp;<blockquote>– Қазір жұмыс істеймін деген білікті мамандарға кез келген салада сұраныс көп. Бізде техникаға жақын, іскер, білімді жастарды жұмысқа тартып, оларға әлеуметтік көмек көрсету жолдары да қарастырылған. Қазір сенделіп жүрген жастар көп. Оқуын оқып, қолына дипломын алады да, түнгі көшені кезіп, таң атқаннан кеш батқанға дейін ұйықтайды. Солай жүгенсіз жүрген бірнеше баланы жұмысқа шақырып едім, бәрі ат тонын ала қашты. «Жеңілдің астымен, ауырдың үстімен жүретін» жастарға қарап қайран қаласың. Бір нәрсені үйренейін, келешек нәпақамды маңдай термен табайын демейді. Бәрінің аңдығаны, ойлағаны – оңай олжа, қызық, думан. Киелі мекеннен шыққан екі мәрте Социалистік Еңбек Ері Ыбырай Жақаев атамыз да табысқа осы ЖерАнаны ему арқылы, ерен еңбектің арқасында қол жеткізді. Сондықтан қазіргі жастарға айтарым, ауыр жұмыстан қашпай, шаруашылықта атқарылатын жұмыстарды үйрене бергені абзал. Алдағы уақытта жеке шаруа ашса да өзіне пайда, жұмыс істесе де өзіне пайда, – деді Балтабай Қошқаров.&nbsp;</blockquote>Бұл шаруа қожалықта тәжірибелі мамандар еңбек етеді. Майталман механизаторлар Е.Бабыр, С.Арысбаев, С.Жарасбаев, Б.Қожаев, Ә.Байжанов, Р.Саханов, Ә.Досманов сынды азаматтар мәртебелі мамандықты меңгергенін өлшеусіз еңбектерімен дәлелдесе, аталған қожалықтағы белді күрішшілер сапындағы Сейітбек Жарылқасынов, Нұртуған Ортаев, Ағыбай Досмановтар табанды еңбек етуде. Сонымен қатар егістікке қажетті Беларусь МТЗ-80, МТЗ-1221, К-700, «MacDon» сияқты алып техникалар жүйелі жұмыс істеуде. Сондай-ақ бұл күнде шаруа қожалықтың қызметкерлері жұмыстың қиындығына қарамастан, сөзге беріктік пен еңбекке ептіліктің арқасында шаруашылықтың берекесін арттырып отыр.&nbsp;Бір сөзбен айтқанда, «Бестам Елінің» қысқа дайындығы қарқынды жүріп жатыр. Енді тек мол етіп мал азығын қамдау үшін, аудан шаруаларының көсіліп еңбектенуі үшін ауа райы мұрсат берсе болғаны. Себебі жаздың әрбір ашық күні – қыстың бірнеше күніне кепіл болмақ.

Шөбі шүйгін, малы қоңды Шиелі

<a href="https://kyzylorda-news.kz/">Kyzylorda-news.kz</a> Бейбіт елдің тыныштығын бұзып, астан-кестеңін шығарған сұм соғыс. Ананы баласынан, баланы әкесінен, бауырды бауырынан айырған &nbsp;қасіретті жылдар ұмытыла ма? Еңбектеген баладан еңкейген қартқа дейін тылда ауыр еңбек етіп, соғыс майданындағы жауынгерлерге қолдарынан келген көмегін аямады. Елдің басына қара бұлт үйіріп, қан қақсатқан, миллиондардың өмірін жалмап, тозаққа айналдырған Ұлы Отан соғысының жеңіспен аяқталғанына да 80 жылға жуықтапты. &nbsp;Уақыт төрелігімен тән жарасы жазылса да жан жарасы әлі жазыла қойған жоқ. Майданнан келген үшбу қарақағазға сенбей, осынша жыл өтсе де, сол ұрыс даласында шейіт болған немесе із-түзсіз жоғалып кеткен әке-ағалардың артында қалған ұрпақ, бауырлары бір хабары шығып қалар ма екен деп бүгінгі күнге дейін үмітін үзбей келеді.&nbsp;Осыбір аты жаман, жан дүниені түршіктірер алапат соғысқа 15 республикадан құралған Кеңес одағы құрамында Қазақстан да қатысты. Оның ішінде біздің облыс, ауданымыздан да мыңдаған азаматтар соғысқа аттанып, жау шебінде болашақ ұрпағы жолында жан алысып, жан берісіп ерен ерліктің үлгісін көрсетті.&nbsp;Қасіретті жылдары майданда да, тылда да бүкіл ел болып бір жеңнен қол, бір жағадан бас шығарып, ұйымшылдықпен «Бәрі де майдан үшін! Бәрі де жеңіс үшін!» ұранымен жұмылған жұдырықтай бірігіп, жауға тойтарыс берді. Кейбір мәліметтерге сүйенсек, Кеңес әскерінің қатарына шақырылған 1 млн 200 мың қазақстандықтың қатарында Қармақшы ауданынан 5 мыңға жуық жауынгер сұрапыл соғысқа аттанған. Олардың 2 мың 507-сі хабарсыз кетсе, 1 мың 205-і соғыстан оралмаған боздақтар қатарына енген. Елге аман-есен оралғандары соғыстан кейінгі елді қайта қалпына келтіру жұмыстарында бейбіт заманның еңбеккерлеріне айналды.&nbsp;Майдан даласында қиян-кескі ұрыстар жүріп жатса, еңбек майданында да бала-шаға, қариялар мен аналар тынымсыз жұмыстар жүргізді. Соғыстың алғашқы жылдарының өзінде-ақ ауыл шаруашылығы саласында жұмыс қолының тапшылығы байқалды. 1941 жылы қазанда қалалық Пионерлер үйінде Қызылорда еңбекші әйелдерінің фашизмге қарсы митингісі өтті. Онда майданның негізгі тірегі саналатын тылдағы еңбекті күшейту, ауылдарға көмекке баруға үндеу жасалды. Түрлі мамандықты игерген қыз-келіншектер ерлермен бірдей иін тіресіп, Отанның игілігі үшін маңдай терлерін төкті. Қызылорда қаласы қыздарының бастамасымен ашылған шоферлар курсының алғашқы түлегінің бірі, трактор мен комбайн тізгіндеген Ұлбосын Қосымова соғыс жылдары Ақжар МТС-інде жұмыс істеді. Майданға аттанған ер-азаматтардың орнын жоқтатпай, тылдағы тірліктің түтінін түтеткен трактор тізгіндеуші – қармақшылық қыз-келіншектер қатарында &nbsp;Боршан Бексебаева, Күлән Жахатаева, Балтай Тасманбетова, Болшан Жанәділова, Күлпаш Ізбасқановалардың болғанын мақтанышпен атай аламыз. Ауданда темір тұлпар-трактор тізгіндеген, отар-отар қой баққан, бейнеттің ортасында жүріп те ұрпақ бойына ілім-білім таратудан тартынып қалмаған кітапханашы, мұғалім қыз-келіншектердің бір шоғырын халық «Бозарықтың қырық қызы» деп құрметпен атағаны баршамызға мәлім. &nbsp; 1943 жылы майдандағы қазақ жауынгерлеріне хат жазып, рухтандырған сырбойылық аналардың арасында Қармақшы механикалық зауытының стахановшысы Қ.Жүзжасарова да болды. «Қазақстанның ардақты ұлдары! Құрметті балаларымыз, ерлеріміз бен туысқандарымыз!» деп мейірім сөздеріне толы хатта қазақ жауынгерлерінің сырбойылық аналар мен әпке-қарындастары жауды күйрете жойып, елге аман-есен жеңіспен оралатындарына сенім білдірген еді.&nbsp;Басқа қанша қайғы-қасірет түскенімен қармақшылық әйелдер аналар мен балаларға, отбастарына ғана емес, сонымен қатар ауыл-аймақ, еліне де иелік етіп, бас-көз бола білді. Олардың қатарында «Ақбел» ұжшарының төрағасы болған Ақорын Тілеубаева, Тән Түменбаева, Әлима Наурызбаева, Әлия Оразбаева, Жұмагүл Әділова, Дәме Жұбаевалардың есімдерін құрметпен атауға болады. Ақын Пал Баймаханова халықтың рухын жырмен көтерсе, Рабиға Шалабаева партия ісіне белсене араласты. Ауданның саяси-қоғамдық дамуына атсалысты.&nbsp;Ауыл азаматтарының өз қолымен салынған Абыла жел диірмені қиын-қыстау кезеңде халықтың игілігіне асты. Сонау сұрапыл жылдардың естелігіндей болған жел диірмені бүгінде тарихи орынға айналып, &nbsp;мемлекет қорғауына алынған. Сонымен қатар мемлекеттік қорғаныс комитетінің қаулысына сай, Жосалы механикалық зауыты 82 миллиметрлік шойын миналар жасайтын болды. Зауыт түсті металл шығарудан жылдық жоспарды 1943 жылы 110 пайызға, 1944 жылы 130 пайызға орындаса, ұжымнан 30-ға жуық стахановшы-озат еңбеккер шықты. Одан бөлек, аудан халқы майданға деп, астық, жылы киімдер жөнелтіп отырды. 1943 жылы облыстық «Ленин жолы» газетінде Қызыл әскер қорына өз есептерінен артығымен астық өткізген колхозшылардың есімдері жарияланды. Олардың арасында ауданымыздың «Бидайкөл» ұжшарының төрағасы Ысқақ Дәлібеков, «Қызыл әскер» ұжшарының төрағасы Қали Бексебаев, «Бозарқаш» ұжшары бастауыш партия ұйымының хатшысы Байғабылова, Жаңажол ұжшарының төрағасы Тәжібаев, Энгельс атындағы ұжшардың төрағасы Шәди Түйімбетов және Ленин ауылдық кеңесі атқару комитетінің төрағасы Табынбаев, Чапаев атындағы ұжшардың төрағасы Ыбырай Сейтеновтердің есімі аталады. &nbsp;Сындарлы уақытта майданға жіберілген азық-түлік өнімдерін дайындауда қармақшылық диқандар мен шопандардың &nbsp;жанқиярлық еңбектерін атап айтпай кету мүмкін емес. Олардың қатарында қарт диқан Бисенбай Кеңесбаев, шопандар Адамқайыр Бисенбаев, Айсұлтан Отарбаев, Әбдібай Есіркепов, Омар Сүлеевтер ет, сүт дайындау жоспарын асыра орындап, ерен еңбек өнегесін көрсетсе, тылдағы аудан халқы майданда қаза болған, соғыстан мүгедек болып оралған майдангерлердің отбасыларын назардан тыс қалдырмады. Қара жамылған отбасыларына, мүгедек, жетім-жесірлерге қамқорлық қолын созды. &nbsp;КСРО Халық Комиссарлар Кеңесінің 1943 жылдың 25 қыркүйектегі №1049 қаулысы негізінде Еңбекші депутаттардың облыстық атқару комитетінің №207 өкімімен еңбек резервтері желісінде трактор механиктерін дайындау үшін облыс аудандары мен МТС-нен 10 &nbsp;трактор жүргізушісі мен бригадирлерді Оңтүстік Қазақстан облысының Еңбек резерві басқармасының қарауына берілді. Аталған 10 тракторшының арасныда біздің аудандағы Ақжар МТС-нің 1 тракторшысы болды. Қазақстандағы мұнай өңдеу кәсіпшілігіне жұмылдырылған 300 адамның 30-ы қармақшылық болатын. Одан өзге Еңбекшілер депутаттарының облыстық атқару комитетінің 1943 жылдың 22 маусымындағы қала және ауылдарда жұмыс істейтін тұрғындарды Қарағанды көмір бассейнінің шахталары мен құрылыстарына жұмыс істеуге мобилизациялау туралы №15 қаулысына сай, облыс бойынша 950 адам жұмылдырылса, оның 150-і біздің ауданынан қамтылды. Осы жылы Свердловск қаласындағы электростанса құрылысына ауданнан 45 адам жіберілді. &nbsp;&nbsp;Айта берсек, өңірдің Ұлы Отан соғысының жеңісіне қосқан үлесі ұшан-теңіз. Соғыс майданында аудан азаматтары ерлік істерімен көзге түсті. Облыс бойынша Кеңес Одағының Батыры атағын алған 20 қаһарманның қатарында қармақшылық Тәйімбет Көмекбаев болса, жерлестеріміз Смағұл Ысқақов, Тиыштыбай Ешмұратов, Әбдірауық Сатыбалдиев, Ідіріс Тұрмағамбетов, Сәдібек Әйекенов, Қалмырза Жарманов, Әлімбай Әлиасқаров, Әбзали Егізбаев, Шәкіман Бектібаев, Ұлы Отан соғысына бастан-аяқ қатысып, жеңісті жақындатқан ержүрек батырлар болды.&nbsp; &nbsp;

Қармақшы ауданының Ұлы Отан соғысына қосқан үлесі 

Сырдариялық 37 сарбаз әскерге барады

<a href="https://kyzylorda-news.kz/">Kyzylorda-news.kz</a>&nbsp; Арада 79 жыл өтсе де соғыстың тақсіреті әлі күнге дейін жүректерде өшкен жоқ. Талай боздақ майдан даласында жер жастанса, талайы мүгедек болып оралды. Қаншасы хабар-ошарсыз кетті. Қаншасының артында ботадай боздап жақындары қалды. Ел басына туған қаралы жылдарды сөзбен айтып жеткізу мүмкін бе?!«Тау алыстаған сайын, биіктей түседі» дейді. Миллиондардың өмірін қиып, бейбіт өмірлерінің шырқын бұзған қасіретті жылдар қанша алыстағанымен соғыс салған жара қазірге дейін жазылмады. Осынша жыл өтсе де, із-түзсіз кеткен әке, аға-бауырларының бір хабарына зар болған адамның санында шек бар ма?! Олардың кейбірі халықаралық архив құжаттарынан мәлімет тауып, жат елде қалған жақындарының басына бір уыс топырақ салып, мауқын басса, талай жан арманын алға тартып, үмітпен өмір сүріп келеді. Ұрпақ болашағы үшін кеудесін от пен оққа төсеген батыр бабаларымыздың қасиетті есімдері тарихтан ешқашан өшпек емес. &nbsp;&nbsp;Жылдағы дәстүрмен батыр бабалардың рухына тағзым ету мақсатында бейсенбіде Қармақшы ауданының орталығындағы «Тағзым» алаңында 9 мамыр – Жеңіс күніне арналған салтанатты іс-шара өтті. Оған тыл ардагерлері, аудан тұрғындары мен аға, жас ұрпақ өкілдері қатысып, батыр әке, аталардың рухына тағзым етті.Мерекеде Қазақстан Республикасының Мемлекеттік әнұраны ойналды. &nbsp;Одан соң аудан әкімі Жандос Еркінбек тұрғындарды Жеңіс күнімен құттықтап, игі тілегін жеткізді.&nbsp; – Қармақшы ауданынан соғысқа 5 мыңға жуық азамат қатысса, олардың 563-і ғана елге аман-сау оралған. 2507-сі хабарсыз кетсе, 1250-і соғыстан келмегендердің қатарына енген. Біз әкелеріміз бен аталарымыздың жанкешті ерлігін ешқашан ұмытпаймыз. Батыр бабаларымыздың жауынгерлік жолдары, ерлік рухы кейінгі ұрпақтарын, бүгінгі жас Отан қорғаушыларды әрқашан асқақ арман-мұраттар мен ерлікке бастап келеді. Тыл еңбеккерлері де Жеңісті жақындатуға өлшеусіз үлес қосты. Сондықтан әрдайым ардагерлерімізді ардақтап, Отан үшін опат болған ерлердің рухына тағзым етеміз, – деді аудан басшысы Жандос Еркінбекұлы.&nbsp;Салтанатта &nbsp;ұрпақ болашағы үшін қанқұйлы соғыс жылдарында ерлік көрсеткен қаһармандар құрметіне 1 минут үнсіздік жарияланып, «Мәңгілік алау» монументіне шоқ шоқтары қойылды.&nbsp; &nbsp;

Қармақшыда Ұлы жеңіс күні аталып өтілді

<a href="https://kyzylorda-news.kz/">Kyzylorda-news.kz</a> Қасиетті топырағымыз саналы ұрпақ пен саялы азаматтарға кенде емес. Десе де, олардың әрбірінің қоғамнан ойып алар өз орыны, ерекшелігі бар. Бірі – өнер саласында құлашын кеңге жайса, бірі – ғылым-біліммен өмірін сабақтастырған. Келесі бірі еңбек жолын ел басқару ісіне арнап, оның дамуына қомақты үлесін қосып жүрсе, бір азаматтарымыз Отан қорғау ісінде адалдығымен көзге түсуде. Солардың қатарынан ауданның ғана емес, Сыр елінің мақтанышына айналған арда азамат Бақыт Құрманбаевтың есімін құрметпен атаған болар едік.&nbsp;Бақыт Жанұзақұлы бала кезінен ілім-білімге қанық өсті. Ата-анасы мен мектептегі ұстаздарының берген тәлім-тәрбиесі оған құт болып қонды. Сол кішкене күнінен-ақ тазалық пен тәртіпті жанына серік етіп ер жетті. &nbsp;Болашақ генерал 1970 жылы Өскемен қаласында дүниеге келді. &nbsp;Жосалы кенті орталығындағы Кеңес Одағының Батыры Т.Көмекбаев атындағы №250 мектеп-лицейінен орта білім алды. Алғашқы еңбек жолы сол мектеп бітірген жылы ДЭУ-228 мекемесінде жұмысшылықтан басталған. 1993 жылы әл-Фараби атындағы Қазақ Мемлекеттік Ұлттық университетін тәмамдап, осы жылдар аралығында Алматыда орта мектептердің бірінде физика пәні мұғалімі болып, балаларды білім нәрімен сусындатты. 2005 жылы Ресей Федерациясы Құрлық әскерлері әскери әуе шабуылына қарсы қорғаныс әскери академиясында білім алса, 2008 жылы Ресей Федерациясы Қарулы Күштері Бас штабы Әскери академиясының Жоғары академиялық курсын бітіріп шығады. Әскери салаға өмірін арнаған жас азаматтың қызмет жолы Ұшыру қондырғысы взводының командирі, зениттік зымыран батареясының командирі, зениттік зымыран полкі командирінің қару-жарақ бойынша орынбасары – техникалық бөлімнің бастығы лауазымымен жалғасады. &nbsp;Бақыт Құрманбаев Қазақстан Республикасы Қарулы Күштерінде қызмет атқарған кезінде әріптестерінен жоғары кәсіби шеберлігімен және ауқымды да іскерлік тәжірибесімен ерекшелене білді. Әскери салада қондырғыларды қосу взводының, зениттік-зымыран батареясының командирінен бастап әр жылдары Әскери•академияның тыңдарманы, &nbsp;Қазақстан Рес­публикасы Қорғаныс министрлігінің штабтар басшыларының комитеті Департаментінің аға офицері, бөлім, басқарма бастығы секілді қызмет жолдарынан өтті. 2009-2010 жылдары Қазақстан Республикасы Қауіпсіздік Кеңесі Хатшылығының инспекторы, 2010-2017 жылдары Қазақстан Республикасы Қорғаныс министрлігінің Департамент бастығының орынбасары, бастығы қызметтерінде болды. Сонымен қатар Қазақстан Республикасы Қауіпсіздік Кеңесі әскери қауіпсіздік және қорғаныс бөлімінің меңгерушісі лауазымын абыроймен атқарды. Оның әскери саладағы елге сіңірген ерен еңбегі ескеріліп, 2017 жылы Қазақстан Республикасы Президентінің Жарлығымен оған «Генерал-майор» әскери атағы берілді.&nbsp;Әскери саланы біркісідей жетік білетін жерлесіміз 2019 жылы Қазақстан Республикасы Қорғаныс министрінің орынбасары болып тағайындалды. Ол материалдық-техникалық қамтамасыз ету, қорғаныс өнеркәсіп кешені мен өзара іс-қимыл жасау, қару-жарақ және әскери техника, сондай-ақ тылдық және медициналық қамтамасыз ету мәселелеріне жетекшілік етіп, бұл жұмыстарды зор жауапкершілікпен атқарды.&nbsp;«Ер жігіт қиыншылықта сыналады» дегендей, Бақыт бауырымыз Арыс қаласындағы төтенше жағдай салдарын жоюда айтарлықтай үлес қосып, төтеннен келген пандемиямен күрес кезеңінің алғашқы күндерінен бастап коронавирустың таралуына қарсы іс-шараларды ұйымдастыру мен қамтамасыз етуге белсенді атсалысты. Бақыт Құрманбаев қызмет атқарған кезеңдерде II-дәрежелі «Айбын» және «Данқ» ордендерімен, бірқатар медальмен марапатталды.Ол өзі таңдаған мамандықтың білгір маманы болумен қатар, отбасында асқар тау әке, адал жар болды. Жары Роза Жамбылқызымен &nbsp;Руслан, Диана есімді ұл-қыз тәрбиелеп өсірді. Олар бүгінде Қазақстанның өсіп-өркендеуі жолында адал қызмет етіп жүр. Немерелері Эмир, Демир ер жетіп, өсіп келеді.&nbsp;Бақыт Жанұзақұлы небәрі 50 жасында, яғни 2020 жылы &nbsp;мезгілсіз өмірден өтті. Оның еліне бергенінен берері көп болатын. Амал қанша? Асыл ер, арда азаматтың есімі жерлестерінің есінде ұзаққа сақталмақ.&nbsp; &nbsp;

Ауылды ардақтаған арда азамат

<a href="https://kyzylorda-news.kz/">Kyzylorda-news.kz</a> Сол бір сұм соғыс жылдарындағы отты күндер адамзат санасынан еш өшпек емес, себебі оның құндылығы ғасырлар бойы жаңа жас буын ұрпаққа өсиет. Жеңісті жақындатқан жауынгер аталарымызға қандай құрмет көрсетсекте лайықты. Айбынды білектерімен Отан үшін бар күштерін сарқыған кешегі жігіттер бүгінгі, өнегелі майдангерлерді ардақтау-абыройлы міндет. Міне, кешегі бейбіт аспанды кейінгі ұрпақ үшін киелі болсын деп қан-майданға аттанған жауынгердің бірі – Нұрман Асанов. Биыл Бесарық ауылында Жеңістің 79 жылдығын қарсы алған майдангер атамыздың хал-жағдайын біліп, тілдесіп қайтқан едік.Біз сөз еткелі отырған тұлғаның болмыс бітімі бекзаттықпен өрілген. Батагөй ақсақал. Бүгінде тоқсанның төріне шыққан төбе би. Сонау отты жылдардан аман-есен оралып, елдің еңсесін тіктеуде еңбегі ерен. Ел алдында беделі биік. Тоқсан төрт жастағы қарияның қан майдандағы отты жылдары әлі көз алдында.<blockquote>«Тағдыр жазды, аман оралдық, еңбекке араласып, ел игілігіне жұмыс жасадық. Шайқастан аман шыққаным өң мен түстің арасы секілді. Ал, қабатында майдандасыңның қаны төгіліп жатады» – деп әңгімесін бастады майдангер атамыз.</blockquote>1942 жылы Кеңес әскерінің қатарына алынған жас Нұрман бүгінгі Жамбыл облысына қарасты Луговой ауданында №51 Авиация училищесінде алты ай бойы әскери өмірдің қыр-сырына қанығып, «әуе шабуылының атқышы» деген тілдей қағазға ие болады. Тағы да алты ай Ашхабадта әскери шеберлігін шыңдайды. Осылайша, 1943 жылы Тула қаласындағы 300-дивизия құрамымен қан майданның ортасына түседі. Онда 904-әуе полкының атқышы болып Гомель, Польша қалаларын азат етуге қатысады. Бұдан бөлек 173-шабуылдаушы авиация полкінде және 16-әуе-десант әскері құрамында болған.Бүгінде бейбітшілік заманның берекесін тілеп отырған майдангер қарияның әрбір сөзі өскелең өренге өнеге.&nbsp;<blockquote>«Шырақтарым қазіргі күніме мыңда бір шүкіршілік етемін. Тәуелсіз елміз. Бейбіт өмірде, ынтымағы жарасқан жерде ғұмыр кешудеміз. Кейінгі ұрпақ осы тыныштықтың қадірін білсе игі», – деді майдангер ақсақал.</blockquote>Сұрапыл соғыстағы ерен еңбегі еленіп «Варшаваны азат еткені үшін» және Гомелді азат етуге қатысқаны үшін «Қызыл жұлдыз» ордені, «Берлинді алуға қатысқаны үшін» медальімен наградталған. Оған қоса, «Ұлы Отан соғысының І-ІІ-дәрежелі, «Суворов», «Жеңіс күні», «Жуковтың 70 жылдық» медальдары тағы бар.Майдан даласынан әуе атқышы болып елге оралған Нұрман Асанұлы туған жер топырағы Талап кеңшарында ауыл шаруашылығы саласында абыройлы қызмет еткен. Ия, осындай батыр аталарымыздың өмір жолы өскелең ұрпақты ұлтжандылыққа, Отанды сүюге тәрбиелеуге өнеге болары сөзсіз. Жеңіс жолын жақындатқан жауынгер аталарымыздың Жаратқан күш-жігерлерін арттырып, жасампаз еліміздің жарқын істерінің куәсі болып, ортамызда аман-есен жүре берулеріне тілекшіміз. Расында ардақты ардагерлеріміздің ерлігін үнемі жадымызда жаттап, олардың тарихи тағылымын есте ұстау-бүгінгі ұрпақтың басты міндеті. <img src="https://knadmin.beoblood.kz/uploads/39982aa6_699e_46fd_bc98_5b31c96b4ba1_7e0217c770.jpg" alt="39982aa6-699e-46fd-bc98-5b31c96b4ba1.jpg">

Қазақстан және Қызылорда облысының жаңалықтары: Қоғам