<a href="https://kyzylorda-news.kz/">Kyzylorda-news.kz</a> Енді eGov.kz порталына электрондық цифрлық қолтаңбамен кіру үшін азамат&nbsp;жеке тұлғасын қосымша растау керек.&nbsp;Қазан айынан бастап eGov.kz порталы мен оның сервистерінің, соның ішінде eOtinish және “Ашық үкімет”&nbsp;жүйелерінің пайдаланушылары жаңартылған тәсілмен авторизациядан өтеді.&nbsp;Бұл туралы&nbsp;<a href="https://stan.kz/egovkz-portalina-kiru-tartibi-ozgerdi-1414-ten-sms-kod-424632/">Stan.kz&nbsp;</a>ақпарат агенттігі хабарлайды.Азамат порталға ЭЦҚ арқылы кіргеннен кейін пайдаланушы жеке басын 1414 қысқа нөмірінен келетін SMS-код арқылы қосымша растауы керек. “Ұлттық ақпараттық технологиялар”&nbsp;АҚ мәліметінше, бұл екінші кезеңі бөгде адам&nbsp;ЭЦҚ-ға қол жеткізген күннің өзінде рұқсатсыз кірудің алдын алуға мүмкіндік береді.Код тек пайдаланушы өз жеке кабинетімен алдын ала байланыстырған нөмірге ғана жіберіледі. Егер нөмір тіркелмеген болса, SMS хабарлама келмейді. Ал шетелде жүргендерге 1414 нөмірінен хабарламалар тек халықаралық роуминг қосылған жағдайда ғана жетеді.SMS-кодтың орнына eGov Mobile қосымшасын пайдалануға болады. Бұл жағдайда сайттағы QR-кодты сканерлейсіз.<blockquote>“ЭЦҚ-ны басқа адамдарға беруге болмайды. Электрондық қолтаңба — бұл жеке құрал және ол тек иесінің иелігінде болуы тиіс”, –&nbsp;дейді &nbsp;“Ұлттық ақпараттық технологиялар”&nbsp;АҚ.</blockquote>Заңды тұлға атынан құжаттарға тек ұйым басшысы немесе ресми сенімхат алған қызметкер қол қоя алады, бірақ әрқайсысы өзінің жеке ЭЦҚ-сын қолдануға міндетті. Сенімхат өкілеттікті растайды, бірақ электрондық кілттің өзін алмастырмайды.ЭЦҚ-ны дұрыс пайдаланбағаны үшін әкімшілік айыппұлдар қарастырылған:<ul><li style="text-align:justify;">Жеке тұлғаларға – 50 АЕК (196 600 теңге);</li><li style="text-align:justify;">Лауазымды тұлғаларға, шағын бизнес пен ҮЕҰ-ларға – 100 АЕК;</li><li style="text-align:justify;">Орта бизнеске – 150 АЕК;</li><li style="text-align:justify;">Ірі бизнеске – 200 АЕК.</li></ul>&nbsp;Фото: eGov.kz

eGov.kz порталына кіру тәртібі өзгерді: 1414-тен SMS код керек

<a href="https://kyzylorda-news.kz/">Kyzylorda-news.kz</a> Қызылорда қаласының Қазақстанның астанасы болғанына биыл 100 жыл толып отыр. Осы мерейлі дата аясында «AMANAT» партиясы Қызылорда қалалық филиалында «КІТАП-AMANAT» жобасы шеңберінде «Тарих тұғыры – Қызылорда. 100 жылдық шежіре» атты кітап көрмесі ұйымдастырылды.Іс-шараның мақсаты – Сыр өңірінің бай тарихын, рухани мұрасын және ел дамуына қосқан үлесін кеңінен насихаттау, сонымен қатар жастар арасында кітап оқуға деген қызығушылықты арттыру.Көрменің салтанатты ашылуына партияның облыстық филиалының атқарушы хатшысы Ләйлә Төрешова &nbsp;және партияның қалалық филиалының атқарушы хатшысы Гүлшат Мұсаева қатысты.Іс-шара барысында қонақтарға Сыр елінің әсем әндері мен ұлттық күйлері ұсынылып, көрменің рухани мазмұнын байыта түсті.&nbsp;Сондай-ақ, қатысушыларға Қызылорданың тарихына қатысты қызықты блиц-сұрақтар қойылып, жеңімпаздарға естелік сыйлықтар табысталды.Көрмеде Қызылорда облыстық Ә.Тәжібаев атындағы әмбебап ғылыми кітапханасының қызметкерлері &nbsp;Сыр өңірінің өткені мен бүгінін сипаттайтын, өңір тұлғаларының өмірі мен еңбегін қамтитын құнды кітаптар топтамасын көпшілік назарына ұсынды.Іс-шараға қатысушылар қала тарихына арналған мұндай жобалардың маңыздылығын атап өтіп, кітап оқу мәдениетін қалыптастыру – елдің рухани дамуының басты кепілі екенін айтты.

«Тарих тұғыры – Қызылорда. 100 жылдық шежіре» атты кітап көрмесі өтті

Бүгін Қызылордадағы М.Мәметова атындағы педагогикалық жоғары колледжінде «Тіл және әдебиет контексіндегі құндылықтар жүйесі: трансформациясы және заманауи әдістемелік ізденістер» тақырыбында халықаралық &nbsp;ғылыми-тәжірибелік конференция өтті. &nbsp;Конференция ҚР Білім беру ісінің үздігі, ҚР Білім беру ісінің құрметті қызметкері, еңбек ардагері Тазагүл Сейтжанқызының туғанына 80 жыл толуына арналды. Т.Сейтжанқызының өмірі мен шығармашылығын дәріптеу, ХХІ ғасырдағы қазақ филологиясының жетістіктері мен алдағы келелі мәселелерін, &nbsp;қазіргі қазақ тіл білімі мен әдебиеттанудың теориялық, практикалық, әдістемелік мәселелерін, тіл мен әдебиетті оқытуда жасанды интеллектінің мүмкіндіктерін зерделеу мақсатында өткен конференцияда көршілес Түркия, Қытай республикасынан zoom платформасы арқылы ғалымдар қосылды.&nbsp;<img src="https://knadmin.beoblood.kz/uploads/IMG_20251011_WA_0025_b3bbd4072a.jpg" alt="IMG-20251011-WA0025.jpg"> Қорқыт Ата университетінің Құрметті профессоры, Қазақстанның еңбек сіңірген қайраткері, Түркия, “Қазақстан мәдениет және сауда орталығының” басшысы, Қазақстанның Ыстамбұлдағы алғашқы консулы Уәйіс Ержан Убайдаұлы Т.Сейтжанқызы жайында ұлағатты естеліктерімен бөлісті. ҚХР Бейжің қаласындағы Орталық Ұлттар университетінің доценті, PhD Айнұр Әбіш «Қазақ халқының көшпелі өмірі және ұлттық құндылықтары» тақырыбында баяндама жасады. Әл-Фараби атындағы ҚазҰУ профессоры, филология ғылымдарының докторы Гүлдархан Нұрғазықызы «Қазақ мәдениетіндегі құндылықтар әлемі»; әл-Фараби атындағы ҚазҰУ профессоры, филология ғылымдарының докторы Салқынбай Анар Бекмырзақызы «Абай іліміндегі “түсіну – меңгеру – тану” қалыбы» тақырыбында баяндама оқыды.&nbsp; Медицина ғылымдарының кандидаты, Қазақстанның еңбек сіңірген қайраткері, Қызылорда облысының Құрметті азаматы, еңбек ардагері &nbsp;Тұрғанбай Маханов, педагогика ғылымдарының кандидаты, Қазақстанның еңбек сіңірген қайраткері, ҚР Білім беру ісінің құрметті қызметкері, Қызылорда облысының Құрметті азаматы Әлима Жақыпқызы, Қорқыт Ата атындағы Қызылорда университетінің қауымдастырылған профессоры, филология ғылымдарының кандидаты Күлдірсін Сейтжанқызы Тазагүл ұстаздың ұстанымы мен азаматтық болмысын әңгімеледі. Пленарлық мәжіліс соңында Т.Сейтжанқызы жайлы «Дария ғұмыр» кітабының тұсаукесер рәсімі өтті. &nbsp; Конференцияның халықаралық дәрежеде өтуіне атсалысқан және мазмұнды да мағыналы, салиқалы да сындарлы сөзін арнаған Ержан Убайдаұлына және онымен бірге zoom платформасына қосылып, семинарға қатысқан қазақ бауырларымызға ұйымдастырушылар зор алғыс білдіреді.

Ұстазға құрмет: халықаралық ғылыми-тәжірибелік конференция өтті

<a href="https://kyzylorda-news.kz/">Kyzylorda-news.kz</a> Қызылорда облыстық «Славяне» қоғамдық-мәдени орталығының жетекшісі, қоғам қайраткері Щербакова Галина Сергеевнаның 70 жасқа толған мерейтойына арналған салтанатты іс-шара өтті.Мерейтой облыс әкімдігінің ғимаратында ұйымдастырылып, шараны облыстық қоғамдық даму басқармасының басшысы Каюпов Руслан Мұхамедәліұлы жүргізді.Кездесу барысында сөз алған басқарма басышысы мерейтой иесінің өңірдегі қоғамдық келісім мен бірлікті нығайту ісіне қосқан зор үлесін атап өтті. Ол Галина Сергеевнаның білім саласындағы қажырлы еңбегі мен этносаралық татулықты насихаттаудағы белсенді қызметі жас ұрпаққа үлгі екенін атап өтіп, облыс әкімі, облыстық Қазақстан халқы Ассамблеясының төрағасы Нұрлыбек Нәлібаевтың атынан құттықтау хатын табыстады.Салтанатты басқосуда неміс этномәдени бірлестігінің төрайымы Ирина Шек, ҚХА ардагері Асылбек Жұмабаев, сондай-ақ облыстық Ассамблея ардагері Рахима Ахметова, Шешен эмб төрағасының орынбасары Лайла Пашаева және Славяне орталығының белсенділері мерейтой иесіне жылы лебіздерін білдіріп, естеліктерімен бөлісті.Шара барысында Галина Сергеевнаның өңірдегі қоғамдық келісім мен халық достығын дамытуға сіңірген еңбегі ерекше атап өтілді. Ол өз сөзінде туған елі мен ел дамуы жолындағы азаматтарға ризашылығын білдіріп, өзіне көрсетілген құрмет үшін алғысын айтты.Мерейтой иесінің еселі еңбегі мен азаматтық ұстанымы Сыр өңірінің қоғамдық өмірінде ерекше орын алады. Галина Сергеевна жетекшілік ететін «Славяне» орталығы көптеген мәдени, қайырымдылық және ағартушылық шаралардың бастамашысы болып келеді.Шара соңында қатысушылар мерейтой иесіне зор денсаулық, ұзақ ғұмыр, отбасына амандық тілеп, естелік суретке түсті.Фото: Ассамблея Қызылорда

Сыр өңірінде «Славяне» орталығының төрағасы Галина Щербакованың 70 жас мерейтойы аталып өтті

<a href="https://kyzylorda-news.kz/">Kyzylorda-news.kz</a> Арал ауданындада өтіп жатқан мерейтойлық іс-шаралар аясында аудандық мәдениет үйінде «Балық шаруашылығы өндірісінің 100 жылдығына» арналған республикалық ғылыми-танымдық конференция өтті.Аталған жиынға аудан әкімі Аманжол Оңғарбаев төрағалық етіп, саланың маңыздылығына тоқталып өтті. Сонымен қатар, мерейтойға арнайы келген мәртебелі меймандарды таныстырды.Басқосуға Қазақстан Республикасы Ауыл шаруашылығы министрлігінің Балық шаруашылығы комитетінің төрағасы С.Сермағамбетов, Қызылорда облысының табиғи ресурстар және табиғат пайдалануды реттеу басқармасының басшысы Е.Ғалымжан, Ақтөбе облысы Ырғыз ауданының әкімі Н.Қызбергенов, Халықаралық Аралды құтқару қоры атқарушы комитетінің халықаралық қатынастар бөлімінің басшысы Қ.Құлмағамбетов, сонымен қатар облыстық басқармалар, департаменттер, инспекция басшылары, халықаралық ұйымдардың өкілдері мен Астана, Алматы, Қызылорда қалаларынан арнайы келген делегация өкілдері және зиялы қауым өкілдері қатысты.Аудан әкімі Аманжол Сақыпұлы конференция барысында ауданда өтіп жатқан мерейтой қарсаңында аймақ басшысы Нұрлыбек Нәлібаевтың құттықтау хатын көпшілікке оқып беріп, өңір балықшыларына деген арнайы лебізін жеткізді.Талай жыл тірнектеп қызмет еткен жандардың ақ-адал маңдай тері елеусіз қалып жатпағаны белгілі. «Су келсе, тіршілік келеді» деген. Соңғы жылдары «Қамбаш», «Ақшатау» көлдер жүйесі тіршілік нәріне толғанына ел куә. Осы және «Балық шаруашылығын дамыту бойынша қабылданып жатқан шаралар» туралы жиында ҚР Ауыл шаруашылығы министрлігінің Балық шаруашылығы комитетінің төрағасы Серік Сағитжанұлы хабарлама жасады.Арал үшін ғұмырын арнап, теңізді қайтсем толтырам деп жанұшырған жанашыр жандар жетерлік. Олардың есімі әркез ел есінде. Келесі сөзді жалғаған қазіргі аға буын өкілі, балық шаруашылығы саласының ардагері, мемлекет және қоғам қайраткері, Қазақ ССР Балық шаруашылығы министрі қызметін атқарған Құдайберген Саржанұлы «Өңіріміздегі балық шаруашылығын дамытудың оңтайлы жолдары» туралы өз ойын ортаға салды.<img src="https://knadmin.beoblood.kz/uploads/Baly_sharuashyly_yn_damytu_a_arnal_an_ylymi_tanymdy_konferencziya_tti_f3100e4052.jpg" alt="Балық шаруашылығын дамытуға арналған ғылыми-танымдық конференция өтті.jpg">Көпшіліктің ой-мүддесі бір арнаға тоғысқан ауқымды шарада Қызылорда облысының балық өсіру шаруашылығы туралы Қызылорда облыстық табиғи ресурстар және табиғат пайдалануды реттеу басқармасының басшысы Ғалымжан Бақтығалиұлы сөз алса, халықаралық ұйымдармен Арал мәселесі бойынша кешенді шаралар қабылдауда жан-жақты жүргізіліп жатқан жұмыстар жөнінде Халықаралық Аралды құтқару қоры атқарушы комитетінің халықаралық қатынастар бөлімінің басшысы Қайрат Амангелдіұлы хабарлама жасады.«Өңіріміздегі су шаруашылығының жағдайы» туралы сөз «Арал-Сырдария» бассейндік су шаруашылығы инспекциясының басшысы Зейнулла Молдағалиұлына берілсе, «Балық шаруашылығы ғылыми-өндірістік орталығы» жауапкершілігі шектеулі серіктестігі директорының орынбасары Тынысбек Темірханұлы «Өңіріміздегі тауарлы балық өсірудің қазіргі жағдайы және тауарлы балық өсіретін су айдынының жай-күйі» бойынша баяндады.Конференция барысында қатысушылар тарапынан балық шаруашылығы саласын дамыту, өзекті мәселелерді шешу және өзге де маңызды жұмыстар бойынша жан-жақты сауалдар жолданып, мамандар өзара пікір алмасты.<img src="https://knadmin.beoblood.kz/uploads/2_Baly_sharuashyly_yn_damytu_a_arnal_an_ylymi_tanymdy_konferencziya_tti_87d7f345bd.jpg" alt="2Балық шаруашылығын дамытуға арналған ғылыми-танымдық конференция өтті.jpg">Жиын соңында Арал балық шаруашылығы өндірісінің құрылғанына 100 жыл толуына орай балық шаруашылығы саласына елеулі үлес қосқан ардагерлер мен сала мамандары облыс әкімінің Құрмет грамотасымен, Алғыс хатымен және ҚР «Балық шаруашылығы саласының еңбек сіңірген қызметкері» медалімен, ҚР «Балық шаруашылығы саласындағы мінсіз қызметі үшін» төсбелгісімен, ҚР Ауыл шаруашылығы министрлігінің «Құрмет» грамотасымен және ҚР Ауыл шаруашылығы министрлігі Балық шаруашылығы комитеті төрағасының Алғыс хатымен марапатталды.Фото: Арал ауданы әкімінің баспасөз қызметі

Балық шаруашылығын дамытуға арналған ғылыми-танымдық конференция өтті

<a href="https://kyzylorda-news.kz/">Kyzylorda-news.kz</a> &nbsp;2025 жылдың 3-4 қазан аралығында «Азаматтарға арналған үкімет» мемлекеттік корпорациясының Қызылорда облыстық филиалы мен полиция департаменті бірлесіп «Жолда қабылдау» республикалық акциясын өткізді.Шараның басты мақсаты – азаматтарға құқықтық көмек көрсету, олардың құқықтық сауаттылығын арттыру, сыбайлас жемқорлықтың алдын алу, сондай-ақ көші-қон заңнамасы мен жол қозғалысы ережелерін сақтау бойынша түсіндірме жұмыстарын жүргізу болды.Акция барысында 300-ден астам облыс тұрғыны полиция қызметкерлеріне өз сұрақтарын қойып, нақты жауап алды. Олардың ішінде көлік тіркеу, жүргізуші куәлігін алу, жол қозғалысы ережелерін бұзу, айыппұлдарды төлеу және көші-қон мәселелеріне қатысты сұрақтар жиі қойылды.Бұл акция полиция мен халық арасындағы сенімді арттыруға, сондай-ақ азаматтарға мемлекеттік қызметтерді көрсетудің қолжетімділігін қамтамасыз етуге бағытталды.

ХҚКО «Жолда қабылдау» акциясы өткізілді

<a href="https://kyzylorda-news.kz/">Kyzylorda-news.kz</a> Бүгін Жалағаш ауданындағы Руханият орталығының алаңында қазақ халқының бай рухани мұрасының бір көрінісі – «Кеусен беру» дәстүрі жаңғыртылып, көпшілікке кеңінен таныстырылды. Егін бітік шығып, қамба дәнге толған берекелі уақытта атқарылатын бұл рәсім — қазақ халқының жомарттығы мен дархандығын айқындайтын ерекше салттардың бірі.<img src="https://knadmin.beoblood.kz/uploads/1_Zhala_ash_audanynda_Keusen_beru_d_st_ri_zha_yrdy_75c7ac7fa8.jpg" alt="1Жалағаш ауданында «Кеусен беру» дәстүрі жаңғырды.jpg">Мерекелік шара барысында «Кеусен беру» дәстүрі сахналық көрініс арқылы көрерменге ұсынылып, елдің ыстық ықыласына бөленді. Аудан өнерпаздарының қатысуымен, «Ұлағатты аналар» ансамблі әсем ән мен би шырқалып, ұлттық нақыштағы концерттік бағдарлама ұйымдастырылды.<img src="https://knadmin.beoblood.kz/uploads/2_Zhala_ash_audanynda_Keusen_beru_d_st_ri_zha_yrdy_de2bed6937.jpg" alt="2Жалағаш ауданында «Кеусен беру» дәстүрі жаңғырды.jpg">Аудан әкімдігінің ұйымдастыруымен өткен «Кеусен - ата дәстүрдің алтын арқауы» атты тағылымды шара ұлттық салт-дәстүрлердің ұмытылмай, жас ұрпақтың бойына сіңуіне, рухани құндылықтарымыздың жаңғыруына бағытталған маңызды қадам болып табылады.<img src="https://knadmin.beoblood.kz/uploads/3_Zhala_ash_audanynda_Keusen_beru_d_st_ri_zha_yrdy_822a3a3c5f.jpg" alt="3Жалағаш ауданында «Кеусен беру» дәстүрі жаңғырды.jpg">Дәстүрдің мәніне сай, шара соңында ауданның әр ауылынан келген отбасыларға кеусен үлестірілді. Бұл – еңбек пен ізгіліктің, ынтымақ пен ырыстың белгісі.<img src="https://knadmin.beoblood.kz/uploads/4_Zhala_ash_audanynda_Keusen_beru_d_st_ri_zha_yrdy_e461f6c0e8.jpg" alt="4Жалағаш ауданында «Кеусен беру» дәстүрі жаңғырды.jpg">

Жалағаш ауданында «Кеусен беру» дәстүрі жаңғырды

<a href="https://kyzylorda-news.kz/">Kyzylorda-news.kz</a> &nbsp;Қасиетті Арал топырағында өтіп жатқан ғасырлық тойдың жалғасы «Қарашалаң балық» ЖШС зауытының салтанатты ашылуына ұласты.Теңіз төсіндегі тағылымды шараға аудан әкімі А.Оңғарбаев, Қазақстан Республикасы Ауыл шаруашылығы министрлігінің Балық шаруашылығы комитетінің төрағасы С.Сермағамбетов, Ақтөбе облысы Ырғыз ауданының әкімі Н.Қызбергенов, Халықаралық Аралды құтқару қорының өкілдері, облыстық және аудандық мәслихат депутаттары, Астана, Алматы, Қызылорда қалаларынан, Ырғыз, Қазалы аудандарынан арнайы келген мемлекет және қоғам қайраткерлері, зиялы қауым өкілдері мен еңбек ардагерлері, сондай-ақ балық шаруашылығы саласының мамандары қатысты.Озық технологиямен жабдықталған өндіріс ошағының салтанатты ашылу рәсімінде аудан әкімі А.Оңғарбаев сөз алып, жаңадан бой көтерген кәсіпорынның алдағы жұмысына сәттілік тіледі.<blockquote>– Құрметті қонақтар, қадірлі жерлестер! Өндірістің жаңа кезеңіне қадам басқалы отырған “Қарашалаң балық” зауытының ашылуымен баршаңызды құттықтаймын! Бұл игілікті бастаманың Арал балық шаруашылығы өндірісінің құрылғанына 100 жыл толуымен тұспа-тұс келуі – ерекше символдық мәнге ие.Себебі бұл мекен ғасырлардан жалғасып келе жатқан балықшылық кәсіптің алтын діңгегі саналатын өңір. Арал теңізі – қойнауы балыққа бай, еліміздің ғана емес, бүкіл әлемнің назарын аударған айдын.Арал өңірі үшін балық шаруашылығын дамыту – ғасырлар бойы қалыптасқан өмірлік маңызы зор кәсіп. Қазіргі таңда теңіздің кіші бөлігі қалпына келіп, көлдер жүйесі жандана бастаған шақта бұл саланың әлеуеті бұрынғыдан да артып келеді.“Балық іздесең – көлге бар, береке іздесең – елге бар” дейді халқымыз. Бүгінгі ашылып отырған кәсіпорын – ел еңбегінің, ынтымақ пен тірліктің жемісі.Осы мерейлі сәтте баршаңызға мықты денсаулық, шаңырақтарыңызға береке-бірлік, ел игілігі жолындағы еңбектеріңізге табыс тілеймін! – деді аудан әкімі Аманжол Сақыпұлы.</blockquote>Сондай-ақ ол Арал өңірінде өтіп жатқан ғасырлық мерейтойдың маңыздылығын атап өтіп, елге арнайы келген қонақтарға ризашылығын білдірді.<img src="https://knadmin.beoblood.kz/uploads/1_Merejtoj_ayasynda_Aralda_baly_deu_zauyty_ashyldy_ad18efbc63.jpg" alt="1 Мерейтой аясында Аралда балық өңдеу зауыты ашылды.jpg">Мұнан соң Қазақстан Республикасы Ауыл шаруашылығы министрлігі Балық шаруашылығы комитетінің төрағасы Серік Сағитжанұлы сөз алып, аймақтағы балық шаруашылығы саласының даму бағытына тоқталып, барша қонақтарды мерейтоймен құттықтады.Ел ағасы, Арал ауданының Құрметті азаматы Әбілбай Садықбаев ауданда ашылып жатқан жаңа өндіріс ошағының маңыздылығын атап өтіп, осындай игі істерге бастамашы болып жүрген азаматтарға алғыс білдіріп, батасын берді.Ауданда өтіп жатқан ғасырлық мерейтой аясында өткен балық зауытының ашылу салтанатында салада айрықша еңбек етіп келе жатқан бірқатар азаматтар Арал ауданы әкімінің Құттықтау хатымен және Қазақстан Республикасы Ауыл шаруашылығы министрлігі Балық шаруашылығы комитеті төрағасының Алғыс хатымен марапатталды.Кәсіпорынның ашылу салтанатына куә болған меймандар ғимарат ішін аралап көріп, онда жүріп жатқан балық өңдеу жұмыстарымен танысты. Аймақтағы өндірістің қуатын еселейтін бұл кәсіпорынның жұмысы алдағы уақытта жандана түспек.Айта кетейік, қазіргі уақытта ауданда жылдық қуаттылығы 23 900 тонна болатын 9 балық өңдеу зауыты жұмыс істейді. Оның ішінде 2 кәсіпорын Еуропа нарығына шығуға мүмкіндік беретін «Еврокод» сертификатына ие. Бұдан бөлек, 15-ке жуық сұрыптау және сақтау цехтары халық игілігіне қызмет етуде. Сол қатарды толықтырған жаңа «Қарашалаң балық» зауыты өндірістік қуатты жылына 6 мың тоннаға арттырып, ішкі нарықты сапалы өніммен қамтамасыз етуге бағытталған маңызды жоба. Зауыттың жалпы құны 500 млн теңгені құрайды. Оншақты адамды тұрақты жұмыспен қамтитын бұл табысты кәсіпорын өңір экономикасының өркендеуіне үлес қосады деп күтілуде.Фото: Арал ауданы әкімінің баспасөз қызметі

Мерейтой аясында Аралда балық өңдеу зауыты ашылды

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалы жанындағы Өңірлік даму жөніндегі кеңестің отырысы өтті.Жиында Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауын жүзеге асырудағы міндеттер туралы, партияның 2023-2027 жылдарға арналған Сайлауалды бағдарламасында қамтылған &nbsp; облыс тұрғындарын сапалы ауыз сумен қамтамасыз ету бағытында атқарылып жатқан жұмыстар, сонымен қатар сайлау уақытында сайлаушылардан түскен ұсыныстардың орындалу барысы талқыланды.Кеңес отырысына партияның облыстық филиалының атқарушы хатшысы Ләйлә Төрешова, аймақтық кеңес төрағасы Қожахмет Ілиясов және жауапты сала өкілдері мен кеңес мүшелері қатысты.Жиында Президент Жолдауынан туындайтын міндеттер төңірегінде Қорқыт Ата атындағы Қызылорда университетінің Жасанды интеллект институты директоры экономика ғылымдарының кандидаты Нұрлан Құлмырзаев атап өтті. Ол Байқоңырдан басталған технологиялық дәстүрді жалғастыру – біздің ортақ борышымыз екенін тілге тиек етіп, облыста осы бағытта қолға алынған жасанды интеллект институты жұмысына &nbsp;тоқталды.<blockquote>«Бүгінде Қызылорда жастары VR/AR, Big Data, цифрлық егіздер бағытында жобалар жасап жүр. Біз Кореяның SeoulTech университетімен серіктестік орнаттық, жақында үш сервер әкелінді, сол арқылы зертханалар мен киберполигондар ашылып жатыр. Бұл – Кызылорданы Президент тапсырмасын тәжірибеде жүзеге асыратын алғашқы өңірлердің біріне айналдыруға мүмкіндік береді. Біз үшін ең бастысы – деректердің қауіпсіздігі, этикалық нормаларды сақтау және сандық теңсіздікті азайту. Бұл бағытта заң шығарушы орган, бизнес және университеттер бірлесе жұмыс істеуі қажет. Депутаттар заңнамалық негіз қалыптастырып, қаржыландыруға ықпал етсе, бизнес жаңа стартаптар құрып, экономиканы дамытады. Ал университеттер сапалы кадр дайындап, ғылымды ілгерілетеді», - дейді Нұрлан Құлмырзаев. Сайлауалды бағдарламадағы тұрғындарды сапалы ауыз сумен қамтуға келсек, облыстық энергетика және тұрғын үй - коммуналдық шаруашылық басқарма басшысының орынбасары Бауыржан Измагамбетов: өңірде 4 қала және 222 ауылдық елді мекен бар. Оның ішінде орталықтандырылған ауыз су жүйесіне қосылмаған 8 ауылдық елді мекен болатын. Бұл жұмыстар бойынша арнайы жол картасы әзірленіп жұмыс жасалуда. Жыл соңына дейін Мемлекет басшысының халықты 100 пайыз сапалы ауыз сумен қамту тапсырмасын толық орындау жоспарланған,- дейді.</blockquote>Күн тәртібіндегі сайлаушылардан түскен ұсыныстардың орындалуы бойынша партияның облыстық филиалының қоғамдық қабылдау бөлмесінің кеңесшісі Қанат Ақылбеков хабарлама жасады.Қанат Ақылбековтың айтуынша ҚР Парламенті Мәжілісі және мәслихаттар депутаттарын сайлау науқанының Үгіт кезеңінде кандидаттармен «Халық айтсын» акциялары мен тұрғындарды жеке мәселелеріне сәйкес облыс бойынша өткізілген 213 қабылдауға 935 адам келіп, 1223 ұсыныс &nbsp;жинақталған. 91 ұсыныс ҚР Парламент Мәжілісіне ұсыну үшін Республикалық қоғамдық қабылдау кабинетіне ұсынылған. Қалған 1132 ұсыныстың бүгінгі күнге 97,4 пайызы оң шешілген. 29 ұсыныс бойынша жұмыс жасалуда. &nbsp;Жиында күн тәртібіне ұсынылған мәселелер кеңес мүшелерімен кеңінен талқыланып, аталған салалардағы жұмысты жетілдіру бойынша ұсыныстар ортаға салынып, жиынның хаттамасына енгізілді.

Өңірлік даму жөніндегі кеңестің отырысы өтті

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмаханов Ғани Мұратбаев және Абай ауылының халқымен кездесіп, әлеуметтік нысандардың жұмысымен танысты.&nbsp;Алдымен аудан орталығына жақын орналасқан Ғани Мұратбаев ауылының халқымен дидарласқан аудан әкімі өңірде аймақ басшысы Нұрлыбек Машбекұлының қолдауымен жүзеге асып жатқан жобалар мен алдағы жүзеге асырылатын жұмыстар жайында атап өтті.&nbsp;Мұнан соң кезек ұсыныс пікірлерге келгенде ауыл халқы округ аумағындағы инженерлік-инфрақұрылым жүргізілген аймаққа жол салу, ауылға жаңа мектеп салу сынды мәселелерді көтерді. Аудан басшысы бірінші сауал бойынша ауылдық округтегі инженерлік-инфрақұрылым жүргізілген аймаққа жол салу үшін жоба әзірленгенін, жобаға сәйкес алдағы уақытта тиісті қаржы бөлінген жағдайда жол салу жұмыстары басталатындығын айтты. Ал, жаңа мектеп салу мәселесіне байланысты облыстық құрылыс басқармасы арқылы ауылдық округке 250 орындық мектеп салу үшін жалпы құны 1,9 млрд.теңге болатын жобалық сметалық құттама дайындалып, сараптамадан өткізілгенін, сондай-ақ құрылысты қаржыландыруға ұсынылғанын жекізді.Аудан әкімінің мұнан кейінгі кездесуі дарияның арғыбетінде орналасқан Абай ауылында жалғасты. Кездесуде аудан әкімі ауданда жыл басынан бері атқарылған жұмыстар мен алдағы жоспарлар жайында тарқатып өтті. Ауыл тұрғындары кездесу барысында ауылішілік көшелерді асфальттау, шабындық және жайылымдық жердің тапшылығы, оны суландыру мәселесі сынды елдік мәселелерді ортаға салды. Алмасбек Әбілқасымұлы бұл ретте келер жылға мүмкіндігінше ауыл ішіндегі бір көшені асфальттау мәселесін қолға алып, шабындық, жайылымдық жер мәселесі бойынша арнайы мамандармен бірлесе жұмыс жасалатындығын жеткізді. Сонымен қатар алдағы уақытта ұйымдастырылып жатқан Абай ауылының 85 жылдық мерекесін жоғары деңгейде өткізілуіне тілектестігін білдірді.Аудан әкімі екі ауылдыңда халқымен өткен кездесудерден кейін мектеп, балабақша сынды әлеуметтік нысандарды аралап көріп, нысандардың &nbsp;бу қазандықтарының қысқы жылу беру маусымына дайындығын пысықтады.<img src="https://knadmin.beoblood.kz/uploads/T_r_yndarmen_kezdesu_azaly_4_ffb05b6258.jpg" alt="Тұрғындармен кездесу Қазалы 4.jpg">

Тұрғындармен кездесіп, әлеуметтік нысандарды аралады

<a href="https://kyzylorda-news.kz/">Kyzylorda-news.kz</a> Түркістан облысында ерекше оқиға болды: 24 жастағы ұл өз әкесіне бауыр доноры болып, өмірін сақтап қалды. Дәрігерлер операцияның сәтті өткенін хабарлады. Бұл – өңірдегі трансплантология саласындағы маңызды жетістік, деп хабарлайды <a href="https://baq.kz/akem-ushin-barine-dayynmyn-turkistanda-ul-bauyryn-akesine-berdi-200023116/">BAQ.KZ</a> тілшісі.Түркістан облыстық клиникалық ауруханасында бауырды ауыстыру бойынша екінші трансплантация сәтті өтті. Денсаулық сақтау министрлігінің мәліметінше, операция академик Болатбек Баймахановтың жетекшілігімен, А. Сызғанов атындағы ұлттық ғылыми хирургия орталығының мамандарының қатысуымен жүргізілген.54 жастағы бауыр циррозына шалдыққан науқасқа оның 24 жастағы ұлы донор болды. Ол өз еркімен әкесіне бауырының бір бөлігін беруге келісімін берген. Толық медициналық тексеруден кейін қарсы көрсетілімдер анықталмаған.Операция сәтті өтіп, науқастың жағдайы тұрақты, жаңа бауырдың қызметі біртіндеп қалпына келіп жатыр. Дәрігерлердің айтуынша, бұл трансплантация өңірдегі трансплантология саласының дамуына және жоғары технологиялық медициналық көмекке қолжетімділікті кеңейтуге маңызды қадам болды.Фото: freepik.com

"Әкем үшін бәріне дайынмын": 24 жастағы жігіт әкесіне бауырын берді

<a href="https://kyzylorda-news.kz/">Kyzylorda-news.kz</a> Қазақстан төлқұжат дизайнын жаңарту қарастырылып жатыр. Мемлекеттік хатшы Ерлан Қарин жаңа құжат жобасының әзірленуі 2025 жылдың ақпанында басталғанын мәлімдеді. Бұл туралы <a href="https://stan.kz/kazakstannin-tolkyzhat-dizayni-ozgertilmek-424588/">Stan.kz</a> ақпарат агенттігі хабарлайды.Ерлан Қарин қазіргі төлқұжат жобасының 17 жылдан бері қолданылып келе жатқанын және жаңартуды қажет ететінін атап өтті.<blockquote>"Ұлттық банктің жетекші дизайнерлері мен Банкнот фабрикасының сарапшылары қазір төлқұжаттың визуалды дизайнына база әзірледі. Бұл жұмыста халықаралық стандарттар мен трендтер ескерілді: минималистік стиль, виза беттеріндегі фондық суреттер, контрафактілікке қарсы жаңа элементтер. Қазақстанның қайталанбас ерекшеліктерін, оның ұлттық ерекшелігін, елдің мәдени әралуандылығын көрсететін жаңа дизайн тұжырымдамасы әзірленді. Жаңа дизайн жақын арада таныстырылады", – деді Қарин.</blockquote>Сондай-ақ ол келесі қадам сигнал макетін шығару болатынын, көп сатылы басып шығару және қауіпсіздік технологияларын енгізу есебінен бірнеше ай қажет екенін атап өтті. Төлқұжатты жаппай ауыстыру жоспарда жоқ, ескі құжаттардың мерзімі бітіп, бүлінген жағдайда немесе жеке тұлғаның өтініші бойынша жаңа құжаттар беріледі. Төлқұжат құны бұрынғысынша қалады.Сонымен қатар 9 қазанда мемлекеттік хатшы Банкнот фабрикасының мамандарымен кездесу өткізіп, цифрлық үлгіні жасаудың техникалық аспектілерін және жаңа құжатты кейіннен шығаруды талқылады.Фото: gov.kz

Қазақстан және Қызылорда облысының жаңалықтары: Қоғам