<a href="https://kyzylorda-news.kz/">Kyzylorda-news.kz</a> Жуырда Шиелі аудандық мәдениет үйінде Шиелі ауданы әкімі Нұржан Ахатов және Шиелі аудан прокуроры Нұрбек Қаратаевтың төрағалығымен&nbsp;құқық бұзушылық профилактикасы жөнінде арнайы мәжіліс өтті. Жиынға&nbsp;мәслихат төрағасы, аудан әкімінің орынбасарлары, депутаттар, құқық қорғау органдарының басшылары, дербес бөлім басшылары, кент және ауылдық округ әкімдері, мектеп директорлары мен тәрбие ісі жөніндегі орынбасарлары, мемлекеттік және жеке балабақшалардың меңгерушілері қатысты.&nbsp;Мәжіліс күн тәртібіндегі негізгі 3 мәселе төңірегінде жүргізілді. Атап айтсақ, Шиелі ауданы&nbsp;көлемінде өсім алған кәмелетке толмағандардың қатысуымен орын алған қылмыстардың, алаяқтық және балалар мен жасөспірімдер арасындағы құқық бұзушылықтың алдын алу, олардың жазғы демалысын ұйымдастыру мәселелері кеңінен талқыланды.&nbsp;Алғашқы сөзді Шиелі ауданының әкімі Нұржан Сәбитұлы алып, балалар құқығын қорғау және сақтауға бағытталған жұмыстарды күшейте түсу керегін тілге тиек етті. Бұдан соң күн тәртібіндегі алғашқы мәселе жөнінде аудан прокурорының аға көмекшісі Қ.Жантөреев баяндама жасап, аудан жасөспірімдері арасындағы қазіргі ахуалды баяндады. Оның айтуынша, бүгінде&nbsp;аудандағы жалпы білім беретін 38 мектепте 18 379 оқушы дәріс алады. Прокурорлық тексеру мен бала құқықтарына қатысты білім беру ұйымдарында кәмелетке толмағандар құқықтарының сақталуын тексеру барысында бірқатар өрескел жағдайлардың, аудан бойынша мәселесі шешілмеген мектептердің бары анықталған. Аталған тақырып аясында білім ошақтарындағы асханалар жайы, олардың санитарлық талаптарға сай келмейтіні сөз етілді. Мектеп асханаларын тұрақты бақылау мақсатында арнайы комиссиялар құрылғанымен, олар тарапынан тиісті жұмыстар атқарылмағаны белгілі болды.Бұдан бөлек қазіргі таңда Шиелі ауданында қылмыстық жағдай күрделі сипат алған. Мәселен, жыл басынан бері тіркелген қылмыс істерді өткен жылмен салыстырғанда, аудандағы қылмыстық ахуал 13,8%-ға өсім алса, оның ішінде адам өлтіру 200%-ға, қарақшылық 100%-ға, тонау 100%-ға, қорқытып алу 100%-ға, мал ұрлау 66,7%-ға, алаяқтық 40%-ға, бұзақылық 200%-ға, қасақана ауыр дене жарақатын салу 100%-ға, алкогольдік еліктеу жағдайында жасалған қылмыстар 40%-ға, топ болып жасалған қылмыстар 600%-ға жоғарылаған.Сондай-ақ жақын күндері Ш.Қодаманов ауылындағы №158 орта мектепте 10-сынып оқитын 2 жасөспірім осы мектептің 9-сыныбында оқитын оқушысын ұрып-соғып, денсаулығына қасақана ауыр зиян келтіруінің салдарынан соңы өліммен аяқталу фактісі орын алды. Бұл өкінішті жайт жыл басынан бері тіркелмеген қылмыстық істердің күрт күрделенуіне әкеліп отыр.Бүгінде Шиелі ауданы&nbsp;прокуратурасымен "Бақытты және қауіпсіз балалық шақ" жобасы бойынша мобильді топ құрылып, аудан көлемінде әр мектеп бойынша әлеуметтік паспорттар әзірленіп, ондағы жасөспірімдер арасында мінез-құлқы ерекше балалармен, қараусыз және қолайсыз отбасында тәрбиеленіп жатқан балалар арасында қылмыстық құқық бұзышылықтардың алдын алу, жасөспірімдердің құқықтарын қорғауды күшейту үшін тұрмыстық зорлық-зомбылыққа қарсы іс-қимыл, суицидті болдырмау жөнінде жергілікті атқарушы және уәкілетті органдармен бірлесіп іс-шаралар атқарылуда.&nbsp; Сондай-ақ аудан көлеміндегі білім мекемелерінде де аталған мәселелер бойынша облыс прокуратурасымен әзірленген жол картасы бойынша жұмыстар жүргізіліп жатыр.Сонымен қатар жазғы демалыстың жақындауына байланысты кәмелетке толмағандардың жазатайым оқиғаға ұшырауы, олардың немесе оларға қатысты қылмыс жасалудың, суицидтік фактілердің орын алуын болдырмау мақсатында кешенді жұмыстар атқару сұралды. Білім беру мекемелері мен балабақшаларда кәмелетке толмағандардың ата-аналарымен балалардың қауіпсіздігін қамтамасыз ету мақсатында түсіндірме жұмыстарын жүргізу жиналыстарын, төтенше жағдай органдары демалыс аймақтары мен суға түсу, өзен, көл, су арналары және т.б. орындарда бақылауды күшейтіп, жоғары деңгейде түсіндірме жұмыстарын, БАҚ арқылы, құтқару қызметі, смс хабарламасы, теледидар, билбордтар және т.б. түрінде халыққа жеткізу қажеттігін айтты.Баяндамашы сөз болған мәселелерге сәйкес&nbsp;білім ошақтарындағы оқушылар арасында бопсалау, әлімжеттік көрсету және жас ерекшеліктері бойынша топтардың бар-жоғын анықтау мақсатында сауалнамалар алынып, қорытындыға сәйкес алдын алу шараларын күшейтуді, өз кезегінде мектеп әкімшілігі мен мұғалімдер құқық бұзушылыққа бейім оқушыларды анықтау шараларын қатаң жүргізуді ұсынып,&nbsp;тәлім-тәрбие жұмыстарын бірлесіп атқаруға шақырды.Күн тәртібіне қойылған екінші мәселе жөнінде аудандық полиция бөлімінің жедел уәкілі Ж.Құттыбай сөз алып, бүгінгі таңда қоғам арасында алаяқтық қылмыстардың өршіп тұрғанын, былтырғы жылмен салыстырғанда, биыл мамыр айына дейін 140%-ға жоғарылағанын атап өтті.– Жыл басынан бері барлығы&nbsp;63 қылмыс тіркелген. Бұл өткен жылмен салыстырғанда, қылмыстардың 16,7%-ға жоғарылағанын көрсетеді. Оның ішінде онша ауыр емес және орта санаттағы қылмыстардың саны 34-ті құрап, былтырға қарағанда 17,2%-ға жоғарылап, ашылу көрсеткіші 12,4%-ға жақсарды. Ауыр және аса ауыр санаттағы қылмыстар өткен жылмен салыстырғанда 4 қылмысқа өсім алды. Десек те, олардың ашылу көрсеткіші 51,1%-ға жақсарды,&nbsp;– деді ол.&nbsp;&nbsp;Қазірде алаяқтық қылмыстардың 20 дерегі тіркеліп, 100%-ға артқан. Олардың басым бөлігі&nbsp;–&nbsp;интернет-алаяқтық санатындағы қылмыстар. Бұл мәселенің туындауына адамдардың әлеуметтік желілерде сатылымға заттар жарияланатын&nbsp;OLX.kz, Instagram, WhatsApp және т.б. түрлі қосымшаларда алдын ала төлем жасау арқылы алдану жолдары, белгілі бір мекемеге жұмысқа орналастырып беру және қайтарымсыз несиені жеңілдетілген пайызбен алып беру секілді алаяқтықтардың құрбаны болуы себеп. Мәселен, бұған дейін кент орталығында бір емес, бірнеше адамнан несие алу төңірегінде ақша жинап, салдарынан 16 жәбірленушіні сан соқтырған тұрғынның әрекеті анықталды. Баяндамашы осыған сәйкес&nbsp;тұрғындарға сақтық шаралары ретінде жеке куәлік деректерін, төлем карталарының мәліметтерін, құпиясөздерді және смс кодтарды ешкімге хабарламауға, белгісіз әрі тексерілмеген сайттар арқылы төлем жүргізбеуге, ұялы телефон мен компьютерге белгісіз қосымшаларды орнатпауға шақырды. Сондай-ақ сақтық шаралары туралы кеңінен насихаттап, тақырыпқа сәйкес&nbsp;түсіндірме жұмыстарын жүргізуді одан әрі жандандыру&nbsp;алаяқтықтың алдын алатыны айтылды.Күн тәртібіндегі үшінші мәселеге байланысты кезекті баяндаманы&nbsp;аудандық полиция бөлімінің жергілікті полиция қызметі бөлімшесінің инспекторы А.Мадиев жасады. Ол кәмелетке толмағандар арасында жыл басынан бері ешқандай қылмыстық әрекет орын алмағанын, дегенмен, жуырда орын алған жағдай бұл фактіні жоққа шығарғанын мәлімдеді. Сондай-ақ кәмелетке толмаған жасөспірімдердің мезгілсіз уақытта жүруіне байланысты осы уақытқа дейін барлығы 205 хаттама толтырылғаны, рейдтік іс-шаралар кезінде жасөспірімдердің&nbsp;темекі өнімін сату бойынша тұрған дүкендері мен&nbsp;бірнеше ойын-сауық мекемесі&nbsp;анықталды. Бүгінде аталған мәселелерге қатысты профилактикалық шаралар жүргізіліп жатыр.Жиын барысында аудан әкімі&nbsp;полиция бөлімінің жұмысын сынға алып, түнгі мезгілде ұйымдастырылатын рейдтік шараларды көбейтуді, учаскелік инспектордың ауыл-аймақты үзіліссіз бақылап отыру қажеттігін қатаң ескертті.&nbsp;Мәжіліске қатысушылар күн тәртібіндегі мәселелер төңірегінде жауапты сала мамандарына сауалдар жолдап, ұсыныстарын білдірді. Сондай-ақ жасөспірімдер арасындағы тәртіпсіздікке жол бермеу үшін ата-аналардың&nbsp;мектепішілік жиындарға қатысуын қамтамасыз ету маңызды екені көтерілді.Мәжіліс соңында бірқатар бөлімдерге тапсырмалар беріліп, нәтижелі жұмыс атқару жүктелді. Аудан әкімі қоғамда болып жатқан мәселелерді бірлесе бақылауға алып, олқылықтарды ескерусіз қалдырмай, ортақ жауапкершілік танытудың маңызды екенін атап өтті.&nbsp;

Шиеліде қылмыстық ахуал қалай?

<a href="https://kyzylorda-news.kz/">Kyzylorda-news.kz</a>&nbsp; Терезеден құлау фактісінің тіркелуіне басты себеп - балалардың қараусыз қалуы дейді мамандар. Сондықтан да сақтық шарасына бей-жай қарамау әр отбасының алдында тұрған жауапты міндет. Осыған сәйкес, облыстық Төтенше жағдайлар департаментінің қызметкерлері “Терезе” профилактикалық шарасы аясында сол жағалауда орналасқан көпқабатты үйлердің тұрғындарына түсіндірме жұмыстарын жүргізді.<blockquote>– &nbsp;Балалардың терезеден құлау фактісінің басты себебі - ата-аналардың балаларды бақылаусыз қалдыруы. Сондай-ақ, терезеде уақытша бекіткіш торлардың болмауы мен москит торларының берік бекітілмеуі және балалардың терезенің алдында ойнауы тікелей себеп болып отыр. Сондықтан, құрметті тұрғындар, егер үйлеріңізде кішкентай бала болса, терезені ашық қалдырмауларыңызды сұраймыз, - деді</blockquote>Қызылорда қаласы төтенше жағдайлар басқармасының бас маманы, азаматтық қорғау майоры Мұхтар Белсенбаев.Балалар болашағымыз десек, олардың&nbsp;қауіпсіздігі басты орында болуы керек. Бүлдіршіндерді&nbsp;әр тұрмыстағы&nbsp;әр түрлі&nbsp;қауіптерден сақтау ата-аналардың, сонымен&nbsp;қатар, жалпы&nbsp;қоғамның міндеті.Фото: Қызылорда облысының Өңірлік коммуникациялар қызметі

Балалардың қауіпсіздігі маңызды 

<a href="https://kyzylorda-news.kz/">Kyzylorda-news.kz</a> Е.Әуелбеков атындағы №4 облыстық мамандандырылған мектеп-лицей-интернаты неше жылдық тарихы бар, дарынды оқушылардан құралған білім ордасы. Мектеп ұжымы озат оқушыларды жетінші сыныптан бастап қабылдап, оларға білім мен тәрбиені қатар беріп келеді.Биылғы оқу жылында да &nbsp;400-дей оқушы түрлі байқауларда бақ сынап, оның ішінде 200-ге жуығы жүлделі орындармен марапатталды.Аталған мектеп жыл сайын өзінің дарынды шәкірттерімен қанатын кеңге жайып келеді. Биылғы оқу жылында мектептің мерейін асқақтатқан 10-сынып оқушысы Жасмин Науан «Үздік оқушы-2024» номинациясымен марапатталды.<blockquote>– Осындай мүмкіндікке ие болғаныма өте қуаныштымын. Менің үздік болуыма атсалысып, білімі мен тәрбиесін берген ұстаздарыма алғысым шексіз. Үздік оқушы болып қалыптасуыма бірден-бір септігін тигізген мектеп ұжымына үлкен рахметімді айтамын. Бұл номинация мен үшін үлкен жетістік. Осы атқа кір келтірмей, мектеп атын жақсы жағынан шығаруға күш саламын, – деді Жасмин.</blockquote>Иә, мектептің атын оқушы саны емес, дарынды баланың даңқы шығарады. Жасмин мектеп табалдырығын аттаған сәттен бастап өзінің үлгілі, озат оқушы екенін көрсетіп келеді. Ол оқу жылының басынан бастап Төлеген Айбергенов оқуларының облыстық кезеңінде Алғыс хат, «Балалар оқулары» байқауының облыстық кезеңінде ІІІ орын, «Менің кіші Отаным» облыстық эссе байқауында ІІІ орын, «Ақберен» облыстық өнер байқауында ІІІ орын, жалпы білім беретін пәндер бойынша олимпиаданың облыстық кезеңінде ІІ орын, «Жарқын болашақ» облыстық олимпиадасында ІІІ орын, Қанипа Бітібаева атындағы қазақ тілі мен әдебиеті пәнінен облыстық олимпиадасында Алғыс хат, жалпы білім беретін пәндер бойынша республикалық олимпиаданың «Алтын медаль» иегері атанды.Осындай дарынды шәкірттерді тәрбиелеп, оларды білім нәрімен сусындатып жүрген ұстаздар қауымы да үздіктер қатарынан көрініп, марапатқа ие болды. Мектеп-лицей-интернатында мектепішілік педагогикалық алаң ұйымдастырылып, барлық ұстаздар оқу жылында атқарған іс-тәжірибелерін сараптап, талқылап есеп берді.Сонымен қатар әр пән мұғалімдері 2024-2025 оқу жылына жасалған өз кешенді жоспарларына таныстырылым жасады. Сондай-ақ, алдағы оқу жылында атқарылар «Шеберлер шеберханасы» жобасының іс шаралары нақтыланды.Биылғы оқу жылының қорытындысымен «Үздік педагог-2024» номинациясын мектеп-лицей-интернатының үздік маманы Азамат Жанәділов жеңіп алды.<blockquote>– Ең алдымен мектеп ұжымына алғысым шексіз. Қаншама үлгілі педагогтардың арасынан мені үздік деп танығаны еңбегімнің жемісі деп ойлаймын. Мен өз шәкірттеріммен мақтанамын. Мұндай номинацияны иеленуіме дарынды да озат оқушыларым себепкер. Олардың түрлі байқауларда жеңімпаз атануы менің жетістіктер қоржынымды тағы бір мараптпен толдырды. Алдағы уақытта оқушыларыммен бірге талай белестерді бағындырамыз деп сенемін, – деді Азамат Жанәділов.</blockquote>Мінекей, мектеп ұжымы осындай үлгілі мамандарымен және де озат оқушыларымен мақтанады. Үздіктер қатарынан көрініп жүрген мектеп-лицей-интернатының алар асуы биік болары сөзсіз.&nbsp;Аружан Ералы

Үздіктерді тәрбиелеген білім ордасы

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласы бойынша «Әлеуметтік әріптестік пен әлеуметтік-еңбек қатынастарын реттейтін қалалық үш жақты комиссияның» кезекті отырысы өткізілді.Отырыста екі мәселе қаралды. Күн тәртібіндегі бірінші мәселе бойынша Қызылорда қаласының әкімдігі, Қызылорда облыстық жұмыс берушілердің бірлестіктері (қауымдастықтары, одақтары) мен Қызылорда облысының кәсіподақтар орталығы арасындағы 2024-2026 жылдарға арналған қалалық келісім жобасы мақұлданып, қол қойылды.Бұл құжат негізінен қалалық деңгейдегі әлеуметтік әріптестікті күшейту мен дамытуға, әлеуметтік тұрақтылыққа қол жеткізуге және қоғамдық келісімді нығайтуға, сондай-ақ қала халқын жұмыспен қамтуға, еңбек қатынастарын реттеуге және жұмыскерлердің еңбек қауіпсіздігі мен табыс деңгейін арттыруға, еңбек дауларын болдырмауға бағытталған шараларды көздейді.Қалалық келісімге Қызылорда қаласының әкімдігі атынан – қала әкімінің орынбасары Дархан Есалыұлы, жұмыскерлер тарапынан – «Қызылорда облысының кәсіподақтар орталығы» аумақтық кәсіпордақтар бірлестігі төрағасының орынбасары Марат Бәйімбетов, жұмыс берушілер тарапынан - «Парыз» Қазақстан Республикасы Жұмыс берушілер Ұлттық Конфедерациясы» заңды тұлғалар бірлестігінің Қызылорда облысы бойынша өкілі Болат Бөгетов және Қызылорда облысы жолаушыларын автокөлікпен тасымалдаушылар ассоциациясының төрағасы Нұрлыбек Нұрымбетов қол қойды.Күн тәртібіндегі екінші мәселе Міндетті әлеуметтік сақтандыру жүйесіндегі проблемалық мәселелер туралы талқыланды. Кәсіпорын басшыларының әлеуметтік төлемдердің кешіктіріліп төленуі себептері тыңдалып, барлық мекеме өкілдеріне уақытылы &nbsp;төлем жүргізу тапсырылды.Сонымен қатар, отырысқа Қызылорда қаласы бойынша Мемлекеттік кірістер басқармасы басшысының орынбасары Жорабек Сүйірбаев шақырылып, әлеуметтік төлемдерді кешіктіріп төлейтін кәсіпорындарға шара қолдану туралы түсіндірілді.

Қызылорда: Қала әкімдігінде комиссия отырысы өтті

<a href="https://kyzylorda-news.kz/">Kyzylorda-news.kz</a>&nbsp; Құшағы кең қазақ елі көптеген өзге ұлт өкілдерін бауырына тартты. Қазақстанда бір шаңырақ астында өмір сүріп жүрген түрлі ұлттар мен ұлыстардың бірлігі, ынтымағы басқа мемлекеттерге үлгі. Елімізде соңғы уақытта қазақша сөйлейтін өзге ұлт өкілдері айтарлықтай көбейгені де басты жетістігіміз. Біздің өңірде бірнеше ұлттың өкілдері шоғырлаған. Олардың&nbsp;қазақ тіліне деген құрметі шексіз. Тіпті қазақтың салт-дәстүрлерін де ерекше құрметтейді. Осы ретте&nbsp;Қызылорда облысының санитариялық-эпидемиологиялық бақылау департаментінде ауруханаішілік инфекцияларды эпидемиологиялық бақылау бөлімінің басшысы әңгімелескен едік.Юрий Палович &nbsp;тіл үйрену ынтаны, қажеттілікті, табандылықты қажет етеді. Сіз қазақ тілін қалай үйрендіңіз? Естуімізше тіпті іс-қағаздарын да қазақша толтырады екенсіз?Мен қазақ халқының ортасында өстім.&nbsp;Ата-анамыз үнемі көрші тұрған жергілікті ұлт өкілдерімен бауырындай араласты. Бір-бірінің үйіне қонаққа шақырып, қуаныш пен қайғыны ортақ бөлісті. Сондықтан мен бала кезімнен қазақ тілін меңгеруге тырыстым. Ол&nbsp;маған ешбір қиындық туғызған жоқ. Көршілердің барлығы қазақ ұлтынан еді. Бір-бірімізбен қазақ тілінде сөйлесеміз. Осылайша тілді жақсы меңгеріп алдым. Жалпы, тіл үйренгеннің ешбір айыбы жоқ. Қайта ойтанымың кеңейіп, өзіңді жаңаша қырынан сезінуге болады. Еңбек жолымда да&nbsp;қазақ тілінің көп пайдасы тиіп келеді.Өткен ғасырдың зобалаң жылдарына көз салсақ, кәрістердің Қазақстанға жер аударылғанын білеміз. Сіз де сол бір көштен өсіп-өнген тағдырлы ұрпағысыз. Өңірдегі үлкен диаспораның бірі....Жалпы Қазақстанға көшіп келген корейлердің ата қонысы Қиыр Шығыстағы Приморье өлкесі. Бұл жерлерде ерте замандарда Пархэ, Чхон секілді мемлекеттер болғаны тарихи деректер айғақтайды. 1860 жылы Ресей мен Қытай арасындағы Пекин трактатынан кейін бұл жерлер Ресей империясының құрамына кірді. 1863 жылдан бастап Приморье өлкесіне корейлердің қоныстануы басталды. Менде сол кәріс ұлтының өкілімін.Қазіргі таңда Қызылорда қаласы және аудандарда 7565 корей ұлтының өкілдері мекен етіп жатыр. &nbsp;Расымен бұл аймақтағы өзге ұлт өкілдерінен орыстардан кейінгі ірі диаспора болып табылады. Сыр бойына қоныстанған корейлер қай кезеңде болмасын аймақтың барлық саласында өзіндік қолтаңбаларын қалдырып келеді. Олар облысымыздың әлеуметтік-экономикалық, саяси-қоғамдық, мәдени-рухани шараларына белсене атсалысады. Сонымен қатар, мемлекеттік қызметте жұмыс атқаратын, білім, ғылым, мәдениет медицина, бұқаралық ақпарат құралдарында, спорт, құрылыс, өнеркәсіп, кәсіпкерлік саласында, ауылшаруашылық секторында да толағай табыстар мен жетістіктерге жеткен корей ұлтының өкілдері жетерлік. Оны мақтанышпен айта аламын.Сізді қазақ халқының салт-дәстүрін білетін тұлға ретінде танимыз. Онан бөлек қазақ жазушыларының шығармаларына қызығушылығыңыз бар екен...Иә &nbsp;қазақ жазушыларының шығармаларын жақсы көремін. Оның ішінде қарымды қаламгер Ілияс Есенберлиннің шығармаларына деген құрметім ерекше. Өзге де&nbsp;ақын-жазушылардың шығармаларын сүйсініп оқимын. Дегенмен, Есенберлиннің қаламынан туған дүниелерде қазақ халқының тарихы кеңінен сөз болады. Қаншама ғасырға созылған тарихы жайында жан-жақты таныса аласың.Осы орайда «Көшпенділер» шығармасы маған ерекше әсер етті. Шәмшінің әндеріне деген құрметім ерекше. Қазақ халқы қашанда қонақжай дәстүрімен ерекшеленеді. Кезінде тағдыр жазуымен қазақ жеріне қадам басқан қаншама ұлт өкілдерін ешбір жатсынған жоқ. Барлығын бауырына басып, мейірім шуағын төкті. Сондықтан қазір елімізде өмір сүріп жатқан көптеген этнос өкілдері қазақ халқының осындай мейірімі үшін ризашылығын білдіреді. Көптеген қазақ әндерін де жатқа білемін. Іс-шараларға, қоғамдық жұмыстарға белсенді қатысамын. Қазақ тілінде ән айтамын. Қазақтың ұлттық тағамдарын өзім дайындай аламын.&nbsp;Әйелім&nbsp;— қазақ, бір ұл тәрбиелеп отырмыз.Әңгімеңізге рақмет.Сұқбаттасқан: Мейрамкүл Дауылбайқызы

Юрий  Хегай: Шәмшінің әндеріне деген құрметім ерекше

Қызылорда қалалық қоғамдық кеңестің кезекті отырысы өтті

<a href="https://kyzylorda-news.kz/">Kyzylorda-news.kz</a>&nbsp; Бүгін партияның облыстық филиалы жанындағы «Отбасы және Халықты әлеуметтік қорғау», «Білім және Денсаулық сақтау» мәселелері бойынша аймақтық кеңестердің бірлескен отырысы өтті.Жиында «Балалар мен жасөспірімдердің жазғы демалысын, бос уақытын мазмұнды ұйымдастыру мен сауықтыру» мәселесі сонымен қатар облыстық жастар денсаулығы орталығының 2023-2024 жылдар аралығындағы атқарған жұмыстары қаралды.Жалпы, аймақта 1-10 сынып аралығында 173 859 оқушы бар. Бүгінгі күні оның 170 383-ін немесе 98% жазғы тынығумен және еңбекпен қамту жоспарланған. Облыс көлемінде жазғы демалысты ұйымдастыруға 2518 педагог, 38 белсенді студент пен 23 ерікті тартылмақ.<blockquote>«Биыл мектеп жанынан жұмыс жасайтын 238 жазғы тынығу лагерінде тамақпен 25 823 оқушы, 290 лагерьде 131 879 бала тамақсыз демалатын болады. Одан бөлек, қала сыртындағы 8 лагерьде 7 ауысымда 7035 бала демалса, аймақтан тыс жерде орналасқан лагерьлерде 6 ауысымда 5646 оқушы демалыспен қамтылады.Оның ішінде 1430 бала «Қазақстан халқына» қоры арқылы «Қуаныш» демалыс орнына барады. Жалпы тынығумен 1-10 сынып оқушыларының 38504, яғни 22,1% құрайды», – дейді атқарылған жұмыстар жөнінде хабарлама жасаған облыстық білім басқармасы басшысының орынбасары Бектұр Қали.</blockquote>Жазғы уақытта балалардың бос уақытын тиімді ұйымдастыру мақсатында өңірде түрлі экскурсиялар мен арнайы турлар ұйымдастырылмақ. Мұнан бөлек «Ауыл лайф», «Сыр камп», «Дәстүрлі қоржын», «Жас қазақ», «Киелі Қазақстан», «Кітап құрттары» жобалары өтеді. Сондай-ақ, оқушылар арасында салауатты өмір салтын насихаттау, зияткерлік дағдыларды дамыту мақсатында биылдан бастап аймақ басшысының қолдауымен «Сыр лигасы» жобасы жүзеге асуда.Күн тәртібіндегі екінші мәселеге тоқтаслақ, «Облыстық жастар денсаулығы орталығы» мемлекеттік мекемесі өңір жастарына медициналық-психологиялық көмек көрсету мақсатында облыс әкімінің 2015 жылдың 25 маусымындағы № 57 қаулысымен Республикамызда алғаш рет дербес түрде құрылған. Бүгінде жастар денсаулығына қатысты өзекті мәселелердің алдын алу мақсатында жүйелі жұмыс жүргізіп келеді. Негізгі мақсаты - жасөспірімдер мен жастар денсаулығын сақтау мен нығайту. Статистикалық мәліметтерге сәйкес, бүгінгі күні облысымызда 841 000 адам өмір сүруде, оның ішінде 14-28 жас аралығындағы жастардың саны 167 739, бұл тұрғындардың 20%-ын құрайды екен. Өткен жылы Жастар денсаулығы орталығы барлығы 53 922 жасқа қызмет көрсеткен. Әлеуметтік санаты бойынша айтар болсақ, олардың 20,3% мектеп оқушылары, 62,8% студенттер, 10,3% жұмыс жасайтындар және 4,5% жұмыссыздар, 2,1%. маргиналды жастар.<blockquote>Өткен жылы орталықтың дәрігер мамандары 15 мыңнан астам азаматқа медициналық көмек көрестті. Қаралу нәтижесінде – 14 296 адамға кеңес беріліп, 1077 адам тұрғылықты жері бойынша емханаларда сауықтырылды, 60 адам ары қарай қосымша ем алуға жіберілді. Ағымдағы жылдың І тоқсанында өткізілген профилактикалық тексеруі нәтижесінде -3845 адамға кеңес беріліп, 247 жас тұрғылықты жері бойынша емханаларда сауықтырылды, 5 адам ары қарай қосымша ем алуға жіберілді», – дейді орталықтың ұйымдастыру - әдістемелік бөлімінің дәрігері Сәуле Каусова.</blockquote>Жиын барсында кеңес мүшелері балалардың жазғы тынығу лагеріне тасымалдау кезіндегі қауіпсіздікті қатаң бақылау алу, әлеуметтік осал топтағы балалардың 100 пайыз жазғы тынығу орындарына баруын қамтамасыз ету, зорлық-зомбылық және суицидтің, ерте жүктіліктің, нашақорлықтың алдын-алу бойынша жүйелі жұмыстар жүргізу секілді бірқатар ұсыныстарын жеткізді. Көтірлген ұсыныстар хаттамаланып, партиялық бақылауға алынды.

Кеңестердің бірлескен отырысы өтті

<a href="https://kyzylorda-news.kz/">Kyzylorda-news.kz</a> Қызылорда облысы бойынша мемлекеттік кірістер департаментінің түсіндіру жұмысы басқармасы және байланыс орталығының түсіндіруінше көпшілікке бір нәрсені жалға беруден түскен пайда пассивті табыс ретінде қызықты. Алайда, коммерциялық жылжымайтын мүлікке инвестиция салудың әртүрлі аспектілері туралы бәрі бірдей біле бермейді. Осы ретте мұндай жылжымайтын мүлікті жалға берудің оң және теріс жақтарын, тұрғын емес объектінің иесі нені білуі керек және пайдалы бөлмені қалай таңдау керектігін біле жүріңіз.Сонымен, коммерциялық жылжымайтын мүліктің иесі болу сіз оны сатып алған жағдайда ғана мүмкін емес. Сіз бизнес-объектіні сыйлық ретінде, мұрагерліктің жалпы тәртібімен немесе өсиет бойынша ала аласыз. Содан кейін дилемма: бұл коммерциялық жылжымайтын мүлікпен не істеу керек? Оны сатқан кезде, Егер меншік иесі оны жалға беруді шешсе, сұрақтар әлдеқайда аз болады. Қандай салық режимін таңдау керек? ЖК рәсімдеу керек пе? Егер сіз жеке адам болсаңыз, ғимарат бөлмесін заңды түрде тапсыра аласыз ба?Тәжірибе көрсеткендей, заңды айналып өтіп үй-жайды жалға беру пайдасыз.Біріншіден, мұндай заңсыз алаяқтық үй-жайдың сақталуын қамтамасыз ету үшін белгілі бір тәуекелдерді тудырады, екіншіден, жаңа бизнес Мемлекеттік кірістер органдарының назарына түспей ұзақ уақыт өмір сүре алады деген оймен айналыспау керек. Қазақстанның әкімшілік құқық бұзушылық туралы кодексінің 463-бабына сәйкес тіркеусіз кәсіпкерлік қызметпен айналысқаны үшін жеке тұлғалар үшін 15 АЕК (55 380 теңге) мөлшерінде айыппұл көзделген. Қайта бұзғаны үшін айыппұл артады.Коммерциялық нысандарда жалдау бизнесін заңдастырудың бес әдісі бар. Үш салық режимі жеке кәсіпкер (жеке кәсіпкер) ретінде тіркелуді көздейді. Жеке адамдар үшін тағы екі нұсқа бар.Егер коммерциялық объектінің иесі жеке тұлға болсаБұрын Қазақстанда жеке тұлғалар үшін екі салық режимі болған: бұл бірыңғай жиынтық төлем (БЖТ) төленетін режим немесе жеке табыс салығы бойынша декларация.Бірақ қазір «бірыңғай жиынтық төлем» Салық кодексінің 89-тарауының қолданылу мерзімі аяқталды. Ол 2023 жылдың 31 желтоқсанына дейін есептелген. Осылайша, 2024 жылғы 1 қаңтардан бастап жеке тұлғалар тіркеусіз 10% ставка бойынша мүліктік кіріс бойынша ЖТС есептей алады және 240.00 нысаны бойынша декларация бере алады. Ол 31 наурызға дейін салық төлейтінін ұмытпаңыз.Декларацияны салық түрінде де, E-salyqazamat қосымшасында да тапсыруға болады. Салық табыстың 10% құрайды, декларацияны төлеу мерзімі 10 сәуірге дейін. Салық кезеңіндегі кірістің шегі жоқ.Мысалы: жылжымайтын мүлік айына 300 мыңға жалға беріледі делік. Оның 30 мыңы салық. 12-ге көбейтеміз, нәтижесінде жылына 360 мың теңге салық аламыз.Кейде жалға беруші мен жалға алушы үй-жайды жалға алушы заңды тұлға салық сомасын иесінен ұстап, оны төлейтіндей етіп келіседі. Бірақ салық агенттеріне жалға беру кезінде салықтарды әрдайым агенттің өзі ұстайды және төлейді.Коммерциялық нысанды жалға берудің тағы бір нұсқасы бар: риэлтор арқылы. Жеке тұлға риэлторлық Агенттікпен шарт жасасуға құқылы, ал агенттік клиенттерді іздестіріп, жалға алушыны бақылаумен айналысатын болады.&nbsp;Бірақ бұл нұсқаны аз адамдар таңдайды.&nbsp;&nbsp;&nbsp;

Коммерциялық жылжымайтын мүлікті дұрыс және заңды түрде жалға беру туралы не білеміз?

<a href="https://kyzylorda-news.kz/">Kyzylorda-news.kz</a> Мүліктік табыс алу кезінде, оның ішінде құн өсімінен кіріс пайда болған жағдайда мүлікті сату кезінде тұрғылықты жері бойынша салық органына декларация табыс ету және белгіленген мерзімде (есепті жылдан кейінгі жылдың 31 наурызына дейін) өсімнен жеке табыс салығын төлеу қажет. Қазақстан Республикасында бір жылдан аз меншік құқығындағы мүлікті өткізу кезіндегі өсім жеке тұлғаның табысы болып танылады.Жеке табыс салығы бойынша міндеттемелер бар.Мүліктік табыс жеке тұлғада келесі мүлікті сату кезінде пайда болады:- тұрғын үйлер (пәтерлер, үйлер, гараждар) - егер мұндай тұрғын үйлер меншік құқығында бір жылдан кем болған жағдайда және құнның өсуі (өткізу бағасы (құны) мен сатып алу бағасы (құны) арасындағы оң айырма) болған жағдайда;- тұрғын үйге іргелес және оның астындағы, гараждың астындағы жер учаскесі, саяжай жер учаскесі, нысаналы мақсаты бар жер учаскесі жеке тұрғын үй құрылысы-егер мұндай жер учаскелері меншік құқығында бір жылдан кем болған және жер учаскесін өткізу бағасы (құны) мен оның кадастрлық (бағалау) жер учаскесіне меншік құқығы туындаған күнгі құны)- коммерциялық жылжымайтын мүлік және оған іргелес және оның астындағы жер учаскесі (дүкен, кеңсе, қонақ үй, мейрамхана және т. б.), коммерциялық жылжымайтын мүлікке арналған нысаналы мақсаты бар жер учаскесі-мұндай жылжымайтын мүліктің меншік құқығында болу кезеңіне қарамастан, егер оны өткізу бағасы (құны) мен сату бағасы (құны) арасындағы оң айырма болса сатып алу бағасымен (құнымен));- механикалық көлік құралы-егер мұндай көлік құралы меншік құқығында бір жылдан кем болған жағдайда және көлікті Қазақстан аумағына әкелу кезінде төленген кедендік төлемдерді және/немесе ҚҚС пен акцизді қоса алғанда, оны өткізу бағасы (құны) мен оны сатып алу бағасы (құны) арасындағы құн өсімі (оң айырма)болған жағдайда;- инвестициялық алтын, бағалы қағаздар, қатысу үлесі, қаржы құралдары - мұндай мүліктің меншік құқығында болу кезеңіне қарамастан, егер құнның өсуі (оны өткізу бағасы (құны) мен оны сатып алу бағасы (құны) арасындағы оң айырма) болса мүліктік табыс төленеді.&nbsp;

Жеке табыс салығы бойынша орындалатын міндеттемелер

<a href="https://kyzylorda-news.kz/">Kyzylorda-news.kz</a> Төтенше жағдай саласы – кез келген адам еңсере бермейтін, қызығы мен қиыншылығы көп сала. Бұл салада қызмет ететін мамандар да түрлі жаттығу мен дайындықтан өтіп қана келеді. Алапат өрт, жер сілкінісі, орман өрті, тіпті су тасқыны секілді айтып келмейтін апаттың кез келгенінде зардап шеккен қарапайым тұрғындарға ең алдымен көмек қолын созатын да осы төтенше жағдай қызметкерлері. Қандай жағдай болмасын адам өміріне дәрігелерден кейінгі жауапты маман десек артық айтпағандығымыз. Тіпті кейде&nbsp;медицина қызметкерінің де жұмысын атқарып жатады. &nbsp;Төтеншеліктер үшін ең алдымен өзінің емес өзгенің өмірі бірінші орында. Сондықтанда бұл сала аса жауапкершілікті талап етеді.Бұл салада бірнеше буынға созылған еңбек династиясын жалғап келе жатқан әулет өкілдері де бар. Бүгінде Қызылорда облыстық төтенше жағдайлар департаментінің бастығы қызметін атқаратын Руслан Қайрақбаевтың бұдан бұрын атасы мен әкесі азаматтық қорғаныс саласында жемісті қызмет атқарған. Олардың қаншама жылдарға жалғасып келе жатқан еңбектері көпке үлгі, әрі, өнеге.Руслан Сламбекұлының бұл саланы таңдауына Атасы Бодан мен әкесі Сламбектің септігі көп тиген. Бала кезінен олардың қызметін көріп өскен ол мамандық таңдауда еш қиналмаған. Керісінше, ата жолын жалғастыруды ойлайды.Атасы − Бодан 1952-1975 жылдары Қызылорда қаласындағы өрттен қорғау саласында әртүрлі қызметтер атқарып, құрметті зейнет демалысына шыққан. 1919 жылы Сырдария ауданындағы «Комсомол» кеңшарында дүниеге келген ол кісі Екінші дүниежүзілік соғыста рота саяси жетекшісінің орынбасары болып еңбек еткен. Одан соң Мемлекеттік қауіпсіздік комитетінде, Ішкі істер министрлігінде қызметте болады. Қаншама мақтау қағаз алып, 11 медальмен марапатталған. Әкесі Сламбек өрт сөндіру саласында 1980-1997 жылдары жемісті еңбек еткен.<blockquote>− Рас, атам мен әкем кезінде төтенше жағдайлар саласында қызмет атқарды. Расында, менің мамандық таңдауыма сол кісілер әсер етті. Ата жолын жалғауды армандап өстім деуге болады. Ол кісілер секілді елге құрметті болуды, кәсіби маман иесі болуды бала кезден мақсат тұттым. Әкем Сламбек майор шенімен зейнетке шығып, ұл-қызының ортасында ғибратты ғұмыр кешуде. − дейді ол.</blockquote>Руслан Көкшетау техникалық институтының «өрт қауіпсіздігі инжинері» мамандығы бойынша аяқтаған. Одан кейін Қызылорда экономика, экология және құқық университетін «заңгер» мамандығы бойынша тәмамдайды. Еңбек жолы №11 мамандандырылған өрт бөлімінің аға инженері-кезек жетекшісі болудан басталады. Мұнан соң Қызылорда қаласы Төтенше жағдайлар саласындағы мемлекеттік бақылау және қадағалау бөлімінің бас маманы, Төтенше жағдайларға ден қою басқармасының жедел кезекшісі, Азаматтық қорғаныс басқармасы азаматтық қорғаныс іс-шараларының орындалуын бақылау бөлімінің бас маманы және өзге де қызметтер атқарып, мол тәжірибе жинақтайды. Одан кейінгі жылдарда департамент бастығының орынбасары, облыстық мемлекеттік өртке қарсы қызмет басқармасының бастығы болады.<blockquote>− Біздің әулеттегі атам, әкем және менің төтенше жағдайлар саласындағы жалпы еңбек өтіліміз жетпіс жылдан асты. Бұл уақытта қаншама өзгерістер болды. Біздің салада да қаншама жаңашыл істерге жол ашылып, техника жаңарту бағытында өзгерістер жасалды. Ол кездегі төтенше жағдайлар саласының қызметі мен бүгінгі кезеңді, техникалық жабдықтауды салыстыруға ешбір келмейді. Жетпіс жылдай бұрын материалдық-техникалық база қазіргідей жоғары деңгейде болды деп айта алмаймыз. Соған қарамастан аға буын өкілдері жұмыстың жоғары деңгейде жүруіне барынша зор үлес қосты. Олардың атқарған еңбегі өлшеусіз.&nbsp;Техниканың су сыйымдылығы аз болғанына қарамастан өрттен қорғауда аянбай жұмыс жасады.Қай кезде де ардагерлердің еңбегін жоғары бағалаймыз. Қазір материалдық-техникалық базаны жаңартуға жоғары деңгейде мән беріліп келеді. Республикалық бюджеттен 2022 жылы 3 өрт сөндіру автотехникасы берілсе, «Қамыстыбас» елді мекеніндегі құтқарушыларға арналған құрастырмалы-жиналмалы модульдік үй салынды. Былтыр республикалық бюджеттен тағы 6 автотехника алынды. Облыс әкімінің қолдауымен қосымша 7 бірлік техника биылғы 28 ақпанда жеткізілді, − дейді.</blockquote>Руслан Сламбекұлы саланы басқарғандықтан жас мамандарға ерекше көңіл бөледі. Олардың білім алуына, біліктіліктерін ұштауына жағдай жасауды алдыңғы орынға қояды. Бұл оның өзінің жұмысына деген адалдығы, жастарға деген қамқорлығы.<blockquote>− 2023 жылы облыстық Төтенше жағдайлар департаменті «Өрт сөндіру және авариялық құтқару жұмыстары қызметінде» 18 жас еңбек жолын бастады. Оған қоса М.Ғабдуллин атындағы Азаматтық қорғау академиясын тәмамдаған 6 маман иесі қызметке жолдамамен келді. Сондай-ақ, Ресейдің Мәскеу, Санкт-Петербург, Беларусьтің Минск қалаларындағы азаматтық қорғау саласындағы оқу орындарына оқуға түскен жастар бар. Ал М.Ғабдуллин атындағы Азаматтық қорғау академиясына 4 талапкер оқуға қабылданды. Бұл саладағы оқуға қабылданатын талапкер ҰБТ бойынша жоғары балл иегері, спортқа шыныққан, денсаулығы жақсы, алдына мақсат қойғыш, білімді, еңбекқор, адамгершілік, қамқорлық қасиеті болғаны абзал. Өйткені, аталған салада қызмет еткен сәтте осы қасиеттің барлығы таразыға тартылады. Қысқасы, құтқарушыларға қойылатын талап жоғары, − деген ол қызылордалық төтенше жағдайлар саласының мамандары шетелдік және өзге өңірдегі әріптестерімен қандай байланыс жасап жатқандығын сөз етті.</blockquote><blockquote>− Шетелдік және өзге өңірдегі әріптестермен жоғары деңгейде байланыс орнатылған деуге толық негіз бар. Атап айтқанда, Байқоңыр қаласында ресейлік өрт сөндірушілерімен бірге оқу-жаттығу өткізіліп, мамандар тәжірибесін арттыра түсті. Былтыр қыркүйек айында Түркияның Стамбул қаласында өткен өрт сөндіру-құтқару чемпионатында Қазақстан құрамасы сапында Аралдағы №3 мамандандырылған өрт сөндіру бөлімінің аға инженері Әбдібек Еркін қатысып, жалпы командалық есепте екінші орын алып қайтты. Ал сол жылдың мамыр айында Ресейдің Волгоград қаласында Тоғжан Тұрсынхан өрт сөндіру-құтқару спортынан өткен жарысқа ел құрамасы сапында жалпы командалық есепте үздік үштіктен көрінді. Былтыр 1 тамызда департамент ғимаратында маңызды жиын өтті. Оған Біріккен Ұлттар Ұйымының Қорғау және қауіпсіздік департаментінің Қауіпсіздік бойынша кеңесшісі Джастин Аллим Рашид қатысты.</blockquote>Кездесу барысында БҰҰ-ның ҚР Қауіпсіздік департаменті мен ҚР Үкіметінің өңірлердегі қауіпсіздік құрылымдары арасында қатынас орнату, төтенше жағдайлардың алдын алу және жою қажеттілігіне қарай бірлесіп жұмыс істеу жағдайы жан-жақты таразыланды.Айта кетерлігі, департаментте халықаралық азаматтық қорғаныс ұйымының сүңгуірлерді даярлау стандартына сәйкес бірінші сыныпты сүңгуір біліктілігін алған маман Мейрамбек Доспенбетов қызмет атқарады, ол халықаралық құтқару операцияларына қатыса алады. Ол жедел-құтқару жасағында 20 жылдан астам уақыт жұмыс жасауда, − дейді.Аса қауіпті саланы меңгеріп, өңірдің тыныштығын сақтауға, қауіп-қатердің алдын алуға бар ғұмырын арнаған Руслан Сламбекұлының бүгінде&nbsp;еңбегі зор. Алдағы жұмысына тек сәттілік тілейміз.

 Төтеншеліктер династиясы

<a href="https://kyzylorda-news.kz/">Kyzylorda-news.kz</a> &nbsp;Ұлан-байтақ даламыздың сынық сүйем жері біз үшін ұлық көрінеді. Арғы-бергі қиырына ат арытып әрең жететін қазақ жерінде талай жақсы мен жайсаң ғұмыр кешті. Алаштың ардағына айналған тұлғалар қалың қауымды уәлі сөзімен ұйыта білді. Сондай-ақ олар ерекше қасиеттерімен елдің есінде мәңгілік жатталып қалды. Сырдағы жұрт тағзым ететін киелі орындар жетерлік. Солардың бірі – Қармақшы топырағында жамбасы жерге тиген Марал баба Құрманұлы.Марал ишан – тарихи тұлға, Ислам дінінің көрнекті насихатшысы. Кезінде Бұхара медресесінде, кейін Мазари Шариф­те (қазіргі Ауғанстан жері) білім алған. Ағартушылық қызметпен де көп айналыс­қан ол Қызылорда, Қызылжар, Қоста­най өңірлерінде бірнеше мешіт пен мед­­ресе ашқан.Сәрсенбіде Қазақстан мұсылмандары діни басқармасының төрағасы Наурызбай қажы Тағанұлы ауданымызға жұмыс сапарымен келді. Бас мүфти Жосалы кентінде жаңадан салынып жатқан «Марал Ишан» атындағы мешіт құрылысының жұмысымен танысты. Нысан басында, аудан әкімі Жандос Еркінбекұлы Қазақстан мұсылмандары діни басқармасының төрағасына ауданның тыныс-тіршілігі мен өңірді дамыту бағытында атқарылып жатқан игі жұмыстарды баяндады.Сапар соңында, Бас мүфти үш жүзге пір болған Марал Ишан кесенесіне табан тіреді. Зиярат етуге бас муфтимен қатар,&nbsp;Діни басқарма жанындағы Ақсақалдар кеңесінің мүшелері,&nbsp;аудан ақсақалдары мен бірқатар азаматтар қатысты.Кесене басында баба рухына құран бағышталды. «Жаратушы Жаббар Иеміз Марал бабамызды мейіріміне алғай. Жамағатпен жасаған зияратымызды қабыл етіп, хақ дініміз Исламның өсіп-өркендеуін нәсіп қылғай. Еліміз аман, жеріміз тыныш, егемендігіміз баянды болғай» деді&nbsp;жамағатпен бірге ел ертеңі үшін дұға жасаған бас мүфти Наурызбай қажы Тағанұлы.

Бас мүфти Марал баба мазарын зиярат етті

<a href="https://kyzylorda-news.kz/">Kyzylorda-news.kz</a>&nbsp; Төретам кенті кітапханасының "COWORKING" орталығында ел ағасы, Байқоңыр өңірлік Ауғанстан ардагерлерінің төрағасы Кенжебек Үйрековтің «Өткен күнде белгі бар» атты кітабының тұсаукесері өтті. Кітап ауған соғысына қатысқан барлық жауынгердің құрметіне арналады."1979-1989 жылдар аралығында он жылға созылған сұрапыл соғыста жат жерде жанын пида етіп, жап-жас жігіттер қыршыннан қиылды. Бұл біз үшін отты жылдарда жалынды жастығы қалған барша жауынгерді, қандыкөйлек достарымызды еске алатын қасіретті де қасиетті жылдар болып, қанша уақыт өтсе де жадымызда жаңғырып тұра бермек" деп толғанады автор.Кітап беташарының алғы сөзін жазушы Жантөре Әбдірейімов жазса, "Төретам кенті әйелдер кеңесі" қоғамдық бірлестігінің төрайымы Ахметкүл Аралбаева жаңа әдебиеттің оқырманы көп болсын деп, сәттілік тіледі.Кеш аясында №85 орта мектептің оқушысы, жас ақын Еркебұлан Жалғасбаев өзінің арнауын мәнерлеп оқыса, іс-шара қонақтары марқұм болып кеткен Жантөре Әбілдаев ағамыздың жұбайы, ұстаз Жаңыл Молдабаева апайымыз, Қалдыбек Алтыруов ағамыздың інісі Қазбек Алтыруов, Төлеген Өсербаев ағамыздың бауыры Тілеген Сәрсенбаевтар толғаныстары мен естеліктерімен бөлісті.Ардагерлер Ғани Адаев, Әбубәкір Маханов, Әскербек Жолмырзаев, Сұлтанбек Жұмабаев, Орынбек Шайманов ағаларымыз майдангер достарына деген сағыныштарын маржан сөзбен айтып берді.Кездесуде Байқоңыр қаласы, Ақай ауылы мен Төретам кентіндегі &nbsp;ақын-жазушылардың кітапханаға сыйға тартқан кітаптарынан дайындалған "Байқоңыр жыр маржандары" атты кітап көрмесін кітапханашы Айгүл Жеңісқызы таныстырса, кент клуб үйінің әншілері Бақтияр Сабырбаев, Ғазиз Сүлейменов, Рауан Ысқақовтар әннен шашу шашты.Қымбат МОЛЫБЕКҚЫЗЫ

Қазақстан және Қызылорда облысының жаңалықтары: Қоғам