ХІХ ғасырда патша отаршылдарына қарсы ұлт-азаттық күрес жүргізген Кенесары хан мен оның қасында бірге болған, елге, халыққа белгілі адамдар көп еді. Солардың бірі – Кенесары туралы деректерде жиі айтылатын халық батыры Бұқарбай Естекбайұлы. Бұқарбай батырдың даңқы тек Сыр өңірінде ғана емес, тұтас қазақ даласына ерлігімен танымал. Біз осындай батырдың біздің өңірден шыққанын мақтан тұтамыз.&nbsp;Жалағаш ауданына қарасты Бұқарбай батыр ауылында баһадүрдің атындағы тарихи үй – музей бар. Бұл ғимарат батырдың 180 жылдық мерейтойы қарсаңында пайдалануға беріліп, Бұқарбай Естекбайұлының туғанына – 200 жыл толғанда жаңадан қайта салынған екен. Онда батырдың ұрпақтары өткізген көне жәдігерлер сақтаулы. Біз осы тарихи үйге барып, ондағы әр жәдігердің, экспонаттың тарихымен таныстық.&nbsp;Музейге кіреберісте Бұқарбай батырдың ескерткіші қойылған.&nbsp;Ғимараттың бірінші залында картиналар орналасқан. Бұл картиналарды батырдың мерейтойы қарсаңында танымал суретшілер тарту еткен. Майлы бояудан салынған. Бір картинада батырдың бейнесі, біреуінде өмірлік жары Шынар анамыз, тағы бірнеше картинада қазақ батырларының жорық кезіндегі, шайқас кезіндегі суреттері бейнеленген. Батырдың жары ажарлы, қайратты жан болғанын тарихтан білеміз. Шынар анамыздың ерлігін дәріптейтін ел аузында жүрген әңгіме де бар. Біле білсек, «Шынар көлдің» атауы осы кісінің есімімен байланысты.&nbsp;Бұқарбай батыр нөкерлерін ертіп, шапқыншылықпен ұзақ уақытқа жорыққа кетеді. Соны естіген қоқандықтар батырдың әйелін өлтіріп, кек алмақшы болады. Бір күні Сыр өңірін, Сырдария бойын жайлап отырған Бұқарбай батырдың ауылына келіп тұтқиылдан шабуыл жасайды. Сол сәтте «Еркегі жоқ бейбіт ауылды шапқалы тұрғандарың қай сасқандарың, қарапайым халыққа, бала-шағаға тимеңдер, мен керек болсам алдарыңда тұрмын» деп, шапқыншыларға қарсы тұрған екен. Бірақ қоқан шапқыншылары оны қоршап, қыспаққа алады. Ақырында найза түйреп өлтіріп, денесін көлге тастайды. Жаумен шайқас кезіндегі Шынар анамыздың ерлігін көрген ауыл адамдары Шынардың денесін арулап, көлдің жағасына көмген көрінеді. Сөйтіп ел жайлаған көл «Шынар көлі» атанып кетеді. Негізінде батырдың жарының өлімімен байланысты бір-екі аңыз-әңгіме бар. Солардың ішіндегі шындыққа жанасатыны да, көнекөз қариялардың білетіні де осы.&nbsp;Тарихи үйдегі әрбір экспонаттың тарихымен таныстырған музей қызметкері Мереке Әбілдаева батырдың ерлік істерінен әңгіме қозғап жүрді. «Бұл музейдің алғашқы директоры – Жоламан Алданазаров. Бұл кісі де тегін адам емес. Атақты батырдың тікелей ұрпағы. Қанша жыл осы музейді басқарды» дейді музей қызметкері. Тарихтан сыр шертетін көне жәдігерлердің ішінде ең алдымен біздің көзімізге түскені – Бұқарбай батырдың бір жарым ғасырға жуық уақыт бұрын жорықта пайдаланған қайқы қылышы. Қолымызға алып көрдік. Осыншама уақыт өтсе де, сыны кетпепті. Жақсы сақталған деуге болады. Жүзі әлі де өткір. Қылыштың салмағы да әжептәуір ауыр екен. Қыны ағаштан жасалғанға ұқсайды. Қолымызға алып тұрып «Осы қайқы қылышпен батыр бабамыз ұланғайыр жазиралы даламызға көзін сатқан жауды талай мәрте жер жастандырды-ау. Осы қарумен елін, жерін қорғап бізге бейбіт күннің таңын атырып кетті-ау» деп баба рухына еріксіз алғыс айттық. Мұнымен қоса музейде сонау&nbsp;XVIII-XIX&nbsp;ғасырлардағы темір қалқан, шақпақты аңшы мылтығы және Нұрмағанбет Оспанқұловтың шоқпары тұр. Бұқарбай батырдың шашақты туы, күмістен жасалған мөрі, өзінің қызына дүние есебінде берген оюлы сандығы да осында сақтаулы. Күмістен соғылған мөрдің ортасында араб әріптерімен жазылған сөз бар. Музей қызметкерінен сұрағанымызда, бұл жазудың мағынасы «Бұқарбай баһадүр» дегенді білдіретінін айтты.&nbsp;Екінші залдың төрінде орналасқан қабырғада батырдың суреті бейнеленген тоқылған кілем ілулі тұр. Оның қасында Бұқарбай батырдың мүсіні орналасыпты. Бұл мүсінді батырдың мерейтойында Тереңөзек ауданының мүсіншісі Жәркен Смағұлов арнайы жасаған екен. Гипстен құйылған, сырты сырланған. Көлемі аса үлкен емес. Батырдың сауыт-сайманын асынып, жорыққа дайындалып отырған бейнесі бейнеленген.&nbsp;– Жастайынан ел қорғау жорықтарына қатысып, шыңдалып өскен Бұқарбай батыр ержүректілігімен көзге түседі. Кенесары көтерілісіне алғашқылардың бірі болып қатысқан. Ол 1839 жылы тамызда Ақмола бекінісін алуға қатысты. Орыс тіліндегі деректерге қарағанда, Бұқарбай осы шайқастардың бірінде ауыр жараланып еліне қайтқан соң бейбіт еңбекпен айналысқан. Егін егіп, 1854 жылы Сырдария сағасынан күні бүгінге дейін ұрпақтары пайдаланатын «Бұқарбай арығын» қаздырған. Талайды көріп, ұзақ өмір сүрген батыр туған жерінде 1898 жылы дүние салды. Батырдан тараған ұрпақтары бүгінде өзі туып-өскен өңірде өмір сүруде.Ауыл тұрғындары жиі келеді. Батырдың тұтынған заттарын, қылышын, мөрін көріп, батыр бабаны еске алып тұрады, – дейді музей қызметкері.&nbsp;Музейде ауылдың ұстасы Мұқтасын Қауқановтың баласы өткізген зергерлік көрік, сонымен бірге үзеңгілер, қырықтық, құранды ер, ас үй, тұрмыстық бұйымдар мен ағаштан жасалған ыдыс-аяқтар да тарихтан сыр шертіп тұрады. Бір бөлігінде Сорлыасардан табылған қыш құмыралардың сынықтары, Қарақұмнан табылған қобыз, өгіз соқа орналасқан. Сонымен қатар сол ауылдан шыққан атақты тұлғалар, батырлар, &nbsp;соғыс ардагерлері және басшыларға арналған витрина да тарихи үйге көрік беріп тұр.&nbsp;Шағын ғана екі залдан тұратын мудейде тарих беттерінен сыр шертетін құнды жәдігерлер бар. Өткенді танып-білмей, болашаққа бағдар жасау мүмкін емес. Біз музейдегі экскурсия барысында Бұқарбай батырдың өмірінен, ерлік істерінен тағы да мағлұмат жинап, тарихқа көз жүгірттік.

Тарихқа толы музей

Көктемгі науқан орта тұсына жеткен шақта алқаптағы жұмыс қыза түседі. Қайнаған тіршілікке қарап тұрып, осынша ырзық-несібесін адалынан берген қара жерге «Жер-Ана» деп айдар таққан адамнан айналасың. Рас қой, тастаған дәнің мыңдаса, ала жаздай атыз жағалағандағы бейнетіңнің зейнеті қайтса «Жер- Ана» демей не дейсің! Өткенде аудан іргесіндегі «Сәрке батыр» шаруа қожалығына бардық. Көшені бойлай келе алқапқа енгеніміз сол еді, атыз басындағы керемет көрініс маған қара жердің қадірін ұқтырды. Ауыл шаруашылығы саласындағы қажырлы мамандардың қолтаңбасы қалған бұл дала төсі кейінгі буынға аманат екен ғой. Ал соны жете түсініп, өткеннен өнеге алған бүгінгі буыннан айналасың.&nbsp;Шаруашылықтың шираған жұмысына қарап саладағы кадр жастармен толығып жатқанына көз жеткіздік. Күрішке түскен комбайн үстінде де жас маман, күзгі науқан барысында босаған жерді көктемгі егіске дайындап жатқан трактор тізгіндеген еңбек адамдарының басым бөлігі жастар. Буын алмасудың бүгінгі шаруашылықтарда жүріп жатқаны қуантады. Оның үстіне қазір заманауи техникалармен жарақтанып жатқан ауыл шаруашылығының жұмысы айтарлықтай жеңілдеді. Ал «Сәрке батыр» ЖШС-дағы Наурыз Демесінов сала серпін алмай тұрып та өзінің білікті маман екенін ісімен дәлелдеген майталман механизатор.&nbsp;2007 жылдан бері аталған шаруашылыққа жұмыс істейтінін Наурыздың уақыт өте түрлі техника тізгіндеймін деп өзі де ойламаған. Бұл салада он жылдан астам тәжірибесі бар білікті маман көктем басталса ХТЗ тракторымен сүдігер жұмыстарына кіріседі. Ал күз болса комбайнға отырып, күріш жинайды. Бұл маусымда комбайншылар жетерлік. Десе де өнімнің мол болуына байланысты күріш тасымалдайтын көлік тапшылығы байқалады. ХТЗ тракторына тіркеме жегіп алып, Сыр салысын тасымалдауға жәрдемдесіп жүргені де сондықтан.&nbsp;– Шаруашылық жұмысы тек қыс мезгілінде тоқтайды. Қалған уақытта өздеріңіз көріп тұрғандай, бізге дамыл жоқ. Кеше ашылған 100 гектар жерді көктемгі науқанға дайындап қойдық. Енді қалған жерлер босағанға дейін осылай күріш тасымалдауға жәрдемдесемін. Жерді сүдігерлеуге келсек, егістікті күзде бір, көктемде бір жыртқан абзал. Себебі күзде айдалған жердің бетіне шыққан арам шөптер қыстағы аязбен үсіп кетеді. Есесіне келер жылы өнім отақтың ешқандай кедергісінсіз тегіс бас алатын болады. Алдын ала тағы бір айдап алып жатқан себебіміз сондықтан. Өзімнің әкем де ауыл шаруашылығының тәжірибелі маманы. Менің бүгінгі жетістіктерімнің бәрі – сол кісіден үйренгендерімнің жемісі, – дейді механизатор.&nbsp;Байқасақ айтқан сөзінің жаны бар. Осының алдында ғана шаруашылық төрағасымен сөйлескенімізде бұрын өнімді аз беретін отақ басқан алқап мәселесінен осындай әдіспен арылғанын айтқан еді. Есесіне былтыр гектарынан 30-35 центнерден өнім берген сол атыздардан қазір 69-70 центерден өнім алынуда. Төраға бір сөзінде тәжірибеде бар тәсілді меңгеріп алған осындай жас мамандарымен мақтанатынын да жасырмады. Біз Наурыздың ауыл шаруашылығы саласы бойынша айтқан бір ғана тәжірибесімен бөлісіп отырмыз. Болмаса жерді сүдігерлеу кезінде нендей жұмыстарға мән беру қажет, дәннің толық бас алуы үшін қандай жағдай жасалу керектігі жөнінде біраз кеңес алдық. Майталман механизатор агрономия саласынан да бейхабар емес. &nbsp;Талай техниканың тізгіндей жүріп, саланың жұмысын меңгеріп алған механизатордың біліктілігіне тәнті болдық.&nbsp;

Қыстың қамын жазда ойла

Кәсіпкерлікті қолдауға бағытталған мемлекеттік бағдарламалар соңғы жылдары ауыл халқының әлеуетін арттыруға да өз септігін тигізіп жатыр. Бұрынғыдай емес, қазір кәсіпке ден қойып, қаржылай қолдаумен іс бастап, оны әрі қарай дамытып жатқандардың қатары артуда. Олардың ішінен ауылдық елді мекендер тұрғындарының табылып жатқаны бізді қуантып отыр. Неге? Себебі бұрын ауыл халқы іс бастауға жүріксінетін, тіпті қаржылай қолдау көру үшін оның құжаттарын дайындауға орашолақ қарайтын. Қазір ше, қазір мүлде басқа. бүгінде ауыл халқы да кәсіпсіз нәсіп болмайтынын жете түсінді. Жалағаш ауданына қарасты 14 елді мекеннің қайсысына атбасын бұрсаңыз да ауыл халқының кемінде 7-8-і мемлекеттік бағдарламамен қаржылай қолдауға ие болып, іс бастап жатқанын көресіз. Бұл өз кезегінде әлеуметтің әлеуетін арттырумен шектелмей, жұмыссыздық мәселесінің алдын алуға да үлкен көмек болуда.Осы кәсіпкерлікті дамытуға арналған қай жобаны алып қарасаңыз да мақсаты бір – елде жұмыссыздықтың алдын ала отырып, жергілікті халықтың тұрмыс сапасын жақсарту. Кеше Жаңадария ауылына барғанымызда мұндай бағдарламалардың расында ауыл халқы үшін үлкен көмек екеніне көз жетті. 500 мың теңге қайтарымсыз грантқа ие болған Нұрлан Шериев бүгінде құс шаруашылығын дамытуға ден қойған. Ауыл азаматы тиісті қаражатқа Қараөзек ауылынан «Линда» тұқымды 60 қаз сатып алыпты. Мұнан бөлек балапан шығаратын арнайы аппаратты «Қазпошта» АҚ арқылы Алматы қаласынан алдырған. Іскер азамат алдағы уақытта қолдағы қазбен шектелмей олардың қатарын арттыруға ден қоятынын айтады.&nbsp;– Осыдан 2-3 ай бұрын мемлекеттің қайтарымсыз қаржылай қолдауына ие болдым. Қолға алған жобамның бағытын айтып едім, кәсіпкерлікті қолдауға арналған мекеме қызметкерлері маған жәрдем берді. Тиісті қаржыға қол жеткізген бойда іс бастауға кірісіп кеттім. Осылайша желідегі жарнамалардан Қараөзек ауылында «Линда» тұқымды қаз барын естіп, 60 қаз сатып алдым. Ал әлгі аппарат алдағы уақытта олардың қатарын көбейтуге қажет болады. Күн жылысымен осы бағыттағы жұмысыма кірісемін. Біздің ауыл негізінен мал және құс шаруашылығын дамытуға қолайлы өңір. Себебі мұнда су да бар, шөп те бар. Ал қысқы құс азығын енді сатып алуға тура келеді. Өткенде 3-4 тонна жем алып қойдым. Сонымен бұйыртса қыстан шығады. Ал келер жылы қаздың қатары артса, қажетті жем-шөптің де көлемі артады. Алдағы уақытта осы үй құсының басқа да тұқымдарын өсіруді қолға алсам деймін. Кешегі қаржылай қолдау маған үлкен көмек болды. Біз мемлекет ұсынған осындай қолдау барда кәсіпке кірісуіміз керек, – дейді жаңадариялық Нұрлан Шериев.Кәсіпкер тек қаз өсірумен шектелмеген. Арнайы аппаратымен балапан шығарып, етті тауық өсіруді де қолға алған. Оның айтуынша, әлгі аппарат қаздың жұмыртқасынан 30 күнде балапан шығарса, тауықтың жұмыртқасын 20 күнде қорытып үлгереді екен. Қаз тек наурыз-сәуір айында жұмыртқалайтындықтан одан көп пайда болмайтын көрінеді. Сондықтан кәсіпкер көбіне құсты бордақылағаннан табыс мол болатынын айтады. &nbsp;– Қаздың басқа түрі қалай болатынын білмеймін, бірақ осы тұқымы тек екі-ақ айда жұмыртқалайды. Сондықтан біз тек ет бағытында табысқа жетуді көздейміз. Ондай кезде тауығымыз бар. Мәселен, кепедегі тауықтың өзінен осылардың жем-суын шығаруға болады. есеппен іс қыламын деген жанға пайда табудың жолы көп қой. Ол үшін қаржылық сауаттылық керек екен, мен осыны ұқтым. Бұрын біздің ауылдың тұрғындарында мемлекеттік бағдарламамен іс бастауға ниет бола бермейтін. Қазір Аллаға шүкір, олардың қатары артып отыр. Мен де осымен шектеліп қалмаймын. Өз жоспарымды толық орындасам, кәсіптің басқа да көздерін қолға аламын, – дейді іскер азамат.Табысы өз алдына, аулаңда қаздың керіле қанатын кеңге жайғанының өзі бір сән ғой. Ара-тұра арық жағалап, суға малынғанының өзі неге тұрады. Ауыл сонысымен қызық. Көптен бері мұндайға кезікпеген соң біз бұл көріністен ерекше әсер алдық.&nbsp;

500 мыңмен құс кәсібін бастаған

Жалағаш ауданындағы &nbsp;ауыз су құрылысының басынан келе жатқанда көше жиегіндегі үйлердің бірінің ауласында станокпен жұмыс жасап жатқан ағамызды көзім шалды. Басылымның кезекті санына еңбек адамының бар ынтамен жасап жатқан жұмысын насихаттайық деген оймен көлік тізгіндеген әріптесімді тоқтаттым. Үйге қарама-қарсы орналасқан сарайдың алды толған пластик есік-терезелердің қалдығы. Пластик түгілі ағаштан жасалған құрылыс заттарының өзін сырттан таситын жаңадарияда осындай кәсіпті біреу дөңгелентіп отыр дегенге ішкі түйсігім сенер емес. Алайда ауданнан ең шет орналасқан елді мекен халқының кәсіпке деген қызығушылығы мен ойлағаннан да жоғары болып шықты.Әріптесім Кирил Денисов екеуміз аялдаған шаңырақ Жеңіс Исаев ағамыздың үйі екен. 15-20 жылдай пластик есік-терезе шығаратын зауытта жұмыс жасаған жігіт ағасы кейін бұл істі өзі бастауға бел буады. Қажетті құрал-жабдықтар алуға қаржысы жетпеген кейіпкеріміз кәсіпкерлікті дамытуға бағытталған мемлекеттік бағдарламалардың көмегіне жүгінуді жөн санайды. Осылайша аудан орталығына келіп, өз жобасын арнайы мамандарға таныстырады. Мамандар ағамыздың жобасының жарқын екенін айтып қаржылай қолдау алуға жәрдемдесіпті. Нәтижесінде былтыр Жеңіс Исаев 1 млн теңге қайтарымсыз грантқа қол жеткізеді. Қаржы қолға тиген бойда жұмыс та басталып кетті.&nbsp;Іскер азамат есік-терезеге пайдаланылатын негізгі шикізатты түркиялық «Кави» дүкенінен алады. Оның сөзінше, түрік тауарларында айтарлықтай сапа бар көрінеді. Ал тұтынушы талабына сай өнім шығару үшін алдымен сапаға аса мән беру қажеттігін бәріміз жақсы білеміз. Шикізат көзі былай тұрсын, кәсіпкер қолдағы құрал-жабдықтардың өзін арнайы дүкендерден алдырыпты.&nbsp;– Өз ісімді бастап кеткелі қазір бір жылдай уақыт болып қалды. Кейбір адамды кәсіп ашарда «Бұл істі әрі қарай жүргізе алам ба?» деген сауал мазалайды. Ал менде мұндай болған емес. Себебі бұрын қатарынан бірнеше жыл осы салада жұмыс жасағанмын. Ол кәсіпорында біз өндірген тауарға қатысты бірде-бір шағым болған жоқ. «Қашанғы бір айлыққа қарап жүре береміз, мұнан өзім жеке іс бастағаным жақсы» деген ой келді. Осылайша бастап та кеттім. Шыны керек, жұмысымның алға басуына мемлекеттің үлкен қолдауы көмек болды. 1 млн теңге қайтарымсыз қаржы кімге болса да үлкен жәрдем. Сондықтан алдағы жауапкершілікті сезініп жұмыс жасау – бізге міндет. Ауданнан шет орналасқан ауыл болсақ та әзірге тапсырыс берушілердің қатары сиремей тұр. Біз бұған қуанамыз. Ал өнімімді тұтынған жандардың да ешқайсысы реніш білдіріп жатқан жоқ. Соған қарағанда бұрынғыдай сапаға аса мән беріп жатқан болуым керек, – дейді кәнігі маман.&nbsp;Жеңіс Исаев – негізінен екінші топтағы мүмкіндігі шектеулі жан. Бірақ менің денсаулығымда ақау бар екен деп мүжілетін ол жоқ. Керісінше өмірге деген бұл талпынысынан кейбір аяқ-қолы сау адамдар сабақ алуы қажеттігін айтады. Есік-терезе сатып алған ауыл тұрғындары да өнімінде сапа барын айтып отыр. Кейіпкеріміздің қолынан шыққан есік-терезелерге тек жаңадариялықтар ғана емес, көршілес Есет батыр мен Еңбек, Аққұм, Мәдениет, Мырзабай ауылының тұрғындары да тапсырыс беруде. Бұрыннан бұл салада қолтаңбасы бар Жеңіс Исаевтың бұйымына қала берді аудан орталығынан да бірлі-жарым тапсырыс түсетін күндер де болды. Тапсырыс берушілер қатары көбейген сайын кейіпкеріміздің жұмысқа деген ынтасы артатын көрінеді.&nbsp;– Қазір тек ауыл халқынан ғана емес, көрші ауылдардан да тапсырыс түсіп жатыр. Бұл менің жұмысқа деген ынтамды одан әрі арттыра түседі. Табыс өз алдына, менің негізгі мақсатым – тұтынушы талабынан шығу. Маған жасаған бұйымыма төленген қаржыдан сөзбен берген бағасы жоғары тұрады қашанда. Сапаға аса мән беретінім де сондықтан. Біреу өзіңнің қолыңнан шыққан туындыңа қатысты теріс пікір айтса, ертең жұмысқа ынтаң болмай, қабілетің ашылмайды ғой. Аллаға шүкір, менде ондай жағдай болған емес. Алдағы уақытта да болдырмауға тырысамын. Мына қолымдағы құрылғы 120 мың теңге тұрады. Арнайы пластик есік-терезелер жасауға арналған. Алдым қыс, сондықтан енді көктемге дейін тапсырыс бола бермейді. Біздің маусым күн жылығанда ғой, – деп бір жымиып алды ағам.&nbsp;Расында, жаңадариялық Жеңіс Исаевтың бұл ісі үлгі алуға тұрарлық. Тек бақша дақылы мен мал шаруашылығын қолға алған ауыл үшін бұл жоба – үлкен жаңалық. Алдағы уақытта кейіпкеріміз кәсібінің көкжиегін кеңейтіп, пластиктен басқа да бұйымдар дайындауға ниеттеніп отыр. Қазірдің өзінде іскер азамат бір адамды жұмыспен қамтыған. Жаңадариялықтарға менің риза болатыным осы. Бізде күріш не өндіріс жоқ деп мүжілмейді. Барға қанағат қылып, тек алға талпынуды біледі.Жалпы кәсіпкерлікті дамытуға бағытталған бағдарламалар мен үшін өңірлерді дамытуға негізделгендей көрінеді. Себебі ауылдың әрбір азаматы оның игілігін көрсе, сол өңірдің алға басуына кішкене де болса оң әсері тиеді. Кәсіпорын бар жерде жұмыссыздық болмайды, әлеуметтік сала алға басады. Ондай ауылда тұратын әрбір отбасының тұрмыстық сапасында да ілгерілеушілік басым болады. Біз бір күнгі сапардан осыны ұқтық.

1 млн теңгемен кәсіп бастаған

<a href="https://kyzylorda-news.kz/">Kyzylorda-news.kz</a>&nbsp;&nbsp; «AMANAT» партиясының облыстық филиалы жанындағы Сыбайлас жемқорлыққа қарсы іс қимыл жөніндегі кеңестің отырысы өтіп, онда мемлекет қаржысын белгіленген мақсатқа сәйкес нәтижелі жұмсалуы және жалпы сыбайлас жемқорлықтың алдын алу бағытындағы жұмыстарын саралау үшін облыстық табиғи ресурстар және табиғат пайдалануды реттеу басқармасы мен экология департаментінің жауапты басшыларының есебі тыңдалды.Бүгін есеп берген басқарманың миссиясы: өңірдің қоршаған ортасын қорғау саласын басқару, экологиялық жағдайды жақсартуға және экологиялық қауіпсіздікті қамтамасыз етуге бағытталған бірыңғай табиғатты қорғау саясатын қалыптастыру болып табылса, экология департаментінің негізгі міндеттері – жобаларға мемлекеттік экологиялық сараптама жасау, табиғат пайдаланушыларға қоршаған ортаға эмиссияға рұқсат беру, қоршаған ортаның құрамдас бөліктеріне зертханалық талдау-бақылау жүргізу болып табылады.<blockquote>«Сыбайлас жемқорлық бар жерде әділетті қоғам орната алмайтынымыз анық. Мемлекет басшысы Қасым-Жомарт Кемелұлы Тоқаев Әділетті Қазақстанды құру үшін адам құқығы мен заң үстемдігі мәселесін алға қойды. Осыны басты назарға алып, жұмыс істесек, сыбайлас жемқорлықтың алдын алсақ, оны жеңе алатынмызға күмән жоқ. Біздің де негізгі міндет — қызметтегі неғұрлым сыбайластыққа «жақын» салаларды анықтау және бақылау, сол арқылы құқық бұзушылыққа жол бермеу»,- деді барлық жұмыстарды саралай келе жиынды қорытындылаған Кеңес төрағасының орынбасары Дәурен Шәріпбаев.</blockquote>

Мемлекет қаржысының мақсатты жұмсалуы мен сыбайластықтың алдын алу мәселелері қаралды

Қазақтың ән-күйін, тұрмыс-салтын зерттеген орыс этнографы Григорий Потанин: "Маған бүкіл қазақ даласы ән салып тұрғандай болып көрінеді" деп тамсаныпты. Рас, кең даланы мекендеп, еркін өмір сүрген халқымыздың бүтін болмысының өзі әнге-күйге айналып кеткен. Жиырма жыл бұрын "Ұлытау" атты аспапты этно-рок стиліндегі музыкалық ұжым Голливудта өткен Бүкіләлемдік музыка орындаушыларының чемпионатында бас жүлдені жеңіп алды. Құрманғазының "Адай" күйімен қазақтың қара домбырасын мұхиттың арғы бетіне таныстырып, америкалықтарды таң қалдырды. Одан бері де қазақтың маңдайына біткен жарық жұлдызы, сиқырлы дауысымен әлемді табындырған алтын дауысты әнші Димаш Құдайберген азуын айға білеген сол Батыстың сахнасында ұлттық аспабымыздан күмбірлете күй төгіп, халық әндерін нақышына келтіре орындап, жаһаннан жиылған жұрттың жанарын жасқа толтырды. Осыдан соң әлем қазақтың төл өнерін, соның ішінде ұлттық музыкамызды мойындамай көрсін...Таяуда жас әнші, сазгер, Қ.Қазантаев атындағы аудандық мәдениет үйінің жанынан құрылған "Жігер" этно-фальклорлық ансамблінің жетекшісі Руслан Бурабай қара домбыраның қасиетін әлемге тағы бір паш етті. Американың Техас штатында өткен "ARTIVITIES seassons" Халықаралық көпжанрлы онлайн конкурс-фестиваліне өзінің "Талас" күйімен қатысып, "Халықтық орындау" жанры бойынша І орынды иеленді. Бұл – ауданымыз үшін ғана емес, еліміз үшін де сүйіншілейтін жағымды жаңалық, үлкен жетістік.&nbsp;Руслан Бурабай Қарағанды қаласындағы Тәттімбет атындағы өнер колледжнің және Көкшетау қаласындағы Біржан сал атындағы музыкалық колледжінің халық аспаптар бөлімін бітірген. 2016 жылдан бері Қ.Қазантаев атындағы аудандық мәдениет үйінде қызмет істеп келеді. Жігерлі жас 2017 жылы "Жігер" этно-фальклорлық ансамблін құрып, ұрпақтан-ұрпаққа мирас болып келе жатқан мәдени мұрамызды жаңғыртуды қолға алыпты. Қазір сол "Жігердің" жетекшісі және мәдениет үйі жанынан ашылған домбыра үйірмесінің ұстазы. Құрамында он адамы бар "Жігер" этно-фальклорлық ансамблі құрылғаннан бері жақсы жетістіктерге қол жеткізген. Атап айтсақ, 2017 жылы Қазалы ауданында өткен "Қастерлеп жүрсін өнеріңді ұрпағың" атты облыстық фальклорлық ансамблдердің байқауында Раманқұл Әуезов атындағы арнайы жүлдені иеленсе, 2019 жылы Жамбыл облысында өткен "Көне Тараз күмбірі" атты республикалық байқауда Ықылас Дүкенұлы атындағы арнайы жүлдені жеңіп алды және сол жылы қыркүйек айында Қызылорда қаласында өткен "Қорқыт және ұлы дала сазы" атты халықаралық фестивальда жоғары дәрежеде өнер көрсетіп, дүние жүзінен жиылған түркі тектес туысқан халықтарды тәнті етті. Сонымен бірге Руслан Бурабай қазірде өзінің жеке шығармашылығына ден қойып жүр. Үлкен сахналардан орындалып жүрген бірнеше ән мен күйдің авторы. "Шабыт" және "Тәуелсіз Қазақстан" атты екі күйі "Қазақ күйлерінің энциклопедиясына" енген.&nbsp;– Менің өмірім өнермен егіз. Қазірде мамандығым бойынша сол өнер саласында қызмет етіп келемін. Мен өмірімді әуенсіз елестете алмаймын. Соның ішінде ұлттық бояуы бар әуендер жаныма жақын және ұлттық музыкалық аспаптармен орындалатын халық әндері мен жеке авторлық күйлерді хал-қадірімше насихаттап келемін. Қазірде өзім жетекшілік ететін ансамблді құрғандағы негізгі мақсатым да сол болатын. Бұл бағытта әлі алда жоспарлар бар, сол арқылы жұмысымызды жалғастыра береміз.Таяуда Америкада өткен "ARTIVITIES seassons" Халықаралық көпжанрлы онлайн конкурс-фестиваліне өзімнің авторлық туындымды қосып, "Халықтық орындау" жанры бойынша І орынды иелендім. Әрине, өнердің ордасынан, тіпті облыс орталығынан шалғай жүрген мен үшін бұл күтпеген қуаныш болды. Алайда, жақсы туынды қашанда өз бағасын алады ғой. Бұл менің талантыма беріліп тұрған баға емес, қазақ өнеріне көрсетілген құрмет деп білемін. Ал орын алған шығармаға келер болсақ, "Талас" күйі аты айтып тұрғандай, сан ғасыр бойы қазақ халқының басынан өткізіп келе жатқан аумалы-төкпелі жаугершілік заманды, талас-тартыспен өткен өмірін суреттейді, &nbsp;– дейді Руслан ініміз.Бір кездері ұстазға шәкірт болып, республикалық "Бозторғай" шығармашылық конкурсының лауреаты, республикалық "Күй құдіреті" байқауының жүлдегері, делфильік ойындардың жеңімпазы және басқа да көптеген халықаралық байқаулардың жүлдегері атанған Руслан Бурабайдың өзі де қазір шәкірт тәрбиелеп жатыр. &nbsp;

Голливудта чемпион атанды 

Фото: Ақорда<a href="https://kyzylorda-news.kz/">Kyzylorda-news.kz</a>&nbsp; Мемлекет басшысы Қасым-Жомарт Тоқаев бұқаралық ақпарат құралдары қызметкерлерін мерекемен құттықтады. Бұл туралы Ақорданың баспасөз қызметі хабарлады.<blockquote>«Құрметті журналистер!Бұқаралық ақпарат құралдарының қызметкерлері!Сіздерді кәсіби мерекелеріңізбен құттықтаймын! Еліміздің бұқаралық ақпарат құралдары қоғам санасын жаңғыртып, ұлт тұтастығын нығайту жолында айрықша рөл атқарады. Баспасөз саласын дамыту, сондай-ақ журналистердің құқықтары мен заңды мүдделерін қорғау – мемлекеттің маңызды міндетінің бірі.Қазақ журналистикасының тағылымды тарихы, аға буын қалыптастырған ерекше қолтаңбасы бар. Біз оның бай шежіресі мен ағартушылық дәстүрін барынша сақтауымыз қажет. Бүгінгі ақпарат саласының өкілдері осы сабақтастықты лайықты жалғастырып, өзіне жүктелген жауапты миссияны абыроймен атқарып келеді.Сіздер қай кезде де халыққа шынайы әрі жедел хабар таратып, кәсіби біліктіліктің озық үлгісін көрсетіп жүрсіздер. Болашақта да елдік мәселелерді көтеріп, ұлттық құндылықтарды насихаттауға белсене атсалыса бересіздер деп сенемін. Баршаңызға бақ-береке, толағай табыс, шығармашылық шабыт тілеймін!», - деп жазылған Президент құттықтауында.</blockquote>

Мемлекет басшысы бұқаралық ақпарат құралдары қызметкерлерін мерекемен құттықтады

Астана мен Қазақстанның 15 облысында ауа райына байланысты ескерту жарияланды.Астанада күндіз найзағай жарқырап, бұршақ жаууы мүмкін.Қарағанды ​​облысында аптап ыстық болып, жоғары өрт қаупі сақталады.Шығыс Қазақстан облысында жел соғып, аптап ыстық болады, жоғары өрт қаупі сақталады.Атырау, Қостанай, Батыс Қазақстан облыстарында қатты жаңбыр жауады.Алматы, Маңғыстау, Солтүстік Қазақстан облыстарында, Жетісу облысында күн күркірейді.28 маусымда Ақмола облысында түнде батыста және оңтүстікте найзағай күтіледі, күндіз облыстың басым бөлігінде найзағай ойнап, бұршақ жаууы мүмкін, облыстың батысында, солтүстігінде және оңтүстігінде бұршақ жаууы мүмкін.Солтүстікте, батыста, Қызылорда облысының орталығында найзағай ойнап, шаңды дауыл соғады, солтүстікте, шығыста, Ақтөбе облысының орталығында нөсер жауын жауып, найзағай ойнайды, кей жерлерде күн күркірейді. Күндіз облыстың солтүстігінде нөсер жаңбыр жауады, солтүстікте, батыста, орталық аудандарда найзағай ойнап, бұршақ жаууы мүмкін.28 маусым күні Абай облысында солтүстік-шығыстан жел соғады, күндіз оңтүстікте, орталықта жел 15-20 м/с күшейеді. Семей: 28 маусымда күндіз ауа температурасы 37 градусқа көтеріледі. Өрт қаупі әлі де жоғары.Күндіз Ұлытау облысының солтүстігі мен шығысында найзағай ойнап, бұрқасын болады.Күндіз Түркістан облысының тауларында найзағай ойнап, солтүстікте шаңды дауыл соғады.

Ауа райына байланысты ескерту жарияланды

Жер сүдігерден өткеннен астықты қамбаға құямын дегенше есет батырлық Нұрбол Шәкірге тыным жоқ. Жас та болса өзіне бекітіліп берілген алқаптың жауапкершілігін мойнына алған диқанның өткен жылға өкпесі де жоқ. Себебі шаруашылық төрағасы былтырғы күзгі науқан қорытындысымен кейіпкерімізге темір тұлпар табыстаған болатын.Жалағаш ауданы Аламесек ауылдық округіндегі “Қарабура Ата-1” шаруа қожалығының еңбеккері бұл салаға аяқ басқанына көп болмаса да ұжымдағы білікті мамандардан үлкен тәжірибе жинаған. Былтыр гектарынан 70 центнерден астам өнім алған ол шаруашылық төрағасы тарапынан еңбектің жоғары бағаланып жатқанын айтады.&nbsp;– Бала күнімізде қыстық шөп ору үшін атыз басына баратынбыз. Ол кезде қарапайым күрішшілер бізге жай ғана маман болып көрінетін. Жалпы диқан қауымының мол өнім алуда қандай қиындыққа да қарсы тұратынын өзіміз салаға келгенде ғана түсіндік. Ала жаздай атыз жағалаған ағалардың берген ақылымен жас та болса өзімізді жұмысымызбен көрсетіп келеміз. Өткен жылға өкпе жоқ. Жер ана өзінің ырзық-несібесін молынан төкті. Жалпы жерді қалай күтіп баптасаң, соншалықты өнімге қол жеткізесің. Сондықтан біз ол жердің құнарын жоғалпау үшін нендей күтім керек, соның бәрін жасаймыз. Төрағаның артқан сенімін ақтап келемін. Былтыр күзгі науқанның қорытындысында темір тұлпар тақымдадым. Биыл көктемгі науқан басталып кетті. Енді осы жылы да бұйыртса мол өнімге қол жеткіземін, – дейді диқан.&nbsp;1994 жылғы Жалағаш ауданы Есет батыр ауылының тұрғыны шаруашылық ұжымы өзі секілді жас мамандармен толығып жатқанын айтады. Бұл бірінші кезекте саладағы сабақтастықты сақтап қалуға да оң әсерін тигізетінін жақсы біледі. Сондықтан алдыңғы буыннан өзі де көрген-білгенін, көкейге түйгенін дамытуға тырысып жүр. Себебі ертең бұлар да саладағы үлкен буынның орнын ауыстырғанда өзінен кейінгі жастарға көрген-білгенін үйретіп, Жер-Ананы күтіп-баптаудың қыр-сырына қанықтырады.Нұрбол Шәкіраттың сөзінше, шаруашылық төрағасы Дастан Ержанов жыл сайын ұжымды айлығынан бөлек қосымша сыйақымен сүйіншілейді екен. Мұндай ұжымның еңбегі бағаланған кез келген ортада еңбек өнімділігі өз жемісін берері анық. Осының нәтижесі болар, “Қарабура Ата-1” шаруа қожалығы жыл сайын қамбаға құйылатын астық көлемін еселеп жатыр.&nbsp;– Аламесекке күріш егемін деп келген шаруашылық төрағасы еңбеккерлердің жұмысын бағалауды бірінші кезекке қойды. Оны осы ұжымдағы барлық еңбеккерден сұрасаңыз да айтып береді. Сондықтан болар, келе салып ісіміз алға басты. Алдағы уақытта да жақсы көрсеткішке қол жеткізуге ұжым болып жұмыламыз, – дейді Нұрбол Шәкір.&nbsp;Айта кетейік, Дастан Ержанов төрағалық ететін шаруашылық еңбеккерлері 7 темір тұлпар тақымдады. Ал алдыңғы жылы тағы да бірнеше автокөлік тізгіндеген ұжым биыл да мол өнімнен үмітті. Төрағасы ұжымның еңбегін лайықты бағалайтын, осы бір сыйластыққа сызат түсірмеуді көздеген дала дарабоздарының алдағы науқанда да толайым табысқа қол жеткізуіне тілектеспіз.&nbsp;

70 центр өнім алған Нұрбол

Ауданның білім бәйгесінде мерейі асып, ҰБТ қорытындысымен бірнеше жыл қатарынан алдыңғы үштіктен көрінуі – ұлағатты ұстаздар еңбегінің жемісі. №202 орта мектептің көркем еңбек пәнінің мұғалімі Ермек Бүркітбаевтың та шәкірттері білім жолында ұстаз еңбегінің, ата-ананың үмітін ақтап жүр. Ермек Алпысбайұлы – оқыту әдістемесін жоғары деңгейде меңгерген, кәсіби біліктілігін арттырумен қатар талай жетістіктерге жетіп жүрген ұлағатты ұстаз.&nbsp;– Мұғалімнің негізгі мақсаты – оқушылардың шығармашылық қабілетін, өзіндік таным біліктілігін дамыта отырып, алған білімдерін өмірде қолдана білуге үйрету. Әрине оңай жұмыс емес. Алдыңа әр үйдің еркесі келгенде бәрінің назарын өзіңе аударып, сабаққа қызығушылығын арттыру үшін еңбектену қажет. Өз іс-тәжірибемде күн сайын білім берудегі жаңаша түрлі әдіс-тәсілдерді қолданып, оқушыларды оқу-танымдық, шығармашылық іс-әрекетке ынталандырып және әр оқушының нәтижеге жетуі үшін жағдайын жасаймын. Мұғалім деген ұлы мамандықты иеленіп, арқалап жүргеніме өзімді бақытты санаймын, – дейді ол.&nbsp;Ермек Алпысбайұлы – еңбек жолының 22 жылдан астам уақытын ұстаздыққа арнап, өзінің айшықты еңбегімен дараланған тағылымға толы өмір иесі. Ұлы мамандықтың қыр-сырына енді ғана қанығып келе жатқан жас мұғалімдер үшін өнеге. Жастайынан қолөнерге құштар болған ел ағасы ағаштан, темірден ою-өрнектер, қылқаламмен суреттер салуға машықтанады. Жан-жануарлардың, табиғаттың тылсым да, таңғажайып құбылыстарын көркемдеп, өзінің шығармашылық кеңістігіне терең бойлаған өнерлі азамат. Арманына қанат байлаған ол 1999 жылы кенттегі №202 орта мектепте ұстаздық жолын бастайды. Жан-жақты, ізденімпаз ұстаз мектеп тіршілігіне белсене араласып, мектепішілік, аудандық көрмелерге, байқауларға, іс-шараларға &nbsp;&nbsp;қатысып, талантымен көзге түскен. Ермектің қолынан шыққан суреттер мектеп қабырғасына көрік беріп, ерекше әдемілік сыйлап тұрады. Ермек Алпысбайұлының педагогика саласындағы көп жылдық қызметі мен &nbsp;жетістіктері бағаланып келеді, ұстазының мерейін асырған, сантүрлі бәйгелерден оза шапқан шәкірттерінің жетістіктері жетерлік, &nbsp;өзі де көптеген облыстық &nbsp;дәрежедегі марапатқа ие болды. Ұжымдастары Е.Бүркітбаев &nbsp;жайында «Мұғалім болып жұмыс жасағалы ол өзін білікті маман, тәжірибелі ұстаз ретінде көрсете білді. Еңбек пәнінен мектепте оқушылар арасында түрлі шараларды ұйымдастырып, &nbsp;үнемі ізденіс үстінде жүреді. Жас мамандарға әдістемелік бағыт-бағдар беруде аянбайды. Оқушыларды оқыту мен тәрбиелеуде ұстаздық кәсіби шеберлігі мен ұйымдастырушылық қабілетін жоғары бағалаймыз» дейді.&nbsp;Бүгінде білікті ұстаз – өзі сабақ беретін көркем еңбек пәнін терең меңгерген, теориялық білімін күнделікті әрбір сабағында іске асырып, тәрбие мен білімді қатар ұштастырып отырған, шәкірттерін биіктерден көрсетіп жүрген маман. &nbsp;Өнердің қыр-сырын жете түсінген &nbsp;Ермек Бүркітбаев мектепте өнерлі ұстаз ретінде танылса, облыс көлемінде оқушылары талай рет марапат төрінен көрінді. &nbsp;Мәселен, шәкірті Ақбота Рахымбек жалпы білім беру ұйымдарының 5-7 сынып оқушылары арасында өткен «Мен – елімнің ертеңімін» атты облыстық сурет байқауында І орын, 1-4 сынып оқушылары арасында қашықтан «Ата Заңым – алтын қазығым!» атты облыстық сурет байқауының аудандық кезеңінде 3 сынып оқушысы Ерғазы Дарын &nbsp;І орын, «Шеберлер қаласы: ата-бабамыздың мұрасын сақтаймыз және дамытамыз» атты өлкетану сәндік-қолданбалы республикалық шығармашылық көрмесінің аудандық кезеңінде «Ұлттық колориті бар интерьердің ерекше дизайн-жобасы» бағыты бойынша оқушылары Жұбандық Әбілбеков пен Әсет Әлішер І орын иеленіп, облыстық кезеңде ІІ орын алған. Ал осы байқауда оқушысы Елшібек Ұлан &nbsp;ІІ орын иеленсе, «Ұлы өнертапқыштыққа алғашқы қадам» атты инновациялық идеялар аудандық байқауында &nbsp;жүлделі І орынға лайық деп танылды.&nbsp;Бұл іргелі білім ошағының мерейін асырып жүрген оқушылардың бірнешеуі ғана. Жалпы азаматын ардақтап, өткеніне құрметпен қарайтын Жалағашта талантты, талапты үздіктер баршылық. Ал ұдайы игі шаралар мен жарқын істердің жанынан табылған кейіпкеріміз, ұлағатты ұстаздың тағылымға толы өмірі мен еңбек жолы өскелең ұрпаққа үлгі боларлықтай. Талмай еңбек ету мен ізденістің арқасында өз еңбегінің жемісін көріп отырған Ермек Алпысбайұлының шығармашылық еңбек жолына шалқар шабыт пен табыс тілейміз.

Мерейі үстем мұғалім 

<a href="https://kyzylorda-news.kz/">Kyzylorda-news.kz</a> Ғалымдар&nbsp;айтпақшы, «мұғалім&nbsp;–&nbsp;өзінің&nbsp;білімін&nbsp;үздіксіз&nbsp;көтеріп&nbsp;отырғанда&nbsp;ғана&nbsp;мұғалім,&nbsp;ал&nbsp;оқуды,&nbsp;ізденуді&nbsp;тоқтатқанда&nbsp;оның&nbsp;мұғалімдігі&nbsp;де&nbsp;жойылады»&nbsp;деген.&nbsp;Аталған білім ошағындағы қазақ тілі мен әдебиеті пәнінің мұғалімі Марина Жақсылықова – бәсекеге қабілетті тұлға қалыптастыруда қажырлы еңбек етіп жүрген ұстаздардың бірі.&nbsp;– Қазіргі заманғы білім беру жүйесінің негізгі мақсаты – бәсекеге қабілетті маман дайындау. Мектеп оқу-білімге үйрететін орта болса, оның жүрегі – мұғалім. Білікті, білімді, ұлағатты ұстаз атану, осы қасиетті ұғымды қастерлеп, қадір тұту, арындай таза ұстау әр мұғалімнің борышы деп білемін. Ізденімпаз мұғалімнің шығармашылығындағы ерекше тұс – оның сабақты түрлендіріп, тұлғаның жүрегіне жол таба білуінде. Білім &nbsp;берудегі &nbsp;мен &nbsp;таңдаған &nbsp;педагогикалық &nbsp;&nbsp;ұстанымның &nbsp;негізгі &nbsp;мәні – оқушылардың &nbsp;ой-өрісін &nbsp;жан-жақты &nbsp;дамыту, &nbsp;оларға &nbsp;қазіргі &nbsp;заман &nbsp;талабына &nbsp;сай &nbsp;білім &nbsp;беру &nbsp;және &nbsp;тәрбиелеу. Оқушыны &nbsp;жан-жақты дамыту дегеніміз, баланың жан дүниесін, рухани &nbsp;өсуін, &nbsp;қабілеті &nbsp;мен &nbsp;дарынының &nbsp;өрістеуі, &nbsp;парасатты &nbsp;ой &nbsp;мен &nbsp;адамгершілік &nbsp;көзқарасының &nbsp;қалыптасуы &nbsp;деген сөз. &nbsp;Қазіргі &nbsp;таңда оң нәтижеге &nbsp;бағыттап &nbsp;білім &nbsp;беруге &nbsp;байланысты &nbsp;оқытудың &nbsp;әдісі, &nbsp;тәсілі &nbsp;және &nbsp;формалары &nbsp;тиімді &nbsp;және &nbsp;оқушының &nbsp;жас &nbsp;ерекшелігінің &nbsp;&nbsp;мүмкіндіктерін &nbsp;ескере &nbsp;отырып &nbsp;жүргізілуі &nbsp;қажет. &nbsp;Бұл &nbsp;жағдайда &nbsp;оқыту &nbsp;үрдісінде &nbsp;жаңа &nbsp;педагогикалық &nbsp;технологияларды &nbsp;тиімді &nbsp;пайдалану &nbsp;және &nbsp;құзыреттілікке &nbsp;бағыттау &nbsp;уақыт &nbsp;талабына &nbsp;айналып &nbsp;отыр.&nbsp;Мен бүгінгі таңда білім беру саласында 25 жылдай еңбек етіп келемін. Күн сайын алдымда отырған шәкірттеріме зер сала қараймын. Алға үмітпен талпынған олардың алдында менің де ұстаз ретінде үлкен жауапкершілігім бар екенін іштей сезінемін. Сондықтан менің өзіме қояр талабым, алдыма қойған мақсатым жоғары болуы тиіс, өйткені сол жарқыраған шамшырақты дер кезінде байқап, дер кезінде жаға білу – менің ұстаздық парызым. Сыныптағы балалардың бірі зерек те алғыр, бірі енжар, бірі баяу, бірі тым пысық. Ал менің бәріне беретін білімімнің мазмұны мен қоятын талабым бірдей де, олардың мұны қабылдауы түрліше, – деген ұстаз осы салаға келгеніне еш өкінбейтінін, керісінше еліміздің келешек абыройлы азаматтарын тәрбиелеу зор мақтаныш екенін айтады.Марина Жақсылықовамен тілдескенде өзі айтқандай мамандығына деген ерекше ықыласын, сүйіспеншілігін байқамау мүмкін емес. Ол жаңашыл ұстаз ретінде заман ағымына сай шәкірттерін жан-жақты дамыған, өмірге реалистік тұрғыдан қарайтын, терең біліммен қаруланған тұлға ретінде қалыптастыруды көздейді.&nbsp;Ұстаздың саладағы жетістіктері де аз емес. Ұстаздық еңбек жолында А.Байтұрсынұлы атындағы республикалық педагогикалық шығармашылық олимпиадасында ІІІ орынмен, білім беру саласында жас жеткіншектердің тәрбиесі мен кемел келешегіне ықпал етіп, сапалы білім, саналы тәрбие берудегі еңбегі үшін «Құрмет» грамотамен, &nbsp;Халықаралық білім мен педагогикалық шеберлікті арттыру алаңында республикалық «Тіл дүлділі» олимпиадасына шәкірт дайындағаны үшін, Абай Құнанбайұлының 175 жылдығына орай «Асыл сөзді іздесең, Абайды оқы, ерінбе!» атты республикалық онлайн эссе байқауына оқушы дайындағаны үшін, І республикалық «Абай жаққан бір сәуле» атты А.Құнанбайұлының қара сөздеріндегі афоризмдерді талдау олимпиадасында, «AL-FARABY» білім қолдау орталығының ұйымдастыруымен өткен Абай Құнанбайұлының 175 жылдығына орай республикалық «Абай жолы» атты жас көркемсөз оқу шеберлерінің арасындағы сайысқа шәкірт дайындағаны үшін алғыс хатпен марапатталса, «Рухани жаңғыру» ақпараттық-сараптамалық орталығы, «UlY DALA USTAZY», «Үздік автор – 2020» атты республикалық ғылыми практикалық конференцияда «Үздік мақала» номинациясы бойынша І дәрежелі дипломды, «Үздік тіл маманы – 2019 &nbsp;облыстық байқауында ІІ дәрежелі дипломды, Қазақстан Республикасы Білім және ғылым министрлігі «Дарын» республикалық &nbsp;ғылыми практикалық орталығы өзге ұлт өкілдерінің «Тіл – мемлекет тәуелсіздігінің символы» атты ХІІІ республикалық қашықтық олимпиадасында &nbsp;жеңімпаз бен жүлдегер дайындағаны үшін арнайы грамотаны иеленген.&nbsp;«Қазақ тілі мен әдебиеті – баланың жүрегіне бойлай еніп, оның рухани өрісін болжай алатын пән. Қазақ тілі мен әдебиетін оқытудағы мақсатым – бала қиялын қияға өрлетер ғажайып ертегілер, шыншыл да сыншыл аңыз-әңгімелер, ерлікті дәріптеген батырлар жыры, шынайы махаббатты мұрат еткен әсерлі ғашықтық жырлар, өткір де өміршең шешендік сөздер арқылы халқымыздың рухани құндылықтарын бойына сіңірген, ертеңгі еліміздің тізгінін ұстайтын жас жеткіншекті тәрбиелеу. Әрине шәкірттерім әдеби шығармаларды оқу арқылы халқының арманы мен қиялын, өткені мен бүгінгі өмірін таниды. Сүйікті кейіпкерлердің арасындағы достығы мен сүйіспеншілігінен, патриоттығы мен еңбеккорлығынан, адалдығы мен адамгершілік қасиеттерінен үлгі алып, жақсысына жаны сүйсініп, жаманынан жиреніп, өзінше ой түйіп, жан-жақты іздене біледі» деген мектеп мұғалімінің шынайы жүрегінен шыққан тәлімді сөздері мен жауапкершілік жүгінің ауыр екенін сезінген ұстаздық болмысына қайран қалып, еріксіз басыңды иесің.

Мұғалім – өзінің білімін үздіксіз көтеріп отырғанда ғана мұғалім

<a href="https://kyzylorda-news.kz/">Kyzylorda-news.kz</a> Кәсіптің түрі көп. Нарық бізді түрлі кәсіпті меңгеруге мәжбүр қылды. Тек кәсібің адал, жұмысың сапалы болса болғаны. Мемлекетке қол жаймай, өз қаржысын салып, кәсібін айналдырып отырғандар ауданда аз емес. Солардың бірі – Қанат Адамбаев. Қанат ағамыздың бірнеше жылдан бері жасап келе жатқан кәсібі қазаққа жат емес. Ата-бабамыздан келе жатқан ұсталық өнер. Бабаларымыздың ежелгі көлігі арбадан бастап, қазіргі автокөліктерді қозғалысқа түсіріп, адамзат өркениетінің бастауы болып табылатын дөңгелек ең алғаш біздің қазақ даласында жасалды. Содан бері халқымыздың тұрмыстық тілінде «шебер», «ұста», «зергер» деген сөздер пайда болып және ол күні бүгінге дейін біздің күнделікті тұрмысымызда маңызын жоймай келеді. Кешеге дейін халық арасында көрік басып, темірден түйін түйген, ағаштан ою ойған ұсталар, алтын, күмістен әшекей бұйымдар жасаған зергерлер болды. Тіпті еліміз тәуелсіздік алғанға дейін әрбір ауылда темір, ағаш ұсталары бар еді. Ауыл тұрғындарының дені базар жағаламай, тұрмысқа қажетті заттарын сол ұсталарға тапсырыс беріп жасататын. Сол ұсталар соққан темір, ағаш бұйымдарды кейбір үйлер әлі тұтынып келе жатыр.Қанат ағамыз да ағаш ұстасы. Өзінің жаратылысындағы алғырлық пен еңбекқорлық және әкенің тәрбиесімен бойына сіңірген ұқыптылық, ыждағаттылық, сабырлы мінез Қанат ағамыздың әрбір жұмысына береке үйіріп отыр. Өзі айтқандай, кәсіп иесінің ең бірінші ұстанымы – тек пайда табу емес, жұртқа адал қызмет көрсету. Шебердің қолы – алтын. Оның қолынан шыққан жиһаздар қазірде аудандағы әрбір тұрғынның үйінде бар.&nbsp;Қанат Адамбаев өз кәсібін осыдан он бес жыл бұрын бастаған. Алғашында ағаштан қолжуғыш, кішкене орындықтар жасап бастаған Қанат ол қазірде үй ішіне қажетті барлық жиһазды жасай береді. Алдын ала тапсырыс берушілер де көп екен. Тұтынушылар қазір қай заттың да сапасына мән беретін болған. Қанат ағамыздың қолынан шыққан дүниелердің барлығы да сапалы әрі сәнді.&nbsp;– &nbsp;Қазір нарық талабына қарай еңбек етіп, отбасын асырап, одан артылса кәсібін кеңейтіп, бірнеше адамды тұрақты жұмыспен қамтып отырғандардың қатары артып келеді. Біз бұған қуануымыз керек. Кәсіппен айналысамын деген ынталыларға мемлекет тарапынан түрлі бағдарламалар арқылы қолдау да көрсетіліп келеді. Тек істің көзін тауып, еңбек ету керек. Еңбек ақы, маңдай термен тапқан ақшада береке бар. Әкеміз жастайымыздан бізді адал еңбекке, түрлі кәсіпке үйретті. Мал, егін шаруашылығында жүрсе де, үйдегі басқа да шаруаларды істегенде қасынан тастамайтын. Сол жұмыстың қыр-сырына қанықтырып, бейімдейтін.&nbsp;Қазір отбасылық жеке кәсібім бар. Мықты ұста болсаң да, құрал-саймансыз ештеңе істей алмайсың. Жұмысың өнбейді. Сондықтан үйден шағын цех аштым. Тапсырыспен де, тапсырыстан бөлек те түрлі ағаштан жиһаздар жасаймын. Қазір халықтың жағдайы кешегі өтпелі кезеңдермен салыстырғанда әлдеқайда жақсы. Оның бір ғана дәлелі – бүгінде осы аудан орталығындағы ескі үйлердің жетпіс пайызы жаңаланды. Тұрғындар қалтасындағы қаражатына көлеміне қарай жаңа үлгімен үй салып жатыр. Жаңа тұрмыс жағдайына сәйкес жаңа үлгіде жасалған жиһаз керек. Кейбір тұтынушылар түгелдей бір үйдің жасауына тапсырыс береді. Әр бөлменің өз ерекшеліктеріне лайықтап қажетті жиһаздар жасап беремін. Жиһаздың негізгі шикізаты – ағаш. Ағаштарды және жасайтын жиһазыма қажетті басқа да бөлшектерді Қызылорда қаласынан алдырамын. Жасаған дүниеміздің сапасы оның ағашына да байланысты. Мәселен, қарағай қатты болғандықтан оның кепілдік мерзімі де ұзақ болады. Бірақ тапсырыс берушімен келісілген бағамыз қалтаға салмақ салмайды. Келешекте кәсібімді кеңейтпек ойым бар, – дейді кәсіпкер.&nbsp;Расында ұстаның қолына түскен ағаштың бір жапырақ жаңқасының өзі кәдеге жарап жатады. Қанат ағамыздың үйіндегі ағаштан жасалған бұйымдардың барлығы да былайғы күндері аяқтың астында жататын қалдық ағаштардан жасалған. Қазір әрқайсысының атқаратын өз қызметі бар. Отыруға жайлы, арқалы орындық, піспегі келіскен күбі, нан жаятын тақтай мен оқтау және сол сияқты тағы да басқа күнделікті қолданатын, тұрмысымызға қажетті заттар үй иесінің қолынан шыққан.Иә, "Еңбек ет те, міндет ет" дейді халқымыз. Кәсіптің қай түрі де оңай емес. Соның ішінде халқымыз дәріптеп келе жатқан ұсталық тек кәсіп қана емес, ол – кез келген адамның бойында кездесе бермейтін үлкен өнер. Бірақ бұл өнерді кәсіпке айналдырмау керек деген сөз емес. Қол еңбегі де, ой еңбегі иесіне және қоғамға пайда әкелуі керек. Әсіресе нарық талабында қолөнер шеберлерінің еңбегі бағалануы тиіс. Осы тұрғыдан алғанда Қанат Адамбаевтың қолынан шыққан сапасы мен сәні үйлескен дүниелерге деген сұраныс жоғары.&nbsp;

Қазақстан және Қызылорда облысының жаңалықтары: Қоғам