<a href="https://kyzylorda-news.kz/">Kyzylorda-news.kz.</a> Сыр өңіріндегі бренд тауарлардың бірі – балық өнімдері. Облыста 9 балық өңдеу зауыты жұмыс жасап, балықтың 14 түрі экспортталады. Оның 4-уінде «Еврокод» Еуропалық сапа стандартына растайтын белгісі бар. &nbsp;
Ішкі және сыртқы нарыққа шығатын балық өндірісін әрі қарай жетілдіру үшін аймақта балық шаруашалығын дамытудың 2030 жылға дейін бағдарламасы әзірленді.
Осы орайда бүгін облыс әкімі Гүлшара Әбдіқалықова ҚР Экология, геология және табиғи ресурстар министрлігінің Балық шаруашылығы комитетінің төрағасы Нариман Жүнісовпен кездесті.
Басқосуға әкім орынбасары, аппарат басшысы және жауапты сала мамандары қатысты.
Аймақ басшысы балық шаруашылығы облыс экономикасының негізгі салаларының бірі екенін айтып, мұндағы бірқатар мәселелерді тізбектеді.
<blockquote>
 «Соңғы жылдары Сырдария өзенінің төменгі ағысында қалыптасқан су тапшылығы балық шаруашылығын дамытуға кері әсерін тигізуде. Бүгінгі күні 207 көлдің орташа толуы 51 пайыз шамасында болса, 126 көлге мүлдем су түспеуде, 17 көл толық тартылған. Егер, көлдерге қосымша су түспесе, 126&nbsp; көлдің де күзге дейін құрғап қалу қауіпі бар. Кіші Арал теңізінің жағдайы күрделі, теңіз жағалауы өз жағасынан 15-20 метрге тартылған. Осы мәселе туралы Үкімет басшысына баяндадық, жақын арада көрші мемлекет Премьер-Министрларының қатысуымен арнайы жиын өткізілмек. Сондықтан қазіргі таңда бірігіп, жүйелі жұмыс істеуіміз керек», – деді облыс әкімі.
</blockquote>
Өз кезегінде Балық шаруашылығы комитетінің төрағасы Нариман Жүнісов аталған мәселе бойынша бірлескен жұмыстардың маңыздылығына тоқталды.
«Қазіргі таңда балық шаруашылығы саласын дамытудың 2030 жылға дейін бағдарламасы әзірленді. Былтыр Қызылорда облысы барлық индикаторларын орындады. Алдағы уақытта да бірлесіп жұмыс жасап, даму қарқынын бірге шешуіміз керек», – деді комитет төрағасы.
Айта кетейік, бүгінгі күні облыс аумағынан балықтың 18 түрі ауланады. 2020 жылы 4303 тонна балық өнімдері экспортталды. &nbsp;
2021 жылы 3911 тонна балық Ресей Федерациясы, Польша, Литва, Нидерланды, Грузия, Германия, Украина, Қырғызстан, Австрия, Әзірбайжан елдеріне экспортталды. Экспортталатын балықтардың негізгі түрлері тыран, торта, алабұға, шортан, көксерке. Сондай-ақ, өңделген өнімдер түрінде көксерке сүбесі, тыран қанаттары, балық фаршы, балық сүбесі, мұздатылған балық және балық ұны шетелге саудаланады.
<img src="https://kyzylorda-news.kz/wp-content/uploads/2022/02/whatsapp-image-2022-02-10-at-15.18.58.jpeg" alt="" />

Қызылордада балық шаруашылығын дамыту мәселелері талқыланды

<a href="https://kyzylorda-news.kz/">Kyzylorda-news.kz.</a> Қызылорда облысында құс етін тұтыну қажеттілігі жылына 13,8 мың тоннаны құрайды. Биыл индустрияландыру бағдарламасы аясында 2 құс фабрикасы іске қосылады. Бұл жобалар толық қуатта жұмыс жасағанда аймақ қажетілігінің 36,7 пайызын қамтиды. Бұл туралы Өңірлік коммуникациялар қызметінде өткен брифингте облыстық индустриялық-инновациялық даму басқармасының басшысы Ринат Сұлтангереев хабарлады.
<blockquote>
 «Қармақшы ауданындағы «Қармақшы-құс» фабрикасының құрылысы 95 пайызға аяқталды. Бұл фабриканың жалпы құны – 1,9 млрд.теңгені құрайды. Ал инженерлік инфрақұрылым «Бизнестің жол картасы – 2020» бағдарламасы аясында жеткізілді. Қазіргі таңда шет елдерден қондырғылар сатып алу үшін қаржыландыру мәселесі қарастырылуда. Осы мақсатта жоба бастамашысы – «Аграрлық несие корпорациясы» арқылы несие алуды жоспарлаудамыз. Сондай-ақ, Жаңақорған ауданындағы «Абдулла» шаруа қожалығы құс фермасының жалпы құны – 3,9 млрд.теңге. Жоба өткен жылы өңірлік кәсіпкерлікті қолдау картасына енгізілді. Бүгінде цех құрылысының 70 пайызы аяқталды. Мемлекеттік қолдау ретінде Жаңақорған ауданынан 1000 га жер телімі берілді», – деді басқарма басшысы Ринат Сұлтангереев.
</blockquote>
«Абдулла» шаруа қожалығының құс фермасы жылына 3,5 мың тонна құс етін өндеуге мүмкіндігі бар. Қажетті инженерлік инфрақұрылымдар «Бизнестің жол картасы – 2025» мемлекеттік бағдарламасы аясында жүргізілуде. Жоба толық орындалса 120-150 адамға дейін жұмыспен қамтылады.
<blockquote>
 «Былтыр мемлекеттік қолдаудың арқасында 3,5 млдр.теңгеден астам несие алып, құс фермасының құрылыс жұмыстарын бастадық. Мамыр айында толық іске қосуды жоспарлаудамыз. Алдағы уақытта құс еті бағытында шаруашылық көлемін ұлғайтып, нарықта өзіміздің өнімдерді қамтамасыз етеміз» – деді «Абдулла» шаруа қожалығының төрағасы Әбілхан Тәжімбетов.
</blockquote>

«Қармақшы-құс» фабрикасының құрылысы аяқталуға жақын

<a href="https://kyzylorda-news.kz/">Kyzylorda-news.kz.</a>&nbsp; Былтыр Тасбөгет кентінің коммуналдық саласын жетілдіру, инфрақұрылымын дамыту мақсатында бірқатар ауқымды жобалар жүзеге асқан. 8 көшеге орташа жөндеу, 1 көшеге ағымдағы жөндеу жұмыстары жүргізіліп, 5 көшеге қиыршық тас төсеу жұмыстарының жобалау құжаттары әзірленген.
«Наурыз» шағын ауданындағы аулаларға 25 дана түнгі жарықшамдары орнатылып, «Белгісіз солдат» ескерткішіне ағымдағы жөндеу жұмыстары жүргізілді. Сонымен қатар, салауатты өмір салтын қалыптастыру бағытында байдарка және каноэ есу базасы, 4 спорт клубы және Бозғұлов көшесіндегі көпқабатты үйлер ауласына 1 ойын алаңы салынып, Наурыз, Тасарық шағын аудандарында орналасқан 5 спорттық-балалар ойын алаңы ағымдағы жөндеуден өткізілген.
<blockquote>
 «Ауыл тұрғындарының бірлігі негізінде атқарылып жатқан жұмыстар легіне де тоқталып өтсек. Өткен жылы демеушілік есебінен «Карамель» оптомаркетінің алдына балалар ойын алаңы, Бозғұлов көшесіне 1 дана аяқ су насосы орнатылды. «Агроспецмонтаж» өндірістік кооперативінің демеушілігімен кенттегі Құнанбаев, Мұратбаев, Маханбетов, Молдағұлова көшелерінің кейіннен қалыптасқан бөліктеріне ауыз су желілерін тарту жұмыстары жүргізілді. Соңғы жылдары Тасбөгет кенті тұрғындарының кәсіпкерлікті қолдау бағдарламаларына қатысу қарқыны артты. 2021 жылы барлық бағдарламалар бойынша 103 жоба мақұлданып, 1 млрд 188 млн теңгеге қаржыландырылды. Жыл көлемінде 90 кәсіпкер тіркеліп, 150-ден аса тұрақты жұмыс орны ашылды. Кент аумағынан түрлі әлеуметтік және кәсіпкерлік нысандар салуға сыртқы көздерден 2 млрд 130 млн теңге көлемінде қаржы тартылып, нәтижесінде 140-тан аса жаңа жұмыс орындары ашылды», – деді Тасбөгет кентінің әкімі Семсер Сыздықов.
</blockquote>
<img src="https://kyzylorda-news.kz/wp-content/uploads/2022/02/273690244_3022627764670628_2944567904633449056_n.jpg" alt="" />
Бұдан бөлек, 2021 жылы Тасбөгет кентіне қарасты Сабалақ өңірін ауыз сумен қамту жобасы аяқталды. Қазіргі таңда «Агроспецмонтаж» өндірістік кооперативінің қолдауымен 5 шақырым көшеге ауыз су желісі жүргізілуде. «ҚазГерМұнай» ЖШС-і 50 млн теңгеге өңірге қосымша ұңғыма қазып, сыйымдылығы 50 текше метр болатын ауыз су мұнарасының құрылысын аяқтады.
Сондай-ақ, Ш.Есенов атындағы 150 орындық білім беру орталығының құрылысы аяқталса, жеке кәсіпкер өңірдің кіре берісінен «Bilim Orda» жеке мектеп құрылысын жүргізді. Бұл мектеп алдағы уақытта 500-ден аса баланы қамтиды деп жоспарланып отыр.

Тасбөгет кентінде бірқатар ауқымды жобалар жүзеге асты

Kyzylorda-news.kz. 2021 жылы «Нұрлы жер» және «Өңірлерді дамыту 2020-2025 жылға дейінгі» мемлекеттік бағдарламалары аясында Қызылорда қаласының инженерлік – коммуникациялық инфрақұрылымын дамыту мақсатында қала және қалаға қарасты елді мекендерде ауыз су, электр желісі, газ желісі, малтатасты жол құрылысы секілді бірқатар жобалар жүзеге асырылған.
Мәселен, «Нұрлы жер» мемлекеттік бағдарламасы аясында Сырдария өзенінің сол жағалауындағы №4 тұрғын кварталы, СПМК-70 тұрғын ауданындағы №2, №4 тұрғын аудандары толық инженерлік – коммуникациялық инфрақұрылыммен қамтылса, «Бәйтерек» мөлтек ауданында ұзындығы 9,7 шақырым болатын 5 көшеге ауыз су, 7,4 шақырым газ желісі, 9,1 шақырым электр желісі, 0,9 шақырым болатын 3 көшеге малтатасты жол құрылысы жүргізілген.
<blockquote>
 “Аталған бағдарлама аясында өткен жылы «Сабалақ» елді мекені сапалы ауыз сумен қамтылса, биыл Ақсуат ауылдық округіне газ желілерін тарту жұмыстары бастау алды.
 Сонымен қатар, өткен жылы ауыз су желісінің құрылысы Арай-Шұғыла тұрғын ауданында, Әубәкіров, Есетов және Тәуке хан көшелерінде жүргізіліп, Тұрмағанбет көшесінен Н. Шәменұлы көшесіне дейінгі аралығы, Шанхай, Гагарин аумағындағы жеке тұрғын үйлердің ауыз су желісі қайта жаңғыртылған”,- деді қалалық құрылыс бөлімінің басшысы Біржан Далабаев.
</blockquote>
Электрмен жабдықтау құрылысы бойынша Әл-Фараби қыстағындағы ұзындығы 7,1 шақырым болатын 12 көше, Титов қыстағындағы ұзындығы 8,2 шақырым болатын 13 көше және Сәулет мөлтек ауданындағы 2,2 шақырым болатын 3 көше электр желісімен жабдықталды.
Малтатасты жол құрылысы КБИ мөлтек ауданындағы 9,8 шақырым болатын 26 көшеде жүргізілді.
«Өңірлерді дамыту 2020-2025 жылға дейінгі» мемлекеттік бағдарламасы аясында Белкөл кентіндегі 1 көшеде, Баймұрат батыр ауылындаға 5 көшеде ауыз су желісі құрылысы, ал Бірқазан елді мекеніндегі 2 көшеде ауыз су және электр желісі құрылысы, Талсуат ауылдық округіндегі ет комбинаты мен Наурыз елді мекеніндегі 31 көшеде электр желісінің құрылысы жүргізілген.
<blockquote>
 Өткен жылы СПМК-70, Сол жағалау тұрғын аудандарында 1830 пәтерлі 37 көпқабатты тұрғын үйдің құрылысы жүргізілді. Биыл ипотекалық 640 пәтерлі 2 үйдің құрылысын аяқтау жоспарлануда. Сондай-ақ, арендалық 250 пәтерлі 5 көпқабатты тұрғын үйдің құрылысы бастау алды, – деп қорытындылады бөлім басшысы.
</blockquote>
<img src="https://kyzylorda-news.kz/wp-content/uploads/2022/02/fb_img_1643991010552.jpg" alt="" />

Қызылорда қаласында құрылыс жұмыстары қарқынды жүргізілуде

<a href="https://kyzylorda-news.kz/">Kyzylorda-news.kz.</a> Шиелі ауданындағы «Шиелі Шұжық» ЖШС шұжық цехы қазіргі кезде аудан ғана емес, облыс көлеміне жақсы танымал. Одан шыққан өнімдер дастарханның сәнін келтірумен қатар, дәмін татқан жанның таңдайында қалады.
2005 жылы құрылған цех біршама қиындықтарға байланысты 2017 жылы жұмысын тоқтатуға мәжбүр болды. Дегенмен, кәсіпорын басшысы, белгілі кәсіпкер Патима Маханбет қиындықтан шығудың жолын іздеп, өндірісті іске қосты.
Осылайша кәсіпорын 2020 жылы жұмысын қайта бастады. Кәсіпкер «Байқоңыр» ӘКК-дан осы жобаға 32 млн теңге несие де алды. Істің көзін тапқан кәсіпкерге кешегі пандемия да қолбайлау болмады. Жаңа құрылғылар сатып алып, жұмысын жандандырған кәсіпкер бүгінгі күні 12 адамды тұрақты жұмыспен қамтып отыр. Цехта заманауи жабдықталған құрылғылардың арқасында күніне 500 келі шұжық өндіріледі. Жалпы мұнда шұжық өнімдерінің 12 түрі бар.

«Шиелі Шұжық»  күніне 500 келі шұжық өндіреді

<a href="https://kyzylorda-news.kz/">Kyzylorda-news.kz.</a> Энергетика министрі Болат Ақшолақов бекітілген газ бағасын жариялады, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “Бекітілген баға 50-75 теңгені құрайды. Нақты құны өңірге байланысты. Әрине сұйытылған газ өндіретін зауыт орналасқан жерде баға 50 теңгеден аспайды. Одан мың шақырым шалғай жерге де газ жеткізу керек. Сондықтан газ бағасы 75 теңгеге дейін барады”, – деп түсіндірді Ақшолақов орталық коммуникациялар қызметінде өткен онлайн брифингте.
</blockquote>
Министрдің айтуынша, қазіргі кезде газ жеткілікті. Әкімдіктер газдың көлемі туралы тұрақты түрде хабарлап отырады.
<blockquote>
 “Біз әрбір әкімдікпен жұмыс істеп жатырмыз. Күнде хабарын алып отырамыз. Егер қандай да бір жағдай болса, сол күні шешуге тырысып отырамыз. Бірақ қазіргі жағдай тұрақты, газ 50-75 теңгеден сатылып жатыр”, – деп атап өтті ведомство басшысы.
</blockquote>
Осы орайда Ақшолақов митингілер кезінде халыққа автобуспен жүруге кеңес берген экономист Олжас Байділдиновтың министрлікте істемейтінін жеткізді.
<blockquote>
 “Ол бұрын бізде “Адалдық алаңы” деген жобалық кеңсені басқарған. Қазірге кезде жұмыстан шығып кетті. Адалдық алаңы кеңсесіне басқа адам бекітілді”, – деді министр.
</blockquote>

Энергетика министрі бекітілген газ бағасын жариялады

<a href="https://kyzylorda-news.kz/">Kyzylorda-news.kz.</a> Жалағаш ауданы, Таң ауылында өткен жылы «Агро Лидер Таң» ЖШС бастамасымен «TAN–FOOD» ет өңдеу цехы іске қосылды. Жоба құны 144 млн теңгені құрады, оның 87 млн теңгесі серіктестіктің жеке қаражаты есебінен, ал 57 млн теңгесі «Байқоныр ӘКК» АҚ арқылы қаржыландырылды. Бүгінде ет өңдеу цехы 8 адамды тұрақты жұмыспен қамтып отыр.
«TAN-FOOD» ет өңдеу цехы тәулігіне үш бас ірі қара етін өңдеп, одан 15 түрлі тағам әзірлеп, аудандағы және облыс орталығындағы бірқатар сауда орындарын қамтамасыз етіп отыр.
Айта кетейік, «Бір асым етке» лайықталған, салмағы 3 келі (баспақ еті, жылқы қазысы, қой құйрығы) өнімнің бағасы 7 мың теңге болса, сыйлы қонаққа ұсынатын «Сыбағаның» бағасы – 8 мың теңге. Бұл – бір табаққа шақталып, жылқы етінен жасақталған даяр өнім. Сол күйі қазанға сала бересіз. Сыйлы қонақ келсе, сыбағасы дайын. Сонымен қатар, цехта өндірілген жылқы еті 2200 теңге, сиыр еті 2000 теңгеден сатылады. Оған қоса, өкпе-бауыр, фарш, манты, әсіп, тұшпара, котлет, тефтели сияқты өнім түрлері де қолайлы бағада сатылып, тұрғындар сұранысын қанағаттандырып отыр.

Жалағаш ауданында  «TAN–FOOD» ет өңдеу цехы іске қосылды

Kyzylorda-news.kz. Тұрғындардың өмір сапасын жақсартуда елді мекендерді ауыз сумен қамту маңызды. Бұл ретте өңірдегі 230 елді мекенді сапалы ауыз сумен қамту міндеті бар. Бүгінгі күні аймақта 230 елді мекеннің 198-інде ауыз желілері барған. Нәтижесінде халықтың 97 пайызы орталықтандырылған ауыз сумен қамтылған. Қалған ауылдарға кезең-кезеңімен ауыз су тартылады. Бүгін облыс әкімі Гүлшара Әбдіқалықова энергетика және тұрғын үй-коммуналдық шаруашылық саласында атқарылған жұмыстардың есебін тыңдады.
Жиынға облыс әкімі аппаратының басшысы Ерлан Райғаниев, облыстық энергетика және тұрғын үй-коммуналдық шаруашылық басқармасының басшысы Ерлан Жаңабаев қатысты.
Алдымен елді-мекендерді газдандыру мәселесі қозғалды. Бүгінде аймақтағы барлық аудан орталықтары толыққанды табиғи газға қосылған. Биыл өткен жылы басталған 5 жобаның құрылысы жүргізілуде. Оның ішінде, Қызылорда қаласындағы Наурыз және Махамбет, Қазалы қаласы, Шиелі ауданындағы Алғабас, Ақмая, Тереңөзек кентіндегі «Ақ дақтар» жобасы бар. Сондай-ақ, осы жылы «Ауыл – ел бесігі» бағдарламасы арқылы Қазалы ауданындағы Жалаңтөс батыр, Пірімов, Басықара ауылдарын газдандыру жұмыстары басталады.
Биыл 6 елді мекен газдандыру үшін Энергетика министрлігіне өтінім берілді. Яғни Аралдағы Сексеуіл кентіне АГТС орнату және кентішілік газдандыру, Қармақшыдағы Төретам және Ақай елді мекендеріне, Шиелі ауданы Шоқай АГТС орнату мен Жаңақорғандағы Бірлік, Қыраш ауылдарына газ тарту межеленіп отыр.
Облыс әкімі құрылыс-монтаж жұмыстарын сапалы жүргізіп, уақытылы аяқтауды жүктеді. Табиғи газ бағасын бақылауда ұстау қажет екенін баса айтты. 
Биыл Қызылорда қаласындағы 4 қосалқы станцияны жаңғырту құрылысы жалғасуда. Ал, Ұлттық экономика министрлігіне 2 жобаға бюджеттік өтінім ұсынылған. Сонымен қатар, Қызылорда қаласындағы Сырдария өзенінің сол жақ жағалау бөлігін электрмен жабдықтау және Шиелі кентіндегі қосалқы станциясын қайта жаңғырту бойынша 2 жоба әзірленуде.
Аймақ басшысы аталған жобалар бойынша бірқатар тапсырма беріп, коммуналдық тарифтердің көтерілуіне жол бермеу керек екенін атап өтті.
Еске салайық, аймақта жылу тарифі 2021 жылдың 1 қыркүйегінен бастап 1 Гкал жылу энергиясы үшін уақытша өтемдік тариф енгізіліп, 2020 жылдың деңгейімен салыстырғанда 13,4%-ға, газ тарифі 2020 жылмен салыстырғанда 5,9% төмендетілді.
Жылумен қамтамасыз ету бойынша да жүйелі жұмыс жүргізілуде. 2022 жылға «Ауыл-ел бесігі» бағдарламасы арқылы әлеуметтік нысандардың жылу қазандықтарын қайта жаңғырту бойынша 4 жобаға республикалық бюджеттен қаржы бөлінді. 
Жиын соңында облыс әкімі жылу беру маусымын ақаусыз аяқтап, ауыз сумен қамту, газдандыру мәселелеріне кешенді түрде талдау жасау нақты шешімдерді қабылдау қажеттігін еске салды.
<img src="https://kyzylorda-news.kz/wp-content/uploads/2022/01/fb_img_1643289464341.jpg" alt="" />

Биыл Қызылорда облысында 6 елді мекенге газ жүргізіледі

Kyzylorda-news.kz. Бүгін қала әкімі Ғанибек Қазантаев газдандыру жобасындағы құрылыс-монтаж жұмыстарының жүру барысын көрді. Мердігер мекеме «Әлия-Сервис» жауапкершілігі шектеулі серіктестігі құбырларды дәнекерлеп, арнайы техникамен жер қазу шараларын атқаруда. Серіктестік мамандары газ желісін тартуда кедергілердің жоқ екендігін айтып, наурыз айына дейін құбырларды жалғап болатындығын жеткізді.
Жоспар бойынша жоғары қысымды көгілдір отын шыны зауыты жанындағы газ тарату стансасынан алынады. Екі аралықтағы темір жол, авто жолға және Шіркейлі каналына залал келтірмей құбырларды өткізу үшін озық үлгідегі техниканың көмегімен бұрғылау әдісі қолданылады.
Бастау алған игілікті іске қолдау білдіруге келген ақсуаттық ағайын шаһар басшысымен жүздесті. Кездесуде Ғанибек Қонысбекұлы тұрғындарға жобаның жай-жапсарын таныстырды. Алдағы уақытта ауыл көшелері қазылып, құбырлар орналастырыла бастайды. Сол кездері қауіпсіздік шараларына ерекше ден қойып, талаптарды орындау қажет. Ал, мердігер мекеме қазылған жерге құбыр қойылған соң, қайта көму жұмысын жедел жүргізуді жауапкершілігіне алады.
Көше бойымен жүргізілген газ құбырынан тұрғындар өз есептерінен үйлеріне газ кіргізетіндіктері белгілі. Бұл тұста, лицензиясы бар мекемелермен келісім-шартқа отыру керектігі ескертілді. Ғанибек Қонысбекұлы осындай мәселелердің алдын алу мақсатында ауыл әкімі Мәмбетәлі Ақмырзаевқа бірқатар міндеттер жүктеп, мердігер мекемеге жұмыстың сапалы әрі жүйелі жүргізілуін қамтамасыз етуді тапсырды.
<img src="https://kyzylorda-news.kz/wp-content/uploads/2022/01/fb_img_1643284263425.jpg" alt="" />
<img src="https://kyzylorda-news.kz/wp-content/uploads/2022/01/fb_img_1643284257027.jpg" alt="" />
<img src="https://kyzylorda-news.kz/wp-content/uploads/2022/01/fb_img_1643284269469.jpg" alt="" />

Ақсуат ауылдық округі мен Наурыз елді мекенінде газ жүйесінің құрылысы қарқынды жүргізіліп жатыр

Kyzylorda-news. kz. Өткен жылы облыстың өнеркәсіп кәсіпорындары 773,1 млрд.теңгенің өнімін өндірді. Өсім өңдеу өнеркәсібінің 14,5%-ға арту есебінен құралып отыр дейді Өңірлік коммуникациялар қызметінде өткен баспасөз конференциясында облыстық экономика және бюджетті жоспарлау басқармасы басшысының орынбасары Ринат Құдайбергенов.
Өңір экономикасына 302,8 млрд. теңге инвестиция салынды.
<blockquote>
 «Өткен жылы индустрияландыру бағдарламасы аясында жалпы құны 45,2 млрд. теңгені құрайтын, 456 жұмыс орны бар 4 жоба іске асырылды. Олар «Табақша шыны шығару және өңдеу зауыты құрылысы», «Ас тұзын өндіру», «Жаңақорған ауданындағы керамзит және керамзит блоктарын өндіру», қуаттылығы жылына 630 тонна күріш өңдеу цехы пайдалануға берілді», – Ринат Мәжитұлы.
</blockquote>
Сонымен қатар, былтыр 38 әлеуметтік нысанның құрылысы жүргізілді. Оның 17-і пайдалануға берілді. Оның 5-і білім, 7-денсаулық, мәдениет және спорт саласынан 2 нысаннан салынды. 103,3 млрд. теңгеге құрылыс жұмыстары орындалды. 
Ал, ауыл шаруашылығының жалпы өнімінің көлемі 166,8 млрд. теңгені құрады. Бұл салада оң тенденция мал шаруашылығы есебінен қалыптасып отыр.

Өткен жылы Қызылордаға 302,8 млрд. теңге инвестиция салынды

<a href="https://kyzylorda-news.kz/">Kyzylorda-news.kz.</a> Арал ауданының әкімі Серік Сермағамбетов «Сырдария өзенінің арнасын реттеу және Арал теңізінің солтүстік бөлігін сақтау» жобасының 2 кезеңін (САРАТС-2) іске асыру мәселесімен Иран Республикасы «Yelkom Consulting Engineers» компаниясының өкілдерімен кездесті.
Кездесуге Гидролог, оңалту және мониторинг бойынша сарапшы Данешвар Шахаб, Су ресурстарын біріктірілген басқармасының сарапшысы Рафиан Хамид, Әлеуметтік сарапшы Джангчикашани Сомайе, Қазақстан Республикасындағы Халықаралық Аралды құтқару қорының бас маманы Мария Заднепровская, «Арал-Сырдария» бассейннің экологиясы мен биоресурстары ғылыми зерттеу институты» ЖШС-нің Арал филиалының директоры Зауалхан Ермаханов, аудандық ардагерлер кеңесінің төрағасы Әділбек Әйімбетов, «Тұран ойпаты – Арал теңізі» коғамдық бірлестігі төрағасы, аудан ардагері Көлбай Данабай және облыстық табиғи ресурстар және табиғат пайдалануды реттеу басқармасы су реттеу бөлімінің маманы Айгүл Аяпова қатысты.
Кездесу барысында Иран Республикасының «Арал теңізінің солтүстік бөлігін өңірлік дамыту және қалпына келтіру» жобасы басшысының орынбасары Шефиейфар Мехди Сырдария өзенінің арнасын реттеу және Арал теңізінің солтүстік бөлігін сақтау» жобасының техникалық-экономикалық негіздемесін дайындап, жобаның 2 кезеңін іске асыру мақсатында әзірленген арнайы жобалармен таныстырып, жобаның маңызды тұстарын түсіндіріп өтті. Сонымен қатар кездесуде САРАТС-1 жобасының бірінші кезеңінің жүзеге асырылуы нәтижесінде ауданның әлеуметтік-экономикалық дамуы, оның ішінде балық шаруашылығының дамуына жасалған үлкен мүмкіндіктер мен өңірдегі экологиялық мәселелер сөз болды.
Аудан басшысы өз кезегінде тіршілігі теңізбен байланысқан әрбір Арал халқының көк теңіздің қайта оралуын асыға күтетін жеткізді. САРАТС 2 жобасының жүзеге асуына әлемдік деңгейде жұмыс жасап жатқан «Yelkom Consulting Engineers» компаниясының өкілдеріне ризашылығын білдірді.
<img src="https://kyzylorda-news.kz/wp-content/uploads/2022/01/fb_img_1643271376670.jpg" alt="" />

САРАТС: Арал ауданына Иран Республикасының өкілдері келді

<a href="https://kyzylorda-news.kz/">Kyzylorda-news.kz.</a> Қызылорда облысы кәсіпкерлер палатасына былтыр бизнес өкілдерінен құқығын қорғау бойынша 136 өтініш түскен. Осы өтініштердің 44-і жер қатынастары қатысты болды.
Бұл туралы Кәсіпкерлер палатасының директоры Ғалымбек Жақсылықов облыс әкімі Гүлшара Әбдіқалықованың қатысуымен өткен сыбайлас жемқорлыққа қарсы саясаттың жаңа тұжырымдамалық жобасын талқылау барысында айтты. 
«Жалпы 2021 жылы Палатаға кәсіпкерлерден 541 өтініш түсті. Оның 136-сы – бизнесті қорғау бағытындағы шағымдар. Сарапшылар түскен өтініштердің 40 пайызында оң шешімге қол жеткізе алды. Нәтижесінде мыңнан аса кәсіпкердің құқығы қорғалды. Осы жерде атап өтетін мәселе, 136 өтініштің 44-і жер қатынастарына қатысты болды. Бұл – алаңдатарлық жайт. Кәсіпкерлердің проблемасы өте көп. Сыбайлас жемқорлық тәуекелдері жоғары 1-2 салаға тоқтап кетейін», – деген Палата басшысы шарада проблемаларға тоқталды.
Палата директорының айтуынша, жер қатынастары саласындағы заңнамаға сәйкес аукцион өткізілетіні туралы алдын ала кәсіпкерлер хабардар етілуі керек. Бірақ қала, аудан әкімдіктері бұқаралық ақпарат құралдарында да, кейде ресми интернет-ресурстарында да жарияламайды екен. Жер комиссиясы отырыстарының ашықтығын қамтамасыз ету үшін аудио, бейнежазбасы жүргізілу керек, жергілікті атқарушы органдар бұл талапты да орындамай отыр.
<blockquote>
 «Аукцион жарияланғанда жер учаскелерінің нақты мекенжайы көрсетілген орналасу сызбасы қоса жариялану қажет. Бұл талап та орындалмай, сол жағалаудан жер алған кәсіпкерлердің кейбірі тіпті ұтқан жерлерінің қайда орналасқанын да білмейді. Былтыр 2 қарашада Қызылорда қаласы Сырдария өзенінің сол жағалауын игеру жұмыстарын ұйымдастыру жөніндегі облыстық штаб отырысында қала әкіміне бекітілген егжей-тегжей жоспарлау жобасына сәйкес келмейтін, сауда-саттық арқылы жалға берілген 72 жер учаскесін қолданыстағы заңнама аясында мемлекет меншігіне қайтару бойынша шараларды қабылдау тапсырылды. Бұл жерде аукционға заңды қатысқан кәсіпкерлердің құқығына нұқсан келіп отыр», – деген Ғалымбек Жақсылықов аймақ басшысынан осы мәселеге мән беріп, жауапты мемлекеттік органдарға нормативтік-құқықтық акті бойынша талаптардың орындалуын тапсыруды сұрады.
</blockquote>
Бұдан бөлек Кәсіпкерлер палатасының басшысы агроөнеркәсіп кешеніндегі субсидия мәселесін көтерді. Ғалымбек Жақсылықовтың айтуынша, саладағы бюрократиядан, ақпараттық жүйелердің күрделілігі мен талаптарда кездесетін қиындықтардан кәсіпкерлер зардап шегіп отыр. Субсидияға берілген қаржы бірнеше жылдан кейін «құжаттарда қателік кетті» деген желеумен қайта қайтаруды талап етілуі мүмкін.
<blockquote>
 «Сондықтан, тексеруші органдарға (Қаржы полициясы, Прокуратура, Ішкі аудит қызметі т.б. органдар) субсидияның заңсыз берілуін тексеру барысында кәсіпкерлерге мейлінше зияны тимейтін жағын қарастыру ұсынылады. Біздің жағдайымызда субсидия алған кәсіпкердің емес, оған дейін құжаттарын тексеріп қабылдап алған жергілікті атқарушы органның қателігі болып отыр. Әрі қарай заң шығарушы органдарға сыбайлас жемқорлық тәуекелдерін жоюға қатаң ұсыныс жасап, соларды өзгертуге ықпал етуіңізді сұраймын», – деді ол.
</blockquote>
Отырыста Кәсіпкерлер палатасының директоры Ғалымбек Жақсылықов «Қазақстан Республикасының 2022-2026 жылдарға арналған сыбайлас жемқорлыққа қарсы саясат» тұжырымдамасын қабылдау барысында заңнамалардың орындалуын қатаң бақылауды және көтеріп отырған салалардағы әкімшілік кедергілерді жоюға қатысты ұсыныстардың ескерілуін сұрады.

Қазақстан және Қызылорда облысының жаңалықтары: Экономика