<a href="https://kyzylorda-news.kz/">Kyzylorda-news.kz.</a> Қашықтан істейтін қызметкерлер жалақысын толық көлемде алады. Егер олар жақсы нәтиже көрсетсе, сыйақы төленуі тиіс. Бұл туралы әділет министрі Марат Бекетаев мәлімдеді.
Журналистер министрден “салықтың аз түсуіне және мемлекеттік бюджет шығыстарының ұлғаюына байланысты жалақы қысқарып, сыйақы төленбеуі мүмкін бе?” деп сұрады. Еуропаның бірқатар елі осындай тәжірибеге көшкен.
<blockquote>
 “Қазір сыйақыны алып тастау туралы сөз қозғауымыз керек деп ойламаймын. Егер мемлекеттік қызметкерлерге келсек, қазір үйден істеп жатқан адамдардың 70 проценті жалақысын толық көлемде алады. Егер жақсы нәтиже көрсетсе, сыйақы төленуі керек. Өйткені ол мемлекеттік қызметкерлерді өз жұмысын уақытында және сапалы орындауға ынталандыруы тиіс”, – дейді Бекетаев астанада өткен баспасөз мәслихатында.
</blockquote>
Ол мемлекеттік бюджетке түсетін салық төмендеп, кіріс азайған жағдайда белгілі бір секвестр (бюджеттің шығыстарын қысқарту немесе шектеу) жасалатынын айтты.
<blockquote>
 “Ең алдымен, мен мынаны айтқым келеді. Әзірге қаржы министрлігі бюджетке кіріс едәуір азаятынын болжап отырған жоқ. Бұған дейін менің әріптестерім айтып кеткендей, қаржы резерві жеткілікті. Мемлекеттік аппарат пен мемлекеттік қызметкерлер өздеріне жүктелген міндетті орындайтынына сенімдіміз”, – деді ведомство басшысы.
</blockquote>

Төтенше жағдай: Елімізде жалақы қысқарып, сыйақы төленбеуі мүмкін бе?

<a href="https://kyzylorda-news.kz/">Kyzylorda-news.kz.</a> Азаматтардың қауіпсіздігін қамтамасыз ету және короновирустың таралуымен күресу мақсатында Қызылорда облысының кәсіпкерлер палатасы қызметкерлердің бір бөлігін қашықтықтан жұмыс режиміне ауыстырды. Палата кеңсесінен, сондай-ақ Кәсіпкерлерге қызмет көрсету орталығынан кәсіпкерлер бұрынғынша кеңес ала алады.
Қызылорда облысы кәсіпкерлер палатасының сенім телефоны +7 (7242) 40-09-81, call-орталық +7 777 764 33 11.
Қызылорда облысы кәсіпкерлер палатасының орталық офисінде (Қызылорда қ-сы, Желтоқсан к-сі 12, «Бастау» бизнес-орталығының 11-қабаты) әр бөлім бойынша бір кезекші қызметкер жұмыс істейді.
Палатаның 7 аудандық филиалы штаттық режимде жұмыс жасауда. Кеңес беру қызметі онлайн форматқа көшірілді.
Коронавирустың өршуінен бизнестері зардап шеккендер үшін «Атамекен» Ұлттық Кәсіпкерлер Палатасы базасында, қазақстандық бизнес үшін жағымсыз салдарды нивелирлеу жөніндегі жедел штаб жұмысын жалғастыруда. Қазіргі уақытта штаб кәсіпкерлердің мәселелерімен тәуекелдері туралы ақпаратты, сондай-ақ бизнеске зиянды азайту жөніндегі ұсыныстарды жинаумен және талдаумен айналысуда.
Орыс тіліндегі сауалнамаға мына <a href="https://docs.google.com/forms/d/e/1FAIpQLSdi2fEgi7WEbkEbnHqJdkchBe-GsOyJYMLaaIixN-7dOCH2LQ/viewform?fbclid=IwAR2N1mEfkeHCq0wkEwSBQ2Gd2pUlGHsdCYSoF_HdYcCcHRV5BEYBpOBnuPw">сілтеме</a> бойынша өтуге болады.
Қазақ тіліндегі сауалнамаға мына <a href="https://docs.google.com/forms/d/e/1FAIpQLSeFthA-kKhUgqk2C1E1lFrS6m37UzuS7zqtfSr9ln6IS-alrw/viewform?fbclid=IwAR0gfEHaty2PEp8qcOOAYQQwMXLYwBYVAB12kySeLap3eX8p01guRg2ZPz8">сілтеме</a> бойынша өтуге болады.
Сонымен қатар, штаб күнделікті негізде бизнеске қатысты ағымдағы жағдай бойынша ақпараттандыратын болады. Ақпаратты Ұлттық кәсіпкерлер палатасының <a href="https://atameken.kz/kk/?fbclid=IwAR16OhmrJotnsaRoil1irBFFWsGuDM_ZxndtWFOeZxpoEJCNqOzD2rWjUfI">atameken.kz</a> ресми сайтынан немесе әлеуметтік желілердегі <a href="https://web.facebook.com/atamekenkz/">Facebook</a> және <a href="https://www.instagram.com/atamekenkz/?hl=ru&fbclid=IwAR0dQERtG0_CSC38FAs6YS6faOW6jdby6wZdc9Cd4RTcTVTw5bQDosSFVnw">Instagram,</a> сондай-ақ штаб жетекшісінің орынбасары – Шыңғыс Темірдің <a href="https://web.facebook.com/groups/AtamekenZashita/?ref=group_header">парақшасынан</a> табуға болады. Барлық кәсіпкерлерден сілтеме бойынша сауалнаманы толтырып, таратуларыңызды, сондай-ақ «Атамекен» ҰКП call-орталығына 1432 хабарласуды сұраймыз.
Бизнес тарапынан жиі қойылатын сұрақтардың жауаптары осы сілтемеде: <a href="https://atameken.kz/kk/news/category/pomosh-biznesu?fbclid=IwAR0ak7ghLVuFmE7AtaXiTlenzeIEq_NSVepl_ymelDDlL4N0zw892bgR8sc">#ТӨТЕНШЕЖАҒДАЙДАҒЫБИЗНЕС</a>

Төтенше жағдай: Қызылордалық кәсіпкерлер қайда хабарласа алады?

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақовтың төрағалығымен жер қойнауын пайдаланушылармен кеңес өтті. Кеңесте Қызылорда облысының минералды-шикізат базасын дамытуға қатысты бірқатар мәселелер талқыланды. Оған экология, геология және табиғи ресурстар министрлігі Геология комитетінің төрағасы А. Надырбаев және Нұр-сұлтан және Алматы қалаларынан келген Қазақстанның ғылыми қауымдастығының өкілдері қатысты.
Қазақстан Республикасы экономикасын тұтастай алғанда, соның ішінде өңірлердің дамуын айқындайтын факторлардың бірі тау-кен металлургия кешенінің жұмысы. Бұл ретте Қызылорда облысы мұнай, газ, полиметалл кендері мен уранды қоса алғанда, минералдық-шикізат ресурстарына бай.
<blockquote>
 «Өздеріңіз білетіндей, мұнай – газ саласын дамытудың осы проблемалық мәселелерін біз бірнеше жыл бойы, соның ішінде 2019 жылғы наурызда Қауіпсіздік Кеңесінің отырысында баяндадық. Нәтижесінде, Үкімет Қаулысымен Қызылорда облысының әлеуметтік-экономикалық дамуының кешенді жоспары бекітілді. Республикалық бюджет есебінен Шу – Сарысу, Сырдария, Оңтүстік-Торғай бассейндерін жалпы сомасы 11 млрд.теңгеге геологиялық зерттеу шешімі қабылданды», – деді облыс әкімі Қ. Ысқақов.
</blockquote>
Айта кету керек, биылғы жылы Шу-Сарысу және Оңтүстік-Сургай бассейндері бойынша зерделеу жұмыстары басталды. Бұл үшін ағымдағы жылы республикалық бюджеттен 1,47 млрд.теңге бөлінді. Сырдария бассейнін зерттеуге қаражат бөлу Үкімет деңгейінде қарастырылуда.
Қазіргі уақытта 2021-2025 жылдарға арналған геологиялық барлаудың мемлекеттік бағдарламасы аясында Арал өңірі бассейнін зерделеу көзделеп отыр. Бұл зерделеу жұмыстарының негізі Арал теңізінің бұрынғы түбін зерттеуге бағытталады.
<blockquote>
 «Қазіргі кен орындарының тау-кен бөліністерінің тереңдік шекаралары 
1 500 – 2 000 метр ал, іргетас тереңдігі 3 000 метр. Жоғарғы, орта, төменгі Юра және палеозой шөгінділері зерттелмеген. Осыған байланысты өндіру және барлау ұңғымаларының тереңдігін 3 000 метрден астам асыру мәселесі өзекті болып отыр. Мысалы, «Қуатамлонмұнай» мұнай компаниясы 5000 метр тереңдікте тірек-параметрлік ұңғыманы бұрғылау үшін өтінім берген болатын. Алайда, Энергетика министрлігі тарапынан қолдау көрсетілмеді. 5000 метр тереңдікте тірек-параметрлік ұңғыманы бұрғылау мәселесі оң шешілген жағдайда компания қызметкерлерінің жалақы мәселесі де шешімін табар еді. Сондықтан Ақбатыр Алуадинұлы, сізден осы мәселенің оң шешілуіне көмек көрсетуіңізді сұраймыз», – деді облыс әкімі Қуанышбек Досмайлұлы.
</blockquote>
Естеріңізге сала кетейік, Қызылорда облысында қатты минералдық-шикізат ресурстарының болашағы зор. Мәселен, қорғасын, мырыш, кадмий, германия, алтын, күміс, селен, темір, жанғыш тақтатастар, қоңыр темір, фосфориттер, молибден-ванадий және цирконий-титан кендерінің қорлары анықталды. Сонымен қатар, облыс аумағында темір, фосфориттер, жанғыш тақтатастар, тальк, мыс, алтын кен орындары да бар.
<img src="https://kyzylorda-news.kz/wp-content/uploads/2020/03/bek_5316.jpg" alt="" />
<img src="https://kyzylorda-news.kz/wp-content/uploads/2020/03/bek_5324-scaled.jpg" alt="" />
<img src="https://kyzylorda-news.kz/wp-content/uploads/2020/03/bek_5287-scaled.jpg" alt="" />

Қызылорда облысындағы кен орындарына геологиялық зерттеулер жүргізіледі (ФОТО)

<a href="https://kyzylorda-news.kz/">Kyzylorda-news.kz.</a> Бірыңғай жинақтаушы зейнетақы қорының қызметкерлері өткен жылы сұраусыз қалған 675 мың зейнетақы шотының иелерімен байланыс орнатты, деп хабарлады қордың баспасөз қызметі.
Олар – бір жыл және одан да көп жылдардан бері жарна түспеген «ұйқыдағы» шоттар. Арасында өзін-өзі жұмыспен қамтушылар, жұмыссыздар, сондай-ақ зейнетақы жарналарын уақытша аудармағандар: үйде бір жылдан астам уақыттан бері декреттік демалыста отырғандар, тәжірибе жұмысындағылар, тағылымдамадан өтушілер, үй шаруасындағы әйелдер, мүгедектігі бар адамдар, әскери қызметшілер және сотталғандардың шоттары бар.
Қор мамандары ақпарат беру-түсіндіру жұмыстары аясында салымшыларға міндетті зейнетақы жарналарын аударудың маңыздылығын түсіндірді. Соның арқасында 128 мың жеке зейнетақы шотына жалпы сомасы 4 миллиард теңгеге 523 202 жарна келіп түсті.
Осылайша БЖЗҚ «ұйқыдағы» шоттарды жандандыру, соңғы жылдары шоттарына зейнетақы жарнасын аудармай жүрген салымшыларды іздестіру жұмыстарын одан әрі жалғастыруда.

Қазақстанның зейнетақы қоры кімдердің шотына ақша түспей жатқанын мәлімдеді

<a href="https://kyzylorda-news.kz/">Kyzylorda-news.kz.</a> Бұл туралы Кәсіпкерлер палатасының директоры Ғалымбек Жақсылықов бизнес-қауымдастық алдындағы есепті кездесуінде айтты.
Бүгін «Кәсіпкерлер үйінде» Қызылорда облысы кәсіпкерлер палатасының директоры Ғалымбек Жақсылықовтың бизнес-қауымдастық алдындағы есебі өтті.
Кездесуге облыс әкімінің орынбасары Мұрат Имандосов, мүдделі мемлекеттік орган басшылары, өңірлік кеңес, аудандық кәсіпкерлер кеңесі, Кәсіпкерлердің құқығын қорғау кеңесі мүшелері, жалпы аймақтың бизнес-қауымдастық өкілдері қатысты.
Кездесу басталмас бұрын «Бастау» жобасы бойынша оқып, кәсіптерін ашқан бизнес өкілдерінің өнімдерінен көрме көрсетілді.
<blockquote>
 «Қызылорда облысының экономикасы мұнай өндірісіне тәуелді екені білгілі. Өткен жылы мұнай өндірісі көлемінің 13 пайызға төмендеуі тиісінше өнеркәсіптік өнімнің 10,7 пайызға азаюына алып келді. Жалпы, соңғы 7 жылда облыста мұнай өндірісі екі есеге дейін азайып, 5,5 млн тоннаға дейін төмендеген. Биыл да 1 млн тоннаға кемиді деген болжам бар. Сондықтан өндеу өнеркәсібі бағытында облыс экономикасын әртараптарандыру – күн талабы. Оны тек шағын және орта бизнесті дамыту арқылы қол жеткізе аламыз», – деді Ғалымбек Жақсылықов.
</blockquote>
Биылғы жылдың 1 қаңтар айындағы көрсеткіш бойынша аймақта 46&nbsp;297 шағын және орта кәсіпкерлік субъектісі жұмыс жасауда (дара кәсіпкерлер –&nbsp; 70%, шаруа қожалықтары – 17,8% және заңды тұлғалар – 12,2%). Өсім – 9,3 пайыз.
Өткен жылдың 9 айында шағын және орта кәсіпкерлікте 285,5 млрд теңгенің өнімі өндірілген. Өсім – 9,9 пайызға тең.
Соңғы 3 жылда шағын және орта бизнестің жалпы өңірлік өнімдегі үлесі 14,2 пайыздан 18 пайызға өскен. Өткен жылдың 9 айында шағын және орта кәсіпкерлік саласында 92 223 адам жұмыс жасады. Өсім – 2,5 пайызды көрсетуде.
2019 жылы шағын және орта кәсіпкерліктен бюджетке 
73,8 млрд теңге салық түсіп, өсім 10,6 пайызды құрады.
<img src="https://kyzylorda-news.kz/wp-content/uploads/2020/02/28dinamika2.jpg" alt="" />
<img src="https://kyzylorda-news.kz/wp-content/uploads/2020/02/28dinamika3.jpg" alt="" />
<img src="https://kyzylorda-news.kz/wp-content/uploads/2020/02/28dinamika4.jpg" alt="" />

Қызылордалық кәсіпкерлер өткен жылы бюджетке 73,8 млрд теңге салық түсірген

<a href="https://kyzylorda-news.kz/">Kyzylorda-news.kz.</a> ҚР Премьер-Министрі Асқар Мамин Атырау облысына жұмыс сапары аясында елімізде балық шаруашылығы саласын дамыту мәселелері жөнінде кеңес өткізді, деп хабарлайды&nbsp;<a href="https://primeminister.kz/kz/news/premer-ministr-rk-a-mamin-provel-soveshchanie-po-voprosam-razvitiya-rybnogo-hozyaystva-strany">Үкіметтің баспасөз қызметі</a>.
ҚР балық шаруашылығын дамытудың жай-күйі мен перспективалары туралы Экология, геология және табиғи ресурстар министрі М. Мырзағалиев пен «Балық шаруашылығы қауымдастығы – BD» ЗТБ атқарушы директоры Н. Жұмағалиұлы, өңірлердегі балық шаруашылығының проблемалық мәселелері туралы Атырау, Шығыс Қазақстан, Қызылорда, Түркістан облыстарының балық бизнесінің өкілдері, ҚР-да балық шаруашылығын дамыту туралы ресейлік профессор А. Литвиненко мен ҚР Парламенті Сенатының депутаты С. Еңсегенов баяндады.
Қазақстанның балық және балық өнімдері нарығының жалпы көлемі шамамен 66 мың тоннаны құрайды. Оның 45 мың тоннасы балық аулау кәсібіне, 7,4 мың тоннасы балық шаруашылығына тиесілі. Сонымен қатар 30 мың тоннасы экспортқа шығарылса, 43,5 мың тонна өнім импортталады.
Орта мерзімді перспективада отандық нарық көлемін 120 мың тоннаға дейін ұлғайту әлеуеті бар. Бұл алабалық пен Атлант ақсеркесін өсуінің арқасында импорт көлемін төмендетуге мүмкіндік береді. Сонымен қоса, әлемдік нарықтарға, атап айтқанда, Қытайға, Ресейге және Еуропаға экспорт көлемін арттырады.
Қазақстанда кәсіпшілік балық аулаумен балық шаруашылығының 1 мыңнан астам субъектісі айналысады. Оларға 1646 балық шаруашылығы су айдындары мен олардың учаскелері бекітілген. Аталған салада 11 мың адам жұмыс істейді.
Балық аулау негізінен Каспий және Арал теңіздерінде, Балқаш және Зайсан көлдерінде, Бұқтырма, Қапшағай және Шардара су қоймаларында, Алакөл көлдер жүйесінде, Жайық және Қиғаш өзендерінде қолға алынған. Негізгі кәсіптік өңірлер — Атырау – 13,1 мың тонна (29,2%), Шығыс Қазақстан – 8,2 мың тонна (18,3%), Қызылорда – 7,4 мың тонна (16,4%), Алматы – 6,6 мың тонна (14,6%), Маңғыстау – 2,3 мың тонна (5,2%) және Түркістан облыстары – 2 мың тонна (4,5%).
Қазақстанда балық шаруашылығы қарқынды дамуда — соңғы 7 жылда өсірілген балық көлемі 9 есе 800 тоннадан 7 мың тоннаға дейін артты. Елімізде балық өсірумен 180 балық шаруашылығы айналысады, оларда 1 мыңнан аса адам жұмыспен қамтылған.
Үкімет басшысы елімізде балық шаруашылығын дамыту үшін жүйелі шаралары қабылдау қажеттігін атап өтіп, биыл 1 сәуірге қарай ҚР Балық шаруашылығын дамыту тұжырымдамасының жобасын дайындауды тапсырды.
<blockquote>
 «Өзендердің суы қорғалатын аймақтарында жұмыс істеуге балық шаруашылықтарына тыйым салуды алып тастау, сондай-ақ балық шаруашылығы субъектілерінің су ресурстарын пайдаланғаны үшін жасайтын төлемдерін қысқартып, тек нақты су шығындары үшін төлемдерді қалдыру мәселесін қарастыру қажет. Төлем мөлшерлемесін азайтуды қоса алғанда, балық ресурстарын пайдаланғаны үшін төлем жасау тетігін жетілдіру керек», — деді А. Мамин.
</blockquote>
Премьер-Министр балық өнімдерін бақылау ақпараттық жүйесін әзірлеуді және енгізуді тапсырды.
<blockquote>
 «Бір ай ішінде Каспий теңізінде және Жайық өзенінде балық аулау мерзімдерін ұзарту, сондай-ақ түнгі уақытта балық аулауға рұқсат ету бойынша ұсыныстарды әзірлеу қажет. Балық шаруашылығы субъектілерін мемлекеттік қолдау шараларын арттыру және балық шаруашылығын экономиканың басымдықты салаларының қатарына жатқызу керек», — деді А. Мамин.
</blockquote>
Үкімет басшысы балық шаруашылығы мелиорациясын тұрақты жүргізу мақсатында су түбін тереңдету техникасын сатып алу мәселесін қарастыруды, сондай-ақ балық өсіру зауыттары мен балық шаруашылығының аумақтық инспекцияларын материалдық-техникалық жарақтандыруды қаржыландыру туралы ұсыныстар әзірлеуді тапсырды.
Жұмыс сапары аясында А. Мамин Атырау бекіре балық өсіру зауытына, «Амангелді атындағы» ЖШС, «Caspian Royal Fish» кәсіпорындарына барды, сондай-ақ ҚР балық шаруашылығы саласындағы жетістіктер көрмесін аралап көрді.
<img src="https://kyzylorda-news.kz/wp-content/uploads/2020/02/27balykshar2.jpg" alt="" />
<img src="https://kyzylorda-news.kz/wp-content/uploads/2020/02/27balykshar3.jpg" alt="" />

Қызылорда облысында жылына 7,4 мың тонна балық өндіріледі

<a href="https://kyzylorda-news.kz/">Kyzylorda-news.kz.</a> Былтыр Байқоңыр қаласында «Нұрлы жер» мемлекеттік бағдарламасы аясында 50 пәтерлік 5 үй пайдалануға берілді. Бұл соңғы 30 жылда алғаш рет орын алған игі іс болды. Бұл туралы Қызылорда облысының әкімі Қуанышбек Ысқақов есепті кездесуде айтты.
<blockquote>
 «Байқоңыр қаласында тұрып жатқан азаматтарымыздың әлеуметтік-экономикалық жағдайы ерекше назарда. Былтыр 50 пәтерлі 5 тұрғын күй пайдалануға берілді. Биыл тағы 5 үйдің құрылысын бастағалы отырмыз. Қазіргі таңда жоба-сметалық құжаттары әзірленуде», – дейді аймақ басшысы.&nbsp;
</blockquote>
Сонымен қатар өткен жылдың қазан айында қаланың барлық көппәтерлі үйлерін (20427 пәтер) табиғи газға көшіру аяқталған. Бұл іс тұрғындар үшін газ төлемін 16 есеге төмендетуге мүмкіндік туғызды.
<blockquote>
 «Жылу тарифтерін төмендету мақсатында Байқоңыр қаласының жылу-электр станциясын қайта құру мәселесін Ресей тарапымен талқылап жатырмыз», – дейді облыс әкімі.
</blockquote>
Аймақ басшысының айтуынша, қазіргі таңда Елбасы Нұрсұлтан Назарбаевтың және Мемлекет басшысы Қасым-Жомарт Тоқаевтың тапсырмасымен «Байқоңыр» еркін экономикалық аймағын құру мәселесі пысықталуда.

«Байқоңыр» еркін экономикалық аймағын құру мәселесі пысықталуда

<a href="https://kyzylorda-news.kz/">Kyzylorda-news.kz.</a> «Қызылорда облысында жұмыс істеп тұрған кәсіпкерлік субъектілерінің саны, кәсіпкерлікпен айналысатын халықтың саны да артқан. Шағын және орта бизнестен түсетін салық көлемі де былтырдың өзінде 11 пайызға өсіп отыр», деп мәлімдеді аймақ басшысы халыққа есеп беру жиынында.&nbsp;
Облыс әкімі Қуанышбек Ысқақовтың айтуынша жұмыс істеп тұрған 46 мың кәсіпкерлік субъектісінің 22 пайызы ғана жылына 2 млн. теңгеден артық табыс түсірген.
<blockquote>
 «Президенттің тапсырмасына сәйкес, шағын және орта бизнестің өңірдегі өндірілген өнімдегі үлесін 2025 жылға 35 пайызға жеткізуіміз керек. Ал, бізде,өткен жылдың 9 айы бойынша 16,5 пайыз ғана. Өңірде жалпы көлемі – 910 гектарды құрайтын 6 индустриалдық аймақ жұмыс жасауда. Оның ішінде 54 жоба (193,7 млрд.теңге) орналасып, 237,5 гектар жер телімі ғана игеріліп тұр. 636 гектар учаскесі бос. Сондықтан, біз осы индустриалдық аймақтардың мүмкіндігін барынша пайдалануымыз қажет»,&nbsp; – деді ол.
</blockquote>
Аймақ басшысы «Еңбек» және «Қарапайым заттар экономикасы» бағдарламаларының мүмкіндіктерін барынша тиімді пайдалануға шақырды.&nbsp;
<blockquote>
 «Енді халық тұтынатын қарапайым тауарлар шығаруға бағытталуымыз қажет. Бұрында біздегі тігін фабрикасы, аяқ киім фабрикасы қандай сапалы өнім шығарғаны естеріңізде болар. Табиғи теріден жасалған балалар аяқ киімі тіпті алыс шетелдерге де экспортқа шығарылған болатын. Неге, біз төсек-орын жабдығын өзімізде шығаруға мүмкіндік бола тұра бүгінде шетелден әкелеміз?! Бізде қаражат та, шикізат та, жұмыс күші де бар», – дейді Қуанышбек Досмайылұлы.
</blockquote>

Қызылорда облысында 46 мың кәсіпкерлік субъектісі жұмыс жасайды

Kyzylorda-news.kz. Бүгінгі күні жиырма шақты елге экспортталатын агроөнеркәсіптік кешен өнімдерінің тізбесі 3-тен 19 түрге дейін артты. Бұл туралы Қызылорда облысының әкімі Қуанышбек Ысқақов халық алдындағы есепті кездесуде айтты.
Өткен жылы экспорт көлемі 7 пайызға өскен, экспорттың 90 пайызы қайта өңделген өнім болып табылады.
<blockquote>
 «2017 жылы Қызылорда облысының ауыл шаруашылығы өнімдерін өткізу нарықтарына кешенді маркетингтік зерттеулер жүргізілген болатын. Соның негізінде аймақта агроөнеркәсіптік кешенінің «Агрокартасы» жүзеге асырылуда. Оның мақсаты экспорттың өсуін және жергілікті өнімдердің қауіпсіздігін қамтамасыз ету», – дейді облыс әкімі.
</blockquote>
Ауыл шаруашылығы өнімдерін қалдықсыз өңдеуге жаңа технологиялар тартылуда. Мәселен, 2019 жылдың қазанында, толығымен автоматтандырылған, әлемдегі өңдеу технологиясы жағынан озық, заманауи күріш өңдеу зауыты (шамамен 500 млн теңге) пайдалануға берілді.
Сандық технологиялар кәсіпорынға өнімділікті арттыруға және қалдықсыз өндірісті жолға қоюға мүмкіндік береді.
Қазіргі таңда күріш өндірушілер толықтай жоғары өнімді күріш тұқымын&nbsp; пайдалануда. Нәтижесінде, былтыр диқандарымыз әр гектардан орта есеппен 60,3 центнерден өнім алған.
<blockquote>
 «Өкінішке қарай, жыл сайын күріштің жоғары өнімін қамтамасыз етіп отырғанымызбен, бізде ет өнімі мардымсыз. Қысқы және көктемгі кезеңде көкөніс, жеміс бойынша қажеттілікті жаппаймыз. Сондықтан, өнімнің бір бөлігі көрші өңірлерден әкелінеді, ал, бұл бағаның тұрақсыздығына әкеліп соғады. Көкөністер мен жемістердің қорын жинақтауға болатын қоймалар, жаңа үлгідегі жылыжай, ет комбинаты, бордақылау алаңдары, сүт-тауар фермалары жеткіліксіз. Дегенмен, тауарлардың әлеуметтік маңызы бар түрлеріне тұрақтандыру қорының серіктес сауда желілері арқылы бағаны тұрақты ұстап тұруға қол жеткізіп отырмыз», – дейді аймақ басшысы.
</blockquote>
Өткен жылдың қорытындысымен әлеуметтік маңызы бар азық-түлік тауарларының баға индексі республика бойынша біздің облыста ең төменгі өсімді, яғни 9,1 пайызды көрсетті.
<blockquote>
 «Осы жылдың көктемінде Маханбетов аулындағы 2 гектарды құрайтын және испандық технология негізінде жұмыс жасайтын автоматтандырылған жылыжай кешенінде өсірілген көкөністердің алғашқы өнімін жинайтын боламыз. Бұл жобаның құны – 1 млрд теңгені құрайды», – дейді Қуанышбек Ысқақов.
</blockquote>

Қызылорданың агроөнімдері 20-ға жуық елге экспортталады

<a href="https://kyzylorda-news.kz/">Kyzylorda-news.kz.</a> Қызылорда облысында осы жылы кварц құмын байыту бойынша тау-кен байыту комбинатының бірінші желісі пайдалануға беріледі. Бұл туралы аймақ басшысы Қуанышбек Ысқақов Н. Бекежанов атындағы облыстық қазақ музыкалық драма театрында өтіп жатқан халық алдындағы есепті кездесуінде мәлімдеді.
<blockquote>
 – 2020 жылы Арал ауданында құны 750 млн. теңге тұратын, сағатына 5 тоннаны құрайтын кварц құмын байыту бойынша тау-кен байыту комбинатының бірінші желісі пайдалануға беріледі. Бұдан басқа, Қызылорда қаласында құны 1,8 млрд.теңге тұратын жоғары қысымды шыныпластик желілік және сорғы-компрессорлық құбырларды шығару жобасы іске асады, – деді облыс әкімі халық алдындағы кездесуінде.
</blockquote>
Облыс әкімінің атап өткеніндей, 2019 жылы «Арал тұз» акционерлік қоғамы тұз өндіру көлемін 25 пайызға, атап айтқанда, жылына 400-ден 500 мың тоннаға дейін ұлғайтты. Ал, биыл тағы 10 пайызға арттыруды және 2022 жылға қарай өндіру көлемін 700 мың тоннаға дейін жеткізуді жоспарлап отыр. Сондай-ақ, қуаттылығы 120 мың тонна болатын ас тұзын өндіретін үшінші испандық цехтың құрылысына кірісуде.
Сонымен қатар, өңір басшысы кальцийлендірілген сода өндіретін алғашқы зауыттың құрылысының жобасын министрліктермен келісудің соңғы кезеңі жүріп жатқандығын да атап өтті.
<blockquote>
 – Шиелі ауданындағы «Баласауысқандық» ванадий кен орнында қара тақтатастарды автоклавты қайта өңдеу жобасы, Жаңақорған ауданындағы «Шалқия» кен орнында тау-кен байыту комбинатын салу және басқа да бірқатар перспективалы жобалар бойынша жұмыс жалғасуда. Осылайша, өңдеу өнеркәсібін дамыта отырып, болашақта өңірдің мұнайға тәуелділігін төмендетеміз. Алайда, бұл бір жылдың жұмысы емес, – деді Қ.Ысқақов.
</blockquote>

Биыл облыста кварц құмын өндіретін комбинат пайдалануға беріледі

<a href="https://kyzylorda-news.kz/">Kyzylorda-news.kz.</a> Биыл Қызылорда облысында 10 ірі жоба іске асырылмақ. Олардың жалпы құны 408 млрд. теңгеден асады. Бұл туралы аймақ басшысы Қуанышбек Ысқақов халық алдындағы есепті кездесуінде мәлімдеді.
Облыс әкімі атап өткеніндей, биыл облыста тау-кен саласын дамыту мақсатында «Талап» қорғасын-мырыш кен орнын және «Ақ еспе» титан-цирконий кен орнын барлау басталады.
Сонымен бірге, шикізаттық емес секторды дамытуға, әсіресе, экспортқа бағытталған өндірістерді дамытуға баса назар аударылмақ.
<blockquote>
 «Мәселен, 2015 жылдан бастап индустриялық-инновациялық даму мемлекеттік бағдарламасының 2-кезеңінің басталған уақытымен салыстырсақ, өңдеу өнеркәсібіндегі еңбек өнімділігі 2,8 пайызға жуық, жалпы қосылған құн – 17 пайыздан астам, ал, шикізаттық емес экспорт көлемі19 пайызға өсті. 2018 жылдың желтоқсанында пайдалануға берілген тампонажды цемент өндіру зауыты 6 цемент түрін өндіреді және көршілес өңірлерге ғана емес, 2019 жылдың шілдесінен бастап экспортқа Өзбекстанға – 40 мың тонна шығаруда. Ал, қара тақтатастарды автоклавты қайта өңдеу бойынша жоба іске асырылып жатқан «Баласауысқандық» ванадийлі кен орнынан жыл сайын Ресей мен Ұлыбританияға 200 тоннадан астам аммоний метаванадаты экспортталуда», – деді Қ. Ысқақов.
</blockquote>
Сондай-ақ, аймақ басшысы 2020 жылы жалпы құны 408 млрд.теңгеден асатын тағы 10 ірі жобаны іске асыру жоспарланып отырылғанын атап өтті.
<blockquote>
 «Оның ішінде шыны зауыты бар. Әрине, бұл күрделі жобаның өзіндік қиыншылықтары жеткілікті. Бірнеше рет құрылтайшылар арасындағы келіспеушілікке және мердігерлердің өзгеруіне байланысты іске асыру мерзімі кейінге шегеріліп келеді», – деді ол.
</blockquote>
Айта кетейік, қуаты жылына 197,1 мың тонна болатын табақты шыныны өңдеу және өндіру бойынша зауыт құрылысы жобасының құны 42 млрд.теңгенің құрайды. Шыны зауыты ашылған жағдайда 226 жаңа жұмыс орны ашылады. Тапсырыс беруші – «Орда Гласс ЛТД» ЖШС.

Қызылорда облысында биыл жалпы құны 408 млрд. теңгеден асатын 10 жоба жүзеге асады

<a href="https://kyzylorda-news.kz/">Kyzylorda-news.kz.</a> Биыл ҚызылордадаШу-Сарысу шөгінді бассейнінде мұнай-газ перспективалы құрылымдарын анықтау мақсатында жер қойнауын зерттеу жұмыстарын жүргізу басталады.
Қызылорда облысының әкімі Қуанышбек Ысқақов халық алдындағы есебі кезінде мұнай-газ саласын дамытуға қатысты пікір білдірді. &nbsp;
<blockquote>
 «2019 жылдың ақпанында Тұңғыш Президентіміз – Елбасы Нұрсұлтан Әбішұлы Назарбаевтың төрағалығымен өткен Қауіпсіздік Кеңесінің отырысында Қызылорда облысын дамыту мәселелері қаралған кезде, мұнай-газ саласын дамыту, жаңа кен орындарын барлау, газ өндіру және өңдеу мәселелерін үлкен блок етіп көтердік», – дейді облыс әкімі.
</blockquote>
Аймақтың кешенді дамуына қатысты бірқатар мәселелер ҚР Үкіметінің қаулысымен бекітілген 2019-2022 жылдарға арналған облыстың әлеуметтік-экономикалық дамуының кешенді жоспарына енгізілген. Жоғарыда айтып өткендей, биыл Шу-Сарысу шөгінді бассейнінде мұнай-газ перспективалы құрылымдарын анықтау мақсатында жер қойнауын зерттеу жұмыстарын жүргізіледі. Бұл – мұнай-газ саласын дамыту мәселесіндегі елеулі өзгерістер болмақ.
<blockquote>
 «Өте қымбатқа түсетін жұмысты бастау үшін биыл республикалық бюджеттен 600 млн теңге қарастырылып отыр», – дейді Қуанышбек Ысқақов. &nbsp;
</blockquote>
Сонымен қатар аймақ басшысы айтып өткендей, жоспарда аз зерттелген «Оңтүстік Торғай және Сырдария» шөгінді бассейндерін барлау көзделген. Осы шөгінді бассейндер бойынша жұмыстарды бастау үшін республикалық бюджеттен 2 млрд теңгеден астам қаражат бөлінуіне жұмыс жасалатын болады.

Қазақстан және Қызылорда облысының жаңалықтары: Экономика