<a href="https://kyzylorda-news.kz/">Kyzylorda-news.kz.</a> Қызылорда облысында жыл сайын мұнай өндіру көлемі 1 млн тоннаға дейін төмендеп жатыр. Бұл туралы бүгін Үкімет отырысында ҚР Экология, геология және табиғи ресурстар министрі Мағзұм Мырзағалиев айтты, деп хабарлайды <a href="https://lenta.inform.kz/kz/magzum-myrzagaliev-tayau-zhyldary-tausylatyn-ken-oryndaryn-atady_a3615692">ҚазАқпарат</a>.
<blockquote>
 «ҚР Президенті Қасым-Жомарт Тоқаевтың тапсырмасына сәйкес Геологиялық барлаудың 2021-2025 жылдарға арналған мемлекеттік бағдарламасының тұжырымдамасы әзірленді. Бұл мәселеге Мемлекет басшысы былтыр 5 қыркүйекте Атырау қаласында өткен мұнай-газ саласына қатысты кеңесте баса назар аударды. Негізі елімізде 8 мыңға жуық кен орны тіркелген. Оның ішінде 317 көмірсутек, яғни мұнай, газ, конденсат кен орындары бар. Мұнан бөлек, 910 қатты пайдалы қазбалар кен орны болса, 3 мыңнан астамы кең таралған пайдалы қазбаларға тиесілі. Сонымен қатар 4 мыңға жуығы жерасты сулары кен орны бар», – деді тұжырымдаманы таныстырған министр.
</blockquote>
Оның айтуынша, бүгінгі күні бірқатар өзекті мәселе күн тәртібінде тұр. Атап айтқанда, моноқалалардағы тау-кен кәсіпорындарының шикізат базасының тұрақсыздығы, пайдалы қазба қорларының азаюы және «байырғы» кен орындарында өндіру көлемінің төмен деңгейге түсуі өзекті болып отыр.
<blockquote>
 «Мысалы, Қызылорда облысында жыл сайын мұнай өндірудің көлемі 1 млн тоннаға дейін төмендеуде. Осы мәселе таяу арада Ақтөбе мен Маңғыстау облыстарында да болжануда. Соңғы он жылдықта Шығыс Қазақстандағы моноқалаларға жақын орналасқан – Шемонаиха, Юбилейно-Снегирихинское, Зыряновское ірі қорғасын-мырыш кен орындарының қоры түгелдей таусылып, жабылды. 2025-2040 жылдарға таман Орловское, Малеевское, Тишинское, Риддер-Сокольное сияқты кен орындарында да пайдалы қазба қорларының толықтай сарқылуы күтілуде», – деді Мағзұм Мырзағалиев.
</blockquote>
<img src="https://kyzylorda-news.kz/wp-content/uploads/2020/02/18munai2.jpg" alt="" />

Қызылорда облысында жыл сайын мұнай өндіру көлемі төмендеп жатыр

<a href="https://kyzylorda-news.kz/">Kyzylorda-news.kz.</a>&nbsp;Қаңтарда жылдық инфляция 5,6% құрады. Азғантай өсім реттелетін қызметтер мен бензин бағасы тарапынан көрсетілген қысымның салдары болды, деп хабарлайды <a href="https://sputniknews.kz/economy/20200211/12808843/Kazakhstan-benzin-kymbat.html">Sputnik Қазақстан</a>.
<blockquote>
 “Азық-түліктік емес жылдық инфляция 5,2% құрады (өткен айда 5% болған). Бұл акциздердің артуына байланысты бензиннің қымбаттауы есебінен болды. Көлік қызметтері және электр қуаты бағасының өсімі ақылы қызметтер инфляциясының ұлғаюына ықпал етті (инфляция 2019 жылдың желтоқсанындағы 0,7%-тен 1,4%-ке дейін артты)”, – деді Қазақстан Республикасы ұлттық банкі төрағасының орынбасары Ақылжан Баймағамбетов.
</blockquote>
Ал азық-түліктік инфляция қаңтарда баяулады. Бұған жеміс-жидек, көкөніс, ет, ет өнімдері, нан-тоқаш өнімдері, жарма, балық, май бағасы өсімі қарқынының төмендеуі әсер етті. Осылайша, 2020 жылы азық-түліктік инфляция баяулай түседі деп болжанып отыр.

Қазақстанда бензин қымбаттады

<a href="https://kyzylorda-news.kz/">Kyzylorda-news.kz</a>. Әлемде соңғы 4 айда азық-түлік бағасы біршама өскен, деп хабарлайды <a href="https://24.kz/kz/zha-aly-tar/lemde/item/372677-b-lemde-azy-t-lik-ba-asy-sti">«Хабар 24»</a>.
Бұл туралы БҰҰ-ның Азық-түлік және ауыл шаруашылық ұйымы хабарлады. Мәліметке қарағанда, биыл қаңтар айында бұл көрсеткіш былтырғы желтоқсан айымен салыстырғанда 0,7 пайызға көтерілген. Азық-түлік өнімдерінің ішінде ең көп қымбаттағаны өсімдік майы, қант және астық. Мысалы, өсімдік майы соңғы айда 7 пайызға артса, қант 5,5 процентке, ал астық 2,9 пайызға қымбаттаған.
Бұдан бөлек, сүт өнімдері 0,9 процентке, ал ет 4 пайызға өскен. Мамандар бұған мемлекеттер арасындағы сауда текетіресі, кей елдердегі экономикалық дағдарыс және Қытайдағы коронавирус сынды жағдайлар себеп дейді.

БҰҰ: Әлемде азық-түлік бағасы өсті

<a href="https://kyzylorda-news.kz/">Kyzylorda-news.kz.</a> Өткен жылдың қорытындысымен Қызылорда облысына тартылған инвестиция көлемі 400 млрд теңгені құрап, бұл көрсеткіш 2018 жылдың есепті кезеңімен салыстырғанда 17,4% өсті.
Инвестициялардың өсуі негізінен инфрақұрылымдық, индустриялық жобаларға және мұнай компаниялары мен басқада салаларға тартылған инвестиция есебінен қамтамасыз етілуде.
2018 жылдың есепті кезеңімен салыстырғанда инвестицияның номиналды өсімі 1,2 есеге көбейіп, өткен жылы көзделген меже толығымен орындалды. 
Қазіргі таңда Қызылорда облысында шетелдік капиталдың қатысуымен жалпы құны 276,1 млрд тенге құрайтын 7 инвестициялық жоба іске асырылуда. Олардың қатарында «Компания Гежуба Шиелі Цемент», «Орда Гласс» , «АралСода», «Балауса», «Номад Солар», «НЕС», «Байконыр Солар» ЖШС бар. 
Сыртқы инвестиция тартуда да қарқынды жұмыстар атқарылуда. 2019 жылы көрсеткіш 12% ұлғайғаны байқалады.
Айта кету керек, үстіміздегі жылы «Негізгі капиталға инвестициялардың нысаналы индикаторын бекіту туралы» меморандумға сәйкес облысқа 481 млрд теңге инвестиция тарту жоспарлануда.
Динара МАХАНОВА

Қызылорда облысында инвестиция көлемі артуда

<a href="https://kyzylorda-news.kz/">Kyzylorda-news.kz.</a> Қазақстанда 2020 жылдың қаңтарында жан басына есептегенде күнкөріс минимумы 30 мың теңгеге жетіп, 11,6 пайыз өсімді көрсетіп отыр, деп хабарлайды <a href="https://www.inform.kz/kz/kazakstanda-kunkoris-minimumy-12-payyzga-osti_a3612065">ҚазАқпарат</a>.
Зерттеуге сүйенсек, тура бір жыл бұрынғы көрсеткіш 26,9 мың теңге болып, жылдық өсім 4 пайызды құраған.
<blockquote>
 «Биыл қаңтар айында тауарлар мен қызметтердің бағасы өткен жылдың қаңтар айымен салыстырғанда 5,6 пайызға өсті. Оның ішінде азық-түлік тауарларының бағасы 9,2 пайыз, азық-түлікке жатпайтын тауарлар 5,2 пайыз, ақылы қызметтер 1,4 пайыз деңгейге өсті. Ең жоғары күнкөріс минимумы бұрынғыша Маңғыстау облысында – 35,4 мың теңгелік деңгейде. Бұл бүкіл ел бойынша орташа деңгейден 18 пайызға жоғары көрсеткіш», – делінген зерттеу қорытындысында.
</blockquote>
Көнкөріс минимумының мөлшері бойынша үздік үштікті Нұр-Сұлтан қаласы (33,5 мың тг) мен Алматы (33,1 мың тг) түйіндейді. Үздік бестік сапында сонымен қатар Алматы (30,7 мың) мен Түркістан (30,3 мың) облыстары тұр. Жалпы елде алты өңірде күнкөріс минимумының мөлшері орташа республикалық деңгейден жоғары. Ал күнкөріс минимумының төменгі деңгейі Павлодар (26,3 мың тг), Батыс Қазақстан (26,9 мың тг) және Ақтөбе (27,2 мың тг) облыстарында байқалады.

Қазақстанда күнкөріс минимумы 12 пайызға өсті

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қазақстанда биыл 90 млн тонна мұнай өндіру көзделіп отыр, деп хабарлайды <a href="https://lenta.inform.kz/kz/kazakstanda-biyl-90-mln-tonna-munay-ondiru-zhosparlanuda_a3607039">ҚазАқпарат</a>.
<blockquote>
 «2020 жылы отын-энергетикалық ресурстарды өңдеу көлемін барынша арттыруға басымдық беріледі», – деді Асқар Мамин бүгін ҚР Президенті Қасым-Жомарт Тоқаевтың қатысуымен өтіп жатқан&nbsp;Үкіметтің кеңейтілген отырысында.
</blockquote>
Премьер-Министрдің айтуынша, биыл 90 млн тонна мұнай мен 56,3 млрд куб газ өндіру жоспарланған.
<blockquote>
 «Жалпы, отын-энергетика саласындағы инвестициялық жобалардың құны 2 трлн теңгені құрайды», – деді ол.
</blockquote>

Қазақстанда биыл 90 млн тонна мұнай өндіру жоспарлануда

<a href="https://kyzylorda-news.kz/">Kyzylorda-news.kz.</a> Өткен жылдың қорытындысымен Қызылорда облысында «Қарапайым заттар экономикасы» бағдарламасы бойынша жалпы құны 6,6 млрд.теңгені құрайтын 47 жоба мақұлданған. Бұл туралы Кәсіпкерлер палатасы директорының орынбасары Қожахмет Ілиясов айтты.
Қожахмет Ілиясовтың айтуынша, «Қарапайым заттар экономикасын» дамыту жөніндегі өңірлік жобалық кеңсенің қарауында жалпы сомасы 11,2 млрд.теңгені құрайтын 105 жоба бар. Оның ішінде 47 жоба (6,6 млрд.теңге) банктермен және Аграрлық несие корпорациясымен мақұлданып, жүзеге асырылуда екен. 18 жоба қаржы институттарында қаралып жатса, қалған жобалар бойынша құжаттар жинақталуда.
Айта кету керек, жобалардың ішінде жалпы құны 4 млн.теңгеден (жихаз өндіру құрал-жабдықтары) бастап 4 млрд.теңгеге («Аралтұз» испан цехы) дейінгі жобалар кездеседі.
Естеріңізге сала кетсек, 2019 жылы «Қарапайым заттар экономикасы» салаларын дамыту шеңберінде басым жобаларға жеңілдетілген несие берудің бағдарламасы іске қосылды. Бағдарламаны іске асыру барысында шұғыл түрде кедергілерді анықтап, жою мақсатында Үкімет басшысының тапсырмасына сәйкес «Атамекен» Ұлттық кәсіпкерлер палатасы алаңында Жобалық кеңселер құрылды.
Қызылордада Өңірлік жобалық кеңсенің тең төрағалары – облыс әкімінің орынбасары Мұрат Имандосов пен Кәсіпкерлер палатасының директоры Ғалымбек Жақсылықов.
Жыл бойы жобалық кеңсе мүшелері кәсіпкерлермен кездесіп, олардың ұсыныстары мен проблемаларын жүйелеп, орталыққа ұсынып отырды. Осының нәтижесінде қысқа мерзімде Үкімет қаулысына 3 рет толықтырулар енгізіліп, несиелендіру шарттары түбегейлі қайта қаралды.
<blockquote>
 «Ұдайы жүргізілген жұмыстардың нәтижесінде кәсіпкерлерге берілетін несие пайызы 8 пайыздан 6 пайызға дейін, жеңілдік кезеңі 28 айға дейін берілетін болды», – дейді Қожахмет Ілиясов.
</blockquote>
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Мұнан өзге, несиенің 50 пайызына дейін кепілдендіру тетігі енгізіліп, несиенің 50 пайызына дейін айналым қаражатын толықтыру мүмкіндігі қарастырылды. Қаржыландыруға жататын тауарлар мен қызметтер тізілімі 365-тен 1 мыңнан аса тауарға кеңейтілді, ОКЭДтер саны 65-тен 124-ке дейін ұлғайды.
<blockquote>
 «Біздің облысымыз бойынша Өңірлік жобалық кеңсенің ұсынысымен жылқы, түйе, қой, ешкі, құс, тауық, қаз, балық өсіру, тұзды қайта өндеу, бетоннан материалдар, силикат кірпішін шығару, медициналық мекемелерді салу, жөндеу және оларды медициналық жабдықтармен жабдықтау сияқты аймақ үшін өзекті ОКЭДтер енгізілді», – дейді Палата директорының орынбасары.
</blockquote>
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Агроөнеркәсіптік кешендегі өндіру жобаларын қаржыландыру үшін бағдарламаны іске асыруға Аграрлық несие корпорациясы енгізілді. Бүгінгі күні 27 жоба Аграрлық несие корпорациясымен мақұлданған.
<img src="https://kyzylorda-news.kz/wp-content/uploads/2020/01/6ekonomika2.jpg" alt="" />

Қызылордада «Қарапайым заттар экономикасы» бағдарламасы аясында 47 жоба мақұлданды

<a href="https://kyzylorda-news.kz/">Kyzylorda-news.kz.</a> Ақшаны қалай жинауға болады? Иә, бұл сауал қазіргі уақытта қоғамда жиі қойылып жүр.
1. Жалақы алған күні дүкенге жүгірмеу
Отыз күн бойы күткен еңбекақы қолға тиген уақытта, көп адам дүкенге немесе супермаркетке жүгіретіні рас.
“Ай сайынғы табыстың бір бөлігі артылсын” деген жан, бұл ойдан арылу қажет.
Өйткені, қалтада ақша бар кезде, адамдардың біршамасы ойланбай сауда жасайды, қажетсіз дүниелерді сатып алады.
Сол себепті, ең алдымен үйге келіп, керекті заттардың тізімін жасап алған жөн.&nbsp;
2. 50/20/30&nbsp; қағидаты
<ul>
<li>Ай сайынғы табыстың тек 50%-ы ғана тамақ, көлік, кредит секілді “міндетті шығынға” жұмсалуы тиіс.</li>
<li>20 пайызын депозит ретінде сақтап қою керек.</li>
<li>Қалған 30%-ы өзі үшін (достармен көңіл көтеру, сұлулық салондары, мейрамхана-дәмхана)</li>
</ul>
Ақша жинауды мақсат еткен кез келген адамға ай сайынғы табысын осылай бөлуге кеңес береміз.&nbsp;
3. Әр тиынды жазып жүру
Бюджетті жоспарлау – пайдалы іс. Табыс пен шығынды күнделікті жазып отыру арқылы ақшаның қайда жұмсалып отырғанын анық білуге болады.&nbsp;
4. Банк карточкасын сирек қолдану
Қазіргі уақытта адамдардың көбісі ыңғайлы әрі сенімді боғандықтан, банк картасымен есеп айырысуды жөн көреді. Алайда ақша үнемдеуге қатысты жүргізілген зерттеулерге сүйенсек, банк картасын үнемі пайдаланатындар ай соңында өз шығындарын есептей алмайды екен. Өйткені, кез келген жанға әмияндағы қағаз ақшадан қарағанда көзге көрінбейтін цифрлармен “қоштасу” жеңілірек.
Егер банк картасынан бас тарта алмасаңыз, онда әр есеп айырысқаннан кейін чекті мұқият зерттеп, немесе мобильді қосымша арқылы кеткен шығынды бақылауды әдетке айналдырыңыз.&nbsp;
Сондай-ақ, сізге қызмет көрсететін банктің ақша жинауға қатысты қандай қосымша сервистері бар екенін біліп алған да&nbsp;артық етпейді.&nbsp;
5. “Копилка”&nbsp;
Қанша жерден ескі болғанымен, тиімді тәсілдің бірі. Үлкен әрі әдемі ақша жинайтын сандықша сатып алуды ұсынамыз. Оған тек ұсақ тиын-тебен ғана емес, қағаз ақша да&nbsp;сиятын болсын.&nbsp;
6. Зиянды әдеттерден арылу&nbsp;
Бұл тәсіл тек ақшаны үнемдеуге ғана емес, денсаулығыңызды жақсартуға да&nbsp;сеп болады. Аптасына, айына немесе жылына қанша қорап темекі тартатыныңызды және оған жұмсалатын ақшаны есептеп көріңіз. Осы зиянды әдеттен арылсаңыз, осынша ақша қалтаңызда қалар еді.&nbsp;
7. Тамақты үйде пісіріңіз
Мейрамхана, дәмханалардан тамақтанғанша, үйде тамақ пісіргенді әдетке айналдырған абзал. Себебі қызметкерлердің дені түскі асты жақын маңдағы дәмхана-мейрамханадан ішіп, ай сайынғы жалақысының бір бөлігін соған қалдырады.&nbsp;
8. Қажетсіз заттарды сатып жіберіңіз
Ақша жинаудың тағы бір әдісі – көптен киілмеген бағалы киімдер мен пайдаланылмай тұрған электроника, тұрмыстық техникаларды сатып жіберу. Ол үшін арнайы сайттарға хабарландыру жарияласаңыз болғаны. Тіпті, бұл заттардың кімге керегі бар деп санасаңыз да, хабарландыру беріңіз: сатып алушы күтпеген жерден пайда болуы мүмкін.
9. Қымбат тауардың бәрі сапалы емес&nbsp;
Брендке айналған азық-түлік түрлерінің орнына көпке танымал емес тауарды сатып алу ақшаны әжептәуір үнемдеуге мүмкіндік береді. Қымбат тауардың бәрі сапалы емес екенін естен шығармаған абзал. Мәселен, денеге жағатын крем немесе йогуртты сатып алмас бұрын, оның құрамына назар аударып, бағаларын салыстырып шығыңыз.&nbsp;
Есте болсын:&nbsp;мерчандайзинг ережесі бойынша, кез келген сауда орнында ең қымбат тауарлар көзге бірден көріну үшін жоғарғы сөрелерде орналасады. Ал арзан тауарлар тиісінше төменде.
10. Бес сұрақ ережесін қолданыңыз
Ақша үнемдеуге көмектесетін өте қарапайым тәсіл. Бір нәрсені сатып алмас бұрын өзіңізге мына бес сұрақты қойыңыз:
<ul>
<li>Бұл қажеттілік пе, жоқ әлде менің қалауым ба?</li>
<li>Маған дәл осы нәрсе керек пе?</li>
<li>Мұны пайдаланып жүргенімді көз алдыма елестете аламын ба?</li>
<li>Мұны қаншалықты жиі қолдана аламын?</li>
<li>Уақытымды сарп етерлік дүние ме?</li>
</ul>
<a href="https://sputniknews.kz/society/20190127/9042747/aqsha-jinau-unemdeu-joldary.html">Sputnik Қазақстан</a>

Жалақы алған күні дүкенге жүгірмеңіз

<a href="https://kyzylorda-news.kz/">Kyzylorda-news.kz.</a> 2020 жылдың 1 қаңтарынан бастап, Қазақстанда айлық есептік көрсеткіш, төменгі күнкөріс деңгейі және төменгі еңбекақы мөлшері өзгерді.
Қазақстанда 2020 жылдың 1 қаңтарынан бастап ең төменгі күнкөріс деңгейі мен айлық есептік көрсеткіш өзгереді: ең төменгі күнкөріс деңгейі – 31 183 теңге, ең төменгі жалақы – 42 500 теңге, ал айлық есептік көрсеткіш – 2 651 теңге.

Қазақстанда айлық есептік көрсеткіш пен төменгі жалақы мөлшері өзгерді

<a href="https://kyzylorda-news.kz/">Kyzylorda-news.kz.</a> «Сарыарқа» магистральдық газ құбырының құрылысы аяқталып, пайдалануға берілді, деп хабарлайды ҚР Энергетика министрлігінің баспасөз қызметі.
Қызылорда облысынан бастау алған «Сарыарқа» газ құбыры еліміздің елордасын, орталық және солтүстік өңірлерін отандық көгілдір отынмен қамтамасыз етуге мүмкіндік береді.
<blockquote>
 «Нұр-Сұлтан, Қарағанды, Теміртау, Жезқазған қалаларының және газ құбыры трассасының бойына жақын орналасқан 171 елді мекеннің шамамен 2,7 млн тұрғыны табиғи газға қол жеткізеді. Аталған газ құбырын салу ҚР Тұңғыш Президенті – Елбасы Н. Ә. Назарбаевтың «Бес әлеуметтік бастама» атты Қазақстан халқына жолдауының аясында және «Сарыарқа магистральдық газ құбыры құрылысын уақтылы аяқтау туралы Мемлекет басшысы Қ.К. Тоқаевтың «Игілік баршаға! Сабақтастық. Әділдік. Өрлеу» сайлауалды бағдарламасы аясында жүзеге асырылды. 2018 жылдың желтоқсан айында Елбасының қатысуымен өткен Телекөпір барысында газ құбырының құрылысын бастау рәсімі өтті. Биылғы қаңтарда техника мен адамдарды жұмылдыру, наурыз айында газ құбырын дәнекерлеу жұмыстары басталды. Құрылыс барысында 1 мыңнан астам техника және шамамен 2 мың адам жұмысқа тартылды», – делінген министрлік мәліметінде.
</blockquote>
Сонымен қатар, құрылыс барысында отандық өндірушілер барынша жұмылдырылды. Бас мердігер – отандық «ҚазҚұрылысСервис» компаниясы. Ілмекті арматура және кран тораптарымен жергілікті өндіруші «Бемер Арматурен Қазақстан» компаниясы, ал автоматтандырылған газ тарату станцияларымен «Батыс Мұнай Газ жабдықтары» компаниялары қамтамасыз етті.
<blockquote>
 «Нормативті мерзіммен салыстырғанда айтарлықтай қысқа мерзімде 1061,3 километр газ құбыры, 5 бірлік қуатты автоматтандырылған газ тарату станциясы, сондай-ақ газ өлшеу стансасы салынды. Бұл жұмыстың үйлесімділігін және біздің мамандарымыздың жоғары кәсіби даярлығын, құрылыс барысында пайдаланылған технологиялардың инновациялығын көрсетеді», – делінген хабарламада.
</blockquote>
Тұтастай алғанда, жобаны іске асыру мультипликативті әсер әкелетінін, шағын және орта бизнестің дамуына, жаңа жұмыс орындарының пайда болуына, сондай-ақ газ құбыры бойындағы өңірлер инфрақұрылымының дамуына серпін беретінін атап өткен жөн.

«Сарыарқа» магистральдық газ құбыры іске қосылды

<a href="https://kyzylorda-news.kz/">Kyzylorda-news.kz.</a> Сәйкесінше өңірдегі құрылыс көлемінің басым бөлігі әлеуметтік нысандардың үлесінде,&nbsp;деп хабарлайды <a href="https://24.kz/kz/zha-aly-tar/o-am/item/364451-yzylorda-oblysy-byudzhetini-50-leumettik-sala-a-b-linedi">«Хабар 24»</a>.
Ағымдағы жылы білім, денсаулық, мәдениет және спорт саласы бойынша 25 көпбейінді кешен құрылысы басталып, 12-сі пайдалануға берілді.
Доңыз жылы ашылған нысандардың көлемі жағынан ең үлкені – жастар орталығы. Сырдарияның сол жағалауына орналасқан сәулетті кешен дарынды, өнерпаз өрендердің басқосу алаңына айналды.
<blockquote>
 «Жастар орталығының қазіргі таңнын өзінде 40 мыңға жуық жас игілігін пайдаланды. ІТ кітапхана, фитнес, мәжіліс, түрлі бағыттағы шара ұйымдастыруға арнайы залдармен қамтылған. Бұл – жастарға мемлекеттің үлкен қолдауы», – дейді жастар ресурстық орталығының директоры Бауыржан Мәстеков.
</blockquote>
Ағымдағы жылы 10 білім нысанының құрылысы жүргізіліп, жартысы аяқталды. Республикалық бюджетке салынған Жаппасбай батыр көшесіндегі 600 орындық мектеп жуырда ел игілігіне берілмек.
<blockquote>
 «Құрылыс негізі 2 жылға есептелген, өткен жылы басталды, биыл жыл соңына пайдалануға қабылдаймыз. Бүгінгі күнге 49 млн теңге, яғни 5% ақшасы қалды. Қалған ақшасы игерілді. Қазір құрал-жабдық тасымалдау, монтаждау жұмыстары жүріп жатыр. Жаппасбай батыр көшесінде көпқабатты үйлерде қазір балабақша жоқ. Саяхат мөлтек ауданына 600 орындық мектеп келесі жылы басталады деп күтіп отырмыз. Басқа да құрылыстар аудандарда бар. Келесі жылғы жоспар биылғы жылдан төмен болмайды», – дейді құрылыс, сәулет және қалақұрылысы басқармасының басшысы Мұхамедиса Әлсеріков.
</blockquote>
Құрылыстағы негізгі облигациялар тұрғын үй нарығына тиесілі. Соңғы жылдары облыс орталығында 15 жаңа шағын аудан бой көтерді. Биылдың өзінде 46 көпқабатты үйдің құрылысы жүргізіліп, қызылордалықтар 720 мың шаршы метр тұрғын үйге қоныстанды.&nbsp;&nbsp;&nbsp;
<blockquote>
 «Қорқыт ата атындағы ҚМУ ғалымдар үйінде тұрып келдім. Міне енді өз пәтеріме жетіп, қуанып жатқан жайым бар. Қос баланың әкесімін. Жастар жылында өзіме қуаныш болып жатыр», – дейді қала тұрғыны Қуандық Нарымбетов.
 «Бұл пәтерді көп күттім. 2016 жылдан бастап салымшы болып келемін. Бұған дейін жалдамалы пәтерде тұрдым. Қазір қолым жетіп жатыр, үлкен рақмет. Әр қазақ баспаналы болсын», – дейді қала тұрғыны Айдана Алтай.
 «Қаржы жинақтап, «Нұрлы жер» бағдарламасы арқылы пәтерге қол жеткіздім. Өзіме ұнаған қабаттан 3 бөлмелі пәтер кілтін алдым. Мемлекетіміз осындай бағдарламаны жасап, халыққа көп көмегі болып отыр», – дейді қала тұрғыны Айжан Жүсіпбекова.
</blockquote>
Құрыш қолды құрылысшылар келесі жылы да жұмыссыз қалмайды. Өңірде 31 нысан бой көтермек. Оның ішінен Сырдария сол жағалауына түсетін драм театр, жабық стадион және аурухананы ерекше атап өтуге болады.

Қызылорда облысы бюджетінің 50% әлеуметтік салаға бөлінеді

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов Арал ауданында жұмыс сапарымен болды. “Aral” қонақ үйінің ашылу рәсіміне қатысып, аудандық оқушылар үйінің құрылыс жұмыстарының барысымен, “Sulpak” сауда орталығының және ЖК “Жалғасбеков Талғаттың” жол бойғы қызмет көрсету кешенінің де жұмысын көрді.
“Aral” қонақ үйі 540 млн. теңгеге «Бизнестің жол картасы – 2020» бағдарламасы аясында салынған. Қонақ үйде 33 жатын бөлме, кафе, мәжіліс зал, шағын кездесу бөлмесі қарастырылған. Аталмыш нысан жеке кәсіпкердің қаржысына салынған. Сол арқылы 40 адамды тұрақты жұмыспен қамтып отыр.
Аймақ басшысы жаңа нысанның ашылуында аудан экономикасының дамуына, сәулетіне үлес қосып отырған жоба басшылығына алғысын айтты.
<blockquote>
 “Аймағымызда құрылыс жұмыстары жылдан-жылға қарқынды дамып, кәсіпкерлеріміз халықтың қажеттілігін қамтамасыз ететін орындарды көптеп ашып, соның нәтижесінде жаңа жұмыс орындары да құрылуда. 2018-2020 жылдар өңірімізде жаппай кәсіпкерлікті қолдау жылы болып жарияланғаны белгілі. Соның екі жылында шағын және орта бизнес өкілдері көптеген ғимараттар салып, жаңа жұмыс орындарын ашып, облыстың көркеюіне үлес қосып келеді. Бүгін, міне, сондай игі істердің бірі – күрделі жөндеуден өткен, заманауи үлгідегі “Aral” қонақ үйі пайдалануға беріліп отыр. Қала тұрғындары мен қонақтарына сапалы қызмет көрсетуді мақсат етіп, қолайлы әрі жайлы жағдайлар жасалған осындай нысандарды көбейтудің маңызы зор”,- деді облыс әкімі Қ.Ысқақов.
</blockquote>
Аймақ басшысы Қуанышбек Досмайылұлы “Aral” қонақ үйінің ашылуынан кейін аудандағы бірқатар нысандарды аралады.
Аудандық оқушылар үйі 1940 жылы салынған ескі ғимаратта жұмыс істеп келген. “Қызылорда облысының құрылыс, сәулет және қала құрылысы басқармасы” ММ тапсырмасымен жаңа аудандық оқушылар үйінің құрылысы басталған. Орталық 250 адамға лайықталған.
Наурыз айында Арал ауданынан тұрмыстық техника сататын ” Sulpak ” дүкені ашылған болатын. 30 аса адамды жұмыспен қамтып отырған сауда орталығының құны 110 млн. теңге.Облыс әкімі кәсіп ашып, халықты жұмыспен қамтуға , өңір экономикасын дамытуға үлес қосқысы келетін барша кәсіп иелеріне жергілікті билік тарапынан қолдау көрсетілетіндігін айтты.
«Батыс Еуропа – Батыс Қытай» халықаралық көлік дәлізі бойындағы «С» және «Д» санатты жол бойы сервистік қызмет көрсету кешенінің құрылыс жұмысы наурыз айында басталған. Жеке кәсіпкер қаражатына салынған аталмыш кешеннің аумағы 600 шаршы метр. Жобаға сәйкес май құю бекеті, қонақ үй, сауда дүкенінің құрылыстары жүргізілуде.
<img src="https://kyzylorda-news.kz/wp-content/uploads/2019/12/26akimataral2.jpg" alt="" />
<img src="https://kyzylorda-news.kz/wp-content/uploads/2019/12/26akimataral3.jpg" alt="" />

Қазақстан және Қызылорда облысының жаңалықтары: Экономика