<a href="https://kyzylorda-news.kz/">Kyzylorda-news.kz</a>. Шиелі ауданы бойынша егіс көлеміне беріліп отырған су көлемі секундына 60 текше метрді құрайды. Бұл туралы Өңірлік коммуникациялар қызметінің ақпарат алаңында Шиелі ауданы әкімінің орынбасары Ерсұлтан Апетов баяндады.
<blockquote>
 «Көктемгі су алу және су жүйелерін тазарту жұмыстарына сәйкес, шаруашылықаралық және ішкі шаруашылық каналдар, гидротехникалық құрылыстарды жөндеу жұмыстары мен насос қондырғыларын орнату жұмыстары толығымен орындалып, 4 130 гектар шабындық жерлер суарылды»,-деді Шиелі ауданы әкімінің орынбасары Ерсұлтан Апетов.
</blockquote>
Биыл орта мерзімдік даму жоспары бойынша ауданда 30 836 гектар жерге ауыл шаруашылығы дақылдары орналастырылды.Оның ішінде: күздік бидай 1 889 га, жаздық бидай 800 га, арпа 20 га, тары 150 га, дән жүгері 60 га, сүрлем жүгері 50 га, мақсары 992 га, соя 70 га, жаңа жоңышқа 4 013 га, ескі жоңышқа 5 448 га, мал жемдік асқабақ 150 га, сондай ақ картоп 1 200 га,көкөніс 1 600 га және 2 357 га бақша дақылдары егілді. Ал, негізгі дақыл күріш 12037 гектарды құрайды.
<blockquote>
 «Биыл ауданда егін шаруашылығын әртараптандыру жұмыстарына басымдық беріліп, былтырғы жылмен салыстырғанда бидай 1 092 гектарға, жүгері 65 гектарға, тары 65 гектарға, арпа 20 гектарға артық егілсе, 70 гектарға соя дақылы орналастырылды. Ауданымызда негізгі дақылы күріш көлемін анықтау мақсатында мониторингтік топ құрылып, ауыл шаруашылығы бөлімі және су шаруашылығы тарапынан биылғы жылы болжамды су тапшылығы туралы шаруашылық құрылымдарына және ауыл округі әкімдеріне түсіндірме жұмыстары жүргізілуде»,- деді Шиелі ауданы әкімінің орынбасары Ерсұлтан Амантайұлы .
</blockquote>

Шиеліде суды аз тұтынатын дақылдар көлемі артты

<a href="https://kyzylorda-news.kz/">Kyzylorda-news.kz</a>.&nbsp; ҚР Бәсекелестікті қорғау және дамыту агенттігінің төрағасы Серік Жұманғарин Қазақстанда құрылыс материалдарының қымбаттау себептерін түсіндірді, деп хабарлайды ҚазАқпарат.
<blockquote>
 «Агенттік жүргізген баға мониторингіне сәйкес, зауыттан тұтынушыға дейінгі цемент құнының өсуі 25%-ды көрсеткен. Алдын ала ақпарат бойынша, бағаның негізгі өсуі көтерме-бөлшек бөлімінде байқалады. Бірқатар ірі өндіруші цемент сатуды тек өздерінің сауда және сату компаниялары арқылы жүргізеді. Қазақстан теміржол ақпараты бойынша, мамыр айында өткен жылмен салыстырғанда цемент тасымалдау көлемі 14%-дан астам (900 мың тонна) өскен. Бұл ретте магистральдық теміржол желісі тарифінің ұлғаюы цемент бағасының өсуі 5%-дан аспайтынына әсер етті. Цемент бағасының нақты өсуінің себептері байқалып отырған жоқ, Сондықтан, бағаның өсуіне байланысты басты назар көтерме-бөлшек саудаға аударылады», – деді С. Жұманғарин бүгінгі Үкімет отырысында.
</blockquote>
Оның айтуынша, Қазақстан өзін цементпен 100% қамтамасыз етеді, цементтің 20%-дан астамы экспортталады.
<blockquote>
 «Кірпіш нарығында республика бойынша 88 негізгі өндіруші бар. Жергілікті нарықтарда, облыстардың шекараларында бірқатар қатысушылардың басымдығы орын алуда. Сонымен бірге, ішкі нарықтың 50%-ы керамикалық кірпішті импорттау арқылы қамтылады, ал біз өзімізді силикат кірпішпен қамтамасыз етеміз. Импорттың жоғары үлесін ескере отырып, керамикалық кірпішке бағаның ең жоғары өсуі байқалып отыр (30%), дегенмен Ресей Федерациясында керамикалық кірпіштің қымбаттауы 5-10% көрсеткен», – дейді спикер.
</blockquote>
Республика бойынша арматура нарығында 5 өндіруші жұмыс істейді, олардың негізгілері – өндіріс қуаты 400 мың тонна Қарағандыдағы «АрселорМиттал Теміртау» АҚ және Қостанайдағы «ЕвразКаспиан Сталь» ЖШС (450 мың тонна). Сонымен қатар, импорт 65% болғандықтан, нарық импортқа тәуелді. Арматураның әлемдік бағасы 70%-дан жоғары болып отыр.
<blockquote>
 «Сондай-ақ, полиэтилен құбырларына бағаның өсуі байқалады. Қазақстан бойынша орташа өсім – 10%, оның ішінде Ақмола облысында – 62%, Шымкент қаласында және Ақтөбе облысында – 19%, Қарағанды облысында-14% . Бұл ретте, Ақмола облысында «Қазинжиниринг» АҚ еншілес кәсіпорны «Тыныс» АҚ бағаны 62%-ға көтерген, ал шикізат бағасы 10%-дан аспаған. Аталған факті бойынша монополияға қарсы заңнаманы бұзушылықтарды жою туралы хабарлама шығарылды.
</blockquote>
Полиэтилен құбырларын өндіруге арналған шикізат толығымен импортталғанын атап өткен жөн (РФ). Сонымен қатар, Ресей Федерациясында полиэтилен шикізаті бағасы 10-15% қымбаттаған», – деп түсіндірді С. Жұманғарин.
<blockquote>
 «Осылайша біз ең алдымен, құрылыс материалдары бағасының алыпсатарлық өсуін көріп отырмыз. Осыған байланысты агенттік бағалық уағдаласудың анықталған белгілері бойынша әрекет ету шараларын қабылдайды», – деді агенттік төрағасы.
</blockquote>

Құрылыс материалдары алыпсатарлықтан қымбаттауы мүмкін

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаев Премьер-Министр Асқар Маминді қабылдады.
Премьер-Министр Қасым-Жомарт Тоқаевқа Қазақстанның биылғы қаңтар-мамыр айларындағы әлеуметтік-экономикалық дамуының қорытындылары, еліміздегі санитарлық-эпидемиологиялық ахуал мен егіс науқанының аяқталғаны жөнінде есеп берілді.&nbsp;
Премьер-Министр Қазақстан экономикасының пандемиядан кейінгі қайта қалпына келу сатысына өткені туралы айтты. Биылғы қаңтар-мамыр айларындағы ішкі жалпы өнім өсімінің қарқыны былтырғы осы кезеңмен салыстырғанда 1,6 пайызды құрады.
Асқар Маминнің айтуынша, дамудың негізгі қозғаушы күші 7,2 пайыздық өсім деңгейін көрсетіп отырған өңдеу өнеркәсібі (машина жасау, құрылыс материалдарын өндіру, жеңіл өнеркәсіп және т.б. салаларда қарқынды өсім бар), құрылыс секторы болып отыр.
Экономиканың өндірмейтін секторларында жоғары инвестициялық белсенділік байқалады. Негізгі капиталға құйылған инвестицияның өсімі тау-кен саласын есепке алмағанда 25,5 пайызға жеткен.
Президентке көктемгі егін егу жұмыстарының нәтижесінде егіс алқаптары 78,2 мың гектарға ұлғайып, 22,7 миллион гектарға дейін артқаны жөнінде баяндалды.
Үкімет көктемгі егіс науқанын қаржылық, материалдық-техникалық тұрғыдан қамтамасыз ету үшін барлық қажетті шешімдерді қабылдады. Көктемгі егіс жұмыстарына 128 миллиард теңге қаржы бөлініп, 380 мың тонна жанармай нарықтағы бағадан 14 пайызға төмен сатылған және 405,3 мың тонна тыңайтқыш берілген.&nbsp;&nbsp;
Премьер-Министр еліміздегі санитарлық-эпидемиологиялық ахуалдың жақсарғанын айтып, Covid-19 індетінің таралуы бойынша Қазақстан «сары» аймақтан «жасыл» аймаққа өткенін жеткізді. Бір апта ішінде індет жұқтыру деңгейі 30 пайызға азайып, коронавирустың таралу индексі 0,84-ке дейін төмендеген. Жұқпалы аурулар бөлімдерінің 24 пайызында, жан сақтау бөлімдерінің 21 пайызында науқастар ем қабылдап жатыр.&nbsp;
Нұр-Сұлтан қаласы «қызыл» аймақта, Алматы қаласы, Атырау, Павлодар, Батыс Қазақстан, Ақмола және Қарағанды облыстары «сары» аймақта. Қалған 10 облыс – «жасыл» аймақта.
Қазіргі таңда 2,4 миллион адам екпенің бірінші компонентін алды, 1,3 миллионға жуық адамға екпенің екінші компоненті салынған.
Мемлекет басшысы тұрғындарға вакцина салу қарқынын бәсеңдетпеудің және эпидемияға қарсы шараларды жалғастырудың маңызды екенін атап өтті.
Кездесу қорытындысы бойынша Президент әлеуметтік маңызы бар азық-түлік тауарларының бағасын ұстап тұру, құрылыс материалдарының бағасын реттеу, сыртқы және ішкі инвестиция көлемін арттыру, өңдеу секторын дамытып, өсімін қамтамасыз ету арқылы экономиканың құрылымдарын әртараптандыру жөніндегі шараларды жүзеге асыруға баса мән беруді тапсырды.

Президент азық-түлік тауарларының бағасын тұрақтандыруды тапсырды

<a href="https://kyzylorda-news.kz/">Kyzylorda-news.kz</a>. Қызылорда өңірінде индустрияландырудың үшінші бесжылдық жоспары аясында құны 543 миллиард теңгеден асатын 41 инвестициялық жобаны іске асыру жоспарлануда. Нәтижесінде, 7 мыңнан аса жұмыс орны ашылмақ. Бұл туралы облыс әкімі Гүлшара Әбдіқалықова елордада өткен баспасөз конференциясында айтты.
Аймақта жаңа өнім өндіру бағытында инвесторлармен бірлескен жобалар іске асырылады. Мәселен, аймақта отандық инвесторлармен бірге қызанақ өнімдерін өндіру, ет және жұмыртқа өндірісі бойынша құс фабрикасын салу жобалары басталмақ.
Жергілікті билік шетелдік компанияларымен бірлесіп, тері мен жүнді өндеу және соңғы өнімді шығару ісін қолға алмақ. Ал, алдағы кезеңде инвесторлармен бірге күріш сабанынан целлюлоза өндіретін кәсіпорын құру жоспарланған.
Ерекше айту керек, Сыр елінде халықаралық компаниямен бірлескен жаңа жобаға келіссөздер жүргізілуде. Яғни енді қызылордалықтар&nbsp; чех технологиясын қолданып сусындар мен шырындар шығаруға ниетті.

Қызылордада 543 млрд. теңгеден асатын 41 инвестициялық жобаны іске асыру жоспарлануда

<a href="https://kyzylorda-news.kz/">Kyzylorda-news.kz</a>.&nbsp; Сенат депутаттары «Қазақстан Республикасының Үкіметі мен Ресей Федерациясының Үкіметі арасындағы «Байқоңыр» ғарыш айлағынан «Союз-2» зымырандарын ұшыру жөніндегі келісімді ратификациялау туралы» Заң жобасын қабылдады.
Сенат отырысында Мәжіліс мақұлдаған «Қазақстан Республикасының Үкіметі мен Ресей Федерациясының Үкіметі арасындағы поляр маңындағы орбиталарға солтүстік бағытта ғарыш аппараттарын ұшыру үшін «Байқоңыр» ғарыш айлағынан «Союз-2» типіндегі тасымалдағыш зымырандарды ұшыруды жүзеге асыру жөніндегі ынтымақтастық туралы келісімді ратификациялау туралы» Қазақстан Республикасы Заңының жобасы қаралды.
Заң жобасын таныстырған Цифрлық даму, инновациялар және аэроғарыш өнеркәсібі министрі Бағдат Мусин Қазақстан аумағынан «Союз-2» типіндегі тасымалдағыш зымырандарды ұшырғаны үшін қандай төлем алынатынын түсіндірді.
<blockquote>
 «Қазақстан Республикасы Парламентінің Мәжілісі мақұлдаған «Қазақстан Республикасының Үкіметі мен Ресей Федерациясының Үкіметі арасындағы поляр маңындағы орбиталарға солтүстік бағытта ғарыш аппараттарын ұшыру үшін «Байқоңыр» ғарыш айлағынан «Союз-2» типіндегі тасымалдағыш зымырандарды ұшыруды жүзеге асыру жөніндегі ынтымақтастық туралы келісімге 2019 жылғы 20 маусымда Нұр-Сұлтан қаласында қол қойылды. Осы келісім бүкіл әлемді кеңжолақты интернетпен қамтамасыз етуге бағытталған OneWeb халықаралық жобасын жүзеге асыру үшін «Байқоңыр» ғарыш айлағынан ғарыш аппараттарын ұшыру негізінде Қостанай облысының аумағында «Союз-2» типіндегі тасымалдағыш зымырандардың бөлінетін бөліктерінің құлау ауданын Ресей тарапынан пайдалану тәртібін реттейді. Құлау ауданын пайдалану үшін Қостанай облысының Жангелді ауданы әкімшілігіне түсетін жылына 3 рет ұшыру үшін 460 мың доллар көлемінде төлемақы анықталған. Ал қосымша ұшыру болған жағдайда әрбір ұшыру үшін 50 мың доллар көлемінде төлемақы төленетін болады. Құлау ауданы жылына небәрі бірнеше рет сервитут шартына сай қолданылып отырады», – деді министр.
</blockquote>
Сондай-ақ, ол аталған зымыран бөлшектерінің қай өңірге құлайтынын, жергілікті тұрғындардың қауіпсіздігі қалай қаматамсыз етілетінін баяндады.
<blockquote>
 «3-6 тәулікті құрайтын бұл кезеңдерде адамдар мен үй малының қаупсіздігін қамтамасыз ету үшін құлау ауданына кіру жабық болады. Қалған уақытта құлау ауданында жүруге және оны жайылым ретінде пайдалануға шектеу қойылмайды. Адамдардың құлау ауданынан тысқары жерлерде тұруы қауіпсіз болып табылады. Сонымен қатар тасымалдағыш зымырандарды әрбір ұшырған сайын жақын маңдағы тіршілік ортасына гигиеналық баға беру жұмыстары жүргізіліп, сынамалары алынатын болады», – дейді Бағдат Мусин.
</blockquote>
Ведомство басшысы киік төлдейтін уақытта Байқоңырдан аталған зымырандардың ұшуына шектеу қойлатынын да еске салды.
<blockquote>
 «Құлау ауданын пайдалану кезінде жануарлар мен өсімдіктер әлеміне жыл сайын мониторинг жүргізу көзделуде. Табиғат қорғау ұйымдарының киіктердің төлдеу және құстардың ұя салу кезеңінде құлау ауданын пайдалануды шетеу туралы талаптары орындалады. Яғни, сәуір мен маусым айлары аралығында тасымалдағыш зымырандар ұшырылмайды», – деді министр.
</blockquote>
<a href="https://lenta.inform.kz/kz/senat-soyuz-2-zymyrandaryn-ushyru-zhonindegi-kelisimdi-ratifikaciyalau-turaly-zan-zhobasyn-kabyldady_a3799176">ҚазАқпарат</a>

Сенат «Союз-2» зымырандарын ұшыру жөніндегі келісімді ратификациялау туралы заң жобасын қабылдады

<a href="https://kyzylorda-news.kz/">Kyzylorda-news.kz</a>. Биыл Байқоңыр қаласы мен Төретам елді мекенін дамытуға 2,1 млрд теңге жұмсалады. Бұл туралы Қаржы министрі Ербол Қарашөкеев айтты, деп хабарлайды ҚазАқпарат.
«1994 жылғы 10 желтоқсандағы Қазақстан Республикасының Үкіметі мен Ресей Федерациясының Үкіметі арасындағы «Байқоңыр» кешенін жалға беру шартына өзгеріс енгізу туралы хаттаманы ратификациялау туралы» заң жобасын талқылау кезінде Сенат депутаты Бекболат Орынбеков Байқоңырдағы орта білім мәселесін көтерді.
<blockquote>
 «Тарихи ғарыш кешені орналасқан 76 мыңнан асатын тұрғыны бар, оның ішінде 49 мыңнан астам Қазақстан Республикасының азаматы бар Байқоңыр қаласын дамыту кезеңінде бірқатар проблема туындап отыр. Атап айтқанда, Ресей тарапынан қолданыстағы ифнрақұрылымды күтіп ұстауға ғана қаражат бөлінуде. Қаладағы тұрғын үй қоры жаңартылмайды және инженерлік инфрақұрылым мен әлеуметтік нысандардың тозығы жеткен. Қазақстан тарапы да қолданыстағы заңнамалар негізінде Байқоңыр қаласының инфрақұырылым жобаларын тікелей қаржыландыра алмайды. Сонымен қатар қаржы жетіспеушілігі салдарынан ҚР азаматтарын сапалы біліммен қамтамасыз ету кезеңінде проблема орын алып отыр, Атап айтқанда, қалада 9200 оқушы тәлім алатын 12 мектеп бар. Оның ішінде Ресей Федерациясының 7 мектебінде 4000 оқушы және Қазақстанның 5 мектебінде 5200 оқушы білім алуда. Ресейлік мектептердегі 4000 оқушының 1408-і – Қазақстан Республикасының азаматтары. Олардың ресейлік білім беру бағдарламасын оқуына байланысты мемлекеттік грантпен жоғары оқу орнына түсу кезінде қиындықтар туындайды», – деді депутат.
</blockquote>
Сенат өкілі қаладағы 11 мың пәтердің иесі өз баспаналарын өз аттарына қарата алмай жүргенін де еске салды.
<blockquote>
 «Қолданыстағы заңнамаларға өзгеріс енгізіп, жалға алу кезінде төленетін түсімдер есебінен Байқоңыр қаласы мен оған іргелес жатқан Төретам мен Ақай елді мекендерін дамытуды қаржыландыру жұмыстары қашан және қалай іске асырылмақ? Байқоңыр қаласының 11606 пәтерінде тұрып жатқан ҚР азаматтарының баспанасын жекешелендіру мәселесі қашан және қалай шешімін табады», – деп сұрады Бекболат Орынбеков.
</blockquote>
Қаржы вице-министрі Ербол Қарашөкеевті айтуынша, «Байқоңыр» кешенінен түсіп жатқан жалдау ақысын нысаналы түрде Байқоңыр қаласы мен Төретам, Ақай елді мекендерінің дамуына жіберу –тұжырымдамалық мәселе.
<blockquote>
 «Мүдделі мемлекеттік органдар арасында ол мәселе талқыланған. Түсіп жатқан жалдау ақысы негізі салық емес түсім болғандықтан, бірыңғай бюджетке түседі. Оның бір бөлігін арнайы түрде бөліп алып, осы елді мекендердің дамуына жіберу мүмкін емес. Себебі ол бюджеттік принциптерге қайшы келеді», – деген министрлік өкілі соған қарамастан, осы елді мекендердің, Байқоңыр қаласының инфрақұрылымын қаржыландыруға толық мүмкіндік бар екенін атады.
 «2021 жылы Байқоңыр қаласы мен Төретам елді мекенін қаржыландыру үшін нысаналық трансферт арқылы бюджеттен 2,5 млрд теңге құю жоспарланған. Жалпы Қызылорда облысына республикалық бюджеттен 22,7 млрд теңге көзделіп отыр. Сол себепті мүмкіншілік бар. Нысаналы трансферт арқылы осы мақсаттарға ақшаны жіберуге дайынбыз. Ол үшін әрбір министрлік өз құзыреттерінде бізге ұсыныстарын енгізуі қажет», – деді вице-министр.
</blockquote>
Ведомство өкілі Байқоңыр қаласындағы 11 мыңнан астам пәтерді жекешелендіру мәселесін біржола шешуге бағытталған процес басталғанын да айтты.
<blockquote>
 «Ол үшін қолданыстағы тұрғын үй заңнамасын өзгерістер енгізудің қажеті жоқ. Біріншіден, ол Қызылорда облысының әкімдігінің құзыреті. Жекешелендіру процесін бастау үшін әуелі облыс әкімдігі сол пәтерлерді Ресей тарапының жалдауынан шығаруы керек. Жалдаудан шығару үшін «Байқоңыр» кешенінің мәселелері жөніндегі үкіметаралық комиссияның күн тәртібіне енгізіп, Ресей тарапынан, «Байқоңыр» әкімшілігінен келісім алу керек. Ресейдің жалдауынан шығарылғаннан кейін Қызылорда облысы әкімдігінің коммуналдық меншігіне өткізіп, осындан кейін қолданыстағы заңнама бойынша жекешелендіру процесі жүргізіледі. Ол жұмыс басталды, қазір жүргізіліп жатыр», – деді Ербол Қарашөкеев.
</blockquote>

Биыл Байқоңыр қаласы мен Төретам елді мекенін дамытуға 2,1 млрд теңге жұмсалады

<a href="https://kyzylorda-news.kz/">Kyzylorda-news.kz</a>.&nbsp; Аудан әкімі Мұхтар Оразбаев «Батыс Еуропа – Батыс Қытай» автодәлізінің бойында орналасқан кәсіпкерлік нысандардың жұмысын аралап көрді.
Аудан басшысы ең алдымен Майлыбас ауылдық округінің №99 бекетінің жанынан салынып жатқан қызмет көрсету кешенінің құрылысымен танысты.
Жалпы құны 100 млн теңге болатын кешенді жеке кәсіпкер Арзана Байсуғанова салып жатыр. Құрылыс жұмыстары аяқталған уақытта мұнда жолаушылар мен автокөлік жүргізушілеріне қонақ үй, монша, тамақтану орны,автотұрақ және шағын маркет қызметі жұмыс істейтін болады.
Аудан әкімі Мұхтар Оразбаев мұнан соң жол бойындағы «Мирас» және «Арзан city» кешендеріне ат басын бұрды. &nbsp;
2017 жылы іске қосылған «Мирас» кешенінде 40 адамға арналған дәмхана, 20 орындық қонақ үй, дәріхана, шағын маркет, автокөлікке техникалық қызмет көрсету орталығы, жеңіл және жүк көліктеріне арналған тұрақ және жанар-жағар май құю бекеті бар.
Аудан орталығы – Әйтеке би кентіне жақын орналасқан «Арзан City» кешені де 2017 жылы ашылған. Мұнда «Батыс Еуропа – Батыс Қытай» автодәлізінің бойымен жүретін жолаушылар мен автокөлік жүргізушілеріне қажеттілердің барлығы да бар. Кешенде 120 адамға арналған кафе, 20 орындық қонақ үй, монша, автакөлік жуу орталығы, шағын маркет, автокөлікке техникалық қызмет көрсету орталығы 24 сағат жұмыс істейді.
Ұлы жолдың бойынан жақында тағы бір кәсіпкерлік нысан бой көтерді. «Қашқансу» учаскесінен жеке кәсіпкер Бақытбек Ерхатов жалпы құны 377 млн теңге болатын көпсалалы қызмет көрсету кешенін салып, ел игілігіне пайдалануға беріп жатыр. Бұл жердің бір ерекшелігі жазды күні кешеннің жанында орналасқан көлге шомылып, балық аулауға болады.
<img src="https://kyzylorda-news.kz/wp-content/uploads/2021/06/27e00a6d-80c2-4296-a62b-893c587a2607.jpg" alt="" />
<img src="https://kyzylorda-news.kz/wp-content/uploads/2021/06/d65056e9-6860-48a9-8617-829dca5c06ac.jpg" alt="" />

Қазалы: Жол бойындағы бизнес қалай дамып жатыр?

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықованың төрағалығымен шағын және орта бизнестің даму барысы жөнінде кеңейтілген отырыс өтті. Жиынға тиісті сала басшылары және селекторлық режимде Қызылорда қаласы мен аудан әкімдері қатысты. Күн тәртібінде 2021 жылдың төрт ай қорытындысы бойынша шағын және орта бизнестің даму барысы, ауылдық елді-мекен кәсіпкерлерін шағын несиелендіру нәтижесі және алдағы жоспар, шағын және орта бизнес субъектілерін қаржыландыру барысы туралы айтылды.
Бірінші мәселе бойынша облыстық кәсіпкерлік және туризм басқармасының басшысы Фердоуси Қожабергенов баяндады.
Биылғы жылы кәсіпкерлік саласындағы бірқатар көрсеткіштерде оң динамикалық өсім байқалады. Атап айтақанда, тіркелген кәсіпкерлік субъектілер санының өсу қарқынына сәйкес облыс республика бойынша – 1 орынға орналасты. Сондай-ақ, жұмыс жасап тұрған кәсіпкерлер саны бойынша – 2 орында.
Ағымдағы жылдың 1 мамырында облыста тіркелген шағын және орта кәсіпкерлік субъектілері7,7 пайызға ұлғайып, 55 498 бірлікті құрады. Ал жұмыс жасап тұрғандардың саны 7,5 пайызға артып, 49 434 бірлікке жетті. 
Бөлшек сауда айналымы 94,2 млрд. теңгені құрап, 2020 жылдың сәйкес кезеңіне 100,1%-ға шықса, көтерме сауда айналымы 56,9 млрд. теңгеге жетіп, 102,5%-ды құрады. Жалпы соңғы бес жылдықта өңірде шағын және орта бизнестің өңірлік өнімдегі үлесі 3,5 пайызға дейін ұлғайды.
Биылғы жылы бизнесті жеңілдікпен несиелендіру өз жалғасын тапты. Жыл басынан бері облыста банктермен шағын және орта бизнеске берілген кредиттер портфелі 11 млрд. теңгені құрады. Несиенің 52%-ы саудаға, 9,6%-ы көлік және қоймалау, ауыл шаруашылығы салаларына,3,3%-ы құрылысқа және2,5%-ы өнеркәсіпке, қалған 32,1%-ы өндірістік емес салаға бағытталды. Облыс Бағдарлама аясында жобаларды субсидиялау бойынша өңірлер арасында алғашқы бестік енген.
“Қарапайым заттар экономикасы” бағдарламасы аясында 2019 жылдан бастап жалпы 9,6 млрд. теңгеге119 жоба, оның ішінде биылғы жылы 300 млн. теңгеге 10 жоба қаржыландырылды.
Бұдан өзге, қаржы ұйымдары арқылы “Еңбек” мемлекеттік бағдарламасы аясында жыл басынан бері 120 адам 521 млн. теңге шағын несиемен қамтамасыз етілді. Ауыл кәсіпкерлерінің үлкен сұранысына ие болған “Қызылорда” өңірлік инвестициялық орталығының жұмысы биылғы жылы да жалғасуда. Орталықпен микрокредит беруге жалпы 800 млн. теңге, оның ішінде облыстық бюджеттен 300 млн.теңге қарастырылған. 
Аймақ басшысы қала және аудан әкімдері мен жауапты сала басшыларына бірқатар тапсырма берді.
<blockquote>
 «Қала және аудан әкімдеріне Ұлттық статистика бюросы және салық органымен бірлесе отырып, макроэкономикалық көрсеткіштердің өсімін қамтамасыз ету бағытында тиісті шараларды қабылдауды тапсырамын. Мемлекеттік кірістер департаменті облыс көлемінде салық органдарының базасында жалпылама қызмет көрсету түрімен тіркеліп, техникалық қызмет көрсету және жөндеу бағытында жұмыс жасап жатқан кәсіпорындардың санын анықтап, тізімін шығару керек. Ұлттық статистика бюросының облыстық департаменті қала және аудан әкімдіктерімен бірлесіп, анықталған тізім бойынша нәтижелі көрсеткішке қол жеткізу үшін тиісті шаралар қабылдасын. Тек бұл ғана емес, жыл қорытындысымен кәсіпкерлік саласының негізгі көрсеткіштерінде оң динамика қалыптастыруды қатаң бақылауда ұстау қажет», – деді Гүлшара Әбдіқалықова.
</blockquote>
Ауылдық елді-мекен кәсіпкерлерін шағын несиелендіру нәтижесі және алдағы жоспар туралы «Қызылорда» Өңірлік инвестициялық орталығы» МҚҰ» ЖШС-нің директоры Самат Ерниязов баяндама жасады.
Қазіргі кезде, орталықтың жобаларды қаржыландыру процессі орта есеппен 10 күннен 15 күн ішінде жүргізілуде. 
Жалпы 2015 жылданбастап бүгінгі күнге дейін Орталықпен жалпы құны 8 млрд. 267 млн.теңгені құрайтын 1 928 кәсіпкерлердің жобалары қаржыландырылып, соның арқасында шамамен 2 320 жұмыс орындары құрылды. 
Оның ішінде, ауылдық елді мекендердегі жобалардың саны 1830, қаржыландыру көлемі 7 млрд. 116 млн. теңге. Яғни, барлық қаржыландырылған жобалар бойынша несие құнының 90 пайызы ауылдық елді-мекендердегі жобаларға тиесілі болды.
Күн тәртібіндегі үшінші мәселе бойынша “Даму” КДҚ” АҚ-ы Қызылорда облысы бойынша аймақтық филиалының директоры Ерлан Түктібаев айтты.
Облыс әкімі Гүлшара Әбдіқалықова мемлекеттік бағдарламаларды тиімді пайдалана отырып, өндірістік, өңдеу өнеркәсібі бағытындағы жобаларды іске асыруға басымдық беруді және инвестиция көлемін ұлғайтуды жүктеді. Сондай-ақ, биылғы жылы Экономикалық дамыту Картасы аясындағы және өзге де жобаларды сүйемелдеуге алып, қолдау шараларын көрсету қажет екенін атап өтті.
<img src="https://kyzylorda-news.kz/wp-content/uploads/2021/06/196972836_3434869443282767_1313009087698725545_n.jpg" alt="" />

Қызылорда: Шағын және орта бизнестің даму барысы бақылауда

<a href="https://kyzylorda-news.kz/">Kyzylorda-news.kz</a>.&nbsp; Биыл Қазалы ауданы бойынша 17 685 гектар жерге ауылшаруашылығы дақылдарын орналастыру жоспарланған. Оның ішінде күрiш көлемі 6637 гектарды құрайды. Ауданда күріш егу жұмыстары сәуір айының 25-де басталып, 31 мамырда толығымен аяқталды.
<blockquote>
 «Қазіргі таңда егілген күріштің 6088 га суға бастырылды. Әліде 389 га жер суға бастырылмаған. Суға бастырудың оңтайлы мерзімі 5-ші маусымға аяқталуы тиіс. Дегенмен қазіргі уақытта әлі де 10 күнге созылуы мүмкін. Бүгінде күріштің пісу мерзімі қысқа «Сыр сұлуы» сорты егілуде»,-деді Қазалы ауданы әкімінің орынбасары Күнтілес Назымбеков.
</blockquote>
Қазалыда суды тиімді пайдалану мақсатында шаруашылықтар өз күштерімен 9,2 км шаруашылық, 12,7 км ішкі шаруашылық каналдарға механикалық тазалау жұмыстарын жүргізді.

Қазалылық дихандар биыл 6637 гектар жерге күріш екті

<a href="https://kyzylorda-news.kz/">Kyzylorda-news.kz</a>. Биыл Қазалы қаласындағы 10 көше қайта жаңғыртылудан өткізілуде. Олардың қатарында С.Толыбеков, З.Бұлақбаев, Аманкелді батыр, Бекетай би, Қ.Рысқұлбеков, Ы.Алтынсарин, А.Қыстауов, Б.Момышұлы, Г.Шляпин, С.Мұқанов көшелер бар.
Ұзындығы 8,2 шақырымды құрайтын жолды жөндеу үшін «Шағын және моноқалаларда бюджеттік инвестициялық жобаларды іске асыру» жобасымен республикалық және облыстық бюджеттен қаржы бөлінген.
Барлық көшедегі жол жөндеу жұмыстарымен «Кочевник» ЖШС-ның жолшылары айналысуда. Қазіргі таңда олар З.Бұлақбаев көшесін жөндеп жатыр.
Аудан әкімі Мұхтар Оразбаев Қазалы қаласына сапары кезінде осындағы жол жөндеу жұмыстарымен де танысты. Аудан әкімінің орынбасары Ғалымжан Еркебай жол жөндеу жұмыстарына бөлінген қаржы мен атқарылуы тиіс жұмыстар туралы аудан басшысына егжей-тегжейлі айтып берді.
Аудан басшысы серіктестік директорының орынбасары Шаймерден Махантаевқа белгіленген жұмыстар уақытылы әрі сапалы орындалуы тиіс екендігін қатаң тапсырып, бұл жұмыстар өзінің жеке бақылауында болатындығын жеткізді.
<img src="https://kyzylorda-news.kz/wp-content/uploads/2021/06/194444518_3073275672893359_3686858944459698796_n-1.jpg" alt="" />
<img src="https://kyzylorda-news.kz/wp-content/uploads/2021/06/195951442_3073275836226676_7876620649910673875_n.jpg" alt="" />

Қазалыда жол жөндеу жұмыстары жалғасуда

<a href="https://kyzylorda-news.kz/">Kyzylorda-news.kz</a>. Қазақстанда ішкі нарықтағы тауарлық газды көтерме саудада өткізудің жаңа шекті бағалары бекітілді. Бұл туралы Энергетика министрлігі хабарлады.
<blockquote>
 “Қазақстан Республикасының ішкі нарығында тауарлық газды көтерме саудада өткізудің 2021 жылғы 1 шілдеден бастап 2022 жылғы 30 маусымды қоса алған кезеңге арналған шекті бағалары бекітілді. Осы бұйрыққа сәйкес тауарлық газды көтерме саудада өткізудің шекті бағалары өңірге байланысты орта есеппен 11 пайызға көтерілді”, – делінген ҚР ЭМ баспасөз қызметі хабарламасында.
</blockquote>
Министрлік газ бағасын реттеуге қатысты толыққанды ақпарат берді.
<blockquote>
 “ҚР заңнамасына сәйкес тауарлық газдың көтерме сауда бағасын мемлекеттік реттеуді Энергетика министрлігі, ал бөлшек сауда бағасын мемлекеттік реттеуді Ұлттық экономика министрлігі жүзеге асырады. Ішкі нарықта газдың соңғы бағасын ұстап тұру үшін “ҚазТрансГаз” АҚ жыл сайын елдің ішкі нарығын экспорт есебінен субсидиялайды. 2015-2020 жылдар аралығында Ұлттық оператордың ішкі нарықты субсидиялаудан шеккен шығындар сомасы шамамен 425 миллиард теңге болды”, – деді Энергетика министрлігі баспасөз қызметі өкілі.
</blockquote>
Оған қоса газды көтерме саудада өткізу жолдарына тоқталды.
<blockquote>
 “Осыған байланысты, тауарлық газды көтерме саудада өткізудің шекті бағаларын қазіргі деңгейде бекіткен жағдайда Ұлттық оператордың шығындары ұлғаяр еді, ал инвестициялық бағдарламалардың орындалмауы ақыр соңында газ құбырларының шектік ақаулар санының артуына әкеп соғады, бұл елімізге орны толмас нұқсан келтірері сөзсіз”, – деді Энергетика министрлігі баспасөз қызметі өкілі.
</blockquote>

Шілдеден бастап газ бағасы қымбаттайды

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықова Қызылорда қаласының сол жағалауын дамыту жобасын жүзеге асыру бойынша облыстық штабтың алғашқы отырысын өткізді.
Жиынға облыс әкімінің орынбасарлары, қала әкімі және басқарма басшылары мен салалық мекеме басшылары қатысты.
Аймақ басшысы перспективалық жобаның маңыздылығын ескере келе, осы кезге дейін сол жағалауда іске асқан жұмыстарды саралап өтіп, алдағы кезеңде атқарылуға тиіс міндеттерді айқындап берді.
Сырдария өзенінің сол жағалауын дамыту жобасы 2017 жылдан бастап жүзеге асып келеді. Осыған дейін жеке инвесторлардың қаражаты мен мемлекет бюджеті есебінен 53 көпқабатты тұрғын үй, бірқатар әлеуметтік нысандар, көше-жол торабы, сыртқы және ішкі инженерлік инфрақұрылымдар, екі көпірдің құрылысы жүргізіліп, пайдалануға берілген. Ал, алдағы кезеңде бірқатар әлеуметтік нысандар мен 9-12 көпқабатты тұрғын үйдің құрылыстарын жүргізу көзделіп отыр.
Жиында облыстық құрылыс, сәулет және қала құрылысы басқармасының басшысы Бердияр Пірімбетов соңғы 4 жылда орындалған жұмыстарды тізбелеп, сол жағалаудан бой көтеретін жаңа нысандардың негізгі ерекшеліктеріне тоқталды.
Биыл республикалық бюджет есебінен 590 пәтерді құрайтын 12 арендалық тұрғын үй пайдалануға беру көзделген. Бұл үшін тұрғын үйлер мен инженерлік желілерінің және абаттандыру жұмыстарына қаржы толығымен қаралған. Мұнан бөлек, алдағы уақытта 9 және 12 қабатты тұрғын үйлердің құрылысын салу жоспарда бар.
Алдағы жылы сол жағалаудан көгалдағы хоккей, физика-математикалық бағыттағы жаңа мектеп, көпсалалы аурухана, облыстық қан орталығы, әкімшілік ғимараттар салынбақ. Сонымен бірге салтанат сарайы мен әлеуметтік базардың құрылысын салу көзделіп отыр.
Сол жағалаудан бой көтеретін жаңа “Гүл бульварлары” жобасы да қала көркіне сән қосады. Мұнда әртүрлі сәулет фигуралары, жасыл желектер мен гүл композицияларын отырғызу, балалар және ойын алаңдарын, субұрқақтар мен су айдындары қамтылады.
Отырыста облыс әкімі сол жағалауда жоспарланған әрбір нысанның инженерлік инфрақұрылыммен толықтай қамтамасыз етілуі және жол сапасын қадағалауға жете мән беру керектігін қаперге салып, сала басшыларына бірнеше тапсырмалар жүктеді.Штаб отырысын қорытындылаған облыс әкімі Гүлшара Әбдіқалықова сол жағалаудағы әрбір нысанның құрылысы, инженерлік-инфрақұрылымы, абаттандырылуы облыстық штабпен жан-жақты талқыланып, келісілуі қажеттігін баса айтты. Сондай-ақ, қала әкімі Ғанибек Қазантаевқа «Гүл бульвары» құрылысының жоба-сметалық құжаттамаларын жыл соңына дейін әзірлеп, құрылысын бастауды қамтамасыз етуді тапсырды. Ал, облыстық құрылыс, сәулет және қала құрылысы басқармасының басшысы Бердияр Пірімбетовке құрылыс нысандарына мониторинг жүрігізіп, бақылауға алып, тоқсанына бір рет баяндауды жүктеді.
Аймақ басшысы жиында айтылған барлық тапсырмалардың орындалуын бақылауды орынбасары Серік Сүлейменовке тапсырды.

Қазақстан және Қызылорда облысының жаңалықтары: Экономика