<a href="https://kyzylorda-news.kz/">Kyzylorda-news.kz</a>. Өңірдің 2023 жылға дейінгі экономикалық даму жоспарын іске асыру шеңберінде «Қызылорда облысының инвестициялық мүмкіндіктері» тақырыбындағы таныстырымдылық құжат әзірленді. Ондағы 30-ға жуық жоба шетелдік инвесторларға ұсынылды. Бұл туралы Өңірлік коммуникациялар қызметінің ақпараттық алаңында өткен брифингте облыстық индустриялық-инновациялық даму басқармасы басшысының міндетін атқарушы Жолмырза Еламан мәлімдеді.
<blockquote>
 «Бүгінде өңір экономикасын дамыту мақсатында инвесторлар тартуға жұмыстар жасалуда. Мәселен, жыл басынан бері төрт рет көрме ұйымдастырылды. Моңғолияның тері өңдеу саласындағы кәсіпорындарымен, Францияның Страсбургтегі ҚР Бас консулдығымен бейнеконференция, Өзбекстан Республикасының Алматы қаласындағы Бас консулы Фатхуллаев Абрордың және Литва Республикасының Қазақстандағы Төтенше және Өкілетті Елшісі Гинтаутас Васюлис бастаған делегация біздің аймақта іс-сапарда болды. Облыс әкімдігі тарапынан өңірге инвестиция тарту үшін барлық жағдай жасалынған, инвесторларға жан-жақты қолдау көрсетеміз»,-деді Жолмырза Қайыпұлы.
</blockquote>
Өнеркәсіп өнімінің көлемі 282,3 млрд. теңгеге жетті. Ал ауылшаруашылығының өнім көлемі 22,9 млрд.теңгені құрайды.
<blockquote>
 «Облыста 13 506 жаңа жұмыс орны құрылды. Оның 4 111-і тұрақты. Сонымен қатар, 2021 жылға арналған облыс әкімінің іс-қимыл жоспарына ай сайын тұрақты мониторинг жасалуда. Іс-қимыл жоспары негізгі 6 бөлімнен тұрады. Атап айтқанда: макроэкономикалық тұрақтылықты сақтау, қолайлы бизнес ахуалды қамтамасыз ету, жұмыспен қамту және әлеуметтік қорғау, адами капиталды дамыту, көлік және тұрғын үй-коммуналдық инфрақұрылымын дамыту, бюджеттік саясат»,-деді облыстық экономика және бюджеттік жоспарлау басқармасы басшысының орынбасары Ринат Құдайбергенов.
</blockquote>
<img src="https://kyzylorda-news.kz/wp-content/uploads/2021/07/207313606_1321877564874419_5038561122706095036_n.jpg" alt="" />

Қызылорда: Шетелдік инвесторларға отызға жуық жоба ұсынылды

<a href="https://kyzylorda-news.kz/">Kyzylorda-news.kz</a>. Бүгін аудандарға жұмыс сапары аясында облыс әкімі Гүлшара Әбдіқалықова Жалағаш ауданына аялдап, Жалағаш кентін газға қосу рәсіміне қатысып, ауыл тұрғындарының қуанышына ортақтасты. Ерекше күнде ауыл ақсақалы Оспан Жанұзақов игі істердің жалғасын тауып, ел несібесінің мол болуын тілеп, көпшілікке ақ батасын арнады.
Елді мекендерді газға қосу Nur Otan партиясының сайлауалды бағдарламасында көзделген. Жалағаш кентінің газдандыру жұмыстарына 3 млрд. 691 млн. теңге бөлініп, бас мердігер «StroyGazCompany» ЖШС құрылыс жұмыстарын толық аяқтады.
Мұнан соң облыс әкімі жаңадан салынған жабық бассейн кешенін ашты. Жаңа үлгідегі бассейн халық игілігіне қызмет етіп, салауатты өмір салтын ұстануға септігін тигізеді деп сенім білдірген Гүлшара Әбдіқалықова бұл нысан Астана күніне тарту болып отырғанын тілге тиек етті.
Жеке кәсіпкер Қайыржан Құлтекеновтың жеке қаражаты есебінен салынған басейннің жоба құны 350,3 млн. теңгені құрайды. Жүзу бассейнінде бір уақытта 20 адам қабылдауға мүкіндігі бар. Алдағы кезеңде оқушыларға арналған тегін жүзу үйірмесі ашылмақ. Үйірмеге 20-ға жуық оқушы қабылданып, көпбалалы, ата-анасының қамқорлығынсыз қалған отбасының балаларына жеңілдіктер қарастырылған. Сонымен бірге мүгедектігі бар азаматтар мен қарттарға күніне 1 сағат тегін кіруге жағдай жасалған.
Шара барысында ардагер Раушанбек Смағұлов аудан тұрғындары атынан алғысын жеткізіп, батасын берді. 
Іссапары кезінде облыс әкімі Рәміздер алаңының құрылыс жұмыстарын көріп, «Бизнеске арналған Үкімет» кәсіпкерлер Үйі жұмысымен танысты. Сонымен бірге алдағы ауыл әкімдерінің сайлау науқанына дайындық барысын саралады.
Аймақ басшысының жұмыс сапары Аққыр ауылдық округінде жалғасты. Мұнда ауыл тұрғындарымен кездесіп, дәрігерлік емхананың жұмысын көріп, екпе жұмыстарының қарқынын бағдарлады. Кездесуде ауылдың әлеуметтік-экономикалық жағдайы талқыланды, маңызды мәселелер көтерілді. Округ тұрғындары ауылдық клубтың қажеттілігін айтып, ұсынысын білдірді. Өз кезегінде облыс әкімі әлеуметтік нысандарды салу Nur Otan партиясының сайлауалды бағдарламасында айқындалғандықтан, сұранысқа сай жаңа ғимараттарды салу кезектілікпен жүргізілетінін атап өтті. Сондай-ақ, Жаңаталап және Мырзабай ахун ауылдық округтерінде де тұрғындармен кездесіп, мәселелерді саралады. Мырзабай ахун тұрғыны, еңбек ардагері Қасым Кәрімбаев Астана күні мерекесіне орай Сыр еліне арнап құттықтау лебізін жеткізді.
<blockquote>
 «Қазақта «біріккен білек жер қопарады» деген әдемі тәмсіл бар. Елдің бірлігінің арқасында биыл Тәуелсіздік алғанымызға 30 жылдығын қарсы алып отырмыз. Бұл жылдары еліміздің әлеуметтік-экономикалық жағдайы нығайып, бірқартар жетістіктерге жеттік. Елбасы Нұрсұлтан Әбішұлының туған күнімен түспа-тұс келген Астана күні баршамызға құтты болсын. Елімнің амандығын, Тәуелсіздігіміздің мәңгі болуын тілеймін», – деді ардагер.
</blockquote>
<img src="https://kyzylorda-news.kz/wp-content/uploads/2021/07/207176910_3496335527136158_338267116150071040_n.jpg" alt="" />
Мұнан өңір басшысы Мырзабай ахун ауылдық округіндегі алма бағына аялдады. Алма бағында биыл 12 гектарға 8 мың түп алма егілген. Жеке кәсіпкер Ерұлан Өмірсеріков жеміс алғашқы өнім 2023 жылы беріледі деген ниетте. Облыс әкімі алма бағының иесіне сәттілік тілеп, жеміс-жидек өнімін өндіру арқылы жергілікті нарықты толтырудың қажеттілігін атап өтті.
Жұмыс сапары соңында облыс әкімі Гүлшара Әбдіқалықова аудан әкімі Асылбек Шаменовке су тапшылығына байланысты егін алқаптарын суару жұмыстарын кестеге сәйкес жүргізу, вакцинация жұмыстарын кең көлемде ұйымдастыруды тапсырды.
<img src="https://kyzylorda-news.kz/wp-content/uploads/2021/07/207264591_3496330953803282_6677751180603608012_n.jpg" alt="" />
<img src="https://kyzylorda-news.kz/wp-content/uploads/2021/07/210197746_3496310007138710_8597974276359898896_n-1.jpg" alt="" />
<img src="https://kyzylorda-news.kz/wp-content/uploads/2021/07/207095688_3496331817136529_8561223229807991959_n.jpg" alt="" />
<img src="https://kyzylorda-news.kz/wp-content/uploads/2021/07/211872924_3496332830469761_5592735637175964920_n.jpg" alt="" />

Жалағашта жабық бассейн кешені ашылды

<a href="https://kyzylorda-news.kz/">Kyzylorda-news.kz</a>. Бүгін Жосалы кенті тұрғындары көгілдір отынның игілігін көруде. Облыс әкімі Гүлшара Әбдіқалықова Қармақшы ауданына жұмыс сапары аясында Жосалы кентін газға қосу салтанатты шарасына қатысты. Тұрғындарды қуанышымен құттықтаған аймақ басшысы кент орталығына қосылып жатқан алау отын әр отбасына жылу сыйлап, халықтың тынымсыз еңбектің мехнатынан арылатын күнге жеткенін атап өтті.
<blockquote>
 «Баршаңызды келе жатқан 6 шілде – Астана күнімен шын жүректен құттықтаймын! Мерейлі мереке қарсаңында бүгін екі аудан орталығы Жосалы және Жалағаш кенттеріне көгілдір отын берілгелі тұр. Осы тарихи сәтпен аудан тұрғындарын шын жүректен құттықтаймын! 
 Елбасы, ҚР Тұңғыш Президенті Нұрсұлтан Әбішұлы Назарбаевтың қолдауымен басталған ірі стратегиялық маңызы бар «Бейнеу-Шымкент» магистралды құбыры Сыр елін газдандыруға зор мүмкіндік берді. Облыс аумағынан өтетін 846 шақырымдық газ құбыры Қызылорда облысына жол ашты. 
 Облысымызда Арал, Қазалы, Сырдария, Шиелі, Жаңақорған аудандарының орталықтары мен Байқоңыр қаласы және 9 ауылдық елді мекендер көгілдір отынға қосылды. Жалпы жыл соңына дейін Қазалы қаласын, Шиелі ауданының Бекежанов және Қодаманов ауылдарын толықтай газбен қамтамасыз етіп, тұрғындарлың газ тұтыну үлесін 67,4 пайызға жеткізетін боламыз»,-деді облыс әкімі Гүлшара Әбдіқалықова.
</blockquote>
Айта кетейік, өткен жылы Арал ауданындағы Жақсықылыш, Қазалы ауданындағы Мұратбаев және Шиелі ауданындағы Байсын елді мекендері газге қосылды. Нәтижесінде 8 мыңға жуық тұрғын көгілдір отынның игілігін көруге мүмкіндік алды. Ал, биылғы жылдың ақпан айында 11 мың тұрғын бар Сырдария ауданы Тереңөзек кенті табиғи газ тұтынуға мүмкіндік алды. Алдағы кезеңде Төретам кенті мен Ақай ауылын газдандыру жоспарлануда. 
Салтанатты шарада Қармақшы ауданының ардагері Қаршыға Есдәулет Тұңғыш Президент – Елбасы Нұрсұлтан Әбішұлы Назарбаевтың сарабдал саясатының нәтижесінде Тәуелсіздік жылдарында еліміз елеулі жетістіктерге жеткенін атап өтіп, Астана күніне арналған ақжарма тілегін жеткізді.
Елді мекендерді газға қосу Nur Otan партиясының сайлауалды бағдарламасында көзделген. Жосалы кентіндегі кварталішілік газдандыру жұмыстарын бас мердігер – «Энергоресурс» ЖШС мамандары атқарып, республикалық және облыстық бюджеттен 2,69 млрд. теңге қаржыға жұмыстарды аяқтады.
Мұнан кейін аймақ басшысы Қармақшы ауданына жұмыс сапары барысында Тәуелсіздік ықшам ауданындағы көп балалы отбасыларға арналған тұрғын үйлер құрылысының жұмысымен танысып, құрылыс заттарының сапасына мән беруді және құрылысты уақытылы аяқтауды тапсырды. Аталмыш үйлер ағымдағы жылдың аяғында пайдалануға беріледі деп жоспарлануда. Әр үйдің көлемі 68,7 шаршы метрді құрайды.
Одан кейін Гүлшара Әбдіқалықова Иіркөл және Ақжар ауылдық округтеріне барды. Иіркөл ауылында тұрғындармен кездесіп, елдің тыныс-тіршілігіндегі маңызды мәселелерді бағамдады. Ауыл ақсақалдары аяқ су мәселесін алға тартты. Өз кезегінде облыс әкімі аяқ су мәселесін түбегейлі шешу жолдарын қарап, кезең-кезеңімен реттелетінін айтып, егін алқабына суды жеткізудің мөлшерін үнемдеу қажеттігін еске салды. Сонымен бірге індеттің таралу деңгейі бәсеңсімей тұрғанын жеткізіп, екпе егудің маңыздылығына тоқталды.
Сапары кезінде Гүлшара Әбдіқалықова Ақжар ауылында «Ақжар» шаруа қожалығының егіс алқабындағы шаруашылық жұмысын көріп, мамандармен тілдесті.
Бірқатар нысандарды аралаған аймақ басшысы аудан әкімі Мұса Қалдарбековке құрылыс, су тапшылығына байланысты егін шаруашылығына қажетті шараларды уақытылы әрі судың бөлінісін үнемдеп пайдалану бағытында жұмысты үйлестіруді тапсырды.
<img src="https://kyzylorda-news.kz/wp-content/uploads/2021/07/207616084_3496307993805578_3688670627067454066_n.jpg" alt="" />
<img src="https://kyzylorda-news.kz/wp-content/uploads/2021/07/207502510_3496309190472125_2562795577050320920_n.jpg" alt="" />
<img src="https://kyzylorda-news.kz/wp-content/uploads/2021/07/207628056_3496311287138582_8265496793298597161_n.jpg" alt="" />
<img src="https://kyzylorda-news.kz/wp-content/uploads/2021/07/210197746_3496310007138710_8597974276359898896_n.jpg" alt="" />

Жосалы кенті көгілдір отынға қосылды

<a href="https://kyzylorda-news.kz/">Kyzylorda-news.kz</a>. Кеше облыс әкімі Гүлшара Әбдіқалықова Қазалы ауданындағы бірқатар әлеуметтік нысандардың жұмысын көріп, тұрғындармен кездесті. Ең әуелі аймақ басшысы аудандық Ардагерлер үйінің жұмысымен танысып, еңбек ардагерлерімен пікірлесті. Басқосуда су тапшылығы жағдайын алдын алу, ауылшаруашылығы саласы, денсаулық сақтау мәселелері сөз етіліп, алдағы жоспарлар талқыланды.
Ауыл ақсақалдары облыс әкіміне аудан үшін өзекті Қарлан көпіріне аяқтауға ықпал етуді сұрады. Өз кезегінде аймақ басшысы Қарлан көпірінің құрылыс жұмыстарын аяқтау күн тәртібінде тұрғанын және көпір құрылысын аяқтауды жүзеге асыру кейінге шегерілген жобалар негізінде қаралатынын еске салды.
Кездесу сәтінде ауылдық ардагерлер кеңесінің төрағасы Оразғали Бекбанов бата беріп, Астана күніне құттықтауын жеткізіп, аймақ басшысының жұмысына сәттілік тіледі.
Айта кету керек, аудандағы Ардагерлер үйі 2015 жылы демеушілер есебінен пайдалануға берілген. Ғимаратта тренажер, асхана, демалыс, дәрігер, ем қабылдау бөлмелері бар.
Мұнан кейін облыс әкімі аудан орталығында орналасқан Б.Мергенбаев атындағы №226 мектеп гимназиясында қосымша спорт зал құрылысын көріп, нысанды жаңа оқу жылына дейін аяқтауды міндеттеді. Мұнымен қоса, Әйтеке би кенті – Қазалы қаласы аралығындағы «Жалаңтөс батыр» ескерткіші орналасатын орынды көрді. Ескерткіш Рәміздер аллеясы жанынан бой көтермек.
Жұмыс сапары барысында аймақ басшысы Құмжиек ауылдық округтерінде болып, Пірімов ауылындағы орталық саябақта ауыл тұрғындарымен кездесіп, мәселелерін тыңдады. Жүздесуде ақсақалдар ауылдың өзекті жағдайларын қозғады. Оның ішінде спорт кешенінің құрылысын бастау, жаңа балабақша салу қажеттігін атап өтті. Тұрғындар тілегін тыңдаған облыс әкімі әлеуметтік нысандарды салу Nur Otan партиясының сайлауалды бағдарламасында көзделгенін атап өтіп, құрылыс жұмыстарын салу кезең-кезеңімен аяқталатынын жеткізді. 
Жұмыс сапары кезінде облыс әкімі Қарашеңгел елді-мекеніндегі «Жалаңтөс батыр» ЖШС-нің егіс алқабында күріш дақылының су жағдайымен танысты. Шаруашылықтың жалпы егіс көлемі 1255 гектар. Оның ішінде, күріш – 600 гектар болса, жаздық бидай – 100 гектар, жоңышқа – 555 гектарды құрап отыр. Егіс алқабында стенд арқылы ауданның ауылшаруашылығы дақылдарының орналасу көрсеткіші мен алдағы жоспары таныстырылды.
Гүлшара Әбдіқалықова облыстық ауыл шаруашылығы басқармасының басшысы Талғат Дүйсебаев пен аудан әкімі Мұхтар Оразбаевқа су тапшылығына байланысты ауылшаруашылық дақылдарын әртараптандыруды және егін алқаптарын суару кестесін бақылауға алуды тапсырды.
Облыс әкімі Гүлшара Әбдіқалықова Арал, Қазалы ауданына жұмыс сапарын қорытындылап, мәселелерді жан-жақты таразылап, аудан әкімдері мен сала басшыларына бірқатар тапсырмалар жүктеді.
<blockquote>
 «Бүгін Арал, Қазалы аудандарындағы бірнеше ауылдарға барып, елдің ішіндегі өзекті болып тұрған құрғақшылықтан туындаған мал азығының жетімсіздігі, малдардың қырылуы, су арналарын тазарту мәселелерін саралап, тиісті шешімдер қабылдадық. Осы кезге дейін ахуалды таразылай келе мәселелерді оңтайлы шешу үшін аудан әкімдеріне, сала басшыларына бірқатар тапсырмалар берілді. Қазір жағдай түзеліп, мал азығынан тапшылық көріп отырған аудандарға көрші аудандардан жем-шөп, жоңышқа жеткізілуде. Ал, Арал ауданына төтенше жағдай жариялау процедуралары аяқталуға жақын. Қазірде тиісті құжаттамалар ашық нормативтік құжаттар порталына енгізілді. Жағдайдан шығудың механизмін сызып, қысқы маусымға мал азығын алдын ала жинап алу жұмыстарын үйлестірудеміз. Егін мәселесі де тысқары қалмайды. Бүгінде сала мамандарымен бірлесіп күн сайын жағдайды бақылап отырмыз. Суды үнемдеп пайдалануды және шаруа қожалықтарына су бөлінісін кестеге сай бөлу жұмыстары жолға қойылды. Барлығы да өзімнің бақылауымда»,-деді Гүлшара Әбдіқалықова.
</blockquote>
Айту керек, облыс әкімінің жұмыс сапары Қармақшы және Жалағаш аудандарында жалғасады.
<img src="https://kyzylorda-news.kz/wp-content/uploads/2021/07/210781654_3494328454003532_3960423282459036883_n.jpg" alt="" />
<img src="https://kyzylorda-news.kz/wp-content/uploads/2021/07/210184210_3494328770670167_4316476171747390694_n.jpg" alt="" />

Гүлшара Әбдіқалықова Қазалы ауданындағы бірқатар әлеуметтік нысандардың жұмысын көрді

<a href="https://kyzylorda-news.kz/">Kyzylorda-news.kz</a>.&nbsp; Өңірде картоп, сәбіз, пияз, қырыққабат бағасының өсуі өткен жылғы қордың азаюына және маусымаралық кезеңге байланысты болып отыр. Бағаның тұрақтылығын қамтамасыз ету мақсатында облыстық бюджеттен 1,4 млрд. теңге бөлінді. Оның 500 млн.теңгесі әлеуметтік маңызы бар негізгі азық-түлік өнімдерін сатуға кәсіпкерлерге қарызға беріледі.
Бұл туралы Өңірлік коммуникациялар қызметінің ақпараттық алаңында өткен брифингте облыстық ауыл шаруашылығы басқармасының басшысы Талғат Дүйсебаев баяндады.
<blockquote>
 «Жыл сайын сәуір айынан бастап шілдеге дейін көкөніс, картоп, сәбіз, пияз және қырыққабат өнімдерінің бағаларының өсуі орын алады. Бұл қоймалардағы күзгі өнімдердің таусылуы және жаңа өнімнің жаппай пісуі күзгі айларға келетіндіктен. Осы маусымаралық кезенде оңтүстік өнірлердің ерте пісетін өнім сорттары жеткізіліп нарық бағасымен сатылады. Бүгінде халықты көкөніс, жеміс-жидекпен қамтамасыз ету мақсатында оңтүстік облыстардан және көршілес Өзбекстан республикасынан жеткізілуде»,- деді Талғат Тұрсынұлы.
</blockquote>
Бүгінгі күнде аймақтың тұрақтандыру қорында 1072,2 тонна өнім бар. Бұл өнімдер 29 дүкенде және 5 ірі сауда үйінен ашылған әлеуметтік бұрыштарда белгіленген бағада халыққа сатылуда. Мұнан өзге, биыл қосымша тағы 10 әлеуметтік дүкен ашылатын болады.
<img src="https://kyzylorda-news.kz/wp-content/uploads/2021/07/208956336_1320526338342875_701334434724650054_n.jpg" alt="" />

Қызылордадағы тұрақтандыру қорында  1072,2 тонна өнім бар

<a href="https://kyzylorda-news.kz/">Kyzylorda-news.kz</a>. Қызылорда облысында өнеркәсіп өнімінің көлемі 282,3 млрд. теңгеге жетті. Бұл көрсеткіш өткен жылмен салыстырғанда 100,3 пайызға өсті. Басым бөлігі, яғни 47,8 пайызы пайдалы қазбалар өндірісіне тиесілі.
Ал ауылшаруашылығының өнім көлемі 22,9 млрд.теңгені құрайды. Мәселен, жыл басынан бері 14,2 тонна құс еті, сүт өнімі 32,4 мың тонна , 2,5 млн. дана жұмыртқа өндірілген.
Шағын және орта бизнес субьектілерінің саны 49 671 құрап, 107,3 пайызға артты. Еліміздегі өңірлердің ішінен 2 орынға көтерілді.
Сондай-ақ, биыл индустрияландыру бағдарламасы аясында 48,5 млрд. теңгені құрайтын, 4 жобаны іске асыру жоспарланған. Атап айтқанда, табақша шыны шығару және өңдеу зауыты, қуаттылығы жылына 1500 тонна құс етін өндіру, ас тұзын өндіру, түйе сүтінен құрғақ ұнтақ шығару өндірісі. Жоба аясында 506 жұмыс орнын құру көзделген.
Айта кетейік, аймақта жыл басынан бері 13 571 адам жұмыспен қамтылды. Оның ішінде тұрақты жұмыспен 4176 адам, жергілікті бюджет есебінен төленетін қоғамдық жұмыстарға 7752, жастар тәжірбиесімен 922 , әлеуметтік жұмыстарға 721 адам жіберілді. Ал қаңтар-наурыз айларында бір қызметкердің орташа айлық жалақысы 194 678 теңгені құрады.
Мұнан өзге, облысқа тартылған инвестиция көлемі 106,7 пайызға артты. Инвестиция көлемінің өсу себебі Жаңақорған ауданындағы күн электр станциясының құрылысы, Сырдария өзенінің сол жағалауындағы тұрғын үйлердің құрылыстарын салу, қалалық және аудандық маңызы бар жол құрылыстары және Жаңақорған ауданында авто жанармай құю бекетінің құрылысы есебінен қамтамасыз етілді.
Сонымен қатар, облыстағы құрылыс жұмыстарында да өсу қарқыны байқалды. Республика бойынша 2 орынға тұрақтады. Яғни, құрылыс жұмыстарының көлемі 14,8 млрд. теңгені құрап, былтырғы сәйкес кезеңмен салыстырғанда 162,5 пайызға өсті.

Қызылордада өнеркәсіп өнімінің көлемі артты

<a href="https://kyzylorda-news.kz/">Kyzylorda-news.kz</a>. Мемлекет басшысы облыстардың және республикалық маңызы бар қалалардың әкімдерімен ауыл әкімдерін сайлау мәселелері жөнінде кеңес өткізді. Жиынға Президент Әкімшілігі мен Үкіметтің басшылық құрамы да қатысты, деп хабарлайды <a href="https://www.akorda.kz/kz/kasym-zhomart-tokaev-auyl-akimderin-saylau-maseleleri-zhoninde-kenes-otkizdi-2355013">Ақорда.</a>
Президент алдағы сайлау науқанының маңызды екенін атап өтті. &nbsp;
<blockquote>
 – Осы оқиғаны еліміздің тарихындағы айтулы белес деп айтуға болады. Негізі, бұл біз үшін стратегиялық мәні айрықша міндет. Азаматтарымыз тұңғыш рет жергілікті атқарушы биліктің басшысын тікелей сайлау мүмкіндігіне ие болмақ. Біз бұған біртіндеп, жоспарлы түрде келдік, – деді Мемлекет басшысы.
</blockquote>
Қасым-Жомарт Тоқаев ауыл әкімдерін тікелей сайлау туралы бастаманы былтырғы Жолдауында көтергенін еске салды. Бір жылға жетер-жетпес уақыт ішінде бұл жұмыс жүзеге асырыла бастады.
<img src="https://akorda.kz/assets/media/daa-5122-2.jpg" alt="" />
Мемлекет басшысы Қазақстан халқының 40 пайыздан астамы ауылда тұратынына тоқталып, бұл саяси шара, ең алдымен, ауыл тұрғындарының мүддесі үшін жасалып жатқанын жеткізді.
<blockquote>
 – Алдағы сайлау біз жүзеге асырып жатқан саяси реформаларға тың серпін береді деп сенемін. Сондай-ақ тұрғындарды ел басқару және шешім қабылдау үдерісіне тартуға жол ашады, – деді Қасым-Жомарт Тоқаев.
</blockquote>
Мемлекет басшысы партиялық бәсекені күшейту мәселесіне назар аударды. Партиядан үміткер ұсыну мемлекеттің институционалдық тұтастығын бекемдей түседі және саяси үдерістің барынша ашық болуына септігін тигізеді.
<img src="https://akorda.kz/assets/media/daa-4974-1.jpg" alt="" />
Осы ретте Қасым-Жомарт Тоқаев жергілікті атқарушы биліктің жауапкершілігі жоғары болуға тиіс екеніне баса мән берді.
<blockquote>
 – Әкімдер – биліктің әрбір елді мекендегі тікелей өкілі.&nbsp; Жұрт олардың қызметіне қарап бүкіл мемлекеттік басқару жүйесінің тиімділігін бағалайды. Сондықтан тиімді мемлекет және әділетті қоғам талаптарына сай болу үшін алдағы сайлауды дұрыс ұйымдастыру өте маңызды, – деді Қасым-Жомарт Тоқаев.
</blockquote>
Сонымен қатар Президент өңір басшыларына бірқатар міндет жүктеді.
Атап айтқанда Мемлекет басшысы еліміздегі санитарлық-эпидемиологиялық ахуалдың әлі де күрделі екеніне назар аударды. Оның айтуынша, Қазақстанның жасыл аймақта тұрғанына қарамастан, босаңсуға әлі ерте, коронавирустың үндістандық түрінің біздің елімізде де болуы ықтимал.
<img src="https://akorda.kz/assets/media/dsc-1214.jpg" alt="" />
Осыған байланысты Президент санитарлық-эпидемиологиялық шектеулердің жиі бұзылып жатқанын және халықты вакциналау қарқынының бәсеңсіп қалғанын айтты.
<blockquote>
 – Әкімдер азаматтарға екпе салу науқанынан шеттеп қалған сияқты. Әлеуметтік нысандардың, бизнес кәсіпорындардың және жалпы елдің экономикасы вакциналаудың сәтті жүргізілуіне тікелей байланысты екенін түсіну керек. Қазір жаппай вакциналау науқаны әкімдер жұмысының ең маңызды міндеттерінің қатарында болуы қажет. Сіздер барынша белсенділік танытып, азаматтарды вакциналау науқанына өздеріңіз жетекшілік етулеріңіз керек, – деді Президент.
</blockquote>
<img src="https://akorda.kz/assets/media/daa-4725-1.jpg" alt="" />
Мемлекет басшысы сыбайлас жемқорлыққа қарсы алдын алу жұмыстарын күшейтуге шақырды. Президенттің айтуынша, былтыр әртүрлі деңгейдегі 7 әкім мен олардың орынбасарлары, сондай-ақ, 14 облыстық басқарма басшысы мен олардың орынбасарлары қылмыстық жауапкершілікке тартылған. Бұдан бөлек 2020 жылдың қаңтарынан 2021 жылдың наурызына дейінгі аралықта қарамағындағы қызметкерлерінің жемқорлыққа қатысы болғаны үшін 20 саяси қызметкерге қатысты шара қолданылды.
Қасым-Жомарт Тоқаев әкімдерге өз аймақтарындағы сыбайлас жемқорлықты болдырмау үшін жүйелі жұмыстар жүргізуді тапсырды. Ал жемқорлыққа қарсы күрес қызметі өздеріне жүктелген міндетке сергек қарағаны жөн.
<blockquote>
 – Бұған дейін айтқанымдай, егер мемлекеттік қызметші бюджет қаржысын жымқыруды немесе пара алып баюды көздемей, шешім қабылдау кезінде қателікке жол берген болса, онда ол қылмыстық жауапкершілікке тартылмауы керек. Әйтпесе, мемлекеттік аппараттың берекесін кетіреміз. Сыбайлас жемқорлыққа саналы түрде барған шенеунік қылмыстық жауапкершілікке тартылуы тиіс, – деді Президент.
</blockquote>
<img src="https://akorda.kz/assets/media/dsc-2216.jpg" alt="" />
Мемлекет басшысы өткен жылыту маусымы барысында болған оқыс оқиғалар, өрт және технологиялық апаттар мәселесіне баса мән берді. Президент төтенше жағдайлардың салдарын жедел жою жұмыстарын қамтамасыз ету жөнінде түбегейлі шаралар қабылдаудың қажеттігіне назар аударды.
Бұдан бөлек Қасым-Жомарт Тоқаев қоғамдық мүлікті бүлдіру, бұзақылық және вандализм сияқты оқиғалардың жиілеп кеткеніне тоқталды.
<blockquote>
 – Жуырда елордада мас адам лифтідегі мониторды сындырғаны үшін оған 14 мың теңге ғана айыппұл салынған. Бұлай болмайды. Мұндай іс-әрекет үшін кемінде 15 тәулікке қамау керек немесе 1 жылға түзету жұмыстарына салу жөнінде жаза кесу қажет. Мұндай жағдайларға мүлдем төзбеу керек. Жеңіл жаза жарамайды. Ал іс жүзінде жазаламау салдары құқық бұзушылық пен қылмыстың одан әрі өршуіне алып келеді. Сондықтан осы мәселе бойынша заңнаманы қатаңдату керек, – деді Президент.
</blockquote>
<img src="https://akorda.kz/assets/media/dsc-2903.jpg" alt="" />
Мемлекет басшысы биыл дәстүрлі форматта өтетін жаңа оқу жылына дайындық жұмыстарын қазірден бастап қолға алу қажет екенін айтты. Оның айтуынша, көптеген білім ордалары бір жылдан астам уақыт толыққанды жұмыс істемеді. Бұл ретте, Қасым-Жомарт Тоқаев университеттердің, мектептер мен балабақшалардың инфрақұрылымдарының дайындығын, сонымен қатар оқытушылар мен тәрбиешілер штатының жасақталу деңгейін тексеруді тапсырды.
Президент жиын соңында өңірлердегі ахуал үшін әкімдердің өздері жауап беретінін еске салып, қоғамдық-саяси тұрақтылықты және орнықты дамуды қамтамасыз ету олардың тікелей міндеті екенін атап өтті.
<img src="https://akorda.kz/assets/media/dsc-1325.jpg" alt="" />
Іс-шара барысында Алматы облысының әкімі Амандық Баталов, Түркістан облысының әкімі Өмірзақ Шөкеев, Жамбыл облысының әкімі Бердібек Сапарбаев, Ақтөбе облысының әкімі Оңдасын Оразалин және Ақмола облысының әкімі Ермек Маржықпаев Мемлекет басшысына ауыл әкімдерінің алдағы сайлауына дайындық барысы және өңірлерді дамыту жөніндегі тапсырмаларының орындалуы туралы баяндады.
<img src="https://akorda.kz/assets/media/daa-4906-1.jpg" alt="" />
<img src="https://akorda.kz/assets/media/daa-4886-1.jpg" alt="" />

Қасым-Жомарт Тоқаев ауыл әкімдерін сайлау мәселелері жөнінде кеңес өткізді

<a href="https://kyzylorda-news.kz/">Kyzylorda-news.kz</a>. Қызылорда облысында экономикаға инвестициялар көлемі 6% астам көрсеткішке өскен. Оның ішінде өңдеуші салада – 40,5%, ауыл шаруашылығы саласында – 66% өсті.
Облыс әкімдігінің дерегінше жыл қорытындысы бойынша 456 млрд.теңгеден астам инвестиция тарту жоспарлануда.
Жұмыс істеп тұрған кен орындарының сарқылуына байланысты мұнай өндіру көлемінің қысқару үрдісі сақталуда (90,1%), бұл жалпы өнеркәсіп бойынша өнім өндіру көрсеткішінде (99,7%) көрініс табады.
Қазіргі уақытта Қызылорда облысының мұнай-газ саласын дамытудың 2021-2022 жылдарға арналған Жол картасы әзірленуде, оған сәйкес жер қойнауын пайдаланушылар 79 жаңа мұнай-газ ұңғымасын бұрғылауды жоспарлап отыр.

Қызылорда облысында инвестиция көлемі артты

<a href="https://kyzylorda-news.kz/">Kyzylorda-news.kz</a>. Есеп комитетінің төрағасы Наталья Годунова сырттан тиімсіз қарыз тартқаны және жұмсағаны үшін лауазымды тұлғалардың жеке жауапкершілігін қатаңдатуды ұсынды, деп хабарлайды&nbsp;<a href="https://sputnik.kz/">Sputnik Қазақстан</a>.
Айтуынша, өсіп жатқан мемлекеттік борыш елдегі макроэкономикалық тұрақтылыққа қауіп-қатер төндіреді.
<blockquote>
 «Қарызды қашан, қандай көздерден және қандай көлемде өтеу жоспарланып отырғаны айқын көрсетілуге тиіс. Және бір-үш жылға ғана емес, кемінде 10 жылға жоспар жасалуы қажет. Бұл мәселеде ашықтық керек», – деді Годунова парламент палаталарының бірлескен отырысында.
</blockquote>
Сондай-ақ ол мемлекеттік органдардың ағымдағы қызметін іске асыруға, халықаралық консультанттар тартуға және шетелдік тәжірибені зерделеуге сырттан ақша алу практикасын жою керек екенін атап өтті. Бұл міндеттерді орындауға қаржылық және адами ресурстар өзімізде де жеткілікті, деді комитеті төрағасы.
<blockquote>
 «Сыртқы қарыздарды тиімсіз тартқаны және пайдаланғаны, сондай-ақ оны уақытында игермегені, ал кей кезде күшін жойғаны үшін жеке жауапкершілікті қатаңдату талап етіледі. Бұл туралы депутаттар да айтқан болатын», – деді Годунова.
</blockquote>

Тиімсіз қарыз тартқан шенеуніктердің жеке жауапкершілігін қатаңдату ұсынылды

<a href="https://kyzylorda-news.kz/">Kyzylorda-news.kz</a>.&nbsp; Биыл қазалылық дихандар 781 гектар жерге ауданның климатына бейімделген «Сыр сұлуы» күріш сортын екті.
Жергілікті сорттың авторлары Қызылорда қаласындағы Ыбырай Жақаев атындағы Қазақ күріш шаруашылығы ғылыми зерттеу институтының ғалымдары. Күріштің бұл түрі біздің өңірдің климаттық жағдайына бейімделген. Вегетациялық мерзімі қысқа (105-110 күн), суды аз қажет етеді.
Күріштің жаңа сортын ауданда «РЗА-Агро» ЖШС 235 гектар, «Сыр маржаны» ЖШС 500 гектар, «Ақмаржан» ШҚ 46 гектар жерге егіп, қазіргі таңда дала еңбеккерлері күтіп-баптауда.
Ауданда су тапшылығына байланысты егісті орналастыруды жоспарлау барысында әртараптандыруға аса мән берілді. Нәтижесінде суды аз тұтынатын мал азықтық құнарлы дақылдар – сүрлемдік жүгері мен жоңышқа дақылының көлемі арттырылды.
Сондай-ақ, биыл суармалы суды үнемдеу мақсатында Қазалы ауданында жаңбырлатқыш қондырғысын пайдалана отырып 87 гектар жерге жүгері егу жобасы өндіріске енгізілді.Алдағы жылдары жаңадан суармалы жерлер ашылып, осы технология бойынша 2300 гектар жерге егіс егу жоспарлануда.

Қазалылық дихандар 781 гектар жерге «сыр сұлуы» сортын екті

<a href="https://kyzylorda-news.kz/">Kyzylorda-news.kz</a>. Биыл Жаңақорған ауданына қарасты «Жыңғылдысай» көлінің маңынан жылына 1-5 млн. дана балық шабақтарын шығаратын инкубациялық цех пен шабақ өсіру питомнигін іске қосу жоспарлануда. Бұл туралы Өңірлік коммуникациялар қызметінің ақпарат алаңында өткен брифингте Арал-Сырдария облысаралық бассейндік балық шаруашылығы инспекциясы басшысының орынбасары Жанқожа Сапаров мәлімдеді.
Сондай-ақ, биыл балық шаруашылығын дамытудың өңірлік бағдарламасы әзірленіп, 2030 жылға дейін 16 мың тонна балық өндіру көзделген.
<blockquote>
 «Бағдарлама аясында балық экспорты 4, ал тауарлы балық өндіру көлемі 115 есеге өседі. Бұған қоса, 1500 жұмыс орны құрылады. Алдағы уақытта, балық шаруашылықтарының санын көбейту бағытында жұмыстар жүргізу жоспарлануда. Балық шаруашылығын дамыту бағдарламасы әлеуметтік-экономикалық жағдайдың дамуына өз әсерін тигізетін болады. Жоба шеңберінде жылына 12950 тонна балық шығаратын 16 шарбақтық шаруашылық, 12 мың тонна балық өсіретін 12 шаруашылық құру, 400 тонна болатын 3 тұйықталған жүйелі сумен қамтамасыз етілген және 1450 тонна балық өсіретін 55 көл-тауарлы су айдыны ұйымдастырылады», – деді Жанқожа Рамбердіұлы.
</blockquote>

Жаңақорғанда шабақ өсіру питомнигі ашылады

<a href="https://kyzylorda-news.kz/">Kyzylorda-news.kz</a>. Жалағаш ауданында биыл 19 800 гектарына күріш дақылының тұқымы себіліп, толық суға бастырылды. Су тапшылығына байланысты күріш дақылы 600 гектарға қысқартылды. Бұл туралы Өңірлік коммуникациялар қызметінің ақпарат алаңында Жалағаш ауданы әкімінің орынбасары Алтынбек Дәрібаев баяндады.
<blockquote>
 «Қазір жоспарланған жаздық бидай, мақсары, жаңа жоңышқа дақылдары 100 пайыз орналастырылып, күздік бидай, ескі жоңышқа дақылдары күтімге алынды. Сонымен қатар, межелген 500 га картоп, 1000 га көкөніс және 1200 га бақша дақылдары толық егілді. Биыл жылдағыдан күріш дақылының көлемі қысқарып, суды аз қажет ететін 93 га жаздық бидай, 72 гектар жүгері, 30 гектар жаздық арпа, 443 га мақсары, 445 га жаңа жоңышқа дақылдары орналастырылды», – деді Алтынбек Дәрібаев.
</blockquote>
Ауданда шаруашылық басшылары егілген егінді сумен қамтамасыз ету үшін 53 дана насос қондырғысын іске қосты.
<blockquote>
 «Облыстық бюджеттен 4 дана насос қондырғысы сатып алынатын болады. Қазіргі таңда, Жаңаталап және Шаменов ауылдық округтеріне насос қондырғылары жеткізілді. Ағымдағы жылдың 20 маусымына дейін тағы 2 насос жеткізіледі», – деді облыстық табиғи ресурстар және табиғатты пайдалануды реттеу басқармасы басшысының орынбасары Жұлдызай Айтжанова.
</blockquote>
Егістікке тіршілік нәрін тұрақты беру үшін магистралды каналдардан су алу кестесі жасалды. Жалағашта жоспар бойынша секундына 40 текше метр су алу керек болса, бүгінде 30 текше метр келуде. Осыған орай, барлық аудан әкімдігі мен шаруашылық арасында келісім жасалып, график бекітілді. Ұзақтығы 5-6 күннен аспайтын болады. Кезекке қойған кезде мысалы, оң тармаққа су берілетін болса, сол тармақты нөлге дейін жауып тастамайды. Тек су деңгейі төмендейді, – деді «Қазсушар» РМК Қызылорда филиалының су шаруашылығы нысандарын пайдалану бөлімінің басшысы Айдос Асанбаев.

Қазақстан және Қызылорда облысының жаңалықтары: Экономика