<a href="https://kyzylorda-news.kz/">Kyzylorda-news.kz</a> Жылу беру маусымы – қауіпсіздік талаптарын қатаң сақтауды қажет ететін маңызды кезең. Бұл маусым басталысымен-ақ тұрғындар өрт және газ қауіпсіздігі мәселелеріне ерекше мән беруі керек. Себебі, сақтық шараларын уақытында қолға алу төтенше жағдайлардың алдын алуға көмектеседі. Бұл туралы Өңірлік коммуникациялар қызметінің ақпарат алаңында облыстық ТЖД Мемлекеттік өрт бақылау басқармасының бастығы Асхат Оразбеков айтты.<blockquote>– Департамент қызметкерлері жыл сайын жылу беру маусымы басталар алдында адам өмірі мен денсаулығын сақтау және қоршаған ортаны өрттен қорғау бойынша тиісті жұмыстар жүргізеді. Биыл да 4 302 тұрғын үй секторын аралау арқылы 15 389 тұрғынға тұрмыстағы өрт қауіпсіздігі талаптары бойынша үгіт-насихат жұмыстары жүргізілді. Осы бойынша көпқабатты тұрғын үй аулаларында да 1 861 тұрғынға электр және газ баллон жабдықтарын, газ пештерін ортану, қолдану барысындағы өрт қауіпсіздігі талаптары түсіндірілді. Айта кету керек, өткен жылмен салыстырғанда биыл жарақат алғандар саны екі есеге азайған, – &nbsp;деді Асхат Плалұлы.</blockquote>Мамандардың айтуынша, тұрмыстық газ баллондарын автогаз бекеттерінде толтыру – адам өміріне қауіпті. Мұндай жағдайлар тұтынушылардың газ иісінен улануымен ғана шектелмей, жарылысқа әкеп соқтыруы мүмкін.<blockquote>– Стационарлық автомобильді газ құю станциясында автокөлікке пайдалануға арналмаған баллондарды толтыруға жол берілмейді. Облыс бойынша бүгінде 30-дан аса автогаз құю бекеттері жұмыс істейді. Аталған бұзушылықтардың алғышарттары тауарлық газды газ тарату жүйесі бойынша тасымалдауды, газ тарату жүйесін техникалық пайдалануды, сондай-ақ тауарлық газды көтерме және бөлшек саудада өткізуді жүзеге асыратын ұйымдардың жосықсыз жұмыстарынан туындайды,- деді ТЖМ Өнеркәсіптік қауіпсіздік комитетінің Қызылорда облысы бойынша департаментінің бөлім басшысы Ақылбай Әкімниязов.</blockquote><img src="https://knadmin.beoblood.kz/uploads/brifing_zhylu_1_1cf78bdfc1.jpg" alt="брифинг жылу 1.jpg"><img src="https://knadmin.beoblood.kz/uploads/brifing_zhylu_b47299c6cf.jpg" alt="брифинг жылу.jpg">Фото: gov.kz

Жылу беру маусымына дайындық барысы пысықталды

<a href="https://kyzylorda-news.kz/">Kyzylorda-news.kz</a> Қазақстанның бірқатар өңірінде алдағы күндері, яғни қазанның 5-7 аралығында 30 градусқа дейін ыстық болады деп күтілуде. Бұл туралы «Қазгидромет» РМК сілтеме жасаған <a href="https://kaz.nur.kz/society/2169870-qazaqstannyng-kei-ongirinde-demalys-kunderi-aua-temperaturasy-30-gradusqa-deiin-koteriledi/">KAZ.NUR.KZ</a> хабарлайды.Синоптиктердің болжамынша, скандинавиялық антициклонның ықпалымен еліміздің батысында, 5-6 қазанда республиканың солтүстік және шығыс облыстарында ауа райы құрғақ және ашық болады. Күндіз батыста 23-30 градусқа дейін жылы болса, солтүстікте және шығыста 15-23 градусқа дейін күн жылынады. Дегенмен түнде ауа температурасы нөлден төмен мәндерге дейін төмендейді.7 қазанға қарай солтүстік пен шығысқа суық атмосфералық фронт пен жаңбырлы бұлттар тарай бастайды, сондықтан жауын-шашын (көбінесе жаңбыр), желдің күшеюі және күндізгі ауа температурасының төмендеуі күтіледі.Ал елдің оңтүстігінде және орталығында, атмосфералық фронттардың әсерінен 5-7 қазан аралығында жаңбыр жауады. 6-7 қазанда таулы аймақтарда қатты жаңбыр мен найзағай, жел күшейеді, түнде және таңертең таулы аймақтарда тұман болады.Фото: NUR.KZ/Владимир Третьяков

Қазақстанның кей өңірінде демалыс күндері ауа температурасы 30 градусқа дейін көтеріледі

<a href="https://kyzylorda-news.kz/">Kyzylorda-news.kz</a> &nbsp;Облыс әкімі Нұрлыбек Нәлібаев жылу-электр орталығында алдағы жылу маусымына дайындық мәселелері бойынша көшпелі мәжіліс өткізіп, мекемеге 9 арнайы техниканың кілтін табыстады.&nbsp;Аймақ басшысы кәсіпорын қызметкерлерінің қажырлы еңбегін атап өтіп, саланың дамуына алдағы уақытта да қолдау көрсетілетінін жеткізді.«Мемлекет басшысы мен Үкіметтің қолдауының арқасында Сыр өңірінде соңғы жылдары мақсатты бастамалар қолға алынды. Экономиканың барлық негізгі көрсеткіштерінде өсім бар. Қаңтар-тамыз айларындағы әлеуметтік-экономикалық даму көрсеткіштері бойынша Қызылорда облысы өңірлер арасында алғашқы орыннан көрінді. Облыстың биылғы бюджеті 744 млрд. теңгеден асты. Бұл ауқымды қаражат бірінші кезекте аймақтың өзекті мәселелерін шешуге, облыс тұрғындарының өмір сүру сапасын арттыруға бағытталуда.&nbsp;Тұрғындарды жылумен үздіксіз қамту мақсатында жылу нысандарын жаңғыртуға 12 млрд. теңге қаржы қаралды. Оның ішінде 9,5 шақырым жылу желілерін жаңғыртудың 6 жобасын жүзеге асыруға 6 млрд. 900 млн. теңге қаржы бағытталды. Үкімет резервінен «Оңтүстік» қазандығының «Bono Energy» маркалы үш бу қазандығын жаңғыртуға 2 млрд. 700 млн. теңге бөлініп, жұмыстар жүргізілуде. Жергілікті бюджет және кәсіпорын қаржысы есебінен мекеменің негізгі қондырғылары мен жылу қазандықтары жөндеуден өткізілуде. Жұмыс жылу беру маусымына дейін толық аяқталады.&nbsp;Мемлекет басшысының тапсырмасына сәйкес Қызылорда қаласында қуаттылығы 240 мегаваттық жаңа жылу-электр орталығының құрылысы қарқынды жүруде. Нысан 2025 жылғы тамыз айында ел игілігіне табысталады.&nbsp;Бүгін орталық қызметкерлерінің халыққа қызмет көрсету сапасын арттыру үшін облыстық бюджеттен 521 млн. теңгеге сатып алынған 9 жаңа заманауи арнайы техниканың кілтін табыстаймыз. Жаңа техникалар ел игілігі үшін қызмет етеді деп сенеміз», – деді Нұрлыбек Машбекұлы.Іс-шарада «Құрмет» орденінің иегері, Қызылорда қаласы және Арал ауданының Құрметті азаматы Имамадин Оңғарбаев орталық ұжымын құттықтап, бата берді.&nbsp;Жылу-электр орталығына жұмысқа ең қажетті арнайы техникалар, атап айтқанда, экскаватор, манипулятор, автокран, жүк тасығыш табысталды.Айта кетейік, соңғы жылдары өңірде барлық саланың материалдық-техникалық базасын нығайтуға басымдық берілуде. Қоғамдық көліктің мәселесін түбегейлі шешу үшін 300, мектеп оқушыларына 30 автобус, денсаулық сақтау саласына 70 жедел жәрдем көлігі, орманшыларға 95 арнайы техника, ветеринария саласының мамандарына 59, құқық қорғау органдарына 92 қызметтік автокөлік алынды.&nbsp;Коммуналдық салаға да жан-жақты қолдау көсетілуде. «Қызылорда тазалығы», КРЭК, «Қызылорда су жүйесі» мекемелеріне 42 арнайы техника табысталып, тұрғындар игілігі үшін қызмет етуде. Алдағы уақытта «Қызылорда су жүйесі» мекемесіне 5, «Жасыл Қызылорда» мекемесіне 23, «Қызылорда тазалығы» мекемесіне 24 жаңа арнайы техниканың кілті табысталмақ. Мұнан бөлек, «Үлгілі елді мекен» облыстық байқауының жеңімпаздарына күнделікті ел тұрмысына қажетті, заманауи үлгідегі 48 арнайы техника берілді.&nbsp;Биыл облыс тұрғындарының сұранысына сәйкес өңірдің барлық елді мекеніндегі денсаулық сақтау мекемелеріне 200 санитарлық автокөлік алынуда. Оның 126-сы қолданыста, қалған 74-і жақын күндері табысталады.<img src="https://knadmin.beoblood.kz/uploads/zhylu_4_707ceee672.jpg" alt="жылу 4.jpg"><img src="https://knadmin.beoblood.kz/uploads/zhylu_2_c8ce1e1b55.jpg" alt="жылу 2.jpg"><img src="https://knadmin.beoblood.kz/uploads/zhylu_3_0274fe04da.jpg" alt="жылу 3.jpg"><img src="https://knadmin.beoblood.kz/uploads/zhylu_10ba93307f.jpg" alt="жылу.jpg">Фото: Қызылорда облысы әкімінің баспасөз қызметі

Жылу-электр орталығына арнайы техникалар табысталды

<a href="https://kyzylorda-news.kz/">Kyzylorda-news.kz</a> ҚР Премьер-министрі Олжас Бектеновтің төрағалығымен өткен Үкімет отырысының күн тәртібінде су тасқыны салдарын жою және оның алдын алу мәселесі талқыланды. Жиынға жауапты министрліктер қатысып, өңір әкімдіктері онлайн байланыс арқылы қосылды.Үкімет отырысынан кейін облыс әкімі Нұрлыбек Нәлібаев арнайы мәжіліс өткізіп, жауапты басшыларға бірқатар тапсырма берді.<blockquote>«Облыс аумағында 2023-2024 жылдары қыс-көктем мезгілінде су тасқынының алдын алудың кешенді шаралары ұйымдастырылды. Нәтижесінде оқыс оқиғалар мен қауіпті жағдай болған жоқ. Дегенмен, апат айтып келмейді. Алдын алу бағытындағы жұмыстарды жүйелі ұйымдастырып, дайын болуымыз қажет. Сырдария өзенінің су шаруашылығы нысандарын зерттегенде жағалаудың осал тұстары анықталған. Бұл учаскелердің кейбіреуі республикалық меншікте.Бұдан бөлек, облыс аумағында 4 стратегиялық маңызды су торабы бар. Олар арқылы мол суды қауіпсіз өткізу үлкен жауапкершілікті талап етеді. Бүгінде 6 су қоймасының 3-ін жөндеуге облыстық бюджеттен 94,9 млн теңге бөлінді. Сырдария өзені бетіндегі мұзды өз деңгейінде қатырып алу бірінші кезектегі мақсатымыз болу қажет. Сондықтан ықтимал су тасқынына дайындықты қазірден бастап жүргізу керек», – деді Нұрлыбек Машбекұлы.</blockquote>Жиын қорытындысында Қызылорда қаласы мен аудан әкімдеріне облыстық жұмылдыру дайындығы басқармасымен бірлесіп, өз аумақтарындағы учаскелерді қатаң бақылауға алу, аса қауіпті тұстарды нығайту тапсырылды. Ықтимал су басу аймақтарына арнайы техникалары бар жауапты мекемелерді бекіту қажет. Су тасқынына қарсы материалдық-техникалық қор жасақтау, эвакуациялық жинақтау және қабылдау пункттерін дайындау да маңызды. Облыстық табиғи ресурстар және табиғат пайдалануды реттеу басқармасына «Қазсушар» Қызылорда облыстық филиалымен бірлесіп, магистралды каналдар мен көлдер жүйесін түгендеу, су алу кестесін әзірлеу жөнінде тапсырма берілді.<img src="https://knadmin.beoblood.kz/uploads/akimat_1_5dc02e3a2f.jpg" alt="акимат 1.jpg"><img src="https://knadmin.beoblood.kz/uploads/akimat_2_d12d71d8ea.jpg" alt="акимат 2.jpg"><img src="https://knadmin.beoblood.kz/uploads/akimat_3_e353bb6a87.jpg" alt="акимат 3.jpg"><img src="https://knadmin.beoblood.kz/uploads/akimat_4_91fbcdd0c4.jpg" alt="акимат 4.jpg">Фото: Қызылорда облысы әкімінің баспасөз қызметі

Су тасқынына қарсы шаралар талқыланды

<a href="https://kyzylorda-news.kz/">Kyzylorda-news.kz</a> Энергетика вице-министрі Әлібек Жамауов 2025 жылы Қазақстанда автогаз бағасы тағы да көтерілетінін айтты. Бұл туралы <a href="https://stan.kz/kazakstanda-avtogaz-bagasi-2025-zhilga-karay-tagi-da-ko-406457/">Stan.kz</a> ақпарат агенттігі хабарлайды.Ол ел нарығында сұйытылған мұнай газының тапшылығы бар екенін растады. Себебі автокөлік иелері арзан отынға белсенді түрде&nbsp;көшіп жатыр."Кейінгі екі жылда осы кемшіліктерді қолымызбен жабуға тырысып жатырмыз. Ұлттық компанияларымыздан бізді қолдап, басқа отынға қарағанда сұйытылған мұнай газын көбірек өндіруін сұраймыз. Сондай-ақ сұйытылған мұнай газын экспорттауға тыйым салынды. Бағаны&nbsp;кезең-кезеңімен көтеруді жоспарлап отырмыз. Биыл бізде 5-8 теңгеге өсті. Келесі жылы да газ шамамен 10 теңгеге қымбаттайды. Біздегі 20 аймақта баға әртүрлі. Мысалы, Алматыда литріне 75 теңге болса, келер жылы 85 теңге болады", – деді Жамауов.Мәжіліс отырысында вице-министр тапшылықты 2030 жылға дейін жоюды&nbsp;жоспарлап отырғанын мәлімдеді. Сонымен қатар автокөлік жүргізушілерінің газбен жүретін көлікке көбірек ауысып жатқанын атап өтті.“Уақыт өте автогаз құны жанармай құнымен теңескен соң, жүргізушілер автогазға ауысуын доғарады деп ойлаймын. Біз газ құнын жанармаймен теңестірмекпіз, себебі дәстүрлі отын ретінде жанармай мен дизель қолданылып келді. Ал сұйылтылған газ мұнайгаз химиясында қолданылуы керек. Газомоторлы жанармай ретінде қолданылмауы керек”, –&nbsp;деп қосты вице-министр.Бұдан бұрын үш жылда&nbsp;әр алты ай сайын сұйытылған газдың бағасы 5 теңгеге көтерілетіні туралы айтылған еді. Бірінші өсім 2024 жылдың I тоқсанында болды.Фото:&nbsp;freepik.com

Қазақстанда автогаз құны жанармай бағасымен теңестірілмек

<a href="https://kyzylorda-news.kz/">Kyzylorda-news.kz</a>&nbsp; Бүгін ҚР Ұлттық экономика министрлігі Табиғи монополияларды реттеу комитетінің Қызылорда облысы бойынша департаменті &nbsp; «QazaqGaz Aimaq» АҚ Қызылорда өндірістік филиалының жаңарту және&nbsp;жаңғырту жұмыстары мен инвестициялық міндеттемесінің орындалуымен танысу мақсатында баспасөз туры ұйымдастырды.Тур барысында &nbsp;екі нысанның жұмыс барысымен таныстырды. Сонымен қатар, қысқа дайындық жұмыстары пысықталды. Тиісті сала мамандары газға берешегі бар тұрғындардың саны жыл сайын артып келе жатқанын тілге тиек етті.Жалпы «QazaqGaz Aimaq» АҚ Қызылорда өндірістік филиалы жоғары және төмен қысымды таратушы құбыр жолдары арқылы газды тасымалдау қызметін көрсетеді және барлық санаттағы тұтынушыларға газды өткізу қызметін іске асырады.<blockquote>– Табиғи газдың өзге отын түрлеріне қарағанда артықшылығы көп адамның күнделікті тұрмыс-тіршілігін айтарлықтай жеңілдететіні рас. Дегенмен тұтынатын табиғи газ адамдардың өміріне қауіп төндірмес үшін QAZAQGAZ AIMAQ компаниясының қызметкерлері алдағы жылыту маусымына дайындықты жан-жақты жүргізуде. Компанияның Қызылорда өндірістік филиалының мамандары алдағы қыс мезгіліне дайындық жұмысы аясында, жыл сайын "көгілдір отынға" қосылатын халық санының көбеюін ескеріп, тұтынушыларды газбен үздіксіз қамтамасыз етуде. Департаменттің және ҚР Энергетика министрлігінің бірлескен бұйрығымен филиалға жалпы соммасы &nbsp;99,492 млн. теңгеге 2020-2025 жылдарға арналған инвестициялық бағдарламалар бекітілді. Аталған бағдарламаны іске асыру барысында біршама жұмыстар жүрзілуде. Биыл 11 нысанға технологиялық жабықты ауыстыру көзделген. Бұл жұмыстар жыл аяғына дейін толық бітеді деп жоспарлануда, – деді «QazaqGaz Aimaq» АҚ Қызылорда өндірістік филиалы директорының орынбасары Бауыржан Әбдіқаппарұлы.</blockquote>Бұл жұмыстың барлығы яғни күрделі салымдарды орындау авариялық жағдайлардың туындау тәуекелін азайтады және қауіпсіз, үздіксіз әрі авариясыз жабдықтауды қамтамасыз етеді екен.&nbsp; "Шыны керек, қазіргі таңда газға берешек тұрғындар көп. Оның көп бөлігі жалдамалы пәтерде тұратындар. Үйіне барсаң есігін ашпайды, хабарлассаң жауап бермейді" дейді тиісті сала мамандары.Қарызды өтеу жөнінде тұтынушыға сотқа дейінгі хабарлама беріледі. Тұтынушы&nbsp;қарызын 3 күн ішінде төлемесе қарызды өндіру бойынша материалдар &nbsp;нотариусқа жіберіледі. Нотариус сотқа дейінгі хабарламаның негізінде атқарушылық жазба шығарып, тұтынушыға жібереді. Егер тұтынушы 10 жұмыс күн ішінде нотариус &nbsp;жіберген атқарушылық жазбаға қарсы шағым жазбаса атқарушылық жазба күшіне енеді. «QazaqGaz Aimaq» АҚ осы нотариус шығарған атқарушылық жазбаны жеке сот орындаушыларға жібереді. Олар осы атқарушылық жазба негізінде тұтынушының жеке шоттарын бұғақтайды екен.<blockquote>&nbsp;–&nbsp;«QazaqGaz Aimaq» АҚ Қызылорда өндірістік филианының теңгерімінде (сенімгерлік басқару нысандарымен қоса алғанда) 3386,58 шақырым газ құбыры, 58 дана ГРП, ГРПШ/ШРП - 350 дана бар.&nbsp;Регламенттік жұмыстардың орындалуы, жабдықтарға техникалық қызмет көрсету және жөндеу жұмыстары жүргізілуде, техникалық қарау жұмыстары айына 1 рет жүргізіледі, &nbsp;– деді газ жүйелерін пайдалану қызметінің басшысы Бауыржан Төлепов.</blockquote>Айта кетейік, қыс мезгіліне дайындық жұмыстары толығымен аяқталып, күзгі-қысқы жылыту мерзіміне дайындық паспорты облыстық энергетика және тұрғын-үй шаршуашылығы басқармасымен келісіліп, бекітілді.&nbsp;Сурет: Оrenburg.kp.ruМөлдір САБЫРЖАН

 «QazaqGaz Aimaq»: Қысқа дайындық аяқталды

<a href="https://kyzylorda-news.kz/">Kyzylorda-news.kz</a> Биылғы жылы аса қауіпті жұқпалы аурулардың алдын алу бойынша және эпизоотиялық тұрақтылықты сақтау мақсатында аса қауіпті 14 түрлі жұқпалы ауруға республикалық бюджет есебінен 7468,5 мың доза ветеринариялық препараттар қаралды.Облысқа бөлінген 7123,2 мың доза ветеринариялық препараттар аудандарға таратылды. 9 айлық жоспарға сәйкес 5726,9 мың доза препараттың 4987,4 мың дозасы алдын ала егіліп, жұмыстың 87 пайызы орындалды.Салада атқарылып жатқан ауқымды істерді облыстық ветеринария басқармасының басшысы Шахмардан Қойшыбаев айтып берді.<blockquote>– Өңірімізде сапалы жүргізілген жұмыстардың нәтижесінде дүниежүзілік жануарлар денсаулығы ұйымы арқылы облысымызға аусыл ауруынан таза аймақ мәртебесі берілді. Бұл өңіріміздің экспорттық әлеуетін арттыруға мол септігін тигізеді. Сондай-ақ ауыл шаруашылығы жануарларын бірдейлендіру жұмыстары тұрақты түрде жүргізіліп, ақпараттық жүйеге енгізілді. 1 қыркүйекке дейін ақпараттық жүйеге 1567,6 мың бас ауыл шаруашылығы жануарлары тіркелді. Ветеринария саласына аймақ басшысының да қолдауы ерекше. Биылғы жылдан бастап алғаш рет 10 шілде «Ветеринария қызметкерлері күні» болып белгіленді. Аймақ басшысының қатысуымен іс-шара өткізіліп, саланың ардагерлері мен үздік қызметкерлері марапат мінберінен көрінді. Сонымен қатар, биыл облыстық бюджеттен 26 арнайы автокөлік сатып алынып, ветеринария ұйымдарына берілді, – деді Шахмардан Қойшыбаев.</blockquote><figure class="image"><img src="https://knadmin.beoblood.kz/uploads/Oblysta_Epizootikaly_ahual_t_ra_ty_11380a21c6.jpg" alt="Облыста Эпизоотикалық ахуал тұрақты.jpg"></figure>Фото: Өңірлік коммуникациялар қызметі

Облыста Эпизоотикалық ахуал тұрақты

<a href="https://kyzylorda-news.kz/">Kyzylorda-news.kz</a> Бүгінде облыста қатты тұрмыстық қалдықтарды өңдеу бойынша 17 кәсіпкерлік субъекті жұмыс жасайды. Мемлекет басшысы Қасым-Жомарт Тоқаевтың «Ірі қалаларда қатты тұрмыстық қалдықтарды қайта өңдейтін зауыттар салу» тапсырмасына сәйкес, облыстық табиғи ресурстар және табиғат пайдалануды реттеу басқармасы алдағы екі жылда 10 жоба іске асырылатын болады.<blockquote>– Өңірде қалдықтарды сұрыптау және өңдеу саласында «Жасыл Даму» акционерлік қоғамының механизмі арқылы 9 жоба іске асырылады. Ал, Сырдария ауданындағы сұрыптау кешенімен қатты тұрмыстық қалдықтар полигон құрылысы қараша айында аяқталады деп күтілуде. Аймақтағы жобалар толық жүзеге асқан кезде 500 тұрақты жұмыс орны ашылып, қалдықтардың өңдеу үлесі 30,1 пайыздан 33,6 пайызға ұлғаяды. Нәтижесімен құрылысқа қажетті брусчатка, кәріз люктері, қағаз, пластик және шыны өнімдері шығарылады. Қалдықтарды басқаруда облыс орталығы Қызылорда қаласына аса мән берілуде. Қалада 3 жоба жүзеге асыру жоспарланып отыр. Біріншісі – «With You E&amp;C Kyzylorda» ЖШС-нің қолданыстағы полигонды жаңғырту жобасы. Жоба аясында қалдықтарды ұсақтау және өртеу қондырғылары, мусоровоз, экскаватор, жүк тиегіш, жүк тасымалдаушы, өрт сөндіру, суару автокөліктері секілд 32 арнайы техникалар мен 3 мың дана евроконтейнерлер алынып, медициналық және құрылыс қалдықтары кәдеге жаратылатын болады. Нәтижесінде, полигонның қалдықтарды қабылдау қуаттылығы 60 мың тоннадан 300 мың тоннаға ұлғаяды. Одан соң «Seven Rivers Technologies» ЖШС-нің шыны ыдыстарын өндіруді іске асыру жобасы жоспарлануда. Қуаттылығы бойынша жылына 220 млн шыны ыдыстарды шығаруға мүмкіндігі бар. Зауытқа шикізат ретінде өнімнің 50 пайызына республика бойынша жинақталған шыны қалдықтар қолданылатын болады. Үшінші жоба «Дезинфекция» ЖШС-і Қызылорда қаласында тұрмыстық қатты қалдықтардан пластикалық шелек, леген, цистерна шығару жоспарланып отыр. Жобаның қуаттылығы жылына 1200 тоннаны құрайды, - деді Серік Сағитжанұлы Өңірлік коммуникациялар қызметінде өткен брифингте.</blockquote>Фото:freepik.com

Қызылорда: Тұрмыстық қалдықтарды қайта өңдеу бағытында 10 жоба іске асырылады

<a href="https://kyzylorda-news.kz/">Kyzylorda-news.kz</a> Биыл Кіші Арал теңізіндегі су деңгейі Балтық жүйесі бойынша 41,13 метрді құрап, 2022 жылмен салыстырғанда 21,6 млрд текше метрге артқан. Ал, осы жылдың вегетациялық кезеңінде Шардара су қоймасына 3,6 млрд метр куб су түседі деп жоспарланса, бүгінгі күні 4,5 млрд метр куб су түсіп, өңірде су тапшылығы болмаған. Сонымен қатар, осы жылдың вегетациялық кезеңінде Арал теңізіне түскен судың көлемі де едәуір ұлғайған. Бұл туралы Өңірлік коммуникациялар қызметінің ақпарат алаңында облыстық табиғи ресурстар және табиғат пайдалануды реттеу басқармасының басшысы Серік Сермағамбетов мәлімдеді.<blockquote>– 2020-2023 жылдары маусым, шілде, тамыз айларында Арал теңізіне орташа есеппен секундына 15 текше метр су түссе, биылғы жылы 70 текше метр су түсуде. Мемлекет басшысының Жолдауында «Ирригация жүйелері және жалпы су шаруашылығы мәселесімен мұқият айналысу, көктемгі қарқын суды жинап, оны дихандардың қажетіне жарату мақсатында гидрология бекеттерін жөндеп, жаңғырту» қажеттігін тапсырды. Бұл бағытта облыста бірқатар жұмыстар атқарылып жатыр. Атап айтқанда, старатегиялық маңызды «Қызылорда» және «Әйтек» су тораптары күрделі жөндеуден өтсе, «Көкарал бөгетін сақтау» жобасы іске асырылуда. Сонымен бірге, 2024 жылға республикалық бюджеттен тиісті қаржы бөлініп, «Қызылорда облысы, Жаңақорған ауданының Келінтөбе магистралды каналына су беретін канал» жобасы жүзеге асырылуда. Айта кету керек, облыс үшін су жинау көлемі 775 млн метр куб болатын «Қараөзек» су қоймасын салу өте маңызды. Бүгінгі күні су қоймасын салу мәселесін «Ислам Даму Банкі» есебінен қаржыландыру үшін тиісті жұмыстар жүргізілуде, - деді Серік Сағитжанұлы.</blockquote>Фото: Қызылорда облысының Өңірлік коммуникациялар қызметі

Арал теңізіне түскен судың көлемі ұлғайды 

<a href="https://kyzylorda-news.kz/">Kyzylorda-news.kz</a>&nbsp; Бүгін облыс әкімі Нұрлыбек Нәлібаевтың төрағалығымен өткен мәжілісте автогаз құю бекеттері арқылы сұйытылған мұнай газын сату мәселесі талқыланды.Аймақ басшысы операторлардан сатылым лимитін алып тастауды талап етіп, газ тапшылығын қолдан жасауға тыйым салды.«Энергетика министрлігінің 26 маусымдағы №233 бұйрығына сәйкес сұйытылған газдың бағасы 1 шілдеден бастап өсті. Нақтырақ айтқанда, өңірімізде шекті бөлшек сауда бағасы 1 литр үшін – 70 теңге, ал, облыс орталығынан 200 шақырымнан астам қашықта орналасқан шалғай аудандарда 1 литрі – 75 теңге.Жаз айларында Түркістан облысы мен Шымкент қаласында газ тапшылығы байқалды. Ұлытау облысында баға біздің өңірмен салыстырғанда едәуір көтерілген, 1 литрі 84-89 теңге, бұрын 76-81 теңге еді.Операторлардың газды не үшін талонмен сататыны белгілі. Жеке және заңды тұлғалармен келісімге келіп, оларды газбен толық қамтамасыз етуге жұмыс жасайды. Әлеуметтік газды тек халыққа сату керектігі былтыр да қатаң ескертілді.Бұл мәселеде мен халықты қолдаймын, қарапайым тұрғындар газ тапшылығынан зардап шекпеуі керек. Автобекеттерде кезек болмауын қадағалаңыздар. Қазіргі қойылған лимитті алып тастаңыздар», – деп тапсырды Нұрлыбек Машбекұлы.Облыстық кәсіпкерлік және өнеркәсіп басқармасының басшысы Бекболат Шәріпбеков аталған мәселеге орай хабарлама жасады. Облыс аумағында 25 оператор 210 автогаз құю бекеті арқылы сұйытылған мұнай газын сатады. Қыркүйек айына аймаққа 7 184 тонна газ бөлінді.Облыс әкімі операторларға коммерциялық газды өз қаражатына алу керектігін ескертті. Ал әлеуметтік газды жоғары бағамен сатқандар жауапкершілікке тартылады.Жиын қорытындысында жауапты басшыларға газдың басқа өңірлерге тасымалданбауы үшін Түркістан және Ұлытау, Ақтөбе облыстарының шекарасына тәулік бойы кезекшілік қою тапсырылды. Бәсекелестікті қорғау және дамыту департаменті Қызылорда қаласы және аудан әкімдерімен бірлесіп, барлық оператордың газ қорына мониторинг жүргізіп, талонмен сатуға және оның бағасына зерделеу жүргізеді. Егер заңнама талаптары бұзылса, нақты шара қабылдау қажет.Бұл жұмыстарды бақылау облыс әкімінің орынбасары Ардақ Зебешевке жүктелді.<img src="https://knadmin.beoblood.kz/uploads/gaz_1_6a7482eea0.jpg" alt="газ 1.jpg"><img src="https://knadmin.beoblood.kz/uploads/gaz_2_9bf4d4cb72.jpg" alt="газ 2.jpg"><img src="https://knadmin.beoblood.kz/uploads/gaz_fedbbfe36f.jpg" alt="газ.jpg">Фото: Қызылорда облысы әкімінің баспасөз қызметі

Қазақстан және Қызылорда облысының жаңалықтары: Экология