<a href="https://kyzylorda-news.kz/date/2020/08/05/">Kyzylorda-news.kz.</a> Жайлаған індет қоғамның қос өкпесін қысып барады. Бұрыннан-ақ бас ауырып, балтыр сыздаса дәрігерге жүгінетін жұрт қазіргідей уақытта ақ халаттылардың көмегіне тіпті зәру. Науқастарды емдеу үшін өз басын қатерге тігіп, антына адал болған дәрігерлердің ерлігі көпке үлгі.
Қасқырбек Ермаханов – Тәуелсіздіктің құрдасы. Қуаңдария ауылында дүние есігін ашқан ол жастайынан-ақ дәрігер болуды арман етті. Солай арман қуып қалаған саласы бойынша 2008 жылы Қазақ Ұлттық медицина университетіне оқуға түсіп, 2015 жылы қарашаңырақты терапевт мамандығы бойынша тәмамдайды. Одан соң ауданға келіп ауруханада бір жыл терапевт болып қызмет атқарады. Мұнымен Қасқырбек бір орында тоқтап қалмайды.
2016 жыл болғанда Қазақ медициналық үздіксіз білім беру университетіне анестезиология реаниматология мамандығы бойынша резидентураға түсіп, былтыр бітіріп шығады. Бүгінде ол аудандық ауруханада анестезиология реанимацияның бөлім меңгерушісі. Қазіргідей уақытта біздің дәрігермен сұқбатымыз онлайн өрбіді. Көк экранның ар жағынан емен-жарқын байланысқан ол пандемиядағы күресте қандай қиындықтарды бастан кешкенін баяндап берді.
<blockquote>
 “Індетпен күресте қиындықтар көп болды. Алдымен, бұрын соңды мұндай аурумен бетпе бет келмегендіктен тәжірибеміз аз еді. Күн санап өршіп, ауыр жағдайда бөлімшеге жеткен науқастарды көріп тағы жанымыз ауырды. Олардың қиналғанын, өлім мен өмір арасындағы күресін көру біз үшін қиынға тиді. ИВЛ аппараты, оттегі баллондары жетіспеген кездер болды. Ондайда дем жетпей қиналған науқастарға қолымыздан келген бар көмекті аямадық. Әрине, жұмыла көтерген жүк жеңіл. Аудан жұртшылығы, арда азаматтар, аға буын мен ерікті жастардың қолдауы, демеуінің арқасында індетпен күресті күшейте білдік. Қазір толық індетті жеңген жоқпыз. Әлі де жансақтау бөлімінде жатқан науқастар бар. Бірақ алдыңғы айға қарағанда індеттің беті қайтып келеді. Десе де, олай деп, арқаны кеңге жаюға болмайды. Біз әлі де күресудеміз. Қасық қанымыз қалғанша күресуге дайынбыз. Егер біз әлсіз болсақ, науқастар да салын суға кетірер еді ғой. Сол үшін мықты болуға тырыстық. Олардың індеттен айығуына барлық ем-домды жасадық. Онымен қоса психологиялық қолдау көрсетіп, өмір үшін күресуге мотивация бердік. Біздің басты міндетіміз де осы. Дәрігерлерің де жақсы күндерге сенімі мол”, – дейді Қасқырбек Арыстанұлы.
</blockquote>
<img src="https://kyzylorda-news.kz/wp-content/uploads/2020/08/116879071_1564619977042236_6469714182542255176_n.jpg" alt="" />
Ол күніне 10 сағатын науқастармен өткізеді. Демалыстағы кезекшілігі тағы бар. Оның өз өмірін қатерге тіге отырып, өзгенің өмірін сақтап қалу кезіндегі ерлікпен бірдей ерен еңбегі көпке үлгі.

Қасқырбек Ермаханов: Індеттің беті қайтып келеді

<a href="https://kyzylorda-news.kz/date/2020/08/05/">Kyzylorda-news.kz.</a> Қызылорда қаласының әкімі Нұрлыбек Нәлібаев облыс орталығындағы бірқатар медициналық мекемелерге барып, дәрігерлермен кездесті.&nbsp; Медицина қызметкерлерімен тілдескен шаһар басшысы емдеу мекемелеріндегі бірнеше мәселені назарға алды.
&nbsp;&nbsp;Сонымен бірге қала әкімдігінің ұйымдастыруымен және кәсіпкерлердің қолдауымен 39,7 млн. теңгеге алынған 1 өкпені жасанды тыныстандыру аппараты мен 15 оттегі концентраторы табысталды.
<img src="https://kyzylorda-news.kz/wp-content/uploads/2020/08/02-scaled.jpg" alt="" />
Аталған медициналық құралғыларды алуға қолдау білдірген кәсіпкерлер: «Сәт-Сервис» ЖШС, «Бақ-Береке 2030» ЖШС, «Сапақ» ӨК, «Асанас-Дар» ЖШС, СК «МетПромМонтаж» ЖШС, «Нұр-Ай Ақжол» ЖШС, «Алтын Айдарлы» ЖШС.
Жаңа құрылғылардың ішінде 1 өкпені жасанды тыныстандыру аппараты мен 2 оттегі концентраторы қалалық ауруханаға берілсе, облыстық жұқпалы аурулар ауруханасының базасы 3 аппаратпен толықты. Облыстық балалар ауруханасына 5, «Ана мен бала» орталығына 5 жаңа құрылғы табысталды.
<img src="https://kyzylorda-news.kz/wp-content/uploads/2020/08/04-scaled.jpg" alt="" />
Қиын кезеңде қолдан келген көмегін беріп, өз қаражаттары есебінен демеушілік танытқан кәсіпкерлерге шаһар басшысы қала тұрғындарының атынан алғыс білдірді.
&nbsp;ШаҺар басшысы одан кейін&nbsp; медицина саласындағы мәселелерге назар салды. Мәселен облыстық балалар ауруханасының бас дәрігері Зоя Кушенова&nbsp; өзі басқаратын емдеу мекемесінің реанимация бөліміне жөндеу жұмыстарының қажет екенін мәлімдеді. 12 орынға шақталған орталық 3 жылдан бері тек ағымдық жөндеуден өтіп келген. Алайда жансақтау бөлімі толығымен жаңалауды қажет етеді. Бұл мәселені қала әкімі демеушілік есебінен жақын уақытта шешіп беретінін жеткізді.
<img src="https://kyzylorda-news.kz/wp-content/uploads/2020/08/01-scaled.jpg" alt="" />
Айта кетейік, вируспен күресте аймағымыздың ерікті тұрғындары асқан белсенділік танытып, қауіпті кеселден арылуға үлкен септігін тигізіп келеді. Еріктілер қатарында кәсіпкерлер, құрылысшылар, мәслихат депуттары да бар.
Осындай жомарт жүрек, дархан көңіл жандарды қала әкімдігі игі іске ұйыстырып, вируспен күресте жүйелі жұмыстар атқарылуда. Соның нәтижесінде аз уақытта&nbsp; 56,2 млн. теңгеден аса қаржы жиналып, аймақ орталығындағы емдеу мекемелеріне қажетті құрал-жабдықтар алынды.
Сонымен қатар пандемия кезінде 400 ден аса дәрігер отбасынан оқшауланып, белгіленген ғимараттарға орналастырылды. Бұл мәселеде де қала кәсіпкерлерінің қолдауы ерекше. Атап айтқанда «Қызылорда» қонақ үйі 110 дәрігерді жатын орынмен қамтамасыз етсе, «Бәйтерек» қонақ үйінен медицина қызметкерлеріне 49 орын ұсынылып, «Арбат» қонақ үйінде облыстық туберкулез диспансерінің 30 дәрігеріне орын берілген болатын.

Қызылорда қаласының әкімі дәрігерлермен кездесті

<a href="https://kyzylorda-news.kz/">Kyzylorda-news.kz.</a> Тамыз айының басындағы жағдай бойынша әлем халқының 10% ғана коронавирус жұқтырған.
Бұл туралы Дүниежүзілік денсаулық сақтау ұйымының жаңа аурулар мен зооноздар жөніндегі бөлімінің басшысы Мария Ван Керхе мәлімдеді.
Оның айтуынша, әлем халқының 10%-інде ғана коронавирусқа қарсы антиденелер бар.
Осылайша, коронавирусқа қарсы ұжымдық иммунитет әлі қалыптаспағанын айтты. Әлем халқының 60-70% коронавируспен ауырса, ұжымдық иммунитет қалыптасуы мүмкін екенін айтып өтті.
<a href="https://24.kz/kz/zha-aly-tar/lemde/item/414054-lem-khal-yny-10-inde-ana-koronavirus-a-arsy-immunitet-bar-dds">Хабар 24</a>

ДДҰС: Әлем халқының 10%-інде ғана коронавирусқа қарсы иммунитет бар

<a href="https://kyzylorda-news.kz/">Kyzylorda-news.kz.</a> Елімізде колледж және жоғары оқу орындарының студенттері үшін оқу жылы негізінен қашықтан оқыту форматында басталады, деп хабарлайды <a href="https://www.inform.kz/kz/biylgy-oku-zhyly-studentter-ushin-kalay-bastalady_a3679985">ҚазАқпарат</a>.
ҚР Білім және ғылым министрлігінің Telegram парақшасында жарияланған ақпаратқа сәйкес, педагогикалық, IT, әлеуметтік, гуманитарлық бағыт студенттері қашықтан оқиды. Технологиялық, аграрлық бағыттар, медицина және өнер мамандықтарының студенттері ішінара қашықтықтан білім алады. Дәріс және семинар сабақтары онлайн өтсе, зертханалық сабақтар және өндірістік тәжірибе дәстүрлі форматта жүргізіледі.
Алыс ауылдық жерлерде және шағын қалаларда орналасқан 102 колледж штаттық режимде жұмыс істейді. Бір топтағы студент саны 15-тен аспайтын болады (бірнеше топ құрылады).
Жоғары оқу орындарында студенттер негізінен қашықтан оқыту форматында білім алады. Педагогикалық ғылымдар, IT, әлеуметтік және гуманитарлық бағыттар қашықтан оқиды.
Табиғи, техникалық және аграрлық бағыттар, медицина және өнер мамандықтары бойынша дәрістер мен семинарлар онлайн, зертханалық және практикалық сабақтар штаттық режимде өткізіледі.
Ал магистратура мен докторантура сабақтар ішінара қашықтықтан оқытылады. Интернатура мен резидентурада оқу дәстүрлі формата жүретін болады.

Биылғы оқу жылы студенттер үшін қалай басталады?

Kyzylorda-news.kz. Үкімет басшысы Асқар Мамин коронавирустың таралу деңгейі төмендеген аймақтарды атады, деп хабарлайды&nbsp;<a href="https://sputniknews.kz/">Sputnik Қазақстан</a>.&nbsp;
Премьер-министрдің айтуынша, бір аптаның ішінде бірқатар облыста инфекцияның репродуктивті көрсеткіші, яғни, вирустың бір адамнан таралу деңгейі 1-ден төмен түсті. Олар: Атырау, Ақтөбе, Маңғыстау, Қызылорда, Шығыс Қазақстан, Жамбыл, Түркістан мен Павлодар облыстары, Нұр-Сұлтан, Шымкент пен Алматы қалалары.
<blockquote>
 “Ал инфекцияның репродуктивтік деңгейі 1-ден жоғары өңірлер: Қостанай мен Ақмола облыстары. Бұл өңірлерде жағдай күрделі және аймақ әкімдерді эпидемияға қарсы шараларды күшейтуге аса назар аударуы қажет”, – деді Мамин үкіметтің онлайн отырысында.&nbsp;
</blockquote>
Үкімет басшысы әлем бойынша 126 мемлекетте коронавирус жұқтырғандардың жаңа өсімі тіркеліп отырғанын да атап өтті.&nbsp;
<blockquote>
 “Пандемияның жаңа толқыны күзде пайда болуы мүмкін және оған дайын болуымыз керек. Оның алдын алу үшін барлық белгіленген талаптардың сақталуын қамтамасыз етіп, жоспарланған іс-шаралар кешенін іске асыру қажет”, – деп атап көрсетті Мамин.
</blockquote>

Асқар Мамин коронавирус пандемиясының жаңа толқыны туралы айтты

Kyzylorda-news.kz. Әлемде коронавирус жұқтырған адамдардың жалпы саны 4 тамызда таңертең 18,2 миллионнан асты. Пандемия 188 елге әсер етті.
Дүниежүзілік денсаулық сақтау ұйымының басшысы Тедрос Аданом Гебрейесус COVID-19-ды құртатын дәрі-дәрмек жоқ екенін айтты.&nbsp;
<blockquote>
 «Қазіргі уақытта ауруды&nbsp;күміс оқ жоқ және, мүмкін, ешқашан болмайды», – деді Гебрейесус.
</blockquote>
Бұл туралы ұйым басшысы Женевадағы (Швейцария) БҰҰ штаб-пәтерінен виртуалды брифинг кезінде айтты. Коронавирустан тиімді вакцинаны алуға деген үлкен үміттерге қарамастан, мәңгіге құтылу мүмкін емес деді ол. Гебрейесус сонымен қатар қазіргі уақытта ауруға қарсы бірқатар вакциналар сынақтардың үшінші кезеңінде тұрғанын атап өтті.
<blockquote>
 ДДСҰ басшысы барлық елдерді денсаулық сақтау шараларын қатаң сақтауға, азаматтарды маскалар киюге шақырды. Бұл Гебрейсейдің пікірінше, бүкіл әлемде ынтымақтың символына айналуы керек.
</blockquote>

ДДСҰ басшысы коронавирусты жою ешқашан мүмкін еместігін мәлімдеді

Kyzylorda-news.kz. Қызылорда облысында эпидемиологиялық жағдайдың күрделенуі кезеңінде бірқатар кәсіпкерлер денсаулық сақтау саласына демеушілік жасауы, заттай көмектер ұйымдастыруы өз жалғасын табуда.
Бүгін “Сат-Сервис”, “Бақ-Береке”, “Сапак”, “Асанас-Дар”, “Нур-Ай”, “Алтын Айдарлы” жауапкершілігі шектеулі серіктестіктері бірігіп, бағасы 29 млн 633 мың теңгені құрайтынды терапияға арналған желдеткіш және 10 млн 107 мыңға оттегі концентраторын қалалық ауруханаға сыйға тартты.

Қызылорда қалалық ауруханасына оттегі концентраторы сыйға тартылды

Kyzylorda-news.kz. Жаңақорған ауданында 2 провизорлық стационар орталығы жабылды. Бұл туралы аудан әкімдігінің баспасөз қызметі хабарлады.
Жаңақорған ауданында барлығы 3 провизорлық стационар орталығы бар болса, соның 2-і жабылды.
Бүгінгі күнде тек ауданаралық ауруханасының жұқпалы аурулар бөлімінде барлығы 23 науқас ем алуда. Олардың ішінде 2 науқастың жағдайы орташа деңгейде, 21 науқастың жағдайы жақсы.
Дәрігерлерлердің айтуынша, апта соңына дейін бұл көрсеткіш те азаяды деп күтілуде.

Жаңақорған ауданындағы 2 провизорлық орталық жабылды

Kyzylorda-news.kz. Әлеуметтік медициналық сақтандыру қоры биыл наурыздан маусым айына дейін медицина қызметкерлерінің еңбекақысына қосымша 1 117,4 млн теңгеден астам қаржы төледі. Үстеме ақы үшін республикалық бюджеттен жалпы 1 559,13 млн теңге бөлінді.
Ең үлкен соманы (35% немесе 393,03 млн теңге) 3-ші тәуекел тобының қызметкерлері алды: провизорлық стационарлардың дәрігерлері, орта және кіші медицина қызметкерлері, жедел медициналық жәрдем дәрігерлері мен фельдшерлер, сонымен қатар санитарлық авиацияның дәрігерлері мен орта медицина қызметкерлері жұмысқа тартылған жағдайда. Ал саны бойынша 3-ші тәуекел тобының медицина қызметкерлері басым – үстеме ақы алған барлық медицина қызметкерінің 51% немесе 3 363 мың адам. Инфекциялы қауіпті аумаққа жұмысқа тартылған медицина қызметкерлері санының ай сайын өсуі байқалады. Егер наурыз айында 520 астам қызметкер үстеме ақы алатын болса, маусым айында олардың саны 2 393 адамға дейін артты.
Бұдан басқа, медициналық сақтандыру жүйесіне қатысушы медициналық ұйымдарды қолдау шаралары қабылданды.
<blockquote>
 «Қазір аурухана мен емханалар өте қиын жағдайда жұмыс істеуде. Оларды қолдау үшін Қор алғытөлем сомасын 50% дейін арттырды. Ал ауылдық ауруханалар желісіндегі қаржылық тұрақтылықты сақтау үшін жоспарлы медициналық қызметтер көлемі төмендегенде базалық қаржыландыру жүргізіледі. Сондай-ақ, пандемия кезеңінде Қор медициналық ұйымдардың шарттық міндеттемелеріне мониторинг жүргізуге мораторий жариялады», – дейді Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов.
</blockquote>

Әлеуметтік медициналық сақтандыру қоры медицина қызметкерлеріне ақы төлеуді жалғастыруда

<a href="https://kyzylorda-news.kz/">Kyzylorda-news.kz.</a> Денсаулық сақтау министрі Алексей Цой карантин шараларын ұзартуға қатысты пікір білдірді.
Министрдің айтуынша, қазіргі кезде жағдай тұрақталды. Стационарларда мыңдаған орын резервке қойылды. Бұрынғы жұмыс кестесіне, яғни жоспарлы емдеуге көшкен стационарлар да бар. Ал карантинді ұзарту немесе жеңілдету мәселесі жан-жақты зерделенеді. Негізгі көрсеткіш – науқастардың күнделікті өсімі.&nbsp;&nbsp;
<blockquote>
 “Біз алдағы екі апта бойы осы көрсеткішті бақылайтын боламыз. Егер індетті жұқтыру көрсеткіші тұрақты түрде төмендейтін болса, онда шектеу шараларын кезең-кезеңімен алып тастау жоспары бар. Біз оны мемлекеттік комиссияның отырысында жариялаған болатынбыз. Ал осы көрсеткіштер нашарласа, онда басқа шешімдер қабылданады. Әзірше, оң динамика бар”, – деді Цой орталық коммуникациялар қызметінде өткен онлайн брифингте.
</blockquote>
Айта кетсек, бүгін денсаулық министрі қиын кезеңнің артта қалғанын жариялады. Батыс Қазақстан, Алматы, Түркістан, Қостанай, Ақмола, Маңғыстау облыстары мен елордада жағдай жақсарып жатыр.&nbsp;
<blockquote>
 “Қазақстанда коронавирусқа шалдығу жағдайы тұрақталды деп толық айта аламыз. Шарықтау шегі артта қалды. Ендігі мақсат – осы көрсеткішті ұстап қалу және төмендету”, – деп атап көрсетті Цой.
</blockquote>

Министр карантин қандай жағдайда тағы ұзартылатынын айтты

<a href="https://kyzylorda-news.kz/">Kyzylorda-news.kz.</a> Бүгінгі күннің батырлары – дәрігерлер екені даусыз. Төтенше жағдай кезінде табанынан тік тұрып, қызметке кіріскен ақ халаттылар әлі де тыным тапқан жоқ. Пандемиямен күресте науқастармен тығыз байланыста жұмыс істеп жүрген жанның бірі дәрігер Бекзат Мәмбетәлиева.
1986 жылы Қызылорда облысы, Қазалы ауданында туған ол бала кезінен ақ халат киіп дәрігер болуды армандаған. Мектепті тәмәмдаған соң, алдына биік мақсаттар қойған ол М.Оспанов атындағы Батыс Қазақстан мемлекеттік медициналық университетіне оқуға түседі.
Жалпы тәжірибелі дәрігер мамандығы бойынша оқуын ойдағыдай аяқтап, алғаш еңбек жолын Қызылорда қаласындағы №6 емханада жасөспірімдер дәрігері болып бастайды.
Мұнан кейін, Ақтөбе облысы, Әйтеке би аудандық орталық ауруханасында жұмыс істейді. Бұл жерде 6 жылға жуық қызмет етіп, халықтың ақеден алғысына бөленеді.
Онан соң, №3 қалалық емханаға жалпы тәжірибелі дәрігер болып жұмысқа орналасады. Бүгінде Бекзат Әкімғазықызы аталған емханада абыройлы еңбек етіп келеді.
Жоғарғы оқу орнын бітіргеннен кейін рентгенолог – дәрігер мамандығы бойынша білімін жетілдірген ол қазіргі таңда білікті мамандардың бірі әрі бірегейі.
Бүгінге дейін Бекзат Мәмбетәлиева жүрек-өкпе ренимациясы бойынша біліктілігін арттыру крусынан өтті. Сонымен қатар Қазақ медициналық үздіксіз білім беру университетінде көшбасшылық және адами ресурстарды басқару циклі аясында тәжірибе жинақтады.
Одан бөлек, ҚР ДСМ «Еңбек гигиенасы және кәсіби аурулар ұлттық орталығы» ШЖҚ РМК жанында «Кәсіптік аурулардың өзекті мәселелері» циклында 108 сағат көлемінде біліктілігін арттырды.
Үнемі ізденіс үстінде жүретін жан заманауи медициналық емдеу тәсілдерін меңгеру негізгі мақсаты екендігін алға тартады. Қазіргі таңда ол карантин жағдайына байланысты емханада құрылған мобильді топ мүшесі. Уақытпен санаспай барлық шақыртуларға жедел жетіп, тұрғындарға сапалы медициналық қызмет көрсетуде.
<blockquote>
 «Өзгенің өміріне жауапты болғандықтан, жұмысымды бірінші орынға қоямын», дейді дәрігер.
</blockquote>
Бір қолымен әлемді, екінші қолымен бесікті тербететін нәзік болмыс иелерінің осындай жауапты қызметтегі ерен ерліктері жас мамандарға үлгі болары хақ. Ақ халатты абзал жан Бекзат Мәмбетәлиева жұмыспен қатар отбасына да көңіл бөліп, бала тәрбиесімен айналысып отырған ардақты ана. Дәрігер әрбір тұрғын карантин кезінде барлық сақтық шараларын жасап, аурудың алдын-алуға жұмыс жасаса қауіптің сейілетінін айтады.

Бекзат Мәмбетәлиева: «Өзгенің өміріне жауапты болғандықтан жұмысымды бірінші орынға қоямын»

<a href="https://kyzylorda-news.kz/">Kyzylorda-news.kz.</a> Пандемия уақытында үй жағдайындағы балалардың қауіпсіздігін сақтау және психологиялық көмек беруде Қызылорда облыстық Білім басқармасы жанынан «Жасөспірімдердің психологиялық саулығын сақтау жұмысын үйлестіру» орталығы ашылды. Онлайн көмекті Bilim foundation қоғамдық қоры жүргізеді.
Орталық қиын жағдайдағы, психологиялық көмекті қажет ететін әрбір отбасыға, балаларға онлайн бағытта көмек береді. Бұл республикада алғаш болып Қызылорда облысында іске асырылуда. Маусым айынан бастап қазірге дейін 89 жасөспірім психологиялық көмек және 25 жасөспірім қор дәрігерінің тексеруінен өтіп ем алған.
Мобильді онлайн көмек беру үшін психолог-кординаторлар бекітіліп, әр аудан бойынша call орталық жұмысы іске асырылды. Әр психолог онлайн бағытта балаларға психологиялық көмек беріп, тиісті алгоритмге сәйкес әрекет етеді. Онлайн кеңес беру жұмысына облыстан 12 психолог және 2 психотерапевт дәрігер тартылған. Әр ауданнан қүрылған мобильді Call орталық әрбір қоңырауға жауап беріп, психологиялық қолдау жасайды.
Орталық жазғы оқу демалысы кезінде суицидалды әрекеттің алдын алу мақсатында «психологиялық қолдау тобына» анықталған жасөспірімдерге бағалау жұмыстарын жүргізіп, «тәукел» топтағы балаларға психологиялық қолдау жасайды.
Кеңес беру жұмысымен қатар орталық мамандары жаңа оқу жылындағы қашықтықтан оқыту форматында психологиялық қызметті жетілдіру бойынша жұмысты бастайды.

Қазақстан және Қызылорда облысының жаңалықтары: COVID-19