<a href="https://kyzylorda-news.kz/">Kyzylorda-news.kz.</a> Солтүстік Қазақстан және орталық өңірлерде директорлар мен олардың орынбасарларының тапшылығы мәселесі туындап отыр. Бұл туралы ҚР Білім және ғылым министрі Асхат Аймағамбетов айтты, деп хабарлайды <a href="https://lenta.inform.kz/kz/mektep-direktorlary-zhalakysyn-2-esege-arttyru-mumkindigine-ie-ministr_a3614557">ҚазАқпарат</a>.
<blockquote>
 «Директорлар үшін жай ғана мұғалім болып істеген ыңғайлы. Директорлардың жауапкершілігі жоғары және қағазбастылық көп, балалармен жұмыс істеу деңгейі де өзгеше. Бар мәселе – ынталандыруда, яғни директорлардың айлығы мұғалімдердің айлығынан төмен. Осы орайда жалақыны 2 есеге арттыру директорлар мен олардың орынбасарларына да қатысты болмақ. Ендігі кезекте директорлар өз шеберліктеріне байланысты санаттарға бөлініп, өз жалақыларын 2 есеге, яғни 100 пайызға арттыру мүмкіндігіне ие. Директорларды да қолдайтын боламыз»,- деді А. Аймағамбетов журналистерге берген сұхбатында.
</blockquote>

Директорлардың айлығы мұғалімдердің айлығынан төмен

<a href="https://kyzylorda-news.kz/">Kyzylorda-news.kz.</a> Бүгін Жалағаш ауданында еріктілер жылы аясында білім саласы қызметкерлерінің «Біз біргеміз – берік іргеміз» атты аудандық форумы өтті.
Оған аудан әкімі Қайратбек Сәрсенбаев, облыстық білім басқармасының тәрбие және өзін-өзі тану бөлімінің басшысы Мәди Бекмағанбетов, Сырдария ауданының волонтерлар жетекшісі, мектеп басшылары, оқушылардан құралған волонтерлар тобы, БАҚ өкілдері қатысты.
Форум аясында «Таза әлем» жобасымен тұрмыстық қалдық өнімдерін жинау арқылы тазалыққа бей-жай қарамайтын еріктілер тобының жұмысын насихаттау үшін №38 орта мектеп оқушысы Мәди Бижан, «Қауіпсіз жол» акциясы негізінде аудан мектептерінің «Жас жол инспекторларынан құралған волонтерлар тобының жұмыс нәтижелерімен Дидар Өмірзақ, «Саулық» бағыты бойынша денсаулық сақтау саласымен бірлесіп жасалып жатқан «Салауатты өмір салтын сақтайық» акциясының маңыздылығы туралы Аружан Нұрадин, оқушылардың қолынан жасалған қолөнер бұйымдарынан көрме ұйымдастырып, өздерінің бұйымдарын ерекше білімді қажет ететін оқушылардың туған күніне, мерекелік қайырымдылық жасау бағытында шаралар өткізіп келе жатқан №201 мектеп-лицейінің волонтерлар тобының жетекшісі Еркінқызы Нәзия, төтенше жағдайлар, орман шаруашылығы мекемелерімен бірлесіп қауіпті аймақтарға белгілер ұйымдастырып келе жатқан волонтерлар тобы атынан Т.Жүргенов атындағы №123 мектеп-лицей оқушысы Инабат Тыныштықбай сөз сөйлеп, бейне-ролик арқылы жүргізілген жұмыстарын көрсетті.
Аудан әкімі Қайратбек Сәрсенбаев, облыстық білім басқармасының тәрбие және өзін-өзі тану бөлімінің басшысы Мәди Бекмағанбетов сөз сөйлеп, белсенді жастарға сәттілік тіледі. Форум соңында еріктілер жылының эстафетасын Жалағаш ауданы Сырдария ауданына табыстады.
<img src="https://kyzylorda-news.kz/wp-content/uploads/2020/02/12zhalagashforum2.jpg" alt="" />
<img src="https://kyzylorda-news.kz/wp-content/uploads/2020/02/12zhalagashforum3.jpg" alt="" />
<img src="https://kyzylorda-news.kz/wp-content/uploads/2020/02/12zhalagashforum4.jpg" alt="" />

Жалағашта білім қызметкерлерінің форумы өтті

<a href="https://kyzylorda-news.kz/">Kyzylorda-news.kz.</a> Қызылорда «Болашақ» университеті мен «Болашақ» Ғылыми-зерттеу институты 2014 жылдан бастап чехиялық «Sociosféra-CZ» Ғылыми-баспа орталығымен ынтымақтастықта жұмыс істеп келеді.
«Болашақ» ҒЗИ және «Sociosféra-CZ» ҒЗО бір-біріне ғылыми материалдар мен әдебиетпен, оның ішінде тараптардың әрқайсысының қолдауымен шығарылған әдебиеттермен алмасуға жәрдемдеседі және өзара алмасу әрбір елдегі қолданыстағы заңнамаға сәйкес жүргізіледі. Екі тарап қолда бар мүмкіндіктерді негізге ала отырып, келесі жұмыстарды атқаруға ұмтылады: бірлескен ғылыми зерттеулер жүргізу; бірлескен семинарлар, конференциялар, симпозиумдар өткізу; ынтымақтастық мәселелерінің бүкіл кешені бойынша жарияланымдармен алмасу.
2014 жылдан бастап «Болашақ» ҒЗИ төрт халықаралық ғылыми-тәжірибелік конференция бойынша бірлескен жұмыстарды бастады. Соңғы жылдардағы бірлескен жұмыстар «Қазіргі шарттардағы тәрбиенің мақсаттары, міндеттері мен құндылықтары» және «Адам мен қоғам қауіпсіздігі әлеуметтік-гуманитарлық ғылымдардың мәселесі ретінде» атты Халықаралық ғылыми-тәжірибелік конференциялар шеңберінде жүргізілуде.
Біздің ойымызша, конференция материалдарында жарияланған баяндамалардың сандық көрсеткіштеріне назар аударғанымыз жөн:
<img src="https://kyzylorda-news.kz/wp-content/uploads/2020/02/12tabkaz1.jpg" alt="" />
Осы мәліметтерден бес жыл ішінде 284 баяндама жарияланғаны көрініп тұр. Баяндамалар 9 елдің ғалымдары, оқытушылары, студенттері, аспиранттары мен докторанттарының&nbsp; авторлығында жазылған: Австрия, Армения, Әзірбайжан, Беларусь, Қазақстан, Өзбекстан, Польша, Ресей, Украина. 2020 жылы аталмыш конференциялар Қызылорда облысы бойынша саяси зерттеулер ассоциациясының филиалы, Краснодар қаласындағы Әскери байланыс академиясының филиалы және Пенза мемлекеттік технологиялық университетімен бірлесіп өткізіледі. Конференцияның ресми тілдері – қазақ, орыс, ағылшын. Жоғарыдағы конференциялардың халықаралық ұйымдастыру комитетінің құрамына «Болашақ» ҒЗИ директоры, саяси ғылымдарының кандидаты, қауымдастырылған профессор М.Ө. Насимов кіреді. 2018 жылғы Қызылорда «Болашақ» университетінің институционалдық аккредиттеуі кезінде Білім сапасын қамтамасыздандыру бойынша тәуелсіз агенттігі (БСҚТА)&nbsp;сарапшылары осы жұмыстар кешенін жоғары оқу орындары үшін оң тәжірибе екендігін атап өтті.

«Болашақ» университеті шетелдік орталықтармен тығыз байланыста

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда мемлекеттік университетінің ғылыми-техникалық кітапханасы кезекті пруст сауалнамасын өткізді.
Бұл жолғы сауалнама Қорқыт ата атындағы Қызылорда мемлекеттік университетінің көрнекті ғалымы, педагог, ҚР Білім беру ісінің үздігі, «Ы.Алтынсарин» атындағы төсбелгінің, халықаралық «Менделеев» және «Үздік оқытушысы» медалінің иегері, екінші мәрте ҚР Білім және ғылым министрлігінің «Жоғары оқу орнының үздік оқытушысы» атты ЖОО оқытушыларына берілетін Мемлекеттік грант иегері Күлбарам Сәдуақасқызының ғибратты өмір жолына арналды.
Іс-шараға университет студенттері және елімізге белгілі қайраткерлер: ақын Махмұтбай Әміреев, «Құрмет» орденінің иегері ұстаз – ақын Ділдахан Торғаева, университет профессоры Әнипа Сейдалықызы және қала мектептерінің директорлары қатысты.
Жиында «Жаратылыстану» институтының директоры Самалбек Оразбайұлы Қосанов ғалым-педагогтың өмір жолына тоқталып, қызықты деректермен бөлісті.
Сондай-ақ өз кезегімен сөз алған әрбір қатысушы Күлбарам Сәдуақасқызының бойындағы адами қасиеттер хакім Абай жырлаған «Бес асыл істің» толығынан табылатындығын зор ықыласпен жеткізді. Оның еңбексүйгіштігі мен ізденімпаздығы, білуге құштарлығы арқасында жеткен жеңісі кез-келген жанға үлгі боларлық.
Өзі химик болса да, лирик атанған ғалым-ұстаз Күлбарам Сәдуақасқызының ғылыми – әдістемелік еңбектерінен басқа жарыққа шыққан «Жүрек жырлары» атты өлеңдер жинағын студент жастар мәнерлеп оқыса, озат студенттер ұстазға арнап жүрекжарды лебізін өлеңмен жеткізді.
<img src="https://kyzylorda-news.kz/wp-content/uploads/2020/02/11ustazben2.jpg" alt="" />
<img src="https://kyzylorda-news.kz/wp-content/uploads/2020/02/11ustazben3.jpg" alt="" />

Университет жастары ұлағатты ұстазбен кездесті

<a href="https://kyzylorda-news.kz/">Kyzylorda-news.kz.</a> Мұғалімдер жалақыны уақтылы алуы керек. Білім және ғылым министрлігінің аппараттық отырысында министр Асхат Аймағамбетов облыстық білім басқармаларына осындай тапсырма берді, деп хабарлайды <a href="https://lenta.inform.kz/kz/ashat-aymagambetov-mugalimderdin-zhalakysyn-durys-esepteuge-katysty-tapsyrma-berdi_a3613309">ҚазАқпарат</a>.
Отырыс барысында министр өзінің орынбасары Бибігүл Асыловадан мұғалімдердің айлығы бойынша қандай да бір қиындық туындап жатқаны туралы сұрады.
<blockquote>
 «Облыстық және қалалық білім басқармаларының ресми мәліметтеріне сәйкес, жергілікті бюджеттен және ақпан айындағы қаржыландыруды күткеннен кейін барлық мұғалімге айлықтары төленіп жатыр. Алайда біздің жобаны әзірлеушілеріміз «Калькулятор» атты чат әзірлеген еді. Сонда кейбір аймақтағы мұғалімдер ақшаның төленбей жатқанын айтып шағымдануда. Кейбір мектептегі есепшілердің дұрыс есептемеуінен үлкен шағымдар түсіп жатыр. Сол себепті аймақ басшыларының жауапты орынбасарларынан әркімнің өз аймағындағы ахуалды бақылап отыруын сұрадым. Өйткені, мың жарымға тарта өтінім келіп түскен. Өзім де оларға жауап беріп жатырмын. Алайда физикалық тұрғыда олардың бәріне жауап бере алмай жатырмыз. Мұғалімдер айлықтарының дұрыс есептеліп берілмей жатқанына шағымдануда», – деді Бибігүл Асылова Білім және ғылым министрлігінің аппараттық отырысында.
</blockquote>
Өз кезегінде Асхат Аймағамбетов бұл бағытта тиісті вебинар өткізілуі керектігін айтып өтті.
<blockquote>
 «Тиісті тапсырма беремін. Арнайы вебинар өткізіп, сол бойынша тиісті технологияны қолдана отырып, барлық экономистер мен бухгалтерлерге бүкіл ақпаратты беру керек. Өйткені бүгінгі таңда түсінбеушілік өте көп. Мысалы облыстық білім басқармалары бір, басқасы екінші ақпаратты айтады. Жергілікті мектепке келгенде мұғалімдерге айлығын қалай төлейтінімізді түсінбей жатыр. Бірақ бізде нормативті құжатта – 11.93-ші қаулыда бәрі жазылып тұр. Ол жерде күрделі ештеңе жоқ. Коэфицентті жазып қойдық – енді соны көбейтіп, санау керек. «Калькулятор» чатын онлайн-режімде қостық. Содан да қарап отыруға болады», – деді Білім министрі.
</blockquote>
Министрдің айтуынша, жалақыны мұғалімдер уақтылы алуы керек.
Еске сала кетсек, 2020 жылдың 1 қаңтарынан бастап еліміздегі мұғалімдердің жалақысы 25 пайызға көтерілген еді.

Асхат Аймағамбетов мұғалімдердің жалақысын дұрыс есептеуге қатысты тапсырма берді

<a href="https://kyzylorda-news.kz/">Kyzylorda-news.kz.</a> Ұлттық тестілеу орталығының директоры міндетін атқарушы Дидар Смағұлов әлеуметтік желіде 2020 жылы ҰБТ электронды форматта өтеді деген ақпаратты жоққа шығарды, деп хабарлайды&nbsp;<a href="https://kaz.tengrinews.kz/">Tengrinews.kz</a>.
<blockquote>
 “Қазіргі уақытта біз компьютерлік тест бастау мәселесін тексеріп жатырмыз, бірақ бұл қағаз форматынан кету деген сөз емес. Әлеуметтік желілер мен мессенджерлерде әр түрлі ақпараттар жүр. Оның бәрін жоққа шығарғым келеді және маусымда ҰБТ (соның нәтижесінде оқуға грантқа түсетін түлектер анықталады) қағаз форматында өтеді”, – деді Смағұлов.&nbsp;
</blockquote>
Ол 2021 жылы қағаз тестілеуін компьютерлік тестілеуге толық ауыстыру жоспарланғанын түсіндірді.

ҰБТ-2020 қағаз форматымен өтеді

<a href="https://kyzylorda-news.kz/">Kyzylorda-news.kz.</a> &nbsp;Елімізде 130 ЖОО бар, олардың саны қысқаруы мүмкін. Бұл туралы Орталық коммуникациялар қызметінде өткен брифингте ҚР ЖОО Ассоциациялар президенті Рахман Алшанов айтты, деп хабарлайды <a href="https://www.inform.kz/kz/kazakstanda-130-universitettin-20-sy-zhabyluy-mumkin_a3613024">ҚазАқпарат</a>.
<blockquote>
 «Мысалы, машина жасау мамандығына 1000 грант береді, ал керегі – 200 болуы мүмкін. Бұл жерде бәрі қандай мамандық қажет екеніне байланысты. Әр саланың ерекшелігін, сұранысқа ие екенін ескере келе, 130 ЖОО-ның 15-20-сы қысқаруы немесе жабылуы мүмкін», – дейді Рахман Алшанов.
</blockquote>
Сондай-ақ, ҚР ЖОО Ректорлар кеңесі төрағасы Ерлан Сыдықов студенттер саны қысқармайтынын айтты.
<blockquote>
 «Студенттердің саны қысқармайды. Жоғары білім алғысы келетін, соған ынталы азаматтардың көп болуы еліміздің болашағы үшін маңызды. Ежелден қазақ қоғамында баласын оқытуға, оның білімін шыңдауға ынта жоғары болған. Бұл ынтаны біз пайдалануымыз керек, сондықтан бұл жерде студенттерді қысқарту мәселесі жоқ. Біз тек талапқа сай емес жоғары оқу орындарын қысқарту бойынша ұсыныстар беруіміз шарт», – дейді ол.
</blockquote>

Қазақстанда 130 университеттің 20-сы жабылуы мүмкін

<a href="https://kyzylorda-news.kz/">Kyzylorda-news.kz.</a> Еріктілер жылы аясында Қызылорда қаласындағы Назарбаев Зияткерлік мектебінде оқушылар арасында «Көмек еріктілері» клубы құрылды.
Еріктілер қозғалысы 7-12-сынып білім алушыларынан құралған. Олар негізгі бес бағыт бойынша жұмыс атқармақ. Мәселен, «педагогтар» пән мұғалімдерімен бірлесіп, үлгірімі төмен оқушыларға көмек көрсетсе, «медицина қызметкерлері» оқушылар арасында түрлі профилактикалық шараларды жүргізуге жәрдемдеседі. Эколог-волонтерлар тобы мектептің «Қысқы бағында» бөлме гүлдерді отырғызу жұмыстарын жүргізсе, «кітапханашылар ұйымы» мектептің кітаптар қорын реттеу, санын ұлғайту және кітапхана пайдалану ережелері туралы ақпараттандыру шараларын ұйымдастырмақ. Сонымен қатар, «асханашылар» тобы оқушылардың тамақтану режимін дұрыс орындалуын қамтамасыз етуде қажетті көмек көрсетеді.
Қазіргі уақытта еріктілер клубына 100-ге жуық оқушы мүше болуға ұсыныс білдірді. Алдағы уақытта жоспарланған шараларды жүзеге асыру арқылы өзге оқушыларды волонтерлыққа тартуға және азаматтық қоғамның белсенділігін арттыруға ықпал ету көзделуде. «Көмек еріктілері» клубының мақсаты – оқушыларды әлеуметтік жауапкершілік тұрғысынан тәрбиелеуге, отансүйгiштiкке баулу, мамандық тандаудағы кәсіби бағыт бағдар беруге бағытталған.
Айта кету керек, бүгінде елімізде 200-ден астам еріктілер ұйымы белсенді жұмыс жасайды, олардың 50 мыңнан аса белсенді еріктілері бар.
<a href="https://www.inform.kz/kz/kyzylordada-komek-eriktileri-kluby-kuryldy_a3611999">ҚазАқпарт</a>

Қызылордада «Көмек еріктілері» клубы құрылды

<a href="https://kyzylorda-news.kz/">Kyzylorda-news.kz.</a> Мәжіліс депутаты Майра Айсина оқушыларға сабақ кезінде смартфон мен планшетті пайдалануға тыйым салуды ұсынды, деп хабарлайды&nbsp;<a href="https://sputniknews.kz/society/20200205/12745995/deputat-mektep-usynys.html">Sputnik Қазақстан</a>.
Депутаттың айтуынша, смартфондар мен планшеттерге тәуелділік, онлайн ойындарға әуестік балалардың ойлау қабілетіне зиян келтіріп, бас сүйегі-ми жарақатынан кейінгі жағдайға ұқсас өзгеріске әкеп соғады.
Айсина әлем елдерінің тәжірибесін тілге тиек етті. Мәселен, Германия, Франция және басқа да көптеген елде, соның ішінде посткеңестік кеңістіктегі елдердің оқу мекемелерінде гаджет пайдалануға тыйым салынған.
<blockquote>
 «Бұл мәселе біздің мүдделі министрліктер мен ведомстволардан қазіргі жағдайға жан-жақты талдау жүргізуді, «Балалардың денсаулығына және дамуына зардабын тигізетін ақпараттан қорғау туралы» заңның тиімді жүзеге асырылуын талап етеді», – деп санайды ол.
</blockquote>
Мәжілісмен үкімет интернетте балалардың қауіпсіздігін барынша қамтамасыз ету үшін және ақпаратты сүзгіден өткізу үшін қосымша жүйелі шаралар қабылдауы қажет екенін айтты.
<blockquote>
 «Жұмыс және демалыс күндері 16 жасқа дейінгі балалар үшін онлайн ойын ойнау уақытын шектеу мүмкіндігін зерделеу керек. Жұмыс күндері интернет-кафелерде балаларға видео ойындар ойнауға, мектептерде сабақ кезінде смартфон мен планшеттерді пайдалануға тыйым салу керек», – деді депутат.
</blockquote>

Депутат мектепте неден бас тарту қажет екенін айтты

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің мұғалімі Мұхтар Бегайдаров мектеп оқушылары мен мұғалімдерге арнап жасаған математикалық сайты Қазнетте танымалдылығы артуда. Бір айдың ішінде жүйеге 23 000 белсенді қолданушы тіркеліп, олар контент мазмұны мен қолжетімділігіне жоғары баға беруде.
Сайт құру идеясы 2 жыл бұрын пайда болған екен. Қазақ тіліндегі материалдардың жетіспеушілігін байқаған Мұхтар Бегайдаров математика бойынша оқулықтардың электронды нұсқаларын бір веб-параққа жинақтауды қолға алды. Алдымен 600-ден астам кітап, видео-оқулықтар, ғылыми мақалалар және тақырыптық теориялық материалдар жүктеді. Кейін әріптестерінің кеңесі бойынша онлайн-платформаны түрлі ресурстармен және құралдармен толықтырды. Сайтта әдістемелік нұсқаулықтан басқа, қорытынды емтиханға дайындалуға арналған әртүрлі тест тапсырмалары бар. Сонымен қатар, пән бойынша білімді тексеруге арналған олимпиадалық бөлім ашылған.
<blockquote>
 «Мен сайтты 2018 жылы бастап оны. «NISmath» деп атадым. Өткен жылғы түлек Арман Әлішер сайт логотипін жасауға көмектесті. Тағы бір оқушы Нұрбол Бижігіт оның мобильді нұсқасын әзірледі», – деді Мұхтар Бегайдаров.
</blockquote>
Оқырмандар мен сайт пайдаланушылар географиясы күн сайын артып келеді. Алғашқы жылдары платформаны 1000-ға жуық адам қолданса, биыл бір ғана айдың ішінде жүйе 23000 белсенді қолданушыны тіркеді.
<blockquote>
 «Сайт өте қолжетімді және заманауи білім беру бағдарламасына бейімделген. Барлық ресурстар тегін, бұл пайдаланушылар үшін өте маңызды. Мен өз тәжірибемде оқулықтарды, тапсырмаларды жиі қолданамын. Сабақтарда сайттың қосалқы қосымшаларын пайдаланамын», – деді Түркістан облысындағы ауыл мектебінің мұғалімі Жазира Балаби.
</blockquote>
Бүгінде «NISmath» көмегіне еліміздің педагогтары мен оқушылары жүгінеді.
Мұхтардың бұл авторлық жобасын пайдаланушылар ғана емес, сонымен қатар мұғалімдер арасында өткізілетін дәстүрлі республикалық білім сайысының сарапшылары да жоғары бағалады. Педагогикалық идеялар фестивалінің «Шеберлік палитрасы» бөлімінде <a href="https://nismath.org/">«nismath.org»</a> интернет-платформасы әріптестердің үлкен қызығушылығын тудырды, ал жобаны қорғаған кезде қатысушылардың 100 пайызы платформаның белсенді қолданушылары болып шықты. Байқау нәтижесінде Мұхтар Бегайдаровтың математикалық сайты таратуға және тәжірибеде қолдануға лайықты үздік идея деп танылды.
Айта кету керек, 2019 жылғы қорытынды аттестаттаудың нәтижелері бойынша Мұхтар Бегайдаров шәкірттері математика пәні бойынша жоғары балл жинап, жиырма Зияткерлік мектеп арасында бірінші орыннан көрінді.
Білім беру жүйесін дамытуға қосқан үлесі мен педагогикалық қызметтегі шығармашылық жетістіктері үшін Мұхтар Білім және ғылым министрінің Алғыс хатымен марапатталды.
Мұхтар Бегайдаров – бос уақытында өз бастамасы бойынша мектеп оқушылары мен мұғалімдерге жаңа білімді меңгеруге және математиканы бағындыруға көмектесетін Сыр өңіріндегі ең танымал еріктілердің бірі.
<img src="https://kyzylorda-news.kz/wp-content/uploads/2020/02/5matemsite2.jpg" alt="" />
<img src="https://kyzylorda-news.kz/wp-content/uploads/2020/02/5matemsite3.jpg" alt="" />

Қызылордадағы Назарбаев Зияткерлік мектебінің мұғалімі қазақ тілді математика сайтын жасап шығарды

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебі аймақтағы 9 жетекші мектеппен ынтымақтастық жөніндегі меморандумға отырды. Ресми түрде құрылған мектептер қоғамдастығы алдағы уақытта өзара тәжірибе алмасып, білім беру үдерісіне иновацияларды енгізу және дамыту бағытында бірлескен жұмыстар атқаратын болады.
Өңірімізде алғаш рет құрылған мектептер қоғамдастығы құрамына облыстық дарынды балаларға арналған білім беру ұйымдары, жетекші мектептері және «Ауылдық мектептер» жобасының пилоттық мектептері енді. Бүгін осы білім ордаларының басшылары мен олардың орынбасарлары NIS жұмысымен танысып, тәжірибе алмасты.
Алдымен мектептің ішіне экскурсия жасап, оқу үдерісінің ерекшеліктерін бақылауға мүмкіндік алған конақтар нанотехнология кабинетінде өрт сөндіру, криминалистика, медицина салаларына қатысты оқушылардың жасаған қызықты тәжірибелерін көрді. Сондай-ақ ДНҚ, микробиологиялық синтездер және генетикалық инженерия бағытында зерттеулерді жүргізуге арналған биотехнология кабинетінің жұмысымен танысты.
Содан соң қонақтар Назарбаев Зияткерлік мектебінің жетістіктері, кәсіби бағдар беру жұмысын ұйымдастыру жүйесі, оқушыларға қолайлы моральды-психологиялық жағдай жасау қызметі, тәрбие беру моделі, сыртқы жиынтық бағалау үдерісі, білім алушылардың жобалау іс-әрекетін ұйымдастыру, CIS Халықаралық аккредиттеуі мен «Action Research» және «Lesson Study» зерттеушілік жұмыстары бойынша жан-жақты ақпарат алды.
Дөңгелек үстел басында білім саласының мамандары мектеп қоғамдастығының негізгі жұмыс бағыттарына талқылау жүргізіп, өзара ынтымақтастық туралы меморандумға отырды. Бұл меморандум жетекші мектептер арасындағы байланысты нығайтып, оқытудың инновациялық әдістерін енгізу және оларды дамыту мақсатын көздейді.
<blockquote>
 «Осы мектептермен алдағы уақытта тәжірибе алмасу бойынша көптеген жұмыстар жүргізу жоспарланған. Бір-біріміздің үздік тәжірибемізді тарататын боламыз. Оқу-тәрбиелік, ғылыми-шығармашылық, мәдени-спорттық бағыттағы бірлескен жобаларды жүзеге асыру арқылы мектептердің дамуына ықпал етуге болады», – деді Қызылорда қаласындағы Назарбаев Зияткерлік мектебінің директоры Бахыт Жұматай.
</blockquote>
<img src="https://kyzylorda-news.kz/wp-content/uploads/2020/02/4nis2.jpg" alt="" />

Қызылордадағы Назарбаев Зияткерлік мектебі өңір мектептерімен қоғамдастық құрды

<a href="https://kyzylorda-news.kz/">Kyzylorda-news.kz.</a> 2019 жылы педагогикалық мамандықтарға түсу балы 50-ден 60-қа көтерілсе, биыл 70-ке жоғарылату жоспарланып отыр.
Педагогикалық ЖОО студенттерімен кездесуде Білім және ғылым министрі Асхат Аймағамбетов педагогикалық мамандықтарға талапкерлерді тарту үшін нақты шараларды қабылдау қажеттігіне тоқталды.
<blockquote>
 “Бүгінде ең үздік мектеп түлектерінің арасында мұғалім мамандығы айтарлықтай сұранысқа ие болмай отыр. Білім беру гранттарын тағайындау конкурсына қатысуға өтініш бергенде талапкерлер&nbsp;педагогика бағытын үшінші не төртінші кезекте таңдайды. Бұл педагогикалық мамандықтарға мектепті үздік не жақсы бітірмеген түлектер көбірек түсетінін көрсетеді”, – деді Асхат Аймағамбетов.
</blockquote>
Министр 2021 жылдан бастап жоғары оқу орындарының мемлекеттік емес, жеке өзіндік үлгідегі диплом беруі туралы норма күшіне енетінін айтты. Бұл норманың әскери және арнайы оқу орындарына қатысы жоқ. Мұндай өзгеріс жоғары оқу орындары арасындағы бәсекелестікті арттырып, ұсынылатын білім беру қызметтерінің сапасына қатысты жауапкершіліктің өсуін қамтамасыз етпек.
Асхат Аймағамбетов мектеп түлектері мен олардың ата-аналарын жоғары оқу орнын таңдауда мұқият болуға шақырды. Ендігі кезекте жұмысқа орналастыру кезінде жоғары оқу орнының беделі мен имиджіне мән беріледі.
Еске сала кетейік, білім және ғылым вице-министрі Бибігүл Асылова енді кез келген мұғалім өз жалақысын өзі есептей алатының <a href="https://kyzylorda-news.kz/bilim/qazaqstandyq-mughalimder-endi-zhalaqysyn-oezderi-eseptej-alady-43000/">мәлімдеді</a>.

Қазақстан және Қызылорда облысының жаңалықтары: Білім