<a href="https://kyzylorda-news.kz/">Kyzylorda-news.kz.</a> Мәжіліс депутаты Майра Айсина оқушыларға сабақ кезінде смартфон мен планшетті пайдалануға тыйым салуды ұсынды, деп хабарлайды&nbsp;<a href="https://sputniknews.kz/society/20200205/12745995/deputat-mektep-usynys.html">Sputnik Қазақстан</a>.
Депутаттың айтуынша, смартфондар мен планшеттерге тәуелділік, онлайн ойындарға әуестік балалардың ойлау қабілетіне зиян келтіріп, бас сүйегі-ми жарақатынан кейінгі жағдайға ұқсас өзгеріске әкеп соғады.
Айсина әлем елдерінің тәжірибесін тілге тиек етті. Мәселен, Германия, Франция және басқа да көптеген елде, соның ішінде посткеңестік кеңістіктегі елдердің оқу мекемелерінде гаджет пайдалануға тыйым салынған.
<blockquote>
 «Бұл мәселе біздің мүдделі министрліктер мен ведомстволардан қазіргі жағдайға жан-жақты талдау жүргізуді, «Балалардың денсаулығына және дамуына зардабын тигізетін ақпараттан қорғау туралы» заңның тиімді жүзеге асырылуын талап етеді», – деп санайды ол.
</blockquote>
Мәжілісмен үкімет интернетте балалардың қауіпсіздігін барынша қамтамасыз ету үшін және ақпаратты сүзгіден өткізу үшін қосымша жүйелі шаралар қабылдауы қажет екенін айтты.
<blockquote>
 «Жұмыс және демалыс күндері 16 жасқа дейінгі балалар үшін онлайн ойын ойнау уақытын шектеу мүмкіндігін зерделеу керек. Жұмыс күндері интернет-кафелерде балаларға видео ойындар ойнауға, мектептерде сабақ кезінде смартфон мен планшеттерді пайдалануға тыйым салу керек», – деді депутат.
</blockquote>

Депутат мектепте неден бас тарту қажет екенін айтты

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің мұғалімі Мұхтар Бегайдаров мектеп оқушылары мен мұғалімдерге арнап жасаған математикалық сайты Қазнетте танымалдылығы артуда. Бір айдың ішінде жүйеге 23 000 белсенді қолданушы тіркеліп, олар контент мазмұны мен қолжетімділігіне жоғары баға беруде.
Сайт құру идеясы 2 жыл бұрын пайда болған екен. Қазақ тіліндегі материалдардың жетіспеушілігін байқаған Мұхтар Бегайдаров математика бойынша оқулықтардың электронды нұсқаларын бір веб-параққа жинақтауды қолға алды. Алдымен 600-ден астам кітап, видео-оқулықтар, ғылыми мақалалар және тақырыптық теориялық материалдар жүктеді. Кейін әріптестерінің кеңесі бойынша онлайн-платформаны түрлі ресурстармен және құралдармен толықтырды. Сайтта әдістемелік нұсқаулықтан басқа, қорытынды емтиханға дайындалуға арналған әртүрлі тест тапсырмалары бар. Сонымен қатар, пән бойынша білімді тексеруге арналған олимпиадалық бөлім ашылған.
<blockquote>
 «Мен сайтты 2018 жылы бастап оны. «NISmath» деп атадым. Өткен жылғы түлек Арман Әлішер сайт логотипін жасауға көмектесті. Тағы бір оқушы Нұрбол Бижігіт оның мобильді нұсқасын әзірледі», – деді Мұхтар Бегайдаров.
</blockquote>
Оқырмандар мен сайт пайдаланушылар географиясы күн сайын артып келеді. Алғашқы жылдары платформаны 1000-ға жуық адам қолданса, биыл бір ғана айдың ішінде жүйе 23000 белсенді қолданушыны тіркеді.
<blockquote>
 «Сайт өте қолжетімді және заманауи білім беру бағдарламасына бейімделген. Барлық ресурстар тегін, бұл пайдаланушылар үшін өте маңызды. Мен өз тәжірибемде оқулықтарды, тапсырмаларды жиі қолданамын. Сабақтарда сайттың қосалқы қосымшаларын пайдаланамын», – деді Түркістан облысындағы ауыл мектебінің мұғалімі Жазира Балаби.
</blockquote>
Бүгінде «NISmath» көмегіне еліміздің педагогтары мен оқушылары жүгінеді.
Мұхтардың бұл авторлық жобасын пайдаланушылар ғана емес, сонымен қатар мұғалімдер арасында өткізілетін дәстүрлі республикалық білім сайысының сарапшылары да жоғары бағалады. Педагогикалық идеялар фестивалінің «Шеберлік палитрасы» бөлімінде <a href="https://nismath.org/">«nismath.org»</a> интернет-платформасы әріптестердің үлкен қызығушылығын тудырды, ал жобаны қорғаған кезде қатысушылардың 100 пайызы платформаның белсенді қолданушылары болып шықты. Байқау нәтижесінде Мұхтар Бегайдаровтың математикалық сайты таратуға және тәжірибеде қолдануға лайықты үздік идея деп танылды.
Айта кету керек, 2019 жылғы қорытынды аттестаттаудың нәтижелері бойынша Мұхтар Бегайдаров шәкірттері математика пәні бойынша жоғары балл жинап, жиырма Зияткерлік мектеп арасында бірінші орыннан көрінді.
Білім беру жүйесін дамытуға қосқан үлесі мен педагогикалық қызметтегі шығармашылық жетістіктері үшін Мұхтар Білім және ғылым министрінің Алғыс хатымен марапатталды.
Мұхтар Бегайдаров – бос уақытында өз бастамасы бойынша мектеп оқушылары мен мұғалімдерге жаңа білімді меңгеруге және математиканы бағындыруға көмектесетін Сыр өңіріндегі ең танымал еріктілердің бірі.
<img src="https://kyzylorda-news.kz/wp-content/uploads/2020/02/5matemsite2.jpg" alt="" />
<img src="https://kyzylorda-news.kz/wp-content/uploads/2020/02/5matemsite3.jpg" alt="" />

Қызылордадағы Назарбаев Зияткерлік мектебінің мұғалімі қазақ тілді математика сайтын жасап шығарды

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебі аймақтағы 9 жетекші мектеппен ынтымақтастық жөніндегі меморандумға отырды. Ресми түрде құрылған мектептер қоғамдастығы алдағы уақытта өзара тәжірибе алмасып, білім беру үдерісіне иновацияларды енгізу және дамыту бағытында бірлескен жұмыстар атқаратын болады.
Өңірімізде алғаш рет құрылған мектептер қоғамдастығы құрамына облыстық дарынды балаларға арналған білім беру ұйымдары, жетекші мектептері және «Ауылдық мектептер» жобасының пилоттық мектептері енді. Бүгін осы білім ордаларының басшылары мен олардың орынбасарлары NIS жұмысымен танысып, тәжірибе алмасты.
Алдымен мектептің ішіне экскурсия жасап, оқу үдерісінің ерекшеліктерін бақылауға мүмкіндік алған конақтар нанотехнология кабинетінде өрт сөндіру, криминалистика, медицина салаларына қатысты оқушылардың жасаған қызықты тәжірибелерін көрді. Сондай-ақ ДНҚ, микробиологиялық синтездер және генетикалық инженерия бағытында зерттеулерді жүргізуге арналған биотехнология кабинетінің жұмысымен танысты.
Содан соң қонақтар Назарбаев Зияткерлік мектебінің жетістіктері, кәсіби бағдар беру жұмысын ұйымдастыру жүйесі, оқушыларға қолайлы моральды-психологиялық жағдай жасау қызметі, тәрбие беру моделі, сыртқы жиынтық бағалау үдерісі, білім алушылардың жобалау іс-әрекетін ұйымдастыру, CIS Халықаралық аккредиттеуі мен «Action Research» және «Lesson Study» зерттеушілік жұмыстары бойынша жан-жақты ақпарат алды.
Дөңгелек үстел басында білім саласының мамандары мектеп қоғамдастығының негізгі жұмыс бағыттарына талқылау жүргізіп, өзара ынтымақтастық туралы меморандумға отырды. Бұл меморандум жетекші мектептер арасындағы байланысты нығайтып, оқытудың инновациялық әдістерін енгізу және оларды дамыту мақсатын көздейді.
<blockquote>
 «Осы мектептермен алдағы уақытта тәжірибе алмасу бойынша көптеген жұмыстар жүргізу жоспарланған. Бір-біріміздің үздік тәжірибемізді тарататын боламыз. Оқу-тәрбиелік, ғылыми-шығармашылық, мәдени-спорттық бағыттағы бірлескен жобаларды жүзеге асыру арқылы мектептердің дамуына ықпал етуге болады», – деді Қызылорда қаласындағы Назарбаев Зияткерлік мектебінің директоры Бахыт Жұматай.
</blockquote>
<img src="https://kyzylorda-news.kz/wp-content/uploads/2020/02/4nis2.jpg" alt="" />

Қызылордадағы Назарбаев Зияткерлік мектебі өңір мектептерімен қоғамдастық құрды

<a href="https://kyzylorda-news.kz/">Kyzylorda-news.kz.</a> 2019 жылы педагогикалық мамандықтарға түсу балы 50-ден 60-қа көтерілсе, биыл 70-ке жоғарылату жоспарланып отыр.
Педагогикалық ЖОО студенттерімен кездесуде Білім және ғылым министрі Асхат Аймағамбетов педагогикалық мамандықтарға талапкерлерді тарту үшін нақты шараларды қабылдау қажеттігіне тоқталды.
<blockquote>
 “Бүгінде ең үздік мектеп түлектерінің арасында мұғалім мамандығы айтарлықтай сұранысқа ие болмай отыр. Білім беру гранттарын тағайындау конкурсына қатысуға өтініш бергенде талапкерлер&nbsp;педагогика бағытын үшінші не төртінші кезекте таңдайды. Бұл педагогикалық мамандықтарға мектепті үздік не жақсы бітірмеген түлектер көбірек түсетінін көрсетеді”, – деді Асхат Аймағамбетов.
</blockquote>
Министр 2021 жылдан бастап жоғары оқу орындарының мемлекеттік емес, жеке өзіндік үлгідегі диплом беруі туралы норма күшіне енетінін айтты. Бұл норманың әскери және арнайы оқу орындарына қатысы жоқ. Мұндай өзгеріс жоғары оқу орындары арасындағы бәсекелестікті арттырып, ұсынылатын білім беру қызметтерінің сапасына қатысты жауапкершіліктің өсуін қамтамасыз етпек.
Асхат Аймағамбетов мектеп түлектері мен олардың ата-аналарын жоғары оқу орнын таңдауда мұқият болуға шақырды. Ендігі кезекте жұмысқа орналастыру кезінде жоғары оқу орнының беделі мен имиджіне мән беріледі.
Еске сала кетейік, білім және ғылым вице-министрі Бибігүл Асылова енді кез келген мұғалім өз жалақысын өзі есептей алатының <a href="https://kyzylorda-news.kz/bilim/qazaqstandyq-mughalimder-endi-zhalaqysyn-oezderi-eseptej-alady-43000/">мәлімдеді</a>.

Педагогикалық мамандықтарға түсу үшін енді ҰБТ-да 70 балл жинау қажет

Kyzylorda-news.kz. Әдетте көп балалар балабақшаға барғысы келмей, жылап, біраз жүйкені жұқартады. Балаға ұрыспас бұрын ең алдымен оның себебін анықтап алу керек.
Баланың дайын болмауы
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Ата-аналар көбіне баласын 2-2,5 жасында балабақшаға береді. Жай ғана күртесі мен аяқкиімін кие алмауы ол үшін үлкен проблема. Мұндай жағдайда баланы балабақшадан алып, үйде үйрету қажет.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Бейімделу
&nbsp;Бала жаңа күн тәртібіне, жаңа талаптарға үйренуі керек. Топтағы күн тәртібін алдын ала біліп, үйде үйрете бастау қажет. Алғашқыда 2-3 сағат баламен бірге топта болу кеоек. Кейін біртіндеп ұзаққа қалдыра бересіз. Баланың жақсы көретін ойыншығын өзімен бірге алып бару керек.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Басқа балалармен араласқандағы қиындықтар
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Егер бала ұяң, тұйық, ерке болса басқа балалар онымен ойнаудан бас тартуы мүмкін. Баланы қатарластарымен ертерек араластырып үйрету керек. Мысал үшін ауладағы ойын алаңында.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Тәрбиешінің қарым-қатынасы
&nbsp;Балаңыз тәрбиешіден қорқуы мүмкін. Егер тәрбиеші балаларға жиі дауыс көтеретін, ашушаң адам болса тәрбиешінің өзімен сөйлесу керек.
A<a href="http://anabol.kz/otbasy/ana-men-bala/2680-bala-nege-balabakshaga-bargysy-kelmeydi">NABOL</a>

Бала неге балабақшаға барғысы келмейді?

<a href="https://kyzylorda-news.kz/">Kyzylorda-news.kz.</a> Жергілікті атқарушы органдар апатты мектептерге қатысты мәліметті дұрыс бермейді. Бұл туралы ҚР Білім және ғылым министрлігінің кеңейтілген алқа отырысында ведомство басшысы Асхат Аймағамбетов айтты, деп хабарлайды <a href="http://lenta.inform.kz/kz/zhergilikti-organdar-apatty-mektepter-turaly-malimetti-bizden-zhasyrady-aymagambetov_a3609879">ҚазАқпарат</a>.
<blockquote>
 «Білім сапасына әсер ететін маңызды факторлардың бірі – педагог кадрлармен қамтамасыз ету. Білім беру ұйымдарында 5 267 пән мұғалімі жетіспейді. Осы мәселені біз биыл қайта бір қарап, шешуіміз қажет. Ол үшін тиісті қаражат та, мүмкіндік те жеткілікті», – деді министр.
</blockquote>
Сонымен қатар ол үш ауысымды және апатты мектептерге қатысты мәселеге тоқталып өтті.
<blockquote>
 «Бұл мәселе бойынша өткен жылы министрлік мониторинг жүргізді. 204 мектепті ғана таңдап алдық. Сол 204 мектепке барып, тиісті зерттеу жүргіздік. Олардың ішінде 2 ауысым нормативінен асып кеткен қосымша 83 мектеп және апатты жағдайдағы 37 мектепті анықтадық. Бұл тек 204 мектепті қарап шыққанның өзінде ғана. Сондағы ең басты мәселе – бүгінгі күні жергілікті атқарушы органдар, білім басқармалары, білім бөлімдері статистиканы, мәліметті дұрыс беріп отырған жоқ. Ол статистиканы жасырғаннан кейін бұл мәселені шешпейміз. Әрине, бұл мәселені шешуіміз керек. Қазіргі уақытта мемлекеттік бағдарламада 800 мектеп салуға қаржы бөлінді», – деді Асхат Аймағамбетов.
</blockquote>

Жергілікті органдар апатты мектептер туралы мәліметті жасырады

<a href="https://kyzylorda-news.kz/">Kyzylorda-news.kz.</a> Білім және ғылым министрлігі педагогтердің айлығын есептейтін калькулятор жасап шығарды. Енді кез келген мұғалім өз жалақысын өзі есептей алады. Бұл туралы бүгін білім және ғылым вице-министрі Бибігүл Асылова мәлімдеді, деп хабарлайды&nbsp;<a href="https://sputniknews.kz/society/20200131/12712418/Kazakhstan-mugalim-zhalaky.html">Sputnik Қазақстан</a>.
<blockquote>
 “Асхат Қанатұлы министр болып келген кезде бізге ұстаздардың еңбекақысын есептейтін калькулятор жасауды тапсырды. Енді кез келген педагог онлайн режимде өзінің айлығын есептей алады. Бұл дегеніміз, мұғалімдер бухгалтерлер мен қаржыгерлерге тәуелді болмайды”, – деді Асылова министрліктің кеңейтілген алқа отырысында.
</blockquote>
Ұстаз калькуляторға өз категориясын, жұмыс өтілін, сағат санын жазып, жалақысын есептей алады. Сондай-ақ, экологиялық апатты аймақта тұрғаны үшін, магистрант, тәлімгерлік қызметтер үшін қандай үстемақы болатынын көріп, біле алады.
Асылованың айтуынша, қаңтар айының өзінде еңбекақыны есептейтін бөлімге елуден астам өтініш келіп түскен. Педагоготер әртүрлі себептерге байланысты айлығының дұрыс есептелмегенін айтып шағымданған.
<blockquote>
 “Енді кез келген мұғалім база арқылы өз жалақысын есептеп, есеп бөлімінен себебін сұрай алады. Ол базаға ұстаздардың еңбекақысын арттыру жөніндегі шаралардың барлығы енді. Егер есепші шатасып кетсе, ол сол қағазды шығарып алып, түсіндіруді талап етуге құқылы”, – деді вице-министр.
</blockquote>

Қазақстандық мұғалімдер енді жалақысын өздері есептей алады

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің 11-сынып оқушысы Әлішер Алтынбасов жазғы демалыста Ресей Федерациясының Тюмень қаласында өтетін «IESO 2020» халықаралық олимпиадасында ел намысын қорғайтын болады.
Нұр-Сұлтан қаласында ұйымдастырылған&nbsp; республикалық іріктеу кезеңінде Әлішер Алтынбасов ең жоғары нәтиже көрсетіп, олимпиаданың І орын иегері атанды.
Еліміздің астанасында өткен білім сайысында қызылордалық Назарбаев Зияткерлік мектебінің оқушылары жүлделі орындарды иеленді. Әлішермен бірге Гүлдана Сабитова мен&nbsp; Нұрдаулет Қонысбаев&nbsp; жер туралы ғылым бойынша үздік деп танылып, ІІ және ІІІ орынмен марапатталды.
<blockquote>
 «Мен бұл олимпиадаға бірінші рет қатысып отырмын. Барлық тапсырмалар ағылшын тілінде болды. Олимпиадада біз жер қыртысы мен құрылымын зерттейтін Назарбаев Университетінің профессорымен кездесуге мүмкіндік алдық. Ол бізге геолог мамандығының ерекшеліктері туралы айтып, кәсіби бағдар берді. Болашақта мен өмірімді геологиямен байланыстырғым келеді», – деді олимпиада жеңімпазы Әлішер Алтынбасов.
</blockquote>
Байқауға елімізден барлығы 100-ге жуық мектеп оқушы қатысты. Оқушылар геология, геофизика, метеорология, мұхиттану және астрономия пәндерінен күрделі тапсырмалар орындап, білімдерін шыңдады. Білім бәйгесінде оза шауып келген дарындылардан Қазақстан құрамасы жасақталып, олар алдағы уақытта халықаралық аренада ел намысын қорғайтын болады.
IESO – әлемдегі ең беделді олимпиаданың бірі. 2007 жылдан бастап Корея, Италия, Испания, Бразилия, Жапония және Франция сияқты елдерінде өткізілген білім сайысы биыл Ресейдің Тюмень қаласында әлемдегі ең үздік жас геологты анықтайтын болады.
<img src="https://kyzylorda-news.kz/wp-content/uploads/2020/01/31nis2.jpg" alt="" />

Қызылордалық зияткер – әлемнің үздік геологы атағына үміткер

<a href="https://kyzylorda-news.kz/">Kyzylorda-news.kz.</a> Қызылорда облысында инклюзивті балаларға жағдай жасау бағытында келелі жұмыстар бар. 2020-2022 жылдарға арналған Жол картасын бекіту туралы шешім қабылданды. Осы жылдың өзінде мектептерге 48 штат бірлікте арнайы педагогтар бөлінді, арнайы педагогтар ерекше балаларға оқу бағдарламасын үйренуге көмектеседі.
Облыстық білім басқармасының дерегінше Қызылордада 40 мектепте инклюзивтік кабинет ашылады. Ал Байқоңыр және Қызылорда қаласында аутист балаларға арналған арнайы инклюзивті қолдау кабинеттері жұмыс істейді. Барлығы 3 жыл ішінде әр түрлі бұзылулары бар балаларға арналған 126 инклюзивті кабинеттер ашылмақ.
Инклюзивті кабинеттер осы кезге дейін Қызылорда қаласынан ашылған. Ал, 2018 жылы аутист балаларға арналып ашылған инклюзивті қолдау кабинеттері бірнеше айдан кейін оң нәтиже берді. Бүгінгі таңда 28 балабақшада арнайы және инклюзивті топтар бар.

Қызылордада облысындағы 40 мектепте инклюзивтік кабинет ашылады

<a href="https://kyzylorda-news.kz/">Kyzylorda-news.kz.</a> Қарағанды және Қызылорда облыстарында пилоттық режимде «Ауыл мектебі» жаңа білім беру жобасы бастау алды, оның&nbsp;аясында педагогикалық практиканы жетілдіру, материалдық-техникалық базаны жақсарту және цифрлық ресурстардың қолжетімділігін арттыру арқылы республиканың ауыл мектептеріндегі білім сапасын арттыру жоспарлануда.
<blockquote>
 «Жаңа жобаның басты міндеті – қалалық және ауылдық мектептер арасындағы білім сапасындағы айырмашылықты азайту. Қазір жұмыстар Қарағанды облысы Қарқаралы ауданының төрт мектебінде және Қызылорда облысының Жаңақорған және Сырдария аудандарының үш мектебінде басталды. Жоба аясында оқу процесі мен материалдық-техникалық базаны егжей-тегжейлі зерделеу, білім беру ортасының мониторингі, мұғалімдердің кәсіби сұраныстары, ата-аналар мен қоғамның мектеп өміріне қатысуы, сонымен қатар оқу-тәрбие процесінің басқа да мәселелерін зерттеу жоспарланған», – дейді «Назарбаев Зияткерлік мектептері» дербес білім беру ұйымының тәжірибені тарату департаментінің директоры Гүлнар Балғабаева.
</blockquote>
Жобалық топтардың құрамына облыстық білім басқармаларының қызметкерлері және «Назарбаев Зияткерлік мектептері» дербес білім беру ұйымының өкілдері кірді: тәжірибе тарату мен зерттеулер департаменті бөлімдері, төрт орталық – білім беру бағдарламалары, педагогикалық шеберлік, педагогикалық өлшемдер, ақпараттық технологиялар және сервис. Әр жоба нәтижелері бойынша жоба топтары аналитикалық есептер мен ұсыныстар дайындайды, әкімдіктер соның негізінде кешенді бағдарламалар әзірлейді.
Ауыл мектептерін кең көлемде қолдау мақсатында құрылған жаңа білім беру жобасы вице-премьер Бердібек Сапарбаевқа Назарбаев Зияткерлік мектептерінің басшылығымен болған кездесуде ұсынылды. «Ауыл мектебі» аясында республиканың барлық ауылдық мектептері материалдық-техникалық базаның жақсаруы және мұғалімдердің шығармашылық әлеуетінің артуының нәтижесінде қайта жанданады деп күтілуде.
<img src="https://kyzylorda-news.kz/wp-content/uploads/2020/01/28aulmektebi2.jpg" alt="" />
<img src="https://kyzylorda-news.kz/wp-content/uploads/2020/01/28aulmektebi3.jpg" alt="" />

Қызылордада «Ауыл мектебі» жобасы басталды

<a href="https://kyzylorda-news.kz/">Kyzylorda-news.kz.</a> Ғылыми кеңестің шешімімен Қорқыт Ата атындағы Қызылорда мемлекеттік университетінің ректоры, филология ғылымдарының кандидаты Бейбіткүл Кәрімова&nbsp;облыстық мәслихаттың хатшысы, техника ғылымдарының докторы, профессор Қылышбай Бисеновке «Құрметті ректор» атағын табыстады.
Қылышбай Алдабергенұлының білім биігіндегі еңбегі ерен. Қызылорда облыстық мәслихатына бес мәрте сайланған депутат. Ы.Жақаев атындағы Қызылорда политехникалық институтының ректоры. Қазақстан Республикасы Парламенті Мәжілісінің депутаты. Қорқыт Ата атындағы Қызылорда мемлекеттік университетінің ректорлығына дейін көтерілді. Танымды тұлға университетті басқарған жылдары білім ордасының халықаралық деңгейдегі қарым-қатынасы күшейіп, бәсекеге қабілетті мамандар даярлау ісінде нәтижелі жұмыстар атқарылды. Ғылым мен білімге ұмтылған жастарды қолдау арқылы Сыр елі жас ғалымдарының жаңа буыны қалыптасты. Университеттің материалдық-техникалық базасы нығайып, жастарға арналған жаңа әлеуметтік нысандар бой көтерді. Білім берудің нәтижесін анықтайтын әлемдік және республикалық рейтингтерде университет жоғары орындардан көрінді.
<img src="https://kyzylorda-news.kz/wp-content/uploads/2020/01/28bisenov2.jpg" alt="" />

Қылышбай Бисеновке «Құрметті ректор» атағы берілді

<a href="https://kyzylorda-news.kz/">Kyzylorda-news.kz.</a> Қызылорда қаласындағы А.Байтұрсынов атындағы №211 орта мектебінің ұйымдастыруымен «Мектебім жүрегімнің төріндесің» тақырыбында білім ордасының 30 жылдық мерейтойына арналған салтанатты жиын өтті.
Жиын барысында А.Байтұрсынов атындағы №211 орта мектебінің директоры Ә.Көшкінбаева мектептің 30 жылдық тарихына тоқтала келіп, мектеп ұстаздары мен шәкірттерінің айтулы жетістіктерімен таныстырды.
Шараға Қалалық білім бөлімінің басшысы М.Әбдіхалықова, Қызылорда облыстық білім және ғылым қызметкерлерінің кәсіподақ комитеті төрайымының орынбасары Г.Есқалиева, қалалық мәслихат депутаты М.Кәрімбаев, «Өрлеу» БАҰО» АҚ филиалы Қызылорда облысы бойынша педагогикалық қызметкерлердің біліктілігін арттыру институтының аға оқытушысы О.Маханбетов және мектеп директорлары, ардагер-ұстаздар, мектеп түлектері қатысты.
Салтанатты жиында мектепте әр жылдары қызмет жасаған басшылар мен ардагер-ұстаздар құттықтау лебіздерін білдірді.
«Өрлеу» БАҰО» АҚ филиалы Қызылорда облысы бойынша педагогикалық қызметкерлердің біліктілігін арттыру институтының аға оқытушысы, кәсіподақ комитетінің төрағасы О.Маханбетов мектеп ұжымы мен оқушыларды мектептің 30 жылдық мерейтойымен құттықтап, институт тарапынан Алғыс хатпен марапаттады.
<img src="https://kyzylorda-news.kz/wp-content/uploads/2020/01/27bilimordasy2.jpg" alt="" />
<img src="https://kyzylorda-news.kz/wp-content/uploads/2020/01/27bilimordasy3.jpg" alt="" />

Қазақстан және Қызылорда облысының жаңалықтары: Білім