<a href="https://kyzylorda-news.kz/">Kyzylorda-news.kz.</a> 2020 жылдың алғашқы Ұлттық бірыңғай тестілеуі 16-20 қаңтар аралығында өтеді. Оған қатысуға 95 мыңнан астам адам өтініш берген.
Білім және ғылым министрлігіне қарасты Ұлттық тестілеу орталығымен бірге биыл өткізілетін Ұлттық бірыңғай тестілеуге қатысты басты сауалдарға жауап берді.
ҰБТ-ны қашан тапсыруға болады?
2019 жылдан бастап ҰБТ жылына төрт рет:&nbsp;қаңтар, наурыз, маусым, тамыз айларында&nbsp;өткізіледі. Маусым айындағы тестілеуге қатысқан талапкерлер ғана білім беру грантын тағайындау конкурсына қатыса алады. Қалған айлардағы ҰБТ нәтижелерімен ақылы түрде жоғары оқу орындарына түсуге болады.
Ұлттық білім беру дерекқорының мәліметінше биыл&nbsp;131 387&nbsp;оқушы мектеп бітіреді. Қаңтардағы тестілеугеқатысуға&nbsp;95 400&nbsp;адам өтінім берген. Тестілеу 99 ҰБТ өткізу пункті базасында өткізіледі және 820 аудитория пайдаланылады.
Тестілеу құны –&nbsp;2242&nbsp;теңге. Жыл сайын тест тапсырмаларының базасы 25-30 пайыз жаңартылады.
ҰБТ-ға қатысу үшін қандай құжаттар қажет?
Орта білім беру ұйымдарының бітірушілері тестілеуге қатысу үшін ҰБТ өткізу пунктіне келесі құжаттарды тапсырады:
<ul>
<li>жеке басын куәландыратын құжат бойынша толтырылған өтініш (өткізу пунктінде беріледі);</li>
<li>3×4 см екі фотосурет;</li>
<li>жеке басын куәландыратын құжат көшірмесі (16 жасқа толмаған және жеке басын куәландыратын құжаты жоқ адамдар туу туралы куәлігінің көшірмесін тапсырады);</li>
<li>туу туралы куәлігімен тіркелетін тұлғалар үшін өзі білім алатын орта білім беру ұйымының анықтамасы (2 дана).</li>
</ul>
Құжаттар онлайн қабылдана ма?
ҰБТ-ға өтініш беру құжаттарының санын азайту және рәсімді оңтайландыру үшін орта білім беру ұйымдарының бітіруші 11 және 12-сынып оқушыларынан өзі білім алатын орта білім беру ұйымының анықтамасы (Туу туралы куәлігімен келетіндерді есепке алмағанда) мен тестілеу ақысы төленгені туралы түбіртек талап етілмейді. 2020 жылғы бітіруші сынып оқушыларының деректер базасы сайт арқылы тексерілді.
Ұлттық тестілеу орталығы ҰБТ-ға қатысатындардан бірде-бір құжатты талап етпеудің жолдарын әзірледі. Соның бірі –&nbsp;Digital ID&nbsp;қосымшасы арқылы онлайн түрде цифрлық сәйкестендіруден өту. Пилоттық жоба сәтті аяқталып, жақсы нәтиже көрсетсе, наурыз айындағы ҰБТ құжаттары онлайн қабылдануы мүмкін.
ҰБТ-ны электронды түрде тапсыруға бола ма?
Қаңтардағы ҰБТ-ны онлайн тапсыруға болады деген ақпарат тараған болатын. Алайда Ұлттық тестілеу орталығы мұның жалған екенін, бұрынғыдай кітапшалар қала беретінін мәлімдеді. Дегенмен наурызда пилоттық жоба ретінде электронды тестілеу өткізу жоспарланып отыр. Ал маусымдағы ҰБТ қағаз түрінде қала береді. Орталық инфрақұрылымды тексерістен өткізу және өзге де тестілеу мәселелері барын айтып отыр.
Наурыз айындағы электронды тестілеунақты қай қалаларда өтетіні белгісіз. Электронды сұрақтар базасы дайын. Ұлттық тестілеу орталығы пилоттық жоба белгілі бір пәндер бойынша өткізілуі мүмкін екенін де айтып отыр.
2019 жылы педагогтардың Ұлттық біліктілік тестілеуі онлайн форматқа толық ауыстырылды. Ал ҰБТ-ны электронды түрге кезең-кезеңімен&nbsp;2021 жылы&nbsp;толық көшіру жоспарланып отыр.
Электронды тестілеудің артықшылықтары қандай?
<ol>
<li>Электронды форматқа көшу қаржыны үнемдейді.</li>
<li>Электронды тестілеу нәтижелері тапсырып отырған компьютердің экранына бірден шығады.</li>
<li>Тестілеу аяқталған соң&nbsp;60 минут&nbsp;ішінде апелляцияға сұрақтар беруге болады. Осыған дейін сұрақтарды есте сақтап, тестілеудің келесі күні ғана апелляцияға беруге болатын.</li>
<li>Тестілеу кезінде сұрақтарға қайта келіп белгілеген жауаптарды өзгерту мүмкіндігі.</li>
<li>Экран бетінде үлкен шрифтпен тек бір сұрақтың көрсетілуі ыңғайлы.</li>
</ol>
ҰБТ-ны қалай бақылауға болады?
Ұлттық тестілеу орталығының басшысы Дидар Смағұлов тест тапсырушылардың әлеуметтік тобына, отбасылық қатынастарына және қаржылық жағдайына қарамастан&nbsp;тең және объективті&nbsp;жағдай жасалатынын айтты. Сондай-ақ тәуелсіз бақылаушылар ретінде Арнайы мониторингтік топ өкілдері шақырылды.
Тест жүргізіліп жатқан барлық аудиторияға ZOOM функциясы бар бейнебақылау орнатылады. Соның арқасында экрандарды үлкейтуге және әр тест тапсырушыны жеке тексеру мүмкін болмақ.
Барлық аудиториядан онлайн көрсетілім ұйымдастырылады. Онлайн трансляцияға арналған сілтеме БАҚ, әлеуметтік желілер арқылы таратылып, көпшілікке жария етіледі. Кез келген адам сілтеме арқылы өтіп, ҰБТ-ның қалай өтіп жатқанын көре алады. Көшіріп алу фактілері, басқа да ережелердің бұзылуы жөнінде&nbsp;Digital agent&nbsp;қосымшасы арқылы Ұлттық тестілеу орталығына хабарлауға болады. Орталық әрі қарай шара қолданады.
ҰБТ-да қандай заттар қолдануға тыйым салынады?
<ul>
<li>калькулятор;</li>
<li>фотоаппарат;</li>
<li>пейджер;</li>
<li>ұялы телефон;</li>
<li>планшет;</li>
<li>ноутбук;</li>
<li>плеер;</li>
<li>ақпарат беретін материалдар мен анықтамалар,</li>
<li>шпаргалка;</li>
<li>шимай дәптер алып кіруге және қолдануға болмайды.</li>
</ul>
Химияны таңдау пәні ретінде таңдаған оқушылар Менделеев пен тұздың еру кестесін алып кіре алады. Оқушы өзімен бірге су, көк не қара түсті қалам, сызғыш, қарындаш кіргізуіне рұқсат.
Бұрын тестілеуге кірер алдында қатысушылардан тыйым салынған заттар табылса оларды тек алып қоюмен шектелетін. Енді металл анықтағыштан өткен кезде шпаргалка, құлаққап, смартфон секілді кез келген тыйым салынған зат табылса тест тапсырушыға аудиторияға өтуге автоматты түрде рұқсат етілмейді. Осылайша тестілеуге жіберілмейді.
Тестілеу кезінде не істеуге болмайды?
<ul>
<li>сөйлесуге;</li>
<li>орнынан тұруға;</li>
<li>жүруге;</li>
<li>аудиториядан рұқсатсыз шығуға;</li>
<li>орын ауыстыруға;</li>
<li>кез келген материалмен алмасуға;</li>
<li>кітапшаны ауыстыруға;</li>
<li>көшіруге;</li>
<li>алдын ала берілген тест жауаптарын пайдалануға болмайды.</li>
</ul>
Тәртіп бұзғандар аудиториядан шығарылып, олардың жауап парақтары қабылданбайды.
Жауап парағын бояу кезінде:
<ul>
<li>түзетуге арналған сұйықтықты пайдалануға;</li>
<li>көк немесе қара түсті қаламнан өзгесін қолдануға;</li>
<li>қауырсынмен, гель қаламмен жазуға;</li>
<li>қарындашпен бояуға;</li>
<li>жауап парағын бүктеп, жыртуға тыйым салынады.</li>
</ul>
Ұлттық тестілеу орталығы ҰБТ туралы өзгерістер мен жаңалықтардан хабардар болу үшін әлеуметтік желілердегі парақшаларында ұдайы ақпарат жаңартып отырады.

Елімізде ақылы ҰБТ басталды: Тест тапсырушылар нені білуі керек?

<a href="https://kyzylorda-news.kz/">Kyzylorda-news.kz.</a> Оқушылардың әлеуметтік желіні пайдалану ережелері мен жазба этикасы туралы ақпарат беру мақсатында Қызылорда қаласындағы Назарбаев Зияткерлік мектебінде кәмелетке толмағандардың істері жөніндегі мамандандырылған ауданаралық сотының мамандарымен кездесу өтті.
Кездесуде судья Қайратбек Бержанов пен мекеменің бас маманы Дәурен Тайыров жас жеткіншектерге ғаламтордың зияны мен пайдалану ережелерін бұзу салдарынан заң шеңберінде жазаланатын әрекеттерді саралап берді.
<blockquote>
 «Бір-бірін қорлау, ар-намысына тиетін сөздер айтса, қылмыстық жауапкершілікке тартылады. Жалған ақпарат таратқан жағдайда да азаматтар заң шеңберінде жазаланады», – деді судья Қайратбек Бержанов.
</blockquote>
Сондай-ақ, сот өкілдері интернет кеңістігіндегі кейбір ақпараттың пайдаланушыларға тигізетін зияны туралы тереңірек түсінік беріп, хат алмасу мессенджерлеріндегі теріс топтардың тұтқынына түспеуге кеңес берді. Сонымен қатар, күмән тудырған хабарламалар туралы ата-аналарды хабардар етіп, қауіп-қатерлерді алдын алудың маңызды екенін ескертті.
Кездесу барысында кәмелет жасына жетпеген балалардың түнгі уақытта қоғамдық орындарда жүруі, компьютерлік ойындарға құмарлығы секілді өзекті мәселелер туралы да сөз қозғалып, келелі кеңестер берілді.

Қызылордадағы Назарбаев мектебіне судья мен сот қызметкерлері не үшін келді?

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>Мектеп-бұл бүкіл әлем, бірнеше жүз бала мен ондаған мұғалімдер жиналған социумның өзіндік үлгісі. Бұл әлем мектеп қабырғалары мен ауланың периметрімен &nbsp;шектеледі.
Осы шекаралардың ішінде жиналған барлық адамдар мінез-құлқы, темпераменті, жасы, тәрбиесі, қоғамдық жағдайы жағынан әр түрлі. Олардың әрқайсысының өз дүниетанымы бар. Бұл адамдар бір-бірімен үнемі сөйлесіп, күніне 4-8 сағат бірге болады. &nbsp;Кейбіреулер табысты өзара іс-қимыл жасайды, басқалары конфронтацияға түседі.
Мұндай жағдайда даусыз жүруге бола ма? Болмайды, сондықтан, мектеп қақтығыстары сөзсіз. Оларға мұғалімдер, оқушылар және олардың ата-аналары тартылады. Сондықтан ең бастысы-барлық тараптар үшін ең аз шығынмен жанжалдардан шығуды үйрену.
Көбінесе ең күрделі мәселелерді шешу үшін екі адамның өздігінен шеше алмайтын жағдайда, үшінші тарап шақырылады. Бұл сот тәжірибесінен алынған классикалық жағдай: әрбір қақтығысқа қатысушылардың кезегін тыңдап, судья өз шешімін шығарады, шешім әділ болғаныменен, тараптың бір жағы қанағаттанбайды.
Осы кезде үшінші тарап көмекке келеді, бейтарап тұлға-медиатор (лат. mediatio-делдалдық).&nbsp;
Бірақ медиация-аралық сот емес. Медиация жүргізу алдында медиатор оған дайындық жүргізеді. Тараптарды тыңдап, даудың шығу себебін айқындау үшін, екі жақтың пікірін толық тыңдап қажетті мәлімет жинайды.&nbsp;&nbsp;&nbsp;&nbsp;&nbsp;
Тараптардың әрқайсысынан даудың шығу себебін тыңдап, қандай сұрақтарды талқылау қажеттігін шешеді. Бұл ретте медиатор нақты тыңдау және қайталап сұрап, конструктивті мағынасын табу шараларын қолданады.&nbsp;
Екіншіден медиатор екі жақтың талабын тыңдап, ол талаптың қайсысы болашақта тараптарды біріктіретінін жобалайды.&nbsp; Бұл кезде медиатор нейтралитет сақтауы қажет. Үшінші қадам кезінде медиатор тараптарға даудың түрлі шешімдерін ұсынады. Ол шешімдер бірнеше және олар альтернативті болуы қажет.
&nbsp;Сонымен медиатор екі жақты творчестволық ізденіске итермелейді. Қорытындыға келгенде екі жақ та шешімге өз еркімен келгеніне көзі жету керек. Төртінші қадамда медиация шешімі дайындалады. Тараптардың қатысуымен медиатор болашақ шешімнің талаптарын оқып береді және оның әр бабын талқылайды. Медиацияның бесінші қадамында медиация шешіміне екі жақ қол қояды. Медияциялық шешім олардың қайсысының да көңілінен шығу керек. Осы орайда медиаторға жүктелетін міндет өте ауыр десе болады. Медиатор шын мәнінде адамдармен тіл табыса алатын психолог әрі сабырлы, байыпты жан болуы тиіс.
Медиацияның мақсаты кінәлілерді іздеу емес, жағдайдан шығуды іздестіру болып табылады.
А.КАЙБАЛДИЕВА
Қызылорда облысының кәмелетке
толмағандардың істері жөніндегі
мамандандырылған ауданаралық
сотының кеңсе меңгерушісі

Мектеп медиациясы да маңызды

<a href="https://kyzylorda-news.kz/">Kyzylorda-news.kz.</a> Бүгін Қазақстанның жүзге жуық тестілеу пунктінде Ұлттық бірыңғай тестілеудің алғашқы кезеңі басталды, деп хабарлайды <a href="https://www.inform.kz/kz/kazakstanda-ulttyk-biryngay-testileu-bastaldy_a3604086">ҚазАқпарат</a>.
2020 жылдың 16-20 қаңтары аралығында 95 мыңнан астам үміткер ҰБТ тапсырады.
Айта кетейік, жоғары оқу орнына ақылы негізде түсу үшін ҰБТ жылына 4 рет өткізіледі (қаңтар, наурыз, маусым және тамыз). Бұл ретте, оқуға түсушілер білім гранты конкурсына қатысу үшін маусым айында өтетін ҰБТ-ны тапсыруы қажет. Жалпы, Ұлттық бірыңғай тестілеуді тапсыру форматы өзгерген жоқ. Бұл норма жоғары білім алуға қолжетімділікті арттыру мақсатында енгізілді.
ҰБТ-ға қатысу үшін құжаттар 2019 жылы 1-15 желтоқсан аралығында бірыңғай ақпараттық жүйе арқылы қабылданды. Нәтижесінде, ҰБТ-ға қатысуға 95 мыңнан астам адам өтініш берді. Оның ішінде 75 520 оқушы тестілеуді қазақ тілінде, 22 744 бала – орыс тілінде және 176 бала ағылшын тілінде тапсырады.
Санаттар бойынша, 90 808 бала – 11 (12) сыныпта оқиды және былтырғы тестілеуден өтпеген, ЖОО-ға шартты түрде қабылданған 2 701 үміткер бар. Одан бөлек, шығармашылық дайындықты талап ететін, өзге білім беру бағдарламасына ауысқысы келетін 1-2-інші курстағы 1 841 студент бар.
ҰБТ-да 820 аудитория пайдаланылады. Барлық аудиториялар ұялы байланыс құралдарының жұмысын бұғаттайтын құралдармен және бейнебақылау камераларымен қамтамасыз етілген. Тыйым салынған заттар табылған үміткер ҰБТ-ға кіргізілмейді және акт арқылы ғимараттан шығарылады.
Өңірлерге ҚР Білім және ғылым министрлігінің 447 өкілі жіберіледі, апелляциялық комиссиялар құрылады, медициналық көмек көрсету бекеттері ұйымдастырылады және тестілеу барысындағы қауіпсіздік қамтамасыз етіледі. Бұдан бөлек, қажет болған жағдайда жеке көмекшілер, сондай-ақ ерекше білім беру қажеттілігі бар балаларға арналған сурдоаудармашылар ұсынылады.
Жергілікті жерлерде ҰБТ ұйымдастыру және өткізу бойынша Мемлекеттік комиссиялар құрылды. Мемлекеттік комиссия құрамына облыстар немесе республикалық маңызы бар қалалар әкімдіктерінің өкілдері, құқық қорғау органдарының, қоғамдық ұйымдардың, бұқаралық ақпарат құралдарының өкілдері кірді.

Қазақстанда Ұлттық бірыңғай тестілеу басталды

<a href="https://kyzylorda-news.kz/">Kyzylorda-news.kz.</a> 2015-2025 жылдарға арналған сыбайлас жемқорлыққа қарсы стратегияның іске асырылуын сыртқы талдау және бағалау жөніндегі арнайы мониторингтік топтың өкілдері екі күннен соң өтетін ҰБТ-ға қатысады.
Бұл туралы Ұлттық тестілеу орталығының басшысы Дидар Смағұлов өзінің Facebook парақшасында хабарлады.&nbsp;
Ұлттық тестілеу орталығының басшысы шынайы әрі әділ емтихан өтеді деп сендірді.
<blockquote>
 «Біз барлық түлектер үшін әлеуметтік мәртебеге, отбасылық қатынастарға және қаржылық жағдайға қарамастан емтихан тапсыру үшін тең және объективті жағдайлар жасаймыз. Бүгін Сыбайлас жемқорлыққа қарсы іс-қимыл агенттігінің қолдауы мен сеніміне ие болдық: арнайы мониторингтік бақылау топтарының мүшелері тәуелсіз бақылаушылар ретінде шақырылады», – деп жазды Дидар Смағұлов.
</blockquote>
2020 жылдың 16 және 20 қаңтар күндер аралығында Қазақстанда ҰБТ өтеді. Бұл университетке ақылы негізде түсуге мүмкіндік береді. Тестілеуге қатысуға 95 мыңнан астам адам өтінім берді.
ҰБТ тапсыру барысында ұялы құрылғылар жұмысы бұғатталатын және бейнебақылау жүйесімен қамтамасыз етілген&nbsp; 820 аудитория пайдаланылады.
<blockquote>
 «Біз кез келген емтихан бөлмесінен онлайн режимінде хабар таратамыз. Сонда кез келген адам емтиханның әділ өтуін бақылай алады. Алдау және басқа да ережелерді бұзу фактілері туралы Digital agent қосымшасы арқылы он-лайн режимінде хабарлауға болады: біз жедел жауап беруге кепілдік береміз», – деді Ұлттық тестілеу орталығының директоры.
</blockquote>

16 қаңтарда 95 мың оқушы ҰБТ тапсырады

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>Қызылорда облысы білім басқармасына қарасты Арал колледжі директорының орынбасары сыбайлас жемқорлық жасады деген күдікке ілінді. Бұл туралы ҚР Сыбайлас жемқорлыққа қарсы іс-қимыл агенттігі хабарлады.
«Қызылорда облысының сыбайлас жемқорлыққа қарсы қызметі сыбайлас жемқорлық құқық бұзушылық жасады деп күдікке ілінген Қызылорда облысы білім басқармасының «Арал көпсалалы колледжі» МКҚК директорының орынбасарына қатысты сотқа дейінгі тергеуді бастады», делінген хабарламада.
Баспасөз қызметінің мәліметінше, ол аталған колледжге оқытушы қызметіне жұмысқа тұрғызу үшін азаматты «Қызылорда облысы білім басқармасы» ММ-нің лауазымды тұлғаларына 400 мың теңге көлемінде пара беруге итермелегені үшін күдікке ілінді.
<blockquote>
 «Кінәні мойындауға және күдікті мен оның қорғаушысының келу міндеттемесін беруге байланысты процессуалдық ұстау қолданылған жоқ.
 Күдіктінің кінәсінің деңгейі туралы түпкілікті шешімді сот шығарады», делінген хабарламада.
</blockquote>

Арал колледжі директорының орынбасары парақорлық күдігіне ілікті

<a href="https://kyzylorda-news.kz/">Kyzylorda-news.kz.</a> Нұр-Сұлтан қаласында өткен математика пәні мұғалімдерінің фестивалінде Қызылордадағы Назарбаев Зияткерлік мектебінің мұғалімі Бәймен Сәбит өз біліктілігімен ерекшеленіп, олимпиаданың 3-орын иегері атанды.
Үшінші рет жалауын желбіреткен фестивальге ел бойынша Назарбаев Зияткерлік мектептерінің 100-ге жуық педагогы қатысты. Үш күнге созылған шарада қатысушылар математика пәнінің оқытудағы өзекті мәселелері аясында 20 тақырыптық семинарда тәжірибе алмасып, оқушылардың білім деңгейін арттырудағы тың идеяларымен бөлісті.
Сондай-ақ, фестиваль барысында қатысушылар арнайы өткізілген олимпиадада күрделі есептерді шығару арқылы логикалық қабілеттерімен сынға түсті. Нәтижесінде қызылордалық Баймен Сәбит жоғары ұпай жинап, үздік үштіктің қатарынан көріне білді. Олимпиаданың үшінші орын иегері атанған жас математик бұл фестивальдің барлық педагогтер үшін озық тәжірибе алмасу алаңы болды дейді.
<blockquote>
 «Өзге Зияткерлік мектеп мұғалімдерінің атқарып жатқан жұмыстарын көріп, өзіміздің тәжірибемізбен де бөлісу мүмкіндігін алдық. Заманауи білім беруде қажетті оқыту әдістемелері мен математика пәніне деген қызығушылықты арттыратын тәсілдер қарастырылған семинарларда барлық қатысқан ұстаздар алдағы жұмыстарын жандандыруға жаңа идеялар мен мотивациялар алды деп ойлаймын», – деді Бәймен Сәбит.
</blockquote>
<img src="https://kyzylorda-news.kz/wp-content/uploads/2020/01/nish-2.jpg" alt="" />

Қызылордалық мұғалім математиктер фестивалінен олжалы оралды

<a href="https://kyzylorda-news.kz/">Kyzylorda-news.kz.</a> Қызылордада жалпы білім беретін пәндер бойынша республикалық олимпиаданың облыстық кезеңі аяқталып, жеңімпаз оқушылар марапатталды. Үздіктерді облыстық білім басқармасының басшысы Майра Мелдебекова марапаттап, оқушылардың білім сынындағы жетістіктеріне тоқталды.
Жаратылыстану-математика бағытындағы пәндер бойынша 9- 10 -11 сынып оқушылары және қоғамдық-гуманитарлық бағыттағы пәндер бойынша 10-11 сынып оқушылары білімдерін сынады.
Олимпиадаға 337 оқушы 13 пән бойынша қатысты. Үздік танылған 161 оқушы облыстық білім басқармасының І, ІІ, ІІІ дәрежелі дипломдарымен марапатталды. Сонымен, І орын – Алтын медаль иегерлері – 22 оқушы, ІІ орын – Күміс медаль иегерлері – 50 оқушы, ІІІ орын – Қола медаль иегерлері – 89 оқушы.
Білім сынында үздік командалар марапатталып, арнайы номинация иегерлері де анықталды. Олардың қатарында І дәрежелі «Ең үздік олимпиадалық команда – 2020» – №9 дарынды балаларға арналған облыстық «Білім-инновация» лицей-интернаты, ІІ дәрежелі «Ең үздік олимпиадалық команда – 2020» – Қызылорда қаласы, ІІІ дәрежелі «Ең үздік олимпиадалық команда – 2020» – Қармақшы ауданы лайық деп танылды. Ал, «Ең үздік қала мектебі – 2020» – Үш тілде оқытылатын мамандандырылған сыныптары бар «Мұрагер» мектебі, «Ең үздік ауыл мектебі – 2020» – Қазалы ауданы, №249 мектеп-лицейі, «Олимпиада жұлдызы – 2020» номинациясымен №9 дарынды балаларға арналған облыстық «Білім-инновация» лицей-интернатының 11 сынып оқушысы Ким Артем марапатталды.
<img src="https://kyzylorda-news.kz/wp-content/uploads/2020/01/qyzylordada-oblystyq-olimpiada-zhengimpazdary-1.jpg" alt="" />
<img src="https://kyzylorda-news.kz/wp-content/uploads/2020/01/qyzylordada-oblystyq-olimpiada-zhengimpazdary-2.jpg" alt="" />

Қызылордада облыстық олимпиада жеңімпаздары марапатталды

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінде Каникулярлық&nbsp; мектеп өз жұмысын бастады.&nbsp; Қаңтардың төртінен бастап жалпы білім беретін мектептердің 6-сынып оқушылары Зияткерлік мектептің тілдік және математикалық пәндері бойыша қосымша сабақтарында білімдерін толықтыруда.&nbsp;
Қысқы демалыс уақытында ұйымдастырылатын дәстүрлі Каникулярлық мектепке бұл жолы&nbsp; 80-ге жуық&nbsp; бала шақырту алды. Олар –&nbsp; арнайы «Виртуалды мектеп» веб-сайтына тіркеліп, тиісті тапсырмаларды орындап, онлайн оқудың қорытынды тестілеуінен сәтті өткен дарындылар.
Каникулярлық мектеп қатысушылары бір апталық курс барысында «тыңдалым», «айтылым», «оқылым» және «жазылым» дағдыларын дамытуға арналған арнайы жаттығулар орындау арқылы коммуникативті дағдыларын қалыптастыратын болады. Сондай-ақ, тілдік пәндер сабақтарында сөздік қорларын байытып, тест тапсырмаларын орындау арқылы мектепке түсу емтиханына дайындық жүргізуге мүмкіндік алды.
Ал&nbsp; математика сабағында оқушылар командалық логикалық есептерді шығарып, пәнге деген қызығушылықтарын оятады.
Жалпы Каникулярлық мектеп – оқушылардың жаратылыстану-математика ғылымдарын оқуға қызығушылығын арттыру және Зияткерлік мектептерге Тұңғыш Президенттің «Өркен» грантына түсуге дайындау үшін жағдайлар жасауға бағытталған үлкен жоба.
Айта кету керек, бүгінде Назарбаев Зияткерлік мектебінің 7-сыныптарында 2020-2021 оқу жылында білім алу үшін іріктеу конкурсына құжаттарды қабылдау жүріп жатыр. Үміткерлер тиісті құжаттарды 2020 жылғы 31 қаңтарға дейін қабылдау комиссиясына тапсырулары қажет.
<img src="https://kyzylorda-news.kz/wp-content/uploads/2020/01/6kanikulsk2.jpg" alt="" />
<img src="https://kyzylorda-news.kz/wp-content/uploads/2020/01/6kanikulsk3.jpg" alt="" />

Қызылорда облысындағы виртуалды мектеп үздіктері NIS-ке күндізгі оқуға келді

<a href="https://kyzylorda-news.kz/">Kyzylorda-news.kz.</a> Мұғалімдерге қатысты «Мұғалім мәртебесі туралы» заңды бұзғаны үшін қандай айыппұлдар қарастырылған?
Жеке тұлғалардың тәрбиешілерді қорлағаны үшін айыппұл 30 айлық есептік көрсеткіш (АЕК) құрайды (79 530 теңге).
Егер мұндай заң бұзушылық бір жыл ішінде қайталанса, онда 40 АЕК (106 040 теңге) айыппұл немесе бес күнге дейін әкімшілік қамауға алу жазасы тағайындалады. 
Егер мұғалімді кәмелетке толмағандар ренжітсе, онда олардың ата-аналарына немесе оларды алмастыратын адамдарға&nbsp;20 АЕК (53 020 теңге) айыппұл салынады.&nbsp;Бірнеше рет бұзғаны үшін 30 АЕК көлемінде айыппұл салынады.
Мұғалімдерді әдеттен тыс қызметтерге тарту туралы ескерту жасалады, бірнеше рет бұзғаны үшін 20-дан 120 АЕК-ке дейін айыппұл салынады (318 120 теңге). 
Сондай-ақ күтпеген есептілікті талап ету, бірнеше рет бұзғаны үшін ескерту болады – 20-дан 120 АЕК-ке дейін айыппұл салынады.
Заңнамада қарастырылмаған тексерулер жүргізу үшін, сонымен қатар ескерту жасалады. Бірнеше рет бұзғаны үшін – 20-дан 120 АЕК-ке дейін айыппұл салынады.
2020 жылы 1 АЕК 2 651 теңгені құрайды.
<a href="https://stan.kz/mygalimderdi-renzhitkenderge-kansha-ayippyl-salinadi-325963/">Stan.kz</a>

Мұғалімдерді ренжіткендерге қанша айыппұл салынады?

<a href="https://kyzylorda-news.kz/">Kyzylorda-news.kz.</a> Қазір балалар қысқы демалыста. Әйтсе де, шаңғы теуіп, сырғанаққа барудың қаупі жоқ емес. Осы орайда ҚР ДСМ Қоғамдық денсаулық сақтау ұлттық орталығының инфекциялық емес аурулар мониторингі бөлімінің бас маманы Қуаныш Әлімбетов қысқы демалыс кезінде балалардың саулығы үшін ата-аналарға біршама кеңес береді, деп хабарлайды <a href="http://lenta.inform.kz/kz/balalardyn-kysky-demalysy-zharakat-aludan-kalay-saktanu-kerek_a3601200">ҚазАқпарат</a>.
Оның айтуынша, қыста көктайғақтан және ауа райына байланысты бала түгілі ересектердің жарақаттанып қалу қаупі жоғары.
<blockquote>
 «Егер балаңыз конькимен, шаңғымен немесе шанамен сырғанағысы келсе алдымен ойын құралдарын тексеру керек. Шаңғы баланың аяғына сенімді әрі дұрыс бекітілуі тиіс. Ал коньки аяқ өлшеміне сай тұруы керек. Шанамен немесе шаңғымен сырғанау үшін таңдап алынатын аумақ міндетті түрде жолдан, тал-тоғайдан алыста болуы тиіс», – дейді ол.
</blockquote>
Қуаныш Әлімбетовтың айтуына қарағанда, әсіресе көлік құралдарына тіркеліп, шаналарды бір-біріне байлау қауіпті. Конькимен арнайы жабдықталған орындарда немесе мұз айдындарында сырғанау керек.
<blockquote>
 «Шаңғымен және конькимен сырғанау, сондай-ақ тайғақ табаны бар аяқ киімді кию – аяқ сынуының негізгі себептері. Сынықтың барына күдіктенген кезде дәрігерге баруды кейінге қалдырмаңыз. Қар үстіндегі ойын, көздің зақымдануына әкелуі мүмкін, сондықтан ересектер балаларға майда болса да мұз бөлшектері араласқан қарды лақтырмау керектігін ескерткені жқн. Жылдың суық мезгілінде негізгі қауіп-қатер көктайғақтан келеді. Біріншіден, балаға аяқ киімді дұрыс таңдап алыңыз: жұмсақ резеңкеден немесе термоэластопластан жасалған, өкшесіз қабырғалы табаны бар аяқ киім кигені дұрыс. Екіншіден, көктайғақ кезінде үлкен қауіп-қатерді сатылар туғызады. Мүмкіндігінше, сатыдан түскен немесе шыққан кезде аяқты баспалдақтың бойымен қойып, абайлап түсу керек», – дейді ол.
</blockquote>
Маман өз сөзінде қыста жарақаттар тізіміне «мұзға жабысу» қаупі де қосылатынын атап өтті. Балаға аязда дымқыл қолмен, не тілмен темір конструкцияларды ұстап, жалауға болмайтынын ескерту керек. Сонымен қатар, жол-көлік жарақаттары да тіркелуі мүмкін. Балалар көлік жақындап келе жатқанын көре тұра, тезірек өтіп кетуге асығады. Ал тайғақ жолда жүргізуші тежеуге үлгермеуі мүмкін. Балаға міндетті түрде жол жүру ережелерін сақтау қажеттігін ескерту керек.
<blockquote>
 «Тағы бір көп кездесетін қысқы жарақат – үсік. Оған ауаның төмен температурасымен бірге, дымқыл ауа райы, ылғалды киім немесе тығыз аяқ киім себеп болуы мүмкін. Көбінесе қол мен аяқтың саусақтары, бет, мұрын, құлақ үсиді. Жағымсыз салдарлардан аулақ болу үшін баланы серуендеуге дұрыс киіндірген жөн: аяғын қыспайтын және су өткізбейтін аяқ киім, жылы астарлы су жұқпайтын материалдан жасалған бас киім қажет. Теріні арнайы балалар кремімен қорғау керек», – дейді Қуаныш Әлімбетов.
</blockquote>

Балалардың қысқы демалысы: Жарақат алудан қалай сақтану керек?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Бүгін Қорқыт ата атындағы Қызылорда мемлекеттік университетінің ректоры қызметіне Бейбіткүл Кәрімова тағайындалды.&nbsp;
Сыр өңіріне іс сапармен келген ҚР Білім және ғылым вице-министрі Шолпан Каринова Қорқыт Ата атындағы Қызылорда мемлекеттік университет ұжымына жаңа ректорды таныстырды.
Кәрімова Бейбіткүл Сәрсемханқызы 1972 жылы Алматы облысы, Райымбек ауданы, Шырғанақ ауылында дүниеге келген.
1994 жылы Қазақ мектебіндегі орыс тілі мен&nbsp;әдебиеті мамандығы бойынша Қазақ қыздар педагогикалық институтын бітірген. Филология ғылымдарының кандидаты.
Оқу орнын тәмәмдаған соң, Қазақ қыздар институтының аспирантурасында білім алған. Қазақ қыздар институтының филология факультетінде деканның оқу ісі жөніндегі орынбасары, орыс филология кафедрасының оқытушысы қызметінен еңбек жолын бастаған. 24 жылдық еңбек жолында 8 жыл декан орынбасары, 5 жыл Алматы үздіксіз білім беру университетінің оқу ісі жөніндегі проректоры қызметін атқарған. 3 жыл Әл-Фараби атындағы Қазақ Ұлттық университеті коллледжінің директоры болды. 2011 жылдан бастап бүгінгі күнге дейін Бейбіткүл Сәрсемханқызы ҚР Білім және ғылым министрлігіне қарасты «Оқулық» республикалық ғылыми-практикалық орталығының директоры қызметін абыроймен атқарып келді.
Бейбіткүл Кәрімова Тіл білімі, салыстырмалы грамматика, қазақстандық саясаткердің тілдік тұлғасы және оқулықтану мәселелеріне арналған 80-нен аса ғылыми еңбектің авторы.
Вашингтон, АҚШ, Франция, Финляндия және Оңтүстік Корея шет елдерінде біліктілігін жоғарылату курстарынан өткен.
Вице–министр Шолпан Каринова 80 жылдан астам тарихы бар іргелі оқу орнын ұзақ жылдар басқарған техника ғылымдарының докторы, профессор Қылышбай Бисеновтің университетке сіңірген ерен еңбегін атап өтті. Сонымен қатар, жылға жуық Қорқыт Ата атындағы ҚМУ ректорының міндетін атқарушы қызметін атқарған физика-математика ғылымдарының докторы, профессор Бақытхан Абдикаримовқа жемісті еңбегі үшін алғысын білдіріп, жаңа ректордың қызметіне табыс тіледі.
<img src="https://kyzylorda-news.kz/wp-content/uploads/2020/01/c7b4660d-07c7-44bf-a141-f95fc617fab7.jpg" alt="" />

Қазақстан және Қызылорда облысының жаңалықтары: Білім