<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде жыл сайын жас ғалымдардың ғылыми ізденістерін қолдау мақсатында гранттар тағайындалады. Биыл гранттың жалпы сомасы 20 млн теңгеге артып, 15 жоба жеңімпаз атанды.Бұл жас ғалымдардың ғылыми – зерттеу жұмыстары мен инновациялық жобаларын қолдауға бағытталған. Сонымен қатар, университеттің ғылыми әлеуетін арттырып, өңірлік және республикалық деңгейде жаңашыл зерттеулерді жүзеге асыруға мүмкіндік.<blockquote>«Биыл Ректор грантының жалпы құны &nbsp;20 млн теңгеге дейін ұлғайғаны бізге үлкен серпін берді. Бұл қолдау ғылыми мақалаларымызды беделді басылымдарда жариялауға, әрі жеке тұлға ретінде қалыптасуымызға зор мүмкіндік туғызады. Өз жобамда ауыл шаруашылығы саласының цифрлық трансформациясын мемлекеттік реттеудің заманауи моделін ұсынамын. Жоба нәтижесінде ауыл шаруашылығын климаттық қаржыландыруды субсидиялаудың жаңа механизмін әзірлеп, ұсынатын боламын»,-деді жас ғалым Ағжан Сайлаубекқызы.</blockquote>Университетте 40 жасқа дейінгі жас ғалымдарға 2021 жылдан бастап ғылыми-зерттеу жұмыстарын жүргізу үшін &nbsp;арнайы грант бөлініп келеді. Бүгінге дейін 33 жобаға жалпы көлемі 50 млн теңге қаржылай қолдау көрсетілді.Айта кетейік, оқу орнында 2024 жылы ғылымнан түскен жалпы табыс 4 есеге өсті. Бұдан бөлек, профессор-оқытушылар құрамының индекстелген журналдарда мақала жариялау белсенділігі жыл сайын артып келеді. Нақты айтқанда, 2024 жылы Scopus деректер базасында 99 ғылыми мақала, Web of Science деректер базасында 50 ғылыми мақала жарияланды. Университет ғылыми зерттеулердің нәтижелерін жариялау үшін 8 ғылыми журнал шығарады.

Биыл жас ғалымдардың жобасына 20 млн теңге бөлінді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Студенттер сарайында Басқарма Төрағасы-Ректор Бейбіткүл Каримова атқарылған жұмыстар мен алдағы міндеттер туралы есепті кездесу өткізді. Университет басшысы қазіргі таңда университеттің халықаралық білім беру ортасындағы беделі мен бәсекеге қабілеттілігі артқанын айтты.“Университет QS Word University Ranking-2025 рейтингі бойынша әлемдегі 1400+ үздік университеттердің қатарына кіреді. Азия континентіндегі университеттер арасында QS Asia Ranking рейтингтік агенттігінің мәліметі бойынша университет 2024 жылы ТОП 541-560 қатарына кіріп, Орталық Азиядағы университеттер арасында 34-орында тұр. Бұдан бөлек, UI Green Metric World University Rankings-2023 рейтингінде университет 1015-ші орында.Оқу орны 2024 жылы Times Higher Education рейтингінде Global University Impact Rankings-2025 индикаторы бойынша нәтиже көрсетті”,-деді Бейбіткүл Каримова.Кездесу барысында оқу орнының академиялық білім беру, ғылыми-зерттеу, халықаралық қатынас, әлеуметтік қызмет және цифрландыру бағыттары баяндалды.<blockquote>“Жыл сайын университетте контингент саны артып келеді. Бүгінде оқу ордасында 10 512 студент білім алуда, оның ішінде 4 905 мемлекеттік білім гранты бойынша оқиды. Биыл алғаш рет еліміздің өзге облыстарынан 151 түлек 1-курсқа қабылданды. Жалпы 2019-2020 оқу жылындағы студенттер санымен салыстырғанда жаңа оқу жылында білім алушылар 2 есеге, мемлекеттік грант негізінде оқитын студенттер саны 4,4 есеге өсті. Сонымен қатар, Қытай, Моңғолия, Өзбекстан және Ресейден келген 46 шетелдік студент білімін жетілдіруде”,-деді университет басшысы.</blockquote>Есепті кезеңде Өзбекстан елінің «Ташкент ирригация және ауыл шаруашылығын механикаландыру инженерлері институты» Ұлттық зерттеу университетімен 6 бірлескен білім беру бағдарламасы әзірленді. Ал қос диплом бағдарламасы бойынша Мәскеу авиация институтының «Восход» филиалы және Ж.Баласағын атындағы Қырғыз ұлттық университетімен бірлескен &nbsp;2 білім беру ағдарламасы жүзеге асырылуда.Бейбіткүл Сәрсемханқызы есепті кездесуде 2024-2025 оқу жылына арналған межелі міндеттерге тоқталды. Университет ректоры алдағы уақытта еліміздің адами капиталы мен ғылыми-технологиялық әлеуетін күшейтуге ықпал ететін жаңа бастамаларды жүзеге асыратынын айтты.Жиынға зиялы қауым өкілдері, университеттің профессор-оқытушылар құрамы, серіктестер, білім алушылар мен БАҚ өкілдері қатысты. Қатысушылар кездесу соңында сауалдарын қойып, ұсыныс-пікірлерін білдірді. Айта кетейік, есепті кездесу оқу орнының ресми әлеуметтік желілерінде тікелей эфирде жүргізілді.Кездесу 17 қараша - Халықаралық студенттер күніне арналған студенттік халық аспаптар оркестрінің концертімен жалғасты.

Қорқыт ата атындағы Қызылорда университетінде 2023-2024 оқу жылында атқарылған жұмыстар қорытындыланды

<a href="https://kyzylorda-news.kz/">Kyzylorda-news.kz</a> &nbsp;&nbsp;Іңкәрдариялық ұстаз Жұмакүл Ақтаева саналы ғұмырын мектепке, білім саласына арнаған ұлағатты жан. Ардақты ұстаз ауыл балаларына білім мен тәрбие беруде мұғалімдіктен бастап, басшылық қызмет атқарып, абыройға бөленді. Жұмакүл Ақтаеваны әріптестерімен қатар бүкіл ауыл жұртшылығы құрметтейді.Жұмакүл Қожамұратқызы Қармақшы ауданында туып-өскен. Жастық шағынан бастап, 41 жыл бойы Іңкәрдария ауылындағы №191 орта мектепте ұстаздық қызмет етіп келеді. Өзі туған ауылындағы мектепті бітірген соң Қызылорда қаласындағы М.Мәметова атындағы педагогикалық училищені музыка пәнінің мұғалімі мамандығы бойынша бітіріп шығады. Алғашқы еңбек жолын келін болып түскен қасиетті мекен Іңкәрдариядағы білім ошағында бастап, тапжылмастан еңбек етіп, енді аз уақытта ардагерлікке абыроймен жеткелі тұр. Музыка пәнінің мұғалімі ретінде оқушыларға эстетикалық тәрбие беруде алдына жан салмаған ұстаз екінші мамандық алады. Қорқыт ата атындағы Қызылорда университетін педагог-психолог мамандығымен бітіреді.<blockquote>– Іңкәрдария ауылы туған ауылым болып кетті. Жастайымнан киелі мекенге келін болып түсіп, осында өсіп-өндім. Қызмет атқарып, ең ұлық мамандық иесі ретінде абыройға кенелдім. Ұстаз-ана үшін мұнан асқан бақыт жоқ шығар, сірә? Ауыл мектебінің ыстығы мен суығын, ең бастысы педагогикалық ұжыммен бірге оқушыларға саналы білім мен тәрбие беруге үлес қостым. Шәкірттеріміз талай шыңды бағындырып, мәртебемді өсірді. Өнерге жақын балаларды қанаттандырып, «Әнші балапан», «Бозторғай» сияқты сайыстарда бақ сынады. Шәкірттерімнің арасында Шынар Ізбасқанова, Тұрсынкүл Жұмабекова, Ұлтай Өміртаева, Мәдина Құндызбаеваның есімдері ерекше. Өнерге біртабан жақын талантты шәкірттерім ауылдың мақтанышына айналды, – дейді ардақты ұстаз Жұмакүл Ақтаева.</blockquote>Жүрегі жұмсақ, мінезі жайдарлы ұстаз адал еңбегімен дараланып, ізденімпаздығы мен ұйымдас¬тырушылық қабілетінің арқасында мектептің басшылық қызметіне дейін көтерілді. Ең күрделі әрі жауапты қызмет оқу ісі жөніндегі орынбасарлықты 2003 жылдан бері абыроймен атқарды. Жұмакүл Қожамұратқызы білгенін үйретуден шаршамайтын, қызмет барысында адал, талап қойғыш, іскер, білікті маман ретінде әріптестерінің арасында беделге ие болды. Мектептің өміріне ғана емес, ауылдың тыныс-тіршілігіне де белсене араласып, игі баста¬малардың басы-қасында жүру оның ұста¬нымына айналды.Ардақты ұстаздың шәкірттері пән олимпиадаларында да жүлделі орын иегері атанды. Шәкәрім Жүсіпов, Аслан Дүйманов, Бекзат Несіпбай, Аида Кішкенбай, Ерсұлтан Несіпбай ұстаз абыройын, мерейін тасытқан оқушылар. Бұл оқушылардың бар¬лығы да грант иегерлері атанып, қазір мамандықтарына сәйкес әр салада жұмыс істеуде.Қажырлы да жемісті еңбегінің арқасында ардақты ұстаз Білім және ғылым Министрлігінің Құрмет грамотасымен, Сырдария ауданынының 90 жылдық медалімен, облыстық білім басқармасының Құрмет грамотасымен, Қорқыт ата атындағы Қызылорда университетінің төсбелгісімен, Қызылорда облыстық білім басқармасы, Білім және ғылым қызметкерлері кәсіподағының облыстық комитетінің Құрмет грамотасымен, аудандық білім бөлімінің Алғыс хатымен марапатталды.«Ұйымдастырушы-әдіскер», «Ең үздік оқу ісі меңгерушіс», «Үздік бағдарлы оқыту жөніндегі орынбасар», «Үздік педагог» – шебер ұстаздың қырық жылғы қызметінде алған атағы.Бүгінгі заман талабына сай бәсекеге қабілетті, зерделі, ой-өрісі кең жастарды тәрбиелеуге, білім саласын дамытуға зор үлес қосып келетін ұстаз биыл құрметпен ардагерлікке қадам басқалы тұр.<blockquote>– Ұстаздардың ұстазы атанған ардақты Жұмакүл Қожамұратқызының ұрпақ тәрбиесіне сіңірген еңбегі өлшеусіз. Оның белсенді қызметі мен шығармашылық ізденісі кейінгі толқын мамандарға үлгі-өнеге. Өмірде де, қызметте де адалдығымен дараланған ұстаз ауылдағы берекесі мен ынтымағы жарасқан отбасылардың отанасы. Дүниеге әкелген төрт перзентінен немере сүйіп, өнегелі келін атанған апай ағайын-туыс ортасында адамгершілік қасиетімен ерекшеленеді. Отбасының ұйытқысы, ауылдың анасы, аяулы ұстаз, іскер басшы ретінде ол кісінің орны біз үшін бөлек. Сондықтан, апайдың қызметіне мың алғыс айтамыз. Мектеппен байланысы ешқашан үзілмейтініне, жанашырлық, қамқорлық таныта беретініне сенеміз, – дейді әріптесі әрі шәкірті Нұргүл Төкенова.&nbsp;</blockquote>Бибісара ЖАНӘЛІ

Ұстаздардың ұстазы

<a href="https://kyzylorda-news.kz/">Kyzylorda-news.kz</a>&nbsp; Шәкiрттерiн бiлiм нәрiмен сусындатып, тәлім-тәрбиe беру, жақсы қасиeттерді бойына дарытып, адамгершілік рухта бағыт-бағдар берудe ұстaздың еңбегi зор. Сондықтан да ол әрдайым құрметті тұлға ретінде ерекшеленеді. Қазалыда осынау ұлы салада он бір ғасырға жуық қызмет етіп келе жатқан әулет бар десем, сенер ме едіңіз?! Иә, бұл мамандығын парызы тұтқан әулеттің бірегейі – ұстаздық жолын ұстанып, қаншама шәкірттің шырағын жағып келе жатқан, 1070 жыл жұмыс өтілі бар – Жәдиевтер отбасы.Кезінде Жәдиден тараған алты баланың біреуі Өмірзақ ауыл шаруашылығы саласында қызмет істеп, зейнет демалысына шықса, қалған бесеуі – Жаниет пен Ақниет, Жандәулет, Жанғазы және Шынтас ұстаздық жолын таңдады.Бұлардың арасында Шынтас Жәдиев 46 жыл өмірін мұғалімдікке арнап, бүгінде зейнетке шыққан. Алғаш еңбек жолын №97 мектепте тарих пәнінің мұғалімі болып бастаған. 1977-1978 жылдары Ақтан батыр ауылындағы №190 мектепте тарих пәнінің мұғалімі болды. Одан кейін №102 мектепте директор болды. 45 жылға жуық уақыт бала тәрбиелеу ісімен айналысып келе жатқан Шынтас Жәдиұлы 1997 жылы Қазақстан Республикасының Білім және ғылым министрлігінің, 1986 жылы облыстық білім басқармасының «Құрмет грамотасымен», 2011 жылы облыстық ғылыми-практикалық конференцияда «Орта мектептерде он екі жылдық білім беру туралы» баяндама жасап, облыстық білім жетілдіру институтының «Алғыс хатымен» марапатталған.Шынтастың ізін жалғаған балалары мен келіндері, немерелері де осы жолды таңдаған. Жәдиев Ержан Шынтасұлы 1993 жылдан бері №98 география пәнімен қатар тәрбие ісі жөніндегі орынбасары қызметін қалтқысыз атқарып келеді. Ал оның жұбайы Гауһар Әбілдаева сол білім ордасында 21 бойы бастауыш сынып мұғалімі қызметінде. Сонымен қатар Шынтастың қыздары Әсия тарих пәнінен 21 жыл шәкірттерді шыңдап келе жатса, Ләззат 15 жыл бойы бастауыш сыныптарының зейінін ашып келеді. Сондай-ақ немерелері Ерсұлтан география пәнен мұғалімдік қызметін атқарса, Рауан қазақ тілі мен әдебиеті пәнінің мұғалімі.Жалпы Жәди ақсақалдан тараған алты ұлдың да ұрпақтары осы асыл қызметте жүздеген жылдық жұмыс өтілі бар. Мәселен, Жәниет Жәдидің әулетінің педагогика саласындағы еткен еңбек өтілі 299 жыл болса, Ақниет Жәдиевтің ұрпақтарының бұл жолда 124 жыл жұмыс өтілі бар. Ал Жандәулет Жәдиевтің балаларының білім саласында 200 жыл жұмыс өтілі болса, Жанғазының ұрпақтары 205 жыл қызмет еткен. Сонымен қатар Өмірзақтың ұрпақтары 80 жыл және Жәди ақсақалдың кенжесі Шынтастың балаларының 148 жыл жұмыс өтілі бар. Яғни ата жолын жалғап, шәкірттерді білім нәрімен сусындап, осынау киелі ұстаздық жолымен келе жатқан әулеттің бүгінде жұмыс өтілі 1066 жылды құрайды.Жәдиевтер әулеті өте белсенді, аудандағы, облыс пен республикадағы ауқымды отбасылық байқауларда бақ сынап та келеді. Жуырда өткен «Мерейлі отбасы» ұлттық конкурсының аудандық кезеңінде бақ сынап, «Үлгілі отбасы» бағамын иеленді. Отбасының ардақты атасы Шынтас Жәдиев қазір 70 жаста. Ол – білім беру ісінің үздігі. 46 жыл өмірін ұстаздық жолға арнап, білім саласында елеулі еңбек еткен ардагер-ұстаз. Қазақстан Республикасының білім және ғылым министрлігінің «Құрмет грамотасын» иеленген. Жұбайы Күлпәш Қалымбетовамен 4 бала тәрбиелеп, 14 немере, 5 шөбере сүйген үлгілі отбасы.Сонымен қатар Өмірзақ Жадиевтің отбасы да «Мерейлі отбасы» ұлттық конкурсында бағын сынап келеді. Өмірзақ ақсақал 13 жыл бойы математика пәнінен сабақ беріп, қазір бейнетінің зейнетін көріп отыр. Оның Жұбайы да осы жолда, қазақ тілі пәнінен 39 жыл қызмет еткен. Бүгінде Өмірзақтың ұлдары мен келіндері де білім саласында қызмет етіп келеді. Жалпы Жәдиевтер әулеті елге еткен қызметі үшін қандай да болсын мадаққа, марапатқа лайықты. Жапырағы жайқалып, тамырын тереңінен жайған әулетке тек жақсылық тілейміз. Серік АҚМЫРЗА

Ұлағаттылық жолында 1070 жыл

<a href="https://kyzylorda-news.kz/">Kyzylorda-news.kz</a>&nbsp; Елімізде «Педагог мәртебесі туралы» заңға сәйкес, 2021 жылдан бастап «Қазақстанның еңбек сіңірген ұстазы» атағы енгізілді. Мемлекет басшысы Қасым-Жомарт Тоқаевтың тапсырмасымен қабылданған заң аясында біршама оңтайлы іс атқарылып жатыр. «Қазақстанның еңбек сіңірген ұстазы» атағы – мәртебелі мемлекеттік награда. Бұл атақ мұғалімдерге үздік жетістіктері мен мемлекет алдындағы ерекше еңбегі үшін беріледі. Осы уақытқа дейін республика бойынша 46 мұғалім осы марапатқа ие болса, биылғы 5 қазанда тағы 24 мұғалімге жоғары награда берілді.&nbsp;Кәсіби мерекеде мерейі үстем болған ұстаздар қатарында – Қызылорда қаласындағы №10 дарынды балаларға арналған облыстық «Білім-инновация» лицейінің қазақ тілі мен әдебиеті пәнінің мұғалімі Нағиша Есбосын да бар. Қасиетті Қазалы топырағының тумасы, ұлағатты ұстаз Нағиша Қожаққызымен телефон арқылы тілдесіп, сұхбат алудың сәті түскен еді.– Нағиша Қожаққызы, құрметті атағыңыз құтты болсын. Бұған дейін де бірнеше рет марапат төрінен көрініп, түрлі атақтарды иелендіңіз. Десе де бұл награданың жөні бөлек. Президент Қасым-Жомарт Тоқаевтың қолынан марапат алғанда қандай сезімде болдыңыз?– Әрине, ерекше толқыдым. Бұл – Президенттің өз қолымен табыс ететін мұғалім үшін ең үлкен, мемлекеттік деңгейдегі құрметті атақ болып табылады. 2021 жылы ең алғаш 20 мұғалімге берілді. Солардың бірі болып Қазалы ауданы, Әйтеке би кентіндегі №249 мектеп-лицейдің ағылшын тілі пәнінің мұғалімі, менің жан құрбым Жамила Әбжанова алып келді. Сол кезде қатты қуанып, дәл осындай ұстазға жасалып жатқан құрметке, шынайы еңбегіне берілген марапатқа риза болдым. Дәл осы сезімді өзім алған кезде де басымнан кешірдім. Оның үстіне Ақорданың төрінде керемет әсер. Ауызбен айтып жеткізу мүмкін емес. Үлкен толқыныс, толғаныс. Адам өмірінде төбеңнен нұр төгіліп тұратын сәулелі сәттер болады ғой. Міне, менің бойымды дәл осы күй биледі.&nbsp;Мамандығына адал болып жүрген барша мұғалімдер қауымына, балаларға білім беру, шәкірттерді қанаттандыру жолында уақытын да, өмірін де арнап жүрген әрбір ұстазға жұғысты болса екен деп тілеймін. Бұл, әсіресе, жас мұғалімдерге үлкен мотивация. Адал еңбектің жоғары бағаланатындығының дәлелі деп санаймын.&nbsp;Иә, сөзіңіздің жаны бар. Еткен еңбегімнің жемісін көріп, сый-құрметке бөлендім. Атап айтар болсам, бірнеше жинағым мен әдістемелік құралдарым жарыққа шықты. Соның ішінде «Қыздармен сырласу сабағы» және «Оқытудың жаңа әдіс-тәсілдері қоржынынан» жинақтарым республика көлемінде таратылып, мектептерде факультативтік сабақтар ретінде өткізіліп жүр. Республика, облыс көлемінде семинарлар мен шеберлік сабақтарын өткіздім. Республикалық «Q talks» жобасындағы сөзім телеарналар мен әлеуметтік желілер арқылы таратылды. Облыстық ішкі саясат бөлімінің пулспикері ретінде үнемі саяси ақпараттарды насихаттау жұмыстарына да араласып келемін. Менің бастамаммен әдістемелік желілер, іс-әрекетті, сабақты зерттеу жұмыстары облыс көлемінде жүзеге асып, бірнеше мектептермен тікелей жұмыс жасап отырмын. 2020 жылы «Қызылорда облысының білім беру саласын дамытудағы еңбегі үшін» төсбелгісімен, 2021 жылы «Ы.Алтынсарин» белгісімен марапатталдым.Ұстаздың мерейін тасытатын, еңбегінің нәтижесін көрсететін ол – шәкірттерінің шыққан шыңы. Дайындаған оқушыларым облыстық, республикалық пән олимпиадалары мен ғылыми жобалар байқауында, түрлі мүшәйралар мен сайыстарда жеңімпаз атанып, биік тұғырлардан көрініп жүр. Соңғы 5 жылда 3 оқушым республикалық олимпиаданың «Алтын», «Күміс» медальдарын иеленді.– Ұстаздық деген ұлы жолда тер төгіп, шәкірт тәрбиелеу бала күнгі арманыңыз ба, әлде ата-ана ықпалы әсер етті ме?– Мен 1973 жылы 1 қыркүйекте Қазалы ауданына қарасты Ғани Мұратбаев ауылындағы №91 мектепке бірінші сыныпқа қабылданып, алғашқы ұстазымды, жаңа достарды, мектеп партасын көрген сәттен-ақ ерекше әсер алдым. Сол жылы көрініс, жап-жас ұстаз, оның маған мейіріммен күлімсірей қараған сұлу жүзі көз алдымда. Сол күні сабақтан үйге «Мен мұғалім боламын» деп айқайлап кіргенім әлі есімде. Бастауыш бітіріп, бесінші сыныпқа барған кезде Райхан Жұмағамбетова апай математика пәнінің мұғалімі болды. Сол кісіні көрдім де, «Математика пәнінің мұғалімі боламын» деп шештім. Абайдың өзі: «Адамға жақсы мінез ата-анадан, жақсы ұстаздан, құрбыдан жұғады. Әсіресе, кімді қаттырақ жақсы көрсе, содан көбірек жұғады» деп айтады. Мұғалімдерімді жақсы көргендігімнен болар, мамандыққа деген қызығушылығым, бала арманым сонау шақта санамда қалыптасты. Күндердің бір күнінде менің алғашқы ұстазым аяқ астынан дүниеден озды. Бұл оқиғадан кейін бастауыштағы арманым қайта тірілгендей болды. Ең алғашқы ұстазыма: «Сіз сияқты мұғалім боламын» деген сертім санамда лаулады. 8-сыныптан кейін Қызылорда қаласындағы М.Мәметова атындағы педагогикалық училищеге түсіп, бастауыш сынып мұғалімі болуға бел будым. Кейінірек бұл туралы былай жазғаным есімде:&nbsp;Бір арман әлдиледі бала жастан, Тәтті еді сол әлдиім әуел бастан. Ең алғаш ұстаз алдын көрген күні «Мұғалім болам!» – дедім ­ойланбастан. Тұрғасын лүп-лүп етіп жүрек қалап, Өзімді әжептәуір ұстаз санап. Жасап ап көрнекілік ағаш-тастан Өтуші ем қозы-лаққа күнде сабақ.Ол кезде біздің ойыншығымыз, қуыршақтарымыз болған жоқ. Төл бағатынбыз. Сол төлдерге өзімнің сыныптастарымның атын қойып, апайдың бүгін өткен сабағын соларға қайталап өтіп жүретін едім.&nbsp;Нығайып әр жыл сайын қадамым бек,&nbsp; Ұстаз қып елестеттім өзімді тек. Серт бердім алғашқы ұстаз қазасында, «Мұғалім дәл өзіңдей боламын» – деп. Әрі қарай осы өлеңім жалғаса береді.&nbsp;Арман қуып, педагогикалық училищеге түстім. Ол жақта жүргенде де математика пәнін жақсы көрдім. Бітіргеннен кейін «физика-математика» пәнінің мұғалімі боламын деп жүрдім. Әртүрлі себептермен физика-математика пәні мұғалімдігіне бармадым.&nbsp;Педагогикалық училищені бітіргеннен кейін Қазалы ауданындағы №249 орталау мектептің аға пионер вожатыйы болып еңбек жолымды бастадым. Келесі жылы ҚазГУ-дің филология факультетіне түстім. Қазалы ауданының комсомол комитетінің үшінші хатшысы бола жүріп, мектептермен тығыз байланыс жасадым. 1992 жылы ҚазГУ-ды бітіргенен кейін Қазалыдағы №216 Қ.Сәтбаев атындағы орта мектепке мұғалім болдым. Одан кейін директордың бастауыш сыныптар жөніндегі орынбасары қызметін атқардым. Бертін келе Қызылорда қаласына ауыстым. Қорқыт ата атындағы университеттің жанындағы «Қабілет» мектеп-гимназиясында жұмыс жасадым. 2012 жылы Қазақ-түрік лицейіне «Қазақ тілі мен әдебиеті» пәнінің мұғалімі болып ауыстым. Содан бері 12 жылдың жүзі болды. Осы жерде еңбек етудемін. Қазір қазақ-түрік лицейі №10 дарынды балаларға арналған облыстық «Білім-инновация» лицейі деп аталады.&nbsp;– Шәкірт болдыңыз, шәкірт тәрбиелеп жүрсіз. Бүгінгі ұстаз бен бұрынғы ұстаздың беделінде айырмашылық бар ма?&nbsp;– Мен, жалпы, бұрынғы мұғалім, қазіргі мұғалім деп бөлуге қарсымын. Қай кезде де мұғалімнің жүгі, жауапкершілігі бірдей деңгейде. Мұғалім шәкіртіне сапалы білім, саналы тәрбие, үлгі-өнеге берудің жолында ізденеді, жаңалықтың көшінен қалмайды. Сондықтан бұрынғы мұғалімдер басқаша еді, қазіргі мұғалімдер былай еді деп айтуға болмайтын секілді.&nbsp;– Әрбір адамның болашағына айқын бағыт-бағдар беретін бірден-бір тұлға ол – ұстаз! Мектептің жүрегіне баланатын мұғалімнің мәртебесі қалай қорғалып жүр?&nbsp;– &nbsp;Мұғалімге жасалып жатқан құрмет жақсы деңгейде. «Педагог мәртебесі» туралы заң қабылданғаннан кейін де ұстаздарға Президент тарапынан, құзырлы орындардың тарапынан жақсы көңіл бөлініп, олардың әл-ауқатын жақсартуға, жұмысына деген құлшынысын арттыруға мотивация беруде көптеген шаралар жүзеге асырылып жатыр. Мен оны қуана құптаймын.&nbsp;Бізде азғантай келеңсіз жағдай болса, соны дабырайтып көрсету сәттері өте көп. Мәселен, ата-ана тарапынан немесе қоғамдағы кейбір мәселелерге байланысты жүзден бір келеңсіз оқиға болып қалса, барлығы сондай секілді қабылданып кетеді. Ал тоқсан тоғызы жақсы бола тұра, кейде көрінбей қалады.&nbsp;Ұстаз мәртебесін көтеруде оларға жасалып жатқан құрметтің, шәкірттерінің, ата-аналардың, жұртшылықтың қолдауы, демеуі жылдан-жылға жақсарып келеді.&nbsp;– Нағиша апай, уақыт бөліп, сұхбат бергеніңізге рақмет. Шығармашылық табыс тілеймін. Ұлболсын ТАЛАПБАЕВА

«Білім-инновация» лицейінің мұғалімі: Төбемнен нұр төгіліп тұрған сәулелі сәт еді

<a href="https://kyzylorda-news.kz/">Kyzylorda-news.kz</a> Осыдан 2 жыл бұрын халыққа Жолдауында Мемлекет басшысы Қасым-Жомарт Тоқаев «Жайлы мектеп» пилоттық жобасын әзірлеу керектігі туралы айтқан еді. Бұл жоба апатты мектептерді жою, үш ауысымды мектептер мен оқушы орындарының тапшылығы мәселесін шешу және білім саласындағы бірқатар мәселелерді шешу мақсатында қолға алынған еді. Бұл бағытта 2023-2025 жылдар аралығында елімізде 369 орта білім беру нысанын салу жоспарланған.&nbsp;Нәтижесінде жоба екі ауысымда 740 мың жаңа оқушы орнын құруға мүмкіндік береді. «Жайлы мектептің» құрылысы екі кезең бойынша жүзеге асады. Бірінші кезең бойынша 2023-2024 жыл аралығында 208 жайлы мектеп салынуы қажет. Ал екінші кезеңде 151 жаңа білім ошағы ел игілігіне беріледі деп жоспарлануда. Осылайша, елімізде 2025 жылға дейін 300-ден астам заманауи үлгідегі жайлы білім ошағы бой көтереді.Аты да заты да бөлек бұл мектептің жобасы, сапалы салынуы, қаржыландыруы «Samruk-Kazyna Construction» АҚ жауапкершілігінде. Республика бюджеті мен Ұлттық қордан ұлттық жобаны жүзеге асыруға 2,38 триллион теңге қаржы бөлінген. Оның ішінде 2023 жылға 499,9 миллиард теңге бөлінсе, биылға 976,7 миллиард теңге, келер жылға – 909,4 миллиард теңге қарастырылған. Сондай-ақ жоспарланған 369 мектептің 206-сы қалада, 163-і ауылдық жерде салынбақ.Ұлттық жобаның уақытылы әрі сапалы жүзеге асуы жоғарыда аталған компанияның бақылауында. Жалпы «Жайлы мектеп» ұлттық жобасының тағы бір мақсаты – отандық өнімді қолдау. Осы орайда нысанды салушы құрылыс мекемелері қажетті жабдықтар мен жиһаздарды отандық тауар өндірушілерден алуы тиіс. Бұл тек сөз жүзінде қалмай, іс жүзінде қадағаланады. Себебі мердігерлерге ай сайын Қазақстанда өндірілген материалдар мен тауарларын пайдалану бойынша есеп беріп отыру міндеттелген. Бұдан бөлек жобаны іске асырудың ашықтығын қамтамасыз ету мақсатында бірыңғай кросс-платформа әзірленген. Жайлы мектептердің мердігерлері апта сайын құрылыстың барысы туралы электрондық форматта есеп дайындап порталға жүктеуге міндеттелген. Осылайша бақылау бір уақытта бірнеше деңгейде жүзеге аспақ. Бұл мектептерді жобалау және салу процесін бақылауға, жобаны әзірлеу кесте бойынша жүріп жатқанына көз жеткізуге мүмкіндік береді.&nbsp;Егер мердігер қандай да бір жұмыс түрлері бойынша үлгермесе немесе артта қалса, порталда ашық көрсетіп тұрады. Сондай-ақ порталда барлық төлем құжаттары мен орындалған жұмыс актілері болады. Осылайша мердігердің қанша ақша алғаны және атқарған жұмысы көрінеді. Сонымен қатар құрылыс нысандарында фото және бейнебақылау орнатылған. Бұл арқылы әрбір мектептің құрылысын техникалық қадағалау сарапшылары бақылай алады. Нәтижесінде сапалы жұмыс болады.Қазіргі таңда «Жайлы мектеп» ұлттық жобасы Қазақстанның барлық өңірлерінде, ауыл-аймақтарында жүзеге асырылуда. Дегенмен мектептерде оқушы орындарының тапшылығы бар аймақтарға басымдық берілген. Бұл қатарда Алматы, Астана, Шымкент сынды ірі қалалар мен Түркістан, Қызылорда облысы да бар. &nbsp;Мемлекет басшысының бастамасымен қолға алынған жобаның игілігін көруді жұртшылық асыға күтуде. Бұл білім ошағында тәлім алғысы келетін оқушылардың қарасы қалың.Ал жұртшылық тағатсыз күткен жайлы білім ордасы қандай артықшылығы бар? Пилоттық жобаны жүзеге асыру аясында jaily-mektep.kz арнайы сайты іске қосылған. Аталған ақпарат порталында «Жайлы мектептің» несімен ерекшеленетіні жазылған. Ондағы ақпарат көзіне сүйенсек, аталған білім ордасының ауданы, сынып бөлмесі басқа мектептерге қарағанда 15-20 процентке кең болмақ. Сонымен бірге техникалық жабдықталуы 4 есе жоғары болады. Теория мен тәжірибеге арналған құрал-жабдықтар толық қамтамасыз етіледі. Заманауи компьютерлер мен интерактивті тақталар орнатылып, қауіпсіздік шарасын сақтауда бейнекамералар, кіріп-шығуды қадағалау жүйесі орнатылады. Сондай-ақ оқушылар мен мұғалімдерге арналған демалыс және нетворкинг аймақтары жабдықталады. Бұдан бөлек 3-4 спорт залы, мектеп аумағында спортпен шұғылдануға және басқа да іс-шараларға арналған алаңдар жасалады. Ерекше балалар үшін кедергісіз орта қамтамасыз етіліп, пандус, лифт, арнайы дәретханалар және инклюзивті білім беру кабинеті жұмыс істемек. Техникалық бағыттағы кабинеттер қажетті құрылғылармен қамтамасыз етіліп, оқушылардың теорияны тәжірибемен ұштастыруына мүмкіндік жасалады. Робототехниканы игеруге басымдық беріледі. Сонымен қатар жоғары сынып пен бастауыш сынып ғимараттары бөлек орналасады.Аймақта ұлттық жоба аясында 2025 жылға дейін 12300 орынға арналған 21 мектеп бой көтеруі керек. Оның ішінде облыс орталығынан бастап барлық аудан және ауылдар қамтылған. Атап айтқанда, Арал ауданында және Сексеуіл, Жақсықылыш ауылында – 300 орындық, Жалағаш ауданында – 300, Қазалы ауданына қарасты Жанқожа батыр ауылында – 300, Әйтеке би кентінде – 600, Жаңақорған ауданында – 600, оған қарасты Жаңарық ауылдық округінде – 300, Қармақшы ауданының ІІІ интернационал ауылында – 300, Жосалы, Тереңөзек кентінде – 300, Шиеліде – 900 орындық білім ошағы бой көтереді. Ал Қызылорда қаласы бойынша 6 жайлы мектеп салынады. Оның ішінде сол жағалауда – 900, СПМК-70 – 1500, Арайда – 1500, КБИ-де – 600, Ж.Махамбетов және Қызылжарма ауылдық округінде – 600 орындық мектеп бой көтереді деп жоспарланған. Бұл ретте аймақ басшысы Нұрлыбек Нәлібаев жаз бойы құрылыс алаңдарын аралап, нысанның сапалы салынуын қадағалады.Бұл туралы облыс әкімдігінің «facebook» парақшасында биыл 6900 орындық 10 мектеп, алдағы жылы 5400 орындық 11 мектеп пайдалануға берілетіні айтылған. Облыс әкімдігі оларға инфрақұрылым жеткізуге жергілікті бюджеттен 118,4 миллион теңге бөліп, жоба-сметалық құжаттары әзірленді, сараптаманың оң қорытындысы алынды. Инфрақұрылым жүргізуге жергілікті бюджеттен 1,7 миллиард теңге бөлініп, қазір 10 мектептегі құрылыс-монтаж жұмыстары толық аяқталды. Биыл құрылысы басталатын 11 мектептің жер телімдері белгіленіп, «Самұрық-Қазына Констракшн» акционерлік қоғамына берілген.Ұлттық жоба туралы ақпарат беретін «Jaily-mektep.kz» сайтында көрсетілген ақпаратқа сүйенсек, биыл Қызылорда қаласына қарасты Ж.Махамбетов ауылынан басқа аумақтардағы білім ошағы пайдалануға берілуі тиіс.Ал аймақтағы алғашқы 900 орындық «Жайлы мектеп» сол жағалаудан қала күні қарсаңында оқушылар игілігіне берілді. Білім ғимаратының ашылу салтанатына облыс әкімі Нұрлыбек Нәлібаев арнайы қатысты. Шара барысында аймақ басшысы қала тұрғындарын жаңа мектептің ашылуымен құттықтап, жиналған жұртшылыққа ізгі тілегін айтты.<blockquote>– Жас ұрпақтың білімі мен оқу-ағарту ісіне барынша көңіл бөлу – мемлекетіміздің ең маңызды міндеті. Биыл өңірдің білім саласына бөлінген қаржы 262 миллиард 100 миллион теңгеге жетіп, облыс бюджетінің 35,2 пайызын құрады. Мемлекет басшысының бастамасымен «Жайлы мектеп» ұлттық жобасы еліміздің барлық аймағында жүзеге асырылуда. Ұлттық жоба аясында 740 мың оқушыға арналған 369 мектеп салынады. Осы жобамен өңірімізде 12 300 орынға лайықталған 21 мектеп салу жоспарланған, оның 10-ның құрылысы жүргізілуде. «Жайлы мектеп» жобасын іске асыру арқылы аймағымыздағы 4 апатты және 3 бейімделген мектептің мәселесі түбегейлі шешімін табады. Бүгін республикалық бюджеттің тікелей қаржыландыруымен, «Самұрық-Қазына» акционерлік қоғамының үйлестіруімен, 6 миллиард 851 миллион теңгеге салынған облыстағы алғашқы 900 орындық «Жайлы мектеп» ел игілігіне берілуде. Бұл ғимарат Қызылорда қаласының сол жағалауы тұрғындарының мемлекеттік мектепке деген сұранысына толық жауап береді. Білім ордасында шәкірттердің барлық пәнді оқып үйренуіне, ұстаздардың шығармашылықпен еңбек етуіне толық мүмкіндік жасалған. Өскелең ұрпақтың игілігі үшін Жаңақорған, Шиелі аудандарында 200 орындық оқушылар үйі мен 50 орындық өнер мектебі, «СаутсОйл» компаниясының демеушілігімен музыкалық колледждің жаңа ғимараты, Шығармашылық-инновациялық орталық, «Білімді қолдау қоры» есебінен физика-математика мектеп-интернаты салынуда. Мектеп-интернат екінші тоқсанда пайдалануға беріледі.</blockquote>Жаңа мектеп салу, апатты мектептер мен үш ауысымдық оқытуды жою – білім саласындағы басым бағыттың ең маңыздысы. Осы білім ошағында ұстаз бен шәкірт, мектеп пен ата-ана байланысы артып, алдыңғы буынның ізгі жолын жалғаған білімді де талантты, санасы сергек, ойы ұшқыр, бәсекеге қабілетті жас ұрпақ тәрбиеленіп шығарына сеніміміз мол. Жаңа оқу жылында биік табыстарға қол жеткізіп, алға қойған мақсаттарыңыз орындалсын! Ел мүддесі жолындағы игі істерді бірге атқарайық, жетістікке бірге жетейік! Егемен еліміздің ертеңі еңселі, тәуелсіздігіміз тұғырлы болғай!», – деді облыс әкімі Нұрлыбек Нәлібаев ашылу рәсімінде.«Жайлы мектептің» ашылу жиынына сонымен бірге «Самұрық-Қазына Констракшн» акционерлік қоғамының басқарма төрағасы Мәулен Айманбетовте болды. Ол қала тұрғындарын жаңа мектептің ашылуымен құттықтап, қатысушыларға игі тілегін жеткізді.Жоспар бойынша жыл соңына дейін 12 жаңа мектеп және 4 мектеп жанындағы қосымша құрылыс аяқталып, пайдалануға беріледі деп күтілуде. Өткен жылы облыс орталығындағы 4 мектепке 1850 оқушыға арналған қосымша ғимарат салынған еді. Осылайша артық шығындалмай, бюджетке салмақ салмай үш ауысымды оқытуға көшуі мүмкін мектептер мәселесі шешімін тапқан еді. Бұл бағытта былтыр 1170 орындық төрт мектеп, осы жылдың басында 550 орындық екі мектеп пайдалануға берілді. Сонымен қатар биылғы жаңа оқу жылында шиелілік өрендер «Білім беру инфрақұрылымын қолдау» қорының қаржыландыруымен 100 орындық мектепте, ал жаңақорғандық оқушылар жергілікті бюджет есебінен 150 орындық мектепте білім білім шырағын жағуға мүмкіндік алды.А.ӘЛІМ

Жайлы мектеп сапалы білім кепілі

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы, Қазалы ауданында балалардың зейінін ашып қана қоймай, балғындарды бақытқа бөлеген – «Алпамыс» бөбекжай-балабақшасы бар. Заманауи ілім менен білім берер, аудандағы бәсі биік балабақшаның алған асуы, бағындырған белесі де ауызтолтырып айтарлықтай. Жақында аталған орынға барып, меңгерушісі Жанат Көлановамен жолығып, бала бағбандарының бүгіні мен болашағын саралап, көріп қайтқан едік.Әйтеке би кентінің 5-ші квартал аталып кеткен аймағында орналасқан №21 «Алпамыс» бөбекжай-балабақшасы» «Балапан» мемлекеттік бағдарламасы аясында салынып, 2014 жылы қазан айының алтыншы жұлдызынан бастап пайдалануға берілді. Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан өтіп, ұлт болашағы – бүлдіршіндерді заман талабына сай тәрбиелеуде елеулі үлес қосып келеді. Балабақшада 12 топ бар. Бұнда баланы қабылдау, ойын, жатын, ыдыс-аяққа және қол жууға арналған бөлме, меңгеруші, әдіскер кабинеті, логопед, дефектолог, есепші, педагог-психолог, шаруашылық меңгерушісі кабинеті, музыка, денешынықтыру залы, медициналық кабинет және оқшаулау бөлмесімен қамтамасыз етілген. Сонымен қатар бүлдіршіндерге патриоттық, эстетикалық, адамгершілік тәрбие беру, өз ой-пікірін білдіре алатын, салауатты өмір салтына сай, болашақтың тірегі болатын дені сау, жан-жақты азамат етіп тәрбиелеуде балабақшада дене шынықтыру нұсқаушысы, педагог ұйымдастырушы, педагог-психолог, логопед, дефектолог мамандары, музыка жетекшісі, би жетекшісі жұмыс істейді.<blockquote>– Мектепке дейінгі тәрбие мен оқытудың үлгілік оқу бағдарламасын басшылыққа алып, әр баланың қызығушылығын, ерекшеліктері мен қажеттіліктерін ескере отырып, жалпы адами және ұлттық құндылықтар негізінде оларды толыққанды дамыту мен әлеуетін ашу мақсатында жұмыс жүргізіп келеді. Рухани адамгершілік құндылықтың негізі – халық педагогикасынан бастау алады. Оның бірнеше ғасырлық тәжірибесіне сүйене отырып, рухани құндылықты сақтай отырып, болашақ ұрпақты еңбекке, қоғамдық ортаға дайындау, имандылық қасиеттерін бала бойына сіңіру әрбір педагогке жүктелген. Сондықтан да заман талабынан кеш қалмай жаңашылдыққа, инновациялық өзгерістерді күнделікті тәрбиелеу – білім беру процестерінде ұйымдастыру балабақша педагогтеріне қойылатын басты талаптардың бірі, – дейді балабақша меңгерушісі Жанат Көланова.</blockquote>Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан өтіп, ұлт болашағы – бүлдіршіндерді заман талабына сай тәрбиелеуде елеулі үлес қосып келеді. Балабақша педагогтерінің озық тәжірибелерін аудан, аймақ, облыс көлемінде тарату мақсатында аудандық білім бөлімінің ұйымдастыруымен «Мектепке дейінгі ұйымда тәрбиелеу мен оқыту үшін баланың жас ерек¬шеліктеріне сәйкес біліктері мен дағдыларын әрекет түрлерінде ойын ар¬қылы қалыптастыру» тақырыбында аудандық семинар өткізілді. Семинарға аудандағы мектепке дейінгі ұйымдардан екі жүзге жуық педагог қатысты. Сонымен бірге педагогтердің шығармашылық шеберлігін шыңдау, педагогикалық тәжірибелерін көпшілікке тарату, мектепке дейінгі балалардың заманауи ақпараттық-технологияларды пайлану арқылы білім, білік дағдыларын меңгерту мақсатында 2024 жылы 22 мамыр күні Қызылорда облыстық оқу орталығының ұйымдастырумен «Тәрбиеленушілердің дене, зияткерлік және жеке тұлғалық дамуын қамтамасыз етудегі жаңашыл бағыттар, ортақ ізденіс, тиімді нәтиже» тақырыбындағы облыстық вебинар өткізілді. Вебинарға облыстық оқу орталығы директорының орынбасары Г.Б.Дихамбаева, облыстық оқу орталығы мектепке дейінгі бөлімінің меңгерушісі Ж.С.Хожбанова және облыс көлемінде 100-ге жуық педагог қатысып, тәжірибе алмасып, оң пікірлерін айтты. Аталған семинарларда мектепке дейінгі мекемедегі білім берудің 5 дағдысы бойынша заманауи, ақпараттық технологияларды пайдаланып, өз тәжірибесін бөлісіп, шығармашылықпен жұмыс жасаған Г.Жұбаныш, М.Танирбергенова, А.Бауыржан, А.Утеген, Н.Нұрылла, С.Тұрғанбай, М.Шапихова, А.Жолмырзаева, Т.Казмамбетова, М.Мейрамбек, А.Нұрдәулет, Б.Көзімай, Г.Жолмырзаева, Г.Уразымбетова, Б.Сержанова, Р.Алгазиевалардың ашық ұйымдастырылған іс-әрекеттері ұсынылды.<blockquote>– 2024 жылдың қаңтар айынан бастап балабақшамызда «IT балабақша заман талабы» жоба аясында, мектепке дейінгі білім беруде ақпараттық технологияларды кеңінен пайдалану мақсатында STEAM кабинет ашылды. Бұл кабинеттің мақсаты – цифрлық білім беру ресурстарын пайдалану арқылы мектепке дейінгі білім беру сапасын арттыру, мектепке дейінгі ұйымда өзгерістерді енгізу үшін қажеттіліктерді анықтау, заман талабына сай инновациялық технологияларды енгізу үшін IT-жобасын іске асыру, «Тірек білім беру ұйымы» базасында ақпараттық технологияларды пайдалану тәжірибесін облыстың басқа білім беру ұйымдарына тарату, жаңартылған білім беру мазмұнына көшуді ескеріп, цифрлық технологияларға негізделген оқу бағдарламаларын әзірлеу, мектепке дейінгі ұйымда өзгерістерді енгізе отырып, заманауи тұлға қалыптастыру және бала, ата-ана, педагог бірлесіп, мақсатты нәтиженің жоғары көрсеткішіне ие болу, – дейді балабақша кабинеттерімен таныстырған Жанат Қуанышқызы.</blockquote>Ұйымдастырылған тәрбиелеу – білім беру жұмыстарының нәтижесінде балабақша бірнеше рет аудандық білім бөлімі, облыстық білім басқармасы, Қызылорда облыстық оқу орталығының және республикалық балаларды ерте дамыту институтының Алғыс хаттарымен марапатталды. Ұлболсын ТАЛАПБАЕВА

Балғындарды бақытқа бөлеген балабақша

&nbsp;&nbsp;<a href="https://kyzylorda-news.kz/">Kyzylorda-news.kz</a> 35 жылдық тарихы бар А.Байтұрсынов атындағы №211 орта мектебі білім беру ісінде жаңа бастамаларды жүзеге асырып,&nbsp;білімді, білікті, бәсекеге қабілетті ұрпақ тәрбиелеуді мақсат еткен білім ордасы. Алаш қайраткерінің есімі берілген білім ошағы ұлт ұстазының атына лайық білім беруді басты мақсат санайды.Заман талабына сай ғылымды игеру – бүгінгі күннің басты талабы. Бұл ретте бар жауапкершілік білім беру орындарына артылатыны сөзсіз. Қазіргі таңда елімізде білім беруде уақыт талабына сай инновациялық технологияларды қолдану міндеттелген.&nbsp;Жаңа инновациялық тәсілдер негізінде мектептерге жағдай жасау – білім саласын дамытудың, білім мен ғылымды игеретін ұрпақ тәрбиелеудің негізі болмақ.Мыңнан астам шәкірт тәрбиелеп отырған оқу ордасының ғимараты биыл күрделі жөндеуден өткен. Жаңа ғимарат іші жарық, жылы, жайлы. Оқушының білім алуына қажетті құрал-жабдықтармен қамтамасыз етілген. Оқу кабинеттері, зертханалар заманауи технологиямен жабдықталып, баланың тек теория тұрғысында емес, тәжірибе жасап көруіне де қолайлы жағдай жасалған. «Білім берудегі өзгерістің 1000 көшбасшысы» жобасы аясында тағайындалған мектеп басшысы Айжан Әлімова білім ошағының жұмысын жандандырып, сапалы білім беруді арттыруда жас та болса іскерлігін көрсетіп, қолдан келер мүмкіндікті қалт жібермей жүйелі жүргізіп келеді. &nbsp;Ол алда үлкен жобаларды жүзеге асыруды көздеп отырғанын айтады.Бүгінде орта мектепте қазақ тілінің қолдану аясын кеңейту, оқушылардың қазақ тілінде ойлау және сөйлеу дағдысын жетілдіру мақсатында республикалық «Тілге бойлау» жобасы қолға алынуда. Бұл аймақта алғаш рет пилоттық жоба ретінде жүзеге асырылмақ. Оны жүзеге асыруда А.Байтұрсынов атындағы №211 орта мектебі таңдалған.<blockquote>– Оқу-ағарту министрлігі Ы.Алтынсарин атындағы ұлттық білім академиясы «Тілге бойлау» жобасының концепциясын іске асыру мақсатында мемлекеттік қазақ мектептерде білім алушылардың тілдік дағдыларын жетілдіруді қолға алуда. Жоба аясында 6 ғылыми зерттеу зертханасы мен ҚазТест орталығы жұмыс істейді. Бүгінде Қорқыт ата атындағы Қызылорда университеті ғалымдарымен шығармашылық байланыс орнатылып, екі жақты меморандумға қол қойылды. Сонымен бірге Алматы қаласындағы мемлекетті тілді дамыту институты, Қызылорда облысының тілдерді оқыту орталығы, облыстық әдістемелік орталықпен тығыз байланыс орнатылған, – дейді мектеп директоры.</blockquote>Білімді&nbsp;ұрпақтың мектеп қабырғасынан жан-жақты дамуы, ізденісте болуы керек-ақ. Ал мектеп қабырғасында жүзеге асатын жобалар оқушының қабілетін ашуға, дағды қалыптастыруға таптырмас құрал.«Тілге бойлау» жобасының да оқушыларға берері мол. Соның нәтижесінде оқушылардың қазақ тілін терең меңгеруіне, таза, анық сөйлеуіне, &nbsp;сөз саптауына, тіпті шығарма, мәтінді сауатты жазуды игеруіне де сеп болмақ. Білім ордасының басшысы Айжан Шорабекқызының айтуынша, жоба аясында оқушылар әр пән бойынша термин сөздерді қолданбай қазақша атауымен айтуға дағдыланады.<blockquote>– Жоба бойынша 6 зерттеу бағыты қамтылған. Оның ішінде «Тыңдалым» ғылыми-зерттеу зертханасында оқушының бойына ұлттық құндылықты сіңіру, әлемді қазақ тілі арқылы таныту, рухани, ұлттық дүниетанымын кеңейту міндеттелсе, «Айтылым әрекеті» зертханасында ауызша сөйлеудегі әдеп, мәнерлі сөйлеу шеберлігін үйретеді. Сол сияқты «Академиялық жазылым» зертханасында әлеуметтік-мәдени, ғылыми, ресми, іскерлік бағытта мәтін жазуды игереді. Яғни мәтінге, ғылыми жобаға жоспар құру, шығарма, эссе, мазмұндама жазуда ойын көркем жеткізуді әрі орфографиялық, пунктуациялық қатесіз жазуды үйренеді. Бұдан бөлек «Оқу сауаттылығы» зертханасы бар. Мұнда оқушылардың функционалдық сауаттылығын, академиялық білімі мен дағдысын, оқу сауаттылығының сапасын арттыруға басымдық беріледі. Ал «Грамматикалық өнер» зертханасында &nbsp; &nbsp; оқушылардың коммуникативтік дағдысы қалыптастырылады. Қазақ тілі білімінің мета тілін меңгеру арқылы түрлі деңгейдегі пәндік олимпиадаларда, ғылыми жобаларда өз мүмкіндіктерін көрсететін болады. Жобаның соңғы бағыты «Ахметтану» ғылыми-зерттеу зертханасы деп аталады. Мұнда гуманитарлық және жаратылыстану пәндері бойынша ғылыми-зерттеу жұмысы ұйымдастырылады, – дейді Айжан Шорабекқызы.</blockquote>Мектепте тілді меңгеру жұмысы мұнымен шектелмейді. &nbsp;Қазақ тілін меңгеру деңгейін бағалау бойынша Қазтест орталығының базасы қалыптаспақ. Қазіргі таңда орталық базасы қажетті техникалық жабдықтармен қамтамасыз етілген.<blockquote>– Ұлттық тестілеу орталығымен алдағы уақытта біліктілік тестін, сондай-ақ магистратура, докторантураға түсуде дайындық тесттерінен өтуге мүмкіндік жасалуда. Сонымен бірге 4-9 сыныптарға арналған сынамалы тест топтамасы әзірленді. ПИЗА, ПИРЛС, ТИМСС, АЙСИЛС-ке типтес тапсырмалар құрастырылды, – дейді білім ордасының басшысы.</blockquote>Қазақ тілі білімін дамытуда қажырлы еңбек еткен Алаш қайраткері Ахмет Байтұрсынов атындағы мектеп ұжымы атына заты сай білім ошағы болуды мақсат еткен. Сол мақсатқа жету үшін «Тілге бойлау» пилоттық жобасын сәтті жүзеге асыруды көздейді.&nbsp; Еліміздің білім саласын әлемдік талапқа сай ету, білім сапасын арттыру, сол арқылы оқушылардың 3 тілді жетік меңгеруі, ақпарат пен технология заманында заманауи технологиямен жұмыс істей білуін, креативті ойлап, талдау жүргізе алуын, олардың жеке, жұппен, топпен бірге жұмыс істей алуын қалыптастыру ұстаздарға қойылар басты талап. Бұл ретте мектеп ұжымы оқушыларға сапалы білім беріп, саналы ұрпақ, тұлға ретінде өсуіне күш салуда.&nbsp; &nbsp;Ұлағаттты жандардың шәкірт тәрбиелеудегі еңбегі еш кеткен емес. Білім беруде ұстаз үмітін ақтаған оқушылар жетерлік. Олар мектеп абыройын асырып, білім сапасының артуына да өз үлесін қосуда. Қалалық, облыстық, республикалық сайыстарында үздік шығып, білім додасында оза шапқан шәкірттер мектеп мақтанышы. Былтырғы оқу жылының қорытындысы бойынша межелі мақсатқа жеткен білім ордасын тәмамдаған 40 түлектің 26-сы білім грантын иеленді. Білімді де тәрбиелі шәкірт тәрбиелеу ісінде мектепте 80-ге жуық мұғалім жұмыс істеуде. Оның 30-ы педагог-зерттеуші болса, 14-і педагог-сарапшы, 20 педагог-модератор бар. Сонымен қатар мектепте инклюзивті білім беру кабинеті жасақталып, ерекше балалардың қоғамға бейімделуіне жағдай жасалуда. Бұдан бөлек оқушының рухани толысуына, шығармашылығын дамытуына Coworking орталығының да септігі мол. Одан басқа 32573 кітап қоры бар кітапхана қызметін кітапқұмар оқушылар игілігіне пайдалануда.Білім ордасында тек білім беру ісі емес, шәкірттерді өнерге баулу, қабілетін ашу, спортқа бейімдеу шаралары да қолға алынған. Қыз баласының өнерді игеріп, қазақы дәстүрді меңгергені, ұлттық құндылықты дәріптей алғаны жақсы емес пе? Осы орайда білім ордасында «Іскер ана» жобасы қолға алынған. Мұндағы мақсат – халқымыздың салт-дәстүрін қыз балалардың бойына сіңіру, тұрмыстық бұйымдар жасауды үйрету, қолөнер шеберлігіне баулу. Сол үшін арнайы кабинет жабдықталып, оны оқушылардың жасаған бұйымдарымен толықтырған. Кабинет тоқу құралдары, тігін машиналары сынды өзге де қажетті құрал-жабдықтармен жабдықталған. Ал оқушылардың қолынан шыққан қолөнер туындылары бөлмеге ерекше сән беріп тұр.Баланы өнерге баулуда қолөнер үйірмесінен бөлек «Сарыжайлау» домбыра үйірмесі де жұмыс істейді.Ұлттық құндылықты бала бойына сіңіруде мектеп ұжымы басымдық берген тағы бір дүние тоғызқұмалақ ойынының тың әдісінің енгізілуі. Мұндағы ерекшелік тоғызқұмалақтың жаңа түрінде оқушылар ойынды асық арқылы және топпен ойнайды. Оның өзіндік ережесі мен тәртібі бар. «Бұл баланың ақыл ойын дамытып қана қоймай, қимыл-қозғалысының ширақ болуына да әсер етеді» дейді ұстаздар қауымы. Сондай-ақ шахмат, каратэ-до үйірмесі де оқушылар үшін жұмыс істеуде. Тоғызқұмалақ үйірмесіне 70 оқушы барса, 50 оқушы шахмат, 40 оқушы каратэ-до спортын үйренуде.Қазіргі таңда оқушы қауіпсіздігі – басты назарда. Бұл ретте білім ошағы күзет қызметі, өрт, дыбыстық ескерту мен бейнебақылау жүйесімен қамтамасыз етілген.Оқушыға сапалы білім, саналы тәрбие беріп, өнерге үйретіп, спортқа баулып жан-жақты дамуы үшін қолайлы жағдай жасаған білім ұясынан келешек мықты азаматтардың шығары сөзсіз. Мұндай заманауи мектепте білім алған бала да арман жоқ.&nbsp;Айдана Сейіл

Білім бәсекесінде бәсі биік мектеп

<a href="https://kyzylorda-news.kz/">Kyzylorda-news.kz</a> Ұлттық құндылығымыз бен болмысымыздың түп тамыры ең алдымен ауылдан бастау алады. Ауылдың рухани ошағына айналған ауыл мәдениеті бүгінде кеңге қанат жайып келеді. Мәдениет ошақтарының бүгінгі күні атқарып жатқан ілкімді істерінің нәтижесінде ұлттық мәдениетіміздің мәртебесі өсуде. Ауыл мәдениетінің өсіп-өркендеуіне өз үлесін қосып жүрген талантты өнерпаздар ең алдымен үйірмеден қанат қағатыны белгілі. Сырдария ауданына қарасты Іңкәрдария ауылдық клуб үйі жанынан ашылған «Сұлу-ай» шығармашылық өнер орталығындағы Айгерім Жұмабекова жетекшілік ететін «Көркем оқу» үйірмесінде ауыл балалары қазақ халқының атақты ақын-жазушыларының шығармаларын нақышына келтіріп, мәнерлеп оқу дағдысын қалыптастыруда.&nbsp;Бірнеше жылдан бері жергілікті халықтың баласын өнерге баулуға ықпал жасаған «Сұлу-ай» шығармашылық өнер орталығының өрендері көптеген белесті бағындырып келеді. Қызылқұм топырағынан түлеп ұшқан әрбір шәкірт өнер мен білімде өздерін қатар шыңдауда. Расында, бала қабілетін ашуда сан түрлі әдіс-тәсілге иек артатын сала мамандары қазақ халқының тағылымды сөздерін оларға жаттатуға тырысады.<blockquote>– Іңкәрдария ауылдық клуб үйінің жанынан құрылған «Көркем оқу» үйірмесіне үлкен және кіші топтан құралған барлығы 20 оқушы қатысады. Көркем оқу үйірмесі аптасына екі мәрте өткізіледі. Жалпы үйірменің басты мақсаты оқушылардың бос уақытын тиімді өткізу, шығармашылығын шыңдау, поэзияға, әдебиетке, өнерге жақын оқушыларды көркемсөз оқу шеберлігіне, мәнерлеп оқытуға үйрету, қызығушылығын арттыру болып табылады. Бүгінде үйірме аясында танымал ақындардың шығармашылығына байланысты кездесулер, еске алу және шығармашылық кештер, концерттер, түрлі байқаулар ұйымдастырылып отырады. Жетекші ретінде үйірмеге қатысатын әр оқушы өзінің өнерін көрсетіп, үнемі белсенділік танытуын басты назарда ұстаймын. Бүгінгі таңда үйірмеге қатысатын шәкірттерімнің жеткен жетістіктері де аз емес. Ауыз толтырып айтатындай біршама жетістіктері мен марапаттары бар. Атап айтқанда, Алматы қаласында ұйымдастырылған «Балбұлақ» атты халықаралық балалар байқауына шәкіртім Асылым Сұлтанова қатысып, «көркем сөз» номинациясы бойынша бірінші орынды иеленген болатын. Сонымен қатар Алматы қаласында өткізілген «Жеті өнер» шығармашылық орталығының ұйымдастыруымен «Наурыз айы туғанда» атты халықаралық өнер байқауына шәкірттерім «көркем сөз» номинациясы бойынша қатысып Нұрай Мұратбек, Зейнеп Нұрланқызы, Асылым Сұлтанова, Ақбота Ермаханова, Халиалла Жумабеков бас жүлде иеленсе, Кәусар Мұратбек, Аяулым Алпысбай, Мәншүк Бисенбай, Ақнұр Бишенбекова бірінші орынды қанжығаларына байлап, іргелі ауылымыздың мәртебесін биіктеткен болатын, – дейді Айгерім Жұмабекова.</blockquote>Бала күнінен шығармашылыққа, өнерге жақын Айгерім Жұмабекова сөздің, тілдің тазалығына өте қатты мән береді. Түрлі жанрдағы кітапты көп оқитын ол шығарма жазуға бейім. Білікті маманның әріптестерінің айтуынша Айгерім өте еңбекқор, ізденімпаз, жұмыс талғамайтын көрінеді. Өз ісінің білікті маманы әдіскерлік жұмысымен қатар көркем оқу және би үйірмесі жұмыстарын қатар алып жүреді. Шәкірттері түрлі сайыс пен байқауларға үнемі белсене қатысып келеді. Мәселен, биылғы жылдың 24 маусым күні Шымкент қаласында өткен байқауда көркем оқу үйірмесінің белсенді мүшесі Ақбота Ермаханова көрнекті ақын Мұқағали Мақатаевтың «Мен сені сағынғанда» өлеңін оқып, бірінші орынды иеленіп Түркия еліне халықаралық байқауға жолдама алды. Сонымен қатар Шымкент қаласында сәуір айында өткен республикалық байқауға Жанерке Нұрланқызы жеке би жанры бойынша қатысып, бірінші орынды қанжығасына байлап қана қоймай, Ташкент қаласына жолдама ұтып алды. Шәкірттерінің жеткен әр жетістігі Айгерімнің еңбегінің жемісі, нәтижесі екені сөзсіз.<blockquote>– «Сұлу-ай» шығармашылық өнер орталығы тарапынан өнерпаздарға қолдау көрсетіліп тұрады. Өскелең ұрпақты өнерге барынша баулу маңыздылығын жоймайды. Шын мәнінде, «Көркем оқу» үйірмесі баланы қазақылыққа, төл мәдениетін сақтауға, ой-өрісін дамытуға зор мүмкіндік туғызады. Тынымсыз еңбектің нәтижесінде киелі сахнада оқушыларым тарихи, әдеби шығармаларды нақышына келтіріп орындауда. Қашанда бала сауатын аша отырып, табиғатына сай келетін шығарма таңдауға тырысамын. Мұндайда кәсіби біліктілікті шыңдай отырып, әрбір сабаққа дайындықпен келемін. Ең алдымен, бала өзінің мәнерлеп оқитын шығармасының шығу тарихына тереңнен қаныққаны дұрыс. Бұның барлығы – үйірме сабақтары барысында бала санасына сіңіріледі. Біз баламен жұмыс жасау арқылы өнерден өзіндік орнын табуға жағдай жасаймыз, – дейді Айгерім Жұмабекова.</blockquote>Көркем оқу үйірмесіне қатысып, жақсы жетістіктерге жетіп жүрген балалар алдағы уақытта ауданның өнер, мәдениет, білім саласын дамытуға үлес қосады деп сенеміз. Өнерлінің өрісін кеңейткен сала мамандарының жұмысына сәттілік тілейміз.А.ЖҮНІСОВА

Ауыл балаларының үйірмеден үйренері көп

<a href="https://kyzylorda-news.kz/">Kyzylorda-news.kz</a> Бастауыш сынып мұғалімі мамандығы – барлық мамандықтардың іргетасы болып табылатын ең ізгілікті, сұранысқа ие және байыпты мамандық. Педагог мемлекеттің болашағы қолында болатын жастардың дүниетанымын қалыптастырумен айналысады. Бұл мамандықты өмір салты деп атауға болады. Өйткені мұғалім барлық оқушыларының мінез-құлқын қалыптастыруға жауапты. Бірінші мұғалім түсініксіз мәселелерді шешеді және күн сайын балалардың санасында үздіксіз туындайтын көптеген сұраққа жауап береді. Әрбір шешім немесе жауап сауатты және стратегиялық тұрғыдан дұрыс болуы керек. Себебі бастауыш мектепте алған білімді адам саналы өмір бойы пайдаланады.Бақыткүл Жақсыбайқызы кішкентай балақайлармен тығыз жұмыс істегеніне де 36 жыл болды. Бала кезден армандаған кәсібіне қол жеткізіп, қаншама белестерді бағындырды. Педагогикалық еңбек өтілінде көптеген жетістіктерімен әріптестеріне үлгі болып келеді.<blockquote>– Бастауыш сынып мұғалімі мамандығының бірегейлігі бірден бірнеше әлеуметтік мәртебелерді біріктіруде жатыр. Мұғалім үшін ең үлкен қуаныш – балалар, олардың жетістіктері, олардың көпшілігімен мақтанамын да. Маған балалармен жұмыс істеу қызықты. Жасым келді деп, қол қусырып отырмаймын. Жастармен қатар заман талабына сай біліктілікті арттырып отырамын. Компьютерленген уақыт болғандықтан ба, қазіргі балалардың ойы ұшқыр. Қойылған сұраққа ойланбастан тез жауап береді. Бастауыш сатыдан бастап баланың тілін, ой-өрісін, қиялы мен шығармашылығын дамыту арқылы заман талабына сай жан-жақты дамыған жеке тұлғаны қалыптастыру оңай шаруа емес. Қаншама ізденіс пен еңбекті талап етеді. Шәкірттеріммен бірге оқу-тәрбие процесін жаңаша ұйымдастыруға, олардың шығармашылық таным-қабілеттерін дамыта отырып, жеке ерекшеліктерін де таныта білуге күш-қуатымды жұмсаудан жалыққан емеспін. Еліміз дамыған алдыңғы қатарлы мемлекеттердің қатарынан көрінуді мақсат етуде. Бұл мақсатқа жету үшін әрбір азаматты мектеп қабырғасынан кәсіби біліктілікке баулу қажет, – дейді Бақыткүл Әлжан.</blockquote>Бүгінде Бақытгүл Жақсыбайқызы – С.Сей­фуллин атындағы №165 орта мектепте бастауыш сынып мұғалімі. Биыл төртінші сыныпқа дәріс береді.«Ел боламын десең, бесігіңді түзе» деген бар. Мектептегі білім мен тәрбие беру негізі бастауыш сыныптардан басталады. Бастауыш сынып мұғалімі – пән оқытушы ғана емес, ол – бағбан, баланың болашағына бағыт беруші, бала бойындағы қабілетінің көзін ашушы, қорғанышы деуге болады. Барлық білімнің негізі бастауышта қаланатын болса, балаға дәл осы кезде білім беріп қалудың маңызы зор. Баланы оқуға үйрету мен тәрбиелеу, оның тұлға ретінде өзін-өзі ашуға, жалпы дамуының қалыптасуына жағдай жасайтын негізгі саты. Жалпы адамның мектептегі білім алу кезеңі және тұтас педагогикалық үрдіс сапалы нәтижеге жету үшін бастауыш сыныптардағы оқу-тәрбие үрдісі қазіргі заман талаптарына сай құрылуы шарт. Сондықтан бастауыш мұғаліміне қойылар талап пен жауапкершілік те салмақты.«Қазіргі таңдағы мұғалім оқушы үшін «дайын» білім көзі ғана болмай, керісінше кіші мектеп оқушыларының танымдық іс-әрекеттерінің ұйымдастырушысы және үйлестірушісі бола білу қажет. Ол үшін мұғалім өз бетімен білімін жетілдіре алатын, шығармашылық, сыни ойлауы қалыптасқан, қалыптан тыс кәсіби міндеттерін шешуде жаңаша жол табуға дағдыланған маман болуы қажет. Бас­тауыш сынып оқушыларының тәрбиесі, оқуы мен дамуы жайлы теория мен тәрбие таным мәселесінде қиылысады. Қазіргі балалардың таным белсенділігі мен қызығушылығын қалыптастыруға септігін тигізетін оқытудың инновациялық әдіс-тәсілдерін білім беруде орынды пайдалансақ, ол өзінің сипатын береді, яғни оқушының жаттығу жұмысы нәтижесінде деңгейлері көтеріліп, пәнге деген қызығушылығы артады. Оқушының білім сапасы жоғарылап, логикалық ойлау мен шығармашылық іс-әрекетке қабілеті артады деген тұжырымда Бақыткүл Әлжан.&nbsp;Айнұр ҚАЗМАҒАМБЕТОВА

Бақыткүл Жақсыбайқызы: "Мұғалім үшін ең үлкен қуаныш – балалар, олардың жетістіктері"

Білім мен тәжірибе ұштасқан оқу ордасы

<a href="https://kyzylorda-news.kz/">Kyzylorda-news.kz</a> Қашанда сапалы білімнің іргетасы бастауыш сыныпта қалыптасады. Сондықтан мектеп табалдырығын аттаған әрбір балаға бағыт-бағдар беретін алғашқы ұстаздың ұлылығын барлық адам мойындайды. Мамандыққа деген адалдықты шәкіртке деген сүйіспеншілікпен ұштастырған алғашқы ұстаз бала жанының бағбаны екені сөзсіз.&nbsp; Кенжегүл Раманқұлова – 35 жылға жуық абыройлы қызмет атқарып, терең білім мен тәлімді тәрбиені шәкірттеріне сіңіріп, адамға тән асыл қасиеттерді бойына жинаған саналы ғұмырын ұстаздыққа арнаған ұлағат иесі. Білікті ұстаз талай жыл бойы ауыл балаларына білім мен тәрбиені қатар беріп, қажырлы еңбек етіп келеді.Ұлағатты ұстаз Кенжегүл Жорабекқызы 35 жылға жуық уақыт Сырдария ауданына қарасты Асқар Тоқмағамбетов ауылындағы №135 орта мектепте қызмет етіп келеді. Орта мектепті ойдағыдай аяқтаған соң 1987-1990 жылдары М.Мәметова атындағы педагогикалық училищені жалпы білім беретін мектептің бастауыш кластарында оқыту мамандығы бойынша үздік дипломмен бітіріп, 1991-1994 жылдары Қорқыт ата атындағы Қызылорда педагогикалық институтында бастауыш оқытудың педагогикасы мен әдістемесі маман­дығын игеріп шығады. Бала кезінен білімге құштар болған білікті маман алғашқы еңбек жолын 1990 жылы №135 А.Тоқмағамбетов атындағы орта мектепте бастауыш сынып мұғалімі болып бастаған. Саналы ғұмырында талай шәкіртін білім нәрі­мен сусындатып, тәлімді тәрбие беріп жүрген ардақты ұстаз мектеп директорының тәрбие ісі жөніндегі орынбасары, бағдарлы оқыту ісі жөнін­дегі орынбасар, оқу ісінің орынбасары қызметтерін атқарған. Аяу­лы жан ұстаздық қызметімен қоса отбасын қатар алып жүрген үлкен шаңырақтың шамшырағы, ұйытқысы. Өмірлік серігі қажырлы еңбек етіп жүрген шаруа адамы. Білікті ұстаз жолдасымен бірге 4 бала тәрбиелеп, бүгінде бақытты ата-әже атанып отыр.<blockquote>– «Ел боламын десең, бесігіңді түзе» дейді халық даналығында. Мекте­тегі білім мен тәрбиенің алғашқы баспалдағы және негізі бастауыш сыныптардан басталатыны белгілі. Бастауыш мұғалімі ол тек оқытуышы ғана емес, ол – бағбан, баланың жарқын болашағына жол көрсетуші, бағыт-бағдар беруші, сонымен қоса баланың бойындағы қабілет көзін ашушы. Бастауыш мұғаліміне қойылар талап пен жауапкершілік басқалардан екі есе жоғары деуге болады. Осы тұста ұстаз ретінде баланы сол қалпында жақсы көру маңызды екенін айтқым келеді. Тентек пен тілалғышты, ұғымтал мен ойлау қабілеті төмен, ұқыпты мен жалқау оқушыларды бөліп-жармай, барлығын да бірдей жақсы көру керек. Балаларға деген мейірімділік пен сүйіспеншілік бар жерде қатыгездік болмайды, намысына тиетін сөздер айтылмайды, олардың әрбір жетістіктеріне қуанып отырасың. Оларды түсіне білу, яғни солардың көзқарастарымен санасу, оларды ересектерше қабылдау, қамқорлық танытқанына қуану, ақыл­дасып отыру маңызды. Олардың танытқан қамқорлықтары мен әрбір ісіне кешіріммен емес, үлкен құрметпен қарау керек. Балаларды түсіну дегеніміз – оларды билігі­ бағындыру емес, керісінше олар­дың бүгінгі өмірі­не сүйене отырып, бола­шақ өміріне алғашқы дәндерін себу. Бала жүрегінің тебіренісі мен жан дүние­сінің қозғалысын түсіне білген педагог оқушысының тәрбиесі­мен тереңдей айналыса алады. Мұғалімнің бойынан адамға тән жақсы қасиеттердің барлығы – күлімсіреу, қаталдық, ұстамдылық, салмақтылық, сезімталдық, шынайылық, зияткерлік, тіл табысушылық, өмірге деген махаббат болуы керек, – дейді білікті ұстаз.</blockquote>Кенжегүл Раманқұлова өзінің ұстаздық еткен жолында «Бастауыш сыныптағы математика пәнінің үздік мұғалімі – 2021» аудандық байқауына қатысып, ІІ орын иегері атанды. Ұлағат­ты ұстаз әр сабағында қазіргі заман талабына сай дамыта оқытудың жаңа технологияларын пайдалана отырып, әртүрлі әдіс-тәсілдерді кеңінен қолданып, оқушылардың сабаққа деген қызығушылығын арттырып, құштарлығын оятып, жан-жақты ізденуге ұмтылдырады. Тәжірибелі маманның сыныптан тыс жұмыс­тары, тәрбие сағаттары, мере­келік іс-шаралары үнемі жоғары деңгейде өтеді. Білікті ұстаздың талай жылғы еңбегі ақталып, сол еңбектің нәтижесінде бүгінде алған марапаттары мен жетісіктері жетерлік. Атап айтқанда, 2018 жылы «Сырдария ауданының 90 жылдығы» мерекелік медалімен марапатталса, 2019 жылы ҚР бастауыш сынып оқушы­лары арасындағы олимпиадада оқушы жетістігі үшін «Алғыс хат» алған. Одан бөлек Қызылорда облыстық білім және ғылым қызмет­керлері кәсіподағының Құр­мет грамотасымен марапатталған. Абырой биігіндегі ұстаз шәкірттері де шетінен өнерлі, дарынды және соның нәтижесінде жеткен жетістіктері де аз емес. Мәселен, Мұхамедияр Абзалұлы «Бояулар құпиясы» атты республикалық сурет байқауында ІІ орын иеленсе, Балнұр Болатбекова І орын иегері атанған. Республикалық пәндік олимпиададан Батырбек Ақылбекұлы мен Айнамкөз Уалиханқызы халықаралық «Ақбота» сайысында жүлделі І орынды қанжы­ғаларына байлады.<blockquote>– Кенжегүл Жорабекқызы әр сабағын жоғары ізденушілікпен, заманауи технологияларды пайдаланып, жан-жақты шығармашылықта өткізетін ұстаз ретінде ұжым арасында сыйлы. Өз пәнін жетік меңгерген маманның бойында адамгершілік қасиеттері мол. Әрбір іске аса жауапкершілікпен қарайды, ұжымда беделді. 2019-2024 жылдары мектептің бастауыш кәсіподақ ұйымының төрағасы болған. Саналы ғұмырында балаларға тәлім-тәрбие беріп, қажырлы еңбек етіп жүрген білікті ұстаздың мектебіміздің өсіп-өнуіне, дамуына, бүгінгідей дәрежеге жетуіне қосқан үлесі мен еңбегі орасан зор, – дейді мектеп директоры.</blockquote>Алтынай ЖҮНІСОВА

Қазақстан және Қызылорда облысының жаңалықтары: Білім