<a href="https://kyzylorda-news.kz/">Kyzylorda-news.kz.</a> Осыған дейін мұғалімдерді конкурс арқылы жұмысқа қабылдаудың жаңа жүйесі жайында айтылған. Ондағы талаптардың бірі — педагог қызметіне алғаш кіріскелі тұрған мамандарға міндетті біліктілік тестілеуден өту. Осыған байланысты ҚР Білім және ғылым минстрі Асхат Аймағамбетов Facebook парақшасында өз ойын ортаға салды.
«2021 жылы алғаш рет педагогикалық бағытта білім алған 32 мың түлекті тесттілеуден өткіздік.
Тестілеу пилотты түрде өтті. Бірақ енді жаңа ережелерді қабылдағаннан кейін, биылдан бастап түлектер мектепке жұмысқа орналасу үшін педагогикалық жоғары білімі туралы дипломының болуы жеткіліксіз. Енді қосымша тестілеуден өту арқылы «Педагог» біліктілігін алуға міндетті.
Бұл қалай жүзеге асырылады? 
Бәрі өте қарапайым.
Мысалы, төрт жыл бойы математика мұғалімі мамандығын оқыған студент мектепке жұмысқа орналасуы үшін Ұлттық біліктілік тестін тапсыратын болады. Тестілеу сұрақтарында математика бойынша мектеп бағдарламасы мен сол пән бойынша сабақ беру әдістемесі қамтылады. 
Жоғары оқу орнында шын мәнінде төрт курс оқып, қажетті білім алған студенттерге тест тапсыру қиындық тудырмайды.
Ал бірқатар себептермен білімі мен қабілеті балаларымызды оқытуға жеткіліксіз түлектер білім беру ұйымдарына қабылданбайды. Бізге сан емес, сапа маңызды. Тиісті деңгейде білімі жоқ түлектер балалармен жұмыс істемеуі керек.
Енді 2021 жылғы пилоттық жобаның нәтижелері туралы:
Болашақ педагогтерді алғаш рет тестілеу көптеген жоғары оқу орны үшін үлкен сынақ болды.
Бастапқыда белгіленген шекті деңгейді айтарлықтай төмендеткенімізге қарамастан түлектердің 46 пайызы ғана қажетті балл жинағай алғанын айта кеткен жөн. Бұл — тест тапсырған 32 мың түлектің 15 мыңы ғана. Ақпарат ретінде айта кетейін, жыл сайын білім беру ұйымдарына 12-14 мыңға жуық педагог жұмысқа орналасады. Яғни, бұл шара мұғалім тапшылығына айтарлықтай әсер етпейді.
Бәрінен бұрын мұндай нәтиже жоғары оқу орындарын лицензиясынан айыру, профильдеу, білім беру бағдарламаларын жаңарту және басқа да бастамалар бойынша министрліктің қабылдап жатқан шаралары қажет әрі дұрыс екенін айқын көрсетіп отыр.
Естеріңізге сала кетейін, бұған дейін педагогтерді еліміздің 86 жоғары оқу орны даярлаған болатын. Министрлік атқарған жұмыстың нәтижесінде 30-дан астам ЖОО-ның педагогика бойынша лицензиясы қайтарып алынды.
Айта кетерлік жайт, біз лицензиясын қайтарып алған жоғары оқу орындарының түлектері тестілеу кезінде ең төмен нәтижелер көрсетті.
Бірақ, соның өзінде әлі 50-ден астам жоғары оқу орнының лицензиясы бар, олар педагогтерді даярлауды жалғастырып жатыр. Барлық мәселе олардың кейбірінің нәтижелері оқыту сапасына қойылатын талаптарға сәйкес келмейтіндігінде.
Осыған байланысты алдағы уақытта да елімізде кадрлар даярлау сапасын жақсарту үшін қажетті шараларды қабылдайтын боламыз, әсіресе, педагогикалық бағытта. Енді 
негізгі тренд анықталып, педагог мамандығы мектеп түлектері үшін қызықты бола бастаған кезде, бізге болашақ мұғалімдерді жоғары сапада даярлауды қамтамасыз ету өте маңызды.
Бұрын ҰБТ нәтижесі бойынша орташа балл 55-60 болып, тиісті балл жинай алмау мәселесі өзекті болған еді. Ал қазір оқуға түсушілердің орташа балы айтарлықтай өсіп, 96-ға жетті. Сондай-ақ үздік түлектер мен «Алтын белгі» иегерлерінің саны да шамамен екі есе өсті. Педагогикалық бағыттағы мамандықтарға түсу үшін ҰБТ-ның ең жоғары шекті балын қойғанымызға қарамастан, осындай көрсеткішке жетіп отырмыз.
Осылайша, Президент Қ.К. Тоқаевтың қолдауының және мемлекет қабылдаған кешенді шаралардың арқасында бұл мамандыққа деген қызығушылық айтарлықтай артты.
Осы уақытқа дейін жалақы көлемін арттырып отырғанымызға қарамастан, Президенттің тапсырмасы аясында 2022 жылдың қаңтарынан бастап еңбекақы тағы 25%-ға өсті.
Кейбір түлектерді, атап айтқанда, оқу бағдарламасын тиісті деңгейде игермеген және алған дипломдарының негізінде ғана жұмысқа орналасуға ниет білдіргендерді енгізілген тәртіп қуантпайтыны анық. Кейбір университеттерге де бұл шешім ұнаған жоқ, өйткені, бұл олардың жұмысының деңгейі мен сапасын айқын көрсетті.
Бірақ біз жоғары оқу орындарының білім беру қызметінің сапасын жақсарту мақсатында, мектепте қызмет етуге тек мықтылар келуі үшін жұмысты әрі қарай жалғастырамыз.
Аталған тиімді тұстарынан бөлек, бұл шара студенттерді диплом үшін ғана оқуға емес, шын мәнінде сапалы білім алуға ынталандырады деп үміттенемін. Ал жоғары оқу орындары тиісті сапада білім беруге міндетті болады.
Бұл шешімді барлығы бірдей оң көзқараспен қабылдамайтыны белгілі болды. Бірақ мен оның маңызды әрі қажет екеніне сенімдімін.
Егер ұшқыштар немесе аудиторлар мен адвокаттар қызметіне кірісуі үшін жауапты емтихан тапсыратын болса, балалармен жұмыс істеуді алғаш рет бастайтын педагогтер сынақтан өтуі қажет емес пе». — деді ҚР Білім және ғылым минстрі Асхат Аймағамбетов.

Мұғалімдерді конкурс арқылы жұмысқа қабылдаудың талаптары қандай?

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының білім басқармасының «Дарын» облыстық қосымша білім беру орталығының ұйымдастыруымен облыс бойынша жалпы білім беретін пәндер бойынша республикалық пәндік олимпиаданың қалалық, аудандық кезеңі бастау алды.
Білім бәсекесінің аудандық, қалалық кезеңі жаратылыстану-математика, қоғамдық-гуманитарлық бағыттардағы 14 пән бойынша санитарлық талапты қатаң сақтай отырып, офлайн форматта өткізілуде.
Олимпиаданың бүгінгі алғашқы күнінде облыс көлемінде 9-11 сынып бойынша барлығы 5 510 оқушы биология және информатика пәндерінен бақ сынауда.
Биылғы олимпиаданың басты ерекшелігі оқушылар «1 оқушы, 1 компьютер, 1 камера» қағидасы бойынша “Oqylyq.kz” платформасы арқылы жүргізілуде. Сонымен қатар олимпиада кезінде ашықтық пен академиялық адалдықты бақылау үшін мүдделі емес «үшінші тұлғалар», яғни «Adaldyq alańy» жобалық кеңсесінің қызметкері, ата-аналар комитетінің өкілдері, журналистер, ғалымдар шақырылды.

Қызылордада республикалық пәндік олимпиаданың қалалық, аудандық кезеңі басталды

<a href="https://kyzylorda-news.kz/">Kyzylorda-news.kz.</a> Мәскеуде Қасым-Жомарт Тоқаев пен Владимир Путин ұзақ келіссөздер жүргізіп, оның қорытындысы бойынша мемлекет басшылары бірлескен мәлімдеме жасады. Қазақстан Президенті ресейлік жоғары оқу орындарының филиалдары ашылатынын айтты.
Мемлекет басшысы Қазақстанда инженерлік-техникалық кадрларға деген сұранысты ескере отырып, білім беру саласындағы ынтымақтастыққа ерекше назар аударылғанын атап өтті.
<blockquote>
 “Бүгін келіссөздер барысында мен Владимир Владимировичке Ресей Федерациясының ең танымал университеттерінің, ең алдымен техникалық университеттерінің филиалдарын Қазақстанда ашуға келісім бергені үшін алғысымды білдіремін. Олар біздің еліміздегі білім беру саласына үлкен үлес қосады деп ойлаймын”, – деді Тоқаев.
</blockquote>
Қазақстан Президенті Ресейдің жетекші жоғары оқу орындарының Қазақстандағы филиалдарының желісін кеңейту жөніндегі елеулі келісімдерді құптайтынын атап өтті.
<blockquote>
 “Қазақстанда мына университеттердің филиалдары ашылатынын атап өткім келеді, бұл жоғары оқу орындары барлығына жақсы таныс: МИФИ (Ұлттық ядролық зерттеу университеті, МИФИ ), университет имени Губкина (Губкин атындағы Ұлттық зерттеу университеті), Бауманское училище (Бауман атындағы мемлекеттік техникалық университеті). Қазір училище университет болып үлгерген сияқты, бірақ, бренді қалды. Білім беруді қолдау өзара қарым-қатынас саласындағы &nbsp;өте маңызды ілгерілеушілік деп ойлаймын”, – деді Қасым-Жомарт Тоқаев.
</blockquote>
Еске салайық, Мәскеуде Қазақстан Президенті Қасым-Жомарт Тоқаев пен Ресей Президенті Владимир Путин жоғары деңгейдегі келіссөздер жүргізіп, оның барысында екі ел арасындағы көпқырлы стратегиялық серіктестікті дамыту перспективаларын қарастырған болатын.
<a href="https://massaget.kz/layfstayl/bilim/bilim-ordalary/67397/">Massaget</a>

Қазақстанда ресейлік қандай университеттердің филиалдары ашылады?

<a href="https://kyzylorda-news.kz/">Kyzylorda-news.kz.</a> БҰҰ Бас Ассамблеясының 2015 жылғы шешімімен 11 ақпан ғылымдағы әйелдер мен қыз балалардың халықаралық күні деп жариялады. Атаулы датаға орай Өңірлік коммуникациялар қызметінде Қорқыт ата атындағы Қызылорда университетінің «Аграрлық технологиялар» кафедрасының профессоры, ауыл шаруашылығы ғылымдарының докторы Лаура Тохетова мен Қорқыт ата атындағы Қызылорда университетінің магистранты Салтанат Мағауия ғылым саласындағы бұрымдылардың үлесі туралы баяндады.
<blockquote>
 «Қазіргі уақытта ғылым саласында әйелдердің орны ерекше. Ағартушылық салада жаңалық ашып, өлшеусіз үлкен қосқан қыздар арамызда өте көп. Еліміздегі ғылым саласында гендірлік теңсіздік жоқ деп айтуға әбден болады. Себебі, біз кәсіби біліктілік пен біліміне баса назар аударамыз. ЮНЕСКО институтының статистикалық мәліметіне сүйенсек, әлемдегі әйел ғалымдардың үлесі 30 пайыздан асады екен. Мемлекет басшысы Қ.Тоқаевтың жолдауында аграрлық салаға үлкен мән беруді тапсырған болатын. Оның ішінде ғалымдарды базалық қаржыландыруға мүмкіндік берді. Бұл өте қуантарлық жайт. Жылдан-жылға білімге құштар жастар көбейіп келеді. Әсіресе, бұрымдылардың ғылымдағы жетістіктері қуантады», – деді Лаура Тохетова.
 «Мен аграрлық технологиялар саласына көп уақыт бойы қызығушылық танытып келемін. 2020 жылы халықаралық академияға мобильді оқу арқылы тәжірибе жинақтадым. Қазіргі таңда аграрлық технологиялар саласын әрі қарай жетілдіру үшін өз үлесімді қосқым келеді», – деді Салтанат Бекетқызы.
</blockquote>

11 ақпан – Халықаралық ғылымдағы әйелдер күні

<a href="https://kyzylorda-news.kz/">Kyzylorda-news.kz.</a>&nbsp; Қазақстанның бас санитарлық дәрігері Айжан Есмағамбетова жаңа қаулыға қол қойды, деп хабарлайды Sputnik Қазақстан.
<blockquote>
 “Облыстар, Алматы, Нұр-Сұлтан пен Шымкент қалаларының әкімдері, Қазақстан Республикасының білім және ғылым министрлігі 2022 жылғы 14 ақпаннан бастап барлық меншік нысанындағы және водомстволық тиісті білім беру ұйымдарында штаттық форматта оқытуды қамтамасыз етсін”, – делінген құжатта.
</blockquote>
Алайда барлық жерде сақтық шаралары сақталуы шарт.
Сондай-ақ, Есмағамбетова санитариялық-эпидемияға қарсы іс-шараларды күшейту туралы бұрынғы қаулының күшін жойды. Бас санитар қаулысының толық мәтіні мына жерде жарияланған.
8 ақпанда Коронавирус инфекциясыың таралуына жол бермеу жөніндегі ведомствоаралық комиссияның отырысында мектептердің толық офлайн оқыту форматына көшуі туралы мәселе талқыланған болатын.

Оқушылар мен студенттердің оқу форматына қатысты жаңа қаулы шықты

Kyzylorda-news.kz. Барлық мемлекеттік білім беру ұйымдарының басшылары енді конкурстық негізде қызметке орналасады. ҚР БҒМ-нің толықтырулар енгізілген бұйрығында білім беру ұйымының бірінші басшысының бос немесе уақытша бос лауазымы пайда болған кезде бес жұмыс күні ішінде Білім басқармаларына конкурс өткізу туралы өтініш жібереді.
Бірінші басшының лауазымына тағайындауға арналған конкурсты білім басқармасы жариялайды. Бұл туралы бүгін Өңірлік коммуникациялар қызметінде өткен баспасөз конференциясында облыстық білім басқармасының басшысы Ақзира Қасымова кеңірек сөз етті.
<blockquote>
 «Конкурс рәсімі бірқатар кезеңдерді қамтиды, қатысушы 100 сұрақтан тұратын тестілеуге қатысады. Мамандандырылған білім беру ұйымдарының бірінші басшысының бос лауазымына орналасуға үміткер тестілеуден өткеннен кейін “Дарын” республикалық ғылыми-практикалық орталығымен әңгімелесу нысанында келісудің қосымша кезеңінен өтеді. Ал, “Білім-инновация” лицейінің бірінші басшысының лауазымына үміткерлер тестілеуден, қамқоршылық кеңеспен келісуден босатылады және “Білім-инновация” халықаралық қоғамдық қорымен әңгімелесу нысанында келісуден, сондай-ақ мемлекеттік органның комиссиясының отырысында әңгімелесуден өтеді. Сонымен қатар, жетім балалар мен ата-анасының қамқорлығынсыз қалған балаларға арналған білім беру ұйымының бірінші басшысының бос лауазымына орналасуға үміткер кандидаттар тестілеуден өткеннен кейін Министрліктің Балалардың құқықтарын қорғау комитетімен әңгімелесу нысанында келісудің қосымша кезеңінен өтеді», – деді А.Қасымова.
</blockquote>
Айта кету керек, конкурс қорытындысы бойынша бірінші басшы лауазымының жеңімпазы жаңа қызметке бес жыл мерзімге тағайындалады. 
Сонымен қатар, білім саласында сапаны қаматамасыз ету үшін барлық білім ұйымдары мемлекеттік аттестаттаудан 5 жылда бір рет өтетіні белгілі.
<blockquote>
 «Биыл мемлекеттік аттестаттаудан 149 мемлекеттік балабақша, 30 мектеп, 7 колледж жоспарланып отыр. Ал, жекеменшік білім нысандары келер жылдан бастап аттестацияланады», – деді облыстық білім саласында сапаны қамтамасыз ету департаментінің басшысы Ғалия Дәулетова.
</blockquote>
Брифинг барысында мектеп басшыларын ротациялаудың тиімділігі туралы да айтылды. Білім беру ұйымында 4 жыл жұмыс атқарған басшы ротациядан өтініші негізінде босатылып, қолданыстағы еңбек шарты шеңберінде өз жұмысын жалғастыра алады. Егер басшы сол ұйымда 7 жылдан астам уақыт жұмыс істесе, онда ол міндетті түрде ротацияланады. Осылайша, бір білім беру ұйымына жетекшілік ету мерзімі 7 жылдан аспауы тиіс.

Директорлар конкурспен тағайындалады

<a href="https://kyzylorda-news.kz/">Kyzylorda-news.kz.</a> Биыл колледждерде білім алуға бөлінетін мемлекеттік тапсырыс саны 10 мың орынға артады, деп хабарлады ҚР Білім және ғылым министрлігінің баспасөз қызметі.
107 мың қазақстандық студент колледжде мамандықты тегін меңгере алады.
Естеріңізге салайық, 9-сынып бітірушілердің барлығы «Білімді ұлт» сапалы білім беру» ұлттық жобасы аясында кезең-кезеңімен тегін оқи алады.
Биылғы оқу жылында алғаш рет әлеуметтік осал топ санатындағы балалардың колледждерге түсуі үшін тағы үш квота енгізілді. Квота көпбалалы, толық емес отбасынан, ерекше қажеттіліктері бар балаларды тәрбиелеп отырған отбасынан шыққан балаларға арналған.
<blockquote>
 «Бұрын мұндай мүмкіндік жетім, ата-анасының қамқорлығынсыз қалған, ерекше қажеттіліктері бар балаларға, сондай- ақ жеңілдіктер бойынша Ұлы Отан соғысы қатысушыларына теңестірілген тұлғаларға қарастырылған еді. Ауыл жастары да квота бойынша мемлекеттік тапсырысты алады», – деді техникалық және кәсіптік білім департаментінің директоры Насымжан Оспанова.
</blockquote>
Сонымен қатар білім берудің ашықтығы мен қолжетімділігін қамтамасыз ету үшін министрлік мемлекеттік тапсырыстарды «Ақша студенттің соңынан жүреді» қағидаты бойынша орналастырудың жаңа механизмін әзірледі.
Яғни бұған дейін гранттарды колледждер арасында білім бөлімдері орналастырған болса, енді колледждер арасындағы мемлекеттік тапсырыс талапкерлердің таңдауы бойынша бөлінетін болды.

Қазақстанда колледжерге арналған квота саны артты

<a href="https://kyzylorda-news.kz/">Kyzylorda-news.kz.</a>&nbsp; Биыл мұғалімдерді жұмысқа алу конкурсы электронды форматқа ауыстырылады. Бұл туралы білім және ғылым министрі Асхат Аймағамбетов мәлімдеді.
<blockquote>
 «Былтыр педагогтерді жұмысқа қабылдаудың жаңа қағидалары әзірленіп, қабылданды. Қысқаша айтқанда, бұдан былай директорлардың өз қалауы бойынша мұғалімдерді өзі жұмысқа қабылдауға мүмкіндігі болмайды. Енді нақты критерийлер белгіленіп, мұғалімдер жұмысқа қызметінің нәтижесі мен жетістіктері негізінде конкурс арқылы орналасады. Биыл бұл рәсім цифрлық форматқа көшіріледі», – деп жазды Аймағамбетов&nbsp;әлеуметтік желідегі <a href="https://www.facebook.com/askhat.aimagambetov">парақшасында</a>.
</blockquote>
Осы орайда министр есеп беруді азайту және мұғалімдерді артық жұмысқа тарту мәселесі қатаң қадағаланатынын ескертті.
<blockquote>
 «2021 жылы жаңа заңның нормаларын бұзғаны үшін (артық есептерді талап ету, қызметтік міндетіне жатпайтын жұмысқа тарту және т.б.) білім беру ұйымдарының жүздеген басшысын және өзге де лауазымды тұлғаларды жазалауға тура келді. Бұл жұмыс жалғасатын болады», – деді Асхат Аймағамбетов.
</blockquote>

Енді директорлар мұғалімдерді жұмысқа қабылдай алмайды

Kyzylorda-news.kz. Қызылорда қаласындағы Назарбаев Зияткерлік мектебінің үш оқушысы IESO-2022 халықаралық олимпиадасының республикалық кезеңінде қола жүлдегер атанды.
IESO-2022 – Жер туралы ғылымдар байқауы. Жыл сайын еліміздің түкпір-түкпірінен жиналған оқушылар геология, геофизика, метеорология, мұхиттану, астрономия пәндерінен бақ сынайды.
Сыр өңірінен Тоғжан Марат (жетекшісі Абзал Іскендір), Ақжанар Абдикаримова (жетекшісі Еркін Жомартов) және Сымбат Жәнібек (жетекшісі Мұхтар Әбілмаев) NIS-тің намысын қорғады. Жас зияткерлер небәрі 3 ұпай есе жіберіп, жеңіс тұғырының 3-сатысынан көрінді.
<blockquote>
 «Бұл олимпиадаға алғаш рет қатыстым. Жер туралы ғылым мені ерекше қызықтырады, әсіресе ғаламшардың пайда болу тарихын, сыры мен проблемаларын зерттеуге әуеспін. Дайындық барысында мен өзім үшін көптеген жаңалықтар ашып, болашақта қажет болатын жаңа ілім мен ақпарат алдым деп айта аламын», – дейді Ақжанар Абдикаримова.
</blockquote>
Айта кетейік, зияткерлік мектеп оқушылары – бұл білім додасының жыл сайынғы қатысушысы. Бұған дейін мектеп мақтаныштары Жангерей Зинелов пен Данагүл Келдібай олимпиаданың барлық іріктеу кезеңдерінен сәтті өтіп, халықаралық аренада қола медалін иеленген болатын.

IESO-2022: Қызылордалық зияткерлер қола жүлдеге ие болды

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Достық үйінде» кітапсүйер қауым «Kitap Qurttary» еріктілер клубының 3 жылдығын атап өтті.
Іс-шараны ашқан «Kitap Qurttary» клубының негізін қалаушы Талғат Меңдібаев ұйымның 3 жыл ішінде жасаған жұмыстарын таныстырды. Осы уақыт ішінде клуб құрамына түрлі саладағы ерікті азаматтар мен жанашыр тұлғалар жиналып, буккроссинг, кинотайм, косплей-пати, «Кітап сыйла» қайырымдылық іс-шаралар мен интеллектуалдық сайыстар өткізілді. Нәтижесінде кітап клубының аудандарда, жергілікті оқу орындарында филиалдары ашылды. Тіпті жақында Атырау облысында да өкілдігі құрылмақ.
Облыс әкімінің орынбасары Серік Ахмет жастардың пікірлерін саралай келе, отандық және шетелдік әдебиеттердің өскелең ұрпақтың ой-санасын дамуына зор ықпал ететінін және «Кітап құрттарындағы» интеллектуалды жастардың арасынан жаңа есімдердің шығару қажеттігін айтты.
Сондай-ақ, аймақ басшысының атынан «Сыр – Алаштың анасы» кітабын сыйға тартты.
Кеш қонақтары кітап клубының аймақтың интеллектуалдық әлеуетін дамытып, креативті жастардың жан-жақты қолдауына қосқан үлесін жоғары бағалап, ізгі тілектерін білдірді және ұйымның қорын бірнеше құнды кітапты сыйға тартты және өздерінің сүйікті шығармалары туралы еркін пікір алмасты.
<img src="https://kyzylorda-news.kz/wp-content/uploads/2022/02/img-20220203-wa0021.jpg" alt="" />
<img src="https://kyzylorda-news.kz/wp-content/uploads/2022/02/fb_img_1643866561666.jpg" alt="" />
<img src="https://kyzylorda-news.kz/wp-content/uploads/2022/02/fb_img_1643866549138.jpg" alt="" />
<img src="https://kyzylorda-news.kz/wp-content/uploads/2022/02/fb_img_1643866551132.jpg" alt="" />
<img src="https://kyzylorda-news.kz/wp-content/uploads/2022/02/fb_img_1643866559141.jpg" alt="" />
<img src="https://kyzylorda-news.kz/wp-content/uploads/2022/02/fb_img_1643866293967.jpg" alt="" />

Қызылордалық «Kitap Qurttary» кітап клубына 3 жыл толды

<a href="https://kyzylorda-news.kz/">Kyzylorda-news.kz.</a> Халықаралық зияткерлік олимпиада жеңімпаздары ҰБТ тапсырмай-ақ жоғары оқу орнына грантқа түсе алады. Бұл туралы Білім және ғылым министрі Асхат Аймағамбетов бүгінгі Үкімет отырысында мәлімдеді.
<blockquote>
 Дарынды балаларды қолдау өте маңызды. Президенттің тапсырмасы бар. Биылдан бастап халықаралық зияткерлік олимпиадалардың жеңімпаздарына конкурсқа қатыспай,&nbsp;ҰБТ&nbsp;тапсырмай-ақ жоғары оқу орнына грант алу мәселесі қарастырылып отыр, — деді министр.
</blockquote>
Сондай-ақ олимпиада жеңімпаздары мен олардың ұстаздарына арнайы сыйақы беріледі.

Кімдер ҰБТ тапсырмай грантқа түсе алады?

<a href="https://kyzylorda-news.kz/">Kyzylorda-news.kz.</a> ҚР Премьер-Министрі Әлихан Смайыловтың төрағалығымен өткен Үкімет отырысында білім және ғылым жүйесін дамыту бойынша кешенді жоспарлар қаралды, деп хабарлайды Үкіметтің баспасөз қызметі.
Білім және ғылым министрлігі қандай реформаларды жүзеге асыруды жоспарлап отырғаны туралы білім және ғылым министрі Асхат Аймағамбетов баяндады.
Балабақша деңгейі бойынша
Білім министрі 3 жастан 6 жасқа дейінгі балаларды балабақшамен қамту қазір 99%-ға жеткенін айтты. Мектепке дейінгі білім беру реформалары шеңберінде 3 тармақты іске асыру жоспарлануда:
Біріншіден, мектепке дейінгі тәрбие мен оқыту моделі қабылданды. Оны биылғы жылы іске асырамыз. Осыған дейін кішкентай балаларға мектептегі сияқты кестеге сәйкес 20 минуттық сабақтар жүргізіліп келген болса, енді жаңа модель бойынша педагог оқыту мен тәрбиелеуді баланың бақшаға келген тұсынан бастап, осы жастағы балалардың физиологиялық және психологиялық қажеттіліктері бойынша ойын және коммуникациялар арқылы арнайы әдістемемен іске асыратын болады. Шетелдік тәжірибелердің зерттеулері де осы әдістеменің маңыздылығын көрсетіп отыр.
Екіншіден, балабақшалардың сапасын қамтамасыз ету үшін оларға деген талаптар күшейтіледі. Яғни материалдық-техникалық база, бейнебақылау жүйесі, педагогтердің біліктілігі, санитариялық, өртке қарсы нормаларға сәйкестігі, мемлекеттік тапсырысты берудің басты талаптары болады. Соның ішінде жекеменшік балабақшалардан да балаларға қолайлы жағдай жасау талап етіледі.
Үшіншіден, балабақшалардағы орындарды бөлу кезіндегі ашықтықты қамтамасыз ету үшін, облыстардағы электронды кезектердің бәрі енді республика бойынша бірыңғай базаға еніп, біріктірілетін болады.
Орта білім деңгейі бойынша
Білім және ғылым министрлігі жоғарыда айтылғандардан басқа алдағы орта білім беру реформасында негізгі бағыттарды ұсынды.
<blockquote>
 «Академиялық біліммен бірге оқушыларға өмірлік маңызы зор дағдыларды игертуге бағытталған «Жаһандық құзыреттіліктер» таңдау курсы ұсынылатын болады», — деді министр.
</blockquote>
ҚР Үкіметінің отырысы барысында ҚР БҒМ басшысы оқу бағдарламаларын одан әрі жаңғыртуға да тоқталды.
<blockquote>
 «Президент техникалық бағыттағы мамандықтарды дамыту бойынша тапсырма берді. Оны орындау үшін математикалық білімнің сапасын арттыру қажет. Ол үшін оқу бағдарламаларын, әдістемелік құралдарды, оқулықтарды жаңартамыз, математиканы топтарға бөліп оқытуды қолға аламыз», — деді А. Аймағамбетов.
</blockquote>
Балаларды еңбекке дайындау үшін ерте кәсіптік бағдарлауға баса назар аударылады, тиісті бағдарламаны өзгертіледі. Орта білім берудің сапасын бағалау үшін «Алтын белгіге» үміткерлерге қойылатын талаптар да күшейтіледі.
«Биылдан бастап білім беру сапасына сырттай бағалау толығымен енгізіледі. Мемлекеттік аттестаттау рәсімі қайтарылып, профилактикалық бақылау түрінде балабақша, мектеп, колледж деңгейлері үшін өткізіледі. Заңға қажетті өзгерістер енгізілді», — деді министр Үкімет отырысы барысында.
Пән мұғалімдерінің тапшылығы проблемаларын шешу үшін қайта даярлау тетігі қолданылады. Мысалы, мамандығы мұғалім емес, бірақ кәсіби білімі мен тәжірибесі жеткілікті мамандар мұғалімдікке қайта даярлау арқылы тартылатын болады.
«Мемлекет басшысының тапсырмасымен біліктілікті арттыру курстары енді педагогтер үшін 5 жылда бір рет емес, 3 жылда бір рет өткізілетін болады. Тиісті заң жобасы Парламентте қарастырылуда. Педагогтердің курстарының мазмұны да айтарлықтай өзгереді» — деді А. Аймағамбетов.
Апатты, үш ауысымды мектептер және оқушы орындарының тапшылығы проблемаларын шешу мақсатында 200 жаңа мектеп ашу жоспарланған, биыл 1003 ауыл мектебі жаңғыртылады. 560 мектепке күрделі және кешенді ағымдағы жөндеуден өтеді, 2068 пәндік кабинет сатып алынады. 598 мектепте жиһаз жаңартылады, 862 кітапхананы жаңғыртудан өтеді. Кемінде 2 млн көркем және танымдық балалар әдебиеті сатып алынады.
«Президент тапсырмасымен заңнамалық деңгейде оқушылар сарайларын, музыка және көркемөнер мектептерін жекешелендіруге жол бергізбеу нормаларын енгізу бойынша жұмыс жүргізудеміз. Балаларды үйірмелер мен курстармен неғұрлым көбірек қамту үшін алғаш рет биыл қосымша білім беруге мемлекеттік тапсырыс орналастыру механизмі іске асырылады. Сондай-ақ, алғаш рет ерекше балақайларды арнайы психологиялық-педагогикалық қолдау үшін мемлекеттік тапсырыс енгізіетін болады», — деді министр.
Колледждер бойынша
Түлектерді мамандықпен қамту үшін биыл мемлекеттік тапсырыс саны 20 мың орынға көбейеді. Жұмыс берушілер қажетті мамандар дайындау үшін оқу бағдарламаларын жасауға және колледждерді басқару жұмысына Қамқоршылық және индустриялық кеңестерге кіре отырып тартылатын болады. Ірі кәсіпорындар салалық колледждерді шефтік қамқоршылыққа алады, осындай кәсіпорындар биылғы жылы 100-ге жеткізіледі.
<blockquote>
 «Дуалды оқытуды қолдау бойынша бірқатар шаралар жасалады. Кадрлар даярлауда колледждерге толық академиялық дербестік беріледі. Барлық оқу бағдарламалары жұмыс берушілермен келісіліп, жұмыс беруші тарапынан сараптамадан өткізілетін болады. Кадрларды жұмыс берушілермен бірге дайындау үшін біз биыл алғаш рет пилоттық режимде кәсіпорындардың өзіне мемлекеттік тапсырысты беретін боламыз», — деді Асхат Аймағамбетов.
</blockquote>
Жоғары білім беру бойынша 2022 жылы гранттар саны 10%-ға артады. Бұған қоса техникалық бағыттарға басымдық пен қолжетімділікті кеңейту үшін техникалық мамандықтарға арналған гранттардың үлесі 40%-дан 60%-ға дейін ұлғайтылатын болады. Сондай-ақ, ауылдық квота да биыл 35%-ға дейін ұлғайтылады.
<blockquote>
 «Білім сапасы жағынан алшақтығы бар өңірлердің абитуриенттеріне техникалық бағыттары бойынша қосымша 10 000 нысаналы грант бөлінетін болады. Біз талдау жүргізіп, өңірлерді анықтадық. Бұл – Маңғыстау, Атырау облыстары. Жоспарға сәйкес студенттер еліміздің жетекші жоғары оқу орындарында білім алатын болады. Сондай-ақ, оқу аяқталған соң тұрғылықты жерлеріне барып өтеу көзделеді», — деді министр.
</blockquote>
Қоғамдық тәртіпті сақтау жөніндегі міндеттерді орындау кезінде қаза тапқан құқық қорғау және арнаулы мемлекеттік органдар қызметкерлерінің балаларына университеттерде тегін оқу үшін білім гранттарын беру жөніндегі норма енгізіледі.
<blockquote>
 «Экономика үшін кадрларды жедел даярлау үшін биыл пилоттық режимде 2,5 – 3 жыл оқытумен қолданбалы бакалавриат енгізіле басталады. Жоғарғы білім беруде «онлайн-оқыту» жаңа нысанын енгізу жоспарлануда. Тиісті заң жобасы Мәжілісте қаралуда. Бұл цифрландыру заманының сұранысына сай келетін шара», — деді А.Аймағамбетов.
</blockquote>
Мемлекет басшысының тапсырмасы бойынша беделді шетелдік университеттердің 5 филиалы ашылады.
<blockquote>
 «Қазіргі уақытта елімізде Де Монтфорт Лестер Ұлыбритания университетінің филиалы жұмыс істей бастады. Солтүстік Қазақстан мемлекеттік университетін Аризона университетіне сенімгерлік басқаруға беріледі. Сондай-ақ, техникалық бағыттар бойынша Ресейдің үздік жоғары оқу орындарының филиалын ашу бойынша келіссөздер жүргізілуде. Тағы да бір британдық университеттің филиалын ашу бойынша келісссөздер жүріп жатыр. Еліміздің батыс өңірі жастарының жоғары стандарттарға негізделген білімге қол жеткізуін қамтамасыз ету мақсатында екі жетекші шетелдік техникалық университеттің филиалдары ашылатын болады», — деді А. Аймағамбетов.
</blockquote>
Ғылым саласы бойынша Білім және ғылым министрлігі ғалымдарды қолдау жөнінде кешенді шаралар қабылдады. Жас ғалымдардың зерттеулеріне 1000 грант бөлу, 500 ғалымды жетекші шетелдік ғылыми орталықтарда тағылымдамаға жіберу ұйымдастырылады. Алғаш рет 2022 жылы жоғары оқу орындары мен ғылыми зерттеу институттарында постдокторантура енгізіледі.
<blockquote>
 «Егер бұрын ғалымдар жалақыны тек конкурстар арқылы ғана алатын болса, енді жетекші ғалымдар тұрақты жалақы алатын болады. Бұл – 85 ғылыми ұйымның 1200-ге жуық жетекші ғалымдарының жағдайын жақсартады», — деді А. Аймағамбетов.
</blockquote>
Бұған қоса, еліміз үшін аса маңызды іргелі зерттеулермен айналысатын тарих және этнология институты, тіл білімі институты, математика институты, ядролық физика институты, әдебиет және өнер институты, философия және т. б. институттардың ғалымдары енді жалақыларын тұрақты режимде алып, үздіксіз жұмыс істейтін болады.
Жоғарыда айтылғандардан басқа, Білім және ғылым министрлігі ғылыми зерттеу институттарының материалдық-техникалық базасын жаңғырту жұмыстары биыл да жалғастырад.

Қазақстан және Қызылорда облысының жаңалықтары: Білім