Білесіз бе, өңірдегі химия-биология бағытындағы Назарбаев зияткерлік мектебінің түлегі Майя Жалғасбаеваға бір емес, тоғыз бірдей оқу орны таласты.&nbsp;Еуропа төріндегі Германияның «Landshut Hochschule», «THWS», «Hochschule Coburg», «HSWT», «Hochschule München», «Hochschule München», «Deggendorf TH», «TH Ingolstadt» және «Westfälische Hochschule» жоғары оқу орны біздің қызға «Бізде оқы» деп ұсыныс білдірген. Білім биігіне қанатын қаққан Майяның таңдауы Ландсхута Қолданбалы ғылымдар университетіне түсіпті. Бүгінде ол аталған білім ордасында қазақ жастарының қаншалықты білімді, ынталы, талапшыл болатынын көрсетіп жүр. Сыр елі мақтан еткен перзентімен дидарласып, сұқбаттасудың сәті түсті.– Жерлесіміздің елдің мерейін үстем етіп, білімнің биік шыңдарын бағындырып жүруі – біз үшін үлкен қуаныш. Сіз үшін біз өзіңіздей қуаныштымыз. Биыл он жылдығын атап өтіп жатқан алтын ұяңыз, Назар­баев зиятк­ерлік мек­тебіне ыстық ықы­ласы­ңыз­ды көріп қуан­дық. Сізге бұл мек­теп не берді?<blockquote>– Ең алдымен, менің оқыған мектебім маған ең керемет базалық білім мен ары қарайғы дамуыма ең қажетті қасиеттерді сіңірді. Мектебім ақжарқын ұстаздарды сыйлады. Мұндай ұстаздардың сабағына қатысуға құлшынып тұрасың, ойландырған әрбір сауалыңның жауабын білетініңе сенімді әрі ол жерде жаныңа жылулық сыйлайтынын білесің. Осындай жайсаң жандардың берген білімімен қатар тәрбиесі де адамдық қасиеттің ауылына тұрақтайды. Тағы бір айта кетерлігі, мектебім әркез өзіңді алға жетелейтін ең керемет бәсекелестік ортаны сыйлады. Бұл орта мені бір орында тұрақтамауға, әрқашан алға жүруге ұмтылысымды арттыруға сеп болды. Ол орта мақсаттарыма жетеледі. &nbsp;Мектеп бізге болашақ мақсаттардың негізін қалап береді. Қоғамда өзіңнің орныңды ойып тұрып алуға тәрбиеледі. Мен өзімнің тұлғалық дамуымның алғышарттары осы мектепте, Назарбаев зияткерлік мектебінде қаланғанына қуаныштымын.</blockquote>–&nbsp;«Білімдінің күні – жарық» дейді дана халқымыз. Білім алу үшін не керек, қандай қабілет керек? Бұл бағытта орта маңызды ма?<blockquote>– «Кез келген жетістіктің артында 99% еңбек пен 1% талант тұрады» дегенді қолдаймын. Өмірлік ұстанымым десек те болады. Адам өзін белгілі бір салада шыңдау үшін еңбек пен тәртіп бірінші орында тұрады. Мақсатын белгілеп, оған жетер жолын жоспарлап алған әрбір адам шын мәнінде жетістікке жете алады. Адам баласының қалыптасуына ортасы маңызды рөл атқарады. «Егер сіз бес миллионермен аралассаңыз, алтыншысы сіз боласыз» деген бар. Сіздің ортаңызда өз уақыты мен мүмкіндігін, энергиясын ұтымды басқара білетін адамдар болса, сіз де өз мақсатыңызға жетер жолды айқындап, оған күш саласыз. Сондықтан сапалы білім алу үшін аспандағы айды алар құдырет керек емес. Бар болғаны ниетіңіз, дұрыс орта және тәртіп болса, жеткілікті.</blockquote>– Германияда алып жатқан біліміңізге қандай баға берер едіңіз? Қандай мүмкіндіктер бар? Біздің елдің олардан үйренері көп пе екен?<blockquote>– Осы жерде ерекше тоқталып өтетін бір нәрсе бар. Германияда оқуды таңдағанымның басты себебі практикалық түрде мамандану. Мен үшін бұл маңызды ерекшелік. Алған теориялық біліміңді тәжірибеде жүзеге асырып, өзіңді сынайсың. Оқып жүрген университеттің басты ұстанымы осында жатыр. Бұл көп нәрсені шешеді. Студенттердің өз мамандығы бойынша машықтануына, оқу бітірген соң қолына дипломын ұстап, бос қалмауына жасалған жағдай. Жұмысқа орналасқанда алдымда не күтіп тұрғанын білемін, жұмыс процесімен алдын ала таныс боламын. Бұл жұмыс берушінің де, жұмыскердің де мәселесін шешеді. Қазақстандық студенттерге осы нәрсе жетіспейді. Рас, елімізде теория мен тәжірибені ұштастырып, қолға алып жатырған оқу орындары бар. Бірақ тағылымдамадан өтушілерге жауапкершілікті тапсырмалар бермейді, аяққа оратылмас үшін жеңіл жұмыс беріп қойып, ісімен айналыса береді. Бұл ешқандай да құпия емес. Ал Германияда мүлдем басқаша. Өз ісінің хас шеберлері ізінен шәкірт тәрбиелеп, оларға бойындағы бар қабілеті мен өнерін үйреткісі келеді. Оны көріп тұрған студенттің ұмтылысы еселеп арта түседі. Бұл нәрсені біз немістерден үйренуіміз керек.</blockquote>– Біздің елде, өзіңіз оқыған білім ошағында бәсеке бар ма? Жалпы, білім алуда бәсеке қаншалықты керек?<blockquote>– Бәсеке алдыңғы орында тұрады. Иә, мен сондай адаммын. Бала кезден өнер мен ғылым бағытындағы көптеген байқауларда бақ сынадым. Өзімді жан-жақты қырымнан байқап көрдім. Міне, осы нәрсе бәсекеге қабілетті болуға, төтеп беруге, өзгеден оза жүруге тәрбиеледі. Әрине, бәсеке дегенді дұрыс жағынан түсінуге және оны қабылдауға үйрендім. Өйткені, оның екінші қыры бар. Одан қашық жүрген абзал. Көпшілік бәсеке мен бақталастықты ажырата алмай қалып жатады. Бұл жерде таза бәсекені айтып отырмын. Әрқашан алда болуым керек деп өз-өзіме мотивация сыйладым, әлі де солай келемін. Айналамдағы кез келген адамның жеңісі одан да күшті болуға итермеледі. Өзгелердің жеңісіне қуана аламын, қызғанбаймын, ал бәсекелестерің жауың емес, олар сенің жеңіс жолындағы сапарластарың. Осыны әркез ойда ұстау керек. Бәсекелестеріңсіз өз бойыңдағы мінді табу қиын, биікке өрлегенде артқа тартатын қандай қасиетің барын да оларсыз таба алмайсың. Сондықтан бәсеке дегенде де оның ең жақсысын таба білу керек.</blockquote>– Жетістікке жетуде сіздегі ұстаным қандай және сізге мотивация берген қандай күш?<blockquote>– Германияда білім алу ең биік мақсаттарымның бірі болды және бұл мақсатымның өмірімді өзгертіп жіберетініне сендім. Германияға оқуға түсу үшін неміс тілін С1 деңгейіне дейін үйренуім керек болатын. Айтарлықтай көп уақыт болған жоқ, сондықтан жағдайдың жеңіл емес екенін сезіндім. Өзімнің мүмкіндіктеріме сергек көзқараспен қарап, шыңдай түсуім керек болды. Әрбір минут, әрбір секунд, тықылдап жүрген сағат тілі мүмкіндіктер алаңымды тарылтып жатқандай еді. Үзіліс, қолым қалт еткен әрбір сәтте неміс тілін оқып, емтихан тапсырмаларының байқау сынамаларын тапсырдым. Күн санап білімімді арттыра түстім, неміс тілінен сөздік қорымды кеңейттім. Ойын-сауықты, қызықты кештерді ысырдым, бәрінен бас тартуыма тура келді. Есесіне тынымсыз ізденістің арқасында алған беттен қайтпайтын қайсарлығымның көмегімен емтиханнан өтіп, сертификат алдым, Германияның 9 жоғары оқу орнынан шақырту алдым.Ең бірінші адам өзінің мақсатына қаншалықты ынтық, қаншалықты құмар екенін сезіну керек. Сіз мақсатыңызға жету жолында қандай нәрседен бас тарта аласыз, қаншалықты жан-тәніңізбен беріле аласыз, осының бәрін сараптаңыз. Мақсатқа жетуде дұрыс шешім қабылдап, дұрыс таңдау жасай білу керек. Міне сонда ғана сіз мүмкін еместі шынайы өмірге алып келе аласыз.</blockquote>– Сіз үшін өмірде ең маңыздысы не? Бәрінен бұрын не нәрсені биік қояр едіңіз?<blockquote>– Бұл сұрақтың жауабы қарапайым. Мен үшін ең бастысы – отбасы. Мына ғаламда одан артық ешкім де, ешнәрсе де жоқ. Өзімнің бақыт әлемімді қалап, алтын ұяның іргетасын нықтасам деймін. Өмірімдегі ең басты құндылық – отбасы. Өзіңді қауіпсіз, бейқам сезінетін, ешкім ешқайда қуа алмайтын ең қымбат орта. Кеудеңді ең ғаламат сәттермен, бақытпен, шаттықпен, қуанышпен толтыратын, өзіңді дамытуға барынша көмектесетін, қуансаң қуанып, мұңайсаң мұңаятын, сенің өсуіңе бар күшін салатын ортаң – отбасың. Ол – сенің командаң. Болашақта өзіңнің мақтанышыңа айналуың керек ортаны қалыптастыру үшін ең алдымен өзіңді дайындауың керек. Бұл – ең үлкен жұмыс.</blockquote>– Оқуыңызды бітірген соң жоспар қандай? Сонда қаласыз ба, әлде елге келіп қызмет етесіз бе?<blockquote>– Шетелдік компанияларда жұмыс істеу арқылы тәжірибе жинау – зор мүмкіндік және &nbsp;бұл мүмкіндікті жіберіп алмауға тырысамын. Бірақ өмір бойы шетелде тұрақтап қалу тілегімдегі нәрсе емес. Әу бастан Қазақстан мен Германия арасындағы логистика саласындағы мүмкіндіктерді зерттедім. Оның болашағы зор екеніне көзім жетті. Осы саладағы қат мамандардың арасында елге қызмет етіп, өзімді осы саладан табатыныма сенімдімін. Осы жерде ерекшелеп айта кететін нәрсе: отбасымды, шаңырағым мен керегемді атамекенімде қалап, өзімнің туған жеріме туымды тігуім керек. Бұл – принципім. Болашақта өзімнің кіндік қаным тамған қасиетті қазақтың ортасында балаларымды туған тілге, Отанға, ұлтқа жанашыр етіп қалыптастырғым келеді. Олардың бойына ұлттық құндылықтарды сіңіргім келеді. Ал мұндай үлкен жұмысты бөгде елде жасаған дұрыс емес. Қазақ мұндайда «Өзге елде сұлтан болғанша, өз еліңде ұлтан бол» деп кесіп айтқан. Ал дүниетанымыңды кеңейтіп, көзқарасыңды байыту үшін төрткүл дүниені шарласаң да қылмыс емес. Ол – өзіңді дамыту.</blockquote>– Білім ошағына ақжолтай тілегіңізді білсек…<blockquote>– Түлеп ұшқан алтын ұям – Қызылорда қаласындағы химия-биология бағытындағы Назарбаев зияткерлік мектебіне жасаған зор мүмкіндіктер үшін алғыс айтқым келеді. Оқу орныма талантымен талайды тәнті етіп, білімнің биік шыңын бағындырар, білім ошағының беделін көтеріп, мәртебесін үстем етер болашағы зор шәкірттері көп болуын тілеймін. Білім ошағымыз, алтын ұямыз көркейе берсін, дами берсін, қарқыны арта берсін.</blockquote>– Уақыт тауып, сұқбат бергеніңіз үшін алғыс білдіреміз.&nbsp;

Тоғыз оқу орны таласқан қызылордалық түлек

<a href="https://kyzylorda-news.kz/">Kyzylorda-news.kz</a> Жастардың оқу-білімге ұмтылысы – қоғам дамуындағы оң өзгеріс. Әсіресе жаратылыстану ғылымына қызығушылық танытып, тәжірибесін өндірісте кәдеге жаратып жүрген жастар жетерлік.&nbsp;Солардың қатарында жерлесіміз Рахымжан Тұрманов та бар. Ол органикалық химия бағытында біршама зерттеу жүргізіп, Сыр еліне халықаралық ғылыми үрдісті әкелуде. Бүгінде Қорқыт ата атындағы Қызылорда университетінде ұстаздық ететін жас ғалым шәкірттерге де жол сілтеп келеді.–&nbsp;Рахым­жан Ахметханұлы, органикалық химия несімен ерекше? Аталған бағытты аймақ өндірісімен қалай байланыстырар едіңіз?<blockquote>– Органикалық химия – күрделі сала. Үнемі білім жетілдіруге тура келеді. Осы мақсатпен Ресей Федерациясының Қазан қаласында магистратура және аспирантура бітірдім. Нәтижесінде химия ғылымдарының кандидаты ғылыми дәрежесін иелендім.Барлық зерттеу жұмысы өндіріс саласын ілгерілетеді. Мысалы, магистратурада өндіріске қажетті полимерді зерттедік. Нақтысы, термо­тұрақтандырғыш пен пласти­фикаторларды синтездеумен айналыстым. Бұл зерттеу материалдың сыртқы орта әсерінен, яғни ауа райы салдарынан тозбауын қамтамасыз ету үшін жасалды. Ал аспирантурада органикалық синтезге басымдық бердім. Сол арқылы дәрілік препараттарды дамытуға мүмкіндік туды.</blockquote>–&nbsp;Білім жетілдіру мақсатында Ресей Федерациясының Қазан қаласында оқыдыңыз.&nbsp;Екі елдің білім беру жүйесінде нендей айырмашылық бар деп ойлайсыз?<blockquote>– Қазақстандағы білім беру саласы жылдан-жылға дамуда.&nbsp;Әлемдік тәжірибелер мен жаңалықтар қолданысқа еніп, білім алушыларға барлық жағдай жасалған. Әсіресе жас ғалымдарға қолдау күшейді. Басымдық зерттеу, ғылыми орта қалыптыстыру бағытына бұрылды. Мысалы, ғалымдар Scopus базасымен жұмыс істеуді назарға алып, ғылыми мақала жариялау кең өріс алды. Бұл – әлемдік үрдіс әрі ғылымды дамыту жолы. Бірнеше жыл Ресейде білім алдым. Байқағаным, ол жақта дәстүрлі білім беру жүйесі сақталған. Ал бізде Болон жүйесі жолға қойылған. Яғни, кредиттік технология бойынша оқытылады. Аталған жүйе білім беру сапасына айтарлықтай әсер етеді деп ойламаймын. Барлығы студент ынтасы мен ұстаз білігіне байланысты.</blockquote>– Қарапайым адамға жаратылыстану ғылымдарындағы жаңалық түсініксіз.&nbsp;Әсіресе, химиядағы зерттеу мен формулаларды ұғатындар аз. Осы орайда күрделі ғылымды халық арасына танымал ету үшін қандай әдіс қолдар едіңіз?<blockquote>– Айнала химия ғажайыбына толы. Әлемді химиясыз елестету мүмкін емес. Мұны түсіну үшін ғылымға қызығушылық болу шарт секілді. Түрлі әдістің тиімділігі де осы шарт төңірегінде талқыланса керек. Десе де химияны танымал етудің басты әдісі мектептегі білімді жетілдіру. Себебі оқушы химия пәнімен алғаш танысқанда сүйіспеншілігі оянса әрі ғылыми іргетасы берік болса, бұл салаға бейжай қарамайтыны анық.</blockquote>– Университеттің инжинирингтік технологиялар кафедрасында аға оқытушы екенсіз. Шәкірттер қолға алған қай зерттеуді баса айтар едіңіз?<blockquote>– Университетте көптеген ғылыми зерттеу жүруде. Мұның барлығы ұстаздар ұжымы мен шәкірттер белсенділігінің арқасында орын алды. Қазіргі таңда түрлі синтез арқылы термотұрақтандырғыш алу, ароматты қосылыстар тотықтыру арқылы оттекті органикалық қосылыстар алу процесі қолға алынды. Бұдан бөлек көптеген жоба кезек күтіп тұр. Барлығы өндіріс пен қоғам өміріне пайда әкелетіні анық.</blockquote>–&nbsp;Ауқымды өндіріс орындарындағы химиялық қалдықты өңдеу, залалсыздардыру ісі көңіліңіздер шыға ма? Бұл орайда қандай мәселе бар деп ойлайсыз?<blockquote>– Әрине, өндіріс болсын, тұрмыстық қалдық болсын, өңдеуден өтуге тиіс деп санаймын. Бұл табиғатты қорғауға және экологиялық зардаптың алдын алуға көмектесері сөзсіз. Осы ретте өндірістегі химиялық қалдықтарды залалсыздандыру ісіне ерекше мән беру керек. Әсіресе, қоғам тарапынан өндірістердің экологиялық талаптын сақтауға қадағалау нәтиже беретініне сенемін.Мәселе де осы тұста туындауда. Қоғамда қоршаған орта мәселесіне үн қосатын белсенділер аз. Қоғамдық ұйымдар экологияға қатысты ғаламдық және мемлекет талабының сақталуын жіті қадағалау орынды. Экология зардабын ерекше сезінген аймақ үшін де аталған ұсыныс өзекті болары белгілі.</blockquote>–&nbsp;Әңгімеңізге рақмет!

Рахымжан Тұрманов: Елімізде білім алушыларға барлық жағдай жасалған

<a href="https://kyzylorda-news.kz/">Kyzylorda-news.kz.</a>&nbsp; Атырауда мектептегі әлімжеттік әрекеттерін жасырғаны үшін бес мектеп директоры&nbsp;жауапкершілікке тартылды. Бұл туралы <a href="https://stan.kz/atirauda-5-mektep-direktori-balalardi-yrip-sogu-faktile-396949/">Stan.kz</a> ақпарат агенттігі хабарлайды.Прокуратура тексеру барысында&nbsp;білім беру ұйымдарында 1200-ден астам заң бұзушылық анықталды. Заң бұзушылықтар негізінен қауіпсіздік, құрылыс, мемлекеттік сатып алу, білім сапасы, санитарлық-эпидемиологиялық нормалар мен өрт қауіпсіздігі салаларына қатысты.Жоғары сынып оқушыларының өзінен кішкентайларды ұрып-соғу фактілерін және басқа да заңсыз әрекеттерді жасырғаны үшін бес мектеп директоры әкімшілік жауапкершілікке тартылды.Сондай-ақ 16 мемлекеттік&nbsp;және бір жеке мектепте оқушылар интернетте тыйым салынған&nbsp;сайттарға еркін кіріп келген. Қазір бұл сайттарға кіру шектеліп, кінәлілер әкімшілік жауапкершілікке тартылды.“Барлығы 29 мемлекеттік және 11 жекеменшік мектепде тексеру жүргізіліп,&nbsp;заң бұзушылықтарды жою туралы 91 ұсыныс енгізіліп, 108 заңды және 55 лауазымды тұлға әкімшілік жауапкершілікке, бір тұлға жалған диплом пайдаланғаны үшін қылмыстық жауапкершілікке тартылды. Негізсіз жоспарланған 353 миллион теңгеге мемлекеттік сатып алулар тоқтатылды”, –&nbsp;делінген Атырау облыстық&nbsp;прокуратурасының хабарламасында.Фото: freepik.com

Атырауда 5 мектеп директоры балаларды ұрып-соғу фактілерін жасырып келген

<a href="https://kyzylorda-news.kz/">Kyzylorda-news.kz.</a> Кез келген мемлекет білім мен ғылымды дамытуға ерекше көңіл бөледі. Олай болатыны да заңдылық, себебі барлық салада серпін қалыптастыруда бұл мақсат-міндеттер ерекше маңызға ие. Қазақстан да тәуелсіздік алған жылдардан бері аталған салаға ерекше қолдау көрсетуде. Нәтиже де жоқ емес, қазір сөзімізді қуаттай түсу үшін салада қалыптасқан серпін жайын тілге тиек етсек, Жалағаш ауданының өзінде бірқатар жетістік бар. Жыл сайын түлектердің басым бөлігі мемлекеттік грантпен білім алуға қол жеткізуде. Аудан аймақта білім саласымен алдыңғы қатардан көрініп келеді. Әлбетте бұл мемлекет тарапынан көрсетілген қолдаудың және ұлағатты ұстаздардың еселі еңбегінің жемісі екеніне ешкімнің дауы жоқ. Мереке қарсаңында аудандық білім бөлімінің басшысы Талғат Садықовпен ауданда саланың даму барысы қалай, әлі де қандай мәселелер бар, жаңа оқу маусымында білім беру жүйесінде нендей өзгерістер бар, осы және өзге де бірқатар сауалдардың түйінін тарқатқан едік... &nbsp;– Талғат Құрақбайұлы, биыл ауданда сала бюджетінде өсім бар ма?– Биыл ғана емес, жыл сайын білім саласына бөлінетін қаражат көлемінде өсім қалыптасып келеді. Мәселен, 2022 жылы білім саласына бөлінген қаржы &nbsp;10 млрд теңгені құраса, 2023 жылға жоспарланған қаржы 14,5 млрд теңгеге жетті. Орташа есеппен сала бюджеті 30 пайызға артты деп толық айта аламын. Биыл да салаға бөлінген қаражат көлемінде өсім болды.&nbsp;– Осыған дейінгі сұхбаттарыңызда мектепке дейінгі тәрбие ісі тыс қалып жатады. Жалпы ауданда мектепке дейінгі тәрбиелеу мен оқыту барысы қалай, ауданда ондай қанша ұйым бар, оның қаншасы мемлекеттік, қаншасы жеке балабақшалар?&nbsp;– Жалағаш ауданында жалпы 36 мектепке дейінгі ұйым бар. Оның 10-ы – мемлекеттік, 23-і – жекеменшік балабақшалар. Мұнан бөлек 3 шағын орталық бар. Қазір бұл ұйымдарда 3048 бала тәрбиеленуде. Ауданда 3 жастан 6 жасқа дейін балаларды қамту көрсеткіші 100 пайызға жетіп отыр. Яғни мектеп жасына дейінгі балаларды балабақшамен қамтамасыз етуде мәселе жоқ.&nbsp;Сөзіңізден мектепке дейінгі тәрбие ісімен айналысатын ұйымдардың ішінде жекелердің үлсі басым екенін аңғаруға болады, оның қаншасы ауылдық елді мекендерде, қаншасы аудан орталығында? Жалпы ауылдарда бұған қатысты мәселе бар ма? Жалпы балабақшалардың ішінде апатты жағдайда тұрғандары бар ма және мектепке дейінгі тәрбие ісімен айналысатын ұйымдардың алдағы жылу мауысымына дайындығы қалай?&nbsp;– Жеке балабақшалардың үлесі 85,2 пайызды құрайды. 23 жекеменшік балабақшаның 13-і кентте, 10-ы ауылдық округтерде орналасқан. Қазіргі таңда апатты жағдайдағы балабақша жоқ, Кентте орналасқан «Күншуақ», «№19 санаторий», «Ақмаржан» балабақшалары табиғи газбен жылыту жүйесіне қосылды. Ал «Арай», «Жауқазын» балабақшаларын көгілдір отынға қосуға байланысты жобалық-сметалық құжаттар дайындауға 9 млн 356 мың теңгеге &nbsp;&nbsp;бюджеттік өтінім жасалды.&nbsp;– Енді орта білім беру жүйесіне көшейік, ауданда қанша мектеп бар, жаңа оқу жылын қанша оқушымен бастадыңыздар?&nbsp;– Ауданда 20 мектеп жұмыс жасайды. Оқушы саны – 7063. 2023-2024 оқу жылында бірінші сыныпқа барлығы 628 оқушы қабылданды. 2021-2022 оқу жылында 358 түлек мектепті тәмамдады.&nbsp;– Олардың қаншасы ҰБТ-ға қатысты, нәтиже қалай? &nbsp;– Ұлттық бірыңғай тестілеуге 323 түлек қатысты. Орташа балл – 83,1. Ұлттық бірыңғай тестілеу қорытындысымен білім беру гранты конкурсына қатысқан 302 талапкердің 86 пайызы, яғни 260 түлек грант иегері атанды. Әрине бұл – үлкен жетістік, мұның артында мемлекеттің салаға деген ерекше қолдауы мен әріптестерімнің еселі еңбегі жатыр. Бірақ біз бұл жетістікке тоқмейілсуден аулақпыз, керісінше жасаған жұмысымыздың жемісінен шабыт алып, әрі қарай да бәсекеге қабілетті ұрпақ қалыптастыруға аянбай еңбек етеміз.Қосымша және инклюзивті білім беруде нендей мәселелер бар?&nbsp;– Жалағаш ауданында 1 оқушылар үйі, 1 өнер және 2 спорт мектебінде &nbsp;2 300 &nbsp;бала қосымша біліммен қамтылған. Осы оқу жылында 20 мектеп жанындағы 126 үйірмеге 1825 &nbsp;бала қатысуда. Бүгінде 343 ерекше білім беруді қажет ететін балалар анықталып отыр. 169 бала мектепте, 22 бала арнайы психикалық дамуы тежелген сыныпта, 54 бала үйден оқытылуда, 60 бала балабақшада, 43 бала психологиялық-педагогикалық түзету, 45 бала ресурстық орталықта, 30 бала логопедиялық пункте түзету сабақтарын алуда. Әр оқу жылында ақыл-ой бұзылысы бар, нашар көретін және брайль шрифтімен жазатын оқушыларға арналған арнайы оқулықтар алынуда. Биылғы оқу жылында сұранысқа сай 2 млн 350 мың теңгеге оқулықтар алынды. Жұмыс жасайтын пән мұғалімдерінің біліктілігін арттыруда арнайы инклюзивті курстар тұрақты түрде ұйымдастырылуда. Мәселен, қазірге дейін 1 275 педагогтың 44 пайызы арнайы инклюзивті курстан өткен.&nbsp;– Жалпы білім ошақтарының материалдық инфрақұрылымы қалай?&nbsp;– Ағымдағы жөндеу жұмыстарына 2022 жылы 17 млн 800 мың теңге бөлінген, 2023 жылға барлығы 89 млн 346 мың теңге қаралып, тиісті қаражат көлемі 5 есеге &nbsp;артып отыр. 10 млн 727 мың теңгеге кент орталығындағы №31 мектеп-гимназиясы, Бұқарбай батыр ауылындағы №33 мектеп ғимаратын күрделі жөндеуге байланысты жобалық-сметалық құжаттары әзірленіп, мемлекеттік сараптамадан өткізілді. Ғимараттың күрделі жөндеу жұмыстарына келсек, №31 мектеп-гимназиясына 805,1 млн теңге, 33 орта мектепке 435,8 млн теңге қажет.Модернизация жаңғырту жұмыстарына 2023 жылы 6 мектеп &nbsp;жоспарға енгізіліп, барлығы 79 млн 297 мың теңге жұмсалды. Аудан мектептері 100 пайыз кеңжолақты интернет желісіне қосылған. &nbsp;Сонымен қатар бүгінгі күні мектептер 95 пайыз &nbsp;жаңа модификациялық физика, химия, биология пәндік кабинеттерімен жабдықталған. Мектептер бойынша құрал-жабдықтар алуға, яғни 2023 жылға&nbsp;LTD&nbsp;экран, парта, тақта, акт зал орындықтары, бейне бақылау камерасы, дабыл нүктесі, жылу жүйесінің құрал-жабдықтарына 107 млн 817 мың теңге бөлінді.&nbsp;– Бұрын тек көмекке мұқтаж балалар ғана мектеп қабырғасында ыстық тамақпен қамтылатын, қазір бастауыш сынып оқушылары да бұл мүмкіндікке қол жеткізді. Жалпы ауданда қанша балаға білім ошақтарында ыстық тамақ беріледі?– 2023 жылдың қаңтар айынан бастап 1-4 сыныптарда оқитын 1 899 оқушы 100 пайыз тегін ыстық тамақпен қамтылды. Көмекке мұқтаж 2074 баланы бір реттік қаржылай көмекпен қамтамасыз ету үшін облыстық бюджеттен 83 млн теңге бөлінді. Балаларға берілетін астың сапасы ұдайы бақылауда болады. Олардың ыстық тамақпен қамтылуында осы күнге дейін ешқандай мәселе туындаған емес, алдағы уақытта да жол бермейміз.&nbsp;– Жалпы мемлекет тарапынан салаға басқа да қандай қолдаулар бар?– Қазір білім саласына мемлекет тарапынан ерекше қолдау бар, оны жоғарыда айттым. Мұндай қолдау болмаса, сұхбат барысында сүзгіден өткізген қаншама шаруа осынша ширамайтын еді. Мұнан бөлек Президент Қасым-Жомарт Тоқаев мұғалімдердің әлеуметтік жағдайын жақсартуға және беделін арттыруға ерекше көңіл бөліп отыр. Президенттің бастамасымен 2019 жылы «Педагог мәртебесі туралы» жеке Заң қабылданды. Соңғы төрт жылда ұстаздардың жалақысы 2 есе өсті. Жуырда балабақша тәрбиешілерінің де айлығы 30 &nbsp;пайызға артты. Ұстаздардың еңбек демалысы да ұзартылды. Мұғалімнің міндетіне кірмейтін &nbsp;артық жұмыстың бәрі алынып тасталды. Ұстаздардың кәсіби біліктілігін арттыру мәселесіне әлі де мән беріліп жатыр. Қазір мұғалім мамандығын таңдаған жастарға қойылатын талап та күшейді. Осы саладағы студенттердің шәкіртақысы 2,5 есеге артты. Бір сөзбен айтқанда, білікті ұстаз даярлау ісіне ерекше мән берілуде.&nbsp;– Сұхбатыңызға рахмет!

Жалағаш аудандық білім бөлімінің басшысы:  Былтыр түлектердің 86 пайызы грантпен оқуға түсті

<a href="https://kyzylorda-news.kz/">Kyzylorda-news.kz.</a> Ұстаз деген ұлы есімді естігенде көз алдымызға жарқын мінезді, ақ жүректі, жылы жүзді бейне елестейтіні сөзсіз. Ұстаз бейнесі – шәкірт үшін адамгершіліктің ең жоғары үлгісі. Бала тәрбиелеуде үздіксіз қызмет етіп келе жатқан Манат &nbsp;Маханбетова – Жалағаш ауданындағы Темірбек Жүргенов атындағы №123 мектеп-лицейінің педагог-зерттеуші, орыс тілі мен әдебиеті пәнінің мұғалімі.&nbsp;Қасиетті мамандықтың қадірін түсірмей жүрген асыл жанмен жүздесу үшін арнайы қайраткер атындағы алтын ұяға қадам бастық. Өз ісіне берілген, шәкіртінің жанына нұр құя білген Манат апайдың көзқарасынан-ақ баланы оқытуда аянбай тер төгіп, ұрпақтың ұлы мұраты жолында талмай еңбек ететін ұлағатты ұстаз екені көрініп тұр. Ұлағатты ұстаз орыс тілі мен әдебиетіне қызыққан шәкірттеріне сапалы білім беруде оң бағыт-бағдар, дұрыс жол көрсетуде. «Адамның адамшылдығы жақсы ұстаздан» деп Абай хәкім айтпақшы, әрбір шәкірт жеңіске жетіп жатса, оның артында ұстаздарымыздың бір тамшы болса да еңбегі барын ұмытпауымыз қажет. «Еткен еңбегің міндетті түрде жемісін береді» дейді Манат апай. Оған дәлел, оның шәкірттері бүгінге дейін біраз жетістіктерге қол жеткізген.Мәселен, оқушылары орыс тілі мен әдебиеті бойынша көптеген республикалық, облыстық, аудандық, жалпы білім беретін пәндер бойынша олимпиадалардың жеңімпазы атанған. Атап айтсақ, Айсұлу Пайзрахманова облыстық лингвистикалық олимпиаданың ІІІ орын иегері атанса, Аружан Бақытжан аудандық «Пушкин оқуларынан» І орын, «Экология және біз» тақырыбында эсселер байқауынан Фариза Меңлібай ІІІ орын иеленген. Сондай-ақ жалпы білім беретін пәндер бойынша аудандық олимпиададан шәкірті Айсұлу Пайзрахманова былтыр І орын иеленіп, облыстық байқауда ІІІ орынға тұрақтады. Биыл дәл осы олимпиаданың аудандық кезеңінен Нұрсәуле Бақдәулет І орын алып, облыстық кезеңде үздік үштікті түйіндеді.Сондай-ақ дәл осы республикалық олимпиаданың 5-6 сынып оқушыларына арналған аудандық, облыстық кезеңінде 5 сынып оқушысы Данияр Мырамыр І орын иеленіп, республикалық кезеңнен ІІ орын алып, жеңіс тұғырынан көрінген.Ақылшы ұстаз әрқашан өзінің мол тәжірибесін жастарға үйретуден жалыққан емес. Саналы ғұмырын өзі сүйген қызметке арнап, баршаның ардақтысына айналған ұлағатты ұстаздың жетістіктері де жоқ емес. Ол – жақсы ұстаз ғана емес, білікті маман педагог-зерттеуші. Оның елеулі еңбегі қашанда ескерусіз қалмайды. &nbsp;Білім саласындағы жемісті еңбегі үшін ол облыс, қала әкімдерінің, республикалық кәсіподақ ұйымының алғыс хатымен және білім беру ұйымдарының дипломымен марапатталған. Сондай-ақ облыстық &nbsp;тамыз кеңесі аясында «Разработка заданий для оценивания по русскому языку и литературе» тақырыбы аясында шебер сынып көрсеткені үшін арнайы алғыс хатпен марапатталып, облыстық білім басқармасының республикалық олимпиада жеңімпазын дайындағаны үшін арнайы алғыс хат та иеленген. Бұдан бөлек «Үздік мектеп тренері» байқауының аудандық, облыстық кезеңінің жүлдегері. «Үздік авторлық бағдарлама» байқауының облыстық кезеңінің І орын иегері. Республикалық «Педстарт Дарын» олимпиадасында І орынды жеңіп алған білімді ұстаз.– Әр оқушының өзіне тән әлемі бар. Әрқайсысының мінезі мен қабілеті әртүрлі. Бірнеше жылдық еңбек жолымда алдымнан түрлі оқушылар өтті.«Ертеңгі күннің еншісі бүгінгі жас ұрпақтың білімі мен тәрбиесіне тікелей байланысты» десек, білімді шәкірт тәрбиелеп, оларды тұлға етіп &nbsp;қалыптастыруда қажырлы еңбек етіп, тер төгуіміз қажет.Жастардың білімнің ең биік шыңдарын бағындыруға жасаған алғашқы қадамдарының бірі – &nbsp;жалпы білім беретін пәндер бойынша олимпиадалар мен білім сайыстары және ғылыми жобалар. Бұл тұста мектебіміздің дарынды оқушылары республикалық олимпиадаларға облыс атынан қатысып, &nbsp;аудан абыройын асқақтатып, жүлделі орындардан көрініп жүр. Осындай дарынды шәкірттеріміз болашақта бұдан да биік белестерді бағындырып, үлкен жетістіктерге жететініне сенімім мол дейді, – Манат Жақсылыққызы.&nbsp;«Алты Алаштың баласы бас қосса, төрдегі орын мұғалімдікі» деп Мағжан Жұмабаев дәл айтқан. Шәкірттерін білім нәрімен сусындатып, тәлім-тәрбие беріп, жақсы қасиеттерді бойына дарытуда ұстаздың еңбегі зор. Ол сонысымен де қастерлі. Шәкірттерін терең біліммен қаруландырып, үлкен өмірге дайындау – тек білімді ұстаздың ғана қолынан келетін іс. Осындай ауыр жүкті көтеріп жүруде еш шаршамаған Манат Жақсылыққызы әлі талай жастың қанатын қатайтып, үлкен өмірге қадам басуына септігін тигізе бермек.&nbsp;23 жыл бойы ұстаздықтың ұлы жолында өзінің айшықты еңбегімен дараланған Манат Жақсылыққызы – ұлағатты ұстаз ғана емес, білікті маман. Себебі ол ғибратты ғұмырының қымбат шақтарын болашақ буындарды оқыту мен тәрбиелеу ісіне арнап келеді. Өз ісіне берілген, шәкірттерінің жанына нұр құйып, әрқайсысының тілін таба білетін, жас мамандарды өз ісінің мықты маманы болуға қайрап жүретін кейіпкеріміздің еңбегі – болашақ жастарға өнеге.

Мәртебесі биік мұғалім

<a href="https://kyzylorda-news.kz/">Kyzylorda-news.kz.</a> Ғылым-білім дамып, өркениет өрлеп тұрған заманда білімді, білгір ұрпақ қалыптасуы заңдылық. Егемен еліміздің ертеңі, кемел келешегіміздің кепілі болған жастар жаңашылдық пен ғылымға әуес. &nbsp;Еліміздің әр өңірінде талантымен талайды тамсандырып, білімімен көзге түсіп жүрген жастар да жоқ емес. Осы тұста жыл сайын оқушылардың өнертапқыштық пен шығармашылыққа деген қызығушылығын арттыру мақсатында «Ұлы өнертапқыштыққа алғашқы қадам» инновациялық идеялардың &nbsp;республикалық байқауы ұйымдастырылып тұрады. Биыл да аталған байқау жалғасын тауып, аудандық кезеңі өтті. Оған ауданға қарасты білім ошақтарынан &nbsp;10-нан аса оқушы қатысып, бақ сынады.Сайыстың басты мақсаты – техникалық мамандықтардың әлеуетін арттыру. Бұл сайыста оқушының білімі де, ойлау қабілеті де сынға түседі. Байқауға қатысушы оқушылардың біреуі архитектураға қызығып, түрлі макет жасаса, енді бірі работотехника саласын таңдаған.&nbsp;Байқауға қатысушылардың бірі – Фархад Мұратбек. Ол – Жалағаш ауданындағы Шекер Ермағанбетова атындағы №246 орта мектептің 7 сынып оқушысы. Мектеп оқушысы өз жобасын 1 айдан астам уақыт бойы дайындаған. Ол байқау барысында «Су көлігі саласындағы техникаларды құрастыру» номинациясы бойынша І орынды иеленді. Жас өнертапқыш облыстық байқауда аудан атынан қатысып, жеңіс тұғырынан көрініп, &nbsp;республикалық байқауға жолдама алды. Қуанышты хабарды ести сала әріптесім екеуміз қоғам қайреткері атындағы мектепке бет алып, ұлағатты ұстаз бен талантты жаспен тілдесуді жөн көрдік. Мектепке кіргеннен көздің жауын алар көркем қолөнерлер көзімізге оттай басылды. Ғалымжан Сейтжановтың шәкірттерімен бірлесе жасаған жұмыстары бір бөлмені бүтіндеп тұр.<blockquote>– Мен бұл кеменің ерекшеліктерін ғаламтор желісінен байқап, жетекшім Ғалымжан Сейтжанов ағайдың нұсқаулығымен жасадым. Бұл кеме 2014 жылы Францияда «EURONAVAL 24» атты көрмеде прототипі таныстырылған. Бұл кеме ТРИМАРАН 4000 XWIND стелс стилінде жасалды. Ұзындығы – 130-140 метр, ал ені 40 метрге жуық. Бұл кемені Француздар 2030 жылы құрастырып шығаруды жоспарлап отыр.</blockquote>Бұл кеменің ерекшелігі ол басқа кемелердің радарына көрінбейді және жаңа үлгідегі радиоэлектрлік станция жүйесі қойылады деп жоспарлануда. Бұл жүйе кемеге радиоэлектрлік шабуылға қарсы тұра алады.Қару есебінде жаңа үлгідегі лазерлік қондырғылар орналастырылған және кемеде екі басқарушысыз тікұшақ бар. Бұл аппараттар теңізде, мұхитта жүргенде оларды аспанға ұшырып, жан-жақтарына барлау жұмыстарын жүргізе алады. Бұл кеменің тағы бір ерекшелігі, оның тұмсығында. Ол теңізде қатты толқындар болған жағдайда толқынды кесіп өтіп, кеменің жылдамдығына әсер етпейді. Сондай-ақ басқа кемелерге қарағанда толқында өзін жақсы ұстайды. Алға қарай жүріп, оңға, солға бұрыла алады. Бұл кемені өз елімізде құрастырып шығаратын болсақ, Қазақстан Республикасының әскери теңіз флотына шекарамызды қорғауда аса көп көмегін тигізер еді, – дейді жас өнертапқыш.&nbsp;Мектеп мақтанышы Фархадтың әскери кемелерге деген қызығушылығы жоғары. Ол өзінің қызығушылығының арқасында осы кемені жасауды қолға алғанын, болашақта әскери маман болғысы келетінін жеткізді.&nbsp;Фархадтың жетекшісі Ғалымжан Сейтжанов – 27 жылдық еңбек өтілі бар тәжірибелі ұстаз, білікті маман. Шәкірттерін шыңдауда шаршамайтын қолөнер шеберінің оқушыларымен жеткен жетістіктері жетерлік. Бүгінге дейін ол бірнеше оқушыны үлкен сайыстарға дайындап, республикалық жарыстардан да жүлдемен оралған. Мәселен, өнертапқыш шәкірттерінің бірі Тамерлан Алдамжаров «Алтын қазына» көркем және сәндік-қолданбалы балалар шығармашылығының республикалық байқауының аудандық, облыстық кезеңдерінен І орын иеленіп, республикалық байқаудан арнайы сертификат жеңіп алған. &nbsp;Айта кетейік, бұл Тамерланның алғашқы жеңісі емес. Ол ұстазы Ғалымжан Абатұлымен бірге 2017 жылдан бастап түрлі байқауларда бақ сынап келеді. &nbsp;&nbsp;Дәл осы сайыстың облыстық байқауында шәкірті Ахат Нұртөре ағаш, сүйек, тері бұйымдары номинациясы бойынша ІІІ орынды иеленген. Білікті маман 2017 жылдан бастап «Ұлы өнертапқыштыққа алғашқы қадам» атты инновациялық идеялар байқауына оқушыларын қатыстырып, нәтижесінде толағай табыстарға жетіп жүр.&nbsp;Бүгінге дейін Ғалымжан Сейтжановтың жас өнертапқыштармен бірге авиация саласындағы жобалар, космоновтика және аэракосмос техникасы, автокөліктің қолданыстағы модельдерін әзірлеу, су көлік саласындағы техникаларды құрастыру тақырыптары аясында бірлесе жасаған жұмыстары қазылар алқасының көңілінен шығып, марапат төрінен көрінген. Соның бірі – жоғарыда айтып өткеніміздей, Фархадтың республикалық байқауға жолдама алуы.&nbsp;Талантты жастың жетекшісі Ғалымжан Сейтжановтың оқушысының әлі талай жетістікке жететініне сенімі мол.&nbsp;<blockquote>– ХХІ ғасыр – білім мен біліктіліктің дәуірі. Әр адам өзін үздіксіз жетілдіріп, жаңа кәсіптерді игеріп, үнемі заман ағымына қарай бейімделу арқылы ғана қабілетін арттыра алады. Сондай-ақ «Жастар – қашанда тың идеялардың қайнар көзі, оң өзгерістердің қозғаушы күші. Сондықтан өскелең ұрпақтың осындай әлеуетін дұрыс арнаға бағыттап, тиімді пайдалануымыз керек» деп Мемлекет басшысы Қасым-Жомарт Тоқаев өз мақаласында айтқан болатын. Заман өзгерістерінен тыс қалмай, өзінің жаңа технологиялық жетістіктерімен ғаламды мойындату – бүгінгі жас ұрпақтың үлесіне тиген үлкен мүмкіндік. Осы орайда келешегін ғылыммен байланыстыратын жас шәкірттердің еңбегін көпшілікке жиі таныстырып, мүмкіндік болып жатса, өзге өңірлерге тәжірибе алмасуға жіберіп тұрсақ деген ниеттеміз. Расында ХХІ ғасыр – ғылым мен білімнің, жаңа технологияның дәуірі. Осы тұста жастардың ақыл-ойы мен күш-жігерін өнертапқыштық салаға икемдеп, технологияны жетік меңгеруіне жүйелі түрде жұмыс жасап келеміз, – дейді, жетекшісі Ғалымжан Абатұлы.&nbsp;</blockquote>Әрбір шәкіртті тәрбиелеуде білім мен өнерді ұштастырып, шәкіртінің дарынын дамытып, қолдау көрсетіп жүрген Ғалымжан ұстаздың еңбегі ерен. ҚР Білім және Ғылым министрінің «Құрмет» грамотасымен марапатталған білікті маманның шәкірттері талай байқауларда топ жарып, аудан намысын қорғайтыны анық.&nbsp;

Жалағаштық өнертапқыш оқушы

<a href="https://kyzylorda-news.kz/">Kyzylorda-news.kz</a>&nbsp; Ұлттық бұйымдар алыстан көз тартады. Сыбызғыдай сызылған сыныптың шашбаулылары майысқан саусақтарымен жетіген тартып, әсем ән айтып отыр. Бұл Қазалы ауданындағы Ғани Мұратбаев атындағы 17 орта мектептің 4 "А" сыныбында өткен шараның бір шеті. Сынып жетекшісі Бағым Сахиева «Көрісу күні» аясында ұмыт болып бара жатқан салт-дәстүрді насихаттау мақсатында балалармен бірлесіп, «Бастаңғы» ұйымдастырды.&nbsp;Мектеп директорының тәрбие ісі жөніндегі орынбасары Айнұр Кенжалиева мен педагог ұйымдастырушы Бауыржан Бердібай сөз алып, ұлттық құндылықтарымызды жас ұрпақтың бойына сіңірудің маңыздылығына тоқталды.&nbsp;– Құрметті ата-аналар, оқушылар бүгін керемет күн. Көрісу күнімен тұспа-тұс келген сыныптарыңыздың Наурыз мерекесі тойлайтын күндеріңіз қатар келіп отыр екен. Қыстан аман-сау шыққанымызға осы күнді амал күні, көрісу күні деп атаған. Мереке баршамызға құтты болсын. Деніміз сау, отбасымыз аман болсын! Балалар үздік оқып, бізді қуантсын, – деді мектеп директорының тәрбие ісі жөніндегі орынбасары Айнұр Кенжалиева.&nbsp;– Көктем айы келіп, Наурыз мерекесі тойлауды бастап кеттік. Дана халқымыз күн мен түннің теңесуін біліп, жылдың басы санаған. Барлығыңызға жаңа жыл құтты болып, ақ мол болсын. Еліміз тыныш, бейбітшілік заман болып, өсіріп отырған балаларымыз биік белестерден көріне берсін, – деді педагог ұйымдастырушы Бауыржан Бердібай.&nbsp;Шаттыққа толы шара соңында балалар ән шырқап, би биледі. Керемет көрініс қойылды. Кең көлемде өткен мектеп оқушыларының шарасы көңіл қуантты. Келген қонақтар дастарқаннан дәм татып, тілектерін айтып, «Наурыз көже» ішті.

Қазақтың ұлттық салт-дәстүрі насихатталды

<a href="https://kyzylorda-news.kz/">Kyzylorda-news.kz</a>&nbsp; Жуырда аудандық білім бөлімі мен аудандық білім саласы ардагерлер ұйымының қолдауымен "Ата-ананың бала тәрбиесіне ықпалының педагогикалық шарттары" тақырыбында тренинг өтті.&nbsp;Аудандық оқушылар үйінің мәжіліс залында өткен жиында "Қазақстан Республикасы білім беру ісінің үздігі", "Қазалы ауданының құрметті азаматы", ғалым-ұстаз – Шарафадин Алтынбайұлы, белді кәсіпкер – Медеу Бердібайұлы мен ардагер ұстаз – Серік Қуанышбаевтар қатысты.Жалпы, қай уақытта болмасын, бала тәрбиесі мәселесі назардан тыс қалмаған. Өйткені ол – мемлекеттің аса маңызды міндеттерінің бірі. Кездесуде ата-аналар мен мұғалімдер бала тәрбиесіне қатысты өз ой-пікірлерін ортаға салды.– Қай елде, қай кезде болмасын, бала тәрбиесін ерекше дамытушы да, ілгері апарушы да-балалар, яғни бүгінгі ұрпақ-ертеңгі елдің болашағы. Жел бесіктен, жер бесікке дейінгі адам өміріндегі тәрбиенің ұйытқысы ата-ана мен ұстаз. Болашақ десек те, келешек десе де бала – ұрпақ деген мағынаны білдіреді. Адамның өзге тіршілік иесінен айырмашылығы – дүниеге перзент әкелген соң, оның болашағын ойлау, адам етіп тәрбиелеу. Бала тәрбиесі – бір отбасының ғана емес, бүкіл қоғамның мемлекеттік абыройлы міндеті. Кезінде Әл Фараби бабамыз «Ғылым емес, ең алдымен, тәрбиеге көңіл бөлу керек, тәрбиесіз адамға ғылым баянды болмайды» – демеп пе еді. Осыған орай, бүкіл ата-ана тәрбиеге бет бұруы керек. Ұрпақ тәрбиесіне мүдделі екендігін ата-аналар іс-жүзінде дәлелдеп отырулары тиіс. Міне, осындай ынтымақ бірлігінде ғана ойдағыдай нәтиже берері ақиқат. Жас ұрпақ біздің өміріміздің тікелей жалғастырушы ғана емес, еліміздің тірегі, мызғымас болашағы. Адамзаттың өмірдегі ең қымбаттысы, көз қуанышы – бала. Бала – дербес тұлға. Оның бойындағы табиғи қасиеттер, адамгершілік құндылықтары отбасында, мектепте, әлеуметтік ортада нәрленеді,&nbsp;– деді ардагер ұстаз Серік Қуанышбаев.Мұнан соң "Агро-Өркен" ЖШС құрылтайшысы Медеу Есқожаев өз қаржысына ұрпақ тәрбиесіне арналып шыққан "Тәрбие басы – тал бесік немесе бір өкініш, бір үміт" атты кітаптың 200 данасын баспадан қайта бастырып, тренингке қатысқан 200 ата-анаға Республикалық "Кітап сыйла" қозғалысы аясында тегін таратып берді. Жиын қатысушы ата-аналар сұрақ-жауабымен қорытындыланды.&nbsp;

Бала тәрбиесі – басты назарда 

<a href="https://kyzylorda-news.kz/">Kyzylorda-news.kz</a>&nbsp; Мұғалімнің шеберлігі мен жетістігі – сапалы білім мен жақсы тәрбие алған шәкірттерінде. Шәкірт қабілетін жан-жақты дамытып, шығармашылығын, ізденімпаздығын ұштай білу үшін ұстаз өзі шығармашыл тұлға болуы тиіс. Демек, бүгінгі заман мұғалімі қазіргі қоғамдық-әлеуметтік талаптарға жауап беретін, жан-жақты білімді, жаңашыл ойлау дағдысын меңгере отырып, теория мен практиканы үйлестіріп, оқыту тәсілдерін үнемі жетілдіріп, осының бәрін әдіснамалық тұрғыдан игеруі тиіс.&nbsp;Жуырда аудандық оқушылар үйінде білім мазмұнына сай технология элементтерін қолдана отырып, оқушылардың техникалық үйірмелер бойынша білімдерін тереңдетіп, қызығушылықтарын арттыру және логикалық қабілеттерін дамыту мақсатында «Техникалық шығармашылық: Ізденіс. Идея. Шеберлік» тақырыбында техникалық үйірмелер онкүндігі өткізілді. Онкүндікті техникалық бағыттағы &nbsp;«Авиамодельдеу», «Робототехника», «Бағдарламалау негіздері», «Көлік модельдеу», «Бастауыш техникалық жобалау», «3Д модельдеу» үйірмелері ұйымдастырды.&nbsp;Қазалы аудандық оқушылар үйінің «Бағдарламалау негіздері» үйірмесінің жетекшісі Гүлмира Нартайқызының айтуынша, онкүндіктің ашылуында&nbsp; аспан әлемін бейнелейтін ерекше декарацияны әр үйірме бағытында жасалған макеттер мен модельдер, роботтар, &nbsp;3Д модельдер көрмесі толықтырды.&nbsp;Оқу-тәрбие жұмысын түрлендіру бағытында ашық сабақтар, ұстаздар арасында&nbsp; тәжірибе алмасу сағаттары, оқушылармен&nbsp; тәрбиелік шаралар, спорттық жарыстар, оқушылар арасында&nbsp;ұйымдастырылған&nbsp; қызықты да, көңілді үзілістер -&nbsp; онкүндіктің мазмұнын аша түсті.&nbsp;Атап айтқанда, &nbsp;Ауғанстаннан кеңес әскерлерінің шығарылғанына 35 жыл толуына орай "Қаһарлы күндердің қаһарман елестері" тақырыбында ауған соғысы ардагерлері Қуаныш Шаңбаев, Болат Теңізбаев, Нұрлан Қоразбаевпен кездесу кеші өткізілді. Кешке қатысушы қонақтар, оқушылар, ұстаздар ауған жерінде қаза тапқан жауынгерлердің рухына 1 минут үнсіздік жариялап, еске алды. Ардагерлер ел болашағы жастарды патриотизмге, білімді, тәрбиелі болуға шақырды, оқушылар тарапынан қойылған&nbsp; сұрақтарға жауап берді. Ел аманатын арқалап, жастық шақтарының бір бөлігін от пен оқ астында өткізген ауған соғысы ардагерлеріне&nbsp;құрмет көрсетілді.&nbsp;– Дебат&nbsp;– пікірсайыс, шешендік өнер мен ой ұшқырлығы сынға түсетін ойын. Ойыншылар дәлелдер мен фактілерге сүйенеді. Дебат тәртіпке бағынады және дебатта ойыңызды еркін, нақты жеткізе аласыз. Оқушылар үйінде техникалық үйірмелер онкүндігі барысында &nbsp;қосымша білім педагогтарына арналған "Заманауи мұғалімнің кәсіби шеберлігінде АКТ қолдануы" тақырыбында әдістемелік сабақ, мұғалімдер арасында&nbsp; «Ғаламтор көлеңкесіндегі кітап» тақырыбында дебат өткізілді. Ұстаздар&nbsp; өздерінің өткір ойлы, сөзге шебер екендіктерін пікірсайыс барысында дәлелдеп, сөз саптау деңгейін, ораторлық қабілеттерін көрсете білді. Шараға дебат жетекшісі Жанболат Изжанов төрелік жасады. Сонымен қатар,&nbsp; "Лего құрастыру", "Жанасу датчигі" &nbsp;тақырыбындағы ашық сабақтар, оқушының бойында жақсы көңіл-күй қалыптастыруға арналған "Көңілді балақай" тренингі,&nbsp; оқушылардың балалық шағынан, отбасылық өмірінен, саяхат кезінен қызықты сәттерден «Бақытты балалық шақ» фотокөрмесі, «Қалдықтардан жасалған ғажайып» атты оқушылар арасында қалдық заттардан жасалған бұйымдар көрмесі, "Біз чемпионбыз!" спорттық сайысы өте тартысты ұйымдастырылды, – дейді Қазалы аудандық оқушылар үйінің «Бағдарламалау негіздері» үйірмесінің жетекшісі Гүлмира Иманалиева.Жеке тұлғаның өзіндік көзқарасын қалыптастыру және белсенділіктерін арттыру, ақыл-ой таным қабілеттерін дамыту, әрбір күні өзгеріске толы бүгінгі жауапты кезеңде замана көшінен қалмай, уақыт талабына сай жас ұрпақты білімді етіп тәрбиелеуде.&nbsp;Оқушылар үйінде түрлі бағыттағы онкүндік шаралар жалғасуда.&nbsp; Шығармашыл тұлғаны дамыту және қалыптастыруда, оқушының сабақтан бос уақытын тиімді ұйымдастыруда қосымша білім педагогтарының ізденістері мен педагогикалық шеберліктерінің арттыра түсері сөзсіз.&nbsp;

Шеберлік шыңдалған онкүндіктер

<a href="https://kyzylorda-news.kz/">Kyzylorda-news.kz</a>&nbsp; &nbsp;Жақында әдістемелік кабинеттің жылдық жоспарына сәйкес Ы.Алтынсарин атындағы №204 орта мектептің қазақ тілі мен әдебиеті пәні бірлестігінің ұйымдастыруымен «Оқылым дағдысы – функционалдық сауаттылықтың негізі» тақырыбында аудандық семинар өтті.&nbsp;Семинардың барысында мектеп басшысы Ләззат Ізбасқан мен аудандық білім бөлімінің әдіскері Жазира Оңғарова жиынға қатысушыларға сәттілік тілеп, құттықтау лебіздерін жеткізді. Мектеп оқушыларының алған білімдерін өмірде қолдану мүмкіндіктері туралы ақпарат беріліп, 7-сынып оқушысы Дамир Айғараның қазақ күйімен жалғасты.&nbsp;Бұдан бөлек, ұлттық құндылықтар қоса дәріптеліп, пән мұғалімдері Ажар Есенованың «Қазақ тілі пәнінен функционалдық сауаттылықты арттырудың тиімді тәсілдері» тақырыбында баяндамасы тыңдалды. Ғазиза Орынбетованың 9 «В» сыныбымен «Ғаламтор желісінің жетістіктері», Мақсат бағыныңқылы сабақтас құрмалас сөйлем тақырыбында ашық сабағы көрсетіліп, Шакизада Есенова мен Назгүл Ізімқұлдың «Білімдінің ойы ұшқыр, өресі кең» тақырыбында 9-сынып оқушылары арасында зияткерлік сайыс сабағы өткізілді. Одан әрі Қаламқас Телеуова мен Гүлназ Жүнісованың «Оқу сауаттылығының негізі – мәтінмен жұмысты толық қалыптастыру» тақырыбында шеберлік сағаты өткізілді. Мәтінмен жұмысты толық қалыптастыру мақсатында түрлі әдіс-тәсілдер ұйымдастырылды.&nbsp;Семинар соңында аудандық білім бөлімі әдіскері өткізілген сабақтардың мақсатына жеткендігін саралап, жиында жұмыстарын көрсеткен пән мұғалімдерін білім бөлімінің Алғыс хатымен марапаттады.

Филологтар шеберлік сабағын өткізді

Жаңақорған халқы ұстазға құрмет көрсетті

<a href="https://kyzylorda-news.kz/">Kyzylorda-news.kz</a>&nbsp;Қазақ ұлттық мәдениетінің ең байырғы, аса құнды салаларының бірі - қолөнер. Бүгінгі ұрпақ өзінің ұлттық кодын, ұлттық сезімдерін, өнерін жоғалтпауы қажет. Өнер адамға жақсы әсер ететін және оны тәрбиелейтін нәзік дүние. Оның құндылығы орасан зор.Осы орайда, Қызылорда қаласы бойынша білім бөлімінің ұйымдастыруымен Ахмет Байтұрсынов атындағы №211 орта мектебінде «Қазақ қолөнер туындылары – ұлттық құндылық пен дәстүр жалғастығы» тақырыбында көркем еңбек пәні мұғалімдерінің қалалық семинары өтті.&nbsp;Өнерлі оқушылар мен шығармашыл ұстаздардың әуезді әні мен күмбірлеген күйі, бастауыш сынып оқушыларының әсерлі хоры, жоспарлы шаралар, шебер ұстаздар мен талантты шәкірттердің әзірлеген қолөнер көрмесі, лайфхакқа толы «Шеберлік сағаттар», мектепте жүргізіліп жатқан «ІСКЕР АНА» жобасы бойынша қыз балалардың аналарымен бірлескен жұмыстары семинарға келген қонақтарға ұсынылды.Бұл мектепте республикалық, облыстық байқаулардың жеңімпазы, көркем еңбек пәнінің мұғалімдері Таңатарова Дәрігүл мен Жусупова Ұлдана жетекшілік ететін «ІСКЕР АНА» жобасы 2022-2023 жылдан бастап қарқынды жұмыс жасап келеді. Жоба аясындағы ата-аналармен бірлескен жұмыстар өз нәтижесін беруде.Талантты қылқалам шебері Азиз Әуезханұлы өзіндік қолтаңбасымен ерекшеленетін туындыларының қалай жарыққа шыққанын айтып, тәжірибесімен бөлісу арқылы әріптестерінің бейнелеу өнеріне деген ерекше құрметін арттыра білді.<img src="https://knadmin.beoblood.kz/uploads/431474789_1525593464835423_8546032167267031831_n_bd354c0395.jpg" alt="431474789_1525593464835423_8546032167267031831_n.jpg"><img src="https://knadmin.beoblood.kz/uploads/431182945_1525593648168738_3748345768805033992_n_4a9721101c.jpg" alt="431182945_1525593648168738_3748345768805033992_n.jpg"><img src="https://knadmin.beoblood.kz/uploads/431481777_1525593364835433_7965919833285863744_n_24aaaeb5eb.jpg" alt="431481777_1525593364835433_7965919833285863744_n.jpg"><img src="https://knadmin.beoblood.kz/uploads/431513596_1525593351502101_1757688857585198168_n_d390088214.jpg" alt="431513596_1525593351502101_1757688857585198168_n.jpg">

Қазақстан және Қызылорда облысының жаңалықтары: Білім