<a href="https://kyzylorda-news.kz/ru/obshestvo/">Kyzylorda-news.kz</a>. Сербия астанасы Белград қаласында өтіп жатқан бокстан әлем чемпионатының финалында бүгін екі қазақстандық шаршы алаңға шығады, деп хабарлайды ҚазАқпарат.
Бүгін ел құрамасынан Махмуд Сабырхан (54 келі) мен Теміртас Жүсіпов (48 келі) шаршы алаңға шығады. Махмуд жапониялық Томоя Цубоимен қолғап түйістірсе, Теміртас таиландтық Вуттичай Юрачаймен кездеседі.
Бүгін жеті салмақтағы жекпе-жекте шығатын боксшылар тізімі төмендегіше:
48 келі. Теміртас Жүсіпов (Қазақстан) – Вуттичай Юрачай (Таиланд)
54 келі. Махмуд Сабырхан (Қазақстан) – Томоя Цубои (Жапония)
60 келі. Абдумалик Халоков (Өзбекстан) – Софьян Умиа (Франция)
67 келі. Севонрец Окадзава (Жапония) – Омари Джонс (АҚШ)
75 келі. Йоэнлис Эрнандес Мартинес (Куба) – Джамбулат Бижамов (Ресей)
86 келі. Кено Мачадо (Бразилия) – Лорен Альфонсо Домингес (Әзербайжан)
92 келіден жоғары. Давит Чалоян (Армения) – Марк Петровский (Ресей).
Жекпе-жектер елорда уақытымен 23:00-де басталып, «Qazsport» телеарнасынан тікелей эфирде көрсетіледі.
Еске салсақ, ел құрамасынан Теміртас Жүсіпов (48 келі), Махмуд Сабырхан (54 келі), Сәкен Бибосынов (51 келі), Серік Теміржанов (57 келі) финалға берілген үшінші жолдамаға ие болды.
<a href="https://www.inform.kz/kz/alem-chempionaty-kazakstan-kuramasynan-finalga-tort-boksshy-shykty_a3858008">Ал ел құрамасынан</a>&nbsp;Абылайхан Жүсіпов (67 келі) жапон Севонрец Окадзаваға есе жіберді.
Еске салсақ, ширек финалда Нұрбек Оралбай (80 келі), Санатали Төлтаев (63,5 келі) Асланбек Шымбергенов (71 келі), Саматәли Төлтаев (60 келі) пен Нұрқанат Райыс (75 келі) қарсыластарына жол берді.
Ал ширек финалға дейін Бек Нұрмағамбет (86 келі), Айбек Оралбай (92 келі) пен Нұрлан Сапарбай (92 келіден жоғары) қарсыластарына жол берді.
Әлем чемпионаты 6 қарашада мәресіне жетеді.

Бокстан әлем чемпионатының финалы: Бүгін екі қазақстандық рингке шығады

<a href="https://kyzylorda-news.kz/ru/obshestvo/">Kyzylorda-news.kz</a>. Бокстан әлем чемпионатының кешкі сессиясында шаршы алаңғы шыққан Санатәлі Төлтаев пен Асланбек Шымбергенов қарсыластарына есе жіберіп, жарысты жүлдесіз аяқтады.
63,5 килоға дейінгі салмақта Санатәлі Төлтаев шотланд боксшысы Рис Линчке жол берді. Қазақ боксшысы үш раунд бойы белсенді жұдырықтасқанмен, төрешілер шешімі екі жарылды. Нәтижесінде қарсыласы 3:2 есебімен басым болып кетті.
71 килоға дейінгі салмақта Асланбек Шымбергенов Украинадан барған Юрий Захареевке жеңілді. Айқасқа толы өткен жекпе-жекте де төрешілердің шешімі қарсылас пайдасына ауды. 3:2 есебімен ұтқан Юрий жартылай финалға шықты.
Қазіргі таңда жартылай финалға 5 боксшымыз жолдама алды. Олар – Теміртас Жүсіпов, Махмұд Сабырхан, Абылайхан Жүсіпов, Сәкен Бибосынов және Серік Теміржанов.

ӘЧ-2021. Жартылай финалға 5 боксшы жолдама алды

<a href="https://kyzylorda-news.kz/ru/obshestvo/">Kyzylorda-news.kz</a>. Аталған шара көрерменсіз өтті. Оған тек ресми тұлғалар – ел президенті Катерина Сакелларопулу, Халықаралық Олимпиада комитетінің президенті Томас Бах, Грекия Олимпиада комитетінің басшысы Спирос Капралос және тағы басқалары қатысты, деп хабарлайды ҚазАқпарат.
Алауды жағу рәсімі&nbsp;<a href="https://www.youtube.com/watch?v=pz936NJY2HI">YouTube</a>&nbsp;арнасынан көрсетілді. Олимпиада алауының шырағын бірінші болып тау шаңғышысы Иоаннис Антониу көтереді.
Алау Ежелгі Олимпия стадионынан қазіргі заманғы Олимпиада ойындарының негізін қалаушы, француз бароны Пьер де Кубертен ескерткішіне дейін апарылады.
Бұдан кейін түнге қарай оны Афинаның Акрополіне апарып, 19 қазанда Қытай делегациясына табыстайды.
Грекияда алау эстафетасы COVID-19 вирусына байланысты шектеуге байланысты өткізілмеді.
Айта ктерлігі, Қысқы Олимпиада ойындары Бейжіңде 2022 жылғы 4-20 ақпан күндері аралығында өтеді.
Фото: tass.com

Грекияда Олимпиада алауы жағылды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Нобель сыйлығы алғаш рет 1901 жылы берілді, содан бері әлемдегі ең беделді марапаттардың біріне айналды. Бірақ жанжалдар мен даулы оқиғалар бұл сыйлықты да айналып өтпеді. Оның тарихында күмәнді жеңімпаздар мен саясаттың тигізген әсері болды.
<img src="https://kyzylorda-news.kz/wp-content/uploads/2021/10/nobel1.jpg" alt="" />
Марапаттаушы
1888 жылы француз газетінде Альфред Нобельдің өліміне байланысты “Өлім саудагері қайтыс болды” деп аталатын некролог жарияланды. Бұл қайғылы хабар орынсыз жарияланды. Өйткені Канндағы ауруханалардың бірінде Альфредтің туған ағасы Людвиг Нобель дүниеден озған еді. Динамит өнертапқышы осы некрологты оқығаннан кейін ұрпақ жадында өмір бойы “Өлім саудагері” ретінде қалғысы келмеді және дүние жүзінде ғылымда жетістіктерге жеткендерді ынталандыратын арнайы қорға өз мүлкін өсиет етті.
<img src="https://kyzylorda-news.kz/wp-content/uploads/2021/10/nobel2.jpg" alt="" />
Толстойдың Нобель алмауы оқырмандар мен қаламгерлердің наразылығын тудырған
1901 жылы әдебиет саласындағы алғашқы Нобель сыйлығын француз ақыны Арман Сюлли-Прюдом алды. Бұл&nbsp; әлемде шығармалары ең көп оқылатын жазушы Лев Николаевич Толстойдың атағы дүрілдеп, өнімді еңбек етіп жүрген уақытта болған еді.
Кейбір деректер орыс жазушысының бұл сыйлықты 1901 жылы алуға үмітті болғанын, ал 1906 жылы тағы ұсынылғанда үзілді-кесілді бас тартқанын айтады.
<img src="https://kyzylorda-news.kz/wp-content/uploads/2021/10/nobel3.jpg" alt="" />
Мәжбүрлі түрде бас тартқан ақын Пастернак
1955 жылы орыс ақыны Борис Пастернак “Доктор Живаго” романын жазып бітіреді. Кеңес цензурасынан алғаш өткен шығарма баспаға әзір болады, бірақ кейіннен бұл туындыны Совет идеясына қарсы шығарма деп басылуға тыйым салады. Осы уақытта “Доктор Живаго” қолжазба түрінде Еуропаға өтіп кетеді. Алғаш рет 1958 жылы италян тілінде шығады. Сол жылы-ақ Нобель сыйлығына ие болады. Бірақ, Пастернак бұл сыйлықты барып ала алмайды. Оны сыйлықтан үкімет адамдары мәжбүрлі түрде бас тартқызады. Ақынды отанын сатқан опасыз деп айыптайды. Қудалауға ұшыраған Пастернактың өмірі аш-жалаңаш күйінде қайғылы аяқталады.
<img src="https://kyzylorda-news.kz/wp-content/uploads/2021/10/nobel4.jpg" alt="" />
Гендерлік теңсіздік
Марапаттау рәсімінің тарихында жеңімпаздардың тек 5 пайызы әйелдер болды. Ең үлкен жанжал британиялық астрофизик Джоселин Белл Бернеллге қатысты болды. Ол 1967 жылы ғарыштық сәулелердің көзін анықтап, Энтони Хьюмен бірге мақаланың авторы болды. Алайда, 1974 жылы Нобель сыйлығын Энтони Хью мен оның басқа әріптестері алды, ал өнертапқыш әйелдің аты-жөні де айтылмады.
<img src="https://kyzylorda-news.kz/wp-content/uploads/2021/10/nobel5.jpg" alt="" />
Қарама-қайшылық тудырған марапат
Бұл бағыт марапаттау тарихындағы ең даулы бағыттардың бірі болып және жеңімпазды таңдаудағы қателіктің жарқын мысалы.
Ясир Арафат 1994 жылы Исаак Робин мен Шимон Переспен Палестина-Израиль қақтығысын реттеу туралы келісім бойынша жұмыс істегені үшін сыйлыққа ие болды. Даудың себебі Ясир Арафат халықаралық терроризмнің көрінісі деп саналатын “Палестинаны азат ету” ұйымының басшысы еді.
<img src="https://kyzylorda-news.kz/wp-content/uploads/2021/10/nobel6.jpg" alt="" />
Сәтсіз әзіл
1939 жылы Адольф Гитлер Нобель сыйлығына ұсынылды. Осыдан соң Нобель комитеті көпшіліктің наразылығына ұшырады. Кейіннен оның кандидатурасы қайтарылып алынды және Гитлердің кандидатурасы “сәтсіз әзіл” деп жарияланды.
<img src="https://kyzylorda-news.kz/wp-content/uploads/2021/10/nobel7.jpg" alt="" />
Менің бас тартуға құқығым бар
Нобель сыйлығын алу өте беделді және маңызды болғанымен, бұл атақтан бас тартқандар болды. Мысалы, француз философы Жан-Поль-Сартр ешқашан, ешқандай жағдайда да ресми сыйлық алған емес. Ол 1964 жылғы әдебиет бойынша Нобель сыйлығынан бас тартты.
1974 жылы Вьетнамда бейбітшілік орнатуға еңбек сіңірген саясаткер Ле Дик Тхо бұл елде бейбітшілік орнауға әлі көп уақыт бар екенін айтып, сыйлықтан бас тартты.
<img src="https://kyzylorda-news.kz/wp-content/uploads/2021/10/nobel8.jpg" alt="" />
Мүдделер қақтығысы
2008 жылы папиллома вирусының қатерлі ісікпен байланысы бар екенін анықтаған Харальд Цур Хаузенге сыйлықтың табысталуына байланысты көптеген даулар болды. Вакцина шығарушы AstraZeneca Нобель сыйлығының сайтына демеуші болып шықты. Сонымен қатар, осы ғалымның кандидатурасына дауыс бергендердің екеуі де бұл компаниямен байланысы бар екен. Кейінгі тексерулерде заң бұзушылықтар анықталмады. Бірақ марапаттау рәсімі сынға ұшырады.
***
Жыл сайынғы Нобель сыйлығын тапсыру рәсімі Стокгольмде өтеді. Бейбітшілік сыйлығын қоспағанда, барлық марапатты Швеция королі ұсынады және марапаттау рәсімінен кейін жеңімпаздар мен олардың қонақтары арнайы банкетке шақырылады. 1901 жылдан бері жұмыс істеп келе жатқан банкет мәзірі ешқашан қайталанбаған, бүкіл процесс әр секундына дейін есептелген және оның уақыты бұзылған емес.
Биыл&nbsp; пандемияға байланысты сыйлықтың марапаттау рәсімі екінші рет өтпеді.
4 қазанда Медицина саласындағы беделді марапат Калифорния университетінің профессоры Дэвид Джлиус пен АҚШ -тағы Scrips зерттеу институтының ғылыми қызметкері Ардем Патапутянға берілді.
5 қазанда Джорджио Паризи, Клаус Хассельман және Сюкуро Манабе 2021 жылғы физика бойынша Нобель сыйлығының лауреаттары атанды.
6 қазанда Бенджамин Лист пен Дэвид Макмиллан химия бойынша асимметриялық органокатализаторды дамытқаны үшін 2021 жылғы Нобель сыйлығының лауреаттары атанды.
7 қазанда Ұлыбритания жазушысы, тегі танзаниялық Абдулразак Гурна әдебиет саласы бойынша Нобель сыйлығының лауреаты атанды.
8 қазанда Бейбітшілік саласы бойынша Нобель сыйлығы Ресейдің “Новая газетасының” бас редакторы Дмитрий Мұратов пен филиппиндік зерттеуші журналист Мария Рессаға сөз бостандығын, демократия мен мөлдір әлемнің негізін қорғауға күш салғаны үшін берілді.
11 қазанда экономика саласындағы Альфред Нобель сыйлығы америкалық ғалымдар Дэвид Кардқа “еңбек экономикасына эмпирикалық үлес қосқаны үшін”, Джошуа Ангрист пен Гвидо Имбенске “себеп-салдарлық қатынастарды талдаудағы әдістемелік үлесі үшін” берілді.
<a href="https://massaget.kz/layfstayl/debiet/66356/?fbclid=IwAR0QLH3gtJRDUBGlpcxL4OT9VcT__ULrCnl0rzoKGxTaMCUkEKJiG8VOe1U">Massaget.kz</a>

Нобель айналасындағы даулы оқиғалар

<a href="https://kyzylorda-news.kz/ru/obshestvo/">Kyzylorda-news.kz</a>. 2008 жылда бері 15 қазанда&nbsp;«Дүниежүзілік таза қол күнін»&nbsp;(Global Handwashing Day) аталып өтіледі. Бұл шара БҰҰ Бас ассамблеясы ЮНИСЕФ балалар қорымен және Дүниежүзілік денсаулық сақтау ұйымының бастамасы бойынша өткізілеп келеді, деп хабарлайды Қоғамдық денсаулық сақтау ұлттық орталығының баспасөз қызметі.
Бұл күн қол жуудың денсаулыққа әсері туралы халықтың хабардарлығын арттыруға арналған. Дүниежүзілік таза қол күні жеке гигиена негіздеріне арналған. Оның басты мақсаты – үйде де, одан тыс жерлерде де қолды жууды дағдылы әрекетке айналдыру.
Адам алақанымен бітн жауып түшкіреді немесе жөтеледі, содан кейін ол қолымен есік тұтқасынан немесе көліктегі тұтқаны ұстайды, кейін тура сол тұтқаны сізді ұстайсыз. Вирустар мен бактериялардың бәрі сіздің қолыңызда қалады. Бұл жағдайдың өзі қорқынышты емес. Мәселе, біз бейсаналы түрде бетімізді қолымызбен қстаймыз, зерттеуге сәйкес, орташа есеппен сағатына 23 рет, яғни күніне жүздеген рет ұстайды екенбіз. Әрбір осындай жанасу арқылы ағзаға ауыздың, мұрынның және көздің шырышты қабаттары арқылы инфекцияның кіру қаупі бар. Егер сіз қолыңызды үнемі жусаңыз, қауіп айтарлықтай төмендейді.
Антисептиктер, майлықтар, гельдер және құрамында спирті бар басқа дезинфекциялық заттар пайдалы болуы мүмкін, бірақ қарапайым сабынмен ештеңені салыстыруға болмайды. Сабын мен судың үйлесімі жұқпалы ауруларға, соның ішінде коронавирусқа қарсы ең күшті қарудың бірі болып қала береді. Сондықтан Дүниежүзілік денсаулық сақтау ұйымы (ДДҰ) қолды жуу мүмкін болмаса, антисептикті сабынға балама ретінде ғана қолдануды ұсынады.
Ең бастысы – қолды дұрыс жуу: оны кем дегенде 20 секунд жуу ұсынылады. Алақанның сыртына, сондай-ақ саусақтардың арасындағы теріге назар аудару керек. Тырнақтарды да ұмытпаңыз – олардың астында үнемі кір, тамақ қалдықтары және патологиялық микроорганизмдердің көбеюіне тамаша жағдай жасайтын басқа заттар жиналады.
Қолды тамақ пісірер алдында және дастархан дайындамас бұрын; тамақтанар алдында; көшеден келгенде немесе қоқыс шығарғанда; қоғамдық орындардан үйге оралғанда немесе қоғамдық көлікте жүргеннен кейін; дәретханаға барғаннан кейін; жараны емдеуден бұрын және кейін; үй жануарларымен ойнағаннан кейін және т. б.&nbsp;жуу керек. Бұл диарея ауруының деңгейін 40 пайыздан астам, ал тыныс жолдарының инфекциясын 25 пайызға дейін төмендетеді.

Бүгін Дүниежүзілік қол жуу күні

<a href="https://kyzylorda-news.kz/ru/obshestvo/">Kyzylorda-news.kz</a>. Әлемдік психиатрия ассоциациясы суицидология секциясының мүшесі Всеволод Розанов коронавирустық пандемия басталғаннан бері әлем бойынша суицид саны азайғанын мәлімдеді, деп хабарлайды&nbsp;<a href="https://stan.kz/">Stan.kz</a>.&nbsp;
<blockquote>
 “Посткеңестік елдерге келетін болсақ, мұнда соңғы 10 жылда суицид саны азайып келеді. Пандемия басталған уақытта біз тап болған күйзеліс кезеңінде суицид саны көбеюі мүмкін деген қорқыныш болды. Пандемияның бірінші кезеңінде-ақ көптеген локдаундар жарияланды. Сонымен қатар суицид санының да төмендегені байқалды”, – деді Розанов.
</blockquote>
Маман мұны адамдардың қиын кезеңде тірі қалуға тырысатынымен байланыстырды.&nbsp;
<blockquote>
 “Мұнда, былайша айтқанда, өзін-өзі өлтіруге дейін болмады. Алайда дәл қазір жағдайдың қалай болып жатқанын білмейміз. Суицид жайлы деректер кешігіп жатыр. Пандемияның тез аяқталмауы мен туындаған экономикалық жағдайға байланысты әлемде суицид саны қайта көбеюі мүмкін деген қорқыныш та бар. Біз қазір дамыған елдерде де логистикалық байланыстың үзілгенін көріп отырмыз. Әрине, жағдай нашарлап кетуі де мүмкін”, – деп түсіндірді спикер.
</blockquote>

Пандемия уақытында суицид саны азайған

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылордалық ауыр атлет Рахат Бекболат жасөспірімдер арасында әлем чемпионы атанды.
Рахат Бекболат Сауд Арабиясында өтіп жатқан ауыр атлетикадан жасөспірімдер арасындағы әлем чемпионатында 102 келіге дейінгі салмақ дәрежесінде бірінші орынды иеленді.
Бекболат 355 (155 + 200) келіні көтерді. Екінші орында түркиялық Танер Чаглар (152 + 185). Үздік үштікте Ирак спортшысы Аммар Рубаяви Әли бар (149 + 185). Спортшы алтын медаль алғаннан кейін қазақстандық жанкүйерлерге қолдау көрсеткені үшін алғысын білдірді.
Мен өте ризамын, бәрі бір деммен өтті. Жарыс жоғары деңгейде және санитарлық-эпидемиологиялық талаптарға сай болды, – дейді жас спортшы.

Қызылордалық Рахат Бекболат ауыр атлетикадан әлем чемпионы атанды

<a href="https://kyzylorda-news.kz/ru/obshestvo/">Kyzylorda-news.kz</a>. Қорқыт Ата атындағы Қызылорда университетінде білім ала жүріп, шетелдегі оқу орындарында тәжірибе жинақтап, біліктілік арттыруға болады. Бүгінде университет пен шетелдік жетекші жоғары оқу орындары, білім беру және мәдени орталықтары арасында 170-ке жуық шарт пен меморандумға қол қойылды.
Биыл білім ордасындағы студенттер арасында шетелде оқуға ниет білдірушілер саны артқан. Олардың қатарында 2 курс магистранты Әсел Баймаханова бар. Қазір Әсел АҚШ-тың Монтана штаты, Бозмен қаласындағы Montana мемлекеттік университетінде білімін шыңдауда. Жуырда Әселмен хабарласып, ол жақтағы оқу барысы, ерекшелігі туралы сөз қозғадық.
<img src="https://kyzylorda-news.kz/wp-content/uploads/2021/10/03.jpg" alt="" />
– Әсел, АҚШ-қа 6 апталық тәжірибе алмасуға аттандыңыз.&nbsp;Шетелде оқимын деген мақсат қалай туындады?
– Бала кезден-ақ, шетелде оқысам білімім екі еселенеді деген сенім болды. Он жыл бұрын менде мүмкіндік болғанымен, отбасылық жағдайыма байланысты бара алмадым. Сол арманым биыл орындалды. Шетелде оқудағы мақсатым – елдегі біліммен салыстыра отырып, кәсіби деңгейде даму, шәкірттеріме әлемдік деңгейдегі білім дағдыларын үйрету.
Бұл елде ағылшын тілін білу деңгейім артты. Мұнда ерекше балаларға білім беру тәсілдерін меңгеріп жатырмыз. Елімізде денсаулық жағдайы, өзіндік ерекшелігіне байланысты үйден оқитын оқушыларды мектепке апару, қоғамға үйрету жұмыстары жүргізілуде. Бұл жұмыстардың өзіндік күрделі тұстары жетерлік. Сондықтан білімімді жетілдіре отырып, мұндай мәселелерді шешу жолдары, білім беру жүйесінің артықшылықтары туралы зерттеу жүргізудемін.
– Қазір жастардың көбі шет елге шығуды армандайды. Жастардың шет елде оқуға деген ерекше ұмтылысы туралы не айтасыз?
– Жастардың шетелде оқуға құштарлығы қуантады. Шетелде оқу арқылы ең алдымен ұлттық құндылықтарды бағалап үйренеді. Білім беру жүйесін салыстырып, тұлғалық тұрғыда дамуға оң әсер етеді. Бір Американың өзінде&nbsp;30 елдің адамымен кездесуге болады. Әр елдің сабақ беру методикасын көру арқылы көп жаңашылдықты үйренесің. Бір аптадан бері «public speaking», яғни, &nbsp;халық алдында сөйлеуді үйреніп жатырмыз. Негізі мұндағы жүйенің біздің оқу бағдарламасымен ұқсас тұстары бар, бірақ қосымша үйренетін дүниелер де аз емес.
<img src="https://kyzylorda-news.kz/wp-content/uploads/2021/10/02.jpg" alt="" />
– Білім жетілдіру барысында қандай жаңа мақсаттар туындады?
– Алдағы уақытта балаларымның ой-өрісі, дүниетанымдарының кең болуы үшін ата-ана ретінде қолымнан келгенін жасағым келеді. Шет елде жүріп, қаншама дарынды жастарды көрдім. Олардың көздерінен оқу-білімге деген ерекше құлшынысты көруге болады. Біз АҚШ, Жапония сияқты дамыған елдердің қатарына қосылу үшін кейінгі ұрпақ білімді болу керек.
АҚШ-та алған білімімді елдің дамуы үшін жұмсасам деймін.
– Әсел енді туған жеріңіз, өскен ортаңыз, отбасыңыз туралы айтсаңыз…
– Жалағаш ауданы, Бұқарбай батыр ауылында мұғалімдер отбасында тәрбиелендім. Әкем физика пәнінің мұғалімі, мектеп директоры болған кісі. Менде әкемнен үлгі алып, ұстаздық жолды таңдадым. Он жылдан бері мұғалім болып қызмет етіп келемін. Сондай-ақ, төрт баланың анасымын.
– Жастарға қандай кеңес бересіз?
– Қазіргі заман білімділер заманы. Виза алғаннан кейін мен не көрдім? Ірі компанияларды жұмыс жасайтын, шет елге саяхатқа шыққан жастардың көптігін байқадым.&nbsp; Жай ғана жанкүйер ретінде футбол командасының кезекті ойынын көру үшін шет елге атанған жас отбасыларды көрдім. Ата-анасымен ел көруге аттанғандар қаншама?! Мен оларды көріп қанаттандым. Қанша жерден бай болсаң да, білімің болмаса биікке шыға алмайсың. Болашақ тек білімді жастардың қолында.
Сұқбаттасқан Назерке Шарападдин

Әсел Баймаханова: Жастар шетелде оқу арқылы ұлттық құндылықтарды бағалап үйренеді

<a href="https://kyzylorda-news.kz/ru/obshestvo/">Kyzylorda-news.kz</a>. «Кальмар ойыны» сериалынан кейін балалар ондағы эпизодтарды қайталауда. Әлем ұстаздары осылай деп дабыл қағуда. Балалар ойын ойнап, жеңілгендерді кемсітіп, қорлап, тіпті соққыға жығып, қатыгез жазалауда, деп хабарлайды <a href="https://stan.kz/">Stan.kz</a>.
Ал қиялы қатты дамыған балалар сценарийден шығып, кинодағыдан да қауіпті жазаларды ойлап табуда.&nbsp;
Психолог әрі психотерапевт Галина Салтанованың айтуынша, бұл ойынды тоқтатпаса, оның соңы орны толмас өкінішке апаруы мүмкін.&nbsp;
<blockquote>
 «Балалардың психикасы толық қалыптасып бітпеген. Олар образды түрде, көз алдына картинаны елестетіп ойланады. Ал ол ойлары алдымен санасына, кейін бейсанасына жазылады», –&nbsp;дейді психолог.&nbsp;
</blockquote>
Салтанованың пікірінше, «Кальмар ойыны» балалар үшін қауіпті. Бұл ойын әлсіз адамның көзін жоюға жетелейді.&nbsp;
<blockquote>
 _«Ойын –&nbsp;балалық кезеңнің жетекші қызметі. Ойын ойнау арқылы біз рөлдерді танып-білеміз. Бұрын балалар анасы мен қызы, дүкенші, құтқарушы, полицей сынды ойындарды ойнайтын. Енді балалар қаскөйді сомдайды.&nbsp;Бұл қоғам үшін қауіпті», –&nbsp;деді Галина Салтанова._
</blockquote>
Психологтың айтуынша, елімізде «Кальмар ойынына» тез арада шектеу қою керек. &nbsp;
<blockquote>
 _«Кальмар ойыны» өте қауіпті. Белгісіз адамдардың мектепке басып кіріп, оқушыларды атып тастағанын хикаялардан білеміз. Ата-аналар баланың теледидардан, ғаламтордан қандай контент қарап отырғанын қатаң бақылауы керек», – дейді психолог._
</blockquote>
Бұл ойынды ойнаған баланың психикасына сіңіп, болашақта ол сыртқа шығып, адам шошырлық жайттарға апаруы мүмкін.&nbsp;
<blockquote>
 _«Жүйке-жүйесі әлсіз қабылдағыш балалар әлсіз болудан қорқатын болады», –&nbsp;деді Салтанова._&nbsp;
</blockquote>
Айта кетейік, «Кальмар ойыны» жақында ғана ел арасында кеңінен танымал болған Netflix-тегі сериал. Хикаяда қарызға батқан адамдар біртүрлі ойынға қатысуға келіседі. Жеңімпаз қомақты қаржыға ие болса, жеңілгендер өледі. Сериал әлемнің 90 елінде ең көп қаралған 10 туындының ішінде көш бастады.

Қазақстанда «Кальмар ойыны» сериалына тыйым салу ұсынылды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Италия Роттердамдағы Maneskin тобының жеңісінен кейін ән байқауын өткізу құқығына ие болған.
Бүгін халықаралық ән байқауының қай қалада өтетінін жариялады. 2022 жылы «Евровидение» ән байқауы Италияның Туринінде ұйымдастырылады.
Итальяндық Rai мемлекеттік радио-телевидение корпорациясы басшылығының ресми хабарламасы да жарияланатын күн алыс емес, дегенмен Туриннің кандидатурасы мақұлданып қойған.
Солтүстік әкімшілік орталығынан бөлек байқауды өткізуге Милан, Болонья, Римини және Пезаро қалалары да үміткер болды.
<a href="https://24.kz/kz/zha-aly-tar/lemde/item/503160-eurovision-2022-baj-auy-aj-alada-tetini-any-taldy">24 kz</a>

Eurovision 2022 байқауы қай қалада өтетіні анықталды

<a href="https://kyzylorda-news.kz/ru/obshestvo/">Kyzylorda-news.kz</a>. ҚР Білім және ғылым министрлігінің қолдауымен Қорқыт ата атындағы Қызылорда университетінің 10 студенті «Академиялық ұтқырлық» бағдарламасы бойынша Польша Республикасының Лодзь университетіне 2021-2022 оқу жылының бірінші академиялық кезеңіне оқуға барады.
Осы орайда, жолдама алған білім алушыларымызды құттықтап, оқуда сәттілік тілеп, еуропалық білім сапасының маңыздылығы мен қоса беріліп отырған жаһандық мүмкіндіктер туралы айттық.
Сонымен қатар бүгінгі таңда университетіміздің білім алушылары Словенияның University of Ljubljana, Бельгияның Howest University of Applied Sciences және Корея Республикасының Каннам университеттерінде академиялық ұтқырлық және қос диплом бағдарламалары арқылы білім алуда.

Қорқыт ата атындағы Қызылорда университетінің 10 студенті шетелге оқуға барады

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстан құрамасы футзалдан әлем чемпионатының ширек финалында Иранмен шеберлік байқасты, деп хабарлайды ҚазАқпарат.
Бүгінгі кездесу аса тартысты өтті. Алғашқы минуттарда ирандық спортшылар тізгінді өз қолына алуға тырысты. Нәтижесінде бірінші кезеңнің 8-минутында Мослем Оладгобад есеп ашса, 15-минутта Ахмад Эсмаилпур есепті үстемелей түсті.
Екінші кезеңде қазақстандық футзалшылар алға қарай ұмтылды. Ойынның 25-минутында Дәурен Тұрсағұлов көздеген нысанадан мүлт кеткен жоқ. Ал 29-минутта Арнольд Кнауб таразы басын теңестірді. Ойынның 39-минутында қазақстандық Тайнан жеңіс голын соқты.
Осылайша Қазақстан қарсыласын&nbsp;3:2 есебімен жеңді.
Топтық кезеңде Қазақстан құрамасы Коста-Рикадан 6:1, Литвадан 3:0 есебімен басым болды. Ал Венесуэламен 1:1 есебімен тең түсті. Одан кейін 1/8 финалда Таиландты 7:0 есебімен&nbsp;тізе бүктірді.
Бұдан бұрын 1/4 финалда Бразилия Марокконы 1:0 есебімен жеңген болатын. Ал Аргентина мен Ресей кездесуінің негізгі кезеңі 1:1 есебімен аяқталып, пенальтиде аргентиналықтар 5:4 есебімен жеңіске жетті. Бүгін Португалия – Испания кездесуі португалиялықтар пайдасына 4:2 есебімен аяқталды.
Енді 29 қыркүйекте өтетін жартылай финалда Бразилия мен Аргентина кездессе, 30 қыркүйекте Қазақстан мен Португалия ойнайды.
Қазақстан құрамасы бұдан бұрын әлем чемпионатының финалдық сатысында екі мәрте бақ сынаған еді. 2000 жылы бірінші кезеңнен аса алмаса, 2016 жылы 1/8 финалға дейін жетті.
Әлем чемпионатының финалы 3 қазанға белгіленген.

Қазақстан және Қызылорда облысының жаңалықтары: Әлем