<a href="https://kyzylorda-news.kz/">Kyzylorda-news.kz</a> Amanat партиясы Қызылорда облыстық филиалы жанындағы партиялық бақылау комиссиясы мен сыбайлас жемқорлыққа қарсы іс-қимыл жөніндегі аймақтық кеңестің бірлескен отырысы өтті. Онда Аrt sport бағдарламасының жүзеге асырылу барысы сөз болды, – деп хабарлайды <a href="https://kaz.inform.kz/news/kizilordada-art-sport-bagdarlamasina-bolnetn-karzhi-ek-ese-unemdeled-f9df43/">Қазақпарат.</a>Бұқаралық спортты дамыту, балалардың спорт үйірмелеріне тегін баруы, осы мақсатқа бөлінген мемлекет қаржысының игерілуі жөнінде облыстық дене шынықтыру, спорт және туризм басқармасының басшысы Бақтияр Артаев баяндама жасады.&nbsp;Оның айтуынша, балалар мен жасөспірімдерге арналған шығармашылық және спорттық тапсырыс аясында 2021-2025 жылдарға облыс бойынша 28,6 млрд теңге қаржы қаралған. Оның 12,1 млрд теңгесі игеріліп, 7 млрд теңге бюджетке қайтарылған. Өткен жылы 5,2 млрд теңге жұмсалса, биыл бұл сома екі есе үнемделеді.&nbsp;<blockquote>– Арнайы жұмысшы тобы бұл бағыттағы жұмыстарды тексерді. Нәтижесінде 310 кәсіпкердің 215-імен келісімшарттар біржақты бұзылған. Қазіргі уақытта Art Sport бағдарламасына 52 кәсіпкер тартылған. Заңсыздықтардың алдын алу мақсатында үйірмелер мен спорт секцияларына Face ID жүйесі орнатылды, – деді басқарма басшысы.&nbsp;</blockquote>Жиынға қатысушылар ұсыныстарын жеткізді. Облыстық мәслихаттағы депутаттық фракция мүшесі Балжан Шәменова бағдарлама шарапаты қала, кент, аудан орталықтарымен шектелмей, ауылдарға да жету керек екенін атап өтті.<blockquote>– Оған бөлінген қаржының игілігін қала мен аудан орталықтарындағы балалар ғана көріп отырған секілді. Себебі шалғай ауыл мектептерінде дене шынықтыру сабағынан басқа балалардың спортпен шұғылдануына мүмкіндік жоқ. Ауыл балалары ауылда туғанына кінәлі емес. Сондықтан бағдарламаны елді мекендерге дейін жеткізіп, ауыл балалары да оның жемісін көруі керек, – деді Балжан Шәменова.</blockquote>Фото: Pexels

Қызылордада Аrt sport бағдарламасына бөлінетін қаржы екі есе үнемделеді

<a href="https://kyzylorda-news.kz/">Kyzylorda-news.kz</a> Театр – жүректен шыққан сезімнің сахнаға айналатын орны. Ал сол сахнада шынайы өмірді сомдайтын актер – рухы мықты, жүрегі сезімтал тұлға. Бүгінгі мақаламызда жас та болса, өнер жолында өзіндік өрнек қалыптастырып үлгерген А.Тоқмағанбетов атындағы қалалық мәдениет үйі жанынан құрылған "Жастар" театрының артисі Мақсат Серіков туралы сөз қозғамақпыз.Мақсаттың театрға деген сүйіспеншілігі мектеп қабырғасынан қалыптаса бастаған. Ол шығармашылық шараларға белсене қатысып, түрлі көріністер мен қойылымдарға белсене атсалысқан. Кейіпкеріміздің айтуы бойынша, мектептегі мұғалімдері оның бойындағы ерекшелікті байқап “театр актері бағытында өзіңді сынап көрмейсің бе?” деген пікірлер білдірген. Осы шабыт – Мақсат үшін театр әлеміне ашылған қақпа болды.<blockquote>– Иә, өнер – оңай жол емес. Бірақ ол тек қиындықтан тұрмайды. Бұл жол – білім мен тәртіптің, еңбек пен рухтың жемісі. Сыналасың, сүрінесің, бірақ бәрібір қайтпайсың. Тәртіппен шыңдалған адам мықты актер бола алады, – дейді ол.&nbsp;</blockquote>Ол әртістің басты қаруы – өзімен үздіксіз жұмыс істеу екенін айтады. Әсіресе, қиын сәттерге дайын болу, ішкі сенім мен төзімді сақтау – өнер адамының серігі.Мақсат осы уақытқа дейін бірнеше маңызды рөлді сомдап үлгерген. Атап айтқанда, ағылшын драматургі Людвигтің “Бикештер” пьесасында Лео Кларк пен Максин рөлдерін сомдаған. Сонымен қатар Мұхтар Әуезовті “Еңлік – Кебек” трагедиясында Кебектің рөлін ойнаған. Алдағы уақытта ол отбасы құндылықтарын арқау ететін қойылымдарда, әсіресе әке немесе бала бейнесін сомдауды армандайды. Оның жүрегіне махаббат пен адами сезімдерге толы рөлдер жақын.Негізінен актерлік шеберліктің маңызды бөлігі – дайындық барысы. Кейде дайындыққа санаулы күн ғана беріледі. Осындай сәттерде актер ұйқысыз түндерді де артта қалдырып, бар күш-жігерін салып дайындалады.<blockquote>– Біз белгілі режиссерлермен бірге көп жұмыс істейміз. Әр рөлге физикалық та, рухани да дайын болу керек. Театрда "ойнау" емес, "өмір сүру" деген ұғым бар. Біз сахнаға шыққанда кейіпкердің өмірін шынайы өткеруіміз қажет, – дейді кейіпкеріміз.</blockquote>Мақсаттың ұстаздарына деген құрметі ерекше. Ең алғаш оны театрға жетелеген ұстазы – Байқоңыр қаласындағы “Асыл арман” театр үйірмесінің жетекшісі Айдар Ақботаұлы. Сонымен қатар ҚР Мәдениет қайраткері Оңталап Нұрмаханов, Нартай Бекежанов атындағы қазақ музыкалық академиялық драма театрының артисі Залипа Төлепова, Сырым Әбдіразақов, Санат Жүзбай сынды белді артистер оны театр әлеміне жетелеген.Алматыда Мұхтар Әуезов атындағы Қазақ мемлекеттік академиялық драма театрының актері Шерхан Пірназардан сабақ алып, аз уақыт болса да көп дүние үйренген. Сондай-ақ оң солын үйреткен, жанына жалау бола білген ұстазы Гаухар Көнебекованы ерекше атап өтті.<blockquote>– Ұстаздарымның сенімі мен қолдауы – мен үшін рухани күш”, – дейді актер.&nbsp;</blockquote>Қазіргі таңда Мақсат өзі де шәкірт тәрбиелеуге үлес қосып жүр. Алматы, Астана қалаларындағы академияларда білім алып жатқан шәкірттері көп. Театр қойылымдарына шақырылып, шәкірттерінің жетістіктеріне қуана қолдау көрсетіп келеді.&nbsp;<blockquote>– Нағыз әртіс жан-жақты болуы керек. Театрда "штамп" деген ұғым бар. Егер тек сахнамен шектеліп қалсаң, ойың да шектеледі. Ал штамп кейінірек қалыптасса, сен кино мен театрды қатар алып жүре аласың. Егер ұсыныс түссе, театрдағы рөлдерімді әріптестеріме тапсырып, кино саласында да өзімді сынап көруге дайынмын, – дейді ол.</blockquote>Кейіпкеріміз өнер әлемінде еркін қанат қағып көрерменнің ыстық ықыласына бөленуіне әріптестерінің де қолдауы ерекше екенін жеткізді.Өнер адамының рухани болмысы оның оқыған кітаптарынан да көрінеді.&nbsp;<blockquote>– Актер болу үшін "Абай жолын" оқу – парыз. Барлық өнер мектебі соны оқытудан бастайды. Өйткені бұл – өнер мен парасаттың, терең ойдың негізі, – дейді Мақсат.&nbsp;</blockquote>Сондай-ақ ол Төлен Әбдіктің “Оң қол” әңгімесін, Сайын Мұратбековтің “Жусан иісі”, Әзілхан Нұршайықовтың “Махаббат, қызық мол жылдар” сынды шығармалары театр артисіне шабыт беретінін айтты.&nbsp;<img src="https://knadmin.beoblood.kz/uploads/Akter_Ma_sat_Serikov_68c1a0b2d4.jpg" alt="Актер Мақсат Серіков.jpg">Әдебиет – актердің ішкі шырағы. Сенің сөзің терең болуы үшін, ойың да терең болуы керек. Адамда ең бастысы, адамгершілік қасиеттің болуы маңызды. Адамгершілік болмаса, ой да, сана да, тәрбие де қалыптаспайды. Ал егер осы қасиет болса, онда бәрі болады.&nbsp;Кейіпкерімізге өнер жолында биіктен көрініп, қазақ өнерінің өрісін кеңейтетін тұлғалар қатарынан көрінуіне тілектеспіз.Көркем ТӨЛЕБАЙ

Өнер – тәртіп пен жанның жемісі

<a href="https://kyzylorda-news.kz/">Kyzylorda-news.kz</a> Қызылорда облысы Жаңақорған ауданындағы мемлекеттік балабақшаға барып жүрген төрт жасар қыздың құлағы естімей қалды. Анасының сөзінше, бір құлағының пердесі тәрбиешінің ауыр соққысынан жарылып кеткен. Бүлдіршін анасына апайының қалай ұрғанын өзі айтып беріпті. Бірақ бөбекжай қызметкері жазасыз қалыпты.&nbsp;Бұл туралы<a href="https://stan.kz/4-zhasar-kizdin-kylagi-estimey-kalgan-kizilorda-oblisin-417008/">&nbsp;Stan.kz&nbsp;</a>ақпарат агенттігі 31-арнаның Информбюро жаңалықтар бағдарламасына&nbsp;сілтеме жасап хабарлайды.Екі ай бұрын №2 Ұлан бөбекжайынан келген Айзия Серікқожаның құлағы&nbsp;солқылдап&nbsp;ауырған екен. Түнімен мазасынданған бүлдіршінді анасы таңда емханаға апарған. Айтуынша, дәрігерлер құлақ пердесінің қатты соққыдан тесіліп кеткенін айтқан. Содан бері олар емдеу мекемелерінің табалдырығын тоздыруға мәжбүр.Айзияның бір құлағы әлі де дұрыс естімейді. Аруна Ахметова қызының&nbsp;дерті оның жүйкесіне де әсер еткен дейді. Алайда&nbsp;бөбекжай қызметкерлері бүлдіршінді ұрғанын мойындамаған. Оның үстіне балабақшадағы бейнекамералардың жазбасын да көрсетпей қойды дейді.<blockquote>“Полициямен барған кезде камерасы қосылып тұр. Екі камера тұр екен, құпиясөз сұрап тұр. Бастығы “құпиясөзді бір жерге жазып қойып ем, таппай тұрмын” деп сол күні құпиясөзі айтылмады, камера да ашылған жоқ. Бала&nbsp;өтірік айтпайды. Мен сенемін. Өйткені кішкентай қыздың құлағы тиіп кеткеннен көгермейді. Пердесі тесілмейді. Олар ең құрығанда жауапкершілік танытып, мұны медбикеге айтпаған”, –&nbsp;деді қыздың анасы Аруна Ахметова.</blockquote>Балабақша басшылары бұл шағымды растамады, не жоққа шығармады. Тек болған іс бойынша құзырлы органдар айналысып жатыр деді. Қазір “кәмелетке толмаған баланы тәрбиелеу міндеттерін орындамау” бабымен іс тергеліп жатыр.Фото: Видеодан скриншот

4 жасар қыздың құлағы естімей қалған: Қызылорда облысында ата-ана тәрбиешілердің жазасыз қалғанына наразы

<a href="https://kyzylorda-news.kz/">Kyzylorda-news.kz</a> Мектепте тамақтанудың жаңа стандарты әзірленді. Ол 2025 жылғы 1 қыркүйектен бастап елдің барлық білім беру ұйымында күшіне енеді, деп хабарлайды ДСМ басшысы Ақмарал Әлназарова.Мемлекет басшысы өз тапсырмаларының бірінде бүгінде елімізде 1,7&nbsp;млн оқушы қамтамасыз етіліп отырған тегін мектеп тағамдарының сапасын арттыру қажеттігін атап өтті.<blockquote>—&nbsp;Біз мектеп оқушыларын күмәнді сападағы арзан өнімдермен тамақтандыра алмаймыз. Балалардың тамақтануының халықаралық стандарттарына ұмтылу керек, бұл жас ұрпақтың денсаулығына тікелей әсер етеді,&nbsp;— деді Президент.</blockquote>ДСМ басшысы Ақмарал Әлназарованың сөзінше, мектептегі тамақтану реформасы министрліктің басты міндеттерінің біріне айналды. Оны жүзеге асыру&nbsp;— ең алдымен балалардың денсаулығын, оқу жетістіктерін және жалпы әл-ауқатын жақсарту үшін мультипликативті әсер береді.<blockquote>—&nbsp;Денсаулық сақтау министрлігі Білім министрлігімен, бейінді отандық және халықаралық сарапшылармен бірлесіп, ғылыми деректер мен халықаралық ұсынымдардың негізінде мектепте тамақтанудың жаңа стандартын әзірледі. Ол&nbsp;2025 жылғы 1 қыркүйектен бастап елдің барлық білім беру ұйымдарында күшіне енеді. Өкінішке қарай, соңғы жылдары біз балалардағы семіздік, II&nbsp;типті қант диабеті, жүрек-қан тамырлары аурулары, тісжегі және аллергия жағдайларының өсуін байқадық. Бұл көбінесе теңгерімсіз және зиянды диетаға байланысты,&nbsp;— деді Әлназарова.</blockquote>Денсаулық сақтау министрі атап өткендей, сараптамалық бағалауларға сәйкес стандартты қатаң сақтау арқылы келесі көрсеткіштерге қол жеткізуге болады:• балалардағы семіздік деңгейін 10-15%-ға төмендету, •II типті қант диабеті жағдайлары&nbsp;— 10-20%-ға, • артериялық гипертензия&nbsp;— 8-18%-ға, • басқа созылмалы аурулар&nbsp;— 5-15%-ға, • сондай-ақ балалардың зейіні мен үлгерімін арттыру.<blockquote>—&nbsp;Диетаны жаңартумен қатар, біз мектеп асханаларының тамақтану қауіпсіздігі мен санитариялық жағдайын бақылауды күшейтеміз.&nbsp;Мемлекеттік бақылауға жаңа тәсілдер енгізіліп жатыр:&nbsp;тексерулер туралы алдын ала хабарлаудан бас тарту, тұрақты мониторингтік сапарлар жүйесін енгізу. Бұл шаралар тамақтану жағдайларын объективті бағалауға және бұзушылықтарды уақтылы жоюға бағытталған. Біз бұл қадамды балаларымыздың денсаулығы үшін жасаймыз және білім беру жүйесінің барлық қатысушыларын жаңа талаптарды жауапкершілікпен және адал орындауға шақырамыз,&nbsp;— деп түйіндеді министр.</blockquote>Фото: Әділет Беремқұлов

1 қыркүйектен бастап мектеп оқушылары жаңа стандарт бойынша тамақтанады 

<a href="https://kyzylorda-news.kz/">Kyzylorda-news.kz</a> Ел полицейлері тұрғындарға үндеу жасап, жол қауіпсіздігі мәселесіне назар аударуға шақырды, деп хабарлайды <a href="https://baq.kz/qazaqstandyq-politseyler-turgyndarga-undeu-zhasady-200012330/">BAQ.KZ</a> Polisia.kz-ке сілтеме жасап.&nbsp;Құрметті азаматтар! Бәріміз жол жүрісіне қатысушымыз. Жолдағы қауіпсіздікті сақтау – жалпыға ортақ міндет. Қазір елімізде "Қауіпсіз жол" жедел-профилактикалық іс-шарасы өтіп жатыр. Оның мақсаты - тек жол жүрісі қағидаларын сақтау емес, әрбір адам үшін қауіпсіз орта қалыптастыру. Шара басталғалы, яғни, 19 сәуірден бері жолда 30 мыңға жуық құқық бұзушылыққа тосқауыл қойылды. Бұл ретте полицияның жазалау мен жауапқа тартуды көздемейтінін тағы да еске саламыз. Құрметті азаматтар! Жол қателікті кешірмейді. Шараның алғашқы күндері-ақ жол апаттарында адам шығындары болды. Бұл - орны толмас қайғы. Жылдамдықты асырған әр көлік, назарсыз қалған әр сәт біреудің өмірін қиып кетуі мүмкін. Сондықтан жүргізуші де, жаяу жүргінші де мұқият әрі жауапты болуы керек! Баршаңызды "Заң мен Тәртіп" қағидатын ұстануға шақырамыз, - деді полиция өкілдері.Алда мейрам және демалыс күндері.<blockquote>Отбасыларыңызға көңіл бөліп, уақытты қауіпсіз әрі тиімді өткізуді ұсынамыз. Яғни, жақындарыңызға, әсіресе балаларыңызға жолдағы қауіпсіз жүріс-тұрысты үйретіңіздер. Полициямен бірге қоғамдағы кез келген құқық бұзушылыққа нөлдік төзімділік қағидатын қалыптастыруға атсалыңыздар! Ішкі істер министрлігінде 2025 жыл "профилактика жылы" болып жарияланғанын еске саламыз. Қылмыс пен құқық бұзушылыққа жол бермей, олардың алдын алуға тырысайық. Егер әрқайсымыз көлік тізгінінде, жаяу жүргінші жолында және тротуарда мұқият болсақ – еліміздегі жолдар шын мәнінде қауіпсіз болады. Жолдағы қауіпсіздік мәдениетін бірге қалыптастырайық. Бұл туралы отбасымызда, жұмыс орнымызда, қоршаған ортамызда айтып жүрейік. Өзіміз үлгі болайық! Үлкен өзгеріс бірлескен қадамдардан басталады, - деді тәртіп сақшылары.</blockquote>Фото: Нұрболат Нұржаубай

Қазақстандық полицейлер тұрғындарға үндеу жасады

Мемлекет басшысы Қасым-Жомарт Тоқаевтың Қазақстан халқы Ассамблеясының ХХХІV сессиясында сөйлеген сөзі

<a href="https://kyzylorda-news.kz/">Kyzylorda-news.kz</a> Қызылорда облысында «Қауіпсіз жол» жедел-профилактикалық айлығы басталды, – деп хабарлайды <a href="https://kaz.inform.kz/news/politsiya-kizilorda-aktobe-bagitindagi-zholda-drondardi-ske-kosti-ddb0aa/">Қазақпарат.</a>Айлықтың алғашқы 4 күнінде 1454 өрескел құқық бұзу дерегі тіркелді. Оның ішінде қауіпсіздік белдігін тақпау, тасымалдау қағидаларын сақтамау (299), жаяу жүргіншілер жолағынан өтпеу (104), міндетті сақтандыру заңнамасының талаптарын елемеу (87), көлік тізгінінде келе жатып ұялы телефон пайдалану (75), міндетті техникалық тексерістен өтпеу (69) сияқты жағдайлар жиі кездесті. Сонымен қатар 137 автокөлік айып тұрағына қойылып, 48 темір тұлпардың мемлекеттік тіркеу белгілері алынып, жүруіне шектеу қойылды.&nbsp;<blockquote>— Талдау нәтижесі республикалық маңызы бар Қарабұтақ-Қызылорда-Шымкент автожолында, яғни Қызылорда-Ақтөбе бағытында жолдың екіжолақты болуы себепті көліктердің бір-бірінен озуға ұмтылуы, жолдың қарама-қарсы бағытына шығып кетуі сияқты жағдайлар көбейген. Осыған байланысты ұшқышсыз ұшу аппараттары қолданыла бастады. Дрондар арқылы 50-ге жуық өрескел құқықбұзушылық анықталды, — деді Қызылорда облыстық полиция департаменті жергілікті полиция қызметі басқармасы бастығының орынбасары, полиция подполковнигі Мұратбек Манатов.</blockquote>Жыл басынан бері өңірде 233 жол апаты тіркеліп, соның салдарынан 17 адам көз жұмды. 307 адам дене жарақатын алған.<img src="https://knadmin.beoblood.kz/uploads/yzylorda_A_t_be_11921aae40.jpg" alt="Қызылорда-Ақтөбе.jpg">Фото: &nbsp;Қызылорда облыстық полиция департаменті

Полиция Қызылорда-Ақтөбе бағытындағы жолда дрондарды іске қосты

<a href="https://kyzylorda-news.kz/">Kyzylorda-news.kz</a> Мемлекет этносаралық келісім мен бейбітшілікке нұқсан келтіретін кез келген арандатудың жолын кесіп, қатаң тосқауыл қоя бермек. Президент Қасым-Жомарт Тоқаев Қазақстан халқы Ассамблеясының ХХХІV сессиясында осындай ой айтты, – деп хабарлайды <a href="https://kaz.inform.kz/news/demokratiyani-breudn-karzhisimen-ornatuga-bolmaydi-kasim-zhomart-tokaev-e925dd/">Қазақпарат.</a><blockquote>- Күріш пен күрмекті, конструктивті сын мен дәлелсіз мін тағуды, көңілге тимейтін пародия мен жиіркенішті қорлауды айыра білу маңызды. Заң алдында бәрі тең. Сол себепті біз еліміздегі этносаралық келісім мен бейбітшілікке нұқсан келтіретін кез келген арандатудың жолын кесіп келеміз, бұдан әрі де қатаң тосқауыл қоямыз. Өздерін сөз еркіндігінің жақтаушысы ретінде көрсеткісі келетін кейбір құқық қорғау ұйымдарының өкілдері, блогерлер мен журналистер еліміздегі әр істен саяси, жағымсыз астар іздеп, шын мәнінде, арандатумен айналысып жүргенін айтпасқа болмайды. Бұл Қазақстаннан көшіп кетіп, шетелде жүріп халқымызға шабуыл жасайтын, тіпті, мемлекеттік органдарды бопсалайтын бұрынғы азаматтарымыздың әрекеті. Олар шет мемлекеттер берген ақшаны ақтауға жұмыс істеп жүр. Бүгінде мұны бәрі біледі. Демократияны біреудің қаржысымен орнатуға болмайды, - деді Қасым-Жомарт Тоқаев.</blockquote>Президенттің пайымдауынша, Қазақстандағы демократия мен сөз бостандығы үшін шетелде ешкімнің басы ауырып, балтыры сыздамайды.<blockquote>- Оны нақты түсінген жөн. Жақында шетелдік үкіметтік емес ұйымдардың әрекеттері әшкереленді. Сонда олардың арам ниеті, ашкөздігі мен Қазақстанға жаны ашымайтыны анық көрінді. Сондай-ақ кейбір танымал қазақстандық грант алушылардың көлеңкелі әрекеттері де белгілі болды. Қазақстанда проблема жоқ демейміз. Әрине, басқа елдердегідей бізде де түйткілдер бар. Бірақ біз оны әлдекімдердің әдістемесімен емес, өзіміздің ұлттық мүддеміз бен заңнама аясында шешеміз. Осындай қисынды әрекеттерімізді халқымыздың басым көпшілігі мен ниеті адал халықаралық серіктестеріміз дұрыс түсінетініне сенімдімін. Идеологиялық өшпенділік – біздің дүниетанымымызға мүлде жат. Дәстүріміз бен құндылықтарымыз, болмысымыз бен өмір салтымыз ұлтымызды біртұтас тарихи-мәдени және саяси қауым ретінде біріктіріп, тұтастығын бекемдейді, - деді Мемлекет басшысы.</blockquote>Фото: Ағыбай Аяпбергенов

Демократияны біреудің қаржысымен орнатуға болмайды – Қасым-Жомарт Тоқаев  

<a href="https://kyzylorda-news.kz/">Kyzylorda-news.kz</a> Елдегі 500-ден астам көшеге бұған дейін елеусіз қалған жергілікті қаһармандардың есімі беріледі, – деп хабарлайды <a href="https://kaz.inform.kz/news/zhenske-80-zhil-500-den-astam-koshege-eleusz-kalgan-kaarmandardin-esm-berled-1956ea/">Қазақпарат.</a>Мемлекет басшысы Қасым-Жомарт Тоқаев Қазақстан халқы Ассамблеясының ХХХІV сессиясында осындай мәлімет айтты.<blockquote>— Енді екі аптадан кейін әлемдік маңызы бар тарихи оқиға — Ұлы Жеңіске 80 жыл толады. Біз бұл мерейтойды кең көлемде атап өтеміз. Қазақстанның майдангерлері мен тыл еңбеккерлері — барша халқымыз Отан үшін отқа түсті. Ұлы Жеңістің тағылымы барша халыққа, әсіресе, саясаткерлерге ксенофобияға, нәсілдік және ұлттық үстемдікке, халықаралық құқық қағидаттарын құрметтемеуге құрылған жауапкершіліктен жұрдай саясат жүргізудің салдары қандай қасіретке әкелетінін әлі күнге дейін көрсетіп отыр. Бірер күн бұрын менің тапсырмаммен Республикалық ономастикалық комиссия елді мекендердегі 500-ден астам көшеге бұған дейін елеусіз қалған жергілікті қаһармандардың есімін беру туралы шешім қабылдады, — деді Мемлекет басшысы.</blockquote>Қасым-Жомарт Тоқаев бұл істе ең алдымен, жаңа және атауы қайталанатын көшелерге басымдық берілетінін ескертті.<blockquote>— Мен Жеңістің 80 жылдығына дайындық туралы осыдан бір жарым жыл бұрын алдын ала айттым. Соған сәйкес біз «Ұлы Жеңіс: ерлікке тағзым, ұрпаққа үлгі» жоспарын арнайы қабылдап, жүзеге асыра бастадық. Осы ауқымды жұмыстың аясында екі мыңнан астам мәдени, ғылыми-зерттеу, ағарту және басқа да іс-шаралар өткізіледі. Ең бастысы, әрине, мемлекет пен қоғамның ерекше қорғауында болатын құрметті ардагерлерімізге айрықша көңіл бөлеміз. Ұлы Жеңістің мерейлі датасын атап өтуге арналған іс-шаралар легі ауқымды әскери шеруге ұласады. Түптеп келгенде, бұл әскери шерудің мән-маңызы зор болмақ. Себебі мұны бір жағынан майдангерлер мен тыңгерлерге тағзым десек, екінші жағынан қазіргі күрделі геосаяси ахуалда ұлттық рухымыздың мықтылығын көрсететін символ деуге болады, — деді Президент.</blockquote>Фото: Александр Павский

Жеңіске 80 жыл: 500-ден астам көшеге елеусіз қалған қаһармандардың есімі беріледі  

<a href="https://kyzylorda-news.kz/">Kyzylorda-news.kz</a> Президент Қасым-Жомарт Тоқаев Қазақстан халқы Ассамблеясының ХХХІV сессиясында этнос театрларының фестивалін өткізуді ұсынды, – деп хабарлайды <a href="https://kaz.inform.kz/news/memleket-basshisi-kazakstan-etnostari-teatrlarinin-festivaln-otkzud-usindi-9075e7/">Қазақпарат.</a><blockquote>- Үшіншіден, «Бірлігіміз – әралуандықта» қағидатын жүзеге асыру үшін мәдениет пен өнердің әлеуетін толық пайдаланған дұрыс. Александр Пушкин, Тарас Шевченко, Федор Достоевский, Михаил Шолохов және басқа да тұлғалардың музейлері – Қазақстан мәдениетінің баға жетпес қазынасын толықтырып тұр. Бұл музейлерді көпшілікке таныту үшін экспозицияларын Астана мен Алматыда ұйымдастыру маңызды. Кейбір этномәдени бірлестіктер бірегей өнер және этнографиялық жеке коллекцияларды жинады. Бұл да еліміздің мәдени мұрасына айналуға тиіс. Қазақстанда 9 орыс драма театры табысты жұмыс істеп жатыр. Сондай-ақ ерекше төрт этнос театры, яғни, ұйғыр, корей, өзбек және неміс театрлары көрерменнің көзайымы болып жүр. Ассамблеяның 30 жылдығы аясында Алматыда бәрінің басын қосып, Қазақстан этностары театр өнерінің фестивалін өткізсек болады. Халық көп келеді деп ойлаймын, - деді Қасым-Жомарт Тоқаев.</blockquote>Сондай-ақ, Президент Наталья Дубс көтерген театр мен мәдениет саласына техникалық мамандарды даярлау мәселесін орынды деп бағалады.<blockquote>- Бұл бастаманы зерттеп, оны жүзеге асыруға көмектесу қажет, - деді Мемлекет басшысы.</blockquote>Фото: Ағыбай Аяпбергенов

Мемлекет басшысы Қазақстан этностары театрларының фестивалін өткізуді ұсынды

<a href="https://kyzylorda-news.kz/">Kyzylorda-news.kz</a> Наурыз мейрамын кеңінен дәріптеуіміз керек. Бұл туралы Қазақстан халқы Ассамблеясының ХХХІV сессиясында Мемлекет басшысы Қасым-Жомарт Тоқаев айтты, – деп хабарлайды <a href="https://kaz.inform.kz/news/nauriz-meyramin-kennen-darpteumz-kerek-prezident-3d9ab5/">Қазақпарат.</a><blockquote>— Қазақстан — тағдырдың жазуымен шетте туып, шетте өскен барша қазақтың тарихи Отаны. Шетелдегі қазақтардың басым көпшілігі ана тілі мен ата дәстүрін берік ұстанып келеді. Ел бірлігі — ең алдымен, күллі қазақтың бірлігі. Екіншіден, ел бірлігі — қасиетті қазақ жерін мекен еткен барша этностың бірлігі. Біз бұл туралы үнемі айтамыз. Кезінде Қазақстанға миллиондаған адам жер аударылды. Халқымыз олардың ешқайсысын жат көрмей, бауырына басты. Сол буыннан тараған миллиондаған адам — қазір Қазақстанның толыққанды адал азаматтары. Олар мемлекетімізді дамытуға зор үлес қосып, ел игілігіне қызмет етіп жүр. Қазақ жұрты егемендігін алған соң қандастарымыздың елге қайтуына жол ашылды. Қазақстаннан да көптеген адам өзінің тарихи атамекеніне оралды, — деді Қасым-Жомарт Тоқаев.</blockquote>Мемлекет басшысы 4 миллионға жуық отандасымыз Германияға, Польшаға, Израильге және басқа елдерге көшіп кеткенін еске салды.<blockquote>— Бірақ олардың көбі қазақ жұртының жақсылығы мен қамқорлығын ұмытпайды. Қазақстанның туын төріне іліп, елге деген сағынышын көрсетіп отырады. Қазақша сөйлеп, қазақша ән айтып, қазақтың салт-дәстүрін ұстанады. Жыл сайын Наурыз мейрамын атап өтеді. Барша Қазақстан азаматтары, шетелде тұрып жатқан барлық отандасымыз — бәрі де бір үлкен отбасы деуге болады. Отбасы құндылықтарын нығайту — тұрақты және үйлесімді қоғамның негізі, еліміздің жарқын болашағының кепілі. Жан-жақты дамыған тұлға да, жауапкершілігі зор азамат та, Отанға деген сүйіспеншілік те отбасында қалыптасады. Біз еліміздің әр шаңырағы, әр азаматы тойлайтын мерекеге құрметпен қарап, кеңінен дәріптеуіміз керек. Міне, сондай нағыз халықтық мерекелердің бірі, бұл — Наурыз мейрамы. Биыл жаңа тұжырымдамаға сай біз Ұлыстың ұлы күнін ерекше атап өттік. Көктемгі көңіл-күй мен мызғымас бірлік мерекесі еліміздің әр аймағында тойланды. Осылайша, біздің қоғамда жасампаз жаңа дәстүрлер қалыптасып, орнығуда, — деді Президент.</blockquote><img src="https://knadmin.beoblood.kz/uploads/HA_foto_A_orda_2_709f1eed4c.jpg" alt="ҚХА фото Ақорда 2.jpg">Фото: Нұрболат Нұржаубай/Ақорда

Наурыз мейрамын кеңінен дәріптеуіміз керек — Мемлекет басшысы 

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев Қазақстан халқы Ассамблеясының ХХХІV сессиясында барлық этномәдени бірлестікті «Таза Қазақстан» акциясына белсене қатысуға шақырды, – деп хабарлайды <a href="https://kaz.inform.kz/news/tokaev-barlik-etnomadeni-brlestkt-taza-kazakstan-aktsiyasina-belsene-katisuga-shakirdi-56b5f4/">Қазақпарат.</a><blockquote>— Менің бастамаммен былтырдан бері «Таза Қазақстан» акциясы жүзеге асырылып жатыр. Жалпыұлттық жобаға 6 миллионнан астам адам қатысты. 1,6 миллион тоннадан аса қоқыс жиналды. 3,3 миллион көшет отырғызылды. «Таза Қазақстан», бұл — біздің бүгінгі және ертеңгі күніміздің кепілі. Сондықтан жұмыс үздіксіз жалғаса береді. Біз әр азаматтың, әсіресе, жастардың бойына тазалық, ұқыптылық, жауаптылық сияқты қасиеттерді сіңіруіміз керек. Таза я тазалық, бұл — киелі сөздер. Ары таза адам ешқашан елін сатпайды. Біз «Қазақстан — ортақ үйіміз» деп үнемі айтамыз. Сондықтан еліміз таза, тартымды, мәдениетті болуы керек. Ассамблея бұл идеяны жан-жақты дәріптеп келеді. Бұл — өте тиімді әрі пайдалы жұмыс. Тазалық әр үйден басталуы керек. Сонда ғана «Таза Қазақстан» боламыз, — деді Мемлекет басшысы.</blockquote>Қасым-Жомарт Тоқаев кішкентай кезінен тазалыққа үйренген бала кейін жауапкершілігі жоғары, саналы азамат болып өсетінін еске салды.<blockquote>— Сондықтан бүгін мен Қазақстан халқы Ассамблеясының мүшелерін, барлық этномәдени бірлестікті «Таза Қазақстан» жалпыұлттық акциясына белсене қатысуға шақырамын. Бұл — жай науқан емес, бұл — өскелең ұрпаққа озық білім мен тәлім-тәрбие беру деген сөз. Баршамызға қатысы бар идеологиялық маңызды іске әр қаланың, ауылдың, көшенің және ауланың тұрғындарын жұмылдыру керек. «Таза Қазақстан», бұл — шынайы отаншылдықтың көрінісі. Бәріміз Әділетті, Қауіпсіз және Таза Қазақстанда өмір сүргіміз келеді, — деді Президент.</blockquote>Фото: Ақорда

Архив