<a href="https://kyzylorda-news.kz/ru">Kyzylorda-news.kz</a> &nbsp;Қазақстанда жойылып кеткен жолбарыс табиғатқа қайта оралмақ. Алайда бұл қадам қауіпсіздік пен бақылауды қажет етеді. <a href="https://baq.kz/turan-zholbarysy-erkindikke-shyqsa-ne-ozgeredi-200011783/">BAQ.KZ</a> тілшісінің ресми сауалына жауап берген министрлік дайындық барысын түсіндірді.Бүгінде жолбарыстар резерват аумағындағы арнайы вольерде өмір сүреді. Олар мамандардың күнделікті бақылауында. Ал күшіктері адаммен байланыссыз, жабайы ортада өсіріліп жатыр. Жобаның басты мақсаты - болашақта жолбарыстарды еркін табиғи ортаға бейімдеп, қауіпсіз мекендерге көшіру.Жолбарыстарға қолайлы аумақтың жалпы көлемі 1 миллион гектардан асады. Бұл – адам мекендейтін аймақтардан тыс, жануарлардың еркін өмір сүруіне ыңғайлы аумақ, – делінген министрлік берген ресми жауапта.Жолбарыстарды еркіндікке жіберу мәселесі қауіпсіздікпен тікелей байланысты. Осыған орай келесі шаралар қолға алынған:– барлық жолбарыстарға GPS-қарғыбау тағылады, олар нақты уақытта бақыланады; – мал жайылатын аумақтар мен елді мекендердің айналасына қоршаулар орнатылады; – жергілікті халыққа арналған оқыту бағдарламалары ұйымдастырылады; – арнайы жедел топ құрылып, қауіп төндірген жағдайда жолбарыстарды қауіпсіз аумаққа көшіреді.Бұл кешенді шаралар адамдар мен жабайы табиғаттың қатар бейбіт өмір сүруіне жағдай жасауды көздейді.GPS-қарғыбау жыртқыштардың қозғалысын нақты уақытта бақылауға мүмкіндік береді. Елді мекендерге жақындаса, жедел әрекет етуге жағдай жасалады, – делінген министрлік жауабында.Фото: freepik.com

Тұран жолбарысы еркіндікке шықса, не өзгереді?

<a href="https://kyzylorda-news.kz/">Kyzylorda-news.kz</a> Қазақстандықтарды жазда&nbsp;аптап ыстық күтіп тұр. Сол себепті министрлікті&nbsp;орман шаруашылығында өрт шығу қаупі жоғарылағаны алаңдатып отыр.&nbsp;Бұл туралы&nbsp;<a href="https://stan.kz/kazakstanda-zhazda-aptap-istik-boladi-ministrlik-orman-416493/">Stan.kz</a>&nbsp;ақпарат агенттігі хабарлайды.&nbsp;Үкімет отырысында экология және табиғи ресурстар министрі Ерлан Нысанбаев аптап ыстық мезгілінде орман шаруашылығына төнетін қауіпті мәлімдеді.<blockquote>"Қазгидрометтің болжамы бойынша, биылғы жаз&nbsp;ыстық болады. Осыған байланысты облыс әкімдіктері ормандарда өрт қауіпсіздігін сақтау үшін барлық шараны қабылдауы керек", –&nbsp;деді министр үкімет отырысында.</blockquote>Жыл басынан бері еліміздің мемлекеттік орман қоры аумағында 32 орман өрті тіркелді.Оның айтуынша, ел өз күштері мен құралдарын толық жауынгерлік дайындыққа келтіріп, мемлекеттік орман қоры аумағында ірі орман өрттерінің алдын алуға кірісті.Бөлінген қаржы қажеттілікті толық өтей алмайтынын айтқан министр үкімет басшысынан көмек сұрады.<blockquote>"Құрметті Олжас Абайұлы, осы маңызды мәселені шешуге көмектесуіңізді сұраймын. Қосымша 11 млрд теңге қажет”, – деді министр.</blockquote>Нысанбаевтың айтуынша, өрт сөндіру техникасының 75 бірлігі жарамсыз, 314 көліктің 132-сі есептен шығарылуы керек.&nbsp; Бұл – бүкіл автокөлік паркінің 42 пайызы.Сонымен қатар&nbsp;ол орман күзетшілерінің жетіспейтінін де айтты.<blockquote>"Өткен жылдағыдай бұл өзекті мәселе. Шығыс Қазақстан және Павлодар облыстарында орман күзетшілерінің санын стандартқа дейін арттыру мәселесі шешілген жоқ", –&nbsp;деді министр.</blockquote>Төтенше жағдайлар вице-министрі Кеген Тұрсынбаев та жаз мезгілі құрғақ, биік шөп өсетінін баса айтты.<blockquote>"Өрт қаупі жоғары. Қазір министрліктің басқару орталығында жедел топ тәулік бойы жұмыс істеп жатыр. Былтырғыдай өрттің алдын алу және ертерек анықтау басты назарда", – деді Тұрсынбаев.</blockquote>Фото: freepik.com

Қазақстанда жазда аптап ыстық болады: Министрлік дабыл қақты

<a href="https://kyzylorda-news.kz/ru">Kyzylorda-news.kz</a> Елімізде орын алған су тасқынының салдарын жою және алдын алу шараларына Қызылорда облысының құтқарушылары да жұмылдырылған. Атап айтқанда, Ақтөбе, Ақмола облыстарында кезек күттірмейтін және авариялық-құтқару жұмыстарына өңірлік төтенше жағдайлар департаментінен 52 маман, 8 техника, 22 мотопомпа және 2 моторлы қайық бар. Бүгін Өңірлік коммуникациялар қызметінің ақпарат алаңында су тасқыны кезінде өзге өңірлерде атқарылған жұмыстар мен су тасқынының алдын алу жұмыстары туралы айтылды.<blockquote>– Авариялық-құтқару жұмыстары кезінде Ақтөбе облысындағы Құйылыс елді мекенінен өтетін Ырғыз бен Торғай өзендерінің қосылған арнасын нығайту мақсатында 9 585 дана қапқа құм толтырылып, ұзындығы 212 метр болатын бөгеттің жиегі күшейтілді. Ырғыз ауданына қатынайтын далалық жол бойында ауыл тұрғындарының күшімен салынған көпірді нығайту үшін 4 910 дана құм толтырылған қап төселді. Ақмола облысына қарасты Ешім ауылында су басу қаупі бар тұрғын үйлердің ауласының сырты 4 050 дана құм толтырылған қаптармен қоршалды. Сол елді мекендегі 265 тұрғын үйге және оның ішінде су басу қаупі жоғары 51 тұрғын үйге қауіптің алдын алу жұмысы атқарылды,- деді облыстық ТЖД бастығының орынбасары Бекболат Әбдіқадыров.</blockquote>&nbsp;<blockquote>– Су тасқынының алдын алу үшін қыс-көктем мезгілдерінде тиісті сала мамандары Сырдария өзені арнасындағы 10 су бекеттерінен, 4 су тораптарында су деңгейіне күнделікті мониторинг жүргізді. Ықтимал су тасқыны кезеңінде халықты көшіруге 61 эвакуациялық қабылдау пункті дайындалды. Қосымша 22 уақытша орналастыру пункті, 13 жылыту пункті жұмыс жасады. Су тасқынына қарсы департаменттің күш-құралдарының құрамында 123 адам, 23 техника, 6 жүзу құралы, 33 мотопомпа мен 2 тікұшақ әзірленді. Өңірде су тасқыны кезеңі шығынсыз тәмамдалды, төтенше жағдай орын алған жоқ,- деді облыстық ТЖД төтенше жағдайдың алдын алу басқармасының бастығы.</blockquote>Фото: Қызылорда облысының Өңірлік коммуникациялар қызметі

Өңірде су тасқыны кезеңі шығынсыз аяталды

<a href="https://kyzylorda-news.kz/ru">Kyzylorda-news.kz</a> 15 сәуірде Қазақстанда Ғашықтар күні — аты аңызға айналған Қозы Көрпеш пен Баян Сұлуға арналған мереке атап өтіледі. Осы ерекше күні Қызылордада жас жұбайлар үшін салтанатты неке қию рәсімі өтті.Осы күні алғашқылардың бірі болып Дамир мен Ақерке Өтегеновтар некелерін заңдастырды. Жас жұбайлар бұл күнді кездейсоқ таңдамағанын мойындады - Қозы Көрпеш пен Баян Сұлудың оқиғасы оларды шынайылығымен шабыттандырады.<blockquote>"Біз үйлену тойымыз үшін дәл осы күнді таңдағанымызға өте қуаныштымыз. Ол ерекше мағынаға толы және мәңгілік махаббатты бейнелейді. Біздің сезімдеріміз Қозы Көрпеш пен Баян Сұлу сияқты күшті болады деп үміттенеміз", — деп Дамир мен Ақерке өз сезімдерімен бөлісті.&nbsp;</blockquote>"Азаматтарға арналған үкімет" мемлекеттік корпорациясының облыстық филиалының басшысы Аида Абибулаева осындай іс-шараларды өткізудің маңыздылығын атап өтті.<blockquote>"Жастар отбасын құру үшін Өозы Көрпеш пен Баян Сұлу күнін — адал және шынайы махаббаттың бейнесін таңдайтыны символдық. Мұндай оқиғалар неке институтын нығайтып қана қоймай, біздің мәдени құндылықтарымыздың сақталуына ықпал етеді", — деп атап өтті Аида Ибрагимқызы.</blockquote>Айта кетейік, бүгін қызылордалық 15 жұп осы күнді ерекше махаббат, адалдық және бақытты болашаққа деген үмітпен толтыра отырып, өз тағдырларын байланыстыруға шешім қабылдады.<img src="https://knadmin.beoblood.kz/uploads/Whats_App_Image_2025_04_15_at_15_35_59_1_8509268113.jpeg" alt="WhatsApp Image 2025-04-15 at 15.35.59 (1).jpeg">Фото: Отбасы орталығы

Қызылордада Қозы Көрпеш және Баян Сұлу күні атап өтті

<a href="https://kyzylorda-news.kz/">Kyzylorda-news.kz</a> Бүгін өртке қарсы дайындық, су тасқынының алдын алу мәселелері талқыланған Үкімет отырысы өтті. Оған облыс әкімі Нұрлыбек Нәлібаев селекторлық режимде қатысты.Аймақ басшысы Үкімет отырысынан кейін жиын өткізіп, көтерілген мәселелер бойынша жауапты сала басшыларына тапсырма жүктеді.«Статистикалық деректерге қарағанда, еліміздегі төтенше жағдайлардың 90 пайызы өрт салдарынан болады. Өңіріміздің құрғақ, желді климатын ескерсек, дала өрттерінің тұтану, тез таралу қаупі аса жоғары.Дала өрттерінің алдын алу үшін тұрақты мониторинг жүргізіп, тиісті шараларды дер кезінде қамтамасыз ету қажет. Орман, дала өрттерінің басым бөлігі тұрғындардың, шаруашылықтардың өрт қауіпсіздігі ережелерін сақтамауынан, жауапкершілікті сезінбеуінен туындайды.Жергілікті шаруашылықтар тазалық жұмыстарын жүргізерде орман мекемелеріне алдын-ала хабарлама беруі тиіс. Өрттің алдын алу шараларының толық ұйымдастырылуын қатаң бақылауға алыңыздар. Табиғи, адами факторлардың әсерінен магистральді және ауданаралық жол бойында, егіс алқаптарында құрғақ шөптің жану қаупі жоғары. Орман алқаптарында, егістікте бақылауды күшейту керек.Өңірімізде су тасқынының алдын алудың кешенді шаралары қабылданып, 14 ақпаннан бастап өзен бетінде мұз жүрді, наурыз айында толық тазартылды. Келген мол су көлдер жүйесіне жіберілді. Өзендегі су деңгейі магистральді каналдар мен көлдер жүйелеріне су алу арқылы реттелді. Суды тиімді пайдалану және су басу аймақтарының қауіпсіздігін қамтамасыз ету аса маңызды.<blockquote>Бүгінгі мәжілісте қаралған мәселелер өзекті. Қатаң бақылауда ұстап, мерзімінде тиісті шара қабылдау қажет», – деді Н.Нәлібаев.</blockquote>Айта кетейік, өрттің алдын алуда орман шаруашылығы мекемелерінде 15 өрт сөндіру автокөлігі, 10 дрон және 65 тұрақты өрт сөндіруші жасағы қызмет атқаруда.Соңғы 3 жылда өңірдегі орман шаруашылығы мекемелерінің материалдық- техникалық базасын нығайтуға қаржы бөлінді. Биыл 62 техника мен 80-ге жуық құрал алу көзделуде. Орман және дала өрттерін сөндіру үшін 18 тонна жанар-жағармай қоры дайындалып, 15 қадағалау мұнарасында тұрақты кезекшілік ұйымдастырылған.Су басу қаупі бар 29 аймаққа арнайы техника, күш-құралдары бар 135 жауапты мекеме бекітілді. Оларда 410 арнайы техника және 1 234 адам күші бар. Су тасқынына қарсы материалдық-техникалық қор жеткілікті, яғни 129,7 тонна жанармай, 95 110 қап және басқа да материалдар жинақталған. Ықтимал су тасқыны кезінде халықты көшіру пункттері дайын. Атап айтсақ, 61 эвакуациялық жинақтау және 71 эвакуациялық қабылдау пункті бар.<img src="https://knadmin.beoblood.kz/uploads/Oblys_kimdigi_zhinalys_2_d839dedea2.jpg" alt="Облыс әкімдігі жиналыс 2.jpg">Фото: Қызылорда облысы әкімінің баспасөз қызметі

Үкімет отырысында көтерілген мәселелер бойынша тапсырма берілді

<a href="https://kyzylorda-news.kz/ru">Kyzylorda-news.kz</a> Аймақ басшысының төрағалығымен өткен мәжілісте өртке қауіпті маусымға дайындық барысы және су тасқыны жағдайы туралы мәселелер қаралып, бірқатар олқылықтар назарға алынған болатын. Осыған сәйкес Арал ауданының әкімі Аманжол Оңғарбаевтың төрағалығымен арнайы мәжіліс өтіп, күн тәртібіндегі мәселелер бойынша аудан аумағында атқарылуы тиіс жұмыстар пысықталды.Айталық, 2025 жылдың І тоқсанында аудан аумағында барлығы 12 өрт оқиғасы тіркелген. Бұл алдыңғы жылмен салыстырғанда 4 есеге көбейген. Өрт салдарынан жарақат алғандар да бар. Аудан әкімі тілсіз жаудың алдын-алу бағытында әрбір жағдайға жауапкершілікпен қарап, тиісті жұмыстарды қазірден қолға алуды тапсырды. Сонымен қатар орман және дала өрттерін болдырмау керектігін жеткізіп, жауаптыларға қауіпті аумақтарға минералды жолақтарды жаңғырту жұмыстарын толық әрі сапалы жүргізуді тапсырды.Аудан аумағында шаруа қожалықтардың егістіктер мен жайылымдарда және шабындықтарда құрғақ шөптерді өртеу жұмыстары бекітілген кестеге сәйкес жүргізілу керек. Бұл бағытта аудандық төтенше жағдайлар бөлімімен бірлесіп жұмыс жасау маңызды. Мәселеге ауылдық округ әкімдері де бей-жай қарамауы тиіс.Мәжілісте көтерілген кезекті мәселе су тасқыны жағдайы туралы болды. Биыл Кіші Аралға түскен судың көлемі айтарлықтай ұлғайғаны байқалады. 2024 жылдың вегетация кезеңінде Кіші Арал теңізіне түскен судың көлемі де едәуір ұлғайды. 2022 жылдың қазан айында Кіші Арал теңізінің су деңгейі Балтық жүйесі бойынша 40,42 метрді құрап, су көлемі 18,5 млрд. текше метрге азайған болатын. Қазіргі таңда, су деңгейі Балтық жүйесі бойынша 41,13 метрді құрап, теңіздегі су көлемі 22,3 млрд. текше метрге дейін көбейді. Бұл мәселеге байыпты көзқарас танытқан аудан әкімі аудан аумағындағы жайылымдық жерлердің сулану деңгейін де тілге тиек етті.<blockquote>– Биыл Сырдария өзенімен келетін су көлемінің мол болуы және «Аспай» су ағытқысының көмегімен Қамыстыбас-Ақшатау көлдер жүйесі толықтай су алды. Әрине мол суды береке дейміз, бірақ екінші жағынан тілсіз жау екенін де жоққа шығара алмаймыз. Сондықтан мол судан келетін қауіптің болу ықтималдығын ескере отырып, тиісті мамандарға жағдайды тұрақты бақылауда ұстауды тапсырамын, – деді Аманжол Сақыпұлы.</blockquote>Жиын соңында аудан басшысы жер жырту жұмыстарына қысқаша тоқталып, бұл мәселеде шаруа қожалықтарына тиісті көмекті үйлестіру үшін арнайы техникалардың мүмкіндіктерін пайдалану керектігін атап өтті.<img src="https://knadmin.beoblood.kz/uploads/Aral_audany_m_zhilis_3efcbee674.jpg" alt="Арал ауданы мәжіліс.jpg">Фото: Арал ауданы әкімінің баспасөз қызметі

Тілсіз жаудан келер қауіптің алдын алу маңызды

<a href="https://kyzylorda-news.kz/ru">Kyzylorda-news.kz</a> Қала әкімі Нұржан Ахатовтың өкімімен қала әкімінің орынбасары лауазымына Омаров Бақытжан Бауыржанұлы тағайындалды.Шаһар басшысы жаңа орынбасарын кадрлық өзгерістерге байланысты өткен актив отырысында таныстырды.«Бақытжан Бауыржанұлы – журналистика, қоғаммен байланыс салаларында және мемлекеттік қызметте жемісті еңбек еткен тәжірибелі маман. Сондықтан әлеуеті жоғары кадр ретінде өз жұмысын кәсіби деңгейде атқарады деп сенемін», – деді қала әкімі.Бақытжан Бауыржанұлы 1987 жылы дүниеге келген. Жоғары білімді.Л.Н.Гумилев атындағы Еуразия ұлттық университетін «Халықаралық қатынастар» (2008 жыл), «Журналистика» (2010 жыл) мамандықтары бойынша тәмамдаған.Еңбек жолын 2008 жылы республикалық «Қазақстан» телерадиокорпорациясында редакторлықтан бастап, 2009-2012 жылдары аралығында осы корпорацияда түрлі қызметтерді атқарған.2012-2025 жылдары Түркия мемлекетінің Анкара қаласындағы телерадиокорпорациясында жаңалықтар жүргізушісі, «Хабар-24» телеарнасының бас редакторы, Қызылорда облысы әкімінің баспасөз хатшысы, ҚР Мәдениет және ақпарат министрлігінің Түрксой ұйымындағы өкілі болып еңбек еткен.2025 жылдың ақпан айынан бастап бүгінгі күнге дейін Қызылорда облысы әкімі аппараты басшысының орынбасары лауазымын атқарып келді.Бақытжан Бауыржанұлы қоғамдық даму, жұмыспен қамту және әлеуметтік бағдарламалар, дене тәрбиесі, спорт және туризм, мәдениет және тілдерді дамыту бөлімдеріне жетекшілік жасайтын болады.Осы кезге дейін қала әкімінің орынбасары болған Еркебай Ғалымжан Бақтығалиұлы облыстық табиғи ресурстар және табиғат пайдалануды реттеу басқармасының басшысы лауазымына ауысуына байланысты атқарып отырған қызметінен босатылған болатын. Шаһар басшысы актив отырысында Ғалымжан Бақтығалиұлының өзіне жүктелген міндеттерді жоғары деңгейде атқарып, қаланың құрылыс, тұрғын үй-коммуналдық шаруашылық салаларының дамуына қосқан зор үлесі үшін алғысын білдіріп, Қызылорда қаласының ең жоғары марапаты «Құрмет грамотасын» табыстады.Актив отырысына қатысқан қалалық қоғамдық кеңестің төрағасы Серік Дүйсенбаев, қалалық ардагерлер кеңесінің төрағасы Шәкизат Төребаев және «Қызылорда қоғамдық телерадиокомпаниясының» құрылтайшысы Шаһизада Әбдікәрімов тағайындалған азаматтардың жаңа қызметтеріне сәттілік тіледі.Фото: Қызылорда қаласы әкімінің баспасөз қызметі

Бақытжан Омаров жаңа қызметте

<a href="https://kyzylorda-news.kz/ru">Kyzylorda-news.kz</a> Өткеніне үңілсең ғасырлардан сыр тартатын, бүгінін бағамдасаң келешегінің кемелдігін аңғартатын Қызылорда Алаштың анасы ғана емес, айбары да болып үлгерді. Биыл Қызылорданың астана болғанына 100 жыл толып отыр. Осыдан 100 жыл бұрын Қазақ мемлекетінің астанасына мұндай атау беруді кім ұсынды? Бұл идея қайдан туды?2003 жыл. Алматы қаласындағы А.С.Пушкин атындағы кітапханаға бардым. Мақсатым – жыраулар поэзиясына, оның ішінде Бұқар жыраудың толғауларына талдау жасау. Өзіме қажетті кітаптар мен ескі газет-журналдарды алып, оқырмандар залына беттедім. Кенет алдымнан қазақ руханиятына бақ боп біткен маңдайалды ғалымның бірі Тұрсынбек Кәкішев шыға келді. Ғалым ағамызды бір-екі рет көргенім болмаса арнайы таныстығым жоқ. Сол себепті амандық-саулықтан ары аса алмадық. Бірақ руханият тереңіне дендеп бойлаған адамдармен сөйлесіп, дидарласу жаныма жақын. Содан ба, әйтеуір сол күні Тұрсынбек ағаймен жақын танысуға, ашық пікір алмасуға бел будым. Ол кісі кітапханада төрт сағаттан аса отырды. Ағай кетіп қалмасын деп, өзіме керекті материалдарды түртіп, белгілеумен болдым. Бір кезде ағай орнынан көтеріліп, қайтуға ыңғайланды. Менде осы сәтті күтіп отырған едім. Бірден ағайға ілесіп, кітапханадан сыртқа қарай шықтым. Қайта амандасып, ғалымның кітаптарын ықыластана оқитынымды, өзін құрмет тұтатынымды айттым. Содан қоярда қоймай ағайды сол маңдағы дәмханаға шәйға шақырдым. Шәй үстінде көп әңгіме айтылды. Тұрсынбек ағайдың білімділігі сонша, тыңдай бергің келеді. Әсіресе, Сәкен мен Мағжан туралы көсіле сөйлегенде, ол кісіні бөлмек былай тұрсын, тоқтату мүмкін емес. Сөзден сөз шығып, менің қай жерден екенімді сұрады. Мен Қызылордадан екенімді айтқанымда «Е, сен бала Қоңырқожаның елінен болдың ғой» деді. Бұл кісінің айтып отырғаны Қоңырқожа Қожықов екенін бірден түсіндім. Тұрсынбек Кәкішев: «Қызылорданы Қызылорда деп атауға ең бірінші болып ұсыныс берген де, атын ойлап тапқан да осы кісі» дегенінде қатты таңғалдым. Қазақ руханиятына Қожықовтардың қосқан орасан-зор үлесі барын білетінмін. Бірақ Алашқа ана атанған Сыр өлкесінің бас қаласына атау бергенін естімеппін.&nbsp;... Арада 17 жыл өтті. 2020 жылы Қызылорда қалалық «Ақмешіт апталығы» газетінің тізгінін ұстау бұйырды. Мына қызықты қараңыз, дәл осы кезде Қызылордада қала күні мерекеленіп жатыр. Пандемияның салдарынан мерекелік шаралар онлайн форматта өтті. Бір апта бойы онлайн форматта өткен шаралар, ашылған мектеп, саябақ, «Тағзым» алаңы мен пайдалануға берілген үй жұртшылыққа қуаныш сыйлауда. Осы тұста ойыма осыдан 13 жыл бұрынғы Тұрсынбек Кәкішевтің Қызылорданы Қызылорда деп атауға ең бірінші болып ұсыныс беріп, атын ойлап тапқан Қоңырқожа Қожықов жайлы айтқаны есіме түсті. Дереу тарихи деректерді ақтара бастадым. Тұрсынбек Кәкішевтей тұлғалы ғалымның бір дерекке сүйеніп айтқаны белгілі ғой. Ондай адамдар тарихи деректерге қатысты айтқанда, сүйенетін дәлелінің болатыны анық.&nbsp; Тарихқа көз жүгіртсек, 1925-1929 жылдары Қызылорданың ел астанасы болғаны айтылады. Орынбордан Ақмешітке орталық қаланы ауыстырғанда саяси элита да Сыр бойына келген болатын. &nbsp;Архив құжаттарын негізге ала отырып, тарихи деректерді сөйлетер болсақ, 1925 жылдың сәуірінде Қазақ АКСР кеңестерінің Ү съезіне сайланған делегаттар мен үкімет мүшелері Ақмешітке келген. Осы қалада сол кезде бес күнге созылған съезд өтіпті. Бұл жайында облыстық «Сыр бойы» газеті бас редакторының орынбасары Г.Жалғасова «Алаштың алты қанат ақ ордасы» атты мақаласында: «15 сәуірде Ақмешіт қаласында бүкіл Қазақстан еңбекшілері өкілдерінің басын қосқан Қырғыз (Қазақ) АКСР кеңестерінің Ү съезі салтанатпен ашылды» деп жазады. Бұл съезде ұлтымыз бен қаламызға қатысты екі тарихи шешім қабылданған. Олар ресми құжаттарда қырғыз аталып келген ұлт атауын қазақ етіп, тарихи қателікті жөндеу және Ақмешіт атауын Қызылорда деп өзгерту болды.Жалпы ұлт атауына қатысты тарихи қателікті жөндеу жайлы мәселені қайраткерлер бұған дейін де көтерген. Дәлелді алыстан іздемей-ақ ғалым Тұрсынбек Кәкішевтің еңбектеріне үңілейік. Ол кісі Сәкен Сейфуллиннің тәуелсіздік жылдарына дейін беймәлім болып келген бірнеше мақаласын тапқан. Соның бірі –1923 жылы жазылған &nbsp;«Қазақты қазақ дейік, қатені түзетейік» атты мақаласы.&nbsp;Ұлттың атауына келгенде бәрі түсінікті, ел қамын жеген азаматтар әбден ойланып, толғанып барып қабылданған шешім. Ал Қызылорда атауы ше? Бұл жайында тарихшы ғалым Х.Тұрсын өзінің «Алаш қозғалысының оңтүстік қағанаты» атты еңбегінде архив құжаттарына негізделген мәлімет келтіреді. Ғылыми еңбекке Дінше Әділовтің 1928 жылы ОГПУ тергеушісіне берген жауабы енгізілген. Онда: «Қожанов, мен, Есболов Табынбаевтың үйінде түскі ас іштік. Съезд аяқталуға таяған еді. Сол кезде үкімет көшіп келген Ақмешіт қаласының атын өзгерту мәселесі көтерілген болатын. Жаңа астананы қалай атау жөнінде ойластық. Қызылорда атауын алғаш ағартушы-ғалым Қоңырқожа Қожықов ойлап тапты. Одан «неге?» деп сұрадық. Бұл қос қатпарлы атау, ол екі жақты да қанағаттандыруы тиіс екенін айтты. «Қызыл» – демек большевиктерге ұнайды, ал «Орда» – ұлттық атау. Демек ол жақ та, бұл жақ та кінә арта алмайды. Бұл ұсыныспен келістік. Сұлтанбек Қожанов съезде кезектен тыс сөз алып, ұсыныс жасады: бірінші ұсыныс Қырғыз республикасын Қазақ республикасы деп атау керек десе, екіншісі – Ақмешіт қаласын Қызылорда деп атау жөнінде. Съезд екі ұсынысты да бірауыздан қабылдады» делінген. Бұдан Қызылорда атауын съезде көпшілікке ұсынған Сұлтанбек Қожанов болса, оны ойлап тапқан Қоңырқожа Қожықов екенін көруге болады. Ал дәл осы тарихи оқиғаға биыл 100 жыл толып отыр. Демек сүйікті қаламыздың Қызылорда атанғанына да 100 жыл болды деген сөз.Әзиз БАТЫРБЕКОВ

Қызылорда деп қаланы атаған кім?

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимов аудан орталығындағы стадионның жәй-күйімен танысып, спорт нысаны талапқа сай болуын тапсырды.«Стадион тұрғындарға, әсіресе жастарға ыңғайлы әрі қауіпсіз болуы қажет. Бұл нысан тек спортпен айналысатын жер ғана емес, салауатты өмір салтын қалыптастыратын маңызды орын. Сондықтан бұл нысан талапқа сай болуы керек», – деді аудан әкімі Ардақ Ибраимов.Стадионның бүгінгі жәй-күйімен танысқан аудан әкімі нысанның санитарлық тазалығы, жабдықталуына ерекше назар аударып, жауапты сала басшыларына жөндеу жұмыстарын жүргізу үшін нақты шешімдер қабылдауды тапсырды.<img src="https://knadmin.beoblood.kz/uploads/Sport_nysandary_2_c3799e0e52.jpg" alt="Спорт нысандары 2.jpg">Фото: Жалағаш ауданы әкімдігі

Ардақ Ибраимов: "Спорт нысандары талапқа сай болуы тиіс"

<a href="https://kyzylorda-news.kz/">Kyzylorda-news.kz</a> Қазақстанның құрама командасы 2025 жылғы 13-19 сәуір аралығында Приштина (Косово) қаласында өтетін қыздарға арналған Еуропалық математикалық олимпиадаға (EGMO) қатысып жатыр. Бұл туралы <a href="https://kaz.inform.kz/news/kazakstandik-4-okushi-halikaralik-matematikalik-olimpiadada-el-namisin-korgaydi-d214eb/">Қазақпарат</a> Оқу-ағарту министрлігінің баспасөз қызметіне сілтеме жасап хабарлайды.Зияткерлік сайыста әлемнің 60 елінен 240 оқушы бақ сынайды. Қазақстан құрамасын Алматы қаласындағы Haileybury Almaty халықаралық мектебінің 11-сынып оқушысы Арай Қасенова, Павлодар қаласындағы дарынды балаларға арналған № 8 мектеп-лицейінің 10-сынып оқушысы Юлия Катунина, Алматы қаласындағы С.Ходжиков атындағы № 39 мамандандырылған лицейдің 11-сынып оқушысы Анар Дидарбекова және Аружан Қайрат таныстырады.EGMO алғаш рет 2012 жылы Кембриджде (Ұлыбритания) өткізілді. Қазақстан командасы олимпиадаға 2017 жылдан бері қатысып келеді. Осы уақыт ішінде еліміздің құрамасы 3 алтын, 9 күміс, 11 қола медаль және 4 құрмет грамотасын жеңіп алған.&nbsp;Фото: Оқу-ағарту министрлігінің баспасөз қызметі

Қазақстандық 4 оқушы халықаралық математикалық олимпиадада ел намысын қорғайды

<a href="https://kyzylorda-news.kz/">Kyzylorda-news.kz</a> Бүгін сағат 10:00-де Үкіметтің кезекті отырысы басталады. Онда қазіргі және алдағы кезеңдегі маңызды 2 мәселе қаралады деп жоспарланған.<ul><li style="text-align:justify;">Нақтырақ айтқанда, Үкімет отырысының күн тәртібіне мына мәселелер шығарылып отыр:</li><li style="text-align:justify;">2025 жылғы өртке қарсы маусымға дайындық бойынша қабылданып жатқан шаралар</li><li style="text-align:justify;">Су тасқыны жағдайы</li></ul>Аталған мәселелер бойынша Су ресурстары және ирригация, Экология және табиғи ресурстар, Төтенше жағдайлар министрліктерінің басшылығы, сондай-ақ бірқатар облыстың әкімі баяндама жасайды.Мәселен, Су ресурстары және ирригация министрі Үкімет отырысында су тасқыны жағдайын баяндайды. Ол 2030 жылға дейінгі су ресурстарын басқару жүйесін дамыту тұжырымдамасы жүзеге асырылып жатқанына тоқталмақ. Министр баяндамасында су тасқыны кезеңіне дайындық жұмыстары қалай жүргізілгенін егжей-тегжейлі айтады. Сондай-ақ елдегі су қоймаларындағы соңғы ахуал жайлы мәліметтермен бөліседі.Еске сала кетесек, жақында Президент Су кодексіне қол қойған болатын.Ал, Төтенше жағдайлар вице-министрі өрт қаупі кезеңіне дайындық мәселесіне, су тасқынына қатысты қазіргі ахуалға жан-жақты тоқталады.Экология министрі Қазгидрометтің алдын ала болжамына сәйкес, биыл жаз өткен жылдарға қарағанда ыстық болатынын, осыған байланысты облыс әкімдіктері орман өрттерінің алдын алу бойынша жан-жақты шаралар қабылдап, орман шаруашылықтарының күштері мен құралдарын толық жауынгерлік дайындыққа келтіруі қажеттігін баса айтады.Отырыс біткеннен кейін баспасөз мәслихаты өткізіледі. Онда Су ресурстары және ирригация министрі Нұржан Нұржігітов, Экология және табиғи ресурстар министрі Ерлан Нысанбаев, Төтенше жағдайлар вице-министрі Кеген Тұрсынбаев БАҚ өкілдерінің сауалдарына жауап береді.Үкімет отырысының тікелей таратылымы PrimeMinister.kz сайтында, YouTube ресми арнасында, Facebook әлеуметтік желісінде, сондай-ақ UKIMET Telegram-каналында жүреді.Баспасөз конференциясының тікелей таратылымын YouTube ресми арнасынан және Facebook әлеуметтік желісінен көруге болады.Фото: Үкіметтің баспасөз қызметі

Бүгін Үкімет отырысында қандай мәселелер көтерілмек 

<a href="https://kyzylorda-news.kz/">Kyzylorda-news.kz</a> Өңірімізде 10 сәуір мен 6 мамыр аралығында “ЖАСӨСПІРІМ” жедел профилактикалық шарасы өтуде.Шараның негізгі мақсаты - жасөспірімдер қылмысының алдын алу және оның профилактикасы. Соның ішінде білім беру мекемелерінің оқушылары арасындағы құқық бұзушылықтардың жолын кесу, олардың құқықтық сауаттылығын арттыру. Профилактикалық шараның нәтижелерін облыстық ПД Жергілікті полиция қызметі басқармасы бастығының орынбасары Рауан Әлдешов мәлімдеді.<blockquote>- Іс-шараға қатысуға білім, денсаулық сақтау, жұмыспен қамту, қоғамдық даму басқармаларына, жастар ресурстық орталығына және кәмелетке толмағандар істері жөніндегі мамандандырылған ауданаралық сотқа қатынас хаттар жолданып, қазіргі уақытта бірлесіп тиісті жұмыстар атқарылуда. Іс-шараға барлығы 297 қызметкер жұмылдырылды, олардың 182-сі – ішкі істер органдарының қызметкері, 93-і – білім беру орындарынан, ал 22-сі – жергілікті атқарушы және өзге де органдардың өкілдері қатысты. Іс-шараның 4 күнінде кәмелетке толмағандарға қатысты барлығы 264 әкімшілік хаттама толтырылды. Әкімшілік кодекстің 127-бабы бойынша, яғни ата-ананың немесе басқа да заңды өкілдердің балаларды тәрбиелеу жөніндегі міндеттерін орындамағаны үшін барлығы 30 ата-анаға әкімшілік хаттама толтырылды,- деді Рауан Қырымұлы.</blockquote><img class="image_resized" style="width:88.66%;" src="https://knadmin.beoblood.kz/uploads/Brifing_14_04_4fda59b425.jpg" alt="Брифинг 14.04.jpg">Фото: Өңірлік коммуникациялар қызметі

Архив