<a href="https://kyzylorda-news.kz/">Kyzylorda-news.kz</a> Тарихы кенен, бірлігі бекем Іңкәрдария ауылының жұртшылығы бүгінде сырдың дәстүрлі өнері мен мәдениетінің өркендеуіне зор үлес қосып келеді.&nbsp; Өнердің қыз-қыз қайнаған ордасы Іңкәрдария ауылдық клуб үйінің жұмысы жылдан жылға жандануда. Талай талант түлеп ұшқан мәдениет ошағының бүгінгі жай-күйі жөнінде білікті басшы, мәдениет саласының майталманы Зағира Ахметовамен сұхбат құрдық.– Зағира Саханқызы, сұхбатымыздың алғашқы сұрағын мәдениет ошағының тарихынан бастасақ…– Ең алдымен, ауыл тарихынан бастаған дұрыс болар. Негізінен, 1964 жылы ҚССР министрлер кеңесі қаулысы бойынша қаракөл қой шаруашылығын дамыту мақсатында Іңкәрдария совхозы құрылған еді. Сол уақыттан бері ауылымызға көптеген басшы келіп, мал шаруашылығы саласына серпін береді. Әрине, жергілікті тұрғындар қоныстана бастаған тұста ауыл мәдениеті халыққа қызмет көрсете бастағаны анық. Негізінен, ауылдағы алғашқы клуб үйі совхоз құрылған жылы пайдалануға берілген. Өз кезегінде ауыл өмірімен біте қайнасқан мәдениет майталмандары салада өзіндік қолтаңбасын қалдырды. Осыдан 42 жыл бұрын мені сол кездегі совхоз директоры Құрман Ысқақов сүйемелдеуші мамандығына қабылдады. Араға бірнеше жыл салып, өз ісінің білгірі Дүйсенкүл Батталовадан меңгерушілік қызметті алған едім. Міне, осы сәттен бастап мәдениетте қажырлы еңбек етіп келемін. Ауылымыздан шыққан таланттар ішінде Тұрсынкүл Жұмабекова, Ұлтай Өміртаева, Құралай Топалақованың есімі мен өнері ел есінде.Шындығында, әр жылдары көптеген қиындыққа тап болдық. Жекешелендіру мәселесін шешіп, құлдыраудан аман-есен шыққанымыз бар. Ал жаңа ғимарат 2015 жылы Іңкәрдария ауылының 50 жылдық мерейтойы қарсаңында пайдалануға берілді. Іңкәрдария ауылдық клуб үйінде 7,5 штатпен 8 қызметкер жұмыс істеп келеді.– Баланың бойындағы талантын ашып, шығармашылығын шыңдауда үйірменің маңызы жоғары екені белгілі. Осы ретте ауылдық клуб үйінде қандай үйірме жұмыстары жүргізілуде? Ауыл өнерпаздарының жетістіктері жөнінде айтып берсеңіз…– Мәдениет ошағында «Көркем сөз», «Драма», «Сурет», «Ән», «Домбыра» үйірмесі бар. Сондай-ақ «Сұлу-ай» шығармашылық өнер орталығы тарапынан «Көркем оқу», «Сурет салу», «Домбыра», «Ұлттық би», «Балалар хоры» үйірмесі ашылды. Бүгінде арнайы орталықтың шапағатын көрудеміз. Өнерлі бұрымдылар би өнерімен шұғылдану үстінде. Материалдық база жасақталып, үйірмеге қажетті құралжабдық алынды. Бұның барлығы – ауыл баласының игілігі үшін жасалуда.Біздің өнерлі өрендеріміз жыл көлемінде көптеген жоғарғы деңгейдегі байқауға қатысып, жеңімпаз атануда. Мәселен, Жанерке Нұрлан «Құс жолы» балалар журналының ұйымдастыруымен өткен «Құс жолы» республикалық балалар мен жасөспірімдер арасындағы өнер байқауында «Хореография» жанры бойынша І орын иеленді. Нұредин Еділбай «Balafest» ІІ республикалық өнер байқауында «Вокал» жанры бойынша ІІ орын еншілесе, «Бозторғай» байқауының дипломанты атанды. Оспанхан Әубәкіровтің 90 жылдығы мен Толымбек Әлімбекұлының 70 жылдығына арналған «Асқардың ізімен...» атты облыстық сатирик ақындар мүшәйрасында Малика Қожақова жеңіс тұғырынан көрінді. «Жауқазын» өнер орталығының ұйымдастыруымен «Жауқазын» республикалық өнерлі балалар байқауының «Атамекен – жұмақ мекен» тақырыбында өткізілген сайысында «Көркемсөз» жанры бойынша Ақбота Ермаханова жеңімпаз атанды. Жалпы, ауылдық клуб үйінің өнерпаздары осыған дейін 22 аудандық, облыстық, республикалық байқаудан үздіктер қатарынан табылды.– «Адал адам» мәдени-тәрбие орталығы» тұжырымдамасы аясында қандай жұмыстар атқарылуда?– Адал адам мәдени-тәрбие орталығы» тұжырымдамасы 7 бағыт бойынша әзірленді. Бірнеше бағыт бойынша 2024 жылдың 6 айында 36 іс-шара ұйымдастырылды. Мүмкіндігі шектеулі жандарға арналған «Жүрек жылуы» атты аудандық өнер фестивалі байқауы өткізілді. «Арт уақыт» жобасы бойынша ақын, Қазақстанның халық жазушысы Фариза Оңғарсынованың туғанына 85 жыл толуына орай «Өлең, мен сені аялап өтемін» атты көркем оқу үйірме оқушылары арасында аудандық байқау жүзеге асты. «Кино тайм» жобасы аясында тәрбиелік мәні бар бірнеше кино ауыл халқына тегін көрсетілді. «Арт уақыт» жобасы аясында клуб үйінің үйірме өнерпаздарымен бірлесе ауқымды іс-шара өткізу жолға қойылған. «Жанұя шуағы» бойынша отбасы құндылығы барынша дәріптелуде. «Креативті хаб» жобасы аясында ауылымыздан шыққан қолөнер шеберлерінің көрмесі көпшілік сұранысына ие болуда. «Әлем book» жобасы аясында балалармен «Ертегілер еліне саяхат» жасалады. «Еріктілер тобы» мүшесі саналатын ауыл жастары ерікті түрде көпшілікке қолғабыс етуде. «Сұхбат тайм» жобасы аясында «Бестің шайы» бағдарламасы жүзеге асуда.&nbsp;Әңгімелескен&nbsp;Балтабай Ордабеков

Мәдениет ошағы – ауылдың рухани айнасы

<a href="https://kyzylorda-news.kz/">Kyzylorda-news.kz</a> Спорт – денсаулық кепілі. Қазіргі таңда жастарды спортқа баулу және оны дамыту елімізде жақсы жолға қойылған. Мәселен, Сырдария ауданында көгалдағы хоккей спорты қарқынды дамып келеді. Бүгінде әлемдік жарыстарда талай мәрте чемпион атанып, ел намысын қорғаған спортшылардың басым көпшілігі сырбойылық өрендер екені сөзсіз.Сырдария ауданының жастары халықаралық жарыстарда ұлттық құрама сапында өнер көрсетіп, ел намысын қорғап жүр. Сол себепті де аудан спортшыларының бәсі жоғары. Қарлығаш Болғанбаева – Қазақстан Ұлттық құрама командасының ойыншысы, облысымыздың намысын қорғап жүрген «Қайсар» құрама командасының нұсқаушысы, аудандағы ең таңдаулы әрі мықты спортшылардың бірі де бірегейі.Білікті спортшы Қарлығаш Айтбайқызы – Тереңөзек кентінің тумасы. Бала күнінен спортқа жақын болған көгалдағы хоккей шебері – И.Тоқтыбаев атындағы №35 мектептің түлегі. Спорт майталманы мектепті ойдағыдай тәмам­даған соң М.Тынышбаев атындағы Қазақ көлік және коммуникация колледжінде «Жолсерік» мамандығы бойынша білім алып, кейіннен Оңтүстік Қазақстан педагогикалық университетінің «Дене шынықтыру және спорт» мамандығын меңгеріп шыққан. Қарлығаштың бойындағы спортқа деген қабілеті мен дарыны отбасынан берілсе керек. Олай деуіміздің себебі атасы Тұрғанбай Болғанбаев тоғызқұмалақ спортынан жаттықтырушы болса, әкесі де жас кезінде футбол, көгалдағы хоккей секілді бірнеше спорт түрімен айналысқан мықты спортшы екен. Небәрі 10 жасында спорттық мансабын бастаған Қарлығаш Айтбайқызы өзінің ептілігімен, спортқа деген құлшынысымен көзге түсе білген. Тәжірибелі жаттықтырушы Сұлтанбек Қобландин жас спортшының осы спортқа деген құлшынысын аңғарып, Қарлығашты команда қатарына қосып, түрлі жарыстарға қатыстырып, зор еңбек етті. Әбден ысылған білікті спортшы байрақты бәсекелерде талай мәрте жеңіс тұғырынан көрініп, әлемнің түрлі спорт алаңдарында еліміздің әнұранын асқақтатып, көк туын аспанда желбіретіп келеді.<blockquote>– Көгалдағы хоккейге ең алғаш 2002 жылы 10 жасымда келдім. Менің бұл спортқа келуіме бірден-бір себепші ауданда қыздар арасында көгалдағы хоккейдің негізін қалаушысы, мықты бапкер Сұлтанбек Қобландин ағайым еді. Бесінші сыныпты аяқтап, жазғы демалыстың кезінде спорт мектебінің ауласында ойнап жүргенімде Сұлтанбек ағай жанына шақырып алып, «Тұрғанбай Болғанбаевтың немересісің бе?» деп сұрады. Хоккейге қатысуға шақырып, мені ойнап жүрген бір топ қыздардың арасына қосып жіберді. Сөйтіп жүріп көшке қосылып кетіп, ағайымның арқасында көгалдағы хоккей спортынан бір-ақ шықтым. Сұлтанбек ағайдың мықты бапкерлігі мен қолдауының арқа­сында 2009 жылы «спорт шебері» атағын алдым. Сонымен қоса талай жыл­ғы қажырлы еңбектің нәтижесінде 2018 жылы «халықаралық спорт шебері» атағына ие болдым, – дейді білікті спортшы.</blockquote>Ауданда тәжірибелі жаттықтырушылардың арқасында спортшылар республикалық, әлемдік деңгейдегі жарыстардан жүлделі оралып жүр. Соның нәтижесінде, жастардың спортқа деген құлшынысы да артуда. Спорт шебері Қарлығаш Болғанбаева ел мерейін республика көлемінде ғана емес, шет мемлекеттерде де асқақтатып жүр. Атап айтқанда, 2007 жылы Катар қаласында өткен Азия чемпионатында І орын, 2024 жылы Өзбекстан мемлекетінің Андижан қаласында өткен байрақты бәсекеде І орын иегері атанған. Қарлығаштың жетісітігі мұнымен бітпейді, аруымыз құрама команда сапында Малайзия, Катар, Сингапур, Доха, Индия, Иондонезия мемлекеттерінде өткен турнирлерде өнер көрсетіп, еліміздегі республикалық дәрежедегі додалардан алдыңғы орындардан түспей келеді. Көгалдағы хоккей шеберінің осындай биіктерді бағындыруы тынбай жаттығу жасауы мен талай жылғы тәжірибенің арқасында. Қазіргі таңда көгалдағы хоккейден тәжірибелі спортшы «Қайсар» спорт клубының белді ойыншысы. Өз кезегімізде білікті спортшы аруға тек қана жеңіс тұғырынан көріне беруіне және Сұлтанбек ағайының жолын жалғастырар мықты бапкер болуына тілектеспіз.Алтынай ҚАЙРАТҚЫЗЫ

Спортты жанына серік еткен ару

<a href="https://kyzylorda-news.kz/">Kyzylorda-news.kz</a> Бүгін Премьер-министр Олжас Бектеновтің төрағалығымен өткен Үкімет отырысында жылу маусымындағы өрт қауіпсіздігі, халықты дәрі-дәрмекпен қамтамасыз ету мәселелері қаралды. Жиынға жауапты министрліктер қатысып, өңір әкімдіктері онлайн байланыс арқылы қосылды.Айта кетейік, биыл аймақ тұрғындары республикалық бюджет есебінен 9 млрд. теңгеге тегін дәрі-дәрмекпен қамтамасыз етіліп, өсім алдыңғы жылдармен салыстырғанда 20 пайызды құрады. Жергілікті бюджеттің 557,8 млн. теңге қаржысына 21 түрлі сирек кездесетін аурумен ауыратын 425 науқасқадәрі-дәрмек алынды. Алдағы жылға осы мақсатқа 776 млн. теңге бөлінді.2022-2024 жылдары сирек кездесетін ауруға шалдыққандар «Қазақстан халқына» қоры арқылы 1 млрд. 463 млн. теңгенің дәрі-дәрмегімен қамтылды. Бүгінде медициналық жеткізушілер 100 пайыз тестілеуден өтті. Жыл басынан бері 10 айда 44 медицина ұйымы 430 мың қорап дәрілік препараттар қабылдаған. «Әлеуметтік әмиян» жобасы аясында 15 792 рецепт жазылып, босатылды. Денсаулық сақтау министрлігі бекіткен жол картасына сәйкес, облыстың 17 медициналық ұйымында «Госпитальдық фармация» бөлімдерін ашу жоспарлануда.Бүгінде құзырлы органдар өрт қауіпсіздігі талаптарын күшейтуде профилактикалық жұмыстарды қолға алған. Жергілікті бұқаралық ақпарат құралдары арқылы табиғи газды қауіпсіз пайдалану, түтін жолдары мен ауа-желдеткіш каналдарды уақытылы тазалау және жылу маусымы кезіндегі өрт қауіпсіздігінің талаптарын сақтау бағытында үгіт-насихат үздіксіз жүргізілуде.<img src="https://knadmin.beoblood.kz/uploads/rt_auipsizdigi_1_3e240d4289.jpg" alt="өрт қауіпсіздігі 1.jpg"><img src="https://knadmin.beoblood.kz/uploads/rt_auipsizdigi_2_c1578ecda9.jpg" alt="өрт қауіпсіздігі 2.jpg">Фото: Қызылорда облысы әкімінің баспасөз қызметі

 Өрт қауіпсіздігі шаралары талқыланды 

<a href="https://kyzylorda-news.kz/">Kyzylorda-news.kz</a> Қоғаммен ашық тіл табысу, азаматтардың сеніміне ие болу, атқарылған жұмыстарды ашық көрсету және көпшілікпен бірлесе қылмыстың алдын алу жұмыстары әрбір учаскелік полиция инспекторының басты мақсаты.&nbsp;Оларға артылатын жүк ауыр. Сондықтан да қоғамдық тәртіпті сақтауда әрдайым шепте тұратын олардың қызметі қашанда өзекті.Осы тұрғыда Қызылорда облысы ПД бастығының міндетін атқарушы полиция полковнигі Ермахан&nbsp;Абдраманов Қызылорда қаласы Полиция басқармасына қарасты барлық учаскелік полиция инспекторларымен кездесіп, олардың жұмысымен танысты.Кездесуде Қазақстан Республикасы Ішкі істер министрімен өткізілген жиындағы учаскелік полиция инспекторларына берілген тапсырмаларды және «Учаске» жедел профилактикалық іс-шарасы кезеңінде атқарылған жұмыстардың жай-күйі туралы мәселелері талқыланды.Полиция полковнигі Ермахан Әділханұлы азаматтардың өтініштеріне жедел жауап берудің, профилактикалық жұмысты арттырудың және халықпен тұрақты өзара іс-қимылдың маңыздылығына тоқталды.Ол учаскелік полиция инспекторларының қауіпсіздік жүйесіндегі маңызды буын екенін, олардың кәсібилігі мен жауапкершілігі тұрғындардың тыныштығы мен әл-ауқатына әсер ететінін атап көрсетті.Министрмен қойылған басты талаптар мен берілген тапсырмаларға тоқталып, жіті түсіндірді. Бұл өз кезегінде полиция қызметкерлерінің жүктелген жауапкершілікті арттырып, адал әрі нәтижелі жұмыс жасауларына септігін тигізері анық.Жиналыс барысында Департамент басшылығы учаскелік полиция инспекторларының жұмыс тиімділігін арттыруға бағытталған бірқатар тапсырмалар берді.Ермахан Әділханұлы құқық бұзушылықтың алдын алуды күшейтудің және азаматтардың құқықтарын қорғауға ерекше назар аударып, әр учаскелік инспектордың жауапты көзқарасы құқық тәртібін нығайтуда елеулі нәтижелерге қол жеткізуге мүмкіндік беретініне сенім білдірді.<img src="https://knadmin.beoblood.kz/uploads/Vstrecha_s_uchastkovymi_inspektorami_policzii_1_e1e6f8875c.jpeg" alt="Встреча с участковыми инспекторами полиции 1.jpeg">

Қызылорда облыстық полиция департаменті бастығының міндетін атқарушы учаскелік полиция инспекторларымен кездесті

<a href="https://kyzylorda-news.kz/">Kyzylorda-news.kz</a> «Азаматтарға арналған үкімет» Мемлекеттік корпорациясы киберқауіпсіздік саласындағы жетекші компания - TSARKA-мен ынтымақтастық туралы Меморандумға қол қойылғанын жариялады. Бұл келісім ақпараттық қауіпсіздік деңгейін арттыруға және Мемлекеттік корпорацияның ақпаратын қорғауға бағытталған.Әріптестік аясында TSARKA &nbsp;ақпараттық жүйелердегі осалдықтарды анықтау және жою мақсатында Tumar.One платформасынан зерттеу және тестілеу жүргізу үшін баг-хантерлерді белсенді түрде тартады.Баг-баунти платформасы – тәуелсіз киберқауіпсіздік зерттеушілері бағдарламалық қамтамасыз етуді тестілеу және анықталған осалдықтар туралы хабарлау мүмкіндігіне ие болатын инновациялық модель.<blockquote>«Меморандумға қол қою – &nbsp;екі ұйымның киберқауіпсіздіктің жоғары стандарттарын ұстанатынын, мемлекеттік сонымен қатар жеке құрылымдар арасындағы серіктестіктің маңыздылығын растайды. Бұл қадам қауіпсіздікті үздіксіз бақылауды қамтамасыз етіп, мемлекеттік басқару жүйесіне азаматтардың сенімін арттыруға мүмкіндік береді», – деп атап өтті TSARKA Group президенті Олжас Сәтиев.</blockquote>«Азаматтарға арналған үкімет» Мемлекеттік корпорациясы мен TSARKA арасындағы ынтымақтастық барлық азаматтар мен ұйымдар үшін қауіпсіз цифрлық ортаны құрудағы маңызды қадам болмақ.<blockquote>«Цифрлық дәуірде деректер қауіпсіздігін қамтамасыз ету – біздің қызметіміздегі негізгі аспектілерінің бірі. Серіктестер бағдарламалық қамтамасыз етуді тестілеп, осал тұстардың анықталғаны туралы хабарлап отырады. Біз өз тарапымыздан бұзушылықтар, рұқсатсыз қолжетімділік және басқа да қауіптерді болдырмау үшін кешенді шаралар қабылдаймыз. Бұл Мемлекеттік корпорацияның деректерді қорғауды күшейтіп, олардың құпиялылығына кепілдік беруіне мүмкіндік береді», – деп қосты «Азаматтарға арналған үкімет» Мемлекеттік корпорацияның Басқарма Төрағасы Арман Кенжегалиев.</blockquote>&nbsp;

 «Азаматтарға арналған үкімет» Мемлекеттік корпорациясы мен TSARKA арасында меморандумға қол қойылды

<a href="https://kyzylorda-news.kz/">Kyzylorda-news.kz</a> «AMANAT» партиясының Хатшысы Ержан Жылқыбаев бейнебайланыс режимінде партияның облыстық филиалымен жиын өткізіп, ағымдағы жылдың 9 айында атқарылған жұмыстарды саралап, алдағы міндеттерді пысықтады.Жиында партияның облыстық, қалалық және Арал, Қазалы, Жалағаш, Жаңақорған аудандық филиалдарының, облыстық мәслихаттағы депутаттық фракция мен партиялық бақылау комиссиясы жұмысының есебі берілді.Жалпы облыстық филиалмен жыл басынан ауқымды жұмыстар атқарылып келеді. Соның ішінде партия айнасы болып табылатын қоғамдық қабылдау бөлмелеріне есепті кезеңде азаматтардан 4880 өтініш түсіп, олардың 72,3 пайызы оң шешілді. 1 317 адамға өтінішіне сәйкес заңнамалық кеңес берілді.9 айда бекітілген жоспарға сәйкес 614 шара өткізіліп, 41 980 адам қатысты. Оларда әрбір страталарды қамтитын Партиялық жобалар да насихатталып, БАҚ пен әлеуметтік желілерде жарияланды. Соның ішінде «Жер аманаты» жобасы бойынша биылға жоспарланған 70,0 мың гектардың бүгінге 76 377 гектар жер мемлекет меншігіне қайтарылып, жоспар артығымен орындалды. «Қарызсыз қоғам» жобасы бойынша 9462 адам қаржылық сауаттылықты арттыру курсынан өтті.Биыл 38 ауылда әкімдер сайлауы жоспарланса, сайлауда 37 ауылдың әкімі лауазымына партиядан ұсынылған үміткерлер жеңіске жетті.«Жастар рухы» Жастар қанаты да белсенді жұмыс жасап келеді. «Ерікті көмек» жаңа жобасы аясында «109» Қызу желі іске қосылып, шұғыл көмек қажет азаматтарға қолдау жасалуда. Мәселен, есепті кезеңге 200-ге жуық қоңырау келіп түсіп, оның ішінде, қызу желі жобасына сәйкес келетін 70-тен астам әлеуметтік жағдайы төмен, жалғыз басты қарттарға жастар еріктілерімен азық-түлік пен үй ауласына қол көмек жұмыстары жүргізілді.Партия Хатшысы жалпы атқарылған жұмыстарға оң бағасын беріп, алдағы уақытта да партия филиалына Сайлауалды бағдарламаның орындалуын қатаң бақылауға алу, депутаттық фракция жұмысын жетілдіріп, партиялық жобалар, қоғамдық қабылдау, ақпараттық жұмыстарды күшейту секілді бірқатар міндеттер жүктеді.

9 айда атқарылған жұмыс сараланып, алдағы міндеттер пысықталды

<a href="https://kyzylorda-news.kz/">Kyzylorda-news.kz</a> &nbsp;Қызылорда облысының газдандыру деңгейі 75 пайызды құрады. Бұл бағытта 24 жобаға республикалық және облыстық бюджеттен және «Самұрық-Қазына» АҚ тарапынан қаржы бөлінген.<blockquote>– Жыл басынан бері алты елді мекен газға қосылып, облыс бойынша газдандырылған елді мекендердің саны 41-ге артты. Жыл соңына дейін бес ауылдық елді мекенге табиғи газ беріліп, облыстың газбен қамту деңгейі 78 пайызға, газдандырылған елді мекендер саны 46-ға жеткізілетін болады, - деді Өңірлік коммуникациялар қызметінде өткен брифингте облыстық энергетика және тұрғын-үй коммуналдық шаруашылық басқармасының басшысы Медет Усаин.</blockquote>Айта кетейік, келесі жылы Шижаға, Ақтан батыр, Дүр Оңғар, Шаған, Н.Ильясов, Ортақшыл, Баймұрат, Талдыарал, Сабалақ ауылдарын табиғи газға қосу жоспарлануда.&nbsp;Брифинг барысында облыстық энергетика және тұрғын-үй коммуналдық шаруашылық басқармасының басшысы Медет Усаин жаңа электр орталығың жұмыс барысын баяндады.Басқарма басшысының айтуынша электр орталығындағы негізгі қондырғыларды дайындауға шетелдік компанияларға тапсырыс беріліп, бүгінде газотурбиналық қондырғылар мен жылу қазандығы құрылыс алаңына жеткізілген. Жаңа жылу электр орталығы облыс аумағын электр энергиясының қажеттілігін толығымен қамтып, артылғанын басқа өңірлерге жіберуге мүмкіндік береді.<blockquote>– Мемлекет басшысының тапсырмасына сәйкес оңтүстік өңірлерде электр энергиясының тапшылығын болдырмау мақсатында Қызылорда қаласында қуаттылығы 240 мегаватты құрайтын жаңа жылу электр орталығы құрылысы жүргізілуде. Жобаның инвесторы «Акса Энерджи» түрік компаниясы болып табылады. Бүгінгі таңда инвестор тарапынан жылу орталығының құрылысына инвестиция салынды. Станцияны 2025 жылдың 4 тоқсанында іске қосу жоспарлануда,- деді басқарма басшысы.</blockquote>Бұдан бөлек, бюджет есебінен жылу электр орталығын газбен қамтамасыз ету жобасы іске асырылуда. Бүгінгі күнге жұмыстар 80 пайызға орындалды.&nbsp;Аймақ тұрғындарын орталықтандырылған ауыз сумен қамту үлесі 98,4 пайызды құрайды. Облыс аумағында 4 қала және 230 ауылдық елді мекен бар. Барлық қалалар 100 пайыз ауыз сумен қамтылған. Бұл туралы баспасөз алаңында айтылды. Жыл басынан атқарылған жұмыстарын баяндаған облыстық энергетика және тұрғын-үй коммуналдық шаруашылық басқармасының басшысы Медет Усаин 26 елді мекенді 2025 жылдың соңына дейін сапалы ауыз сумен қамту мақсатында жол картасы әзірленгенін айтты.<blockquote>– Жол картасы аясында 5 елді мекенді топтық су құбырына қосылып, 4 елді мекенге су тұщытқышын орнатылады. 3 елді мекенде ішкі су жүйесінің құрылысы жоспарланған. Биылға жоспарланған жобалар бойынша барлығы 88 шақырым ауыз су және 23 шақырым су бұру желілеріне жаңғырту жұмыстары жүргізілуде. Келесі жылы 28 жобаны іске асыру жоспарлануда, - деді басқарма басшысы.</blockquote><img src="https://knadmin.beoblood.kz/uploads/466140852_2141217599607074_2570856163068818006_n_741e679c36.jpg" alt="466140852_2141217599607074_2570856163068818006_n.jpg">

Жыл соңына дейін 5 елді мекен табиғи газға қосылады

<a href="https://kyzylorda-news.kz/">Kyzylorda-news.kz</a> &nbsp;Кейінгі кезде Қазақстан жаңалықтарында полицияның дропперлерді ұстағаны туралы хабарды жиі еститін болдық. Көбіне олар жасөспірімдер, жастар болып жатады. Алаяқтар олардың өзін немесе шоттарын алданып қалған азаматтардың ақшасын аудару үшін пайдаланады. Кейде қандай да бір қылмысқа сыбайлас болып жатқанын дроппердің өзі де білмеуі мүмкін.Дроппер (немесе дроп) деп алаяқтар қылмыстық жолмен басқалардың шотынан ұрлаған ақшаларын шығаруға немесе қолма-қол ақша&nbsp;айналдыру үшін пайдаланатын адамды айтады.<figure class="image"><img src="https://knadmin.beoblood.kz/uploads/dropper2_01_291ec50b7c.png" alt="dropper2-01.png"></figure>Дроппер не істейді? Ол басқа біреудің ақшасын қылмыскерлердің картасына аударады немесе өз шотынан шешіп алып, қолма-қол ақша түрінде береді. Сонымен бірге ол банкомат арқылы ақша толықтыруы немесе шешуі де мүмкін. Алаяқтар кәмелетке толған делдалдарға өз карточкаларын рәсімдеп, оның мәліметтерін (карта нөмірі, шыққан күні, үш саннан тұратын код) пайдалануға бергендері үшін ақшалай сыйақы береді. Қаскүнемдер мұндай карточкаларды ұрлап алған ақшаны аудару үшін және шығару үшін пайдаланады. Алайда, заң бойынша картаны атына рәсімдеген адам ол арқылы жүргізілген барлық операцияға өзі жауапты болады. Кейіннен картаны басқа біреулер пайдаланғанын, иесі картасына қастық әрекет жасалғанынан мүлде хабарсыз екенін полицияға дәлелдеу қиынға соғады.Алаяқтар дропперлерді қалай табады және қалай арбайды? Көбіне алаяқтар мұндай «іске» ақшаға мұқтаж әрі осы әрекетінің салдары неге соғатынын саралай алмайтын жасөспірімдер мен тәжірибесіз студенттерді тартады. Ондай аңқау «қызметкерлерді» әдетте әлеуметтік желілер мен мессенджерлер, электрондық пошта бойынша, таныстары арқылы және қоғамдық орындарда жұмыс тәжірибесі мен білімін талап етпейтін вакансия туралы хабарландырулар жариялау арқылы табады. Мысалы, алаяқтар жеңімпаздарға «ұтысын» жіберіп отыратын лотерея әкімшісінің жұмысын ұсынады. Сондай-ақ, олар ақшаға карта ашып табыс табуды, тіпті досын да әкелуді ұсынады. Ата-анасы ашып берген виртуалды картасын белсенді пайдаланатын оқушы да дропперге айналуы мүмкін.<figure class="image"><img src="https://knadmin.beoblood.kz/uploads/dropper3_01_fab3ba186b.png" alt="dropper3-01.png"></figure>Алаяқтар жастарды тартымды талаптарымен: ешбір ауыр жұмыс істеместен, оңай ақша табуға болады деп қызықтырады. Әрине, олар карта арқылы қылмыстық жолмен алынған біреулердің ақшасын аударатынын және алатынын айтпайды. Жасөспірімдердің сеніп, оларды қалай да көндіру үшін түрлі аңыздар ойлап табады.Сонымен қатар міндетті түрде қолданылатын заң бойынша жауапкершілік жайлы да ешкім сөз қозғамайды. Себебі осы әрекеттері арқылы қаскөйлер адамдарды алаяқтық әрекеттеріне қатыстырып, қылмыстық істеріне сыбайлас болуға тартады.Жақында ғана, биыл қыркүйекте Алматыда алаяқтардың қылмыстық жолмен алған ақшасын қолма-қол ақшаға айналдыруға көмектескен екі жас дроппердің ұсталғаны туралы айтылды. Олар ақшалай сыйақы үшін өздерінің банк карталары мен жеке мобильді банктік шоттарын қаскүнемдерге берген. Алаяқтардың бір әйелді алдау арқылы ұрлап алған 20 миллион теңгені осы жастардың шоттары арқылы қолма-қол ақшаға айналдырғаны белгілі болды. Полиция қылмыстық іс қозғап, дропперлерді қамауға алды.<figure class="image"><img src="https://knadmin.beoblood.kz/uploads/dropper1_01_645ba654de.png" alt="dropper1-01.png"></figure>Алаяқтыққа қатысы бар адамдар заң бойынша бес жылға дейін бас бостандығынан айырылу түрінде жауапқа тартылады.&nbsp;Есіңізде болсын, түбінде&nbsp;дропперлер&nbsp;Фемидаға&nbsp;сай қатаң түрде жауапқа тартылады.&nbsp;Ерте ме, кеш пе, олардың ізіне түседі. Әдетте дропперлер бірінші болып ұсталады, себебі ақша ағыны солар арқылы өтеді, ал барлық аударым және басқа да операциялар банк жүйесінде тіркеледі. Барлық жерде камералар орнатылған, оның үстіне қазір полиция мұндай қылмыстық топтарды залалсыздандыруға жаңа технологияларды қолданады.Бұл – қылмыстық жаза қолданылатын қылмыс! Алаяқтар ұрлаған барлық соманы сот шешімі арқылы кәмелетке толмаған дропперлердің өздерінен немесе олардың ата-аналарынан, қамқоршысынан өндіріп алуға болады. Әдетте бұл – миллиондаған ақша.<figure class="image"><img src="https://knadmin.beoblood.kz/uploads/law_01_61047b219e.png" alt="law-01.png"></figure>Алаяқтардың тұзағына қалай түспеуге болады?Біріншіден, «батпан құйрықты» уәде ететін «керемет» ұсыныстар мен «вакансияларға» алданып қалмаңыз.Екіншіден, өзіңізге және ата-анаңызға қатысты қаржылық ақпаратты немесе банк карталарының деректерін ешкімге беруге болмайды.Үнемі ата-анаңызбен және ересек туыстарыңызбен кеңесіңіз!<figure class="image"><img src="https://knadmin.beoblood.kz/uploads/2_millions_01_1_86e14314a2.png" alt="2-millions-01-1.png"></figure>Фото: Fingramota.kz

Дроппер деген кім? Олар несімен қауіпті? 

<a href="https://kyzylorda-news.kz/">Kyzylorda-news.kz</a> &nbsp;Нағи Ілиясов ауылының тұрғыны Айдана Қалиева – жас кәсіпкер. Ол ауданда кәсіпкерлік бойынша тың жобаны қолға алды. Өткен жылы жаңа бизнес-идеясын бастау үшін конкурсқа құжатын дайындап, грантқа қол жеткізді. Айдананың әзірлеген бизнес-жоспары Қызылорда облыстық кәсіпкерлік және өнеркәсіп басқармасы тарапынан қолдау тауып, мемлекеттік грант негізінде 5 млн теңге қайтарымсыз қаржыға ие болды. Оның негізгі бастамасы – бір реттік қолданатын бахила өндірісі. Ауылдан жалға алған ғимараттың ішінде шағын кәсібін дөңгелетіп отырған жас кәсіпкер басқа да жобаны іске асыруды мақсат етіп отыр.<blockquote>– Мемлекет тарапынан жаңа идеяларға әрдайым қолдау білдірілетіндіктен, көптен бері ойымда жүрген бахила өндіретін цех ашуды жоспарладым. «Атамекен» кәсіпкерлер палатасының аудандық филиалына барып, бизнес-жоспарымды айтып, мамандар тарапынан қолдау алып, құжат әзірлеуге кірісіп кеттім. Бұл өндіріс цехы облыста жоқ тың идея болғандықтан, инновациялық жобаның құжаттарын әзірлеу де біраз уақыт алды. Облыс аумағынан өтінім бергендердің арасынан жобам жеңімпаз деп танылып, осылайша мемлекеттік грант иегері атандым. Қазіргі уақытта Нағи Ілиясов ауылында мәдениет үйі ғимаратынан бір бөлме жалға алып, осында құрылғымды орнаттым, – дейді жас кәсіпкер Айдана Қалиева.</blockquote>Иә, бахила шын мәнінде көптеген мекемелерде, әсіресе емханада гигиена мен тазалықты сақтау үшін таптырмас зат. Аяқ киімнің сыртынан киілетін бахила айналаны шаңмен ластамауға немесе керісінше аяқ киімді сыртқы ластанудан қорғауға өте қолайлы. Бахила тазалықты және санитарияны сақтауды аса қажет ететін мекемелерде кеңінен қолданылады. Әсіресе, медициналық мекемелерде, салондарда, шаштаразда келушіге ыңғайлы жағдай жасау үшін бір рет пайдаланылатынын көріп жүрміз. Сондықтан бахилаға деген сұраныс күн са­йын артпаса, кемімейтінін зерттеп, білген кәсіпкер өз идеясын іске асыруға батыл кірісіп, өз бизнесін жасауға мемлекеттен грант ұтып алды.Айдана Маратқызы бахила шығаратын арнайы құрылғыны Қытайдан алдырған. Бұл құрылғы зауыттан 380 В-пен жұмыс жасайтын болып шығатындықтан, оны 220 В-қа қайта жасауға тапсырыс берген. Зауыт тапсырысты орындап берген. Минутына 200 дана шығаратын жаңа құрылғының салмағы 600 келі. Мемлекеттен берілген грантты құрылғыны сатып алуға жұмсаса, қосымша өз қаржатына өндіріске қажетті полиэтилен пакеті, резеңке мен қаптама пакетін, яғни шикізат сатып алған. Бүгінде бахила өндірісін бастап кеткен кәсіпкер 2 адамды жұмыспен қамтып отыр.&nbsp;1000 данадан жоғары тапсырыс қабылдайтын кәсіпкердің өз тұтынушылары бар. Әсіресе медициналық мекемелер, балабақшалар, мектеп интернаты секілді мекемелерге тендер жеңімпазы ретінде өзі тапсырыс­ты орындап береді. Тиімді әрі табыс әкелетін өндірісті жолға қойған кәсіпкер қызметін көрші облыстарға да ұсынады. Шағын цех иесі еліміздің облыс, аудан, ауылдарынан түскен тапсырысты уақытылы орындап, жөнелтіп отыр.«АҚЖОЛ» жеке кәсіпкерліктің иесі Айдана Қалиева – қос жоғарғы білімі бар жас. Журналист әрі орыс тілі мен әдебиеті пәнінің мұғалімі Т.Айтбаев атындағы №132 орта мектепте зертханашы болып жұмыс істейді. Қосымша табыс көзін тапқан жас кәсіпкердің бос уақыты жоқ. Қолы қалт еткенде өндіріс басына барып, жұмысты өзі жүргізсе, алдағы уақытта іске асыратын жаңа идеяның құжаттарын әзірлеуге байланысты іссапарларға көп шығады.<blockquote>– Қазір екі қолды қусырып отыратын заман емес. Маман­дығым бойынша жұмыс табылмағандықтан, кәсіпкерлікке ден қойдым. Қазір бір кәсіппен отыруды жөн көрмедім. Ауылда тұрғындардың сұранысы бойынша дәріхана ашуды қолға алдым. Дәріхана ашу оңай емес екен. Ізденістің арқасында алдымен жауапкершілігі шектеулі серіктестік құруым керек болды. Сондықтан «АААА GROUP» ЖШС-ін құрдым, серіктестік негізінде фармацевтикалық білімі бар маманды жұмысқа қабыл­дадым. Серіктестік атауына келсек, екі баламның есімі А әрпінен басталады, ал кейінгі екеуі өзімнің есімім мен өмірден ерте озып кеткен бауырым Айбектің құрметіне алынған. Яғни, Ақжол, Аяулым, Айдана, Айбек тобы дегенді білдіреді. Енді аз күнде ауылдан жаңадан ашылатын дәріхананы қызым Аяулымның атымен «AYAUMEDFARM» деп атадым, – дейді Айдана Маратқызы.</blockquote>Қос бірдей кәсіпкерлік саланы қолға алған жас кәсіпкер жоғарыда айтылғандай екі баланың анасы. Оның бастамаларын қолдап отырған ата-анасы мен екі бірдей бауыры бар. Балаларының болашағы үшін бірнеше кәсіпті қолға алған Айдана жақында аудан әкімінің қолдауымен ауданның «Үздік жас кәсіпкер» номинациясын жеңіп алды. Бұл ауданда кәсіпкерлік бағытты қолға алған жастарды қолдауға берілген марапат. Сондықтан мемлекет тарапынан тың идеяларды жүзеге асыруды мақсат еткен кәсіпкерлер әрдайым қолдау тауып, қайтарымсыз грантқа қол жеткізетіні айқын.Республикаға танылған гүлденген Нағи Ілиясов ауылында алғаш болып қос кәсіпті бастаған Айдананың дәріханасы алдағы уақытта ауыл тұрғындары үшін қызметін көрсететін болса, бахила өндірісі елдің әрбір түкпіріне, тіпті шетелге жететініне сенімдіміз.Бибісара ЖАНӘЛІ

Сырдариялық жас кәсіпкер грант алып, бахила шығара бастады

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы бойынша Қылмыстық-атқару жүйесі департаментінің №37 мекемесінің психолог маманы Ақгүл Аманова сотталғандарға ерекше психологиялық тренинг өткізді. &nbsp;Бұл тренингтің негізгі мақсаты — сотталғандардың ойлау қабілетін дамыту, өз эмоцияларымен жұмыс жасау және дұрыс шешім қабылдау дағдыларын қалыптастыру.&nbsp;Тренингтің негізі әдісінің бірі — Эдвард де Бононың “6 қалпақ” ойлау техникасы. Бұл әдіс жеке тұлғаның ішкі дүниесін түсінуге, әлеуметтік дағдыларды қалыптастыруға және проблемаларды шығармашылықпен шешуге бағытталған.&nbsp;Тренинг барысында психолог маман “Бауырсақ” ертегісін айтып берді. Одан соң олар 6 әртүрлі түсті қалпақты таңдап алып, ертегіні түрлендіріп айтты. Әртүрлі түсі мен мағынасы бар алты қалпақтың көмегімен әрқайсысы әртүрлі шешім қабылдап, көзқарастарын білдіріп, өз эмоцияларымен жұмыс жасады.&nbsp;<blockquote>– Маған бүгінгі ерекше тренинг ұнады. Өз-өзімізді тануымызға, жағымсыз көңіл күйден арылуымызға көмектесті. Мен қызыл қалпақты таңдадым. Бұл қалпақ “менің сезімім қандай?” деген сұраққа жауап береді. Ертегіні тыңдай отырып, өз көзқарасымды айтып бердім. Психолог маманның әртүрлі тренингтерінен қалмауға тырысамын. Психологпен сөйлесіп, өмір сүруге деген құлшынысымыз оянады. Мекеме психологына алғысымыз шексіз, – деді сотталған азамат.&nbsp;</blockquote>Тренингте сотталғандар өз эмоцияларымен жұмыс жасауды үйреніп, әртүрлі жағдайларға қалай дұрыс жауап беру керектігін түсінді. Олар өз мәселелерін жаңа тәсілдермен шешуге және қоғамға қайта оралған соң әлеуметтік бейімделу процесінде тиімдірек болуға мүмкіндік алды.&nbsp;<blockquote>– “6 қалпақ” психологиялық тренингі сотталғандар үшін тек өзін-өзі тану және эмоциямен жұмыс істеу ғана емес, сонымен қатар өз әрекеттері мен ойларын басқару дағдысын дамытуға да үлкен септігін тигізді. Мұндай тренингтер сотталғандардың қоғамға бейімделуіне, олардың түзелу процесіне оң әсер етіп, бостандыққа шыққаннан кейін жаңа мүмкіндіктерге жол ашады, – дейді психолог маман Ақгүл Аманова.</blockquote>

Қызылордада сотталғандарға “6 қалпақ” психологиялық тренингі өткізілді

<a href="https://kyzylorda-news.kz/">Kyzylorda-news.kz</a> Бүгінде Сырдария ауданының жастары қоғам өмірінде әркез түрлі игі істің басы-қасынан табылып, еліміздің дамуына тигізетін көптеген оң бастамалардың себепшісі болып, белсенділік танытуда. Осыған орай аудандық қоғамдық даму бөліміне қарасты жастар ресурстық орталығы директорының міндетін атқарушы Нұржан Сейтжанмен аудан жастарының тыныс-тіршілігі мен бүгінгі ахуалы жөнінде әңгімелесуді жөн көрдік.&nbsp;– Алдымен аудан жастары туралы жалпы ақпаратқа қанықсақ...– Қазіргі таңда аудан халқының шамамен 30 пайызын жастар құрайды. Кент орталығы мен ауылдық округтерді қосқанда 14-35 жас аралығындағы жастар саны – 11 727. Аудан жастары белсенді, қай істе де алға жылжу анық байқалады. Спорт, мәдениет, мемлекеттік қызмет, денсаулық сақтау, білім беру – қай саланы алып қарасақ та білімді, талапты, рухты жастарымыз аудан намысын қорғап, кемел келешектің іргетасын мықтап қалап келеді деп ауыз толтырып айтуға негіз бар. Ал осы жастарды қоғаммен тығыз байланыстыруда аудан әкімдігінің, қоғамдық даму бөлімінің қолдауымен жастар ресурстық орталығы түрлі іс-шаралар ұйымдастырып, түрлі бағытта жұмыс істейді.– Орталықтың ұйытқы болуымен өткізілген іс-шаралар туралы нақтырақ айтып өтсеңіз?– Қазіргі таңда кент және ауылдық округтерде жастар саясаты бойынша 14 маман қызмет атқаруда. Жастардың бос уақытын тиімді өткізуі үшін түрлі бағыттағы іс-шаралар ұйымдастырылады. Оған мектеп оқушыларынан бастап 35 жасқа дейінгі жастар қамтылады. Атап айтар болсақ, мемлекеттік жастар саясатын жүзеге асыру мақсатында жыл басынан бастап 40-қа жуық іс-шара өткізілді. Оның ішінде акциялар, кездесулер, түсіндірме жұмыстары, т.б. атап өтуге болады. «Жастар лагері», «Сырдария барысы» турнирі сияқты ауқымды іс-шаралар жүзеге асырылды. Қайбір бастама болса да әлбетте жастарды дамытуға, ой-өрісін кеңейтуге, саламатты өмір салтын насихаттауға бағытталады. Мысалы, жақында қолға алынған «Кешкі vibe» жобасы түрлі сала бойынша өңірімізден шыққан, жастарға үлгі бола білген жастарды дәріптеуді мақсат етеді. Сұхбат алаңына лайықты жастар шақырылып, көрермен ретінде мектеп оқушылары қатысады. Бұл жердегі мақсат – осындай түрлі салада өз жолын салып келе жатқан аудан азаматтарына қарап, үлгі алса, мотивация болса деген ой. Әскери форум, «Таныс болайық» айдары, «Кітап сыйла» акциялары, поэзия кештері де – жастарды жарқын болашаққа бағыттауға арналған іс-шаралар.– Иә, жастардың ауқымды іс шараларына біз де куәміз. Сондай-ақ&nbsp; әлеуметтік желі арқылы да бақылап отырамыз. Жалпы орталық белгілі бір бағыттарға сүйеніп жұмыс жүргізетін шығар?– Әрине, негізгі сегіз бағыт бойынша жұмысты үйлестіреміз. Олар – «Әкелер мектебі», «Еркеzhan» қыздар клубы, «Сырдария жастары» еріктілер штабы, жастар бригадасы, кеңес беру орталығы, «Жайдарман» лигасы, «Жас сарбаздар» клубы, «Кітап оқиық» кітап клубы. Міне осы бағыттар аясында түрлі іс-шаралар ұйымдастырылады. Айтпақшы, пробация есебінде тұрған жастар бар. Олар назардан тыс қалмайды. Әр ай сайын кездесулер ұйымдастырылып, арнайы іс-шаралар да жүзеге асырылады.– Жастардың күші еріктілікте көрініп жатады. Аудандағы волонтерлер жайына қысқаша тоқталсаңыз...– Өздеріңізге мәлім, елдегі қандай жағдай болса да жастар өкілдері өз үлестерін қосудан аянып қалып жатқан жоқ. Жақында елімізде орын алған алапат су тасқыны кезінде ерікті жастарымыз бауырларымызға көмек қолын созып, азық-түлік, тұрмыстық қажеттілік яки ақшалай көмек көрсетуге барын салды. Ауылдық округтерде құрылған еріктілер штабтары жұмыс жүргізуде. Табиғи апатқа тосқауыл жоқ. Түрлі жағдаймен баспанасынан айырылған яки көмекке мұқтаж жандарға қолдан келген көмекті аямайды. Сондай-ақ «Жасыл ел» еңбек жасағына биыл 110 адам тартылып, ауданды абаттандыру жұмыстарына атсалысты. «Қайырымдылық қылсаң, қайырын өзің көресің» деген ғой. Жақында аудан волонтерлері «BIRGEMIZ» облыстық волонтерлер слетінде «Үздік әлеуметтік волонтер» атанды. Аудан жастарының ізгі іске бір табан жақын болып, жақсылық жасауда жарысатыны көңілді қуантады.– Жастар бригадасының жұмысы туралы не айтасыз?– Жұмыссыз жастарды еңбекке тарту әрі бос жерлерді игеріп, азық-түлік қауіпсіздігін қамтамасыз ету мақсатында ауылдық округтерде жер ашылып, жастар бригадалары құрылды. Жастар бригадасының саны жыл сайын артып келеді. Бұл өте жақсы бастама. Аудан әкімінің қолдауымен Айдарлы, Аманкелді, Жетікөл, Шіркейлі ауылдық округтерінде жастар маусымдық жұмыспен қамтылуда. Сондай-ақ Бесарық, А.Тоқмағамбетов ауылдарында жастардан құрылған бригада белгіленген көлемдегі жерге картоп, бау-бақша дақылдарын егіп, еңбек даласының көркін қыздыруда.– Шығыстың ғұлама ғалымы әл-Фараби «Жас жеткіншектеріңізді көрсетіңіз, мен сіздердің болашақтарыңызды айтып берейін» дейді екен. Сол айтпақшы, ел болашағының жарқын көрінісі жастар болса, жастар саясаты мәселесі де ауқымды тақырып. Ал аудан жастарының талпынысы жоғары, ауқымды жұмыстары да белгілі. Өзіңіз жарқын болашақтың жалынды жасы ретінде ел дамуына қандай үлес қосып жүрмін деп ойлайсыз?– Кез келген мемлекеттің болашағы – жас ұрпақ яғни саналы жастарымыз. Бүгiнгі жас – болашақ Қазақстанның жанды бейнесі, ертеңгі ел тізгінін ұстайтын тұлға. Жастар – қоғам өмірін алға бастаушы прогрессивті күш иесі екенін қай қоғамда да дәлелдеп келеді. Қай заманда болмасын қоғамның қозғаушы күші – жастар, бүгінде озық идеяларымен қаруланып, еліміздің дамып, өркендеуіне барынша үлес қосып келеді. Осы ретте аудан жастарымен бір толқында болып, жастық жігерімді өзім қатарлы жастардың дамуына, алға жылжуына арнап жүргеніме қуанамын. Бұл мен үшін үлкен мәртебе әрі азаматтық парызым деуге болады. Жастарда жалын бар. Олармен жұмыс істеу қызықты, шабыт аласың. Аудан жастарын игі істерге ұйыстыру жолында атсалыссам, үлес қоссам – бұл менің бүгінгі таңда атқарған үлкен жұмысым, жеткен жетістігім. Алдағы уақытта Тәуелсіздігіміздің тамырын тереңдетіп, Қазақстанды іргелі мемлекетке айналдыру біздің қолымызда, яғни болашағымыз жастардың жауапкершілігінде. Бүгінде елімізде жастар саясатына үлкен көңіл бөлінуде. Жастар – жердің, елдің иесі, қазақ елінің рухани тәуелсіздігінің биік тұғыры.Аружан МҰХАНБЕТҚАЛИ

Бүгінгі жалынды жас – ертеңгі ел болашағы

<a href="https://kyzylorda-news.kz/">Kyzylorda-news.kz</a> ҚР Көлік министрі Марат Қарабаев Сыр еліне жұмыс сапарымен келіп, аймақтың жол-көлік инфрақұрылымын дамытуда атқарылған жұмыстарды көрді, тұрғындармен кездесті.Облыс әкімі Нұрлыбек Нәлібаев алдымен сол жағалаудағы жаңадан ашылған автовокзал жұмысымен таныстырды. Жаңа автовокзал - халықтың талап-тілегі мен сұранысына сай салынған жаңа нысан. Мұнда жолаушылар мен жүргізушілерге, мүмкіндігі шектеулі азаматтарға барлық жағдай қарастырылған.Жолаушылар осы жерден халықаралық және түрлі бағыттағы 38 бағытқа сапарға шыға алады. Тәулігіне 200 жолаушыға қызмет көрсетілетін ғимарат аумағына жолаушыларды түсіруге арналған 6, сапарға шығатындарға арналған 11 перрон жасалған. Автобустарға арналған қосымша 30 орындық автотұрақ бар.Әрі қарай министр жолаушылар тасымалы қызметін одан әрі жетілдіруде, қоғамдық көлік мәселесін шешуде атқарылған жұмыстармен танысты.«Экотакси» қызметін ұйымдастыру үшін «Қызылорда автобус паркі» ЖШС-не «JAC EJ7» маркалы 100 электромобиль сатып алынды. Бүгінде 52 электромобиль қала тұрғындары мен қонақтарына күнделікті қызмет көрсетуде, 48 көлікті мемлекеттік тіркеу жұмыстары жүргізілуде. Элекромобильдер үшін «Қызылорда автобус паркі» ЖШС-нің базасында 5 қуаттағыш қондырғы, «Qazaq Energy Charge» компаниясы қаланың бірнеше жерінде қуаттау бекеттерін орналастырған.2022-2024 жылдары Қызылорда қаласының қоғамдық көлік мәселесін түбегейлі шешу үшін «Өнеркәсіпті дамыту қоры» АҚ арқылы табиғи газбен жүретін 300 «Yutong ZK6852 HG» автобусы алынды.Мұнан бөлек, министр «Қызылорда-Жезқазған» автожолын қайта жаңғырту жұмыстарының барысымен танысты. Республикалық маңызы бар «Қызылорда-Жезқазған» жолының жалпы ұзындығы – 424 шақырым, ал Қызылорда облысының аумағындағы бөлігі – 216 шақырым. Қазір құрылыс жұмыстары 65 % аяқталып, жыл соңына дейін 140 шақырым жолды пайдалануға беру жоспарланған. Негізі аталған автомобиль жолының құрылыс кезеңі 2022-2026 жылдар аралығын қамтиды.Марат Қарабаев «Қызылорда-Жезқазған» автожолын қайта жаңғырту республикалық маңызы бар жоба екенін, құрылысты сапалы жүргізудің маңызын атап өтті.<img src="https://knadmin.beoblood.kz/uploads/5_b98557ec3c.jpg" alt="5.jpg"><img src="https://knadmin.beoblood.kz/uploads/6_088a555559.jpg" alt="6.jpg"><img src="https://knadmin.beoblood.kz/uploads/7_cf5c71da0a.jpg" alt="7.jpg"><img src="https://knadmin.beoblood.kz/uploads/8_47bd72994d.jpg" alt="8.jpg"><img src="https://knadmin.beoblood.kz/uploads/9_71e4e826aa.jpg" alt="9.jpg">Фото: Қызылорда облысы әкімінің баспасөз қызметі

Қазақстан және Қызылорда облысының жаңалықтары