<a href="https://kyzylorda-news.kz/">Kyzylorda-news.kz</a> &nbsp;Қазалы ауданының әкімі Алмасбек Есмаханов Әйтеке би кенті мен Қожабақы ауылында салынып жатқан спорт кешендерін көрді. Қазіргі таңда екі нысанның да негізгі құрылыс жұмыстары толықтай аяқталып, кешендерді пайдалануға беруге дайындық жұмыстары жүргізілуде.«Ауыл – Ел бесігі» бағдарламасы аясында жүзеге асырылып жатқан жобалардың бірі – Әйтеке би кентіндегі Қазалы мәдени-демалыс кешені аумағында бой көтерген спорт кешені. Құны 628 млн теңгені құрайтын нысанның құрылысын «Болашақ» ЖШС мердігер мекемесі жүргізуде. Ал Қожабақы ауылындағы құны 537,1 млн теңгені құрайтын спорт кешенінің құрылысын «Намыс-Құрылыс» ЖШС жүзеге асыруда.<img src="https://knadmin.beoblood.kz/uploads/737046181_941194618933097_8960912085689978450_n_17835cce41.jpg" alt="737046181_941194618933097_8960912085689978450_n.jpg">Қазіргі таңда екі кешеннің құрылыс жұмыстары аяқталып, нысан аумақтарын абаттандыру, ішкі сыртқы әрлеу мен тазалық жұмыстары жүргізілуде.Нысандарды аралау барысында аудан әкімі құрылыс сапасына ерекше назар аударып, барлық жұмыстардың талапқа сай әрі сапалы орындалуы керектігін атап өтті. Мердігер мекемелер мен құрылысқа жауапты сала басшыларына бірқатар кемшіліктерді атап көрсетіп, анықталған кемшіліктерді шұғыл түрде қалпына келтіріп, кешендерді ел игілігіне сапалы әрі мерзімінде беру қажеттігін ескертті.Айта кетейік, аталған екі спорт кешенінен бөлек, биыл жыл басында «Ауыл – Ел бесігі» бағдарламасы аясында Бекарыстан би ауылында да осындай заманауи спорт кешені пайдалануға беріліп, ауыл тұрғындарының игілігіне табысталған болатын.

Қазалы ауданында жуық арада екі спорт кешені пайдалануға берілмек

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаев, Қорқыт ата атындағы Қызылорда университетінің Басқарма төрағасы-ректор Наурызбай Байқадамовтың қатысуымен Қорқыт ата атындағы Қызылорда университетінің магистратура бағдарламасын тәмамдаған түлектерге диплом табыстау рәсімі өтті.Жаңа Конституцияның қолданысқа енуі аясында өткен магистранттармен кездесуде Мұрат Нәлқожаұлы білімді, бәсекеге қабілетті ұрпақ тәрбиелеудің маңызына тоқталды.Диплом иегерлері білімі мен кәсіби біліктілігін ел игілігіне бағыттап, қоғам дамуына үлес қосатынына сенім білдірді.Өңірдегі жоғары білім мен ғылымның қарашаңырағы саналатын оқу орнын биыл 2600-ден астам түлек бітірді.<blockquote>«Еліміздің ертеңі мен тірегі – Сіздер секілді жалынды жастарға үлкен жауапкершілік жүктеледі. Әділетті Қазақстанды құрудың басты қозғаушы күші де, оның жаңа белестерін бағындыратын жасампаз қуаты да – өздеріңіз. Президентіміз Қасым-Жомарт Кемелұлы: «Біздің басты стратегиялық мақсатымыз – жоғары конституциялық қағидаттарды іске асыра алатын білімді, дені сау, зияткер әрі озық ойлы ұрпақ тәрбиелеу» деген болатын.Сіздер жастық жігерді Тәуелсіздігіміздің тұғырын одан әрі биіктете түсуге жұмсайтындарыңызға сенемін. Бүгінде облысымызда жаңа өндіріс орындары ашылуда, цифрландыру үдерісі жедел енгізіліп, әлеуметтік сала жаңғыртылып жатыр. Жаһандану дәуірінде креативті, жаңашыл әрі тың көзқарасы бар мамандар аса қажет.Баласының бағын тілеген ата-ананың қуанышында шек жоқ екенін көріп тұрмын. Сіздерге көп рақмет! Ал шәкіртін шыңға шығарған профессор-оқытушыларға аймақ халқының атынан ерекше алғысымды білдіремін. Сіздер облысымыздың басты байлығы – адами капиталды қалыптастырып келесіздер.Бойларыңыздағы білім мен өнегені Отанымыз – Қазақстанның, туған жеріміз – Сыр өңірінің игілігіне жұмсай беріңіздер», – деді Мұрат Нәлқожаұлы.</blockquote>Тоқсан жылға жуық тарихы бар университет озық идеялардың жаршысы ретінде ғылымға инновациялық жаңашылдықтарды енгізіп, бәсекеге қабілетті маман даярлау бағытындағы жұмысын табысты жалғастырып келеді.«Қазақстан Республикасы жоғары оқу орындары сұранысының тәуелсіз рейтингі – 2026» қорытындысыменеліміздегі көпсалалы жоғары оқу орындары арасында 7-орынға ие болды.Оқу орнының 31 білім беру бағдарламасы республикадағы үздік үштік қатарынан көрінді.Айта кетейік, биыл университеттің бакалавриат бағдарламасын 630, ал магистратура бағдарламасын 79 түлек тәмамдады.Фото: Қызылорда облысы әкімінің баспасөз қызметі

Магистратура түлектеріне диплом табысталды

<a href="https://kyzylorda-news.kz/">Kyzylorda-news.kz</a> Асқазан-ішек жолы ауруларын анықтаудың ең ақпараттық әдістерінің бірі&nbsp;- фиброгастродуоденоскопия (ФГДС). Бүгінде бұл зерттеуден «МедАрт» клиникасында міндетті әлеуметтік медициналық сақтандыру жүйесі аясында ауыртпалықсыз өтуге болады.Медициналық орталықта мұрын қуысы немесе ауыз арқылы енгізілетін диаметрі небәрі 4,2 мм болатын өте жұқа зонды бар заманауи жапон эндоскопы қолданылады. Құрылғының жұқалығының арқасында тексеру барынша жайлы өтеді. Пациенттерде құсу рефлексі мен тамақтағы жағымсыз сезімдер болмайды.<blockquote>«Эндоскоп мұрын-жұтқыншақ арқылы ешқандай жайсыздық тудырмай оңай өтеді. Тексеру барысында асқазанның жағдайын қарады, полиптің өскені анықталды. Диагностикалық тексеруге жергілікті емхана жолдады, енді емімді жалғастырамын. МӘМС аясында қажетті медициналық қызметтерді уақытылы алуға мүмкіндік бар», — деді Қызылорда қаласының тұрғыны Сауле Оспанова.</blockquote>Процедура бірнеше минутты алады. Осы уақыт ішінде мамандар өңеш пен асқазанның шырышты қабатының жағдайын бағалайды және қажет болған жағдайда әрі қарай гистологиялық зерттеу үшін тіндерден сынама алынады.<blockquote>«ФГДС NBI - тар жолақты бейнелеу технологиясын қолдану арқылы жүзеге асырылады. Бұл жағдайда шырышты қабаттағы қан тамырлары мен капиллярлардың контрастылығын арттыратын көк және жасыл түсті жарық қолданылады.&nbsp;Мұндай&nbsp;әдіс тіпті&nbsp;кішігірім өзгерістерді, соның ішінде&nbsp;қатерлі ісікке дейінгі&nbsp;жағдайларды анықтауға мүмкіндік береді. Заманауи диагностикалық әдістердің арқасында&nbsp;әртүрлі патологияларды анықтау көрсеткіші айтарлықтай артты. Бұл МӘМС жүйесінің тиімділігін көрсететін мысалдардың бірі», - деді «Клиники МедАрт» ЖШС директоры, дәрігер-гастроэнтеролог Бақыт Калиев.</blockquote>Клиника мамандары күн сайын шамамен 30 пациент қабылдайды. Ағымдағы жылы Әлеуметтік медициналық сақтандыру қорымен жасалған&nbsp;шарт аясында медициналық ұйымға халыққа қызмет көрсету үшін шамамен 33 миллион теңге бөлінді.

МӘМС аясында ауыртпалықсыз эндоскопия 

<a href="https://kyzylorda-news.kz/">Kyzylorda-news.kz</a> Жаңақорған аудандық пробация қызметінің есебінде тұрған азаматтарды қоғамға бейімдеу, олардың бос уақытын тиімді пайдалануына жағдай жасау мақсатында Жаңақорған ауданының денн тәрбиесі, спорт және туризм бөлімінің ұйымдастыруымен &nbsp;дойбы ойынынан жарыс ұйымдастырылды.&nbsp;Шараның негізгі мақсаты – спорттық ойындар арқылы азаматтарды салауатты өмір салтына баулу, қоғамдық ортаға бейімдеу және бір-бірімен тығыз қарым-қатынас орнатуға ықпал ету болды.Тартысты өткен сайыс қорытындысында жүлделі орын иеленген азаматтарға алғысхаттар табысталып, естелік сыйлықтар берілді. Жеңімпаздар өз қуанышымен бөлісіп, ұйымдастырушыларға алғыстарын білдірді.&nbsp;<blockquote>- Ұйымдастырылған шара көңілімізді сергітіп, жақсы әсер қалдырды. Дойбы ойыны арқылы бір-бірімізбен әңгімелесіп, уақытты тиімді өткіздік. Осындай іс-шаралар бізге қоғамға жақындай түсуге, өзімізді пайдалы іспен айналысуға мүмкіндік береді. Ұйымдастырушыларға алғысымыз шексіз, – деді жарысқа қатысқан сотталған азамат.</blockquote>

 Жаңақорған ауданында пробация есебіндегі азаматтар арасында дойбыдан жарыс өтті

<a href="https://kyzylorda-news.kz/">Kyzylorda-news.kz</a> Халықаралық World Impact Media Organization (WIMO) ұйымының Reuters ақпарат агенттігінің сайтында жарияланған талдамалық есебінде Қазақстанның неғұрлым тұрақты әрі әртараптандырылған өсім көрсетіп отырғаны, инвестициялық тартымдылығын нығайтып, экономиканың шикізаттық факторларға тәуелділігін біртіндеп азайтып келе жатқаны атап өтіледі.Авторлар бұл нәтижелердің әлемдік экономикадағы тұрақсыздық жағдайында – жаһандық өсімнің баяулауы, нарықтардың құбылмалылығы, сауда ағындарының өзгеруі және инвестициялар үшін бәсекелестіктің күшеюі аясында ерекше маңызды екенін көрсетеді. WIMO бағалауынша, осы жағдайларда Қазақстан даму қарқынының салыстырмалы түрде тұрақтылығын сақтап отыр.Материалда негізгі экономикалық көрсеткіштер келтірілген: 2025 жылдың қорытындысы бойынша Қазақстанның жалпы ішкі өнімі (ЖІӨ) 6,5%-ға өсті, ал 2026 жылдың алғашқы бес айында экономика 3,7%-ға ұлғайды. Нақты сектор 4%-ға, қызмет көрсету саласы 3,6%-ға өсті. Экономикалық өсім кең ауқымды сипатқа ие: құрылыс 13,4%-ға, өңдеу өнеркәсібі 9%-ға, көлік және қоймалау саласы 8,4%-ға, сауда 5,6%-ға өсті.Материалда инвестицияларға ерекше назар аударылған. Онда келтірілген мәліметтерге сәйкес, 2025 жылы Қазақстанға тартылған тікелей шетелдік инвестициялар көлемі 20,5 млрд АҚШ долларына жетіп, бір жыл ішінде 14,4%-ға артқан. Сонымен қатар инвестициялық ағындар барған сайын әртараптандырылып, өндіруші сектор шеңберінен шығып келеді. Сондай-ақ 2025 жылы *greenfield* жобаларына салынған инвестициялар көлемі 19 млрд АҚШ долларын құрап, бұл Орталық Азиядағы осындай инвестициялардың шамамен 89%-ына сәйкес келгені атап өтіледі.WIMO бұл көрсеткіштер Қазақстан экономикасындағы айқын өзгерісті көрсететінін атап өтеді: елдің өсімі барған сайын тек шикізат тауарларына емес, инвестицияларға, өнеркәсіпке және заманауи қызмет көрсету салаларына негізделіп келеді.Материалда сондай-ақ болжамды әрі тұрақты инвестициялық ортаны қалыптастыруға бағытталған реформалардың рөліне ерекше мән берілген. Олардың қатарында 2030 жылға дейінгі жаңартылған Инвестициялық саясат тұжырымдамасы, Инвестициялық штаб тетігі, Ұлттық цифрлық инвестициялық платформа, арнайы экономикалық және индустриялық аймақтар, сондай-ақ ағылшын жалпы құқығы қағидаттары негізінде жұмыс істейтін «Астана» халықаралық қаржы орталығының мүмкіндіктері аталған.World Impact Media Organization бағалауынша, осы шаралардың жиынтығы инвесторлар үшін тәуекелдерді төмендетіп, рәсімдердің ашықтығын арттырады және ұзақ мерзімді инвестициялар үшін қолайлы жағдай қалыптастырады. Сонымен қатар Қазақстан Сингапур, Катар, Қытай және Сауд Арабиясы сияқты негізгі серіктестерімен инвестицияларды өзара қорғау туралы келісімдер желісін кеңейтіп жатқаны да атап өтіледі.Экономиканы әртараптандыру мәселесіне ерекше назар аударылған. Өңдеу өнеркәсібіне, ауыл шаруашылығына, азық-түлік өндірісіне, энергетикаға, көлік саласына және цифрлық инфрақұрылымға салынатын инвестициялар жаңа экономикалық өсім моделінің негізі ретінде қарастырылады. Атап айтқанда, ауыл шаруашылығына инвестициялардың артуы, тамақ өнеркәсібінің дамуы, энергетикалық инфрақұрылымның жаңғыртылуы және жаңартылатын энергия көздері саласындағы жобалардың кеңеюі көрсетілген.Осылайша, халықаралық сарапшылар маңызды үрдісті атап өтеді: Қазақстан біртіндеп инвестициялар, өнеркәсіп, логистика, агроөнеркәсіптік кешен және заманауи қызмет көрсету салалары шешуші рөл атқаратын неғұрлым тұрақты даму моделіне көшіп келеді. Бұл еліміздің халықаралық бизнес үшін сенімді әрі болжамды серіктес ретіндегі ұстанымын нығайта түседі.Дереккөз:<a href="https://www.reuters.com/press-releases/world-impact-media-report-kazakhstan-economy-broadens-beyond-oil-2026-07-01/"> https://www.reuters.com/press-releases/world-impact-media-report-kazakhstan-economy-broadens-beyond-oil-2026-07-01/</a>

Халықаралық БАҚ жаһандық экономикалық баяулау жағдайында Қазақстан экономикасының тұрақтылығын атап өтті

<a href="https://kyzylorda-news.kz/">Kyzylorda-news.kz</a> Т.Жүргенов атындағы шығармашылық үйінде жыл сайын дәстүрлі түрде ұйымдастырылатын Қазақстан Журналистер одағына мүшелікке қабылдау рәсімі өтті.Іс-шараға облыстық «Сыр медиа» ЖШС бас директоры Марат Аралбаев, Қазақстан Журналистер одағы облыстық филиалының төрағасы, облыстық «Сыр бойы» газетінің бас редакторы Қуат Шарабидинов, облыстық «Кызылординские вести» газетінің бас редакторы Бота Ажарбаева, республикалық тәуелсіз қоғамдық-саяси «Ақмешіт ақшамы» газетінің бас редакторы Сәрсенкүл Биқожа, республикалық қоғамдық-әлеуметтік «Ұстаз мәртебесі» газетінің бас редакторы Нұрлан Көбегенұлы және «Казахстанская правда» газетінің Қызылорда облысындағы меншікті тілшісі Әлібек Байшүленов қатысты.Салтанатты жиында журналистика саласының ардагерлері мен белсенді өкілдері құрметке бөленіп, Одақ қатары жаңа мүшелермен толықты.Жиында Қазақстан Журналистер одағының төрағасы Қуат Шарабидинов сөз сөйлеп, кәсіби мереке қарсаңында Одақ қатарына қабылданып жатқан жаңа толқынды құттықтады. Ол журналистикадағы буын сабақтастығының маңызын атап өтіп, шығармашылық ортаға қосылған әрбір жаңа мүшеге сәттілік тіледі.<blockquote>– Жылдағы дәстүрге айналған іс-шара биыл да өз жалғасын тапты. Қалам ұстап, қасиетті мамандықтың бел ортасында жүрген жандарды мүшелікке қабылдап отырмыз. Еңбектеріңіз еленіп, абырой биігінен көрінулеріңізге тілектеспін, – деді облыстық филиал төрағасы.</blockquote>Өз сөзінде Қуат Шарабидинов Қазақстан Журналистер одағының «Алтын медалі» осыдан екі жыл бұрын тағайындалғанын атап өтті. Оның айтуынша, марапат қоғамға адал қызмет етіп, кәсібилігімен және азаматтық ұстанымымен ерекшеленген түрлі саланың үздік өкілдеріне табысталады. Алғашқы жылы марапат денсаулық сақтау саласының үздігіне берілді.Биылғы «Алтын медаль» Қызылорда қаласы Төтенше жағдайлар басқармасының №4 өрт сөндіру бөлімінің бастығы, ІІІ дәрежелі «Мінсіз қызметі үшін» медалінің иегері Фархад Миранбекұлы Тажиевке табысталды. Ол 2004 жылы Тасбөгет кентінде болған өрт кезінде бір ересек адам мен үш жасөспірім баланы құтқарып, ерлік танытқан.Салтанатты жиында Қазақстан Журналистер одағының Құрмет грамотасымен ардагер журналист Төлепберген Бектұрғанұлы, Қорқыт ата атындағы Қызылорда университетінің баспасөз хатшысы Қамбар Ғалымұлы Бекенов және «Халық» газетінің бас редакторының орынбасары – жауапты хатшысы Рыскелді Сәрсенұлы Жахман марапатталды.Сонымен қатар Қазақстан Журналистер одағының қатарына Жібек Баймұратова, Үмбеталы Абибуллаев, Жанар Қайназарова, Сәкен Қабылов, Құралай Жақсылық, Қымбатгүл Бердеш, Айнұр Әлімбаева, Айнұр Назарова, Айсұлу Алданазарова, Малика Тұрғантай, Төребек Төремұратов, Назым Қараева, Гүлдана Жұмадинова және Перизат Захрадин қабылданды.Салтанатты рәсім соңында марапат иелері мен жаңадан қабылданған мүшелерге Қазақстан журналистикасының дамуына қосар үлестері үшін алғыс айтып, шығармашылық табыс пен толайым жетістік тіледі.<img src="https://knadmin.beoblood.kz/uploads/Zhurnalister_oda_y_2_8f7783318d.jpg" alt="Журналистер одағы 2.jpg">

Қазақстан Журналистер одағы жаңа құраммен толықты

<a href="https://kyzylorda-news.kz/">Kyzylorda-news.kz</a> «Әділет» партиясының облыстық филиалында конференция өтіп, оның қорытындысы бойынша филиал басшысы, Саяси кеңес пен Бақылау-тексеру комиссиясының мүшелері сайланды.Күн тәртібіндегі негізгі мәселелердің бірі Қазақстан Республикасының Президенті Қасым-Жомарт Тоқаевтың «Жаңа Конституция – Жаңа Дәуір» атты үндеуін қолдау болды. Сондай-ақ конференция барысында партияның облыстық филиалының басшылық органдарын қалыптастыру мәселелері қаралды.<img src="https://knadmin.beoblood.kz/uploads/dilet_partiyasyny_yzylorda_oblysty_filialynda_basshyly_organdar_alyptastyryldy_43b058c880.jpg" alt="«Әділет» партиясының Қызылорда облыстық филиалында басшылық органдар қалыптастырылды.jpg">Ашық дауыс беру нәтижесінде облыстық филиалдың басшысы болып мемлекеттік және қоғамдық-саяси салада көп жылдық тәжірибесі бар Жандос Базартай сайланды. Жаңа қызметінде ол облыстық филиалдың жұмысын үйлестіріп, партияның бағдарламалық мақсаттарының жүзеге асырылуын қамтамасыз етеді және өңір тұрғындарымен өзара байланысты нығайту бағытында жұмыс жүргізеді.Өз кезегінде Жандос Базартай өзіне көрсетілген сенім үшін алғыс айтып, партияның бағдарламалық мақсаттары мен міндеттерін өңірде сапалы іске асыруға, халықтың өзекті мәселелерін шешуге белсенді атсалысуға, азаматтардың құқықтары мен заңды мүдделерін қорғауға және қоғаммен ашық, сындарлы әрі нәтижелі диалог орнатуға күш-жігерін жұмсайтынын жеткізді.Алқалы жиында партияның Қызылорда облыстық филиалының Саяси кеңесінің және Бақылау-тексеру комиссиясының жаңа құрамы сайланды. Саяси кеңестің құрамына кәсіпкерлік, білім беру, ғылым, &nbsp;мәдениет, спорт, өнеркәсіп, үкіметтік емес сектор, жастар ұйымдары, бұқаралық ақпарат құралдары және өңірдің экономикасы мен қоғамдық өмірінің түрлі салаларын танытатын өкілдер енді.Бақылау-тексеру комиссиясының құрамына экономика, қаржы және құқық салаларында тәжірибесі бар мамандар сайланды.<img src="https://knadmin.beoblood.kz/uploads/dilet_partiyasyny_yzylorda_oblysty_filialynda_basshyly_organdar_alyptastyryldy2_4e76081d8a.jpg" alt="«Әділет» партиясының Қызылорда облыстық филиалында басшылық органдар қалыптастырылды2.jpg">Осылайша, партияның облыстық филиалының басшылық органдарын қалыптастырудың ұйымдастыру кезеңі аяқталды. Алдағы уақытта филиал өңір тұрғындарымен жүйелі жұмыс жүргізуге, партиялық бастамаларды іске асыруға, сондай-ақ сарапшылар қауымдастығымен, кәсіпкерлермен және қоғамдық бірлестіктермен өзара ынтымақтастықты дамытуға кіріседі.

«Әділет» партиясының Қызылорда  облыстық филиалында басшылық органдар қалыптастырылды

<a href="https://kyzylorda-news.kz/">Kyzylorda-news.kz</a> Президент Қасым-Жомарт Тоқаев еліміз ұдайы орнықты даму бағдарын ұстанып келе жатқанын атап өтті. Сонымен қатар ең әуелгі міндет экономиканы және саяси бағытты жаңа талаптарға дер кезінде бейімдеу екеніне тоқталды.&nbsp;<blockquote>– Сыртқы конъюнктураның қолайсыздығына қарамастан, Қазақстан экономикасы былтыр 6,5 пайызға өсті. Елдегі ішкі жалпы өнім көлемі 300 миллиард долларлық межеден асты. Инвестиция тарту көрсеткіші бойынша еліміз Орталық Азиядағы көшбасшылығын сақтауды көздейді. Тікелей шетелдік инвестицияның жиынтық көлемі 150 миллиард доллардан асып, аймаққа құйылған барлық қаржының шамамен 70 пайызын құрады.Осы экономикалық табыстарға негізінен саяси тұрақтылықтың арқасында қол жеткізіп отырмыз. Жалпыұлттық тарихи референдумның қорытындысы бойынша Қазақстан Республикасының жаңа Конституциясын қабылдадық, бұл құжат қазірдің өзінде халықтық Конституция ретінде танылды. Негізгі заңның бүгінгі отырыс қарсаңында күшіне енуі символдық мәнге ие. Жаңартылған конституциялық нормалар инвесторлар құқығын барынша жоғары деңгейде қорғайды, – деді Мемлекет басшысы.</blockquote>Президент халықаралық бизнес үшін тартымды заманауи институционалдық орта қалыптасқанына назар аударды.&nbsp;Сондай-ақ инвестициялық рәсімдерді жеңілдету үшін «бір терезе» қағидатына сай қызмет көрсететін Ұлттық цифрлық инвестициялық платформа іске қосылды.&nbsp;<blockquote>– Инвестициялық штаб қызметі жедел шешім қабылдауға және инвесторларға мемлекет тарапынан жан-жақты қолдау көрсетуге бағытталған. Бизнеске институционалдық кепілдіктермен бірге ұзақмерзімді нақты ынталандыру тетіктерін ұсынамыз. Бүгінде шетелдік кәсіпкерлер салықтық жеңілдіктер мен оңайлатылған көші-қон рәсімдері қарастырылған Altyn visa бағдарламасының артықшылығын пайдалана алады. Дегенмен біз мұнымен ғана шектелмейміз. Алдымызда ауқымды жұмыс бар, – деді Қасым-Жомарт Тоқаев.</blockquote>t.me/aqorda_resmi

Мемлекет басшысы Шетелдік инвесторлар кеңесінің 38-ші пленарлық отырысын өткізді

<a href="https://kyzylorda-news.kz/">Kyzylorda-news.kz</a> Бүгін облыс әкімі Мұрат Ергешбаев «Сыр жұлдыздары» шығармашылық-инновациялық академиясында өңір жастарымен еркін форматтағы кездесу өткізді. Онда жастар саясатын дамыту, білім беру жүйесін жетілдіру, кәсіпкерлікті, жастардың қоғамдық бастамаларын қолдау және өңірді әлеуметтік-экономикалық тұрғыдан дамытудағы кейінгі буынның рөлі кеңінен талқыланды.Аймақ басшысы елдегі саяси реформалардың маңызына тоқталып, жаңа Конституцияның қабылдануы жаңа кезеңнің бастауы екенін атап өтті.<blockquote>«Бұл – әділетті қоғам құруға және болашаққа деген сенімді нығайтуға бағытталған тарихи шешім. Мемлекет басшысы Қасым-Жомарт Кемелұлы атап өткендей, Әділетті Қазақстанды құруда білімді, отаншыл жастардың рөлі айрықша. Сондықтан жастардың сапалы білім алып, еңбек етуіне, кәсіп бастауына және жан-жақты дамуына мемлекет жүйелі қолдау көрсетіп отыр. Биыл жастар саясатын іске асыруға жергілікті бюджеттен 2 млрд теңге бөлінді.Мемлекет басшысы айқындаған «Заң мен тәртіп», «Адал азамат» және «Таза Қазақстан» бастамаларын жүзеге асыруда жастардың белсенділігі мен қоғамдық жауапкершілігі ерекше маңызды», – деді Мұрат Нәлқожаұлы.</blockquote>Еркін пікір алмасу кезінде жастар ұсыныс-пікірлерін ортаға салды. «Сыр жастары» бағдарламасының қатысушысы, жас журналист Арайлым Шакизадаева, «Global Motors» Қызылорда автосалонының директоры Олжас Балтақожа, «Kyzylorda Hub» бизнес-инкубаторының директоры Жанарыс Түбекбаев, блогер Нұржан Сейтмұрат, облыстық «GAMMA MMA» федерациясының төрағасы Бейбітжан Қобланов және «Анаға тағзым» орталығының әдіскері Ақбота Шамшиева сөз сөйледі.Облыс әкімі барлық ұсыныстар жан-жақты қаралатынын, жастар бастамаларын қолдау жүйелі жалғасатынын жеткізді. Сонымен қатар жастарды өңірдің әлеуметтік-экономикалық дамуына бағытталған жобаларды іске асыруға белсенді қатысуға шақырды.Статистикалық мәліметтерге қарағанда, өткен жылы облыста 14 пен 35 аралығындағы 248 279 жас есепке алынған, бұл – жалпы халықтың 29,4%-ы. «Мемлекеттік жастар саясатының 2023-2029 жылдарға арналған тұжырымдамасы» аясында жүйелі жұмыс орындалуда.Ақпараттық-талдау орталығы жылына екі рет аймақ жастары арасындағы ахуалға зерттеу жүргізіп, қорытындысы бойынша мүдделі органдарға ұсыныстар береді. Ұсыныстар қатарында тұрғын үйге қолжетімділікті арттыру, жастардың бос уақытын тиімді ұйымдастыру, кәсіби бағдарлау бар.Жастарды еңбекке баулу мақсатында құрылған еңбек бригадаларының саны 30-дан асып, құрамына 800-ден астам адам тіркелді. Еңбек жасағына әлеуметтік аз қамтылған отбасылардан шыққан, NEET санатындағы жастар да тартылды.Облыстық жастар ресурстық орталығы жанында 6 үйірме мен клубтар бар. «Оқушылар сарайы», «Теннис орталығы», «Сыр жұлдыздары» шығармашылық-инновациялық академиясы, «Анаға тағзым», «Отбасы орталығы», барлық аудандағы «Руханият орталықтарында» жастардың бос уақытын тиімді өткізуіне жағдай жасалған.<img src="https://knadmin.beoblood.kz/uploads/Erkin_formatta_y_kezdesude_zhastar_sayasatyny_basym_ba_yttary_tal_ylandy2_031eac57c7.jpg" alt="Еркін форматтағы кездесуде жастар саясатының басым бағыттары талқыланды2.jpg">Өңір жастарын қолжетімді баспанамен қамтамасыз ету және жас отбасыларды қолдау мақсатында Нұрлыбек Машбекұлының бастамасымен «Сыр жастары» жеңілдетілген ипотекалық несие беру бағдарламасы қабылданған. Бағдарлама бойынша 35 жастан аспаған, Қызылорда облысында тұрақты тіркеуі бар жастар жылдық 6% пайыздық мөлшерлемемен, үй бағасының 10% жарнасын жинап үй ала алады. Бюджеттік ұйымдар, мәдениет және спорт, ауыл шаруашылығы, төтенше жағдай, тұрғын-үй коммуналдық шаруашылық саласында, жоғары оқу орындары мен ҒЗИ, ұлттық холдингтер мен ұлттық компаниялар, екінші деңгейдегі банк филиалдарында жұмыс істейтін қызметкерлер, журналистер, кәсіпкерлерге оңтайлы мүмкіндік ұсынылған.Еске салсақ, 2024 жылы 798 адам құжат тапсырып, жолдама алған 471-інің 100-і төлем қабілеттін растап, үш бөлмелі пәтер иесі атанды. Өткен жылы 691 адам құжат тапсырып, оның 453-нің құжаты қабылданып, 300 жасқа «Отбасы банк» АҚ-нан жолдама берілді. Төлем қабілетін сәтті растаған жастар сол жағалаудағы көпқабатты тұрғын үйден пәтер алды.Мемлекет басшысының бастамасымен 2026 жылды БҰҰ Бас Ассамблеясы «Орнықты даму жолында Халықаралық еріктілер жылы» деп жариялады. Соған сәйкес халықаралық және республикалық деңгейдегі екі ауқымды шара өтеді.<img src="https://knadmin.beoblood.kz/uploads/Erkin_formatta_y_kezdesude_zhastar_sayasatyny_basym_ba_yttary_tal_ylandy3_9d0c87fb94.jpg" alt="Еркін форматтағы кездесуде жастар саясатының басым бағыттары талқыланды3.jpg">Тамыз айындағы республикалық волонтерлер слеті жастар мен еріктілердің тәжірибе алмасуына, жаңа бастамаларды талқылауға және қоғам игілігіне арналған жобаларды дамытуға арналады. Сондай-ақ, «Менің мамандығым – менің жетістігім» тақырыбында республикалық жас мамандар форумын өткізу жоспарланған.<img src="https://knadmin.beoblood.kz/uploads/Erkin_formatta_y_kezdesude_zhastar_sayasatyny_basym_ba_yttary_tal_ylandy1_7a6c74d78a.jpg" alt="Еркін форматтағы кездесуде жастар саясатының басым бағыттары талқыланды1.jpg">Қазан айында халықаралық «Green Aral: Volunteers for Life» халықаралық еріктілер апталығы аясында Арал маңы табиғатын қалпына келтіру және экологиялық мәселелерді шешуге бағытталған жобалар іске асырылады.Фото: Қызылорда облысы әкімінің баспасөз қызметі

Еркін форматтағы кездесуде жастар саясатының басым бағыттары талқыланды

<a href="https://kyzylorda-news.kz/">Kyzylorda-news.kz</a> Бүгін облыс әкімі Мұрат Ергешбаев «Alpecon Group» компаниясы өкілдері Самат Балабеков, Ержан Ибраимов, Нармұхан Сарыбаевпен кездесті. Кездесуде инвестициялық жобаларды жүзеге асыру мәселесі талқыланды.<blockquote>«Бүгінде өңірде ауыл шаруашылығы өнімдерін терең өңдеуге басымдық беріліп отыр. Осы ретте қызанақ пастасы зауыты жобасын Жаңақорған ауданында жүзеге асыру ниетіңізді қолдаймыз.Бұл өнімге қосылған құн қалыптастырып қана қоймай, көкөніс шаруашылығының дамуына, егіс алқаптарының ұлғаюына мүмкіндік береді. Қажетті жер учаскесін ұсынуға, барлық кезеңде әкімшілік және инфрақұрылымдық сүйемелдеуге дайынбыз. Өңіріміз үшін стратегиялық маңызы бар инвестициялық бастамаға жан-жақты қолдау көрсетіледі», – деді Мұрат Нәлқожаұлы.</blockquote>Қазір инвесторлар Жаңақорған ауданының Бесарық ауылындағы «ATMO AGRO» ЖШС-ның зауытын сатып алып, оның базасында қызанақ пастасын шығаруға қызығушылық танытып отыр. 2,3 млрд теңге инвестиция құйып, технологиялық жабдықтарды жаңғырту, өндірістік және қосалқы нысандарды жөндеу, арнайы техника сатып алу жоспарланған. Бұл тәулігіне 600 тоннаға дейін қызанақ өңдеуге жол ашады. Шикізатпен тұрақты қамтамасыз ету үшін 2 300 гектар суармалы егіс алқабын игеру, көршілес Түркістан облысынан сатып алу да көзделіп отыр.Фото: Қызылорда облысы әкімінің баспасөз қызметі&nbsp;

Қызанақ пастасы зауытының жобасы талқыланды

<a href="https://kyzylorda-news.kz/">Kyzylorda-news.kz</a> Еліміздің біраз өңірлерінде жүргізілген ауқымды реконструкциядан кейін 30 теміржол вокзалы мен жолаушылар инфрақұрылымы нысандары пайдалануға берілді. Жұмыстар Мемлекет басшысының көлік инфрақұрылымын дамыту және жолаушылар тасымалының сапасын арттыру жөніндегі тапсырмаларын іске асыру аясында жүргізілді.Жаңғырту соңғы жылдардағы теміржол вокзалдарын жаңартудың ең ірі жобасы болды. Реконструкция нәтижесінде жолаушыларға арналған жағдайлар айтарлықтай жақсарды, қауіпсіздік пен жайлылық деңгейі артты, нысандардың өткізу қабілеті ұлғайды, сондай-ақ теміржол саласы қызметкерлері үшін заманауи еңбек жағдайлары жасалды.<img src="https://knadmin.beoblood.kz/uploads/aza_standa_zha_yrtudan_kejin_30_temirzhol_vokzaly_ashyldy_71b355e8d0.jpg" alt="Қазақстанда жаңғыртудан кейін 30 теміржол вокзалы ашылды.jpg">Жұмыстар барысында ғимараттардың қасбеттері мен шатырлары жаңартылды, энергия үнемдейтін витраждар орнатылды, жылу жүйелері, сумен жабдықтау, желдету, ауаны баптау, өрт қауіпсіздігі және бейнебақылау жүйелері жаңғыртылды. Құрылыс және реконструкция кезінде негізінен отандық өндірістің материалдары пайдаланылды.Ерекше назар кедергісіз орта қалыптастыруға аударылды. Вокзалдарда пандустар, лифтілер, бейімделген кіреберіс аймақтары мен санитарлық бөлмелер, тактильді жолақтар және арнайы касса аймақтары жабдықталды. Нысан санатына қарай ана мен бала бөлмелері, медициналық пункттер, сақтау камералары қарастырылып, жолаушылар ағынын тиімді ұйымдастыру үшін үй-жайлар қайта жоспарланды.Кешенді жаңғырту тек вокзал ғимараттарын ғана емес, сонымен қатар жолаушылар платформаларын, вокзал маңындағы алаңдарды және инженерлік инфрақұрылымды да қамтыды. Барлық нысандар заманауи қауіпсіздік талаптарына, санитарлық нормаларға және қызмет көрсету стандарттарына сәйкестендірілді.Елдегі теміржол вокзалдарының басым бөлігі 1950–1970 жылдары салынған, ал кейбір ғимараттар 80–100 жылдан астам уақыт бойы пайдаланылып келеді. Нысандардың шамамен 70 пайызы ондаған жылдар бойы күрделі жөндеуден өтпеген.Өңірлер бойынша реконструкциядан кейін келесі вокзалдар ашылды:&nbsp;Абай облысы — Ауыл және Белағаш станцияларының вокзалдары; &nbsp;Ақмола облысы — Курорт-Бурабай, Шортанды, Макинка және Ақкөл; &nbsp;Атырау облысы — Ганюшкино және Аққыстау; &nbsp;Батыс Қазақстан облысы — Семиглавый Мар, Қазақстан және Шыңғырлау; &nbsp;Қарағанды облысы — Қарағанды-Сортировочная, Жаңа Қарағанды және Нұра, сондай-ақ Қарағанды-Сортировочная станциясының жолаушылар платформасы жаңартылды; &nbsp;Қостанай облысы — Аманқарағай және Құсмұрын; &nbsp;Қызылорда облысы — Жаңақорған, Қазалы,Шиелі және Талап станциясының платформасы; &nbsp;Алматы облысы — Қонаев және Шамалған; &nbsp;Жетісу облысы — Талдықорған; &nbsp;Солтүстік Қазақстан облысы — Тайынша, Жаңаесіл және Саумалкөл; &nbsp;Шығыс Қазақстан облысы — Риддер және Шемонаиха; &nbsp;Павлодар облысы – Бозшакөл платформасы.Көлік министрлігі еліміздің барлық өңірлерінде жолаушылар инфрақұрылымын кезең-кезеңімен жаңартуды және азаматтар үшін заманауи, қауіпсіз және жайлы жағдай жасау жұмыстарын жалғастырады.

Қазақстанда жаңғыртудан кейін 30 теміржол вокзалы ашылды

<a href="https://kyzylorda-news.kz/">Kyzylorda-news.kz</a> 1 шілдеден бастап мемлекеттік басқару жүйесін түбегейлі жаңғырту жұмысы ресми түрде бастау алды. Бұл – еліміз үшін &nbsp; жаңа тарихи кезең. &nbsp;&nbsp;Жаңа конституцияның алғашқы баптары өзгеріссіз қалған. Онда Қазақстанның демократиялық, зайырлы және унитарлы мемлекет екені айтылған. Оған қоса биліктің бірден-бір қайнар көзі – халық екені тағы да нақтыланған. Ешкімнің мемлекеттік билікті өз бетінше иеленуіне жол берілмейді және мұндай әрекет үшін жауапкершілік қарастырылған.Жаңа Конституцияның жаңашыл өзгерістеріне, біз – өзімізде ере білуіміз қажет. &nbsp;Елдігімізді сақтап, мемлекетіміздің дамуына өз деңгейімізде қызмет атқаруға тиістіміз.&nbsp;Қазақстан Республикасының бір ауылы &nbsp;Ақжар ауылдық округінде 386 қожалық, 1784 тұрғын тұратын болса, олардың арасынан жеке кәсібін жүргізіп отырған 72 отбасы бар. &nbsp;Ірі шаруашылық, 2 шағын шаруашылық егінмен айналысса, 2 кооператив «Ауыл аманаты» аясында 58 млн теңге көлемінде несие алып, бірі сүт жинау, тасымалдаумен, екіншісі жем-шөп дайындаумен айналысуда.&nbsp;Биылғы жылы &nbsp; облыстық бюджеттен екі көшеге күрделі жөндеуге &nbsp;283,0 млн теңге қаржы бөлініп, жұмыстар жүргізіліп жатыр.&nbsp;Әлеуметтік жағынан қорғалған тұрғындарымыз, рухани жағынан да үлкен жетістіктерге жетіп отыр. Жастарымыз бен оқушыларымыз халықаралық, республикалық, облыстық байқаулармен жарыстарға қатысып, жүлделі орындарды иеленіп, ауылымыздың мерейін тасытуда.«Ел болам деген ұлт- бесігін түзейді» деген, бүгінгі ұрпақ, ертеңгі болашақ. Мемлекетіміздің ертеңгі болашағының жарқын болатындығына сеніміміз кәміл.Нұржамал Бектайқызы,Қармақшы ауданы, Ақжар ауылдық округінің әкімі

Қазақстан және Қызылорда облысының жаңалықтары