<a href="https://kyzylorda-news.kz/">Kyzylorda-news.kz.</a> Қызылордада қатерлі АИТВ/ ЖИТС дертінің алдын-алу , оның жұғу жолдарынан сақтану, қорғану мақсатында 5 қараша мен 5 желтоқсан аралығында «Қоғамдастықтың маңызы» ұранымен түсіндірме шаралары өтуде. Бұл туралы Өңірлік коммуникациялр қызметінің ақпарат алаңында ЖИТС-тің алдын алу және оған қарсы күрес жөніндегі облыстық орталығының эпидемиологиялық бөлімінің меңгерушісі Салтанат Балықбаева.
<blockquote>
 «Үстіміздегі жылдың 10 айында&nbsp;адамның иммундық тапшылық вирусы салдарынан 15 адам анықталды. Оның 7-і ер адам, 8-і әйел адам. Вирустың жұғу жолдары: спермада, қынап кілегейінде, емшек сүтінде және көп мөлшері қанмен келеді. Яғни, жыныстық қатынас арқылы, есірткі тұтыну , анасынан нәрестеге жұғуы арқылы.Сонымен қатар,адамдар өзіне, өз денсаулығына жауапкершілікпен қарамайды, мінез- құлықтың қауіпті түрлерін жүргізеді», – деді Салтанат Шамиқызы.
</blockquote>
Сонымен қатар, сала мамандары зиянды әдеттерден аулақ болып, салауатты өмір салтынұстануға шақырды.

Қызылордада жыл басынан бері 15 адамда АИТВ анықталған

<a href="https://kyzylorda-news.kz/">Kyzylorda-news.kz.</a> Арал ауданы аумағындағы Сырдария өзені үстінен өтетін қалқымалы көпірдің орнынан жылжып кетті. Салдарынан үш елді мекенге жол қатынасы тоқтап тұр.
Сырдария өзені арқылы Қазалы ауданы аумағынан қалың сел тосыннан келіп, Қызылжар, Хан елді мекендері тұсында орналасқан қалқымалы көпірлердің шынжыры үзіліп кеткен. Көпір Хан ауылы тұсында 600, Қызылжар тұсында 1500 метрге дейін жылжып кетті. Салдарынан Аманөткел, Жаңақұрылыс, Қызылжар елді мекендеріне жол қатынасы тоқтап қалды.
<blockquote>
 «Қазіргі таңда Хан елді мекені тұсындағы қалқымалы көпір орнына қойылып Жаңақұрылыс, Аманөткел елді мекендеріне жол қатынасы ашылды. Ал Қызылжар елді мекені тұсындағы қалқымалы көпірді орнына қоюға әзірге мүмкіндік жоқ. Себебі, дария бойында мұз байқалады. Төтенше жағдай уақытында қалқымалы көпірлердің дария бойымен ағып кетпеуіне және қайта қалпына келтіруге Қызылжар, Жаңақұрылыс, Аманөткел елді мекенінің тұрғындары және округ басшылары ұйымшылдықпен атсалысты», – дейді Арал аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Амантай Тасқынбаев.
</blockquote>

Аралда қалқымалы көпірдің жылжып кетуінен жол қатынасы үзілді

<a href="https://kyzylorda-news.kz/">Kyzylorda-news.kz.</a> «Сұңқар» әлеуметтік қамқорлық орталығы» қоғамдық қорының ұйымдастыруымен «Білім және инновация» атты инновациялық идеялар мен жобалар байқауы өтті.
Байқау&nbsp; Қызылорда&nbsp;&nbsp; қаласындағы&nbsp;&nbsp; жалпы&nbsp;&nbsp; білім&nbsp; беретін мектептердің 7-11 сынып оқушылары және химия биология бағыттағы Назарбаев зияткерлік мектебі және жалпы білім беретін мектеп оқушылары арасында ұйымдастырылды.
Қатысушы үміткерлер IT технология, робототехника, география,&nbsp; физика,&nbsp; химия,&nbsp; биология,&nbsp; экология,&nbsp; информатикасалалары бойынша тың жобалары (автокөлік, өндіріс, ауылшаруашылық, су көлігі, құрылыс, жылу-электр энергетикасы, авиация, космонавтика) мен идеяларын ұсынды.
Байқауға қала көлемінде 38 инновациялық жоба ұсынылды.
Қазылар ақласының шешімімен I – орын Диляра Оңайбек, Сая Сламғалиға бұйырды. II – орынды Мәди Нұрмұхаметов, Анель Талғат ие болды. III – орынды &nbsp;Ергеш Алтынбек алды.
Шара жеңімпаздары ұйымдастырушылар тарапынан жүлделі орындармен марапатталып, бағалы сыйлықтар табысталды.
<img src="https://kyzylorda-news.kz/wp-content/uploads/2019/11/02-3.jpg" alt="" />

Қызылордалық оқушылар арасында инновациялық жобалар байқауы өтті

<a href="https://kyzylorda-news.kz/">Kyzylorda-news.kz.</a> Қазақстанда тұрғын үй саласында гендерлік теңдікті жетілдіру мақсатында әйелдерге арналған ипотека жобасы жүзеге асырылайын деп жатыр.&nbsp;“Тұрғын үй құрылыс жинақ банкі” “Азия Даму Банкімен” біріге отырып, шамамен 4000 әйелге ипотека бермекші, деп хабарлайды <a href="https://kaz.tengrinews.kz/buildings/elmzde-ayelder-ipotekasyi-kanday-sharttarmen-berled-302845/">Tengrinews.kz.</a>
<blockquote>
 “Қазақстанда 9,1 миллион әйел бар, олардың 4,4 миллионы жұмыспен қамтылған, жартысы өз отбасыларын өздері асырап отыр. Сондай-ақ, әйелдердің жалақысы ерлердікіне қарағанда үш есеге аз екенін ескеру керек. Бұл әйелдердің ерлерге қарағанда пәтер алу мүмкіндігі төмен екенін білдіреді. Сондықтан біз “Азия Даму Банкімен” бірге қазақстандық әйелдерді қолдай отырып, гендерлік жобаны жүзеге асырмақшымыз”, – деді&nbsp; “Тұрғын үй құрылыс жинақ банкі” басшысы Ләззат Ибрагимова.
</blockquote>
Банктегілердің айтуынша, ипотека жобасына жаңа салынған үйлер де, қайталама нарықтағы пәтерлер де кіреді. Кредиттің максимал сомасы – 30 миллион теңге, алғашқы жарна – 15 пайыз. Бірақ ол әйелдің жалақысы 200 мың теңгеден кем болуы тиіс. Ал жалақысы 200 мың теңгеден асатын әйелдер үшін алғашқы жарна – 20 пайыз. Пайыздық мөлшерлеме әлі белгісіз, ол туралы кейінірек айтылады.

«Әйелдер ипотекасын» алу үшін не істеу керек?

<a href="https://kyzylorda-news.kz/">Kyzylorda-news.kz.</a> Қызылорда облысы Арал ауданында құтқарушылар жолда қалып қойған жолаушыларға көмек көрсетті.
Арал ауданы №3 мамандандырылған өрт сөндіру бөлімінің байланыс бекетіне жолаушылардың жолда қалып қойғаны жөнінде хабар түскен.
Оқиға орнына жедел жеткен құтқарушылар «Mercedes-Benz» маркалы жеңіл автокөлігінің «Самара-Шымкент» автожолының 1417 шақырымында жолда қалып қойғанын анықтады. Көліктің қозғалтқыш бөлігі бұзылып, істен шыққан.
<blockquote>
 «Жолаушылар Атырау қаласынан Түркістанға бағыт алған. Құтқарушылардың күшімен 2 жолаушы Қамыстыбас елді мекеніне жеткізілді. Олар медициналық көмекті қажет еткен жоқ. Ақаулы автокөлік эвакуатормен үйлеріне қайтарылды», – деп мәлім етті Қызылорда облысы Төтенше жағдайлар департаментінің Өрт сөндіру және авариялық құтқару қызметі.
</blockquote>

Аралда жолда қалып қойған жолаушылар құтқарылды

<a href="https://kyzylorda-news.kz/">Kyzylorda-news.kz.</a> 2017 жылы донор кезегін күткен 91 адам қайтыс болса, 2018 жылы 121 адам өмірден өткен.
Трансплантация және жоғары технологиялық медициналық қызметтерді үйлестіру республикалық орталығы директорының міндетін атқарушы Әділ Жұмағалиевтің айтуынша, Қазақстанда ағза доноры тапшы.
<blockquote>
 “Бүгінде кезекте 3 128 адам тұр. Жыл сайын жүз шақты адам ота кезегіне жете алмай қайтыс болады”, – деді ол трансплантология мәселелері бойынша Нұр-Сұлтанда өткен дөңгелек үстел барысында.
</blockquote>
Бүйрек ауыстыруға 2 706 азамат өтініш білдірсе, оның 69-ы балалар. Бауырдың трансплантациясына кезекке тұрған 295 адамның ішінде алты бала бар. Өкпесін ауыстыру үшін кезекке жеті адам тұрған. Жүрек трансплантациясына кезекке тұрғандар саны 120-ға жеткен, оның 13-і балалар.
Қайтыс болған адамның ағзасын донор етіп беру бойынша Солтүстік Қазақстан, Қостанай жән Ақмола облыстары алда. Ал оңтүстік өңірлер тұрғындары әзірге белсенділік танытып жатқан жоқ.
Әділ Жұмағалиев оның себебін діни ұстанымдармен байланыстырмайды.
<blockquote>
 “Өйткені діни ұйымдар бізді қолдайды, бірігіп жұмыс жасап жатырмыз. Осы уақытқа дейін бірде-бір діни ұйым қарсы шыққан емес”, – деді ол.
</blockquote>
Бүйректі алмастыру шамамен&nbsp;3 миллион 200 мың теңгетұрады. Бауырды алмастыру құны&nbsp;5 миллион 800 мың&nbsp;болса, ал жүректі алмастыру отасына&nbsp;25 миллион&nbsp;теңге қажет. Бұл оталар тегін медициналық көмектің кепілдендірілген көлеміне кіретіндіктен, ота шығынын мемлекет төлейді.
Осылайша, биыл медициналық мекемелерге&nbsp;3 миллиард 202 миллионтеңге аударылған.
Денсаулық сақтау вице-министрі Ләззат Ақтаеваның мәліметінше, жыл сайын трансплантация оталарының саны азайып жатыр. Мәселен, 2017 жылы қайтыс болған донордың мүшесі 217 адамға, 2018 жылы 180 адамға трансплантацияланған. Ал тірі донордың мүшесін ауыстыру бойынша 2017 жылы 86, 2018 жылы 32 ота жасалған.
Медициналық сақтандыру қорының басқарушы директоры Нұрлан Қасымов алдағы уақытта емделушілер тұрғылықты жері бойынша бақылауда болатынын айтты.
<blockquote>
 “Амбулаториялық негізде емделушілер ақысыз дәрі-дәрмектермен қамтамасыз етіледі. Биылдан бастап біз донор органдарын дайындауға ақы төлей бастадық. Яғни, әлеуетті донор пайда болған клиника органдардың тіршілігін қолдап, оларды алу жұмыстарын жүргізеді. Мұның ақысын да біз төлейміз”, – деді ол.
</blockquote>
<a href="https://informburo.kz/kaz/zhyl-sayyn-zhz-shaty-adam-donor-kezegn-kte-almay-kz-zhmady.html">Informburo</a>.

Жыл сайын жүз шақты адам донор кезегін күте алмай көз жұмады

<a href="https://kyzylorda-news.kz/">Kyzylorda-news.kz.</a> Қызылордада түн ішінде адам қағып, оқиға орнынан қашып кеткен жергілікті тұрғынға қатысты сот үкімі шықты, деп хабарлайды <a href="http://lenta.inform.kz/kz/kyzylordada-adam-kagyp-oltirgen-kolik-zhurgizushisi-sottaldy_a3587987">ҚазАқпарат</a>.
Аталмыш оқиға биылғы жылдың 29 маусымында түнгі сағат 04.00 шамасында болған. Қызылорда қаласында тұратын азамат «Lada Granta» маркалы автокөлігімен облыс орталығындағы Тәуелсіздік даңғылы мен Ш.Есенов көшесінің қиылысында жаяу жүргіншілер өткелінен өтпекші болған 19 жастағы жолаушыны қағып кеткен. Содан соң қағып кеткен адамға көмек көрсетпестен оқиға орнынан кетіп қалған.
<blockquote>
 «Соның салдарынан А.Теңізбай мидың ауыр жабық жарақатын алып, оқиға орнында қайтыс болған. Аталған дерек бойынша көлік жүргізушісі үстінен ҚР Қылмыстық кодексінің 345-бабының 3-бөлігімен және 347-бабымен қылмыстық іс қозғалды. Онда көлiк құралдарын басқаратын адамның жол жүрісі қағидаларын бұзуы арқылы абайсызда адам өліміне әкеп соққан әрекет және жол-көлiк оқиғасы болған жерден кетіп қалу жағдайы көрсетілген. Сол бойынша қылмыстық іс тіркеліп, тергеп-тексеру амалдары жүргізіліп, іс сотқа жолданған.
 Қызылорда қаласының №2 соты үкімімен кінәсі толығымен дәлелденіп, жүргізуші кінәлі деп танылды. Сот үкімімен ол 5 жыл мерзімге көлік құралын басқару құқығынан және 1 жыл мерзімге бас бостандығынан айырылды. Қазіргі таңда аталған сот үкімі заңды күшіне енді. Сотталушы жазасын қылмыстық атқару жүйесінің қауіпсіздігі барынша төмен мекемесінде өтеуде», – деп мәлім етті Қызылорда қаласы прокуратурасының бөлім прокуроры Мөлдір Жансүгірова.
</blockquote>

Қызылордада адам қағып өлтірген көлік жүргізушісі сотталды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Алдағы жыл қазақстандықтар үшін дәстүрлі мерекелік күндермен басталады, деп жазады <a href="https://kaz.nur.kz/1828768-kazakstandyktar-2020-zyly-kalaj-demalady.html">KAZ.NUR.KZ</a>.
Қазақстан халқы Жаңа 2020 жылды қарсы алған соң&nbsp;қаңтардың 1 мен 4 аралығында&nbsp;демалады.
5-қаңтар (жексенбі) мен 6-қаңтар (дүйсенбі) жұмыс күні болады.&nbsp;7 қаңтар Рождествоның құрметіне ел тұрғындары тағы да демалады.
Сонымен қатар ел көптеген күтетін мерекенің бірі-&nbsp;8-наурыз халықаралық әйелдер күні.
Бұл мейрамға орай қазақстандықтар үш күн демалады&nbsp;(7-наурыз сенбіге, 8-наурыз жексенбіге түсетіндіктен, 9-наурыз дүйсенбі демалыс болмақ).
Сондай-ақ,&nbsp;Наурыз мерекесінде тұрғындар&nbsp;21-наурыздан (сенбі) бастап, 25-наурызға дейін (сәрсенбі) демалады.
1 мамыр – Қазақстан халықтарының бірлігі күні.&nbsp;Бұл күн жұмаға түскендіктен, қазақстандықтар бірден үш күн (жұма, сенбі, жексенбі) демалады.
Жеңіс күніне орай&nbsp;ел тұрғындары 7-10 мамыр аралығында&nbsp;төрт күн демалады.
Ал 6-шілде&nbsp;Астананың туған күніне орай&nbsp;4-6 шілде аралығында үш күн демалыс болмақ.
Конституция күнінде&nbsp;де ел тұрғындары үш күн қатарынан демалады (29-31 тамызда).
Одан кейінгі демалыстар тек желтоқсан айында болмақ.&nbsp;Тәуелсіздік күнінде&nbsp;ел тұрғындары төрт күн (16-19 желтоқсан) демалады. Сөйтіп жұмыс күні жексенбі күнінен басталмақ.
Оқырмандарға ыңғайлы болу үшін NUR.KZ алдағы 2020 жылы болатын мерекелік және демалыс күндердің күнтізбесін жасады.

Қазақстандықтар 2020 жылғы мерекелерде қалай демалады?

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалында Халыққа қызмет көрсету бойынша №1 қалалық бөлімінде «Халықтық заңгер» акциясы өтті.&nbsp;
Қала халқына консультациялық кеңес беру үшін 30 түрлі сала қызметкерлері қоғамдық қабылдау өткізді. Атап айтар болсақ, облыс әкімінің кеңесшісі Мақсұт Нәлібаев пен қала әкімінің міндетін атқарушы Бектас Балғабайұлы, Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің бірінші орынбасары Бақытжан Ниязов және әлеуметтік, білім, кәсіпкерлік, жер, тұрғын үй, ауыл шаруашылығы салаларының мамандары мен халыққа қызмет көрсету орталықтарының білікті мамандары бар.
Шараның басты мақсаты – ашықтық, жариялылық принциптері негізінде елмен етене жұмыс істеу және халықтың құқықтық сауаттылығын арттыру болып табылады. Акция барысында 200-ден астам азаматтар қатысып, бақылау-қадағалау, әлеуметтік, денсаулық, жер, тұрғын үй қатынастары, қаржы институттары және басқа да қажетті орган өкілдері тұрғындарды жеке-жеке қабылдап, өтініштерін тыңдады.
Акция аясында сонымен қатар, халыққа қызмет көрстеу орталығының мамандары азаматтардың цифрлық сауаттылықтарын арттыру мақсатында «egov.kz» үкімет порталы мен egov mobile және Telegram bot мобильді қосымшасы арқылы онлайн қызметтерді алу жолдары бойынша түсіндірме жұмыстарын жүргізді.
<img src="https://kyzylorda-news.kz/wp-content/uploads/2019/11/25hzanger2.jpg" alt="" />
<img src="https://kyzylorda-news.kz/wp-content/uploads/2019/11/25hzanger3.jpg" alt="" />
<img src="https://kyzylorda-news.kz/wp-content/uploads/2019/11/25hzanger4.jpg" alt="" />
<img src="https://kyzylorda-news.kz/wp-content/uploads/2019/11/25hzanger5.jpg" alt="" />
<img src="https://kyzylorda-news.kz/wp-content/uploads/2019/11/25hzanger6.jpg" alt="" />

«Халықтық заңгер» акциясында 200-ге жуық тұрғын кеңес алды

<a href="https://kyzylorda-news.kz/">Kyzylorda-news.kz.</a> Енді қазақстандықтар азаматтық хал актілерінің барлығын тұрғылықты тіркеу орнына қарамастан кез-келген жерде ала алады. Бұл туралы заңға енгізілген түзетулер Парламент Сенатында қабылданған заң жобасында қарастырылды.
Жаңашылдық баланың тууына, некені тіркеу мен ажырасуға, аты-жөні мен тегін өзгертуге, қайтыс болу құжаттарын тіркеу сияқты қызметтерді қамтиды.
Бұрын азаматтар аталған мемлекеттік қызметтерді алу үшін тұрғылықты тіркеу орны немесе тіркеу жазбасының орналасқан жері бойынша мемлекеттік корпорацияның фронт-офистеріне немесе АХАТ бөліміне хабарласатын. Енді азаматтық хал актілеріне қатысты 5 түрлі қызметті кез-келген ХҚКО-дан немесе АХАТ-тан алуға болады. Бұл керекті құжаттарды аз уақыт ішінде алуға және сыбайлас жемқорлық деректерін болдырмауға мүмкіндік береді.
<blockquote>
 «Бұрын құжаттарды рәсімдеп алу үшін өтініш беруші тіркеу орны бойынша халыққа қызмет көрсету орталықтарына немесе тіркеуші органға хабарласып, 5-тен 30 күнге дейін жауап күтетін, бұл қызмет алушылар үшін қолайсыздық пен қосымша қағазбастылықты тудыратын. Мәселен, егер азамат бір аймақта тегін өзгерту туралы өтініш білдірсе, мемлекеттік орган өзге аймақтан – оның туған жерінен қосымша мәліметтерді сұрататын. Тиісінше, қызмет көрсету уақыты ұзаратын», – деді «Азаматтарға арналған үкімет» мемлекеттік корпорациясының басқарма төрайымы Әсемгіл Балташева.
</blockquote>
Жалпы, заңға ұсынылған түзетулердің 70 мемлекеттік қызметтерді оңтайландыру мен автоматтандыруға мүмкіндік береді. Электрондық форматқа көшу құжаттарды қабылдау уақыты мен олардың санын қысқартады, әкімшілік кедергілерді жояды және қызметтерді алу процесін жеңілдетеді.

Азаматтық хал актілерін кез келген аймақта тіркеуге болады

<a href="https://kyzylorda-news.kz/">Kyzylorda-news.kz.</a> Қызылорда облыстық Қазақстан халқы ассамблеясының қолдауымен «Қазақстан кәрістер қауымдастығы» Қызылорда облыстық қоғамдық бірлестігінің ұйымдастыруымен кәріс этносының мәдени күні болып өтті.
Мерекелік шараға облыстық Қазақстан халқы ассамблея құрылымдары, этномәдени бірлестіктің басшылары және белсенді мүшелері, жоғары және орта арнаулы оқу орындарының жастары және БАҚ өкілдері қатысты.
Шара барысында Достық үйінің фойесінде көрме ұйымдастырылды. Келушілер кәріс этносының асханасынан дәм татты.
Облыстық Қазақстан халқы ассамблеясы хатшылығының меңгерушісі Ләйлә Төрешова бірлік пен ынтымақты ту еткен кәріс этномәдени бірлестігінің бірқатар белсенділерін марапаттап, бірлестік жетекшісі Елена Алексеевнаға аймақ дамуына қосқан үлесі үшін алғысын білдірді.
<blockquote>
 «Сыр өлкесі – атам заманнан сан ұлт өкілі бас қосқан, бақыт тапқан мекен. Бүгінгі күні біздің өңірде 35 өзге этнос өкілдері бар. Әрқайсысы өз салт-дәстүрлерін сақтай отырып, өңірдің дамуына өз үлесін қосып келеді. Соның ішінде, кәріс халқы 80 жылдан астам осынау қазақ өлкесінде өмір сүруде. Бұл жай ғана оқиғалардың, күндердің тізбегі емес, &nbsp;ол – өзара бірлесіп өткізілген өмір, ортақ тарих. Кәріс этносының өкілдері әрдайым еңбекқорлығымен ерекшеленді. Бұған тек бір Шиелі ауданында ғана кәріс этносының 29 өкілі Социалистік Еңбек Ері атағына лайық екені дәлел бола алады. Ал “Авангард” колхозынан, бүгінгі күні Ақмая ауылдық округі 16 Социалистік Еңбек Ері шықты. Бұл лайықты таңданыс. Ұрпақтар сабақтастығын 30 жыл бойы “Қазақстан кәрістер қауымдастығы” Қызылорда филиалының жетекшісі Ким Елена Алексеевна бастаған мүшелері жалғастырып келеді. Құрметті, Елена Алексеевна және&nbsp; орталық белсенділері, сіздерге өңірдегі этносаралық келісім мен жалпыұлттық бірлікті нығайтуға, корей этносының мәдениетін, тілін, салт-дәстүрін және тарихын дамытуға және сақтауға қосқан үлестеріңіз үшін зор алғысымды білдіремін», – деді Ләйлә Төрешова.
</blockquote>
Шара мерекелік концертке ұласып, өнерпаздар әннен шашу шашып, түрлі қойылымдар қойды.
<img src="https://kyzylorda-news.kz/wp-content/uploads/2019/11/25karisetnos2.jpg" alt="" />
<img src="https://kyzylorda-news.kz/wp-content/uploads/2019/11/25karisetnos3.jpg" alt="" />
<img src="https://kyzylorda-news.kz/wp-content/uploads/2019/11/25karisetnos4.jpg" alt="" />
<img src="https://kyzylorda-news.kz/wp-content/uploads/2019/11/25karisetnos5.jpg" alt="" />
<img src="https://kyzylorda-news.kz/wp-content/uploads/2019/11/25karisetnos6.jpg" alt="" />

Қызылордада кәріс этносының мәдени күні өтті

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Тағдырдың жазуымен жалғыз немесе қараусыз қалған қарттар мен мүмкіндігі шектеулі адамдардың жанынан табылып, көмек көрсетіп жүрген әлеуметтік қызметкерлердің еңбегі зор. Олар қарттарға қамқор болып, мүгедектердің мұңымен бөлісіп, мүмкіндігі шектеулі балалардың қоғамнан бөлектенбеуі үшін аянбай қызмет етіп келеді.
Жақында Қызылорда қалалық жұмыспен қамту, әлеуметтік бағдарламалар және азаматтық хал актілерін тіркеу бөлімінде болып, әлеуметтік қызметкерлердің бір күндік жұмыс барысымен таныстық.
Бізді қарсы алған аталған бөлімнің басшысы Гүлмира Рахметова әлеуметтік қызметкерлердің жұмысымен таныстырып, тағдырдың тауқыметін тартқан жандардың бабын табу оңай еместігін айтты.
«Мемлекеттік келін»
<img src="https://kyzylorda-news.kz/wp-content/uploads/2019/11/25aleumettik2.jpg" alt="" />
<blockquote>
 «Жалпы бөлімге қарасты «Мүгедектер мен қарттарға үйде қызмет көрсету» және &nbsp;«Мүмкіндігі шектеулі балаларға үйде арнаулы әлеуметтік қызмет көрсету» бөлімшелері жұмыс істейді. Бөлімшеде жалғыз басты бөгде адамның көмегіне мұқтаж 158 қарт есепке алынған. Оның 43-і мүгедек, 115-і зейнеткер. Сонымен қатар 187 мүгедек бала жеке оңалту бағдарламасы бойынша есепте тұр. Оларға қызмет көрсететін әлеуметтік қызметкердің саны 48. &nbsp;Біздің қызметкерлеріміз арнаулы әлеуметтік қызмет көрсету мақсатында қызмет алушылардың үйіне тазалық жұмыстарын жүргізіп, емханаларға апарады. Олардың коммуналдық төлемдерін төлеп, азық-түліктерін де жеткізіп береді. Сонымен қатар күнделікті ағымдағы жұмыстардан басқа қарт кісілердің үйлерінде жеңіл жөндеу, қысқы жылуға дайындық жұмыстарына және тұрғын үй көмегіне тиісті құжаттамаларын тапсыруға көмек көрсетеді. Бір сөзбен айтқанда «мемлекеттік келін» десе де болады. Туған баласы мен келіні қарт ата-аналарын жалғыз қалдырып, мүгедек ата-ана баққысы келмей сыртқа теуіп жатқан мына қоғамда әлеуметтік қызметкерлер маңызды роль атқарады» – дейді Гүлмира Рахметова. &nbsp;
</blockquote>
Бөлім басшысы ғұмырының 24 жылын осы мамандыққа арнаған әлеуметтік қызметкер Гүлзира Жылқайдаровамен таныстырды. Біз онымен әлеуметтік-психологиялық көмек алушы 96 жастағы тыл ардагері &nbsp;Мария Лукенченконың&nbsp; үйіне бет алдық. Есікті ашқан Мария әжей үйде жылу жоғын айтып, бізді көңілсіз қарсы алды. Ол әлеуметтік қызметкердің жұмысына күмән келтіріп, «төлемақыны төлемегенсің» деп ренжіді. Алайда Гүлзира Жылқайдарова әжейдің күмәнін сейілту үшін төлемақының түбіртегін көрсетіп, жылудың қосылып тұрғанын айтты.
<img src="https://kyzylorda-news.kz/wp-content/uploads/2019/11/25aleumettik3.jpg" alt="" />
<blockquote>
 «Мен мұндай мінезіне үйренгенмін. Еш ренжімеймін де. Әлеуметтік қызметкердің міндеті де сол. Барынша сабырлы болуымыз керек. Бұл кісілердің бізден басқа ешкімі жоқ. Сондықтан бар еркелігін көтереміз, мұңымен бөлісіп, қайғысын жеңілдетуге тырысамыз. Мария әжей 96 жаста, қарт кісі ғой. Ұлы 17 жыл бұрын қайтыс болған. Содан бері біздің бөлімнің қызметіне жүгінеді. Бұл кісіге аптасына 3 рет келіп, қызмет көрсетемін», – дейді Гүлзира Жылқайдарова.
</blockquote>
«Үйім жинаулы, киімім жуулы. Бұл осы Гуляның (Гүлзира Жылқайдарова – авт.) арқасы. Менің бар қажеттілігімді өтеп, жағдайымды жасап отыр. Мені емханаға ертіп апарады, қажет болса таза ауада серуендейміз», – дейді Мария Лукенченко.
«Мамандығым тағдырыммен байланысты»
&nbsp;«Мүмкіндігі шектеулі балаларға үйде арнаулы әлеуметтік қызмет көрсету» бөлімшесінің әлеуметтік қызметкері Индира Бақыторазова бұл жұмысқа 6 жыл бұрын келгенін айтты. Өзінің баласы Димаш оның әлеуметтік қызметші болуына себепкер болған. Димаш туа бітті церебральды сал ауруына шалдыққан.
<blockquote>
 «Жоғары білімім бар, мұғаліммін. Мектепте жұмысым да болды. 6 жыл бұрын екінші ұлым дүниеге келгеннен соң жұмыстан шықтым. Науқас балаға күтім керек. Ерекше оқытуды қажет ететін әр баланың өзіне ғана тән ерекшеліктері бар. Бұл балалармен жұмыс істеу аса жауапкерлішікті талап етеді. Мамандығым педагог болғандықтан балалармен жұмыс жасаған өзіме ұнайды. Менің қарамағымда жас ерекшеліктері, сырқаттары әр түрлі 9 бала бар. Оның үлкені 16 жаста, кішісі 5 жаста. Жұмыс уақытында осы балалардың үйлерін аралап, оқытамын. Кешке үйге келген соң өзімнің балама қараймын. Балаларға түрлі әдіс-тәсілдерді қолданып, олардың ой-өрісінің дамуына жұмыс жасаймыз» , – дейді әлеуметтік қызметкер Индира Бақыторазова.
</blockquote>
<img src="https://kyzylorda-news.kz/wp-content/uploads/2019/11/25aleumettik4.jpg" alt="" />
Индира апай екеуміз қызмет алушы Бақдәулет Дүйсенғазының үйіне бардық. Бағдәулеттің церебральды сал ауруына шалдыққаны 2 жасында белгілі болады. &nbsp;Дәрігерлер еш емі жоқ деп жылы жауып қойған. Бірақ Бақдәулеттің туыстары барынша шыдамдылықпен қараса қандай да бір дәрежеде қоғамда өмір сүруге болатынына сенеді. Сондықтан мемлекет &nbsp;тарапынан көрсетіліп жатқан бар көмекті алып, баласына қолынан келген жағдайды жасап отыр.
<blockquote>
 «Біз былтырдан бері әлеуметтік қызметкердің көмегіне жүгіндік. Бір жылда үлкен өзгеріс болды. Бақдәулет өте тұйық, адаммен араласуы қиын еді. Әлеуметтік қызметкер маған айтарлықтай көмек болды. Аптасына екі рет келіп баламмен жұмыс жасайды. Қазір Индира екеуі жақын дос болып алды. Бізге әлеуметтік көмек көрсетіп ғана қоймай, құқықтық кеңес береді. Мемлекет тарапынан берілген көмекті алу жолдары, жылда шипажайға баратын болсақ құжаттарын дайындауға көмек көрсетеді», – дейді Бақдәулеттің әжесі.
</blockquote>
<img src="https://kyzylorda-news.kz/wp-content/uploads/2019/11/25aleumettik5.jpg" alt="" />
P.S: Біз бүгін екі әлеуметтік қызметкердің бір күндік жұмысымен ғана таныстық. Түйгенім темірдей төзім, аса жоғары жауапкершілік керек екен. Қарттардың көңілін тауып, мүмкіндігі шектеулі жандардың қорқынышын сейілту үлкен сабырды қажет етеді. &nbsp;Олар өз міндеттерін атқарып қана қоймай, жаны жабырқау жандарға мейірім нұрын төгіп, олардың болашағына деген үміт сәулесін жағады. Әрине қызметі оңай емес бірақ қоғамға өте қажет, қайырымды мамандық.
Фариза ОМАРОВА

Қазақстан және Қызылорда облысының жаңалықтары