<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Бейсенбі 23 қаңтарда елімізде жел күшейіп, қар жауады, боран соғады, тұман және көктайғақ болуы ықтимал, деп хабарлайды Қазгидромет.
<blockquote>
 &nbsp;«23 қаңтарда Қазақстан аумағының көп бөлігіне Мурманск үстінде орналасқан циклон жырасы әсер етеді. Осыған байланысты қар жауады, батыста, солтүстік батыста, солтүстік шығыста және оңтүстікте жауын-шашын түседі. Еліміздің кей жерлерінде тұман, көктайғақ, бұрқасын күтіледі, жел күшейеді», делінген ауа райы болжамында. &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
</blockquote>
Ақмола, Солтүстік Қазақстан, Қостанай облыстарында жел 15-20, кей жерлерде жылдамдығы 23-28 м/с жетеді, екпіні 30 м/с-ден асып боранмен бірге соғады, кей жерлерде көктайғақ болуы ықтимал, Қостанай облысында тұман күтіледі.
Павлодар облысында жел 15-20 м/с, кей жерлерде 23-28, екпіні 30 м/с жетеді, кейде одан асып кетеді, кей жерлерде бұрқасын, көктайғақ күтіледі. Қарағанды облысында жел түнде 15-20, кей жерлерде 23-28 м/с жетеді, күндіз кей жерлерде 15-20, екпіні 23-28 м/с күшейеді, кей жерлерде бұрқасын, тұман, көктайғақ күтіледі.
Қызылорда облысында жел 15-20, түнде және таңертең кей жерлерде 25 м/с күшейеді, кей жерлерде бұрқасын, тұман көктайғақ күтіледі.
&nbsp;Шығыс Қазақстан облысының кей жерлерінде бұрқасын, көктайғақ күтіледі, жел 15-20, екпіні 23-28 м/с күшейеді.
Атырау, Жамбыл облыстарының кей жерлерінде тұман, көктайғақ, бұрқасын күтіледі, жел 15-20 м/с күшейеді.
&nbsp;Батыс Қазақстан, Ақтөбе облыстарының кей жерлерінде көктайғақ күтіледі, жел 15-20 м/с күшейеді, Батыс Қазақстан облысында тұман түседі, Ақтөбе облысында боран соғады.
Түркістан, Маңғыстау облыстарының кей жерлерінде тұман күтіледі, жел 15-20 м/с күшейеді.
Алматы облысының түнде кей жерлерінде тұман күтіледі, күндіз Жаланашкөл ауданында жел 15-20 м/с күшейеді.

Күшті жел, боран, тұман және көктайғақ &#8211; Бейсенбіге арналған ауа райы

Қолмен хат жазу күні
Бүгінде баспа, сандық ақпарат жаулап алған кезеңде әділетсіз ұмыт болған қолмен жазылған хаттың маңыздылығын көпшіліктің есіне түсіруге арналды. Бұл мерекенің күнтізбеге енгізілуіне бастамашылық еткен Жазу құралдарын өндіру қауымдастығы болды.
1982 жылы Қазақтың академиялық опера және балет театрында «Ақан сері – Ақтоқты» операсының премьерасы өтті. Алғашқы қойылымда бас партияларды Қазақстанның еңбек сіңірген әртістері Хорлан Қалиламбекова мен Кенжеғали Мыржықбаев орындады. Операның авторы – Сыдық Мұхамеджанов. Либреттосын жазған Ғабит Мүсірепов.
1992 жылы БҰҰ Қауіпсіздік Кеңесі отырысында Қазақстан Республикасын БҰҰ-ға мүше етіп қабылдау туралы қарар қабылданды. 1992 жылғы наурыздың 2-сінде Қазақстан БҰҰ-ның толық мүшесі болды.
1995 жылы Брюссельде Елбасы Нұрсұлтан Назарбаев пен Еуропа ынтымақтастығы кеңесінің төрағасы Ален Жюппе Қазақстан Республикасы мен Еуропа ынтымақтастығы арасындағы серіктестік пен ынтымақтастық туралы келісімге қол қойды.
2008 жылы Елбасы Нұрсұлтан Назарбаев бизнестің әлеуметтік жауапкершілігінің жыл сайынғы «Парыз» конкурсын өткізіп отыру туралы Жарлыққа қол қойды. Қазақстанның жеке кәсіпкерлік субъектілерінің корпоративтік әлеуметтік жауапкершілік принциптерін қалыптастыру мен ілгерілету және оларды осы саладағы ең үздік тәжірибені енгізуге ынталандыру мақсатымен құрылған.
2015 жылы Мемлекет басшысы «Әл-Фараби атындағы ғылым мен техника, әдебиет және өнер саласындағы Қазақстан Республикасының мемлекеттік сыйлықтары туралы» Жарлыққа қол қойды.

23 қаңтар:Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 23 қаңтарға арналған жұлдыз-жорамалы.
Тоқты
Бүгін ешбір іске күш салмайсыз, оқиғаны сырттай бақылап отырасыз. Ашықтығыңыз, шыншылдығыңызды бағалайтын жандар бар. Олар сізді барлық жағынан да қолдайтын болады.
Торпақ
Сәтті күн. Бұл күн пайдалы іспен айналысуға да, жай демалуға да қолайлы күн. Өзіңізге ұнайтын қызықты іспен айналысасыз. Кешке қарай көңіл көтеретін кештің қонағы боласыз.
Егіздер
Бүгін жаңа достар табасыз. Сонымен қатар алдағы уақытта өміріңіздің бір бөлшегіне айналатын жанды жолықтырасыз. Бүгін ірі көлемде сауда жасаудың қажеті жоқ.
Шаян
Айналаңызда болып жатқан жағдайларға қарамастан, сабырлық сақтап отырасыз. Бұл шешіміңіз өте дұрыс болмақ. Соның арқасында кикілжіңдерден бойды аулақ ұстайсыз, сондай-ақ арандатуларға жол бермейсіз.
Арыстан
Бүгін шаруа көп. Ең алдымен қайсысынан бастау қажет екенін реттеп алыңыз. Ойға түрлі жоспарлар келеді. Бірақ идеяларды дәл қазір жүзеге асырудың қажеті жоқ. Себебі олар әзірге табыс әкелмейді.
Бикеш
Күніңізді пайдалы іспен айналысуға жұмсаңыз. Әсіресе, қиын шаруаларды қолға алғаныңыз жөн. Жаңашылдыққа тез үйренесіз. Сонымен қатар көп ақпараттың ішінен өзіңізге қажеттісін ала аласыз.&nbsp;
Таразы
Қызықты күн. Ішкі түйсігіңізге жүгіне отырып, ең қиын шаруаларды мойныңызға жүктейсіз. Өзгелер ала алмаған асуды бағындырасыз. Сіздің тың идеяларыңыз барлығына ұнайтын болады.
Сарышаян
Бүгінгі күн демалуға, күш-жігеріңізді қайта қалпына келтіруге қолайлы күн. Кейбір шаруаларды кейінге қалдырғаныңыз жөн. Алайда мұқият болыңыз. Түстен кейінгі уақытта туыстарыңыздың арасында боласыз.
Мерген
Қиын шаруалардың барлығы артта қалды. Енді тыныштықта демелатын боласыз. Көтеріңкі көңіл-күйде болыңыз. Бүгін көп күшті қажет ететін, маңызды шаруаларды, ірі жобаларды қолға алмаңыз.
Тауешкі
Жемісті күн. Таңертеңгілік айтарлықтай жоспарларыңыз болмаса да, біраз уақыттан соң айналысатын іс тауып аласыз. Бойыңызда күш-қуатыңыз көп. Сондықтан біраз шаруаны тындыратын боласыз.
Суқұйғыш
Кез келген пайдалы іспен айналысуға мүмкіндік бар. Ойлау қабілетіңіз жоғары, сондықтан қиын тапсырманың өзін оңай орындай аласыз. Сіз бүгін өз ортаңыздың көшбасшысысыз. Оны кез келген адам мойындайды.
Балықтар
Өзгелердің сізге сеніп тапсырған жұмысына бей-жай қарай алмайсыз. Бар ынтаңызбен көмек көрсетіп, қайырымдылық акцияларына атсалысасыз. Сонымен қатар әділеттілікке қол жеткізу үшін барыңызды саласыз.
Аударған Динара МАХАНОВА

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Әлеуметтік желілер мен мессенджерлерде таратылған атаулы әлеуметтік көмекті&nbsp;(АӘК) тағайындау үшін құжаттарды халыққа қызмет көрсету орталықтарында беруге болатыны туралы ақпарат шындыққа сәйкес келмейді.
АӘК тағайындауға қатысты өтінішті Халықты жұмыспен қамту орталықтарында және әкімдіктер жанындағы жұмыспен қамту бөлімдерінде қабылдайды. Құжаттарды 2020 жылғы қаңтардың соңына дейін тапсыруға болады.
Атаулы әлеуметтік көмек тағайындау критерийлеріне сәйкес келетін азаматтарға атаулы әлеуметтік көмек ағымдағы жылғы ақпан айынан бастап төленеді, АӘК алатын отбасылардың балалары үшін кепілдік берілген әлеуметтік топтама берілетін болады.

Әлеуметтік көмектің құжатын қайда тапсыру керек?

<a href="https://kyzylorda-news.kz/">Kyzylorda-news.kz.</a> ЭЦҚ (электрондық цифрлық қолтаңба) – бұл электрондық құжатқа қолы қойылған және мөрмен бекітілген қағаз жеткізгіштегі құжат сияқты заң күшін беру үшін пайдаланылатын өзі қойған қолының аналогы.
ЭЦҚ алуға өтінімді ҚР ҰКО сайтының арнайы бөлімі арқылы онлайн режимінде беруге болады. Өтінімді қауіпсіздік мақсатында дербес компьютерден беру ұсынылады.
Ең алдымен <a href="http://pki.gov.kz/">pki.gov.kz</a> сайтындағы «Заңды тұлғалар үшін ЭЦҚ алу» бөліміне кіресіз.
Одан кейін мәртебеңізді көрсете отырып қажетті ҚР ҰКО тіркеу куәліктерінің үлгісін таңдауыңыз қажет. (Ол мекеменің бірінші басшысы, қол қою құқығы бар жұмыскер немесе қаржылық құжаттарға қол қою құқығы бар қызметкер және т.б. болуы мүмкін).
Онлайн-өтінімді бергеннен кейін сізге оны растау үшін ХҚО-ға бару қажет. Өзіңізбен бірге жеке куәлігіңіз, уәкілетті тұлғаның растайтын құжаттары мен басып шығарылған өтінім болуы қажет. Тексергеннен кейін оператор растауды жасайды және сіз ЭЦҚ өз компьютеріңізге жүктеп, оған өз пароліңізді орната аласыз.
:point_right:Міне, енді сіз электрондық үкімет порталымен жұмысты бастай аласыз.
ЭЦҚ пайдалана отырып заңды тұлғалар келесідей артықшылықтарға қол жеткізбек:
•Электрондық сауда-саттыққа қатысу;
•Жеке қатысуынсыз банктік операцияларды орындау;
•Жеке қатысуынсыз электронды есептерді тапсыру;
•Компанияны қашықтықтан басқару және т.б.
ЭЦҚ-ны түрлі ақпарат жеткізгіштерінде сақтауға болады, бірақ бұл ретте ол бөтен қолға түспеуін жауапкершілікпен қадағалау қажет.
:exclamation:ЭЦҚ-ның қолданыс мерзімі 1 жыл, бірақ пайдаланушы оны электронды порталда мерзімі өтіп кетпей тұрып тағы бір жылға ұзарта алады.

Заңды тұлғалар ЭЦҚ қалай алады?

<a href="https://kyzylorda-news.kz/">Kyzylorda-news.kz.</a> Қазақстан Республикасы Президентімен 2019&nbsp; жылдың 26 қарашасында Қазақстан Республикасы Парламенті Мәжілісінің депутаттары бастамашылық еткен «Қазақстан Республикасының кейбір заңнамалық актілеріне мемлекеттік қызметтер көрсету мәселелері бойынша өзгерістер мен толықтырулар енгізу туралы» Қазақстан Республикасы Заңына қол қойылды.
Азаматтық хал актілерін тіркеу саласындағы мемлекеттік қызметтерді оңтайландыру, құжат айналымын қысқарту, сондай-ақ, балалардың құқықтары мен мүдделерін қорғау&nbsp; мақсатында Қазақстан Республикасының «Неке (ерлі-зайыптылық) және отбасы» туралы Кодексінің&nbsp; 50-ден астам баптарына өзгерістер енгізілді.
Сонымен қатар,&nbsp;&nbsp; «Эксаумақтық қағидаты бойынша азаматтық хал актілерін тіркеу саласында мемлекеттік қызмет көрсетуді және Қазақстан Республикасынан тыс жерде туылған&nbsp; баланың тууын мемлекеттік тіркеуді пилоттық режимде іске қосу туралы» Әділет, Цифрлық даму, инновациялар және аэроғарыш өнеркәсібі, сыртқы істер министрінің бірлескен бұйрығы енгізілді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Бастапқы куәлік жоғалған немесе пайдалануға жарамсыз болған жағдайда азаматтық хал актісін тіркеу туралы азаматтарға қайтадан берілетін&nbsp; куәліктер, тууды, қайтыс болуды тіркеу, әке болуды анықтауға, Қазақстан Республикасы азаматтарының бала асырап алуына байланысты тууды мемлекеттік тіркеу туралы акт жазбаларына өзгерістер, толықтырулар енгізу, сондай-ақ азаматтық хал актілерін тіркеу кезінде жіберілген қателерге байланысты қайтадан куәліктер беру мемлекеттік қызметі&nbsp;&nbsp;эксаумақтық қағидаға сәйкес жүзеге асырылуда.
Мысалы, құжаттарын жоғалтқан жағдайда, азамат қай аймақта тұратына, туған жеріне қарамастан,кез-келген тіркеуші органға барып, қайталама туу туралы куәлігін ала алады.
Ақпараттық жүйелерден алуға болатын құжаттарды (сот шешімдері, медициналық анықтамалар, Қазақстан Республикасында тіркелген актілер туралы ақпарат және т.б.) азаматтармен мемлекеттік органдарға ұсыну қажеттілігі жойылды.
Бұған дейін&nbsp; ерлі-зайыптылар сот арқылы некесін бұзып, немесе содан кейін АХАТ органдарына барып куәлік алуы қажет болса, өзгерістерге сәйкес сот шешімі заңды күшіне енген сәттен, автоматты түрде неке қию туралы акт жазбасына некенің бұзылғаны туралы белгі қойылып, куәлік алудың қажеттілігі алынып тасталды. Азаматтар АХАТ органдарына бару қажеттілігінен босатылды.
Конституцияда және Кодексте кепілдік берілген отбасы құпиясын, бала асырап алудың, баланың шығу тегінің құпиясын сақтау мақсатында әке болуды анықтауды мемлекеттік тіркеу, бала асырап алуды мемлекеттік тіркеу тараулары алынып тасталды. Бұл ретте, баланың жеке және ата-анасы туралы деректері&nbsp; туу туралы куәлікте ғана көрсетіледі.
Ата-аналардың таңдауы бойынша SMS-хабарлама арқылы тууды проактивті жолмен тіркеу мүмкіндігі заңнамалық түрде реттелді.
Сонымен қатар, бала перзентханада туылса, тууы туралы дәрігерлік куәліктің негізінде (анасының жеке сәйкестендіру нөмірі көрсетілген) &nbsp;анасының жеке басын куәландыратынқұжатының болмауына қарамастан, нәрестеге міндетті түрде туу туралы куәлік беріледі.
Бүгінгі таңда шетелде туылған баланың туу туралы мәлімет ақпараттық жүйелерде жоқ, себебі туу туралы куәлік шетелдің тіркеуші органдарымен берілген.
Шетелде туылған балалардың тууын тіркеуге негіз болатын құжаттардың тізімі кеңейтілді.
Осыған орай, егер баланың ата-анасы Қазақстанның туу туралы куәлігін рәсімдегісі келсе, олар қалауы бойынша тіркеуші органға барып, шетелде берілген туу туралы куәлікті (қажет болған жағдайда апостиль мөрі қойылған немесе заңдастырылған) ұсынса жеткілікті. Баланың нақты туылған жері көрсетіліп, жаңа туу туралы куәлік алу мүмкіндігі қарастырылған.
Аталған өзгерістер балалардың мүддесін қорғауда балаларға қатысты толыққанды мемлекеттік қызметтерді: мектепке дейінгі білім беру ұйымдарына кезекке тұру, денсаулық сақтау ұйымдарына тіркелу, жәрдемақы алу, қарыз жүктемесін алып тастау және т.б.алуға мүмкіндік береді.
Г. ЕЛЕУСІЗОВА,
Қызылорда облысының Әділет департаментінің
тіркеу қызметі саласындағы әдістемелік қамтамасыз және бақылау бөлімінің бас маманы

Азаматтық хал актілерін тіркеу саласына өзгерістер енді

<a href="https://kyzylorda-news.kz/">Kyzylorda-news.kz.</a> Қызылорда қаласы білім бөліміне қарасты Әли Мүсілімов атындағы №101 мектеп-лицейінде “Рухани жаңғыру” бағдарламасы аясында «Жаhандық әлемдегі заманауи қолөнер мәдениеті» тақырыбында қалалық семинар өтті.
Оған қалалық білім бөлімінің маманы Сулушаш Алмасбекқызы және қала көлеміндегі мектептердің мұғалімдері қатысты.
Семинар жоспары үш бөлімнен: ұйымдастыру бөлімі, негізгі бөлім:ашық сабақтар, практикалық бөлім:шебер-сынып жұмыстары жүргізілді. Ұйымдастыру бөлімінде мектеп-лицей директоры Айгүл Алтынбекқызы сөз сөйлеп, еліміздің өркениетті елдер қатарына қосылуы үшін қоғамның әрбір азаматының ой-санасы дамыған, өзіндік ой-пікірі бар, шығармашылық тұлға болуы талап етіледі. Өйткені, мемлекетіміздің келешегінің кемелдене түсуі – тек шығармашыл адамдар қолынан келетін іс. Қолөнердің қашанда заман, өмір ағымымен туындап, дамып отыратындығын айтты.
Көркем еңбек пәні мұғалімдері Мақсат Байділдақызы «Этностильдегі бас киімдер. Тақия, сәукеле» тақырыбында, «Бұйым өру» тақырыбында Гүлбарам Қанжарбекқызы және Алия Данышпанқызы «Өзгеріске ұшырау және тігін бұйымдарды сәндеу» тақырыбында жоғары деңгейде ашық сабақтар көрсетіп, көпшілік ілтипатына бөленді.
Семинардың практикалық бөлімі шеберлік сыныптармен жалғасын тапты. Көркем еңбек пәні мұғалімдері Рысдаулет Әкімбекұлы, Бауыржан Баймағанбетұлы «Қалдық материалдан бұйым жасау», «Аэрография» «Модерн дизайн қазақи ою нақышында салынған өнер мектебі» тақырыбында қолдан жасалған бұйымдарын көрсетіп, заманауи қазақи нақышта жасалынған макеттерін таныстырды. 7 сыныптары оқушылары «Құм терапиясы» тақырыбында құммен сурет салу әдісін көрсетсе, қолдан жасалынған бұйымдарын «Бейнелеу өнердегі заманауи бағыттары» тақырыбында таныстырды. Сондай-ақ қыздар тобына сабақ беретін мұғалімдеріміз «Сән үлгілерінің көрсетілімі», «Жылдам тігілетін белдемше» тақырыптарында жылдам тігілетін киім үлгілерін, трансформация және тігін бұйымдарын сәндеп тігу әдістерін көрсете білді.
Семинардың қорытынды бөлімінде қалалық білім бөлімінің маманы Сулушаш Алмасбекқызы сөз сөйлеп, кері байланыс алды. Семинарда көркем еңбек пәні ұстаздарының түрлі материалдардан: қалдық материалдан, ою нақышындағы қазақи дизайн ғимараты, заманауи бағыттағы өнер туындысы, құм терапиясы мен сән үлгілері насихаттала отырып, пішіндердің ықшам да мәнді үйлесімі, түстердің жоғары талғамы, көздің мүлтіксіздігін, колдың дәлдігін және қиял ұшқырлығын ұштастырып, шебердің өзіне тән тәсілдермен жеткізе білгендігін айтты.
Шара соңында қала мектептерінен келген мұғалімдер жүргізілген жұмыстарға кері байланыстар беріп, өз ұсыныс пікірлерін білдіріп, заманауи өнер туындысы жайында көп мағлұмат алғандықтарын айтты. Өткізілген жұмыстардың көкейге қонымды, тиімді, шынайы екендігіне көз жеткізгендерін айтып, алдағы уақытта өз жұмыстарынан көрініс табатындарын атап өтті.
<img src="https://kyzylorda-news.kz/wp-content/uploads/2020/01/22koloner2.jpg" alt="" />
<img src="https://kyzylorda-news.kz/wp-content/uploads/2020/01/22koloner3.jpg" alt="" />
<img src="https://kyzylorda-news.kz/wp-content/uploads/2020/01/22koloner4.jpg" alt="" />

Қызылордада «Жаhандық әлемдегі заманауи қолөнер мәдениеті» тақырыбында семинар өтті

<a href="https://kyzylorda-news.kz/">Kyzylorda-news.kz.</a> Қазақстанда қаңтардағы ақылы ұлттық бірыңғай тестілеу аяқталды. Тестілеуге қатысуға өтініш берген 95 440 адамның 72 520-сы – қазақ тілінде тапсыруға ниет білдірсе, 22 744 оқушы орыс тілін, 176 оқушы ағылшын тілін таңдаған.
Ұлттық тестілеу орталығы директорының міндетін атқарушы Дидар Смағұлов ақылы ҰБТ-ға қатысатындар легі артып келе жатқанын айтады. 2019 жылы қаңтарда тестілеуге бар болғаны 35 838 адам өтініш берген екен.
Бұған дейін тестілеуге тыйым салынған зат алып кіру әрекетіне түсіністікпен қарап келсе, бұл жолы алғаш рет олар автоматты түрде сынақтан шеттетілді. Мұндай оқушылар саны – 778. Тестілеуге кірер алдында қатысушылар жеке заттарын, смартфондары мен басқа да тыйым салынған заттарды қалдырып кетті. Сонда да смартфонын шоколад сияқты безендіріп, рентген кескініне орап, шаш арасына жасырып кірмекші болғандар анықталған.
ҰБТ 2019 жылдан бері жылына төрт рет: қаңтар, наурыз, маусым және тамыз айларында өткізіледі. Маусым айындағы тестілеуге қатысқан талапкерлер ғана білім беру грантын тағайындау конкурсына қатыса алады. Қалған айлардағы ҰБТ нәтижелерімен ақылы түрде жоғары оқу орындарына түсуге болады.
Тестілеу құны –&nbsp;2242 теңге.&nbsp;Жыл сайын тест тапсырмаларының базасы&nbsp;25-30 пайыз&nbsp;жаңартылады.

Ақылы ҰБТ тапсырған оқушылардың жартысынан астамы ғана қажетті балл жинаған

<a href="https://kyzylorda-news.kz/">Kyzylorda-news.kz.</a> «СК-Фармация» ЖШС басқарма төрағасының міндетін атқарушы Берік Шәріп тегін дәрілердің емханаларға жетпей қалып жатқан жағдайына қатысты түсінік берді. Еске салайық, тегін медициналық көмектің кепілдік берілген көлемі аясында дәрілік заттар мен медициналық бұйымдар емханаларға тегін жеткізілуі тиіс. Алайда бұған қатысты шағымдар да баршылық, деп хабарлайды <a href="https://lenta.inform.kz/kz/sk-farmaciya-basshysy-emhanalarga-zhetpey-zhatatyn-tegin-darilerge-katysty-tusinik-berdi_a3606291">ҚазАқпарат</a>.
<blockquote>
 «Әрине, өңірлерде кейбір кезде жоспарлау тұрғысынан мәселе туындайды. Байланыс орталығының пайда болуының ең бірінші себебі де осы. Осылайша, азаматтармен тікелей жұмыс жүргізуді жолға қойдық. Кейбір жағдайда медициналық мекемелерде дәрі-дәрмектер бітіп қалады. Кейбір медициналық мекеме керекті дәрі-дәрмек үшін өтінімді дұрыс бермей жатады. Сондықтан, әрбір азаматтың байланыс орталығына (1439 нөмірі) хабарласуына мүмкіндігі бар», – деді Берік Шәріп Парламент Сенатының депутаттарымен кездесу барысында.
</blockquote>
Оның айтуынша, мамандар әр шағымды жеке қарастырып, мәселені шешуге тырысады.
<blockquote>
 «Әрбір шағым бойынша медициналық мекемемен тікелей хабарласамыз. Әр өңірде өзіміздің дәрі-дәрмек сақтайтын қоймамыз бар. Сол қоймадан дәрі-дәрмек жібереміз. Яғни, шағым түскен өңірдегі медициналық мекемеге 2-3 күннің ішінде дәрілік заттар мен медициналық бұйымдарды жібере аламыз. Одан бөлек сирек кездесетін дәрі-дәрмекке арналған республикада төрт қоймамыз – Алматы, Шымкент, Нұр-Сұлтан мен Ақтөбеде бар. Осы фармацевтикалық төрт хабтағы дәрі-дәрмекке байланысты арыз болса, тиісті дәріні 5-7 күнде жеткізе аламыз», – деді ол.
</blockquote>
Берік Шәріптің сөзіне сенсек, «СК-Фармация» ЖШС-ның веб-сайтында дәрілік заттардың емханалардағы мөлшерін көруге болады. Яғни, әр науқас өз дертіне қарай қандай дәрі-дәрмекті алып отыр – сол дәрінің атауын веб-сайтқа енгізіп, қалғанын немесе қалмағанын көріп отыра алады.

Тегін дәрілер неге емханаларға жетпейді?

<a href="https://kyzylorda-news.kz/">Kyzylorda-news.kz.</a> Мәскеу облысының Ступино қаласында 9 жасар қыз артынан аңдып жүрген ер адамды алдап кетті. Бұл оқиға тұрғын үйдің бейнекамерасына жазылып қалды, деп хабарлайды&nbsp;<a href="https://sputniknews.kz/Russia/20200122/12600156/qyz-er-adamdy-aldady-video.html">SputnikҚазақстан</a>.
Видео әлеуметтік желілер арқылы жылдам тарап кетті. Кадрде оқушы қыздың кіреберіс есікке қарай жүріп келе жатқаны көрінеді. Ал ер адам артынан аңдып жүрді. Кішкентай қыз кіреберіске кіріп, біршама жүргеннен кейін қуысқа бұрылып кетеді. Мұны артында келе жатқан ер адам байқамай қалған. Сөйтіп, лифтке қарай өтіп кетеді.
Ер адам кіреберіс есіктің ашылғанын естігеннен кейін артқа қарай жүреді. Осы уақыттың ішінде 9 жасар қыз далаға шығып үлгереді. Ал бірнеше секундтан кейін таныс біреумен үйге кіреді.
Желі қолданушылары айла тауып құтылып кеткен қызды жарыса мақтап жатыр. Бірақ видеоны әдейі солай түсірген дейтіндер де бар. Ал кішкентай қызды аңдыған ер адамның кім екені анықталды. Ол психоневрологиялық диспансердің тіркеуінде болған.

9 жасар қыз соңынан аңдыған ер адамды алдап кетті (ВИДЕО)

<a href="https://kyzylorda-news.kz/">Kyzylorda-news.kz.</a> Қазақстанның жоғары оқу орындарында 25% арттырылған стипендия беріле бастады, деп хабарлайды ҚР Білім және ғылым министрлігінің баспасөз қызметі.
<blockquote>
 «ҚР Президенті Қ. Тоқаев Жастар жылының жабылу салтанатында 2020 жылдың қаңтарынан бастап жоғары оқу орындары мен колледж студенттерінің стипендиясы 25% көтерілетінін мәлімдеді. ҚР Білім және ғылым министрлігі жергілікті атқарушы органдармен бірлесе отырып, Мемлекет басшысының тапсырмасын орындау бойынша шаралар қабылдады. Бүгінде еліміздің 30-дан астам жоғары оқу орны студенттердің стипендиясын 25% жоғарылатты. Жергілікті атқарушы органдар тарапынан колледж студенттеріне стипендия төлене бастады. Осылайша, 179 мың ЖОО студенті мен 136 мың колледж студенті стипендиясының көлемі артады», – деді ҚР БҒМ-нің баспасөз қызметінен.
</blockquote>
Айта кетейік, бакалавриат студенттерінің стипендиясы 20 949 теңгеден 26 186 теңгеге дейін, интернатура –37 945 теңгеден 47 431 теңгеге дейін, магистратура – 53530 теңгеден 66 913 теңгеге дейін, докторантура – 81 998 теңгеден 102 498 теңгеге дейін өсті. Колледж студенттерінің стипендиясы 16 759 теңгеден 20 948 теңгеге артты.

Қазақстандық студенттердің стипендиясы 25% артты

<a href="https://kyzylorda-news.kz/">Kyzylorda-news.kz.</a> Биылғы жылдың 11 қаңтарынан бастап енген жаңа заңнамаға сәйкес түсіндірме жұмыстары жүргізілуде. Енді мас күйінде көлік жүргізгендерге қатысты жаза күшейтілді. Жаңа заң қолданысқа енгеннен бастап Қызылорда облысында ішімдік ішіп, көлік басқарған екі автокөлік жүргізушісі қолға түсті.
Оқиғаның бірі облыс орталығында, екіншісі Жаңақорған ауданында болған. Бұл туралы Өңірлік коммуникациялар орталығының ақпарат алаңында Қызылорда облысының Полиция департаменті Жергілікті полиция басқармасы бастығының орынбасары, полиция подполковнигі Азамат Оспанов мәлімдеді.
Ағымдағы жылдың 16 қаңтар күні жол сақшылары жүрісі сезікті автокөлікті тоқтатқан. Алайда көлік иесі тәртіпке бағынбай қаша жөнелген. Бірақ көп ұзамай көлік тоқтатылып, оның жүргізушісі ішімдік ішкендігі анықталды. Тексеру барысында жүргізушінің мас күйінде көлік басқарып, оның үстіне бұрын-соңды сот шешімімен жүргізу құқығынан айрылғандығы белгілі болды. Қазіргі таңда сот амалдары жүргізіліп жатыр.
<blockquote>
 «Аталған іске байланысты жүргізушіге 5 мың айлық есептік көрсеткіш көлемінде айыппұл салынып, 5 жыл бас бостандығынан және өмір бойына көлік құралын басқару құқығынан айыру жазасы қарастырылған», – дейді Азамат Оспанов.
</blockquote>
Брифинг барысында басқарма бастығының орынбасары биылдығы жылдың 11 қаңтарынан бастап күшіне енген ҚР әкімшілік құқық бұзушылық заңының жол-көлік оқиғаларына қатысты баптарына тоқталып өтті.
<blockquote>
 «Бұрынғы заңнама бойынша жүргізуші көлікті ішімдік ішіп басқаратын болса, жүргізуші куәлігінен 3 жылға айырылатын. Енді биылдан бастап мұндай іс-әрекеті үшін 7 жылға куәліктен айырылады және 15 тәулікке қамауға алынады. Бұл бірінші рет автокөлікті масаң күйде басқарғаны үшін қолданылатын жаза. Ал егер жүргізуші көлікті масаң күйде басқарып, жол көлік оқиғасын жасап, материалдық шығын келтіретін болса, 7 жылға дейін көлік жүргізу куәлігінен айырылып, 20 тәулікке әкімшілік қамауға алынады. Сонымен қатар жүргізу 3 немесе 7 жылға көлік жүрігізу куәлігінен айырылған адам сол уақыт аралығында көлік жүргізсе оған 10 тәулікке қамауға алынып және айыппұл салынатын болады», – дейді.
</blockquote>
Байқағанымыздай, жаңа заң ешкімге аяушылық танытпайды. ҚР Қылмыстық кодекске жаңадан енген 345-1-бап бойынша масаң күйде жол жүрісі немесе көлік құралдарын пайдалану қағидаларын бұзу арқылы абайсызда адамның денсаулығына ауырлығы орташа зиян, адам өліміне алып келген және абайсызда екі немесе одан көп адамның өліміне алып келген іс-әрекет үшін қылмыстық жауапкершіліктер қарастырылған. Сонымен қатар кодекстің 346 бабын күшейтуге бағытталған біршама өзгерістер мен толықтырулар енгізілген.
Динара МАХАНОВА

Қазақстан және Қызылорда облысының жаңалықтары

Күшті жел, боран, тұман және көктайғақ – Бейсенбіге арналған ауа райы

23 қаңтар:Атаулы күндер мен оқиғалар

Жұлдыздар не дейді?

Әлеуметтік көмектің құжатын қайда тапсыру керек?

Заңды тұлғалар ЭЦҚ қалай алады?

Азаматтық хал актілерін тіркеу саласына өзгерістер енді

Қызылордада «Жаhандық әлемдегі заманауи қолөнер мәдениеті» тақырыбында семинар өтті

Ақылы ҰБТ тапсырған оқушылардың жартысынан астамы ғана қажетті балл жинаған

Тегін дәрілер неге емханаларға жетпейді?

9 жасар қыз соңынан аңдыған ер адамды алдап кетті (ВИДЕО)

Қазақстандық студенттердің стипендиясы 25% артты

Қызылордада мас күйінде көлік жүргізген екі жүргізуші қолға түсті

Қазақстан және Қызылорда облысының жаңалықтары

Күшті жел, боран, тұман және көктайғақ &#8211; Бейсенбіге арналған ауа райы

23 қаңтар:Атаулы күндер мен оқиғалар

Жұлдыздар не дейді?

Әлеуметтік көмектің құжатын қайда тапсыру керек?

Заңды тұлғалар ЭЦҚ қалай алады?

Азаматтық хал актілерін тіркеу саласына өзгерістер енді

Қызылордада «Жаhандық әлемдегі заманауи қолөнер мәдениеті» тақырыбында семинар өтті

Ақылы ҰБТ тапсырған оқушылардың жартысынан астамы ғана қажетті балл жинаған

Тегін дәрілер неге емханаларға жетпейді?

9 жасар қыз соңынан аңдыған ер адамды алдап кетті (ВИДЕО)

Қазақстандық студенттердің стипендиясы 25% артты

Қызылордада мас күйінде көлік жүргізген екі жүргізуші қолға түсті

Күшті жел, боран, тұман және көктайғақ – Бейсенбіге арналған ауа райы