<a href="https://kyzylorda-news.kz/">Kyzylorda-news.kz.</a> ҚМДБ-ның Қызылорда облысы бойынша өкілдігі, қалалық «Нұр» мешітінің ұйымдастыруымен «Достық» үйінде «Жарасымды жанұя» тренингі өтті.
Қазақстан мұсылмандары діни басқармасына 30 жыл толуына орай, ҚМДБ төрағасы, Бас мүфти Наурызбай қажы Тағанұлының бастамасымен қолға алынған өнегелі шаралардың тұсаукесері – тұңғыш рет өткен жаңа форматтағы отбасылық тренинг болды.
Тренингті ашып берген «Ақмешіт-Сырдария» орталық мешітінің наиб имамы Жеңіс Әбибуллаұлы «30 жылдық мерейтойға 30 игі шара» республикалық акциясы аясында бастау алған бірқатар жобалармен таныстырып, облыстық мешітте «Діни сұрақтар бойынша кеңес беру» орталығы үздіксіз жұмыс жасайтынын айтты.
Бұдан кейін қоғамдағы өзекті мәселелердің түйіткілін түртіп, түйінін шешуге арналған тағылымы мол рухани кештің басты спикерлері: қалалық «Әл-Уәли» мешітінің Бас имамы Батырбек Тұрғанбайұлы бала тәрбиесіндегі Пайғамбар (оған Алланың игілігі мен сәлемі болсын) үйреткен тәлімді мысалға келтіре отырып, ата-ана мен бала арасында берік көпір орнату, салихалы ұрпақ өсіру туралы ой саларлық кеңестерімен бөліссе, «Нұр» мешітінің Бас имамы Марат Үркімбайұлы ерлі-зайыптылардың қарым-қатынасы, міндеттері мен құқықтары, бақытты отбасы болудың құпиясы жайында сөз қозғады.
Кеш соңында көрермендердің қатысуымен «сұрақ-жауап» ойыны ойнатылып, 3 кезең бойынша барлық сұрақтарға дұрыс жауап берген Ілесбек есімді азамат кіші қажылыққа жолдаманы жеңіп алса, одан бір ұпайға ғана есе жіберген Шынболат бауырымыз жүлделі екінші орынды иемденіп, Samsung S10 маркалы ұялы телефонды қанжығасына байлады.
Айта кетейік, мерекеге арналған мерейлі шараның басты демеушілері – үнемі шарапаты мол сауапты істердің қасынан табылатын белсенді азаматтардан құралған ҚМДБ-ның Сыр өңіріндегі өкілдігіне қарасты «Нұр» мешітінің ерікті жамағаты.
Тегін тренингке келіп, берекелі кештің куәсі болған 350-ге жуық көрермен ерекше әсерлерімен бөлісіп, ұйымдастырушыларға риясыз ризашылықтарын жеткізді. Алдағы уақытта да осындай ерекше форматтағы тағылымды жобалар көптеп жүзеге асырылуына тілек білдірді.
<img src="https://kyzylorda-news.kz/wp-content/uploads/2020/02/12trening2.jpg" alt="" />
<img src="https://kyzylorda-news.kz/wp-content/uploads/2020/02/12trening3.jpg" alt="" />

Қызылордалық азамат қажылыққа тегін жолдама алды

<a href="https://kyzylorda-news.kz/">Kyzylorda-news.kz.</a> &nbsp;Қызылорда облысында түнде және таңертең кей жерлерде көктайғақ, бұрқасын болады.
Жел оңтүстік-батыстан оңтүстік-шығысқа ауысады, жылдамдығы кей жерлерде 15-20 м/с-ге жетеді. Ауа райы болжамының дәлдігі 95-100%.

Қызылорда облысында ауа райына байланысты ескерту жарияланды

<a href="https://kyzylorda-news.kz/">Kyzylorda-news.kz.</a> Жамбыл облысына қарасты Масанчи ауылында орын алған келеңсіз жағдай баршамызды алаңдатып отыр.
Ислам ешкімді дініне, ұлтына, нәсіліне және жынысына қарап бөлінуді құптамайды. Адамзаттың ардақтысы болған Пайғамбарымыз (Алланың оған игілігі мен сәлемі болсын)&nbsp; да былай дейді: «Уа, адамдар! Естеріңде болсын! Раббыларың біреу, ешбір араб араб еместен, араб емес арабтан, ақтың қарадан, қараның ақтан діндарлығынан басқа ешқандай артықшылығы жоқ. Күмәнсіз Алланың алдында ең мәртебелілерің діндар болғандарың». Яғни, мұсылман адамның өзінің діндес бауыры түгілі, өзге дін өкіліне де зиян келтірмеуін, құрметпен қарауын аманат еткен.
Қоғам ішіндегі бүлікшілік пен алауыздыққа жол бермеу – әрбір мұсылманға парыз. Себебі, асыл дініміз ислам – татулық пен бейбітшілікке үндеуші дін. Демек, «алтау ала болса ауыздағы кетеді» демекші, мәселенің анық-қанығына жетпестен, алауыздыққа бой алдырып, тыныштығымызды бұзғанша&nbsp; ортақ ымыраға келуіміз қажет.
Құрметті бауырлар, жекелеген адамдардың өзара келіспеушіліктерін бұқараралық сипаттағы дауға ұластырып, білместікпен өзге мұсылмандарға&nbsp; жапа шеккізуден сақ болайық.
Қаншама ұлттар мен ұлыстарды панасына алып отырған мемлекетіміз де өзара татулық пен келісімді нығайту бағытында көптеген игі бастамаларды жүзеге асыруда. Осыған орай асыл дініміз бен ата заңымыз бұйырғандай, елі ішіндегі бүлік пен іріткі салудың алдын алып, қоғам тыныштығының бұзылуына жол бермеуге шақырамын.
Алла Тағала&nbsp; халқымыхдың ынтымақ-бірлігін арттырып, ел амандығы мен жұрт тыныштығын сақтағай! Әмин!
Болатбек АБУОВ,
ҚМДБ-ның Қызылорда облысы бойынша Бас имамы
(Жазып алған Нұрсұлтан МЫҚТЫБАЙ)

Қызылорда облысының Бас имамы қоғам тыныштығының бұзылуына жол бермеуге шақырды

<a href="https://kyzylorda-news.kz/">Kyzylorda-news.kz.</a> &nbsp;Өзбекстан астанасы Ташкентте ауыр атлетикадан өткен халықаралық турнирде жерлесіміз Илья Ильин чемпион атанып, еліміздің Əнұранын шырқатты.
Ол 102 келі салмақта сынға түсіп, жұлқа көтеру 160, серпе көтеру 195 келіні көтеріп, қоссайыс нəтижесінде 355 келіні бағындырды.
Ол Токиодағы Олимпиада ойындарына жолдама алу үшін ұпай жинайтын жарыстарға кезеңімен қатысуда.
Енді сəуір айында Нұр-Сұлтан қаласында ауыр атлетикадан өтетін Азия чемпионатына Илья Ильин бастаған Сыр спортшылары Евгений Ломанов, Рүстем Сыбай, Рахат Бекболат жəне Айсамал Сансызбаева қатысады.
Айта кетейік, қызылордалық ауыр атлет допинг дауынан кейін тағы да чемпион атанды.
Динара МАХАНОВА
<img src="https://kyzylorda-news.kz/wp-content/uploads/2020/02/12iliya2.jpg" alt="" />
<img src="https://kyzylorda-news.kz/wp-content/uploads/2020/02/12iliya3.jpg" alt="" />

Илья Ильин – чемпион

<a href="https://kyzylorda-news.kz/">Kyzylorda-news.kz.</a> Қазақстан Республикасы сауда және интеграция министрлігінің тұтынушылардың құқықтарын қорғау комитеті Қызылорда облысының тұтынушылардың құқығын қорғау&nbsp; департаменті 2020 жылдың 19 ақпанында тұтынушылардың құқығын қорғау сұрақтары бойынша ашық есік күнін өткізеді.
Облыстық департаменттің мамандары азаматтарды департаменттің әкімшілік ғимаратында сағат 09.00-ден 18.30-ға дейін (түскі үзіліс сағат 13.00-14.30) күтеді.
Туындаған сұрақтар бойынша төмендегі мекен-жайға хабарласуға болады. Қызылорда қаласы, Абай даңғылы №52 үй.
Әділет департаментінің ғимараты, №407-414 кабинет.
Байланыс телефоны 8 (7242) 23-50-66, 23-50-72.

Қызылордадағы тұтынушылардың құқығын қорғау  департаментінде ашық есік күні өтеді

<a href="https://kyzylorda-news.kz/">Kyzylorda-news.kz.</a> Бүгін Жалағаш ауданында еріктілер жылы аясында білім саласы қызметкерлерінің «Біз біргеміз – берік іргеміз» атты аудандық форумы өтті.
Оған аудан әкімі Қайратбек Сәрсенбаев, облыстық білім басқармасының тәрбие және өзін-өзі тану бөлімінің басшысы Мәди Бекмағанбетов, Сырдария ауданының волонтерлар жетекшісі, мектеп басшылары, оқушылардан құралған волонтерлар тобы, БАҚ өкілдері қатысты.
Форум аясында «Таза әлем» жобасымен тұрмыстық қалдық өнімдерін жинау арқылы тазалыққа бей-жай қарамайтын еріктілер тобының жұмысын насихаттау үшін №38 орта мектеп оқушысы Мәди Бижан, «Қауіпсіз жол» акциясы негізінде аудан мектептерінің «Жас жол инспекторларынан құралған волонтерлар тобының жұмыс нәтижелерімен Дидар Өмірзақ, «Саулық» бағыты бойынша денсаулық сақтау саласымен бірлесіп жасалып жатқан «Салауатты өмір салтын сақтайық» акциясының маңыздылығы туралы Аружан Нұрадин, оқушылардың қолынан жасалған қолөнер бұйымдарынан көрме ұйымдастырып, өздерінің бұйымдарын ерекше білімді қажет ететін оқушылардың туған күніне, мерекелік қайырымдылық жасау бағытында шаралар өткізіп келе жатқан №201 мектеп-лицейінің волонтерлар тобының жетекшісі Еркінқызы Нәзия, төтенше жағдайлар, орман шаруашылығы мекемелерімен бірлесіп қауіпті аймақтарға белгілер ұйымдастырып келе жатқан волонтерлар тобы атынан Т.Жүргенов атындағы №123 мектеп-лицей оқушысы Инабат Тыныштықбай сөз сөйлеп, бейне-ролик арқылы жүргізілген жұмыстарын көрсетті.
Аудан әкімі Қайратбек Сәрсенбаев, облыстық білім басқармасының тәрбие және өзін-өзі тану бөлімінің басшысы Мәди Бекмағанбетов сөз сөйлеп, белсенді жастарға сәттілік тіледі. Форум соңында еріктілер жылының эстафетасын Жалағаш ауданы Сырдария ауданына табыстады.
<img src="https://kyzylorda-news.kz/wp-content/uploads/2020/02/12zhalagashforum2.jpg" alt="" />
<img src="https://kyzylorda-news.kz/wp-content/uploads/2020/02/12zhalagashforum3.jpg" alt="" />
<img src="https://kyzylorda-news.kz/wp-content/uploads/2020/02/12zhalagashforum4.jpg" alt="" />

Жалағашта білім қызметкерлерінің форумы өтті

<a href="https://kyzylorda-news.kz/">Kyzylorda-news.kz</a>. Бүгін Қызылорда облысының әкімі Қуанышбек Ысқақов «Сыр медиа» ЖШС-ның жұмысымен танысты. Серіктестікке қарасты редакцияларды арнайы аралап, баспаханадағы газет басылу процесін көрді.
Мемлекеттік мүддені қалың көпшілікке жеткізіп, қоғамдағы өзгерістерге сай көзқарас қалыптастыруда аймақтық медианың маңызы зор. Осы орайда облыстағы бірнеше басылымды бір шаңырақ астына топтастырған «Сыр медиа» серіктестігі елдік мұраттарға қызмет ету жолында сенім биігінен түскен емес.
Он жылға жуық тарихы бар медиабірлестік құрамында әуелгі жылдары бір өзеннің қос саласындай қатар өрілген «Сыр бойы» және «Кызылординские вести» газеттері болды. 2013 жылы оған қалалық, аудан­дық ресми басылымдар қосылып, жұмыс ауқымы кеңейді. Облыс әкімдігінің қол­дауы нәтижесінде содан бері «Сыр медиа» еліміз бойынша өнімін өз баспаханасынан шығарып, өзі тарататын іргелі ұйымға айналды.
«Сыр медиа» ЖШС мем­лекеттік саясатты, республика мен өңір жаңалықтарын ха­лық­қа дер кезінде мазмұнды түрде жеткізу қызметін қа­зіргі заман талаптарына сәй­кес жаңашылдықпен жүр­гі­зіп келеді. Бүгінде бар­лық басы­лымның сайттары, сондай-ақ 2011 жылы ашылған «Kyzylorda-news.kz» ақпарат агент­тігі саясат, экономика, білім беру, денсаулық сақтау, спорт, мәдениет және өзге де салалар бойынша қоғамның тыныс-тіршілігі туралы оқыр­манға жедел әрі сенімді ақпарат таратуды жолға қойды.Бүгінде 500-ден астам адам еңбек ететін «Сыр медиа» серіктестігі ел игілігіне жарайтын бастамаларымен қалың бұқараға жақсылықтың жаршысы, ұлағатты істердің ұйытқысы ретінде белгілі.
Облыс әкімі «Сыр медиа» серіктестігінің жұмысына жан-жақты қаныққан соң «Сыр медиа» академиясында» медиахолдинг ұжымымен кездесті. Жүздесуде «Сыр медиа» ЖШС-ның бас директоры Аманжол Оңғарбаев серіктестіктің атқарып келе жатқан жұмыстары туралы егжей-тегжейлі баяндап берді. Жиын соңында облыс әкімі медиахолдингтің атқарып келе жатқан жұмыстарына оң бағасын беріп, алғысын жеткізді.
<img src="https://kyzylorda-news.kz/wp-content/uploads/2020/02/01-1.jpg" alt="" />
<img src="https://kyzylorda-news.kz/wp-content/uploads/2020/02/02.jpg" alt="" />
<img src="https://kyzylorda-news.kz/wp-content/uploads/2020/02/03.jpg" alt="" />
<img src="https://kyzylorda-news.kz/wp-content/uploads/2020/02/05.jpg" alt="" />
<img src="https://kyzylorda-news.kz/wp-content/uploads/2020/02/06.jpg" alt="" />
<img src="https://kyzylorda-news.kz/wp-content/uploads/2020/02/07.jpg" alt="" />
<img src="https://kyzylorda-news.kz/wp-content/uploads/2020/02/08.jpg" alt="" />
Суреттерді түсірген Нұрболат НҰРЖАУБАЙ

Қызылорда облысының әкімі «Сыр медиа» серіктестігінде болды (ФОТО)

<a href="https://kyzylorda-news.kz/">Kyzylorda-news.kz.</a> Қызылорда «Болашақ» университеті мен «Болашақ» Ғылыми-зерттеу институты 2014 жылдан бастап чехиялық «Sociosféra-CZ» Ғылыми-баспа орталығымен ынтымақтастықта жұмыс істеп келеді.
«Болашақ» ҒЗИ және «Sociosféra-CZ» ҒЗО бір-біріне ғылыми материалдар мен әдебиетпен, оның ішінде тараптардың әрқайсысының қолдауымен шығарылған әдебиеттермен алмасуға жәрдемдеседі және өзара алмасу әрбір елдегі қолданыстағы заңнамаға сәйкес жүргізіледі. Екі тарап қолда бар мүмкіндіктерді негізге ала отырып, келесі жұмыстарды атқаруға ұмтылады: бірлескен ғылыми зерттеулер жүргізу; бірлескен семинарлар, конференциялар, симпозиумдар өткізу; ынтымақтастық мәселелерінің бүкіл кешені бойынша жарияланымдармен алмасу.
2014 жылдан бастап «Болашақ» ҒЗИ төрт халықаралық ғылыми-тәжірибелік конференция бойынша бірлескен жұмыстарды бастады. Соңғы жылдардағы бірлескен жұмыстар «Қазіргі шарттардағы тәрбиенің мақсаттары, міндеттері мен құндылықтары» және «Адам мен қоғам қауіпсіздігі әлеуметтік-гуманитарлық ғылымдардың мәселесі ретінде» атты Халықаралық ғылыми-тәжірибелік конференциялар шеңберінде жүргізілуде.
Біздің ойымызша, конференция материалдарында жарияланған баяндамалардың сандық көрсеткіштеріне назар аударғанымыз жөн:
<img src="https://kyzylorda-news.kz/wp-content/uploads/2020/02/12tabkaz1.jpg" alt="" />
Осы мәліметтерден бес жыл ішінде 284 баяндама жарияланғаны көрініп тұр. Баяндамалар 9 елдің ғалымдары, оқытушылары, студенттері, аспиранттары мен докторанттарының&nbsp; авторлығында жазылған: Австрия, Армения, Әзірбайжан, Беларусь, Қазақстан, Өзбекстан, Польша, Ресей, Украина. 2020 жылы аталмыш конференциялар Қызылорда облысы бойынша саяси зерттеулер ассоциациясының филиалы, Краснодар қаласындағы Әскери байланыс академиясының филиалы және Пенза мемлекеттік технологиялық университетімен бірлесіп өткізіледі. Конференцияның ресми тілдері – қазақ, орыс, ағылшын. Жоғарыдағы конференциялардың халықаралық ұйымдастыру комитетінің құрамына «Болашақ» ҒЗИ директоры, саяси ғылымдарының кандидаты, қауымдастырылған профессор М.Ө. Насимов кіреді. 2018 жылғы Қызылорда «Болашақ» университетінің институционалдық аккредиттеуі кезінде Білім сапасын қамтамасыздандыру бойынша тәуелсіз агенттігі (БСҚТА)&nbsp;сарапшылары осы жұмыстар кешенін жоғары оқу орындары үшін оң тәжірибе екендігін атап өтті.

«Болашақ» университеті шетелдік орталықтармен тығыз байланыста

<a href="https://kyzylorda-news.kz/">Kyzylorda-news.kz.</a> &nbsp;Бұл туралы Мемлекет басшысы Қасым-Жомарт Тоқаевтың қатысуымен өтіп жатқан волонтерлердің «Birgemiz» республикалық фронт-кеңсесінің ашылу салтанатында айтылды.
Айта кетсек, Президент елордада волонтерлерге арналған фронт-кеңсенің ашылу салтанатына қатысып жатыр.

Қасым-Жомарт Тоқаев Қазақстандағы волонтерлер қозғалысының құрметті елшісі атанды

<a href="https://kyzylorda-news.kz/">Kyzylorda-news.kz.</a> Қазақстан Президенті Қасым-Жомарт Тоқаев «Birgemiz» республикалық фронт-кеңсесінің орталықтары еліміздің барлық өңірінде ашылатынын мәлім етті, деп хабарлайды <a href="https://www.inform.kz/kz/memleket-basshysy-volonterlerdin-front-kensesi-barlyk-onirde-ashylatynyn-malimdedi_a3613696">ҚазАқпарат</a>.
<blockquote>
 «Бүгін бәріміз ерекше тарихи оқиғаға байланысты елордада жиналып отырмыз. Бұл еліміздің тарихында мұндай іс-шара бұрын болған жоқ. Биыл Волонтерлар жылында көптеге ауқымды жобалар қолға алынады. Осы арнайы кеңседе өте маңызды бастамалар жүзеге асады деп сенемін. Мұндай орталықтар еліміздің барлық өңірінде ашылады», – деді Мемлекет басшысы елордадағы Birgemiz» республикалық фронт-кеңсесінің ашылу салтанатында.
</blockquote>
Айта кетсек, Президент Қасым-Жомарт Тоқаев елордада ЭКСПО көрмесінің «Art Hub» павильонында орналасқан волонтерлердің «Birgemiz» республикалық фронт-кеңсесінің ашылу салтанатына қатысуда. Волонтер жылы аясында фронт-кеңсенің ашылуы барысында «QQQAZVOLUNTEER.KZ» онлайн платформасының қызметі және волонтерліктің «Bilim», «Qamqor», «Úmit», «Sabaqtastyq», «Taza Álem» және «Saulyq» атты 7 салалық бағыт бойынша алаңдары таныстырылады.
Фронт-кеңсе бүкіл Қазақстанның волонтерлері үшін кеңес беру, әдістемелік, оқыту және ақпараттық орталыққа айналатын болады. Сондай-ақ, ол волонтерлік жобалар мен оқыту бағдарламаларын үйлестіру, мониторинг жасау, волонтерлікті ілгерілету бойынша бірыңғай ақпараттық саясатты жүргізеді және бірыңғай Call-орталықтың жұмысын ұйымдастырады.

Қызылордада волонтерлердің фронт-кеңсесі ашылады

<a href="https://kyzylorda-news.kz/">Kyzylorda-news.kz.</a> Қармақшы ауданында облыстық ардагерлер кеңесінің көшпелі алқасы өтті.
Облыстық жиын басталмас бұрын Жосалы кентіндегі Ш.Уәлиханов атындағы №26 орта мектебінде бастауыш ардагерлер ұйымының және Қармақшы аудандық денсаулық сақтау саласының бастауыш ардагерлер ұйымының, аудандық ішкі істер саласының бастауыш ардагерлер ұйымының жұмыстарымен танысты.
Сонымен бірге аудандық ардагерлер үйінде болып, былтырғы жылы атқарылған жұмыстарды саралады.
Аудан әкімдігінің мәжілісінде өткен жиынға облыстық ардагерлер кеңесінің төрағасы Серік Дүйсенбаев, облыстық ардагерлер кеңесі төрағасының кеңесшісі Әбілханов Рахым Әбілханұлы,облыстық ардагерлер кеңесінің мүшесі Дайрабай Искаков және аудандық мәслихат хатшысы Марат Наятұлы, кент, ауылдық округтердегі бастауыш ардагерлер ұйымының төрағалары, мекеме басшылары, бұқаралық ақпарат құралдарының өкілдері қатысты.
Алғашқы сөзді аудан әкімі Мұса Қалдарбеков алып,&nbsp; ауданымыздағы әлеуметтік – экономикалық дамуындағы атқарылған жұмыстар мен алдағы жоспарлары жайлы бөлісті.
Сонымен бірге, облыстық ардагерлер кеңесінің Қармақшы ауданындағы көшпелі алқасын аудандық ардагерлер кеңесінің төрағасы Қаршыға Есдәулетов жүргізіп, Жаңажол ауылдық округінің бастауыш ардагерлер кеңесінің төрағасы&nbsp; Тәуекелов Бақытбек, Төретам кентінің бастауыш ардагерлер ұйымының төрағасы Аралбаев Смағұл сөз сөйлеп, ұсыныс – пікірлері тыңдалды.
Алқа мәжілісі барысында облыстық ардагерлер кеңесінің төрағасы&nbsp; Серік Дүйсенбаев сөз алып, қасиетті Қармақшы өлкесіндегі ардагерлерді ардақтау мақсатында атқарылған шаруаларға ризашылығын жеткізді.
<blockquote>
 «Сіздер ауданымыздың қалыптасып дамуының куәгерісіздер. Сол себептен ауданымыз үшін маңызды көптеген мәселелер бойынша Сіздердің ақыл-кеңестеріңіз, ағалық қолдауларыңыз біздер үшін маңызды. Сіздердің даналықтарыңыз бен өмірлік тәжірибелеріңіз әрқашан көптеген мәселелерді шешуге көмектеседі», – деп атап өтті аудан әкімі.
</blockquote>
<img src="https://kyzylorda-news.kz/wp-content/uploads/2020/02/12karmardager2.jpg" alt="" />

Қармақшыда облыстық ардагерлер кеңесінің алқасы өтті

<a href="https://kyzylorda-news.kz/">Kyzylorda-news.kz.</a> Елордада Қазақстан Президенті Қасым-Жомарт Тоқаевтың қатысуымен волонтерлердің «Birgemiz» республикалық фронт-кеңсесінің ресми ашылуына арналған шара басталды, деп хабарлайды <a href="https://lenta.inform.kz/kz/prezident-elordadagy-volonterler-front-kensesinin-ashylu-saltanatyna-katysuda_a3613676">ҚазАқпарат</a>.
ЭКСПО көрмесінің «Art Hub» павильонында орналасқан фронт-кеңсенің ашылуы барысында «QQAZVOLUNTEER.KZ» онлайн платформасының қызметі және волонтерліктің «Bilim», «Qamqor», «Úmit», «Sabaqtastyq», «Taza Álem» және «Saulyq» 7 салалық бағыты бойынша алаңдары таныстырылады. Аталған жобаларды жүзеге асыру аясында азаматтардың нақты жергілікті мәселелерді шешудегі талпынысын қолдау үшін шағын гранттар бөлу қарастырылуда.
Фронт-кеңсе бүкіл Қазақстанның волонтерлері үшін кеңес беру, әдістемелік, оқыту және ақпараттық орталыққа айналатын болады. Сондай-ақ, ол волонтерлік жобалар мен оқыту бағдарламаларын үйлестіру, мониторинг жасау, волонтерлікті ілгерілету бойынша бірыңғай ақпараттық саясатты жүргізеді және бірыңғай Call-орталықтың жұмысын ұйымдастырады.
<img src="https://kyzylorda-news.kz/wp-content/uploads/2020/02/12frontoffis2.jpg" alt="" />

Қазақстан және Қызылорда облысының жаңалықтары