<a href="https://kyzylorda-news.kz/">Kyzylorda-news.kz</a>. ҚР АШМ баспасөз қызметі Қазақстан аймақтарындағы көктемгі егіс жұмыстарының барысы туралы ақпараттандырды жариялады. Бүгінде Алматы, Жамбыл және Түркістан облыстарынан кейін Қызылорда өңірінде егіс науқаны басталды.
Ағымдағы жылы Қызылорда облысы бойынша 183,1 мың гектарға егiс егу жоспарланып отыр. Оның ішінде негізгі дақыл күрiштің көлемі 88,2 мың гектар. Ал, басқа дәндi дақылдар 9,8 мың, майлы дақылдар 6 мың, мал азықтық дақылдары 61,6 мың, картоп, көкөнiс, бақша 17,7 мың гектарға егіледі.
Бүгінде өңірде егілген егіс көлемі 27,8 мың гектар, оның ішінде 3,8 мың&nbsp;(100,5%)&nbsp;гектары – жаздық бидай, 600 гектарға&nbsp;(жоспардың 105,6%)&nbsp;жаздық арпа,&nbsp; 4,8 мың гектар(85,7%)&nbsp; – мақсары,&nbsp; 18,6 мың гектар&nbsp;(98,9%)– жоңышқа.
Өңірдің негізгі дақылы «күрішті» егу жұмыстары сәуір айының 20-нан кейін басталады деп күтілуде.
Облыста егіс көлемдерін әртараптандыру бағытында биылғы жылы соя дақылын 290 гектарға, қант қызылшасын 200 гектарға ұлғайтуды және 164 гектар жерге жеміс-жидек, жүзім отырғызу межеленіп отыр. Бұрын облыста 366,7 гектарға – алма, &nbsp;2,2 гектарға – жүзім, 37,4 гектарға – басқа жеміс-жидектердің түрлері егілетін.
Сонымен қатар, су үнемдеу технологиясын қолдану арқылы барлығы 200 гектар жерге ауыл шаруашылығы дақылдарын орналастыру жоспарлануда. Оның 80 гектарына ылғал сақтағыш технологиясын пайдалану арқылы 80 гектарға күздік бидай егілген. Тамшылатып суару әдісімен – 23 гектарға жеміс, көкөніс, бақша дақылдары, жаңбырлатып суару әдісімен – 97 гектарға жүгері, жоңышқа дақылдары егіледі.
Аймақта егістікке қажетті минералдық тыңайтқыштар мен тұқымдық материалдар толық қамтамасыз етілген. Ауыл шаруашылығы техникалары толықтай дайындалып, егіс егу науқанына қатысуда.
Облысқа 2020 жылдың көктемгі егіс және дала жұмыстарын жүргізуге&nbsp; 14 мың тонна арзандатылған дизель отыны бөлінген. Наурыз айына бөлінген 3250 тонна дизель отыны облысқа жеткізіліп, шаруашылықтарға толығымен таратылды. Сәуір айына бөлінген 4615 тонна дизель отынына толық келісім-шарт жасалып, 1479 тонна дизель отыны облысқа жеткізіліп, оның 700 тоннасы шаруашылықтарға таратылды.
Мемлекет басшысының дизель отынының бағасын арзандату бойынша берген тапсырмасына сәйкес, бүгінде арзандатылған дизель отынының бағасы әр литрге 162 теңгені құрап отыр.
Облыста 2020 жылы межеленген егіс көлемдеріне сәйкес, көктемгі дала және егіс егу жұмыстарына қажетті қаржы көлемі 8,5 млрд. теңгені құрап отыр.
«Аграрлық несие корпорациясы» АҚ арқылы 19 шаруашылық құрылымы 339,4 млн теңгеге, «Агрохолдинг Қызылорда» ЖШС арқылы 34 шаруашылық құрылымы 489,6 млн теңгеге қаржыландырылған. Фермерлерді қаржыландыру жұмыстары жалғастырылуда.

Биыл Қызылорда өңірінде 88,2 мың гектарға күріш егіледі

<a href="https://kyzylorda-news.kz/">Kyzylorda-news.kz.</a> Қызылорда облысының әкімдігінде мамыр айында тойланатын мерекелік шараларды өткізуге байланысты жұмыс тобының отырысы өтті. Оған облыс әкімінің орынбасары Серік Ахмет жетекшілік жасап, алдағы мерекелердің маңыздылығына тоқталды.
Бұған дейін кең ауқымда аталып өтіп жүрген шаралар биыл онлайн форматта жүргізіледі. Бұл елімізде енгізілген төтенше жағдайға байланысты қабылданған. Сондықтан тиісті салалар бойынша нақты жоспар әзірленіп, көпшілікке мазмұнды, қызықты іс-шаралар тізбегін ұйымдастыру жоспарланып отыр.
Облыстық Қазақстан Халқы ассамблеясының хатшысы Ләйлә Төрешова 1 мамыр – Қазақстан халқы бірлігі күніне арналған іс-шаралар жоспарымен таныстырды. Бұл бағытта онлайн форматта ұлттар достығын дәріптейтін маңызды шаралар өткізілетін болады. Біздің өңірде 11 этно мәдени орталық бар. Мерекелік шара барысында сол орталықтардың жұмысы кеңінен қамтылады.
Облыстық ішкі саясат басқармасы басшысының міндетін атқарушы Еркін Әбішев 7 мамыр – Отан қорғаушылар және 9 мамыр – Жеңіс күніне арналған мерекелік іс-шаралар барысын баяндап берді. Өңірдегі төтенше жағдайға байланысты бұл атаулы күндерді де онлайн форматта өткізу жоспарланған. Қазіргі таңда Қызылорда қаласы мен аудандардағы негізгі көшелерде көзі тірі соғыс ардагерлерін кеңінен насихаттау мақсатында билбордтар дайындауға мән берілуде. Орталық көшелер тақырыпқа сәйкес безендіріледі. Сонымен қатар, патриоттық әндер байқауы, қарт майдангерлер ерлігін бұқаралық ақпарат құралдары арқылы насихаттауға баса көңіл бөлінген.
Отырыс барысында облыстық жұмыспен қамтуды үйлестіру және әлеуметтік бағдарламалар басқармасының басшысы Талғат Дүйсебаев қарт майдангерлерге мемлекет тарапынан көрсетілетін көмектер жайын да айтты. Ал облыстық ардагерлер кеңесінің төрағасы Серік Дүйсенбаев өзі басқаратын ұйым тарапынан атқарылатын іс-шараларды әңгімелеп берді.
Облыс әкімінің орынбасары сөз түйінінде алдағы мерекелерді жоғары деңгейде атап өтуге көңіл бөлу қажеттігіне назар аударды. Тиісті салалар бойынша нақты жұмыстар жасалып, ел арасында насихаттық мүмкіндіктер барынша дұрыс ұйымдастырылуы қажет.

Қызылордада мамыр айындағы мерекелер онлайн форматта өтеді

<a href="https://kyzylorda-news.kz/">Kyzylorda-news.kz.</a> Жерге тіккен жас шыбық тамырын жайып, мәуелі бәйтерекке айналар осы бір шуақты сәт көгалдандыру жұмыстарын жүргізуге таптырмайтын мезгіл саналады. Мамыражай мезгілдің ерекшелігін ерте түйсінген ата-бабамыз атыз-арықты қоқыстан тазартып, тал-терек егіп мәре-сәре болысқан.
Атадан қалған осынау игі бастаманы жалғастырған Қызылорда облысы Төтенше жағдайлар департаменті мен Өрт сөндіру қызметінің жеке құрамы жыл сайын көктем мезгілінде тал егуді дәстүрге айналдырған.
Бұл жылы да арнайы алынған 150 түп көшет өрт сөндіру бөлімдер мен департамент ғимаратының көшелеріне егілді.
<blockquote>
 &nbsp;«Тал егу акциясы – сауапты іс». Әрі жайқалған әрбір ағаш бейбітшілік нышаны, сондай-ақ, табиғаттың нәзіктілігі екенін естен шығармауымыз керек», – деді департамент бастығы азаматтық қорғау полковнигі Омар Бержанов.
 «Бүгінгі егілген әрбір көшет тамыр тартынына сенімдіміз, себебі әрдайым көмекке ділгір құтқарушы өрт сөндірушілердің риясыз көңілімен отырғызылды. Осындай игі бастаманы шаһардың әрбір тұрғыны атсалысса жасыл желектің көркіне күмән келтірер жан болмас еді», – деді Қызылорда облысы ТЖД Өрт сөндіру және авариялық-құтқару жұмыстары қызметінің маманы Әлия Ережепова.
</blockquote>
<img src="https://kyzylorda-news.kz/wp-content/uploads/2020/04/tal-egw-ort-kaz-2-1.jpg" alt="" />
<img src="https://kyzylorda-news.kz/wp-content/uploads/2020/04/tal-egw-ort-kaz-3-1.jpg" alt="" />
<img src="https://kyzylorda-news.kz/wp-content/uploads/2020/04/tal-egw-ort-kaz-4.jpg" alt="" />

Қызылордада төтеншеліктер дәстүрлі тал егу шарасын өткізді (ФОТО)

<a href="https://kyzylorda-news.kz/">Kyzylorda-news.kz</a>. Бүгін Қызылордаға Ресейден&nbsp; 42 студент келді. Олардың арнайы автобуспен елге жетуін Ресейдегі Қазақстан елшілігі қамтамасыз етті. Облыс жастарын орталық директоры Бауыржан Мастеков, облыстық жастар саясаты мәселелері басқармасы басшысының міндетін атқарушы Нұркен Мықбасовпен&nbsp; бірге тиісті сала өкілдері күтіп алды.
1 «Б» категориясына жататын елден келгендіктен студенттер енді арнайы тест сынамаларын тапсырады. Соның қорытындысы негізінде тұрғылықты жері бойынша 14 күн үй жағдайындағы карантинге қатаң бақылауға алынады немесе қандай да бір күдік болған жағдайда провизорлық стационарға жіберіледі.
Айта кетейік, облыс әкімдігі мен Ресей Федерациясының университеттері арасындағы екіжақты меморандумға сәйкес, бүгінде Мәскеудің және Санкт-Петербургтың маңдайалды оқу орындарында 328 жас білім алуда. Бұған дейін 62 қызылордалық елге оралды.
Бұл ретте басты мәселе –&nbsp; жастардың жауапкерлігі, сақтыққа салғырттық танытпауы болып отыр.
Себебі, осы кезге дейін Шиелідегі бір ғана оқиға талай отбасын вирус құрсауына алып, опық жегізді.
<img src="https://kyzylorda-news.kz/wp-content/uploads/2020/04/stwdentter-keldi-kaz-_-2.jpeg" alt="" />
<img src="https://kyzylorda-news.kz/wp-content/uploads/2020/04/stwdentter-keldi-kaz-_-3.jpeg" alt="" />

Қызылордаға Ресейден келген 42 студент оқшауланды (ФОТО)

<a href="https://kyzylorda-news.kz/">Kyzylorda-news.kz</a>. Қармақшы ауданында жарқын бастамалар жүзеге асады. Бұл туралы аудан әкімі Мұса Қалдарбеков мәлімдеді.
Оның айтуынша, еліміздегі ерекше экономикалық жағдайға байланысты «Жұмыспен қамтудың жол картасы» бағдарламасы жүзеге асуда. Бағдарлама негізінде жаңа жұмыс орындарын құруға, тұрғындардың әлеуметтік мәселелерін шешуге, әл-ауқатын арттыруға бағытталған.
Бүгінде ауданда «Жұмыспен қамтудың жол картасы» шеңберінде жүзеге асырылатын жобалар тізіміне бірнеше нысандардың қайта жаңғыртылуы мен жөндеу жұмыстары кіріп отыр.
Мәселен, Төретам кентіндегі бірқатар электр желілерінің 80% тозығы жеткен. Бұл қыс айларында соққан желдер мен борандардың кезінде электр желілері сөніп қалып немесе электрдің кернеуі көбейіп кетіп тұрғындарды әбігерге түсіретін еді.
Осы мәсені шешу мақсатында үстіміздегі жылы тапсырысты облыстық энергетика басқармасы арқылы Төретам кенті мен Ақай ауылдық округіндегі 6-10/0,4 кВ электр желілерін кеңейту және қайта жаңғырту, Төретам кентіндегі №22 35/10 кВ қосалқы стансасын кеңейту және қайта құрылымдау құрылыс жұмыстары басталады.
Сонымен бірге аудандағы 6 әлеуметтік нысандар, елді-мекендердегі 6 көшеге орташа жөндеу жұмыстары, 4 көшеге жаяу жүргіншілер жолын салуға, 14 көшеге жарықтандыру жұмыстары, 3 нысанға абаттандыру жұмыстары жүргізіліп 236 тұрақты және уақытша жұмыс орындарын ашу жоспарланған.
Жосалы кенті мен Төретам кентіне спорттық тренажерлық және стритболдық алаңдарының құрылысы, Төретам кентіндегі 4 көшеге орташа жөндеу жұмыстары жүргізілетін болады.
<blockquote>
 «Негізгі қаржы өлкеміздің инженерлік-көліктік инфрақұрылымын жақсартуға бағытталған. Қабылданған шаралардың нәтижесінде ауданымызда тұрақты және уақытша жұмыс орындары құрылып, жұмыссыздық деңгейі төмендейді ауданымыздың әлеуметтік экономикалық жағдайы жақсарады», – дейді Қармақшы ауданының әкімі М. Қалдарбеков.
</blockquote>

Қармақшыда жарқын бастамалар жүзеге асады

<a href="https://kyzylorda-news.kz/">Kyzylorda-news.kz.</a> Елімізде төтенше жағдай жариялануына байланысты Қорқыт ата атындағы Қызылорда мемлекеттік университеті 16 наурыздан бастап қашықтан оқыту жүйесіне толғымен көшті.
Осыған орай, Информатика және ақпараттық-коммуникациялық технологиялар кафедрасының оқытушылары өз сабақтарында қашықтан оқыту технологияларын пайдаланып, студенттерге дәрістерді үздіксіз жүргізуде.
Басында оқыту форматы Платонус ақпараттық жүйесінде чат дәрістер негізінде бастау алған болса, екінші аптадан оқу үдерісін одан әрі сапалы және тиімді ұйымдастыру үшін университет педагогтары мен студенттері түрлі ZOOM, Google Classroom.com, Moodle, Telegram, Скайп ақпараттық платформаларында еркін жұмыс істей бастады.
Сондай-ақ оқытушылар мен студенттерге Coursera, Лекториум, МООК сияқты білім порталдарында орналасқан видеодәрістер мен онлайн курстар ұсынылды.
Қашықтан білім беру жағдайында туындаған бар­лық сұрақтарға жауап беру мақсатында университет сайтына Call орталығы туралы ақпарат орналастырылып, онда келіп түскен сұрақтарға дер кезінде жауап берілуде.
Айта кететін нәрсе – барлық сабақтар кестеге сәйкес, байланыс сағаттары онлайн режимге өткізіледі.
Бүған онлайн-лекциялар, бейне-лекциялар, өзіндік онлайн-жұмыс, онлайн-курстар, чат-сабақтар, скайп, теле-сабақтар және т.б. кіреді.
Егер студенттер үйлеріне қайтып кетсе және интернет жұмыс істемейтін алыс ауылдарда тұрса, онда біз бұл мәселеге түсіністікпен қараймыз, студенттер электронды пошта немесе мессенджерлер арқылы жұмыс істей алады.
Егер интернет мүлде болмаса, онда олар осы шаралардың әрекеті аяқталған соң барлық орындалған үй тапсырмаларын оффлайн-режимде ұсынады.
Қорыта айтқанда, қашықтан оқыту техно­логиясын пайдалануды – білік­тілік пен білімнің сыналатын уақытында өзіміздің бәсекеге қабілетті екенімізді байқатуға жасалған бірден-бір мүмкіндік деп сезіндік.
Сәрсен ТІЛЕУБАЙ,
Қорқыт ата атындағы Қызылорда мемлекеттік университеті

Сәрсен Тілеубай: Қашықтан оқыту – бәсекеге қабілетті екенімізді дәлелдейтін зор мүмкіндік

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова аймақ тұрғындарын қасиетті Рамазан айымен құттықтады.
Қымбатты жерлестер!
Барша мұсылман қауымы асыға күтетін он екі айдың сұлтаны, берекелі де кешірімі мол қасиетті Рамазан айының басталуымен шын жүректен құттықтаймын, ниеттеріңіз қабыл болсын!
Рамазан – сабыр мен төзім, береке мен бірлік, мейірім мен шапағат айы, отыз күн ораза тұтып, соған шүкіршілік ететін шуағы мол мереке. Адамдарды бауырмалдыққа, кешірімді болу мен төзімділікке тәрбиелейді. Азаматтарымызды қайырымды іс жасауға, мұқтаж жандарға қол ұшын беруге ниеттейді.
Өкінішке қарай, биылғы Рамазан мерекесі елімізде коронавирус індетінің таралуына байланысты жарияланған Төтенше жағдай кезеңіне сәйкес келіп отыр. Қатерлі індет біздің өңірді де айналып өтпеді.
Қазіргі таңда халқымыз сын сағаттарды бастан кешуде. Бауырмалдығы мен қонақжайлығы, дархан көңілі мен жомарт жүректігі күнделікті өмірінің мән-маңызына айналған азаматтарымызға бұл жағдайдың оңай соқпай отырғаны анық. Алайда, Сыр жұртшылығы талай сүрлеулі соқпақты да, сұрапыл кезеңді бастан өткеріп, даналығымен, сабырлығымен, төзімділігімен жеңген. Бұл сынақты да бірге еңсеріп, жеңіп шығамыз деп сенемін!
Сондықтан, Сіздерді қауіпсіздік шараларын толық орындап, сақтап, қасиетті Рамазан айындағы құлшылықты, ауызашарды отбасында өткізуге шақырамын.
Бұл ай – рухымызды көтеріп, тазалық пен имандылыққа шақыратын кезең.
Бұған дейін істеген істерімізді таразылап, қанағат пен сабырдың, ынсаптың мән-маңызын сезіндіріп, қадірлеуге үйретеді.
Иманға ұйыған халқымыз жетім көрсе жебеген, әлсізге әл-қуат беріп, демеген жанды «жомарт» атап, ерекше қадірлеген, төріне оздырған.
Осы айда бір-бірімізге деген жүрек жылуымыз, мейіріміміз азаймасын, бақ-берекеміз ортаймасын, қайырымды істеріміз көп болсын!
Адамзатты жақсылыққа тәрбиелейтін Рамазан айында індетті бірге жеңіп, Сыр елі өркендей берсін!
Ел игілігі үшін қызмет етіп, індетпен күресіп, сауабы мол істер атқарып, алдыңғы шепте жүрген медицина, полиция және әскери қызметкерлерге, жомарт жүректі кәсіпкер азаматтарға Сыр жұртшылығы атынан алғыс айтқым келеді.
Тәуелсіз еліміздің тұғыры биік, іргесі берік болсын. 
Тұтқан оразаларыңызды, еткен ғибадаттарыңызды, тілеген тілектеріңізді қабыл етсін! 
Еліміз аман, жұртымыз тыныш, бірлігіміз бекем, бауырымыз бүтін болсын!
Рамазан айы қабыл болсын!

Гүлшара Әбдіқалықова облыс тұрғындарын қасиетті Рамазан айымен құттықтады

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 45 адамға жетті. Індеттен айыққандардың қатарына соңғы қосылған науқастар – Қызылорда қаласы және Шиелі ауданының тұрғындары.
23 сәуір 14:00-дегі ақпарат бойынша Қызылорда облысында тағы 16 адам қауіпті індеттен жазылып шыққан. Осылайша қауіпті індеттен айыққандар саны өңірде 45 адамға жетіп отыр.
Айта кетейік, күні бүгінге дейін Қызылорда қаласында – 9, Жаңақорған ауданында – 16, Шиелі ауданында – 17 және Қармақшы ауданында – 3 адам осы індеттен емделіп, үйлеріне шығарылған.
Олар алдағы 14 күнде дәрігерлердің бақылауында болады.

COVID-19: Қызылорда облысында індеттен жазылғандар саны 45-ке жетті

<a href="https://kyzylorda-news.kz/">Kyzylorda-news.kz.</a> Оңтүстік Кореяда Қазақстан азаматы өрт кезінде 10 адамды құтқарып, мемлекеттік марапатқа ұсынылды, деп хабарлайды <a href="https://24.kz/kz/zha-aly-tar/o-am/item/390342-o-t-stik-koreyada-y-aza-stan-azamaty-memlekettik-marapat-a-synyldy">«Хабар24»</a>.
Телеарнаның хабарлауынша, түркістандық Әли отбасымен бірге 2017 жылы Ян Ян шипажайлы қалашығына жұмыс іздеп келген. Оқиға өткен айда болған. 23 наурыз күні түнгі сағат 11-де түтін иісін сезген. Сөйтсе, көрші пәтерлердің бірінде өрт шыққан.
Өрт болған бөлме ішінде әйел қалып қалған. Әли ол бөлменің есігін аша алмай, пәтерге газ құбырымен және телекабельмен өрмелеп шығып, ішіне кірген. Өкінішке қарай, өрт шыққан пәтерде болған әйел кейіннен ауруханада көз жұмған. Отандасымыз өзге көршілерін оятып үлгерген. Соның арқасында олар дер кезінде сыртқа шығып, аман қалған.
<blockquote>
 «Ішке кіріп, есікті ашып шыққан соң өрт сөндірушілер келді. Жедел жәрдем, бәрі келді. Кәріс әйелді ауруханаға дейін апарды, көмектесті», – деді Әли.
</blockquote>
Жерлесіміз ерлігі жайлы да, өрт кезінде денесін күйік шалғаны туралы да туыстарына тіс жармапты. Медициналық көмектен де бас тартқан. Алайда көршілері бой бермей, оны ауруханаға жеткізіп, емге кететін шығынды өздері төлеген.
<blockquote>
 «Кеше газетте, интернетте сосын фейсбукте шыққаннан кейін үйдегілер көріп, анам жылап жіберді. Ол білмейтін еді. Көрді. Қолым, құлағым, мойным дәкемен оралған. Жұмыста ондай-ондай болды, құлап түстім дедім», – деді ол.
</blockquote>
Телеарна мәлімдегендей, Әли жақында үйіне қайтады. Рейсі 1 мамырға жоспарланған. Алайда көршілері оның кеткенін қаламайды. Сондықтан Оңтүстік Корея Президентінің атына хат жазып, жерлесімізді марапатқа ұсыну туралы өтініш білдіріпті.
Көршілері елдің Әділет министрлігіне де оның ерлігі жайлы жазылған мақалалар ұсынған. Соның арқасында оның Кореяда жүріп-тұру уақыты ұзартылды.

Оңтүстік Корея тұрғындары ерлік жасаған қазақ жігітін марапаттауды ұсынып, президентке хат жазды

<a href="https://kyzylorda-news.kz/">Kyzylorda-news.kz</a>. Осы&nbsp;жылы түлектер ұлттық бірыңғай тестілеуді (ҰБТ) 11 сыныптың төртінші тоқсандағы бағдарламалардың&nbsp;сұрақтарынсыз тапсырады, деп хабаралйды «<a href="https://1tv.kz/kz/">Евразия</a>» арнасы.
Бұл туралы Ұлттық тестілеу орталығының директоры Дидар Смағұлов мәлімдеді.
Оқушылардың&nbsp;ата-аналары балалары қашықтан оқытудың салдарынан ҰБТ-ға жақсы дайындала алмайды деп алаңдайды.&nbsp;
Ал тестілеу орталығында қашықтан оқыту оқушыларға кедергі келтірмейді деп сендірді.
<blockquote>
 «Оқушыларға төртінші тоқсаннан сұрақтар болмайды. Яғни 5 сыныптан 11 сыныптың үшінші тоқсанына дейін.&nbsp;&nbsp;ҰБТ-ны өткізу бұрынғы форматта қалады, алайда біз қосымша санитарлық шектеу шараларын енгізетін боламыз», – деді Дидар Смағұлов.
</blockquote>
Ол тестке қатысушылардың арасында қашықтық ұлғаятынын айтты. Сонымен қатар, барлық оқушылардың температурасы&nbsp;жергілікті жерлерде тексеріледі.
Еске&nbsp;сала кетейік, коронавирус індетіне байланысты төртінші тоқсанда қазақстандық оқушылар қашықтықтан білім алып жатыр. Биыл олар үшін бітіру емтихандары тоқтатылды.
Білім және ғылым министрлігінде ҰБТ-ны әдеттегідей маусым айының соңында өткізуді жоспарлап отыр. Алайда ведомствода коронавирус жағдайы нашарлауы мүмкін болған жағдайда Б жоспарына жүгінуге тура келетінін&nbsp;жоққа шығармайды.

Биыл ҰБТ-ның қалай өтетіні белгілі болды

<a href="https://kyzylorda-news.kz/">Kyzylorda-news.kz.</a> Күні кеше Қызылордада «Тұңғыш Президент атындағы саябақ» жанына қойылған <a href="https://kyzylorda-news.kz/oqigalar/qyzylordada-tungghysh-prezident-sajabaghy-oertenip-zhatqany-ras-pa-video-58104/">блок-посттың маңында өрт болып</a>, қызыл жалын үлкен аумақты шарпығанын хабарлаған болатынбыз.
Бүгін аталған <a href="https://kyzylorda-news.kz/kogam/qyzylordada-blokpost-mangyndaghy-oertting-maen-zhajy-2-gektar-aghash-oertengen-58143/">тілсіз жаудың мән-жайы белгілі болғанын</a> жазған едік.
Төтенше жағдай орнында жұмыс жасаған арнайы штабтың мәліметі бойынша, 2 гектарға жуық алқаптағы жыңғыл, тораңғыл, жиде ағаштарына залал келген. Өрт салдарынан адам шығыны болған жоқ. Сондай-ақ, сол маңдағы тұрғын үйлерге зиян келмеген. Қазіргі таңда өрттің шығу себебі мен шығыны анықталуда.
Бүгін «Kyzylorda-news.kz» ақпарат агенттігінің тілшілері тілсіз жау шыққан аумақта болып, оқиға орнымен танысып қайтқан болатын.
Олай болса, назарларыңызға белгілі фотограф Нұрболат Нұржаубайдың фоторепортажын ұсынамыз.
ЕСКЕРТУ: Эксклюзивті материалды көшіріп басуға болмайды!
<img src="https://kyzylorda-news.kz/wp-content/uploads/2020/04/05-10.jpg" alt="" />
<img src="https://kyzylorda-news.kz/wp-content/uploads/2020/04/06-10.jpg" alt="" />
<img src="https://kyzylorda-news.kz/wp-content/uploads/2020/04/04-21.jpg" alt="" />
<img src="https://kyzylorda-news.kz/wp-content/uploads/2020/04/03-31.jpg" alt="" />
<img src="https://kyzylorda-news.kz/wp-content/uploads/2020/04/021-2.jpg" alt="" />

Қызылордадағы өрт: оқиға орнынан көріністер (ФОТО)

<a href="https://kyzylorda-news.kz/">Kyzylorda-news.kz</a>. ҚМДБ-ның Қызылорда облысы бойынша өкілдігі Жалағаш аудандық&nbsp; Иманқұл мешітінде «Жүрек жылуы» атты қайырымдылық іс-шара ұйымдастырылды.
Қайырымдылық акция барысында кенттегі көпбалалы, мүмкіндігі шектеулі бала тәрбиелеп отырған отбасыларға азық-түлікпен көмек берілді.
Тұрғындар қасиетті Рамазан айы қарсаңында қайырымдылық жасаған азаматтарға ризашылықтарын білдірді. Бұл шаралар алдағы уақытта да жалғасын табады.

Қазақстан және Қызылорда облысының жаңалықтары