<a href="https://kyzylorda-news.kz/">Kyzylorda-news.kz.</a> Қызылорда облысының мүгедектерге арналған спорт клубының спортшылары оқу-жаттығу процестерін бастап кетті.
Карантин уақытында спортшылар жаттықтырушылардың берген тапсырмаларын тек үй жағдайында орындап отырды.
Пауэрлифтингтен облыстың аға жаттықтырушысы Бақытбек Рысбаевтың айтуынша, карантин режимі толық аяқталғаннан кейін қазан айында облыс құрамасы Ақтау қаласында өтетін ҚР жекелей чемпионатына қатысуға тыңғылықты дайындық үстінде.
Волейболшыларда шілде айында Нұр-Сұлтан қаласында өтетін ел чемпионатының бірінші турына қатысуды жоспарлауда.
Жеңіл атлетикадан Бүкілəлемдік спорт ойындарының күміс жүлдегері Ислам Салимов, парадзюдодан Əлем чемпионы Олжас Оразалыұлы мен Пара Азия ойындарының күміс жүлдегері Азамат Тұрымбетовтер Паралимпиада ойындарына жолдама алу жарыстарына дайындықтарын пысықтап жатыр.
<img src="https://kyzylorda-news.kz/wp-content/uploads/2020/05/sport1-1.jpg" alt="" />
<img src="https://kyzylorda-news.kz/wp-content/uploads/2020/05/sport2.jpg" alt="" />
<img src="https://kyzylorda-news.kz/wp-content/uploads/2020/05/sport3-1.jpg" alt="" />
<img src="https://kyzylorda-news.kz/wp-content/uploads/2020/05/sport4.jpg" alt="" />
<img src="https://kyzylorda-news.kz/wp-content/uploads/2020/05/sport5.jpg" alt="" />

Қызылордада мүгедектерге арналған спорт клубының спорт шеберлері жаттығуларын бастады

<a href="https://kyzylorda-news.kz/">Kyzylorda-news.kz.</a> &nbsp;«Электрондық үкімет» порталында жүргізуші куәліктерін беру бойынша көрсетілетін қызмет жетілдірілді.
Енді оны мерзімі өткен, тегін, атын және әкесінің атын ауыстырған, құжатты жоғалтқан немесе ұрлаған кезде пайдалануға болады. Көрсетілетін қызметті жеке тұлғалар пайдалана алады, оның нәтижесі жүргізуші куәлігін дайындау туралы хабарлама болып табылады.
<blockquote>
 «Біз тұрақты және тәулік бойы мониторинг жүргізіп, кері байланыс жасаймыз. Азаматтардан келіп түсетін барлық ұсыныстар жеке кейстер ретінде қаралады және пысықталады. Бұл сондай-ақ онлайн режимінде Мемлекеттік көрсетілетін қызметтерді алу процесін жақсартуға және жеңілдетуге ықпал етеді», – деп түсіндірді «ҰАТ» АҚ басқарма төрағасы Әсет Тұрысов.
</blockquote>
Көрсетілетін қызметті алу үшін порталға eGov.kz кіру және «Көлік және коммуникация» қосымша бетін таңдау.
«Автомобиль көлігі» бөлімінде «Жүргізуші куәліктерін беру» көрсетілетін қызметін таңдау. Бұдан әрі порталда авторлану және «Көрсетілетін қызметке онлайн тапсырыс беру» батырмасы бойынша өту. Барлық міндетті алаңдарды толтыру, фотосуретті және қол қою үлгісін жүктеу. 1,25 АЕК мөлшерінде төлем жүргізу және ЭЦҚ көмегімен қызметке қол қою қажет. «Тегін, атын және әкесінің атын өзгерту» жолын таңдаған кезде тегін, атын, әкесінің атын ауыстыру туралы куәлікті жүктеу қажет.
Іс-әрекет ету мерзімі өткеннен кейін 083-У медициналық анықтаманы, жоғалған немесе ұрланған жағдайда аудандық полиция басқармасынан анықтаманы тіркеу қажет. Көрсетілетін қызмет ҚР ІІМ қап-мен бірге модификацияланған.
<a href="https://24.kz/kz/zha-aly-tar/bylu-manyzdy/item/397572-zh-rgizushi-ku-ligin-auystyru-a-tinishti-jden-shy-paj-a-beruge-bolady">«Хабар 24»</a>

Жүргізуші куәлігін ауыстыруға өтінішті үйден шықпай-ақ беруге болады

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың «Әскери міндеттілерді арнаулы жиындарға шақыру туралы» Жарлығына сәйкес, ауданымызда төтенше жағдай кезіндегі тиісті шараларды жүзеге асыру үшін АҚІЖБ-не 60-қа жуық азамат өтініш білдірген. Олардың қатарынан әскери борышын өтеген 24 ерікті әсери міндеттілер іріктеліп алынды.
Арнайы әскери жасаққа алынған азаматтар халықтың қауіпсіздігі мен денсаулығын қорғау және қамтамасыз ету үшін Шиелі кентінің көлемінде қоғамдық тәртіпті сақтау мақсатында аудандық полиция бөлімінің қызметкерлерімен бірлесіп жаяу патрульдеу жұмыстарына қатысты.
Арнайы жиынға негізінен 35 жасқа дейінгі жұмыссыз жастар алынып, мемлекет есебінен 42 500 теңгеден төленді.
Арнайы жасақталған сарбаздар қажетті киіммен, уақытылы 3 мезгіл ыстық тамақпен және медициналық медициналық бетперде, қолғаппен, антисептикалық құралдармен қамтамасыз етілді.
Олар төтенше жағдай кезеңінде бастарын қатерге тіге жүріп 2020 жылғы 21 сәуірден 20 мамырға дейін 1 ай көлемінде құрметке лайық қызмет етті.
Осыған орай, аудан әкімі Қамбарбек Амангелдіұлы аға ұрпақтың ерлік эстафетасын абыроймен жалғастырып, аудан көлеміндегі төтенше жағдайға сәйкес тиісті шараларды жоғары дәрежеде атқарған 24 сарбазға және Қызылорда облысының Шиелі аудандық қорғаныс істері жөніндегі бөліміне ерекше алғысын білдіріп айтып, арнайы алғыс хаттармен марапаттады.
<img src="https://kyzylorda-news.kz/wp-content/uploads/2020/05/shieli1.jpg" alt="" />
<img src="https://kyzylorda-news.kz/wp-content/uploads/2020/05/shieli2-1.jpg" alt="" />

Шиелі ауданында арнаулы әскери жиынға алынған азаматтар марапатталды

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясын жұқтырғандар саны 279-ға жетті. Ал сауығып шыққандар саны – 219. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Жаңадан 7 дерек тіркелді. Оның төртеуі- коронавирус инфекциясын жұқтырғандармен байланыста болған. Ал үшеуі – көпбейінді қалалық аурухананың фильтр кабинетінен анықталды. Қазіргі&nbsp;таңда науқастардың жағдайы бірқалыпты, емдерін алуда», – деді Жақсылық Әбілқасымұлы.
</blockquote>
Сондай-ақ, індет жұқтырғандармен байланыста болған – 3695 азамат анықталды. Оның ішінде, 2051-і жақын қарым-қатынаста, 1644-і жанама байланыста болған.
Құрметті облыс тұрғындары, статистикаға қарағанда вирустың жұғу мүмкіндігі қарым-қатынас арқылы болып отыр. Вирус ауа тамшылары арқылы жұғатын болғандықтан, ол көбіне сулы ауада көп сақталады. Сондықтанда сақтық шараларын қатаң сақтап және бетперде киюді жалғастыра беруге шақырамыз.

COVID-19: Бүгін жаңадан 7 жағдай тіркелді

<a href="https://kyzylorda-news.kz/">Kyzylorda-news.kz.</a> Қызылорда қаласында автокөлікке электр бағаны құлады, деп хабарлайды Қызылорда облысы Төтенше жағдайлар департаментінің баспасөз қызметі.
21 мамыр күні сағат 14:18-де Қызылорда облысы Төтенше жағдайлар департаменті Дағдарыс жағдайындағы басқару басқармасына Ғ.Мүсірепов көшесі 20 үй, 5 қабатты тұрғын үйдің ауласында жүріп бара жатқан «Газель» (бортты) маркалы автокөлігіне белгісіз себептермен электр бағанасы құлап кеткендігі туралы ақпарат келіп түсті.
Зардап шеккендер мен құрбан болғандар жоқ. Қызылорда облысы Төтенше жағдайлар департаментінің жедел тобы мен Полициия департаментінің Жедел тергеу тобы, жедел-жәрдем бригадасы және «Қызылорда электр тарату компаниясы» АҚ қызметкерлері оқиға орнына келіп жетті.
«Оқиға орнына келген құтқарушылар «Газель» автокөлігіне электр тогы жүргізілген бағана құлап, басып қалғандығын, көлікті басқарған 1969 жылы туылған Қызылорда қаласының тумасы «Автошкола» ЖШС-нің жүргізушісі екені анықталды. Оқиға орнының аумағы лентамен қоршалды, электрмен жабдықтаушылар бағананы токтан ажыратқаннан кейін, құтқарушылар оны қауіпсіз жерге көшірді», – деп мәлім етті департаменттің баспасөз қызметі.&nbsp;
Оқиғаға қатысты Қызылорда облысы ТЖД бастығының орынбасары полковник Саид Молдақараев барлық қала тұрғындары мен қонақтарынан көліктерін арнайы белгіленген орындарға қоюын жеткізді.
<img src="https://kyzylorda-news.kz/wp-content/uploads/2020/05/bagana-kwlady-2-1.jpg" alt="" />
<img src="https://kyzylorda-news.kz/wp-content/uploads/2020/05/bagana-kwlady-3-1.jpg" alt="" />
<img src="https://kyzylorda-news.kz/wp-content/uploads/2020/05/bagana-kwlady-4.jpg" alt="" />
<img src="https://kyzylorda-news.kz/wp-content/uploads/2020/05/bagana-kwlady-5-1.jpg" alt="" />
<img src="https://kyzylorda-news.kz/wp-content/uploads/2020/05/bagana-kwlady-6-1.jpg" alt="" />

Қызылордада автокөлікке электр бағанасы құлады

<a href="https://kyzylorda-news.kz/">Kyzylorda-news.kz.</a> Қазақстан мұсылмандары діни басқармасы ораза айт мейрамын өткізуге қатысты мәлімдеме жасады.
Ислам дінінде кез келген мереке ғибадатпен бастау алады. Шариғатымыз бойынша айт намазын жамағатпен оқу – уәжіп. Алайда, биылғы ораза айт намазы еліміздегі карантин жағдайына байланысты мешіттерде жамағатпен өткізілмейді. Ханафи мәзһабы бойынша айт намазын үйде жеке оқу дұрыс емес. Бірақ, айт күні күн найза бойы көтерілгеннен кейін әркім өз үйінде екі немесе төрт ракағат нәпіл (дұха) намазын жеке оқи алады. Оны төрт ракағат етіп оқу – абзал. Абдулла ибн Масғуд (Алла одан разы болсын): «Айт намазын оқи алмаған адам төрт ракағат намаз оқиды. Бірінші ракағатта «Фатиха» сүресінен кейін «Сәббихисмә раббикәл-ағлаа», екінші ракағатта «Уәш-шәмси уә духааһәә», үшінші ракағатта «Уәл-ләйли изаа яғшаа», төртінші ракағатта «Уад-духаа» сүрелерін оқиды», – деген. Ал аталмыш сүрелерді жатқа білмейтін кісілер басқа да сүрелерді оқыса болады.
Айт күні сәресін ішпейді, күндіз аузы ашық болады. Өйткені, хадисте: «Алла Елшісі (оған Алланың салауаты мен сәлемі болсын) ораза және құрбан айт күндері ораза ұстауға тыйым салатын» делінген.
Ораза айт – мереке. Сондықтан мейрам күні ата-анамызға, отбасымызға, балаларға, тума-туыстарға сыйлық үлестіру – сауапты әрі игі іске жатады. Алла Елшісі (оған Алланың салауаты мен сәлемі болсын): «Бір-бірлеріңе сыйлық беріңдер, араларыңда сүйіспеншіліктерің артады» – деп өсиет еткен.
Ораза айт – кешірім жасайтын күн. Пайғамбарымыз (оған Алланың салауаты мен сәлемі болсын): «Әрбір жүрегі пәк – тілі шыншыл адам», – деді. Сахабалар: «Тілі шыншыл деген түсінікті, жүрегі пәк дегенді қалай түсінеміз» деп сұрағанда Пайғамбарымыз (оған Алланың салауаты мен сәлемі болсын): «Жүрегі пәк дегеніміз – тақуа, таза, ыза және көре алмаушылықтан ада адам», – деді.
Ораза айт – мұқтаждарға көмектесетін күн. Құран Кәрімде: «Аллаға құлшылық етіңдер, Оған еш нәрсені ортақ қоспаңдар. Әке-шешеге, жақындарға, жетімдерге, міскіндерге, жақын көршіге, бөгде көршіге, жан жолдасқа, жолда қалғандарға және қол астындағыларға жақсылық жасаңдар», – делінген («Ниса» сүресі, 36-аят).
Жаратқан Алла әрбіріміздің ораза айт күні жасаған ізгі істерімізді, дұға-тілектерімізді қабыл етіп, жылдан жылға, айдан айға аман-есен жетуді нәсіп еткей!
Айта кетсек, Ораза айт мерекесі 24 мамырдан басталады.

Карантинге байланысты мешіттерде Ораза айт намазы оқылмайды

<a href="https://kyzylorda-news.kz/">Kyzylorda-news.kz.</a> Еліміздің бірқатар аймағында ауа райы құбылмалы болады, деп хабарлайды Қазгидромет.
Ал Қызылорда облысында жел күшейіп, желдің ұйытқу жылдамдығы 15-20 м/с. Сонымен қатар кешкісін шаңды дауыл тұрады.

22 мамырға арналған ауа райы болжамы

1992 жылы Қазақстан Республикасы ЮНЕСКО-ға (United Nations Educational, Scientific and Cultural Organization, қысқаша UNESCO) кірді.
2002 жылы Қазақстан Республикасы мен Словения Республикасы арасындағы достық қарым-қатынастарды нығайтудағы қосқан еңбегі үшін Қазақстан Президенті Нұрсұлтан Назарбаевқа Құрметті «Алтын Бостандық ордені» табысталды. Алтын Бостандық ордені – Словения Республикасының ең жоғары мемлекеттік наградасы. Словения Республикасының азаматтарына және шет мемлекеттердің өкілдеріне мемлекет алдындағы ерекше еңбегі үшін немесе Словения Республикасымен достық қатынастарды дамыту ісіндегі ерекше еңбегі үшін тапсырылады.
2006 жылы Қазақстан Республикасының Біріккен Араб Әмірліктерімен дипломатиялық қатынастарын нығайту мақсатында Әбу-Даби қаласында Қазақстан Республикасының Елшілігі ашылды.

22 мамыр: Ел тарихында орын алған оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 22 мамырға арналған жұлдыз-жорамалы.
Тоқты
Кез келген адаммен тіл табыса аласыз. Біраз адамға жақсы ой тастап, олардың сізге деген көзқарасы өзгеретін болады. Айналаңыздағы адамдарға сіздің ойыңыз, идеяларыңыз ұнайтын болады.
Тоқты
Күніңіз сәтті басталады. Бүгін маңызды ақпарат аласыз. Бұл сіздің жеке өміріңізге қатысты болмақ. Сонымен қатар бұл ақпарат өміріңізді түбегейлі өзгертетін болады.
Егіздер
Әңгімелесуге, таныстармен дидарласуға сәтті күн. Сіз басқа адамдардың жан-дүниесін түсіне аласыз. Олардың жан-жарасын жазуға көмектесіп, ақыл-кеңесіңізді бересіз.
Шаян
Сақ болыңыз. Күніңіз айтарлықтай жаман емес, дегенмен ойланбай іс жасамаңыз. Ескі таныстарыңыздың ақыл-кеңесін тыңдаңыз. Олардың кеңесі сіздің қателікке бой алдырмаңызға көмектеседі.
Арыстан
Күніңіз керемет өтеді. Қызықты оқиғаларға тап боласыз. Қиын шаруаларды оңай аяқтауға мүмкіндік бар. бұрын жолыңыз болмаған салада қайта бақ сынап, табысқа жетесіз.
Бикеш
Түске дейін мазаңыз қашады. Үйдің тірлігі тек сізге қарап тұрғандықтан, жалғы өзіңіз жұмыс жасауға тура келеді. Барлығы сіз ойлағандай емес. Жоспарыңыз өзгеруі мүмкін.
Таразы
Алға қойған мақсаттарыңызға жету оңай болады. Оған көп күш жұмсаудың қажеті жоқ. Жұмысқа немесе жеке кәсіпке қатысты ұсыныстар түседі. Жаңа идеялар пайда болып, солармен жұмыс жасайсыз.
Сарышаян
Түске дейінгі уақыт керемет өтеді. Қызықты идеялар ойыңызды «жаулап» алады. Бұл идеяларыңызды жүзеге асыру үшін ескі және жаңа таныстарыңыз көмек көрсететін болады.
Мерген
Табандылық танытыңыз. Сонда ғана нәтижеге жете аласыз. Тәуекел етпей табысқа жету мүмкін емес. Сондықтан барлық істе табандылық, тиянақтылық танытыңыз.
Тауешкі
Кез келген істе жолыңыз болады. Әр бастаған шаруаңыз сәтті аяқталып, табысты боласыз. Ішкі түйсігіңізге сеніңіз. Ол қандай шешім шығару керек екенін нақты біледі.
Суқұйғыш
Жақсы күн. Түрлі идеялар ойлап, оны жүзеге асыру жолдарын қарастырасыз. Осы тың ойларыңызды іске асыру үшін қолдау көрсететін адам табуыңыз қажет. Бұрын бірге жұмыс жасаған әріптестермен байланыс орнатасыз.
Балықтар
Таңертең жолыңыз болады. Сондықтан көптен бері бітпей жүрген шаруаңызды аяқтасаңыз болады. Сондай-ақ бүгін бұрын жанжалдасқан жандармен қайта татуласуға мүмкіндік бар.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Елімізде шомылу маусымы әлі басталған жоқ, деп хабарлайды <a href="https://24.kz/kz/zha-aly-tar/o-am/item/397452-yzylordada-su-a-a-yp-bara-zhat-an-zhigit-t-aryldy">«Хабар 24»</a>.
Осыған қарамастан, суға түсетіндер кездесіп жатыр. Айталық, Қызылордада құтқарушылар бір жігітті аман алып қалды. Ол достарымен бірге Сырдарияға шомылуға келген екен. Кенет аяғы тартылып қалған. Абырой болғанда, құтқарушылар дер кезінде көмекке келіп үлгерді. Аймақта жыл басынан бері 5 адам суға кеткен.
<blockquote>
 «Рейдтік іс-шаралар күнделікті сағат 11.00-мен 17.00 аралығында өтуде. Тұрғындардың суға шомылуға үйреншікті жерлері көп. Сол жерлердің 64 учаскесі қауіпті саналады. Сол 64 учаскеде 110 ескерту тақтайшалары орнатылған. Осындай қауіпті учаскелерді Сырдария өзенінің бойында, басқа су айдындарында анықтау жұмыстарын жүргізудеміз және сол қауіпті учаскелерге ескерту тақтайшаларын орнату жұмыстары жалғасуда», – дейді облыстық ТЖД бастығы Омар Бержанов.
</blockquote>

Қызылордада суға ағып бара жатқан жігіт құтқарылды

Оқыған: Фариза ОМАРОВА
Біздің қазақты оңдырмай жүрген бір қуаныш, бір жұбаныш дегендер бар.
Оның қуанышы – елде бір жаманды тауып, я бір адамның бұл өзі қылмаған жаманшылығы шықса, қуанады. Айтады: құдай пәленшеден сақтасын, о да адаммын деп жүр ғой, оның қасында біз сәулелі кісінің бірі емеспіз бе, оған қарағанда мен таза кісі емеспін бе? – деп. Оған құдай тағала айтып па, пәленшеден тәуір болсаң болады деп? Я білгендер айтып па, әйтеуір өзіңнен наданшылығы асқан, я жаманшылығы артылған кісі табылса, сен жаманға қосылмайсың деп? Жаманға салысып жақсы бола ма? Жақсыға салысып жақсы болады дағы. Жүз ат бәйгеге қосылса, мен бәйге алдым деген сөз болса, алдыңда неше ат бар деп сұрар, артыңда неше ат бар еді деп сұрағанның несі сөз? Мен бес аттан, он аттан ілгері едім дегеннің несі қуаныш?
Енді жұбанышы – жалғыз біз бе, елдің бәрі де сүйтіп-ақ жүр ғой, көппен көрген ұлы той, көппен бірге болсақ болады да деген сөзді жұбаныш қылады. Оған құдай тағала айтып па, көптен қалмасаң болады деп. Көпке қаһарым жүрмейді деп. Көпке тұзағым жетпейді деп пе? Ғылым көпке келіп пе? Біреуден тарап па? Хикмет көптен тарай ма? Бірден тарай ма? Көпке қорлық жүрмей ме? Бір үйдің іші түгел ауырса, жеңіл тие ме? Жер білмеген көп адам адасып жүрсе, бір жер білетұғын кісінің керегі жоқ па екен? Көп кісі жолаушының бәрінің аты арығаны жақсы ма? Жоқ, жармысы арыса, жармысының күйлісі жақсы ма? Жұт келсе, елдің бәрінің түгел жұтағаны жақсы ма? Жарым-жартысы аман қалғаны жақсы ма? Осы көп ақымақтың бір ақымаққа несі жұбаныш? Тұқымымызбен аузымыз сасық болушы еді деген жаман күйеу қалыңдығын жеңіп пе? Көңілін сол сөзі разы қылуға жетіп пе? Ендеше, көбіңнен қалма, сен де аузыңды сасыта бер деп пе?!
1894

Абай Құнанбайұлының жиырма үшінші қара сөзі (АУДИО)

<a href="https://kyzylorda-news.kz/">Kyzylorda-news.kz.</a> 21 мамыр күні 13:00 уақыты бойынша аймағымызда коронавирус індетінен тағы 3 науқас емделіп шықты.
Емделушілердің емі толық аяқталған соң, 2 рет тест сынамасы алынды. Сынама нәтижесі теріс көрсеткіш көрсетуіне орай, яғни науқастар “Covid-19” вирусынан айығуына байланысты ауруханадан үйлеріне қайтарылды.
Індетті жеңген, 3 науқас та Қызылорда қаласының тұрғыны.
Емделушілер алдағы уақытта 14 күн бойы аймақтық дәрігерлер бақылауында болады.
Осы күнге дейін өңірімізде індеттен айығып шыққандар саны – 219.
(Кызылорда қаласы – 80, Арал ауданы – 6, Қазалы ауданы – 3, Қармақшы ауданы – 5, Сырдария ауданы – 26, Шиелі ауданы – 66, Жанакорған ауданы – 31 және өзге мемлекеттер мен өңірлердің азаматы – 2 (Алматы қаласы&nbsp; – 1, Ресей федерациясы – 1).

Қазақстан және Қызылорда облысының жаңалықтары