<a href="https://kyzylorda-news.kz/">Kyzylorda-news.kz</a> Бүгін «Достық үйінде» облыс әкімі Мұрат Ергешбаевтың қатысуымен Мемлекеттік рәміздер күніне арналған салтанатты іс-шара өтті.Аймақ басшысы сырбойылықтарды мерекемен құттықтап, елдік рухты асқақтатқан Мемлекеттік рәміздердің айрықша маңызына тоқталды.<img src="https://knadmin.beoblood.kz/uploads/R_mizder_k_ni_saltanatty_is_shara_2_eff6d682a6.jpg" alt="Рәміздер күні салтанатты іс-шара 2.jpg"><blockquote>– Баршаңызды Мемлекеттік рәміздер күнімен шын жүректен құттықтаймын! Президентіміз Қасым-Жомарт Кемелұлы: «Көк байрағымыз – мызғымас мемлекеттіліктің белгісі. Елтаңбамыз – азаттықтың айшықты көрінісі. Әнұранымыз – еркіндік пен елдіктің үні. Тәуелсіздіктің осы үш символы халқымызға ерекше рух береді. Әрқайсымыздың кеудемізге мақтаныш ұялатады», – деген болатын. Бүгінгі айтулы мерекеге орай облыс көлемінде Мемлекеттік ту көтеру рәсімдері ұйымдастырылып, түрлі форматтағы іс-шаралар өтуде. Осы ретте, еліміздің жарқын болашағына аянбай еңбек етіп, отансүйгіштіктің нағыз үлгісін көрсетіп жүрген жерлестерімізді марапаттау рәсімінде бас қостық. Тәуелсіздігіміздің тұғырын нығайтып, елдігіміздің еңсесін көтеруде әрбір азаматтың адал еңбегі мен берік ұстанымы маңызды. Сіздер Әділетті, Қауіпсіз әрі Таза Қазақстанды құруға, аймағымыздың әлеуметтік-экономикалық дамуына, халықтың әл-ауқатын арттыруға зор үлес қосып келесіздер. Алдағы уақытта да қасиетті Отанымыздың өсіп-өркендеуіне барлық күш-жігерлеріңізді жұмсап, жоғары нәтижелерге қол жеткізеді деп сенемін! – деді облыс әкімі.</blockquote>Мерекелік шарада Мәдениет қайраткері Шәкизада Әбдікәрімов сөз сөйледі. Президент Жарлығына сәйкес жерлестеріміз «Құрмет» орденімен, «Ерлігі үшін», «Ерен еңбегі үшін» және «Шапағат» медальдарымен марапатталды.Сонымен қатар ҚР Премьер-министрінің бірінші орынбасары Нұрлыбек Нәлібаевтың Алғыс хаты табысталды, бірқатар азамат облыстың Құрмет грамотасын, «Қызылорда облысының дамуына қосқан үлесі үшін» медалін және облыс әкімінің Алғыс хатын алды.<img src="https://knadmin.beoblood.kz/uploads/R_mizder_k_ni_saltanatty_is_shara_3_389d7c251e.jpg" alt="Рәміздер күні салтанатты іс-шара 3.jpg">

Мемлекеттік Рәміздер күніне арналған салтанатты іс-шара өтті

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалының төрағасы Жандос Базартай Жалағаш ауданында жұмыс сапарымен болып, «Ұлт саулығы – AMANAT назарында» тақырыбымен ұйымдастырылған «Денсаулық керуені» акциясының жұмысына қатысты.Іс-шара барысында Мәдениет ауылының тұрғындары білікті дәрігерлердің қабылдауында болып, медициналық тексеруден өткізілді. Мамандар азаматтардың денсаулық жағдайын бағалап, қажетті кеңестер беріп, аурулардың алдын алу бағытында түсіндіру жұмыстарын жүргізді.Облыстық филиал төрағасы акцияның өту барысымен танысып, тұрғындармен пікірлесіп, халықтың сапалы медициналық қызметке қолжетімділігін арттыру - партияның маңызды міндеттерінің бірі екенін атап өтті.<img src="https://knadmin.beoblood.kz/uploads/Amanat_mediczinaly_akcziya_2_32766ecfa1.jpg" alt="Аманат медициналық акция 2.jpg"><blockquote>«Мемлекет басшысы азаматтардың денсаулығын жақсарту мен сапалы медициналық қызметтің қолжетімділігін қамтамасыз етуге ерекше мән беріп келеді. Сондықтан ауыл тұрғындарының білікті дәрігерлердің қабылдауынан өтуіне мүмкіндік беретін мұндай бастамалар өз жалғасын табуы тиіс. Халықтың денсаулығы – елдің басты байлығы», – деді Жандос Базартай.</blockquote>«Денсаулық керуені» ауыл тұрғындарының денсаулығын нығайтуға, аурулардың алдын алуға және медициналық көмектің қолжетімділігін қамтамасыз етуге бағытталған маңызды бастама болып табылады.

AMANAT: Ұлт саулығы – партия назарында

<a href="https://kyzylorda-news.kz/">Kyzylorda-news.kz</a> &nbsp;Құрметті отандастар! Баршаңызды Мемлекеттік рәміздер күнімен шын жүректен құттықтаймын! Бұл – қасиетті Отанымыз – Қазақ елінің әрбір азаматы үшін маңызы ерекше мереке. Біз осы күні байрағымызды биікке көтереміз. Сол арқылы еңселі, егемен ел екенімізді күллі әлемге паш етеміз.Қастерлі рәміздеріміз – ұлт құндылықтарының жарқын символы.Мемлекетіміздің әр нышаны халқымыздың болмыс-бітімінің көрінісі саналады. Елтаңба – елдігіміздің айшықты белгісі. Әнұран – азаттығымыздың айбынды үні. Көк Туымыз – Тәуелсіздік тұмары. Төбемізге көтеріп, қадір тұтатын осы үш рәмізді мемлекеттігіміздің мызғымас үштағаны десек, артық болмайды.Тарихқа үңілсек, жұртымыз әрқашан бір тудың астына жиналып, ынтымақ-бірлігін сақтай білген. Қазір де еліміз ауызбіршілігін нығайтып, алға қарай сеніммен қадам басып келеді.Бәріңізге белгілі, наурыз айында біз біртұтас қоғам болып жалпыұлттық референдумға қатыстық. Азаматтарымыз конституциялық реформаны қолдап, дауыс берді. Осылайша, біз жаңа Конституциямызды қабылдап, төл тарихымыздың жаңа парағын аштық. Ата заңда халқымыздың сан ғасырлық арман-тілегі, мақсат-мұраты көрініс тапты. Кең байтақ жеріміздің тұтастығы, еліміздің егемендігі, азаматтардың құқықтары және бостандықтары басты құндылықтар деп жазылды.Заң мен тәртіпті сақтау, білім мен ғылымды, жаңа технологияларды дамыту, тазалықты дәріптеу, табиғатты қорғау, волонтерлік қызметті қолдау конституциялық міндет ретінде айқындалды. Түбегейлі жаңа сипатқа ие болған Ата заңымыз Әділетті Қазақстанның мызғымас жарғысына айналды.Конституцияда әр адам еліміздің мемлекеттік рәміздерін құрметтеуге тиіс деп көрсетілді. Себебі ұлттық нышандарымызды қадірлеу отаншылдық рухының ең биік өлшемі екені сөзсіз. Нағыз патриоттар ғана елдің көшін алға бастайды, жердің шетін жаудан қорғайды. Басқа сөзбен айтқанда, отаншылдық дегеніміз – жеріміздің қауіпсіздігі және тұтастығының кепілі. Ұлт рәміздерінің мәртебесін арттыру, бұл – аса маңызды мемлекеттік жұмыс. Таяу арада Үкімет мемлекеттік рәміздерді орынды пайдалану мәселесі бойынша қаулыға қажетті түзетулерді енгізеді. Ұлттық нышандарымызды ұлықтау – ортақ парыз, бұл – әр азаматтың міндеті. Түптеп келгенде, рәміздерді қастерлеу – мемлекетімізді құрметтеу деген сөз.<img src="https://knadmin.beoblood.kz/uploads/Vystuplenie_Glavy_gosudarstva_na_czeremonii_podnyatiya_Gosudarstvennogo_flaga1_f36d733a7e.jpg" alt="Выступление Главы государства на церемонии поднятия Государственного флага1.jpg">Құрметті отандастар!Біз биыл Тәуелсіздіктің 35 жылдығын атап өтеміз. Бұл тарихи кезең жүріп өткен жолымызды жан-жақты терең талдауды және болашаққа стратегиялық жоспар құруды мұқият ойластыру тұрғысынан үлкен мәнге ие. Аталған мерейлі датаны қажырлы еңбекпен және нақты нәтижелермен қарсы алуымыз керек. Биыл тұтас еліміз үшін ауқымды өзгерістерге толы жыл болып отыр. Қазақстан қоғамдық өмірдің барлық саласында соны серпіліске ұмтылған ел ретінде орнықты дамудың даңғыл жолына түсті.Жалпыхалықтық референдумда қабылданған Конституция – Қазақстанның алдағы ондаған жылдарға арналған басты заңы. Дәл осы Ата заң халқымызды әлемдік өркениеттің жаңа белестеріне бастайды. Технологиялық жетістіктер, саяси дүрбелеңдер, әскери қақтығыстар белең алып жатқан қазіргі дәуірде Негізгі заңымыздың жол нұсқаушы темірқазық ретіндегі маңызы еселене түседі.Еліміздің бас құжаты – Конституция 1 шілдеден бастап күшіне енеді. Тамыз айында бір палаталы Құрылтай сайлауы өтеді, ал қыркүйекте Қазақстан Халық Кеңесі құрылады.Осылайша, біз ауқымды өзгерістер кезеңіне аяқ басамыз. Қазірдің өзінде халқымыздың болмысы, құндылықтары, сана-сезімі, тіпті, дүниетанымы өзгеріп жатыр. Азаматтарымыздың басым көпшілігі заңға құрметпен қарау, қоғамдық тәртіпті нығайту стратегиясын қолдайды, сондай-ақ «Таза Қазақстан» акциясына белсене қатысады.Алайда бұл әр жетістікке мәз болып, жайбарақат отыратын заман емес. Біз биік мақсаттарға ұмтылып, тек қана алға – жарқын болашаққа қарай жүруіміз керек. Келешекке зор сеніммен қарап, Қазақстанды шын мәнінде өркениетті мемлекетке айналдыруымыз қажет.Қазір біз бір ел болып жасампаздық жолына түстік: қоғамымызда жаңа идеялар, жаңа тұлғалар, отаншыл азаматтардың жаңа буыны пайда болуда. Мен Мемлекет басшысы ретінде осындай игі үрдісті қолдаймын. Мұны ел ішінде жасалып жатқан реформалардың айқын көрінісі деп санаймын.Халқымыздың ауызбіршілігін нығайту басты мақсатымыз болып қала береді. Бұл – елдің табысты дамуының бірден-бір шарты, тиімді әрі ұзақмерзімді факторы.Реформалардың бастапқы кезеңінде еліміздегі көзі ашық және ілгері қоғамдық-саяси күштер жалпыұлттық құндылықтар мен мақсаттар аясында бірігуі қажет деп санаймын. Сонда ғана Әділетті Қазақстанды құру, мемлекеттілігімізді нығайту ісінде табысқа жете аламыз.Еліміздің Егемендігі, Тәуелсіздігі – ең маңызды, ең қастерлі құндылығымыз.Біз өркениетті әрі озық ойлы ұлт ретінде өзімізге сенімді болуымыз керек. Ешкімге жалтақтамай батыл әрекет етуіміз қажет. Бұдан басқа жол жоқ. Мақсаты айқын, көзі ашық, көкірегі ояу азаматтарымыз мемлекет тағдырына жауапты екенін терең түсінеді. Олар еріктілер қатарына қосылып, қайырымдылық жасап, маңызды бастамаларды табысты іске асырып жүр.Нағыз отаншыл адам көзбояушылыққа бармайды, шын патриот ел мүддесі үшін табанды еңбек етеді. Жасампаз отаншылдық дегеніміз де – осы.Мемлекет үшін бір күннің қамы емес, болашақтың жайы маңызды. Сондықтан біз Абайдың ұлағатына сай «ақырын жүріп, анық басамыз». Ұлт мүддесін бәрінен биік қойып, алысқа көз тігеміз. Төл тарихымызға құрметпен қарап, ұрпақтар сабақтастығын сақтауға баса назар аударамыз.Бұл бағытта белсенді жұмыс істелуде. Жошы хан жерленген Ұлытау аймағына облыс мәртебесі берілді. Елімізде Жошы ұлысын зерттеу институты құрылды. Біз бұл мекеменің ғылыми әлеуетін күшейте береміз.. Көп ұзамай Қазақстан тарихының жеті томдық академиялық еңбегі жарыққа шығады. Оның бір томы түгелдей Алтын Орда тақырыбына арналды.Бұдан бөлек, біз жаңа Конституцияда қазақ елінің төл шежіресі Ұлы даланың мыңдаған жылдық тарихымен сабақтас екенін айқын көрсеттік. Елордамызда Ұлы дала өркениетіне арналған зәулім ғимарат салынады. Жақында Астанада ЮНЕСКО-ның аясында Алтын Орда мұрасын зерттеу ісіне арналған халықаралық симпозиум өткізілді. Мұның бәрі мемлекеттігіміздің тұғырын нығайта түсуге зор ықпал етеді. Алтын Орда өзінің басқару институттары, дипломатиялық қызметі, байланыс және кеден жүйесі, әлемде мойындалған валютасы, озық инновациялары бар орта ғасырдағы алып ел болды.Қазір Қазақстанда берік орныққан президенттік басқару үлгісі Алтын Орда кезінде құрылған саяси жүйеден бастау алады. Алтын Орданың ең басты мұрасы – оның мызғымас құндылықтары. Себебі алып мемлекетте діні, тілі, мәдениеті, дәстүрі бөлек адамдар ортақ ережелер аясында тату-тәтті өмір сүрді. Бабаларымыздың осындай тағылымды жолы біз үшін өшпес өнеге және басты стратегиялық бағдар болып қала береді.Алтын Орданың жетістігі Еуразиядағы көптеген халықтың ортақ игілігі саналады. Сондықтан Ұлық Ұлыстың мұрагері ретінде біз Еуразияның біртұтастығын, өсіп-өркендегенін, ондағы мемлекеттердің барлығы тату-тәтті ғұмыр кешіп, ортақ қауіпсіздікті сақтап, халықтарының игілігі үшін қызмет еткенін құптаймыз.Біздің мақсатымыз – өзгелердің таптаурын болған тәжірибелері мен идеяларын үлгі-өнеге етпеу, өнбейтін дау-дамайдан бойды аулақ салу. Сонымен бірге өткен ұлы дәуірдің құндылықтарын ой елегінен өткізіп, сапалы түрде жаңғыртып, заманауи өркениетке қарай бейімдеу.Жаппай цифрландыру және жасанды интеллект технологиялары дамудың бұрын-соңды болмаған үлгісі мен тәсілдеріне жол ашатын жаңа әрі шексіз кеңістік қалыптастырды. Мыңның біріне берілетін дәл осы тарихи мүмкіндікті тек қуатты, күшті, болашаққа бағдар түзеген халықтар пайдалана алады.Бұл міндетті еңсеру біздің өскелең ұрпақтың қолынан келеді. Мен бұған сенімдімін.Қазақстанның орнықты дамуының негізінде ұлы тарихымыз, одан кем түспейтін қазіргі сәт және, ең бастысы, жарқын болашақ арасындағы ажырамас байланыс жатыр.Қазір Қазақстан жаңа тұрпатты елге айналды. Біз біртұтас әрі жасампаз ұлт ретінде дамудың даңғыл жолына түстік. Кейінгі жылдарды еліміз үшін тарихи бетбұрыс кезеңі деуге толық негіз бар. Ауқымды реформалар барлық салаға тың серпін беруде. Түбегейлі өзгерістер, әсіресе, қоғамдық санаға зор сілкініс әкелді. Ішкі саясаттың мазмұны жаңарды, бағыт-бағдары айқындала түсті. Ел ішінде жанашырлық, еңбекқорлық, ұқыптылық, үнемшілдік қасиеттері орныға бастады. Азаматтарымыздың көзқарасы және ұстанымы өзгеруде. Халқымыз Әділетті, Мәдениетті, Таза және Қауіпсіз елде өмір сүруді қалайды. Сондықтан жұртымыз тәртіп бұзушылыққа, заңсыздыққа тұтас қоғам болып тосқауыл қоюда. Алайда, алдымызда тұрған жұмыс – өте ауқымды. Бұл жұмысты бәріміз бір ел, біртұтас халық болып міндетті түрде ойдағыдай орындаймыз.<img src="https://knadmin.beoblood.kz/uploads/Vystuplenie_Glavy_gosudarstva_na_czeremonii_podnyatiya_Gosudarstvennogo_flaga2_df9939517c.jpg" alt="Выступление Главы государства на церемонии поднятия Государственного флага2.jpg">Құрметті жас сарбаздар!Мен былтыр әскери оқу орындарының үздік түлектерін қолдау жөнінде бастама көтердім. Оларға қалыптасқан дәстүрге сай «лейтенант» емес, «аға лейтенант» шенін тапсыру қажет екенін айттым. Соған сәйкес нақты тапсырма бердім. Міне, бүгін осы бастама нақты жүзеге асырылмақ. Сіздер оқуды бітіріп, бірден «аға лейтенант» шенін алатын тұңғыш түлек боласыздар. Бұл – өздеріңізге артылған зор сенім және үлкен жауапкершілік.Қазақтың біртуар батыры Сағадат Нұрмағамбетовтің «атақты алғаннан оны арқалап жүру қиын» деген сөзі бар. Шын мәнінде, нағыз сарбаздың абырой-беделі оның шенімен емес, ең алдымен, Отан алдындағы мінсіз қызметіне қарай өлшенеді. Көптеген жастарымыз сіздерге қарап бой түзейді, үлгі алады. Бәріңіз де антқа адал болып, қазақ сардары деген атаққа әрдайым лайық боласыздар деп сенемін. Бүгін алқалы жиынға озат түлектердің ата-аналары да қатысып отыр. Сіздер Қазақстанның дәл осындай отаншыл азаматтарына тәлім-тәрбие бердіңіздер. Баршаңызға шынайы ризашылығымды білдіремін.Жас офицерлердің алғашқы әскери шені құтты болсын! Қызметтеріңізге табыс тілеймін! Туымыз әрдайым көкте желбіресін! Қазақ елі мәңгі болсын!

Президент Қасым-Жомарт Тоқаев Мемлекеттік Ту көтеру рәсімінде сөз сөйледі

<a href="https://kyzylorda-news.kz/">Kyzylorda-news.kz</a> Бүгін айдынды Арал өңірінде Мемлекеттік рәміздер күніне арналған «Рәміздер рухы – Конституцияның күші» атты патриоттық іс-шара ұйымдастырылды.Рәміздер алаңында өткен мерекелік іс-шараға Арал ауданының әкімі Аманжол Оңғарбаев, зиялы қауым өкілдері, құқық қорғау саласының қызметкерлері мен белсенді жастар мен тұрғындар қатысты.Мерекелік салтанатта Ту көтеріліп, еліміздің Әнұраны шырқалды. Рәміздер алаңында өткен іс-шарада аудан әкімі Амажол Сақыпұлы аралдықтарды мерекемен құттықтап, ізгі лебізін білдірді.Өз сөзінде мемлекеттік нышандардың Тәуелсіздіктің баға жетпес құндылығы екенін атап өткен аудан әкімі ел азаматтарын Отанын қастерлеуге, мемлекеттік нышандарды қадірлей білуге шақырды.Патриоттық шара аясында мемлекеттік қызметке алғаш қабылданып, жұртшылық алдында салтанатты түрде ант қабылдаған жас мамандарға арнайы қызметтік куәлік табысталды.<img src="https://knadmin.beoblood.kz/uploads/Aral_R_mizder_k_ni_2_7ba39f73ea.jpg" alt="Арал Рәміздер күні 2.jpg">Сондай-ақ Вьетнам мемлекетінің Дананг қаласында өткен жасөспірімдер арасындағы U17 Азия чемпионатында алтын медаль жеңіп алып, Азия чемпионы атанған грек-рим күресінен халықаралық дәрежедегі спорт шебері Мирас Махамбет пен жаттықтырушысы Ардақ Таңатаровқа қаржылай сыйақы тарту етілді.&nbsp;Арал ауданының әкімі мұнан соң әр салада абыройлы еңбек етіп, түрлі спорттық сайыстарда жетістіктерге жетіп жүрген бір топ азаматтарға аудан әкімінің Алғыс хатын табыстады.&nbsp;Салтанатты іс-шарада аудан әкімі Аманжол Сақыпұлы зиялы қауыммен бірге «Жас ұлан» ұйымының қатарына қабылданған оқушыларға арнайы галстук тағып, қадамына сәттілік тіледі.Мерекелік іс-шарада азаматтардың елге, жерге деген сүйіспеншілігін арттырып, жігерлендіре түсетін патроиттық бағыттағы әндер шырқалып, көпшілікке көтеріңкі көңіл-күй сыйлады.<img src="https://knadmin.beoblood.kz/uploads/Aral_R_mizder_k_ni_2d44f552b6.jpg" alt="Арал Рәміздер күні.jpg">

Арал ауданында патриоттық іс-шара ұйымдастырылды

<a href="https://kyzylorda-news.kz/">Kyzylorda-news.kz</a> &nbsp;Қорқыт Ата атындағы Қызылорда университетінде адам саудасының алдын алу және еңбек қанауы құрбандарын анықтау мәселелеріне арналған “Адам саудасына жол жоқ” тақырыбында профилактикалық кездесу өтті.&nbsp;Іс-шараға Қызылорда облысының жұмыспен қамтуды үйлестіру және әлеуметтік бағдарламалар басқармасының, облыстық полиция департаментінің ұйымдасқан қылмысқа қарсы күрес басқармасының, мемлекеттік еңбек инспекциясы комитетінің Қызылорда облысы бойынша департаментінің, қалалық жұмыспен қамту және әлеуметтік бағдарламалар бөлімінің, сондай-ақ адам саудасы құрбандарына арнаулы әлеуметтік қызмет көрсететін үкіметтік емес ұйымның өкілдері қатысты.&nbsp;Кездесу барысында студенттер мен оқытушыларға адам саудасының алдын алу, адамдарды заңсыз әкету, әкелу және сатуға қарсы күрес шаралары, бала еңбегін заңсыз пайдаланудың жолын кесу бағытындағы жұмыстар туралы ақпарат берілді. Сонымен қатар адам саудасының негізгі белгілері, күмәнді жұмыс ұсыныстарынан сақтану тәсілдері және құқық қорғау органдарына жүгіну тәртібі түсіндірілді.&nbsp;Сондай-ақ облыстық полиция департаментінің есірткі қылмысына қарсы іс-қимыл басқармасының қызметкері жастар арасында нашақорлықтың алдын алу мақсатында есірткі заттарының адам ағзасына тигізетін зияны, оның әлеуметтік салдары, есірткінің таралу жолдары, заңнамада көзделген жауапкершілік пен қатаңдатылған жаза түрлері туралы баяндады.&nbsp;Бұдан бөлек, интернет-алаяқтықтың кең таралған тәсілдері мен олардан сақтану жолдары жөнінде түсіндіру жұмыстары жүргізілді. Мұндай кездесулер жастардың құқықтық сауаттылығын арттырып, қоғамдағы өзекті қауіптердің алдын алуға бағытталған маңызды шаралардың бірі.Фото: polisia.kz

«Адам саудасына жол жоқ»: Қызылорда облысында профилактикалық кездесу өтті  

<a href="https://kyzylorda-news.kz/">Kyzylorda-news.kz</a> Қызылорда медициналық жоғары колледжінде жастар арасында кең таралып бара жатқан аса қауіпті мәселелер – нашақорлық пен ойынқұмарлықтың зардаптарын ашып көрсетуге, сондай-ақ заң мен тәртіпті сақтау және мемлекеттік рәміздердің құндылығын дәріптеуге арналған ауқымды кездесу өтті.<img src="https://knadmin.beoblood.kz/uploads/Za_dyly_pen_y_ty_t_rtip_m_selesi_tal_ylandy1_4727b42dcb.jpg" alt="Заңдылық пен құқықтық тәртіп мәселесі талқыланды1.jpg">Іс-шараны Қызылорда облыстық Қазақстан халқы Ассамблеясы жанындағы Ақпараттық түсіндіру тобы ұйымдастырып, жастармен еркін пікір алмасу алаңын құрды. Басқосуға «Қоғамдық келісім және тіл орталығы» КММ бөлім басшысы, Ақпараттық түсіндіру тобының мүшесі Жанболат Досмаханов, Аналар кеңесінің төрағасы Айгүл Мұсабаева, сондай-ақ колледж студенттері мен оқытушылары қатысты.<img src="https://knadmin.beoblood.kz/uploads/Za_dyly_pen_y_ty_t_rtip_m_selesi_tal_ylandy3_b9a5e743ed.jpg" alt="Заңдылық пен құқықтық тәртіп мәселесі талқыланды3.jpg">Жиында қоғам дертіне айналған зиянды әдеттердің адам денсаулығына, психикасына, отбасылық қарым-қатынас пен болашақ мансапқа тигізетін кері әсері нақты мысалдармен түсіндірілді. Мұнымен қоса, кездесуде кез келген дамыған қоғамның берік іргетасы – заң мен тәртіп үстемдігі екеніне ерекше назар аударылды. Әрбір жас азаматтың құқықтық мәдениетті қалыптастырудағы жауапкершілігі сөз болып, мемлекеттік рәміздердің қадір-қасиеті кеңінен насихатталды.<img src="https://knadmin.beoblood.kz/uploads/Za_dyly_pen_y_ty_t_rtip_m_selesi_tal_ylandy_2873262621.jpg" alt="Заңдылық пен құқықтық тәртіп мәселесі талқыланды.jpg">Көк Туымызды, Елтаңбамыз бен Әнұранымызды қастерлеу — отаншылдық рухтың, елге деген шынайы құрмет пен ұлттық бірегейліктің басты белгісі екені айтылды.Басқосу соңында колледж ұжымы ұйымдастырушыларға алғыс білдіре отырып, мұндай кездесулердің жастарды жат қылықтардан сақтандыруда, бойына патриоттық сезім ұялатуда тәрбиелік және алдын алу маңызы өте зор екенін жеткізді.

Заңдылық пен құқықтық тәртіп мәселесі талқыланды

<a href="https://kyzylorda-news.kz/">Kyzylorda-news.kz</a> Кеше Сырдария ауданының әкімі Берік Сәрменбаевтың қатысуымен «Жалын» тынығу лагерінің жазғы маусымының ашылу салтанаты өтті. Іс-шараға аудандық мәслихат төрағасы Ержан Әжікенов, облыстық мәслихат депутаты Жұмабек Ембергенов, аудандық ардагерлер кеңесінің төрағасы Мұса Келдібаев, зиялы қауым өкілдері, ұстаздар мен оқушылар қатысты.<img src="https://knadmin.beoblood.kz/uploads/Zhalyn_sauy_tyru_lagerini_zhaz_y_mausymy_ashyldy_546009dc6c.jpg" alt="«Жалын» сауықтыру лагерінің жазғы маусымы ашылды.jpg">Салтанатты жиында аудан басшысы жиналған қауымды лагерьдің басталуымен құттықтап, өскелең ұрпақтың сапалы демалысын ұйымдастыру мен олардың жан-жақты дамуына қолайлы жағдай жасау маңызды бағыттардың бірі екенін атап өтті.<blockquote>– Мемлекет басшысы Қасым-Жомарт Кемелұлы Тоқаев өскелең ұрпақтың жақсы өмір сүруі мемлекеттің басты міндеті екенін атап көрсетті. Сондықтан елімізде балаларға барлық жағдай жасалып келеді. Бүгінде білім беру саласын дамыту, мектептердің материалдық-техникалық базасын жақсарту, заманауи технологияларды енгізу, балалар спорты мен шығармашылығын қолдау бағытында нақты нәтижелерге қол жеткізілуде. Мемлекет басшысының тапсырмасымен өңірімізде жаңа білім беру нысандары бой көтеріп, заманауи мектептер мен балабақшалар ашылуда. Соңғы жылдары аймағымызда білім беру саласында ауқымды жобалар жүзеге асырылып, 45 жаңа заманауи білім беру нысаны ел игілігіне берілді. Президентіміздің бастамасымен облысымызда «Келешек мектептері», физика-математика бағытындағы «Білім-инновация» лицей-интернаты, музыкалық колледждің жаңа оқу ғимараты, «Оқушылар сарайы» «Сыр жұлдыздары» академиясы және «Ай-Керім» оқу-сауықтыру орталығы, ботаникалық бақ ашылды. Бұл – балалардың болашағын жарқын етудегі нақты жұмыстар. Жазғы маусымда балалардың демалысын ұтымды ұйымдастыру үшін аудан орталығындағы «Жалын» тынығу лагерінде 791 бала, мектеп жанындағы лагерьлерде 3306 бала қамтылады. «Жалын» тынығу лагерінде уақыттарыңды көңілді өткізу үшін мәдени-спорттық, танымдық іс-шаралар ұйымдастырылатын болады. Мұның барлығы Сіздердің бос уақыттарыңызды тиімді ұйымдастырып, жақсы демалуларыңызға мүмкіндік береді, – деді Берік Әбдіғаппарұлы.</blockquote>Мерекелік іс-шара тынығушылардың қатысуымен ұйымдастырылған концерттік бағдарламаға ұласты.Фото: Сырдария ауданы әкімінің баспасөз қызметі

«Жалын» сауықтыру лагерінің жазғы маусымы ашылды

<a href="https://kyzylorda-news.kz/">Kyzylorda-news.kz</a> Облыс прокуратурасының ұйымдастыруымен облыс прокуроры Ризабек Ожаровтың төрағалығымен, облыс әкімінің орынбасары Ардақ Зебешев,мүдделі мемлекеттік органдар, оның ішінде Әділет департаменті мен жеке сот орындаушылардың өңірлік палатасы басшылары мен өкілдерінің қатысуымен алимент өндіру мәселелері бойынша көшпелі алқа мәжілісі өткізілді.Жиында балалардың құқықтарын қорғау, алимент өндірудің тиімділігін арттыру және қаскөй борышкерлерге қатысты заңмен көзделген шараларды күшейту мәселелері талқыланды.Прокуратурамен жүргізілген талдау нәтижесінде алимент өндіру саласында қайталанатын жүйелі бұзушылықтар анықталды.Атап айтқанда, 500-ден астам алимент өндіру туралы өндіріс атқарушылық іс қозғау қаулысын қабылдаумен ғана шектеліп, әрі қарай тиісті жұмыстар жүргізілмеген.12 борышкердің жалақысына өндіру қолданылмаған, 45 борышкердің мүлкі мен есепшоттарына шектеу қойылмаған, 362 борышкерге шетелге шығуына тыйым салу шаралары қабылданбаған.Мәселен, Байқоңыр қаласының сот орындаушысы шетелге шығуға шектеу қоймауынан миллион теңге қарызы бар борышкер бірнеше рет Өзбекстан еліне барып келген.Бұған қоса екі жылдан бері меншігіндегі шетел автокөліктерінен борышкердің 2 млн теңге берешегін өндіруге әрекеттенбеген.Сондай-ақ, борышкерлерді әкімшілік және қылмыстық жауаптылыққа тарту бағытындағы жұмыстардың жеткіліксіздігі, ал Әділет департаменті тарапынан жүргізілген мемлекеттік бақылаудың нәтижелілігі төмен екендігі атап өтілді.Жиын барысында Бас Прокурордың қасақана жалтарған борышкерлерді әкімшілік және қылмыстық жауаптылыққа тарту тәртібі туралы Нұсқауы түсіндіріліп, аталған қадағалау актісіне сәйкес әзірленген бірлескен іс-қимыл жоспары мен жұмыс алгоритмі талқыланды.Алқа мәжілісінің қорытындысымен уәкілетті органдарға нақты тапсырмалар беріліп, алимент өндіру жұмыстарын күшейту, борышкерлерге қатысты заң талаптарын мүлтіксіз қолдану және азаматтардың өтініштеріне жедел ден қою тапсырылды.Фото: freepik.com

Қызылордада алимент өндіру мәселесі бойынша алқа отырысы өтті

<a href="https://kyzylorda-news.kz/">Kyzylorda-news.kz</a>&nbsp; Қармақшы ауданы әкімі Жандос Еркінбек Жосалы кентіндегі бірқатар нысандарды аралап, тұрғындардың әлеуметтік мәселелерін зерделеді.Алдымен аудан басшысы «Сұлтан» және «Ұлар» сауда орындарына барып, әлеуметтік маңызы бар азық-түлік тауарларының бағаларын бақылады. Кәсіпкерлермен кездесуде:<blockquote>«Ел де, жер де ата-бабамыздан қалған аманат. Туған жеріміздің тұрғындарына жанашырлық танытып, сапалы қызмет көрсету – баршамызға ортақ міндет. Сондықтан халық тұтынатын азық-түлік бағасын тұрақты бақылауда ұстап, тұрғындардың мүддесіне жауапкершілікпен қарау қажет», – деп халықты сапалы әрі қолжетімді өніммен қамтамасыз ету қажет екенін айтты.</blockquote>Сондай-ақ Тайшық би көшесіндегі жаяу жүргіншілер жолының жай-күйі бақыланып, абаттандыру және күтіп ұстау жұмыстарының сапасына ерекше назар аударылды.Мұнан соң аудан басшысы жақында оқыс оқиға орын алған тұрғын үй иелерімен кездесіп, отбасының қазіргі жағдайын білді. Бүгінгі таңда зардап шеккен отбасыға уақытша баспана ұсынылып, қолданыстағы заңнама аясында қажетті әлеуметтік көмек көрсетіліп жатыр. Жандос Еркінбек отбасы мүшелеріне қолдау көрсетіп, көмек қажет болғанда жауапты сала басшыларына тиісті жұмыстарды тұрақты бақылауда ұстауды тапсырды.Аралау барысында Нұржігіт Нақыпов көшесінің бойындағы жаңадан салынатын тұрғын үйлерге бөлінген жер учаскелері де назардан тыс қалмады. Жауапты мамандар құрылыс жоспарлары бойынша ақпарат беріп, алдағы жұмыстардың барысын баяндады.Жалпы Жандос Еркінбек халықтың тұрмыс сапасын арттырып, қолайлы орта қалыптастыру - ең басты бағыт екенін үнемі айтып келеді. Сондықтан барлық жұмыстардың жүйелі әрі сапалы жүзеге асырылуы тұрақты бақылауда болатынын ескертті.Фото: Қармақшы ауданы әкімінің баспасөз қызметі&nbsp;

Аудан әкімі Жосалы кентіндегі нысандарды аралады

<a href="https://kyzylorda-news.kz/">Kyzylorda-news.kz</a> Жаңақорған ауданында пробация қызметінің есебінде тұрған азаматтарды кәсіпкерлікке баулу және олардың жеке кәсіп ашуға деген қызығушылығын арттыру мақсатында арнайы танымдық экскурсия ұйымдастырылды.Іс-шара Жаңақорған ауданының жұмыспен қамту және әлеуметтік бағдарламалар бөлімінің тапсырысы бойынша "Сұңқар" әлеуметтік-құқықтық орталығы" қоғамдық қоры жүзеге асырып жатқан "Өмірлік қиын жағдайда жүрген тұлғаларға әлеуметтік-құқықтық көмек ұйымдастыру" әлеуметтік жобасы аясында өткізілді.&nbsp;Экскурсия барысында қатысушылар Түркістан облысындағы ірі өндіріс орындарының бірі – "Turkistan Textile" ЖШС тігін фабрикасы мен "Grand Miks" ЖШС кеңсе жиһаздарын өндіру кәсіпорнының қызметімен танысты. Олар өндіріс үдерісін өз көздерімен көріп, кәсіпорындардың жұмыс тәжірибесі мен даму жолдары туралы жан-жақты мәлімет алды. Шара аясында қатысушылар мен кәсіпорын басшылары арасында еркін форматта пікір алмасу ұйымдастырылды. Кәсіпкерлер өздерінің еңбек жолы, бизнесті бастау және дамыту тәжірибелері туралы айтып, қойылған сұрақтарға жауап берді.&nbsp;Іс-шараға Жаңақорған ауданының жұмыспен қамту және әлеуметтік бағдарламалар бөлімінің басшылығы мен мамандары, пробация қызметінің өкілдері, "Түркістан индустриалды аймақтардың басқарушы компаниясы" ЖШС қызметкерлері және кәсіпорын жетекшілері қатысты. Сонымен қатар экскурсияға қатысушылар Түркістан облысындағы бірқатар туристік нысандарды аралап, өңірдің тарихи-мәдени мұрасымен танысуға мүмкіндік алды.&nbsp;Жаңақорған аудандық пробация қызметінің бастығы Анарбек Искаковтың айтуынша, бүгінде пробация есебінде тұрған азаматтардың арасында кәсіпкерлікпен табысты айналысып жүргендер бар.&nbsp;<blockquote>– Қазіргі уақытта есептегі екі азаматтың бірі ағаш өңдеу кәсібін жүргізсе, екіншісі мал шаруашылығын дамытып келеді. Ал бұл іс-шараның нәтижесінде тағы үш азамат жеке кәсіп ашуға ниет білдіріп, мемлекеттік қолдау тетіктерін пайдалана отырып, өз ісін бастауға қызығушылық танытты, – деді ол.&nbsp;</blockquote>Мұндай іс-шаралар пробация есебіндегі азаматтардың қоғамға бейімделуіне, еңбекке деген ынтасын арттыруға және олардың жаңа мүмкіндіктерге жол ашуына оң ықпал етуде.

Қызылордада пробация есебіндегі азаматтар өндіріс орындарының жұмысымен танысты

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалының төрағасы Базартай Жандос Нұртайұлы Сырдария ауданына жұмыс сапары барысында Бесарық ауылында орналасқан «Абай-Дәулет» серіктестігі жанынан жаңа бастауыш партия ұйымын құрды.Іс-шараға «AMANAT» партиясы Сырдария аудандық филиалының төрағасы, аудандық мәслихат төрағасы Ержан Әжікенов, «Абай-Дәулет» серіктестігінің директоры Мұрат Сәрсенбаев, аудандық филиалдың атқарушы хатшысы Ақтөре Ибрагимұлы, аудандық мәслихат депутаты Гүлнұр Тлеубергенова қатысты.Кездесу барысында бастауыш партия ұйымының алдағы жоспарлары және партиялық жобаларды жүзеге асыру бағытындағы жұмыстар таныстырылды.Серіктестік мүшелері ауылдың әлеуметтік-экономикалық дамуына қатысты өз ұсыныстарын ортаға салып, партиялық жобалардың тиімділігі жөнінде пікір алмасты.Жандос Нұртайұлы өз сөзінде бастауыш партия ұйымдарының партия жұмысындағы рөліне тоқталып өтті.<blockquote>«Бастауыш партия ұйымдары – партияның халықпен байланысын нығайтатын негізгі буын. Әрбір бастауыш партия ұйымы тұрғындардың ұсыныс-пікірлерін жинақтап, өзекті мәселелердің шешілуіне ықпал етуі тиіс. Бүгінде «AMANAT» партиясы азаматтардың әл-ауқатын арттыруға бағытталған нақты жобаларды жүзеге асырып келеді. Осы жұмыстардың нәтижелі болуы бастауыш партия ұйымдарының белсенділігіне де тікелей байланысты. Сондықтан жаңа құрылған ұйымның алдағы қызметіне үлкен сенім артамыз», – деді партияның облыстық филиалының төрағасы.</blockquote>Кездесу барысында қатысушыларға партияның сайлауалды бағдарламасының орындалу барысы, «Ауыл аманаты», «Жер аманаты», «Қарызсыз қоғам», «Ардагерлерді ардақтайық» және өзге де партиялық жобалардың жүзеге асырылу нәтижелері туралы ақпарат берілді.Өз кезегінде серіктестік директоры Мұрат Сәрсенбаев ауыл шаруашылығы саласында еңбек етіп жүрген ұжымның партия бастамаларын қолдайтынын атап өтті. Оның айтуынша, партиялық жобалар ауыл тұрғындарының тұрмыс сапасын жақсартуға, кәсіпкерлікті дамытуға және жаңа жұмыс орындарын ашуға оң ықпалын тигізуде.Жиын барысында бастауыш партия ұйымының мүшелері қоғамдық-саяси жұмыстарға белсенді қатысуға дайын екендіктерін білдіріп, елдің дамуына бағытталған бастамаларды жүзеге асыруға өз үлестерін қосатындарын жеткізді.Кездесу соңында облыстық филиал төрағасы бастауыш партия ұйымының мүшелерімен еркін ой алмасып, ұйым жұмысын жетілдіру бағытындағы ұысынстарын тыңдады. Сондай-ақ бастауыш партия ұйымының алдағы жұмысына сәттілік тілеп, партияның негізгі мақсаты халықтың мүддесіне қызмет ету екенін атап өтті.Төраға кездесу соңында бірқатар азаматқа партиялық билет және Алғыс хат табысталды.

Абай-Дәулет» серіктестігінен бастауыш партия ұйымы құрылды

<a href="https://kyzylorda-news.kz/">Kyzylorda-news.kz</a> Арал ауданының әкімі Аманжол Оңғарбаев кезекті жұмыс сапарымен Қарақұм ауылдық округіне барды.Кезекті іссапарда аудандық мәслихаттың төрағасы Базарбай Төрахметов, аудан прокуроры Дарын Әбіш, аудандық аурухананың бас дәрігері Бауыржан Қуанышбаев және коммуналдық сала басшылары болды.Аудан басшысы алдымен Абай ауылындағы су айдау насосты станциясында болып, әлеуметтік нысанның қазіргі жай-күйін зерделеді. Аудан басшысы нысан басында құрылыс жұмыстарын жүргізген «Сапа құрылысы 2007» ЖШС өкілдерімен кездесіп, бірқатар мәселелерді талқылады.Қазіргі таңда насос станциясының құрылыс жұмыстары толық аяқталған. Ауылішілік ауыз су желісі бірнеше мәрте химиялық тазалаудан өткізіліп, үйді-үйге арнайы ауыз су шүмектері арқылы су жеткізіле бастаған.<img src="https://knadmin.beoblood.kz/uploads/Aral_audanyny_kimi_kezekti_zh_mys_saparymen_ara_m_auyldy_okrugine_bardy_fa1bebdd69.jpg" alt="Арал ауданының әкімі кезекті жұмыс сапарымен Қарақұм ауылдық округіне барды.jpg">Аудан әкімі Аманжол Сақыпұлы мұнан соң халықпен жүздесіп, елімізде Мемлекет басшысы Қасым-Жомарт Тоқаевтың бастамасымен жүзеге асырылып жатқан ауқымды реформаларға тоқталып, өңірімізде облыс әкімі Мұрат Ергешбаевтың басшылығымен бүгінгі таңда қолға алынып жатқан жобалар туралы кеңінен баяндады. Сондай-ақ аудан көлемінде халықтың әл-ауқатын арттыру бағытында жүзеге асырылып жатқан жұмыстар мен әр саладағы жетістіктерді атап өтті.Ауылдағы өзекті мәселелер де аудан әкімінің назарынан тыс қалған жоқ. Кейбір түйткілдердің кезең-кезеңімен шешімін тауып келе жатқанын айтып, тұрғындар тарапынан түскен өтініштердің барлығы заңдылыққа сай қаралып, оларды шешу бағытында жұмыстар жүргізілетінін жеткізді.Ауыл тұрғындары тарапынан ауылға тартылып жатқан ауыз су мен уақыт өткен сайын сапасы төмендеп бара жатқан тас жол мәселесі басты назарға алынды. Тұрғындар ауыр салмақты жүк көліктерінің жүруіне шектеу қою мәселесін көтерді.Аудан әкімі ел көтерген мәселенің қайсыбірі болсын орынды екенін айтып, оларды шешу бағытында жұмыс жүргізілетінін жеткізді.Аудан басшысы Аманжол Сақыпұлы жұмыс сапары барысында Ерімбетжаға елді мекеніне де барды.Ауыл тұрғындарымен кездесіп, өңірде жүзеге асырылып жатқан жобалар мен алдағы міндеттер туралы айтып, елге ортақ мәселелерден хабардар екенін жеткізді.Кездесуде тұрғындар аудан әкімінің жұмысына сәттілік тілеп, бірқатар ұсыныс-тілектерін жеткізді. Ауылға қатынайтын автомобиль жолын жөндеу, жедел жәрдем көлігін қарастыру және дәрігер маман тапшылығы мәселелері тұрғындар тарапынан көтерілді.Аудан басшысы елге ортақ мәселенің қайсыбірі болсын назардан тыс қалмайтынын айтып, тұрғындар тілегі ескерілетінін жеткізді.Ауыл тұрғындарымен болған кездесуде аудан прокуроры Дарын Елтайұлы мал ұрлығының алдын алу және интернет-алаяқтықтан сақтану мәселелері жайында кеңінен түсіндіріп, тұрғындарды алаяқтардың құрған тұзағына түсіп қалмауға шақырды.Фото: Аудан әкімдігінің баспасөз қызметі

Қазақстан және Қызылорда облысының жаңалықтары