Kyzylorda-news.kz. Сыр өңіріндегі Назарбаев Зияткерлік мектебінің 12-сынып оқушылары халықаралық IELTS емтиханының қорытындысы бойынша биыл тағы да жақсы нәтижеге қол жеткізді. Мектептің орташа ұпайы 6,4 балды құрады. Тілдік сынаққа қатысқан 95 оқушының екеуі 8,0 бал жинаса, 7 бітіруші жас 7,5 және 20 түлек – 7,0 ұпай алды. Биыл емтиханда 6,0-6,5 аралығында жинағандар саны 50 пайыздан асты.
Томирис Жумағалиева мен оның сыныптасы Дамира Ақтай ағылшын тіліндегі оқылым дағдысы бойынша ең максималды 9.0 ұпай иеленді. Олар шет тілін меңгеруде мектептегі білім беру бағдарламасының тиімділігі мен ұстаздардың оқыту ерекшелігінің үлкен септігі болғанын айтады.
<blockquote>
 «Кез келген тілді меңгеруде оны тәжірибе жүзінде пайдалана білу маңызды. Дайындық барысында ұстаздардың берген білімімен қатар, шет тіліндегі фильмдерді көру, достарыммен тілдесулер көмектесті», – деп бөлісті Томирис.
</blockquote>
Дамира үшін ағылшын тілінде сауатты жазу, сөйлеу және оқу Зияткерлік мектепке оқуға түскенде басты мақсатына айналған.
<blockquote>
 «Көп уақытымды практикалық тесттерге арнадым. Айналада өзім үшін ағылшын тілі ортасын қалыптастырдым. Күзден бастап ғаламтордағы қосымша ресурстармен дайындалдым. Бірақ бұл көрсеткішті әлі де арттырғым келеді», – дейді Дамира.
</blockquote>
Бағалау жүйесі бойынша өте жақсы дәрежені көрсетіп, мүмкіндіктерін дәлелдеген мектеп мақтаныштары үшін тіл білімдері Қазақстанның және әлемнің үздік университеттеріне оқуға түсіп, кәсіби маман атануда үлкен көмек берері сөзсіз.
Жалпы IELTS – ағылшын тілінің халықаралық жүйесі бойынша тіл білу деңгейін анықтайтын күрделі әрі қиын емтихан. Назарбаев Зияткерлік мектептің түлектері үшін бұл сынақ міндетті болып саналады және оның қорытындысы мектеп бітіру туралы аттестаттарына жазылады.

Қызылордалық оқушылар IELTS-тан 8,0 ұпай жинады

<a href="https://kyzylorda-news.kz/">Kyzylorda-news.kz</a>. Қызылорда «Болашақ» университетінде «Болашақ» Ғылыми-зерттеу институты мен «Жалпы білім беру және құқық» кафедрасы жанындағы Әлеуметтік-экономикалық және саяси зерттеулер орталығының ұйымдастыруымен «Шығыс пен Батыс ғылымының көпірі – әл-Фараби мұрасы» тақырыбында республикалық дөңгелек үстел онлайн форматта өтті. Дөңгелек үстел жұмысына оқу орнының профессор-оқытушылар құрамы, студенттері қатысты.
Алғашқы сөз философия ғылымдарының кандидаты, доцент, Әл-Фараби Орталығының директоры Бекжан Берікбайұлы Мейрбаевқа берілді. Баяндамашы «Қазіргі Қазақстандағы фарабитану мәселелері» тақырыбы бойынша сөз қозғап, аталмыш ғылым саласының дамуына мән берді. Әл-Фараби орталығының негізгі міндеттеріне тоқталды. Философия ғылымдарының кандидаты, әл-Фараби атындағы Қазақ ұлттық университеті, Философия және саясаттану факультеті, Философия кафедрасының меңгерушісі, «Жаңа гуманитарлық білім. Қазақ тіліндегі 100 жаңа оқулық» жобасы аясында «Ұлттық аударма бюросы» қоғамдық қоры жүзеге асырып жатқан аударма еңбектердің ғылыми редакторы қызметін атқарып келе жатқан Әсет Абайұлы Құранбек «Фарабитану және қазақ қоғамының рухани жаңғыруы» тақырыбында баяндама жасады. Ғалым Қазақстандағы фарабитанудың мәселелері мен міндеттеріне тоқталып, өз ойларын қоғамдағы рухани жаңғырумен байланыстырды.
Философия ғылымдарының кандидаты, әл-Фарабиді зерттеген шығыстанушы, Қазақстан Республикасы Президентінің жанындағы Мемлекеттік басқару академиясы Түркістан облысы бойынша филиалының директоры Жанат Байжомартұлы Момынқұлов «әл-Фарабидің түсінігіндегі философия және діннің арақатынасы» баяндамасын жұртшылық назарына ұсынды. Баяндамашы әл-Фарабиді философия мен діннің арақатынасы туралы зерттеген алғашқы шығыс философы екендігін айта келе, ойшылдың көзқарастары негізіндегі философиялық пікірлері мен діни дүниетанымының байланысын талдайды. Филология ғылымдарының кандидаты, Қызылорда «Болашақ» университеті, Білім беру және педагогика&nbsp; жоғары мектебі, филология, журналистика кафедрасының аға оқытушысы Тасболат Сиезбайұлы Медетбаев «әл-Фараби – әлемнің екінші ұстазы, ұлы философ әрі ғалым» тақырыбында баяндама жасады. Ол ойшылдың ұстаз, философ және ғалым ретіндегі үш қырына ерекше тоқталды.
Философия ғылымдарының кандидаты, Қ. Жұбанов атындағы Ақтөбе өңірлік университеті, Тарих факультеті, Қазақстан халқы Ассамблеясы және әлеуметтік-саяси пәндер кафедрасының меңгерушісі Үмбетхан Қуандықұлы Сәрсембин «әл-Фарабидің Қайырымды қала тұрғындары туралы көзқарастарының қазіргі қоғамда алатын орны» мәселесін қозғады. Ғұламаның әйгілі трактатының философиялық негіздерін атап көрсетті. PhD, Қ.А. Ясауи атындағы Халықаралық қазақ-түрік университеті, Әлеуметтік ғылымдар факультеті, Қоғамдық ғылымдар кафедрасының қауымдастырылған профессоры Қайнар Қалдыбайұлы Қалдыбай «Ұлы ойшылдың туған жерге оралуы» баяндамасы арқылы ойшылдың зиратынан алынған топырақты Отырардағы Арыстан Баб кесенесінің жанына әкеліп қойылған бейнесюжеттерді көрсетті. Соңғы баяндаманы Қорқыт Ата атындағы Қызылорда университеті, Экономика және құқық институты, Философия және әлеуметтік-гуманитарлық пәндер кафедрасының меңгерушісі, PhD Жарқынбек Оралбекұлы Әбікенов «әл-Фарабидің ізгілікті қоғам идеяларын мәдени талдау» тақырыбында жасады.
Дөңгелек үстел жұмысы барысында қатысушылармен сұрақ-жауап, пікір алмасу жүрді. Мазмұнды республикалық іс-шараны техника ғылымдарының кандидаты, Қызылорда «Болашақ» университетінің ректоры Қуаныш Қойшығұлұлы Дауренбеков жүргізді. Аталмыш кездесуді философия магистрі, Қызылорда «Болашақ» университетінің «Жалпы білім беру және құқық» кафедрасының аға оқытушысы Ботагөз Жаппарқызы Паридинова ұйымдастырды.
Әлеуметтік-экономикалық және саяси зерттеулер орталығы

Қызылордада әл-Фараби мұрасына арналған республикалық дөңгелек үстел өтті

<a href="https://kyzylorda-news.kz/">Kyzylorda-news.kz</a>.&nbsp; Қызылорда облысында жыл басынан бері 1203 ұрлық қылмысы тіркеліп, 441-і ашылған. Ашылмай қалған қылмыстар бойынша жедел іздестіру жұмыстары жүргізілуде. Бұл туралы өңірлік коммуникациялар қызметінде өткен баспасөз мәслихатында белгілі болды.
Қызылорда облысының ПД &nbsp;бастығының бірінші орынбасары полиция полковнигі Шамшидин Амитовтің айтуынша аталған санаттағы қылмыстардың болуының басты себебі тұрғындардың мүліктерін қараусыз қалдыруынан. Сондай-ақ ол мүлікті қорғау – мүлік иелерінің басты міндеттері екенін айтып, пәтерлерді пултьпен күзету қызметін пайдалану тиімді екенін ескертті.
<blockquote>
 _“Ағымдағы жылдың 10 айында 214 мал ұрлығы тіркелді. Проблемалық мәселелердің бірі малдардың өрісте қолды болуы.&nbsp; Сондықтан, мал ұрлығының алдын-алу үшін пада ұйымдастырып, малдарды сырғалап, арнайы бақташымен немесе ұйымдасқан әдіспен бағуды және жайылымда жүрген малды қадағалауды жолға қою қажет деп санаймыз. Аумақ әкімдіктеріне ұсыныстар келтірілді”, – дейді Қызылорда облысының ПД &nbsp;бастығының бірінші орынбасары полиция полковнигі _Шамшидин__ Амитов.
</blockquote>

Қызылорда облысында жыл басынан бері  1203 ұрлық тіркелген

<a href="https://kyzylorda-news.kz/">Kyzylorda-news.kz</a>. Қазақстандықтарға зейнетақы жинағын мерзімінен бұрын алған кезде, 10% табыс салығын зейнетке шыққаннан кейін бөліп төлеуге рұқсат етіледі. Сенат Салық кодексіне тиісті түзетулерді қабылдап, құжатты мәжіліске қайтарды, деп хабарлайды&nbsp;<a href="https://sputnik.kz/">Sputnik Қазақстан</a>.
Қолданыстағы заңға сәйкес, зейнетақы жинағының бір бөлігін шешіп алған азамат 10% жеке табыс салығын төлеуі тиіс. Сенат депутаттары бұл қазақстандықтарға салмақ салады деп санайды.
<blockquote>
 “Соңғы уақытта қоғамда зейнетақы жинағын мерзімінен бұрын алу және оған салық салу мәселесі қызу талқыланып жүр. Мәселені оңтайлы шешу үшін сенат депутаттары жеке табыс салығын төлеу мерзімін кейінге шегеруді ұсынады. Яғни, салықты зейнетке шыққан соң, 16 жыл ішінде бөліп төлеуге болады”, – деді сенатор Ольга Булавкина.
</blockquote>
Ұлттық экономика министрі Руслан Дәленов үкімет сенаттың бұл бастамасын толығымен қолдағанын атап өтті.
“Депутаттар зейнетақыны алған кезде салықты бірден ұстап қалмауды ұсынды. Яғни, қазақстандықтар зейнетақы жинағының бір бөлігін алған уақытта жеке табыс салығын төлемейді. Оны төлеу кейінге, болашаққа қалдырылды”, – деді Дәленов.
Сенат депутаттары Салық кодексіне енгізілген тиісті түзетулерді қабылдап, мәжіліске жіберді. Мәжіліс мақұлдаған жағдайда, құжат президентке жолданады.
<h3 id="">Зейнетақы жинағын кім ала алады?</h3>
Қазақстан президенті 1 қыркүйекте халыққа жолдауы кезінде зейнетақы жинағын тұрғын үй сатып алу, емделу, қаржы компанияларына басқаруға беру үшін пайдалануға берілетінін хабарлады.
Соған сәйкес, 2021 жылдан бастап зейнетақы жинағының бір бөлігін алуға болады. Алайда қаражат адамның жеке шотына аударылмайды және қолма-қол берілмейді.
Еңбек және халықты әлеуметтік қорғау министрлігінің мәліметінше, келесі жылдан бастап зейнетақы жинағының бір бөлігін жұмсау мүмкіндігіне 721 мың азамат ие болады. Олар:
<ul>
<li>зейнетақы жинағы бар, қордағы ақшасы “жеткіліктілік шегінен” асатын еңбекке жарамды жастағы азаматтар – 529,7 мың адам;</li>
<li>Бірыңғай жинақтаушы зейнетақы қорында жинағы бар зейнеткерлер – 178,4 мың адам;</li>
<li>зейнетақы аннуитетін рәсімдеген және шотында жинағы қалған қазақстандықтар – 13,3 мың адам.</li>
</ul>
Сонымен қатар әртүрлі жастағы азаматтар зейнетақы жинағынан ақша алуы үшін жасына қарай шотта болуы керек соманың жеткіліктілік шегі бар.
Мысалы, 20 жастағы азаматтың шотында ең кемі 1 миллион 720 мың теңге болуы керек. Ал 30 жастағы азамат үшін жеткіліктілік шегі – 2 миллион 518 мың теңге.

Зейнетақы жинағын алу: 10%-тік салыққа қатысты өзгеріс енгізілді

<a href="https://kyzylorda-news.kz/">Kyzylorda-news.kz</a>.&nbsp;Еліміздің барлық өңірінде COVID-19 вирусын жұқтырғандар саны күрт артқаны байқалып отыр. Бұл туралы ҚР ДСМ Тауарлар мен көрсетілетін қызметтердің сапасын және қауіпсіздігін бақылау комитетінің ресми өкілі Ержан Байтанаев айтты, деп хабарлайды <a href="https://lenta.inform.kz/kz/kazakstannyn-barlyk-onirinde-koronavirus-orship-barady_a3717929">ҚазАқпарат.</a>
<blockquote>
 «Қазақстанда осы жылдың 12 қарашасындағы жағдай бойынша 118 491 науқас тіркелді. Оның ішінде бүгінгі күні 108 632 науқас сауығып шықты. Бүгінгі күні 7 941 науқас емделіп жатыр. Өкінішке қарай 1 899 отандасымыздан айырып қалдық. Сонымен қатар соңғы тәулікте 587 адамның коронавирусқа шалдыққаны белгілі болды», – деді ол Орталық коммуникациялар қызметіндегі баспасөз мәслихатында.
</blockquote>
Оның дерегінше, осы жылдың 1 тамызынан бастап COVID-19 пневманиясына 39 545 адам шалдықты. Оның ішінде 23 351 адам емделіп, сауығып шықты. Ал 9 782 науқас ем қабылдауда. 412 адам қайтыс болды. Соңғы тәулікте 188 адамнан пневмония анықталды.
<blockquote>
 «Сонымен қатар соңғы 2 аптада еліміздің барлық өңірінде COVID-пен сырқаттанудың күрт өсуі байқалып отыр. Сырқаттанушылық барлық өңірде орын алуда. Өткен аптамен салыстырғанда ауру 1,7 есеге өсті. Ауру жұқтырудың 45 пайызы Шығыс Қазақстан облысында тіркелді. Қостанай облысында 4 есеге өссе, Батыс Қазақстан облысында 3,2 есеге артты. Ал Павлодар өңірінде 2,7 есеге айтарлықтай өсім байқалуда. Бүгінгі күні аталған өңірлердің әкімдіктері күшейтілген шараларды қабылдауда», – деді Ержан Байтанаев.
</blockquote>

Қазақстанның барлық өңірінде коронавирус өршіп барады

<a href="https://kyzylorda-news.kz/">Kyzylorda-news.kz</a>. Қызылордада «Nur Otan» қалалық филиалының кезектен тыс ХХVI конференциясы өтті. Конференция жұмысына бастауыш ұйымдарынан ұсынылған 90 делегат қатысты.
Алқалы жиында қалалық мәслихатқа партиялық тізім бекітіліп, облыстық мәслихат пен ҚР Парламенті Мәжілісіне партиялық тізіміге пікірсайсықа қатысушы кандидаттар анықталды. Сондай-ақ, облыстық партия филиалының кезектен тыс өтетін ХХVIІ конференциясына қатысушы делегаттар сайланды.
Сонымен, ең жоғары рейтингісі бар праймеризге қатысушылар қатарынан Қызылорда қалалық мәслихатына 34 кандидаттан тұратын партиялық тізім түзілді. құрамына қоғам қайраткерлері, азаматтық сектор, БАҚ өкілдері кірді.
Сапалық, сандық құрамына келсек тізімдегі әйелдердің үлесі 2,5 есеге артып, 15,7 пайыздан 38,2%-ға дейін, ал 35 жасқа дейінгі жастар 2 есе – 10,5 тен 20,5%-ға дейін өсті.
Үміткерлердің орташа жасы 6 жасқа – 53 жастан 47 жасқа дейін жасарды. Қызметтегі 19 депутаттың 6-ы ғана жаңа партиялық тізімге енді.
Тізімде білім саласы өкілдерінің үлесі басым – 26,5%, ШОБ өкілдері -17,6% және т.б.
Конференция барысында облыстық мәслихат пен мәжіліске партиялық тізімге үміткерлер арасында пікірсайыс өтті. Бірінші раундта қатысушылар өздерінің сайлауалды бағдарламаларының негізгі тезистерін таныстырды, екінші раундта “сұрақ-жауап” түрінде пікірталас сессиясы өтті.
17 үміткердің ішінен партия мүшелері «Праймериз» ақпараттық жүйесі арқылы қалалық квотаға сәйкес 10 кандидатты таңдады. 
Сондай-ақ, конференция барысында қалалық партия филиалының Сайлауалды бағдарламалары бекітілді.
Филиал төрағасы, қала әкім Нұрлыбек Нәлібаев атап өткендей, партияның қалалық сайлауалды бағдарламасы праймериз аясында тұрғындардан түскен ұсыныстардың 82 пайызы ескеріліп және қаланы дамытудың негізгі 7 бағыты бойынша әзірленген.
Еске сала кетейік, бұған дейін «Nur Otan» партиясы өңірлік филиалдардың конференция кестесін жариялаған болатын, оның барысында барлық деңгейдегі мәслихаттарға партиялық тізімдер және әр өңірден Мәжіліске арналған партиялық тізімге кандидаттар анықталатын болады.
Партияішілік іріктеудің бірінші кезеңіне 109 кандидат қатысты. Оның 30.2%-ы – әйелдер, 23.8%-ы – 35 жасқа дейінгі жастар. Бастауыш партия ұйымдарынан кандидаттардың 35.7%-ы ұсынылса, 64,3%-ы – өзін-өзі ұсынушылар.
<img src="https://kyzylorda-news.kz/wp-content/uploads/2020/11/124849585_1038569409888902_6357758723744128510_o.jpg" alt="" />
<img src="https://kyzylorda-news.kz/wp-content/uploads/2020/11/125217345_1038569379888905_5732658387719740560_o.jpg" alt="" />

Қызылорда қалалық мәслихатына партия атынан ұсынылатын үміткерлердің тізімі бекітілді

<a href="https://kyzylorda-news.kz/">Kyzylorda-news.kz</a>. Қызылорда гарнизонындағы әскери бөлімде сыбайлас жемқорлыққа&nbsp; қарсы іс-қимыл жөніндегі заңдылықтарды бақылау жөніндегі комиссияның төрағасы, подполковник Ербол Әбдірайымның басшылығымен кезекті жиын өтті.
Жиынның негізгі мақсаты, гарнизонда елімізді қорғау саласына өз үлестерін қосып жүрген әскерилер арасында сыбайлас жемқорлықтың алдын-алу, заң бұзушылықтарға жол бермеу.
<blockquote>
 «Қазіргі уақытта жүргізіліп жатқан жұмыстар заң бұзушылықтардың алдын алып, сыбайластық әрекеттерге жол берілмеуі тиіс. Сыбайлас жемқорлық тәуекелін азайту және азаматтардың Қарулы Күштерге сенімін көтеру мақсатындағы «Қарулы Күштері – Адалдық Алаңы» жобасы аясында жүргізіліп жатқан тиімді іс-әрекеттерге де көп көңіл бөлінуде», – деді Қызылорда гарнизонына қызмет көрсету жөніндегі әскери полиция бөлімшесінің бастығы, әділет майоры Нұрмұхаммед Сейдуалиев.
</blockquote>
Шара барысында өңірдегі мекеме және әскери бөлім басшылары баяндамаларын оқыды. Жазғы, күзгі мерзімді әскери қызметке шақыру кезіндегі сыбайластық әрекеттерге жол бермеу мақсатында атқарылып жатқан жұмыстарға жеке тоқталып, атқарылып жатқан жұмыстардың қатаң бақылауда екені ескертілді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Жиын соңында осы дертті жою мақсатында жұмыстар атқарылуы керек екендігі баса айтылып, бөлім және мекеме басшыларына ауқымды тапсырмалар берілді.
<img src="https://kyzylorda-news.kz/wp-content/uploads/2020/11/20201105_005036.jpg" alt="" />
<img src="https://kyzylorda-news.kz/wp-content/uploads/2020/11/20201105_005528.jpg" alt="" />

Қызылорда гарнизоны сыбайлас жемқорлыққа қарсы

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықованың қатысуымен орталық алаңда аймақтағы бірқатар медициналық мекемелерге санитарлық жедел жәрдем көліктерін табыстау рәсімі өтті.
Атап айтсақ, 40 дана жедел жәрдем реанимобильдері кілті облыстық медициналық жедел жәрдем стансасына, Арал, Қазалы, Қармақшы, Сырдария, Шиелі, Жаңақорған аудандары мен Төретам жедел жәрдем бөлімдеріне табысталды. Қармақшы және Жалағаш аудандарына 2 дана жылжымалы медициналық кешен кілті берілсе, «Аралтұз» акционерлік қоғамы демеушілігімен Арал ауданаралық ауруханасына 2 реанимобиль автокөлігінің кілті табысталды. Салтанантты шараға медицина саласының ардагері Тұрғанбай Маханов пен Қызылорда қаласы және аудандардан келген мамандар қатысты.
<blockquote>
 «Әлемді жайлаған короновирус пандемиясы кезінде Қызылорда облысының медициналық жедел жәрдем стансасы жұмысты сауатты және ұтымды ұйымдастыруының нәтижесінде барлық республикалық индикаторлардың орындалуын қамтамасыз етті. Халық денсаулығы – еліміздің белсенді дамуына, экономикасына, әсіресе, әлеуметтік жағдайына ықпал ететіні сөзсіз. Сондықтан, қазақстандықтардың денсаулығын жақсарту – еліміздің мемлекеттік саясатының басым бағыттарының бірі. Осы ретте, алдағы 5 жыл ішінде білім, ғылым, денсаулық сақтау салаларына жұмсалатын қаражатты ішкі жалпы өнімнің 10 пайызына жеткізу жоспарланған. Бұл өз кезегінде халықтыңөмір сүру сапасын жақсартуға әкеледі», – деді облыс әкімі Гүлшара Әбдіқалықова.
</blockquote>
Бүгінде Қызылорда облысы халқына 2423 дәрігер, 9528 орта буын мамандары медициналық қызмет көрсетеді. 
2016 жылдан бастап өңірге қажетті медицина мамандықтары бойынша 91 резидентке облыс әкімінің гранты тағайындалды. 
Одан бөлек, 2018 жылдан бастап Марат Оспанов атындағы Батыс Қазақстан медицина университетімен жасалған Меморандум аясында облыс әкімінің арнайы гранты бөлініп, қазіргі таңда 100 жалпы тәжірибелік дәрігер жергілікті бюджет қаражаты есебінен даярлануда. Олар бастапқы медициналық-санитарлық көмек көрсету ұйымдарын аймақтық дәрігерлермен толық қамтуға мүмкіндік береді деп жоспарлануда.
Қазіргі таңда жедел жәрдем қызметін орталықтандырудың арқасында облыс орталығы мен аудандарда жедел жәрдем қызметі бір деңгейде көрсетіліп отыр. 
Сапалы көрсеткіштерге тоқтала кетсек, 2020 жылы шақырыстарға кешігу көрсеткіші 2,5 %-дан 1,9%-ға азайса, жедел жәрдем тобының көз алдындағы өлім көрсеткіші 3,2%-дан 1,6%-ға азайып, нәтижелі реанимация 47,2%-дан 56,3 %-ға көтерілді.
Шара соңында сала ардагері Тұрғанбай Маханов мемлекет тарапынан медицина саласына көрсетілген қолдауға алғысын жеткізіп, алдағы жұмыстарға сәттілік тіледі.
<img src="https://kyzylorda-news.kz/wp-content/uploads/2020/11/125165470_2890934314342952_1664292344972766872_o.jpg" alt="" />
<img src="https://kyzylorda-news.kz/wp-content/uploads/2020/11/125051049_2890934007676316_3090957364786814422_o.jpg" alt="" />
<img src="https://kyzylorda-news.kz/wp-content/uploads/2020/11/124953014_2890934497676267_6291444190811827615_o.jpg" alt="" />
<img src="https://kyzylorda-news.kz/wp-content/uploads/2020/11/125185502_2890934501009600_5741087033851475907_o.jpg" alt="" />

Аймақ басшысы медициналық мекемелерге жаңа санитарлық жедел жәрдем көліктерін табыстады

&nbsp;<a href="https://kyzylorda-news.kz/">Kyzylorda-news.kz</a>. Сенатор Мұрат Бақтиярұлы Байқоңыр қаласының талап-өтініштері бойынша Үкімет басшысы Асқар Маминнің атына депутаттық сауал жолдады, деп хабарлайды <a href="https://lenta.inform.kz/kz/senator-baykonyrdagy-kazakstandyktar-talapka-say-bilim-ala-almay-otyr_a3717819">ҚазАқпарат</a>.
<blockquote>
 «Байқоңыр қаласында қазір 77 мыңнан аса халық тұратын болса, оның 70%-ы қазақстандықтар болып саналады. Байқоңыр халқының ең басты мәселесі – қазақстандық стандартпен білім беретін балабақшалар мен мектептердің тапшылығы болып отыр. 2015 жылы ҚР мен РФ үкіметаралық комиссиясының шешімімен Ресейге қарасты 5 мектеп пен 1 балабақша Қазақстанның қарамағына алынып, балаларға қазақстандық стандартпен қазақ тілінде білім алуға мүмкіндік жасалды. Осы жлы мемлекеттік-жекеменшік әріптестік бойынша қосымша 2 балабақша ашылып, қызмет көрсетуде. Қазақ тілінде тәлім беретін балабақшалардың бүгінгі жағдайы алаңдатып отыр. Бұл балабақшаларда ана тілінде білім беру және толыққанды мектепалды даярлықты өткізуде кемшіліктер бар», – деді Мұрат Бақтиярұлы.
</blockquote>
Депутаттың айтуынша, ата-аналары өз балаларының қазақ мектептерінде білім алуы үшін толыққанды мектепалды даярлықтан өтулері қанағаттандырмай келеді. Сенатор өз сауалында бірнеше деректерді алға тартты. Мысалы, қазақ тілінде білім беретін Байқоңыр қаласындағы 5 мектепте бүгінгі күні 5 236, ал ресейлік 7 мектепте 4049 бала білім алады. Оның 1 508-і, яғни 37%-ы Қазақстан азаматтарының балалары. Байқоңырда қазір Ресей Федерациясына қарасты 7 мектеп бар. Депутат олардың сыйымдылығы толық қамтылмаған дейді. Мұрат Бақтиярұлының айтуынша, қала тұрғындарымен кездесу барысында орыс тілінде оқытатын қазақстандық мектепке сұраныстың жоғары екенін ескере отырып, осы 7 мектептің бірін мемлекет меншігіне өткізуді сұрап отыр екен.⠀
<blockquote>
 «Бұл жағдай, ресейлік мектепте оқитын балалардың мектеп бітіргеннен соң ҰБТ-ға қатысуына және қазақстандық жоғары оқу орындарына түсуіне көп кедергі келтіруде. Себебі емтиханның міндетті пәндері – Қазақстан тарихы, қазақ тілі, қазақ әдебиеті ол мектептерде оқытылмайды», – деді сенатор.
</blockquote>
Одан бөлек, Байқоңырдың орталық аудандарында Ресей Федерациясының меншігіндегі, сыйымдылығы толық пайдаланылмай тұрған 13 балабақша бар. Депутат халықтың бірнеше балабақшаны мемлекеттік юрисдикцияға өткізу талабы орынды деп санайды.
<blockquote>
 «Олар Қазақстан аумағында туып-өскенімен, өз жерінде тұрып, менің Отаным – Россия, менің астанам – Москва деп, Россияның арғы-бергі тарихын, тілі мен әдебиетін оқып, әрине ресейлік патриотизм рухында тәрбиеленеді. Айта өтуіміз керек, біз жерімізді жалға бергенімізбен, сол жерде тұрып жатқан халқымызды жалға берген жоқпыз ғой», – деді Мұрат Бақтиярұлы.
</blockquote>
Сенатор Үкімет басшысынан Байқоңыр қаласы тұрғындарының білім беру саласына қатысты осы түйткілді мәселесін басты назарға алып, оң шешілуіне ықпал етуін сұрады.

Мұрат Бақтиярұлы: Байқоңырдағы қазақстандықтар талапқа сай білім ала алмай отыр

<a href="https://kyzylorda-news.kz/">Kyzylorda-news.kz</a>. Аудандағы эпид ахуал күрделенген жағдайда «Ақтерек» жазғы лагерінде – 50, Мәдениет ауылдық ауруханасына – 100, барлығы 150 қосымша инфекциялық орын жасақталады деп жоспарлануда.
Қазіргі таңда Жалағаш аудандық ауруханасында барлығы 93 дәрігер, 442 орта буынды медицина қызметкерлері және 169 кіші буын қызметкерлері жұмыс атқаруда. Короновирус пандемиясына қарсы күреске&nbsp;аудан бойынша барлығы 182 медициналық қызметкер жұмылдырылған, оның ішінде – 24 дәрігер, 138 орта буынды қызметкерлер және 20 кіші аяжан қызмет атқарды. Осы аталған қызметкерлерге барлығы наурыз және қыркүйек айлары аралығында 76 132 100 теңге үстемақы төленді.
Ауданда эпид ахуал күрделеніп, екінші толқын басталған жағдайда короновирус пандемиясына қарсы күреске аудан бойынша 25 дәрігер, 140 орта буын қызметкері, 20 кіші аяжан жұмылдырады деп жоспарлануда.
Аурухана бойынша жасанды өкпені желдету (ӨЖЖ) ИВЛ аппараты 10 дана. Қазіргі таңда осы аппараттың 3 данасы инфекция бөлімшесінде, 1 данасы перзентхана бөлімшесінде, 6 данасы орталық аурухананың реанимация бөлімшесіне орналастырылған. 2 дана рентген аппараты, 2 дана флюрограф аппараты бар. Бұдан басқа, ауруханада 44 дана оттегі концентраторы, 40 дана оттегі балондарымен, 144 дана пульсоксиметр, 54 дана бесконтактный термометр және арнайы құрал – жабдықтармен толығымен жабдықталған.

Жалағаш ауданы коронавирустың екінші толқынына дайын ба?

<a href="https://kyzylorda-news.kz/">Kyzylorda-news.kz</a>. Үкімет жүргізушілерге ыңғайлы болу үшін көлік салығын төлеу мерзімін осы жылдың 31 желтоқсанынан келесі жылдың 1 сәуіріне ауыстыруды ұсынды, деп хабарлайды <a href="https://sputnik.kz/society/20201112/15456126/kolik-salygyn-toleu-merzimi.html">Sputnik Қазақстан.</a>
Сенатта “Салық және бюджетке төленетін басқа да міндетті төлемдер туралы” Кодекске өзгерістер мен толықтырулар енгізу туралы заң жобасы бірінші оқылымда қаралды.&nbsp;
Заң жобасы көлік салығын төлеу мерзімін ауыстыруды көздейді.
<blockquote>
 “Салық төлеушілерге қолайлы болу мақсатында көлік салығын төлеу мерзімін осы жылдың 31 желтоқсанынан келесі жылдың 1 сәуіріне ауыстыру ұсынылады”, – деді ұлттық экономика министрі Руслан Дәленов.
</blockquote>
Сондай-ақ, жеке тұлғалардың мүлкі мен жерге салынатын салықтарды бір салыққа біріктіру қарастырылып отыр.&nbsp; Яғни, екі салық бірыңғай төлеммен төленеді. Бұл түбіртектерді толтыру және банк комиссияларын төлеу бойынша шығындарды қысқартуға мүмкіндік береді.
Бұдан бөлек, көппәтерлі тұрғын үйлердің меншік иелері үшін жер салығы алынып тасталады.
Жалпы заң жобасы салық салу базасын кеңейтуді, инвестиция тартуды ынталандыруды, бизнес ортаны дамытуды, салықтық әкімшілендіруді жақсартуды көздейді.

Қазақстанда көлік салығын төлеу мерзімі ауысуы мүмкін

<a href="https://kyzylorda-news.kz/">Kyzylorda-news.kz</a>. Жақында ғана мәресіне жеткен «Туған жер» патриоттық шығармашылық республикалық фестивалінің жеңімпазы атанған байқоңырлық Таңат Молдабеков туралы шағын фильм түсірілді.
Естеріңізге сала кетейік, Ұлттық Дельфий Комитеті, «Азаматтық бастамаларды қолдау орталығы» КЕАҚ Қазақстан Республикасы Ақпарат және қоғамдық даму министрлігінің қолдауымен «Туған жер» патриоттық шығармашылық республикалық фестивалін өткізген болатын.
Патриоттық фестивальге Қазақстанның түкпір-түкпіріндегі 14 пен 29 жас аралығындағы жас авторлар бақ сынады. Соның ішінде, Қызылорда облысы Байқоңыр қаласынан қатысқан өнерпаз бәйгеде оза шауып, ерекше өнерімен көзге түсті. Атап айтар болсақ, «Орындаушылық шығармашылық» аталымында бақ сынаған Таңат Қанатұлы Молдабеков жеңімпаз атанды. Қазіргі таңда Қазанғап атындағы Қызылорда жоғарғы музыкалық колледжінің 2-курс студенті болып табылатын домбырашы жігіт туралы фестивальдің ұйымдастырушылары шағын фильм түсірді.
Таңат домбырамен жаным егіз деп санайды. Қасиетті күй өнерін жанына серік еткен жас өнерпаз.
<blockquote>
 «Нағыз қазақ – домбыра» деген ұстаныммен өмір сүремін. Домбыраны алғаш рет осыдан 7 жыл бұрын 12 жасымда қолға алдым. Туған жеріме, еліме деген сүйіспеншілігімді домбыра арқылы паш еткім келеді» – дейді Таңат.
 “Шәкіртім Таңат Молдабеков түрлі байқауларға қатысып, өзінің нағыз домбырашы екенін көрсетіп келе жатыр. Алар асулары әлі алда” ,- деп ағынан жарылды ұстазы Әлімжан Әбсадықов:
</blockquote>
Киелі топырақта өскен Таңат Молдабековтың өнері туралы фильмді Ұлттық Дельфий Комитетінің facebook және <a href="https://www.youtube.com/watch?v=r5kL1euCWio&t=63s&fbclid=IwAR13DY0yGPBofx9ssHGD0FgPOQo1PCkp2HCVzfol3u1IL6d-B-33IZCbnmY">Youtube</a> желілерінің әлеуметтік парақшаларынан тамашалай аласыздар.
Жобаға тоқталатын болсақ, оған қазақстандық авторлар, сондай-ақ, патриоттық тақырыпқа авторлық туындыларды орындайтын шығармашылық ұжымдар «Орындаушылық шығармашылық» (вокал, аспапта ойнау, хореография) және «Көркем шығармашылық» (бейнелеу өнері, бейнеконтент, фотосурет) аталымдары бойынша қатысты.
<blockquote>
 “Әлемдегі эпиджағдайға байланысты фестиваль пішіні өзгергенімен, жоба нәтижесіне көңіліміз толды. Қазіргі таңда 10 жас автордың шығармашылығын насихаттау бойынша жұмыс аяқталуға жақын. Жеңімпаз жас авторлар туралы шағын фильмдеріміз жақында көрермендерге жол тартады”, –деді жоба авторы, Ұлттық Дельфий Комитетінің директоры Құралай Түспекова.
</blockquote>
Бірінші айналымның жұмыстары желі қолданушылары өздеріне ұнаған қатысуға дауыс бере алатын жобаның әлеуметтік желілерінде жарияланды. Осылайша, халықтық дауыс беру нәтижесі арқылы 80 финалист айқындалды.
Байқаудың ақтық сынында қазылар алқасының мүшелері 1,2,3 орын лауреаттарын анықталды, жеңімпаздарға Қазақстанды еліміздің Ұлттық Дельфий құрамасы құрамында Қазақстанның атынан қатысу құқығы беріледі.

Қазақстан және Қызылорда облысының жаңалықтары