<a href="https://kyzylorda-news.kz/">Kyzylorda-news.kz</a> ақпараттық агенттігінің 30 шілдеге арналған жұлдыз-жорамалы.
Тоқты
Бүгін ешкімге қарыз бермеңіз. Егер берер болсаңыз, оны қайтару қиын болады. Әрі отбасылық бюджетіңіз азайып, өзіңіз қиыналып қалуыңыз мүмкін. Сондай-ақ сауда жасаған кезде де қаражатыңызға сақ болыңыз.
Торпақ
Егер ойыңызды жүзеге асырсаңыз немесе көптен бергі арманыңыз орындалса өзіңізді жайлы сезінесіз. Егер сіздің басыңыз бос болса, онда бүгін екінші жартыңызды табасыз. 
Егіздер
Бақыттың дәмін татқыңыз келсе, жолға шығыңыз. «Қайда?» және «неге?» деген сауалдарға жауап іздеп әуре болмаңыз. Бастысы басыңызға уақытша баспана тапсаңыз болғаны. 
Шаян
Достарыңызбен көп кездесуге тырысыңыз. Себебі олар сізге жақсы жаңалықтар жеткізіп, пайдалы кеңестерімен бөлісетін болады. Тіпті сізді мазалап жүрген мәселелердің де шешілуіне септігін тигізеді. 
Арыстан
Бүгінгі күніңізді отбасыңызға арнайсыз. Ересек балаларыңыздың «аяққа тұруына» көмектесесіз. Жалпы, көмек сұраған жандардың меселін қайтармай, олар үшін жаныңыз ауыруы да мүмкін. 
Бикеш
Жаздың соңғы күндерін жақсы, есте қаларлықтай етіп өткізуді құп көресіз. Сондықтан бүгін алыс жолға сапарға шығасыз. Өзіңіздің біліміңізді жетілдіріп, таным көкжиегін кеңейтетін боласыз. 
Таразы
Бүгін жақындарыңызбен тіл табысып, көңіл-күйіңіз көтеріңкі болмақ. Отбасындағы барлық мәселені өзіңіз шешіп, шаруаны тиянақты етіп бітіресіз. Белсенділігіңіздің арқасында бүгін біраз жетістікке жетесіз. 
Сарышаян
Қай істі қолға алсаңызда барлығы сәтті аяқталатын болады. Бірақ отбасында аздаған қиындықтар орын алады. Ол жөндеу жұмыстарына қатысты болуы да мүмкін. Еш мұңаймаңыз, сіздің қолыңыздан барлығы келеді. 
Мерген
Бүгін барлық сізге ғана жүктелген секілді. Мойныңызға артылған шаруа көп. Бірақ еш асықпаңыз. Барлығы өз сәтімен жүзеге асатын болады. Тек сабырлылық таныта біліңіз. 
Тауешкі
Бүгін қосымша табыс табуға мүмкіндік бар. Сонымен қатар жұмыста да абыройыңыз артып, қызметіңіз өседі. Бірақ айналаңыздағы адамдар сіз туралы қауесет таратуы мүмкін. 
Суқұйғыш
Қаржылық жағдай және жұмысқа қатысты сұрақтар сізді жиі мазалайды. Бүгін еңбегіңіз еленіп, соның арқасында өз-өзіңізге деген сенімділігіңіз артады. Сонымен қатар жарыңызбен қарым-қатынасыңыз жақсара түседі. 
Балықтар
Бүгін сіз романтиксіз. Екінші жартыңызға сыйлық алып, оны қуантуға асығасыз. Жұлдыздар екеуіңіздің ара-қатынасыңызға ешкімді араластырмауды ескертеді. Барлығы өз араларыңызда қалуы қажет.

Жұлдыздар не дейді?

<a href="https://kyzylorda-news.kz/">Kyzylorda-news.kz</a>. Қызылорда қаласында үш жастағы сәби электр тогына түсіп, қайтыс болды, деп хабарлайды <a href="https://www.inform.kz/kz/kyzylordada-ush-zhastagy-sabi-tokka-tusip-kaytys-boldy_a3677958">ҚазАқпарат.</a>
Оқиға бүгін, 29 шілдеде жергілікті уақытпен 12.10-да облыс орталығындағы әл-Фараби көшесі бойында орналасқан жеке үйде тіркелді. 2017 жылы дүниеге келген бала ата-анасының бақылауынсыз қалған. «Сәби токқа жалғанған электр сымының жанында ойнаған. Электр тогына түсіп қалған ол оқиға орнында қайтыс болды. Облыс көлемінде мұндай жағдай биыл екінші мәрте тіркеліп отыр. Бұдан бұрын да үш жастағы ер бала тоққа түсіп, көз жұмған еді», – деп мәлім етті Қызылорда облыстық төтенше жағдайлар департаменті өрт сөндіру және авариялық-құтқару жұмыстары қызметінің өкілдері.

Қызылордада үш жастағы сәби тоққа түсіп, қайтыс болды

<a href="https://kyzylorda-news.kz/">Kyzylorda-news.kz.</a> Карантин ауылдағы кәсіпке жол ашып тұр. Жалағаш ауданы Бұқарбай батыр ауылында үш жігіт бірігіп, шлакоблок құятын цех ашты. Ауыл азаматтары бүгінде 10 мың дана шлакоблок өткізіп үлгерген. 
<blockquote>
 “Еділ, Самұрат есімді екі құрдасыммен бірлесіп аштық. Жұмыс өнімділігіне лайықталып, қолдан жасалған аппарат сатып алдық. Ұзын саны 1 млн 200 мың теңгенің шамасында қаражат жұмсалды. Ауылда бұрынғы жем шығаратын зауыт ғимаратын жалға алып отырмыз. Жоғары кернеулі электр желісіне қосылғанбыз. Қазір қызыл және көк түсті шлакоблок құйюдамыз. Бағасы – 180-185 теңге. Жеткізіп беруге де мүмкіндіктер қарас­тырылған”, – дейді Қуаныш ­Қожахметов.
</blockquote>
Құрылыста ғимаратты тез әрі тиімді тұрғызу үшін жасалған мұндай өнімдерге қазір сұраныс жоғары. Карантин уақытында ел ішінде кәсіп ашып, жұмыс бастап кетуге жағдай жасалған дейді олар.

Жалағашта шлакоблок құятын цех ашылды

<a href="https://kyzylorda-news.kz/">Kyzylorda-news.kz.</a> Қызылордада «Құрбан айт» мерекесі күндері жаппай іс-шараларға тыйым салынды. Құрбандық шалу онлайн режимде өтеді. Мұндай шаралар коронавирустық инфекцияның таралуын болдырмау үшін қабылданды. Тыйым салу туралы жаңа Қаулыны облыстың Бас мемлекеттік санитариялық дәрігері Өңірлік коммуникациялар қызметінің ақпарат алаңында өткен брифингте мәлімдеді.
«Облыс тұрғындары арасында коронавирустық инфекцияның алдын алу мақсатында № 19 Қаулы қабылданып, бүгіннен бастап күшіне енді. Атап айтқанда:
<ol>
<li>Көпшілік, мерекелік және отбасылық іс-шараларын, оның ішінде үй ішінде адамдар көп жиналатын іс-шараларды өткізуге;</li>
<li>Орталық мешітімен белгіленген онлайн режимінде құрбандық шалуды жүзеге асыратындарды қоспағанда, мал сою цехтары мен мал сату базары қызметіне; 
3.Мал союды ұйымдастыруға және өткізуге, автокөліктерде және жеке үй иеліктерінде мал сатуға;</li>
<li>Мал сою орындарын анықтау және құрбан шалу рәсімдерін онлайн форматта жүзеге асыруын ұйымдастыруды;</li>
<li>Мал сою цехтарына бөгде адамдарды жібермеуді; 
6.Мал союға тартылған адамдарды жеке қорғану құралдарымен қамтамасыз ете отырып, мұқтаж адамдарға тез бұзылатын өнімдерді (құрбан болған малдың еті) тасымалдау және сақтау жөніндегі ветеринариялық-санитарлық ережелер талаптарының сақталуын қамтамасыз етуді»,-деді облыстың Бас мемлекетттік санитариялық дәрігері Әлия Мүтәліпқызы.</li>
</ol>
<blockquote>
 «Биыл «Құрбан айт» мерекесі эпидемиологиялық ахуалға байланысты өзгеше өтілетін болады. Яғни мешітттерде Айт намазы оқылмайды, әр адам үйінде күн шыққаннан кейін бір сағаттан соң құрбан шалуына болады. Халық денсаулығы бірінші орында. Сол себепті «Құрбан айт» мерекесінде карантин талаптарын орындап, оқшауланайық»,-деді облыстың бас имамы Болатбек Абуов.
</blockquote>

Қызылордада «Құрбан айт» мерекесіне шектеулер қойылды

**<a href="https://kyzylorda-news.kz/">Kyzylorda-news.kz.</a> 30 шілдеде Қызылорда облысының кей аумақтарында таңертең және күндіз солтүстік-шығыстан жел соғады, деп хабарлайды Қазгидромет. 
**
Желдің күші кей жерлерде 15-20 м/с, шаңды дауыл күтіледі. Күндіз өте жоғары өрт қаупі сақталады. 
Дабылды ескертудің ықтималдылығы 95-100%.

Қызылордада ауа райына байланысты ескерту жасалды

<a href="https://kyzylorda-news.kz/">Kyzylorda-news.kz.</a> 22 шілде – 30 тамыз аралығында онлайн режимде Дүниежүзілік шахмат онлайн-олимпиадасы өтеді.
Тұңғыш рет онлайн түрде ұйымдастырылатын байрақты бəсекеде 163 елдің шахматшылары бақ сынасады.
Қазақстан атынан 20 жасқа дейінгі спортшылар арасында жерлестеріміз, шахматтан 3 дүркін Əлем, 7 дүркін Азия, 17 дүркін Қазақстан чемпионы Əсел Серікбай мен 2 дүркін Əлем, 5 дүркін Азия, 14 дүркін Қазақстан чемпионы Назерке Нұрғали сынға түседі. Екеуі де халықаралық ФИДЕ шеберлері.
Қазіргі таңда шахматшы қыздар жарысқа тыңғылықты дайындалу үстінде. Олар аптасына төрт күн 6 сағаттан, сəрсенбі, сенбі, жексенбі күндері Chess.com, Lichess.org, Chess24.com сайттарындағы онлайн жарыстарға қатысып, шыңдалуда.
<img src="https://kyzylorda-news.kz/wp-content/uploads/2020/07/fb_img_1596020451620-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596020453566.jpg" alt="" />

Қызылордалық шахматшылар  дүниежүзілік онлайн олимпиадаға қатысады

<a href="https://kyzylorda-news.kz/">Kyzylorda-news.kz.</a> Індетке байланысты халық санағы келесі жылға шегерілуі ықтимал, деп хабарлады <a href="https://24.kz/kz/zha-aly-tar/o-am/item/412637-khaly-sana-y-kelesi-zhyl-a-shegerilui-m-mkin">“Хабар 24”</a>.
<blockquote>
 «Қазақстанда халық санағын 2020 жылдың 1 қазанынан бастап жүргізу жоспарланған еді. Алайда халық санағын жүргізетін қызметкерлер халықпен жақын қарым-қатынаста еңбек ететіндіктен, коронавирус инфекциясы қаупінің алдын алу мақсатында Ұлттық экономика министрлігі Үкіметке санақты келесі жылға шегеруді ұсынды. Мұндағы негізгі себеп – халықтың мен халық санағын жүргізетін персоналдың амандығы. Біз тиісті шешімді күтіп отырмыз», – деді ұлттық экономика министрі Руслан Дәленов ОКҚ-да өткен баспасөз мәслихатында.
</blockquote>

Халық санағы келесі жылға шегерілуі мүмкін

<a href="https://kyzylorda-news.kz/">Kyzylorda-news.kz.</a> Қызылорда облысынан Отан алдындағы міндетін орындауға 700 азамат аттанды. Олар әскери борышын ҚР Ұлттық қауіпсізді комитеті Шекара қызметінде, ҚР Мемлекеттік күзет қызметінде, ҚР Ұлттық ұлан қызметінде, ҚР Қарулы күштері қатарында өтейтін болады. Бұл туралы Өңірлік коммуникациялар қызметінің ақпарат алаңында өткен брифингте Қызылорда облысы бойынша қорғаныс істері жөніндегі департамент бастығының орынбасары Қанат Омаров мәлімдеді.
<blockquote>
 «Азаматтарды жөнелту жұмыстары барлық санитарлық нормаларды сақтай отырып жүргізіледі. Аудандық, қалалық шақыру пункттерінде және облыстық жиын пунктінде санитарлық посттар қойылды. Санитарлық пост арнайы медициналық маманмен қамтамасыз етілген. Шақыру пунктеріне келген әрбір әскерге шақырылушыларды санитарлық нормаға сәйкес тексеріп, аудандық қалалық және облыстық медициналық комиссиядан өтуге жіберіледі», – деді Қанат Жаңабайұлы.
</blockquote>
Бұған дейін әскерге шақырудың көктемгі кезеңінде 800-ден аса қызылордалық аттанған болатын. Әскери бөлімдерге елімізді қорғауға қабілетті, денсаулығы мықты, дене бітімі шыныққан, сауаты жеткілікті, моральдік-іскерлік қабілеті жоғары азаматтар жөнелтіледі.
<img src="https://kyzylorda-news.kz/wp-content/uploads/2020/07/fb_img_1596009063340-2.jpg" alt="" />

Қызылордадан әскерге 700 азамат аттанды

<a href="https://kyzylorda-news.kz/">Kyzylorda-news.kz.</a> Бүгінгі таңда Жалағаш ауданында індеттің алдын алу, таратпау мақсатында жұмыстар жүргізілуде. 
Күшейтілген санитариялық-дезинфекциялық талаптардың сақталуын қадағалау мақсатында аудан әкімдігі жанынан құрылған 3 мобильді топ күндіз және түнгі мезгілде рейд жұмыстарын тұрақты жүргізуде.
Рейд барысында кәсіпкерлік нысандар оның ішінде дүкендер, дәмханалар және өзге де қоғамдық тамақтану орындары, көлік жуу орталықтары, таксисттер тұрағының күшейтілген санитариялық-дезинфекциялық режимді сақтауы, жұмыс уақыттары тексеріліп, саудагерлер мен тұрғындарға қоғамдық орындарда коронавирус инфекциясын жұқтырмау үшін қауіпсіздік шараларын қатаң сақтауға кеңес беруде.
Тексеріс жұмыстарының нәтижесінде қойылған талаптарға бағынбаған кәсіпкерлерге заңдылыққа сәйкес шара көрілуде.
Сонымен қатар бүгін аудан жастары халық көп шоғырланатын бірнеше орындарға індеттің алдын алу, сақтық шараларын барынша сақтау бағытындағы 15 дана плакат ілді.
Айта кету керек, бүгінгі күнге дейін 200-ге жуық кәсіпкерлік нысанға мобильді топтар тарапынан тексеру және түсіндірме жұмыстары жүргізілді. 3 дүкен иелеріне карантиндік тәртіпті бұзғаны үшін Әкімшілік құқық бұзушылық туралы Кодекстің 425 бабына сәйкес айыппұл салынды.
Барша аудан тұрғындарын енгізілген шектеулерді қатаң сақтауға шақырамыз.
<img src="https://kyzylorda-news.kz/wp-content/uploads/2020/07/fb_img_1596012601988-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012604988.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012607374-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012609734-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012612666-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012615008-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012617316.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012619786-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012625533-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012628449-1.jpg" alt="" />

Жалағашта мобильді топ рейд жұмыстарын тұрақты жүргізуде

<a href="https://kyzylorda-news.kz/">Kyzylorda-news.kz.</a> Қызылорда облысына 170 дәрігер қажет. Бұл туралы облыс әкімі Гүлшара Әбдіқалықова өңірдегі пандемиямен күрес және экономикалық ахуал жөнінде өткен брифингте журналистердің сауалына жауап беру кезінде мәлімдеді.
<blockquote>
 “Өңірде қалыптасқан эпидахуал кезінде денсаулық сақтау саласында қажетті мамандардың жетіспеушілігі анық байқалды. Нақты қандай салалар бойынша мамандар тапшы? Осы бойынша зерттеу жасалды ма және шешілу жолдары қандай?”, – деді облыс әкімі “Қызылорда” телеарнасының тілшісі Әкімжан Жолтаев.
 “Әрине, бұл өте өзекті мәселелердің бірі. Бұл бойынша жауапты сала мамандарымен бірлесіп толық зерттеу жасалды. Денсаулық сақтау басқармасының мәліметіне сәйкес биылғы жылы 170 дәрігерге сұраныс бар. Олардың ішінде: 46 аймақтық дәрігер, 26 анестезиолог-реаниматолог, 8 неонатолог, 8 психиатр, 5 фтизиатр, 5 онколог, 4 балалар хирургі, 5 офтальмолог, 3 инфекционист, 3 балалар невропатологы, 3 оториноларинголог, 3 реабилитолог, 3 дерматовенеролог, 3 патанатом, 4 травматолог, 3 нефролог, 2 пульмонолог, 2 кардиолог, 2 акушер-гинеколог, 2 хирург, 2 дәрігер-лаборант, 2 терапевт, 1 уролог, 1 эндоскопист дәрігер қажет.
 Бұл сұранысты реттеу үшін, бүгінгі күнге 18 жас маман медицина ұйымдарына, олардың 7-еуі елді мекендерге жолданды. Олар – 4 жалпы тәжірибелік дәрігер, 3 терапевт, 3 акушер-гинеколог, 2 хирург, 4 педиатр, 1 нейрохирург, 1 ЛОР дәрігер.
 Бұдан бөлек, провизорлық стационарларға 5 интерн, 1 резидент (жоғары оқу орынын толық аяқтамаған) уақытша жұмысқа қабылданды. Сонымен қатар, Денсаулық сақтау министрлігінің мемлекеттік тапсырысы негізінде медициналық университет түлектерін бөлу хаттамасы бойынша (по протоколу распределения выпускников медицинских ВУЗ-ов) алдағы уақытта облысымызға қосымша 123 жас маман келеді деп күтілуде. Сондай-ақ, облыс әкімінің гранты негізінде медицина мамандығы бойынша білім алып жатқан резиденттерден 15 жас дәрігерлер өңірімізге келіп қызмет атқаратын болады. Осы сәтті пайдалана отырып, дәрігер мамандарды аймағымызға келіп медицина саласының дамуына үлес қосуға шақырамыз, – деді облыс әкімі Г. Әбдіқалықова.
</blockquote>

Қызылорда облысына 170 дәрігер қажет

<a href="https://kyzylorda-news.kz/">Kyzylorda-news.kz.</a> Қызылорда облысындағы 243 мектеп жаңа оқу жылын қашықтан оқыту форматында бастайды. Бұл туралы облыс әкімі Гүлшара Әбдіқалықова өңірдегі пандемиямен күрес және экономикалық ахуал жөнінде өткен брифингте журналистердің сауалына жауап беру кезінде мәлімдеді.
Брифингте аймақ басшысына қойылған сауалдардың бірі жаңа оқу жылына қатысты болды.
<blockquote>
 “Жаңа оқу жылы таяп қалды. Осы ретте қашықтықтан оқыту мәселесіне дайындығымыз қалай және мектепке 1 сынып оқушыларын қалай қабылдайды?”, – деген сауал жолдады облыстық “Ақмешіт жастары” газетінің тілшісі Ерхан Ақын.
 “Алдағы 1 қыркүйекте оқу жылы облыстағы 243 мектепте қашықтан оқыту форматында басталады. Қалған шалғай орналасқан және шағын жинақты 50 мектепте дәстүрлі оқытады деп жоспарлануда. Сонымен бірге, бастауыш сыныптардың оқушыларының ата-анасының өтініші бойынша тиісті мүмкіндіктерге қарай отырып, қатаң санитарлық шараларды сақтаумен кезекші сыныптар ашылады деп күтілуде. Бүгінгі күнге білім беру ұйымдарын жаңа оқу жылына дайындау жұмыстары жүйелі түрде жүргізілуде. Қашықтан оқыту форматы бойынша оқушылар мен педагогтардың электронды құрылғыларымен (компьютер, ноутбук, планшет, смартфон) және интернет, мобильді интернет байланысымен қамтамасыз етілуіне мониторинг жүргізілді. Облыстағы 18 мың мұғалімге 18-22 тамыз аралығында арнайы оқыту курсы онлайн форматта ұйымдастырылады. Компьютері жоқ 300 мұғалімге кәсіподақ есебінен техникалық құралдар беріледі”, деді – облыс әкімі.
</blockquote>
Сондай-ақ, Гүлшара Әбдіқалықова балаларды 1-сыныпқа қабылдауда медициналық анықтамалар уақытша талап етілмейтінін жеткізді. Қазіргі таңда ата-аналар мектепке балалардың құжаттарын 2 түрлі жолмен өткізе алады. Қағаз жүзінде мектепке тапсырылады. Ал, онлайн «egov» порталы арқылы іске асады.
Айта кету қажет, 1-сыныпқа құжат қабылдау 1-тамызға дейін іске асырылады. Қазіргі күні 16207 баланың құжаты қабылданған. Білім басқармасының ақпараттық анализі бойынша биыл 1-сыныпқа 19 мыңға жуық оқушы мектеп табалдырығын аттайды.
<img src="https://kyzylorda-news.kz/wp-content/uploads/2020/07/116344395_2597178650385188_8369051536997539870_o.jpg" alt="" />

Қызылорда облысындағы 243 мектеп жаңа оқу жылын қашықтан оқыту форматында бастайды

<a href="https://kyzylorda-news.kz/">Kyzylorda-news.kz.</a> Қызылорда облысының Тауарлар мен көрсетілетін қызметтердің сапасы мен қауіпсіздігін бақылау департаменті мен басқа да мемлекеттік органдар қызметкерлері және үкіметтік емес ұйымдар өкілдерінен құрылған мониторингтік топ ағымдағы жылдың 08 шілдесінен бастап бүгінгі күнге дейін қаладағы 9 емхана, 122 дәріхана мен «СҚ-Фармация» ЖШС-нің дәріханалық қоймасына мониторинг жүргізді. 
Қалалық емханаларда пневмония, жоғары және төменгі тыныс алу жолдарының жіті респираторлық аурулары бойынша тегін медициналық көмектің кепілдік берілген көлемі аясында және міндетті әлеуметтік медициналық сақтандыру жүйесі шеңберінде берілетін дәрілік заттардың қоры мен олардың пациенттерге берілу жағдайымен танысты. 
Барлық дәріханада жоғарыда аталған нозологиялар бойынша балаларға берілетін дәрі-дәрмектер қоры жеткілікті екені анықталды. Алайда ересектерге берілетін дәрілік заттар кей емханаларда тапшы болғанымен, «СҚ-Фармация» арқылы қосымша тапсырыстар жасалып, дәрілік заттарды жеткізу жоспарланған. Емханаға келе алмайтын, үй жағдайында емделіп жатқан пациенттерге тегін дәрі-дәрмектерді жеткізіп беру үшін емханалар жанынан арнайы мобильдік бригадалар ұйымдастырылған. Бүгінгі күні емханалар мен ауруханаларда тегін берілетін дәрі-дәрмектердің бір айлық қорын қалыптастыру бойынша жұмыстар жүргізілуде. 
Бүгінгі таңда Қызылорда облысы бойынша 328 дәріхана, дәріхана пункттері фармацевтикалық қызметпен айналысады. Оның 178-і Қызылорда қаласында орналасқан. Мониторинг барысында дәріханалардағы ыстықты төмендететін, вирусқа қарсы, антибактериалды дәрілік заттардың сатылымдағы қоры мен шекті бөлшек саудадағы бағаларының сақталуына назар аударылды. 
Жұмысшы топтың алғашқы күндеріндегі мәлімет бойынша дәріханалардың жоғарыда аталған дәрілермен қамтамасыз етілуі 83,6% құраса, мониторинг жүргізудің 17-күнінде бұл көрсеткіш 97,7%-ке дейін көтерілді. Яғни сұраныстағы препараттармен қамтамасыз ету жағдайы жақсарды. Бастапқыда болмаған ыстықты түсіретін, вирусқа және микробқа қарсы препараттар күн сайын барлық дәріханаға түсе бастады. 
Бұдан бөлек, «Чингиз» ЖШС-нің дәріханалық желісіне бір реттік әкелу тәртібі бойынша көп мөлшерде сұранысқа ие дәрілер (парацетамол, амброксол, эуфиллин, дексаметазон, гепарин, левофлоксацин, офлоксацин, метронидазол) жеткізілді. 
Дәрі тапшылығы қатты сезілген маусым-шілде айларында халық сұранысын қанағаттандыру, дәріханалардағы кезектерді азайту мақсатында Қызылорда қаласында – 5, Арал ауданында – 1, Қармақшы ауданында – 1, Қазалы ауданында – 1, Жаңақорған ауданында – 1 дәріхана жаңадан іске қосылды. 
Мониторинг басталған кезеңмен салыстырғанда қазіргі таңда дәрі-дәрмекке қатысты дүрлікпе басылған, дәріханалар алдындағы ұзын-сонар кезектер жойылды. 
Мониторинг жүргізу барысында бірқатар заңбұзушылықтар да орын алды. Атап айтқанда, қаладағы 3 дәріхана дәрілік затты бекітілген шекті бағасынан асырып сатқан. Атап айтқанда 2827,9 теңге тұратын «Хилак форте» дәрілік заты 300 теңгеге сатса, 2142,82 теңге тұратын «Линекс» №16 дәрісі 2310 теңгеден сатылған. Сол сияқты 4143,7 теңге тұратын «Линекс» №32 дәрісі 4595 теңгеден сатылған. Шағын кәсіпкерлік субъектілеріне осы заңбұзушылықтары үшін ӘҚБтК 426-бабының 1-бөлігі 541 710 теңгеге айыппұл салынды. 
Бұдан бөлек, Қызылорда облысының Тауарлар мен көрсетілетін қызметтердің сапасы мен қауіпсіздігін бақылау департаменті құқық қорғау органдарынан келіп түскен материалдар бойынша 40 әкімшілік іс қозғалып, 6 материал әкімшілік сотқа жолданды. Оның ішінде фармацевтикалық қызметке рұқсат құжатынсыз дәрілік затты сату, Қазақстан Республикасында тіркелмеген және медициналық мақсатта қолдануға рұқсат етілмеген дәрілік затты сату дерегі бойынша жеке тұлғаларға қатысты 14 іс қозғалып, 118 065 теңге айыппұл салынды. Сонымен қатар дәрілік затты шекті бағадан асырып сату фактісі бойынша 27 шағын кәсіпкерлік субъектісі кінәлі деп танылды. Аталған деректер бойынша Қызылорда облысының тауарлар мен көрсетілетін қызметтердің сапасы мен қауіпсіздігін бақылау департаментімен 4 041 990 теңге көлемінде айыппұл салынды Заңбұзушылықтардың басым бөлігі – 16 іс Қызылорда қаласында орын алды, одан кейін Аралда-6, Қазалы мен Жаңақорғанда 5-ден, Шиеліде-4, Байқоңыр, Сырдария, Жалағаш мен Қармақшыдан 1-ден орын алды.

Қазақстан және Қызылорда облысының жаңалықтары