<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қазақстанда оқушылардың мектепке бірқатар затты алып келуге тыйым салынған. Бұл туралы ҚР ІІМ әкімшілік полиция комитетінің төрағасы Мұрат Баймұқашев айтып берді, деп хабарлайды&nbsp;<a href="https://stan.kz/">Stan.kz</a>.
Оның атап өтуінше, мектепке алып келуге тыйым салынған заттардың тізіліміне қару-жарақ, пышақ, рогатка, кастеттер және соған ұқсас заттар кіреді.
<blockquote>
 «Сонымен қатар жарылғыш құрылғы имитаторын, аэрозольды бояуды, пиротехникалық заттарды және газ баллондарын алып келуге тыйым салынады», – деді Мұрат Баймұқашев.
</blockquote>

Қазақстандық оқушыларға мектепке қандай заттарды әкелуге тыйым салынады

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;17 мамыр – пульмонологтар күні. Аталған сала мамандарының кәсіби мерекесі 1997 жылдан бері әлемнің көптеген елдерінде аталып келеді. Өздерінің кәсіби меркесіне орай, Денсаулық сақтауды дамыту республикалық орталығының маманы, пульмонолог Айжан Ерназарова коронавирустың алдын-алу бойынша бұқараға қажетті кеңестермен бөлісті, деп хабарлайды <a href="https://lenta.inform.kz/kz/keybir-simptomdar-baykalsa-birden-birneshe-dari-ishu-ziyan-pul-monolog-kenesi_a3788886">ҚазАқпарат</a>.
<blockquote>
 «Коронавирус инфекциясы таралған алғашқы айларда дәрі-дәрмекті дұрыс тағайындамау жағдайлары көп тіркелді. Бұл инфекция тек бір КТ (компьютерлік томография) нәтижесіне қарап қойылатын диагноз емес. Мәселен КТ арқылы өкпеде өзгерістердің бары анықталып, бірақ симптомдары аса мазаламаса немесе тек дене қызуы болса, бұл антибиотикті үйіп-төгіп қабылдау керек дегенді білдірмейді. Бізде адам сәл ентіксе болды, онсыз да қиналып жатқан организмді 3-4 дәрімен одан сайын әлсіретіп жібереміз. Сондықтан шешім компьютерлік томография және қан талдамаларының ортақ нәтижесінен кейін қабылдануы тиіс. Естеріңізде болсын, кез келген препарат бауырдың және өзге де ішкі ағзанының қалыпты жұмысын бұзады», – деп атап өтті Айжан Ерназарова.
</blockquote>
Пульмонологтың айтуынша, бүгінде пульмонологияда өкпе мен бронх ауруларын ерте кезеңдерде анықтауға мүмкіндік беретін әртүрлі диагностикалық әдістер қолданылады. Сондықтан ауруды асқындырмай, дер кезінде дәрігер көмегіне жүгіну қажет.
«Бүкіл ағзаны оттегімен қамтамасыз ететін өкпенің жұмысы өте маңызды. Өкпеде нерв ұштары жоқ. Сондықтан бұл орган соңына дейін сыр бермейді. Сондай-ақ басқа мүшелерге қарағанда өкпеге трансплантация жасау өте қиын. Өйткені, оны ағза көтере алмауы мүмкін.
Сондықтан сақтық шараларын үнемі қаперде ұстаған абзал. Тыныс алу жолдарын сақтау үшін арнайы жаттығуларды жасаған пайдалы. Коронавирус бізге салауатты өмір салтын ұстанудың қаншалықты маңызды екендігін ұқтырды деп ойлаймын», – деді пульмонолог-маман.
Бұдан бөлек Айжан Ерназарова таза ауада серуендеу, зиянды әдеттерден аулақ болу, көбірек қимылдау, дұрыс тамақтану сияқты қарапайым қағидаларды ұстану маңызды екенін атап өтті. Оның пікірінше, жалқаулықтан арылып, осы ережелерді ескерсек, өкпе ауруларының алдын-алуға болады.

Кейбір симптомдар байқалса, бірден бірнеше дәрі ішу зиян – пульмонолог кеңесі

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Маусымда жалпы ұзындығы 5,8 мың шақырым тасжолдағы 18 учаске ақылы жүйеге ауысады, деп хабарлайды&nbsp;ҚазАвтоЖол ҰК баспасөз қызметі.&nbsp;
Инфрақұрылымды дамытудың “Нұрлы жол 2020-2025” мемлекеттік бағдарламасының аясында елімізде 11 мың шақырым автожол ақылы жүйеге ауысады. Оның ішінде жалпы ұзындығы 5,8 мың шақырым болатын 18 учаске биыл маусымнан бастап пайдалануға беріледі.
Бұл: Шымкент-Өзбекстан шекарасы, Орал-Ресей Федерациясының шекарасы (Саратов), Орал-Ресей шекарасы (Самара), Ресей шекарасы (Орынбор)-Ақтөбе, Щучинск-Петропавл, Шымкент-Қызылорда, Шымкент-Тараз, Тараз-Қайнар, Қапшағай-Талдықорған, Қарабұтақ-Қызылорда, Ақтөбе-Орал, Атырау- Бейнеу- Өзбекстан шекарасы, Ақтау-Бейнеу, Қостанай-Ресей шекарасы (Троицк), Нұр-Сұлтан-Қостанай, Павлодар- Ресей шекарасы (Омбы), Нұр-Сұлтан-Павлодар, Павлодар-Семей-Қалбатау учаскелері.
Әр учаске бойынша қандай автокөліктерден төлемақы алынатыны тасжолдың техникалық санатына тікелей байланысты екені хабарланды.
<blockquote>
 “Мәселен,&nbsp;І-техникалық санаттағы тасжолдарда барлық автокөлік, ал ІІ және ІІІ-техникалық санаттағы тасжолдарда тек жүк көліктері төлем жасайды. Осы сәтте, алғашқы ақылы учаске енгізілген кезден бастап бүгінгі күнге дейін ақылы жолдардың тарифтеріне өзгеріс енгізілмегенін, бағаның өспегенін атап өту қажет. Ал жаңа ақылы учаскелер бойынша төлем мөлшерлемесін ҚР Индустрия және инфрақұрылымдық даму министрлігі қарастырып жатыр. Сондай-ақ, тестік пайдалану барысында автокөліктерден уақытша төлем алынбайды”, – делінген хабарламада.
</blockquote>
Мемлекеттік бағдарламаны жүзеге асыру жоспарының негізінде, Қазақстан Республикасының Индустрия және инфрақұрылымдық даму министрлігі мен “QazAvtoJol” ҰК” АҚ бірлесіп төлем алудың “ашық жүйесін” енгізу туралы шешім қабылдады.
Жүйенің ерекшелігі –&nbsp;учаскелерде шлагбаумдар болмайды. Автокөліктердің жүріп өткен жолы туралы ақпарат аркаларда орналасқан арнайы камералар арқылы тіркеледі.
Төлем автокөліктің мемлекеттік тіркеу нөмірі бойынша жасалады. Сондай-ақ, төлемақы мен автокөлік туралы толық ақпарат алуға мүмкіндік беретін арнайы белгілерді (RFID-белгі) жапсыру да көзделген.
<blockquote>
 “Жаңа ақылы учаскелер жүргізушілер мен жолаушылардың сапары жайлы болуы мен қауіпсіздігін қамтамасыз етеді. Жол-көлік апаты азайып, жол инфрақұрылымы, жол бойындағы сервис нысандары, тәулік бойы ұсынылатын сервис белсенді дамиды”, – делінген хабарламада.
</blockquote>
Ақылы жүйе енгізілместен бұрын автожолдар қайта жаңартылатынын ескеру қажет. ҚазАвтоЖол мәліметінше, қайта жаңартуға дейінгі және жаңа жолдардағы жол-көлік апатының көрсеткіштеріне сүйенетін болсақ, ақылы жолдарды пайдалануға бергеннен кейін жол-көлік апаттарының саны азаятыны дәлелденген. Мысалы, қайта жаңарту жұмыстары жүргізілгеннен кейін “Ақтөбе-Орал-Ресей шекарасы” автожолындағы көлік апаты 25 пайызға, “Нұр-Сұлтан-Павлодар” автожолында 46 пайызға, “Қызылорда-Шымкент-Тараз” автожолында 43 пайызға, ал “Павлодар-Семей-Қалбатау” учаскесінде 62 пайызға төмендеген.

Маусымда «Шымкент-Қызылорда» тасжолы ақылы жүйеге ауысады

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;Бүгін Қармақшы&nbsp;аудандық пробация есебіндегі азаматтар аудандық ауруханаға барып, өз еріктерімен коронавирустық инфекцияға қарсы вакцина салдырды.
Вакцина алуға келген есептегі азаматтарға дәрігерлер вакцинаның маңыздылығы мен вакцинаны егу әдістері және вакцинадан кейінгі күтім мен сақтық шаралары туралы түсіндірме жұмыстарын жүргізді.
<blockquote>
 «Өзімнің, отбасымның амандығы үшін вакцина салдырдым. Бұл дертті таратпаудың жолы -вакцина&nbsp; алу болса, оны алу керек деп есептеймін. Хал-жағдайым жақсы. Енді екінші вакцинаны 21 күннен кейін салдыртамын»,- деді есептегі азамат.
 «Пробация есебіндегі азаматтар да өз еріктерімен жаппай вакцина салдыртып жатыр. Індетті жеңудің жалғыз жолы – вакцина. Бұл адамдардың арасында&nbsp; коронавирус инфекциясының әрі қарай таралып кетпеуіне септігін тигізеді. Мен де «Спутник V» вакцинасын алдым. Өйткені біз халықпен жұмыс жасайтын болғандықтан алуға тиіспіз», – деді аудандық пробация қызметінің бастығы әділет подполковнигі Е.Әбілдаев.
</blockquote>
<img src="https://kyzylorda-news.kz/wp-content/uploads/2021/05/img-20210512-wa0005.jpg" alt="" />

Қармақшыда пробация есебіндегі азаматтар вакцина алды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> ҚР Тәуелсіздігінің 30 жылдығына арналған облыс музейлері экспозициялары бойынша «Үш он жылдық белес» атты экскурсиялар шеруі өтеді. Бұл туралы бүгін Өңірлік коммуникациялар қызметінің алаңында облыстық мәдениет, архивтер және құжаттама басқармасы басшысының міндетін атқарушыа Нұршат Наурызбаева мәлімдеді.
Жалпы облыста 14 музей бар. Облыс музейлерінің қоры палеолит дәуірінен бастап қазірге дейінгі өлкенің тарихынан, экономикасы мен мәдениетінен, әдебиеті мен өнерінен, флорасы мен фаунасынан сыр шертетін тарихи құндылықтармен толығып, жәдігер саны 146 923 асады.
<blockquote>
 «Облыс музейлерінде 2306 экскурсия, 229 лекция, 161 көрме, 10 шеберлік сағаты, 18 тарихи-танымдық видеолар ұйымдастырылды. Сондай-ақ, фейсбук, инстаграм әлеуметтік желілерінің парақшасына, музейдің жеке сайтына жарияланып, халық назарына ұсынылуда. Есептік мерзім ішінде облыс музейлері бойынша барлығы – 120 шара ұйымдастырылып, музейге келушілер саны 66536 адамды құрады. «Музеолог» бағдарламасына 770 экспонат, облыстық музейде 200 экспонат ендірілді», – деді облыстық тарихи-өлкетану музейінің директоры Сапар Көзейбаев.
</blockquote>
Қазіргі таңда Жаңақорған аудандық тарихи-өлкетану музейіне жер телімі беріліп, жаңа ғимарат салу жоспарлануда. Сондай-ақ, Шиелі аудандық тарихи-өлкетану музейінің құрылысы жаңадан салынып, экспозициясын жасақтау басталды.
<blockquote>
 «Облыста Халықаралық музейлер күніне орай ауқымды шаралар ұйымдастырылу жоспарлануда. Атап айтсақ, «Менің музейім» атты ашық есік күні жарияланды. ҚР Тәуелсіздігінің 30 жылдығына арналған облыс музейлері экспозициялары бойынша «Үш он жылдық белес» атты экскурсиялар шеруі өтеді. «Тәуелсіздіктің 30 жылдығына – 30 экспона» атты ашық аспан астындағы музейге сый акциясы және «Мәдениет қайраткері, Қазақстан суретшілер одағының мүшесі Аманкелді Кененбаевтың қатысуымен «Өзіңді суретші сезін» атты перформансы ұйымдастырылады», – деді облыстық мәдениет, архивтер және құжаттама басқармасы басшысының міндетін атқарушыа Нұршат Наурызбаева.
</blockquote>

Қызылордада «Үш он жылдық белес» атты экскурсиялар шеруі өтеді

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қызылордада «Қауіпсіз жол» жедел-профилактикалық іс-шарасы басталады.
17 мамыр – 16 маусым аралығында облыс көлемінде «Қауіпсіз жол» жедел-профилактикалық іс-шарасы өткізіледі.
Аталған шара барысында Қызылорда облысы Полиция департаментінің Жергілікті полиция қызметі басқармасымен қоғамдық тәртіпті сақтау мен жол қозғалысы қауіпсіздігін қамтамасыз ету, жол көлік оқиғаларының алдын алу, жол қозғалысы ережелерін өрескел бұзушылықтың, әсіресе заңсыз жолаушы тасымалымен айналысатын автобус және такси көлік құралдары анықталатын болады.

Қызылордада «Қауіпсіз жол» іс-шарасы басталады

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;Ислам Каримов атындағы ғылыми-ағарту мемориалды кешені төрағасының орынбасары, академик Тұрсынәлі Қузиев&nbsp;<a href="https://m.facebook.com/story.php?story_fbid=3954433651343624&id=100003310836016">Facebook</a>&nbsp;парақшасында Өзмемфилармониясы әйелдер ансамблінің майдандағы суретін жариялады. Суретте қазақтың біртуар әншісі, КСРО халық әртісі Роза Бағланова бірінші қатарда отыр.
<img src="https://kyzylorda-news.kz/wp-content/uploads/2021/05/roza.jpg" alt="" />
2011-2013 жылдары Өзбекстан Республикасының Мәдениет министрі болған, бүгінгі күні ғылыми-ағарту кешені директорының орынбасары Тұрсынәлі Қузиевтің сөзіне қарағанда, суреттің артқы жағында «Солтүстік-Батыс фронт, Валдай-Торжок ауданы, 1942 қазан» деген жазу бар. Сондай-ақ, онда суреттегілердің есімдері жазылған.
«Өзмемфилармониясы әйелдер ансамблі алғы шепте әуе байланысы командирі, полковник Токарев Борис Кузьмич, әуе байланысы комиссары, Совет Одағының батыры Таряникпен бірге» деген жазу бүкіл мән-жайды ұғындырып тұрғандай.
«1-қатар, солдан оңға қарай:
-Роза Бағланова;
-Раима Хакимова;
-Муқаддас Изамова;
-Хадиша Хакімова;
Ғани Ағзамов.
2-қатар:
-Габриэльян Сурен Никитович;
-Қиммат Борухова;
-Разия Каримова;
-Токарев Борис Кузьмич;
-Римма Ерматова;
-Таряник;
-Исахар Акилов;
-Мурабий Қасымов.
3-қатар;
-Кино-оператор Фролов;
-Рукия Аюшева;
-Фахриддин Садықов;
-Гауһар Рахымова.
-2 ұшқыш;
-Хабиб Рахманов;
-Бабараим Мырзаев;
-Миновар Сафиевич Бурнаш;
-солдат;
-Барат Байматов.
Суреттегі Григорий Аверьянович Таряник (1913-1979) гвардия полковнигі, Солтүстік-Батыс фронттың 260-жақыннан бомбалаушы әуе полкі комиссары, 4-гвардиялық бомбалаушы авиациялық Борисов дивизиясын басқарған», деп жазады Тұрсынәлі Қузиев.
Роза Бағланова (1922-2011) – соғыстан соң Өзбекстаннан елге оралған. Қазақстанның (1955) және бұрынғы КСРО халық әртісі (1967), Халық қаһарманы (1996). Туысқан халық өкілі жариялаған бұл сурет Роза Бағланова өмірін зерттеушілер үшін құнды жәдігер болмақ.
<a href="https://lenta.inform.kz/kz/roza-baglanovanyn-1942-zhyly-ozmemfilarmoniyasymen-maydanda-tusken-sureti-zhariyalandy_a3788826">ҚазАқпарат</a>

Роза Бағланованың 1942 жылы майданда түскен суреті жарияланды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;Қызылорда қаласында көпқабатты тұрғын үйлердің бірінің ауласында жасөспірімдердің арасында жанжал туындап, топтық төбелеске ұласып, онда бір жасөспірім пышақ жарақатын алды.
Патрульдік полиция батальонының қызметкерлері төбелестің жолын кесіп, оқиға орнынан қалалық ПБ-на 14 жасөспірімді жеткізді. Төбелес салдарынан бір жасөспірім пышақ жарақатын алып, медициналық мекемеге жеткізілді. Жасөспірімнің өміріне ешқандай қауіп төніп тұрған жоқ.
Күдікті ретінде кәмелетке толмаған жасөспірім анықталып, күзетпен ұстау жөніндегі бұлтартпау шарасы таңдалды. Қалған жасөспірімдердің іс-әрекетіне құқықтық баға берілетін болады. Оқиғаның мән-жайы анықталуда.
Аталған дерек бойынша ҚР ҚК-нің 293-бабының 3-бөлігі 2-тармағымен (Бұзақылық, суық қаруды не денсаулыққа зиян келтiру үшiн арнайы лайықталған басқа да заттарды қолданып жасалған іс-әрекеттер) сотқа дейінгі тергеп-тексеру амалдары жүргізілуде. Топтық төбелеске қатысқан жасөспірімдердің ата-аналарына қатысты ҚР ӘҚБтК 127-бабы 3-бөлігіне (Ата-ананың немесе заңды өкілдерінің балаларын тәрбиелеуде міндеттерін орындамауы кәмелетке толмаған адамның қылмыстық не әкімшілік құқықбұзушылық белгілері бар қасақана іс-әрекет жасауына алып келген іс-әрекеті) сәйкес әкімшілік шара көру мәселесі қарастырылуда.

Қызылордада төбелестен жасөспірім пышақ жарақатын алды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қызылорда облысында оқушылардың тәртібін бақылау және қауіпсіздігін арттыру мақсатында «Мектептерде Бұлтты бейнебақылау» пилоттық жобасы іске асырылуда. Бүгінде Қызылорда қаласындағы 14 мектепке 420 бақылау камерасы орнатылды. Оны мектеп әкімшілігі және ішкі істер департаменті бақылай алады.
<blockquote>
 «Әлем елдері арасын жақындату, ақпарат алмасу және жан-жақты коммуникация орнату жолында теле, радио, почта қызметтері мен жедел қарқынмен дамып келе жатқан интернет желілері адам өмірінің ажырамас қажеттілігіне, үлкен көмекшісіне, еліміздің стратегиялық маңызды саласына айналған.Үздіксіз коммуникацияны қамтамасыз ету-күнделікті қиын жұмыс, озық жабдықтар мен заманауи технологияларды қолдана отырып, жаңа жобалармен үнемі жұмыс жасау оңай емес екенін біз жақсы білеміз. Сіздерді байланыс және ақпараттандыру қызметкерлері күні мерекесімен шын жүректен құттықтаймын», – деді облыстық ішкі саясат басқармасының басшысы Мира Қазыбекова.
</blockquote>
Цифрлық теңсіздікті жою мақсатында 2020 жылы «Қазақтелеком» «талшықты-оптикалық байланыс желілері технологиясы бойынша ауылдық елді мекендерді кең жолақты қолжетімділікпен қамтамасыз ету” ауқымды жобасын іске асырды. Қызылорда облысында осы жоба аясында 14 ауылдық елді мекенде 52 мемлекеттік мекеме жоғары жылдамдықты интернетке қосылды.
<blockquote>
 «Ауыл тұрғындарын жоғары жылдамдықты интернетпен қамтамасыз ету жұмыстары жүргізілуде. Қызылорда облысы Жаңақорған ауданы әкімдігімен бірлесіп, Жайылма кентінің тұрғындары үшін көп нүктелі технология бойынша трафикті сымсыз беру үшін радиомост ұйымдастырылды. Радиомост технологиясы бойынша сымсыз байланыс Арал ауданының Тоқабай ауылында және Қазалы ауданының Шәкен ауылында ұйымдастырылды. Бұл ауылдардағы ондаған үйлер жоғары жылдамдықты интернетке қосылды», – деді «Қазақтелеком» оңтүстік өңірлік телекоммуникация дирекциясы Қызылорда қаласы корпоративтік сату орталығының директоры Ержан Наурызбаев.
</blockquote>

Қызылордада 14 мектепке 420 бақылау камерасы орнатылды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қызылордада бес адам мінген көлік каналға құлап, бір адам көз жұмды. Бұл туралы Қызылорда облыстық облыстық Өрт сөндіру және авариялық құтқару жұмыстары қызметінің баспасөз қызметі.
Оқиға 17 мамырда таңғы сағат 04.50 шамасында орын алған. Бес адам мінген «Skoda» көлігі «Қызылорда-Жезқазған» трассасы бойындағы каналға құлап кеткен.
<blockquote>
 «Облыстық Төтенше жағдайлар департаментіне түскен аталған шақырту бойынша оқиға орнына жедел құтқару жасағының құтқарушылары дереу жетті. Автокөлік ішінде жүргізушіден бөлек, 4 жолаушы болғаны анықталды. Олар жедел жәрдем қызметі арқылы дәрігер қарауына жөнелтілді. Олардың денсаулығы қалыпты. Дәрігерлер тексеруінен өтті. Оқиға орнында 1961 жылы туған жолаушы көз жұмғаны белгілі болды. Құтқарушылар оның жансыз денесі мен автокөлікті сыртқа шығарып алды», – деп мәлімдеді облыстық Өрт сөндіру және авариялық құтқару жұмыстары қызметінің баспасөз қызметі.
</blockquote>

Қызылордада 5 адам мінген көлік каналға құлап, бір адам көз жұмды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Синоптиктер 18-20 мамырға арналған ауа райы болжамын жариялады.
Апта ортасында Қазақстанның басым бөлігінде тұрақсыз ауа райы күтіледі, атмосфералық фронтальді жүйелердің өтуіне байланысты кей жерлерде күн күркіреп, шығыста, солтүстікте, орталықта жаңбыр жауады.
20 мамырға жақын еліміздің оңтүстік-шығысында кей жерлерде қатты жаңбыр жауады. 19 мамырдан бастап Салехард аудандарынан суық антициклонның ығысуымен күндізгі ауа температурасы солтүстікте 12-17 жылыға дейін, орталықта 15-20, кей жерлерде 12 жылыға дейін, шығыста 10-15, кей жерлерде 7 жылыға дейін төмендейді. Республика бойынша жекелеген аудандарда желдің күшеюі, дауыл күтіледі, бұршақ жаууы мүмкін.

Алдағы екі күнде жаңбыр жауып, күн салқындайды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Президенттің баспасөз хатшысы Берік Уәли&nbsp;Мемлекет басшысының туған күнін неліктен тойламайтынын айтып берді.
<blockquote>
 «Бүгін азаннан бері бірқатар бұқаралық ақпарат құралының өкілдері хабарласып, «Мемлекет басшысы туған күнін қалай атап өтеді?» деп сұрап жатыр. Бұл жайында былтыр арнайы түсініктеме берген едік. Дегенмен тағы бір мәрте айта кетейік. 17 мамыр әдеттегідей жұмыс күні. Президент Қасым-Жомарт Тоқаев бекітілген кестеге сәйкес жұмыс істейді. Сондықтан ешқандай іс-шара ұйымдастырылмайды, тіпті Әкімшілік қызметкерлеріне де Президентті құттықтауға рұқсат етілмеді. Мемлекет басшысы үшін бүгін қалыпты жұмыс күні. Оның әулетінде балалардың да, үлкендердің де туған күнін тойлау дәстүрі қалыптаспаған», – деп жазды Берік Уәли facebook парақшасында.
</blockquote>
Айтуынша, қазірдің өзінде көрші мемлекеттердің басшылары және Үкімет, Парламент, халықаралық ұйымдардың жетекшілері жүрекжарды тілектерін жеделхаттар арқылы жолдауда, сондай-ақ телефон шалып құттықтауда. Құттықтаулар толассыз келіп жатыр.
<a href="https://24.kz/kz/zha-aly-tar/o-am/item/474197-prezident-tu-an-k-nin-alaj-atap-tedi-berik-u-li-zhauap-berdi">Хабар 24</a>

Қазақстан және Қызылорда облысының жаңалықтары